ନୂଆଦିଲ୍ଲୀ: ଆପ୍ ନେତା ତଥା ସାଂସଦ ସଞ୍ଜୟ ସିଂହଙ୍କୁ ସୁପ୍ରିମକୋର୍ଟରୁ ବଡ଼ ଆଶ୍ୱସ୍ତି । ସଞ୍ଜୟ ସିଂହଙ୍କୁ ଆଜି ଜାମିନ ପ୍ରଦାନ କରିଛନ୍ତି ସୁପ୍ରିମକୋର୍ଟ । ଗତ ୬ ମାସରୁ ଅଧିକ ସମୟ ହେବ ସେ ଜେଲରେ ଥିଲେ । ବହୁ ଚର୍ଚ୍ଚିତ ଦିଲ୍ଲୀ ଅବକାରୀ ନୀତି ଦୁର୍ନୀତି ମାମଲାରେ ଗତ ବର୍ଷ ଅକ୍ଟୋବର ମାସରେ ଗିରଫ ହୋଇଥିଲେ ସାଂସଦ ସଞ୍ଜୟ ସିଂହ । ଆଜି ସୁପ୍ରିମକୋର୍ଟରେ ତାଙ୍କ ଜାମିନ ଆବେଦନ ଶୁଣାଣି ବେଳେ ସୁପ୍ରିମକୋର୍ଟ ଇଡିକୁ ଅନେକ ପ୍ରଶ୍ନ କରିଥିଲେ ଯେଉଁଥିରେ କୌଣସି ପ୍ରକାର ପ୍ରତିବାଦ କରି ନଥିଲା ଇଡି । ବର୍ତ୍ତମାନ ସଞ୍ଜୟଙ୍କୁ ଏହି ଜାମିନ ମିଳିବା ପରେ କେସର ଟ୍ରାଏଲ ଶେଷ ନ ହେବା ଯାଏଁ ତାଙ୍କୁ ଗିରଫ କରାଯାଇପାରିବନାହିଁ । ତେବେ ୨୦୨୪ ସାଧାରଣ ନିର୍ବାଚନ ପୂର୍ବରୁ ସଞ୍ଜୟ ସିଂହଙ୍କୁ ଜାମିନ ମିଳିବା ଏକ ପ୍ରକାର ଆପ୍ ଦଳର ମନୋବଳକୁ ଦୃଢ କରିଥିବା କୁହାଯାଉଛି ।

ନୂଆଦିଲ୍ଲୀ: ଆମ ଆଦମୀ ପାର୍ଟି (ଆପ୍) ରାଜ୍ୟସଭା ସାଂସଦ ସଞ୍ଜୟ ସିଂଙ୍କୁ ୫ ଦିନିଆ ରିମାଣ୍ଡରେ ନେଲା ପ୍ରବର୍ତ୍ତନ ନିର୍ଦ୍ଦେଶାଳୟ । ରାଉଜ ଏଭେନ୍ୟୁ କୋର୍ଟ ଗୁରୁବାର ଏହି ରାୟ ଦେଇଛନ୍ତି। ଇଡି ପକ୍ଷରୁ ୧୦ ଦିନ ରିମାଣ୍ଡ ଦାବି କରାଯାଇଥିବା ବେଳେ ୫ ଦିନ ରିମାଣ୍ଡ ଦେଇଛନ୍ତି ରାଉଜ୍ ଆଭେନ୍ୟୁ କୋର୍ଟ । ଇଡି ସଞ୍ଜୟ ସିଂହଙ୍କୁ ଦିଲ୍ଲୀ ମଦ ଦୁର୍ନୀତି ମାମଲାରେ ବୁଧବାର ଗିରଫ କରିଥିଲା।

ଇଡି କହିଛି ଯେ ଦିଲ୍ଲୀ ବ୍ୟବସାୟୀ ଦୀନେଶ ଅରୋରା ପ୍ରଥମ ଅବକାରୀ ନୀତି ଦୁର୍ନୀତି ଘଟଣାରେ ଅଭିଯୁକ୍ତ ଥିଲେ। ତାଙ୍କୁ ଗିରଫ ମଧ୍ୟ କରାଯାଇଥିଲା। ତାଙ୍କ ବୟାନ ଆଧାରରେ ଇଡି ତଦନ୍ତ କରିବା ସହ ସଞ୍ଜୟ ସିଂହ ୩ କୋଟି ଟଙ୍କା ପାଇଥିବା କୋର୍ଟଙ୍କୁ ଅବଗତ କରାଇଛି। ୪ ଅକ୍ଟୋବର ବୁଧବାର ତାଙ୍କ ଘର ଖାନତଲାସ କାଳରେ ସେଥିରେ ଡିଜିଟାଲ ଏଭିଡେନ୍ସ ମିଳିଛି।

ତେବେ ସଞ୍ଜୟଙ୍କ ଓକିଲ ମୋହିତ ମାଥୁର ଏହାର ବିରୋଧ କରିବା ସହ କହିଛନ୍ତି କି, ଏହି ମାମଲାରେ ଇଡିଙ୍କ ଷ୍ଟାର ସାକ୍ଷୀ ହେଉଛନ୍ତି ଦିନେଶ ଆରୋରା ଯିଏ ଉଭୟ ଇଡି ଓ ସିବିଆଇଙ୍କ ମାମଲାରେ ଅଭିଯୁକ୍ତ ଥିଲେ। ସେ ଏବେ ଉଭୟ ମାମଲାରେ ସରକାରୀ ସାକ୍ଷୀ ହୋଇଯାଇଛନ୍ତି। ଏଣୁ ତାଙ୍କ ବିଶ୍ୱସନୀୟତା ଉପରେ ଏବେ ପ୍ରଶ୍ନ ଉଠୁଛି । ସେହିପରି ଏହି ମାମଲାରେ ତଦନ୍ତକାରୀ ସଂସ୍ଥା କେବେ ହେଲେ ପୂର୍ବରୁ ସଞ୍ଜୟ ସିଂହଙ୍କୁ ସମନ କରି ନଥିଲା।

ନୂଆଦିଲ୍ଲୀ: ଆମ୍‌ ଆଦମୀ ପାର୍ଟି ସାଂସଦ ସଂଜୟ ସିଂହ ଗିରଫ । ଦିଲ୍ଲୀ ମଦ ଦୁର୍ନୀତି ମାମଲାରେ ସଂଜୟଙ୍କୁ ଗିରଫ କରିଛି ଇଡି । ଆଜି ସକାଳେ ଦିଲ୍ଲୀ ମଦ ଦୁର୍ନୀତି ମାମଲାରେ ସାଂସଦ ସଞ୍ଜୟ ସିଂଙ୍କ ବାସଭବନରେ ରେଡ୍ କରିଥିଲା ଇଡି। ଇଡି ଅଧିକାରୀମାନେ ସଞ୍ଜୟଙ୍କୁ ପଚରାଉଚରା କରିଥିଲେ। ସାଂସଦଙ୍କ ବାସଭବନ ଆଗରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଥିଲା । ପୂର୍ବରୁ ମଧ୍ୟ ଏହି ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଚଢାଉ କରିଥିଲା।

ତେବେ ଦିଲ୍ଲୀ ମଦ ଦୁର୍ନୀତି ମାସଲାରେ ଇଡି ଏକ ଚାର୍ଜସିଟ ଦାଖଲ କରିଥିଲେ ଯେଉଁଥିରେ ସଞ୍ଜୟ ସିଂଙ୍କ ନାମ ଉଲ୍ଲେଖ କରାଯାଇଥିଲା। ଗତଥର ଯେତେବେଳେ ଟିମ୍‌ ସଞ୍ଜୟ ସିଂଙ୍କ ଘରେ ପହଞ୍ଚିଥିଲେ, ସେତେବେଳେ ସେ ଇଡି ବିରୋଧରେ ମାନହାନି ମକଦ୍ଦମା ଦାୟର କରିଥିଲେ ।

ଏହି ମାମଲାରେ ପୂର୍ବରୁ ଗିରଫ ହୋଇ ଜେଲରେ ଅଛନ୍ତି ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ । ଚଳିତ ବର୍ଷ ଫେବ୍ରୁଆରୀରେ ମନୀଷ ସିସୋଦିଆଙ୍କୁ ଗିରଫ କରାଯାଇଛି । ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଆପର ଅନେକ ନେତା ତଦନ୍ତକାରୀ ସଂସ୍ଥାର ରାଡାରରେ ଅଛନ୍ତି । ପୂର୍ବରୁ ମନି ଲଣ୍ଡ୍ରିଂ ମାମଲାରେ ଆପ୍ ନେତା ସତ୍ୟେନ୍ଦ୍ର ଜୈନଙ୍କୁ ଗିରଫ କରିଛି ପ୍ରବର୍ତନ ନିର୍ଦ୍ଦେଶାଳୟ । ଅସୁସ୍ଥତା କାରଣରୁ ସୁପ୍ରିମକୋର୍ଟରୁ ସତ୍ୟେନ୍ଦ୍ର ଅନ୍ତରୀଣ ଜାମିନ ପାଇଛନ୍ତି ।

ନୂଆଦିଲ୍ଲୀ: କେନ୍ଦ୍ରୀୟ ତଦନ୍ତକାରୀ ସଂସ୍ଥାଗୁଡ଼ିକର ଦୁରୁପଯୋଗକୁ ନେଇ ଆଜି ରାଜ୍ୟସଭାର ଶୂନ୍ୟକାଳରେ ପ୍ରଶ୍ନ ଉଠାଇଛନ୍ତି ଆମ ଆଦମୀ ପାର୍ଟିର ସାଂସଦ ସଞ୍ଜୟ ସିଂହ। ଯାହାକୁ ନେଇ ରାଜ୍ୟସଭାରେ ଆଜି ହଙ୍ଗାମା ଦେଖିବାକୁ ମିଳିଥିଲା। କେନ୍ଦ୍ର ସରକାରଙ୍କୁ ଟାର୍ଗେଟ୍ କରି ସଞ୍ଜୟ ସିଂହ କହିଛନ୍ତି ଯେ, ବିରୋଧୀମାନଙ୍କୁ ନା ବାହାରେ ନା ସଂସଦ ଭିତରେ ସମସ୍ୟାକୁ ଉଠାଇବାକୁ ଦିଆଯାଉଛି। କେନ୍ଦ୍ର ତଦନ୍ତକାରୀ ସଂସ୍ଥାର ଦୁରୁପଯୋଗ କରି ବିରୋଧୀ ନେତାମାନଙ୍କୁ ଡରାଯାଉଛି ବୋଲି କହିଛନ୍ତି ସାଂସଦ ସଞ୍ଜୟ ସିଂହ ।

ଏନେଇ ସେ ତଥ୍ୟ ଦେଇ କହିଛନ୍ତି ଯେ, ଗତ ୮ ବର୍ଷରେ ବିରୋଧୀ ନେତାଙ୍କ ଉପରେ କେବଳ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦ୍ଵାରା ପାଖାପାଖି ୩ ହଜାର ଚଢାଉ କରାଗଲାଣି। ସେଥିମଧ୍ୟରୁ ଇଡି ମାତ୍ର ୨୩ ଜଣଙ୍କୁ ଦୋଷୀ ସାବ୍ୟସ୍ତ କରିଛି ବୋଲି ଆପ ସାଂସଦ କହିଛନ୍ତି। ଏହାକୁ ନେଇ ପଳାତକ ହୀରା ବ୍ୟବସାୟୀ ନିରବ ମୋଦୀ ଓ ଆଇପିଏଲ୍‌ ସଂସ୍ଥାପକ ଲଳିତ ମୋଦୀ ବିରୋଧରେ ଇଡି କାହିଁକି କାର୍ଯ୍ୟାନୁଷ୍ଠାନ କରୁନି କାହିଁକି ଚୁପ୍ ବସିଛି ବୋଲି ସଞ୍ଜୟ ପ୍ରଶ୍ନ କରିଛନ୍ତି। ରେଡ୍ଡୀ ଭାତ୍ରୃଦ୍ୱୟ ଓ ବିଜୟ ମାଲ୍ୟ, ୟେଦ୍ୟୁରାପ୍ପା ଏବଂ ବ୍ୟାପମ ଦୁର୍ନୀତିରେ ଇଡି ଓ ସିବିଆଇ କାହିଁକି କାର୍ଯ୍ୟାନୁଷ୍ଠାନ ନେଉନି ବୋଲି ପ୍ରଶ୍ନ କରିଛନ୍ତି ସଞ୍ଜୟ।

ଆପ ନେତାଙ୍କ ଉପରେ କିନ୍ତୁ କାର୍ଯ୍ୟାନୁଷ୍ଠାନ ନେଇ କେନ୍ଦ୍ର ସରକାର ଦେଶରେ ଏକଛତ୍ରବାଦର ସରକାର ଚଳାଉଛନ୍ତି ବୋଲି ସଞ୍ଜୟ ସିଂହ କହିଛନ୍ତି। ସେ କହିଛନ୍ତି ସିସୋଦିଆଙ୍କ ଘରେ ୧୪ ଘଣ୍ଟାର ଚଢ଼ାଉ, କେଜରିୱାଙ୍କ ଘରେ ଚଢ଼ାଉ, ସତ୍ୟୈନ୍ଦ୍ର ଜୈନ୍ ଏବେ ବି ଜେଲ୍‌ରେ ବନ୍ଦୀ ଅଛନ୍ତି। ଯଦି ଆପଣ ଦାଦାଗିରି ଓ ଏକଛତ୍ରବାଦୀ ଭାବରେ ଦେଶ ଚଳାଇଭାକୁ ଚାହୁଁଛନ୍ତି ତେବେ ସମସ୍ତଙ୍କୁ ଜେଲ୍‌ରେ ବନ୍ଦ କରିଦିଅନ୍ତୁ ବୋଲି ସଞ୍ଜୟ କହିଛନ୍ତି।