ଭୁବନେଶ୍ବର: ଯୁକ୍ତ ଦୁଇ ପରୀକ୍ଷା ତାରିଖ ଘୋଷଣା କଲେ CHSE ପରୀକ୍ଷା ନିୟନ୍ତ୍ରକ ଡକ୍ଟର ପ୍ରଶାନ୍ତ କୁମାର ପରିଡା। ସେ ସୂଚନା ଦେଇ କହିଛନ୍ତି ଯେ, ଏଥର ଯୁକ୍ତ ଦୁଇ ପରୀକ୍ଷା ଦୁଇ ଭାଗରେ ହେବ। ଇଣ୍ଟରନାଲ ଓ ମେନ ପରୀକ୍ଷା । ଇଣ୍ଟରନାଲ ପରୀକ୍ଷା ଡ଼ିସେମ୍ବର ୨୬ ରୁ ୩୦ ଯାଏଁ ହେବ।  ଜାନୁଆରୀ ୨ ରୁ ୧୨ ଭିତରେ ହେବ ପ୍ରାକ୍ଟିକାଲ ପରୀକ୍ଷା। ଫେବ୍ରୁଆରୀ ୧୫ ରୁ ମାର୍ଚ୍ଚ ୨୦ ଭିତରେ ଥିଓରୀ ପରୀକ୍ଷା ଆରମ୍ଭ ହୋଇପାରେ। ସମସ୍ତ ଷ୍ଟ୍ରିମର ଫଳାଫଳ ପରୀକ୍ଷା ସରିବାର ୪୫ ଦିନ ଭିତରେ ରେଜଲ୍ଟ ବାହାରିବ। ଫର୍ମ ଫିଲଅପ ଚାଲିଛି। ଯେଉଁମାନେ କରି ନାହାନ୍ତି, ଫାଇନ ଡେଟରେ କରିବେ। 75% ଉପସ୍ଥାନ ନ ଥିଲେ ଆଡମିଟ କାର୍ଡ ମିଳିବନି। କିଛି କଲେଜରେ ଯେଉଁଠି ପିଲାମାନଙ୍କ ଉପସ୍ଥାନ କମ ଥିବ, ସେମାନଙ୍କୁ ଶ୍ରେଣୀ ଗୃହକୁ ଆଣିବାକୁ କଲେଜ ଅଧ୍ୟକ୍ଷ ସଚେତନ କରନ୍ତୁ ବୋଲି ସେ କହିଛନ୍ତ।

ଭୁବନେଶ୍ୱର: ଆସନ୍ତା ମାର୍ଚ୍ଚ ମାସରେ ହେବ +୨ ପରୀକ୍ଷା। ଉଚ୍ଚ ମାଧ୍ୟମିକ ଶିକ୍ଷା ପରିଷଦ(ସିଏଚଏସଇ) ଦ୍ୱାରା ପରିଚାଳିତ +୨ କଳା, ବାଣିଜ୍ୟ, ବିଜ୍ଞାନ ଓ ଧନ୍ଦାମୂଳକ ଛାତ୍ରଛାତ୍ରୀଙ୍କ ପରୀକ୍ଷା ମାର୍ଚ୍ଚ ପ୍ରଥମ ସପ୍ତାହରେ ଅନୁଷ୍ଠିତ ହେବ। ଏନେଇ ସିଏଚଏସଇ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି। ପୂର୍ବ ଦୁଇ ବର୍ଷ କରୋନାକୁ ନେଇ ପରୀକ୍ଷାରେ ଅନିଶ୍ଚିତ ଦେଖା ଦେଇଥିବା ବେଳେ ଚଳିତ ବର୍ଷରୁ ସମସ୍ତ ପ୍ରକ୍ରିୟା ପୂର୍ବ ନିର୍ଦ୍ଧାରିତ ସୂଚୀରେ ଆୟୋଜନ ହେବ। ତେଣୁ ସ୍ୱାଭାବିକ ସ୍ଥିତିରେ +୨ ପରୀକ୍ଷା ଆୟୋଜନ ପାଇଁ ସିଏଚଏସଇ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି।

ମାର୍ଚ୍ଚରେ ଯୁକ୍ତ ଦୁଇ ପରୀକ୍ଷା ହେବାକୁ ଥିବାବେଳେ ଛାତ୍ରଛାତ୍ରୀଙ୍କ ଫର୍ମ ପୂରଣ ଆସନ୍ତା ୧୪ ତାରିଖରୁ ଆରମ୍ଭ ହେବ। ନଭେମ୍ବର ୧୪ରୁ ୧୯ ମଧ୍ୟରେ ଫର୍ମ ପୂରଣ ହେବାକୁ ଥିବାବେଳେ ୨୧ରୁ ୨୩ ତାରିଖ ମଧ୍ୟରେ ଫି ଦାଖଲ ହେବ। ସେହିପରି ଶହ ଟେଙ୍କା ଜରିମାନା ଦେଇ ୨୧ରୁ ୨୬ ଏବଂ ୪୫୦ ଟଙ୍କା ଫାଇନ୍‍ ଦେଇ ୨୮ରୁ ୩୦ ତାରିଖ ମଧ୍ୟରେ ଛାତ୍ରଛାତ୍ରୀ ଫର୍ମ ପୂରଣ କରିବେ। ଉଭୟ ରେଗୁଲାର ଓ ଏକ୍ସ ରେଗୁଲାର ଛାତ୍ରଛାତ୍ରୀ ଏହି ସମୟରେ ଫର୍ମ ପୂରଣ କରିବେ। ତେବେ ମାର୍ଚ୍ଚ ପ୍ରଥମ ସପ୍ତାହରେ ପରୀକ୍ଷା ଆୟୋଜନ ପାଇଁ ସିଏଚଏସଇ ତାରିଖ ନିର୍ଦ୍ଧାରଣ କରିଥିବା ପରିଷଦ ସୁତ୍ରରୁ ସୂଚନା ମିଳିଛି। ସବୁ ବର୍ଗର ଛାତ୍ରଛାତ୍ର ୩୦ ତାରିଖ ସୁଦ୍ଧା ଫର୍ମ ପୂରଣ ପ୍ରକ୍ରିୟା ସାରିବେ। ୩୦ ପରେ କୌଣସି ପିଲାଙ୍କ ଫର୍ମ ପୂରଣ ଗ୍ରହଣ କରାଯିବ ନାହିଁ। ତେବେ ରେଗୁଲାର ବର୍ଗର ପିଲାଙ୍କ କ୍ଷେତ୍ରରେ ୫୨୦ ଟଙ୍କା ଫର୍ମ ପୂରଣ ଫି’ ଓ ପ୍ରାକ୍ଟିକାଲ୍‍ ବିଷୟ କ୍ଷେତ୍ରରେ ୪୦ ଟଙ୍କା ଲେଖାଏଁ ଦାଖଲ କରିବେ।

ଚଳିତ ବର୍ଷ ଛାତ୍ରଛାତ୍ରୀ ଶତ ପ୍ରତିଶତ ସିଲାବସରେ ପରୀକ୍ଷା ଦେବେ। ପୂର୍ବ ଦୁଇ ବର୍ଷରେ କରୋନା ପାଇଁ ପିଲାମାନେ ୭୦ ପ୍ରତିଶତ ସିଲାବସ୍‍ରେ ପରୀକ୍ଷା ଦେଉଥିବାବେଳେ ଚଳିତ ବର୍ଷ ସମ୍ପୂର୍ଣ୍ଣ ସିଲାବସରେ ପରୀକ୍ଷା ଦେବେ। ସେହିପରି ମୂଲ୍ୟାୟନ ପଦ୍ଧତ୍ତି ମଧ୍ୟ ପୂର୍ବ ବର୍ଷ ଭଳି ସମାନ ରହିବ। ୨୦ ପ୍ରତିଶତ ମାର୍କ ଶିକ୍ଷାନୁଷ୍ଠାନ ସ୍ତରରୁ ମିଳିବାକୁ ଥିବାବେଳେ ୮୦ ପ୍ରତିଶତ ମାର୍କ ସିଏଚଏସଇ ପ୍ରଦାନ କରିବ। ଶିକ୍ଷାନୁଷ୍ଠାନ ସ୍ତରରେ ଆୟୋଜିତ ହେଉଥିବା ତ୍ରୟ ମାସିକ ପରୀକ୍ଷାର ପ୍ରଦର୍ଶନ ଅନୁଯାୟୀ ପିଲାମାନଙ୍କୁ ୨୦ ପ୍ରତିଶତ ମାର୍କ ମିଳିବ। ଅବଶିଷ୍ଟ ୮୦ ପ୍ରତିଶତ ମାର୍କ ସିଏଚଏସଇ ପରୀକ୍ଷାରେ ପ୍ରଦର୍ଶନ ଅନୁଯାୟୀ ଦିଆଯିବ। ତେବେ ୨୦ ଓ ୮୦ ପ୍ରତିଶତକୁ ବିଚାରକୁ ନିଆଯାଇ ପିଲାଙ୍କୁ ପ୍ରତ୍ୟେକ ବିଷୟର ମାର୍କ ପ୍ରଦାନ କରାଯିବ।