ଟିମ୍ ଇଣ୍ଡିଆର ସିନିୟର ଓପନର୍ ରୋହିତ ଶର୍ମା (Rohit Sharma) ଐତିହାସିକ ଲର୍ଡ୍ସ (Lord's) ମଇଦାନରେ ଇଂଲଣ୍ଡ ବିପକ୍ଷରେ ଶତକ ହାସଲ କରି ସମାଲୋଚକଙ୍କୁ କଡ଼ା ଜବାବ ଦେଇଛନ୍ତି। ତାଙ୍କର ଦିନିକିଆ କ୍ୟାରିୟର ଏବଂ ଭବିଷ୍ୟତକୁ ନେଇ ଚାଲିଥିବା କଳ୍ପନାଜଳ୍ପନା ମଧ୍ୟରେ ପୂର୍ବତନ ଭାରତୀୟ କ୍ରିକେଟର ମହମ୍ମଦ କୈଫ୍ (Mohammad Kaif) ଏକ ବଡ଼ ବୟାନ ଦେଇଛନ୍ତି। କୈଫଙ୍କ ମତରେ ରୋହିତ ନିଜର ଏହି ଦମଦାର ପ୍ରଦର୍ଶନ ଜରିଆରେ ବିସିସିଆଇ ସିଲେକ୍ଟରଙ୍କୁ (BCCI Selectors) ଏକ ଶକ୍ତ ବାର୍ତ୍ତା ଦେଇଛନ୍ତି।

ସମାଲୋଚକଙ୍କୁ ବ୍ୟାଟ୍‌ରେ ଜବାବ ଦେଲେ ହିଟମ୍ୟାନ୍

ଗତ କିଛି ଦିନ ହେବ କ୍ରିକେଟ୍ ଜଗତରେ ଚର୍ଚ୍ଚା ହେଉଥିଲା ଯେ ଇଂଲଣ୍ଡ ବିପକ୍ଷ ତୃତୀୟ ଦିନିକିଆ ରୋହିତ ଶର୍ମାଙ୍କ ଶେଷ ମ୍ୟାଚ୍ ହୋଇପାରେ। ୨୦୨୭ ଦିନିକିଆ ବିଶ୍ୱକପ୍ (2027 ODI World Cup) କୁ ଦୃଷ୍ଟିରେ ରଖି ସିଲେକ୍ଟରମାନେ ନୂଆ ଖେଳାଳିଙ୍କୁ ସୁଯୋଗ ଦେବାକୁ ଚିନ୍ତା କରୁଥିବା ରିପୋର୍ଟ ପ୍ରକାଶ ପାଇଥିଲା। ପ୍ରଥମ ଦୁଇଟି ମ୍ୟାଚରେ କମ୍ ସ୍କୋର କରିବା ପରେ ରୋହିତଙ୍କ ଉପରେ ସମାଲୋଚନାର ଚାପ ବଢ଼ିଥିଲା। କିନ୍ତୁ ସେ ତୃତୀୟ ଦିନିକିଆରେ ମାତ୍ର ୧୩୮ ରନ୍ (138 Runs) ର ଏକ ଚମତ୍କାର ଇନିଂସ୍ ଖେଳି ସମସ୍ତ ଚର୍ଚ୍ଚାର ଅନ୍ତ ଘଟାଇଥିଲେ। ଏଥିସହ ସେ ଲର୍ଡ୍ସ ଗ୍ରାଉଣ୍ଡରେ ଦିନିକିଆ ଶତକ ହାସଲ କରିଥିବା ପ୍ରଥମ ଭାରତୀୟ ବ୍ୟାଟର ହେବାର ଗୌରବ ମଧ୍ୟ ଅର୍ଜନ କରିଛନ୍ତି।

ମହମ୍ମଦ କୈଫ୍ କଲେ ବଡ଼ ଖୁଲାସା

ରୋହିତଙ୍କ ଏହି ବିସ୍ଫୋରକ ଇନିଂସକୁ ନେଇ ପୂର୍ବତନ ତାରକା ଖେଳାଳି ମହମ୍ମଦ କୈଫ୍ କହିଛନ୍ତି ଯେ, ଏହି ଶତକ ସିଲେକ୍ଟରଙ୍କ ପାଇଁ ଏକ ସ୍ପଷ୍ଟ ଏବଂ ପ୍ରଭାବଶାଳୀ ବାର୍ତ୍ତା। କୈଫଙ୍କ ଅନୁଯାୟୀ ରୋହିତଙ୍କ ଏହି ଶତକର ସିଧାସଳଖ ଅର୍ଥ ହେଉଛି, "ଯଦି ମୁଁ ଭଲ ନ ଖେଳେ ତେବେ ମୋତେ ଡ୍ରପ୍ କର, କିନ୍ତୁ ଯେତେବେଳେ ମୋ ବ୍ୟାଟ୍ ଚାଲିବ, ତାହା ନିଜେ ହିଁ ସବୁ ପ୍ରଶ୍ନର ଉତ୍ତର ଦେବ।" ରୋହିତ ବାହାରର କଳ୍ପନାଜଳ୍ପନା ପ୍ରତି ଧ୍ୟାନ ନଦେଇ କେବଳ ନିଜ ଖେଳ ଉପରେ ଫୋକସ୍ କରୁଥିବାରୁ କୈଫ୍ ତାଙ୍କର ଭୂୟସୀ ପ୍ରଶଂସା କରିଛନ୍ତି।

ବାହାରର କଥା ଉପରେ ଧ୍ୟାନ ଦିଅନ୍ତି ନାହିଁ ରୋହିତ

ମ୍ୟାଚ୍ ପରେ ନିଜ ପ୍ରଦର୍ଶନ ଏବଂ ଅବସର କଳ୍ପନାଜଳ୍ପନା ଉପରେ ଖୋଦ୍ ରୋହିତ ଶର୍ମା ମଧ୍ୟ ପ୍ରତିକ୍ରିୟା ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ ତାଙ୍କର ମୂଳ ଲକ୍ଷ୍ୟ ହେଉଛି ପଡ଼ିଆକୁ ଓହ୍ଲାଇବା ଏବଂ ଦେଶ ପାଇଁ ନିରନ୍ତର ଭଲ ପ୍ରଦର୍ଶନ କରିବା। ତାଙ୍କ ମତରେ ଡେବ୍ୟୁ ଦିନଠାରୁ ବାହାରେ ଅନେକ କଥା ଏବଂ ସମାଲୋଚନା ଲାଗି ରହିଛି, ତେଣୁ ସେ ସେହିସବୁ କଥାକୁ ଗୁରୁତ୍ୱ ନଦେଇ କେବଳ ଟିମ୍‌ର ବିଜୟରେ ନିଜର ଯୋଗଦାନ ଉପରେ ଧ୍ୟାନ କେନ୍ଦ୍ରିତ କରୁଛନ୍ତି।

ଆଗାମୀ ଜୁଲାଇ ମାସରେ ଭାରତ ଏବଂ ଇଂଲଣ୍ଡ ମଧ୍ୟରେ ଖେଳାଯିବାକୁ ଥିବା ତିନି ଟିକିଆ ଦିନିକିଆ ସିରିଜ୍ ପାଇଁ ଏପର୍ଯ୍ୟନ୍ତ ଭାରତୀୟ ଦଳର ଘୋଷଣା କରାଯାଇ ନାହିଁ। ତେବେ ମିଳିଥିବା ସୂଚନା ଅନୁଯାୟୀ, ଆସନ୍ତା ୩ ରୁ ୪ ଦିନ ମଧ୍ୟରେ ବିସିସିଆଇ (BCCI) ଦିନିକିଆ ଦଳ ଘୋଷଣା କରିପାରେ। ଏହା ସହିତ ଆହତ ସମସ୍ୟା ଦେଇ ଗତି କରୁଥିବା ଷ୍ଟାର୍ ବ୍ୟାଟର ବିରାଟ କୋହଲିଙ୍କ ଫିଟନେସକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି।

ଦଳ ଚୟନକୁ ନେଇ କ'ଣ ରହିଛି ସୂଚନା?

ଗଣମାଧ୍ୟମ ରିପୋର୍ଟ ଅନୁଯାୟୀ, ଟିମ୍ ଇଣ୍ଡିଆର ଦିନିକିଆ ଦଳର ଚୟନ ଏବଂ ଆନୁଷ୍ଠାନିକ ଘୋଷଣା ଜୁନ୍ ୨୧ ସୁଦ୍ଧା କରାଯାଇପାରେ। ବିସିସିଆଇ ସଚିବ ଦେବଜିତ ସୈକିଆ ସୂଚନା ଦେଇଛନ୍ତି ଯେ, ଆସନ୍ତା ତିନିରୁ ଚାରି ଦିନ ମଧ୍ୟରେ ଚୟନ କମିଟିର ଏକ ଗୁରୁତ୍ୱପୂର୍ଣ୍ଣ ବୈଠକ ବସିବ। ଏହି ବୈଠକରେ ଇଂଲଣ୍ଡ ଗସ୍ତ ପାଇଁ ଭାରତୀୟ ଦିନିକିଆ ଦଳ ଉପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ। ସୂଚନାଯୋଗ୍ୟ ଯେ, ପୂର୍ବରୁ କେବଳ ଟି-୨୦ ସିରିଜ୍ ପାଇଁ ଦଳ ଘୋଷଣା କରାଯାଇଥିଲା, କିନ୍ତୁ ଦିନିକିଆ ଦଳ ଚୟନକୁ ସ୍ଥଗିତ ରଖାଯାଇଥିଲା।

ବିରାଟ କୋହଲିଙ୍କ ଫିଟନେସ୍ ଅପଡେଟ୍

ଭାରତୀୟ କ୍ରିକେଟ୍ ଦଳ ଏବଂ ପ୍ରଶଂସକଙ୍କ ପାଇଁ ସବୁଠାରୁ ଆଶ୍ୱସ୍ତିକର ଖବର ହେଉଛି ବିରାଟ କୋହଲିଙ୍କ ଫିଟନେସ୍। ଗତ ମାସରେ ଖେଳାଯାଇଥିବା ଆଇପିଏଲ୍ ୨୦୨୬ (IPL 2026) ଫାଇନାଲରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ପକ୍ଷରୁ ଖେଳୁଥିବା ସମୟରେ ସେ ହାମଷ୍ଟ୍ରିଙ୍ଗ୍ ଆହତ (Hamstring Injury) ର ଶିକାର ହୋଇଥିଲେ। ଏହି କାରଣରୁ ସେ ଆଫଗାନିସ୍ତାନ ବିପକ୍ଷ ସାମ୍ପ୍ରତିକ ଦିନିକିଆ ସିରିଜରୁ ବାଦ୍ ପଡିଥିଲେ। ତେବେ ରିପୋର୍ଟ ଅନୁଯାୟୀ, କୋହଲି ଦ୍ରୁତ ଗତିରେ ସୁସ୍ଥ ହେଉଛନ୍ତି। ସେ ନିଜର ରିହାବିଲିଟେସନ୍ (Rehabilitation) ପ୍ରକ୍ରିୟା ଆରମ୍ଭ କରିସାରିଛନ୍ତି ଏବଂ ଖୁବଶୀଘ୍ର ଫିଟନେସ୍ ଟେଷ୍ଟ ପାଇଁ ବେଙ୍ଗାଲୁରୁ ସ୍ଥିତ ବିସିସିଆଇ ସେଣ୍ଟର ଅଫ୍ ଏକ୍ସଲେନ୍ସ (BCCI Centre of Excellence) ରେ ରିପୋର୍ଟ କରିବେ। ଯଦି ସବୁକିଛି ଠିକ୍ ରହେ, ତେବେ ଇଂଲଣ୍ଡ ବିପକ୍ଷ ସିରିଜ୍ ଜରିଆରେ ସେ ଦଳକୁ ପ୍ରତ୍ୟାବର୍ତ୍ତନ କରିବେ।

କେବେ ଆରମ୍ଭ ହେବ ସିରିଜ୍?

ଭାରତ ଏବଂ ଇଂଲଣ୍ଡ ମଧ୍ୟରେ ଏହି ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଆସନ୍ତା ଜୁଲାଇ ୧୪ ରୁ ୧୯ ତାରିଖ ମଧ୍ୟରେ ଖେଳାଯିବ। ଏହି ମ୍ୟାଚଗୁଡ଼ିକ ଇଂଲଣ୍ଡର ବର୍ମିଂହାମ୍, କାର୍ଡିଫ୍ ଏବଂ ଲର୍ଡ୍ସ ଷ୍ଟାଡିୟମରେ ଅନୁଷ୍ଠିତ ହେବ। ଆଗାମୀ ସିରିଜ୍ ପାଇଁ ଚୟନକର୍ତ୍ତାମାନେ ଅଭିଜ୍ଞ ଖେଳାଳି ଏବଂ ଯୁବ ପ୍ରତିଭାମାନଙ୍କ ମଧ୍ୟରେ କିଭଳି ସନ୍ତୁଳନ ରକ୍ଷା କରୁଛନ୍ତି, ତାହା ଦେଖିବାକୁ ବାକି ରହିଲା।

ମୁମ୍ଵାଇ: ଆଜି T-20 ବିଶ୍ୱକପର ଦ୍ୱିତୀୟ ସେମି ପାଇନାଲ ମ୍ୟାଚ୍ । ଭାରତ-ଇଂଲଣ୍ଡ ମଧ୍ୟରେ ହେବ ମହା ମୁକାବିଲା । ମୁମ୍ଵାଇର ୱାଙ୍ଖଡ଼େ ଷ୍ଟାଡିୟମରେ ଫାଇନାଲ ଟିକେଟ ପାଇଁ ମୁହାଁମୁହିଁ ହେବେ ଦୁଇ ପୂର୍ବତନ ଚାମ୍ପିୟନ ଭାରତ ଓ ଇଂଲଣ୍ଡ। ଉଭୟ ଦଳରେ ଅଭିଜ୍ଞ ଖେଳାଳି ଥିବାରୁ ହୋଇପାରେ କଡା ଟକ୍କର । T-20 ବିଶ୍ଵକପ୍ ଇତିହାସରେ ଷଷ୍ଠ ଥର ସେମିଫାଇନାଲରେ ପ୍ରବେଶ କରିଛି ଟିମ୍ ଇଣ୍ଡିଆ । ତେବେ ଆଜିର ମ୍ୟାଚର ଓପନର୍ ଯୋଡ଼ି କିଏ ହେବ, ତାକୁ ନେଇ ଦ୍ଵନ୍ଦ୍ଵ ଲାଗି ରହିଛି। ସଂଜୁ ସାମସନଙ୍କ ସହିତ ଅଭିଷେକ ଶର୍ମା ଓପନ କରିବା ନେଇ ସନ୍ଦେହ ରହିଚି। ଏହି ମ୍ୟାଚରେ ବ୍ଯାଟିଂ ଅର୍ଡର ପରିବର୍ତ୍ତନ ନେଇ ଆକଳନ କରାଯାଉଛି। ଅନ୍ଯ ପକ୍ଷରେ ଇଂଲଣ୍ଡ ଦଳ ବେଶ ଭଲ ଫର୍ମରେ ଥିବାରୁ ମୁକାବିଲା ଜୋରଦାର ହେବ। ଏହି ଦୁଇ ଟିମ୍ ମଧ୍ୟରୁ ଯିଏ ଆଜି ଜିତିବ, ସେ ଟାଇଟଲ ପାଇଁ ନ୍ଯୁଜିଲାଣ୍ଡ ସହିତ ଖେଳିବ। ୮ ତାରିଖରେ ଅହମଦାବାଦ ନରେନ୍ଦ୍ର ମୋଦି ଷ୍ଟାଡିୟମରେ ଫାଇନାଲ ମ୍ୟାଚ୍ ଖେଳାଯିବ। 

ସୂର୍ଯ୍ୟଙ୍କ ବ୍ୟାଟିଂ ନା ଆଦିଲ ରସିଦ୍‌ଙ୍କ ଗୁଗଲି, ଆଜି କାହାର ରହିବ ପଲା ଭାରି? ଲଗାତାର ତୃତୀୟ ଥର ପାଇଁ ବିଶ୍ୱକପ୍‌ ସେମିଫାଇନାଲରେ ଭାରତ ଓ ଇଂଲଣ୍ଡ ମୁହାଁମୁହିଁ ହେଉଛନ୍ତି। ପୂର୍ବରୁ ୨୦୨୨ ଓ ୨୦୨୪ରେ ଦୁଇ ଦଳ ୧-୧ ଜିତି ସମାନ ସ୍ଥିତିରେ ଅଛନ୍ତି। ଆଜି ଯିଏ ଜିତିବ, ସିଏ ସିଧା ଫାଇନାଲ୍‌ ଟିକେଟ୍‌ କାଟିବ। ଭାରତ ପାଇଁ ଅଧିନାୟକ ସୂର୍ଯ୍ୟକୁମାର ଯାଦବ ଜବରଦସ୍ତ ଫର୍ମରେ ଅଛନ୍ତି, ସେ ଚଳିତ ବିଶ୍ୱକପ୍‌ରେ ୨୩୧ ରନ୍‌ ସଂଗ୍ରହ କରିଛନ୍ତି। ବୋଲିଂରେ ବରୁଣ ଚକ୍ରବର୍ତୀଙ୍କ ମାୟାଜାଲ ଇଂଲଣ୍ଡ ପାଇଁ ବିପଦ ସାଜିପାରେ। ଅନ୍ୟପଟେ ଇଂଲଣ୍ଡର ହ୍ୟାରି ବ୍ରୁକ୍‌ ଏବଂ ସ୍ପିନର ଆଦିଲ ରସିଦ୍‌ ମଧ୍ୟ ଭାରତ ପାଇଁ ବଡ଼ ଚ୍ୟାଲେଞ୍ଜ ହେବେ।

ୱାଙ୍ଖଡେର ପିଚ୍‌ ସବୁବେଳେ ବ୍ୟାଟରଙ୍କୁ ସହାୟକ ହୋଇଥାଏ। ଫଳରେ ଏଠାରେ ହାଇ-ସ୍କୋରିଂ ମ୍ୟାଚ୍‌ ଦେଖିବାକୁ ମିଳେ। ଯଦିଓ ଟସ୍‌ ଜିତିବା ଦଳ ପ୍ରଥମେ ବୋଲିଂ କରିବାକୁ ପସନ୍ଦ କରିବ, କିନ୍ତୁ ଏହି ମୈଦାନରେ ପ୍ରଥମେ ବ୍ୟାଟିଂ ଏବଂ ଚେଜ୍‌ କରିବା ଦଳର ଜିତିବା ହାର ୫୦-୫୦ ରହିଛି। ଭାରତ ଏଠାରେ ୭ଟି ମ୍ୟାଚ୍‌ରୁ ୫ଟି ଜିତି ବେଶ୍‌ ଆତ୍ମବିଶ୍ୱାସରେ ଅଛି। ମୁମ୍ବାଇରେ ବର୍ଷାର ସମ୍ଭାବନା ନାହିଁ, ତଥାପି ଆଇସିସି ଏକ ‘ରିଜର୍ଭ ଡେ’ ରଖିଛି। କିନ୍ତୁ ଯଦି କୌଣସି କାରଣରୁ ମ୍ୟାଚ୍‌ ଆଦୌ ହୋଇନପାରେ, ତେବେ ଭାରତ ପାଇଁ ଖରାପ ଖବର ହେବ। ନିୟମ ଅନୁସାରେ, ସୁପର-୮ରେ ନିଜ ଗ୍ରୁପ୍‌ର ଶୀର୍ଷରେ ଥିବାରୁ ଇଂଲଣ୍ଡ ସିଧା ଫାଇନାଲ୍‌ ପହଂଚିଯିବ ଏବଂ ଭାରତ ବିଶ୍ୱକପ୍‌ରୁ ବିଦାୟ ନେବ। 

କଟକ: ବାରବାଟୀରେ ଭାରତର ଦମଦାର ବିଜୟ । ଇଂଲଣ୍ଡକୁ ୪ ୱିକେଟରେ ହରାଇଲା ଟିମ୍ ଇଣ୍ଡିଆ । ଏହାସହ ୩ ମ୍ୟାଚ ବିଶିଷ୍ଟ ସିରିଜକୁ ୨-୦ରେ ଜିତିନେଇଛି ରୋହିତ ବାହିନୀ । ପ୍ରଥମେ ବ୍ୟାଟିଂ କରି ଇଂଲଣ୍ଡ ଦେଇଥିବା ୩୦୫ ରନର ବିଜୟ ଲକ୍ଷ୍ୟକୁ ୬ ୱିକେଟ ହରାଇ ମ୍ୟାଚ ଜିତିବା ସହ ସିରିଜକୁ ମଧ୍ୟ ହାତେଇଛି ଭାରତ । କ୍ୟାପଟେନ ରୋହିତ ଶର୍ମା ୯୦ ବଲ୍ ଖେଳି ବିସ୍ଫୋରକ ୧୧୯ ରନ କରି ଭାରତକୁ ବିଜୟ ଦ୍ୱାର ଦେଶରେ ପହଞ୍ଚାଇବାରେ ସଫଳ ଭୂମିକା ଗ୍ରହଣ କରିଥିଲେ ।

କଟକର ବାରବାଟୀ ଷ୍ଟାଡିୟମରେ ଭାରତ-ଇଂଲଣ୍ଡ ମଧ୍ୟରେ ଖେଳାଯାଉଥିବା ଦ୍ବିତୀୟ ଦିନିକିଆରେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଇଂଲଣ୍ଡ। ଆରମ୍ଭରୁ ଦମଦାର ପ୍ରଦର୍ଶନ କରିଥିଲା ଇଂଲଣ୍ଡ । ଇଂଲଣ୍ଡ ପାଇଁ ଫିଲିପ୍ ସଲ୍ଟ ଓ ବେନ୍ ଡକେଟ୍ ପାଳି ଅରମ୍ଭ କରିଥିଲେ। ଆରମ୍ଭରୁ ଇଂଲଣ୍ଡ ଦଳ ଆକ୍ରମଣାତ୍ମକ ବ୍ୟାଟିଂ କରି ଭାରତୀୟ ବୋଲରଙ୍କୁ ଜୋରଦାର ପ୍ରହାର କରିଥିଲେ । ଇଂଲଣ୍ଡ ପକ୍ଷରୁ ବେନ ଡକେଟ୍‌ ୬୫ ରନ କରିଥିବାବେଳେ ଜୋ ରୁଟ୍‌ ୬୯ ରନ କରିଥିଲେ । ପ୍ରଥମ ଇଂନିଙ୍ଗସରେ ଇଂଲଣ୍ଡ ୪୯.୫ ଓଭରରେ ସମସ୍ତ ଵିକେଟ ହରାଇ ୩୦୪ ରନ କରିବାକୁ ସକ୍ଷମ ହୋଇଥିଲା । ଭାରତ ପକ୍ଷରୁ ବୋଲିଂ କରି ରବୀନ୍ଦ୍ର ଜାଡେଜା ୩ଟି ଵିକେଟ ନେଇଥିବାବେଳେ ମହମ୍ମଦ ସାମି, ହର୍ଷିତ ରାଣା, ହାର୍ଦ୍ଦିକ ପାଣ୍ଡ୍ୟା, ବରୁଣ ଚକ୍ରବର୍ତ୍ତୀ ଗୋଟିଏ ଲେଖାଏଁ ଵିକେଟ ନେଇଥିଲେ ।

ଜବାବରେ ଭାରତ ମଧ୍ୟ ଆରମ୍ଭରୁ ଆକ୍ରମଣାତ୍ମକ ବ୍ୟାଟିଂ ଜାରି ରଖିଥିଲା । ଭାରତର ଇନିଂସ ଆରମ୍ଭ କରିଥିଲେ ଅଧିନାୟକ ରୋହିତ ଶର୍ମା ଓ ଶୁଭମନ ଗିଲ୍। ଉଭୟ ପ୍ରାରମ୍ଭିକ ବ୍ୟାଟର ପ୍ରଥମ ୱିକେଟ୍ ପାଇଁ ୧୩୬ ରନ୍ ସଂଗ୍ରହ କରିଥିଲେ। କ୍ୟାପଟେନ ରୋହିତ ଶର୍ମା ୯୦ ବଲ୍ ଖେଳି ବିସ୍ଫୋରକ ୧୧୯ ରନ କରିଥିବାବେଳେ ଶୁଭମନ ଗୀଲ ୬୦ ରନ କରିଥିଲେ । ସେହିପରି ଶ୍ରେୟାସ ଆୟର ୪୪ ରନ କରିଥିବାବେଳେ ଅକ୍ଷର ପଟେଲ ୪୧ ରନ କରି ଭାରତକୁ ବିଜୟୀ କରିଥିଲେ ।

କଟକ: ବାରବାଟୀରେ ମ୍ୟାଚ୍ ଚାଲିଥିବାବେଳେ ବନ୍ଦ ହେଲା ଫ୍ଲଡ ଲାଇଟ୍ । ଯେଉଁଥିପାଇଁ ଅଟକିଲା ଭାରତ-ଇଂଲଣ୍ଡ ମ୍ୟାଚ୍ । ଆଜି କଟକ ବାରବାଟୀରେ ଭାରତ-ଇଂଲଣ୍ଡ ଦ୍ବିତୀୟ ଦିନିକିଆ ମ୍ୟାଚ୍ ଚାଲିଥିବା ବେଳେ ବାରମ୍ବାର ବନ୍ଦ ହୋଇଯାଇଥିଲା ଫ୍ଲଡ ଲାଇଟ୍ । ଫଳରେ ବହୁ ସମୟ ଧରି ଅଟକି ରହିଛି ମ୍ୟାଚ୍ । ଭାରତରର ବ୍ୟାଟିଂ ଜାରି ରହିଥିବା ବେଳେ ଏପରି ଅଘଟଣ ଯୋଗୁଁ ଦର୍ଶକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।

ଭାରତ ସାମ୍ନାରେ ୩୦୫ ରନର ଟାର୍ଗେଟ୍ ରଖିଛି ଇଂଲଣ୍ଡ । ନିର୍ଦ୍ଧାରିତ ୫୦ ଓଭରର ଗୋଟିଏ ବଲ ବାକିଥାଇ ସମସ୍ତ ୱିକେଟ୍ ହରାଇ ୩୦୪ ରନ୍ କରିଛି ଇଂଲଣ୍ଡ। ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଇଂଲଣ୍ଡ। ଆରମ୍ଭରୁ ଆକ୍ରମଣାତ୍ମକ ବ୍ୟାଟିଂ ରଖିଥିଲେ ଭାରତୀୟ ଖେଳାଳି ।

କଟକ: ଆଜି ସୁପର୍ ସଣ୍ଡେରେ ଭାରତ-ଇଂଲଣ୍ଡ ମଧ୍ୟରେ ଚାଲିଛି ମହା ମୁକାବିଲା । ତିନି ମ୍ୟାଚ୍ ବିଶିଷ୍ଟ ଦିନିକିଆ ଶୃଙ୍ଖଳାର ୨ୟ ମୁକାବିଲା କଟକ ବାରବାଟୀ ଷ୍ଟାଡ଼ିୟମରେ ଅନୁଷ୍ଠିତ ହେଉଛି । ଟସ୍ ଜିତି ପ୍ରଥମେ ବ୍ୟାଟିଂ କରି ଭ୍ରମଣକାରୀ ଦଳ ଇଂଲଣ୍ଡ ଟିମ୍ ଇଣ୍ଡିଆକୁ ୩୦୫ ରନର ଟାର୍ଗେଟ ଦେଇଛି । ପ୍ରଥମ ଇଂନିଙ୍ଗସରେ ଇଂଲଣ୍ଡ ୪୯.୫ ଓଭରରେ ସମସ୍ତ ଵିକେଟ ହରାଇ ୩୦୪ ରନ କରିବାକୁ ସକ୍ଷମ ହୋଇଛି । ଫଳରେ ଭାରତ ଜିତିବା ପାଇଁ ୫୦ ଓଭରରେ ୩୦୫ ରନ କରିବାକୁ ପଡିବ । ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଇଂଲଣ୍ଡ ।

ଇଂଲଣ୍ଡ ପାଇଁ ଫିଲିପ୍ ସଲ୍ଟ ଓ ବେନ୍ ଡକେଟ୍ ପାଳି ଅରମ୍ଭ କରିଥିଲେ। ଆରମ୍ଭରୁ ଇଂଲଣ୍ଡ ଦଳ ଆକ୍ରମଣାତ୍ମକ ବ୍ୟାଟିଂ କରି ଭାରତୀୟ ବୋଲରଙ୍କୁ ଜୋରଦାର ପ୍ରହାର କରିଥିଲେ । ଇଂଲଣ୍ଡ ପକ୍ଷରୁ ବେନ ଡକେଟ୍‌ ୬୫ ରନ କରିଥିବାବେଳେ ଜୋ ରୁଟ୍‌ ୬୯ ରନ କରିଥିଲେ । ଭାରତ ପକ୍ଷରୁ ବୋଲିଂ କରି ରବୀନ୍ଦ୍ର ଜାଡେଜା ୩ଟି ଵିକେଟ ନେଇଥିବାବେଳେ ମହମ୍ମଦ ସାମି, ହର୍ଷିତ ରାଣା, ହାର୍ଦ୍ଦିକ ପାଣ୍ଡ୍ୟା, ବରୁଣ ଚକ୍ରବର୍ତ୍ତୀ ଗୋଟିଏ ଲେଖାଏଁ ଵିକେଟ ନେଇଥିଲେ ।

ଭୁବନେଶ୍ୱର: ଭାରତ ଓ ଇଂଲଣ୍ଡ ମଧ୍ୟରେ ଆସନ୍ତା ୯ ତାରିଖରୁ ବାରବାଟୀରେ ଖେଳାଯିବାକୁ ଥିବା ଦ୍ୱିତୀୟ ଦିନିକିଆ ମ୍ୟାଚ୍‌‌ ଲାଗି ଆଜି ଅପରାହ୍ଣ ୪ଟାରୁ ଅନ୍‌‌ଲାଇନ୍‌‌ ଟିକଟ ବୁକିଂ ହେବ। ଏହି ଟିକଟ ଜୋମାଟୋର district App କିମ୍ବା district.in ୱେବ୍‌‌ସାଇଟ୍‌‌ରେ ଲଗ୍‌‌ଇନ୍‌‌ କରି ଆଶାୟୀ କ୍ରିକେଟପ୍ରେମୀମାବେ ଟିକଟ ବୁକିଂ କରିପାରିବେ। ମୋଟ୍‌‌ ୪ହଜାର ଟିକଟ୍‌‌ ଅନଲାଇନ୍‌‌ରେ ବିକ୍ରି ନିମନ୍ତେ ଓସିଏ ସ୍ଥିର ରହିଛି।

ଟିକଟ ବୁକିଂ କରିବା ପାଇଁ ପ୍ରଥମେ district App କିମ୍ବା district.in ୱେବ୍‌‌ସାଇଟ୍‌‌ ଓପନ କରିବେ। ଦ୍ୱିତୀୟରେ ମ୍ୟାଚ୍‌‌ ବ୍ୟାନରକୁ ଯିବେ ଓ ତୃତୀୟରେ ବ୍ୟାନର ଉପରେ କ୍ଲିକ୍‌‌ କରିବେ। ଏହାକୁ କ୍ଲିକ୍‌‌ କରିବା ପରେ ‘ବୁକ୍‌‌ ଟିକଟସ’ ଦେଖାଯିବ। ଚତୁର୍ଥରେ ଏହା ଉପରେ କ୍ଲିକ୍‌‌ କରିବା ପରେ ମ୍ୟାଚ୍‌‌ ଓ ଷ୍ଟାଡିୟମ୍‌‌ ସମ୍ପର୍କରେ ବିସ୍ତୃତଭାବେ ଦେଖିବାକୁ ମିଳିବ। ପଞ୍ଚମରେ ‘ବାଇ ନାଓ’ ଉପରେ କ୍ଲିକ୍‌‌ କରିବେ। ଏଥିରେ ବିକ୍ରି ହେବାକୁ ଥିବା ଟିକଟ, ଷ୍ଟାଣ୍ଡ ଆଦି ସମ୍ପର୍କରେ ସୂଚନା ମିଳିବ। ଏହା ମଧ୍ୟରୁ ନିଜ ପସନ୍ଦ ଅନୁଯାୟୀ ଖାଲିଥିବା ଟିକଟ ବାଛିବେ ଓ ‘କଣ୍ଟିନିଉ’ ବଟନ ଉପରେ କ୍ଲିକ୍‌‌ କରିବେ। ଏହା ପୂରଣ ହେବା ପରେ ସ୍କ୍ରିନ୍‌‌ରେ ଥିବା ଦୁଇଟି ବକ୍ସ ଉପରୁ ଗୋଟିକୁ ବାଛିବେ। ଏଠାରେ ମନେ ରଖିବା ଉଚିତ ମୋବାଇଲ ନମ୍ବର କିମ୍ବା ଇମେଲ ପଞ୍ଜିକରଣ କରିବାକୁ ପଡ଼ିବ। ଏହା ସମ୍ପୂର୍ଣ୍ଣ ହେବା ପରେ ୟୁପିଆଇ, ନେଟ୍‌‌ ବ୍ୟାଙ୍କିଙ୍ଗ୍‌‌ କିମ୍ବା ଇଣ୍ଟରନ୍ୟାସନାଲ ଟ୍ରାଞ୍ଜାକସନ ସୁବିଧା ଥିବା ଡେବିଟ୍‌‌ କାର୍ଡରେ ୧୦ ମିନିଟ୍‌‌ ମଧ୍ୟରେ ପେମେଣ୍ଟ କରିବାକୁ ହେବ।

ସବୁ ଠିକ୍‌‌ଠାକ ଥିଲେ ଟିକଟ କିଣିଥିବା ବ୍ୟକ୍ତିବିଶେଷଙ୍କୁ ଟିକଟ ବୁକିଂ କରିଥିବା ଆପ୍‌‌ରେ କନଫର୍ମେସନ ଆସିବ। ଇ-ମେଲରେ ‘କ୍ୟୁଆର୍‌‌’ କୋଡ ଆସିବ ଓ ଫେବୃଆରୀ ୭ ଓ ୯ରେ କେଉଁଠାରୁ ଟିକଟ ପାଇବେ (କଟକରେ କେମ୍ବ୍ରିଜ୍‌‌ ସ୍କୁଲ୍‌‌ ଓ ଭୁବନେଶ୍ୱରରେ କିଟ୍‌‌ କ୍ୟାମ୍ପସ) ସେ ସମ୍ପର୍କରେ ସୂଚନା ଦିଆଯିବ। ଏହା ଫଳରେ ଜଣେ ଅନ୍‌‌ଲାଇନ୍‌‌ରେ ଟିକଟ କିଣିବାକୁ ସମର୍ଥ ହେବେ ବୋଲି ଏହି ମ୍ୟାଚ୍‌‌ ଆୟୋଜନ କରୁଥିବା ଓଡ଼ିଶା କ୍ରିକେଟ ସଂଘ (ଓସିଏ) ସମ୍ପାଦକ ସଞ୍ଜୟ ବେହେରା ସୂଚନା ଦେଇଛନ୍ତି।

ଓସିଏରୁ ମିଳିଥିବା ସୂଚନା ଅନୁଯାୟୀ ଅନ୍‌‌ଲାଇନ୍‌‌ରେ ମୋଟ୍‌‌ ୪ହଜାର ଟିକଟ୍‌‌ ବିକ୍ରି ହେବ। ଏହା ମଧ୍ୟରୁ ଗ୍ୟାଲେରୀ ନଂ-୨ର ୧୦୭୦ଟି, ଗ୍ୟାଲେରୀ ନଂ-୪ର ୧୦୮୦ଟି, ଗ୍ୟାଲେରୀ ନଂ-୭ର ୧୫୦୦ଟି, ସ୍ପେଶିଆଲ ଏନକ୍ଲୋଜରର ୨୦୦ଟି, ଏସି ବକ୍ସର ୫୦ଟି ଏବଂ ନ୍ୟୁ ପ୍ୟାଭିଲିୟନର ୧୦୦ଟି ଟିକଟ ରହିଛି। ଗ୍ୟାଲେରୀ ନଂ-୨ ଓ ୪ର ମୂଲ୍ୟ ୯୦୦ ଟଙ୍କା, ଗ୍ୟାଲେରୀ-୭’ର ୭୦୦ ଟଙ୍କା, ସ୍ପେଶାଲ ଏନ୍‌‌କ୍ଲୋଜରର ୬, ୦୦୦ ଟଙ୍କା, ଏସି ଗ୍ୟାଲେରୀ ବକ୍ସ ୮, ୦୦୦ ଟଙ୍କା ଓ ନ୍ୟୁ ପାଭିଲିୟନର ଦାମ୍‌‌ ୧୦, ୦୦୦ ଟଙ୍କା ରହିଛି। ଜଣେ ବ୍ୟକ୍ତି ସର୍ବାଧିକ ୨ଟି ଟିକଟ ବୁକିଂ କରିପାରିବେ।

ସୂଚନାଯୋଗ୍ୟ ଭାରତ- ଇଂଲଣ୍ଡ ଦିନିକିଆ ସିରିଜ୍‌‌ର ଦ୍ୱିତୀୟ ମ୍ୟାଚ୍‌‌ କଟକ ବାରବାଟୀ ଷ୍ଟାଡିୟମ୍‌‌ରେ ଫେବୃଆରୀ ୯ ତାରିଖରେ ଖେଳାଯିବ। ଏହି ମ୍ୟାଚ୍‌‌ ଅପରାହ୍ଣ ୧ଟା ୩୦ ମିନିଟ୍‌‌ରୁ ଆରମ୍ଭ ହେବ।

ଗାଏନା: T-20 ବିଶ୍ବକପ ଫାଇନାଲରେ ଭାରତ । ଦ୍ଵିତୀୟ ସେମି ଫାଇନାଲରେ ଡିଫେଣ୍ଡିଂ ଚାମ୍ପିଅନ ଇଂଲଣ୍ଡକୁ ୬୮ ରନରେ ହରାଇ ଫାଇନାଲରେ ପ୍ରବେଶ କରିଛି ଟିମ୍ ଇଣ୍ଡିଆ। ଅକ୍ଷର ଓ କୁଲଦୀପଙ୍କ ଯାଦୁକରୀ ସ୍ପିନରେ ଧୂଳି ଚାଟିଲା ଇଂଲଣ୍ଡ । ୧୭୨ ରନର ବିଜୟ ଲକ୍ଷ୍ଯକୁ ପିଛା କରି ୧୦୩ ରନରେ ଅଲଆଉଟ୍ ହୋଇଗଲା ଇଂଲଣ୍ଡ । ଫଳରେ ୬୮ ରନର ବିରାଟ ବ୍ଯବଧାନରେ ଇଂଲଣ୍ଡକୁ ହରାଇ ଫାଇନାଲ ଟିକେଟ ହାସଲ କରିଛି ରୋହିତ ବାହିନୀ । ଟ୍ରଫି ପାଇଁ ଆସନ୍ତାକାଲି ଦକ୍ଷିଣ ଆଫ୍ରିକା-ଭାରତ ମଧ୍ୟରେ ହେବ ଫାଇନାଲ୍ ଟକ୍କର।

ଗାଏନାର ପ୍ରୋଭିଡେନ୍ସ ଷ୍ଟାଡିୟମରେ ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ଖେଳାଯାଇଥିବା ବର୍ଷା ବାଧାପ୍ରାପ୍ତ ଦ୍ବିତୀୟ ସେମିଫାଇନାଲ ମ୍ୟାଚରେ ଇଂଲଣ୍ଡ ଟସ୍ ଜିତିଥିଲା ଓ ପ୍ରଥମେ ବୋଲିଂ କରିବାକୁ ନିଷ୍ପତ୍ତିି ନେଇଥିଲା । ପ୍ରଥମେ ବ୍ଯାଟିଂ କରି ଭାରତ ନିର୍ଦ୍ଧାରିତ ଓଭରରେ ୭ ୱିକେଟ ହରାଇ ୧୭୧ ରନ କରିଥିଲା । କ୍ଯାପଟେନ ରୋହିତ ଶର୍ମା ୩୯ ବଲରେ ୫୭ ରନ୍ କରିଥିବାବେଳେ ଏବଂ ସୂର୍ଯ୍ୟକୁମାର ୟାଦବ ୩୬ ବଲରେ ୪୭, ରନ ହାସଲ କରିଥିଲେ ।

ହାର୍ଦ୍ଦିକ ପାଣ୍ଡ୍ୟା ୧୩ ବଲରେ ୨୩, ରବୀନ୍ଦ୍ର ଜାଡେଜା ୯ ବଲରେ ୧୭ ଓ ଅକ୍ଷର ପଟେଲ ୬ ବଲରେ ୧୦ ରନ କରି ଦଳୀୟ ସ୍କୋରକୁ ୧୭୧ରେ ପହଞ୍ଚାଇଥିଲେ । ୧୭୨ ରନର ବିଜୟ ଲକ୍ଷ୍ଯକୁ ନେଇ ପଡ଼ିଆକୁ ଓହ୍ଲାଇଥିବା ଇଂଲଣ୍ଡ ନିୟମିତ ଭାବେ ୱିକେଟ ହରାଇଥିଲା । ଭାରତୀୟ ସ୍ପିନର ଓ ଫିଲଡରଙ୍କ ରଣନୀତି ଆଗରେ ଇଂଲଣ୍ଡ ଦଳ ଫେଲ୍ ହୋଇଥିଲା । ହ୍ଯାରୀ ବୃକ୍ ସର୍ବାଧିକ ୨୫ ରନ କରିଥିବାବେଳେ ଅଧିନାୟକ ବଟଲର ୨୩ ରନ କରିବାକୁ ସକ୍ଷମ ହୋଇଥିଲେ ।

ଭାରତର ମୁକାବିଲା କରିନପାରି ଶେଷରେ ୧୬ ଓଭର ୪ଟି ବଲରେ ଇଂଲଣ୍ଡ ୧୦୩ ରନ କରି ଅଲଆଉଟ ହୋଇଯାଇଥିଲା । ଅକ୍ଷର ପଟେଲ ଓ କୁଲଦୀପ ୩ଟି ଲେଖାଏଁ ୱିକେଟ ନେଇଥିବାବେଳେ ବୁମରା ୨ଟି ୱିକେଟ ନେଇଥିଲେ ।

କଟକ: ଓଡ଼ିଶା କ୍ରିକେଟପ୍ରେମୀଙ୍କ ପାଇଁ ଖୁସି ଖବର। ବାରବାଟୀରେ ଖେଳାଯିବ ଭାରତ -ଇଂଲଣ୍ଡ ଦିନିକିଆ ମ୍ୟାଚ୍। ୨୦୨୫ ଫେବ୍ରୁଆରି ୯ ତାରିଖ ( ରବିବାର) ଖେଳାଯିବ ଏହି ମ୍ୟାଚ୍। ଭାରତ ଗସ୍ତରେ ଆସି ୩ଟି ଦିନିକିଆ ମ୍ୟାଚ୍ ଖେଳିବ ଇଂଲଣ୍ଡ। ପ୍ରଥମ ମ୍ୟାଚ୍ ନାଗପୁର, ୨ୟ ମ୍ୟାଚ୍ କଟକ ଓ ୩ୟ ମ୍ୟାଚଟି ଅହମ୍ମଦାବାଦରେ ଖେଳାଯିବ।  ଏ ନେଇ ଓସିଏ ସମ୍ପାଦକ ସଞ୍ଜୟ ବେହେରାଙ୍କ ସୂଚନା ଦେଇଛନ୍ତି।ପ୍ରାୟ ୫ବର୍ଷ ପରେ କଟକକୁ ଅନ୍ତର୍ଜାତୀୟ କ୍ରିକେଟ ଦିନିକିଆ ମ୍ୟାଚ ଫେରିଛି। ଶେଷ ଥର ପାଇଁ ବାରବାଟୀରେ ୨୦୧୯ ମସିହା ଡିସେମ୍ବରରେ ଖେଳାଯାଇଥିଲା ଦିନିକିଆ ମ୍ୟାଚ୍।

ରାଜକୋଟ: ରାଜକୋଟରେ ରୋହିତ ବାହିନୀର ବଡ ବିଜୟ । ଇଂଲଣ୍ଡକୁ ୪୩୪ ରନରେ ପରାସ୍ତ କଲା ଟିମ ଇଣ୍ଡିଆ । ତୃତୀୟ ଟେଷ୍ଟରେ ଭାରତ ଦେଇଥିବା ୫୫୭ ରନର ଟାର୍ଗେଟକୁ ପିଛା କରି ଦ୍ୱିତୀୟ ଇନିଂସ ଆରମ୍ଭ କରିଥିବା ଇଂଲଣ୍ଡ ୧୨୨ ରନରେ ଅଲ୍ ଆଉଟ୍ ହୋଇଯାଇଛି। ଫଳରେ ତୃତୀୟ ଟେଷ୍ଟରେ ୪୩୪ ରନର ବିଶାଳ ବ୍ୟବଧାନରେ ବିଜୟୀ ହୋଇଛି ଭାରତ । ତୃତୀୟ ଟେଷ୍ଟ ଜିତି ୫ ଟିକିଆ ସିରିଜରେ ଭାରତ ୨-୧ ରେ ଆଗୁଆ ରହିଛି ।

ତୃତୀୟ ଟେଷ୍ଟର ଦ୍ଵିତୀୟ ଇଂନିଙ୍ଗସରେ ଭାରତୀୟ ବୋଲରଙ୍କ ଆଗରେ ଇଂଲିଶ ଟିମର କୌଣସି ବ୍ୟାଟର୍ ତିଷ୍ଟି ପାରି ନ ଥିଲେ । ପ୍ରଥମ ଇନିଂସରେ ଭାରତ ୪୪୫ ରନ କରିଥିବାବେଳେ ଇଂଲଣ୍ଡ ୩୧୯ ରନ କରିଥିଲା । ତେବେ ଭାରତ ନିଜର ୨ୟ ଇନିଂସରେ ୪୩୦ ରନ କରି ପାଳି ସମାପ୍ତି ଘୋଷଣା କରିଥିଲା । ଫଳରେ ଇଂଲଣ୍ଡ ଆଗରେ ୫୫୭ ରନର ବିଶାଳ ଲକ୍ଷ୍ୟ ରହିଥିଲା । ଏହି ବିଶାଳ ଲକ୍ଷ୍ୟର ପିଛା କରିବାକୁ ଯାଇ ଇଂଲଣ୍ଡ ଗୁରୁତର ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା ଓ ମାତ୍ର ୧୨୨ ରନରେ ଅଲଆଉଟ ହୋଇଯାଇଥିଲା । ଭାରତ ପକ୍ଷରୁ ଜାଡେଜା ୫ ଓ୍ବିକେଟ ଅକ୍ତିଆର କରିଛନ୍ତି । କୁଲଦୀପ ଯାଦବ ୨ଟି ଓ୍ବିକେଟ ଅକ୍ତିଆର କରିଥିବାବେଳେ ଅଶ୍ବିନୀ ଏବଂ ବୁମରା ଗୋଟିଏ ଲେଖାଏଁ ଓ୍ବିକେଟ ହାତେଇଛନ୍ତି । ଇଂଲଣ୍ଡ ପକ୍ଷରୁ ମାର୍କ ହୁଡ୍ ସର୍ବାଧକ ୩୩ ରନ ସଂଗ୍ରହ କରିଛନ୍ତି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି ଇଂଲଣ୍ଡର ୬ଜଣ ଖେଳାଳି ଦୁଇ ଅଙ୍କ ଛୁଇଁପାରିନାହାନ୍ତି ।

ବିଶାଖାପାଟନମ୍: ଇଂଲଣ୍ଡ ବିପକ୍ଷ ଦ୍ଵିତୀୟ ଟେଷ୍ଟରେ ଭାରତର ଦମଦାର୍ ବିଜୟ । ୧୦୬ ରନ୍‌ରେ ଇଂଲଣ୍ଡକୁ ପରାସ୍ତ କଲା ଟିମ୍ ଇଣ୍ଡିଆ । ୩୯୯ର ବିଜୟ ଲକ୍ଷ୍ୟକୁ ପିଛା କରି ୨୯୨ରେ ଅଲ୍‌ ଆଉଟ୍ ହୋଇଗଲା ଇଂଲଣ୍ଡ। ଦ୍ଵିତୀୟ ଟେଷ୍ଟ ଜିତି ୫ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍‌ରେ ସ୍ଥିତି ବରାବର କରିଛି ଭାରତ । ଭାରତ ପକ୍ଷରୁ ବୁମରାହ ଓ ଅଶ୍ୱିନୀଙ୍କ ଦମଦାର ବୋଲିଂ ଯୋଗୁଁ ଭାରତ ବିଜୟୀ ହୋଇଛି ।

୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ୍‌ର ପ୍ରଥମ ମ୍ୟାଚ୍‌ରେ ହାରିଥିଲା ଭାରତୀୟ ଟିମ୍‌ । ଏହାପରେ ଫେବୃଆରୀ ୨ ତାରିଖରେ ଆରମ୍ଭ ହୋଇଥିଲା ୨ୟ ଟେଷ୍ଟ । ଏହି ମ୍ୟାଚ୍‌ରେ ଟସ୍‌ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ ରୋହିତ ଶର୍ମା । ଯାହାକୁ ଟିମ୍‌ ଇଣ୍ଡିଆ ପାଇଁ ଲକି ସାବ୍ୟସ୍ତ ହୋଇଥିଲା । ଯୁବ ଜଶସ୍ୱୀ ଜୈସଓ୍ୱାଲ୍‌ଙ୍କ ଦମ୍‌ଦାର ଦ୍ୱିଶତକ ବଳରେ ଭାରତ ପ୍ରଥମ ପାରିରେ ୩୯୬ ରନ୍‌ କରିଥିଲା । ଏହାପରେ ଇଂଲଣ୍ଡ ତାର ପ୍ରଥମ ଇଂନିସରେ ୨୫୩ ରନ କରି ଅଲଆଉଟ ହୋଇଯାଇଥିଲା ।

ଦ୍ଵିତୀୟ ଇନିଂସରେ ମଧ୍ୟ ଭାରତ ବଡ ସ୍କୋର କରିବାରେ ଅସମର୍ଥ ହୋଇଥିଲା । ମାତ୍ର ୨୫୫ ରନ୍‌ରେ ଅଲ୍‌ଆଉଟ୍‌ ହୋଇଯାଇଥିଲା ପୁରା ଟିମ୍‌ ଇଣ୍ଡିଆ । ପୂର୍ବ ଇନିଂସର ରନ୍‌ ଏବଂ ୨ୟ ପାରିର ରନ୍‌କୁ ମିଶାଇ ୩୯୯ ରନ୍‌ର ଟାର୍ଗେଟ ରହିଥିଲା । ମାତ୍ର ଦଳର କୌଣସି ଖେଳାଳି ବଡ଼ ସ୍କୋର କରିପାରି ନଥିଲେ। ଫଳରେ ଇଂଲଣ୍ଡ ଦଳ ୨୯୨ ରନ କରି ଅଲଆଉଟ ହୋଇଯାଇଥିଲା । ଭାରତ ଏହି ମ୍ୟାଚକୁ ୧୦୬ ରନରେ ଜିତି ନେଇଛି । ଭାରତ ପକ୍ଷରୁ ଯଶପ୍ରୀତ ବୁମ୍ରା ଓ ରବିଚନ୍ଦ୍ରନ ଅଶ୍ୱିନ ୩ଟି ଲେଖାଏ ୱିକେଟ୍ ନେଇଥିବା ବେଳେ ମୁକେଶ କୁମାର, କୁଲଦୀପ ଯାଦବ ଓ ଅକ୍ଷର ପଟେଲ ଗୋଟିଏ ଲେଖାଏ ୱିକେଟ୍ ନେଇଥିଲେ।

ନୂଆଦିଲ୍ଲୀ: ଇଂଲଣ୍ଡ ବିପକ୍ଷ ୫ଟି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍‌ର ପ୍ରଥମ ଦୁଇଟି ମ୍ୟାଚ୍ ଖେଳିବେନି ବିରାଟ କୋହଲି।  ଏ ନେଇ ସୋମବାର ବିସିସିଆଇ ପକ୍ଷରୁ ଏହି ସୂଚନା ଦିଆଯାଇଛି। ବ୍ୟକ୍ତିଗତ କାରଣରୁ ବିରାଟ ପ୍ରଥମ ଦୁଇଟି ମ୍ୟାଚ୍‌ରୁ ଓହରି ଯାଇଛନ୍ତି ବୋଲି ବିସିସିଆଇ କହିଛି । ବିରାଟ କୋହଲିଙ୍କ ବଦଳରେ କାହାକୁ ଟିମ୍‌ରେ ନିଆଯିବ, ସେ ନେଇ ଚୟନ କମିଟି ଖୁବ୍‌ଶୀଘ୍ର ନିଷ୍ପତ୍ତି ନେବ ବୋଲି କୁହାଯାଇଛି। ଏହି ସିରିଜ୍‌ର ପ୍ରଥମ ମ୍ୟାଚ୍ ଜାନୁଆରୀ ୨୫ରୁ ହାଇଦ୍ରାବାଦରେ ଖେଳା ଯିବ। ଦ୍ୱିତୀୟ ମ୍ୟାଚ୍ ଫେବ୍ରୁଆରୀ ୨ରୁ ବିଶାଖାପାଟଣାରେ ଖେଳା ଯିବ।

ବିସିସିଆଇ ପକ୍ଷରୁ କୁହାଯାଇଛି, ପ୍ରଥମ ଦୁଇଟି ଟେଷ୍ଟ ନଖେଳିବା ନେଇ ବିରାଟ କୋହଲି ଅଧିନାୟକ ରୋହିତ ଶର୍ମା, ଟିମ୍ ମ୍ୟାନେଜମେଣ୍ଟ ଓ ଚୟନକର୍ତ୍ତାଙ୍କ ସହିତ ଆଲୋଚନା କରିଛନ୍ତି। ବିରାଟଙ୍କ ପ୍ରତି ଅଧିନାୟକଙ୍କ ସମର୍ଥନ ରହିଛି। ବିରାଟ କହିଛନ୍ତି ଯେ ଦେଶକୁ ପ୍ରତିନିଧିତ୍ୱ କରିବାକୁ ସେ ପ୍ରାଥମିକତା ଦିଅନ୍ତି। କିନ୍ତୁ ବ୍ୟକ୍ତିଗତ ସ୍ଥିତି କିଛି ଏମିତି ଅଛି ଯେ ସେଥିପ୍ରତି ତାଙ୍କୁ ଦୃଷ୍ଟି ଦେବାକୁ ପଡ଼ିବ ବୋଲି ସେ କହିଛନ୍ତି। ବିରାଟଙ୍କ ବଦଳରେ କାହାକୁ ଟିମ୍‌ରେ ନିଆଯିବ ସେ ନେଇ ଖୁବ୍‌ଶୀଘ୍ର ପୁରୁଷ ଚୟନ କମିଟି ନାଁ ଘୋଷଣା କରିବେ।