ନୂଆଦିଲ୍ଲୀ : ଭାରତୀୟ ଷ୍ଟାର ବୋଲର ଜଶପ୍ରୀତ୍ ବୁମ୍ରା ଏବେ ବେଶ ଚର୍ଚ୍ଚାରେ । ଏ ଚର୍ଚ୍ଚା କ୍ରିକେଟକୁ ନେଇ ନୁହେଁ ବରଂ ବୁମ୍ରାଙ୍କ ବିବାହ ପାଇଁ। ଘାତକ ବାଉନ୍ସର ଓ ୟର୍କରରେ ପ୍ରତିପକ୍ଷ ବ୍ୟାଟ୍ସମ୍ୟାନଙ୍କୁ ପାଭିଲିୟନର ରାସ୍ତା ଦେଖାଉଥିବା ଟିମ ଇଣ୍ଡିଆର ଏହି ଷ୍ଟାର ବୋଲର କ୍ରୀଡା ଉପସ୍ଥାପିକା ସଞ୍ଜନା ଗଣେଶନଙ୍କ ପ୍ରେମରେ କ୍ଳିନବୋଲ୍ଡ ହୋଇଛନ୍ତି।
ସୋସିଆଲ୍ ମିଡ଼ିଆରେ ହେଉଥିବା ଚର୍ଚ୍ଚା ଅନୁଯାୟୀ ମାର୍ଚ୍ଚ ୧୪-୧୫ ତାରିଖରେ ବୁମରାହ ବିବାହ କରିବେ। ସେ ଗୋଆରେ ବିବାହ କରିବେ। ତେବେ ଏ ସମ୍ପର୍କରେ ବୁମ୍ରା କିମ୍ବା ସଞ୍ଜନାଙ୍କ ତରଫରୁ କିଛି ସ୍ପଷ୍ଟ କରାଯାଇ ନାହିଁ କି ଏହି ଖବରକୁ ସେମାନେ ଖଣ୍ଡନ ମଧ୍ୟ କରିନାହାନ୍ତି। କୋଭିଡ ପ୍ରୋଟୋକଲ ଅନୁସାରେ କେବଳ ଘନିଷ୍ଠ ବନ୍ଧୁ ଏବଂ ସମ୍ପର୍କୀୟମାନେ ଏହି ବିବାହ ଉତ୍ସବରେ ସାମିଲ ହେବେ।
ସ୍ପୋର୍ଟ୍ସ ୱେବସାଇଟ ସ୍ପୋର୍ଟ୍ସ କୀଡାର ଟ୍ୱିଟ୍ ଅନୁଯାୟୀ ସଞ୍ଜନା ଓ ଯଶପ୍ରୀତ ବୁମରାହଙ୍କ ବାହାଘର ଗୋଆରେ ହେବ। ୨୮ ବର୍ଷୀୟା ସଞ୍ଜନା ଜଣେ କ୍ରିକେଟ ଆଙ୍କର ଭାବେ ପ୍ରତିଷ୍ଠା ଲାଭ କରିଛନ୍ତି। ସେ ଆଇପିଏଲରେ ସକ୍ରିୟ ରହିବା ସହିତ ଷ୍ଟାର ସ୍ପୋର୍ଟ୍ସ ସହିତ ବି କାମ କରିଛନ୍ତି। ଏହା ସହିତ ସେ ଆଇସିସି ବିଶ୍ଵକପ ୨୦୧୯ ଠାରୁ ଆରମ୍ଭ କରି ଆଇପିଏଲ ଟୁର୍ନାମେଣ୍ଟ ହୋଷ୍ଟ କରିଛନ୍ତି। କଲକାତା ନାଇଟ୍ ରାଇଡର୍ସର ଆଙ୍କର ଭାବେ ବି ସେ କାମ କରିଛନ୍ତି। ଞ୍ଜନା ଇଞ୍ଜିନିୟରିଂ କରିଛନ୍ତି। କିନ୍ତୁ ସେ ମଡେଲିଂ ଆଡକୁ ମୁହାଁଇଥିଲେ ଓ ୨୦୧୪ ମସିହାରେ ସେ ମିସ୍ ଇଣ୍ଡିଆ ଫାଇନାଲ୍ ଯାଏଁ ବି ପହଞ୍ଚିଥିଲେ। ଉଭୟଙ୍କ ବିବାହକୁ ନେଇ ଖବର ପ୍ରକାଶ ପାଇବା ପରେ ପ୍ରଶଂସକମାନେ ସେମାନଙ୍କୁ ଶୁଭେଚ୍ଛା ଜଣାଉଛନ୍ତି।
ସୂଚନାଯୋଗ୍ୟ, ପୂର୍ବରୁ ବୁମ୍ରା ଦକ୍ଷିଣ ଭାରତୀୟ ଅଭିନେତ୍ରୀ ଅନୁପମା ପରମେଶ୍ଵରନଙ୍କୁ ବିବାହ କରୁଥିବା ଖବର ସାମ୍ନାକୁ ଆସିଥିଲା। କିନ୍ତୁ ଅନୁପମାଙ୍କ ପରିବାର ଲୋକେ ସାମ୍ନାକୁ ଆସି ଏହାକୁ ଖଣ୍ଡନ କରିଥିଲେ। ଏହା ଗୁଜବ ବୋଲି ସେମାନେ କହିଥିଲେ।