ଭୁବନେଶ୍ୱର : ରାଜ୍ୟସଭା ନିର୍ବାଚନରେ କ୍ରସ ଭୋଟିଙ୍ଗ କରିଥିବା ବିଧାୟକଙ୍କ ସଭ୍ୟପଦ ରଦ୍ଦ କରିବାକୁ ଦାବି କରିଛନ୍ତି ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ । ସେ କହିଛନ୍ତି, ସମ୍ବିଧାନ ନିୟମ ଅନୁସାରେ ବାଚସ୍ପତି ତ୍ୱରିତ ପଦକ୍ଷେପ ନିଅନ୍ତୁ । ନିକଟରେ ଅନୁଷ୍ଠିତ ରାଜ୍ୟସଭା ନିର୍ବାଚନରେ ୧୧ଜଣ ବିଧାୟକ କ୍ରସ ଭୋଟିଙ୍ଗ କରିଛନ୍ତି । ସେମାନଙ୍କ ସଭ୍ୟ ପଦ ରଦ୍ଦ କରିବାକୁ ବାଚସ୍ପତିଙ୍କ ପାଖରେ ଦାବି ହୋଇଛି । ଦଳୀୟ ଶୃଙ୍ଖଳା ଭଙ୍ଗ କରି ବିଧାୟକମାନେ ଅନ୍ୟ ଦଳକୁ ସମର୍ଥନ କରିଥିଲେ । ଯାହା ଦଳ ବିରୋଧୀ । ତେଣୁ ସମ୍ବିଧାନ ନିୟମ ଅନୁସାରେ ତାଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଦରକାର ବୋଲି ପ୍ରସନ୍ନ ଦାବି କରିଛନ୍ତି । ବିଳମ୍ବିତ ନ୍ୟାୟ ନ୍ୟାୟ ନୁହେଁ । ବାଚସ୍ପତି ବିଧାୟକମାନଙ୍କ ଉପରେ କାର୍ଯ୍ୟାନୁଷ୍ଠାନ ନେବା ଆବଶ୍ୟକ ।

ଭୁବନେଶ୍ୱର: ଦକ୍ଷିଣରେ ଆନ୍ଧ୍ର କୋଟିଆ ମାଡ଼ି ବସିବାକୁ ଷଡ଼ଯନ୍ତ୍ର ଚଳାଇଛି। କୋଟିଆକୁ ନିଜ ଅଞ୍ଚଳ ବୋଲି ଦାବି କରୁଛି। ଉତ୍ତର ବାଲେଶ୍ୱରର ଭୋଗରାଇ ବ୍ଲକ୍‌ ଅଞ୍ଚଳରେ ସୁବର୍ଣ୍ଣରେଖା ନଦୀ ତଟ ଅଞ୍ଚଳକୁ ପଶ୍ଚିମବଙ୍ଗ ଦଖଲକୁ ବୋକୁ ଉଦ୍ୟମ କରୁଛି। ଓଡ଼ିଶା ଅଞ୍ଚଳରେ ସଡ଼କ ନିର୍ମାଣ କରୁଛି। ଏବେ ପଡେ଼ାଶୀ ଛତିଶଗଡ଼ ପଶ୍ଚିମ ଓଡ଼ିଶାର ଝାରସୁଗୁଡ଼ା ଜିଲ୍ଲାର ୩ କିଲୋମିଟର ରାସ୍ତା ଜବରଦଖଲ କରି ସାରିଛନ୍ତି। ମାତ୍ର ସରକାରଙ୍କ ନିଦ ଭାଙ୍ଗୁନାହିଁ, ଝାରସୁଗୁଡ଼ା ପ୍ରଶାସନ ମଧ୍ୟ ଏପରି ସ୍ପର୍ଶକାତର ପ୍ରସଙ୍ଗରେ ନିରବ ରହିଛି। ଯାହାକୁ ନେଇ ଗତକାଲି ଧାନସଭାରେ କ୍ଷୋଭ ପ୍ରକାଶ ସହ ସରକାରୀ ଅପାରଗତାକୁ ସମାଲୋଚନା କରିଛି ବିଜେଡି। ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ବିଧାନସଭାର ଶୂନ୍ୟକାଳରେ ଏହି ପ୍ରସଙ୍ଗ ଉଠାଇବା ସହ ସରକାର ତୁରନ୍ତ ତତ୍ପରତା ପ୍ରକାଶ କରିବାକୁ ଦାବି କରିଛନ୍ତି।

ଶ୍ରୀ ଆଚାର୍ଯ୍ୟ କହିଛନ୍ତି ଯେ  ବହୁ ସଂଘର୍ଷ ପରେ ୧୯୩୬ ମସିହାରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ହୋଇଥିଲା। ୧୯୫୬ ମସିହା ସୀମା ନିର୍ଦ୍ଧାରଣ ସମୟରେ ଓଡ଼ିଶା ଅବହେଳାର ଶିକାର ହେଲା। ଖରସୁଅାଁ ଓ ଷଢେ଼ଇକଳା ଭଳି ବହୁ ଅଞ୍ଚଳ ଓଡ଼ିଶାରେ ରହିପାରିଲା ନାହିଁ। ଏହି ସମସ୍ୟା ସମାଧାନ ହୋଇନାହିଁ। ମାତ୍ର ଏହି ମୟରେ  ଓଡ଼ିଶାକୁ ବିକଳାଙ୍ଗ କରିବାକୁ  ପୁଣି ଆରମ୍ଭ ହୋଇଛି। ଆନ୍ଧ୍ର ପ୍ରଦେଶ ସରକାର କୋଟିଆରେ ବେଆଇନ ପ୍ରବେଶ କରୁଛନ୍ତି। ତାଙ୍କ ସରକାରଙ୍କର ମନ୍ତ୍ରୀମାନେ ସେଠାରେ ସଭା ସମିତି କରୁଛନ୍ତି। ପଞ୍ଚାୟତ ନିର୍ବାଚନ କରିବା ପାଇଁ ପ୍ରୟାସ କରୁଥିଲେ। ଏବେ ଛତିଶଗଡ଼ ମଧ୍ୟ ଏହି ଉଦ୍ୟମ ଆରମ୍ଭ କରିଛି। ଆମର ପଡେ଼ାଶୀ ଛତିଶଗଡ଼ ସହ ଝାରସୁଗୁଡ଼ା, ବରଗଡ଼ ଓ ଅନ୍ୟ ଜିଲ୍ଲାର ସୀମା ଲାଗି ରହିଛି। ଏବେ ଝାରସୁଗୁଡ଼ା ଜିଲ୍ଲାର କନକତୋରାରେ ଛତିଶଗଡ ସରକାର ବେଆଇନ ଅନୁପ୍ରବେଶ କରୁଛି। କନକତୋରା ଗାଁର ୩ କିଲୋମିଟର ରାସ୍ତାକୁ ଅକ୍ତିଆର କରାଯାଇଛି। କନକତୋରା-ଛତିଶଗଡ଼ର ଏକତାରା ପର୍ଯ୍ୟନ୍ତ ରାସ୍ତା ରହିଛି। ଏଠାରେ ଓଡ଼ିଶାର ପ୍ରାୟ ୩ କିମି ରାସ୍ତା ଅଛି। କନକତୋରା ଲୋକେ ୧୯୯୨-୯୩ରେ ନିଜ ଜମି ଦାନ କରିଥିଲେ। ଏହି ଦାନ ଜମିରେ ଓଡ଼ିଶା ସରକାର ରାସ୍ତା ନିର୍ମାଣ କରିଛନ୍ତି। ମାତ୍ର ସେହି ରାସ୍ତାରେ  ଏବେ ଛତିଶଗଡ଼ ଅନଧିକାର ପ୍ରବେଶ କରିଛି। ସେଠାରେ ଛତିଶଗଡ଼ ପ୍ରଶାସନ ପକ୍ଷରୁ ଗାଡ଼ି ଚେକିଂ କରାଯାଉଛି। ଧାନ ଗାଡ଼ିକୁ ମଧ୍ୟ ଅଟକାଯାଉଛି। 

ଏବେ ସେଠାରେ ୪ ଲେନ୍‌ ରାସ୍ତା ନିର୍ମାଣ ପାଇଁ ଛତିଶଗଡ଼ ସରକାର ଯୋଜନା କରୁଛନ୍ତି। ସ୍ଥାନୀୟ ଲୋକ ଏହାକୁ ବିରୋଧ କରୁଛନ୍ତି। ମାତ୍ର ଜିଲ୍ଲା ପ୍ରଶାସନ ଏହି ପ୍ରସଙ୍ଗରେ ସମ୍ପୂର୍ଣ୍ଣ ନିରବ ରହିଛି। ଓଡ଼ିଶା ସରକାର ଏହି ପ୍ରସଙ୍ଗରେ ତୁରନ୍ତ ତତ୍ପରତା ଦେଖାଇବା ଆବଶ୍ୟକତା ରହିଛି। ସେଠାରେ ଅନଧିକାର ପ୍ରବେଶକୁ ଅଟକାଯିବା ଦରକାର। ଉପ ମୁଖ୍ୟମନ୍ତ୍ରୀ ଗୃହରେ ଅଛନ୍ତି। ପ୍ରସଙ୍ଗରେ ସେ ହସ୍ତକ୍ଷେପ କରନ୍ତୁ ବୋଲି ଶ୍ରୀ ଆଚାର୍ଯ୍ୟ ନିବେଦନ କରିଛନ୍ତି। ଏହାସହିତ ବାଚସ୍ପତି ମଧ୍ୟ ଏହି ପ୍ରଙ୍ଗରେ ନିର୍ଦ୍ଦେଶ ଦିଅନ୍ତୁ ବୋଲି ଦାବି କରିବା ସହ ଏହା ସରକାରଙ୍କ ପାଇଁ ସତର୍କବାଣୀ ବୋଲି ଶ୍ରୀ ଆଚାର୍ଯ୍ୟ କରିଛନ୍ତି। ସରକାର ଯଦି ଏହି ପ୍ରସଙ୍ଗରେ ନିରବ ରୁହନ୍ତି, ତେବେ ଘାତକ ହେବ ବୋଲି ପ୍ରସନ୍ନ ଆଚାର୍ଯ୍ୟ ଚେତାଇଛନ୍ତି। 

ଭୁବନେଶ୍ୱର: ରାଜ୍ୟରେ ଧାନ ସଂଗ୍ରହ ରିପୋର୍ଟକୁ ନେଇ ବିଜେପି ସରକାରଙ୍କ ଉପରେ ବର୍ଷିଲା ବିଜେଡି । ରାଜ୍ୟରେ ଧାନ ସଂଗ୍ରହ କୋଲାପ୍ସ ହୋଇଯାଇଥିବା ନେଇ କହିଛନ୍ତି ବିରୋଧୀ ଦଳ ଉପ ନେତା ପ୍ରସନ୍ନ ଆର୍ଚlଯ୍ୟ । ସେ କହିଛନ୍ତି କି, ବିଜେପି ସରକାର ଓଡିଶାରେ ହେବା ଦିନଠୁଁ ଧାନ ସଂଗ୍ରହ ରାଜ୍ୟରେ କମି କମି ଯାଉଛି । ୩୧ ତାରିଖ ଯାଏ ତଥ୍ୟ ଅନୁସାରେ ଓଡ଼ିଶାରେ ମାତ୍ର ୮ ପ୍ରତିଶତ ଧାନ ସଂଗ୍ରହ କରାଯାଇଛି । କେନ୍ଦ୍ର ସରକାର ୱେବ ସାଇଟରେ ଏହି ତଥ୍ୟ ରହିଛି । ହେଲେ ମନ୍ତ୍ରୀ କିନ୍ତୁ ରାତିରେ ସ୍ବପ୍ନ ଦେଖି ଧାନ କିଣା ନେଇ ତଥ୍ୟ ଦେଉଛନ୍ତି । ମନ୍ତ୍ରୀଙ୍କ ତଥ୍ୟ ଅନୁସାରେ ଧାନ କିଣା ବର୍ତମାନ ଓଡିଶାରେ ନଗଣ୍ୟ । ଓଡିଶାରେ ବିଜେପି ସରକାର ଓ ଛାତିଶଗଡ଼ରେ ମଧ୍ୟ ବିଜେପି ସରକାର । ହେଲେ ବର୍ତମାନ ସୁଦ୍ଧା ଛତିଶଗଡରେ ୪୧ ପ୍ରତିଶତ ଧାନ ସଂଗ୍ରହ ହୋଇଥିବା ବେଳେ ଓଡ଼ିଶାରେ ମାତ୍ର ୮ ପ୍ରତିଶତ ହୋଇଛି । ସରକାର ଚାଷୀଙ୍କ ଠାରୁ ଧାନ କିଣୁ ନଥିବାରୁ ଚାଷୀ କମ ଦରରେ ଧାନ ବିକ୍ରି କରୁଛନ୍ତି । ସରକାରଙ୍କ ଆଖିକୁ ଏକଥା ଦେଖାଯାଉ ନାହିଁ । ସରକାର ନିଜେ ବରଗଡ଼ରେ ଚାଷୀଙ୍କୁ ଲିଖିତ ଭାବେ ଦେଇଛନ୍ତି ଧାନ କିଣାରେ ୧ ପ୍ରତିଶତ କଟଣୀ ଛଟଣୀ ହେବ । ଇନପୁଟ ସବସିଡି ଦେଇ ରାଜ୍ୟ ସରକାର ବାହାଦୂରୀ ମାରୁଛନ୍ତି । ହେଲେ ଚାଷୀଙ୍କ ଠାରୁ ଧାନ କିଣିଲେ ସିନା ଚାଷୀ ଇନପୁଟ ସବସିଡ ପାଇବେ । ବର୍ଦ୍ଧିତ msp ୬୯ ଟଙ୍କା ବି ସରକାର ଦେଉ ନାହାନ୍ତି ।

ଭୁବନେଶ୍ବର: ମହାନଦୀ ଜଳ ବିବାଦକୁ ନେଇ ପୁଣିଥରେ ରାଜ୍ୟ ରାଜନୀତି ସରଗରମ ହୋଇଛି। ଓଡ଼ିଶାର ଜୀବନରେଖା ମହାନଦୀର ସୁରକ୍ଷା ଏବଂ ଜଳ ସଂକଟର ସମାଧାନ ନେଇ ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟ ଏକ ସାମ୍ବାଦିକ ସମ୍ମିଳନୀରେ ରାଜ୍ୟ ସରକାରଙ୍କୁ ଘେରିଛନ୍ତି। ମହାନଦୀ ସଂକଟର ସମାଧାନ ପାଇଁ ରାଜ୍ୟ ସରକାରଙ୍କ ଆଭିମୁଖ୍ୟ କ’ଣ, ତାହା ସ୍ପଷ୍ଟ କରିବାକୁ ସେ ଦାବି କରିଛନ୍ତି।

ଛତିଶଗଡ଼ର ମନମାନି ଓ କେନ୍ଦ୍ରର ନୀରବତା

ଶ୍ରୀ ଆଚାର୍ଯ୍ୟ କହିଛନ୍ତି ଯେ, ମହାନଦୀ ଓଡ଼ିଶାର ଜୀବନ ସ୍ରୋତ। କିନ୍ତୁ ଗତ କିଛି ଦଶନ୍ଧି ହେଲା ଛତିଶଗଡ଼ ସରକାର ବେଆଇନ ଭାବେ ମହାନଦୀ ଉପର ମୁଣ୍ଡରେ ବ୍ୟାରେଜ ପରେ ବ୍ୟାରେଜ ନିର୍ମାଣ କରି ଚାଲିଛନ୍ତି। ଓଡ଼ିଶାର ବିନା ସହମତିରେ ଏବଂ ଆନ୍ତଃରାଜ୍ୟ ନଦୀଜଳ ଆଇନକୁ ଉଲ୍ଲଂଘନ କରି ଛତିଶଗଡ଼ ସରକାର ମହାନଦୀର ଜଳସ୍ରୋତକୁ ନିଜ ଇଚ୍ଛାରେ ନିୟନ୍ତ୍ରଣ କରୁଛନ୍ତି। ଜଳସେଚନ ନାଁରେ ଶିଳ୍ପ ସଂସ୍ଥାମାନଙ୍କୁ ପାଣି ଯୋଗାଇ ଦିଆଯାଉଛି, ଯାହାଫଳରେ ଓଡ଼ିଶାରେ ମହାନଦୀ ଶୁଷ୍କ ହେବାକୁ ବସିଲାଣି। ଏହି ପ୍ରସଙ୍ଗରେ କେନ୍ଦ୍ର ସରକାର ଏବଂ କେନ୍ଦ୍ରୀୟ ଜଳ ଆୟୋଗ (CWC) କେବଳ ନୀରବ ଦ୍ରଷ୍ଟା ସାଜିଛନ୍ତି ବୋଲି ସେ ଅଭିଯୋଗ କରିଛନ୍ତି। ଯଦି ଏଭଳି ସ୍ଥିତି ଲାଗିରହେ, ତେବେ ଭବିଷ୍ୟତରେ ହୀରାକୁଦ ଜଳଭଣ୍ଡାର ଜଳଶୂନ୍ୟ ହେବାର ଆଶଙ୍କା ରହିଛି।

ସମାଧାନ ନେଇ ସରକାରଙ୍କୁ ୫ ପ୍ରଶ୍ନ

କେନ୍ଦ୍ର, ଛତିଶଗଡ଼ ଓ ଓଡ଼ିଶାରେ ବର୍ତ୍ତମାନ ଗୋଟିଏ ଦଳର ସରକାର ଥିବାରୁ ଲୋକେ ମହାନଦୀ ସମସ୍ୟାର ଶୀଘ୍ର ସମାଧାନ ଆଶା କରିଥିଲେ। କିନ୍ତୁ ରାଜ୍ୟ ସରକାର କେବଳ କମିଟି ଗଠନ କରି ଚୁପ୍ ବସିଛନ୍ତି ବୋଲି ବିଜେଡି ଅଭିଯୋଗ କରିଛି। ଟ୍ରିବ୍ୟୁନାଲରେ ମାମଲା ୭ ବର୍ଷରୁ ଅଧିକ ସମୟ ଧରି ପଡ଼ିରହିଥିବା ବେଳେ ରାଜ୍ୟ ସରକାର ଆପୋଷ ସମାଧାନର ପ୍ରସ୍ତାବ ଦେଇଛନ୍ତି। ଏହି ପରିପ୍ରେକ୍ଷୀରେ ପ୍ରସନ୍ନ ଆଚାର୍ଯ୍ୟ ସରକାରଙ୍କୁ ୫ଟି ଗୁରୁତ୍ୱପୂର୍ଣ୍ଣ ପ୍ରଶ୍ନ ପଚାରିଛନ୍ତି:

୧. ଆପୋଷ ସମାଧାନ ପାଇଁ ଆଲୋଚନାର ସର୍ତ୍ତାବଳୀ କଣ ରହିବ?

୨. ସରକାର ମହାନଦୀ ଟ୍ରିବ୍ୟୁନାଲରୁ ଓହରିଯିବେ କି?

୩. ଆପୋଷ ସମାଧାନ ପୂର୍ବରୁ ରାଜ୍ୟ ସରକାର ବିରୋଧୀ ଦଳ ଓ ମହାନଦୀ ବଞ୍ଚାଅ ଆନ୍ଦୋଳନ ସଂଗଠନଗୁଡ଼ିକୁ ବିଶ୍ୱାସକୁ ନେବେ କି?

୪. ଆଲୋଚନା ଚାଲିଥିବା ସମୟରେ ଛତିଶଗଡ଼ ସରକାର ଚାଲୁ ରଖିଥିବା ବେଆଇନ ନିର୍ମାଣ କାର୍ଯ୍ୟ ବନ୍ଦ ରଖିବେ କି?

୫. ମହାନଦୀ ଟ୍ରିବ୍ୟୁନାଲର କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ରାଜ୍ୟ ସରକାର ଆବେଦନ କରିବେ କି?

ଭୁବନେଶ୍ବର: ବିରୋଧୀ ଦଳ ଉପ ନେତା ପ୍ରସନ୍ନ ଆଚାର୍ଯ୍ୟ ହୀରାକୁଦର ସୁରକ୍ଷା ପାଇଁ ଶୂନ୍ୟକାଳରେ ଦାବି କରିଥିବା ବେଳେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ ପ୍ରତି ଉତ୍ତର ଦେବାକୁ ଯାଇ କହିଛନ୍ତି ଯେ, ବିରୋଧୀ ଦଳ ଉପ ନେତା ଯେଉଁ ପ୍ରସଙ୍ଗ ଉଠାଇଛନ୍ତି ତାହା ବେଶ ଗୁରୁତ୍ୱପୂର୍ଣ୍ଣ। ସମସ୍ତେ ମଧ୍ୟ ତାକୁ ନେଇ ଚିନ୍ତିତ ରହିଛନ୍ତି। ହୀରାକୁଦରେ ସ୍କିଲ୍ଡ ମାଡ଼ି ଯାଇଛି ଯାହା ପାଇଁ ଜଳ ଧାରଣା କ୍ଷମତା କମିବାର ଲାଗିଛି । ହୀରାକୁଦ ଯେତେବେଳେ ହୋଇଥିଲା ମୁଖ୍ୟତଃ ଉଦ୍ଦେଶ୍ୟ ରହିଥିଲା କି ରାଜ୍ୟର ବନ୍ୟା ସମସ୍ୟା ଦୂର କରିବା । କାହିଁକି ନା ସେତେବେଳେ ଆମର ଯେତିକି ବଜେଟ ରହିଥିଲା ତାହା ସଂପୂର୍ଣ୍ଣ ବନ୍ୟା ନିୟନ୍ତ୍ରଣରେ ଖର୍ଚ୍ଚ ହେଉଥିଲା । ଯାହା ପାଇଁ ବିଶ୍ଵର ବଡ ବିସ୍ଥାପନ କରିଥିଲେ ସରକାର।  ନା ସେତେବେଳେ ମାନବାଧିକାର କମିଶନ ଥିଲା ନା ବିସ୍ଥାପନ ଆଇନ ଥିଲା କିଛି ବି ନଥିଲା । ଯାହା ପାଇଁ ହୀରାକୁଦ ପାଇଁ ବଡ କ୍ଷତି ନିଜ ଜୀବନର ହରାଇଥିଲେ ଅଞ୍ଚଳ ବାସୀ। ହୀରାକୁଦ ଡ଼୍ୟାମରୁ ସ୍କିଲ୍ଡ ଅର୍ଥାତ୍ ବାଲି, ମାଟି ଓ ଗୋଡ଼ି କାଢ଼ିବାକୁ ହେବ।  ଥରେ ଉଦ୍ୟମ କରିଥିଲେ ପୂର୍ବ ସରକାର କିନ୍ତୁ ବିଫଳ ହୋଇଥିଲା ଜାପାନ କମ୍ପାନୀ। ଯେହେତୁ ବଡ ବଡ ଗଛ ରହିଥିଲା ତାକୁ ସମ୍ପୂର୍ଣ ତାଡି କାଢିବା ବଦଳରେ କେବଳ କାଟି ଦେଇ ସଫେଇ କାର୍ଯ୍ୟ କରାଯାଉ ଥିଲା କିନ୍ତୁ ତାହା ହୋଇ ପାରିନଥିଲା।  ଏବେ ସେହି କାର୍ଯ୍ୟ କରିବା ପାଇଁ ଆମେ କେନ୍ଦ୍ର ସରକାର ଓ ବିଭିନ୍ନ ଟେକ୍ନିକାଲ ଟିମ ମାନଙ୍କ ସହ ଆଲୋଚନା କରୁଛୁ। କେନ୍ଦ୍ର ସରକାର ସବୁ ଡ୍ୟାମ ମାନଙ୍କ ସୁରକ୍ଷା ପାଇଁ ଡ୍ୟାମ ସେପ୍ଟି ଆଣିଛନ୍ତି । କାହିଁକି ନା ବିଭିନ୍ନ ଡ୍ୟାମର ଜୀବନ ଧାରା କମିବାରେ ଲାଗିଛି। ଆମେ ଆଶା କରୁଛୁ ଖୁବ୍ ଶୀଘ୍ର ମାଟି, ବାଲି ଓ ଗୋଡ଼ି କାଢ଼ିବୁ । ଆଉ ଗୋଟେ ପର୍ଯ୍ୟଟନ କଥା ଆମେ ପ୍ରଥମେ ହୀରାକୁଦର ସୁରକ୍ଷା ଦେଖିବୁ ପରେ ଯାହା ହେବ। ଆମେ ତାହାକୁ ଆଗେଇ ନେବାକୁ ଉଦ୍ୟମ କରୁଛୁ ବୋଲି ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଥିଲେ। 

ଭୁବନେଶ୍ୱର: ମୁଲତବୀ ପ୍ରସ୍ତାବରେ ଧାନ ସଂଗ୍ରହ ଅବ୍ୟବସ୍ଥା ନେଇ ବର୍ଷିଲେ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ।  ଧାନ ସଂଗ୍ରହ ପୂର୍ବରୁ ସରକାରଙ୍କ ମୁଣ୍ଡରେ ଚାଳ ବାଜିଲାଣି । ସରକାରଙ୍କ ଚାଷୀ ମାରଣା ନୀତିକୁ ନେଇ ଗୃହରେ ବିଜେଡି ଟାର୍ଗେଟ କରିଛି । ଏ ପର୍ଯ୍ୟନ୍ତ  ଧାନ ସଂଗ୍ରହ କରିନାହାନ୍ତି ସରକାର । ବରଗଡ଼ ଓ ସମ୍ବଲପୁର ଜିଲ୍ଲାରେ ସର୍ବାଧିକ ଧାନ ସଂଗ୍ରହ ହୁଏ। ଗତବର୍ଷ ନଭେମ୍ବର ମାସ ପ୍ରଥମ ସପ୍ତାହରୁ ଧାନ ସଂଗ୍ରହ କରିଥିଲେ । ହେଲେ ଏଥର ଏକ ମାସ ବିଳମ୍ବ ହୋଇଛି। ଆଜି  ହଜାର ହଜାର ଚାଷୀ ପଞ୍ଚିକରଣରୁ ବଂଚିତ ହୋଇଛନ୍ତି । କେବଳ ବରଗଡ ଜିଲ୍ଲାରେ ୫ହଜାର ଚାଷୀ ପଞ୍ଜୀକରଣ କରିନାହାନ୍ତି । ସେମାନେ କିପରି ଧାନ ବିକ୍ରୀ କରିବେ। ଗୋଟିଏ ବି ଚାଷୀ କିପରି ଧାନ କିଣାରୁ ବଂଚିତ ନ ହୁଅନ୍ତି ତାହା ଉପରେ ସରକାର ଗୁରୁତ୍ଵ ଦେବା ଆବଶ୍ୟକ ।

ଏଯାଏ ଚାଷୀକୁ ଟୋକନ ମିଳିନାହିଁ।  ଗୋଦାମ ଖାଲି ନାହିଁ, FCI ଚାଉଳ ନେଉନାହିଁ । ଏଯାଏ ସରକାର କେଉଁ ମିଲରେ ଧାନ କିଣାଯିବ ସେ ଟ୍ୟାଗୀଙ୍ଗ ସିଷ୍ଟମ କରାଯାଇ ନାହିଁ। ତେଣୁ ମିଲର ମାନେ ଧାନ କିଣିବେ କେମିତି । ଧାନ କିଣା ଅବ୍ୟବସ୍ଥା ନେଇ ବିଜେପି ସାଂସଦ ପ୍ରଦୀପ ପୁରୋହିତ ମଧ୍ୟ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଜଣାଇଛନ୍ତି। କିଛି ବିଧାୟକ ମାନେ ଭେଟିଛନ୍ତି ଧାନ ସଂଗ୍ରହ ଉପରେ। କେନ୍ଦ୍ର ଦେଉଥିବା msp ୬୯ ଟଙ୍କା ସରକାର ଏଥର ଧାନ କିଣାରେ ଇନପୁଟ ସବସିଡିି ସହ ମିଶାଇ ଦେବେ କି ବୋଲି ପ୍ରଶ୍ନ କରିଥିଲେ ପ୍ରସନ୍ନ ଆଚାର୍ଯ୍ୟ। ସରକାର ଧାନ ସଂଗ୍ରହ ବିଳମ୍ୱ ଓ ଅବ୍ୟବସ୍ଥା ଯୋଗୁଁ ଚାଷୀ ୧୪ଶହରୁ ୧୭ ଶହ ଟଙ୍କାରେ ବାଧ୍ୟ ହୋଇ ବିକ୍ରୀ କରୁଛନ୍ତି । ଚାଷୀ ଦୁଃଖରେ ଅଛନ୍ତି ବୋଲି କହିଛନ୍ତି ପ୍ରସନ୍ନ ଆଚାର୍ଯ୍ୟ।

ଭୁବନେଶ୍ୱର: ଧାନ କିଣା ଅବ୍ୟବସ୍ଥା ନେଇ ସରକାରଙ୍କୁ ଘେରିଲେ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ । ଧାନ କିଣାରେ ପ୍ରବଳ ଅବ୍ୟବସ୍ଥା ହୋଇଥିବା ନେଇ ସେ ଅଭିଯୋଗ କରିଛନ୍ତି । DLPC ନିଷ୍ପତ୍ତି ଅନୁସାରେ ଆଜିଠାରୁ ବରଗଡ ଓ ସମ୍ବଲପୁର ଜିଲ୍ଲାରେ ଧାନ ଉଠିବା କଥା । ହେଲେ ବରଗଡରେ ଏଯାଏଁ ଉଠି ନାହିଁ । ମଣ୍ଡି ଆଗରେ ଧାନ ଧରି ଚାଷୀ ଠିଆ ହୋଇଛନ୍ତି । ହଜାର ହଜାର ସଂଖ୍ୟାରେ ଚାଷୀ ପଞ୍ଜିକରଣ ହୋଇ ନାହାନ୍ତି । ଯେଉଁଥିପାଇଁ ଅଭାବୀ ବିକ୍ରି ଆରମ୍ଭ ହୋଇ ଗଲାଣି । ମିଲର କହୁଛନ୍ତି ସ୍ଥାନ ନାହିଁ ଧାନ ରଖିବାକୁ । ହେଲେ ସରକାର କହୁଛନ୍ତି ଜାଗା ଅଛି । ଯଦି ଜାଗା ଅଛି, ଅଭାବୀ ବିକ୍ରି କାହିଁକି ହେଉଛି? ତୁରନ୍ତ ଯୋଗାଣ ମନ୍ତ୍ରୀ ଓ ସମବାୟ ମନ୍ତ୍ରୀ ସ୍ଥିତି ଯାଞ୍ଚ କରନ୍ତୁ । ଚାଷୀଙ୍କ ଭାଗ୍ୟ ଭବିଷ୍ୟତ ସହିତ ଖେଳନ୍ତୁ ନାହିଁ, ନଚେତ ନିଆଁ ଲାଗିଯିବ । ସରକାରଙ୍କୁ ଚେତାବନୀ ଦେଇ ପ୍ରସନ୍ନ ଆଚାର୍ଯ୍ୟ କହିଛନ୍ତି କି, ବିପଦ ଜନକ ନିଆଁ ସହିତ ଖେଳୁଛନ୍ତି ସରକାର । ସେ ନିଆଁ ସହିତ ଖେଳନ୍ତୁ ନାହିଁ ନଚେତ ସାରା ରାଜ୍ୟରେ ନିଆଁ ଲାଗିଯିବ ।

ସେପଟେ ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ କହିଲେ ଯେ ଧାନ ରଖିବାକୁ ପର୍ଯ୍ୟାପ୍ତ ଅଛି । ଯେଉଁଠି ଧାନ ପ୍ରସ୍ତୁତ ହେଲାଣି, ସେଠି ଚାଷୀଙ୍କୁ ମଣ୍ଡି ଦିଆ ସରିଲାଣି । ବରଗଡ଼ରେ ଆଜି ଠାରୁ ଆରମ୍ଭ ହେଲା । ଜାନୁଆରୀରେ ଉପକୂଳ ଓଡ଼ିଶାରେ ମଣ୍ଡି ଖୋଲିବ । 

ଭୁବନେଶ୍ବର: ବିଧାନସଭାରେ ରାଜ୍ୟର ନୂଆ ଓ ପୁରୁଣା ପ୍ରସଙ୍ଗ ଉଠାଇବ ବିଜେଡି । ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇ ପଡ଼ିଛି । ଆଇନ ଶୃଂଖଳା ପରିସ୍ଥିତି ତଳକୁ ତଳକୁ ଖସି ଯାଇଛି । ରାଜଧାନୀରେ ହତ୍ୟା, ନାରୀ ନିର୍ଯାତନା, ଚୋରୀ, ଡକାୟତି ବଢିଯାଇଛି।  ଭିଆଇପି ଅଞ୍ଚଳରେ ଚୋରି ହେଉଛି, ସାଧାରଣ ଅଞ୍ଚଳରେ ବି ହେଉଛି । ଚାଷୀ ମାରଣା ନୀତି ଗ୍ରହଣ କରିଛନ୍ତି ସରକାର । ଧାନର ଅଭାବୀ ବିକ୍ରି ଓ କଟନୀ ଛଟନୀ ହେଉଛି । ଏହାକୁ ପ୍ରସଙ୍ଗ କରାଯିବ । ଆସନ୍ତାକାଲି ସନ୍ଧ୍ୟାରେ ବିଜେଡି ବିଧାୟକ ଦଳ ବୈଠକ ବସିବ। ନବୀନ ପଟ୍ଟନାୟକ ଅଧକ୍ଷତାରେ ଏହି ବୈଠକ ବସିବ। ବୈଠକରେ ରଣନୀତି ପ୍ରସ୍ତୁତ ହେବ। ବିଧାନସଭା ସୁରୁଖୁରୁରେ କିପରି ଚାଲିବ ତାହା ଶାସକ ଦଳର ଦାୟିତ୍ୱ । ଶାସକ ଦଳ ବିଶୃଙ୍ଖଳା କଲେ କାର୍ଯ୍ୟନୁଷ୍ଠାନ ନେବ ତ ? ଅନେକ ସମୟରେ ଶାସକ ଦଳ କହିବାକୁ ଦେଉନାହିଁ । ବାଚସ୍ପତି ସବୁ ଦଳକୁ ସମାନ ଦୃଷ୍ଟିରେ ଦେଖନ୍ତୁ ବୋଲି ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି।

ଭୁବନେଶ୍ବର: ଅଦିନିଆ ବର୍ଷା ଯୋଗୁଁ ଚିନ୍ତାରେ ପଡ଼ିଛନ୍ତି ଚାଷୀ। ରାଜ୍ୟର ବିଭିନ୍ନ ସ୍ଥାନରେ ଗତକାଲି ରାତିରୁ ଲାଗି ରହିଛି ଝିପ୍‌ଝିପ୍‌ ବର୍ଷା। ହଜାର ହଜାର ଏକର ଧାନ ବର୍ଷାରେ ନଷ୍ଟ ହେଉଛି । ଯେଉଁ ଚାଷୀର ଧାନ ଅମଳ ହୋଇଯାଇଛି ତା ପାଖରେ ଟୋକନ ନାହିଁ, କିନ୍ତୁ ଯାହାର ଧାନ ଅମଳ ହୋଇନାହିଁ ତାକୁ ଟୋକନ ଦିଆଯାଇଛି। ଚାଷୀ ଅମଳ ହୋଇଥିବା ଧାନ କେଉଁଠି ରଖିବ। ମଣ୍ଡିରେ ଧାନ ବର୍ଷାପାଣିରେ ନଷ୍ଟ ହେଉଛି ।ଗ୍ରାଉଣ୍ଡରେ କ’ଣ ଅବସ୍ଥା ସରକାର ନିଜେ ଯାଇ ଦେଖନ୍ତୁ ବୋଲି ପ୍ରସନ୍ନ ଆଚାର୍ଯ୍ୟ କହିଛନ୍ତି।

ସେ ଆହୁରି ମଧ୍ୟ କହିଛନ୍ତି ଯେ, ସମ୍ପୂର୍ଣ୍ଣ ଅବ୍ୟବସ୍ଥା ଭିତରେ ଧାନ ସଂଗ୍ରହ କରୁଛନ୍ତି ରାଜ୍ୟ ସରକାର। ଅନେକ ଧାନ ଟ୍ରକ୍ ମଣ୍ଡିକୁ ନଯାଇ ସିଧା ମିଲକୁ ଯାଉଛି। ଏହାଦ୍ବାରା କେମିତି ଚାଷୀଙ୍କ ବିକାଶ ହେବ। ବର୍ଷାରେ ଧାନର ରଙ୍ଗ ବଦଳି ଯିବ। ଆଉ ତାହାର FAQ କ୍ୱାଲିଟି ରହିବ ନାହିଁ । ଯାହାଦ୍ବାରା ଚାଷୀ କ୍ଷତି ସାହିବ । ଚାଷୀ ବାଧ୍ୟ ହୋଇ ଦଲାଲମାନଙ୍କୁ ଧାନ ବିକ୍ରି କରି ଶୋଷଣର ଶିକାର ହେବ। ସରକାରଙ୍କ ସବୁ ଘୋଷଣା ନିରର୍ଥକ ହୋଇଯାଇଛି। ଦଲାଲମାନଙ୍କୁ ନିୟନ୍ତ୍ରଣ କରନ୍ତୁ ସରକାର। ମଣ୍ଡିରେ କେମିତି ଚାଷୀଙ୍କ ଧାନ ସୁରକ୍ଷିତ ରହିବ ସେ ଉପରେ ଯୁଦ୍ଧକାଳୀନ ଭିତ୍ତିରେ ପଦକ୍ଷେପ ନିଅନ୍ତୁ । ସରକାର କହିଥିଲେ କଟନୀ ଛଟନୀ ହେବ ନାହିଁ । କିନ୍ତୁ କଟନୀ ଛଟନୀ ଏବେ ବି ହେଉଛି । ଏଥିପ୍ରତି ଦୃଷ୍ଟି ଦେବାକୁ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି।

ସମ୍ବଲପୁର: ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟ ଗୁରୁତର। କାର ଦୁର୍ଘଟଣାରେ ପ୍ରସନ୍ନ ଆଚାର୍ଯ୍ୟ ଆହତ ହୋଇଛନ୍ତି। ଭୁବନେଶ୍ଵରରୁ ବରଗଡ଼ ଫେରୁଥିବାବେଳେ ରେଢାଖୋଲ ବେଲଗଡ ଠାରେ ଘଟିଥିଲା ଏକ ଦୁର୍ଘଟଣା। ଏକ ଟ୍ରକ୍ ସହ କାରର ମୁହାମୁହିଁ ଧକ୍କା ହେବା ଫଳରେ ଗୁରୁତର ଭାବେ ଆହତ ହୋଇଛନ୍ତି।

ତାଙ୍କୁ ପ୍ରଥମେ ରେଢାଖୋଲରେ ପ୍ରାଥମିକ ଚିକିତ୍ସା ପରେ ସମ୍ବଲପୁର ଏକ ଘରୋଇ ମେଡ଼ିକାଲରେ ଭର୍ତ୍ତି କରାଯାଇଛି। ତାଙ୍କର ମୁଣ୍ଡ, ଆଖି,ନାକରେ ଗୁରୁତର ଆଘାତ ଲାଗିଛି। ବର୍ତ୍ତମାନ ସେ ଆଇସିୟୁରେ ଅଛନ୍ତି। ତାଙ୍କୁ ଏୟାର ଆମ୍ବୁୁଲାନ୍ସ ଯୋଗେ ଭୁବନେଶ୍ଵରର ଏକ ଘରୋଇ ମେଡ଼ିକାଲକୁ ନିଆଯିବ। ତାଙ୍କ ସହ ପିଏସଓ ଓ ଡ୍ରାଇଭର ଥିବାବେଳେ ସେମାନେ ସାମାନ୍ୟ ଆହତ ହୋଇଛନ୍ତି ।

ବରଗଡ଼: ପଦ୍ମପୁର ଉପନିର୍ବାଚନରେ ପ୍ରଚାର ବେଳେ ବିଜେପି ବାରମ୍ବାର ପଦ୍ମପୁରବାସୀଙ୍କୁ ଭୁଆଁ ବୁଲାଇ ଚାଲିଛି। ପ୍ରଥମେ ପ୍ରଧାନମନ୍ତ୍ରୀ ଫସଲ ବୀମା ଓ ବରଗଡ଼ ରୋଡ଼ ଷ୍ଟେସନ୍‌ରୁ ଭାୟା ପଦ୍ମପୁର ଦେଇ ନୂଆପଡ଼ା ରେଳ ଷ୍ଟେସନ ନାଁରେ କେନ୍ଦ୍ରମନ୍ତ୍ରୀ  ଧର୍ମେନ୍ଦ୍ର ପ୍ରଧାନ ମିଛ କହିଥିବା ବେଳେ ଆଜି ଆଉ ଦୁଇ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ରଙ୍କୁ ମଧ୍ୟ ଟପି ଯାଇଛନ୍ତି। ନିର୍ବାଚନୀ ପ୍ରଚାର ବେଳେ ଜନତାଙ୍କୁ ମିଛ ପ୍ରତିଶ୍ରୁତି ଦେବାରେ ମାହିର ଥିବା ବିଜେପି ଆଜି ପୁଣି ତାର ସମାନ ରଙ୍ଗ ଦେଖାଇଛି। କେନ୍ଦ୍ରମନ୍ତ୍ରୀ  ଧର୍ମେନ୍ଦ୍ର ପ୍ରଧାନ ପଦ୍ମପୁର  ରେଳ ଲାଇନ ନାଁରେ ମିଛ ପ୍ରହେଳିକା କରିଥିବା ବେଳେ ଆଜି ଖୋଦ୍‌ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଓ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର ଆଉ ଟିକେ ଉପରକୁ ଯାଇ ଜନସଭାରେ ମିଛର ସୌଦାଗରୀ କରିଛନ୍ତି।

ଆଜି ପାଇକମାଳରେ ଏକ ନିର୍ବାଚନୀ ସଭାରେ ରେଳ ମନ୍ତ୍ରୀ କହିଥିଲେ, କାଲି ଜାଗା ଦେଲେ ପହରଦିନ କାମ ଆରମ୍ଭ ହେବ। ଜାଗା ଓଡ଼ିଶା ସରକାରଙ୍କର। ଜାଗା ନ ଦେଲେ ରେଲ ଲାଇନ୍ କିପରି ହେବ ବୋଲି କହିଥିଲେ। ଖାଲି ଏତିକି ନୁହେଁ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର ମଧ୍ୟ କହିଥିଲେ ଫସଲ ବୀମା ଯୋଜନା ଟଙ୍କା କେନ୍ଦ୍ର ପକ୍ଷରୁ ରିଲିଜ କରାଯାଇ ସାରିଛି। କିନ୍ତୁ ଏଠାକାର ରାଜ୍ୟ ସରକାରଙ୍କ କାମ ଅତ୍ୟନ୍ତ ମନ୍ଥର। ଫଳରେ ଚାଷୀମାନେ ବୀମା ଟଙ୍କା ପାଇବାରେ ବିଳମ୍ବ ହେଉଛି। ବିଜେପିର ଏହି ଦୁଇ କେନ୍ଦ୍ରମନ୍ତ୍ରୀଙ୍କ ମିଛ ଏବେ ଚର୍ଚ୍ଚାର ବିଷୟ ହୋଇଛି। ନିର୍ବାଚନ ଜିତିବା ପାଇଁ ବିଜେପି କିଛି ବି କରିପାରେ କେବଳ ହଂସା ନୁହେଁ ଜନସଭାରେ କିଭଳି ଖୋଦ୍‌ ବିଭାଗୀୟ ମନ୍ତ୍ରୀ ମିଛ କହିପାରନ୍ତି ତାହା ଦେଖିବାକୁ ମିଳିଥିବା ବେଳେ ଦୁଇ କେନ୍ଦ୍ରମନ୍ତ୍ରୀ ମିଛ ସୌଦାଗରୀ ଉପରେ ବୟାନ ଦେଇଛନ୍ତି ବିଜେଡିର ବରିଷ୍ଠ ନେତା ପ୍ରଶନ୍ନ ଆଚାର୍ଯ୍ୟ।

ଫସଲ ବୀମାକୁ ନେଇ କେନ୍ଦ୍ର କୃଷିମନ୍ତ୍ରୀଙ୍କ ବୟାନ ପରେ  ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି, ଓଡିଶା ଜନସାଧାରଣଙ୍କୁ ବିଭ୍ରାନ୍ତ କରିବାକୁ ଉଦ୍ୟମ କରାଯାଉଛି । କେନ୍ଦ୍ର ସରକାରଙ୍କ ମନ୍ତ୍ରୀଙ୍କ ପାଖରେ ସମ୍ପୂର୍ଣ୍ଣ ତଥ୍ୟ ଅଛି, ଜାଣିଶୁଣି ପ୍ରବଞ୍ଚନାପୂର୍ଣ୍ଣ କଥା କୁହାଯାଉଛି । କ୍ଷତିପୂରଣ ପଇସା ବୀମା କମ୍ପାନୀ ଦିଏ, ରାଜ୍ୟ ସରକାର ଦିଅନ୍ତି ନାହିଁ । କେନ୍ଦ୍ରମନ୍ତ୍ରୀଙ୍କ କଥା କୌତୁହଳପୂର୍ଣ୍ଣ ତଥା ଅସତ୍ୟ ।

ପ୍ରସନ୍ନ ଆଚାର୍ଯ୍ୟ କହିଛନ୍ତି, କେନ୍ଦ୍ର କୃଷିମନ୍ତ୍ରୀ କହୁଛନ୍ତି ଯେ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦିଆଯାଇଛି ଚାଷୀଙ୍କୁ ଫସଲ ବୀମାର ଅର୍ଥ ପ୍ରଦାନ କରାଯାଉ । ବୀମା ବାବଦର ସମସ୍ତ ଟଙ୍କା ରାଜ୍ୟ ପାଖରେ ଜମା କରିଦିଆଯାଇଛି । ରାଜ୍ୟ ସରକାରଙ୍କ ଅବହେଳା କାରଣରୁ ଏ ଟଙ୍କା ଚାଷୀଙ୍କୁ ମିଳିପାରିନାହିଁ । ଏକଥା ଅତ୍ୟନ୍ତ ହାସ୍ୟାସ୍ପଦ । କେନ୍ଦ୍ର ସରକାରଙ୍କ ମନ୍ତ୍ରୀମାନଙ୍କ ପାଖରେ ସମ୍ପୂର୍ଣ୍ଣ ତଥ୍ୟ ରହିଛି । ବିଧି,ବ୍ୟବସ୍ଥା, ପ୍ରଣାଳୀ ସେମାନେ ସବୁକଥା ଜାଣିଛନ୍ତି କିନ୍ତୁ ଜାଣିଶୁଣି ପ୍ରବଞ୍ଚନା ପୂର୍ଣ୍ଣ କଥା କୁହାଯାଏ ତେବେ ଏହା ସଙ୍ଘୀୟ ବ୍ୟବସ୍ଥା ପ୍ରତିକୁଠାରଘାତ ।

ପ୍ରସନ୍ନ ଆଚାର୍ଯ୍ୟ ଆହୁରି ମଧ୍ୟ କହିଛନ୍ତି ମୁଁ ଅନେକ ସମୟରେ ବିଭିନ୍ନ ଦାୟିତ୍ୱରେ ରହିଛି ମୁଁ ଜାଣିନାହିଁ ଯେ ଯେଉଁଠି ଇନସ୍ୟୁରାନ୍ସ ହୁଏ ସେଠି ଫସଲର କ୍ଷତିପୂରଣ ସରକାର ଦିଅନ୍ତି ବୋଲି । ପ୍ରିମିୟମ ପଇସା ଉପଭୋକ୍ତା ବହନ କରିଥାଏ, ପ୍ରିମିୟମର କିଛି ଅଂଶ ଚାଷୀମାନେ ଆଉ କିଛି ଅଂଶ ରାଜ୍ୟ ସରକାର ଓ କେନ୍ଦ୍ର ସରକାର ବହନ କରିଥାନ୍ତି । ଚାଷୀର ଫସଲ କ୍ଷତି ହେଲେ ସେ କ୍ଷତିର ପଇସା ଇନସ୍ୟୁରାନ୍ସ କମ୍ପାନୀ ବହନ କରିଥାଏ । ଏହି ଟଙ୍କା ନା ରାଜ୍ୟ ସରକାର ଦିଅନ୍ତି ନା କେନ୍ଦ୍ର ସରକାର ଦିଅନ୍ତି । ମନ୍ତ୍ରୀଙ୍କ ଖୋଲାସଭାରେ ଏହିଭଳି ବୟାନ ଶୁଣି ଆଶ୍ଚର୍ୟ୍ୟ ଲାଗୁଛି କେନ୍ଦ୍ର କୃଷିମନ୍ତ୍ରୀ ଏହିଭଳି କଥା କହୁଛନ୍ତି।

ସେ ଆହୁରି ମଧ୍ୟ କହିଛନ୍ତି, କେନ୍ଦ୍ର ସରକାର କେବେ ପ୍ରିମିୟମ ଦେଲେ ସେ ଜାଣିଥିବେ । ରାଜ୍ୟ ସରକାର ଇନସ୍ୟୁରାନ୍ସ ବାବଦର ୬୨୩ କୋଟି ଟଙ୍କା ଯଥେଷ୍ଟ ପୂର୍ବରୁ ଜମା କରିସାରିଛନ୍ତି । ସେହିଭଳି କେଉଁ କେଉଁ କମ୍ପାନୀ ଫସଲର ବୀମା କରିବେ ତାର ସମ୍ପୂର୍ଣ୍ଣ ତାଲିକା କେନ୍ଦ୍ର ସରକାର ଦେଇଥାନ୍ତି । ରାଜ୍ୟପାଖକୁ ତାର ପୂରା ତାଲିକା ଜିଲ୍ଲାୱାରୀ ଆସିଥାଏ । ବୀମା କମ୍ପାନୀ ଫସଲ କ୍ଷତିର ରିପୋର୍ଟକୁ ଅଗ୍ରାହ୍ୟ କଲେ ଏବେ ରାଜ୍ୟସ୍ତରୀୟ ଟେକନିକାଲ ଲେଭଲ ଆଡଭାଇଜରୀ କମିଟିରେ ଆବେଦନ କରିଥିଲେ । କମିଟି ମଧ୍ୟ ଚାଷୀଙ୍କ ସପକ୍ଷରେ ରାୟ ଦେଲେ କିନ୍ତୁ ଶସ୍ୟବୀମା କମ୍ପାନୀ କମିଟିର କଥାରେ ସହମତି ପ୍ରକାଶ କଲେ ନାହିଁ । ପରେ ସେମାନେ କେନ୍ଦ୍ରୀୟ ଟେକନିକାଲ ଆଡଭାଇଜରୀ କମିଟିରେ ମଧ୍ୟ ଆବେଦନ କଲେ । ଦୁଇ ମାସ ହେବ କେନ୍ଦ୍ରୀୟ କମିଟି ଚାଷୀଙ୍କ କଥାକୁ ଶୁଣିଲେ ନାହିଁ, ଯାହା ଫଳରେ ଚାଷୀଙ୍କୁ ବୀମା ଟଙ୍କା ମିଳିପାରିନାହିଁ । ନିର୍ବାଚନକୁ ଆଖିରେ ରଖି ଏଭଳି ପ୍ରତିକ୍ରିୟା ଦେବା ଠିକ୍ ନୁହେଁ । ପୂର୍ବରୁ କେନ୍ଦ୍ର କହୁଥିବା ଏହା କେନ୍ଦ୍ରର ଦାୟିତ୍ୱ ନୁହେଁ ତେବେ ବର୍ତ୍ତମାନ କାହିଁକି କେନ୍ଦ୍ର ଏଥିରେ ହସ୍ତକ୍ଷେପ କଲା । ତେଣୁ ଏ ଦାୟିତ୍ୱ କେନ୍ଦ୍ରସରକାରଙ୍କ ଦାୟିତ୍ୱ ।

ଅନ୍ୟପଟେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ମିଛ ବୟାନର ମୁଖା ଖୋଲି ପ୍ରସନ୍ନ ଆଚାର୍ଯ୍ୟ କହିଛନ୍ତି ଯେ ନ୍ଦ୍ର ରେଳ ମନ୍ତ୍ରୀ କହିଲେ ଆଜି ଜାଗା ଦେଲେ, କାଲି କାମ ହେବ । କିନ୍ତୁ ରେଳ ପ୍ରକଳ୍ପ ପାଇଁ ଜାଗା ଯୋଗାଇ ଦେବାକୁ କେନ୍ଦ୍ରମନ୍ତ୍ରୀ କେବେ ରାଜ୍ୟ ସରକରାଙ୍କୁ ଚିଠି ଲେଖିଥିଲେ। ପଦ୍ମପୁର ନିର୍ବାଚନ ଜିତିବାକୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ମିଛ କହୁଛନ୍ତି। ପଦ୍ମପୁର ଜନ ସାଧାରଣଙ୍କୁ ବିଭ୍ରାନ୍ତୀକର ମନ୍ତବ୍ୟ ଦେଉଛନ୍ତି।ପଦମପୁର ଜନତାକୁ ବୋକା ଭାବୁଛନ୍ତି । କାରଣ ପୂର୍ବରୁ ରାଜ୍ୟ ସରକାର ରେଳ ପ୍ରକଳ୍ପ ପାଇଁ ସ୍ଥାନ ସହ ଟଙ୍କା ଦେବାକୁ ପ୍ରସ୍ତୁତ ଅଛନ୍ତି । କିନ୍ତୁ ରେଳ ପ୍ରକଳ୍ପକୁ ଖାରଜ କରିଛନ୍ତି କେନ୍ଦ୍ର ସରକାର । ସେ କହିଛନ୍ତି ଏହି ରେଳ ପ୍ରକକଳ୍ପ ଦ୍ୱାରା କିଛି ଲାଭ ହେବ ନାହିଁ । ଏହି ପ୍ରକଳ୍ପର ସର୍ଭେ ୧୭ ପ୍ରତିଶତ ଥିବାବେଳେ ଏହାକୁ ଖାରଜ କରାଯାଇଛି । ପ୍ରକଳ୍ପ ସର୍ବାଧିକ ମତ ପ୍ରକାଶ ସ୍ୱତେ କେନ୍ଦ୍ର ସରକାର ଅଣଦେଖା କରିଛନ୍ତି ।

କେବଳ ସେତିକି ନୁହେଁ ପୂର୍ବରୁ ମଧ୍ୟ ଏହି ରେଳଲାଇନ ପ୍ରସଙ୍ଗରେ ବିଜେପି ନେତାଙ୍କ ମିଛକୁ ଜନତାଙ୍କ ସାମ୍ନାକୁ ଆଣିଥିଲେ ବିଜେପି ରାଜ୍ୟସଭା ସାଂସଦ ଡ. ସସ୍ମିତ ପାତ୍ର । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ  ୨୦୧୮ ଡିସେମ୍ବର ୧୫ ତାରିଖରେ ଏହି ପ୍ରକଳ୍ପ କେନ୍ଦ୍ର ସରକାରଙ୍କ ଅନୁମୋଦନ ଲାଭ କରିସାରିଛି ବୋଲି ଘୋଷଣା କରିଥିବା ବେଳେ ଏହାର କିଛି ଦିନ ପରେ ଖୋଦ୍ ବରଗଡ଼ ସାଂସଦ ସୁରେଶ ପୂଜାରୀ କହିଥିଲେ ବରଗଡ଼ ରୋଡ଼ ଷ୍ଟେସନ୍‌ରୁ ଭାୟା ପଦ୍ମପୁର ଦେଇ ନୂଆପଡ଼ା ରେଳ ଷ୍ଟେସନ  ୨୦୨୧ ଡିସେମ୍ବର ମାସରେ କେନ୍ଦ୍ର ସରକାରଙ୍କ ଅନୁମୋଦନ ପାଇଛି।

ଯାହାକୁ ନେଇ ଏକ ସାମ୍ବାଦିକ ସମ୍ମିଳନୀରେ ଏହି ପ୍ରସଙ୍ଗ ଉପରେ ସବିଶେଷ ସୂଚନା ଦେଇ ବିଜେଡି ସାଂସଦ ଡ. ସସ୍ମିତ ପାତ୍ର କହିଥିଲେ ଯେ ପଦ୍ମପୁର ରେଳଲାଇନ ପ୍ରକଳ୍ପ ୨୦୧୮ ଡିସେମ୍ବରରେ ଅନୁମୋଦନ ଲାଭ କଲା ନା ୨୦୨୧ ଡିସେମ୍ବରରେ, ତାହା ପ୍ରଥମେ ଶ୍ରୀ ପୂଜାରୀ ସ୍ପଷ୍ଟ କରିବା ଉଚିତ । କାରଣ ମାନ୍ୟବର କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ନା ମାନ୍ୟବର ସାଂସଦ ଶ୍ରୀ ପୂଜାରୀ ମଧ୍ୟରୁ କିଏ ସତ କହୁଛନ୍ତି, ତାହା ଜାଣିବାର ଅଧିକାର ପଦ୍ମପୁରବାସୀଙ୍କର ଅଛି । ଯଦି ଶ୍ରୀ ପୂଜାରୀ ସତ କହୁଥାନ୍ତି, ତେବେ ମାନ୍ୟବର କେନ୍ଦ୍ରମନ୍ତ୍ରୀ ୨୦୧୮ରେ ଏହି ରେଳଲାଇନ ପ୍ରକଳ୍ପ ଅନୁମୋଦନ ପାଇସାରିଛି ବୋଲି ଯେଉଁ ଭୁଲ ତଥ୍ୟ ଦେଇ ପଦ୍ମପୁରବାସୀଙ୍କୁ ଭୁଆଁ ବୁଲାଇଥିଲେ, ସେଥିପାଇଁ ସେ କ୍ଷମା ମାଗିବା ଉଚିତ ।

କେବଳ ସେତିକି ନୁହେଁ  ପଦ୍ମପୁର ରେଳଲାଇନ ରେଳବାଇର ବ୍ଲୁ ବୁକ୍‌ରେ ସ୍ଥାନ ପାଇଛି ବୋଲି ଶ୍ରୀ ପୂଜାରୀ ଦେଇଥିବା ସୂଚନା ଉପରେ ମଧ୍ୟ ଡ. ପାତ୍ର ସ୍ପଷ୍ଟୀକରଣ ରଖିଥିଲେ । ଡ.ପାତ୍ର କହିଥିଲେ ଯେ ଶ୍ରୀ ପୂଜାରୀ ଜଣେ ଅଭିଜ୍ଞ ସାଂସଦ । ସେ ଏ କଥା ଜାଣିବା ଉଚିତ ଯେ ଦେଶର କୌଣସି ରେଳ ପ୍ରକଳ୍ପ ପାଇଁ ଅର୍ଥ ମଞ୍ଜୁର ହେଲେ ଏହା ବ୍ଲୁ ବୁକ୍ ନୁହେଁ, ପିଙ୍କ୍ ବୁକ୍‌ରେ ସ୍ଥାନ ପାଏ । ଭାରତୀୟ ରେଳବାଇ ପକ୍ଷରୁ ପ୍ରକାଶିତ ୨୦୨୨-୨୩ ପିଙ୍କ୍ ବୁକ୍‌ରେ କେଉଁଠି ମଧ୍ୟ ପଦ୍ମପୁର ରେଳଲାଇନ ପ୍ରକଳ୍ପ ସଂପର୍କରେ ଉଲ୍ଲେଖ ନାହିଁ । ଯେତେବେଳେ ଏହି ପ୍ରକଳ୍ପ ପିଙ୍କ୍ ବୁକ୍‌ରେ ସ୍ଥାନ ପାଇ ନାହିଁ ଏବଂ ଏଥିପାଇଁ କୌଣସି ଅର୍ଥ ମଂଜୁର ହୋଇ ନାହିଁ, ସେତେବେଳେ ପ୍ରକଳ୍ପ ପାଇଁ ଜମି ଅଧିଗ୍ରହଣ ଆରମ୍ଭ ହେବା ଉଚିତ ବୋଲି ସାଂସଦ ଶ୍ରୀ ପୂଜାରୀ କହିବା ହାସ୍ୟାସ୍ପଦ ଏବଂ ଦୁଃଖଦାୟକ । କେନ୍ଦ୍ର ସରକାରଙ୍କ ରେଳ ମନ୍ତ୍ରଣାଳୟ ଏହି ପ୍ରକଳ୍ପ ପାଇଁ କୌଣସି ଅର୍ଥ ମଞ୍ଜୁର କରି ନଥିବାବେଳେ ରାଜ୍ୟ ସରକାରଙ୍କୁ ଏହାର ସର୍ଭେ କରିବା କଥା କହି ମୁଣ୍ଡ ଉପରୁ ଦୋଷ ଖସାଇବାକୁ ଉଦ୍ୟମ କରୁଛି ବୋଲି ଡ. ପାତ୍ର ଅଭିଯୋଗ କରିଥିଲେ।