ହରାରେ : ଆଜି ଭାରତ ଓ ଜିମ୍ବାୱେ ମଧ୍ୟରେ ଏଠାରେ ଚାଲିଥିବା ୫ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ର ତୃତୀୟ ମ୍ୟାଚ୍ ଖେଳାଯିବ। ଏହା ପୂର୍ବରୁ ଖେଳାଯାଇଥିବା ୨ଟି ମ୍ୟାଚ୍ ମଧ୍ୟରୁ ଉଭୟ ଦଳ ଗୋଟିଏ ଲେଖାଏଁ ମ୍ୟାଚ୍ ଜିତି ସିରିଜ୍କୁ ବରାବର ସ୍ଥିତିରେ ରଖିଛନ୍ତି। ତୃତୀୟ ମ୍ୟାଚ୍କୁ ଉଭୟ ଜଳ ବିଜୟୀ ହେବା ସହ ସିରିଜ୍ରେ ଅଗ୍ରଣୀ ହେବାକୁ ନିଶ୍ଚିତ ଚେଷ୍ଟା କରିବେ।
ପ୍ରଥମ ମ୍ୟାଚ୍ରେ ଭାରତର ଅପ୍ରତ୍ୟାଶିତ ପରାଜୟ ପରେ ଦ୍ୱିତୀୟ ମ୍ୟାଚ୍ରେ ଚମତ୍କାର ପ୍ରଦର୍ଶନ ଖେଳାଳିଙ୍କ ମନରେ ଆତ୍ମବିଶ୍ୱାସ ଫେରାଇଆଣିଛି। ଏହା ମଧ୍ୟରେ ଟି-୨୦ ବିଶ୍ୱକପ୍ ଚାମ୍ପିଅନ ଦଳର ୩ ଜଣ ସଦସ୍ୟ ଦଳ ସହ ଯୋଗ ଦେଇଛନ୍ତି। ଏମାନଙ୍କ ମଧ୍ୟରୁ ଆଦୌ ମ୍ୟାଚ୍ ଖେଳି ନ ଥିବା ଯଶସ୍ୱୀ ଜୟସ୍ୱାଲ ଓ ୱିକେଟରକ୍ଷକ ସଞ୍ଜୁ ସାମସନ ଏହି ମ୍ୟାଚ୍ରେ ନିଶ୍ଚିତ ଖେଳିବେ। ଦ୍ୱିତୀୟ ମ୍ୟାଚ୍ରେ ୪୬ ବଲ୍ରେ ଶତକ ହାସଲ କରିଥିବା ଓପନର ଅଭିଷେକ ଶର୍ମାଙ୍କ ସ୍ଥାନରେ ଜୟସ୍ୱାଲ ଇନିଂସ ଓପନ କରିପାରନ୍ତି। ସେ ଋତୁରାଜ ଗାଏକୱାଡ୍ଙ୍କ ସ୍ଥାନରେ ଖେଳିବେ ଓ ଅଭିଷେକ ନଂ-୩ ପୋଜିସନରେ ବ୍ୟାଟିଂ କରିବାକୁ ଆସିବେ।
ସେହିପରି ୱିକେଟରକ୍ଷକ ଧ୍ରୁବ ଜୁରେଲଙ୍କ ସ୍ଥାନରେ ସାମସନ, ଗତ ମ୍ୟାଚ୍ରେ ଡେବ୍ୟୁ କରି ବ୍ୟାଟିଂ ସୁଯୋଗ ପାଇ ନ ଥିବା ସାଇ ସୁଦର୍ଶନଙ୍କ ସ୍ଥାନରେ ଶିବମ ଦୁବେଙ୍କ ଖେଳିବାର ସମ୍ଭାବନା ଅଧିକ ରହିଛି। ଏହି ମ୍ୟାଚ୍ରେ ଭାରତ ସହଜ ବିଜୟ ହାସଲ କରିବ ବୋଲି ଆଶା କରାଯାଉଛି। ଅନ୍ୟପକ୍ଷରେ ପ୍ରଥମ ମ୍ୟାଚ୍ରେ ଭଲ ଖେଳିଥିବା ଜିମ୍ବାୱେ ଅଭିଷେକ ଶର୍ମାଙ୍କ ବ୍ୟାଟିଂରେ ଚିତ୍ପଟାଙ୍ଗ ମାରିଥିଲା। ଏହା ସତ୍ତ୍ବେ ଦଳ ଏହି ସିରିଜ୍କୁ ଫେରିବାର ଦକ୍ଷତା ରଖିଛି। କେବଳ ସୁଯୋଗ ଅପେକ୍ଷାରେ ଦଳ ରହିଛି।