ଆର୍ଜେଣ୍ଟିନାର ଅଧିନାୟକ ତଥା କିମ୍ବଦନ୍ତୀ ଫୁଟବଲ ଖେଳାଳି ଲିଓନେଲ୍ ମେସିଙ୍କ ଫୁଟବଲ କ୍ୟାରିୟରକୁ ନେଇ ଏବେ ସାରା ବିଶ୍ୱରେ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି। ସଦ୍ୟ ସମାପ୍ତ ହୋଇଥିବା ଫିଫା ବିଶ୍ୱକପ୍ ଫାଇନାଲ୍ରେ ସ୍ପେନ୍ଠାରୁ ପରାଜୟ ବରଣ କରିବା ପରେ ତାଙ୍କର ଅବସର ନେବାର ସମ୍ଭାବନାକୁ ନେଇ କ୍ରୀଡ଼ାପ୍ରେମୀଙ୍କ ମଧ୍ୟରେ ନାନା କଳ୍ପନାଜଳ୍ପନା ପ୍ରକାଶ ପାଇଛି।

ଲୁହ ଭରା ଆଖି ଓ ଅବସର ଗୁଜବ

ମହାସମରର ଫାଇନାଲ ମ୍ୟାଚରେ ଆର୍ଜେଣ୍ଟିନା ଦଳ ସ୍ପେନ୍ଠାରୁ ପରାସ୍ତ ହେବା ଫଳରେ ଲିଓନେଲ୍ ମେସିଙ୍କ ଲଗାତାର ଦ୍ୱିତୀୟ ଥର ପାଇଁ ବିଶ୍ୱକପ୍ ଟ୍ରଫି ଉଠାଇବାର ସ୍ୱପ୍ନ ଅଧୁରା ରହିଯାଇଥିଲା। ମ୍ୟାଚ୍ ଶେଷ ହେବା ପରେ ପଡ଼ିଆ ମଧ୍ୟରେ ଏହି ମହାନ ଖେଳାଳିଙ୍କ ଆଖିରେ ଲୁହ ଦେଖିବାକୁ ମିଳିଥିଲା। ଏହି ଘଟଣା ପରେ ଏହା ତାଙ୍କର ଶେଷ ବିଶ୍ୱକପ୍ ମ୍ୟାଚ୍ ହୋଇପାରେ ବୋଲି ସବୁଆଡ଼େ ଚର୍ଚ୍ଚା ଜୋର୍ ଧରିଛି।

କ'ଣ କହିଲେ ପ୍ରଶିକ୍ଷକ ଲିଓନେଲ୍ ସ୍କାଲୋନି?

ମେସିଙ୍କ ଅବସର ସମ୍ପର୍କରେ ଉଠୁଥିବା ପ୍ରଶ୍ନର ଉତ୍ତର ରଖିଛନ୍ତି ଆର୍ଜେଣ୍ଟିନା ଦଳର ମୁଖ୍ୟ ପ୍ରଶିକ୍ଷକ (କୋଚ୍) ଲିଓନେଲ୍ ସ୍କାଲୋନି। ସେ ସ୍ପଷ୍ଟ କରିଛନ୍ତି ଯେ ଫୁଟବଲରୁ ସନ୍ନ୍ୟାସ ନେବା ନିଷ୍ପତ୍ତି ସମ୍ପୂର୍ଣ୍ଣ ଭାବରେ ଖୋଦ୍ ମେସିଙ୍କ ଉପରେ ନିର୍ଭର କରେ। ଲିଓନେଲ୍ ସ୍କାଲୋନି କହିଛନ୍ତି, "ମେସିଙ୍କୁ ଏବେ ୩୯ ବର୍ଷ ବୟସ। ତାଙ୍କ କ୍ଷମତା ଏବଂ ପ୍ରତିଭା ସମ୍ପର୍କରେ ଆଉ ଅଧିକ କିଛି ପ୍ରମାଣ କରିବାର ନାହିଁ। ମୁଁ ନିଶ୍ଚିତ ଯେ ସେ ଯେତେଦିନ ପର୍ଯ୍ୟନ୍ତ ଫୁଟବଲ ଖେଳିବାକୁ ଚାହିଁବେ, ସେ ଖେଳିଚାଲିବେ।"

ସେ ଆହୁରି ମଧ୍ୟ ଯୋଡ଼ିଛନ୍ତି ଯେ, "ଏହି ନିଷ୍ପତ୍ତିରେ ଦଳର ସମସ୍ତ ଖେଳାଳି ଏବଂ ଲୋକମାନେ ତାଙ୍କୁ ପୂର୍ଣ୍ଣ ସମର୍ଥନ କରିବେ। ସେ ଫୁଟବଲ ଜଗତରେ ଯାହା କିଛି ହାସଲ କରିଛନ୍ତି, ସେଥିପାଇଁ ଆମେ ସମସ୍ତେ ଗର୍ବିତ। କାରଣ ସେ ହେଉଛନ୍ତି ସର୍ବଶ୍ରେଷ୍ଠ ଫୁଟବଲ ଖେଳାଳି।" ତେବେ ମେସି ନିଜ ଆଡ଼ୁ ବିଧିବଦ୍ଧ ଭାବେ କୌଣସି ଘୋଷଣା କରିନଥିବାରୁ, ତାଙ୍କ ପ୍ରଶଂସକମାନେ ଆଗାମୀ ଦିନରେ ତାଙ୍କ ଚୂଡ଼ାନ୍ତ ନିଷ୍ପତ୍ତିକୁ ଅପେକ୍ଷା କରିଛନ୍ତି।

ନୂଆଦିଲ୍ଲୀ: ବିଶ୍ୱ ଫୁଟବଲ୍‌ର ସବୁଠାରୁ ବଡ଼ ମହାକୁମ୍ଭ ଫିଫା ବିଶ୍ୱକପ୍‌ ୨୦୨୬ ଆରମ୍ଭ ହେବାକୁ ଯାଉଛି। ଆମେରିକା, ମେକ୍ସିକୋ ଓ କାନାଡାରେ ଆରମ୍ଭ ହେବାକୁ ଥିବା ଏହି ବିଶ୍ୱକପ୍‌ରେ ୪୮ଟି ଦଳ ଖେଳିବେ ଓ ମୋଟ୍‌ ଉପରେ ୧୦୪ଟି ମ୍ୟାଚ୍‌ ଖେଳାଯିବ। ସାଧାରଣତଃ ଗୋଲ୍‌ ସ୍କୋରର ଓ ମିଡ଼ଫିଲ୍ଡରମାନେ ଅଧିକ ଚର୍ଚ୍ଚାରେ ରହୁଥିବାବେଳେ, ଆଧୁନିକ ଫୁଟବଲ୍‌ରେ ରକ୍ଷକମାନଙ୍କ ଭୂମିକା ମଧ୍ୟ ସମାନ ଗୁରୁତ୍ୱପୂର୍ଣ୍ଣ। ଏଥର ବିଶ୍ୱକପ୍‌ରେ କିଛି ଡିଫେଣ୍ଡର ନିଜ ପ୍ରଦର୍ଶନ ଦ୍ୱାରା ସବୁଙ୍କ ଦୃଷ୍ଟି ଆକର୍ଷଣ କରିପାରନ୍ତି।

ଗାବ୍ରିଏଲ୍‌ ମାଗାଲହାଏସ୍‌ (ବ୍ରାଜିଲ୍‌)
ବ୍ରାଜିଲ୍‌ର ଏହି କେନ୍ଦ୍ରୀୟ ରକ୍ଷକ ଗତ ଋତୁରେ ନିଜ କ୍ଲବ୍‌ ପାଇଁ ଦୁର୍‌ଦ୍ଦାନ୍ତ ପ୍ରଦର୍ଶନ କରିଥିଲେ। ଆକାଶମାର୍ଗରେ ବଲ୍‌?କୁ ନିୟନ୍ତ୍ରଣ କରିବା ଓ ବିପକ୍ଷ ଆକ୍ରମଣକୁ ରୋକିବାରେ ସେ ଦକ୍ଷ। ବ୍ରାଜିଲ୍‌?ର ଷଷ୍ଠ ବିଶ୍ୱକପ୍‌ ସ୍ୱପ୍ନ ପୂରଣରେ ତାଙ୍କ ଭୂମିକା ଗୁରୁତ୍ୱପୂର୍ଣ୍ଣ ହେବ।

ୱିଲିୟମ୍‌ ସାଲିବା (ଫ୍ରାନ୍ସ)
ଫ୍ରାନ୍ସର ରକ୍ଷଣଭାଗର ମୁଖ୍ୟ ଭରସା ହେଉଛନ୍ତି ସାଲିବା। ଦୃଢ଼ ରକ୍ଷଣ ଓ ଖେଳକୁ ପଢ଼ିବାର କ୍ଷମତା ତାଙ୍କୁ ବିଶ୍ୱର ଶ୍ରେଷ୍ଠ ରକ୍ଷକମାନଙ୍କ ମଧ୍ୟରେ ସ୍ଥାନ ଦେଇଛି। ଚୋଟରୁ ସୁସ୍ଥ ହୋଇ ସେ ବିଶ୍ୱକପ୍‌ରେ ଫେରୁଛନ୍ତି।

ଭର୍ଜିଲ୍‌ ଭାନ୍‌ ଡାଇକ୍‌ (ନେଦରଲ୍ୟାଣ୍ଡସ)
ଅଭିଜ୍ଞ ଭାନ୍‌ ଡାଇକ୍‌ ଏବେ ବି ନେଦରଲ୍ୟାଣ୍ଡ ଦଳର ମେରୁଦଣ୍ଡ। ତାଙ୍କ ନେତୃତ୍ୱ, ଶାରୀରିକ ଦକ୍ଷତା ଓ ସଠିକ୍‌ ସ୍ଥାନ ଚୟନ କ୍ଷମତା ଦଳକୁ ବଡ଼ ସଫଳତା ଦେଇପାରେ। ନେଦରଲ୍ୟାଣ୍ଡର ପ୍ରଥମ ବିଶ୍ୱକପ୍‌ ଜିତିବା ଆଶାରେ ସେ ମୁଖ୍ୟ ଅସ୍ତ୍ର।

ଆଶ୍ରାଫ୍‌ ହାକିମି (ମୋରୋକ୍କୋ)
ଦ୍ରୁତଗତି ଓ ଆକ୍ରମଣାତ୍ମକ ଖେଳ।ଇଁ ପରିଚିତ ହାକିମି ୨୦୨୨ ବିଶ୍ୱକପ୍‌ରେ ମୋରୋକ୍‌କୋକୁ ସେମିଫାଇନାଲ୍‌?ରେ ପହଞ୍ଚାଇବାରେ ବଡ଼ ଭୂମିକା ନେଇଥିଲେ। ଡାହାଣ ପାର୍ଶ୍ୱରୁ ତାଙ୍କ ଆକ୍ରମଣ ବିପକ୍ଷ ଦଳ ପାଇଁ ସବୁବେଳେ ବିଦ ସୃଷ୍ଟି କରେ।

ନୁନୋ ମେଣ୍ଡେସ୍‌ (ପର୍ତ୍ତୁଗାଲ୍‌)
ବାମ।ର୍ଶ୍ୱର ଏହି ଯୁବ ରକ୍ଷକ ଗତି, ଶକ୍ତି ଓ ସଠିକ୍‌ କ୍ରସ୍‌ ପାଇଁ ଜଣାଶୁଣା। ଶାନ୍ତ ଭାବେ ନିଜ କାମ କରୁଥିବା ମେଣ୍‌ଡେସ୍‌ ପର୍ତ୍ତୁଗାଲ୍‌?ର ବିଶ୍ୱକପ୍‌ ଅଭିଯାନରେ ଗୁରୁତ୍ୱପୂର୍ଣ୍ଣ ଭୂମିକା ନେଇପାରନ୍ତି। ଫିଫା ବିଶ୍ୱକପ୍‌ ୨୦୨୬ରେ ଗୋଲ୍‌ ସ୍କ?ରରମାନଙ୍କ ସହ ଏହି ରକ୍ଷକମାନେ ମଧ୍ୟ ନିଜ ଦକ୍ଷତାର ଛା ଛାଡ଼ିବାକୁ ପ୍ରସ୍ତୁତ। ଦଳର ସଫଳତାରେ ରକ୍ଷଣଭାଗର ଭୂମିକା କେତେ ଗୁରୁତ୍ୱପୂର୍ଣ୍ଣ, ତାହା ଏହି ତାରକା ଖେଳାଳିମାନେ ପୁଣିଥରେ ପ୍ରମାଣ କରିବାକୁ ଚେଷ୍ଟା କରିବେ।

ମେକ୍ସିକୋ ସିଟି: ଆଜିଠାରୁ ଫୁଟ୍‌ବଲ୍‌ ମହାକୁମ୍ଭ । ବିଶ୍ୱର ସବୁଠାରୁ ଲୋକପ୍ରିୟ ଖେଳ ଫୁଟବଲ ପ୍ରତିଯୋଗିତାର ବରିଷ୍ଠ ବିଭାଗ ପୁରୁଷ ବିଶ୍ବକପ୍‌ ପ୍ରତିଯୋଗିତା ଆଜିଠାରୁ ଆରମ୍ଭ ହେଉଛି । ଫୁଟବଲ ଖେଳର ସର୍ବୋଚ୍ଚ ସଂସ୍ଥା ଦ୍ୱାରା ଏହା ଆୟୋଜିତ ହେଉଥିବାରୁ ଫିଫା ବିଶ୍ୱକପ୍‌ ନାମରେ ପରିଚିତ ଏହି ମେଗା ଇଭେଣ୍ଟ ଜୁନ୍‌ ୧୧ରୁ ଆରମ୍ଭ ହୋଇ ଜୁଲାଇ ୧୯ରେ ଶେଷ ହେବ। ପ୍ରଥମଥର ୩ଟି ଦେଶ ଯଥା ଆମେରିକା, ମେକ୍ସିକୋ ଓ କାନାଡ଼ା ଏହି ବିଶ୍ୱକପ୍‌ ଆୟୋଜନ କରୁଥିବାରୁ ୩ଟି ଟାଇମିଂ ଜୋନ୍‌ରେ ଖେଳ ଦେଖିବା ଦର୍ଶକଙ୍କ ଲାଗି କଷ୍ଟକର ହେଉଛି। ତଥାପି ଅଂଶଗ୍ରହଣକାରୀ ଦେଶର ସମୟ ଅନୁଯାୟୀ ଏହି ମ୍ୟାଚ୍‌ର କାର୍ଯ୍ୟକ୍ରମ ପ୍ରସ୍ତୁତ କରାଯାଇଛି। ଏଥର ୩ଟି ଦେଶର ମୋଟ ୧୬ଟି ଭେନ୍ୟୁରେ ମ୍ୟାଚ୍‌ ଆୟୋଜିତ ହେବାର କାର୍ଯ୍ୟକ୍ରମ ରହିଛି। ରଙ୍ଗାରଙ୍ଗ କାର୍ଯ୍ୟକ୍ରମରେ ଏହି ବିଶ୍ୱକପ୍ର ଉଦଘାଟନୀ ଉତ୍ସବ ଏକ ସଙ୍ଗେ ୩ଟି ଦେଶରେ ଆୟୋଜିତ ହେବ। ଆମେରିକାରରେ ସର୍ବାଧିକ ୧୧ଟି ଷ୍ଟାଡିୟମ୍‌ରେ ସର୍ବାଧିକ ୭୮ଟି ମ୍ୟାଚ୍‌ ଖେଳାଯିବାର କାର୍ଯ୍ୟକ୍ରମ ରହିଛି। 

ମେକ୍ସିକୋରେ ଉଦ୍‌ଘାଟନୀ, ନ୍ୟୁ ଜର୍ସୀରେ ଫାଇନାଲ
ବିଶ୍ୱକପ୍‌ରେ ଏଥର ସର୍ବାଧିକ ୪୮ଟି ଦେଶ ଭାଗନେଉଥିବାରୁ ସ୍ୱାଭାବିକ ଭାବେ ସର୍ବାଧିକ ୧୦୪ଟି ମ୍ୟାଚ୍‌ ଖେଳାଯିବ। ଏହା ମଧ୍ୟରୁ ଆମେରିକାରେ ୭୮ଟି ଓ ଅନ୍ୟ ଦୁଇ ସହଯୋଗୀ ଦେଶରେ ୧୩ଟି ଲେଖାଏଁ ମ୍ୟାଚ୍‌ ଆୟୋଜିତ ହେବ। ରାଉଣ୍ଡ ଅଫ୍‌ ୩୨ ଓ ରାଉଣ୍ଡ ଅଫ୍‌ ୧୬ରେ ୩ଟି ନକ୍‌ଆଉଟ ମ୍ୟାଚ୍‌ ଆମେରିକା ବାହାରେ ଓ ଅନ୍ୟ ସମସ୍ତ ନକ୍‌ଆଉଟ ମୁକାବିଲା ଆମେରିକାରେ ଅନୁଷ୍ଠିତ ହେବ। ରେକର୍ଡ ତୃତୀୟଥର ଉଦ୍‌ଘାଟନୀ ଉତ୍ସବ ସହ ଉଦ୍‌ଘାଟନୀ ମୁକାବିଲା କରିବାକୁ ଯାଉଥିବା ମେକ୍ସିକୋ ସିଟିର ଆଜ୍‌ଟେକା ଷ୍ଟାଡିୟମ୍‌ରେ ଆୟୋଜକ ମେକ୍ସିକୋ ଓ ଦକ୍ଷିଣ ଆଫ୍ରିକା ମଧ୍ୟରେ ଭାରତୀୟ ସମୟ ରାତି ୧୨ଟା ୩୦ ମିନିଟ୍‌ରେ ଖେଳାଯିବ। ସେହିପରି ପ୍ରତିଯୋଗିତା ଶେଷରେ ଦୁଇ ଶ୍ରେଷ୍ଠ ଦଳ ମଧ୍ୟରେ ଆମେରିକାର ନ୍ୟୁ ଜର୍ସିୀରେ ଥିବା ମେଟ୍‌ଲାଇଫ୍‌ ଷ୍ଟାଡିୟମ୍‌ରେ ଫାଇନାଲ ମୁକାବିଲା ଜୁଲାଇ ୧୯ ତାରିଖ ରାତି ୧୨ଟା ୩୦ ମିନିଟ୍‌ରେ ଖେଳାଯିବ।

ଉଦ୍‌ଘାଟନୀ ଉତ୍ସବର ଆକର୍ଷଣ ସାକିରା
ବିଶ୍ୱର ଅନ୍ୟତମ ଶ୍ରେଷ୍ଠ ଗାୟିକା ସାକିରା ଫିଫା ବିଶ୍ୱକପ୍‌ ପୂର୍ବର ଉଦ୍‌ଘାଟନୀ ସମାରୋହରେ ସଙ୍ଗୀତ ପରିବେଷଣ କରିବେ। ଫିଫା ଦ୍ୱାରା ପ୍ରସ୍ତୁତ କରାଯାଇଥିବା ସଙ୍ଗୀତ ଦାଏ ଦାଏ’କୁ ଗାଇବେ ସାକିରା। ତାଙ୍କ ସହ ନରୱେର ବୁର୍ଣ୍ଣା ବୟ ମଧ୍ୟ ଫିଫା ସଙ୍ଗୀତ ପରିବେଷଣ କରିବେ।  ଅନ୍ୟ ତାରକାମାନଙ୍କ ମଧ୍ୟରେ ଆଲେଜାଣ୍ଡ୍ରୋ ଫର୍ଣ୍ଣାଣ୍ଡିଜ୍‌, ବେଲିଣ୍ଡା, ଡାନ୍ନି ଓସେନ୍‌, ଜେ. ବାଲଭିନ୍‌, ଲିଳା ଡାଉନ୍ସ, ଲସ୍‌ଆଞ୍ଜିଲ୍ସ ଆଜୁଲେସ୍‌, ମାନା ଓ ଟିଲା ମଧ୍ୟ ଅଫିସିଆଲ ଫିଫା ସଙ୍ଗୀତ ପରିବେଷଣରେ ସହଯୋଗ କରିବେ। ଉଦ୍‌ଘାଟନୀ ଉତ୍ସବ ମେକ୍ସିକୋ ସିଟିରେ ଭାରତୟ ସମୟ ରାତି ୧୦.୩୦ରୁ ଆରମ୍ଭ ହେବ। ପ୍ରତ୍ୟେକ ଦେଶରେ ଖେଳାଯିବାକୁ ଥିବା ଉଦ୍‌ଘାଟନୀ ମୁକାବିଲା ପୂର୍ବରୁ ଉଦ୍‌ଘାଟନୀ ଉତ୍ସବ ଆୟୋଜିତ ହେବ। କାନାଡାରେ ଟରଣ୍ଟୋ ଓ ଆମେରିକାରେ ଲସ୍‌ଏଞ୍ଜେଲ୍ସରେ ଏହି ଉତ୍ସବ ଓ ପରେ ମ୍ୟାଚ୍‌ ଖେଳାଯିବ। ଟରଣ୍ଟୋରେ ଗାୟକ ଓ ଲେଖକ ମାଇକେଲ ବବଲ ଓ ଆଲାନିସ୍‌ ମୋରିଷ୍ଟେ, ଆମେରିକାର ସୋଫି ଷ୍ଟାଡିୟମ୍‌ରେ ପପ୍‌ ଷ୍ଟାର କାଟି ପେର, ରାପର ଫ୍ୟୁଚର ଉଦ୍‌ଘାଟନୀ କାର୍ଯ୍ୟକ୍ରମ ପରିବେଷଣ କରିବେ। କାନାଡା ଜନ୍ମିତ ବଲିଉଡ୍‌ ଷ୍ଟାର ନୋରା ଫତେହୀ ଟରଣ୍ଟୋ କାର୍ଯ୍ୟକ୍ରମରେ ନୃତ୍ୟ ପରିବେଷଣ କରିବେ।

ହାଇତି ଜର୍ସିରେ ରହିବ ପୋଲାଣ୍ଡ ପତାକା
ୱାଶିଂଟନ: ଦୀର୍ଘ ୫୨ ବର୍ଷ ପରେ ହାଇତି ଫିଫା ବିଶ୍ୱକପ୍‌ ଖେଳିବାକୁ ଯୋଗ୍ୟତା ଅର୍ଜନ କରିଛି। ଏହି କାରବୀୟ ରାଷ୍ଟ୍ର ପ୍ରଥମ ଓ ଶେଷଥର ଲାଗି ୧୯୭୪ ଫିଫା ବିଶ୍ୱକପ୍‌ରେ ଅଂଶଗ୍ରହଣ କରି ଗ୍ରୁପ୍‌ ପର୍ଯ୍ୟାୟରୁ ବିଦାୟ ନେଇଥିଲା। ୫୨ ବର୍ଷ ପରେ ପୁଣିଥରେ ଏହି ମେଗା ଇଭେଣ୍ଟକୁ ଯୋଗ୍ୟତା ଅର୍ଜନ କରିଥିବାରୁ ଏଥର ହାଇତି ପ୍ରଦର୍ଶନର ଛାପ ଛାଡ଼ିବା ଲକ୍ଷ୍ୟରେ ରହିଛି। କିନ୍ତୁ ହାଇତି ଖେଳାଳିମାନେ ପିନ୍ଧିବାକୁ ଥିବା ଜର୍ସିରେ ପୋଲାଣ୍ଡର ଜାତୀୟ ପତାକା ରହିବା ଫୁଟବଲପ୍ରେମୀଙ୍କ ଦୃଷ୍ଟି ଆକର୍ଷଣ କରିଛି। ପ୍ରଥମତଃ ଏହା କିଟ୍‌ ନିର୍ମାତାଙ୍କ ଦ୍ୱାରା କୌଣସି ତ୍ରୁଟି ନୁହେଁ। ପ୍ରକୃତରେ ଏହା ଡିଜାଇନର ଏକ ଅଂଶ। ହାଇତି ଦଳର ଜର୍ସିରେ ପୋଲାଣ୍ଡର ଜାତୀୟ ପତାକାର ଉପସ୍ଥିତିର ଏକ ଐତିହାସିକ ଗୁରୁତ୍ୱ ରହିଛି। ତାହା ହେଉଛି ୧୮୦୪ ମସିହାରେ ହାଇତିକୁ ସ୍ୱାଧୀନତା ହାସଲ କରିବାରେ ୫,୦୦୦ ପୋଲାଣ୍ଡ ସୈନିକଙ୍କ ଗୁରୁତ୍ୱପୂର୍ଣ୍ଣ ଅବଦାନ ରହିଥିଲା। ହାଇତିର ପ୍ରତିଷ୍ଠାତା ନେତା ଜିନ୍‌-ଜ୍ୟାକ୍‌ ଡେସାଲିନ୍ସ୍‌ ପୋଲାଣ୍ଡମାନଙ୍କ ଦ୍ୱାରା ପ୍ରଦାନ କରାଯାଇଥିବା ସମର୍ଥନକୁ ସ୍ୱୀକାର କରିଥିଲେ। ତେଣୁ ଏଥର ହାଇତିର ଜର୍ସି ଡିଜାଇନ୍‌ ପୋଲାଣ୍ଡ ସୈନିକଙ୍କ ପ୍ରତି ଏକ ଶ୍ରଦ୍ଧାଞ୍ଜଳି ଭାବରେ ଦେଖାଯାଉଛି। ଯେଉଁମାନେ ସ୍ୱାଧୀନତା ପାଇଁ ସେମାନଙ୍କ ଲଢେ଼ଇ ସମୟରେ ହାଇତିଙ୍କ ସହିତ ଠିଆ ହୋଇଥିଲେ। ଅପରପକ୍ଷରେ ଏକ ଉଲ୍ଲେଖନୀୟ ଘଟଣା ହେଉଛି ଏଥର ପୋଲାଣ୍ଡ ବିଶ୍ୱକପ୍‌କୁ ଯୋଗ୍ୟତା ଅର୍ଜନ କରିବାରେ ବିଫଳ ହୋଇଛି। କିନ୍ତୁ ହାଇତି ଜର୍ସିରେ ଏହାର ପରୋକ୍ଷ ପ୍ରତିନିଧିତ୍ୱ ରହିଛି।

ଚାରିଥରର ଚାମ୍ପିଅନ ଇଟାଲୀର ଅଲୋଡ଼ା ହ୍ୟାଟ୍ରିକ
ଏଥର ଫିଫା ବିଶ୍ୱକପ୍‌ ଆରମ୍ଭ ହେବା ପୂର୍ବରୁ ଏକ ବଡ଼ ବିପର୍ଯ୍ୟୟ ଦେଖିବାକୁ ମିଳିଥିଲା। ଚାରିଥରର ପୂର୍ବ ବିଜେତା ଇଟାଲୀ ଏଥର ଫିଫା ବିଶ୍ୱକପ୍‌କୁ ଯୋଗ୍ୟତା ଅର୍ଜନ କରିବାରେ ବିଫଳ ହୋଇଛି। ଏହାକୁ ମିଶାଇ ଇଟାଲୀ କ୍ରମାଗତ ୩ୟ ସଂସ୍କରଣ ଲାଗି ଫିଫା ବିଶ୍ୱକପ୍‌କୁ ଯୋଗ୍ୟତା ହାସଲ କରିପାରିନାହିଁ। ଏଥିପୂର୍ବରୁ ୨୦୧୮ ଓ ୨୦୨୨ ବିଶ୍ୱକପ ମଧ୍ୟ ଇଟାଲୀ ଖେଳିପାରି ନ ଥିଲା। ବିଶ୍ୱ ମାନ୍ୟତାର ୧୨ତମ ସ୍ଥାନରେ ଥିବା ଏହି ୟୁରୋପୀୟ ଦଳ ଲାଗି ଏହା ଶକ୍ତ ଝଟକା ସଦୃଶ ହୋଇଛି। ସେହିଭଳି ଚଳିତ ବିଶ୍ୱକପ୍‌କୁ ଯୋଗ୍ୟତା ହାସଲ କରିପାରି ନ ଥିବା ଅନ୍ୟ କିଛି ପ୍ରମୁଖ ଦେଶ ହେଲେ ଡେନମାର୍କ, ନାଇଜେରିଆ, ୟୁକ୍ରେନ ଓ ପୋଲାଣ୍ଡ। ୨୦୨୨ ବିଶ୍ୱକପ୍‌ରେ ଡାର୍କହର୍ସ ଥିବା ଡେନମାର୍କ ବର୍ତ୍ତମାନ ଫିଫା ର‍୍ୟାଙ୍କିଙ୍ଗ୍‌ରେ ୨୦ତମ ସ୍ଥାନରେ ରହିଛି। କିନ୍ତୁ ଯୋଗ୍ୟତା ପର୍ଯ୍ୟାୟରେ ଚେକ୍‌ ରିପବ୍ଲିକ ନିକଟରୁ ସୁଟ୍‌ ଆଉଟ୍‌ରେ ହାରିବା ପରେ ଡେନମାର୍କର ବିଶ୍ୱକପ୍‌ ଖେଳିବା ଆଶା ଧୂଳିସାତ୍‌ ହୋଇଯାଇଥିଲା। ଆଫ୍ରିକ ମହାଦେଶର ଅନ୍ୟତମ ଶକ୍ତିଶାଳୀ ଦଳ ନାଇଜେରିଆ ବର୍ତ୍ତମାନ ଫିଫା ର‍୍ୟାଙ୍କିଙ୍ଗ୍‌ରେ ୨୬ତମ ସ୍ଥାନରେ ରହିଛି। କିନ୍ତୁ ୪୮ ଜଣିଆ ବିଶ୍ୱକପ୍‌କୁ ଦଳ ଯୋଗ୍ୟତା ଅର୍ଜନ କରିବାରେ ବିଫଳ ହୋଇଥିଲା। ‘କାଫ୍‌’ ଫ୍ଲେ ଅଫ୍‌ ଫାଇନାଲରେ କଙ୍ଗୋଠାରୁ ହାରିବା ନାଇଜେରିଆ ପାଇଁ ମହଙ୍ଗା ପଡ଼ିଥିଲା। ନାଇଜେରିଆ ୨୦୨୨ ବିଶ୍ୱକପ୍‌କୁ ମଧ୍ୟ ଟିକଟ୍‌ ହାସଲ କରି ନ ଥିଲା। ଅପରପକ୍ଷରେ ୪ ବର୍ଷ ଧରି ରୁଷ ସହ ଯୁଦ୍ଧରେ ସଂଘର୍ଷ କରୁଥିବା ୟୁକ୍ରେନକୁ ମଧ୍ୟ ଏଥର ବିଶ୍ୱକପ୍‌ ଟିକଟ୍‌ ମିଳିନି। ବିଶ୍ୱ ମାନ୍ୟତାର ୩୨ତମ ସ୍ଥାନରେ ଥିବା ଏହି ୟୁରୋପୀୟ ରାଷ୍ଟ୍ର ଶେଷଥର ଲାଗି ୨୦୦୬ ସଂସ୍କରଣ ଖେଳିଥିଲା। ପୋଲାଣ୍ଡ ମଧ୍ୟ ଏଥର ବିଶ୍ୱକପ୍‌ ବସ୍‌ ମିସ୍‌ କରିଛି। ଫିଫା ର‍୍ୟାଙ୍କିଙ୍ଗରେ ୩୨ତମ ସ୍ଥାନରେ ଥିବା ପୋଲାଣ୍ଡ ଯୋଗ୍ୟତା ପର୍ଯ୍ୟାୟର ଫାଇନାଲ ମ୍ୟାଚରେ ୨-୩ ଗୋଲ୍‌ରେ ସ୍ୱିଡେନଠାରୁ ହାରିବା ପୋଲାଣ୍ଡ ପାଇଁ ମହଙ୍ଗା ସାବ୍ୟସ୍ତ ହୋଇଥିଲା।

ଦୋହା : ୧୯୭୮ ଓ ୧୯୮୬ରେ ଚାମ୍ପିଅନ ହୋଇଥିବା ଆର୍ଜେଣ୍ଟିନା, ୧୯୯୮ ଓ ୨୦୧୮ରେ ଟାଇଟଲ ଜିତିଥିବା ଫ୍ରାନ୍ସ ମଧ୍ୟରେ ଏଠାରେ ୨୦୨୨ ଫିଫା ବିଶ୍ୱକପ୍‍ ଫୁଟବଲ ଟୁର୍ଣ୍ଣାମେଣ୍ଟର ଫାଇନାଲ ଖେଳାଯିବ। ଲିଓନେଲ ମେସିଙ୍କ ନେତୃତ୍ୱରେ ଆର୍ଜେଣ୍ଟିନା ଓ ହୁଗ ଲୋରିସ୍‍ଙ୍କ ନେତୃତ୍ୱରେ ଫ୍ରାନ୍ସ ଯଦି ଏଠାରେ ଟାଇଟଲ ବିଜୟୀ ହୁଅନ୍ତି, ତେବେ ଏହା ସେମାନଙ୍କର ତୃତୀୟ ବିଶ୍ୱକପ୍‍ ଟାଇଟଲ ହେବ। ଉଭୟ ଦଳ ଜିତିଲେ ଏଠାରେ ନିମ୍ନଲିଖିତ ରେକର୍ଡ ପ୍ରତିଷ୍ଠା କରିବେ।

ଆର୍ଜେଣ୍ଟିନା ଜିତିଲେ

୧-ଦୀର୍ଘ ୩୬ ବର୍ଷ ପରେ ଟାଇଟଲ ଜିତିବ। ଶେଷଥର ୧୯୮୬ରେ ଆର୍ଜେଣ୍ଟିନା ଟାଇଟଲ ଜିତିଥିଲା।
୨- ଲିଓନେଲ ମେସି ତୃତୀୟ ଅଧିନାୟକ ଭାବେ ଆର୍ଜେଣ୍ଟିନା ପକ୍ଷରୁ ଟାଇଟଲ ଜିତିବେ। ପୂର୍ବରୁ ଡାନିଏଲ ପାସାରେଲା ଓ ଡିଏଗୋ ମାରାଡୋନା ଏହି ସଫଳତା ପାଇଥିଲେ।
୩- ଏହା ଯଦି ସମ୍ଭବ ହୁଏ ତେବେ ଚତୁର୍ଥ ଦଳ ଭାବେ ଆର୍ଜେଣ୍ଟିନା ତୃତୀୟ ଟାଇଟଲ ଜିତିବ। ପୂର୍ବରୁ ବ୍ରାଜିଲ ୫ଥର, ଇଟାଲୀ ଓ ଜର୍ମାନୀ ୪ଥର ଲେଖାଏଁ ଏହି ଟାଇଟଲ ଜିତଛନ୍ତି।
୪-ଗତ ୪ଟି ସଂସ୍କରଣରେ ୟୁରୋପର ଟିମ୍‍ ଟାଇଟଲ ଜିତୁଥିଲାବେଳେ ଏହି ଧାରାରେ ବ୍ରେକ୍‍ ଲାଗିବ। ୨୦୦୨ରେ ବ୍ରାଜିଲ ଦକ୍ଷିଣ ଆମେରିକୀୟ ଟିମ୍‍ ଭାବେ ଶେଷଥର ଟାଇଟଲ ଜିତିଥିଲା। ୨୦୦୬ରେ ଇଟାଲୀ, ୨୦୧୪ରେ ସ୍ପେନ୍‍, ୨୦୧୪ରେ ଜର୍ମାନୀ ଓ ୨୦୧୮ରେ ଫ୍ରାନ୍ସ ୟୁରୋପୀୟ ଦଳ ଭାବେ ଚାମ୍ପିଅନ ହୋଇଛନ୍ତି।
୫-ମେସି ଯଦି ଫାଇନାଲରେ ଗୋଟିଏ ଗୋଲ୍‌ ସ୍କୋର କରିବେ, ଏବଂ ସେହି ସମୟରେ ଫ୍ରାନ୍ସର କିଲିଆନ୍‍ ଏମ୍‍ବାପ୍ପେ ଗୋଲ୍‌ କରିବେ ନାହିଁ, କିମ୍ବା ଫ୍ରାନ୍ସର ଅଲିଭର ଜିରୋଡ ଓ ଆର୍ଜେଣ୍ଟିନାର ଜୁଲିଆନ୍‍ ଆଲଭାରେଜ ଆଉ ୨ଟି ଲେଖାଏଁ ଗୋଲ୍‌ କରିବେ ନାହିଁ ତେବେ ମେସିଙ୍କୁ ଗୋଲ୍‌ଡେନ୍‌ ବୁଟ୍‍ ପୁରସ୍କାର ମିଳିବ।
୬-ମେସି ଏଠାରେ ୪ଥର ପ୍ଲେୟର ଅଫ୍‍ ଦି ମ୍ୟାଚ୍‍ ପୁରସ୍କାର ପାଇଛନ୍ତି। ଫାଇନାଲରେ ଶ୍ରେଷ୍ଠ ଖେଳାଳି ହେଲେ ତାଙ୍କୁ ଗୋଲ୍‌ଡେନ୍‌ ବଲ ପୁରସ୍କାର (ଟୁର୍ଣ୍ଣାମେଣ୍ଟର ଶ୍ରେଷ୍ଠ ଖେଳାଳି) ମଧ୍ୟ ମିଳିବ।
୭-ଫାଇନାଲ ଖେଳିଲେ ମେସି ବିଶ୍ୱକପ୍‍ରେ ସର୍ବାଧିକ ୨୬ଟି ମ୍ୟାଚରେ ପଦାର୍ପଣ କରିବାର ରେକର୍ଡ କରିବେ। ଏହା ପୂର୍ବରୁ ଜର୍ମାନୀର ଲୋଥର ମାଥାଉସ ଓ ମେସି ୨୫ଟି ଲେଖାଏଁ ମ୍ୟାଚ୍‍ ଜିତି ସମାନ ସ୍ଥିତିରେ ରହିଛନ୍ତି।

ଫ୍ରାନ୍ସ ଜିତିଲେ

୧-ଏହା ଗତ ୬୦ ବର୍ଷରେ ତୃତୀୟ ଦଳ ଭାବେ କ୍ରମାଗତ ଟାଇଟଲ ଜିତିବାରେ ସମର୍ଥ ହେବ। ୧୯୫୮ ଓ ୧୯୬୨ ବ୍ରାଜିଲ ଶେଷଥର ଏହି ସଫଳତା ପାଇଥିଲା।
୨- ଏହା ତୃତୀୟ ଦଳ ଭାବେ ଟାଇଟଲ ବଜାୟ ରଖିବ। ପୂର୍ବରୁ ଇଟାଲୀ ଓ ବ୍ରାଜିଲ ଏହି ସଫଳତା ପାଇଛନ୍ତି।
୩- ଫ୍ରାନ୍ସ କୋଚ୍‍ ଡିଡିୟର ଡେସଚାମ୍ପ ବିଶ୍ୱକପ୍‍ ଇତିହାସରେ ମାତ୍ର ଦ୍ୱିତୀୟ ବ୍ୟକ୍ତିଭାବେ କ୍ରମାଗତ ଟାଇଟଲ ଜିତାଇବେ। ପୂର୍ବରୁ ୧୯୩୪ ଓ ୧୯୩୮ରେ ଭିଟ୍ଟୋରିଓ ପୋଜି ଇଟାଲୀକୁ କ୍ରମାଗତ ଟାଇଟଲ ଜିତାଇଥିଲେ।
୪- ଡେସ୍‍ଚାମ୍ପ ମଧ୍ୟ ପ୍ରଥମ ବ୍ୟକ୍ତିଭାବେ ଜଣେ ଖେଳାଳି ଭାବେ ଥରେ ଓ ମ୍ୟାନେଜର ଭାବେ ଦୁଇଥର ଗୋଟିଏ ଦଳକୁ ଚାମ୍ପିଅନ କରାଇବାରେ ସଫଳତା ହାସଲ କରିବେ।
୫- ବିଶ୍ୱକପରେ ୟୁରୋପର ଟାଇଟଲ ଜିତିବା ଅଭିଯାନ ଅବ୍ୟାହତ ରହିବ। ୨୦୦୬ରୁ ୨୦୧୮ ଯାଏ ୟୁରୋପ ଟାଇଟଲ ଜିତିଆସୁଛି।
୬- ଲିଓନେଲ ମେସି ଫାଇନାଲରେ ଗୋଲ୍‌ ନକଲେ ଏବଂ କିଲିଆନ୍‍ ଏମ୍‍ବାପ୍ପେ ଗୋଟିଏ ଗୋଲ୍‌ ଦେଲେ ଗୋଲ୍‌ଡେନ୍‌ ବୁଟ୍‍ (ସର୍ବାଧିକ ଗୋଲ୍‌) ପୁରସ୍କାର ପାଇବେ। ଜିରୋଡ ଓ ଆଲଭାରେଜ୍‍ଙ୍କୁ ୨ଟି ଲେଖାଏଁ ଗୋଲ୍‌ ନକରିବା ଆବଶ୍ୟକ।
୭- ଫାଇନାଲରେ ଏମ୍‍ବାପ୍ପେ ଗୋଲ୍‌ ସ୍କୋର କଲେ ୨୪ ବର୍ଷ ପୂର୍ବରୁ ଗୋଟିଏ ବିଶ୍ୱକପ୍‍ରେ ସର୍ବାଧିକ ଗୋଲ୍‌ ସ୍କୋର କରିବାର ୩ଜଣଙ୍କ ସହ ସମକକ୍ଷ ହେବେ। ୨୪ ବର୍ଷରେ ପଦାର୍ପଣ କରିବା ପୂର୍ବରୁ ଗୋଟିଏ ବିଶ୍ୱକପରେ ସର୍ବାଧିକ ୬ଟି ଲେଖାଏଁ ଗୋଲ୍‌ ବ୍ରାଜିଲର ପେଲେ, ଆର୍ଜେଣ୍ଟିନାର ମାରିଓ କେମ୍ପେସ୍‍ ଓ କଲମ୍ବିଆର ଜେମ୍ସ ରୋଡ୍ରିଗ୍ୱେଜ୍‍ ସ୍କୋର କରିଛନ୍ତି। ଡିସେମ୍ବର ୨୦ରେ ଏମ୍‍ବାପ୍ପେଙ୍କୁ ୨୪ ବର୍ଷ ହେବ।

ନୂଆଦିଲ୍ଲୀ: ମେସିଙ୍କ ପ୍ରଶଂସକଙ୍କୁ ଲାଗିପାରେ ବଡ ଝଟକା । ଫିଫା ବିଶ୍ୱକପ ଫାଇନାଲ ମ୍ୟାଚ ଖେଳି ନପାରନ୍ତି ଲିଓନେଲ ମେସି । ଆସନ୍ତା କାଲି ଅର୍ଥାତ ଡିସେମ୍ବର ୧୮ ତାରିଖରେ ଖେଳାଯିବ ଫିଫା ବିଶ୍ୱକପର ଫାଇନାଲ ମ୍ୟାଚ । ଫାଇନାଲରେ ମୁହାଁମୁହିଁ ହେବେ ଆର୍ଜେଣ୍ଟିନା ଓ ଫ୍ରାନ୍ସ । ସାରା ବିଶ୍ୱବାସୀଙ୍କ ନଜର ଏହି ମ୍ୟାଚ ଉପରେ ରହିଥିବାବେଳେ ଆର୍ଜେଣ୍ଟିନାର ଅଧିନାୟକ ଲିଓନେଲ ମେସିଙ୍କୁ ନେଇ ଆସିଛି ଗୁରୁତ୍ୱପୂର୍ଣ୍ଣ ଖବର ।

ଆଣ୍ଠୁରେ ଆଘାତ ଲାଗିଥିବା ଯୋଗୁଁ ଫାଇନାଲ ମ୍ୟାଚ ପୂର୍ବରୁ ହୋଇଥିବା ଟ୍ରେନିଂ ସେସନରେ ମେସି ଅନୁପସ୍ଥିତ ରହିଥିବା କୁହାଯାଉଛି । ତେବେ ଏହାର କେତେ ସତ୍ୟତା ଅଛି ତାହା ଜଣାପଡି ନାହିଁ । ଯଦି ଏହା ସତ୍ୟ ହୁଏ ତେବେ ଫିଫା ବିଶ୍ୱକପ ଫାଇନାଲ ମ୍ୟାଚ ଖେଳି ନ ପାରନ୍ତି ଲିଓନେଲ ମେସି ।

ମେସି କ୍ରିଏସିଆ ବିରୋଧରେ ଖେଳୁଥିବା ବେଳେ ତାଙ୍କ ଅଣ୍ଠୁରେ ଆଘାତ ଲାଗିଥିଲା । ହେଲେ ସେତେବେଳେ ସେ ଠିକ୍ ଥିବା କଥା ନିଜେ କହିଥିଲେ । ସେ କହିଥିଲେ କି ମୁଁ ଫାଇନାଲ ମ୍ୟାଚ ଖେଳି ନିଜ ଦଳକୁ ସହାୟତା କରିବି । ସେପଟେ ମେସି ଆଘାତ ହୋଇଥିବା ଖବର ଶୁଣିବା ପରେ ପ୍ରଶଂସକମାନେ ଦୁଖିତ ହୋଇପଡିଛନ୍ତି ।

ଦୁନିଆର ସର୍ବଶ୍ରେଷ୍ଠ ଫୁଟବଲ୍ ଖେଳାଳିଙ୍କ ମଧ୍ୟରୁ ଜଣେ ଲିଓନେଲ୍ ମେସିଙ୍କ ନିକଟରେ ନିଜ ଦଳକୁ ଚାମ୍ପିଅନ କରାଇବାର ସୁଯୋଗ ରହିଛି। ଏହା ମେସିଙ୍କ ଶେଷ ବିଶ୍ଵ କପ୍ ଏବଂ ଆର୍ଜେଣ୍ଟିନା ପାଇଁ ଏହା ତାଙ୍କର ଶେଷ ମ୍ୟାଚ୍ ହୋଇପାରେ। ଆର୍ଜେଣ୍ଟିନା ଷଷ୍ଠ ଥର ଫିଫା ବିଶ୍ଵ କପ୍‌ର ଫାଇନାଲ୍‌ରେ ପ୍ରବେଶ କରିଛି। ଏଥିରୁ ଦଳ ଦୁଇ ଥର ୧୯୭୮ ଏବଂ ୧୯୮୬ ବିଶ୍ଵ କପ୍‌ରେ ଚାମ୍ପିଅନ ହୋଇଥିଲା।

ଆଲ୍‍ ଖୋର୍‍, ଦୋହା : ବିଶ୍ୱର ଅନ୍ୟତମ ଶ୍ରେଷ୍ଠ ଖେଳାଳି ନେମାରଙ୍କର ଫିଫା ବିଶ୍ୱକପ୍‍ ଜିତିବା ଆଶା ଧୂଳିସାତ କରିଛି କ୍ରୋଏସିଆ। କ୍ୱାର୍ଟର ଫାଇନାଲରେ ଏହି ୨୦୧୮ ରନର୍ସ ଅପ୍‍ ବ୍ରାଜିଲକୁ ୪-୨ ପେନାଲ୍ଟି ସୁଟ୍‍ଆଉଟରେ ହରାଇ ସେମି ଫାଇନାଲରେ ପ୍ରବେଶ କରିଛି। ମଙ୍ଗଳବାର ଖେଳାଯିବାକୁ ଥିବା ପ୍ରଥମ ସେମିଫାଇନାଲରେ କ୍ରୋଏସିଆ ସହ ମୁକାବିଲା ହେବ ବିଶ୍ୱର ଅନ୍ୟତମ ଶ୍ରେଷ୍ଠ ଖେଳାଳି ଲିଓନେଲ ମେସିଙ୍କ ଆର୍ଜେଣ୍ଟିନା ସହ। ଏହି ମ୍ୟାଚ୍‍କୁ ନିଜ କବ୍‍ଜାରେ ରଖି କ୍ରୋଏସିଆ ମଧ୍ୟ ମେସିଙ୍କ ବିଶ୍ୱକପ୍‍ ଜିତିବା ଆଶାକୁ ଧୂଳିସାତ କରିବା ଲକ୍ଷ୍ୟରେ ରହିଛି। ଏହି ଛୋଟିଆ ଦେଶର ଲକ୍ଷ୍ୟ ସ୍ୱତନ୍ତ୍ର। ଏହା କେଉଁଠାରେ ବଡ଼ିମା ଦେଖାଉ ନାହିଁ କିମ୍ବା ବଡ଼ ବଡ଼ ଆକ୍ରମଣକୁ ପ୍ରତିହତ କରିବାରେ ସମର୍ଥ ହୋଇଛି। ଏଭଳି ସମୟରେ ୭ଥର ବିଶ୍ୱର ଶ୍ରେଷ୍ଠ ଖେଳାଳି ମେସି ତାଙ୍କ ଜୀବନରେ ଶେଷଥର ଲାଗି ଏହି ଟ୍ରଫି ହାସଲ କରିବାକୁ ଲଢ଼ିବେ। ଟ୍ରଫି ହାସଲ କରିବାରେ କ୍ରୋଏସିଆ ଏବେ ବଡ଼ ପ୍ରତିବନ୍ଧକ ହୋଇ ଛିଡ଼ା ହୋଇଛି।

ଏହାର ଖେଳାଳିମାନେ ମଧ୍ୟ ମ୍ୟାଚ୍‍କୁ ନେଇ ବେଶି ଉତ୍ସାହିତ ନୁହଁନ୍ତି। ‘ଆମେ କୌଣସି ଦଳ କିମ୍ବା ଖେଳାଳିଙ୍କୁ ଭୟ କରୁନାହୁଁ। ଆମେ କେବଳ ନିଜର ଶ୍ରେଷ୍ଠ ଖେଳ ଉପରେ ନିର୍ଭର କରୁଛୁ’ ବୋଲି କ୍ରୋଏସିଆର ରକ୍ଷଣଭାଗ ଖେଳାଳି ଜୋସିପ୍‍ ଜୁରାନୋଭିଚ୍‍ କହନ୍ତି। ସେ ଆହୁରି କହନ୍ତି, ଆମେ ମ୍ୟାଚ୍‍ ଖେଳିଲାବେଳେ ଗୋଟିଏ ପରିବାର ଭଳି ଏକତ୍ର ହୋଇ ଖେଳିଥାଉ। ଏହା ହିଁ ଆମର ଶକ୍ତି ଓ ସଫଳତାର ମୂଳମନ୍ତ୍ର ବୋଲି ଜୁରାନୋଭିଚ୍‍ଙ୍କ ମତ। କ୍ୱାର୍ଟର ଫାଇନାଲରେ ବ୍ରାଜିଲ ସହ ନିର୍ଦ୍ଧାରିତ ଓ ଅତିରିକ୍ତ ସମୟ ଖେଳ ୧-୧ ଗୋଲରେ ସମାନ ସ୍ତରରେ ରହିଥିଲା। କିନ୍ତୁ ପେନାଲ୍ଟି ସୁଟ୍‍ଆଉଟରେ କ୍ରୋଏସିଆ ୪-୨ ଗୋଲରେ ବିଜୟୀ ହେବା ଫଳରେ ନେମାରଙ୍କ ବିଶ୍ୱକପ୍‍ ଖେଳିବା ଆଶା ଧୂଳିସାତ ହୋଇଯାଇଥିଲା।

ଅନ୍ୟପକ୍ଷରେ ଆର୍ଜେଣ୍ଟିନାକୁ ସେମିଫାଇନାଲ୍‍ରେ ପ୍ରବେଶ କରାଇବାରେ ମେସିଙ୍କ ଭୂମିକା ଢ଼େର ଅଧିକ। ସେ ୫ଟି ମ୍ୟାଚ୍‍ରେ ୪ଟି ଗୋଲ କରିଛନ୍ତି ଓ ନେଦରଲାଣ୍ଡ୍‍ସ ବିପକ୍ଷ କ୍ୱାର୍ଟର ଫାଇନାଲ ମୁକାବିଲାରେ ଗୋଲ ଦେଇଥିବା ନାହୁଏଲ ମୋଲିନାଙ୍କୁ ସହାୟତା ଦେଇଥିଲେ। ଏହା ମେସିଙ୍କ ମ୍ୟାଜିକ୍‍ ବୋଲି ଧରିବାକୁ ହେବ। ୧୯୮୬ରେ ଶେଷଥର ଆର୍ଜେଣ୍ଟିନା ବିଶ୍ୱକପ୍‍ ଟାଇଟଲ ଜିତିଥିଲା। ଏବେ ମେସିଙ୍କ ସମୟରେ ଆର୍ଜେଣ୍ଟିନା ଥରେ ଫାଇନାଲ ୨୦୧୪ରେ ଖେଳି ମଧ୍ୟ ପଡୋଶୀ ବ୍ରାଜିଲଠାରୁ ୧-୦ ଗୋଲରେ ପରାଜିତ ହୋଇଥିଲା। ମେସିଙ୍କର ଏହା ହୁଏତ ଶେଷ ଟୁର୍ଣ୍ଣାମେଣ୍ଟ। ଏଣୁ ସେ ଓ ତାଙ୍କ ଟିମ୍‍ ଏହାକୁ ଗୁରୁତ୍ୱର ସହ ନେଉଛନ୍ତି। ଏଣୁ ଆଉ ଦୁଇଟି ମ୍ୟାଚ୍‍ ଜିତିପାରିଲେ ମେସିଙ୍କ ଟ୍ରଫି ଜିତିବାର ସ୍ୱପ୍ନ ସାର୍ଥକ ହୋଇପାରିବ।

ଲୁସେଲ ଷ୍ଟାଡିୟମ୍‍ରେ ଖେଳାଯିବାକୁ ଥିବା ଏହି ମ୍ୟାଚ୍‍ ପୂର୍ବରୁ କ୍ରୋଏସିଆ ଚୁପ୍‍ଚାପ୍‍ ରହିଛି। କ୍ରୋଏସିଆ ଷ୍ଟ୍ରାଇକର ବ୍ରୁନୋ ପେଟ୍‍କୋଭିଚ୍‍ଙ୍କ ମତରେ ଆର୍ଜେଣ୍ଟିନାର ଷ୍ଟାର ଖେଳାଳି ଲିଓନେଲ ମେସିଙ୍କୁ ଅଟକାଇବା ଲାଗି ଆମେ କିଛି ସ୍ୱତନ୍ତ୍ର ଯୋଜନା କରିନାହୁଁ କିମ୍ବା ଆମେ କୌଣସି ବ୍ୟକ୍ତି ବିଶେଷଙ୍କ ଲାଗି ଯୋଜନା କରି ନଥାଉ। ଗୋଟିଏ ଦଳ ବିପକ୍ଷରେ ଆମର ଯୋଜନା ହୋଇଥାଏ। ଏଣୁ ଏବେ ଆମେ ଆର୍ଜେଣ୍ଟିନାକୁ କିପରି ହରାଇବୁ ତାହା ଉପରେ ଲକ୍ଷ୍ୟ ରଖିଛି। ଆର୍ଜେଣ୍ଟିନା କହିଲେ କେବଳ ମେସିଙ୍କୁ ବୁଝାଏ ନାହିଁ। ତାଙ୍କ ପରି ଆହୁରି ଅନେକ ଖେଳାଳି ଦଳରେ ଅଛନ୍ତି। ଏଣୁ ଗୋଟିଏ ଦଳକୁ ଅଟକାଇବା ଲକ୍ଷ୍ୟ ନେଇ ଆମେ ଖେଳିବାକୁ ଆସିବୁ ବୋଲି ପେଟ୍‍କୋଭିଚ୍‍ କହନ୍ତି।

କ୍ରୋଏସିଆର ଶ୍ରେଷ୍ଠ ବଳ ହେଲା ମିଡ୍‍ଫିଲ୍ଡ। ୨୦୧୮ ବିଶ୍ୱକପ୍‍ର ଶ୍ରେଷ୍ଠ ଖେଳାଳି ଲୁକା ମୋଡ୍ରିଚ୍‍ଙ୍କ ନେତୃତ୍ୱରେ ଗଠିତ କ୍ରୋଏସିଆ ମିଡ୍‍ ଫିଲ୍ଡ ବିଶ୍ୱରେ ଶ୍ରେଷ୍ଠ ବୋଲି କହନ୍ତି କୋଚ୍‍ ଜ୍ଲାଟ୍‍କୋ ଡାଲିଚ୍‍। ଲୁକାଙ୍କ ସହ ମାଟେଓ କୋଭାସିଚ୍‍ ଓ ମାର୍ସେଲୋ ବ୍ରୋଜୋଭିଚ୍‍ଙ୍କୁ ନେଇ ଗଠିତ ମିଡ୍‍ ଫିଲ୍ଡ କ୍ୱାର୍ଟର ଫାଇନାଲରେ ନେମାର ଓ ବ୍ରାଜିଲଙ୍କୁ ଅଚଳ କରିଦେଇଥିଲେ।

ସେମିଫାଇନାଲରେ କେମିତି ପହଞ୍ଚିଥିଲା  ଆର୍ଜେଣ୍ଟିନା
ଗ୍ରୁପ୍‌ ଲିଗ୍‍ ପର୍ଯ୍ୟାୟରେ

୧- ସାଉଦି ଆରବଠାରୁ ୧-୨ ଗୋଲରେ ପରାସ୍ତ
୨- ମେକ୍ସିକୋ ବିପକ୍ଷରେ ୨-୦ ଗୋଲରେ ବିଜୟୀ
୩- ପୋଲାଣ୍ଡ ବିପକ୍ଷରେ ୨-୦ ଗୋଲରେ ବିଜୟୀ

ପ୍ରି-କ୍ୱାର୍ଟର ଫାଇନାଲରେ

୪-ଅଷ୍ଟ୍ରେଲିଆ ବିପକ୍ଷରେ ୨-୧ ଗୋଲରେ ବିଜୟୀ

କ୍ୱାର୍ଟର ଫାଇନାଲ

୫- ନେଦରଲାଣ୍ଡ୍‍ସ ବିପକ୍ଷରେ ୪-୩ ପେନାଲ୍ଟିରେ ବିଜୟୀ
(ନିର୍ଦ୍ଧାରିତ ସମୟରେ ଖେଳ ୨-୨ରେ ବରାବର)

ସେମିଫାଇନାଲରେ କେମିତି ପହଞ୍ଚିଥିଲା କ୍ରୋଏସିଆ
ଗ୍ରୁପ୍‌ ଲିଗ୍‍ ପର୍ଯ୍ୟାୟରେ

୧- ମରୋକ୍କୋ ସହ ୦-୦ ଗୋଲରେ ମ୍ୟାଚ୍‍ ଡ୍ର
୨- କାନାଡ଼ା ବିପକ୍ଷରେ ୪-୧ ଗୋଲରେ ବିଜୟୀ
୩- ବେଲଜିୟମ ସହ ୦-୦ ଗୋଲରେ ମ୍ୟାଚ୍‍ ଡ୍ର

ପ୍ରି-କ୍ୱାର୍ଟର ଫାଇନାଲରେ

୪- ଜାପାନ ବିପକ୍ଷରେ ୩-୧ ପେନାଲ୍ଟିରେ ବିଜୟୀ
(ନିର୍ଦ୍ଧାରିତ ସମୟରେ ଖେଳ ୧-୧ରେ ବରାବର)

କ୍ୱାର୍ଟର ଫାଇନାଲରେ

୫- ବ୍ରାଜିଲ ବିପକ୍ଷରେ ୪-୨ ପେନାଲ୍ଟିରେ ବିଜୟୀ
(ନିର୍ଦ୍ଧାରିତ ସମୟରେ ଖେଳ ୧-୧ରେ ବରାବର)

କୋଲକାତା: କତାରରେ ଚାଲିଥିବା ଫିଫା ବିଶ୍ୱକପ୍‍ ଫୁଟବଲର ପ୍ରଭାବ ଏବେ ବିଶ୍ୱର ସମସ୍ତ ଫୁଟବଲ ପ୍ରେମୀଙ୍କ ଉପରେ ପଡ଼ିଛି। ଫୁଟବଲ ଲାଗି ପାଗଳ ହୋଇଯାଉଥିବା କୋଲକାତାର ସମର୍ଥକ ମାନେ ଏଥିରୁ ବାଦ୍‍ ଯାଆନ୍ତେ କିପରି ? ଫିଫାର ଏହି ସିନିୟର ପୁରୁଷ ବିଶ୍ୱକପ୍‍ ଖେଳ ଦେଖିବାକୁ କୋଲକାତାରୁ କେବଳ ୯,୦୦୦ ସମର୍ଥକ ଏବେ କତାରରେ ଅଛନ୍ତି। ଏମାନେ ଡିସେମ୍ବର ୧୮ ତାରିଖ ଯାଏ ଖେଳ ଦେଖିବା ପରେ ସ୍ୱଦେଶ ଫେରିବେ ବୋଲି ପ୍ରକାଶ କରିଛନ୍ତି ଟ୍ରାଭେଲ ଏଜେଣ୍ଟ ଫେଡେରେସନ ଅଫ୍‍ ଇଣ୍ଡିଆର ସଭାପତି ଅନୀଲ ପଞ୍ଜାବୀ। ଏମାନଙ୍କ ସହ ପୂର୍ବ ଭାରତରୁ ପାଖାପାଖି ୧୨,୦୦୦ ଫୁଟବଲ ସମର୍ଥକ ଏବେ କତାରରେ ବିଶ୍ୱକପ୍‍କୁ ଉପଭୋଗ କରୁଛନ୍ତି। ଏହା ମଧ୍ୟରେ ଖେଳ ସେମିଫାଇନାଲ ଓ ଫାଇନାଲ ପର୍ଯ୍ୟାୟରେ ପହଞ୍ଚିଲାଣି। ଏହି ପର୍ଯ୍ୟାୟକୁ ଦେଖିବା ଲାଗି କୋଲକାତାରୁ ଆଉ ୧୫୦୦ ଦର୍ଶକ କତାର ଯିବେ ବୋଲି ଆଶା କରାଯାଉଛି।

ଏଠାରେ ପ୍ରଶ୍ନଉଠେ ଭାରତରେ କ୍ରିକେଟ ଖେଳର ଲୋକପ୍ରିୟତା ଥିଲାବେଳେ ଫୁଟବଲ ପ୍ରତି ଏତେ ଆଗ୍ରହ କାହିଁକି। ଏହାର କାରଣ ହେଲା ପୂର୍ବ ଭାରତରେ ଫୁଟବଲ ଖେଳ ପ୍ରତି ଅତ୍ୟନ୍ତ ଆଗ୍ରହ। ଏହି ଆଗ୍ରହ ଯୋଗୁ ସମର୍ଥକମାନେ ଫୁଟବଲ ମ୍ୟାଚ୍‍କୁ ଅଧିକ ଉପଭୋଗ କରିଥାନ୍ତି। ଏହା ବ୍ୟତୀତ କରୋନା ଯୋଗୁ ଗତ କିଛି ବର୍ଷ ହେଲା ଫୁଟବଲ ସମର୍ଥକମାନେ ଘରୁ ବାହାରି ପାରି ନାହାନ୍ତି। ଭାରତରେ କୌଣସି ବଡ଼ ଟୁର୍ଣ୍ଣାମେଣ୍ଟ ମଧ୍ୟ ହୋଇ ନାହିଁ। ଏହା ମଧ୍ୟ ଏକ ବଡ଼ କାରଣ ବୋଲି ପଞ୍ଜାବୀ କହନ୍ତି।
ଆଉ ଏକ ମୁଖ୍ୟ ଏବଂ ଗୁରୁତ୍ୱପୂର୍ଣ୍ଣ କାରଣ ହେଲା ଆର୍ଥିକ ସ୍ଥିତି ଓ ଯୋଗାଯୋଗ ସୁବିଧାର ଉପଲବ୍ଧ। ଏବେ ଭାରତୀୟ ଅର୍ଥନୀତିରେ ଢ଼େର ଉନ୍ନତି ହୋଇଛି। ସାଧରଣ ଜନତାଙ୍କ ଜୀବନ ଧାରଣ ମାନରେ ଉନ୍ନତି ହୋଇଥିଲା ବେଳେ ଆୟ ବୃଦ୍ଧି ହୋଇଛି। ଏହା ବ୍ୟତୀତ କୋଲକାତାରୁ କତାରକୁ ସିଧାସଳଖ ବିମାନ ସେବା ଉପଲବ୍ଧ ହେଉଛି। ଏଠାରୁ ଯିବାଆସିବା ଲାଗି ୫୫,୦୦୦ରୁ ୬୦,୦୦୦ ଟଙ୍କା ଲାଗୁଛି। ଏଣୁ ଏହି ସବୁ କାରଣ ଯୋଗୁ କତାରକୁ ଏତେ ସଂଖ୍ୟାରେ ସମର୍ଥକ ଯାଇଛନ୍ତି।

ଫୁଟବଲରେ ଦକ୍ଷ ଓ ଲୋକପ୍ରିୟ ଟିମ୍‍ ବ୍ରାଜିଲ ଓ ପର୍ତ୍ତୁଗାଲ ବିଦା ହେବା ସତ୍ତ୍ବେ ଏହି ସମର୍ଥକ ଆର୍ଜେଣ୍ଟିନାର ବଡ଼ ସମର୍ଥକ ପାଲଟିଛନ୍ତି। ମେସୀଙ୍କ ପରି ଖେଳାଳିଙ୍କୁ ଖେଳ ନିଜ ଆଖିରେ ଦେଖିବା ସୌଭାଗ୍ୟର କଥା। ଏହାକୁ ମୁଁ ଆଦୌ ହାତଛଡ଼ା କରିବି ନାହିଁ ବୋଲି ଲେକ୍‍ ଟାଉନ ବାସିନ୍ଦା ଶୁଭମ ମିତ୍ର ପ୍ରକାଶ କରିଛନ୍ତି। ସେ ସୋମବାର କତାର ଅଭିମୁଖେ ଯିବେ ଓ ମଙ୍ଗଳବାର ଆର୍ଜେଣ୍ଟିନା ଓ କ୍ରୋଏସିଆ ମଧ୍ୟରେ ଖେଳାଯିବାକୁ ଥିବା ପ୍ରଥମ ସେମିଫାଇନାଲ ମୁକାବିଲାକୁ ଦେଖିବେ ବୋଲି କହିଛନ୍ତି।

କତାର: ଫିଫା ବିଶ୍ୱପକରେ ଇତିହାସ ରଚିଲା ମୋରୋକ୍କୋ । ପର୍ତ୍ତୁଗାଲକୁ ହରାଇ ଐତିହାସିକ ବିଜୟ ହାସଲ କରିଛି ମୋରୋକ୍କୋ । ରୋମାଞ୍ଚକ ମ୍ୟାଚରେ ପର୍ତ୍ତୁଗାଲକୁ ୧-୦ ଗୋଲରେ ହରାଇ ଫିଫା ବିଶ୍ୱକପର ଇତିହାସରେ ପ୍ରଥମ ଆଫ୍ରିକୀୟ ଦଳ ଭାବେ ସେମିଫାଇନାଲରେ ପ୍ରବେଶ କରିଛି ମୋରୋକ୍କୋ । ସେପଟେ ପର୍ତ୍ତୁଗାଲ ମ୍ୟାଚରୁ ବିଦା ହୋଇଛି । ତୃତୀୟ ଦଳ ଭାବେ ସେମିଫାଇନାଲରେ ପ୍ରବେଶ କରିଛି ମୋରୋକ୍କୋ । ଫୁଟବଲର ସବୁଠୁ ପରିଚିତ ଖେଳାଳୀ କ୍ରିଷ୍ଟିୟାନ ରୋନାଲ୍ଡୋଙ୍କ ଦଳ ପର୍ତୁଗାଲ ନକଆଉଟ ମ୍ୟାଚରେ ହାରିବା ପରେ ସେମିଫାନାଲ ରେସରୁ ବାଦ ପଡିଛି । ସେପଟେ ୫ ଥରର ବିଜେତା ବ୍ରାଜିଲ ପରେ ତିନି ଥରର ଉପବିଜେତା ନେଦରଲ୍ୟାଣ୍ଡ ମଧ୍ୟ ଫିଫା ବିଶ୍ୱକପରୁ ବିଦାୟ ନେଇଛି ।

ସ୍ଥାନୀୟ ଅଲ ଥୁମାମା ଷ୍ଟାଡିୟମ୍‍ରେ ଖେଳାଯାଇଥିବା ତୃତୀୟ କ୍ୱାର୍ଟର ଫାଇନାଲରେ ମରୋକ୍କୋ ୧-୦ ଗୋଲରେ କ୍ରିଷ୍ଟିଆନୋ ରୋନାଲ୍ଡୋଙ୍କ ପର୍ତ୍ତୁଗାଲକୁ ହରାଇ ଆଫ୍ରିକାର ପ୍ରଥମ ଦଳ ଭାବେ ସେମିଫାଇନାଲରେ ପ୍ରବେଶ କରିଥିଲା। ବିଜୟୀ ଦେଶ ପକ୍ଷରୁ ପ୍ରଥମାର୍ଦ୍ଧ ଖେଳର ୪୨ତମ ମିନିଟ୍‍ରେ ୟୁସେଫ୍‍ ଏନ୍‍ ନେସିରି ଗୋଲ ଦେଇଥିଲେ। ସେହିପରି ଦ୍ୱିତୀୟ ମ୍ୟାଚ୍‍ରେ ଫ୍ରାନ୍ସ ପକ୍ଷରୁ ଔରେଲିଏନ ଟିଚୋମେନୀ ଓ ଅଲିଭର ଜିରୋଡ ଗୋଲ ଦେଇଥିଲେ। ଇଂଲଣ୍ଡ ଅଧିନାୟକ ପେନାଲ୍ଟିରୁ ଗୋଟିଏ ଗୋଲ ଦେଇଥିଲାବେଳେ ଆଉ ଗୋଟିଏ ଗୋଲ ମିସ୍‍ କରିଥିଲେ।

ଦୋହା : କତାରରେ ଚାଲିଥିବା ଫିଫା ବିଶ୍ୱକପ ୨୦୨୨ର ୩ୟ ଦିନରେ ଦେଖିବାକୁ ମିଳିଛି ବଡ ବିପର୍ଯ୍ୟୟ। ବିଶ୍ବର ସର୍ବଶ୍ରେଷ୍ଠ ଖେଳାଳି ଲିଏନେଲ ମେସିଙ୍କ ନେତୃତ୍ବାଧିନ ଆର୍ଜେଣ୍ଟିନାକୁ ପରାସ୍ତ କରିଛି ସାଉଦିଆରବ। ଆଜି ଲୁସେଲ ଷ୍ଟାଡିୟମରେ ଖେଳାଯାଇଥିବା ଗ୍ରୁପ ସି ମୁକାବିଲାରେ ସାଉଦିଆରବ ଆର୍ଜେଣ୍ଟିନାକୁ ୨-୧ରେ ପରାସ୍ତ କରିଛି। ଫୁଟବଲ ଇତିହାସରେ ଆର୍ଜେଣ୍ଟିନା ବିପକ୍ଷରେ ସାଉଦିଆରବର ଏହା ପ୍ରଥମ ବିଜୟ । ଏହାପୂର୍ବରୁ ଦୁଇ ଦଳ ମୋଟ ୪ ଥର ମୁହାଁମୁହିଁ ହୋଇଛନ୍ତି । ଯେଉଁଥିରେ ଆର୍ଜେଣ୍ଟିନା ୨ ଥର ବିଜୟୀ ହୋଇଥିବା ବେଳେ ଅନ୍ୟ ଦୁଇଟି ମ୍ୟାଚ ଡ୍ର ହୋଇଥିଲା।

Saudi Arabia beat Argentina. @adidasfootball | #FIFAWorldCup

— FIFA World Cup (@FIFAWorldCup) November 22, 2022

ଆଜିର ମ୍ୟାଚକୁ ବିଶ୍ୱକପ ଇତିହାସର ସବୁଠାରୁ ବଡ଼ ବିପର୍ଯ୍ୟୟ ଭାବେ ଅବିହିତ କରାଯାଉଛି। ମ୍ୟାଚ୍‌ ଆରମ୍ଭରୁ ସାଉଦିକୁ ଅଣ୍ଡରଡଗ ଭାବେ ବିବେଚନା କରାଯାଉଥିଲା। ହେଲେ ଗ୍ରୀନ ଫାଲକନ୍ସ ସମସ୍ତଙ୍କୁ ଭୁଲ ପ୍ରମାଣ କରି ଲୁସାଇଲ ଷ୍ଟାଡିୟମରେ ଇତିହାସ ରଚିଛି।ପ୍ରଥମ ଏସିଆନ ଦେଶ ଭାବେ ସାଉଦି ଆରବ ମେସିଙ୍କ ଆର୍ଜେଣ୍ଟିନାକୁ ହରାଇଛି। ଏହି ମ୍ୟାଚ୍‌ରେ ମେସି ଗୋଟିଏ ଗୋଲ ସ୍କୋର କରିଥିଲେ ମଧ୍ୟ ଏହା ବେକାର ହୋଇଯାଇଛି।

ପ୍ରଥମାର୍ଦ୍ଧରେ ପଛରେ ପଡ଼ିଥିବା ସାଉଦି ଆରବ ମ୍ୟାଚର ଦ୍ୱିତୀର୍ଦ୍ଧାର ଆରମ୍ଭରୁ ଆଟାକିଂ ଖେଳ ଖେଳିଥିଲା। ୫ ମିନିଟ ଭିତରେ ୨ଟି ଗୋଲ ସ୍କୋର କରି ଆର୍ଜେଣ୍ଟିନାକୁ ବ୍ୟାକଫୁଟକୁ ଠେଲି ଦେଇଥିଲେ। ହାଫଟାଇମର କିଛି ମିନିଟ ପରେ ସାଲେ ଅଲଶେହରି ଗୋଲ ସ୍କୋର କରି ପ୍ରଥମ ସ୍ଥିତିକୁ ୧-୧ରେ ବରାବର କରିଥିଲେ।ଏହାପରେ ସାଲେମ ଅଲ ଡାୱସୱରି ଚମତ୍କାର ଗୋଲ କରି ସ୍ଥିତିକୁ ୨-୧ କରି ଦେଇଥିଲେ। ୧-୨ରେ ପଛରେ ଥିବା ଆର୍ଜେଣ୍ଟିନା ସ୍ଥିତି ବରାବର କରିବାକୁ ଚେଷ୍ଟା କରିଥିଲା। ହେଲେ ଦଳର ସବୁ ଉଦ୍ୟମକୁ ସାଉଦି ଖେଳାଳି ପଣ୍ଡ କରି ଦେଇଥିଲେ।ଶେଷରେ ସାଉଦି ୨-୧ରେ ମ୍ୟାଚ୍‌ ଜିତି ଗ୍ରୁପ୍‌ ସି’ର ପ୍ରଥମ ସ୍ଥାନରେ ପହଞ୍ଚି ଯାଇଛି

ମେସି ମ୍ୟାଚର ଦଶମ ମିନିଟରେ ପେନାଲ୍ଟି ମାରି ନିଜ ଦେଶ ପାଇଁ ସ୍କୋର କରିଥିଲେ । ଏହି ଗୋଲ ସହିତ ସେ କ୍ରିଷ୍ଟିଆନୋ ରୋନାଲ୍ଡୋଙ୍କ ସାତଟି ବିଶ୍ୱକପ ଗୋଲର ରେକର୍ଡର ସମକକ୍ଷ ହୋଇଛନ୍ତି । ଏହା ସହିତ ସେ ଆର୍ଜେଣ୍ଟିନାର ପ୍ରଥମ ଖେଳାଳି ଭାବରେ ଚାରୋଟି ବିଶ୍ୱକପରେ ସ୍କୋର କରିଛନ୍ତି।

ଦୋହା(ଏଜେନ୍ସି): ବିଶ୍ୱ ସର୍ବଶ୍ରେଷ୍ଠ ଫୁଟବଲ ମହାକୂମ୍ଭ ଫିଫା ବିଶ୍ୱକପ୍‍ ଆଜିଠାରୁ ଆରମ୍ଭ ହେବ। ମଧ୍ୟପ୍ରାଚ୍ୟର କ୍ଷୁଦ୍ର ଦେଶ କତାରେ ଆୟୋଜନ ହେବାକୁ ଥିବା ଫିଫା ବିଶ୍ୱକପ୍‍ର ଏହି ୨୨ତମ ସଂସ୍କରଣ ଏବେ ସାରା ବିଶ୍ୱର ଦୃଷ୍ଟି ଆକର୍ଷଣ କରିଛି। ବିଭିନ୍ନ ଦୃଷ୍ଟିକୋଣରୁ ଏହି ବିଶ୍ୱକପ୍‍ ବେଶ୍‍ ଗୁରୁତ୍ୱ ବହନ କରୁଛି। ପ୍ରଥମଥର ପାଇଁ ସମଗ୍ର ଆରବ ତଥା ମଧ୍ୟପ୍ରାଚ୍ୟରେ ବିଶ୍ୱକପ୍‍ ଖେଳଯାଉଥିବାରୁ ଏଠାରେ ପ୍ରବଳ ଉତ୍ସାହ ପରିଲକ୍ଷିତ ହୋଇଛି। ଆୟୋଜନ ଅଧିକାର ପାଇବା ପରଠାରୁ କତାର ବିଭିନ୍ନ ସମାଲୋଚନାର ସମ୍ମୁଖୀନ ହୋଇଆସିଛି। ତେବେ ଏ ସବୁକୁ ପଛରେ ପକାଇ କତାର ବିଶ୍ୱକପ୍‍ ଆୟୋଜନ ପାଇଁ ସବୁ ପ୍ରକାର ପ୍ରସ୍ତୁତି ଶେଷ କରିଛି। ବିଶ୍ୱକପ୍‍ର ମ୍ୟାଚ୍‍ ଆୟୋଜନ ପାଇଁ ୮ଟି ଅତ୍ୟାଧୁନିକ ଷ୍ଟାଡିୟମ ନିର୍ମାଣ କରାଯାଇଛି। ଗ୍ରୀଷ୍ମ କାରଣରୁ ପ୍ରଥମଥର ପାଇଁ ବିଶ୍ୱକପ୍‍ ଶୀତଋତୁରେ ଆୟୋଜନ ହେବାକୁ ଯାଉଛି।

ବିଭିନ୍ନ ପ୍ରକାର ଦୃଷ୍ଟିକୋଣର ଏହି ବିଶ୍ୱକପ୍‍ ନିଆରା ହେବାକୁ ଯାଉଛି। ଇତିମଧ୍ୟରେ ସବୁ ଦଳ କତାରରେ ପହଞ୍ଚି ସାରିଛନ୍ତି। ନଭେମ୍ବର ୨୦ରୁ ଆରମ୍ଭ ହୋଇ ବିଶ୍ୱକପ୍‍ ଡିସେମ୍ବର ୧୮ ତାରିଖରେ ଶେଷ ହେବ। ଦୀର୍ଘ ୨୯ ଦିନଧରି ଚାଲିବାକୁ ଥିବା ଏହି ବିଶ୍ୱକପ ଦ୍ୱିତୀୟଥର ପାଇଁ ଏସିଆରେ ଆୟୋଜନ ହେବ। ଆୟୋଜକ ଭାବେ କତାର ବିଶ୍ୱକପ୍‍ ଖେଳିବାକୁ ଯୋଗ୍ୟତା ହାସଲ କରିଛି। ଅଲ ଖୋର ସହରର ଅଲ ବାୟତ ଷ୍ଟାଡିୟମରେ ଉଦ୍‍ଘାଟନୀ ମ୍ୟାଚ୍‍ରେ ଆୟୋଜକ କତାର ଓ ଇକ୍ୱେଡର ମୁହାଁମୁହିଁ ହେବେ। ବିଶ୍ୱକପ୍‍ର ମାସ୍କଟ ରହିଛି ଲାଇବ। ଲାଇବର ଅର୍ଥ ହେଉଛି ଜଣେ କୁଶଳୀ ଖେଳାଳି। କତାରର ପରମ୍ପରା ଓ ବୈଭବକୁ ଦୃଷ୍ଟିରେ ରଖି ଲାଇବର ଡିଜାଇନ କରାଯାଇଛି। ବିଶ୍ୱକପର ସଫଳ ଆୟୋଜନ କରି କତାର ଇତିହାସ ସୃଷ୍ଟି କରିବା ଲକ୍ଷ୍ୟରେ ରହିଛି।

ଲାଟିନ ଆମେରିକା- ୟୁରୋପ ମଧ୍ୟରେ ଟକ୍କର

ବିଶ୍ୱକପ୍‍ରେ ୟୁରୋପୀୟ, ଲାଟିନ ଆମେରିକୀୟ ଦେଶଗୁଡିକର ପ୍ରଭାବ ଦେଖିବାକୁ ମିଳିଥାଏ। କିନ୍ତୁ ଏଥର କେତୋଟି ଏସୀୟ, ଆଫ୍ରିକୀୟ, କେନ୍ଦ୍ର ଆମେରିକୀୟ ଓ ଉତ୍ତର ଆମେରିକୀୟ ଦେଶ କଡ଼ା ଚ୍ୟାଲେଞ୍ଜ ଦେବା ପାଇଁ ପ୍ରସ୍ତୁତ ରହିଛନ୍ତି। ଆଜେଣ୍ଟିନାର ଲିଓନେଲ ମେସି ଓ ପର୍ତ୍ତୁଗାଲର ଖ୍ରୀଷ୍ଟିଆନୋ ରୋନାଲ୍ଡୋଙ୍କ ଭଳି ସୁପରଷ୍ଟାରଙ୍କ ପାଇଁ ଏହା ଅନ୍ତିମ ବିଶ୍‍କପ୍‍ ହେବାକୁ ଯାଉଛି। ଏହି ଦୁଇ ଅଭିଜ୍ଞ ତଥା ତାରକା ଫୁଟବଲର ବିଶ୍ୱକପ ଜିତିବାର ଶେଷ ସୁଯୋଗର ସଦବ୍ୟବହାର କରିବାକୁ ଆପ୍ରାଣେ ପ୍ରୟାସ କରିବେ। ତେଣୁ ଏଥର ବିଶ୍ୱକପ୍‍ ବେଶ୍‍ ରୋମାଞ୍ଚକ ଓ ମଜାଦାର ହେବ ବୋଲି ଆଶା କରାଯାଉଛି। ଡିଫେଣ୍ଡିଂ ଚାମ୍ପିଅନ ଫ୍ରାନ୍ସ ସମେତ ଇଟାଲୀ, ସ୍ପେନ, ଇଂଲଣ୍ଡ, ଜର୍ମାନୀ ଭଳି କେତେକ ୟୁରୋପୀୟ ଦେଶ ଟାଇଟଲ ଜିତିବାକୁ ଟାର୍ଗେଟ ରଖିଛନ୍ତି। ଟୁର୍ଣ୍ଣାମେଣ୍ଟରେ ୩୨ଟି ଦଳ ଅଂଶଗ୍ରହଣ କରିବେ। ଦଳଗୁଡିକ ୮ଟି ଗ୍ରୁପ୍‍ରେ ବିଭକ୍ତ କରାଯାଇଛି। ପ୍ରତ୍ୟେକ ଗ୍ରୁପ୍‍ରେ ୪ଟି ଲେଖାଏ ଦଳ ସ୍ଥାନ ପାଇଛନ୍ତି। କ୍ଷମତା ଓ ଦକ୍ଷତାକୁ ଦୃଷ୍ଟିରେ ରଖି ପ୍ରତ୍ୟେକ ଗ୍ରୁପ୍‍ରେ ସନ୍ତୁଳନ ରଖିବାକୁ ପ୍ରୟାସ କରାଯାଇଛି। ପ୍ରତ୍ୟେକ ଗ୍ରୁପ୍‍ର ଶ୍ରେଷ୍ଠ ଦୁଇଟି ଦଳ ନକ୍‍ ଆଉଟ ତଥା ରାଉଣ୍ଡ ଅଫ୍‍ ୧୬ ବା ପ୍ରି- କ୍ୱାର୍ଟର ଫାଇନାଲରେ ପ୍ରବେଶ କରିବେ। ଏହି ବିଶ୍ୱକପ୍‍ରେ କେତେଜଣ ତାରକା ଖେଳାଳି ବିଦାୟ ନେବେ ଓ ଆଉ କେତେ ନୂଆ ତାରକାଙ୍କ ଅବିର୍ଭାବ ହେବ। ୬୪ଟି ମ୍ୟାଚ୍‍ ଖେଳାଯିବା ପରେ ଡିସେମ୍ବର ୧୮ରେ ଚାମ୍ପିଅନ କିଏ ତାହା ସ୍ପଷ୍ଟ ହେବ।

ଅଂଶଗ୍ରହଣ କରିବେ ୫ ଏସୀୟ ଦେଶ

ଲାଟିନ ଆମେରିକାରୁ ବ୍ରାଜିଲ, ଆର୍ଜେଣ୍ଟିନା ଓ ୟୁରୋପରୁ ଫ୍ରାନ୍ସ ସମେତ ଜର୍ମାନୀ, ସ୍ପେନ୍‍, ବେଲଜିୟମ, ନେଦରଲାଣ୍ଡ୍‍ସ, ଇଂଲଣ୍ଡ, କ୍ରୋଏସିଆ ଓ ପର୍ତ୍ତୁଗାଲ ଭଳି ଦେଶଗୁଡିକ ନକ୍‍ଆଉଟରେ ପ୍ରବେଶ କରିବାର ଯଥେଷ୍ଟ ସମ୍ଭାବନା ରହିଛି। ତେବେ ଏମାନଙ୍କ ମଧ୍ୟରୁ ବ୍ରାଜିଲ, ଆର୍ଜେଣ୍ଟିନା, ଫ୍ରାନ୍ସ, ସ୍ପେନ୍‍, ଜର୍ମାନୀ ସେମିଫାଇନାଲକୁ ଉଠିବେ ଏବଂ ପରସ୍ପରକୁ କଡ଼ା ଟକ୍କର ଦେବେ ବୋଲି ଆଶା କରାଯାଉଛି। କିନ୍ତୁ ସ୍ପଷ୍ଟ ଭାବେ କିଛି କହିବା ଅସମ୍ଭବ। ଏପରି କେତେକ ଦଳ ରହିଛନ୍ତି ଯେଉଁମାନେ ବିପର୍ଯ୍ୟୟ ଘଟାଇବାର କ୍ଷମତା ରଖୁଛନ୍ତି। କେତେକ ତାରକା ଖେଳାଳି ଇଞ୍ଜୁରି କାରଣରଚୁ ବିଶ୍ୱକପ୍‍ର ବାଦ୍‍ ପଡିଛନ୍ତି। ତେଣୁ ବିଶ୍ୱକପ୍‍ ଫଳାଫଳ ଉପରେ ଏହାର ପ୍ରଭାବ ପଡିବ। ମୋଟାମୋଟି ଉପରେ ଆରମ୍ଭରୁ ଶେଷ ପର୍ଯ୍ୟନ୍ତ ବିଶ୍ୱକପ୍‍ ରୋମାଞ୍ଚକ ହେବ ବୋଲି ଆଶା କରାଯାଉଛି। ଏସିଆରୁ କତାର ସମେତ ଜାପାନ, ଇରାନ, ସାଉଦି ଆରବ ଓ ଦକ୍ଷିଣ କୋରିଆ ମଧ୍ୟ ଅଂଶଗ୍ରହଣ କରିବେ।

ଭୁବନେଶ୍ୱର: ଆଜିଠୁ କମ୍ପିବ କଳିଙ୍ଗ ଷ୍ଟାଡିୟମ । ହକି ପରେ ଏବେ ଫୁଟବଲ୍‍ ଫିଭର। ଆରମ୍ଭ ହେବ ମହିଳା ବିଶ୍ୱକପ ଫୁଟବଲ୍ ମହାକୁମ୍ଭ । ଆଜିଠାରୁ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ହେବ ଫିଫା ୧୭ ବର୍ଷରୁ କମ୍‍ ମହିଳା ବିଶ୍ୱକପ୍‍। ସଂଧ୍ୟା ୮ଟାରେ ମୁଖ୍ୟ ଅତିଥି ଭାବେ ଯୋଗଦେଇ ପ୍ରତିଯୋଗିତାକୁ ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। କଳିଙ୍ଗ ଷ୍ଟାଡିୟମରେ ପ୍ରଥମ ମ୍ୟାଚ୍ ଅପରାହ୍ନ ୪.୩୦ରେ ମରୋକ୍କୋ-ବ୍ରାଜିଲ୍ ମୁକାବିଲା ହେବ । ଏହା ପରେ ରାତି ୮ରେ ଶକ୍ତିଶାଳୀ ଆମେରିକାକୁ ଭେଟିବ ଭାରତ । ଆମେରିକାର ମହିଳା ଫୁଟବଲ ଟିମ୍ ରାକିଙ୍ଗରେ ୧ ନମ୍ବର ସ୍ଥାନରେ ଥିବାବେଳେ ଭାରତୀୟ ମହିଳା ଦଳ ବିଶ୍ବ ରାଙ୍କିଙ୍ଗରେ ୫୮ସ୍ଥାନରେ ରହିଛି । ଭାରତର ମହିଳା ଟିମ୍ ପ୍ରଥମ ଥର ପାଇଁ ଏହି ବଡ ଚାମ୍ପିୟାନସିପ୍ ରେ ଭାଗ ନେଉଛି ।

ରାଜଧାନୀ ଭୁବନେଶ୍ୱରର ଚାରିଆଡ଼େ ଦେଖିବାକୁ ମିଳୁଛି ଫୁଟବଲ ଫିଭର । ଷ୍ଟାଡିୟମରୁ ଆରମ୍ଭ କରି ରାସ୍ତାଘାଟ ସବୁଠି ଛାଇଗଲାଣି ପୋଷ୍ଟର ବ୍ୟାନର । ୧୨ ହଜାର କ୍ଷମତା ସମ୍ପନ୍ନ କଳିଙ୍ଗ ଷ୍ଟାଡିୟମକୁ ଅତି ସୁନ୍ଦର ଭାବେ ସମ୍ବଲପୁରୀ ପଶାପଲୀ ଡିଜାଇନ୍‌ରେ ସଜା ଯାଇଛି । ଲାଲ, ସବୁଜ, ଧଳା ପ୍ରିଣ୍ଟରେ ସିଟ୍‌ଗୁଡ଼ିକୁ ନୂଆ ରୂପ ଦିଆଯାଇଛି ।

ଭାରତ ପ୍ରଥମ ଥର ପାଇଁ ଏହି ବିଶ୍ୱକପରେ ଖେଳୁଛି । ଆୟୋଜକ ଦେଶ ହୋଇଥିବାରୁ ଭାରତକୁ କୈ।ଣସି ଯୋଗ୍ୟତା ପର୍ଯ୍ୟାୟ ପ୍ରତିଯୋଗିତା ଖେଳିବାକୁ ପଡ଼ିନାହିଁ। ଫିଫାର ଯେକୌଣସି ବିଶ୍ୱକପରେ ଭାରତ ପ୍ରଥମ ପଦାର୍ପଣ କରୁଛି । ଭାରତ ୧୭ ବର୍ଷରୁ କମ୍ ବିଶ୍ୱକପର ଅଷ୍ଟମ ସଂସ୍କରଣ ଆୟୋଜନ କରୁଛି । ମୋଟ ୧୬ଟି ଦେଶର ଟିମ୍ ଏଥିରେ ଭାଗ ନେଉଛନ୍ତି। ୪ଟି ଗ୍ରୁପରେ ୪ଟି ଲେଖାଏଁ ଦଳ ରହିଛନ୍ତି। ଏହିମାସ ୨୯ ତାରିଖରେ ନବୀ ମୁମ୍ବାଇରେ ଖେଳାଯିବ ଫାଇନାଲ ମ୍ୟାଚ।

ଫିଫା ବିଶ୍ବକପ୍ ପାଇଁ ଗତକାଲି କଳିଙ୍ଗ ଷ୍ଟାଡିୟମକୁ ଯାଇ ସୁରକ୍ଷା ବ୍ୟବସ୍ଥାର ସମୀକ୍ଷା କରିଛନ୍ତି ପୁଲିସ କମିସନର ସୌମେନ୍ଦ୍ର ପ୍ରିୟଦର୍ଶୀ ଓ ଭୁବନେଶ୍ୱର ଡିସିପି ପ୍ରତୀକ ସିଂ। ଫୁଟବଲ୍‍ ବିଶ୍ୱକପ ପାଇଁ ଚାରିସ୍ତରୀୟ ସୁରକ୍ଷା ବଳୟରେ ରହିବ କଳିଙ୍ଗ ଷ୍ଟାଡିୟମ। ଏଥିସହ ସୁରକ୍ଷା ଓ ଟ୍ରାଫିକ ଲାଗି ୧୫ ପ୍ଲାଟୁନ ପୁଲିସ ଫୋର୍ସ ମୁତୟନ କରାଯିବ ବୋଲି ସିପି ସୌମେନ୍ଦ୍ର ପ୍ରିୟଦର୍ଶୀ ସୂଚନା ଦେଇଛନ୍ତି। ସେହିପରି ଶାନ୍ତି ଶୃଙ୍ଖଳାର ମ୍ୟାଚ ଶେଷ କରିବା ଦିଗରେ ଗୁରୁତ୍ୱ ଦେଉଛି କମିସନରେଟ୍‍ ପୁଲିସ। ଷ୍ଟାଡ଼ିୟମ ଭିତରେ ସାଧା ପୋଷାକରେ ପୁଲିସ ମୁତୟନ ରହିବେ। ସେମାନେ ଭିଡ଼ ନିୟନ୍ତ୍ରଣ ଉପରେ ଗୁରୁତ୍ୱ ଦେବେ। ଏଥିସହ ପାର୍କିଂ ଆଉ ଟ୍ରାଫିକକୁ ଅଧିକ ପ୍ରାଧାନ୍ୟ ଦିଆଯାଇଛି। ଷ୍ଟାଡିୟମ ବାହାରେ, ଷ୍ଟାଡିୟମ ବାଉଣ୍ଡରୀ ୱାଲ ଭିତରେ ସୁରକ୍ଷା ବ୍ୟବସ୍ଥା କଡ଼ାକଡ଼ି ହୋଇଛି। ଏହାସହ ଖେଳାଳି, ଅମ୍ପେୟାର ଓ ଅନ୍ୟ ଅଫିସିଆଲମାନେ ରହୁଥିବା ହୋଟେଲ ଏବଂ ଅଭ୍ୟାସ କରୁଥିବା ସ୍ଥାନରେ ମଧ୍ୟ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।