ଆମେରିକାର ସବୁଠାରୁ ଅତ୍ୟାଧୁନିକ ଲଢ଼ୁଆ ବିମାନ F-35 ର କିଛି ଗୁରୁତ୍ୱପୂର୍ଣ୍ଣ ଯନ୍ତ୍ରାଂଶ ହଂକଂରେ ପହଞ୍ଚିବା ଘଟଣା ଏବେ ସାରା ବିଶ୍ୱରେ ଚର୍ଚ୍ଚାର ବିଷୟ ପାଲଟିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ୱାଶିଂଟନରେ ହେବାକୁ ଥିବା ବୈଠକ ପୂର୍ବରୁ ଏହି ଖବର ସାମ୍ନାକୁ ଆସିବା ପରେ ରହସ୍ୟ ଆହୁରି ଘନୀଭୂତ ହୋଇଛି।
କିପରି ହଂକଂରେ ପହଞ୍ଚିଲା ଯନ୍ତ୍ରାଂଶ?
ସୂଚନା ଅନୁଯାୟୀ, ଅଷ୍ଟ୍ରେଲିଆରୁ ଆମେରିକା ଯାଉଥିବା ବେଳେ ବାଟରେ ଏହି ଯନ୍ତ୍ରାଂଶଗୁଡ଼ିକ ହଂକଂ ଆଡ଼କୁ ଚାଲିଯାଇଥିଲା। ଏହି ଘଟଣାକୁ ନେଇ ଆମେରିକାର ପ୍ରତିରକ୍ଷା ବିଭାଗ ପେଣ୍ଟାଗନ୍ ତଦନ୍ତ ଆରମ୍ଭ କରିଛି। ଯଦିଓ ଅଷ୍ଟ୍ରେଲିଆର ପ୍ରତିରକ୍ଷା ମନ୍ତ୍ରୀ ରିଚାର୍ଡ ମାର୍ଲ୍ସ ସ୍ପଷ୍ଟ କରିଛନ୍ତି ଯେ ଏହି ଯନ୍ତ୍ରାଂଶଗୁଡ଼ିକ ଅତ୍ୟନ୍ତ ସମ୍ବେଦନଶୀଳ ନୁହେଁ, ତଥାପି ବିଶ୍ୱର ସବୁଠାରୁ ଶକ୍ତିଶାଳୀ ଲଢ଼ୁଆ ବିମାନର ଅଂଶବିଶେଷ ଚୀନ୍ ନିୟନ୍ତ୍ରଣରେ ଥିବା ଅଞ୍ଚଳରେ ପହଞ୍ଚିବା ଯୋଗାଣ ଶୃଙ୍ଖଳାର ସୁରକ୍ଷା ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।
ତଦନ୍ତ କରୁଛି ପେଣ୍ଟାଗନ୍
F-35 ଜଏଣ୍ଟ୍ ପ୍ରୋଗ୍ରାମ୍ ଅଫିସ୍ ପକ୍ଷରୁ କୁହାଯାଇଛି ଯେ ସେମାନେ ଏହି ତ୍ରୁଟି ବିଷୟରେ ଅବଗତ ଅଛନ୍ତି ଏବଂ ଆମେରିକା ପ୍ରଶାସନ ତଥା ନିର୍ମାତା କମ୍ପାନୀ ଲକ୍ହିଡ୍ ମାର୍ଟିନ୍ ସହ ମିଶି କାର୍ଯ୍ୟ କରୁଛନ୍ତି। ଉକ୍ତ ସାମଗ୍ରୀଗୁଡ଼ିକୁ କିପରି ଫେରାଇ ଅଣାଯିବ ଏବଂ ଭବିଷ୍ୟତରେ ଯେପରି ଏଭଳି ତ୍ରୁଟି ନହୁଏ, ସେ ଦିଗରେ ଦୃଷ୍ଟି ଦିଆଯାଉଛି। ବ୍ଲୁମବର୍ଗର ରିପୋର୍ଟ ଅନୁସାରେ, ଏହି ସାମଗ୍ରୀ ମଧ୍ୟରେ କକ୍ପିଟ୍ କାନୋପି ପରି କିଛି ସାଧାରଣ ଉପକରଣ ରହିଛି।
ଟ୍ରମ୍ପ-ଜିନପିଙ୍ଗ୍ ବୈଠକ ଉପରେ ପ୍ରଭାବ
ୱାଶିଂଟନରେ ଚୀନ୍ ରାଷ୍ଟ୍ରପତି ସି ଜିନପିଙ୍ଗ୍ ଙ୍କୁ ସ୍ୱାଗତ କରିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରସ୍ତୁତ ହେଉଥିବା ବେଳେ ଠିକ୍ ଏହି ସମୟରେ ଘଟଣାଟି ସାମ୍ନାକୁ ଆସିଛି। ଏହି ପ୍ରସଙ୍ଗ ଆଗାମୀ ଦ୍ୱିପାକ୍ଷିକ ଆଲୋଚନାରେ ଉଠିବ କି ନାହିଁ ତାହା ଉପରେ ସମସ୍ତଙ୍କ ନଜର ରହିଛି।