ଭାରତକୁ ୨୦୨୬ ଟି-୨୦ ବିଶ୍ୱକପ୍ ଜିତାଇଥିବା ଅଧିନାୟକ ସୂର୍ଯ୍ୟକୁମାର ଯାଦବ ନିଜକୁ ଦଳରୁ ବାଦ୍ ଦିଆଯିବା ପ୍ରସଙ୍ଗରେ ପ୍ରଥମ ଥର ପାଇଁ ନିରବତା ଭାଙ୍ଗିଛନ୍ତି। ବିଶ୍ୱକପ୍ ସଫଳତା ପରେ ହଠାତ୍ ଅଧିନାୟକ ପଦରୁ ହଟାଇବା ସହ ତାଙ୍କୁ ଟି-୨୦ ଦଳରୁ ସମ୍ପୂର୍ଣ୍ଣ ରୂପେ ବିଦା କରାଯାଇଥିଲା। ଏହି ନିଷ୍ପତ୍ତି ପରେ ଚୟନକର୍ତ୍ତାଙ୍କ ଆଭିମୁଖ୍ୟ ଉପରେ ସେ ଖୋଲାଖୋଲି ଭାବେ ନିଜର ମତ ରଖିଛନ୍ତି। ନିକଟରେ ପୂର୍ବତନ ଭାରତୀୟ କ୍ରିକେଟର ଆକାଶ ଚୋପ୍ରାଙ୍କ ୟୁଟ୍ୟୁବ୍ ଚ୍ୟାନେଲରେ ଏକ ସାକ୍ଷାତକାର ବେଳେ 'ସ୍କାଏ' (SKY) ଭାବେ ପରିଚିତ ସୂର୍ଯ୍ୟକୁମାର ଏହି ଆଶ୍ଚର୍ଯ୍ୟଜନକ ନିଷ୍ପତ୍ତି ପଛର କାହାଣୀ ବଖାଣିଛନ୍ତି।

ମନରେ ଉଠିଥିଲା ଗୋଟିଏ ପ୍ରଶ୍ନ- 'ଏମିତି କେମିତି ହୋଇପାରିବ?'

ଦଳରୁ ବାଦ୍ ପଡ଼ିବା ନେଇ ସୂର୍ଯ୍ୟକୁମାର କହିଛନ୍ତି ଯେ, ଏହି ନିଷ୍ପତ୍ତି ତାଙ୍କ ପାଇଁ ଏକ ବଡ଼ ଝଟକା ଥିଲା। ସେ କହିଛନ୍ତି, "ଯେତେବେଳେ ତାଲିକାରେ ମୋ ନାମ ନଥିଲା, ମୁଁ କେବଳ ହସିଥିଲି। କିନ୍ତୁ ପ୍ରାୟ ଦେଢ଼ ମାସ ଧରି ଘରେ ବସି ମୁଁ କେବଳ ଗୋଟିଏ କଥା ଭାବୁଥିଲି ଯେ- ଏମିତି କେମିତି ହୋଇପାରିବ? ମୁଁ ଭାବିଥିଲି ଯେ ୨୦୨୮ ଲସ୍ ଏଞ୍ଜେଲସ୍ ଅଲିମ୍ପିକ୍ସ ଏବଂ ଆଗାମୀ ଟି-୨୦ ବିଶ୍ୱକପ୍ ପର୍ଯ୍ୟନ୍ତ ମୁଁ ଦଳର ନେତୃତ୍ୱ ନେବି। କିନ୍ତୁ ପରିସ୍ଥିତି ହଠାତ୍ ବଦଳିଗଲା"। ସୂର୍ଯ୍ୟକୁମାର ଆହୁରି ମଧ୍ୟ ସ୍ପଷ୍ଟ କରିଛନ୍ତି ଯେ ସେ ନିଜକୁ ଚୟନକର୍ତ୍ତାଙ୍କ ସ୍ଥାନରେ ରଖି ବୁଝିବାକୁ ଚେଷ୍ଟା କରିଥିଲେ ଯେ ସେମାନେ ଭବିଷ୍ୟତ ପାଇଁ ଏକ ନୂଆ ଦଳ ଗଠନ କରିବାକୁ କାହିଁକି ଚାହୁଁଛନ୍ତି।

ଫର୍ମ ଖରାପ ଥିବାରୁ ଶ୍ରେୟସ ଆୟରଙ୍କୁ ମିଳିଥିଲା ଦାୟିତ୍ୱ

ଅଜିତ ଅଗରକରଙ୍କ ନେତୃତ୍ୱାଧୀନ ଚୟନ କମିଟି ଏବଂ ମୁଖ୍ୟ କୋଚ୍ ଗୌତମ ଗମ୍ଭୀର ଟି-୨୦ ଫର୍ମାଟ୍ ପାଇଁ ସୂର୍ଯ୍ୟକୁମାରଙ୍କ ବ୍ୟାଟିଂ ଫର୍ମକୁ ନେଇ ଚିନ୍ତିତ ଥିଲେ। ଗତ ଦୁଇ ବର୍ଷ ଧରି ତାଙ୍କ ବ୍ୟାଟରୁ ଉଲ୍ଲେଖନୀୟ ଇନିଂସ ଆସିନଥିଲା ଏବଂ ଆଇପିଏଲ୍ ୨୦୨୬ରେ ମଧ୍ୟ ସେ ମୁମ୍ବାଇ ଇଣ୍ଡିଆନ୍ସ ପାଇଁ ମାତ୍ର ୨୭୦ ରନ୍ କରିପାରିଥିଲେ। ଏହି କାରଣରୁ ଭବିଷ୍ୟତକୁ ଦୃଷ୍ଟିରେ ରଖି ତାଙ୍କୁ ଅଧିନାୟକ ପଦରୁ ହଟାଇବା ସହ ଦଳରୁ ବାଦ୍ ଦିଆଯାଇଥିଲା। ତାଙ୍କ ସ୍ଥାନରେ ଶ୍ରେୟସ ଆୟରଙ୍କୁ ଭାରତୀୟ ଟି-୨୦ ଦଳର ନୂଆ ଅଧିନାୟକ ଭାବେ ନିଯୁକ୍ତ କରାଯାଇଥିଲା। ଆୟରଙ୍କ ନେତୃତ୍ୱରେ ଭାରତ ଆୟର୍ଲାଣ୍ଡ ଏବଂ ଇଂଲଣ୍ଡ ଗସ୍ତ ପାଇଁ ଯୋଜନା ପ୍ରସ୍ତୁତ କରିଥିଲା।

ଚୟନକର୍ତ୍ତା କହିଥିଲେ- 'ଏବେ ଆଗକୁ ବଢ଼ିବାର ସମୟ'

ସୂର୍ଯ୍ୟକୁମାର ଖୁଲାସା କରିଛନ୍ତି ଯେ ତାଙ୍କୁ ଚୟନକର୍ତ୍ତାଙ୍କ ପକ୍ଷରୁ ଏକ ଫୋନ୍ କଲ୍ ଆସିଥିଲା, ଯେଉଁଥିରେ ତାଙ୍କୁ କୁହାଯାଇଥିଲା ଯେ, "ଏବେ ଆଗକୁ ବଢ଼ିବାର ସମୟ ଆସିଯାଇଛି"। ଏହି କଥା ଶୁଣିବା ପରେ ତାଙ୍କୁ ଗଭୀର ଆଘାତ ଲାଗିଥିଲେ ମଧ୍ୟ ସେ ବିନା କୌଣସି ଅଭିଯୋଗରେ ଏହାକୁ ସମ୍ମାନର ସହ ଗ୍ରହଣ କରିଥିଲେ। ଖରାପ ସମୟରେ ମଧ୍ୟ ନିଜକୁ ଶାନ୍ତ ରଖିବା ଏବଂ ଅତୀତରେ ମିଳିଥିବା ସୁଯୋଗ ପାଇଁ କୃତଜ୍ଞ ରହିବା ତାଙ୍କର ସ୍ୱଭାବ ବୋଲି ସୂର୍ଯ୍ୟକୁମାର ପ୍ରକାଶ କରିଛନ୍ତି। ସୂଚନାଯୋଗ୍ୟ ଯେ, ସୂର୍ଯ୍ୟଙ୍କ ନେତୃତ୍ୱରେ ଭାରତ କୌଣସି ଟି-୨୦ ସିରିଜ୍ ହାରିନଥିଲା ଏବଂ ଏସିଆ କପ୍ ସହିତ ଟି-୨୦ ବିଶ୍ୱକପ୍ ମଧ୍ୟ ଜିତିଥିଲା, ତଥାପି ବିସିସିଆଇର ଏହି କଠୋର ନିଷ୍ପତ୍ତି କ୍ରିକେଟ୍ ପ୍ରଶଂସକଙ୍କୁ ଆଶ୍ଚର୍ଯ୍ୟ କରିଦେଇଥିଲା।

ଭାରତୀୟ ଟି-୨୦ କ୍ରିକେଟ୍ ଦଳର ଅଧିନାୟକ ସୂର୍ଯ୍ୟକୁମାର ଯାଦବ ନିଜର ବିସ୍ଫୋରକ ବ୍ୟାଟିଂ ସହ ସକାରାତ୍ମକ ମନୋଭାବ ପାଇଁ ବେଶ୍ ପରିଚିତ। ନିକଟରେ ପୂର୍ବତନ ଭାରତୀୟ କ୍ରିକେଟର ତଥା କମେଣ୍ଟେଟର ଆକାଶ ଚୋପ୍ରାଙ୍କ ନୂତନ ପୋଡକାଷ୍ଟ ଶୋ' 'ବୈଠ ଆଣ୍ଡ ବୋଲ୍' (Baith & Bol) ରେ ସୂର୍ଯ୍ୟକୁମାର ନଜର ଆସିଛନ୍ତି। ଏହି ସ୍ୱତନ୍ତ୍ର ସାକ୍ଷାତକାରରେ ସେ ନିଜ କ୍ରିକେଟ୍ କ୍ୟାରିୟର୍, ଅଧିନାୟକତ୍ୱ ଏବଂ ସାଥୀ ଖେଳାଳିମାନଙ୍କ ବିଷୟରେ ଅନେକ ଗୁମର ଖୋଲିଛନ୍ତି।

ଦଳରେ ନାଁ ନଥିବା ବେଳେ ବି ହସୁଥିଲି

ଏହି ଶୋ'ରେ ନିଜ ସଂଘର୍ଷର ଦିନଗୁଡ଼ିକୁ ମନେ ପକାଇ ସୂର୍ଯ୍ୟକୁମାର କହିଛନ୍ତି ଯେ, ସେ ସବୁବେଳେ ସକାରାତ୍ମକ ରହିବାକୁ ଚେଷ୍ଟା କରନ୍ତି। "ଯେତେବେଳେ ଭାରତୀୟ ଦଳରେ ମୋ ନାମ ନଥିଲା, ସେତେବେଳେ ମଧ୍ୟ ମୁଁ ଏମିତି ହିଁ ହସୁଥିଲି," ବୋଲି ସେ ପ୍ରକାଶ କରିଛନ୍ତି। ତାଙ୍କ ମତରେ କଠିନ ପରିଶ୍ରମ ଓ ଧୈର୍ଯ୍ୟ ହିଁ ତାଙ୍କୁ ଆଜି ଏହି ସ୍ଥାନରେ ପହଞ୍ଚାଇ ପାରିଛି।

ହାର୍ଦ୍ଦିକ ପାଣ୍ଡ୍ୟା ଓ ଅଧିନାୟକତ୍ୱ

ରୋହିତ ଶର୍ମାଙ୍କ ଅବସର ପରେ ଟି-୨୦ ଫର୍ମାଟରେ ସୂର୍ଯ୍ୟକୁମାର ଯାଦବଙ୍କୁ ଅଧିନାୟକ ପଦ ମିଳିବା ଅନେକଙ୍କ ପାଇଁ ଆଶ୍ଚର୍ଯ୍ୟଜନକ ଥିଲା, କାରଣ ହାର୍ଦ୍ଦିକ ପାଣ୍ଡ୍ୟା ଏହି ରେସ୍‌ରେ ସବୁଠାରୁ ଆଗରେ ଥିଲେ। ଏହି ପ୍ରସଙ୍ଗରେ ଆଲୋଚନା କରି ସୂର୍ଯ୍ୟକୁମାର ହାର୍ଦ୍ଦିକଙ୍କ ସହ ନିଜର ସମ୍ପର୍କ ଏବଂ ଦଳର ନେତୃତ୍ୱ ନେବାର ଆହ୍ୱାନ ବିଷୟରେ ଖୋଲାଖୋଲି ଭାବେ ନିଜର ମତ ରଖିଛନ୍ତି। ସେ କହିଛନ୍ତି ଯେ ଦଳର ସ୍ୱାର୍ଥ ତାଙ୍କ ପାଇଁ ସର୍ବୋପରି ଏବଂ ଅଧିନାୟକ ଭାବରେ ସମସ୍ତଙ୍କୁ ଏକାଠି ନେଇ ଚାଲିବା ତାଙ୍କର ପ୍ରାଥମିକତା।

ସଞ୍ଜୁ ସାମସନ ଓ ଜସପ୍ରୀତ ବୁମରାଙ୍କ ଉପରେ ପ୍ରତିକ୍ରିୟା

ସାକ୍ଷାତକାରରେ ସୂର୍ଯ୍ୟକୁମାର କେବଳ ନିଜ ବିଷୟରେ ନୁହେଁ, ବରଂ ଷ୍ଟାର୍ ବୋଲର ଜସପ୍ରୀତ ବୁମରା ଏବଂ ୱିକେଟ୍ କିପର-ବ୍ୟାଟର ସଞ୍ଜୁ ସାମସନଙ୍କ ପ୍ରଦର୍ଶନ ତଥା ଦକ୍ଷତା ବିଷୟରେ ମଧ୍ୟ ପ୍ରଶଂସା କରିଛନ୍ତି। ବୁମରାଙ୍କୁ ବିଶ୍ୱର ଅନ୍ୟତମ ଶ୍ରେଷ୍ଠ ମ୍ୟାଚ୍ ୱିନର ଭାବେ ବର୍ଣ୍ଣନା କରିଥିବା ବେଳେ, ସଞ୍ଜୁ ସାମସନଙ୍କ ଅସାଧାରଣ ପ୍ରତିଭା ଉପରେ ମଧ୍ୟ ସେ ଆଲୋକପାତ କରିଛନ୍ତି। ଦର୍ଶକମାନେ ଆଗାମୀ ଅଗଷ୍ଟ ୨୮ ତାରିଖରେ ପ୍ରସାରିତ ହେବାକୁ ଥିବା ଏହି ପୋଡକାଷ୍ଟର ସମ୍ପୂର୍ଣ୍ଣ ଏପିସୋଡ୍‌କୁ ଉତ୍ସାହର ସହ ଅପେକ୍ଷା କରିଛନ୍ତି।

ଭାରତୀୟ କ୍ରିକେଟ ଦଳରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ଟି-୨୦ ବିଶ୍ୱକପ୍ ବିଜେତା ଅଧିନାୟକ ସୂର୍ଯ୍ୟକୁମାର ଯାଦବଙ୍କୁ ଟିମରୁ ସମ୍ପୂର୍ଣ୍ଣ ରୂପେ ବାଦ୍ ଦିଆଯାଇଥିବା ବେଳେ ଶ୍ରେୟସ ଆୟରଙ୍କୁ ଭାରତୀୟ ଟି-୨୦ ଦଳର ନୂଆ ଅଧିନାୟକ ଭାବେ ନିଯୁକ୍ତ କରାଯାଇଛି। ଆୟରଲ୍ୟାଣ୍ଡ, ଇଂଲଣ୍ଡ ଏବଂ ଏସିଆନ୍ ଗେମ୍ସ ପାଇଁ ଦଳ ଘୋଷଣା କରାଯିବା ସମୟରେ ବିସିସିଆଇ (BCCI) ପକ୍ଷରୁ ଏହି ବଡ଼ ନିଷ୍ପତ୍ତି ନିଆଯାଇଛି।

ଅଜିତ ଅଗରକର ଖୋଲିଲେ କାରଣ

ସୂର୍ଯ୍ୟକୁମାର ଯାଦବଙ୍କୁ ଟିମରୁ ବାଦ୍ ଦେବା ନେଇ ମୁଖ୍ୟ ଚୟନକର୍ତ୍ତା ଅଜିତ ଅଗରକର ଏକ ସାମ୍ବାଦିକ ସମ୍ମିଳନୀରେ ସ୍ପଷ୍ଟୀକରଣ ଦେଇଛନ୍ତି। ସେ କହିଛନ୍ତି ଯେ, "ବିଶ୍ୱକପ୍ ଜିତିଥିବା ଜଣେ ଅଧିନାୟକଙ୍କୁ ବାଦ୍ ଦେବା କେବେ ବି ସହଜ ନୁହେଁ। କିନ୍ତୁ ଆଗାମୀ ଦୁଇ ବର୍ଷର ଯୋଜନା ଏବଂ ଖେଳାଳିଙ୍କ ସାମ୍ପ୍ରତିକ ଫର୍ମକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି। ଶ୍ରେୟସ ଆୟର ବିଶ୍ୱକପ୍ ଖେଳିବା ଦୌଡ଼ରେ ଥିଲେ ଏବଂ ସେ ଜଣେ ଯୋଗ୍ୟ ଦାବିଦାର ଅଟନ୍ତି। ତାଙ୍କ ପାଖରେ ନେତୃତ୍ୱ ନେବାର ଯଥେଷ୍ଟ ଅଭିଜ୍ଞତା ରହିଛି।"

ତିଲକ ବର୍ମା ଉପ-ଅଧିନାୟକ ଓ ବୈଭବ ସୂର୍ଯ୍ୟବଂଶୀଙ୍କ ଏଣ୍ଟ୍ରି

କେବଳ ଅଧିନାୟକ ପରିବର୍ତ୍ତନ ନୁହେଁ, ଯୁବ ଖେଳାଳି ତିଲକ ବର୍ମାଙ୍କୁ ଟି-୨୦ ଦଳର ନୂଆ ଉପ-ଅଧିନାୟକ ଭାବେ ନିଯୁକ୍ତି ଦିଆଯାଇଛି। ସେହିପରି ୧୫ ବର୍ଷୀୟ ଯୁବ ପ୍ରତିଭା ବୈଭବ ସୂର୍ଯ୍ୟବଂଶୀ ପ୍ରଥମ ଥର ପାଇଁ ସିନିୟର ଟି-୨୦ ଦଳରେ ସ୍ଥାନ ପାଇଛନ୍ତି। ଚୟନ କମିଟି ଆଗାମୀ ଭବିଷ୍ୟତକୁ ଦୃଷ୍ଟିରେ ରଖି ଯୁବ ଖେଳାଳିଙ୍କ ଉପରେ ଅଧିକ ଭରସା କରିଥିବା ସ୍ପଷ୍ଟ ହୋଇଛି।

ଆୟରଙ୍କ ଦମଦାର ନେତୃତ୍ୱ ରେକର୍ଡ

ଆଇପିଏଲ୍ (IPL) ରେ ଶ୍ରେୟସ ଆୟରଙ୍କ ଅଧିନାୟକତ୍ୱ ବେଶ୍ ପ୍ରଭାବଶାଳୀ ରହିଛି। ୨୦୨୪ ମସିହାରେ ସେ କୋଲକାତା ନାଇଟ୍ ରାଇଡର୍ସ କୁ ଆଇପିଏଲ୍ ଟାଇଟଲ୍ ଜିତାଇଥିବା ବେଳେ ୨୦୨୫ ରେ ପଞ୍ଜାବ କିଙ୍ଗସ୍ କୁ ଫାଇନାଲ୍‌ରେ ପହଞ୍ଚାଇଥିଲେ। ତାଙ୍କର ଏହି ନେତୃତ୍ୱ ଦକ୍ଷତା ତାଙ୍କୁ ଜାତୀୟ ଦଳର ମଙ୍ଗ ଧରିବାରେ ସାହାଯ୍ୟ କରିଛି। ଟିମ୍ ଇଣ୍ଡିଆ ଜୁନ୍ ୨୬ ତାରିଖରୁ ଆୟରଲ୍ୟାଣ୍ଡ ବିପକ୍ଷରେ ନିଜର ପରବର୍ତ୍ତୀ ଟି-୨୦ ସିରିଜ୍ ଖେଳିବ।

ମୁମ୍ବାଇ: ବିସିସିଆଇ (BCCI) ଶନିବାର ଜାପାନରେ ହେବାକୁ ଥିବା ୨୦୨୬ ଏସିଆନ୍ ଗେମ୍ସ ପାଇଁ ଭାରତୀୟ ଦଳ ଘୋଷଣା କରିଛି। ମୁମ୍ବାଇସ୍ଥିତ ବିସିସିଆଇ ମୁଖ୍ୟାଳୟରେ ପୁରୁଷ ଚୟନ କମିଟିର ଅଧ୍ୟକ୍ଷ ଅଜିତ ଅଗରକର ଏବଂ ବିସିସିଆଇର ସମ୍ପାଦକ ଦେବଜିତ ସଇକିଆ ଏକ ସାମ୍ବାଦିକ ସମ୍ମିଳନୀରେ ଏହି ଘୋଷଣା କରିଛନ୍ତି। ଆୟର୍ଲାଣ୍ଡ ଏବଂ ଇଂଲଣ୍ଡ ଗସ୍ତ ପାଇଁ ଭାରତର ନୂତନ ଟି-୨୦ ଅଧିନାୟକ ଭାବରେ ନିଯୁକ୍ତ ହୋଇଥିବା ଶ୍ରେୟାସ ଆୟର ଜାପାନରେ ମଧ୍ୟ ଦଳର ନେତୃତ୍ୱ ନେବେ। ସ୍ୱର୍ଣ୍ଣ ପଦକ ବଜାୟ ରଖିବା ଲକ୍ଷ୍ୟରେ ବିସିସିଆଇ ଏକ ଶକ୍ତିଶାଳୀ ଦଳ ପଠାଇବାକୁ ନିଷ୍ପତ୍ତି ନେଇଛି।

୨୦୨୬ ଏସିଆନ୍ ଗେମ୍ସ ପାଇଁ ଘୋଷିତ ଦଳରେ ପ୍ରମୁଖ ଖେଳାଳିମାନଙ୍କୁ ସାମିଲ କରାଯାଇଛି। ଦଳରେ ଶ୍ରେୟାସ ଆୟର (ଅଧିନାୟକ), ତିଲକ ବର୍ମା (ଉପ-ଅଧିନାୟକ), ଅଭିଷେକ ଶର୍ମା, ସଞ୍ଜୁ ସାମସନ (ୱିକେଟ୍ କିପର), ଈଶାନ କିଶନ (ୱିକେଟ୍ କିପର), ଶିବମ ଦୁବେ, ନୀତୀଶ ରେଡ୍ଡୀ, ଅକ୍ଷର ପଟେଲ, ୱାଶିଂଟନ୍ ସୁନ୍ଦର, ବରୁଣ ଚକ୍ରବର୍ତ୍ତୀ, ରବି ବିଷ୍ଣୋଇ, ଜସପ୍ରୀତ ବୁମରା, ହର୍ଷିତ ରାଣା, ଅର୍ଶଦୀପ ସିଂହ ଏବଂ ବୈଭବ ସୂର୍ଯ୍ୟବଂଶୀ ସ୍ଥାନ ପାଇଛନ୍ତି। ବିଶେଷ କରି ଅଭିଜ୍ଞ ଦ୍ରୁତ ବୋଲର ଜସପ୍ରୀତ ବୁମରାଙ୍କ ଉପସ୍ଥିତି ଦଳକୁ ଆହୁରି ମଜବୁତ କରିଛି।

୨୦୨୬ ଟି-୨୦ ବିଶ୍ୱକପ୍ ଜିତାଇଥିବା ଅଧିନାୟକ ସୂର୍ଯ୍ୟକୁମାର ଯାଦବଙ୍କୁ ଖରାପ ଫର୍ମ ଏବଂ ଫିଟନେସ୍ କାରଣରୁ ଦଳରୁ ବାଦ୍ ଦିଆଯାଇଛି। ଅନ୍ୟପକ୍ଷରେ, ମାତ୍ର ୧୫ ବର୍ଷୀୟ ଯୁବ ପ୍ରତିଭା ବୈଭବ ସୂର୍ଯ୍ୟବଂଶୀ ଦଳରେ ସ୍ଥାନ ପାଇ ଏକ ନୂଆ ଇତିହାସ ରଚିଛନ୍ତି। ଆଇପିଏଲ୍ ୨୦୨୬ରେ ରାଜସ୍ଥାନ ରୟାଲ୍ସ ପକ୍ଷରୁ ଖେଳି ସେ ୧୬ଟି ଇନିଂସରେ ୭୭୬ ରନ୍ ସଂଗ୍ରହ କରିଥିଲେ। ଏଥିରେ ତାଙ୍କର ଷ୍ଟ୍ରାଇକ୍ ରେଟ୍ ୨୩୭.୩୦ ରହିବା ସହ ସେ ୭୨ଟି ଛକା ମାରି ଆଇପିଏଲ୍ ଇତିହାସରେ ଅରେଞ୍ଜ କ୍ୟାପ୍ ଜିତିବାରେ ସର୍ବକନିଷ୍ଠ ଖେଳାଳି ହୋଇଥିଲେ। ଗୋଟିଏ ଦିନରେ ଦୁଇଟି ଅଲଗା ଅଲଗା ଭାରତୀୟ ଦଳରେ ସ୍ଥାନ ପାଇବା ତାଙ୍କ କ୍ୟାରିୟରର ଏକ ବଡ଼ ସଫଳତା।

ଶ୍ରେୟାସ ଆୟରଙ୍କ ନେତୃତ୍ୱରେ ଦଳ ୨୦୨୩ ହାଙ୍ଗଝୋଉ ଗେମ୍ସର ସ୍ୱର୍ଣ୍ଣ ପଦକ ବଜାୟ ରଖିବାକୁ ପଡ଼ିଆକୁ ଓହ୍ଲାଇବ। ଆୟର ଆଇପିଏଲରେ ଦିଲ୍ଲୀ କ୍ୟାପିଟାଲ୍ସ, କୋଲକାତା ନାଇଟ୍ ରାଇଡର୍ସ ଏବଂ ପଞ୍ଜାବ କିଙ୍ଗସକୁ ଫାଇନାଲକୁ ନେଇଥିବା ପ୍ରଥମ ଅଧିନାୟକ ଅଟନ୍ତି। ଏସିଆନ୍ ଗେମ୍ସର ପୁରୁଷ କ୍ରିକେଟ୍ ଟୁର୍ଣ୍ଣାମେଣ୍ଟ ଟି-୨୦ ଫର୍ମାଟରେ ଖେଳାଯିବ। ଜାପାନର ଆଇଚି ପ୍ରିଫେକ୍ଚରର କୋରୋଗି ଆଥଲେଟିକ୍ ପାର୍କରେ ଏହା ସେପ୍ଟେମ୍ବର ୨୪ ରୁ ଅକ୍ଟୋବର ୩ ପର୍ଯ୍ୟନ୍ତ ଅନୁଷ୍ଠିତ ହେବ। ଏଥିରେ ଅକ୍ଟୋବର ୩ ତାରିଖରେ ସ୍ୱର୍ଣ୍ଣ ପଦକ ମ୍ୟାଚ୍ ଖେଳାଯିବ। ୨୦୨୮ ଲସ୍ ଆଞ୍ଜେଲସ୍ ଅଲିମ୍ପିକ୍ସରେ କ୍ରିକେଟ୍ ସାମିଲ ହେବାକୁ ଥିବାରୁ ଏହି ଏସିଆନ୍ ଗେମ୍ସ ଭାରତ ପାଇଁ ବେଶ୍ ଗୁରୁତ୍ୱପୂର୍ଣ୍ଣ ରହିବ।

ଟି-୨୦ ବିଶ୍ୱକପ୍ ଇତିହାସରେ କୌଣସି ଦଳ କେବେହେଲେ ଟାଇଟଲ୍ ବଜାୟ ରଖିପାରି ନଥିଲେ, କିନ୍ତୁ ଗତ ମାର୍ଚ୍ଚ ମାସରେ ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଭାରତ ଏହାକୁ ଭୁଲ୍ ପ୍ରମାଣିତ କରିଥିଲା। ଲଗାତାର ତୃତୀୟ ଥର ପାଇଁ ବିଶ୍ୱକପ୍ ଟ୍ରଫି ଜିତିବା ସତ୍ତ୍ୱେ, ମାତ୍ର ତିନି ମାସ ପରେ ଏବେ ଦଳର ନାୟକ ସୂର୍ଯ୍ୟକୁମାର ନିଜ ସ୍ଥାନ ହରାଇବାକୁ ବସିଛନ୍ତି। ରିପୋର୍ଟ ଅନୁଯାୟୀ, କେବଳ ଅଧିନାୟକ ପଦ ନୁହେଁ, ବରଂ ଜଣେ ଖେଳାଳି ଭାବରେ ମଧ୍ୟ ତାଙ୍କ ସ୍ଥାନ ବିପଦରେ ପଡ଼ିଛି। ନେତୃତ୍ୱ ନୁହେଁ, ବରଂ ତାଙ୍କର ଖରାପ ଫର୍ମ ହିଁ ଏହାର ମୁଖ୍ୟ କାରଣ ପାଲଟିଛି।

ଆଇପିଏଲ୍ ୨୦୨୬ ଏବଂ ଖରାପ ଫର୍ମର ପ୍ରଭାବ

ଗତବର୍ଷ ଆଇପିଏଲ୍‌ରେ ୭୦୦ ରନ୍ ସଂଗ୍ରହ କରିଥିବା ସୂର୍ଯ୍ୟକୁମାର, ଆମେରିକା ବିପକ୍ଷ ମ୍ୟାଚ୍‌ରେ ୪୯ ବଲ୍‌ରେ ୮୪ ରନ୍ କରି ନିଜର ଆଶା ଉଜ୍ଜୀବିତ ରଖିଥିଲେ। କିନ୍ତୁ ଆଇପିଏଲ୍ ୨୦୨୬ ତାଙ୍କ ପାଇଁ ନିରାଶାଜନକ ରହିଲା। ବିସିସିଆଇ (BCCI) ର ଜଣେ ଅଧିକାରୀଙ୍କ ଅନୁଯାୟୀ, "ଚୟନକର୍ତ୍ତାମାନେ ଆଇପିଏଲ୍ ଶେଷ ହେବା ଯାଏଁ ଅପେକ୍ଷା କରିବାକୁ ଚାହୁଁଥିଲେ ଯେ ସେ ଫର୍ମକୁ ଫେରୁଛନ୍ତି କି ନାହିଁ। କିନ୍ତୁ ସେ କେବଳ ରନ୍ କରିବାରେ ବିଫଳ ହୋଇନାହାଁନ୍ତି, ବରଂ ସମ୍ପୂର୍ଣ୍ଣ ରୂପେ ଫର୍ମ ବାହାରେ ଥିବା ପରି ମନେ ହେଉଛନ୍ତି, ତେଣୁ ଏକ କଠିନ ନିଷ୍ପତ୍ତି ନେବାକୁ ପଡ଼ିବ"।

ଏକ ସ୍ୱର୍ଣ୍ଣିମ ଯୁଗର ପରିସମାପ୍ତି?

ଏକ ସମୟ ଥିଲା ଯେବେ ସୂର୍ଯ୍ୟକୁମାର ଟି-୨୦ କ୍ରିକେଟ୍‌ରେ ବ୍ୟାଟିଂର ସଂଜ୍ଞା ବଦଳାଇ ଦେଇଥିଲେ। ୨୦୨୧ ରୁ ୨୦୨୩ ମଧ୍ୟରେ ସେ ୫୭ ଟି ଇନିଂସ୍ ଖେଳି ୧୭୧.୮୫ ଷ୍ଟ୍ରାଇକ୍ ରେଟ୍ ଏବଂ ୪୫.୫୫ ହାରରେ ମୋଟ ୨୧୪୧ ରନ୍ ସଂଗ୍ରହ କରିଥିଲେ। ଏହି ସମୟ ମଧ୍ୟରେ ସେ ୪ ଟି ଶତକ ମଧ୍ୟ ହାସଲ କରିଥିଲେ। ବିରାଟ କୋହଲି ଓ ଏବି ଡିଭିଲିୟର୍ସଙ୍କ ଭଳି ସେ ମଧ୍ୟ କ୍ରିକେଟ୍ ଜଗତରେ ଏକ ଅଦ୍ଭୁତପୂର୍ବ ଦବ୍‌ଦବା ସୃଷ୍ଟି କରିଥିଲେ। କିନ୍ତୁ ଏବେ ସେହି ସୁବର୍ଣ୍ଣ ଯୁଗ ଧୀରେ ଧୀରେ ମଳିନ ପଡ଼ିବାରେ ଲାଗିଛି।

ଆକଳନ କହୁଛି ନିରାଶାର କାହାଣୀ

ବର୍ତ୍ତମାନର ଆକଳନ ସୂର୍ଯ୍ୟକୁମାରଙ୍କ ପାଇଁ ଚିନ୍ତାଜନକ ଅଟେ। ୨୦୨୫ ମସିହାରେ ସେ ୧୧ଟି ଇନିଂସ୍‌ରେ ହାରାହାରି ମାତ୍ର ୯ ରନ୍‌ରେ କେବଳ ୧୦୦ ରନ୍ ସଂଗ୍ରହ କରିପାରିଛନ୍ତି। ଅଧିନାୟକ ଭାବରେ ତାଙ୍କର ପୂର୍ଣ୍ଣ କାର୍ଯ୍ୟକାଳ ମଧ୍ୟରେ ସେ ୨୦ଟି ଇନିଂସ୍‌ରୁ ମାତ୍ର ୩୩୦ ରନ୍ କରିଛନ୍ତି। ପୂର୍ବତନ ଭାରତୀୟ ଅଧିନାୟକ କୃଷ୍ଣମାଚାରୀ ଶ୍ରୀକାନ୍ତ ତାଙ୍କର କ୍ରମାଗତ ଖରାପ ପ୍ରଦର୍ଶନ (୦, ୫, ୧୨, ୧) କୁ ଏକ 'ପିନ୍ କୋଡ୍' ସହିତ ତୁଳନା କରି ସମାଲୋଚନା କରିଥିଲେ। ଏହି ସବୁ ଆକଳନ ଏବେ ଭାରତୀୟ ଦଳର ନେତୃତ୍ୱ ଓ ଭବିଷ୍ୟତ ଆଲୋଚନାକୁ ସମ୍ପୂର୍ଣ୍ଣ ରୂପେ ବଦଳାଇ ଦେଇଛି।

ଟଲିଉଡର ଲୋକପ୍ରିୟ ଅଭିନେତ୍ରୀ ଶ୍ରୀଲୀଲା ଏବଂ ଯୁବ ଭାରତୀୟ କ୍ରିକେଟର ତିଲକ ବର୍ମାଙ୍କୁ ନେଇ ଗତ କିଛି ଦିନ ହେବ ସୋସିଆଲ ମିଡିଆରେ ଜୋରଦାର ଚର୍ଚ୍ଚା ଲାଗିରହିଥିଲା। ଉଭୟ ପରସ୍ପରକୁ ଡେଟ୍ କରୁଥିବା ନେଇ ଅନେକ ଗୁଜବ ସୃଷ୍ଟି ହୋଇଥିଲା। ତେବେ ବର୍ତ୍ତମାନ ଏହି ସମସ୍ତ କଳ୍ପନାଜଳ୍ପନାର ଅନ୍ତ ଘଟାଇଛନ୍ତି ଶ୍ରୀଲୀଲାଙ୍କ ମା' ଡାକ୍ତର ସ୍ୱର୍ଣ୍ଣଲତା।

ମା'ଙ୍କ ପ୍ରତିକ୍ରିୟା

ଗଣମାଧ୍ୟମ ସହ କଥାବାର୍ତ୍ତା ବେଳେ ଡାକ୍ତର ସ୍ୱର୍ଣ୍ଣଲତା ଏହି ସମ୍ପର୍କକୁ ନେଇ ଉଠିଥିବା ସମସ୍ତ ଖବରକୁ ସମ୍ପୂର୍ଣ୍ଣ ରୂପେ ଖଣ୍ଡନ କରିଛନ୍ତି। ସେ ସ୍ପଷ୍ଟ କରିଛନ୍ତି ଯେ, ଏହି ଖବରରେ ତିଳେମାତ୍ର ସତ୍ୟତା ନାହିଁ। କେବଳ ସେତିକି ନୁହେଁ, ଶ୍ରୀଲୀଲା ଓ ତିଲକ ବର୍ମା ଆଜି ପର୍ଯ୍ୟନ୍ତ ପରସ୍ପରକୁ ଭେଟି ନାହାନ୍ତି କିମ୍ବା ସେମାନଙ୍କ ମଧ୍ୟରେ କୌଣସି କଥାବାର୍ତ୍ତା ମଧ୍ୟ ହୋଇନାହିଁ ବୋଲି ସେ ପ୍ରକାଶ କରିଛନ୍ତି। ବିନା ତଥ୍ୟରେ ଏଭଳି ମିଥ୍ୟା ଖବର ପ୍ରସାରଣ ନକରିବାକୁ ସେ ଅନୁରୋଧ କରିଛନ୍ତି।

କେମିତି ଆରମ୍ଭ ହୋଇଥିଲା ଗୁଜବ?

ଗତବର୍ଷ ଡିସେମ୍ବର ମାସରେ ବୈକୁଣ୍ଠ ଏକାଦଶୀ ଅବସରରେ ତିରୁମଳା ମନ୍ଦିରରେ ଉଭୟଙ୍କୁ ପୃଥକ ପୃଥକ ଭାବେ ନିଜ ପରିବାର ସହ ଦେଖିବାକୁ ମିଳିଥିଲା। ଏହା ପରେ ଆଇପିଏଲ୍ (IPL) ମ୍ୟାଚ୍ ବେଳେ ଶ୍ରୀଲୀଲାଙ୍କ ମା' ଭିଆଇପି (VIP) ଷ୍ଟାଣ୍ଡରେ ନଜର ଆସିଥିଲେ। ନିକଟରେ ମୁମ୍ବାଇ ଇଣ୍ଡିଆନ୍ସ ଖେଳାଳି ସୂର୍ଯ୍ୟକୁମାର ଯାଦବ ଏକ ଭିଡିଓରେ ତିଲକ ବର୍ମାଙ୍କୁ ଥଟ୍ଟା କରି କହୁଥିଲେ ଯେ ସେ ପ୍ରେମରେ ପଡ଼ିଛନ୍ତି। ଏହି ଭିଡିଓଟି ଭାଇରାଲ ହେବା ପରେ ଲୋକେ ଏହାକୁ ଶ୍ରୀଲୀଲାଙ୍କ ସହ ଯୋଡ଼ି ଦେଇଥିଲେ, ଯାହା ଫଳରେ ଡେଟିଂ ଗୁଜବ ଆହୁରି ତୀବ୍ର ହୋଇଥିଲା।

ନିଟ୍ (NEET) ପ୍ରସ୍ତୁତିରେ ବ୍ୟସ୍ତ ଶ୍ରୀଲୀଲା

ଗୁଜବକୁ ଖଣ୍ଡନ କରିବା ସହ ଡାକ୍ତର ସ୍ୱର୍ଣ୍ଣଲତା ଜଣାଇଛନ୍ତି ଯେ, ଶ୍ରୀଲୀଲା ବର୍ତ୍ତମାନ ତାଙ୍କର ଫିଲ୍ମ କ୍ୟାରିୟର ଏବଂ ଡାକ୍ତରୀ ପାଠପଢ଼ା ଉପରେ ସମ୍ପୂର୍ଣ୍ଣ ଧ୍ୟାନ ଦେଉଛନ୍ତି। ନିଜର ବ୍ୟସ୍ତବହୁଳ ସୁଟିଂ ସିଡ୍ୟୁଲ୍ ମଧ୍ୟରେ ସମୟ ବାହାର କରି ସେ ଆଗାମୀ ନିଟ୍-ପିଜି (NEET-PG) ପରୀକ୍ଷା ପାଇଁ କଠିନ ପରିଶ୍ରମ କରୁଛନ୍ତି। ତେଣୁ ଏଭଳି ସମୟରେ ପ୍ରେମ ବା ଡେଟିଂ କଥା ସମ୍ପୂର୍ଣ୍ଣ ଭିତ୍ତିହୀନ ବୋଲି ସେ ସ୍ପଷ୍ଟ କରିଛନ୍ତି ଅତୀତରେ ମଧ୍ୟ ବଲିଉଡ୍ ଅଭିନେତା କାର୍ତ୍ତିକ ଆର୍ଯ୍ୟନଙ୍କ ସହ ଶ୍ରୀଲୀଲାଙ୍କ ନାମକୁ ଯୋଡ଼ା ଯାଇଥିଲା, ଯାହା ପରବର୍ତ୍ତୀ ସମୟରେ ମିଥ୍ୟା ପ୍ରମାଣିତ ହୋଇଥିଲା।

ମୁମ୍ବାଇ ଇଣ୍ଡିଆନ୍ସର (Mumbai Indians) ଅଧିନାୟକ ହାର୍ଦ୍ଦିକ ପାଣ୍ଡ୍ୟା (Hardik Pandya) ଆଇପିଏଲ୍ ୨୦୨୬ (IPL 2026) ରୁମ୍ବାଇର ବିଦାୟ ପରେ ପୁଣି ଥରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ଦଳର ଖରାପ ପ୍ରଦର୍ଶନ ଏବଂ ତାଙ୍କର ସୋସିଆଲ୍ ମିଡିଆ ଆକ୍ଟିଭିଟି ପରେ ସେ ମୁମ୍ବାଇ ଇଣ୍ଡିଆନ୍ସ ଛାଡିବା ନେଇ ଗୁଜବ ଜୋର ଧରିଛି।

ଇନଷ୍ଟାଗ୍ରାମରୁ ଅନଫଲୋ କଲେ, ପୁଣି ଫେରାଇଲେ

ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ଠାରୁ ପରାସ୍ତ ହେବା ପରେ ମୁମ୍ବାଇ ଇଣ୍ଡିଆନ୍ସ ପ୍ଲେଅଫ୍ ରେସରୁ ବାଦ୍ ପଡିଥିଲା। ଏହି ପରାଜୟ ପରେ ହାର୍ଦ୍ଦିକ ପାଣ୍ଡ୍ୟା ନିଜର ଅଫିସିଆଲ୍ ଇନଷ୍ଟାଗ୍ରାମ ଆକାଉଣ୍ଟରୁ ମୁମ୍ବାଇ ଇଣ୍ଡିଆନ୍ସ (MI) କୁ କିଛି ସମୟ ପାଇଁ ଅନଫଲୋ (unfollow) କରିଦେଇଥିଲେ। ଯଦିଓ କିଛି ମିନିଟ୍ ପରେ ଆକାଉଣ୍ଟ ପୁଣି ଫଲୋଇଂ ତାଲିକାକୁ ଫେରିଆସିଥିଲା, କିନ୍ତୁ ଏହି ଘଟଣା ମୁମ୍ବାଇ ଫ୍ରାଞ୍ଚାଇଜି ଏବଂ ତାଙ୍କ ମଧ୍ୟରେ ଥିବା ସମ୍ପର୍କକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି କରିଛି।

ଖରାପ ଫର୍ମ ଏବଂ ଆହତ ସମସ୍ୟା

ଆଇପିଏଲ୍ ୨୦୨୬ ହାର୍ଦ୍ଦିକ ଏବଂ ମୁମ୍ବାଇ ଉଭୟଙ୍କ ପାଇଁ ଅତ୍ୟନ୍ତ ନିରାଶାଜନକ ରହିଛି। ଚଳିତ ସିଜିନରେ ଖେଳିଥିବା ୮ଟି ମ୍ୟାଚରେ ସେ ମାତ୍ର ୧୪୬ ରନ୍ ସଂଗ୍ରହ କରିବା ସହ ମାତ୍ର ୪ଟି ୱିକେଟ୍ ନେଇଛନ୍ତି। ପିଠିରେ ଯନ୍ତ୍ରଣା (back spasm) କାରଣରୁ ସେ ଲକ୍ଷ୍ନୌ ଏବଂ ଆରସିବି ବିପକ୍ଷ ମ୍ୟାଚ୍ ଖେଳିପାରି ନାହାଁନ୍ତି। ତାଙ୍କ ଅନୁପସ୍ଥିତିରେ ସୂର୍ଯ୍ୟକୁମାର ଯାଦବ (Suryakumar Yadav) ଦଳର ନେତୃତ୍ୱ ନେଉଛନ୍ତି।

ନେଟ୍ସରେ କରୁଛନ୍ତି ଅଭ୍ୟାସ

ଆହତ କାରଣରୁ ଦଳରୁ ବାଦ୍ ପଡିଥିବା ବେଳେ ମେ ୧୩ ତାରିଖରେ ହାର୍ଦ୍ଦିକ ବିଳମ୍ବିତ ରାତିରେ ନେଟ୍ସରେ କଠିନ ଅଭ୍ୟାସ କରୁଥିବାର ଏକ ଭିଡିଓ ସୋସିଆଲ୍ ମିଡିଆରେ ପୋଷ୍ଟ କରିଛନ୍ତି। ଏହି ଭିଡିଓ ଦେଖିବା ପରେ ତାଙ୍କ ଫିଟନେସ୍ ସ୍ଥିତିକୁ ନେଇ ଆଲୋଚନା ଆରମ୍ଭ ହୋଇଛି। ମୁମ୍ବାଇ ଇଣ୍ଡିଆନ୍ସର ମୁଖ୍ୟ କୋଚ୍ ମହେଲା ଜୟବର୍ଦ୍ଧନେ କହିଛନ୍ତି ଯେ ହାର୍ଦ୍ଦିକଙ୍କ ଫିଟନେସ୍ ଉପରେ ମେଡିକାଲ୍ ଟିମ୍ ପ୍ରତିଦିନ ନଜର ରଖିଛି ଏବଂ ଆଗାମୀ ମ୍ୟାଚ୍ ପାଇଁ ତାଙ୍କ ଖେଳିବା ନେଇ ପରିସ୍ଥିତି ଅନୁସାରେ ନିଷ୍ପତ୍ତି ନିଆଯିବ।

କ'ଣ ସତରେ ମୁମ୍ବାଇ ଛାଡିବେ ହାର୍ଦ୍ଦିକ?

ଆଇପିଏଲ୍ ୨୦୨୪ ସିଜିନ ପୂର୍ବରୁ ହିଁ ରୋହିତ ଶର୍ମାଙ୍କ ସ୍ଥାନରେ ଅଧିନାୟକ ପଦ ଗ୍ରହଣ କରିବା ଦିନଠାରୁ ହିଁ ହାର୍ଦ୍ଦିକ ବିବାଦରେ ଘେରି ରହିଥିଲେ। ଏବେ ଦଳ ପ୍ଲେଅଫ୍ ଦୌଡ଼ରୁ ବାଦ୍ ପଡିବା ଏବଂ ଟିମ୍ ମ୍ୟାନେଜମେଣ୍ଟ୍ ସହ ତାଙ୍କର ମତଭେଦର ଗୁଜବ ତାଙ୍କ ଆଇପିଏଲ୍ ଭବିଷ୍ୟତ ଉପରେ ଏକ ବଡ଼ ପ୍ରଶ୍ନଚିହ୍ନ ଲଗାଇଛି। ଆଗାମୀ ସମୟରେ ହିଁ ସ୍ପଷ୍ଟ ହେବ ଯେ ସେ ଆଗକୁ ମୁମ୍ବାଇ ଇଣ୍ଡିଆନ୍ସ ସହ ରହିବେ ନା ଅନ୍ୟ କୌଣସି ଦଳର ଅଂଶବିଶେଷ ହେବେ।

ନୂଆଦିଲ୍ଲୀ: ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (ବିସିସିଆଇ) ଆଇସିସି ପୁରୁଷ ଟି-୨୦ ବିଶ୍ୱକପ୍ ୨୦୨୬ ବିଜୟ ପରେ ଟିମ୍ ଇଣ୍ଡିଆ ପାଇଁ ୧୩୧ କୋଟି ଟଙ୍କାର ଏକ ବିଶାଳ ଆର୍ଥିକ ପୁରସ୍କାର ଘୋଷଣା କରିଛି। ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଟିମ୍ ଇଣ୍ଡିଆ ନିଜ ଘରୋଇ ମାଟିରେ ଟି-୨୦ ବିଶ୍ୱକପ୍ ଟାଇଟଲ୍ ବଜାୟ ରଖିବାରେ ସଫଳ ହୋଇଛି। ଏହି ଟୁର୍ଣ୍ଣାମେଣ୍ଟ ଇତିହାସରେ ନିଜ ଟାଇଟଲ୍ ବଜାୟ ରଖିବାରେ ଭାରତ ବିଶ୍ୱର ପ୍ରଥମ ଦଳ ପାଲଟିଛି। କେବଳ ସେତିକି ନୁହେଁ, ଏହି ବିଜୟ ସହ ଭାରତ ରେକର୍ଡ ତୃତୀୟ ଥର ପାଇଁ ଟି-୨୦ ବିଶ୍ୱକପ୍ ଜିତିଛି। ଏହାପୂର୍ବରୁ ୨୦୨୪ ମସିହାରେ ରୋହିତ ଶର୍ମାଙ୍କ ନେତୃତ୍ୱରେ ବିଶ୍ୱକପ୍ ଜିତିବା ପରେ ବିସିସିଆଇ ଭାରତୀୟ ଦଳକୁ ୧୨୫ କୋଟି ଟଙ୍କା ପୁରସ୍କାର ପ୍ରଦାନ କରିଥିଲା। ଏଥର ଏହି ପୁରସ୍କାର ରାଶିରେ ଆହୁରି ୬ କୋଟି ଟଙ୍କା ବୃଦ୍ଧି କରାଯାଇଛି। 

ବିସିସିଆଇ ବ୍ୟତୀତ ଆନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ପକ୍ଷରୁ ମଧ୍ୟ ବିଜେତା ଦଳକୁ ଆର୍ଥିକ ପୁରସ୍କାର ପ୍ରଦାନ କରାଯାଇଛି। ଫାଇନାଲ୍ ମ୍ୟାଚରେ ନ୍ୟୁଜିଲାଣ୍ଡକୁ ୯୬ ରନରେ ପରାସ୍ତ କରିବା ପରେ ଭାରତୀୟ ଦଳକୁ ଆଇସିସି ତରଫରୁ ୨.୩୪ ନିୟୁତ ଆମେରିକୀୟ ଡଲାର (ପ୍ରାୟ ୨୧.୫ କୋଟି ଟଙ୍କା) ପୁରସ୍କାର ସ୍ୱରୂପ ମିଳିଛି। ସେହିପରି ରନର୍ସ-ଅପ୍ ହୋଇଥିବା ନ୍ୟୁଜିଲାଣ୍ଡ ଦଳକୁ ୧.୧୭ ନିୟୁତ ଡଲାର (ପ୍ରାୟ ୧୦.୭୫ କୋଟି ଟଙ୍କା) ମିଳିଛି।

ବିଶ୍ୱକପ୍ ଟାଇଟଲ୍ ମୁକାବିଲାରେ ପ୍ରଥମେ ବ୍ୟାଟିଂ କରି ଭାରତୀୟ ଦଳ ନିର୍ଦ୍ଧାରିତ ଓଭରରେ ୫ ୱିକେଟ୍ ହରାଇ ୨୫୩ ରନର ଏକ ବିଶାଳ ସ୍କୋର ଛିଡ଼ା କରିଥିଲା, ଯାହାକି ଟି-୨୦ ବିଶ୍ୱକପ୍ ଫାଇନାଲ୍ ଇତିହାସରେ ଏକ ରେକର୍ଡ। ଭାରତ ପକ୍ଷରୁ ସଞ୍ଜୁ ସାମସନ୍ ଏକ ବିସ୍ଫୋରକ ଇନିଂସ୍ ଖେଳି ୮୯ ରନ୍ ସଂଗ୍ରହ କରିଥିଲେ। ଏହାପରେ ବୋଲିଂରେ ମଧ୍ୟ ଭାରତୀୟ ଖେଳାଳିଙ୍କ ଦବଦବା ଦେଖିବାକୁ ମିଳିଥିଲା। ତାରକା ବୋଲର ଯଶପ୍ରୀତ ବୁମରା ମାତ୍ର ୧୪ ରନ୍ ଦେଇ ୪ଟି ୱିକେଟ୍ ଅକ୍ତିଆର କରି ନ୍ୟୁଜିଲାଣ୍ଡର ମେରୁଦଣ୍ଡ ଭାଙ୍ଗି ଦେଇଥିଲେ। ଚମତ୍କାର ପ୍ରଦର୍ଶନ ପାଇଁ ବୁମରାଙ୍କୁ 'ପ୍ଲେୟାର ଅଫ୍ ଦି ମ୍ୟାଚ୍' ଘୋଷଣା କରାଯାଇଥିବା ବେଳେ, ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟର ୫ଟି ଇନିଂସରେ ୩୨୧ ରନ୍ ସଂଗ୍ରହ କରିଥିବା ସଞ୍ଜୁ ସାମସନ୍‌ଙ୍କୁ 'ପ୍ଲେୟାର ଅଫ୍ ଦି ସିରିଜ୍' ପୁରସ୍କାର ପ୍ରଦାନ କରାଯାଇଛି।

କଲମ୍ବୋରେ ଅନୁଷ୍ଠିତ T20 ବିଶ୍ୱକପ୍ ୨୦୨୬ର ଏକ ହାଇ-ଭୋଲ୍ଟେଜ୍ ମ୍ୟାଚରେ ଭାରତ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୬୧ ରନ୍ରେ ପରାସ୍ତ କରିଛି। ତେବେ ମ୍ୟାଚର ଫଳାଫଳ ଅପେକ୍ଷା ପଡିଆରେ ଭାରତୀୟ ଖେଳାଳିଙ୍କ ଆଚରଣ ଏବେ ବିଶ୍ୱବ୍ୟାପୀ ଚର୍ଚ୍ଚାର ବିଷୟ ପାଲଟିଛି। ବିଜୟ ପରେ ମଧ୍ୟ ଭାରତୀୟ ଦଳ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇବାକୁ (Handshake) ମନା କରିଦେଇଛନ୍ତି, ଯାହାକୁ ନେଇ କ୍ରିକେଟ୍ ଜଗତରେ ହଇଚଇ ସୃଷ୍ଟି ହୋଇଛି।

ଟସ୍ ବେଳେ ହାତ ମିଳାଇଲେନି ସୂର୍ଯ୍ୟକୁମାର

ମ୍ୟାଚ୍ ଆରମ୍ଭରୁ ହିଁ ଉତ୍ତେଜନା ଦେଖିବାକୁ ମିଳିଥିଲା। ଟସ୍ ସମୟରେ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ପାକିସ୍ତାନ ଅଧିନାୟକ ସଲମାନ ଅଲି ଆଘାଙ୍କ ସହ ହାତ ମିଳାଇ ନଥିଲେ। ମ୍ୟାଚ୍ ଶେଷ ହେବା ପରେ ମଧ୍ୟ ଭାରତୀୟ ଖେଳାଳିମାନେ ପାକିସ୍ତାନୀ ଖେଳାଳିଙ୍କ ସହ ସୌଜନ୍ୟମୂଳକ ହାତ ମିଳାଇବା ପରିବର୍ତ୍ତେ ସିଧା ଡ୍ରେସିଂ ରୁମକୁ ଫେରିଯାଇଥିଲେ। ରିପୋର୍ଟ ଅନୁଯାୟୀ, ୨୦୨୫ ଏସିଆ କପ୍ ସମୟରୁ ପହଲଗାଓଁ ଆତଙ୍କବାଦୀ ଆକ୍ରମଣର ପ୍ରତିବାଦ ସ୍ୱରୂପ ଭାରତ ଏହି 'ନୋ-ହ୍ୟାଣ୍ଡସେକ୍' ନୀତି ଆପଣାଇ ଆସୁଛି।

ଆଇସିସି ନିକଟରେ ପାକିସ୍ତାନର ଫେରାଦ

ଭାରତର ଏହି ଆଭିମୁଖ୍ୟକୁ ନେଇ ପାକିସ୍ତାନ କ୍ରିକେଟ୍ ବୋର୍ଡ (PCB) ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଏହା ଖେଳୁଆଡ ମନୋଭାବର ବିରୋଧୀ ବୋଲି ଦର୍ଶାଇ ପିସିବି ଆଇସିସି (ICC) ନିକଟରେ ଅଭିଯୋଗ କରିଥିବା ଜଣାପଡିଛି। ଅନ୍ୟପକ୍ଷରେ, ପୂର୍ବତନ ଭାରତୀୟ କ୍ରିକେଟର ସଞ୍ଜୟ ମଞ୍ଜରେକର ମଧ୍ୟ ଭାରତର ଏହି ନୀତିକୁ ସମାଲୋଚନା କରିଛନ୍ତି।

ମ୍ୟାଚରେ ଭାରତର ଏକତରଫା ବିଜୟ

ଖେଳ କଥା ଦେଖିଲେ, ଭାରତ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୭ ୱିକେଟ୍ ହରାଇ ୧୭୫ ରନ୍ ସଂଗ୍ରହ କରିଥିଲା। ଯୁବ ତାରକା ଈଶାନ କିଷାନ ମାତ୍ର ୪୦ ବଲରେ ବିସ୍ଫୋରକ ୭୭ ରନ୍ ସଂଗ୍ରହ କରିଥିଲେ। ଜବାବରେ ପାକିସ୍ତାନ ଦଳ ଭାରତୀୟ ବୋଲରଙ୍କ ମୁକାବିଲା କରିନପାରି ମାତ୍ର ୧୧୪ ରନ୍‌ରେ ଅଲଆଉଟ୍ ହୋଇଯାଇଥିଲା। ଏହି ବିଜୟ ସହ ଭାରତ ସୁପର-୮ ପର୍ଯ୍ୟାୟରେ ପ୍ରବେଶ କରିଛି।

ଟି-୨୦ ବିଶ୍ୱକପ୍ ୨୦୨୬ରେ ଭାରତ ଓ ପାକିସ୍ତାନ ମଧ୍ୟରେ ହେବାକୁ ଥିବା ହାଇ-ଭୋଲଟେଜ୍ ମ୍ୟାଚ୍ ପୂର୍ବରୁ ପୁଣି ଥରେ ଚର୍ଚ୍ଚାକୁ ଆସିଛି 'ହ୍ୟାଣ୍ଡସେକ୍' ବା ହାତ ମିଳାଇବା ପ୍ରସଙ୍ଗ। ରବିବାର କଲମ୍ବୋର ଆର୍ ପ୍ରେମଦାସା ଷ୍ଟାଡିୟମ୍‌ରେ ଉଭୟ ଦଳ ମୁହାଁମୁହିଁ ହେବେ। କିନ୍ତୁ ମ୍ୟାଚ୍ ପୂର୍ବରୁ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ଏହି ପ୍ରସଙ୍ଗରେ କୌଣସି ସ୍ପଷ୍ଟ ଉତ୍ତର ଦେଇନାହାନ୍ତି, ଯାହା ଫଳରେ ସସ୍‌ପେନ୍ସ ଆହୁରି ବଢିଯାଇଛି।

ସୂର୍ଯ୍ୟକୁମାରଙ୍କ ରହସ୍ୟଜନକ ବୟାନ

ସାମ୍ବାଦିକ ସମ୍ମିଳନୀରେ ଯେତେବେଳେ ସୂର୍ଯ୍ୟକୁମାରଙ୍କୁ ପଚରାଯାଇଥିଲା ଯେ ଭାରତୀୟ ଖେଳାଳିମାନେ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇବେ କି ନାହିଁ, ସେ କୌତୁହଳପୂର୍ଣ୍ଣ ଉତ୍ତର ଦେଇଥିଲେ। ସେ କହିଥିଲେ, "ଆଉ ୨୪ ଘଣ୍ଟା ଅପେକ୍ଷା କରନ୍ତୁ। ଭଲ ଖାଆନ୍ତୁ, ଭଲରେ ଶୁଅନ୍ତୁ, କାଲି ଦେଖିବା କ’ଣ ହେଉଛି।" ତାଙ୍କର ଏହି ବୟାନରୁ ସ୍ପଷ୍ଟ ହୋଇଛି ଯେ ଭାରତୀୟ ଦଳ ନିଜର ପୂର୍ବ ଆଭିମୁଖ୍ୟ ବଜାୟ ରଖିପାରେ। ଉଲ୍ଲେଖଯୋଗ୍ୟ ଯେ, ଗତବର୍ଷ ଏସିଆ କପ୍ ସମୟରେ ମଧ୍ୟ ଭାରତୀୟ ଦଳ ପାକିସ୍ତାନ ସହ ହାତ ମିଳାଇବାକୁ ମନା କରିଦେଇଥିଲା।

କାହିଁକି ରହିଛି ବିବାଦ?

ଏହି 'ନୋ-ହ୍ୟାଣ୍ଡସେକ୍' ବିବାଦ ପଛରେ ଏକ ଗୁରୁତର କାରଣ ରହିଛି। ଗତବର୍ଷ ଏସିଆ କପ୍ ସମୟରେ, ପାହାଲଗାମ୍ ଆତଙ୍କବାଦୀ ଆକ୍ରମଣ ଏବଂ ତା’ପରେ ଭାରତୀୟ ସେନା ଦ୍ୱାରା କରାଯାଇଥିବା 'ଅପରେସନ୍ ସିନ୍ଦୂର' ଘଟଣା ପରେ ଦୁଇ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇଥିଲା। ସେବେଠାରୁ ଭାରତୀୟ ଦଳ ପାକିସ୍ତାନ ବିପକ୍ଷ ମ୍ୟାଚ୍‌ରେ ପାରମ୍ପରିକ ହ୍ୟାଣ୍ଡସେକ୍‌ରୁ ନିବୃତ୍ତ ରହିଆସୁଛି। ସୂର୍ଯ୍ୟକୁମାରଙ୍କ ବର୍ତ୍ତମାନର ଆଭିମୁଖ୍ୟ ସୂଚାଉଛି ଯେ ଭାରତ ଏହି ପ୍ରତିବାଦ ଜାରି ରଖିପାରେ।

ପାକିସ୍ତାନ ଅଧିନାୟକଙ୍କ ପ୍ରତିକ୍ରିୟା

ଅନ୍ୟପକ୍ଷରେ, ପାକିସ୍ତାନ ଅଧିନାୟକ ସଲମାନ ଅଲି ଆଗା ମଧ୍ୟ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ ଖେଳକୁ ଖେଳ ଭାବନା ସହ ଖେଳାଯିବା ଉଚିତ୍, କିନ୍ତୁ ବିପକ୍ଷ ଦଳ କ’ଣ କରିବେ ତାହା ସେମାନଙ୍କ ଉପରେ ନିର୍ଭର କରେ। ଟିମ୍ ନ୍ୟୁଜ୍ ବିଷୟରେ କହିବାକୁ ଗଲେ, ଭାରତୀୟ ଓପନର୍ ଅଭିଷେକ ଶର୍ମା ସମ୍ପୂର୍ଣ୍ଣ ଫିଟ୍ ଅଛନ୍ତି ଏବଂ ରବିବାର ମ୍ୟାଚ୍‌ରେ ଖେଳିବା ପାଇଁ ପ୍ରସ୍ତୁତ ଅଛନ୍ତି ବୋଲି ସୂର୍ଯ୍ୟକୁମାର ସ୍ପଷ୍ଟ କରିଛନ୍ତି।

ଭୁବନେଶ୍ବର: ଆଜି କଟକ ବାରବାଟୀରେ ବିଗ୍ ଫାଇଟ୍। ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବ ପ୍ରଥମ ଟି-ଟ୍ବେଣ୍ଟି ମ୍ୟାଚ୍। ମ୍ୟାଚ ପୂର୍ବରୁ ଜଗା ଦର୍ଶନ ପାଇଁ ପୁରୀରେ ଭାରତୀୟ ଖେଳାଳି ପହଞ୍ଚିଥିଲେ। ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କରି ଆଶିଷ ଭିକ୍ଷା କରିଛନ୍ତି ଖେଳାଳି। ଟିମ୍‌ ଇଣ୍ଡିଆର ମୁଖ୍ୟ କୋଚ୍‌ଙ୍କ ସହ ୪ ଖେଳାଳି ଜଗା ଦର୍ଶନ ପାଇଁ ଆସିଥିଲେ। କ୍ୟାପଟେନ୍ ସୂର୍ଯ୍ୟକୁମାରଙ୍କ ସହ ଥିଲେ ତାଙ୍କ ପତ୍ନୀ। କୋଚ୍ ଗୌତମ ଗମ୍ଭୀର, ତିଲକ ବର୍ମା, ୱାଶିଂଟନ ସୁନ୍ଦର କଡ଼ା ସୁରକ୍ଷା ମଧ୍ୟରେ ମନ୍ଦିର ଭିତରକୁ ପ୍ରବେଶ କରିଥିଲେ।

କାନବେରା:  ବିଶ୍ୱର ନଂ-୧ ତଥା ବିଶ୍ୱ ଚାମ୍ପିଅନ ଟିମ୍‌ ଭାରତ ଓ ନଂ-୨ ଟିମ୍‌ ତଥା ଆୟୋଜକ ଅଷ୍ଟ୍ରେଲିଆ ମଧ୍ୟରେ ବୁଧବାରଠାରୁ ୫ ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ ଖେଳାଯିବ। ଏହା ପୂର୍ବରୁ ଦୁଇ ଦେଶ ମଧ୍ୟରେ ୩ ମ୍ୟାଚ୍‌ ବିଶିଷ୍ଟ ଦିନିକିଆ ସିରିଜ୍‌ ଖେଳାଯାଇଥିଲା। ଏଥିରେ ଅଷ୍ଟ୍ରେଲିଆ ୨-୧ରେ ବିଜୟୀ ହୋଇଥିଲା। କିନ୍ତୁ ଟି-୨୦ ଫର୍ମାଟରେ ଭାରତର ଶକ୍ତି ଅଧିକ। ଏପରିକି ୨୦୦୮ ପରଠାରୁ ଅଷ୍ଟ୍ରେଲିଆରେ ଭାରତ ସିରିଜ୍‌ ହାରିନାହିଁ। ରେକର୍ଡ ଯାହା ହେଉ ପଛେ ଦଳର ତାରକା ବୋଲର ଯଶପ୍ରୀତ୍‌ ବୁମ୍‌ରା ଏହି ସିରିଜ୍‌ ଖେଳିବାକୁ ମନୋନୀତ ହୋଇଛନ୍ତି। ଏଣୁ ଭାରତର ଶକ୍ତି ବୃଦ୍ଧି ଘଟିଛି ଓ ଦଳର ସନ୍ତୁଳନକୁ ନେଇ ମ୍ୟାନେଜମେଣ୍ଟର ଚିନ୍ତା ମଧ୍ୟ ବଢ଼ିଛି। ଆସନ୍ତାବର୍ଷ ଭାରତ ଓ ଶ୍ରୀଲଙ୍କାରେ ଖେଳାଯିବ ଟି-୨୦ ବିଶ୍ୱକପ୍‌। ଏହି ଟୁର୍ଣ୍ଣାମେଣ୍ଟ ପୂର୍ବରୁ ନିଜକୁ ପ୍ରସ୍ତୁତ କରିନେବାକୁ ଉଭୟ ଦଳ ଯୋଜନାବଦ୍ଧ ଭାବେ ଉଦ୍ୟମ କରିବେ। ଏପରିକି ଦଳର ଦକ୍ଷତା, ସନ୍ତୁଳନ, ଦୁର୍ବଳତାକୁ ମଧ୍ୟ ସଜାଡ଼ିନେବାକୁ ଉଭୟ ଦଳ ଚେଷ୍ଟା କରିବେ। ଟି-୨୦ ଫର୍ମାଟରେ ଦୁଇ ପ୍ରତିଦ୍ୱନ୍ଦ୍ୱୀ ବିଶ୍ୱର ଟପ୍‌-୨ ଦଳ ହୋଇଥିବାରୁ ଏହି ସିରିଜ୍‌ର ପ୍ରତ୍ୟେକ ମ୍ୟାଚ୍‌ ବେଶ ରୋମାଞ୍ଚକର ହେବ ବୋଲି ଆଶା କରାଯାଉଛି।

ଭାରତରେ ଖେଳାଯିବାକୁ ଥିବା ବିଶ୍ୱକପ୍‌ର ପିଚ୍‌ କିମ୍ବା ଭେନ୍ୟୁ ସହ ଅଷ୍ଟ୍ରେଲିଆର ପିଚ୍‌ର ବ୍ୟବହାର ସମ୍ପୂର୍ଣ୍ଣ ଭିନ୍ନ। କିନ୍ତୁ ଏବେ ସବୁ ଦଳର ନଜର ରହିଛି ବିଶ୍ୱକପ୍‌ ପୂର୍ବରୁ ନିଜର ଶ୍ରେଷ୍ଠ ଟିମ୍‌ ଚୟନ କରିବା। ଏହି ସିରିଜ୍‌ ଭାରତ ଓ ଅଷ୍ଟ୍ରେଲିଆକୁ ଶ୍ରେଷ୍ଠ ଦଳ ଚୟନ ଓ ଦଳର ସନ୍ତୁଳନ ସଜାଡିବାକୁ ବଡ଼ ସୁଯୋଗ ଦେଇଛି। ଉଭୟଙ୍କ ମଧ୍ୟରେ ଲଢେ଼ଇରୁ ଯେଉଁ ଫଳ ମିଳିବ ତାହା ନିଶ୍ଚିତପକ୍ଷେ ଲାଭଦାୟକ ହେବ। ଏହା ପୂର୍ବରୁ ଭାରତ ଟି-୨୦ ଫର୍ମାଟରେ ଏସିଆ କପ୍‌ ଖେଳି ଚାମ୍ପିଅନ ହୋଇଥିଲା। ଏଥିରେ ଦଳ ଅପରାଜେୟ ଥିଲାବେଳେ ଶ୍ରୀଲଙ୍କା ବିପକ୍ଷ ସୁପର-୪’ର ଏକ ମ୍ୟାଚ୍‌କୁ ବାଦ୍‌ ଦେଲେ ଅନ୍ୟ ସବୁଥିରେ ସହଜ ବିଜୟ ହାସଲ କରିଥିଲା। ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଏକାଧିକ ପ୍ରତିଭାବାନ ଖେଳାଳି ଆଇପିଏଲ୍‌ରେ ଶ୍ରେଷ୍ଠ ପ୍ରଦର୍ଶନ କରି ଅନ୍ତର୍ଜାତୀୟ ସ୍ତରରେ ପ୍ରତିଷ୍ଠିତ ହୋଇଛନ୍ତି। ଭାରତ ନିକଟରେ ଏତେ ପ୍ରତିଭା ରହିଛି ଯେ ୧୫ ଜଣିଆ ହେଉ କିମ୍ବା ୧୧ ଜଣିଆ ଦଳ ଚୟନ କରିବା କଷ୍ଟକର।  ଟି-୨୦ ସିରିଜ୍‌ ଲାଗି ଯଶ୍‌ପ୍ରୀତ୍‌ ବୁମ୍‌ରାଙ୍କ ପ୍ରତ୍ୟାବର୍ତ୍ତନ ଦଳକୁ ଅଧିକ ମଜଭୁତ କରିଛି। ଅର୍ଶଦୀପ ସିଂହଙ୍କୁ ପାର୍ଟନର କରି ସେ ନିଶ୍ଚିତଭାବେ ଅଷ୍ଟ୍ରେଲୀୟ ବ୍ୟାଟରଙ୍କୁ ଅସୁବିଧାରେ ପକାଇବେ। ନିକଟରେ ସିଡନୀ ଦିନିକିଆରେ ଶ୍ରେଷ୍ଠ ପ୍ରଦର୍ଶନ କରିଥିବା ହର୍ଷିତ ରାଣା କିମ୍ବା ଶିବମ ଦୁବେ ପେସ୍‌ ବୋଲିଂ ଯୋଡି ବୁମ୍‌ରା-ଅର୍ଶଦୀପ୍‌ଙ୍କୁ ସାହାଯ୍ୟ କରିବେ। ଏସିଆ କପ୍‌ରେ ଭାରତ ସ୍ପିନରଙ୍କୁ ନେଇ ଚାମ୍ପିଅନ ହୋଇଥିଲା। ଅଷ୍ଟ୍ରେଲିଆ ବିପକ୍ଷରେ ସ୍ପିନରଙ୍କ ଭୂମିକା ଅଧିକ ନ ରହିଲେ ମଧ୍ୟ ଏମାନେ ଗୁରୁତ୍ୱପୂର୍ଣ୍ଣ ଭୂମିକା ନେବେ। ଦଳରେ ୪ଜଣ ସ୍ପିନରଙ୍କୁ ନିଆଯାଇଛି। ଅକ୍ଷର ପଟେଲ, କୁଲଦୀପ ଯାଦବ, ୱାଶିଂଟନ ସୁନ୍ଦର ଓ ବରୁଣ ଚକ୍ରବର୍ତ୍ତୀଙ୍କ ମଧ୍ୟରୁ ୨ଜଣ ଖେଳିବା ନିଶ୍ଚିତ।  ଦିନିକିଆରେ ଏମାନେ ଅଷ୍ଟ୍ରେଲିଆ ପିଚ୍‌ରେ ସଂଘର୍ଷ କରିଥିଲେ। ଟି-୨୦ରେ କିପରି ପ୍ରଦର୍ଶନ କରିବେ ତାହା ଉପରେ ଦଳର ସଫଳତା ନିର୍ଭର କରୁଛି। ଭାରତ ୨୦୨୪ରେ ବିଶ୍ୱକପ୍‌ ଜିତିବା ପରେ ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଖେଳି ମାତ୍ର ୩ଟି ମ୍ୟାଚ୍‌ରେ ପରାଜିତ ହୋଇଛି। ଏହି ରେକର୍ଡ ବଜାୟ ରଖିବ ବୋଲି ଭାରତୀୟ ସମର୍ଥକ ଓ କର୍ମକର୍ତ୍ତା ଆଶା ରଖିବା ସ୍ୱାଭାବିକ୍‌।

ଖେଳ ଆରମ୍ଭ : ଅପରାହ୍ଣ ୧ଟା ୪୫ ମିନିଟ୍‌

ପ୍ରସାରଣ : ଷ୍ଟାର ସ୍ପୋର୍ଟ୍ସ ନେଟ୍‌ୱର୍କ, ଜିଓ ହଟ୍‌ଷ୍ଟାର

ଅନ୍ୟପକ୍ଷରେ ଅଷ୍ଟ୍ରେଲିଆ ଗତ ଦୁଇଟି ବିଶ୍ୱକପ୍‌ରେ ସଅଳ ବିଦାୟ ନେବା ସହ ସମସ୍ତଙ୍କୁ ନିରାଶ କରିଥିଲା। କିନ୍ତୁ ୨୦୨୪ ବିଶ୍ୱକପ୍‌ ପରେ ଦଳର ତାହାର ରଣନୀତି ଓ ଦୃଷ୍ଟିକୋଣରେ ପରିବର୍ତ୍ତନ ଆଣିଛି। ଯାହା ଫଳରେ ୧୧ଟି ମ୍ୟାଚ୍‌ ଖେଳି ମାତ୍ର ୨ଟିରେ ପରାଜିତ ହୋଇଛି। ମିଚେଲ ମାର୍ଶଙ୍କ ନେତୃତ୍ୱରେ ପାୱାର ହିଟରଙ୍କୁ କେବଳ ଦଳରେ ସ୍ଥାନ ମିଳିଛି। ଟ୍ରାଭିସ ହେଡ୍‌, ଜୋଶ ଇଂଲିଶ, କାମେରନ ଗ୍ରୀନ୍‌ (ଏହି ସିରିଜ୍‌ରେ ଖେଳୁନାହାନ୍ତି), ଟିମ୍‌ ଡେଭିଡ୍‌, ମିଚେଲ ଓଏନ୍‌ ଓ ଗ୍ଲେନ୍‌ ମ୍ୟାକ୍ସୱେଲ (ଶେଷ ୩ଟି ମ୍ୟାଚ୍‌ ଖେଳିବେ)ଙ୍କୁ ନେଇ ଦଳର ବ୍ୟାଟିଂ ଲାଇନ୍‌ ବେଶ ସଫଳ ହୋଇଛି। ମାର୍କସ ଷ୍ଟୋଇନିସଙ୍କ ନେତୃତ୍ୱରେ ଏକାଧିକ ଅଲରାଉଣ୍ଡର ଅଷ୍ଟ୍ରେଲିଆର ସଫଳତାରେ ଭାଗୀଦାରି ହେଉଛନ୍ତି।

ସମ୍ଭାବ୍ୟ ଦଳ
ଭାରତ- ଅଭିଷେକ ଶର୍ମା, ଶୁବମନ ଗିଲ୍‌, ସୂର୍ଯ୍ୟକୁମାର ଯାଦବ (ଅଧିନାୟକ), ତିଳକ ବର୍ମା, ସଞ୍ଜୁ ସାମସନ (ୱିକେଟରକ୍ଷକ), ରିଙ୍କୁ ସିଂ, ଅକ୍ଷର ପଟେଲ, ଶିବମ ଦୁବେ/ ହର୍ଷିତ ରାଣା, କୁଲଦୀପ ଯାଦବ/ ବରୁଣ ଚକ୍ରବର୍ତ୍ତୀ, ଅର୍ଶଦୀପ ସିଂହ, ଯଶ୍‌ପ୍ରୀତ୍‌ ବୁମ୍‌ରା।
ବେଞ୍ଚ- ୱାଶିଂଟନ ସୁନ୍ଦର, ନୀତୀଶ କୁମାର ରେଡ୍ଡୀ।

ଅଷ୍ଟ୍ରେଲିଆ - ମିଚେଲ ମାର୍ଶ (ଅଧିନାୟକ), ଟ୍ରାଭିସ ହେଡ୍‌, ଜୋଶ ଇଂଲିଶ (ୱିକେଟରକ୍ଷକ), ଟିମ୍‌ ଡେଭିଡ୍‌, ଜୋଶ ଫିଲିପ୍‌, ମିଚେଲ ଓଏନ, ମାର୍କସ ଷ୍ଟୋଇନିସ୍‌, ସିନ୍‌ ଆବଟ/ ଜାଭିୟର ବାର୍ଟଲେଟ, ନାଥାନ ଏଲିସ୍‌, ମ୍ୟାଟ କୁନେମାନ, ଜୋଶ ହାଜ୍‌ଲେଉଡ୍‌।
ବେଞ୍ଚ୍‌- ମାଥ୍ୟୁ ସର୍ଟ, ଜୋଶ ଫିଲିପ୍‌, ତନବୀର ସାଙ୍ଗା ଓ ବେନ୍‌ ଡ୍ୱାରଶୁଇସ୍‌।