ସମ୍ବଲପୁର: ରାତି ହେଲେ ଲୋକଙ୍କୁ ଘାରୁଛି ହାତୀ ଭୟ । ସମ୍ବଲପୁରରେ ହାତୀ ଆକ୍ରମଣରେ ଜଣେ ମହିଳା ଗୁରୁତର ହୋଇଛନ୍ତି । ଝାଙ୍କରପାଲି ଗାଁରେ ଘରେ ଶୋଇଥିବାବେଳେ ଜଣେ ମହିଳାଙ୍କୁ ଆକ୍ରମଣ କରିଛି ହାତୀ । ଆକ୍ରମଣରେ ମହିଳା ଜଣକ ଗୁରୁତର ହୋଇ ବୁର୍ଲା ମେଡିକାଲରେ ଭର୍ତ୍ତି ହୋଇଛନ୍ତି । ହାତୀ ଗାଁରେ ପଶି ଏକାଧିକ ଘରଦ୍ବାର ଭାଙ୍ଗିବା ସହ ତୁରୀପଡାରେ ବି ଅନେକ ଘର ଭାଙ୍ଗିଛି ।
ହାତୀ ଆକ୍ରମଣକୁ ନେଇ ରାତି ହେଲେ ଭୟଭୀତ ଅବସ୍ଥାରେ ରହୁଛନ୍ତି ଅଞ୍ଚଳବାସୀ । ସେହିପରି ସମ୍ବଲପୁର ଭବାନୀପାଲି ଅଞ୍ଚଳରେ ଦନ୍ତା ହାତୀର ଉତ୍ପାତ ଦେଖିବାକୁ ମିଳିଛି । କିଛିଦିନ ପୂର୍ବରୁ ଏହି ଦନ୍ତା ଭବାନୀପାଲି ଅଞ୍ଚଳର ଏକ ପେଟ୍ରୋଲ ପମ୍ପରେ ଭଙ୍ଗାରୁଜା କରିବା ସହ କିଛି ଦୋକାନକୁ ଭାଙ୍ଗିଥିଲା l ଗତକାଲି ବିଳମ୍ୱିତ ରାତିରେ ଭବାନୀପାଲି ଗାଁରେ ଏହି ଦନ୍ତା ହାତୀ ପଶିଥିଲା l ରାତି ସାରା ଗାଁରେ ବୁଲିବା ସହ ଲୋକଙ୍କ ଘରଦ୍ବାର ଏବଂ ଗୋଟିଏ କାର ଭାଙ୍ଗି ଦେଇଥିଲା l ଲୋକେ ହାତୀ ଭୟରେ ରାତିସାରା ଭୟଭିତ ହୋଇ ରହିଥିବା ଜଣାପଡିଛି l ଏ ଦିଗରେ ବନବିଭାଗକୁ ବାରମ୍ବାର ଖବର ଦେଲେ ମଧ୍ୟ କିଛି ସୁଫଳ ମିଳୁନାହିଁ l