ଭୁବନେଶ୍ୱର: ଚଳିତ ବର୍ଷ ମେକ୍ ଇନ୍ ଓଡ଼ିଶା କନକ୍ଲେଭ୍-୨୦୨୨ ରାଜ୍ୟର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି ଶିଳ୍ପ ପାଇଁ ଅନେକ ନିବେଶ ଏବଂ ନିଯୁକ୍ତି ସୃଷ୍ଟି କରିବ। ଏହି ବିଶ୍ୱସ୍ତରୀୟ ସମାବେଶରେ ବିଶ୍ୱର କୋଣ ଅନୁକୋଣରୁ ନିବେଶକମାନେ ଯୋଗଦେଇଥିଲେ। ଏହି ଅବସରରେ ରେଲଟେଲ, ଇଣ୍ଟେଲ, ଆଡୋବେ, ଓରାକେଲ, ଗ୍ଲୋବାଲ ଫାଉଣ୍ଡରିଜ, ଏପିକ ଫାଉଣ୍ଡେସନ ଆଦି କମ୍ପାନୀମାନଙ୍କ ସହିତ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି ବିଦ୍ୟା ବିଭାଗ ଦ୍ୱାରା ବୁଝାମଣାପତ୍ର ସ୍ୱାକ୍ଷର କରାଯାଇଛି।
୧୦,୭୪୦ କୋଟି ଟଙ୍କାର ନିବେଶ ପାଇଁ ହୋଇଥିବା ଏହି ପ୍ରତିବଦ୍ଧତା ଏବଂ ବୁଝାମଣାପତ୍ର ଫଳରେ ରାଜ୍ୟରେ ପାଖାପାଖି ୪୪୦୦୦ ନିଯୁକ୍ତି ସୁଯୋଗ ସୃଷ୍ଟି ହେବ ଏହାଦ୍ୱାରା ଓଡ଼ିଶାର ଅନେକ ଶିକ୍ଷିତ ଯୁବକ ଯୁବତୀ ଲାଭପ୍ରଦ ହେବେ ବୋଲି ଆଶା ପ୍ରକାଶ ପାଇଛି। କନକ୍ଲେଭରେ ଓଡ଼ିଶାରେ ନିବେଶପାଇଁ ଉପସ୍ଥିତ ଅନେକ ନିବେଶକଙ୍କ ମଧ୍ୟରେ ବହୁ ଆଗ୍ରହ ଦେଖିବାକୁ ମିଳିଥିଲା।
ଅନ୍ୟ କମ୍ପାନୀଗୁଡ଼ିକ ମଧ୍ୟରେ ବିଶ୍ୱର ପ୍ରତିଷ୍ଠିତ କମ୍ପାନୀ ଯଥା ଜୁପିଟର ସୋଲାର, ଡେଲୋଏଟ, ଆଇବିଏମ, ହାପିଏଷ୍ଟ ମାଇଣ୍ଡସ, ଆଦାନୀ ଗ୍ରୁପ, ଆର୍ନଷ୍ଟ ଆଣ୍ଡ ୟଙ୍ଗ ଏବଂ ଆରୋନ କ୍ୟାପିଟାଲ ଏହି ସମ୍ମିଳନୀରେ ଯୋଗଦେଇ ରାଜ୍ୟ ସରକାରଙ୍କ ସହିତ ନିବେଶ ବିଷୟରେ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ। ଓଡ଼ିଶାରେ ସୂଚନା ପ୍ରଯୁକ୍ତି ଏବଂ ଇଲେକ୍ଟ୍ରୋନିକ୍ସ ଶିଳ୍ପରେ ନିବେଶକମାନଙ୍କ ଉତ୍ସାହ ଏବଂ ଆଗ୍ରହ ଏକ ସମୃଦ୍ଧ ଓଡ଼ିଶାର ଆଭାସ ଦେଉଛି। ଏହାଦ୍ୱାରା ଓଡ଼ିଶାର ଅର୍ଥନୈତିକ ଅଭିବୃଦ୍ଧି ହେବାସହିତ ଅନେକ ନିଯୁକ୍ତି ସୁଯୋଗ ସୃଷ୍ଟି ହେବ ଓ ଅନେକ ଶିକ୍ଷିତ ଯୁବକ ଯୁବତୀ ଲାଭପ୍ରଦ ହେବେ ବୋଲି ଆଶା ପ୍ରକାଶ ପାଇଛି।