ବେଦାନ୍ତ ଡିମର୍ଜର (Vedanta Demerger) ପରେ ଗ୍ରୁପର ଚେୟାରମ୍ୟାନ ଅନିଲ ଅଗ୍ରୱାଲ (Anil Agarwal) ଏକ ବଡ଼ ଘୋଷଣା କରିଛନ୍ତି। ସୋମବାର ଦିନ ଷ୍ଟକ୍ ମାର୍କେଟରେ ୪ଟି ନୂଆ କମ୍ପାନୀର ଲିଷ୍ଟିଂ ଅବସରରେ ଶ୍ରୀ ଅଗ୍ରୱାଲ କହିଛନ୍ତି ଯେ, ବେଦାନ୍ତର ପ୍ରତ୍ୟେକ ବ୍ୟବସାୟର ମୂଲ୍ୟ ଆଗାମୀ ଦିନରେ ଖୁବ୍‌ଶୀଘ୍ର ୧୦୦ ବିଲିୟନ ଡଲାର (100 Billion Dollar) ଛୁଇଁବାର କ୍ଷମତା ରଖିଛି। ଭାରତରେ ଥିବା ବିପୁଳ ସୁଯୋଗକୁ ଦୃଷ୍ଟିରେ ରଖି କମ୍ପାନୀ ଏହି ମାଇଲଖୁଣ୍ଟ ହାସଲ କରିବା ନେଇ ସେ ଆଶାବ୍ୟକ୍ତ କରିଛନ୍ତି।

୫ଟି ସ୍ୱାଧୀନ କମ୍ପାନୀରେ ବିଭକ୍ତ ହେଲା ବେଦାନ୍ତ

ଗତବର୍ଷ ଘୋଷଣା କରାଯାଇଥିବା ଡିମର୍ଜର ପ୍ରକ୍ରିୟା ଶେଷ ହେବା ପରେ ବେଦାନ୍ତ ଗ୍ରୁପ୍ ଏବେ ୫ଟି ସ୍ୱାଧୀନ ଏବଂ ଲିଷ୍ଟେଡ୍ କମ୍ପାନୀରେ ପରିଣତ ହୋଇଛି। ମୂଳ କମ୍ପାନୀ ବେଦାନ୍ତ ଲିମିଟେଡ୍ (Vedanta Limited) ବ୍ୟତୀତ ଅନ୍ୟ ୪ଟି କମ୍ପାନୀ ଯଥା- ବେଦାନ୍ତ ଆଲୁମିନିୟମ (Vedanta Aluminium), ବେଦାନ୍ତ ଆଇରନ୍ ଆଣ୍ଡ ଷ୍ଟିଲ୍ (Vedanta Iron & Steel), ବେଦାନ୍ତ ଅଏଲ୍ ଆଣ୍ଡ ଗ୍ୟାସ୍ (Vedanta Oil & Gas) ଏବଂ ବେଦାନ୍ତ ପାୱାର୍ (Vedanta Power) ସେୟାର ବଜାରରେ ଲିଷ୍ଟ୍ ହୋଇଛନ୍ତି। ଶ୍ରୀ ଅଗ୍ରୱାଲଙ୍କ ଅନୁଯାୟୀ, ଏହି ୫ଟି ଯାକ ସେକ୍ଟରରେ ବିପୁଳ ସମ୍ଭାବନା ରହିଛି ଏବଂ ସେଗୁଡିକ ଭବିଷ୍ୟତରେ ନିଜ ନିଜ କ୍ଷେତ୍ରରେ ବିଶ୍ୱସ୍ତରୀୟ ଲିଡର୍ ହେବାକୁ ଯାଉଛନ୍ତି।

ଭାରତରେ ୨୦ ବିଲିୟନ ଡଲାରର ବିଶାଳ ନିବେଶ

ଶେୟାରଧାରକମାନଙ୍କୁ ସମ୍ବୋଧିତ କରି ଶ୍ରୀ ଅଗ୍ରୱାଲ କହିଛନ୍ତି ଯେ, ଭାରତର ଅର୍ଥନୀତି ଦ୍ରୁତ ଗତିରେ ବୃଦ୍ଧି ପାଉଛି ଏବଂ ଆଗାମୀ ଦିନରେ ଏଆଇ (AI) ତଥା ଶକ୍ତି କ୍ଷେତ୍ର (Energy Transition) ପାଇଁ ଖଣିଜ ଦ୍ରବ୍ୟ ଓ ତୈଳର ଆବଶ୍ୟକତା ଯଥେଷ୍ଟ ବଢିବ। ଏହି ଚାହିଦାକୁ ପୂରଣ କରିବା ପାଇଁ ବେଦାନ୍ତ ଗ୍ରୁପ୍ ଆସନ୍ତା ୩ ରୁ ୫ ବର୍ଷ ମଧ୍ୟରେ ଭାରତରେ ପ୍ରାୟ ୨୦ ବିଲିୟନ ଡଲାର (୨୦୦୦ କୋଟି ଡଲାର) ନିବେଶ କରିବାକୁ ଲକ୍ଷ୍ୟ ରଖିଛି। ଭାରତ ନିଜର ପ୍ରାକୃତିକ ସମ୍ପଦ ଆବଶ୍ୟକତାର ୫୦% ଆମଦାନୀ କରୁଥିବା ବେଳେ, ଦେଶରେ ଥିବା ଥୋରିୟମର ବିପୁଳ ଭଣ୍ଡାର (Thorium deposits) କୁ ବ୍ୟବହାର କରି ଆଗାମୀ ଦିନରେ ଆତ୍ମନିର୍ଭରଶୀଳ ହେବାକୁ ପଡିବ ବୋଲି ସେ ମତ ଦେଇଛନ୍ତି। ପରମାଣୁ ଶକ୍ତି କ୍ଷେତ୍ରରେ ମଧ୍ୟ ବେଦାନ୍ତ ୨୦,୦୦୦ ମେଗାୱାଟ୍ (20,000 MW) ବିଦ୍ୟୁତ୍ ଉତ୍ପାଦନ କରିବାକୁ ଦୀର୍ଘକାଳୀନ ଯୋଜନା ପ୍ରସ୍ତୁତ କରିଛି।

ନିବେଶକଙ୍କ ପାଇଁ ଲାଭ ଏବଂ ବଜାର ସ୍ଥିତି

ଶ୍ରୀ ଅଗ୍ରୱାଲ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ କମ୍ପାନୀ ପାଇଁ ନିବେଶକମାନଙ୍କ ସ୍ୱାର୍ଥ ସର୍ବୋପରି। ଗତ ୫ ବର୍ଷ ମଧ୍ୟରେ ବେଦାନ୍ତ ଆପଣା ଶେୟାରଧାରକମାନଙ୍କୁ ୩୦୦% ରିଟର୍ଣ୍ଣ ଦେବାରେ ସଫଳ ହୋଇଛି। ଏଥିସହିତ କମ୍ପାନୀ ଲଗାତାର ବଡ଼ ଧରଣର ଡିଭିଡେଣ୍ଡ୍ (୫୫% ଡିଭିଡେଣ୍ଡ୍ ୟିଲ୍ଡ) ପ୍ରଦାନ କରିଆସୁଛି।

ଅନ୍ୟପକ୍ଷରେ ସୋମବାର ନୂଆ କମ୍ପାନୀଗୁଡ଼ିକର ସେୟାର ମାର୍କେଟରେ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳିଛି। ଲିଷ୍ଟିଂର ପ୍ରଥମ ଦିନରେ ବେଦାନ୍ତ ପାୱାର୍ (Vedanta Power) ର ସେୟାର ମୂଲ୍ୟ ୫% ବୃଦ୍ଧି ପାଇଥିବା ବେଳେ, ଅନ୍ୟ କମ୍ପାନୀଗୁଡ଼ିକ ଯଥା ଆଲୁମିନିୟମ୍, ଅଏଲ୍ ଆଣ୍ଡ ଗ୍ୟାସ୍ ଏବଂ ଆଇରନ୍ ଆଣ୍ଡ ଷ୍ଟିଲ୍ ର ସେୟାର ମୂଲ୍ୟରେ ପ୍ରାମ୍ଭିକ ହ୍ରାସ (Lower Circuit) ଦେଖିବାକୁ ମିଳିଥିଲା। ତଥାପି, ଦୀର୍ଘକାଳୀନ ଅବଧିରେ ଏହି ଡିମର୍ଜର ପ୍ରକ୍ରିୟା କମ୍ପାନୀ ଏବଂ ଶେୟାରଧାରକଙ୍କ ପାଇଁ ବିପୁଳ ମୂଲ୍ୟ ସୃଷ୍ଟି କରିବ ବୋଲି ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି।

ମୁମ୍ବଇ: ପୁତ୍ର ଶୋକରେ ମର୍ମାହତ ବେଦାନ୍ତ ଗ୍ରୁପର ଅଧ୍ୟକ୍ଷ ଅନିଲ ଅଗ୍ରୱାଲ ନିଜ ଆୟର ୭୫ ପ୍ରତିଶତ ଦାନ କରିବେ ବୋଲି ଘୋଷଣା କରିଛନ୍ତି। ପୁଅର ମୃତ୍ୟୁକୁ ନେଇ ଅନିଲ ଭାଙ୍ଗି ପଡ଼ିଥିବା ବେଳେ ଦୁଃଖର ସହ କହିଛନ୍ତି ଯେ ଖରାପ ସମୟ ଚାଲିଯାଇଛି ବୋଲି ଆମକୁ ଲାଗିଥିଲା; କିନ୍ତୁ ଭାଗ୍ୟ ଆଉ କିଛି ଚାହୁଁଥିଲା। ସେ ପୁଅକୁ ମନେ ପକାଇ ଏହାକୁ ଜୀବନର ସବୁଠାରୁ ଅନ୍ଧକାରମୟ ଦିନ ବୋଲି କହିଛନ୍ତି। ପୁଅକୁ ଦେଇଥିବା ପ୍ରତିଶ୍ରୁୁତି ପାଳନ କରି ଅନିଲ ନିଜ ଆୟର ୭୫ ଅଂଶ ଦାନ କରିବେ ବୋଲି କହିଛନ୍ତି। 

ସୂଚନାଯୋଗ୍ୟ, ଏକ ଦୁର୍ଘଟଣାର ଶିକାର ହୋଇ ଆମେରିକାରେ ଚିକିତ୍ସିତ ହେଉଥିବା ଅନିଲ ଅଗ୍ରୱାଲଙ୍କ ପୁଅ ଅଗ୍ନିବେଶଙ୍କର ହୃଦ୍‌ଘାତରେ ମୃତ୍ୟୁ ଘଟିଥିଲା। ଆମେରିକାରେ ସ୍କିଇଁ କରୁଥିବା ସମୟରେ ସେ ଆହତ ହୋଇଥିଲେ। ଚିକିତ୍ସା ପାଇଁ ନ୍ୟୁୟର୍କର ମାଉଣ୍ଟ ସିନାଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ହୃଦ୍‌ଘାତ ହେବାରୁ ଅଗ୍ନିବେଶ ଶେଷ ନିଃଶ୍ବାସ ତ୍ୟାଗ କରିଥିଲେ। 

୧୯୭୬ ଜୁନ୍‌ ୩ରେ ଜନ୍ମିତ ଅଗ୍ନିବେଶ ଜଣେ ଉତ୍ତମ ବ୍ୟକ୍ତି ଥିଲେ। ସେ ଆଜମେରର ମେୟୋ କଲେଜରୁ ପ୍ରାରମ୍ଭିକ ଶିକ୍ଷା ଆରମ୍ଭ କରିଥିଲେ। ସେ ବେଦାନ୍ତର କମ୍ପାନୀ ତଲୱଣ୍ଡି ସାବୋ ପାୱାର ଲିମିଟେଡ (ଟିଏସପିଏଲ)ର ବୋର୍ଡରେ ଥିଲେ। ୨୦୧୯ ପର୍ଯ୍ୟନ୍ତ ହିନ୍ଦୁସ୍ତାନ ଜିଙ୍କ ଲିମିଟେଡର ଅଧ୍ୟକ୍ଷ ମଧ୍ୟ ରହିଥିଲେ। ତାଙ୍କ ନେତୃତ୍ବରେ ହିନ୍ଦୁସ୍ତାନ ଜିଙ୍କ ଖଣି ଜ୍ଞାନକୌଶଳକୁ ଆଧୁନିକ କରିଥିଲା।  ଅଗ୍ନିବେଶ ଫୁଜୈରାହ ଗୋଲ୍ଡର ପ୍ରତିଷ୍ଠାରେ ମଧ୍ୟ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥିଲେ।

ଭୁବନେଶ୍ୱର: ଓଡ଼ିଶା ଦିବସ ଅବସରରେ ବେଦାନ୍ତ ଅଧ୍ୟକ୍ଷ ଅନିଲ ଅଗ୍ରୱାଲ ରାଜ୍ୟର ସାଂସ୍କୃତିକ ପରମ୍ପରା, ଜୀବନ୍ତ ଐତିହ୍ୟ ଏବଂ ବିକାଶମୂଳକ ପଦକ୍ଷେପକୁ ସମ୍ମାନ ଜଣାଇ ଓଡ଼ିଶାର ଜନସାଧାରଣଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇଛନ୍ତି।

ଶ୍ରୀ ଅଗ୍ରୱାଲ ତାଙ୍କ ବାର୍ତ୍ତାରେ ଓଡ଼ିଶାର ଆଧ୍ୟାତ୍ମିକ ଗଭୀରତା, ପାରମ୍ପରିକ କଳା, ରନ୍ଧନ ପ୍ରଣାଳୀ ଏବଂ ସମୃଦ୍ଧ ପ୍ରାକୃତିକ ଦୃଶ୍ୟ ଦ୍ୱାରା ଗଠିତ ସ୍ୱତନ୍ତ୍ର ପରିଚୟ ବିଷୟରେ କହିଥିଲେ। ନିଜର ସମର୍ପଣ ଏବଂ ପ୍ରତିଭା ଜରିଆରେ ବିଶ୍ୱ ମଞ୍ଚରେ ଭାରତର ଉପସ୍ଥିତିକୁ ସୁଦୃଢ଼ କରିବାରେ ଓଡ଼ିଆ ଜନସାଧାରଣଙ୍କ ଦୀର୍ଘସ୍ଥାୟୀ ଯୋଗଦାନକୁ ସେ ପ୍ରଶଂସା କରିଥିଲେ।

ଓଡ଼ିଶାକୁ ‘ବିଶ୍ୱର ଆଲୁମିନିୟମ ରାଜଧାନୀ’ ବୋଲି ଅଭିହିତ କରି ଶ୍ରୀ ଅଗ୍ରୱାଲ ରାଜ୍ୟ ସହିତ ବେଦାନ୍ତର ଦୃଢ଼ ସମ୍ପର୍କ ବିଷୟରେ ଉଲ୍ଲେଖ କରିଥିଲେ। ଉଭୟ ଭୂପୃଷ୍ଠ ଏବଂ ଭୂତଳ କ୍ଷେତ୍ରରେ ପ୍ରଚୁର ପ୍ରାକୃତିକ ସମ୍ବଳ ଯୋଗୁଁ ଓଡ଼ିଶା ବିଶ୍ୱସ୍ତରରେ ଭାରତ ପାଇଁ ଏକ ଗୁରୁତ୍ୱପୂର୍ଣ୍ଣ ସ୍ଥାନ ସୃଷ୍ଟି କରିଛି। ଆମେ ଗର୍ବିତ ଯେ ଆମେ ଏକ ଲକ୍ଷ କୋଟି କୋଟି ଟଙ୍କାରୁ ଅଧିକ ନିବେଶ କରିଛୁ। କିନ୍ତୁ ଆମ ପାଇଁ, ଆମର ଦାୟିତ୍ୱ ବ୍ୟବସାୟ ବାହାରେ-ଏହା ସ୍ଥାନୀୟ ଲୋକଙ୍କର କଲ୍ୟାଣ ଏବଂ ସ୍ଥାୟୀ ଅଭିବୃଦ୍ଧି ସୁନିଶ୍ଚିତ କରିବା ସହିତ ଆରମ୍ଭ ହୁଏ।

ବେଦାନ୍ତର ଗୋଷ୍ଠୀଗତ ପଦକ୍ଷେପ ଉପରେ ଆଲୋକପାତ କରି ସେ କହିଥିଲେ, “ଏହା ମୋ ପାଇଁ ଗର୍ବର ବିଷୟ ଯେ ଆମେ କାଳାହାଣ୍ଡିରେ ସମୃଦ୍ଧି ଆଣିବାର ସ୍ୱପ୍ନ ପୂରଣ କରିପାରିଛୁ। ସେଠାକାର ପ୍ରତ୍ୟେକ ଘର ଏକ ସକାରାତ୍ମକ ପରିବର୍ତ୍ତନ ଅନୁଭବ କରିଛି।

ଓଡ଼ିଶାର ଭବିଷ୍ୟତ ପାଇଁ ସେ ଆଶାବ୍ୟକ୍ତ କରି କହିଥିଲେ, “ଭଗବାନ ଜଗନ୍ନାଥଙ୍କ ଆଶୀର୍ବାଦ ଏବଂ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ରାଜ୍ୟର ବିକାଶ ନୂତନ ଉଚ୍ଚତାରେ ପହଞ୍ଚିବ ।”

ବେଦାନ୍ତ ଆଲୁମିନିୟମ ଓଡ଼ିଶାର ଆର୍ଥିକ ଏବଂ ଶିଳ୍ପ ପରିଦୃଶ୍ୟରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ, ଲାଞ୍ଜିଗଡ଼ରେ ୩.୫ ଏମଟିପିଏ ଆଲୁମିନା ବିଶୋଧନାଗାର ଏବଂ ଝାରସୁଗୁଡ଼ାରେ ବିଶ୍ୱର ସର୍ବବୃହତ ଆଲୁମିନିୟମ ସ୍ମେଲ୍ଟର ମଧ୍ୟରୁ ଗୋଟିଏ ପରିଚାଳନା କରେ । କମ୍ପାନୀ ନୂତନ ନିବେଶରେ ୨୫,୦୦୦ କୋଟି ଟଙ୍କାରୁ ଅଧିକ ପ୍ରତିଶ୍ରୁତିବଦ୍ଧ, ଯାହାର ଉଦ୍ଦେଶ୍ୟ ହେଉଛି କାର୍ୟ୍ୟର ସମ୍ପ୍ରସାରଣ ଏବଂ ନିଯୁକ୍ତି, ଭିତ୍ତିଭୂମି ଏବଂ ବୈଷୟିକ ପ୍ରଗତି ସୃଷ୍ଟି କରିବା।

ଅର୍ନ୍ତଭୁକ୍ତ ବିକାଶ ଉପରେ ନିଜର ଧ୍ୟାନ ଜାରି ରଖି ବେଦାନ୍ତ ସକ୍ରିୟ ଭାବେ ଶିକ୍ଷା, ଦକ୍ଷତା ବିକାଶ, ସ୍ୱାସ୍ଥ୍ୟସେବା ସୁବିଧା ଏବଂ ପରିବେଶଗତ ସ୍ଥିରତା ପ୍ରତି ସମର୍ଥନ କରୁଛି। ଓଡ଼ିଶାର ଦୀର୍ଘକାଳୀନ ସାମାଜିକ-ଅର୍ଥନୈତିକ ଅଭିବୃଦ୍ଧିରେ ଯୋଗଦାନ ପାଇଁ କମ୍ପାନୀ ଗଭୀର ଭାବେ ପ୍ରତିବଦ୍ଧ।

ଭୁବନେଶ୍ୱର: ଗତ ୨୨ ବର୍ଷ ମଧ୍ୟରେ ଓଡ଼ିଶାର ପ୍ରଗତି ଅବିଶ୍ୱସନୀୟ । ନିବେଶ ଦୃଷ୍ଟିରୁ ଓଡ଼ିଶା ଭାରତର ସର୍ବୋତ୍ତମ ପ୍ରଦେଶ । ମେକ୍ ଇନ୍ ଓଡ଼ିଶା କନକ୍ଲେଭ୍‌ର ତୃତୀୟ ସଂସ୍କରଣର ଦ୍ୱିତୀୟ ଦିନରେ ବେଦାନ୍ତ ଗ୍ରୁପର ଚେୟାରମ୍ୟାନ ଅନିଲ ଅଗ୍ରୱାଲ ଯୋଗ ଦେଇ କିଛି ଏପରି କହିଛନ୍ତି ।

ଅନିଲ ଅଗ୍ରୱାଲ ନିଜ ଭାଷଣରେ କହିଥିଲେ ଯେ, ଦୁନିଆ ଚାହୁଁନି ଭାରତ ପ୍ରଗତି କରୁ । ଦୁନିଆ ଚାହୁଁଛି ଭାରତ କେବଳ ଆମଦାନୀ କରୁ । ଫଳରେ ଭାରତ ଶିଳ୍ପବିକଶିତ ରାଷ୍ଟ୍ରରେ ପରିଣତ ହେବ ନାହିଁ । କିନ୍ତୁ ଓଡ଼ିଶା ଏହାକୁ ବଦଳାଇ ଦେଇଛି । ଓଡ଼ିଶା ରପ୍ତାନୀ ଭିତ୍ତିକ ଅର୍ଥନୀତିର ଭିତ୍ତି ସ୍ଥାପନ କରିଛି । ନବୀନ ବାବୁଙ୍କ ନେତୃତ୍ୱରେ ଓଡ଼ିଶା ପ୍ରଗତିପଥରେ ଅଗ୍ରସର ଅଛି । ଏଠାରେ ଉପସ୍ଥିତ ଥିବା ସମସ୍ତ ଶିଳ୍ପପତି ଜାଣନ୍ତି ଯେ, ସବୁ ରାଜ୍ୟ ଶିଳ୍ପପତିଙ୍କୁ ନିମନ୍ତ୍ରଣ କରୁଛନ୍ତି କିନ୍ତୁ ଓଡ଼ିଶାରେ ଯେଉଁଭଳି ଉତ୍ସାହ ଅଛି ତାହା ଅନ୍ୟତ୍ର ନାହିଁ ।