ଗୋପ: ଉକୁଣୀ ନେଲା ନାବାଳିକାର ଜୀବନ । ପୁରୀ ଜିଲ୍ଲା ବଳଙ୍ଗା ଥାନା ଚମ୍ପାଗଡ଼ ସାହିର ୧୨ ବର୍ଷିୟା ନାବାଳିକା ଲକ୍ଷ୍ମୀପ୍ରିୟା ସାହୁଙ୍କ ଜୀବନ ନେଇଛି ଉକୁଣୀ । ଲକ୍ଷ୍ମୀପ୍ରିୟା ସ୍ଥାନୀୟ ବିଦ୍ୟାଳୟରେ ୬ଷ୍ଠ ଶ୍ରେଣୀରେ ପଢୁଥିଲେ । କିଛି ମାସ ତଳେ ତାଙ୍କ ମୁଣ୍ଡରେ ମାତ୍ରାଧିକ ଉକୁଣୀ ହୋଇଥିଲା । ଅନେକ ପ୍ରତିକାର କରିବା ସତ୍ତ୍ୱେ ଭଲ ହୋଇନଥିଲା । ଫଳରେ ମା’ ସତ୍ୟଭାମା ସାହୁ ତାଙ୍କୁ ଲଣ୍ଡା ହେବାକୁ କହିଥିଲେ। ହେଲେ ଝିଅ ଲକ୍ଷ୍ମୀପ୍ରିୟା ରାଜି ହୋଇନଥିଲେ । ଏହାରି ଭିତରେ ଉକୁଣୀଗୁଡ଼ିକ ଖପୁରୀକୁ ଆକ୍ରାନ୍ତ କରିଥିଲେ । ମୁଣ୍ଡରୁ ଦୁର୍ଗନ୍ଧ ବାହାରିବାରୁ ଲକ୍ଷ୍ମୀପ୍ରିୟା ବାହାରକୁ ବାହାରିବା ବନ୍ଦ କରି ଦେଇଥିଲେ । ମୁଣ୍ଡରେ ଚୁଟି ରହୁଥିବାରୁ ପରିବାର ଲୋକେ କିଛି ଜାଣି ପାରିନଥିଲେ । ୩ ଦିନ ତଳେ ହଠାତ୍ ତାଙ୍କର ରକ୍ତବାନ୍ତି ହେବା ପରେ ପରିବାର ଲୋକେ ଲକ୍ଷ୍ମୀପ୍ରିୟାକୁ ପୁରୀ ମେଡିକାଲକୁ ନେଇଥିଲେ। ହେଲେ ସେଠାରେ ଚିକିତ୍ସାଧୀନ ଅବସ୍ଥାରେ ଶନିବାର ଦିନ ରାତିରେ ଲକ୍ଷ୍ମୀପ୍ରିୟାଙ୍କ ମୃତ୍ୟୁ ଘଟିଥିଲା।

ନିମାପଡା: ନିମାପଡା ବଳଙ୍ଗା ଥାନା ଗୋପୀନାଥପୁର ପାଟଣା ଗାଁରେ ଚାଞ୍ଚଲ୍ୟ । ନିଜ ମା’କୁ ମାରି ପୋଡି ଦେଲା ନୃଶଂସ ପୁଅ । ଘଟଣାସ୍ଥଳରେ ବଳଙ୍ଗା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ଏହା ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ଅନୁମାନ କରାଯାଉଛି।

ସୂଚନା ଅନୁସାରେ, ଗତ ରାତିରେ ମା’ ସୁଲୋଚନା ସେନାପତିଙ୍କୁ ମାରିବା ପରେ ପ୍ରମାଣ ନଷ୍ଟ କରିବା ପାଇଁ ଘର ପଛପଟରେ ଥିବା ବାଡିରେ କିରୋସିନ୍ ଲଗାଇ ପୋଡି ଦେଇଥିଲା ନୃଶଂସ ପୁଅ ଧଡିଆ ସେନାପତି । ଆଉ ସକାଳୁ ସକାଳୁ ଅତି ଚତୁରତାର ସହିତ ମା ନିଖୋଜ ଥିବା ଥାନାରେ ଏତଲା ଦେଇଥିଲା । ସେପଟେ ପୋଲିସ ନିକଟରେ ଖବର ପହଁଚିଥିଲା ଗାଁରେ ଜଣେ ମହିଳାଙ୍କ ଅଧାପୋଡା ମୃତ ଦେହ ପଡିଛି । ଖବର ପାଇବା ପରେ ବଳଙ୍ଗା ପୋଲିସ ଆସି ଘଟଣାସ୍ଥଳରେ ତଦନ୍ତ ଆରମ୍ଭ କରିଛି । ମୃତ ଦେହର ଅବଶିଷ୍ଟାଂଶକୁ ପୋଲିସ ଉଦ୍ଧାର କରିବା ସହ ପାଖରେ ପଡିଥିବା ମୋବାଇଲ, କିରୋସିନ୍ ଜାରକୁ ଜବତ କରିଛି । ଫରେନସିକ୍ ଟିମ୍ ପହଞ୍ଚି ପାରିପାଶ୍ୱର୍କ ସ୍ଥିତିର ଯାଞ୍ଚ କରିବା ସହ ପୂରା ଅଂଚଳର ଫଟୋଗ୍ରାଫି ଓ ମ୍ୟାପିଂ କରିଛନ୍ତି ।

ଅନ୍ୟପଟେ ମୃତ ମହିଳା ଜଣକ ସୁଲୋଚନା ସେନାପତି ବୋଲି ଗାଁ ଲୋକେ କହୁଥିବାବେଳେ ପୁଅ ଧଡିଆ ସେନାପତି ଏହାକୁ ଅସ୍ୱୀକାର କରୁଛନ୍ତି । ଗାଁ ଲୋକଙ୍କ ଅଭିଯୋଗକୁ ଖଣ୍ଡନ କରି ପୁଅ କହୁଛି କି, ଉଦ୍ଧାର ହୋଇଥିବା ମୃତ ଦେହ ତାଙ୍କ ମା’ଙ୍କର ନୁହେଁ । ତାଙ୍କ ମା’ ନିଖୋଜ ଅଛନ୍ତି । ଅଭିଯୁକ୍ତକୁ ପୁଅକୁ କଠୋର ଶାସ୍ତି ଦେବାକୁ ଗ୍ରାମବାସୀ ଦାବି କରିଛନ୍ତି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆଲୋଡନ ସୃଷ୍ଟି କରିଛି ।