ନୟାଗଡ଼: ଭିଜିଲାନ୍ସ ଜାଲରେ ନୟାଗଡ଼ ଜିଲ୍ଲା ଖଣ୍ଡପଡ଼ା ଉପ କୋଷାଗାରର ବରିଷ୍ଠ କିରାଣୀ ସରୋଜ କୁମାର ସାହୁ । ଜଣେ ପେନସନଭୋଗୀଙ୍କଠାରୁ ପେନସନ କାଗଜପତ୍ର କରିଦେବା ପାଇଁ ୩୦୦୦ ଟଙ୍କା ଲାଞ୍ଚ ନେଉଥିବା ବେଳେ ମାଡି ବସିଲା ଭିଜିଲାନ୍ସ ବିଭାଗ ।
ସୂଚନା ଅନୁଯାୟୀ, ଅଭିଯୁକ୍ତ ବରିଷ୍ଠ କିରାଣି ଶ୍ରୀ ସାହୁ ଜଣେ ପେନସନଭୋଗୀଙ୍କ ପେନସନ୍ ବାବଦୀୟ ପ୍ରାପ୍ୟ ପ୍ରଦାନ କରାଇଦେବା ପାଇଁ ଏହି ଲାଞ୍ଚ ଦାବି କରିଥିଲେ। ଯଦି ତାଙ୍କୁ ଦାବି ମୁତାବକ ୩,୦୦୦ ଟଙ୍କା ନ ମିଳେ, ତେବେ ସେ ବିଲ୍ ପାସ୍ କରାଇଦେବେ ନାହିଁ ଏବଂ ଅଟକାଇ ଦେବେ ବୋଲି ଧମକ ଦେଇଥିଲେ। ବାରମ୍ବାର ହଇରାଣ ହେବା ପରେ ନିରାଶ ହୋଇ ପେନସନଭୋଗୀ ଜଣକ ଭିଜିଲାନ୍ସ ବିଭାଗର ଦ୍ୱାରସ୍ଥ ହୋଇଥିଲେ।
ଅଭିଯୋଗକୁ ଭିତ୍ତି କରି ଓଡ଼ିଶା ଭିଜିଲାନ୍ସ ବିଭାଗ ପୂର୍ବ ଯୋଜନା ମୁତାବକ ପେନସନଭୋଗୀଙ୍କଠାରୁ ୩,୦୦୦ ଟଙ୍କା ଲାଞ୍ଚ ନେଉଥିବା ସମୟରେ ସରୋଜ କୁମାର ସାହୁଙ୍କୁ କାବୁ କରିଥିଲା। ଅଭିଯୁକ୍ତଙ୍କ ନିକଟରୁ ସମସ୍ତ ଲାଞ୍ଚ ଟଙ୍କା ଜବତ କରାଯାଇଛି ଏବଂ ଏହି ଘଟଣାରେ ଅଧିକ ତଦନ୍ତ ଜାରି ରହିଛି।