କେନ୍ଦ୍ରାପଡ଼ା: କେନ୍ଦ୍ରାପଡ଼ା ଜିଲ୍ଲା ରାଜନଗର ଥାନା ଅନ୍ତର୍ଗତ ରାଜପୁର ଗାଁର ଯୁବତୀ ଶୁଭଶ୍ରୀ ଦାସଙ୍କ ମୃତ୍ୟୁ ରହସ୍ୟ କ୍ରମଶଃ ଘନୀଭୂତ ହେବାରେ ଲାଗିଛି। ମଙ୍ଗଳବାର ସୁଦ୍ଧା ତାଙ୍କ ମୃତଦେହ ଉଦ୍ଧାର ହୋଇପାରି ନାହିଁ। ଶବକୁ ଖୋଜିବା ପାଇଁ ପୋଲିସ ଏବଂ ଅଗ୍ନିଶମ ବାହିନୀ ପକ୍ଷରୁ ଅଭିଯାନ ଲଗାତାର ଜାରି ରହିଛି।
ଅଭିଯୋଗ ଅନୁଯାୟୀ, ହତ୍ୟାକାରୀମାନେ ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ଶୁଭଶ୍ରୀଙ୍କ ମୃତଦେହରେ ଏକ ଓଜନିଆ ପଥର ବାନ୍ଧି ନଦୀକୁ ଫିଙ୍ଗି ଦେଇଛନ୍ତି। ଏହି ଘଟଣାରେ ପୋଲିସ ବର୍ତ୍ତମାନ ସୁଦ୍ଧା ୫ ଜଣଙ୍କୁ ଅଟକ ରଖି ଜେରା କରୁଛି। ଏହି ସନ୍ଦିଗ୍ଧମାନଙ୍କ ମଧ୍ୟରେ ଉଭୟ ଶୁଭଶ୍ରୀଙ୍କ ପରିବାର ଲୋକ ଓ ଜଣେ ଡଙ୍ଗା ଚାଳକ ଥିବା ଜଣାପଡିଛି।
ଶୁଭଶ୍ରୀଙ୍କ ହତ୍ୟା ପଛର ପ୍ରକୃତ ଉଦ୍ଦେଶ୍ୟ କ'ଣ ଏବଂ ତାଙ୍କ ମୃତଦେହ କେଉଁଠାରେ ଅଛି, ତାହା ଖୋଜି ବାହାର କରିବା ପାଇଁ ପୋଲିସ ପକ୍ଷରୁ ତଦନ୍ତକୁ ଜୋରଦାର କରାଯାଇଛି। ଇତିମଧ୍ୟରେ, ସୋସିଆଲ ମିଡିଆରେ ଗୋଟିଏ ମୃତଦେହର ଫଟୋ ଘୂରି ବୁଲୁଛି। ତେବେ ସେହି ଭାଇରାଲ ଫଟୋଟି ପ୍ରକୃତରେ ଶୁଭଶ୍ରୀଙ୍କର କି ନୁହେଁ, ସେ ନେଇ ସନ୍ଦେହ ଲାଗି ରହିବା ସହ ପୋଲିସ ପକ୍ଷରୁ ତାହାର ସତ୍ୟାସତ୍ୟ ଯାଞ୍ଚ କରାଯାଉଛି।