ରାଜସ୍ଥାନର ଜୟପୁର ଠାରେ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ପାରିବାରିକ କଳହ ତଥା ଆର୍ଥିକ ଅନଟନ ଯୋଗୁଁ ଜଣେ ବ୍ୟକ୍ତି ନିଜ ପତ୍ନୀ ଏବଂ ୮ ବର୍ଷର ନାବାଳିକା ଝିଅକୁ ଖଣ୍ଡାରେ ହାଣି ନିର୍ମମ ଭାବେ ହତ୍ୟା କରିଛି। ଏହି ଲୋମହର୍ଷକ କାଣ୍ଡ ଘଟାଇବା ପରେ ଅଭିଯୁକ୍ତ ଜଣକ ନିଜେ ଯାଇ ପୋଲିସ ଷ୍ଟେସନରେ ଆତ୍ମସମର୍ପଣ କରିଛି।
ଘରୋଇ କଳହର କରୁଣ ପରିଣତି
ପୋଲିସର ସୂଚନା ଅନୁଯାୟୀ, ଜୟପୁରର ଦୁଦୁ ଅନ୍ତର୍ଗତ ବିଚୁନ ଗାଁ ରେ ଏହି ଘଟଣା ଘଟିଛି। ଅଭିଯୁକ୍ତର ନାମ ସୁରଜିତ ହୋଇଥିବା ବେଳେ ସେ ବୁଧବାର ବିଳମ୍ବିତ ରାତି ପ୍ରାୟ ୧ଟା ସମୟରେ ନିଜ ପତ୍ନୀ ସରୋଜ ଦେବୀ (୩୫) ଏବଂ ୮ ବର୍ଷର ଝିଅ ବଂଶିକାଙ୍କୁ ହତ୍ୟା କରିଥିଲା। ପ୍ରାଥମିକ ତଦନ୍ତରୁ ଜଣାପଡିଛି ଯେ, ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ଗତ ୨ ମାସ ହେବ କୌଣସି କଥାକୁ ନେଇ ବିବାଦ ଲାଗି ରହିଥିଲା। ଆର୍ଥିକ ସଙ୍କଟ ମଧ୍ୟ ଏହି ବିବାଦର ଏକ ମୁଖ୍ୟ କାରଣ ବୋଲି ଅନୁମାନ କରାଯାଉଛି। ରାତିରେ ସମସ୍ତେ ଶୋଇଥିବା ବେଳେ ସୁରଜିତ ଏକ ଖଣ୍ଡା ସାହାଯ୍ୟରେ ପତ୍ନୀ ଓ ଝିଅ ଉପରେ ମରଣାନ୍ତକ ଆକ୍ରମଣ କରିଥିଲା, ଫଳରେ ଘଟଣାସ୍ଥଳରେ ହିଁ ଉଭୟଙ୍କର ପ୍ରାଣବାୟୁ ଉଡିଯାଇଥିଲା।
ରାତିସାରା ମୃତଦେହ ପାଖରେ ବସିରହିଲା ଅଭିଯୁକ୍ତ
ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ହତ୍ୟାକାଣ୍ଡ ଘଟାଇବା ପରେ ଅଭିଯୁକ୍ତ ସୁରଜିତ ସାରା ରାତି ରକ୍ତ ଜୁଡୁବୁଡୁ ମୃତଦେହ ପାଖରେ ବସି ରହିଥିଲା। ଗୁରୁବାର ସକାଳେ ଯେତେବେଳେ ଗାଁ ଲୋକେ ପ୍ରାତଃ ଭ୍ରମଣରେ ବାହାରିଥିଲେ, ସେତେବେଳେ ସେ ଘରୁ ବାହାରି ନିର୍ବିକାର ଭାବେ କହିଥିଲା ଯେ, 'ମୁଁ ମୋ ପତ୍ନୀ ଏବଂ ଝିଅକୁ ମାରିଦେଇଛି'। ଏହାପରେ ସେ ସିଧାସଳଖ ମୋଖମପୁରା ଥାନା ରେ ପହଞ୍ଚି ନିଜର ଦୋଷ ସ୍ୱୀକାର କରିବା ସହ ଆତ୍ମସମର୍ପଣ କରିଥିଲା।
ତଦନ୍ତ ଆରମ୍ଭ କଲା ପୋଲିସ
ଖବର ପାଇବା ମାତ୍ରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଦୁଦୁ ଡିଏସପି ଦୀପକ ଖଣ୍ଡେଲୱାଲ କହିଛନ୍ତି ଯେ ଅଭିଯୁକ୍ତକୁ ହେପାଜତକୁ ନିଆଯାଇଛି ଏବଂ ପଚରାଉଚରା ଜାରି ରହିଛି। ଘଟଣାସ୍ଥଳରେ ଫରେନ୍ସିକ୍ ଟିମ୍ (FSL) ପହଞ୍ଚି ଆବଶ୍ୟକୀୟ ପ୍ରମାଣ ସଂଗ୍ରହ କରିଛି। ପୋଲିସ ଦୁଇଟି ଯାକ ମୃତଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ ଦୁଦୁ ଉପଜିଲ୍ଲା ଡାକ୍ତରଖାନାକୁ ପଠାଇଛି। ଏହି ବର୍ବର ହତ୍ୟାକାଣ୍ଡ ପରେ ସମଗ୍ର ଅଞ୍ଚଳରେ ଆତଙ୍କ ତଥା ଶୋକର ଛାୟା ଖେଳିଯାଇଛି।