ଭୁବନେଶ୍ୱର: ଏଫ୍‌‌ଆଇଏଚ୍‌‌ ଓଡ଼ିଶା ପୁରୁଷ ହକି ବିଶ୍ୱକପ୍‌‌-୨୦୨୩ର ଗ୍ରାଣ୍ଡ ଫାଇନାଲ ଗତଥରର ବିଜେତା ବେଲଜିୟମ ଓ ୨ଥର ଟାଇଟଲ ଜିତିଥିବା ଜର୍ମାନୀ ମଧ୍ୟରେ ଖେଳାଯିବ। ବିଶ୍ୱରେ ହକି ଖେଳ ଆୟୋଜନ ଲାଗି ଖ୍ୟାତି ଲାଭ କରିଥିବା ଐତିହାସିକ କଳିଙ୍ଗ ଷ୍ଟାଡିୟମ୍‌‌ରେ ରବିବାର ରାତି ୭ଟାରେ ଏହି ମହାମୁକାବିଲା ଖେଳାଯିବ। ଦର୍ଶକ, ପ୍ରଶାସକ, ସମର୍ଥକଙ୍କ ସାମ୍ନାରେ ଗତ ଏକମାସ ଧରି ଓଡ଼ିଶାରେ ଚାଲିଥିବା ହକି ମହୋତ୍ସବର ଏହି ମୁକାବିଲା ପରେ ଶେଷ ହେବ। ଅନ୍ୟପକ୍ଷରେ କହିବାକୁ ଗଲେ ଓଡ଼ିଶାରେ ଦେଶ ଓ ବିଦେଶରୁ ଆସିଥିବା ଖେଳାଳି ଓ ସମର୍ଥକଙ୍କୁ ନିଜର ଆତିଥେୟତା, କଳା, ସଂସ୍କୃତି ଓ ଖେଳୱାଡ ମନୋଭାବ ପ୍ରଦର୍ଶନ କରିବାର ଶେଷ ସୁଯୋଗ ହେବ।

ଭାରତ କ୍ରସ୍‌‌ ଓଭରରେ ହାରିଗଲା ପରେ ଏହି ବିଶ୍ୱକପ୍‌‌ରେ ଆୟୋଜକ ଦେଶର ସମର୍ଥକଙ୍କ ଉତ୍ସାହ କମିଯାଇଛି, କିନ୍ତୁ ଗୋଟିକ ପରେ ଗୋଟିଏ ରୋମାଞ୍ଚକ ମୁକାବିଲାରେ ସମର୍ଥକଙ୍କ ବାନ୍ଧି ରଖିବାରେ ସମର୍ଥ ହୋଇଛି। ବିଶ୍ୱକପ ହକିର ଏହି ଶ୍ରେଷ୍ଠ ଟ୍ରଫି ହାସଲ କରିବା ଲାଗି ୟୁରୋପର ଦୁଇ ଦଳ ମଧ୍ୟରେ ଲଢ଼େଇ ହେବ। ଗତଥରର ବିଜେତା ବେଲଜିୟମ ସବୁଠାରୁ ଅଭିଜ୍ଞ ହୋଇଥିଲାବେଳେ ନବାଗତ ଖେଳାଳିଙ୍କୁ ନେଇ ଗଠିତ ଜର୍ମାନୀ ଦଳ ସମସ୍ତଙ୍କୁ ଚକ୍‌‌ମା ଦେଖାଇ ଫାଇନାଲକୁ ଉଠିଛି। ଆର୍ଜେଣ୍ଟିନା ଛାଡି ଜର୍ମାନୀ ପକ୍ଷରୁ ଖେଳୁଥିବା ପେନାଲ୍ଟି କର୍ଣ୍ଣର ବିଶେଷଜ୍ଞ ଗୋଞ୍ଜାଲୋ ପେଇଲାଟଙ୍କ ଉପରେ ସମସ୍ତଙ୍କ ଆଖି। ଅଭିଜ୍ଞ ବେଲଜିୟମ ଓ ଜର୍ମାନୀ ମଧ୍ୟରେ ଏହି ଲଢ଼େଇଟି ସ୍ମରଣୀୟ ହୋଇ ରହିବ। ବେଲଜିୟମ ଏଠାରେ କ୍ରମାଗତ ଦ୍ୱିତୀୟଥର ଏବଂ ୧୭ ପରେ ଟାଇଟଲ ମୁକାବିଲାରେ ଅବତୀର୍ଣ୍ଣ ହୋଇଥିବା ଜର୍ମାନୀ ତୃତୀୟଥର ସକାଶେ ଟ୍ରଫି ଜିତିବାକୁ କଡ଼ା ସଂଘର୍ଷ କରିବେ। ଫାଇନାଲ ପୂର୍ବରୁ ବିଶ୍ୱର ନଂ-୧ ଟିମ୍‌‌ ଅଷ୍ଟ୍ରେଲିଆ ଓ ଏଠାରେ ଗତଥର ରନର୍ସ ଅପ୍‌‌ ହୋଇଥିବା ନେଦରଲାଣ୍ଡ୍‌‌ସ ମଧ୍ୟରେ ତୃତୀୟ ସ୍ଥାନ ଲାଗି ମୁକାବିଲା ହେବ।

ଭୁବନେଶ୍ୱର: ହକି ବିଶ୍ୱକପ୍ ଫାଇନାଲରେ ଜର୍ମାନୀ । ୪-୩ ଗୋଲରେ ଶକ୍ତିଶାଳୀ ଅଷ୍ଟ୍ରେଲିଆକୁ ହରାଇ ପୁରୁଷ ହକି ବିଶ୍ୱକପ୍ ଫାଇନାଲରେ ପହଞ୍ଚିଲା ଜର୍ମାନୀ । ପ୍ରଥମାର୍ଦ୍ଧ ସୁଦ୍ଧା ୨-୦ରେ ଆଗୁଆ ରହିଥିଲା ଅଷ୍ଟ୍ରେଲିଆ । କିନ୍ତୁ ଦ୍ୱିତୀୟାର୍ଦ୍ଧରେ ଉଭୟ ଦଳ ଆକ୍ରମଣାତ୍ମକ ଖେଳ ଦେଖାଇଥିଲେ । ଶେଷ ୧୦ ସେକେଣ୍ଡରେ ବାଜି ପଲଟିଗଲା । ୩ୟ କ୍ବାର୍ଟରରେ ଜର୍ମାନି ଗୋଟିଏ ଗୋଲ୍‌ ଦେଇଥିବା ବେଳେ ଶେଷ କ୍ବାର୍ଟରରେ ୩ଟି ଗୋଲ୍‌ ମାରିଥିଲା। ଶେଷ ମୁହୂର୍ତ୍ତରେ ଗୋଲ୍ ଦେଇ ଫାଇନାଲରେ ପହଞ୍ଚିଛି ଜର୍ମାନୀ ।

ଶେଷ ୧୦ ସେକେଣ୍ଡ ପର୍ଯ୍ୟନ୍ତ ଉଭୟ ଦଳର ସ୍କୋର ସମାନ ଥିଲା । ଉଭୟ ଦଳ ଆକ୍ରମଣାତ୍ମକ ଖେଳ ଦେଖାଇଥିଲେ ମଧ୍ୟ ଶେଷ ମୁହୂର୍ତ୍ତରେ ଅଷ୍ଟ୍ରେଲିଆର ବିଶ୍ୱକପ ଆଶାକୁ ଧୂଳିସାତ କରିଥିଲା ଜର୍ମାନୀ । ଫିଲ୍ଡ ଗୋଲ ଜରିଆରେ ଗୋଲ ବ୍ୟବଧାନ ୪-୩କୁ ବୃଦ୍ଧି କରି ଫାଇନାଲ ଟିକେଟ ହାତେଇଥିଲା ଜର୍ମାନୀ ।

ହକି ବିଶ୍ବକପରେ ଆଜିଠାରୁ ଆରମ୍ଭ ହୋଇଯାଇଛି ସେମିଫାଇନାଲ ଟକ୍କର । ଫାଇନାଲ ଟିକେଟ ପାଇଁ ଟର୍ଫକୁ ଓହ୍ଲାଇଥିଲେ ୪ଟି ଟିମ୍ । ପ୍ରଥମ ସେମିରେ ଅଷ୍ଟ୍ରେଲିଆକୁ ହରାଇ ବାଜି ମାରିଛି ଜର୍ମାନୀ। ଦ୍ଵିତୀୟ ସେମିଫାଇନାଲ ମ୍ୟାଚରେ ମୁହାଁମୁହିଁ ହେବେ ଗତଥର ଚାମ୍ପିଅନ ବେଲଜିୟମ ଓ ନେଦାରଲ୍ୟାଣ୍ଡସ । ଜର୍ମାନି ଆସନ୍ତା ୨୯ ତାରିଖରେ ଫାଇନାଲ ମ୍ୟାଚ୍‌ ଖେଳିବ।

ଭୁବନେଶ୍ବର : ହକି ବିଶ୍ବକପ୍‌ ୨୦୨୩ରେ ତୃତୀୟ ଦଳ ଭାବେ ସେମିଫାଇନାଲରେ ପ୍ରବେଶ କରିଛି ଜର୍ମାନି। କଳିଙ୍ଗ ଷ୍ଟାଡିୟମରେ ଖେଳାଯାଉଥିବା କ୍ବାଟର ଫାଇନାଲ ମ୍ୟାଚରେ ଜର୍ମାନି ପେନାଲ୍ଟି ଶୁଟ ଆଉଟ୍ ରେ ୪-୩ ଗୋଲରେ ଇଂଲଣ୍ଡକୁ ହରାଇ ସେମି ଫାଇନାଲରେ ନିଜ ଜାଗା ପକ୍କା କରିଛି।

ଆଜି ଖେଳାଯାଉଥିବା ହକି ବିଶ୍ବକପ୍‌ ୨୦୨୩ର ତୃତୀୟ କ୍ଵାଟର ଫାଇନାଲରେ ଇଂଲଣ୍ଡ ଆଉ ଜର୍ମାନି ମଧ୍ୟ କଡ଼ା ମୁକାବିଲା ଦେଖିବାକୁ ମିଳିଥିଲା। ସଂପୂର୍ଣ୍ଣ ସମୟ ଶେଷ ହେବା ପରେ ଉଭୟ ଦଳ ୨-୨ ଗୋଲ ରେ ରହିଥିଲେ। ଖେଳ ଆରମ୍ଭରୁ ହିଁ ଇଂଲଣ୍ଡ ଜର୍ମାନି ଉପରେ ଭାରି ଥିବାର ଦେଖିବାକୁ ମିଳିଥିଲା। ଇଂଲଣ୍ଡ ତରଫରୁ ଯାଚେରୀ ୱେଲେସ ୧୧ ମିନିଟରେ ହିଁ ପ୍ରଥମ ଗୋଲ ସ୍କୋର କରିଥିଲେ ଏବଂ ଲିଆନ ଅନ୍ସେଲ ୩୨ ମିନିଟରେ ପେନାଲ୍ଟି କର୍ଣ୍ଣର ଜରିଆରେ ଦ୍ଵିତୀୟ ଗୋଲ ସ୍କୋର କରି ୨-୦ ରେ ଦଳ ଲିଡ଼ କରୁଥିଲା। କିନ୍ତୁ ଶେଷ ୩ ମିନିଟରେ ଜର୍ମାନୀ ଖେଳ ବଦଳେଇ ଦେଇଥିଲା । ଜର୍ମାନୀ ତରଫରୁ ମେଟ୍ ଗ୍ରାମ୍ବୁସ ୫୭ ମିନିଟରେ ପ୍ରଥମ ଗୋଲ ଦେଇଥିଲେ ଏବଂ ୫୮ ମିନିଟରେ ଟମ୍ ଗ୍ରାମ୍ବୁସ ପେନାଲ୍ଟି ଷ୍ଟ୍ରୋକ ଦ୍ବାରା ଦ୍ଵିତୀୟ ଗୋଲ ଦେଇ ସ୍କୋର ୨-୨ ରେ ବରାବର କରିଥିଲେ। ତାପରେ ଉଭୟଙ୍କ ମଧ୍ୟରେ ପେନାଲ୍ଟି ଶୁଟ ଆଉଟ୍ ହେଇଥିଲା ଏବଂ ଯେଉଁଥିରେ ୪-୩ ରେ ଜର୍ମାନୀ ବିଜୟୀ ହୋଇଛି।

ଅନ୍ୟପଟେ ଗତକାଲି କଳିଙ୍ଗରେ ଖେଳାଯାଇଥିବା ଅନ୍ୟ ଦୁଇଟି କ୍ଵାଟର ଫାଇନାଲରେ ବିଜୟ ହାସଲ କରି ବିଶ୍ବ ମାନ୍ୟତାର ୧ ଓ ୨ ନମ୍ବର ସ୍ଥାନରେ ଥିବା ଅଷ୍ଟ୍ରେଲିଆ ଓ ବେଲ୍‌ଜିୟମ ପ୍ରଥମ ଦୁଇ ଦଳ ଭାବେ ଚଳିତ ହକି ବିଶ୍ବକପ୍‌ର ସେମିଫାଇନାଲ୍‌ ସ୍ଥାନ ପକ୍କା କରିଛନ୍ତି। ମଙ୍ଗଳବାରର କ୍ବାର୍ଟରଫାଇନାଲ୍‌ରେ ୩ ଥର ବିଜେତା ଅଷ୍ଟ୍ରେଲିଆ ୪-୩ ଗୋଲ୍‌ରେ ସ୍ପେନ୍‌କୁ ଏବଂ ‌ବିଜେତା ବେଲ୍‌ଜିୟମ ୨-୦ ଗୋଲ୍‌ରେ ନ୍ୟୁଜିଲାଣ୍ଡକୁ ପରାସ୍ତ କରିଥିଲା। ଅଷ୍ଟ୍ରେଲିଆ ୧୯୮୬, ୨୦୧୦ ଓ ୨୦୧୪ରେ ବିଜେତା ହୋଇଥିଲା ବେଳେ ଗତ ଥର କାଂସ୍ୟରେ ସନ୍ତୁଷ୍ଟ ରହିଥିଲା। ଏହି ଦଳ ଲିଗ୍‌ ପର୍ଯ୍ୟାୟରେ ୨ ବିଜୟ ଓ ୧ ଅମୀମାଂସିତରୁ ୭ ପଏଣ୍ଟ ପାଇ ଗ୍ରୁପ୍‌-ଏ’ ଟେବୁଲର ଶୀର୍ଷରେ କ୍ବାର୍ଟର ଫାଇନାଲ୍‌କୁ ଯୋଗ୍ୟତା ଅର୍ଜନ କରିଥିଲା।

ଅନ୍ୟପକ୍ଷରେ ଭୁବନେଶ୍ବରରେ ଗତ ସଂସ୍କରଣ ମୁକୁଟ କରାୟତ୍ତ କରିଥିବା ବେଲ୍‌ଜିୟମ ୨ ବିଜୟ ଓ ୧ ଅମୀମାଂସିତରୁ ୭ ପଏଣ୍ଟ ପାଇ ଗ୍ରୁପ୍‌-ବି’ ଟେବୁଲର ଶୀର୍ଷରେ ରହି କ୍ବାର୍ଟରଫାଇନାଲ୍ ଆସିଥିଲା। ସେହିପରି ଆଜି ଆଉ ଗୋଟିଏ କ୍ବାଟର ଫାଇନାଲ ନେଦରଲାଣ୍ଡ୍ସ-କୋରିଆ ମଧ୍ୟରେ ଖେଳାଯିବ। ଏହି ମ୍ୟାଚରେ ବିଜେତା ଚଳିତ ବିଶ୍ବକପ୍‌ର ଚତୁର୍ଥ ସେମିଫାଇନାଲିଷ୍ଟ ହେବେ।

ଭୁବନେଶ୍ବର : ଏଫଆଇଏଚ୍‌ ଓଡ଼ିଶା ହକି ପୁରୁଷ ବିଶ୍ୱକପ ୨୦୨୩ରେ ଆଜି ଖେଳା ଯାଇଥିବା ଅଷ୍ଟମ ମ୍ୟାଚ୍‌ରେ ଜାପାନ ବିପକ୍ଷରେ ଦମ୍‌ଦାର ବିଜୟ ହାସଲ କରି ଜର୍ମାନୀ ତାର ବିଶ୍ବକପ୍‌ ଅଭିଯାନ ଆରମ୍ଭ କରିଛି। କଳିଙ୍ଗ ଷ୍ଟାଡିୟମରେ ଖେଳାଯାଉଥିବା ମ୍ୟାଚରେ ଜାପାନକୁ ୩-୦ ଗୋଲରେ ହରାଇଛି ଜର୍ମାନୀ।

କଳିଙ୍ଗ ଷ୍ଟାଡିୟମରେ ଖେଳାଯାଉଥିବା ମ୍ୟାଚରେ ଜର୍ମାନୀ ପ୍ରଥମରୁ ଭଲ ପଦର୍ଶନ କରିଆସୁଥିଲେ ମଧ୍ୟ ଗୋଲ କରିବାରେ ସକ୍ଷମ ହୋଇନଥିଲା। ଉଭୟ ଜର୍ମାନୀ ଓ ଜାପାନ ଦଳର ଖେଳାଳି ପ୍ରଥମ ୨ଟି କ୍ବାର୍ଟର ପର୍ଯ୍ୟନ୍ତ ଆକ୍ରମଣାତ୍ମକ ଦେଖାଯାଇଥିଲେ ହେଁ ୩ୟ କ୍ବାର୍ଟରରେ ଜର୍ମାନୀର ଗ୍ରାମବୁସ ମେଟ୍‌ସ ଓ ୪୦ ମିନିଟରେ ରୁହର ଖ୍ରୀଷ୍ଟୋଫର ଯଥାକ୍ରମେ ପେନାଲ୍ଟି ଓ ଫିଲ୍ଡ ଗୋଲ୍‌ ଦେଇ ନିଜ ଦଳକୁ ଆଗୁଆ କରିଥିଲେ। ଏହାପରେ ପ୍ରିଞ୍ଜ ଥିଜ୍‌ ୪୮ମିନିଟରେ ଫିଲ୍ଡ ଗୋଲ ଦେଇଥିଲେ। ପୂରା ମ୍ୟାଚ‌ରେ ଜର୍ମାନିକୁ ୮ ଥର ପେନାଲ୍ଟି ଗୋଲ ଦେବାର ସୁଯୋଗ ମିଳିଥିଲା। କିନ୍ତୁ ଥରେ ମାତ୍ର ଗୋଲ ଦେଇପାରିଥିଲା। ଅପରପକ୍ଷେ ଜାପାନକୁ ପେନାଲ୍ଟି ଗୋଲ ଦେବା ପାଇଁ ଥରଟିଏ ମାତ୍ର ସୁଯୋଗ ମିଳିଥିଲା।

ଅନ୍ୟପଟେ କଳିଙ୍ଗରେ ଆଜି ଖେଳାଯାଇଥିବା ଅନ୍ୟଏକ ମ୍ୟାଚରେ କୋରିଆ ବିପକ୍ଷରେ ଡ଼ିଫେଣ୍ଡି ଚାମ୍ପିଅନ୍‌ ବେଲଜିୟମ ବୃହତ ବିଜୟ ହାସଲ କରିଛି। ଏଫଆଇଏଚ୍‌ ଓଡ଼ିଶା ହକି ପୁରୁଷ ବିଶ୍ୱକପ ୨୦୨୩ରେ ବଡ଼ ବିଜୟ ସହ ଅଭିଯାନ ଆରମ୍ଭ କରିଛି ୨୦୧୮ ହକି ବିଶ୍ବକପ ଚାମ୍ପିଅନ୍‌ ବେଲଜିୟମ୍‌। ଆଜି କଳିଙ୍ଗ ଷ୍ଟାଡିୟମରେ ଖେଳାଯାଇଥିବା ଚଳିତ ବିଶ୍ବକପ୍‌ର ୭ମ ମ୍ୟାଚରେ ୫-୦ ଗୋଲ୍‌ରେ ବେଲଜିୟମ କୋରିଆକୁ ହରାଇଛି।

ମ୍ୟାଚର ପ୍ରଥମ ଦୁଇଟି କ୍ୱାର୍ଟର ଗୋଲଶୂନ ରହିଥିଲା। ହେଲେ ତୃତୀୟ କ୍ୱାର୍ଟରରୁ ବେଲେଜିୟମ ଆଟାକିଙ୍ଗ ଗେମ ଆରମ୍ଭ କରିଥିଲା। ବେଲଜିୟମର ଖେଳାଳିମାନେ କୋରିଆର ଗୋଲପୋଷ୍ଟକୁ ବାରମ୍ବାର ଆଟାକ କରି ଗୋଲ ବର୍ଷା କରିଥିଲେ । ତେଵେ ଅନେକ ପେନାଲ୍ଟି କର୍ଣ୍ଣର କୋରିଆକୁ ମିଳିଥିଲେ ମଧ୍ୟ ଗୋଟିଏ ଗୋଲ ଦେବାରେ ସକ୍ଷମ ହୋଇନଥିଲେ କୋରିଆ ଖେଳାଳି।

ଭୁବନେଶ୍ୱର: ଆଜି ହକି ବିଶ୍ୱକପର ଦ୍ଵିତୀୟ ଦିନରେ ପ୍ରଥମେ ମୁହାଁମୁହିଁ ହେବେ ନ୍ୟୁଜିଲାଣ୍ଡ ଓ ଚିଲି । ଦିନ ଗୋଟାଏରେ ରାଉରକେଲାର ବିର୍ସା ମୁଣ୍ଡା ଷ୍ଟାଡିୟମରେ ମ୍ୟାଚ ହେବ । ଏହି ମ୍ୟାଚ ପରେ ଦିନ ୩ଟାରେ ନେଦରଲ୍ୟାଣ୍ଡ୍ସ ଓ ମାଲେସିଆ ମଧ୍ୟରେ ମ୍ୟାଚ ହେବ । ଏହି ମ୍ୟାଚଟି ମଧ୍ୟ ରାଉରକେଲାର ବିର୍ସା ମୁଣ୍ଡା ହକି ଷ୍ଟାଡିୟମରେ ଖେଳାଯିବ ।

ଆଜି ରାଉରକେଲାରେ ଏହି ଦୁଇଟି ମ୍ୟାଚ ପରେ ସଂଧ୍ୟା ୫ଟାରେ ବେଲଜିୟମ ଓ କୋରିଆ ମଧ୍ୟରେ ଟକ୍କର ହେବ । ସେହିପରି ସଂଧ୍ୟା ୭ଟାରେ ଜର୍ମାନୀ ଓ ଜାପାନ ମଧ୍ୟରେ ଟକ୍କର ହେବ । ଏହି ଦୁଇଟି ମ୍ୟାଚ କଳିଙ୍ଗ ଷ୍ଟାଡିୟମରେ ଖେଳାଯିବ । ବେଲଜିୟମ, କୋରିଆ, ଜର୍ମାନୀ ଓ ଜାପାନ ପୁଲ `ବି’ରେ ଥିବା ବେଳେ ନ୍ୟୁଜିଲାଣ୍ଡ, ଚିଲି, ନେଦରଲ୍ୟାଣ୍ଡ୍ସ, ମାଲେସିଆ ପୁଲ୍ `ସି’ରେ ଅଛନ୍ତି ।

ଭୁବନେଶ୍ୱର: ଆଜିଠୁ ଆରମ୍ଭ ହୋଇଥିବା ହକି ବିଶ୍ଵକପର ପ୍ରଥମ ମ୍ୟାଚ୍ ଶେଷ ହୋଇଛି । ଆଜିର ପ୍ରଥମ ମ୍ୟାଚରେ ଶେଷ ହୋଇଥିଲେ ଆର୍ଜେଣ୍ଟିନା ଓ ସାଉଥ୍ ଆଫ୍ରିକା ଟିମ୍ । ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ଏହି ପ୍ରଥମ ମ୍ୟାଚରେ ଆର୍ଜେଣ୍ଟିନା ୧-୦ ଗୋଲରେ ଜିତିଛି । ଉଭୟ ଦଳ ମଧ୍ୟରେ କଡା ଟକ୍କର ହେଇଥିଲେ ବି ତୃତୀୟ ହାଫରେ ଆର୍ଜେଣ୍ଟିନା ଦଳ ସାଉଥ୍ ଆଫ୍ରିକାକୁ ଗୋଟିଏ ଗୋଲ ଦେଇଥିଲା। ‘ହକି ବିଶ୍ୱକପ ୨୦୨୩’ର ପ୍ରଥମ ମ୍ୟାଚ ଜିତି ଆର୍ଜେଣ୍ଟିନା ତା’ର ବିଜୟ ଅଭିଯାନ ଆରମ୍ଭ କରିଛି ।

ପରବର୍ତୀ ମ୍ୟାଚ ଅଷ୍ଟ୍ରେଲିଆ ଏବଂ ଫ୍ରାନ୍ସ ମଧ୍ୟରେ ଅନୁଷ୍ଠିତ ହେବ। ବିଶ୍ୱକପ ଇତିହାସରେ ଅଷ୍ଟ୍ରେଲିଆ ୩ ଥର ବିଶ୍ୱ ବିଜୟୀ ହୋଇସାରିଛି। ହକି ମହାକୁମ୍ଭର ଦମଦାର ଉଦଘାଟନୀ ଉତ୍ସବ ପରେ ଆଜିଠୁ ଆରମ୍ଭ ହୋଇଛି ଏହି ମେଗା ଟୁର୍ଣ୍ଣାମେଣ୍ଟ। ଅନ୍ୟପଟେ ଆଜି ସନ୍ଧ୍ୟା ୭ଟାରେ ରାଉରକେଲାର ନୂଆ ସର୍ବବୃହତ ଅନ୍ତର୍ଜାତୀୟ ହକି ଷ୍ଟାଡିୟମରେ ଭାରତ- ସ୍ପେନ ମ୍ୟାଚ୍‌ ଥିବାରୁ ଖେଳ ଦେଖିବାକୁ ସହରବାସୀଙ୍କ ମଧ୍ୟରେ ରହିଛି ନାହିଁ ନଥିବା ଉତ୍କଣ୍ଠା। ଖେଳକୁ ଶାନ୍ତିଶୃଙ୍ଖଳାର ସହ ଶେଷ କରିବାକୁ ଜିଲ୍ଲା ଓ ପୁଲିସ ପ୍ରଶାସନ ପକ୍ଷରୁ ଚାଲିଥିବା ସମସ୍ତ ପ୍ରସ୍ତୁତି ମଧ୍ୟ ଶେଷ ‌ହୋଇଛି। ଦର୍ଶକଙ୍କ ସୁରକ୍ଷା, ଟ୍ରାଫିକ୍‌ ନିୟନ୍ତ୍ରଣ ସହ ଅନ୍ୟାନ୍ୟ ବ୍ୟବସ୍ଥାକୁ ଜିଲ୍ଲା ପୁଲିସ ଗୁରୁତ୍ବ ଦେଇଛି।

ଭୁବନେଶ୍ବର : ରାଜଧାନୀରେ ଧରି ଆସିଲାଣି ହକି ଫିଭର୍‍। ଭାରତ ହକି ଖେଳାଳି ଓ ବିଦେଶୀ ପର୍ଯ୍ୟଟକ ଭୁବନେଶ୍ୱରକୁ ଆସିଲେଣି। ଆଉ ଏହାରି ମଧ୍ୟରେ ରାଜଧାନୀ ଭୁବନେଶ୍ବରର ସୁରକ୍ଷା ବ୍ୟବସ୍ଥାକୁ କଡାକଡି କରିବାକୁ ନକ୍ସା ପ୍ରସ୍ତୁତ କରିଛି କମିସନରେଟ୍‍ ପୁଲିସ। ରାଜଧାନୀ ଭୁବନେଶ୍ବରରେ ସୁରକ୍ଷା ବ୍ୟବସ୍ଥା ସହ ସହରର ଟ୍ରାଫିକ ବ୍ୟବସ୍ଥାକୁ ଶୃଙ୍ଖଳିତ ଓ ବ୍ୟବସ୍ଥିତ କରିବା ଲାଗି କମିସନରେଟ୍‍ ପୁଲିସ ପକ୍ଷରୁ  ୫୦ ପ୍ଲାଟୁନ ଫୋର୍ସ ମୁତୟନ କରାଯିବ।

ତେବେ ହକି ବିଶ୍ବକପ୍‌ ସମୟରେ ବିଜୁ ପଟ୍ଟନାୟକ ଅର୍ନ୍ତଜାତୀୟ ବିମାନବନ୍ଦରକୁ ପୁରା ସୁରକ୍ଷା ବଳୟ ମଧ୍ୟରେ ରଖାଯିବ। କାରଣ ଖେଳାଳିଙ୍କ ସହ ବିଦେଶୀ ପର୍ଯ୍ୟଟକମାନେ ବହୁମାତ୍ରାରେ ଆସିବାର ସମ୍ଭାବନା ରହିଥିବାରୁ ସେମାନଙ୍କ ସୁରକ୍ଷାକୁ ପ୍ରାଥମିକତା ଦିଆଯାଇଛି। ଏୟାର ପୋର୍ଟରେ ନିୟୋଜିତ ହେବେ ୨ ପ୍ଲାଟୁନ ଫୋର୍ସ। ଭୁବନେଶ୍ୱର ଏୟାର ପୋର୍ଟ ଭିତରେ ଓ ବାହାରେ ସୁରକ୍ଷା ବ୍ୟବସ୍ଥା ଯାଞ୍ଚ କରାଯିବା ସହ ହକି ସମୟରେ ବାହାରୁ ଆସୁଥିବା ପର୍ଯ୍ୟଟକଙ୍କ ଉପରେ ନଜର ରହିବ। ବାହାର ଦେଶରୁ ଆସୁଥିବା ଖେଳାଳିଙ୍କ ସୁରକ୍ଷା ଉପରେ ସ୍ୱତନ୍ତ୍ର ନଜର ରଖାଯିବ। ଏନେଇ ଆଜି ବିମାନ ବନ୍ଦରର ସୁରକ୍ଷା ବ୍ୟବସ୍ଥାର ସମୀକ୍ଷା କରିଛନ୍ତି ଭୁବନେଶ୍ବର ଡିସିପି ଓ ଏୟାର ପୋର୍ଟ ଅଥରୀଟି।

ଅନ୍ୟପଟେ ବିଶ୍ବକପ୍‌ ସମୟରେ ଭୁବନେଶ୍ବରରେ ଟ୍ରାଫିକ ବ୍ୟବସ୍ଥାକୁ ଶୃଙ୍ଖଳିତ ଓ ବ୍ୟବସ୍ଥିତ କରିବା ଲାଗି କମିସନରେଟ୍‍ ପୁଲିସ ଲାଗି ଏକ ନକ୍ସା ପ୍ରସ୍ତୁତ କରାଯାଇଛି। ସହରର ଟ୍ରାଫିକ ପରିଚାଳନା ଲାଗି ୨୦ ପ୍ଲାଟୁନ୍‍ ପୁଲିସ ଫୋର୍ସ ମୁତୟନ କରାଯିବ। ଏଥିରେ ୫ ଜଣ ଡିଏସ୍‍ପି, ୧୮ ଏସ୍‍ଆଇ, ୧୫ ଜଣ ଏଏସ୍‍ଆଇ ନିୟୋଜିତ ରହିବେ। ଏପରିକି ୫ ଜଣ ଡିଏସ୍‍ପିଙ୍କୁ ରାଜଧାନୀର ଟ୍ରାଫିକ ପରିଚାଳନା ଦାୟିତ୍ୱ ଦିଆଯାଇଛି ବୋଲି ଟ୍ରାଫିକ ଡିସିପି ଠାକୁର ପ୍ରସାଦ ପାତ୍ର ସୂଚନା ଦେଇଛନ୍ତି।

ସେହିପରି ରାଜଧାନୀର ଟ୍ରାଫିକ ପରିଚାଳନା ତଦାରଖରେ ଅତିରିକ୍ତ ପୁଲିସ କମିସନର୍‍ ଉମାଶଙ୍କର ଦାଶ ରହିବେ। ଏଥିସହିତ ସାମାଜିକ ଗଣମାଧ୍ୟମରେ ଟ୍ରାଫିକ୍‍ ପରିଚାଳନା କ୍ଷେତ୍ରରେ ଗୁରୁତ୍ୱ ଦେବାକୁ କୁହାଯାଇଛି। ଏଥିଲାଗି ହେଲ୍ପଲାଇନ୍‍ ନମ୍ବର (୮୨୮୦୩୩୮୩୦୫) ଜାରି କରାଯାଇଛି।

ଅନ୍ୟପକ୍ଷରେ ଆମ୍ବୁଲାନ୍ସ ଲାଗି ସହରରେ ଗ୍ରୀନ୍‍ କରିଡର୍‍ ବ୍ୟବସ୍ଥା କରାଯିବ। ପ୍ରତ୍ୟେକ ଟିମ୍‍ ପାଇଁ ପାଇଲଟ୍‍ ପ୍ରୋଟେକ୍ସନ ଦିଆଯିବ। ହୋଟେଲରୁ ଷ୍ଟାଡିୟମ ପର୍ଯ୍ୟନ୍ତ ଖେଳାଳି ଯିବା ବେଳେ ସମସ୍ତ ଟ୍ରାଫିକ ବ୍ୟବସ୍ଥାର ଅନୁଶୀଳନ କରାଯାଇଛି। ଏଥିସହିତ ଟ୍ରାଫିକ୍‍ ଲାଗି ନିୟୋଜିତ ଥିବା ପୁଲିସ କର୍ମଚାରୀମାନେ ବିଏମ୍‍ସି ଏନ୍‍ଫୋର୍ସମେଣ୍ଟ ଟିମ୍‍ରେ ରହିଛନ୍ତି। ସହରର ବିଭିନ୍ନ ସ୍ଥାନରେ ବେଆଇନ ପାର୍କିଂ ହଟାଇବା ଓ ଟ୍ରାଫିକ ସମସ୍ୟା ନ ଦେଖାଯିବ, ସେନେଇ ବ୍ୟବସ୍ଥା କରାଯାଇଛି।

ଏପରିକି ଟ୍ରାଫିକ ଲାଗି ଏକ କଣ୍ଟ୍ରୋଲ ରୁମ ଖୋଲିବା ସହ ଗୋଟିଏ ମିଡିଆ ସେଲ୍‌ର ବ୍ୟବସ୍ଥା ହୋଇଛି। କୌଣସି ସ୍ଥାନରେ ଟ୍ରାଫିକ୍‍ଜନିତ ସମସ୍ୟା ଦେଖାଦେଲେ ନିକଟସ୍ଥ ଥାନାକୁ ଯୋଗାଯୋଗ କରିବାକୁ କୁହାଯାଇଛି। ଟ୍ରାଫିକ-୧ ଓ ୨ରେ ୪ଟି ଲେଖାଏଁ ଏନ୍‍ଫୋର୍ସମେଣ୍ଟ ଟିମ୍‍ ରହିଛି। ସୋସିଆଲ ମିଡିଆ ସହାୟତାରେ ଏସମ୍ପର୍କରେ ଲୋକଙ୍କୁ ଜଣାଇ ଦିଆଯିବ ବୋଲି ଟ୍ରାଫିକ୍‍ ଡିସିପି ଶ୍ରୀ ପାତ୍ର ସୂଚନା ଦେଇଛନ୍ତି। ଟ୍ରାଫିକ ପୁଲିସ କିମ୍ବା କମିସନରେଟ୍‍ ପୁଲିସର ଟୁଇଟର, ଏଫ୍‍ଏମ୍‍ ରେଡିଓରେ ଟ୍ରାଫିକ ସମ୍ପର୍କିତ ସୂଚନା ପ୍ରଦାନ କରାଯିବ। ସୋସିଆଲ ମିଡିଆ ଜରିଆରେ ସାଧାରଣ ଲୋକେ ନିଜ ଅସୁବିଧା ଜଣାଇପାରିବେ ବୋଲି ଟ୍ରାଫିକ ଏସିପି ସ୍ୱସ୍ତିକ ପଣ୍ଡା ସୂଚନା ଦେଇଛନ୍ତି।

ଜାରିହେବ ଆନିମେଟେଡ୍‍ ଭିଡିଓ,୪ଟି ସ୍ଥାନରେ ପାର୍କିଂ ବ୍ୟବସ୍ଥା 

କଟକ ଅବା ପୁରୀ ପଟୁ ଭୁବନେଶ୍ୱରର କଳିଙ୍ଗ ଷ୍ଟାଡିୟମକୁ ଆସୁଥିବା ହକି ପ୍ରେମୀକୁ ବାଟ ଦେଖାଇବ ଆନିମେଟେଡ୍‍ ଭିଡିଓ। ସହରରେ ଲାଗିଥିବା ଏଲ୍‍ଇଡି ସ୍କ୍ରିନ୍‍ରେ କଳିଙ୍ଗ ଷ୍ଟାଡିୟମ ପହଞ୍ଚିବା ସହ କେଉଁଠି ପାର୍କିଂ କରିବେ, ତା’ର ସର୍ବିଶେଷ ତଥ୍ୟ ପାଇପାରିବେ। ସହରକୁ ପ୍ରବେଶ କରୁଥିବା ପଥଗୁଡ଼ିକରେ ଲାଗିବ ଏଲ୍‍ଇଡି ସ୍କିନ୍‍। ଫଳରେ ଦେଶ ଓ ବିଦେଶରୁ ଆସୁଥିବା ଲୋକେ ଭିଡ଼ରେ ନ ଫସି କଳିଙ୍ଗ ଷ୍ଟାଡିୟମରେ ପହଞ୍ଚିବା ସହ ଠିକ୍‍ ସ୍ଥାନରେ ବାଇକ୍‍ କିମ୍ବା କାର୍‍ ପାର୍କିଂ କରିପାରିବ।

ସେହିପରି ଟ୍ରାଫିକ ଭିଡ଼କୁ ଏଡେଇବା ଲାଗି ଏଫ୍‍ଏମ୍‍ ରେଡିଓ କିମ୍ବା ପୁଲିସର ଟୁଇଟ୍‍ର ଆକାଉଣ୍ଟରେ ଭିଡ଼ ଅଞ୍ଚଳ ବିଷୟରେ ତଥ୍ୟ ପାଇବେ ସାଧାରଣଲୋକେ। ଆର୍‍ଓ, ନିୟୁ ଏଜି କଲୋନୀ, ନିକୋ ପାର୍କରେ କାର୍‍ ଓ ବେହେରାସାହି ରୋଡ୍‍ ବାଇକ ପାର୍କିଂ ପାଇଁ ୪ଟି ସ୍ଥାନରେ ପାର୍କିଂ ବ୍ୟବସ୍ଥା କରାଯାଇଛି। ଚିହ୍ନଟ କରାଯାଇଥିବା ପାର୍କିଂ ପଏଣ୍ଟରେ କିଭଳି ସୁରୁଖୁରରେ ହକି ପ୍ରେମୀ ପହଞ୍ଚିବେ ସେମାନଙ୍କ ଲାଗି ଆନିମେଟେଡ୍‍ ଭିଡ଼ିଓ ଜାରି କରିବ ଟ୍ରାଫିକ ପୁଲିସ।

କଟକ : ମହାସମାରୋହରେ ପାଳନ କରାଯିବ ହକି ବିଶ୍ୱକପ୍‍ର ଉଦ୍‍ଘାଟନୀ ଉତ୍ସବ। ବଲିଉଡ ତାରକା ରଣବୀର ସିଂହ, ଦିଶା ପଟାନୀ ଯୋଗଦେବେ। କୋରିଆନ୍‍ କେ-ପପ୍‍ ଗ୍ରୁପ ‘ବ୍ଲାକସ୍ୱାନ’ ଉତ୍ସବର ମୁଖ୍ୟ ଆକର୍ଷଣ ପାଲଟିବ। ଜାନୁଆରୀ ୧୧ରେ କଟକର ବାରବାଟୀ ଷ୍ଟାଡିୟମରେ ହେବାକୁ ଥିବା ଉଦଘାଟନୀ ଉତ୍ସବ ପାଇଁ ଆଜିଠୁ ଠାରୁ ଟିକଟ ବିକ୍ରି କରାଯିବ। ଅନଲାଇନ୍‍ ପ୍ଲାଟଫର୍ମ ପେଟିଏମ ଇନସାଇଡରରେ ଟିକଟ ଉପଲବ୍ଧ ରହିବ। ଆଜି ଦିନ ୧୨ଟା ଠାରୁ ଦର୍ଶକମାନେ ଏହି ଟିକଟ କିଣିପାରିବେ। ଟିକଟ ଦାମ୍ ୨୫୦ରୁ ୫୦୦ ଟଙ୍କା ରଖାଯାଇଛି ।

ଲଗାତର ଦ୍ୱିତୀୟ ଥର ନିମନ୍ତେ ଓଡ଼ିଶାରେ ହକି ବିଶ୍ୱକପ୍‍ ଆୟୋଜନ ହେବାକୁ ଯାଉଛି। ଓଡ଼ିଶାର ସଂସ୍କୃତି, ପରମ୍ପରା ଓ ଦେଶର ଗୌରବ ଉଦ୍‍ଘାଟନୀ ଉତ୍ସବରେ ଦେଖିବାକୁ ମିଳିବ। ହକି ବିଶ୍ୱକପ୍‍ର ଖେଳ ଭୁବନେଶ୍ୱର ଓ ରାଉରକେଲାରେ ଜାନୁଆରୀ ୧୩ରୁ ଆରମ୍ଭ ହେବାକୁ ଥିଲାବେଳେ ଏହାର ଦୁଇ ଦିନ ଆଗରୁ ଅର୍ଥାତ୍‍ ଜାନୁଆରୀ ୧୧ରେ ଉଦ୍‍ଘାଟନୀ ଉତ୍ସବ କଟକର ବାରବାଟୀ ଷ୍ଟାଡିୟମରେ ଆୟୋଜିତ ହେବ। ଏହି ଉତ୍ସବରେ ନୃତ୍ୟ, ସଙ୍ଗୀତ, ସଂସ୍କୃତି ଓ ବୈଷୟିକ ଜ୍ଞାନ କୌଶଳର ମିଶ୍ରଣରେ ଏହା ପ୍ରତିଫଳିତ ହେବ। ଓଡ଼ିଆ କଳାକାରଙ୍କ ସମେତ ଜାତୀୟ ଏବଂ ଅନ୍ତର୍ଜାତୀୟ ସ୍ତରର ସେଲିବ୍ରିଟି ଯୋଗ ଦେବେ। ଭାରତୀୟ ଏବଂ ୧୫ଟି ଦେଶରୁ ଆସିଥିବା ବିଦେଶୀ ଅତିଥିମାନେ ଉଦ୍‍ଘାଟନୀ ଉତ୍ସବରେ ହକି ଖେଳର ଉତ୍ସାହକୁ ମିଳିମିଶି ପାଳନ କରିବେ’ ବୋଲି ହକି ଇଣ୍ଡିଆ ସଭାପତି ତଥା ପଦ୍ମଶ୍ରୀ ଦିଲ୍ଲୀପ ତିର୍କୀ ପ୍ରେସବିବୃତ୍ତି ମାଧ୍ୟମରେ କହିଛନ୍ତି।

ହକି ବିଶ୍ବକପ୍ ଉଦଘାଟନୀ ସମାରୋହରେ କମ୍ପିବ ବାରବାଟୀ : ରଣବୀର-ଦିଶାଙ୍କ ସହ କେ-ପପ୍ ବ୍ୟାଣ୍ଡ୍ ବ୍ଲାକସ୍ବାନ୍ ସଂଗୀତରେ ଝୁମିବେ ଦର୍ଶକ @thesakala https://t.co/u09MwtEYoV #HockeyIndia #RanveerSingh #DishaPatani #Blackswan #HockeyWorldCup2023 #BarabatiStadium

— Sakala (ସକାଳ) (@TheSakala) December 27, 2022

ହକି ବିଶ୍ୱକପ୍‍-୨୦୨୩ର ଗୀତ ପ୍ରସ୍ତୁତ କରିଥିବା ବଲିଉଡ୍‍ର ସଙ୍ଗୀତ ନିର୍ଦ୍ଦେଶକ ପ୍ରୀତମ ଉତ୍ସବରେ ସାମିଲ ହେବେ। କଣ୍ଠଶିଳ୍ପୀ ବେନି ଦୟାଲ, ନୀତି ମୋହନ, ଲିସା ମିଶ୍ର, ଅମିତ ମିଶ୍ର, ଅନ୍ତରା ମିଶ୍ର, ଶ୍ରୀରାମଚନ୍ଦ୍ର, ନକ୍ସ ଅଜିଜ, ଶଲମାଲି ଖୋଲଗାଡେ, ଗାୟିକା ନମିତା ମେଲେକା ପ୍ରମୁଖ ଯୋଗଦେବେ। ବ୍ଲାକସ୍ୱାନ ଗ୍ରୁପରେ ଦେଖିବାକୁ ମିଳିବ ଓଡ଼ିଆ ଝିଅ ଶ୍ରୀୟା ଲେଙ୍କାଙ୍କୁ। ଏତଦ୍‍ବ୍ୟତୀତ ଉଦ୍‍ଘାଟନୀ ଉତ୍ସବରେ ଗୁରୁ ଅରୁଣା ମହାନ୍ତି, ଶିଆମକ ଦାଭର ନୃତ୍ୟ ପରିବେଷଣ କରିବେ। ଉଦଘାଟନୀ ଉତ୍ସବର କାର୍ଯ୍ୟକ୍ରମକୁ ‘ସେଲିବ୍ରେସନ’ର ଆଖ୍ୟା ଦିଆଯାଇଛି।

ଭୁବନେଶ୍ବର: ରାଜଧାନୀରେ ହକି ଫିଭର । ଆଜି ଭୁବନେଶ୍ୱରରେ ପହଞ୍ଚିଛନ୍ତି ଭାରତୀୟ ପୁରୁଷ ହକି ଟିମ୍। ବିଶ୍ୱକପ୍ ଖେଳିବା ପାଇଁ ଭୁବନେଶ୍ୱରରେ ପହଞ୍ଚିଛନ୍ତି ଭାରତୀୟ ଟିମର ସମସ୍ତ ଖେଲାଳି।  ହକି ଟିମକୁ ବିମାନବନ୍ଦରରେ ଭବ୍ୟ ସ୍ବାଗତ କରାଯାଇଛି। ଜାନୁଆରୀ ୧୩ରୁ ୨୯ ତାରିଖ ପର୍ଯ୍ୟନ୍ତ ଖେଳାଯିବ ବିଶ୍ବକପ । ରାଉରକେଲା ଓ ଭୁବନେଶ୍ବରରେ ସମସ୍ତ ମ୍ୟାଚ ଖେଳାଯିବ। ଭାରତୀୟ ଟିମରେ ୨ ଓଡ଼ିଆ ଖେଳାଳି ସମିଲ ଅଛନ୍ତି। ଭାରତ ଜାନୁଆରୀ ୧୩ରେ ସ୍ପେନ ବିପକ୍ଷରେ ପ୍ରଥମ ମ୍ୟାଚ ଖେଳି ଅଭିଯାନ ଆରମ୍ଭ କରିବ ।