କଟକ: ବାରବାଟୀ ବିଧାୟକ ମହମ୍ମଦ ମୋକିମଙ୍କ ଉପରୁ କଂଗ୍ରେସ ଖୁବଶୀଘ୍ର ନିଲମ୍ବନ ଆଦେଶ ହଟାଇପାରେ । ଏ ନେଇ ପ୍ରତିକ୍ରିୟା ଦେଇଛନ୍ତି ବିଧାୟକ ମହମ୍ମଦ ମୋକିମ୍ । ଗଣମାଧ୍ୟମ ଆଗରେ ସେ କହିଛନ୍ତି କି, ‘ମୁଁ କଂଗ୍ରେସରେ ଅଛି, ମୋ ଉପରୁ ଖୁବଶୀଘ୍ର ଦଳ ନିଲମ୍ବନ ଆଦେଶ ହଟାଇବ ଓ ମୁଁ କଂଗ୍ରେସ ଟିକେଟରୁ ହିଁ ଲଢ଼ିବି’ । ପୁଣିଥରେ ୨୦୨୪ ନିର୍ବାଚନରେ କଂଗ୍ରେସ ଟିକେଟରୁ ନିର୍ବାଚନ ଲଢିବା ନେଇ ମହମ୍ମଦ ମୋକିମ ଆଶାବାଦୀ ଅଛନ୍ତି ବୋଲି କହିଛନ୍ତି । ସେ ଆହୁରି ମଧ୍ୟ କହିଛନ୍ତି କି, କଂଗ୍ରେସର ତୃଣମୂଳ ସ୍ତରର ନେତା ମୁଁ । ମୁଁ ମୋ ନିର୍ବାଚନ ମଣ୍ଡଳୀରେ ଅଛି । ଖୁବଶୀଘ୍ର ଦଳ ଗ୍ରହଣ କରି ଦାୟିତ୍ବ ଫେରାଇବ ବୋଲି କହିଛନ୍ତି ମୋକିମ୍ ।

କଟକ ଦୁର୍ଗାପୂଜାରେ ପିସିସି ସଭପତି ଶରତ ପଟ୍ଟନାୟକ ଓ କଂଗ୍ରେସରୁ ନିଲମ୍ବିତ ବିଧାୟକ ମହମ୍ମଦ ମୋକିମ୍‌‌ଙ୍କ ଭେଟଘାଟ୍‌‌କୁ ନେଇ ଭିନ୍ନ ଚର୍ଚ୍ଚା ଆରମ୍ଭ ହୋଇଛି। ଗତ କିଛି ଦିନ ହେବ ମୋକିମ୍‌‌ କଂଗ୍ରେସ କିମ୍ବା ରାଜ୍ୟ କଂଗ୍ରେସର ନେତୃତ୍ୱ ପ୍ରତି ଶାଣିତ ଆକ୍ରମଣରୁ ନିଜକୁ ଦୂରେଇ ରଖିଛନ୍ତି। ଏହାସହ ଅନ୍ୟ ଦଳକୁ ଯିବା ନେଇ ପୂର୍ବରୁ ଲାଗି ରହିଥିବା ଚର୍ଚ୍ଚାକୁ ମଧ୍ୟ ସେ ଖୋରାକ୍‌ ଯୋଗାଇବା ଭଳି କାର୍ଯ୍ୟରୁ ବର୍ତ୍ତିବାକୁ ଚେଷ୍ଟା କରିଛନ୍ତି। ଅନ୍ୟପଟେ ପୂର୍ବରୁ ମୋକିମ୍‌‌ ଆସନ୍ତା ୨୦୨୪ ନିର୍ବାଚନ ଲଢ଼ିବା ନେଇ ସ୍ପଷ୍ଟ କରିଛନ୍ତି। ଯଦି କଂଗ୍ରେସ ନ ହୁଏ, ସେ ସ୍ୱାଧୀନ ଭାବେ ଲଢ଼ିବେ ବୋଲି କହିଛନ୍ତି। ଏଥିପାଇଁ ସେ ପୁଣିଥରେ କଂଗ୍ରେସକୁ ଫେରିବା ସହ ନିର୍ବାଚନ ପୂର୍ବରୁ ତାଙ୍କ ଉପରୁ ନିଲମ୍ବନ ଉଠିଯିବା ନେଇ ମଧ୍ୟ ଚର୍ଚ୍ଚା ହେଉଛି। ପିସିସି ସଭାପତି ଭାବେ ଦାୟିତ୍ୱ ନେବା ପରେ ଶରତ ପଟ୍ଟନାୟକ ଓ ମୋକିମ୍‌‌ଙ୍କର କେବେ ଭେଟ ହୋଇ ନଥିଲା। ପରବର୍ତ୍ତୀ ସମୟରେ ମୋକିମ୍‌‌ଙ୍କ ବିଭିନ୍ନ ବୟାନ ତାଙ୍କୁ କଂଗ୍ରେସ ଓ କଂଗ୍ରେସର ନେତୃତ୍ୱଙ୍କଠାରୁ ଦୂରେଇ ଥିଲା। ଜୁଲାଇରେ ଏହା ଚରମ ରୂପ ନେବା ସହିତ ତାଙ୍କୁ ଦଳରୁ ନିଲମ୍ବନ କରାଯାଇଥିଲା। ଏବେ ଏହି ଭେଟ୍‌‌ଘାଟ୍‌‌ ଏଥିରେ ମଲମ ଲଗାଇଥିବା ବେଳେ ଆଗକୁ ନେଇ ଏହା ଏକ ନୂଆ ସମୀକରଣ ସୃଷ୍ଟି ହୋଇପାରେ ବୋଲି ଚର୍ଚ୍ଚା ହେଉଛି।

ସେପଟେ ପିସିସି ସଭାପତି କହିଛନ୍ତି, ମୋକିମଙ୍କ ନିଲମ୍ବନ ପ୍ରତ୍ୟାହାର ହେଲେ ସ୍ବାଗତ କରିବୁ। ମୋକିମଙ୍କ ପ୍ରତ୍ୟାହାର ଏଆଇସିସି ଉପରେ ନିର୍ଭର କରେ । ଖୁବଶୀଘ୍ର ମୋକିଙ୍କ ନିଲମ୍ବନ ପ୍ରତ୍ୟାହର ହେବ ବୋଲି ଆଶା ଥିବା କହିଛନ୍ତି ପିସିସି ସଭାପତି ଶରତ ପଟ୍ଟନାୟକ।

ଭୁବନେଶ୍ବର : ବାରବାଟୀ-କଟକ ବିଧାୟକ ମହମ୍ମଦ ମୋକିମ ଆଉ କଂଗ୍ରେସରେ ରହିବେ ନାହିଁ । ସେ ବର୍ତ୍ତମାନ କଂଗ୍ରେସରେ ଥାଇ ବି ନ ଥିଲା ପରି ରହିଛନ୍ତି ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା ତଥା ବିଧାୟକ ତାରା ପ୍ରସାଦ ବାହିନୀପତି। ସେ କହିଛନ୍ତି ଯେ ବିଧାୟକ ମହମ୍ମଦ ମୋକିମ କଂଗ୍ରେସର ନୀତିକୁ ଗ୍ରହଣ କରନ୍ତିନି। ଥରେ ବିଧାୟକ ହୋଇ ସେ ପିସିିସି ସଭାପତି ହେବାକୁ ଚାହିଁଛନ୍ତି। ଏବେ ସେ କଂଗ୍ରେସରେ ଅଛନ୍ତି କି ନାହିଁ ତାହା ଜଣା ନାହିଁ ବୋଲି ମଧ୍ୟ ତାରା କହିଛନ୍ତି।

ତାରା ଏପରି କହିବାର ମୁଖ୍ୟ କାରଣ ହେଉଛି ମହମ୍ମଦ ମୋକିମ କଂଗ୍ରେସ ନୀତିକୁ ଗ୍ରହଣ ନକରିବା ସହ ଦଳକୁ ଅଣଦେଖା କରିବାରେ ଲାଗିଛନ୍ତି। ଗତକାଲି କିନ୍ତୁ ଦୀର୍ଘ ୨୨ ବର୍ଷ ପରେ କଂଗ୍ରେସରେ ସଭାପତି ବାଛିବା ପାଇଁ ନିର୍ବାଚନ ହେଉଥିଲେ ମଧ୍ୟ ମୋକିମ ଏଥିରୁ ନିଜକୁ ଦୂରେଇ ରଖିଥିଲେ। ରାଜ୍ୟରୁ ପିସିସିର ୪୧୨ ସଦସ୍ୟ କଂଗ୍ରେସରେ ସଭାପତି ନିର୍ବାଚନ ପାଇଁ ମତଦାନ କରିଥିଲେ ମଧ୍ୟ ମୋକିମ ଭୋଟ ଦେବାକୁ ଆସିନଥିଲେ। ଯାହା ସମସ୍ତଙ୍କ ଆଶ୍ଚର୍ଯ୍ୟ କରିଥିଲା। ତେବେ ଏହା ଦଳୀୟ କନ୍ଦଳ ନା ଆଉ କିଛି କାରଣ ପାଇଁ ମୋକିମ ଏପରି ପଦକ୍ଷେପ ନେଲେ, ତା’କୁ ନେଇ ସସପେନ୍ସ ଦେଖାଦେଇଛି। ତେବେ ସେ ବାହାରେ ଥିବାରୁ ଭୋଟ ଦେବାକୁ ଆସି ପାରି ନଥିବା କହିଛନ୍ତି। କିନ୍ତୁ ସେ ରାଜ୍ୟ ବାହାରେ ନା ଦେଶ ବାହାରେ ଅଛନ୍ତି, ସେକଥା ସ୍ପଷ୍ଟ ହୋଇନି।

ଏହାପୂର୍ବରୁ ମଧ୍ୟ ବିଧାୟକ ମୋକିମ ରାଷ୍ଟ୍ରପତି ନିର୍ବାଚନରେ ଦଳୀୟ ହ୍ୱିପକୁ ଅବମାନନା କରିଥିଲେ। ଦଳ ପକ୍ଷରୁ ଯଶବନ୍ତ ସିହ୍ନାଙ୍କୁ ରାଷ୍ଟ୍ରପତି ପ୍ରାର୍ଥୀ କରାଯାଇଥିଲା। ହେଲେ ସେ ଓଡ଼ିଆ ଝିଅ ଦ୍ରୌପଦୀ ମୁର୍ମୁଙ୍କୁ ଭୋଟ ଦେଇଥିଲେ। ଏହାକୁ ନେଇ ତାଙ୍କୁ କଂଗ୍ରେସ ପକ୍ଷରୁ କାରଣ ଦର୍ଶାଅ ନୋଟିସ ମଧ୍ୟ ଜାରି କରାଯାଇଥିଲା। ଏହାର ଜବାବ ମୋକିମ ଦେଇଥିଲେ ବି ହାଇକମାଣ୍ଡ ତାଙ୍କୁ କ’ଣ ପରାମର୍ଶ ଦେଇଥିଲେ, ସେକଥା ଜଣାପଡ଼ିନି।

ଅନ୍ୟପଟେ ନିକଟରେ ଧାମନଗର ଉପ ନିର୍ବାଚନ ପାଇଁ କଂଗ୍ରେସ ଜାରି କରିଥିବା ଷ୍ଟାର ପ୍ରଚାରକ ତାଲିକାରୁ ମୋକିମ ବାଦ ପଡ଼ିଥିଲେ। ଏହାକୁ ନେଇ ସେ ପରୋକ୍ଷରେ ଅସନ୍ତୋଷ ପ୍ରକାଶ କରିଥିଲେ। ଏବେ ସେ କଂଗ୍ରେସର ସଭାପତି ନିର୍ବାଚନରେ ଭୋଟ ନ ଦେବା ଦଳ ମଧ୍ୟରେ ସବୁକିଛି ଠିକ୍‌ଠାକ ନଥିବାକୁ ଦର୍ଶାଉଛି।