ନୂଆଦିଲ୍ଲୀ: ଅବକାରୀ ଦୁର୍ନୀତି ମାମଲାରେ ଛନ୍ଦି ହୋଇ ଜେଲ୍‌ରେ ଥିବା ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ଜାମିନ ଆବେଦନ ଉପରେ ସୁପ୍ରିମକୋର୍ଟ ‘ସିବିଆଇ’ ଏବଂ ‘ଇଡି’ଙ୍କୁ ନୋଟିସ ଜାରି କରିଛନ୍ତି। ମନୀଷ ସିସୋଦିଆଙ୍କ ଅନ୍ତରୀଣ ଜାମିନ ଆବେଦନ ଉପରେ ଜୁଲାଇ ୨୮ରେ ଶୁଣାଣି ହେବ। ବିଚାରପତି ସଞ୍ଜୀବ ଖାନ୍ନା ଓ ବେଲା ଏମ୍‌. ତ୍ରିବେଦୀଙ୍କ ଖଣ୍ଡପୀଠ ଏହି ଆବେଦନ ଶୁଣାଣି କରିଥିଲେ।

ମନିଷ ସିସୋଦିଆଙ୍କ ପତ୍ନୀଙ୍କ ସ୍ୱାସ୍ଥ୍ୟ ଖରାପ ରହୁଥିବା ସତ୍ତ୍ୱେ ତାଙ୍କ ଜାମିନ ଆବେଦନ ବାରମ୍ବାର ଖାରଜ ହେଉଥିବାରୁ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଜୁଲାଇ ୧୦ରେ ବରିଷ୍ଠ ଆଡଭୋକେଟ ଅଭିଷେକ ମନୁ ସିଂଘ୍‌ବି ଏହି ମାମଲାକୁ ପ୍ରଧାନ ବିଚାରପତି ଡି.ୟାଇ ଚନ୍ଦ୍ରଚୂଡଙ୍କ ନିକଟରେ ଏହି ମାମଲା ରଖି ଜରୁରୀକାଳୀନ ଶୁଣାଣି ପାଇଁ ଦାବି କରିଥିଲେ।

ନୂଆଦିଲ୍ଲୀ: ଗିରଫ ହେଲେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ। ସିବିଆଇ ମନୀଷ ସିସୋଦିଆଙ୍କୁ ଗିରଫ କରିଛି। ୮ ଘଣ୍ଟାର ଜେରା ପରେ ସିବିଆଇ ମନୀଷ ସିସୋଦିଆଙ୍କୁ ଆଜି ଗିରଫ କରିଛି। ଦିଲ୍ଲୀ ମଦ ଦୁର୍ନୀତି ମାମଲାରେ ଲୋଦି ରୋଡସ୍ଥିତ ସିବିଆଇ କାର୍ଯ୍ଯାଳୟରେ ଆଜି ହାଜର ହେଇଥିଲେ ଉମନୀଷ ସିସୋଦିଆ । ନିଜ କ୍ବାର୍ଟର୍ସରୁ ସିସୋଦିଆ ସିବିଆଇ କାର୍ଯ୍ଯାଳୟ ଅଭିମୁଖେ ବାହାରିବା ବେଳେ, ଶହ ଶହ ଆପ୍ କର୍ମୀ ପ୍ଲାକାର୍ଡ ଦେଖାଇ ସିବିଆଇ ବିରୋଧରେ ନାରାବାଜି କରିଥିଲେ ।

ଗିରଫ ପୂର୍ବରୁ ଆଜି ସିସୋଦିଆ କହିଥିଲେ ଯେ, ‘ସିବିଆଇ ଯାଞ୍ଚ ପ୍ରକ୍ରିୟାରେ ସେ ପୂର୍ଣ୍ଣ ସହଯୋଗ କରିବେ । ତାଙ୍କ ପ୍ରତି ଦେଶବାସୀ ଓ ଲକ୍ଷ ଲକ୍ଷ ଶିଶୁଙ୍କ ଶ୍ରଦ୍ଧା ରହିଛି । ଦେଶ ଲାଗି ସହିଦ ହୋଇଥିବା ଭଗତ ସିଂଙ୍କ ସେ ଅନୁଗାମୀ ।’ ସେପଟେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ କହିଛନ୍ତି, ‘ମନୀଷଙ୍କ ସହ ଭଗବାନ ଅଛନ୍ତି । ଲକ୍ଷ ଲକ୍ଷ ଶିଶୁ ଓ ସେମାନଙ୍କ ପିତାମାତାଙ୍କ ଆଶୀର୍ବାଦ ରହିଛି । ଏହା ଏକ ଅଭିଶାପ ନୁହେଁ ବରଂ ଏକ ଶୌର୍ଯ୍ଯର ପ୍ରତୀକ ।’

ଆପ୍ ପକ୍ଷରୁ ଅଭିଯୋଗ କରାଯାଇଥିଲା ଯେ, ସିସୋଦିଆଙ୍କ ବିରୋଧରେ ସିବିଆଇକୁ ଲଗାଇବା ଲାଗି ଲେଫଟନାଣ୍ଟ ଜେନେରାଲ ଯେଉଁ ନିର୍ଦ୍ଦେଶ ଦେଇଥିଲେ ତା’ ପଛରେ କେନ୍ଦ୍ରର ହାତ ଥିଲା । ଗତ ୧୯ ତାରିଖରେ ହାଜର ପାଇଁ ସମନ ଜାରି କରିଥିଲା ସିବିଆଇ । ମାତ୍ର ଦିଲ୍ଲୀ ବଜେଟ ପାଇଁ ବ୍ୟସ୍ତ ଥିବା ଦର୍ଶାଇ ସପ୍ତାହେ ମହଲତ ମାଗିଥିଲେ ମନୀଷ ।

ମାମଲାରେ ପୂର୍ବରୁ ସିସୋଦିଆଙ୍କ ଘରେ ସିବିଆଇ ରେଡ୍ ସହିତ ତାଙ୍କ ଅଫିସ ଓ ସମସ୍ତ କାଗଜପତ୍ରକୁ ଯାଞ୍ଚ କରାଯାଇଛି । ମଦ ଦୁର୍ନୀତି ମାମଲାରେ ସିବିଆଇ ଚାର୍ଜସିଟ ଦାଖଲ କରିଥିବାବେଳେ ଏଥିରେ ମନୀଷ ସିସୋଦିଆଙ୍କର ନାଁ  ନଥିଲା । ମାତ୍ର ନୂଆ ପ୍ରମାଣ ମିଳିଥିବା କହି ସେ ସମ୍ପର୍କରେ ପଚରାଉଚରା କରିବାକୁ ସିବିଆଇ ନୋଟିସ କରିଥିଲା ।

ନୂଆଦିଲ୍ଲୀ : ଦିଲ୍ଲୀ ଉପମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି(ଆପ୍‌) ନେତା ମନିଷ ସିସୋଦିଆଙ୍କୁ ନେଇ ରାଜନୀତି ସରଗରମ ରହିଛି । ଆଗକୁ ଦିଲ୍ଲୀ ମହାନଗର ନିଗମ ନିର୍ବାଚନ ରହିଥିବା ବେଳେ ବିଜେପି ଆରମ୍ଭ କରିଛି ପୋଷ୍ଟର ୱାର୍। ରବିବାର ଆକ୍ରମଣାତ୍ମକ ଢଙ୍ଗରେ ଦିଲ୍ଲୀର ଭାଜପା ମୁଖ୍ୟ ଏକ ପୋଷ୍ଟର ମାଧ୍ୟମରେ ସିସୋଡିଆଙ୍କୁ ‘ଲୁଟେରା’ ବୋଲି କହିଛନ୍ତି ।

Beware of these lootera's. pic.twitter.com/7EamPxrj6e

— BJP Delhi (@BJP4Delhi) November 13, 2022

୨୦୧୩ରେ ବଲିଉଡର ରିଲିଜ ହୋଇଥିବା ଫିଲ୍ମ ‘ଲୁଟେର’ର ପୋଷ୍ଟରରେ ଫଟୋ ବଦଳାଇ ସିସୋଦିଆଙ୍କୁ ଟାର୍ଗେଟ କରାଯାଇଛି। ପ୍ରକୃତରେ ଫିଲ୍ମ ‘ଲୁଟେର’ରେ ରଣବୀର ସିଂହ ଓ ସୋନାକ୍ଷୀ ସିହ୍ନା ଲିଡ୍ ରୋଲ୍‌ରେ ଥିଲେ। ଏହି ଫିଲ୍ମର ପୋଷ୍ଟରକୁ ଫଟୋସପ୍ କରି ଏଥିରେ ରଣବୀରଙ୍କ ସ୍ଥାନରେ ମନୀଷ ସିସୋଦିଆଙ୍କ ଫଟୋ ଲଗାଇ ବିଜେପି ତାଙ୍କୁ ଲୁଟେରା ଆଖ୍ୟା ଦେଇଛି। କେବଳ ସେତିକି ନୁହେଁ ପ୍ରଡକ୍ସନ ହାଉସର ନାଁ ମହାଠକ ସୁକେଶର ଥିବା ବେଳେ ନିର୍ଦ୍ଦେଶ ଅରବିନ୍ଦ କେଜ୍ରିୱାଲ ବୋଲି ପୋଷ୍ଟର୍‌ରେ ଲେଖା ଅଛି।ଅବକାରୀ ନୀତିରେ କଥିତ ଘୋଟାଲାକୁ ନେଇ ଭାଜପା ଏଏପି ନେତାଙ୍କୁ ଏଭଳି ଦର୍ଶାଇଛି।