ଆଜିକାଲି ପ୍ରଦୂଷଣ, ଧୂଳି ଏବଂ ଅଧିକ ସମୟ ଧରି ସ୍କ୍ରିନ୍ ଦେଖିବା କାରଣରୁ ଆଖି ପୋଡ଼ିବା କିମ୍ବା କୁଣ୍ଡାଇ ହେବା ଏକ ସାଧାରଣ ସମସ୍ୟା ପାଲଟିଛି। ଅନେକ ଲୋକ ଆଖି କୁଣ୍ଡାଇ ହେଲେ ତୁରନ୍ତ ଟ୍ୟାପ୍ ପାଣିରେ ଆଖି ଧୋଇଦିଅନ୍ତି। କିନ୍ତୁ ବିଶେଷଜ୍ଞଙ୍କ ମତରେ ଏହା ଆଖି ପାଇଁ କ୍ଷତିକାରକ ହୋଇପାରେ। ସ୍ୱାସ୍ଥ୍ୟ ବିଶେଷଜ୍ଞମାନେ ଆଖିର ଯତ୍ନ ନେବା ପାଇଁ ସଠିକ୍ ପଦ୍ଧତି ଆପଣାଇବାକୁ ପରାମର୍ଶ ଦିଅନ୍ତି।

ପାଣିରେ ଆଖି ଧୋଇବା ଠିକ୍ କି?

ସାଧାରଣତଃ ଟ୍ୟାପ୍ ପାଣିରେ ବ୍ୟାକ୍ଟେରିଆ ଏବଂ ବିଭିନ୍ନ ପ୍ରକାରର କ୍ଷତିକାରକ ଜୀବାଣୁ ଥାଇପାରନ୍ତି। ଆଖିକୁ ଜୋରରେ ପାଣି ଛାଟି ଧୋଇବା ଦ୍ୱାରା ଏଥିରେ ଥିବା ପ୍ରାକୃତିକ ଟିୟର୍ ଫିଲ୍ମ (Tear Film) ନଷ୍ଟ ହୋଇଯାଏ, ଯାହା ଫଳରେ ଆଖି ଅଧିକ ଶୁଖିଲା ଏବଂ ଲାଲ୍ ପଡ଼ିଯାଏ। ଏହାବ୍ୟତୀତ ପାଣିରେ ଥିବା ଆକାନ୍ଥାମିବା (Acanthamoeba) ଭଳି ଜୀବାଣୁ ଗମ୍ଭୀର ସଂକ୍ରମଣର କାରଣ ହୋଇପାରନ୍ତି।

ଆଇ ଡ୍ରପ୍ ବ୍ୟବହାର କରିବା ଉଚିତ୍ କି?

ଯଦି ଆପଣଙ୍କ ଆଖି ପୋଡ଼ୁଛି କିମ୍ବା ଲାଲ୍ ପଡ଼ିଯାଇଛି, ତେବେ ଡାକ୍ତରଙ୍କ ପରାମର୍ଶ କ୍ରମେ ଲୁବ୍ରିକେଟିଙ୍ଗ୍ ଆଇ ଡ୍ରପ୍ (Lubricating Eye Drops) କିମ୍ବା ଆର୍ଟିଫିସିଆଲ୍ ଟିୟର୍ସ ବ୍ୟବହାର କରିବା ସବୁଠାରୁ ନିରାପଦ ଅଟେ। ଏହା ଆଖିକୁ ଥଣ୍ଡା ରଖିବା ସହ ଶୁଷ୍କତା ଦୂର କରିଥାଏ। ତେବେ କୌଣସି ଔଷଧ ଦୋକାନରୁ ନିଜ ଇଚ୍ଛାରେ ଆଇ ଡ୍ରପ୍ ଆଣି ବ୍ୟବହାର କରିବା ବିପଜ୍ଜନକ ହୋଇପାରେ।

ସଠିକ୍ ପଦକ୍ଷେପ ଏବଂ ସତର୍କତା

ଆଖିରେ କିଛି ପଡ଼ିଗଲେ ହାତରେ ନମଳି ଏହାକୁ ଧୀରେ ଧୀରେ ସଫା କପଡ଼ାରେ ପୋଛିବା ଉଚିତ୍। ଯଦି ପାଣିରେ ଧୋଇବା ନିହାତି ଜରୁରୀ ହୁଏ, ତେବେ ଫିଲ୍ଟର୍ ହୋଇଥିବା ପାଣି କିମ୍ବା ଫୁଟାଇ ଥଣ୍ଡା କରାଯାଇଥିବା ପାଣିର ବ୍ୟବହାର କରନ୍ତୁ। ଦୀର୍ଘ ସମୟ ଧରି ମୋବାଇଲ୍ ବା କମ୍ପ୍ୟୁଟର୍ ବ୍ୟବହାର କରୁଥିଲେ, ମଝିରେ ମଝିରେ ଆଖିକୁ ବିଶ୍ରାମ ଦିଅନ୍ତୁ। ସମସ୍ୟା ଅଧିକ ହେଲେ ତୁରନ୍ତ ଜଣେ ନେତ୍ର ବିଶେଷଜ୍ଞ (Ophthalmologist) ଙ୍କ ସହ ପରାମର୍ଶ କରନ୍ତୁ।