ହର୍ମୁଜ ପ୍ରଣାଳୀରେ 'ତାରା ଗ୍ୟାସ' ଉପରେ କ୍ଷେପଣାସ୍ତ୍ର ଆକ୍ରମଣ: ସୁରକ୍ଷିତ ଅଛନ୍ତି ୨୪ ଭାରତୀୟ ନାବିକ

ହର୍ମୁଜ ପ୍ରଣାଳୀରେ ଗତି କରୁଥିବା ପାନାମା ପତାକାଧାରୀ ଏଲପିଜି ଟ୍ୟାଙ୍କର୍ “ତାରା ଗ୍ୟାସ୍” ଉପରେ ଏକ କ୍ଷେପଣାସ୍ତ୍ର ଆକ୍ରମଣ ହୋଇଛି। ତେବେ ଏହି ଆକ୍ରମଣ ସତ୍ତ୍ୱେ ଜାହାଜରେ ଥିବା ସମସ୍ତ ୨୪ ଜଣ ଭାରତୀୟ ନାବିକ ସୁରକ୍ଷିତ ଥିବା ନେଇ କେନ୍ଦ୍ର ମନ୍ତ୍ରୀ ସର୍ବାନନ୍ଦ ସୋନୋୱାଲ ସୂଚନା ଦେଇଛନ୍ତି।

ଗତ ନଭେମ୍ବର ୧୬ ତାରିଖରେ ହର୍ମୁଜ ପ୍ରଣାଳୀ ଦେଇ ଯାଉଥିବା ସମୟରେ ଏହି ଏଲପିଜି ଟ୍ୟାଙ୍କର୍ ଉପରେ ଆକ୍ରମଣ କରାଯାଇଥିଲା। କେନ୍ଦ୍ର ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରୀ ସର୍ବାନନ୍ଦ ସୋନୋୱାଲ ମଙ୍ଗଳବାର ଦିନ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ ମାଧ୍ୟମରେ ଏହି ସମ୍ପର୍କରେ ସ୍ପଷ୍ଟୀକରଣ ରଖିଛନ୍ତି। ସେ କହିଛନ୍ତି ଯେ, ଏହି ଅଘଟଣରେ ଜାହାଜରେ ଥିବା କୌଣସି କ୍ରୁ ସଦସ୍ୟ ଆହତ ହୋଇନାହାଁନ୍ତି ଏବଂ ସମସ୍ତେ ବିପଦମୁକ୍ତ ଅଛନ୍ତି।

ଜାହାଜରେ ମୋଟ ୨୫ ଜଣ କ୍ରୁ ସଦସ୍ୟ ଥିବାବେଳେ ସେମାନଙ୍କ ମଧ୍ୟରୁ ୨୪ ଜଣ ଭାରତୀୟ ନାଗରିକ ଅଟନ୍ତି। ମନ୍ତ୍ରୀ ସୋନୋୱାଲ ନିଜ ପୋଷ୍ଟରେ ଉଲ୍ଲେଖ କରିଛନ୍ତି ଯେ, ଭାରତ ସରକାର ଏହି ସମ୍ପୂର୍ଣ୍ଣ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି। ନାବିକମାନଙ୍କ ନିରନ୍ତର ସୁରକ୍ଷା ଏବଂ ମଙ୍ଗଳ ସୁନିଶ୍ଚିତ କରିବା ପାଇଁ ଭାରତୀୟ କର୍ତ୍ତୃପକ୍ଷ ଜାହାଜ ପରିଚାଳନା କମ୍ପାନୀ ସହିତ ନିରନ୍ତର ଯୋଗାଯୋଗରେ ଅଛନ୍ତି।

ସାମ୍ପ୍ରତିକ ସମୟରେ ସାମୁଦ୍ରିକ ପଥରେ ଏପରି ଆକ୍ରମଣକୁ ନେଇ ଚିନ୍ତା ପ୍ରକଟ କରାଯାଇଥିବା ବେଳେ, ଭାରତୀୟ ନାବିକଙ୍କ ସୁରକ୍ଷାକୁ ସରକାର ଅଗ୍ରାଧିକାର ଦେଉଛନ୍ତି। ଜାହାଜଟି କେଉଁ ପରିସ୍ଥିତିରେ ଆକ୍ରମଣର ଶିକାର ହେଲା ଏବଂ ଏହା ପଛରେ କାହାର ହାତ ଅଛି, ସେ ନେଇ ଅଧିକ ତଥ୍ୟକୁ ଅପେକ୍ଷା କରାଯାଇଛି।

About The Author: Suryakanta