କଲମ୍ବୋରେ ଅନୁଷ୍ଠିତ T20 ବିଶ୍ୱକପ୍ ୨୦୨୬ର ଏକ ହାଇ-ଭୋଲ୍ଟେଜ୍ ମ୍ୟାଚରେ ଭାରତ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୬୧ ରନ୍ରେ ପରାସ୍ତ କରିଛି। ତେବେ ମ୍ୟାଚର ଫଳାଫଳ ଅପେକ୍ଷା ପଡିଆରେ ଭାରତୀୟ ଖେଳାଳିଙ୍କ ଆଚରଣ ଏବେ ବିଶ୍ୱବ୍ୟାପୀ ଚର୍ଚ୍ଚାର ବିଷୟ ପାଲଟିଛି। ବିଜୟ ପରେ ମଧ୍ୟ ଭାରତୀୟ ଦଳ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇବାକୁ (Handshake) ମନା କରିଦେଇଛନ୍ତି, ଯାହାକୁ ନେଇ କ୍ରିକେଟ୍ ଜଗତରେ ହଇଚଇ ସୃଷ୍ଟି ହୋଇଛି।

ଟସ୍ ବେଳେ ହାତ ମିଳାଇଲେନି ସୂର୍ଯ୍ୟକୁମାର

ମ୍ୟାଚ୍ ଆରମ୍ଭରୁ ହିଁ ଉତ୍ତେଜନା ଦେଖିବାକୁ ମିଳିଥିଲା। ଟସ୍ ସମୟରେ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ପାକିସ୍ତାନ ଅଧିନାୟକ ସଲମାନ ଅଲି ଆଘାଙ୍କ ସହ ହାତ ମିଳାଇ ନଥିଲେ। ମ୍ୟାଚ୍ ଶେଷ ହେବା ପରେ ମଧ୍ୟ ଭାରତୀୟ ଖେଳାଳିମାନେ ପାକିସ୍ତାନୀ ଖେଳାଳିଙ୍କ ସହ ସୌଜନ୍ୟମୂଳକ ହାତ ମିଳାଇବା ପରିବର୍ତ୍ତେ ସିଧା ଡ୍ରେସିଂ ରୁମକୁ ଫେରିଯାଇଥିଲେ। ରିପୋର୍ଟ ଅନୁଯାୟୀ, ୨୦୨୫ ଏସିଆ କପ୍ ସମୟରୁ ପହଲଗାଓଁ ଆତଙ୍କବାଦୀ ଆକ୍ରମଣର ପ୍ରତିବାଦ ସ୍ୱରୂପ ଭାରତ ଏହି 'ନୋ-ହ୍ୟାଣ୍ଡସେକ୍' ନୀତି ଆପଣାଇ ଆସୁଛି।

ଆଇସିସି ନିକଟରେ ପାକିସ୍ତାନର ଫେରାଦ

ଭାରତର ଏହି ଆଭିମୁଖ୍ୟକୁ ନେଇ ପାକିସ୍ତାନ କ୍ରିକେଟ୍ ବୋର୍ଡ (PCB) ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଏହା ଖେଳୁଆଡ ମନୋଭାବର ବିରୋଧୀ ବୋଲି ଦର୍ଶାଇ ପିସିବି ଆଇସିସି (ICC) ନିକଟରେ ଅଭିଯୋଗ କରିଥିବା ଜଣାପଡିଛି। ଅନ୍ୟପକ୍ଷରେ, ପୂର୍ବତନ ଭାରତୀୟ କ୍ରିକେଟର ସଞ୍ଜୟ ମଞ୍ଜରେକର ମଧ୍ୟ ଭାରତର ଏହି ନୀତିକୁ ସମାଲୋଚନା କରିଛନ୍ତି।

ମ୍ୟାଚରେ ଭାରତର ଏକତରଫା ବିଜୟ

ଖେଳ କଥା ଦେଖିଲେ, ଭାରତ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୭ ୱିକେଟ୍ ହରାଇ ୧୭୫ ରନ୍ ସଂଗ୍ରହ କରିଥିଲା। ଯୁବ ତାରକା ଈଶାନ କିଷାନ ମାତ୍ର ୪୦ ବଲରେ ବିସ୍ଫୋରକ ୭୭ ରନ୍ ସଂଗ୍ରହ କରିଥିଲେ। ଜବାବରେ ପାକିସ୍ତାନ ଦଳ ଭାରତୀୟ ବୋଲରଙ୍କ ମୁକାବିଲା କରିନପାରି ମାତ୍ର ୧୧୪ ରନ୍‌ରେ ଅଲଆଉଟ୍ ହୋଇଯାଇଥିଲା। ଏହି ବିଜୟ ସହ ଭାରତ ସୁପର-୮ ପର୍ଯ୍ୟାୟରେ ପ୍ରବେଶ କରିଛି।

T20 ବିଶ୍ୱକପ୍ ୨୦୨୬ର ହାଇ-ଭୋଲ୍ଟେଜ୍ ମୁକାବିଲାରେ ପାକିସ୍ତାନ ବିପକ୍ଷରେ ଧମାକାଦାର ପ୍ରଦର୍ଶନ କରି ଇଶାନ କିଷାନ ରାତାରାତି ସୁପରଷ୍ଟାର ପାଲଟି ଯାଇଛନ୍ତି। ତାଙ୍କର ଏହି ଚମତ୍କାର ବ୍ୟାଟିଂ ଯୋଗୁଁ ଭାରତ ଏହି ଗୁରୁତ୍ୱପୂର୍ଣ୍ଣ ମ୍ୟାଚରେ ବିଜୟ ଲାଭ କରିଛି। କ୍ରିକେଟ୍ ପଡ଼ିଆରେ ନିଜର ଦକ୍ଷତା ପ୍ରମାଣିତ କରିଥିବା ଏହି ଯୁବ ତାରକା ପଡ଼ିଆ ବାହାରେ ମଧ୍ୟ ବେଶ୍ ବିଳାସପୂର୍ଣ୍ଣ ଜୀବନଯାପନ କରନ୍ତି। ଆସନ୍ତୁ ଜାଣିବା ଏହି ନୂତନ 'ମ୍ୟାଚ୍ ୱିନର'ଙ୍କ ନେଟ୍ ୱର୍ଥ, ଦାମୀ କାର୍ ଏବଂ ଘଣ୍ଟା କଲେକ୍ସନ୍ ବିଷୟରେ।

କୋଟି କୋଟି ଟଙ୍କାର ସମ୍ପତ୍ତି (Net Worth)

ରିପୋର୍ଟ ଅନୁଯାୟୀ, ଇଶାନ କିଷାନଙ୍କ ମୋଟ ସମ୍ପତ୍ତିର ମୂଲ୍ୟ ପ୍ରାୟ ୬୦ରୁ ୭୦ କୋଟି ଟଙ୍କା ବୋଲି ଆକଳନ କରାଯାଇଛି। ତାଙ୍କ ଆୟର ମୁଖ୍ୟ ଉତ୍ସ ହେଉଛି ବିସିସିଆଇ (BCCI) ଚୁକ୍ତିନାମା ଏବଂ ଆଇପିଏଲ (IPL) ଦରମା। ଏହା ବ୍ୟତୀତ ବିଭିନ୍ନ ବ୍ରାଣ୍ଡ୍ ଏଣ୍ଡୋର୍ସମେଣ୍ଟ୍ ଜରିଆରେ ସେ କୋଟି କୋଟି ଟଙ୍କା ରୋଜଗାର କରନ୍ତି। ଆଇପିଏଲରେ ମୁମ୍ବାଇ ଇଣ୍ଡିଆନ୍ସ ଏବଂ ସନରାଇଜର୍ସ ହାଇଦ୍ରାବାଦ ଭଳି ଦଳ ପାଇଁ ଖେଳି ସେ ପ୍ରଚୁର ଅର୍ଥ ଉପାର୍ଜନ କରିଛନ୍ତି।

ବିଳାସପୂର୍ଣ୍ଣ କାର୍ କଲେକ୍ସନ୍ (Car Collection)

ଇଶାନ କିଷାନଙ୍କ ଗ୍ୟାରେଜରେ ଅନେକ ଦାମୀ ଏବଂ ଲକ୍ଜୁରୀ କାର୍ ରହିଛି। ତାଙ୍କ ପାଖରେ ଏକ Mercedes-Benz C-Class ଅଛି, ଯାହାର ମୂଲ୍ୟ ପ୍ରାୟ ୧ କୋଟି ଟଙ୍କା। ଏହା ସହିତ ସେ ଏକ BMW 5 Series କାରର ମାଲିକ, ଯାହା ତାଙ୍କର ପ୍ରିୟ ଗାଡ଼ିମାନଙ୍କ ମଧ୍ୟରୁ ଅନ୍ୟତମ। ତାଙ୍କ କଲେକ୍ସନରେ ଏକ ଶକ୍ତିଶାଳୀ Ford Mustang GT ମଧ୍ୟ ସାମିଲ ଅଛି, ଯାହା ତାଙ୍କର ସ୍ପୋର୍ଟସ୍ କାର୍ ପ୍ରତି ଥିବା ଭଲପାଇବାକୁ ଦର୍ଶାଏ।

ଦାମୀ ଘଣ୍ଟା ସଉକ (Expensive Watches)

କେବଳ ଗାଡ଼ି ନୁହେଁ, ଇଶାନ ଦାମୀ ଘଣ୍ଟା ପିନ୍ଧିବାର ମଧ୍ୟ ସଉକ ରଖନ୍ତି। ତାଙ୍କ ପାଖରେ Rolex Day-Date ଭଳି ପ୍ରିମିୟମ୍ ଘଣ୍ଟା ରହିଛି, ଯାହାର ମୂଲ୍ୟ ୨୦ ଲକ୍ଷରୁ ଅଧିକ ହେବ। ଏହା ବ୍ୟତୀତ ତାଙ୍କ ପାଖରେ Zenith Defy Skyline ଏବଂ ଅନ୍ୟାନ୍ୟ ଅନ୍ତର୍ଜାତୀୟ ବ୍ରାଣ୍ଡର ଘଣ୍ଟା ଥିବା ଦେଖିବାକୁ ମିଳେ। ୨୦୨୬ ବିଶ୍ୱକପରେ ତାଙ୍କର ସଫଳତା ପରେ ତାଙ୍କର ଲୋକପ୍ରିୟତା ଏବଂ ବ୍ରାଣ୍ଡ୍ ଭାଲ୍ୟୁ ଆହୁରି ବୃଦ୍ଧି ପାଇବା ନିଶ୍ଚିତ।

ଆଇପିଏଲ୍‌ ଅଷ୍ଟାଦଶ ସଂସ୍କରଣର ଅଧା ମ୍ୟାଚ୍‌ ଶେଷ ହୋଇଯାଇଛି। ରବିବାର ୩୭ ମ୍ୟାଚ୍‌ ଶେଷ ସୁଦ୍ଧା ସର୍ବାଧିକ ୫ଥର ଲେଖାଏ ଟାଇଟଲ୍‌ ଜିତିଥିବା ଚେନ୍ନାଇ ସୁପର୍‌ କିଙ୍ଗ୍‌ସ ଓ କୋଲକାତା ନାଇଟ୍‌ ରାଇଡର୍ସ ଆଶାନୁରୂପ ପ୍ରଦର୍ଶନ କରିବାରେ ବିଫଳ ହୋଇଛନ୍ତି। ମହେନ୍ଦ୍ର ସିଂ ଧୋନିଙ୍କ ଚେନ୍ନାଇ ୭ ମ୍ୟାଚରୁ ୪ ପଏଣ୍ଟ ପାଇ ୧୦ ଦଳୀୟ ଟେବଲ୍‌ର ସର୍ବନିମ୍ନ ସ୍ଥାନରେ ରହିଛି। ସେହିଭଳି ଦଳଗତ ସହ କିଛି ଦାମୀ ଖେଳାଳି ମଧ୍ୟ ଏଥର ନୈରାଶ୍ୟଜନକ ପ୍ରଦର୍ଶନ କରି ସୁପର୍‌ ଫ୍ଲପ୍‌ ହୋଇଛନ୍ତି। ଯାହାକି ସେମାନଙ୍କର ଫ୍ରାଞ୍ଚାଇଜ ପାଇଁ ଚିନ୍ତାର କାରଣ ପାଲଟିଛି। ଅନ୍ୟପଟେ କିଛି ଦାମୀ ଖେଳାଳିଙ୍କ ପ୍ରଦର୍ଶନ ଉପରେ ନଜର ପକାଇବା ଯେଉଁମାନେ ବର୍ତ୍ତମାନ ସୁଦ୍ଧା ବ୍ୟାଟିଂ ହେଉକି ବୋଲିଂରେ ଫ୍ଲପ୍‌ ସାବ୍ୟସ୍ତ ହୋଇଛନ୍ତି।

ଋଷଭ ପନ୍ତ (ଲକ୍ଷ୍ନୌ)
ଦାମ୍‌ ୨୭ କୋଟି – ରନ ୧୦୬
ଗତ ମେଗା ଖେଳାଳି ନିଲାମୀରେ ଲକ୍ଷ୍ନୌ ସୁପର୍‌ ଜାଏଣ୍ଟ୍‌ସ ୨୭ କୋଟିରେ ଋଷଭ ପନ୍ତଙ୍କ କିଣିଥିଲା। ଫଳରେ ଆଇପିଏଲ୍‌ର ୧୮ ବର୍ଷ ଇତିହାସରେ ସେ ସବୁଠୁ ଦାମୀ ଖେଳାଳି ହେବାର କୀର୍ତ୍ତିମାନ ସ୍ଥାପନ କରିଥିଲେ। କିନ୍ତୁ ପନ୍ତ ତାଙ୍କର ଏହି ମୂଲ୍ୟର ପ୍ରଦର୍ଶନ ବର୍ତ୍ତମାନ ସୁଦ୍ଧା କରିପାରି ନାହାନ୍ତି। ଲକ୍ଷ୍ନୌର ନେତୃତ୍ୱ ନେଉଥିବା ପନ୍ତ ୮ ମ୍ୟାଚରୁ ୭ ଇନିଂସରେ ୧୫.୧୪ ହାରରେ ୧୦୬ ରନ କରିଛନ୍ତି। ୬୩ ରନ ତାଙ୍କର ସର୍ବୋଚ୍ଚ ସ୍କୋର ରହିଥିବାବେଳେ ଷ୍ଟ୍ରାଇକରେଟ୍‌ ମାତ୍ର ୯୮.୧୪ ରହିଛି। କିନ୍ତୁ ପନ୍ତଙ୍କ ନେତୃତ୍ୱରେ ଲକ୍ଷ୍ନୌ ୮ ମ୍ୟାଚରୁ ୫ ବିଜୟ ସହ ୧୦ ପଏଣ୍ଟ ପାଇ ୪ର୍ଥ ସ୍ଥାନରେ ରହିଛି।
ରୋହିତ୍‌ ଶର୍ମା (ମୁମ୍ବାଇ)
ଦାମ୍‌ ୧୬.୩୦ କୋଟି – ରନ ୮୨
ମୁମ୍ବାଇ ଇଣ୍ଡିଆନ୍ସକୁ ସର୍ବାଧିକ ୫ଥର ଟାଇଟଲ୍‌ ଜିତାଇଥିବା ରୋହିତ୍‌ ଶର୍ମାଙ୍କ ବ୍ୟାଟ୍‌ର ଯାଦୁ ଚଳିତ ଆଇପିଏଲ୍‌ରେ ଦେଖିବାକୁ ମିଳିନାହିଁ। ମେଗା ନିଲାମୀ ପୂର୍ବରୁ ମୁମ୍ବାଇ ଫ୍ରାଞ୍ଚାଇଜ ରୋହିତ୍‌ଙ୍କୁ ୧୬.୩୦ କୋଟି ଟଙ୍କାରେ ରିଟେନ କରିଥିଲା। କିନ୍ତୁ ରୋହିତ୍‌ ଟିମ୍‌ ମ୍ୟାନେଜମେଣ୍ଟର ଏହି ଭରସାକୁ ବଜାୟ ରଖିବାରେ ବିଫଳ ହୋଇଛନ୍ତି। ସେ ୬ ମ୍ୟାଚ୍‌ ଖେଳି ୧୩.୬୬ ହାରରେ ମାତ୍ର ୮୨ ରନ କରିଛନ୍ତି। ୨୬ ରନ ତାଙ୍କର ଶ୍ରେଷ୍ଠ ପ୍ରଦର୍ଶନ ରହିଛି।
ଭେଙ୍କଟେଶ ଆୟର (କୋଲକାତା)
ଦାମ୍‌ ୨୩.୭୫ କୋଟି – ରନ ୧୨୧
ବାମହାତୀ ବ୍ୟାଟର୍‌ ଭେଙ୍କଟେଶ ଆୟର ଡିଫେଣ୍ଡିଂ ଚାମ୍ପିଅନ କୋଲକାତା ନାଇଟ୍‌ ରାଇଡର୍ସର ପ୍ରମୁଖ ଖେଳାଳିଙ୍କ ମଧ୍ୟରୁ ଅନ୍ୟତମ। ନିଲାମୀରେ କୋଲକାତା ତାଙ୍କୁ ୨୩.୭୫ କୋଟି ଟଙ୍କାରେ କ୍ରୟ କରିଥିଲା। ଆୟର କିନ୍ତୁ ପ୍ରଦର୍ଶନରେ ସ୍ଥିରତା ଦେଖାଇବାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି। ୭ ମ୍ୟାଚରୁ ୫ ଇନିଂସରେ ବ୍ୟାଟିଂ କରିବାର ସୁଯୋଗ ପାଇଥିବା ଭେଙ୍କଟେଶ ୨୪ ହାରରେ ୧୨୧ ରନ ନିଜ ନାମରେ ଲିପିବଦ୍ଧ କରିଛନ୍ତି। ସନରାଇଜର୍ସ ହାଇଦରାବାଦ୍‌ ବିପକ୍ଷରେ ସେ ୨୯ ବଲରୁ ୬୦ ରନର ଦ୍ରୁତ ଅର୍ଦ୍ଧଶତକୀୟ ପାଳି ଖେଳିଥିଲେ।
ରଶିଦ ଖାନ (ଗୁଜରାଟ)
ଦାମ୍‌ ୧୮ କୋଟି – ୪ ୱିକେଟ୍‌ ଓ ୨୨ ରନ
ଆଫାଗାନିସ୍ତାନ ସ୍ପିନର ରଶିଦ ଖାନଙ୍କୁ ୧୮ କୋଟି ଟଙ୍କାରେ ବଜାୟ ରଖି ଗୁଜରାଟ ଟାଇଟନ୍ସ ତାଙ୍କୁ ମେଗା ନିଲାମୀକୁ ଛାଡ଼ି ନ ଥିଲା। ତେବେ ଫ୍ରାଞ୍ଚାଇଜର ଏହି ଭରସାକୁ ରଶିଦ ବଜାୟ ରଖିବାରେ ବିଫଳ ହୋଇଛନ୍ତି। ସେ ଚଳିତ ସିଜନରେ ୭ ମ୍ୟାଚ୍‌ ଖେଳି ୨୬ ଓଭର ବୋଲିଂ କରିଥିବାବେଳେ ମାତ୍ର ୪ଟି ୱିକେଟ୍‌ ନେଇଛନ୍ତି। ୬୩ ରନ ବ୍ୟୟରେ ତାଙ୍କୁ ଗୋଟିଏ ୱିକେଟ୍‌ ମିଳିଛି। ସେହିଭଳି ବ୍ୟାଟିଂରେ ସେ ୩ ଇନିଂସରେ ଖେଳିବାର ସୁଯୋଗ ପାଇ ମାତ୍ର ୨୨ ରନ କରିଛନ୍ତି।
ଇଶାନ କିଶାନ (ହାଇଦରାବାଦ୍‌)
ଦାମ୍‌ ୧୧.୨୫ କୋଟି – ରନ ୧୩୮
ପ୍ରଥମ ମ୍ୟାଚରେ ରାଜସ୍ଥାନ ରୟାଲ୍ସ ବିପକ୍ଷରେ ଅପରାଜିତ ୧୦୬ ରନର ଶତକୀୟ ପାଳିକୁ ଛାଡ଼ିଦେଲେ ସନରାଇଜର୍ସ ହାଇଦରାବାଦ୍‌ର ଇଶାନ କିଶାନଙ୍କ ବ୍ୟାଟର୍‌ କମାଲ ଆଉ ଦେଖିବାକୁ ମିଳିନାହିଁ। ଏହାପରେ ସେ ଆଉ ୬ଟି ଇନିଂସରୁ ମାତ୍ର ୩୨ ରନ କରିଛନ୍ତି। ଅର୍ଥାତ୍‌ ମୋଟ୍‌ ୭ ମ୍ୟାଚରୁ ୧୩୮ ରନ କରିଛନ୍ତି। ଫଳରେ ହାଇଦରାବାଦ୍‌ ଫ୍ରାଞ୍ଚାଇଜ ତାଙ୍କୁ କ୍ରୟ କରିଥିବା ୧୧.୨୫ କୋଟି ଟଙ୍କାର ମୂଲ୍ୟ ସେ ସାବ୍ୟସ୍ତ କରିବାରେ ଫେଲ୍‌ ହୋଇଛନ୍ତି।

ନୂଆଦିଲ୍ଲୀ : BCCI ପକ୍ଷରୁ ଘୋଷଣା ହେଲା ସେଣ୍ଟ୍ରାଲ କଣ୍ଟ୍ରାକ୍ଟ ତାଲିକା । ବାଦ୍ ପଡ଼ିଲେ ଶ୍ରେୟସ ଆୟାର ଏବଂ ଇଶାନ କିଶାନ । ତେବେ ବହୁ ଯୁବ ଖେଳାଳି ବିଭିନ୍ନ ଗ୍ରେଡରେ ସାମିଲ ହୋଇଛନ୍ତି। ବୁଧବାର ବିସିଆଇ ପକ୍ଷରୁ ଏହି ବାର୍ଷିକ ଚୁକ୍ତିନାମା ଘୋଷଣା କରାଯାଇଛି । ରଣଜୀ ଖେଳିବା ପାଇଁ ଶ୍ରେୟସ ଆୟର ଏବଂ ଇଶାନ କିଷନଙ୍କୁ କୁହାଯାଇଥିବା ସତ୍ତ୍ବେ ଉଭୟ ଖେଳିନଥିବାରୁ ଏମାନଙ୍କୁ ଏକପ୍ରକାର ଏପରି ଦଣ୍ଡ ଦିଆଯାଇଛି । ନିୟମିତ ଦଳରେ ସାମିଲ ହୋଇ ଭାରତୀୟ ଟିମରେ ଖେଳୁଥିବା ଜୟସ୍ବାଲଙ୍କୁ ଗ୍ରେଡରେ ସାମିଲ କରାଯାଇଛି । ଆନ୍ତର୍ଜାତୀୟ ଖେଳୁଥିବା ଖେଳାଳିଙ୍କୁ BCCI ପକ୍ଷରୁ ୪ଟି ଗ୍ରେଡରେ ସାମିଲ କରାଯାଇଛି । ଏହି ଗ୍ରେଡ ହିସାବରେ ଦରମା ମଧ୍ୟ ମିଳିଛି । A+, A,B ଏବଂ C ଗ୍ରେଡରେ ରହିଛନ୍ତି । A+ ଖେଳାଳି ବାର୍ଷିକ ୭ କୋଟି, A ଗ୍ରେଡ ଖେଳାଳି ୫ କୋଟି, B ଗ୍ରେଡ ଖେଳାଳି ୩ କୋଟି ଏବଂ C ଗ୍ରେଡ ଖେଳାଳିମାନେ ବର୍ଷକୁ ୧ କୋଟି ଟଙ୍କା ପାଇଥାନ୍ତି ।

A+ ଗ୍ରେଡରେ ରହିଥିବା ଖେଳାଳି ତିନୋଟି ଯାକ ଫର୍ମାଟରେ ଖେଳିଥାନ୍ତି । ତେବେ ଏହି ତାଲିକାରେ ରହିଛନ୍ତି ରୋହିତ ଶର୍ମା, ବିରାଟ କୋହଲି, ରବିନ୍ଦ୍ର ଜାଡେଜା ଏବଂ ଜଶପ୍ରିତ୍ ବୁମରା । A ଗ୍ରେଡରେ ୬ ଜଣ ଖେଳାଳି ରହିଛନ୍ତି । ଏମାନେ ହେଲେ କେ.ଏଲ. ରାହୁଲ, ମହମ୍ମଦ ସିରାଜ, ଶୁଭମନ ଗିଲ, ରବିଚନ୍ଦ୍ରନ ଅଶ୍ବିନୀ, ମହମ୍ମଦ ସାମି ଏବଂ ହାର୍ଦ୍ଦିକ ପାଣ୍ଡ୍ୟା । ରାହୁଲ,ସିରାଜ ଏବଂ ଗିଲଙ୍କୁ ପ୍ରମୋସନ ମିଳି ଏହି ଗ୍ରେଡରେ ସାମିଲ କରାଯାଇଛି ।

B ଗ୍ରେଡରେ ୫ଜଣ ଖେଳାଳି ରହିଛନ୍ତି ଏମାନେ ହେଲେ ଋଷଭ ପନ୍ଥ, ଅକ୍ଷର ପଟେଲ, ସୂର୍ଯ୍ୟ କୁମାର ଯାଦବ, କୁଲଦୀପ ଯାଦବ ଏବଂ ଜଶସ୍ବୀ ଜୟସ୍ବାଲ । ଜୟସ୍ବାଲ ପ୍ରଥମଥର ପାଇଁ ଏବଂ ସେଣ୍ଟ୍ରାଲ କଣ୍ଟ୍ରାକ୍ଟରେ ସାମିଲ ହୋଇଛନ୍ତି ।

ନୂଆଦିଲ୍ଲୀ: ଭ୍ରମଣକାରୀ ଇଂଲଣ୍ଡ ବିପକ୍ଷ ଆଗାମୀ ଟେଷ୍ଟ ସିରିଜର ପ୍ରଥମ ଦୁଇ ମ୍ୟାଚ୍‌ ଲାଗି ଶୁକ୍ରବାର ଭାରତୀୟ ଦଳ ଘୋଷଣା କରାଯାଇଛି। ରୋହିତ୍‌ ଶର୍ମାଙ୍କ ନେତୃତ୍ୱରେ ଘୋଷିତ ୧୭ ଜଣିଆ ଦଳରେ ନୂଆ ମୁହଁ ଭାବେ ଯୁବ ୱିକେଟ୍‌ରକ୍ଷକ ଧ୍ରୁବ ଜୁରେଲଙ୍କୁ ସୁଯୋଗ ମିଳିଛି। ଉତ୍ତରପ୍ରଦେଶର ୨୨ ବର୍ଷୀୟ ଜୁରେଲ ପ୍ରଥମଥର ଲାଗି ଜାତୀୟ ଦଳରୁ ଡାକରା ପାଇଛନ୍ତି।

ଅପରପକ୍ଷରେ ୱିକେଟ୍‌ରକ୍ଷକ ଇଶାନ କିଶାନଙ୍କୁ ପୁନର୍ବାର ଦଳରୁ ବାଦ୍‌ ଦିଆଯାଇଛି। ପୂର୍ବରୁ ସେ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜ ଏବଂ ସଦ୍ୟତମ ଭାବେ ଚଳିତ ଆଫଗାନିସ୍ତାନ ବିପକ୍ଷ ଟି-୨୦ ସିରିଜରୁ ବାଦ୍‌ ପଡ଼ିଥିଲେ। ନିକଟରେ ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡ୍‌ କହିଥିଲେ, ଇଶାନ ଭାରତୀୟ ଦଳରେ ସ୍ଥାନ ପାଇବାକୁ ହେଲେ ପ୍ରଥମେ ଘରୋଇ କ୍ରିକେଟ୍‌ ଖେଳନ୍ତୁ। ଇଶାନଙ୍କ ସଟ୍‌ ଚୟନକୁ ନେଇ ପ୍ରଶିକ୍ଷକ ଦ୍ରାବିଡ୍‌ ଖୁସି ନ ଥିବା ଜଣାପଡ଼ିଛି। ଏସବୁ ମଧ୍ୟରେ ଇଶାନ କିଶନ ସୋସିଆଲ ମିଡିଆରେ ନିଜର ଏକ ଭିଡିଓ ସେୟାର କରିଛନ୍ତି। ଭିଡିଓରେ ସେ ଯୋଗ ଏବଂ ଟ୍ରେନିଂ କରୁଥିବା ନଜର ଆସିଛନ୍ତି।

🏃‍♂️ pic.twitter.com/XjUfL18Ydc

— Ishan Kishan (@ishankishan51) January 12, 2024

ଜୁରେଲ ସାମିଲ ହେବା ଫଳରେ ଦଳରେ ସେ ୩ୟ ୱିକେଟ୍‌କିପର ବିକଳ୍ପ ହେବେ। ଲୋକେଶ ରାହୁଲ ଓ ଶ୍ରୀକର ଭାରତ ମଧ୍ୟ ୱିକେଟ୍‌କିପର ଭାବେ ଦଳରେ ସ୍ଥାନ ପାଇଛନ୍ତି। ଗତ ବର୍ଷ ରାଜସ୍ଥାନ ରୟାଲ୍ସ ପକ୍ଷରୁ ଖେଳି ଜୁରେଲ ଆଇପିଏଲ୍‌ରେ ପଦାର୍ପଣ କରିଥିଲେ। ନିକଟରେ ସେ ଭାରତୀୟ-ଏ ଦଳ ସହ ଦକ୍ଷିଣ ଆଫ୍ରିକା ଗସ୍ତରେ ଯାଇ ଅନ୍‌ଅଫିସିଆଲ୍‌ ଟେଷ୍ଟ ସିରିଜ ଖେଳିଥିଲେ। ଅପରପକ୍ଷରେ ଆଘାତଜନିତ ସମସ୍ୟା ଲାଗି ଦ୍ରୁତ ବୋଲର ମହମ୍ମଦ ସାମିଙ୍କ ନାମକୁ ପ୍ରଥମ ଦୁଇ ଟେଷ୍ଟ ଲାଗି ବିଚାରକୁ ନିଆଯାଇ ନାହିଁ। ଇଂଲଣ୍ଡ ବିପକ୍ଷ ୫ ମ୍ୟାଚ୍‌ବିଶିଷ୍ଟ ଟେଷ୍ଟ ସିରିଜ ଜାନୁଆରୀ ୨୫ରୁ ଆରମ୍ଭ ହେବ। ଜାନୁଆରୀ ୨୫ରୁ ହାଇଦରାବାଦ୍‌ରେ ପ୍ରଥମ ଏବଂ ଫେବ୍ରୁଆରୀ ୨ରୁ ବିଶାଖାପାଟଣାରେ ୨ୟ ଟେଷ୍ଟ ଖେଳାଯିବ।

An action-packed Test series coming 🆙

Check out #TeamIndia's squad for the first two Tests against England 👌👌#INDvENG | @IDFCFIRSTBank pic.twitter.com/vaP4JmVsGP

— BCCI (@BCCI) January 12, 2024

ଭାରତୀୟ ଦଳ (ପ୍ରଥମ ୨ ଟେଷ୍ଟ ମ୍ୟାଚ୍‌): ରୋହିତ୍‌ ଶର୍ମା (ଅଧିନାୟକ), ଶୁବମାନ ଗିଲ୍‌, ଯଶସ୍ୱୀ ଜୟସ୍ୱାଲ, ବିରାଟ କୋହଲି, ଶ୍ରେୟାସ ଆୟର, ଲୋକେଶ ରାହୁଲ, ଧ୍ରୁବ ଜୁରେଲ, ଶ୍ରୀକର ଭରତ (୩ଜଣ ଯାକ ୱିକେଟ୍‌କିପର), ରବିଚନ୍ଦ୍ରନ ଅଶ୍ୱିନ, ରବୀନ୍ଦ୍ର ଜାଡେଜା, ଅକ୍ଷର ପଟେଲ, କୁଲଦୀପ ଯାଦବ, ମହମ୍ମଦ ସିରାଜ, ମୁକେଶ କୁମାର, ଯଶପ୍ରୀତ୍‌ ବୁମ୍‌ରା (ଉପ-ଅଧିନାୟକ) ଓ ଆଭେସ ଖାନ।

ନୂଆଦିଲ୍ଲୀ: ବିଶ୍ୱ ଟେଷ୍ଟ ଚାମ୍ପିଅନସିପ ଫାଇନାଲ ପାଇଁ ଦଳରେ ପରିବର୍ତ୍ତନ କରିଛି ଭାରତ । ଓପନର କେ.ଏଲ ରାହୁଲ ଆହତ ଥିବା ଯୋଗୁ ତାଙ୍କ ସ୍ଥାନରେ ଇଶାନ କିଶାନଙ୍କୁ ସୁଯୋଗ ମିଳିଛି । ଏନେଇ ଆଜି ବିସିସିଆଇ ପକ୍ଷରୁ ବିଧିବଦ୍ଧ ସୂଚନା ଦିଆଯାଇଛି ।

ଆଇପିଏଲ ଚାଲିଥିବାବେଳେ ଆହତ ହୋଇଥିବା ଯୋଗୁଁ କେ ଏଲ ରାହୁଲ ଆଇପିଏଲର ଅବଶିଷ୍ଟ ମ୍ୟାଚ୍‌ ଓ ଆସନ୍ତା ମାସରେ ଖେଳା ଯିବାକୁ ଥିବା ବିଶ୍ୱ ଟେଷ୍ଟ ଚାମ୍ପିୟନଶିପ ଫାଇନାଲରେ ଖେଳିପାରିବେ ନାହିଁ। ଜଙ୍ଘ ଜନିତ ସମସ୍ୟାରେ ପଡ଼ିଥିବା ରାହୁଲଙ୍କର ଖୁବଶୀଘ୍ର ସର୍ଜରୀ ହେବ। ରାହୁଲ ସମ୍ପୂର୍ଣ୍ଣ ଭାବେ ସୁସ୍ଥ ହେବା ପାଇଁ କିଛି ମାସ ସମୟ ଲାଗିବ । ତେଣୁ ଜୁନ ୭ ରୁ ୧୧ ତାରିଖ ଯାଏଁ ଅଷ୍ଟ୍ରେଲିଆ ବିପକ୍ଷରେ ହେବାକୁ ଥିବା ଟେଷ୍ଟ ଫାଇନାଲ ମ୍ୟାଚ୍‌ ଖେଳିପାରିବେନି ଲୋକେସ ରାହୁଲ ।

ଆସନ୍ତା ଜୁନ ୭ ତାରିଖରୁ ଇଂଲଣ୍ଡର ଓଭାଲ ଠାରେ ହେବାକୁ ଥିବା ଭାରତ-ଅଷ୍ଟ୍ରେଲିଆ ବିଶ୍ୱ ଟେଷ୍ଟ ଚାମ୍ପିଅନସିପ ଫାଇନାଲ ମ୍ୟାଚ ପାଇଁ ବିସିସିଆଇ ଇଶାନ କିସାନଙ୍କ ନାମ ସହ ତିନି ଜଣ ଷ୍ଟାଣ୍ଡବାଇ ଖେଳାଳିଙ୍କ ନାମ ଘୋଷଣା କରିଛି । ସେମାନେ ହେଲେ ଋତୁରାଜ ଗାଏକୱାଡ, ମୁକେଶ କୁମାର ଏବଂ ସୂର୍ଯ୍ୟ କୁମାର ଯାଦବ ।

ଚଟ୍ଟୋଗ୍ରାମ: ଆଜି ଭାରତ-ବାଂଲାଦେଶ ମଧ୍ୟରେ ଶେଷ ତଥା ଅନ୍ତିମ ଦିନିକିଆ ମ୍ୟାଚ ଖେଳଯାଉଛି। ୩ ଟିକିଆ ସିରିଜର ଦୁଇଟି ମ୍ୟାଚରେ ପରାଜିତ ହୋଇ ସିରିଜ ହାରି ସାରିଛି ଭାରତ । ଆଜି ସମ୍ମାନ ବଞ୍ଚାଇବାକୁ ପଡ଼ିଆକୁ ଓହ୍ଲାଇଛି ଟିମ୍ ଇଣ୍ଡିଆ । ଟିମ୍ ଇଣ୍ଡିଆ ପ୍ରଥମେ ବ୍ୟଟିଂ ଜାରି ରହିଛି। ଏହାରି ମଧ୍ୟରେ ଇଶାନ୍‌ କିଷାନ ଏକ ଧୂଆଁଦାର ଇଂନିସ ଖେଳିଥିଲେ। ସେ ୧୩୧  ବଲରେ ୨୧୦ ରନ କରି ଆଉଟ ହୋଇଥିଲେ। ଯେଉଁଥିରେ ୨୪ ଟି ଚୌକା ଓ ୧୦ ଟି ଛକା ସାମିଲ ରହିଛି। ସେ ମାତ୍ର ୧୩୧ ବଲରେ ଏପରି ଦୁଇ ଶତକ ହାସଲ କରି ନୂଆ କୀର୍ତ୍ତିମାନ ହାସଲ କରିଛନ୍ତି। ତାଙ୍କ ପୂର୍ବରୁ କେହି ବି ଏତେ କମ ବଲରେ ଦୁଇ ଶତକ ହାସଲ କରି ନ ଥିଲେ। ସେ ଦିନିକିଆ କ୍ରିକେଟରେ ଦ୍ରୁତତମ ଦୁଇ ଶତକ ହାସଲ କରିଥିବା ପ୍ରଥମ ଖେଳାଳି ମଧ୍ୟ ହୋଇଛନ୍ତି।

ଏଥିସହ ସେ ଅନ୍ତରାଷ୍ଟ୍ରୀୟ କ୍ରିକେଟର ଦିନିକିଆ ଫର୍ମାଟରେ ୨୦୦ ରନ କରିଥିବା କ୍ରିକେଟରଙ୍କ କ୍ଲବରେ ସାମିଲ ହୋଇଛନ୍ତି। ୨୧୦ ରନ କରି ଇଶାନ୍‌ କିଷାନ ଅନ୍ତରାଷ୍ଟ୍ରୀୟ କ୍ରିକେଟର ସର୍ବାଧିକ ରନ କରିଥିବା ଖେଳାଳିଙ୍କ ମଧ୍ଯରେ ୬ ତମ ସ୍ଥାନରେ ରହିଥିବା ବେଳେ ଡବଲ ଶତକ ହାସଲ କରିବାରେ ଭାରତର ୪ର୍ଥ ବ୍ୟାଟ୍ସମ୍ୟାନ ହୋଇଛନ୍ତି।

ଅନ୍ତରାଷ୍ଟ୍ରୀୟ କ୍ରିକେଟର ଦିନିକିଆରେ ସର୍ବାଧିକ ରନ କରି ପ୍ରଥମ ସ୍ଥାନରେ ଅଛନ୍ତି ଭାରତୀୟ କ୍ରିକଟେର ରୋହିତ ଶର୍ମା, ୨ୟରେ ଅଛନ୍ତି ମାର୍ଟିନ ଗୁପ୍ଟିଲ, ୩ୟ ରେ ବିରେନ୍ଦ୍ର ସେହ୍ବାଗ, ୪ର୍ଥରେ କ୍ରିସ ଗେଲ , ୫ମରେ ଫକର ଜମାନ ରହିଥିବା ବେଳେ ଇଶାନ୍‌ କିଷାନ ୬ ତମ ସ୍ଥାନରେ ରହିଛନ୍ତି।  ସେହିପରି ଭାରତୀୟ କ୍ରିକଟରେ ଇଶାନ୍‌ କିଷାନଙ୍କ ପୂର୍ବରୁ ସଚିନ ତେନ୍ଦୁଲକର, ବିରେନ୍ଦ୍ର ସେହ୍ବାଗ, ରୋହିତ ଶର୍ମା ଡବଲ ଶତକ ହାସଲ କରିଛନ୍ତି।

ରାଞ୍ଚି: ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଗତକାଲି ଶେଷ ହୋଇଥିବା ଦ୍ଵିତୀୟ ଦିନିକିଆ ମ୍ୟାଚରେ ଭାରତ ବିଜୟୀ ହୋଇଛି । ଫଳରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜରେ ବରାବର ସ୍ଥିତିରେ ରହିଛନ୍ତି ଉଭୟ ଟିମ୍ । ଏହି ମ୍ୟାଚରେ ଟିମ୍ ଇଣ୍ଡିଆର ବିଜୟ ପଛର ନାୟକ ସାଜିଥିଲେ ଶ୍ରେୟସ ଆୟର ଓ ଇଶାନ କିଷାନ । ଶ୍ରେୟସଙ୍କ ଶତକ ଓ ଇଶାନଙ୍କ ଧୂଆଁଧାର ଅର୍ଦ୍ଧଶତକ ବଳରେ ଟିମ୍ ଇଣ୍ଡିଆ ବିଜୟୀ ହେବା ସହ ସିରିଜରେ କମବ୍ୟାକ୍ କରିଛି ।

ତେବେ ମ୍ୟାଚ୍‌ ବିଜୟ ପରେ ଇଶାନ କିଷାନ କହିଛନ୍ତି ଯେ, କିଛି ଖେଳାଳି ଏପରି ଅଛନ୍ତି, ଯେଉଁମାନେ ନିଜ ଷ୍ଟ୍ରାଇକ୍‌କୁ ରୋଟେଟ୍‌ କରି ଚାଲିଥାନ୍ତି । ଷ୍ଟ୍ରାଇକ ରୋଟେଟ କରିବା କିଛି ଖେଳାଳୀଙ୍କର ଶକ୍ତି ହୋଇଥିବା ବେଳେ କିଛି ଖେଳାଳୀଙ୍କର ଛକା ମାରିବା ସବୁଠୁ ବଡ ସାର୍ମଥ୍ୟ । ମୋ ଭଳି ଲଗାତାର ଛକା ମାରିବା ଅନ୍ୟ ମାନଙ୍କ ପାଇଁ କଷ୍ଟସାଧ୍ୟ ହୋଇପାରେ କିନ୍ତୁ ବେଶ ସହଜରେ ମୁଁ ଛକା ମାରିଥାଏ । ଛକା ମାରିବା ମୋର ସାର୍ମଥ୍ୟ । କିନ୍ତୁ କୌଣସି ବି ଖେଳାଳି ମୋ ପରି ଛକ୍କା ମାରିପାରିବନାହିଁ । ମୋତେ ଛକ୍କା ମାରିବାକୁ ଭଲ ଲାଗେ ଏବଂ ମୁଁ ଅତି ସହଜରେ ମଧ୍ୟ ସଟ୍‌ ଖେଳିଦିଏ । ଏହା ହିଁ ମୋ ଶକ୍ତି । ଯଦି ମୁଁ ଛକ୍କା ମାରି ରନ୍‌ ରେଟ୍‌କୁ ମେକଅପ୍‌ କରିଦେଉଛି , ତେବେ ମୁଁ ସିଙ୍ଗିଲ୍‌ ସିଙ୍ଗିଲ୍‌ ରନ୍‌ ନେଇ ଷ୍ଟ୍ରାଇକ୍‌ ରୋଟେଟ କରିବା କଥା ଚିନ୍ତା କରେନାହିଁ ।

ଏହାସହ ଇଶାନ କହିଛନ୍ତି, କିଛି ଏମିତି ବି ମ୍ୟାଚ୍ ଆସିଥାଏ ଯେଉଁଠି ଷ୍ଟ୍ରାଇକ ରୋଟେଟ କରିବାର ଆବଶ୍ୟକତା ରହିଥାଏ । ଯେତେବେଳେ ଲଗାତାର ୱିକେଟ ପଡୁଥାଏ ସେତେବେଳେ ଷ୍ଟ୍ରାଇକ ରୋଟେଟ କରିବା ଉଚିତ୍ । କିନ୍ତୁ ଏଥିପାଇଁ ଅଧିକରୁ ଅଧିକ ପ୍ରାକ୍ଟିସର ଆବଶ୍ୟକତା ପଡିଥାଏ । କିନ୍ତୁ ଯଦି ଆପଣ ଛକା ମାରିବାର ସାର୍ମଥ୍ୟ ରଖୁଛନ୍ତି ଏବଂ ସେହିଭଳି ବଲ ପଡୁଥାଏ ତେବେ ଷ୍ଟ୍ରାଇକ ରୋଟେଟ କରିବା ବଦଳରେ ଛକା କାହିଁକି ନ ମାରିବ?

ଦକ୍ଷିଣ ଆଫ୍ରିକା ବିପକ୍ଷ ଦ୍ଵିତୀୟ ଦିନିକିଆ ମ୍ୟାଚରେ ଇଶାନ କିଷାନ ନିଜ ହୋମଗ୍ରାଉଣ୍ଡ ରାଞ୍ଚିରେ ୮୪ ବଲରୁ ବିସ୍ଫୋରକ ୯୩ ରନର ଇନିଂସ ଖେଳିଥିଲେ । ଯେଉଁଥିରେ ୭ ବିଶାଳ ଛକା ଓ ୪ଟି ଚୌକା ରହିଥିଲା । ତେବେ ଶତକରୁ ଅଳ୍ପକେ ବଞ୍ଚିତ ହୋଇଥିଲେ ଇଶାନ । ଘରୋଇ ଗ୍ରାଉଣ୍ଡରେ ଶତକ ମାରିବା ସମସ୍ତଙ୍କର ଇଚ୍ଛା ଥାଏ କିନ୍ତୁ ଏହି ସ୍ୱପ୍ନକୁ ପୂରା କରିବା ପୂର୍ବରୁ ପ୍ୟାଭିଲିୟନ ଫେରିଥିଲେ ଇଶାନ । କ୍ରିଜରେ ଜମିଥିଲେ ମଧ୍ୟ ୭ ରନ୍ ପାଇଁ ଶତକରୁ ବଞ୍ଚିତ ହୋଇଥିଲେ ଇଶାନ ।