ନୂଆଦିଲ୍ଲୀ: ଦେଶରେ ଖୁବ୍‌ଶୀଘ୍ର ପ୍ରଚଳନ ହେବ ପ୍ଲାଷ୍ଟିକ୍ ନୋଟ୍। ଏଥିପାଇଁ ଭାରତୀୟ ରିଜର୍ଭ ବ୍ୟାଙ୍କ ଦେଶରେ ପ୍ଲାଷ୍ଟିକ୍ କିମ୍ବା ପଲିମର ନୋଟ୍ ପାଇଁ ପ୍ରଥମ ପାଇଲଟ୍ ପ୍ରକଳ୍ପ  ଆରମ୍ଭ କରିବାକୁ ଯାଉଛି। ତେବେ ଏହି ନୋଟ୍‌ର  ପରୀକ୍ଷଣ ୧୦ ଏବଂ ୨୦ ଟଙ୍କିଆ ନୋଟ୍ ସହିତ ଆରମ୍ଭ ହେବ। ପ୍ରାରମ୍ଭିକ ପର୍ଯ୍ୟାୟରେ, ରିଜର୍ଭ ବ୍ୟାଙ୍କ ପ୍ରଥମେ ଛୋଟ ମୂଲ୍ୟର ନୋଟ୍ ଉପରେ ପରୀକ୍ଷଣ କରିବ। 

ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପ୍ରଥମ ପାଇଲଟ୍ ପ୍ରକଳ୍ପ ୧୦ ଏବଂ ୨୦ ଟଙ୍କିଆ ର ଛୋଟ ମୂଲ୍ୟର ନୋଟ୍ ସହିତ ଆରମ୍ଭ ହେବା ଆଶା କରାଯାଉଛି। ଏହି ପରୀକ୍ଷଣର ଫଳାଫଳ ଏବଂ ଅଭିଜ୍ଞତାକୁ ଆଧାର କରି ଆର୍‌ବିଆଇ ଆଗକୁ ପ୍ଲାଷ୍ଟିକ୍‌ ନୋଟ୍‌ ଉପରେ  ଆହୁରି ଅଧିକ ନିଷ୍ପତ୍ତି ନେବ। ଯଦି ଏହି ପରୀକ୍ଷଣ ସମ୍ପୂର୍ଣ୍ଣ ସଫଳ ହୁଏ, ତେବେ କେନ୍ଦ୍ରୀୟ ବ୍ୟାଙ୍କ ୨୦୨୭  ସୁଦ୍ଧା ଦେଶରେ ଏହି ପଲିମର ନୋଟ୍‌ଗୁଡିକୁ ପୂର୍ଣ୍ଣ-ସ୍ତରରେ ବଜାରକୁ ଛାଡିବା ଆରମ୍ଭ କରିପାରେ। ତେବେ ଭାରତୀୟ ବଜାରରେ ପଲିମର ନୋଟ୍ ପ୍ରଚଳନ ହେବାର ଅର୍ଥ ନୁହେଁ ଯେ ପୂର୍ବରୁ ଥିବା କାଗଜ ନୋଟ୍‌ଗୁଡିକୁ ତୁରନ୍ତ ପ୍ରଚଳନରୁ ବାହାର କରିଦିଆଯିବ। ଆର୍‌ବିଆଇ ଏହା ମଧ୍ୟ ସ୍ପଷ୍ଟ କରିଛି ଯେ ନୂତନ ମୁଦ୍ରା ପୁରୁଣା କାଗଜ ନୋଟ୍‌କୁ ବଦଳାଇବ ନାହିଁ।

ପଲିମରରୁ ତିଆରି ହେଉଥ଄ବା ଏହି ବ୍ୟାଙ୍କ ନୋଟ୍‌ଗୁଡିକ ପାରମ୍ପରିକ କାଗଜ ନୋଟ୍ ତୁଳନାରେ ବହୁତ ସ୍ଥାୟୀ ହେବ। ଏହି ନୋଟ୍ ପାଣି, ମଇଳା ଏବଂ ଧୂଳି ପ୍ରତି ପ୍ରତିରୋଧୀ। ଏହା ବ୍ୟତୀତ, ଏହି ନୋଟଗୁଡ଼ିକ ସହଜରେ ଚିରିବ ନାହିଁ, ସେଥÒପାଇଁ ଏହା  ବଜାରରେ ଦୀର୍ଘ ସମୟ ପର୍ଯ୍ୟନ୍ତ ସଫା ଏବଂ ଅକ୍ଷତ ରହିବ। ପଲିମର ସିଟ୍‌ର ଏକ ପ୍ରମୁଖ ସୁବିଧା ହେଉଛି, ଏଥିରେ ଉନ୍ନତ ସୁରକ୍ଷା ବୈଶିଷ୍ଟ୍ୟଗୁଡ଼ିକୁ ସହଜରେ ସାମିଲ କରାଯାଇପାରିବ। ଏହି ନୋଟ୍‌ ଆସିବା ପରେ ଠକମାନେ ଆଉ ନକଲି ନୋଟ୍‌ ପ୍ରସ୍ତୁତ କରିପାରିବେ ନାହିଁ।  ପଲିମର ନୋଟ୍ ପୂର୍ବରୁ ବିଶ୍ବର ଅନେକ ପ୍ରମୁଖ ଦେଶଗୁଡିକରେ ପ୍ରଚଳିତ। ଅଷ୍ଟ୍ରେଲିଆ, କାନାଡା, ୟୁକେ ଏବଂ ନ୍ୟୁଜିଲ୍ୟାଣ୍ଡ ସମେତ ଅନେକ ବିକଶିତ ଦେଶରେ ପଲିମର ନୋଟ୍ ବହୁ ଦିନ ଧରି ବ୍ୟବହୃତ ହୋଇଆସୁଛି। ଦେଶର ମୁଦ୍ରାର ଜୀବନ ବୃଦ୍ଧି ଏବଂ ଏହାର ଗୁଣବତ୍ତା ଉନ୍ନତ କରିବା ପାଇଁ ପଲିମର ନୋଟ୍ ପ୍ରଚଳନ କରିବାକୁ ଆର୍‌ବିଆଇ ଏହା କରିବାକୁ ଇଚ୍ଛା ପ୍ରକାଶ କରିଥÒଲା।  ଏହି ପାଇଲଟ୍ ପ୍ରକଳ୍ପର  ପ୍ରଥମ ବ୍ୟବହାରିକ ପରୀକ୍ଷଣ ଖୁବ୍ ଶୀଘ୍ର ଆରମ୍ଭ ହେବ। ତଥାପି, ଏହି ବିଷୟରେ ଆର୍‌ବିଆଇ ଦ୍ୱାରା ଏ ପର୍ଯ୍ୟନ୍ତ କୌଣସି ସରକାରୀ ବିବୃତ୍ତି ଜାରି କରାଯାଇନାହିଁ।
ନୋଟ୍‌ର ଘରୋଇକରଣ ହେବ : ଅଖିଳେଶ ଯାଦବ

ନୋଟ୍ ମୁଦ୍ରଣ ପାଇଁ ବିଶ୍ୱସ୍ତରୀୟ ଟେଣ୍ଡର ଆମନ୍ତ୍ରଣ ପ୍ରସଙ୍ଗରେ ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ବିଜେପି ନେତୃତ୍ୱାଧୀନ ଏନଡିଏ ସରକାରଙ୍କୁ ଟାର୍ଗେଟ କରିଛନ୍ତି। ସେ ପ୍ରଶ୍ନ କରିଛନ୍ତି ଯେ ବିଜେପି ଶାସନରେ କ’ଣ ଏବେ ନୋଟ୍‌ର ଘରୋଇକରଣ ହେବ।  ସୋସିଆଲ ମିଡିଆ ୱେବସାଇଟ୍ ଏକ୍ସ’ରେ ଏକ ପୋଷ୍ଟରେ ସେ ଲେଖିଛନ୍ତି, ଦେଶର ଲୋକମାନେ କେବେ କଳ୍ପନା କରିନଥିଲେ ଯେ କମିଶନ ନେବା ମଡେଲ୍ ଏହି ସ୍ତରକୁ ଖସିଯିବ। ଯେତେବେଳେ ଦେଶର ମୁଦ୍ରା ନିଜେ ଆତ୍ମନିର୍ଭରଶୀଳ ନୁହେଁ, ତେବେ ଅର୍ଥନୀତି ଏବଂ ଦେଶ କିପରି ଆତ୍ମନିର୍ଭରଶୀଳ ହେବ ? ଏବେ ସରକାର ମଧ୍ୟ ଆଉଟସୋର୍ସିଂ ହେବ କି ?  ଏତେ ବଡ଼ ଏବଂ ସମ୍ବେଦନଶୀଳ କାର୍ଯ୍ୟ ପାଇଁ ଏତେ ଛୋଟ, କଞ୍ଜୁସ୍ ଟେଣ୍ଡର୍ ଜାରି କରିବା ପଛରେ କ’ଣ କିଛି ଗୁପ୍ତ ଉଦ୍ଦେଶ୍ୟ ଅଛି, ଗୁପ୍ତ ଭାବରେ ଏକ ଔପଚାରିକତା ପୂରଣ କରିବା ? ଏହା ମନେହୁଏ ଯେ ବ୍ୟବସ୍ଥା ପୂର୍ବରୁ ହୋଇସାରିଛି ଏବଂ ଔପଚାରିକତାର ପ୍ରଦର୍ଶନ କରାଯାଉଛି। ଏହି ପୋଷ୍ଟରେ, ଅଖିଳେଶ ଯାଦବ ରିଜର୍ଭ ବ୍ୟାଙ୍କ ପ୍ରେସ୍ ପକ୍ଷରୁରୁ ପ୍ରକାଶିତ ଏକ ବିଜ୍ଞାପନ ମଧ୍ୟ ସେୟାର କରିଛନ୍ତି, ଯେଉଁଥିରେ ପ୍ଲାଷ୍ଟିକ୍ ନୋଟ୍ ତିଆରି ପାଇଁ ବ୍ୟବହୃତ ସାମଗ୍ରୀ ପାଇଁ ବିଶ୍ୱର ବିଭିନ୍ନ ସ୍ଥାନରୁ ଟେଣ୍ଡର ଆହ୍ଵାନ କରାଯାଇଛି। 

ସରକାରୀ ଟେଲିକମ୍ କମ୍ପାନୀ ଭାରତ ସଞ୍ଚାର ନିଗମ ଲିମିଟେଡ୍ (BSNL) ନିଜର ଗ୍ରାହକମାନଙ୍କ ପାଇଁ ଏକ ନୂଆ ଏବଂ ଅତ୍ୟାଧୁନିକ ସାଟେଲାଇଟ୍ ଫୋନ୍ ଲଞ୍ଚ କରିଛି। ସାଧାରଣତଃ ମୋବାଇଲ୍ ନେଟୱର୍କ ପହଞ୍ଚିପାରୁନଥିବା ଦୁର୍ଗମ ଅଞ୍ଚଳରେ ଯୋଗାଯୋଗକୁ ସୁଦୃଢ଼ କରିବା ଉଦ୍ଦେଶ୍ୟରେ ଏହି ଫୋନ୍ ବଜାରକୁ ଆସିଛି। ଟିକସକୁ ମିଶାଇ ଏହି ସ୍ୱତନ୍ତ୍ର ସାଟେଲାଇଟ୍ ଫୋନର ମୂଲ୍ୟ ₹୧,୩୪,୧୬୬ (୧.୩୪ ଲକ୍ଷ ଟଙ୍କା) ରଖାଯାଇଛି।

କଣ ରହିଛି ଏହାର ବିଶେଷତ୍ୱ?

ଏହି ସାଟେଲାଇଟ୍ ଫୋନ୍ ସାଧାରଣ ସ୍ମାର୍ଟଫୋନ୍ ଠାରୁ ସମ୍ପୂର୍ଣ୍ଣ ଭିନ୍ନ। ଏହା ନିକଟସ୍ଥ ମୋବାଇଲ୍ ଟାୱାର ଉପରେ ନିର୍ଭର କରିବା ପରିବର୍ତ୍ତେ ସିଧାସଳଖ ସାଟେଲାଇଟ୍ (ଉପଗ୍ରହ) ସହ ସଂଯୁକ୍ତ ହୋଇଥାଏ। ଫଳରେ ଯେକୌଣସି ଦୁର୍ଗମ ଅଞ୍ଚଳରେ ମଧ୍ୟ ବିନା ନେଟୱର୍କରେ ଭଏସ୍ କଲିଂ ଏବଂ ଏସଏମଏସ୍ (SMS) ସୁବିଧା ମିଳିପାରିବ। ବିଏସଏନଏଲ୍ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ଏଥିରେ ଜରୁରୀକାଳୀନ ଏସଓଏସ (SOS) ସପୋର୍ଟ ଏବଂ ଦୀର୍ଘ ସମୟ ପର୍ଯ୍ୟନ୍ତ ଚାର୍ଜ ରହୁଥିବା ବ୍ୟାଟେରୀ ରହିଛି। ବିପଜ୍ଜନକ ଏବଂ ପ୍ରତିକୂଳ ପରିସ୍ଥିତିରେ କାମ କରିବା ପାଇଁ ଏହାର ଡିଜାଇନ୍‌କୁ ବେଶ ମଜବୁତ କରାଯାଇଛି।

କିଏ କିଣିପାରିବେ ଏହି ସାଟେଲାଇଟ୍ ଫୋନ୍?

ଭାରତରେ ଜାତୀୟ ସୁରକ୍ଷା ଦୃଷ୍ଟିକୋଣରୁ ସାଟେଲାଇଟ୍ ଫୋନର ବ୍ୟବହାର ଉପରେ କଡ଼ା କଟକଣା ରହିଛି। ତେଣୁ ଏହି ଫୋନ୍ ସାଧାରଣ ମୋବାଇଲ୍ ଦୋକାନ ବା ଷ୍ଟୋରରେ ଉପଲବ୍ଧ ହେବ ନାହିଁ। ଏହାକୁ କିଣିବାକୁ ହେଲେ ଆଗ୍ରହୀ ଗ୍ରାହକମାନଙ୍କୁ ନିକଟସ୍ଥ ବିଏସଏନଏଲ୍ (BSNL) ଅଫିସ୍ ସହ ଯୋଗାଯୋଗ କରିବାକୁ ପଡ଼ିବ। ଏଥିପାଇଁ କଠୋର ଯାଞ୍ଚ ପ୍ରକ୍ରିୟା ଦେଇ ଗତି କରିବାକୁ ହେବ ଏବଂ ଫୋନ୍ ବ୍ୟବହାରର ସ୍ଥାନ, ଉଦ୍ଦେଶ୍ୟ ତଥା ଅବଧି ସମ୍ପର୍କରେ ସରକାରୀ ବିଭାଗକୁ ସ୍ପଷ୍ଟ ସୂଚନା ଦେବାକୁ ପଡ଼ିବ। ମୁଖ୍ୟତଃ ପ୍ରତିରକ୍ଷା ବିଭାଗ, ସାମୁଦ୍ରିକ କାର୍ଯ୍ୟକଳାପ (Maritime), ବିପର୍ଯ୍ୟୟ ପରିଚାଳନା, ଖଣି ଖନନ, ରିମୋଟ ଅପରେସନ୍ସ ଏବଂ ଆଡଭେଞ୍ଚର ଟ୍ରାଭେଲ୍ କ୍ଷେତ୍ରରେ କାର୍ଯ୍ୟ କରୁଥିବା ଲୋକଙ୍କ ପାଇଁ ଏହାକୁ ସବୁଠାରୁ ଉପଯୁକ୍ତ ବିକଳ୍ପ ଭାବେ ବିବେଚନା କରାଯାଉଛି।

ନୂଆଦିଲ୍ଲୀ: ଆସନ୍ତା ଜୁଲାଇ ୨୦ ତାରିଖରୁ ଆରମ୍ଭ ହେବାକୁ ଯାଉଛି ସଂସଦର ମୌସୁମୀ ଅଧିବେଶନ। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ଏହି ସୂଚନା ଦେଇଛନ୍ତି। ଏହି ଅଧିବେଶନ ଅଗଷ୍ଟ ୧୩ ପର୍ଯ୍ୟନ୍ତ ଚାଲିବ। ଦେଶର ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ଉପରେ ଅର୍ଥପୂର୍ଣ୍ଣ ବିତର୍କ ଏବଂ ନିଷ୍ପତ୍ତି ନେବା ପାଇଁ ଉଭୟ ଗୃହକୁ ଡାକିବାକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଅନୁମୋଦନ ଦେଇଛନ୍ତି।

ଆଗାମୀ ମୌସୁମୀ ଅଧିବେଶନରେ ସାମ୍ବିଧାନିକ ସଂସ୍କାର, ଶାସନରେ ଉତ୍ତରଦାୟିତ୍ୱ ଏବଂ ପ୍ରତିରକ୍ଷା ସମ୍ବନ୍ଧୀୟ ବିବାଦ ଉପରେ ସରଗରମ ବିତର୍କ ଦେଖିବାକୁ ମିଳିବ ବୋଲି ଆଶା କରାଯାଉଛି। ଅଧିବେଶନ ପୂର୍ବରୁ ଜେପିସି ରିପୋର୍ଟ ଉପସ୍ଥାପନ ହେବାକୁ ଥିବାରୁ ସଂସଦରେ ବର୍ଷର ସବୁଠାରୁ ବିବାଦୀୟ ଆଲୋଚନା ହେବାର ସମ୍ଭାବନା ରହିଛି।

ନୂଆଦିଲ୍ଲୀ: ଦେଶର ସର୍ବବୃହତ୍ ବେସରକାରୀ ତୈଳ ବିକ୍ରେତା ନାୟାରା ଏନର୍ଜି (Nayara Energy) ଗ୍ରାହକମାନଙ୍କୁ ବଡ଼ ଆଶ୍ୱସ୍ତି ଦେଇଛି। କମ୍ପାନୀ ପକ୍ଷରୁ ସାରା ଦେଶରେ ପେଟ୍ରୋଲ ଦର ଲିଟର ପିଛା ୫ ଟଙ୍କା ଏବଂ ଡିଜେଲ ଦର ଲିଟର ପିଛା ୩ ଟଙ୍କା ହ୍ରାସ କରାଯାଇଛି। ପଶ୍ଚିମ ଏସିଆରେ ଭୌଗୋଳିକ ରାଜନୈତିକ ଉତ୍ତେଜନା କମିବା ପରେ ବିଶ୍ୱ ବଜାରରେ ଅଶୋଧିତ ତୈଳ ଦର ହ୍ରାସ ପାଇବା କାରଣରୁ ଏହି ନିଷ୍ପତ୍ତି ନିଆଯାଇଛି।

ଦେଶବ୍ୟାପୀ ଥିବା ନାୟାରା ଏନର୍ଜିର ୭,୦୦୦ରୁ ଅଧିକ ଇନ୍ଧନ ଷ୍ଟେସନରେ ଏହି ନୂତନ ଦର ଲାଗୁ ହୋଇଛି। ବିଗତ ଦୁଇ ବର୍ଷ ମଧ୍ୟରେ କୌଣସି ବେସରକାରୀ କମ୍ପାନୀ ଦ୍ୱାରା ଖୁଚୁରା ଇନ୍ଧନ ଦର ହ୍ରାସ କରାଯିବାରେ ଏହା ହେଉଛି ପ୍ରଥମ ଘଟଣା। ତେବେ ବିଭିନ୍ନ ରାଜ୍ୟରେ ଲାଗୁ ହେଉଥିବା ଭାଲ୍ୟୁ ଆଡେଡ୍ ଟ୍ୟାକ୍ସ (VAT) ଏବଂ ଅନ୍ୟାନ୍ୟ ସ୍ଥାନୀୟ ଟିକସ କାରଣରୁ ଖୁଚୁରା ଦରରେ ସାମାନ୍ୟ ପରିବର୍ତ୍ତନ ଦେଖାଯାଇପାରେ।

ଗୋଟିଏ ପଟେ ନାୟାରା ଏନର୍ଜି ନିଜର ଦର ହ୍ରାସ କରିଥିବା ବେଳେ, ଅନ୍ୟପଟେ ରାଷ୍ଟ୍ରାୟତ୍ତ ତୈଳ ମାର୍କେଟିଂ କମ୍ପାନୀଗୁଡ଼ିକ ଦରରେ କୌଣସି ପରିବର୍ତ୍ତନ କରିନାହାନ୍ତି। ଇଣ୍ଡିଆନ ଅଏଲ କର୍ପୋରେସନ (IOC), ଭାରତ ପେଟ୍ରୋଲିୟମ (BPCL) ଏବଂ ହିନ୍ଦୁସ୍ତାନ ପେଟ୍ରୋଲିୟମ (HPCL) ପୂର୍ବ ନିର୍ଦ୍ଧାରିତ ଦରରେ ହିଁ ପେଟ୍ରୋଲ ଏବଂ ଡିଜେଲ ବିକ୍ରି କରୁଛନ୍ତି। ଉଲ୍ଲେଖଯୋଗ୍ୟ ଯେ, ଭାରତର ୯୦% ରୁ ଅଧିକ ଖୁଚୁରା ଇନ୍ଧନ ଆଉଟଲେଟ୍ ଏହି ତିନୋଟି କମ୍ପାନୀ ଅଧୀନରେ ରହିଛି।

ଚଳିତ ବର୍ଷ ଆରମ୍ଭରେ ଆମେରିକା ଏବଂ ଇରାନ ମଧ୍ୟରେ ଉତ୍ତେଜନା ବୃଦ୍ଧି ପାଇବା ସମୟରେ ତୈଳ ଦର ବୃଦ୍ଧି କରିବାରେ ନାୟାରା ଏନର୍ଜି ପ୍ରଥମ ଖୁଚୁରା ବିକ୍ରେତା ଥିଲା। ସେତେବେଳେ କମ୍ପାନୀ ପେଟ୍ରୋଲ ଲିଟର ପିଛା ୫.୩୦ ଟଙ୍କା ଏବଂ ଡିଜେଲ ଲିଟର ପିଛା ୩ ଟଙ୍କା ବୃଦ୍ଧି କରିଥିଲା। ହରମୁଜ୍ ପ୍ରଣାଳୀରେ ଯୋଗାଣ ବାଧାପ୍ରାପ୍ତ ହେବାର ଆଶଙ୍କା ଯୋଗୁଁ ଏହି ଦର ବୃଦ୍ଧି କରାଯାଇଥିଲା। ବର୍ତ୍ତମାନ ବିଶ୍ୱ ବଜାରରେ ଅଶୋଧିତ ତୈଳ ଦର ସ୍ଥିର ହେବା ପରେ ଗ୍ରାହକମାନଙ୍କୁ ଏହି ଆଶ୍ୱସ୍ତି ମିଳିଛି। ଆଗାମୀ ଦିନରେ ରାଷ୍ଟ୍ରାୟତ୍ତ କମ୍ପାନୀଗୁଡ଼ିକ ମଧ୍ୟ ଦର କମାଉଛନ୍ତି କି ନାହିଁ ତାହା ଉପରେ ସମସ୍ତଙ୍କ ନଜର ରହିଛି।

ନୂଆଦିଲ୍ଲୀ: ନୂଆ ମାସ ଆରମ୍ଭ ହେବାକୁ ଆଉ କିଛି ଦିନ ବାକି ଅଛି। ପ୍ରତ୍ୟେକ ମାସର ଆରମ୍ଭରୁ କିଛି ପରିବର୍ତ୍ତନ ସହିତ କରାଯାଇଥାଏ। ଜୁଲାଇ ପହିଲାରୁ ଆଧାର, ପାସପୋର୍ଟ, ଯାନବାହାନ ମୂଲ୍ୟ ଏବଂ ଏପରିକି ଏଲ୍‌ପିଜି ମୂଲ୍ୟରେ ବଡ଼ ପରିବର୍ତ୍ତନ ଘଟିବାର ଆଶା କରାଯାଉଛି, ଯାହା ସବୁ ସିଧାସଳଖ ଆପଣଙ୍କ ପକେଟକୁ ପ୍ରଭାବିତ କରିବ। ଭାରତୀୟ ସ୍ବତନ୍ତ୍ର ପରିଚୟ ପ୍ରାଧିକରଣ (ୟୁଆଇଡିଏଆଇ) ଘୋଷଣା କରିଛି ଯେ ଆପଣଙ୍କ ଆଧାର କାର୍ଡରେ ଆପଣଙ୍କର ଇମେଲ୍ ଆଇଡି ଅପଡେଟ୍ କରିବା ପାଇଁ ଜୁଲାଇ ପହିଲାରୁ ଡିସେମ୍ବର ୩୧ ମଧ୍ୟରେ ମାଗଣା। ପୂର୍ବରୁ, ଆଧାରରେ ଆପଣଙ୍କର ଇମେଲ୍ ଠିକଣା ଅପଡେଟ୍ କରିବା ପାଇଁ ୭୫ ଟଙ୍କା ଶୁଳ୍କ ଲାଗୁଥିଲା। ଆଧାର ପରିଚାଳନା କରୁଥିବା ସଂସ୍ଥା  ୟୁଆଇଡିଏଆ ର ଏହି ପଦକ୍ଷେପ କାର୍ଯ୍ୟକାରୀ କରାଯାଉଛି, ଯାହା ଲୋକମାନଙ୍କୁ ସେମାନଙ୍କର ଆଧାର ସୂଚନା ଅପଡେଟ୍ କରିବାକୁ ପ୍ରୋତ୍ସାହିତ କରିବ।

ଜୁଲାଇରୁ ସରକାର ପାସପୋର୍ଟ ଫି’ ବୃଦ୍ଧି କରିବାକୁ ଯାଉଛନ୍ତି। ନିୟମିତ ପାସପୋର୍ଟ ପାଇଁ ଫି’ ଏବେ ୧୫୦୦ ଟଙ୍କାରୁ ବୃଦ୍ଧି ପାଇ ୨୫୦୦ ଟଙ୍କା ହେବ। ଏକ ତତ୍କାଳ ପାସପୋର୍ଟ ପାଇଁ, ଫି’ ୫୦୦୦ ଟଙ୍କା ହେବ, ଯାହା ପୂର୍ବରୁ ୩୫୦୦ ଟଙ୍କା ଥିଲା। ଏହି ନୂତନ ଫ’ ଜୁଲାଇ ପହିଲାରୁ ଲାଗୁ ହେବ। ଏହାଛଡା ଅନେକ ଅଟୋମୋବାଇଲ କମ୍ପାନୀ  ଜୁଲାଇ ୧ରୁ ମୂଲ୍ୟ ବୃଦ୍ଧି ଘୋଷଣା କରିଛନ୍ତି। ଏଥିରେ ଟାଟା ମୋଟର୍ସ, କିଆ ମୋଟର୍ସ, ଏମ୍‌ଜି ମୋଟର୍ସ ଏବଂ ବିଏମ୍‌ଡବ୍ଲ୍ୟୁ ଅନ୍ତର୍ଭୁକ୍ତ। ଟାଟା ମୋଟର୍ସ ପାସେଞ୍ଜର ଯାନବାହନ ୧.୫ ପ୍ରତିଶତ ପର୍ଯ୍ୟନ୍ତ ମୂଲ୍ୟ ବୃଦ୍ଧି ଘୋଷଣା କରିଛି। ଟାଟା ମୋଟର୍ସ ବାଣିଜ୍ୟିକ ଯାନବାହନ ୨.୫  ପ୍ରତିଶତ ପର୍ଯ୍ୟନ୍ତ ମୂଲ୍ୟ ବୃଦ୍ଧି ଘୋଷଣା କରିଛି। କିଆ ମୋଟର୍ସ ଏବଂ ବିଏମ୍‌ଡବ୍ଲ୍ୟୁ ପ୍ରତ୍ୟେକ ୨ ପ୍ରତିଶତ ମୂଲ୍ୟ ବୃଦ୍ଧି ଘୋଷଣା କରିଛି ଏବଂ ଏମ୍‌ଜି ମୋଟର୍ସ ୩ ପ୍ରତିଶତ ବୃଦ୍ଧି ଘୋଷଣା କରିଛି।

ଏହା ସହିତ, ଜୁଲାଇ ପହିଲାରୁ ଅନେକ କ୍ରେଡିଟ୍ କାର୍ଡ ନିୟମ ପରିବର୍ତ୍ତନ ହେବାକୁ ଯାଉଛି। ରିପୋର୍ଟ ଅନୁସାରେ, ଏଓ୍‌ବିଆଇ କାର୍ଡଗୁଡ଼ିକ କିଛି ଫୋନ୍‌ ପେ ଏସ୍‌ବିଆଇ କାର୍ଡ ପାଇଁ ରିୱାର୍ଡ ପଏଣ୍ଟଗୁଡ଼ିକୁ ସଂଶୋଧନ କରିଛି। ଅନେକ ନୂତନ ସୀମା ଲାଗୁ କରାଯାଇଛି ଏବଂ କିଛି କାରବାରକୁ ରିୱାର୍ଡ ପଏଣ୍ଟ ବର୍ଗରୁ ହଟାଇ ଦିଆଯାଇଛି। ଏଚ୍‌ଡିଏଫ୍‌ସି ରେଗାଲିଆ ଗୋଲ୍‌ଡ କ୍ରେଡିଟ୍ କାର୍ଡଧାରକମାନେ ଏବେ ପ୍ରତି କ୍ୟାଲେଣ୍ଡର ତ୍ରୈମାସିକରେ ତିନିଥର ମାଗଣାରେ ଘରୋଇ ବିମାନ ବନ୍ଦର ଲାଉଞ୍ଜ୍ ପ୍ରବେଶ କରିପାରିବେ। ତଥାପି, ସେମାନଙ୍କୁ ପ୍ରତି ତ୍ରୈମାସିକରେ ଅତି କମ୍‌ରେ ୬୦ ହଜାର ଟଙ୍କା ଖର୍ଚ୍ଚ କରିବାକୁ ପଡିବ।

ନୂଆଦିଲ୍ଲୀ: ଆଧାର, ପାନ୍‌କାର୍ଡ, ପାସପୋର୍ଟ ଭାରତୀୟ ନାଗରିକତାର ପ୍ରମାଣପତ୍ର ନୁହେଁ। ସେହିପରି ଭୋଟର ପ୍ରମାଣପତ୍ର, ରାସନ କାର୍ଡ, ଡ୍ରାଇଭିଂ ଲାଇସେନ୍ସ ମଧ୍ୟ ଭାରତୀୟ ନାଗରିତାର ପ୍ରମାଣପତ୍ର ରୂପେ ଗ୍ରହଣୀୟ ନୁହେଁ।  ସମ୍ପ୍ରତି ବୈଦେଶିକ ମନ୍ତ୍ରଣାଳୟର ଜନୈକ ଅଧିକାରୀ ଏସମ୍ପର୍କରେ ଦେଇଥିବା ଟିପ୍ପଣୀ ସାରା ଦେଶରେ ନୂଆ ବିତର୍କ ସୃଷ୍ଟି କରିଛି। ପାସପୋର୍ଟକୁ ଏକ ଯାତ୍ରା ଦସ୍ତାବିଜ୍‌ ବୋଲି ଉଲ୍ଲେଖ କରି ଏହାକୁ ଭାରତୀୟ ନାଗରିକତାର ପ୍ରମାଣପତ୍ର କୁହାଯାଇ ପାରିବ ନାହିଁ ବୋଲି ବୈଦେଶିକ ମନ୍ତ୍ରଣାଳୟର ମନ୍ତବ୍ୟ ସାରା ଦେଶରେ ଆଲୋଡ଼ନ ସୃଷ୍ଟି କରିଛି। ଯଦି ସରକାରଙ୍କ ପ୍ରଦତ୍ତ ଓ ବିଭିନ୍ନ କାର୍ଯ୍ୟ ନିମନ୍ତେ ସ୍ୱୀକୃତ ଏହି ପ୍ରମାଣପତ୍ରଗୁଡ଼ିକ ନାଗରିକତ୍ୱର ପ୍ରମାଣପତ୍ର ନୁହେଁ, ତେବେ ଭାରତୀୟ ନାଗରିକତାର ପ୍ରମାଣ କ’ଣ ବୋଲି ପ୍ରଶ୍ନ ଉଠିଛି। ଏହି ସମୟରେ ଏହାକୁ ନେଇ ଦେଶରେ ଖୁବ୍‌ ଶୀଘ୍ର ଜାତୀୟ ନାଗରିକ ପଞ୍ଜୀକରଣ (ଏନ୍‌ଆର୍‌ସି) ଲାଗୁ ହୋଇପାରେ ବୋଲି ମଧ୍ୟ ଚର୍ଚ୍ଚା ଦାନାବାନ୍ଧିଛି୤ ଯଦିଓ ଏନ୍‌ଆର୍‌ସି ଲାଗୁ ସମ୍ପର୍କରେ ସରକାରଙ୍କ ପକ୍ଷରୁ ବିଧିବଦ୍ଧ ଘୋଷଣା କରାଯାଇ ନାହିଁ, ତେବେ ଆଗାମୀ ବଜେଟ୍‌ ଅଧିବେଶନରେ ଏ ସଂକ୍ରାନ୍ତରେ କୌଣସି ଚିଠା ଆସିପାରେ ବୋଲି ମଧ୍ୟ ଆକଳନ କରାଯାଉଛି। 

ବର୍ତ୍ତମାନର ଆଇନ ଅନୁସାରେ ଆଧାର କାର୍ଡ ନାଗରିକତାର ପ୍ରମାଣ ନୁହେଁ ବୋଲି କୁହାଯାଉଛି।  ଆଧାର ଆଇନ ୨୦୧୬ର ଧାରା–୯ରେ ସ୍ପଷ୍ଟ କରାଯାଇଛି ଯେ ଆଧାର କେବଳ ପରିଚୟ ଓ ବିଭିନ୍ନ ସେବା ପ୍ରାପ୍ତି ପାଇଁ ଉପଯୋଗ ହୋଇପାରେ।  ଏହା ନାଗରିକତା କିମ୍ବା ବାସସ୍ଥାନର ପ୍ରମାଣ ନୁହେଁ । ୟୁଆଇଡ଼ିଆଇଏ ପୋର୍ଟାଲରେ ମଧ୍ୟ ଏହା ସ୍ପଷ୍ଟ ଉଲ୍ଲେଖ କରାଯାଇଛି । ସେହିପରି ଭୋଟର ପରିଚୟପତ୍ର କେବଳ ଭୋଟ ଦେବାର ଅଧିକାର ପାଇଁ ବ୍ୟବହାର କରାଯାଇଥାଏ ଓ ଏହା ନାଗରିକତାର ପ୍ରମାଣପତ୍ର ନୁହେଁ ବୋଲି କୁହାଯାୁଛି। ନିର୍ବାଚନ ଆୟୋଗ ମଧ୍ୟ ସର୍ବୋଚ୍ଚ ନ୍ୟାୟାଳୟରେ ଏହା ଉଲ୍ଲେଖ କରି ଭୋଟର କାର୍ଡ ନାଗରିକତାର ଅନ୍ତିମ ପ୍ରମାଣ ନୁହେଁ ବୋଲି କହିଛନ୍ତି। ଅନୁରୂପ ଭାବରେ ପ୍ୟାନ୍‌ କାର୍ଡ କେବଳ ଆୟକର ଓ ଆର୍ଥିକ କାରବାର ପାଇଁ ବ୍ୟବହୃତ ହୋଇଥାଏ ଏବଂ ବିଦେଶୀ ନାଗରିକ ଓ ବ୍ୟବସାୟିକ ସଂସ୍ଥାମାନେ ମଧ୍ୟ ଭାରତରେ ବ୍ୟବସାୟ ଓ ଟିକସ ଦେବା ପାଇଁ ଭାରତୀୟ ପାନ୍‌ କାଡର଼୍ ପାଉଥିବା କୁହାଯାଉଛି। 

ରାସନ କାର୍ଡ କେବଳ ପରିବାରର ଆର୍ଥିକ ସ୍ଥିତି ଓ ଠିକଣାର ପ୍ରମାଣ ବୋଲି କୁହାଯାଉଛି ଓ ସରକାରୀ ଖାଦ୍ୟ ସୁରକ୍ଷା ଯୋଜନାର ହିତାଧିକାରୀଙ୍କୁ ପ୍ରଦାନ କରାଯାଉଥିବା କୁହାଯାଉଛି। ସେହିପରି ଡ୍ରାଇଭିଂ ଲାଇସେନ୍ସ ଗାଡ଼ି ଚଳାଇବାର ଅନୁମତି ପତ୍ର ମାତ୍ର। ଭିସାରେ ଭାରତକୁ ଆସିଥିବା ବିଦେଶୀମାନଙ୍କୁ ମଧ୍ୟ ଡ୍ରାଇଭିଂ ଲାଇସେନ୍ସ ମିଳିଥିବା ଦୃଷ୍ଟାନ୍ତ ରହିଛି।  ତେଣୁ ଏହି ସବୁ ଦସ୍ତାବିଜ ମଧ୍ୟ ନାଗରିକତାର ପ୍ରମାଣ ନୁହେଁ ବୋଲି କୁହାଯାଉଛି । ତେବେ ଭାରତୀୟଙ୍କ ନିକଟରେ ଭାରତବାସୀ ହେବାର ପ୍ରମାଣପତ୍ର ବୋଲି ବର୍ତ୍ତମାନ ସମୟରେ କିଛି ନାହିଁ ।

ଗୃହ ମନ୍ତ୍ରଣାଳୟର ସୂଚନା ଅନୁସାରେ ଯେ ଭାରତୀୟ ନାଗରିକତ୍ୱ ପାଇଁ ନାଗରିକତା ଆଇନ ୧୯୫୫ ଓ ପରବର୍ତ୍ତୀ ସଂଶୋଧନକୁ ଆଧାର କରାଯାଇଥାଏ। ଏଥିପାଇଁ କୌଣସି ଗୋଟିଏ ସାର୍ବଜନୀନ ଦସ୍ତାବିଜ ନାହିଁ।  ଜନ୍ମ ତାରିଖ, ଜନ୍ମ ସ୍ଥାନ ଓ ପିତାମାତାଙ୍କ ନାଗରିକତା ଭଳି ତଥ୍ୟ ଆଧାରରେ ଏହା ନିର୍ଣ୍ଣୟ କରାଯାଇଥାଏ । ୧ ଜୁଲାଇ ୧୯୮୭ ପୂର୍ବରୁ ଭାରତରେ ଜନ୍ମ ହୋଇଥିବା ବ୍ୟକ୍ତି ସାଧାରଣତଃ ଜନ୍ମ ଆଧାରରେ ଭାରତୀୟ ନାଗରିକ ବୋଲି ମନେ କରାଯାଇଥାଏ।। ୧ ଜୁଲାଇ ୧୯୮୭ରୁ ୩ ଡିସେମ୍ବର ୨୦୦୪ ମଧ୍ୟରେ ଜନ୍ମିତ ବ୍ୟକ୍ତିଙ୍କ ପାଇଁ ତାଙ୍କର ପିତା କିମ୍ବା ମାତାଙ୍କ ମଧ୍ୟରୁ ଜଣେ ଭାରତୀୟ ନାଗରିକ ହେବା ଆବଶ୍ୟକ। ମାତ୍ର ୩ ଡିସେମ୍ବର ୨୦୦୪ ପରେ ଜନ୍ମ ହୋଇଥିବା ବ୍ୟକ୍ତିଙ୍କ କ୍ଷେତ୍ରରେ ଉଭୟ ପିତାମାତା ଭାରତୀୟ ନାଗରିକ ହେବା ଜରୁରୀ ବୋଲି କୁହାଯାଉଛି । ମାତ୍ର ଏଥିପାଇଁ କୌଣସି ନାଗରିକତ୍ୱ ପ୍ରମାଣପତ୍ର କାହାରିକୁ ଦିଆଯାଇ ନାହିଁ । ଯାହା ହିଁ ସବୁଠାରୁ ଜଟିଳ ପରିସ୍ଥିତି ସୃଷ୍ଟି କରିଛି । ତେଣୁ ଏହାକୁ ଆଧାର କରି ଆଗାମୀ ଦିନରେ କେନ୍ଦ୍ର ସରକାର ଏନ୍‌ଆର୍‌ସି କାର୍ଯ୍ୟକାରୀ କରିପାରନ୍ତି ବୋଲି ମନେ କରାଯାଉଛି । 

ଭାରତର ପ୍ରତିରକ୍ଷା କ୍ଷେତ୍ରରେ ଏକ ବଡ଼ ସଫଳତା। ପ୍ରତିରକ୍ଷା ଅନୁସନ୍ଧାନ ଏବଂ ବିକାଶ ସଂଗଠନ (DRDO) ଗୁରୁବାର ଦିନ ସ୍ୱଦେଶୀ ଜ୍ଞାନକୌଶଳରେ ନିର୍ମିତ 'ନେତ୍ର ଏୟାରବର୍ଣ୍ଣ ଆର୍ଲି ୱାର୍ଣ୍ଣିଂ ଆଣ୍ଡ୍ କଣ୍ଟ୍ରୋଲ୍' (Netra AEW&C) ସିଷ୍ଟମକୁ ଫାଇନାଲ୍ ଅପରେସନାଲ୍ କ୍ଲିୟରାନ୍ସ ବା ଚୂଡ଼ାନ୍ତ କାର୍ଯ୍ୟକ୍ଷମ ମଞ୍ଜୁରୀ (FOC) ପ୍ରଦାନ କରିଛି। ଏହି ମଞ୍ଜୁରୀ ଭାରତୀୟ ବାୟୁସେନାର ନିରୀକ୍ଷଣ ଏବଂ ପ୍ରତିରକ୍ଷା କ୍ଷମତାକୁ ଆହୁରି ମଜବୁତ କରିବ।

ବେଙ୍ଗାଲୁରୁସ୍ଥିତ 'ସେଣ୍ଟର ଫର୍ ଏୟାରବର୍ଣ୍ଣ ସିଷ୍ଟମ୍ସ' (CABS) ଠାରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଏହି ମଞ୍ଜୁରୀ ପ୍ରଦାନ କରାଯାଇଛି। ବାୟୁସେନାର ଡେପୁଟି ଚିଫ୍ ଅଫ୍ ଏୟାର୍ ଷ୍ଟାଫ୍, ଏୟାର ମାର୍ଶଲ ଅବଧେଶ କୁମାର ଭାରତୀ ଏହି ଘୋଷଣା କରିଥିଲେ। ଏହି ସଫଳତା ସମ୍ପର୍କରେ ସୂଚନା ଦେଇ ସେ କହିଥିଲେ ଯେ, "ଏହା କେବଳ ଏକ ସ୍ୱଦେଶୀ ପ୍ରଯୁକ୍ତିବିଦ୍ୟାର ସଫଳତା ନୁହେଁ, ବରଂ ଆତ୍ମନିର୍ଭର ଭାରତ ଗଠନ ଦିଗରେ ବାୟୁସେନା ଏବଂ ବୈଜ୍ଞାନିକ ସମ୍ପ୍ରଦାୟର ସହଭାଗିତାର ପ୍ରତୀକ ଅଟେ।"

ଭାରତର ଆକାଶର ଆଖି

ନେତ୍ର (AEW&C) ସିଷ୍ଟମକୁ ପ୍ରାୟତଃ ଭାରତର 'ଆକାଶର ଆଖି' ବା 'Eye in the Sky' ବୋଲି କୁହାଯାଏ। ଏହା ଅତ୍ୟାଧୁନିକ ରାଡାର୍ ଏବଂ ସେନ୍ସରରେ ସଜ୍ଜିତ ହୋଇଥିବାବେଳେ ଶତ୍ରୁ ପକ୍ଷର ବିମାନ, ଡ୍ରୋନ୍ ଏବଂ କ୍ଷେପଣାସ୍ତ୍ରକୁ ବହୁ ଦୂରରୁ ଠାବ କରିପାରିବ। ଏହାଦ୍ୱାରା ବାୟୁସେନାକୁ ରିଅଲ-ଟାଇମ୍ ଇଣ୍ଟେଲିଜେନ୍ସ, ସର୍ଭେଲାନ୍ସ ଏବଂ ମିଲିଟାରୀ ଅପରେସନ୍‌ରେ ବିଶେଷ ସହାୟତା ମିଳିପାରିବ। ଭୂମିସ୍ଥିତ ରାଡାର ଗୁଡ଼ିକ ଯେଉଁ ସବୁ ତଥ୍ୟ ସଂଗ୍ରହ କରିବାରେ ବିଫଳ ହୁଅନ୍ତି, ନେତ୍ର ଏହାର ସହଜ ସମାଧାନ କରିଥାଏ।

ଯୁଦ୍ଧ ଭୂମିରେ ପ୍ରମାଣିତ ହୋଇଛି କ୍ଷମତା

ବର୍ତ୍ତମାନ ଭାରତୀୟ ବାୟୁସେନା ପାଖରେ ୩ଟି ନେତ୍ର ମାର୍କ-୧ ସିଷ୍ଟମ୍ ରହିଛି ଯାହାକୁ ଏମ୍ବ୍ରାଏର ଇଆରଜେ-୧୪୫ (Embraer ERJ‑145) ପ୍ଲାଟଫର୍ମ ଉପରେ ବିକଶିତ କରାଯାଇଛି। ୨୦୧୫ ମସିହାରେ ବାୟୁସେନାରେ ସାମିଲ ହୋଇଥିବା ଏହି ବ୍ୟବସ୍ଥା ନିଜର ଦକ୍ଷତା ପ୍ରମାଣିତ କରିସାରିଛି। ୨୦୧୯ର ବାଲାକୋଟ୍ ଏୟାରଷ୍ଟ୍ରାଇକ୍, ୨୦୨୦ର ଭାରତ-ଚୀନ୍ ସୀମା ବିବାଦ ଏବଂ ୨୦୨୫ର ଅପରେସନ୍ ସିନ୍ଦୁର ସମୟରେ ଏହା ପ୍ରମୁଖ ଭୂମିକା ଗ୍ରହଣ କରିଥିଲା। ଦୀର୍ଘ ଦଶନ୍ଧି ଧରି ବ୍ୟବହାର ହେବା ପରେ, ଚୂଡ଼ାନ୍ତ ମଞ୍ଜୁରୀ (FOC) ପ୍ରାପ୍ତ କରିବା ଏହାର ସମ୍ପୂର୍ଣ୍ଣ ଯୁଦ୍ଧ ପ୍ରସ୍ତୁତିକୁ ସ୍ପଷ୍ଟ କରିଛି।

ଭାରତର ଅଧ୍ୟକ୍ଷତାରେ ବ୍ରିକ୍ସ (BRICS) ଦେଶଗୁଡ଼ିକର ଜାତୀୟ ସୁରକ୍ଷା ଉପଦେଷ୍ଟା ତଥା ଶୀର୍ଷ ସୁରକ୍ଷା ଅଧିକାରୀମାନଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। ଭାରତର ଜାତୀୟ ସୁରକ୍ଷା ଉପଦେଷ୍ଟା ଅଜିତ ଡୋଭାଲ ଏହି ବୈଠକରେ ନେତୃତ୍ୱ ନେଇଥିଲେ। ବିଶ୍ୱ ସ୍ତରରେ ବଢୁଥିବା ସୁରକ୍ଷା ଆହ୍ୱାନକୁ ଦୃଷ୍ଟିରେ ରଖି ଏହି ବୈଠକରେ ମୁଖ୍ୟତଃ ଆତଙ୍କବାଦ ଏବଂ ୟୁକ୍ରେନ ଯୁଦ୍ଧ ଭଳି ପ୍ରସଙ୍ଗ ଉପରେ ବିସ୍ତୃତ ଆଲୋଚନା କରାଯାଇଛି।

ବୈଠକର ମୁଖ୍ୟ ପ୍ରସଙ୍ଗ

ଏହି ଉଚ୍ଚସ୍ତରୀୟ ଆଲୋଚନାରେ ଆତଙ୍କବାଦକୁ ବିଶ୍ୱ ଶାନ୍ତି ପାଇଁ ସବୁଠାରୁ ବଡ଼ ବିପଦ ଭାବରେ ବର୍ଣ୍ଣନା କରାଯାଇଥିଲା। ବିନା କୌଣସି ଭେଦଭାବରେ ସମସ୍ତ ପ୍ରକାର ଆତଙ୍କବାଦୀ କାର୍ଯ୍ୟକଳାପକୁ ଦୃଢ଼ ନିନ୍ଦା କରିବା ସହ, ଆତଙ୍କବାଦୀ ଗୋଷ୍ଠୀଗୁଡ଼ିକୁ ଆର୍ଥିକ ସହାୟତା ଯୋଗାଉଥିବା ନେଟୱର୍କକୁ ଧ୍ୱଂସ କରିବା ପାଇଁ ବ୍ରିକ୍ସ ରାଷ୍ଟ୍ରମାନେ ଏକମତ ହୋଇଛନ୍ତି। ଏହା ସହିତ ସାଇବର ସୁରକ୍ଷା ଏବଂ ସୀମାପାର ଆତଙ୍କବାଦ ଉପରେ ମଧ୍ୟ ଗଭୀର ଚିନ୍ତା ବ୍ୟକ୍ତ କରାଯାଇଥିଲା।

ୟୁକ୍ରେନ ସଙ୍କଟ ଓ ବିଶ୍ୱ ଶାନ୍ତି

ବୈଠକରେ ଅନ୍ୟତମ ପ୍ରମୁଖ ପ୍ରସଙ୍ଗ ଥିଲା ରୁଷିଆ-ୟୁକ୍ରେନ ଯୁଦ୍ଧ। ୟୁକ୍ରେନ ସଙ୍କଟର ଶାନ୍ତିପୂର୍ଣ୍ଣ ସମାଧାନ ଦିଗରେ କୂଟନୈତିକ ଆଲୋଚନା ଏବଂ ସମ୍ବାଦର ଆବଶ୍ୟକତା ଉପରେ ଭାରତ ଜୋର ଦେଇଛି। ସମସ୍ତ ଦେଶର ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତାକୁ ସମ୍ମାନ ଜଣାଇବା ପାଇଁ ମିଳିତ ଜାତିସଂଘର ଚାର୍ଟର ଅନୁଯାୟୀ ପଦକ୍ଷେପ ନେବାକୁ ବ୍ରିକ୍ସ ସଦସ୍ୟମାନେ ଆହ୍ୱାନ ଦେଇଛନ୍ତି।

ବ୍ରିକ୍ସ ରାଷ୍ଟ୍ରମାନଙ୍କର ସହଯୋଗ

ସମ୍ପ୍ରତି ବିସ୍ତାରିତ ହୋଇଥିବା ବ୍ରିକ୍ସ ସଂଗଠନରେ ନୂତନ ସଦସ୍ୟମାନଙ୍କର ଯୋଗଦାନ ପରେ ଏହା ପ୍ରଥମ ପ୍ରମୁଖ ସୁରକ୍ଷା ବୈଠକମାନଙ୍କ ମଧ୍ୟରୁ ଗୋଟିଏ। ଏହି ସମ୍ମିଳନୀରେ ସଦସ୍ୟ ଦେଶଗୁଡ଼ିକ ମଧ୍ୟରେ ପାରସ୍ପରିକ ସହଯୋଗ ବୃଦ୍ଧି କରିବା ଏବଂ ବିଶ୍ୱ ଯୋଗାଣ ଶୃଙ୍ଖଳା କ୍ଷେତ୍ରରେ ଦେଖାଦେଉଥିବା ସମସ୍ୟାର ମିଳିତ ମୁକାବିଲା କରିବା ପାଇଁ ଦୃଢ଼ ନିଷ୍ପତ୍ତି ନିଆଯାଇଛି।

ମନି ଲଣ୍ଡରିଂ ଏବଂ ଆତଙ୍କବାଦୀ ପାଣ୍ଠି ଯୋଗାଣ (ଟେରର ଫାଇନାନ୍ସିଂ) ରୋକିବା ପାଇଁ ଗଠିତ ଅନ୍ତର୍ଜାତୀୟ ସଂସ୍ଥା ଫାଇନାନ୍ସିଆଲ ଆକ୍ସନ ଟାସ୍କ ଫୋର୍ସ (FATF) ର ନୂତନ ଉପାଧ୍ୟକ୍ଷ ଭାବେ ନିଯୁକ୍ତ ହୋଇଛନ୍ତି ବରିଷ୍ଠ ଭାରତୀୟ ପ୍ରଶାସନିକ ସେବା (ଆଇଏଏସ୍) ଅଧିକାରୀ ବିବେକ ଅଗ୍ରୱାଲ। ପ୍ରଥମ ଥର ପାଇଁ ଭାରତ ଏହି ସଂଗଠନର କୌଣସି ଶୀର୍ଷ ନେତୃତ୍ୱ ପଦବୀ ହାସଲ କରିବାରେ ସଫଳ ହୋଇଛି।

ପ୍ରଥମ ଥର ପାଇଁ ଭାରତକୁ ମିଳିଲା ଏହି ବଡ଼ ଦାୟିତ୍ୱ

ଗତ ୨୦୧୦ ମସିହାରୁ ଭାରତ ଏହି ପ୍ରଭାବଶାଳୀ ଆନ୍ତର୍ଜାତୀୟ ସଂସ୍ଥାର ସଦସ୍ୟ ରହିଆସିଛି। ପ୍ୟାରିସ୍ ସ୍ଥିତ ମୁଖ୍ୟାଳୟରେ ଅନୁଷ୍ଠିତ ପ୍ଲେନାରୀ ବୈଠକ ଶେଷରେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଥିଲା। ଏହି ପଦବୀରେ ସେ ବ୍ରିଟେନର ନାଗରିକ ଜାଇଲ୍ସ ଥମ୍ସନଙ୍କ ସ୍ଥାନ ନେବେ ଏବଂ ତାଙ୍କର କାର୍ଯ୍ୟକାଳ ଜୁଲାଇ ୨୦୨୬ ରୁ ଜୁନ ୨୦୨୭ ପର୍ଯ୍ୟନ୍ତ ରହିବ। ଉପାଧ୍ୟକ୍ଷ ଭାବରେ ସେ ସଂଗଠନର କାର୍ଯ୍ୟ ଏବଂ ପ୍ରାଥମିକତା ନିର୍ଦ୍ଧାରଣ କରିବାରେ ଅଧ୍ୟକ୍ଷଙ୍କୁ ସାହାଯ୍ୟ କରିବେ।

କିଏ ଏହି ବିବେକ ଅଗ୍ରୱାଲ?

ବିବେକ ଅଗ୍ରୱାଲ ହେଉଛନ୍ତି ମଧ୍ୟପ୍ରଦେଶ କ୍ୟାଡର ର ଜଣେ ୧୯୯୪ ବ୍ୟାଚ୍ ର ଆଇଏଏସ୍ ଅଧିକାରୀ। ବର୍ତ୍ତମାନ ସେ ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟ ର ସଚିବ ଭାବେ କାର୍ଯ୍ୟରତ ଅଛନ୍ତି। ତାଙ୍କର ୩୦ ବର୍ଷରୁ ଅଧିକ ପ୍ରଶାସନିକ ଅଭିଜ୍ଞତା ରହିଛି। ଅର୍ଥନୀତି, କୃଷି, ନଗର ଉନ୍ନୟନ, ଭିତ୍ତିଭୂମି ଏବଂ ଜନନୀତି ଭଳି ବିଭିନ୍ନ ଗୁରୁତ୍ୱପୂର୍ଣ୍ଣ କ୍ଷେତ୍ରରେ ସେ ଉଭୟ କେନ୍ଦ୍ର ଏବଂ ରାଜ୍ୟ ସରକାରଙ୍କ ସହ ମିଶି ଅନେକ ବରିଷ୍ଠ ପଦବୀରେ କାର୍ଯ୍ୟ କରିଛନ୍ତି।

ପୂର୍ବ ଅଭିଜ୍ଞତା ଏବଂ ଭାରତ ପାଇଁ ବଡ଼ ବିଜୟ

ସଂସ୍କୃତି ସଚିବ ହେବା ପୂର୍ବରୁ ସେ ଅର୍ଥ ମନ୍ତ୍ରଣାଳୟ ଅଧୀନରେ ଥିବା ରାଜସ୍ୱ ବିଭାଗର ଅତିରିକ୍ତ ସଚିବ ଭାବେ ଦାୟିତ୍ୱ ତୁଲାଇଥିଲେ। ଏହି ସମୟ ମଧ୍ୟରେ ସେ ଫାଇନାନ୍ସିଆଲ ଇଣ୍ଟେଲିଜେନ୍ସ ୟୁନିଟ୍-ଇଣ୍ଡିଆ (FIU-IND) ର ନିର୍ଦ୍ଦେଶକ ଭାବେ ମଧ୍ୟ କାର୍ଯ୍ୟ କରିଥିଲେ ଏବଂ ଫାଟଫ (FATF) ରେ ଭାରତୀୟ ପ୍ରତିନିଧି ମଣ୍ଡଳୀର ନେତୃତ୍ୱ ନେଇଥିଲେ। ତାଙ୍କର ଏହି ନିଯୁକ୍ତିକୁ ବୈଦେଶିକ ବ୍ୟାପାର ମନ୍ତ୍ରଣାଳୟ ଭାରତ ପାଇଁ ଏକ 'ବଡ଼ ବିଜୟ' ବୋଲି ବର୍ଣ୍ଣନା କରିଛି। ଆତଙ୍କବାଦୀଙ୍କ ପାଣ୍ଠି ଯୋଗାଣ ନେଟୱାର୍କକୁ ରୋକିବା ଏବଂ ବେଆଇନ ଆର୍ଥିକ ବ୍ୟବସ୍ଥାକୁ ଧ୍ୱଂସ କରିବା ଦିଗରେ ଭାରତର ନିରନ୍ତର ପ୍ରୟାସକୁ ଏହା ଆହୁରି ମଜବୁତ କରିବ ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି।

ଲୋକପ୍ରିୟ ମେସେଜିଂ ଆପ୍ ଟେଲିଗ୍ରାମ (Telegram) କୁ ନେଇ ଭାରତରେ ବିବାଦ ତୀବ୍ର ହେବାରେ ଲାଗିଛି। ଭାରତରେ ଏହି ଆପ୍‌କୁ ସାମୟିକ ଭାବେ ବ୍ୟାନ୍ କରାଯିବା ନିଷ୍ପତ୍ତିକୁ ବିରୋଧ କରି ଟେଲିଗ୍ରାମ କୋର୍ଟର ଦ୍ୱାରସ୍ଥ ହୋଇଛି। ତେବେ ଏହି ବିବାଦ ମଧ୍ୟରେ କେନ୍ଦ୍ର ସରକାର ଦିଲ୍ଲୀ ହାଇକୋର୍ଟରେ ଏକ ବଡ଼ ଦାବି ଉପସ୍ଥାପନ କରିଛନ୍ତି। ସରକାରଙ୍କ କହିବା ଅନୁଯାୟୀ, ଟେଲିଗ୍ରାମ ଏବେ ଆତଙ୍କବାଦୀ ଗତିବିଧି ପାଇଁ ସବୁଠାରୁ ସହଜ ଏବଂ ସୁବିଧାଜନକ ପ୍ଲାଟଫର୍ମରେ ପରିଣତ ହୋଇଛି।

ନିଟ୍ (NEET) ପରୀକ୍ଷା ପାଇଁ ଲାଗିଥିଲା କଟକଣା

ସୂଚନାଯୋଗ୍ୟ ଯେ, ଆଗାମୀ ଦିନରେ ହେବାକୁ ଥିବା ନିଟ୍ (NEET) ୨୦୨୬ ରି-ଏକ୍ସାମ୍ ପୂର୍ବରୁ ପ୍ରଶ୍ନପତ୍ର ଲିକ୍ ଆଶଙ୍କା କରି ଭାରତ ସରକାର ଏହି ସିକ୍ୟୁର୍ ମେସେଜିଂ ଆପ୍‌ ଉପରେ ସପ୍ତାହେ ପାଇଁ କଟକଣା ଲଗାଇଥିଲେ। ସରକାରଙ୍କ ଏହି ଅସ୍ଥାୟୀ ବ୍ୟାନ୍ ନିଷ୍ପତ୍ତି ବିରୋଧରେ ଟେଲିଗ୍ରାମ ତୁରନ୍ତ ଦିଲ୍ଲୀ ହାଇକୋର୍ଟଙ୍କ ଆଶ୍ରୟ ନେଇଥିଲା। ଆପ୍ ପକ୍ଷରୁ ଏହି କଟକଣାକୁ ଚ୍ୟାଲେଞ୍ଜ କରାଯିବା ପରେ ମାମଲାର ଶୁଣାଣି ଆରମ୍ଭ ହୋଇଛି।

କୋର୍ଟରେ କେନ୍ଦ୍ର ସରକାରଙ୍କ ଦଲିଲ୍

ମାମଲାର ଶୁଣାଣି ପୂର୍ବରୁ ସଲିସିଟର ଜେନେରାଲ ଅଦାଲତଙ୍କୁ ଅବଗତ କରାଇଛନ୍ତି ଯେ, ଏହି ପ୍ରସଙ୍ଗରେ ସରକାରଙ୍କ ପକ୍ଷରୁ ଏକ ବିସ୍ତୃତ ଜବାବ କୋର୍ଟ ରେଜିଷ୍ଟ୍ରିରେ ଦାଖଲ କରାଯାଇଛି। ରେକର୍ଡକୁ ଆସିବା ମାତ୍ରେ ଏହି ମାମଲାର ପରବର୍ତ୍ତୀ ଶୁଣାଣି ଆରମ୍ଭ ହେବ। କେନ୍ଦ୍ର ସରକାର ସ୍ପଷ୍ଟ କରିଛନ୍ତି ଯେ, କେବଳ ପରୀକ୍ଷା ପରିଚାଳନାରେ ଅନିୟମିତତା ନୁହେଁ, ବରଂ ଜାତୀୟ ସୁରକ୍ଷା ଦୃଷ୍ଟିରୁ ମଧ୍ୟ ଏହି ଆପ୍‌ର ବ୍ୟାପକ ଦୁରୁପଯୋଗ କରାଯାଉଛି। ଟେଲିଗ୍ରାମର ସୁରକ୍ଷା ବ୍ୟବସ୍ଥା ଏବଂ ଏନ୍‌କ୍ରିପ୍ସନ୍ କାରଣରୁ ଏହା ଆତଙ୍କବାଦୀ ସଙ୍ଗଠନଗୁଡ଼ିକ ପାଇଁ ଯୋଗାଯୋଗର ଏକ ପ୍ରମୁଖ ମାଧ୍ୟମ ପାଲଟିଛି ବୋଲି ସରକାର ନିଜ ଯୁକ୍ତିରେ ଦର୍ଶାଇଛନ୍ତି।

ବାଂଲାଦେଶରେ ଭାରତର ନବନିଯୁକ୍ତ ହାଇକମିଶନର (ରାଷ୍ଟ୍ରଦୂତ) ଦିନେଶ ତ୍ରିବେଦୀ ନିଜର ଏକ ବୟାନକୁ ନେଇ ଚର୍ଚ୍ଚାକୁ ଆସିଛନ୍ତି। ଦାୟିତ୍ୱ ଗ୍ରହଣ କରିବା ପୂର୍ବରୁ ତାଙ୍କ ଦ୍ୱାରା ଦିଆଯାଇଥିବା ମନ୍ତବ୍ୟକୁ ନେଇ ବାଂଲାଦେଶର ରାଜନୈତିକ ମହଲରେ ବିବାଦ ସୃଷ୍ଟି ହୋଇଛି। ବିଶେଷକରି କଟ୍ଟରପନ୍ଥୀ ଇସଲାମୀୟ ଦଳ ଜମାତ-ଏ-ଇସଲାମୀ ତାଙ୍କ ମନ୍ତବ୍ୟ ଉପରେ କଡ଼ା ଆପତ୍ତି ଜଣାଇଛି।

ତ୍ରିବେଦୀଙ୍କ ବୟାନ କ'ଣ ଥିଲା?

ନିକଟରେ ବେନାପୋଲ୍ ସୀମା ଦେଇ ବାଂଲାଦେଶରେ ପ୍ରବେଶ କରିବା ସମୟରେ ଦିନେଶ ତ୍ରିବେଦୀ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଥିଲେ ଯେ, ଭାରତ ଏବଂ ବାଂଲାଦେଶ ଅଲଗା ରହି ଏକ ଶକ୍ତିଶାଳୀ ରାଷ୍ଟ୍ର ପାଲଟିପାରିବେ ନାହିଁ। ଭାରତର ୧୪୦ କୋଟି ଏବଂ ବାଂଲାଦେଶର ୨୦ କୋଟି ଲୋକଙ୍କୁ ମିଶାଇ ମୋଟ ୧.୬ ବିଲିୟନ (୧୬୦ କୋଟି) ଲୋକଙ୍କ ସ୍ୱାର୍ଥ ପାଇଁ ମିଳିମିଶି କାମ କରିବା ଆବଶ୍ୟକ। ସେ ଆହୁରି ମଧ୍ୟ କହିଥିଲେ ଯେ, 'ଭାରତ ଓ ବାଂଲାଦେଶ ସମାନ ଆକାଶ ଓ ପବନ ଅଂଶୀଦାର କରନ୍ତି ଏବଂ ଉଭୟ ଦେଶକୁ ଏକାଠି କାମ କରିବାକୁ ପଡ଼ିବ।' ତାଙ୍କର ଏହି 'ଏକାଠି ମିଶିବା' ବା 'ଏକ ହେବା' ପ୍ରସଙ୍ଗ ଏବେ ବିବାଦର କେନ୍ଦ୍ରବିନ୍ଦୁ ପାଲଟିଛି।

ଜମାତ-ଏ-ଇସଲାମୀ ଏବଂ ବିରୋଧୀଙ୍କ ଆପତ୍ତି

ତ୍ରିବେଦୀଙ୍କ ଏହି ବୟାନ ଉପରେ ବାଂଲାଦେଶ ଜମାତ-ଏ-ଇସଲାମୀର ମୁଖ୍ୟ ସଫିକୁର ରହମାନ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ସେ କହିଛନ୍ତି ଯେ, ବାଂଲାଦେଶ ଏକ ସ୍ୱାଧୀନ ଦେଶ ଏବଂ ତ୍ରିବେଦୀଙ୍କ 'ଉଭୟ ଦେଶ ଏକ ହେବା' ବୟାନ ଅତ୍ୟନ୍ତ ନିନ୍ଦନୀୟ। ଏହା ସହିତ ସେ ବାଂଲାଦେଶର ତାରିକ୍ ରହମାନ ସରକାରଙ୍କୁ ଅନୁରୋଧ କରିଛନ୍ତି ଯେ ସେମାନେ ଏହି ପ୍ରସଙ୍ଗରେ ଭାରତୀୟ ହାଇକମିଶନରଙ୍କଠାରୁ ସ୍ପଷ୍ଟୀକରଣ ମାଗନ୍ତୁ।

ଅନ୍ୟପକ୍ଷରେ, ନ୍ୟାସନାଲ୍ ସିଟିଜେନ୍ ପାର୍ଟିର ନେତା ତଥା ବିରୋଧୀ ଦଳର ଚିଫ୍ ହ୍ୱିପ୍ ନାହିଦ ଇସଲାମ ମଧ୍ୟ ଏହି ବୟାନକୁ ସମାଲୋଚନା କରିଛନ୍ତି। ସେ କହିଛନ୍ତି ଯେ, 'ଭାରତ ଓ ବାଂଲାଦେଶର ଆକାଶ ଏବଂ ମାଟି ଏକ ନୁହେଁ। ଏହି ବିଷୟରେ ୧୯୪୭ ମସିହାରେ ହିଁ ନିଷ୍ପତ୍ତି ନିଆଯାଇସାରିଛି।'

କୂଟନୈତିକ ମହତ୍ତ୍ୱ

୧୯୭୧ ମସିହାରେ ବାଂଲାଦେଶ ସ୍ୱାଧୀନ ହେବା ପରେ ଦିନେଶ ତ୍ରିବେଦୀ ହେଉଛନ୍ତି ପ୍ରଥମ ରାଜନୈତିକ ବ୍ୟକ୍ତି, ଯାହାଙ୍କୁ ଭାରତ ସରକାର ଢାକାରେ ହାଇକମିଶନର ଭାବେ ନିଯୁକ୍ତି ଦେଇଛନ୍ତି। ବର୍ତ୍ତମାନ ବାଂଲାଦେଶରେ ରାଜନୈତିକ ଅସ୍ଥିରତା ଲାଗିରହିଥିବା ବେଳେ ନୂତନ ରାଷ୍ଟ୍ରଦୂତଙ୍କ ଏହି ବୟାନ ଦୁଇ ଦେଶ ମଧ୍ୟରେ କୂଟନୈତିକ ଉତ୍ତେଜନା ସୃଷ୍ଟି କରିବାର ଆଶଙ୍କା ଦେଖାଦେଇଛି।

ଫିନଲ୍ୟାଣ୍ଡରେ ଆୟୋଜିତ କୁଲ୍ତାରାନ୍ତା ଟକ୍‌ସ୍ (Kultaranta Talks) ରେ ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ରୁଷିଆରୁ ଭାରତର ତୈଳ କ୍ରୟ ଉପରେ ହେଉଥିବା ସମାଲୋଚନାର କଡ଼ା ଜବାବ ଦେଇଛନ୍ତି। ଏହି ଅବସରରେ ସେ ୟୁରୋପର ଦୋମୁହାଁ ନୀତିକୁ ପଦାରେ ପକାଇବା ସହ ସ୍ପଷ୍ଟ କରିଛନ୍ତି ଯେ, ଭାରତୀୟ ଅସ୍ତ୍ରଶସ୍ତ୍ର କେବେହେଲେ କୌଣସି ୟୁରୋପୀୟ ଦେଶର କ୍ଷତି କରିନାହିଁ କିମ୍ବା ସେମାନଙ୍କ ପାଇଁ ବିପଦ ସୃଷ୍ଟି କରିନାହିଁ।

ୟୁରୋପର ଦୋମୁହାଁ ନୀତିକୁ କଡ଼ା ସମାଲୋଚନା

ଭାରତର ରୁଷିଆ ତୈଳ କ୍ରୟକୁ ନେଇ ପାଶ୍ଚାତ୍ୟ ଦେଶଗୁଡ଼ିକର ସମାଲୋଚନା ଉପରେ ପ୍ରତିକ୍ରିୟା ରଖି ଜୟଶଙ୍କର କହିଛନ୍ତି ଯେ ୟୁରୋପର ଐତିହାସିକ ଏବଂ ନୈତିକ ଆଭିମୁଖ୍ୟରେ ଅନେକ ଅସଙ୍ଗତି ରହିଛି। ସେ କହିଛନ୍ତି, "କୌଣସି ୟୁରୋପୀୟ ଦେଶ ଉପରେ ଭାରତୀୟ ଅସ୍ତ୍ରଶସ୍ତ୍ରରେ ଆକ୍ରମଣ କରାଯାଇ ନାହିଁ। କିନ୍ତୁ ଭାରତ ପ୍ରସଙ୍ଗରେ ୟୁରୋପୀୟ ଅସ୍ତ୍ରଶସ୍ତ୍ର ପାଇଁ ମୁଁ ସମାନ କଥା କହିପାରିବି ନାହିଁ।" ଭାରତ ଉପରେ ଆକ୍ରମଣ ପାଇଁ ବ୍ୟବହୃତ ହେଉଥିବା ଅସ୍ତ୍ରଶସ୍ତ୍ରକୁ ୟୁରୋପ ଦୀର୍ଘ ବର୍ଷ ଧରି ବିକ୍ରି କରିଆସୁଛି ବୋଲି ସେ ମନେ ପକାଇ ଦେଇଛନ୍ତି।

ତୈଳ କ୍ରୟ ପଛର ଯୁକ୍ତିଯୁକ୍ତ କାରଣ

ରୁଷିଆ-ୟୁକ୍ରେନ ଯୁଦ୍ଧ ସମୟରେ ଭାରତର ଆଭିମୁଖ୍ୟକୁ ନେଇ ଜଣେ ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେଇ ବୈଦେଶିକ ବ୍ୟାପାର ମନ୍ତ୍ରୀ ସ୍ପଷ୍ଟ କରିଥିଲେ ଯେ, ଭାରତ ମୂଲ୍ୟ ଏବଂ ଉପଲବ୍ଧତାକୁ ଦୃଷ୍ଟିରେ ରଖି ତୈଳ କିଣିଥାଏ। ସେ କହିଛନ୍ତି, "ସେହି ସମୟରେ ବଜାରରେ ମୁଖ୍ୟତଃ ରୁଷିଆ ତୈଳ ଅଧିକ ଉପଲବ୍ଧ ଥିଲା କାରଣ ୟୁରୋପୀୟ ଦେଶଗୁଡ଼ିକ ମଧ୍ୟପ୍ରାଚ୍ୟରୁ ତୈଳ କିଣିବା ଆରମ୍ଭ କରିଦେଇଥିଲେ, ଯାହାକି ଆମର ପାରମ୍ପରିକ ଯୋଗାଣକାରୀ ଥିଲା।" ଫଳରେ ପରିସ୍ଥିତି ଭାରତକୁ ଏକ ବିକଳ୍ପ ଦିଗରେ ଯିବାକୁ ବାଧ୍ୟ କରିଥିଲା ବୋଲି ସେ ଯୁକ୍ତି ବାଢ଼ିଥିଲେ।

ଶାନ୍ତିପୂର୍ଣ୍ଣ ଆଭିମୁଖ୍ୟ

ଏହି ଆଲୋଚନା ଚକ୍ରରେ ଜୟଶଙ୍କର ଦୋହରାଇଛନ୍ତି ଯେ, ଆମେ ଭାରତୀୟମାନେ କେବେହେଲେ ୟୁରୋପ ପାଇଁ ବିପଦ ସୃଷ୍ଟି କରିନାହୁଁ। ଭାରତ ସର୍ବଦା ନିଜର ଜାତୀୟ ସ୍ୱାର୍ଥ ଏବଂ ଶକ୍ତି ସୁରକ୍ଷାକୁ ଆଧାର କରି ବାସ୍ତବବାଦୀ ନିଷ୍ପତ୍ତି ନେଇଥାଏ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। ବିଶ୍ୱବ୍ୟାପୀ ପରିବର୍ତ୍ତିତ ଭୂ-ରାଜନୈତିକ ସ୍ଥିତିରେ ଭାରତର ସ୍ଥିତି ଅତ୍ୟନ୍ତ ସ୍ପଷ୍ଟ ଏବଂ ନିରପେକ୍ଷ ରହିଛି ବୋଲି ମନ୍ତ୍ରୀ ଦର୍ଶାଇଛନ୍ତି।