ପାରାଦୀପ: ଓଡ଼ିଶା ଉପକୂଳ ବଙ୍ଗୋପସାଗରରେ ବୁଡ଼ିଯିବା ଆଶଙ୍କା କରାଯାଉଥିବା ଏକ ପାନାମା ପଞ୍ଜିକୃତ କାର୍ଗୋ ଜାହାଜର ଦୁଇ ଜଣ ଚାଇନିଜ୍ ନାବିକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ଗୁରୁବାର ଦିନ ସେମାନଙ୍କୁ ପାରାଦୀପ ବନ୍ଦରକୁ ଅଣାଯାଇଥିବା ସୂଚନା ମିଳିଛି।

ରିପୋର୍ଟ ଅନୁଯାୟୀ, ଉଦ୍ଧାର ହୋଇଥିବା ଦୁଇ ନାବିକ ହେଉଛନ୍ତି ପାନ୍ ଟୋଙ୍ଗଲାଇ ଏବଂ ଚେନ୍ ଜିଆନହେ। ଗତ ଅଗଷ୍ଟ ୨୨ ତାରିଖରେ ଏକ ଲାଇଫ୍ ରାଫ୍ଟ (ଜୀବନରକ୍ଷକ ଡଙ୍ଗା) ସାହାଯ୍ୟରେ ସମୁଦ୍ରରେ ଭାସୁଥିବା ବେଳେ ମର୍ଚ୍ଚାଣ୍ଟ ଟ୍ୟାଙ୍କର ଏମଟି ଆଇସପୋସ୍ ସେମାନଙ୍କୁ ଉଦ୍ଧାର କରିଥିଲା। ପରେ ସେମାନଙ୍କୁ ଭାରତୀୟ ତଟରକ୍ଷୀ ବାହିନୀର ଜାହାଜ ବରଦକୁ ସ୍ଥାନାନ୍ତର କରାଯାଇଥିଲା, ଯାହା ସେମାନଙ୍କୁ ସୁରକ୍ଷିତ ଭାବେ କୂଳକୁ ଆଣିଥିଲା।

ଉଲ୍ଲେଖଯୋଗ୍ୟ ଯେ, ଏମଭି ଓସେନ୍ ୱିନର୍ ନାମକ ୨୨୫ ମିଟର ଲମ୍ବର ଏହି ଜାହାଜଟିରେ ୭୧,୦୦୦ ଟନ୍ ଲୁହାପଥର ବୋଝେଇ ହୋଇଥିଲା। ଏହା ପାରାଦୀପରୁ ସିଙ୍ଗାପୁର ଅଭିମୁଖେ ଯାତ୍ରା କରୁଥିବା ସମୟରେ ହଠାତ୍ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଅଗଷ୍ଟ ୨୨ରେ ଭିକ୍ଟୋରି ଷ୍ଟାର୍ ଗ୍ରୁପ୍ କୋ. ଲିମିଟେଡ୍ ପକ୍ଷରୁ ଶ୍ରୀ ବିଜୟ ପୁରମ୍ ସ୍ଥିତ ମେରିଟାଇମ୍ ରେସ୍କ୍ୟୁ କୋଅର୍ଡିନେସନ୍ ସେଣ୍ଟର (MRCC)କୁ ଜାହାଜ ନିଖୋଜ ହେବା ନେଇ ରିପୋର୍ଟ ଦିଆଯାଇଥିଲା।

ଏହି ବିରାଟ କାର୍ଗୋ ଜାହାଜରେ ମୋଟ ୨୪ ଜଣ କ୍ରୁ ସଦସ୍ୟ ଥିଲେ। ସେମାନଙ୍କ ମଧ୍ୟରେ ୨୦ ଜଣ ଚୀନ୍, ୩ ଜଣ ମିଆଁମାର ଏବଂ ଜଣେ ବାଂଲାଦେଶୀ ନାଗରିକ ସାମିଲ ଥିଲେ। ଘଟଣା ସମ୍ପର୍କରେ ଖବର ପାଇବା ପରେ ଭାରତୀୟ ତଟରକ୍ଷୀ ବାହିନୀ, ଭାରତୀୟ ନୌସେନା ଏବଂ ଅନ୍ୟାନ୍ୟ ସଂସ୍ଥା ମିଳିତ ଭାବେ ବ୍ୟାପକ ସର୍ଚ୍ଚ ଆଣ୍ଡ ରେସ୍କ୍ୟୁ (ଖୋଜାଖୋଜି ଓ ଉଦ୍ଧାର) ଅଭିଯାନ ଆରମ୍ଭ କରିଥିଲେ। ଭାରତୀୟ ନୌସେନାର ଏକ P-8I ବିମାନକୁ ପାରାଦୀପ ଠାରୁ ପ୍ରାୟ ୨୩୦ ନଟିକାଲ୍ ମାଇଲ୍ ଦକ୍ଷିଣ-ପୂର୍ବ ଦିଗରେ ଆକାଶମାର୍ଗରୁ ନିରୀକ୍ଷଣ ପାଇଁ ନିୟୋଜିତ କରାଯାଇଥିଲା। ଏହି ବିମାନ ସମୁଦ୍ରରେ ଭାସୁଥିବା ତିନୋଟି ଲାଇଫ୍ ରାଫ୍ଟ ଠାବ କରିବାରେ ସଫଳ ହୋଇଥିଲା।

ଓଡ଼ିଶାର ପାରାଦୀପ ବନ୍ଦରରୁ ଲୁହାପଥର ବୋଝେଇ କରି ଚୀନ୍ ଅଭିମୁଖେ ଯାଉଥିବା ପାନାମା ପତାକାବାହୀ ମାଲବାହୀ ଜାହାଜ ଏମ୍‌ଭି ଓସେନ୍ ୱିନର (MV Ocean Winner) ବଙ୍ଗୋପସାଗରରେ ବୁଡ଼ିଯାଇଛି। ମିଳିଥିବା ସୂଚନା ଅନୁଯାୟୀ, ଜାହାଜଟି ପାରାଦୀପ ଉପକୂଳରୁ ପ୍ରାୟ ୨୯୦ ନଟିକାଲ୍ ମାଇଲ୍ (ପୋର୍ଟ ବ୍ଲେୟାର ଠାରୁ ପ୍ରାୟ ୩୯୬ କିମି) ଦୂରରେ ଥିବା ବେଳେ ଏହାର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଏହି ଜାହାଜରେ ପ୍ରାୟ ୭୨,୦୦୦ ଟନ୍ ଲୁହାପଥର ବୋଝେଇ ହୋଇଥିଲା।

ନିଖୋଜ କ୍ରୁ ସଦସ୍ୟଙ୍କ ପାଇଁ ସର୍ଚ୍ଚ ଅପରେସନ୍ ଜାରି

ଏହି ଜାହାଜରେ ସମୁଦାୟ ୨୪ ଜଣ କ୍ରୁ ସଦସ୍ୟ ଥିଲେ, ଯେଉଁଥିରେ ୨୦ ଜଣ ଚୀନ୍ ନାଗରିକ, ୩ ଜଣ ମିଆଁମାର ଏବଂ ଜଣେ ବାଂଲାଦେଶର ନାଗରିକ ଥିବା ଜଣାପଡ଼ିଛି। ଘଟଣା ସମ୍ପର୍କରେ ଖବର ପାଇବା ପରେ ଭାରତୀୟ ନୌସେନା ଏବଂ ତଟରକ୍ଷୀ ବାହିନୀ (Indian Coast Guard) ପକ୍ଷରୁ ତୁରନ୍ତ ସର୍ଚ୍ଚ ଏବଂ ରେସ୍କ୍ୟୁ ଅପରେସନ୍ ଆରମ୍ଭ କରାଯାଇଛି। ଅନ୍ୟ ଏକ ବାଣିଜ୍ୟିକ ଜାହାଜ ସାହାଯ୍ୟରେ ଦୁଇ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବେଳେ ଅନ୍ୟ ୨୨ ଜଣ ଏବେ ବି ନିଖୋଜ ଅଛନ୍ତି। ନିଖୋଜ ସଦସ୍ୟମାନଙ୍କୁ ଖୋଜିବା ପାଇଁ ତଟରକ୍ଷୀ ବାହିନୀ ପକ୍ଷରୁ ତିନୋଟି ପାଟ୍ରୋଲିଂ ଜାହାଜ ମୁତୟନ କରାଯାଇଛି।

କେନ୍ଦ୍ରମନ୍ତ୍ରୀ ପ୍ରକାଶ କଲେ ଉଦ୍ବେଗ

କେନ୍ଦ୍ର ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରୀ ସର୍ବାନନ୍ଦ ସୋନୱାଲ ଏହି ଘଟଣାକୁ ନେଇ ଗଭୀର ଉଦ୍ବେଗ ପ୍ରକାଶ କରିଛନ୍ତି। ସୋସିଆଲ୍ ମିଡିଆ ଏକ୍ସ (X) ରେ ସେ ସୂଚନା ଦେଇ କହିଛନ୍ତି ଯେ, "ଏମ୍‌ଭି ଓସେନ୍ ୱିନର ଜାହାଜ ଦୁର୍ଘଟଣାଗ୍ରସ୍ତ ହେବା ଅତ୍ୟନ୍ତ ଦୁଃଖଦାୟକ। ସମସ୍ତ ଏଜେନ୍ସି ମିଳିତ ଭାବେ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଉଦ୍ଧାର ହୋଇଥିବା ଦୁଇ ଜଣଙ୍କୁ ଆବଶ୍ୟକ ଚିକିତ୍ସା ଯୋଗାଇ ଦିଆଯାଉଛି ଏବଂ ଅନ୍ୟ କ୍ରୁ ସଦସ୍ୟମାନଙ୍କ ସୁରକ୍ଷା ପାଇଁ ମୁଁ ପ୍ରାର୍ଥନା କରୁଛି।"

ଭାରତୀୟ ତଟରକ୍ଷୀ ବାହିନୀ (Indian Coast Guard) ମୁମ୍ବାଇ ଉପକୂଳରେ ଏକ ବଡ଼ ଧରଣର ଅଭିଯାନ ଚଳାଇ ତିନୋଟି ବିଦେଶୀ ତୈଳ ଟ୍ୟାଙ୍କରକୁ ଜବତ କରିଛି। ରିପୋର୍ଟ ଅନୁଯାୟୀ, ଏହି ତିନୋଟି ଜାହାଜ ଇରାନ ସହ ଜଡିତ ଥିବାବେଳେ ଆମେରିକା ଦ୍ୱାରା ଏଗୁଡିକ ଉପରେ କଟକଣା ଲଗାଯାଇଥିଲା। ସମୁଦ୍ର ମଧ୍ୟରେ ବେଆଇନ ଭାବେ ତୈଳ ହସ୍ତାନ୍ତର (ship-to-ship transfer) କରୁଥିବା ସନ୍ଦେହରେ ଭାରତ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି।

କେଉଁ ଜାହାଜଗୁଡିକ ଜବତ ହୋଇଛି?

ଜବତ ହୋଇଥିବା ତିନୋଟି ଟ୍ୟାଙ୍କରର ନାମ ହେଉଛି Stellar Ruby, Asphalt Star ଏବଂ Al Jafzia। ଏହି ଜାହାଜଗୁଡିକ ମୁମ୍ବାଇ ଉପକୂଳରୁ ପ୍ରାୟ ୧୦୦ ନଟିକାଲ ମାଇଲ ଦୂରରେ ସନ୍ଦିଗ୍ଧ ଅବସ୍ଥାରେ ଗତିବିଧି କରୁଥିଲେ। ସୂଚନା ମୁତାବକ, ଏହି ଜାହାଜଗୁଡିକ ବାରମ୍ବାର ନିଜର ପରିଚୟ ବଦଳାଇ ଆଇନର ଆଖିରେ ଧୂଳି ଦେବାକୁ ଚେଷ୍ଟା କରୁଥିଲେ।

ଆମେରିକା ଲଗାଇଥିଲା କଟକଣା

ଉଲ୍ଲେଖନୀୟ ବିଷୟ ହେଉଛି, ଏହି ଜାହାଜଗୁଡିକ ଉପରେ ଆମେରିକା ପୂର୍ବରୁ ଆର୍ଥିକ କଟକଣା (US Sanctions) ଲଗାଇ ସାରିଛି। ଏଗୁଡିକ ଇରାନରୁ ବେଆଇନ ଭାବେ ତୈଳ ପରିବହନ କରୁଥିବା ଅଭିଯୋଗ ରହିଛି। ଭାରତୀୟ ଅଧିକାରୀମାନେ ଏହି ଜାହାଜଗୁଡିକୁ ଅଟକାଇବା ପରେ ମୁମ୍ବାଇ ବନ୍ଦରକୁ ଅଧିକ ତଦନ୍ତ ପାଇଁ ଆଣିଛନ୍ତି। ଏହି ଘଟଣା ପରେ ଭାରତୀୟ ସମୁଦ୍ର ସୀମାରେ ନିରୀକ୍ଷଣକୁ କଡାକଡି କରାଯାଇଛି।

ଇରାନର ପ୍ରତିକ୍ରିୟା

ଅନ୍ୟପକ୍ଷରେ, ଇରାନର ରାଷ୍ଟ୍ରାୟତ୍ତ ତୈଳ କମ୍ପାନୀ (National Iranian Oil Company) ଏହି ଘଟଣା ଉପରେ ପ୍ରତିକ୍ରିୟା ରଖିଛି। କମ୍ପାନୀ ଦାବି କରିଛି ଯେ ଜବତ ହୋଇଥିବା ଟ୍ୟାଙ୍କର କିମ୍ବା ଏଥିରେ ଥିବା ସାମଗ୍ରୀ ସହିତ ସେମାନଙ୍କର କୌଣସି ସମ୍ପର୍କ ନାହିଁ। ତେବେ ଭାରତ ସରକାର ଏହି ମାମଲାର ଗଭୀର ତଦନ୍ତ ଜାରି ରଖିଛନ୍ତି।

ନୂଆଦିଲ୍ଲୀ: ଭାରତୀୟ ତଟରକ୍ଷୀ ବାହିନୀଙ୍କୁ ବଡ ସଫଳତା । ଗୁଜରାଟର ଆତଙ୍କବାଦ ନିରୋଧ ସ୍କ୍ୱାଡ(ଏଟିଏସ) ର ସୂଚନା ଆଧାରରେ ଭାରତୀୟ ତଟରକ୍ଷୀ ବାହିନୀ ଗୁଜରାଟ ଉପକୂଳ ଆରବ ସାଗରରୁ ଏକ ପାକିସ୍ତାନୀ ଡ଼ଙ୍ଗା ଜବତ କରିଛି । ସେଥିରୁ ପ୍ରାୟ ୩୦୦ କୋଟି ଟଙ୍କା ମୂଲ୍ୟର ୪୦ କିଲୋଗ୍ରାମ ନିଶାଦ୍ରବ୍ୟ ଓ ବିପୁଳ ପରିମାଣ ଅସ୍ତ୍ରଶସ୍ତ୍ର ଜବତ ହୋଇଛି । ଏହା ସହିତ ଡଙ୍ଗାରେ ଥିବା ୧୦ ଜଣ ପାକିସ୍ତାନୀଙ୍କୁ ମଧ୍ୟ ସୁରକ୍ଷାକର୍ମୀମାନେ ଗିରଫ କରିଛନ୍ତି। ତଟରକ୍ଷୀ ବାହିନୀ ଡଙ୍ଗା ସହ ପାକିସ୍ତାନ ନାଗରିକମାନଙ୍କୁ ଗିରଫ କରି ଗୁଜରାଟ ଉପକୂଳ ଓଖାକୁ ଆଣିଛି। ଏ ସମ୍ପର୍କରେ ଭାରତୀୟ ତଟରକ୍ଷୀ ବାହିନୀ ଟ୍ୱିଟ କରିବା ସହ ପୂରା ଅପରେସନରେ ଗୁଜରାଟର ଆତଙ୍କବାଦ ନିରୋଧ ସ୍କ୍ୱାଡ(ଏଟିଏସ) ସକ୍ରିୟ ଭୂମିକା ଗ୍ରହଣ କରିଥିଲା ବୋଲି କହିଛି।

@IndiaCoastGuard in joint ops with ATS #Gujarat, apprehended #Pakistani Fishing Boat Al Soheli with 10 crew in Indian waters. During rummaging Arms, ammunition & approx 40 Kgs #narcotics worth Rs 300 cr found concealed. Boat being brought to #Okha for further investigation. pic.twitter.com/3YwzKne6bQ

— Indian Coast Guard (@IndiaCoastGuard) December 26, 2022

ଗୁଜୁରାଟ ଏଟିଏସର ଗୁଇନ୍ଦା ସୂଚନା ଆଧାରରେ ଭାରତୀୟ ତଟରକ୍ଷୀ ବାହିନୀ ପକ୍ଷରୁ ଗତ ୨୫-୨୬ ମଧ୍ୟରାତ୍ରିରେ ଆରବ ସାଗରରେ ଏକ ବଡ଼ଧରଣର ଅପରେସନ ଆରମ୍ଭ କରାଯାଇଥିଲା । ଅପରେସନ ବେଳେ ଭାରତୀୟ ଜଳରାଶିରୁ ଅଲ ସୋହେଲି ନାମକ ଗୋଟିଏ ପାକିସ୍ତାନ ବୋଟକୁ କାବୁ କରାଯାଇଛି। ଚେତାବନୀ ଫାୟାରିଂ ସତ୍ତ୍ବେ ସେମାନେ ନ ଅଟକି ପଳାଇଯାଉଥିବାବେଳେ କୋଷ୍ଟଗାର୍ଡ ପକ୍ଷରୁ ତାହାକୁ ଜବତ କରାଯାଇଥିଲା । ଏଥିରେ ୧୦ ଜଣ କ୍ରୁ ସଦସ୍ୟ ରହିଥିଲେ। ଡଙ୍ଗାକୁ ଓଖଲା ଉପକୂଳକୁ ଆଣି ଯାଞ୍ଚ କରାଯାଇଛି। ଏହା ସହିତ ଡ଼ଙ୍ଗାରୁ ବହୁ ପରିମାଣର ଅସ୍ତ୍ରଶସ୍ତ୍ର ଏବଂ ଗୋଳାବାରୁଦ ଏବଂ ୪୦ କିଲୋଗ୍ରାମ ନିଶାଦ୍ରବ୍ୟ ଜବତ କରାଯାଇଛି । ମାଛଧରା ବୋଟ ନାଁରେ ତାହା ଡ୍ରଗ୍ସ ଚୋରାଚାଲାଣ କରୁଥିବା ଜଣାପଡ଼ିଛି । ଏ ନେଇ ଗିରଫ ବ୍ୟକ୍ତିମାନଙ୍କୁ ଅଧିକ ପଚରାଉଚୁରା ଚାଲିଛି ।