ନୁଆଦିଲ୍ଲୀ : ଅକ୍ଟୋବର ୫ରୁ ଭାରତରେ ଖେଳାଯାଉଥିବା ବିଶ୍ୱକପ ୨୦୨୩ କାଲି ଶେଷ ହେବ। କାଲି ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଫାଇନାଲ ମ୍ୟାଚରେ ମୁହାଁମୁହିଁ ହେବେ ଭାରତ-ଅଷ୍ଟ୍ରେଲିଆ। ଏହି ମ୍ୟାଚକୁ ନେଇ ବହୁ ଚର୍ଚ୍ଚା ଆଲୋଚନା କରାଯାଉଛି। ଭାରତ ଚଳିତ ବିଶ୍ବକପ୍‌ରେ ଅପରାଜେୟ ରହିଥିଲେ ମଧ୍ୟ କାଲି କଣ ହେବ ତାହା କହିବା ଅସମ୍ଭବ। କାରଣ ଅଷ୍ଟ୍ରେଲିଆ ଟିମ୍‌କୁ ହାଲକାରେ ନେଇ ପାରିବନି ଭାରତ।

ଭାରତ ଚଳିତ ବିଶ୍ୱକପରେ ଏଯାବତ୍ ଅପରାଜେୟ ରହିଥିବା ବେଳେ ଲିଗ୍ ପର୍ଯ୍ୟାୟରେ ପ୍ରଥମ ଦୁଇଟି ମ୍ୟାଚ୍ ହାରିବା ପରେ ଜବରଦସ୍ତ ପ୍ରତ୍ୟାବର୍ତ୍ତନ କରିଥିଲା ଅଷ୍ଟ୍ରେଲିଆ। ଲଗାତାର ୮ଟି ମ୍ୟାଚ୍ ଜିତି ଫାଇନାଲରେ ପହଞ୍ଚିଛି ଅଷ୍ଟ୍ରେଲିଆ । ଭାରତ ଓ ଅଷ୍ଟ୍ରେଲିଆ ୨୦ ବର୍ଷ ପରେ ଦିନିକିଆ ବିଶ୍ୱକପର ଫାଇନାଲରେ ମୁହାଁମୁହିଁ ହେଉଛନ୍ତି । ଉଭୟ ଦଳ ଶେଷଥର ୨୦୦୩ ବିଶ୍ବକପ୍ ଫାଇନାଲରେ ପରସ୍ପରକୁ ଭେଟିଥିଲେ । ଜୋହାନ୍ସବର୍ଗରେ ଖେଳାଯାଇଥିବା ସେହି ଫାଇନାଲରେ ଭାରତକୁ ୧୨୫ ରନରେ ହରାଇ ଟାଇଟଲ୍ ଜିତିଥିଲା ଅଷ୍ଟ୍ରେଲିଆ। ସେହି ପରାଜୟର ପ୍ରତିଶୋଧ ନେବାକୁ ଏବେ ଭାରତ ପାଖରେ ସୁଯୋଗ ରହିଛି। ଊଭୟ ଦଳ ମଧ୍ୟରେ ଏକ‌ ରୋମାଞ୍ଚକର ମୁକାବିଲା ଆଶା କରାଯାଉଛି ।

ବିଶ୍ୱକପ୍ ପୁରସ୍କାର ରାଶି

ବିଶ୍ୱକପ ବର୍ତ୍ତମାନ ଶେଷ ପର୍ଯ୍ୟାୟରେ ଅଛି। ୪୬ ଦିନର ଏହି ବଡ ଇଭେଣ୍ଟରେ ଭାରତରେ ୪୭ ଟି ମ୍ୟାଚ୍ ଖେଳାଯାଇଛି। ବର୍ତ୍ତମାନ ଶେଷ ତଥା ଅନ୍ତିମ ମ୍ୟାଚ୍ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯିବ। ଏହି ମ୍ୟାଚ୍‌ରେ ଭାରତ ଏବଂ ଅଷ୍ଟ୍ରେଲିଆର ଦଳ ମୁହାଁମୁହିଁ ହେବେ। ଭାରତ ଏପର୍ଯ୍ୟନ୍ତ ଦୁଇଥର ଚାମ୍ପିୟନ ହୋଇଛି ଏବଂ ଅଷ୍ଟ୍ରେଲିଆ ପାଞ୍ଚ ଥର ଟାଇଟଲ ଜିତିବାରେ ସଫଳ ହୋଇଛି। ୧୨ ବର୍ଷ ପରେ ବିଜେତା ହେବାକୁ ଟିମ୍ ଇଣ୍ଡିଆ ନଜର ରଖିଛି । ଏହି ମ୍ୟାଚ୍ ଜିତୁଥିବା ଦଳ ଉପରେ ଟଙ୍କା ବର୍ଷା ହେବ ।

ଟୁର୍ଣ୍ଣାମେଣ୍ଟ ଆରମ୍ଭ ପୂର୍ବରୁ ମଧ୍ୟ ଆଇସିସି ପୁରସ୍କାର ରାଶି ଘୋଷଣା କରିଥିଲା। ଆଇସିସି ଟୁର୍ନାମେଣ୍ଟ ପାଇଁ ମୋଟ୍‌ ୧୦ ମିଲିୟନ ଆମେରିକୀୟ ଡଲାର ପୁରସ୍କାର ରାଶି ଘୋଷଣା କରିଥିଲା।  ଯାହାର ମୂଲ୍ୟ ଭାରତୀୟ ମୁଦ୍ରାରେ ୮୨.୯୩ କୋଟି ଟଙ୍କା। ପୁରସ୍କାର ରାଶିରେ ଚାମ୍ପିୟନ୍‌ ଟିମ୍‌କୁ ଚାରି ମିଲିୟନ ଆମେରିକୀୟ ଡଲାର ଅର୍ଥାତ ୩୩.୧୭ କୋଟି ମିଳିବ। ଏଥି ସହିତ ରନର୍ସ ଅପ୍‌ ଟିମ୍‌କୁ ଦୁଇ ନିୟୁତ ଆମେରିକୀୟ ଡଲାର ଅର୍ଥାତ ୧୬.୫୯ କୋଟି ଟଙ୍କା ମିଳିବ।

ସେମିଫାଇନାଲ ଏବଂ ଗ୍ରୁପ୍ ରାଉଣ୍ଡରେ ହାରିଥିବା ଦଳଗୁଡିକୁ ମିଳିବ ଏତିକି ଟଙ୍କା

ସେମିଫାଇନାଲରେ ହାରିଥିବା ଦଳଗୁଡିକ ୬.୬୬ ପାଇବେ। ସେମିଫାଇନାଲରେ ଦକ୍ଷିଣ ଆଫ୍ରିକା ଏବଂ ନ୍ୟୁଜିଲ୍ୟାଣ୍ଡକୁ ପରାଜୟର ସାମ୍ନା କରିବାକୁ ପଡିଥିଲା। ଏଥି ସହିତ ଗ୍ରୁପ୍ ରାଉଣ୍ଡ, ପାକିସ୍ତାନ, ଆଫଗାନିସ୍ତାନ, ଇଂଲଣ୍ଡ, ଶ୍ରୀଲଙ୍କା, ବାଂଲାଦେଶ ଏବଂ ନେଦରଲ୍ୟାଣ୍ଡରେ ବାଦ ପଡିଥିବା ଦଳକୁ ୮୩.୨୯ ଲକ୍ଷ ଟଙ୍କା ଲେଖାଏଁ ମିଳିବ।

ନୂଆଦିଲ୍ଲୀ : ଚଳିତ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଦିନିକିଆ ବିଶ୍ୱକପ୍‌‌ରେ ଆୟୋଜକ ଭାରତ ଓ ଅଷ୍ଟ୍ରେଲିଆ ଟାଇଟଲ ପାଇଁ ରବିବାର ଫାଇନାଲ ମୁକାବିଲାରେ ଅବତୀର୍ଣ୍ଣ ହେବେ। ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯିବାକୁ ଥିବା ହାଇଭୋଲ୍ଟେଜ ମ୍ୟାଚ୍‌‌ ଉପରେ ସାରା ବିଶ୍ୱର ନଜର ରହିଛି। ବିଶ୍ୱକପ୍‌‌ ଇତିହାସରେ ଦ୍ୱିତୀୟଥର ପାଇଁ ଏହି ଦୁଇ ଦଳ ଫାଇନାଲରେ ପରସ୍ପରକୁ ଭେଟିବେ। ଏହାପୂର୍ବରୁ ୨୦୦୩ ବିଶ୍ୱକପ୍‌‌ରେ ସୌରଭ ଗାଙ୍ଗୁଲିଙ୍କ ନେତୃତ୍ୱରେ ଭାରତ ଫାଇନାଲରେ ଅଷ୍ଟ୍ରେଲିଆଠାରୁ ବୃହତ୍‌‌ ୧୨୫ ରନରେ ପରାସ୍ତ ହୋଇ ରନର୍ସଅପ୍‌‌ ହୋଇଥିଲା।

ସେହିପରି ୨୦୧୫ ବିଶ୍ୱକପ୍‌‌ ସେମି ଫାଇନାଲରେ ଦୁଇଦଳ ମୁହାଁମୁହିଁ ହୋଇଥିଲେ ଏବଂ ଭାରତ ପରାସ୍ତ ହୋଇ ଫାଇନାଲ ଖେଳିବାରୁ ବଞ୍ଚିତ ହୋଇଥିଲା। ଦୁଇ ଦଶନ୍ଧି ପରେ ଦୁଇ ଦେଶ ପୁଣିଥରେ ଫାଇନାଲ ଖେଳିବେ। ଫାଇନାଲରେ କେଉଁ ଦଳ ଚାମ୍ପିଅନ ହେବ ସେ ନେଇ ତର୍କ ବିତର୍କ ଚାଲିଛି। ୨୦୦୩ ଓ ୨୦୨୩ ଫାଇନାଲ ମୁକାବିଲାକୁ ତୁଳନା କଲେ କେତୋଟି ଅସ୍ୱାଭାବିକ୍‌‌ ତଥା ଅଦ୍ଭୁତ ସମାନତା ରହିଛି। ଏହା ‘ଡେଜା ଭୁ’ର ଅନୁଭୂତି ଆଣିଛି। ‘ଡେଜା ଭୁ’ ହେଉଛି ଏକ ପ୍ରସିଦ୍ଧ ଫ୍ରେଞ୍ଚ୍‌‌ ଶବ୍ଦ ଓ ଏହା ଏକ ବିଶେଷ ପ୍ରକାର ଅନୁଭୂତିକୁ ସୂଚାଏ। ଏହାର ଅର୍ଥ ହେଉଛି ପୂର୍ବରୁ ଏହି ସମାନ ପ୍ରକାର ସ୍ଥିତି ଅନୁଭବ କରିଥିବା କିମ୍ବା ପୂର୍ବରୁ ମଧ୍ୟ ସମାନ ପ୍ରକାର ସ୍ଥିତି ବା ସ୍ଥାନ ଦେଖିଥିବାର ଅବିକଳ ଅନୁଭୂତି। ଦୁଇଟି ବିଶ୍ୱକପ୍‌‌ (୨୦୦୩-୨୦୨୩)ରେ ସମାନତା ତଥା ବିଶ୍ୱକପ୍‌‌ ଇତିହାସରେ ଏହି ‘ଡେଜା ଭୁ’ ବା ସମାନ ପ୍ରକାର ସ୍ଥିତିର ଅନୁଭୂତି ନେଇ ଆଲୋଚନା କରିବା।

୧. ଉଭୟ ଦଳର କ୍ରମାଗତ ଦଶମ ବିଜୟ

୨୦୦୩ ଓ ୨୦୨୩ ବିଶ୍ୱକପ୍‌‌ରେ ଦୁଇ ଦଳ ମଧ୍ୟରେ ଏକ ଅସାଧାରଣ ସମାନତା ରହିଛି। ୨୦୦୩ ବିଶ୍ୱକପ୍‌‌ରେ ରିକି ପଣ୍ଟିଂଙ୍କ ନେତୃତ୍ୱରେ ଅଷ୍ଟ୍ରେଲିଆ କ୍ରମାଗତ ୧୦ଟି ମ୍ୟାଚ୍‌‌ରେ ବିଜୟୀ ହୋଇ ଫାଇନାଲରେ ପ୍ରବେଶ କରିଥିଲା। ସେହିପରି ଚଳିତ ୨୦୨୩ ବିଶ୍ୱକପ୍‌‌ରେ ଭାରତ ମଧ୍ୟ କ୍ରମାଗତ ୧୦ଟି ବିଜୟ ହାସଲ କରି ଫାଇନାଲରେ ପ୍ରବେଶ କରିଛି। ୨୦୦୩ରେ ଅଷ୍ଟ୍ରେଲିଆ ଯେପରି ଆଧିପତ୍ୟ ବିସ୍ତାର କରି ଖେଳିଥିଲା ଏଥର ଭାରତ ମଧ୍ୟ ତାହାଠାରୁ ଆହୁରି ଉନ୍ନତ ଖେଳ ପ୍ରଦର୍ଶନ କରି ପ୍ରଭାବୀ ସାବ୍ୟସ୍ତ ହୋଇଛି। ୨୦୦୩ରେ ଭାରତ ଗ୍ରୁପ୍‌‌ ମ୍ୟାଚ୍‌‌ରେ ଅଷ୍ଟ୍ରେଲିଆଠାରୁ ପରାସ୍ତ ହୋଇଥିଲା। ସେହିପରି ଚଳିତ ବିଶ୍ୱକପ୍‌‌ରେ ଅଷ୍ଟ୍ରେଲିଆ ମଧ୍ୟ ଭାରତଠାରୁ ଗ୍ରୁପ୍‌‌ ମ୍ୟାଚ୍‌‌ରେ ପରାସ୍ତ ହୋଇଛି। ସେତେବେଳେ ୮ଟି ମ୍ୟାଚ୍‌‌ରେ ବିଜୟୀ ହୋଇ ଭାରତ ଫାଇନାଲରେ ପ୍ରବେଶ କରିଥିଲା। ଏଥର ଅଷ୍ଟ୍ରେଲିଆ ମଧ୍ୟ ସମାନ ୮ଟି ମ୍ୟାଚ୍‌‌ ଜିତି ଫାଇନାଲକୁ ଉଠିଛି।

୨. କାମଚଳା ୱିକେଟକିପର ରାହୁଲ

୨୦୦୩ ବିଶ୍ୱକପ୍‌‌ରେ ସ୍ପେଶାଲିଷ୍ଟ ବ୍ୟାଟର ରାହୁଲ ଦ୍ରାବିଡ କାମଚଳା ୱିକେଟକିପର ଭାବେ ସଫଳତାର ସହ ଦାୟିତ୍ୱ ତୁଲାଇଥିଲେ। ଏହାକୁ ସେତେବେଳେ କ୍ରିକେଟ ପଣ୍ଡିତମାନେ ସହଜରେ ଗ୍ରହଣ କରିପାରି ନଥିଲେ। ଏବେ ୨୦୨୩ରେ ଆଉ ଜଣେ ରାହୁଲ ଅର୍ଥାତ ଲେକେଶ ରାହୁଲ କାମଚଳା ୱିକେଟକିପର ଭାବେ ଦମ୍‌‌ଦାର ପ୍ରଦର୍ଶନ କରିଛନ୍ତି। ସେତେବେଳେ ଦ୍ରାବିଡ୍‌‌ ୧୧ଟି ମ୍ୟାଚ୍‌‌ ଖେଳି ୩୧୮ ରନ ସଂଗ୍ରହ କରିଥିଲେ। ସେହିପରି ଲୋକେଶ ଏଥର ୧୦ଟି ମ୍ୟାଚ୍‌‌ ଖେଳି ୩୮୬ ରନ ସଂଗ୍ରହ କରିଛନ୍ତି। ସ୍ପେଶାଲିଷ୍ଟ ୱିକେଟକିପର ଋଷଭ ପନ୍ତ ଦୁର୍ଘଟଣାରେ ଆହତ ହେବା ଫଳରେ ତାଙ୍କ ସ୍ଥାନରେ ଲୋକେଶଙ୍କୁ ୱିକେଟକିପିଂ କରିବାକୁ ପଡ଼ିଛି। ମଜାର କଥା ହେଉଛି ସେତେବେଳେ ଦ୍ରାବିଡ ଉପ-ଅଧିନାୟକ ଦାୟିତ୍ୱରେ ରହିଥିଲେ। ଏବେ ହାର୍ଦ୍ଦିକ ପାଣ୍ଡ୍ୟାଙ୍କ ଅନୁପସ୍ଥିତିରେ ଲୋକେଶ ଉପ- ଅଧିନାୟକ ଦାୟିତ୍ୱ ନିର୍ବାହ କରୁଛନ୍ତି।

୩. ଭାରତୀୟ ବ୍ୟାଟର ଅଗ୍ରଣୀ ସ୍କୋରର

୨୦୦୩ ଓ ୨୦୨୩ ବିଶ୍ୱକପ୍‌‌ରେ ଆଉ ଏକ ଉଲ୍ଲେଖନୀୟ ସମାନତା ଦେଖିବାକୁ ମିଳିଛି। ସେତେବେଳେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ୬୭୩ ରନ ସଂଗ୍ରହ କରି ସର୍ବାଧିକ ସ୍କୋରର ବିବେଚିତ ହୋଇଥିଲେ। ଏଥର ବିରାଟ କୋହଲି ଫାଇନାଲ ମ୍ୟାଚ୍‌‌ ବାକିଥାଇ ସର୍ବାଧିକ ୭୧୧ ରନ ସଂଗ୍ରହ କରି ଆଗରେ ରହିଛନ୍ତି ଓ ରହିବେ ମଧ୍ୟ।

୪. ଉଭୟ ଦଳର ଲକ୍ଷ୍ୟ ଥିଲା ତୃତୀୟ ଟାଇଟଲ

୨୦୦୩ରେ ରିକି ପଣ୍ଟିଂଙ୍କ ନେତୃତ୍ୱରେ ଅଷ୍ଟ୍ରେଲିଆ ତୃତୀୟଥର ପାଇଁ ବିଶ୍ୱ ଚାମ୍ପିଅନ ହେବା ଲକ୍ଷ୍ୟରେ ରହିଥିଲା ଓ ଏଥିରେ ସଫଳ ମଧ୍ୟ ହୋଇଥିଲା। ଏଥର ରୋହିତ ଶର୍ମାଙ୍କ ନେତୃତ୍ୱରେ ଭାରତ ତୃତୀୟଥର ପାଇଁ ଚାମ୍ପିଅନ ହେବା ଲକ୍ଷ୍ୟରେ ରହିଛି। ରବିବାର ମଧ୍ୟରାତ୍ରି ବେଳକୁ ଭାରତ ଚାମ୍ପିଅନ ହେବ କି ନା ତାହା ସ୍ପଷ୍ଟ ହୋଇଯାଇଥିବ। ଭାରତ ପୂର୍ବରୁ କପିଳଦେବଙ୍କ ନେତୃତ୍ୱରେ ୧୯୮୩ରେ ଓ ମହେନ୍ଦ୍ର ସିଂ ଧୋନିଙ୍କ ନେତୃତ୍ୱରେ ୨୦୧୧ରେ ବିଶ୍ୱକପ୍‌‌ ଚାମ୍ପିଅନ ହେବାର ଗୌରବ ଅର୍ଜନ କରିଥିଲା। ସେହିପରି ୨୦୦୩ ପୂର୍ବରୁ ଅଷ୍ଟ୍ରେଲିଆ ୧୯୮୭ରେ ଓ ୧୯୯୯ରେ ଟାଇଟଲ ହାସଲ କରିଥିଲା।

୫. ପ୍ରଦର୍ଶନରେ ଉଭୟ ଦଳ ମଧ୍ୟରେ ସମାନତା

୨୦୦୩ରେ ଅଷ୍ଟ୍ରେଲିଆର ଓ ୨୦୨୩ରେ ଭାରତର ପ୍ରଦର୍ଶନରେ ଯଥେଷ୍ଟ ସମାନତା ରହିଛି। ସେତେବେଳେ ଅଷ୍ଟ୍ରେଲିଆ ଯେପରି ଓ ଯେଉଁ ଢଙ୍ଗରେ ଖେଳିଥିଲା ଏଥର ଭାରତ ଠିକ୍‌‌ ସେହିପରି ସମାନ ଢଙ୍ଗରେ ଖେଳ ପ୍ରଦର୍ଶନ କରୁଛି। ବୋଲିଂ, ବ୍ୟାଟିଂ ଓ ଫିଲ୍ଡିଂରେ ଦୁଇ ଦଶନ୍ଧି ପରେ ଉଭୟ ଦଳ ମଧ୍ୟରେ ସମାନ ପ୍ରକାର ପ୍ରଭାବ ଦେଖିବାକୁ ମିଳିଛି। ତେଣୁ ଏହି ଦୃଷ୍ଟିକୋଣରୁ ବିଚାର କଲେ ଭାରତ ଏଥର ବାଜି ମାରି ଚାମ୍ପିଅନ ହେବ ବୋଲି ପ୍ରଶଂସକ ଓ କ୍ରିକେଟ ପଣ୍ଡିତମାନେ ଅନୁମାନ କରୁଛନ୍ତି। ଏବେ କେବଳ ରବିବାରକୁ ଅପେକ୍ଷା।

ଅହମ୍ମଦାବାଦ : ନରେନ୍ଦ୍ର ମୋଦୀ ଷ୍ଟାଡିୟମରେ ଖେଳାଯାଉଥିବା ଭାରତ-ପାକିସ୍ତାନ ହାଇଭୋଲଟେଜ୍‌ ମ୍ୟାଚ୍‌ରେ ବିଜୟ ହାସଲ କରିଛି ଭାରତ। ପାକିସ୍ତାନ ବିପକ୍ଷରେ ଦମ୍‌ଦାର ବିଜୟ ସହ ଭାରତ ଚଳିତ ବିଶ୍ବକପ୍‌ରେ ଏପର୍ଯ୍ୟନ୍ତ ଖେଳିଥିବା ସମସ୍ତ ୩ ଟି ଲିଗ୍‌ ମ୍ୟାଚରେ ବିଜୟ ସହ ୬ ପଏଣ୍ଟ ହାସଲ କରିଛି। ଆଜି ଖେଳାଯାଉଥିବା ଏହି ରୋମାଞ୍ଚକର ମୁକାବିଲାରେ ପ୍ରଥମେ ଭାରତୀୟ ବୋଲର ଦମ୍‌ ଦେଖାଇଥିଲା ବେଳେ ଭାରତୀୟ ବ୍ୟାଟର ମଧ୍ୟ ସେମାନଙ୍କ ଆକ୍ରମଣାତ୍ମକ ବ୍ୟାଟିଂ ପଦର୍ଶନ କରିଛନ୍ତି। ଯାହା ଫଳରେ ଭାରତ ୩୦.୩ ଓଭରରେ ୩ ୱିକେଟ ହରାଇ ପାକିସ୍ତାନ ପକ୍ଷରୁ ଦିଆଯାଇଥିବା ୧୯୨ ରନ୍‌ର ବିଜୟ ଲକ୍ଷ୍ୟକୁ ହାସଲ କରିନେଇଛି।

ଆଜିର ମ୍ୟାଚରେ ଭାରତ ଅଧିନାୟକ ରୋହିତ ଶର୍ମା ଟସ୍‌ ଜିତି ପାକିସ୍ତାନକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ। ଯାହା ଫଳରେ ପାକିସ୍ତାନ ପ୍ରଥମେ ବ୍ୟାଟିଂ କରିଥିଲା। ଅଧିନାୟକ ରୋହିତ ଶର୍ମାଙ୍କ ବୋଲିଂ ନିଷ୍ପତ୍ତିକୁ ନେଇ ପ୍ରଶ୍ନ ଉଠୁଥିବା ବେଳେ ଭାରତୀୟ ବୋଲରମାନେ ତାହାକୁ ଠିକ ବୋଲି ପ୍ରମାଣିତ କରି ୧୯୧ ରନ୍‌ରେ ପାକିସ୍ତାନକୁ ଅଲ୍‌ଆଉଟ କରିଦେଇଥିଲେ। ଶାର୍ଦ୍ଦୁଲ ଠାକୁରଙ୍କୁ ଛାଡି ଭାରତର ସମସ୍ତ ୫ ବୋଲ ଦୁଇ ଦୁଇଟି ୱିକେଟ ନେଇଥିଲେ। ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ଯଶପ୍ରୀତ ବୁମରା, କୁଲଦୀପ ଯାଦବ, ମହମ୍ମଦ ଶିରାଜ ସମସ୍ତେ ଦୁଇଟି ଲେଖାଏଁ କରି ପାକିସ୍ତାନର ୧୦ ୱିକେଟ ବାଣ୍ଟି ନେଇଥିଲେ।

୧୯୨ ରନର ପିଛା କରୁଥିବା ଭାରତ ବିସ୍ଫୋରକ ଷ୍ଟାଇଲରେ ଇନିଂସ ଆରମ୍ଭ କରିଥିଲା। ଶୁବମନ ଗିଲ୍‌ ୧୧ ବଲରେ ୪ ଚୌକା ସହ ୧୬ ରନ କରିବା ପରେ ଆଫ୍ରିଦିଙ୍କ ବଲରେ ଆଉଟ ହୋଇଥିଲେ। ଏହାପରେ ରୋହିତ ଓ ବିରାଟ ଦ୍ରୁତଗତିରେ ରନ ସଂଗ୍ରହ କରିବା ଆରମ୍ଭ କରିଥିଲେ। ବିଶେଷ କରି ରୋହିତଙ୍କ ବ୍ୟାଟରୁ ବଡ଼ ଶଟ ଦେଖିବାକୁ ମିଳିଥିଲା। ଛକା ପରେ ଛକା ବର୍ଷା କରି ରୋହିତ ନରେନ୍ଦ୍ର ମୋଦୀ ଷ୍ଟାଡିୟମରେ ଥିବା ୧ ଲକ୍ଷ ୩୦ ହଜାର ଦର୍ଶକଙ୍କୁ ବିମୋହିତ କରିଥିଲେ। ଭାରତ ପକ୍ଷରୁ ଅଧିନାୟ ରୋହିତ ଶର୍ମା ୬୩ ବଲରେ ବିସ୍ଫୋରକ ୮୬ ରନର ଇନିଂସ ଖେଳିଛନ୍ତି। ଏଥିରେ ସେ ୬ଟି ଛକା ଓ ୬ଟି ଚୌକା ମାରିଛନ୍ତି। ଅନ୍ୟମାନଙ୍କ ମଧ୍ୟରେ ଶ୍ରେୟସ ଆୟର ୬୨ ବଲରେ ୫୩ ରନ୍‌, କେଏଲ ରାହୁଲ ୧୯, କୋହଲି ୧୬, ଶୁବମନ ଗିଲ ୧୬ ରନ୍‌ କରିଛନ୍ତି।

ବିଶ୍ବକପ୍‌ରେ ୮ ଥର ପାକିସ୍ତାନକୁ ହରାଇଲା ଭାରତ 

ଭାରତ ଏପର୍ଯ୍ୟନ୍ତ ବିଶ୍ବକପ୍‌ରେ ପାକିସ୍ତାନ ସହ ମୋଟ ୮ ଥର ଖେଳିଛି। ଆଉ ସମସ୍ତ ୮ଥର ଭାରତ ହିଁ ବିଜୟ ହାସଲ କରିଛି। ୧୯୯୨ ବିଶ୍ୱକପ୍‌‌ରେ ଦୁଇ ଦଳ ପ୍ରଥମଥର ପାଇଁ ମୁହାଁମୁହିଁ ହୋଇଥିଲେ। ଏହାପରେ ଦୁଇ ଦଳ ୧୯୯୬, ୧୯୯୯, ୨୦୦୩, ୨୦୧୧, ୨୦୧୫, ୨୦୧୯ ଓ ଆଜି ୨୦୨୩ ରେ ପରସ୍ପରକୁ ଭେଟିଥିଲେ। ୧୯୯୨ ଓ ୨୦୧୫ରେ ଦୁଇ ଦଳ ଅଷ୍ଟ୍ରେଲିଆରେ ମୁହାଁମୁହିଁ ହୋଇଥିଲେ। ୧୯୯୬, ୨୦୧୧ ମୁକାବଲା ଭାରତରେ ହୋଇଥିଲା। ୧୯୯୯ ଓ ୨୦୧୯ ମୁକାବିଲା ଇଂଲଣ୍ଡରେ ହୋଇଥିଲା। ୨୦୦୩ ମ୍ୟାଚ୍‌‌ ଦକ୍ଷିଣ ଆଫ୍ରିକାରେ ହୋଇଥିଲା। ୨୦୨୩ରେ ମଧ୍ୟ ଭାରତରେ ପାକିସ୍ତାନକୁ ହରାଇଛି ଟିମ୍‌ ଇଣ୍ଡିଆ। ଏଥିସହ ଭାରତ ଏସିଆ, ୟୁରୋପ, ଆଫ୍ରିକା ଓ ଅଷ୍ଟ୍ରେଲିଆ ମହାଦେଶରେ ପାକିସ୍ତାନକୁ ହରାଇଛି।

ଅହମ୍ମଦାବାଦ୍‌‌ : ଆସନ୍ତାକାଲି ଅର୍ଥାତ ଶନିବାର ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିୟମରେ ଭାରତ ଓ ପାକିସ୍ତାନ ମଧ୍ୟରେ ବିଶ୍ୱକପ୍‌‌ର ସବୁଠାରୁ ଚର୍ଚ୍ଚିତ ମ୍ୟାଚ୍‌‌ ଖେଳାଯିବ। ଚଳିତ ୨୦୨୩ ବିଶ୍ବକପ୍‌ରେ ଉଭୟ ଦଳ ଦମ୍‌ଦାର ଫର୍ମରେ ରହିଛନ୍ତି। ଉଭୟ ଦଳ ବର୍ତ୍ତମାନ ପର୍ଯ୍ୟନ୍ତ ଚଳିତ ବିଶ୍ବକପ୍‌ରେ ଦୁଇଟି ଲେଖାଏଁ ମ୍ୟାଚ ଖେଳି ବିଜୟ ହାସଲ କରିସାରିଛନ୍ତି। ଅଷ୍ଟ୍ରେଲିଆ ଏବଂ ଆଫଗାନିସ୍ତାନ ବିପକ୍ଷରେ ଭାରତ ଜିତିଛି। ଏଥି ସହିତ ପାକିସ୍ତାନ ନେଦରଲ୍ୟାଣ୍ଡ ଏବଂ ଶ୍ରୀଲଙ୍କାକୁ ପରାସ୍ତ କରିଛି। ବର୍ତ୍ତମାନ ରୋହିତ ଶର୍ମା ଏବଂ ବାବର ଆଜାମ ବିଜୟର ହ୍ୟାଟ୍ରିକ୍ ହାସଲ କରି ପଏଣ୍ଟ ଟେବୁଲରେ ଅଗ୍ରଣୀ ହେବାକୁ ଲକ୍ଷ୍ୟ ରଖିଛନ୍ତି। ପାକିସ୍ତାନ ବିପକ୍ଷରେ ଭାରତର ବିଶ୍ୱକପ ରେକର୍ଡ ସଂପୂର୍ଣ୍ଣ ଏକତରଫା ରହିଛି। ଦିନିକିଆ ବିଶ୍ୱକପରେ ଭାରତ କେବେ ହେଲେ ପାକିସ୍ତାନ ଠାରୁ ହାରି ନାହିଁ। ଭାରତ ସପକ୍ଷରେ ରେକର୍ଡ ୭-୦ରେ ରହିଛି।

ଅନ୍ୟପଟେ ଭାରତ-ପାକିସ୍ତାନ ହାଇଭୋଲଟେଜ୍‌ ମ୍ୟାଚ୍‌କୁ ନେଇ ପ୍ରଶଂସକମାନେ ମଧ୍ୟ ଉତ୍ସାହିତ ଅଛନ୍ତି। ବିଶ୍ବ କ୍ରିକେଟରେ ଭାରତ-ପାକିସ୍ତାନ ମ୍ୟାଚ କୌଣସି ବିଶ୍ବକପ୍‌ ଫାଇନାଲଠୁ କମ୍‌ ରୋମାଞ୍ଚକର ନୁହେଁ। ଏଥି ସହିତ ଅହମ୍ମଦାବାଦ୍‌‌ ନରେନ୍ଦ୍ର ମୋଦି ଷ୍ଟାଡିୟମରେ ଲକ୍ଷାଧିକ ଦର୍ଶକଙ୍କ ସାମ୍ନାରେ ଏହି ମ୍ୟାଚ ଖେଳାଯିବାକୁ ଥିବା ବେଳେ ପାଣିପାଗ ବିଭାଗ ଦେଇଛି ଖରାପ ଖବର। ପାଣିପାଗ ବିଭାଗ ସୂଚନା ଅନୁସାରେ କାଲି ମ୍ୟାଚରେ ବର୍ଷା ବାଧକ ସାଜିପାରେ। ଶୁକ୍ରବାର ଓ ଶନିବାର ଅହମ୍ମଦାବାଦ ସମେତ ମଧ୍ୟ ଓ ଉତ୍ତର ଗୁଜରାଟରେ କିଛି ଜିଲ୍ଲାରେ ହାଲ୍‌‌କା ବର୍ଷାର ସମ୍ଭାବନା ଅଛି ବୋଲି କୁହାଯାଇଛି।

ଅହମ୍ମଦାବାଦ୍‌‌ ଆଞ୍ଚଳିକ ପାଣିପାଗ କେନ୍ଦ୍ରର ନିର୍ଦ୍ଦେଶକ ମନୋରମା ମହାନ୍ତି କହିଛନ୍ତି, ଆସନ୍ତା ୫ ଦିନ ଯାଏ ଗୁଜରାଟର ପାଣିପାଗ ମୁଖ୍ୟତଃ ଶୁଖିଲା ରହିବ। କିନ୍ତୁ ଅକ୍ଟୋବର ୧୪ରେ ଅହମଦାବାଦର କିଛି ସ୍ଥାନରେ ହାଲୁକାରୁ ମଧ୍ୟମଧରଣର ବର୍ଷା ହେବାର ଆଶଙ୍କା ରହିଛି। ପୂରା ଆକାଶ ମେଘାଚ୍ଛନ୍ନ ରହିବ। ଦିନକ ପରେ ଅହମଦାବାଦ ଓ ବାଂଶକଣ୍ଠା, ସବରକଣ୍ଠା ଓ ଆରାଭଲ୍ଲିରେ ହାଲୁକା ଧରଣର ବର୍ଷା ହୋଇପାରେ। ଶନିବାର ଅହମଦାବାଦରେ କଳା ବାଦଲ ଦେଖାଯିବ ଓ ମ୍ୟାଚ୍‌ ବେଳେ ହାଲୁକା ବର୍ଷା ମଧ୍ୟ ହୋଇପାରେ। ଯାହା କ୍ରିକେଟ ପ୍ରଶଂସକଙ୍କ ପାଇଁ ଚିନ୍ତା ସୃଷ୍ଟି କରିଛି।

ଯଦି ବର୍ଷା ହେତୁ ମ୍ୟାଚ୍ ବାତିଲ ହୁଏ ତେବେ କଣ ହେବ?

ଯଦି ବର୍ଷା ହେତୁ ମ୍ୟାଚ୍ ବାତିଲ ହୁଏ ତେବେ ଭାରତ ଏବଂ ପାକିସ୍ତାନ ଗୋଟିଏ ଲେଖାଏଁ ପଏଣ୍ଟ ପାଇବେ। ଏହି ମ୍ୟାଚ୍ ପାଇଁ କୌଣସି ରିଜର୍ଭ ଡେ ରଖାଯାଇ ନାହିଁ । ଟୁର୍ନାମେଣ୍ଟର ନକ୍ଆଉଟ୍ ମ୍ୟାଚ୍ ପାଇଁ ରିଜର୍ଭ ଡେ ଅଛି। ହେଲେ ପ୍ରଶଂସକମାନେ ଚାହାଁନ୍ତି ଯେ ଏପରି ପରିସ୍ଥିତି ନ ହଉ ଏବଂ ସେମାନେ ପୁରା ମ୍ୟାଚ୍ ଦେଖନ୍ତୁ।

ମ୍ୟାଚ୍ ପୂର୍ବରୁ ଦର୍ଶକଙ୍କୁ ଝୁମାଇବେ ଅରିଜିତ୍, ଶଙ୍କର ମହାଦେବନ୍

ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଶନିବାର ଭାରତ-ପାକିସ୍ତାନ ମ୍ୟାଚ୍ ପୂର୍ବରୁ ଦର୍ଶକଙ୍କ ମନୋରଞ୍ଜନ ପାଇଁ ବିସିସିଆଇ ସ୍ବତନ୍ତ୍ର ପ୍ରସ୍ତୁତି କରିଛି । ବିଶ୍ୱକପ୍ ୨୦୨୩ ପୂର୍ବରୁ କୌଣସି ଉଦଘାଟନୀ ଉତ୍ସବ ହୋଇନଥିଲା । ଏଥିପାଇଁ ବିସିସିଆଇ ସମାଲୋଚିତ ହୋଇଥିଲା । ତେବେ ଭାରତ-ପାକିସ୍ତାନ ହାଇ ଭୋଲଟେଜ୍ ମ୍ୟାଚ୍ ପୂର୍ବରୁ ଏକ ରଙ୍ଗାରଙ୍ଗ କାର୍ଯ୍ୟକ୍ରମ ଆୟୋଜନ କରିବାକୁ ନିଷ୍ପତ୍ତି ନେଇଛି ବିସିସିଆଇ ।

ଭାରତ-ପାକିସ୍ତାନ ମ୍ୟାଚ୍ ପୂର୍ବରୁ ଦେଶର ତିନି ବଡ଼ ମ୍ୟୁଜିକାଲ ସୁପରଷ୍ଟାର ଅରିଜିତ ସିଂ, ଶଙ୍କର ମହାଦେବନ ଓ ସୁଖବିନ୍ଦର ସିଂ ନିଜ ସଂଗୀତର ଯାଦୁରେ ଦର୍ଶକଙ୍କୁ ଆମୋଦିତ କରିବେ । ଏନେଇ ବିସିସିଆଇ ମଧ୍ୟ ସୋସିଆଲ ମିଡ଼ିଆରେ ନିଶ୍ଚିତ କରିଛି।  ଭାରତ-ପାକିସ୍ତାନ ମ୍ୟାଚ୍ ଅପରାହ୍ନ ୨ଟାରୁ ଆରମ୍ଭ ହେବ। ଏଥିପାଇଁ ଟସ୍ ୧.୩୦ରେ ପଡ଼ିବ । ଟସ୍‌ର ଏକ ଘଣ୍ଟା ପୂର୍ବରୁ ଏହି ମ୍ୟୁଜିକାଲ ଇଭେଣ୍ଟ ୧୨.୩୦ରୁ ଆରମ୍ଭ ହେବ । ଏହି ସାଂସ୍କୃତିକ କାର୍ଯ୍ୟକ୍ରମରେ ନେହା କକ୍କର ଏବଂ ସୁନୀଧି ଚୌହାନ ମଧ୍ୟ ସଂଗୀତ ପରିବେଷଣ କରିବେ ବୋଲି କିଛି ମିଡ଼ିଆ ରିପୋର୍ଟରେ କୁହାଯାଇଛି । ଏହି ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ, ଭାରତ-ପାକିସ୍ତାନ ମ୍ୟାଚ୍ ଇନିଂସ ବିରତି ସମୟରେ ମଧ୍ୟ ୧୦ ମିନିଟର ଏକ ସଂଗୀତ ଶୋ’ ହେବ ।

ପ୍ରାୟ ୭ ବର୍ଷ ପରେ ଭାରତୀୟ ମାଟିରେ ଭାରତ-ପାକିସ୍ତାନ ମଧ୍ୟରେ ମ୍ୟାଚ୍ ଖେଳାଯାଉଛି । ଏହା ପୂର୍ବରୁ ଶେଷ ଥର ଉଭୟ ଦଳ ୨୦୧୬ ଟି-୨୦ ବିଶ୍ୱକପରେ କୋଲକାତାରେ ମୁହାଁମୁହିଁ ହୋଇଥିଲେ । ଚଳିତ ଦିନିକିଆ ବିଶ୍ୱକପରେ ଅଂଶଗ୍ରହଣ କରୁଥିବା ପାକ୍ ଦଳର କୌଣସି ଖେଳାଳି ସେହି ମ୍ୟାଚର ଅଂଶବିଶେଷ ନଥିଲେ ।

ନୂଆଦିଲ୍ଲୀ : ଭାରତରେ ଅକ୍ଟୋବର ୫ରୁ ଖେଳାଯିବାକୁ ଥିବା ଦିନିକିଆ ବିଶ୍ୱକପ୍‌‌ ଲାଗି ଅଂଶଗ୍ରହଣକାରୀ ୧୦ଟି ଦଳର ପ୍ରସ୍ତୁତି ଶେଷ ପର୍ଯ୍ୟାୟ ରହିଛି। ଆଜିଠୁ ୩ଟି ଭେନ୍ୟୁ ଯଥା ଗୁଆହାଟୀ, ହାଇଦରାବାଦ ଓ ଥିରୁଅନନ୍ତପୁରମରେ ସମସ୍ତ ୱାର୍ମଅପ୍‌‌ ମ୍ୟାଚ୍‌‌ ଆରମ୍ଭ ହୋଇଛି । ପ୍ରତ୍ୟେକ ଦଳ ୨ଟି ଲେଖାଏଁ ମ୍ୟାଚ୍‌‌ ଖେଳିବାର କାର୍ଯ୍ୟକ୍ରମ ରହିଛି। ଏହା ଫଳରେ ମୁଖ୍ୟ ଟୁର୍ଣ୍ଣାମେଣ୍ଟ ଆରମ୍ଭ ପୂର୍ବରୁ ପ୍ରତ୍ୟେକ ଦଳ ସେମାନଙ୍କ ଶକ୍ତି ଓ ସାମର୍ଥ୍ୟ ସହ ଦୋଷ ଓ ଦୁର୍ବଳତାକୁ ପରୀକ୍ଷା କରିନେବେ।  ୱାର୍ମ ଅପ୍‌‌ ମ୍ୟାଚ ସେପ୍ଟେମ୍ବର ୨୯, ୩୦, ଅକ୍ଟୋବର ୨ ଓ ୩ରେ ଅନୁଷ୍ଠିତ ହେବ। ଅକ୍ଟୋବର ୫ ତାରିଖରେ ଡିଫେଣ୍ଡିଂ ଚାମ୍ପିଅନ୍‌‌ ଇଂଲଣ୍ଡ ଓ ରନର୍ସ ଅପ୍‌‌ ନ୍ୟୁଜିଲାଣ୍ଡ ମଧ୍ୟରେ ମୁକାବିଲାରୁ ୨୦୨୩ ଦିନିକିଆ ବିଶ୍ୱକପ୍‌‌ ଆନୁଷ୍ଠାନିକ ଆରମ୍ଭ ହେବ।

ତେବେ ବିଶ୍ବକପ୍‌ ଆରମ୍ଭ ହେବା ପୂର୍ବରୁ ଆସନ୍ତୁ ଜାଣିବା ଅଂଶଗ୍ରହଣକାରୀ ୧୦ଟି ଦଳର ଚୂଡ଼ାନ୍ତ ସ୍କ୍ୱାଡରେ ରହିଛନ୍ତି……..

ଭାରତ

ବ୍ୟାଟର୍‌‌- ରୋହିତ୍‌‌ ଶର୍ମା (ଅଧିନାୟକ), ଶୁବମାନ ଗିଲ୍‌‌, ବିରାଟ କୋହଲି, ଶ୍ରେୟାସ ଆୟର, ସୂର୍ଯ୍ୟକୁମାର ଯାଦବ, ଅଲ୍‌‌ରାଉଣ୍ଡର-ହାର୍ଦ୍ଦିକ ପାଣ୍ଡ୍ୟା, ରବୀନ୍ଦ୍ର ଜାଡେଜା, ରବିଚନ୍ଦ୍ରନ ଅଶ୍ୱିନ, ଶାଦ୍ଦୁଳ ଠାକୁର, ୱିକେଟ୍‌‌ରକ୍ଷକ- ଲୋକେଶ ରାହୁଲ, ଇଶାନ କିଶାନ, ବୋଲର-ଯଶପ୍ରୀତ୍‌‌ ବୁମ୍‌‌ରା, କୁଲଦୀପ ଯାଦବ, ମହମ୍ମଦ ସାମି, ମହମ୍ମଦ ସିରାଜ।

ଦକ୍ଷିଣ ଆଫ୍ରିକା

ବ୍ୟାଟର୍‌‌- ତେମ୍ବା ବାଭୁମା (ଅଧିନାୟକ), ରିଜା ହେଣ୍ଡ୍ରିକ୍ସ, ଆଇଡେନ ମାର୍କରାମ, ଡେଭିଡ ମିଲର, ରାସି ଭାନ୍‌‌ ଡର୍‌‌ ଡୁସେନ, ଅଲ୍‌‌ରାଉଣ୍ଡର- ମାର୍କୋ ଜାନସେନ ଓ ଆଣ୍ଡିଲ ଫେଲୁକୱାଓ, ୱିକେଟ୍‌‌ରକ୍ଷକ- କ୍ୱିଣ୍ଟନ ଡି କକ୍‌‌ ଓ ହେନରିକ୍‌‌ କ୍ଲାସେନ, ବୋଲର- ଗେରାଲ୍ଡ କୋଏଜି, କେଶବ ମହାରାଜ, ଲୁନ୍‌‌ଗି ଏନ୍‌‌ଗିଡି, କାଗିସୋ ରାବାଡା, ତାବ୍ରେଜ ସାମ୍‌‌ସି, ଲିଜାର୍ଡ ୱିଲିୟମ୍ସ।

ଶ୍ରୀଲଙ୍କା

ବ୍ୟାଟର୍‌‌- ପାଥୁମ ନିଶାଙ୍କା, ଦିମୁଥ କରୁଣାରତ୍ନେ, ଅଲ୍‌‌ରାଉଣ୍ଡର- ଦାସୁନ ସାନକା (ଅଧିନାୟକ), ଚାରିତ ଆଶାଲଙ୍କା, ଧନଞ୍ଜୟ ଡି ସିଲ୍‌‌ଭା, ୱିକେଟ୍‌‌ରକ୍ଷକ- କୁଶାଲ ମେଣ୍ଡିସ, କୁଶାଲ ପେରେରା, ସାଦୀରା ସମରବିକ୍ରମା, ବୋଲର- ଦୁସାନ ହେମନ୍ଥ, ମାହୀଶ ଥିକସାନା, ଦୁନିଥ ୱେଲାଲାଗେ, କସୁନ ରଜିଥା, ମଥିଶା ପତିରାଣା, ଲାହିରୁ କୁମାର, ଦିଲସାନ ମଦୁଶଙ୍କା।

ବାଂଲାଦେଶ

ବ୍ୟାଟର୍‌‌- ନାଜମୁଲ ହୋସେନ ସାଣ୍ଟୋ, ତୋହିଦ ହୃଦୟ, ତାଞ୍ଜିଦ ହାସନ, ଅଲ୍‌‌ରାଉଣ୍ଡର- ଶାକିବ ଅଲ୍‌‌ ହାସନ (ଅଧିନାୟକ), ମେହେଦୀ ହାସାନ, ମହମ୍ମଦୁଲ୍ଲା ରିୟାଦ, ମେହଦୀ ହାସନ ମିରାଜ, ୱିକେଟ୍‌‌ରକ୍ଷକ- ମୁସଫିକର ରହିମ, ଲିଟନ ଦାସ, ବୋଲର- ତାସକିନ ଅହମ୍ମଦ, ମୁସ୍ତାଫିଜୁର ରେହମାନ, ହାସନ ମହମ୍ମଦ, ଶୋରିଫୁଲ ଇସଲାମ, ନାସୁମ ଅହମ୍ମଦ, ତାଞ୍ଜିମ ହାସାନ ସାକିବ।

ଅଷ୍ଟ୍ରେଲିଆ

ବ୍ୟାଟର୍‌‌- ଡେଭିଡ୍‌‌ ୱାର୍ଣ୍ଣର, ଷ୍ଟିଭ ସ୍ମିଥ, ଟ୍ରାଭିସ୍‌‌ ହେଡ୍‌‌, ମାର୍ନସ ଲାବୁସେନ, ଅଲ୍‌‌ରାଉଣ୍ଡର: କାମେରନ ଗ୍ରୀନ, ମିଚେଲ ମାର୍ଶ, ଗ୍ଲେନ ମ୍ୟାକ୍ସୱେଲ, ମାର୍କସ ଷ୍ଟୋଇନିସ, ସିନ ଆବଟ୍ଟ, ୱିକେଟ୍‌‌ରକ୍ଷକ- ଆଲେକ୍ସ କ୍ୟାରୀ ଓ ଜୋଶ୍‌‌ ଇଂଲିଶ, ବୋଲର- ପ୍ୟାଟ୍‌‌ କମିନ୍ସ (ଅଧିନାୟକ), ମିଚେଲ ଷ୍ଟାର୍କ, ଜୋଶ ହାଜଲେଉଡ୍‌‌, ଆଦାମ ଜାମ୍ପା।

ନ୍ୟୁଜିଲାଣ୍ଡ

ବ୍ୟାଟର- କେନ୍‌‌ ୱିଲିୟମସନ (ଅଧିନାୟକ), ଅଲ୍‌‌ରାଉଣ୍ଡର- ମାର୍କ ଚାପମ୍ୟାନ, ଡାରିଲ ମିଚେଲ, ଜିମ୍ମି ନୀଶାମ, ରଚିନ ରବୀନ୍ଦ୍ର, ୱିଲ୍‌‌ ୟଙ୍ଗ, ମିଚେଲ ସାଣ୍ଟନର, ୱିକେଟ୍‌‌ରକ୍ଷକ: ଡେଭନ କନୱେ, ଟମ୍‌‌ ଲାଥମ, ଗ୍ଲେନ ଫିଲିପ୍ସ, ବୋଲର- ଟ୍ରେଣ୍ଟ ବୋଲ୍ଟ, ଲକି ଫର୍ଗୁସନ, ମ୍ୟାଟ୍‌‌ ହେନରୀ, ଇଶ୍‌‌ ଶୋଧୀ, ଟିମ୍‌‌ ସୌଦୀ।

ଆଫଗାନିସ୍ତାନ

ବ୍ୟାଟର୍‌‌- ଇବ୍ରାହିମ ଜଡ୍ରାନ, ରିଆଜ ହାସାନ, ନାଜିବୁଲ ଜଡ୍ରାନ, ହସମତୁଲ୍ଲା ସାହିଦୀ (ଅଧିନାୟକ), ଅଲ୍‌‌ରାଉଣ୍ଡର- ରହମତ୍‌‌ ଶାହ, ମହମ୍ମଦ ନବୀ, ରଶିଦ ଖାନ, ଅଜମତୁଲ୍ଲା ଓମାଜାଇ, ୱିକେଟ୍‌‌ରକ୍ଷକ- ରହମନଉଲ୍ଲା ଗୁର୍‌‌ବାଜ ଓ ଇକ୍ରାମ ଆଲିଖିଲ, ବୋଲର- ଅବଦୁଲ୍ଲ ରହମନ, ନୁର୍‌‌ ଅହମ୍ମଦ, ମୁଜିବ ଉର୍‌‌ ରେହମାନ, ଫଜଲହକ୍‌‌ ଫାରୁକି, ନବୀନ-ଉଲ୍‌‌-ହକ।

ଇଂଲଣ୍ଡ

ବ୍ୟାଟର୍‌‌- ହ୍ୟାରୀ ବ୍ରୁକ୍‌‌, ଲିଆମ ଲିଭିଂଷ୍ଟୋନ, ଡାୱିଡ୍‌‌ ମଲାନ, ଜୋ ରୁଟ୍‌‌, ଅଲ୍‌‌ରାଉଣ୍ଡର- ମୋଇନ ଅଲ୍ଲୀ, ବେନ୍‌‌ ଷ୍ଟୋକ୍ସ, ସାମ୍‌‌ କୁରାନ, ଡେଭିଡ୍‌‌ ୱିଲୀ, କ୍ରିସ୍‌‌ ୱକ୍ସ, ୱିକେଟ୍‌‌ରକ୍ଷକ- ଜୋଶ ବଟଲର୍‌‌ (ଅଧିନାୟକ) ଓ ଜନ୍ନୀ ବେୟାରଷ୍ଟୋ, ବୋଲର- ଗସ୍‌‌ ଆଟକିନସନ, ଆଦିଲ ରଶିଦ, ରିସି ଟୋପଲେ ଓ ମାର୍କ ଉଡ୍‌‌।

ପାକିସ୍ତାନ

ବ୍ୟାଟର୍‌‌- ବାବର ଆଜମ (ଅଧିନାୟକ), ଅବଦୁଲ୍ଲା ସଫିକ, ଫକର ଜମାନ, ଇମାମ-ଉଲ୍‌‌-ହକ୍‌‌, ଅଲ୍‌‌ରାଉଣ୍ଡର- ଇଫତିକାର ଅହମ୍ମଦ, ଆଘା ସଲମାନ, ସାଉଦ ସକିଲ, ଶାଦବ ଖାନ, ମହମ୍ମଦ ନୱାଜ, ୱିକେଟ୍‌‌ରକ୍ଷକ- ମହମ୍ମଦ ରିଜୱାନ, ବୋଲର- ହାରିସ ରୌଫ, ହାସନ ଅଲ୍ଲୀ, ମହମ୍ମଦ ୱାସିମ ଜୁନିଅର, ଶାହିନ ଆଫ୍ରିଦୀ, ଉସମାନ ମୀର।

ନେଦରଲାଣ୍ଡ୍‌‌ସ

ବ୍ୟାଟର୍‌‌- ବିକ୍ରମଜିତ୍‌‌ ସିଂହ, ସାକିବ ଜୁଲଫିକର, ସିବ୍ରାଣ୍ଡ ଏନଗେଲ୍‌‌ବ୍ରେଚ୍‌‌, ଅଲ୍‌‌ରାଉଣ୍ଡର- କଲିନ ଆକରମାନ, ବାସ୍‌‌ ଡି ଲିଡ୍‌‌, ତେଜା ନିଦାମାନୁରୁ, ଶାରିଜ ଅହମ୍ମଦ, ମାକ୍ସ ଓଡୋୱଡ, ରୋଏଲଫ୍‌‌ ଭାନ ଡର୍‌‌ ମର୍‌‌ୱେ, ୱିକେଟ୍‌‌ରକ୍ଷକ- ସ୍କଟ୍‌‌ ଏଡ୍‌‌ୱାର୍ଡ୍ସ (ଅଧିନାୟକ) ଓ ୱେସଲୀ ବାରେସି, ବୋଲର- ଲୋଗାନ ଭାନ୍‌‌ ବିକ୍‌‌, ର‍୍ୟାନ କ୍ଲେଇନ, ଆର୍ଯ୍ୟନ ଦତ୍ତ, ପଲ୍‌‌ ଭାନ୍‌‌ ମିକେରନ।

ନୂଆଦିଲ୍ଲୀ : ଅକ୍ଟୋବର ୫ରୁ ଭାରତରେ ଖେଳାଯିବ ବିଶ୍ୱକପ ୨୦୨୩। ବିଶ୍ବକପ୍‌ ନେଇ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ରହିଥିବା ବେଳେ ଆଜି ଆନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ବିଶ୍ବକପ୍‌ର ପୁରସ୍କାର ରାଶି ଘୋଷଣା କରିଛି। ଆଇସିସି ଟୁର୍ନାମେଣ୍ଟ ପାଇଁ ମୋଟ୍‌ ୧୦ ମିଲିୟନ ଆମେରିକୀୟ ଡଲାର ପୁରସ୍କାର ରାଶି ଘୋଷଣା କରିଛି। ଯାହାର ମୂଲ୍ୟ ଭାରତୀୟ ମୁଦ୍ରାରେ ୮୨.୯୩ କୋଟି ଟଙ୍କା।ଅକ୍ଟୋବର ୫ରେ ଡିଫେଣ୍ଡିଂ ଚାମ୍ପିଅନ୍ ଇଂଲଣ୍ଡ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ପ୍ରଥମ ମ୍ୟାଚ୍ ଖେଳାଯିବ। ନଭେମ୍ବର ୧୯ରେ ଟୁର୍ନାମେଣ୍ଟର ଫାଇନାଲ ଅନୁଷ୍ଠିତ ହେବ। ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଉଭୟ  ଉଦ୍‌ଘାଟନ ଏବଂ ଫାଇନାଲ ମ୍ୟାଚ୍ ଖେଳାଯିବ।

ଅକ୍ଟୋବର ୫ରୁ ଆରମ୍ଭ ହେଉଥିବା କ୍ରିକେଟ୍‌ ମହାକୁମ୍ଭ ପାଇଁ ସାରା ବିଶ୍ୱରେ କ୍ରିକେଟ୍‌ ପ୍ରେମୀଙ୍କ ମଧ୍ୟରେ ବେଶ୍‌ ଉତ୍ସାହ ଦେଖିବାକୁ ମିଳୁଛି। ନଭେମ୍ବର ୧୯ ପର୍ଯ୍ୟନ୍ତ ଘରୋଇ ଗ୍ରାଉଣ୍ଡରେ ଖେଳା ଯିବାକୁ ଥିବା ବିଶ୍ୱକପ୍‌ ପାଇଁ ଅଧିକାଂଶ ଷ୍ଟାଡିୟମ୍‌ରେ ସିଟ୍‌ ବୁକ୍‌ ସରିଗଲାଣି। ସେପଟେ ଆଇସିସି ଘୋଷଣା କରିଥିବା ପୁରସ୍କାର ରାଶିରେ ଚାମ୍ପିୟନ୍‌ ଟିମ୍‌କୁ ଚାରି ମିଲିୟନ ଆମେରିକୀୟ ଡଲାର ଅର୍ଥାତ ୩୩.୧୭ କୋଟି ମିଳିବ। ଏଥି ସହିତ ରନର୍ସ ଅପ୍‌ ଟିମ୍‌କୁ ଦୁଇ ନିୟୁତ ଆମେରିକୀୟ ଡଲାର ଅର୍ଥାତ ୧୬.୫୯ କୋଟି ଟଙ୍କା ମିଳିବ।

The total prize pool for #CWC23, including the cash prize for the winners, has been announced 💰

Details 👇

— ICC (@ICC) September 22, 2023

ବିଶ୍ବକପ୍‌ ଖେଳୁଥିବା ସମସ୍ତ ୧୦ଟି ଟିମ୍‌ ଗ୍ରୁପ୍ ପର୍ଯ୍ୟାୟରେ ଏକ ରାଉଣ୍ଡ-ରବିନ ଫର୍ମାଟରେ ପରସ୍ପରକୁ ଭେଟିବେ। ପଏଣ୍ଟ ଟେବୁଲର ଶ୍ରେଷ୍ଠ ଚାରିଟି ଦଳ ସେମିଫାଇନାଲରେ ପ୍ରବେଶ କରିବେ। ୧୦୧୯ରେ ମଧ୍ୟ ସମାନ ଫର୍ମାଟରେ ଟୁର୍ନାମେଣ୍ଟ ଆୟୋଜିତ ହୋଇଥିଲା। ଚଳିତ ବିଶ୍ବକପ୍‌ର ଗ୍ରୁପ୍ ପର୍ଯ୍ୟାୟ ମ୍ୟାଚ୍‌ ଜିତିଲେ ମଧ୍ୟ ପୁରସ୍କାର ରାଶି ଦେବାକୁ ଘୋଷଣା କରାଯାଇଛି। ଟିମ୍‌ ଗୁଡ଼ିକୁ ପ୍ରତ୍ୟେକ ବିଜୟ ପାଇଁ ୪୦,୦୦୦ ଆମେରିକୀୟ ଡଲାର (୩୩.୧୭ ଲକ୍ଷ ଟଙ୍କା) ମିଳିବ। ଗ୍ରୁପ୍ ପର୍ଯ୍ୟାୟ ଶେଷରେ ଯେଉଁ ଟିମ୍‌ ନକ୍ଆଉଟ୍‌ରେ ପହଞ୍ଚିବାରେ ବିଫଳ ହେବେ, ପ୍ରତ୍ୟେକଙ୍କୁ ୧୦୦,୦୦୦ ଡଲାର୍ (୮୨.୯୪ ଲକ୍ଷ) ମିଳିବ।

ବିଶ୍ୱକପରେ ୪୮ଟି ମ୍ୟାଚ୍ ଖେଳାଯିବ

ବିଶ୍ୱକପର ୧୩ ତମ ସଂସ୍କରଣରେ ୧୦ଟି ଦଳ ଟ୍ରଫି ପାଇଁ ପ୍ରତିଦ୍ୱନ୍ଦ୍ୱିତା କରିବେ। ଆୟୋଜକ ଭାରତ ବ୍ୟତୀତ ନ୍ୟୁଜିଲ୍ୟାଣ୍ଡ, ଇଂଲଣ୍ଡ, ବାଂଲାଦେଶ, ପାକିସ୍ଥାନ, ଅଷ୍ଟ୍ରେଲିଆ, ଆଫଗାନିସ୍ତାନ ଏବଂ ଦକ୍ଷିଣ ଆଫ୍ରିକା, ଶ୍ରୀଲଙ୍କା ଏବଂ ନେଦରଲ୍ୟାଣ୍ଡର ଦଳ ଖେଳିବେ। ୧୦ ଟି ଦଳ ମଧ୍ୟରେ ମୋଟ ୪୮ ଟି ମ୍ୟାଚ୍ ଖେଳାଯିବ। ବିଶ୍ୱକପ ଆରମ୍ଭ ପୂର୍ବରୁ ପ୍ରତ୍ୟେକ ପ୍ରସ୍ତୁତି ପାଇଁ ଦୁଇଟି ଅଭ୍ୟାସ ମ୍ୟାଚ୍ ଖେଳିବେ।

ନନ୍ଦିଘୋଷ ବ୍ୟୁରୋ: କ୍ରିକେଟ ବିଶ୍ୱ କପର ପ୍ରାରମ୍ଭିକ ପର୍ଯ୍ୟାୟରେ ୧୯୭୫ ଏବଂ ୧୯୭୯ରେ ଦୁଇଥର ବିଶ୍ୱ କପ ବିିଜେତା ହୋଇଥିବା ଓ୍ବେଷ୍ଟଇଣ୍ଡିଜକୁ ନିରାଶାଜନକ ପ୍ରଦର୍ଶନ କରିଛି। ଦଳ ଚଳିତ ବିଶ୍ୱକପ୍ ଖେଳିବା ପାଇଁ କ୍ୱାଲିଫାଏ କରିପାରିନାହିଁ। ବିଶ୍ୱକପ୍ କ୍ୱାଲିଫାୟର ମ୍ୟାଚରେ ୱେଷ୍ଟଇଣ୍ଡିଜକୁ ସ୍କଟଲାଣ୍ଡ ୭ ୱିକେଟରେ ହରାଇଛି। ଏହା ପ୍ରଥମଥର ଅଟେ ଯେବେ ଦଳ ବିଶ୍ୱକପରେ ଖେଳିବ ନାହିଁ । ୱେଷ୍ଟଇଣ୍ଡିଜ ବିଶ୍ୱକପର ପ୍ରଥମ ଦୁଇଟି ସିଜିନରେ ଟାଇଟଲ ଜିତିଛି। ୧୯୭୫ ଏବଂ ୧୯୭୯ରେ ଚାମ୍ପିଅନ ହୋଇଥିଲା ଦଳ। ହରାରେ ସ୍ପୋର୍ଟ୍ସ କ୍ଲବରେ ଶନିବାର ଖେଳାଯାଇଥିବା ମୁକାବିଲାରେ ୱେଷ୍ଟଇଣ୍ଡିଜ ପ୍ରଥମେ ବ୍ୟାଟିଂ କରି ୧୮୧ ରନ୍ ବନାଇଥିଲା।

ବିଜୟ ପାଇଁ ଆବଶ୍ୟକୀୟ ରନକୁ ସ୍କଟଲାଣ୍ଡକୁ ୪୩.୩ ଓଭରରେ ୩ ୱିକେଟ୍ ହରାଇ ହାସଲ କରିନେଇଛି। ସ୍କଟଲାଣ୍ଡର ବ୍ରାଣ୍ଡନ ମ୍ୟାକମୁଲେନ ଓଭୟ ବ୍ୟାଟିଂ ଏବଂ ବୋଲିଂରେ ଚମତ୍କାର ପ୍ରଦର୍ଶନ କରିଛନ୍ତି। ପ୍ରଥମେ ୱେଷ୍ଟଇଣ୍ଡିଜର ତିନି ଜଣଙ୍କୁ ଆଉଟ୍ କରିଥିଲେ। ପରେ ୬୯ ରନର ଇନିଂସ ଖେଳି ଦଳକୁ ବିଜୟୀ କରିବାରେ ମୁଖ୍ୟ ଭୂମିକା ନିର୍ବାହ କରିଛନ୍ତି। ଏହି ଚମତ୍କାର ପ୍ରଦର୍ଶନ ପାଇଁ ତାଙ୍କୁ ମ୍ୟାନ ଅଫ ଦି ମ୍ୟାଚ୍ ବିବେଚିତ କରାଯାଇଛି। ପ୍ରକାଶଥାଉକି, ଅକ୍ଟୋବର ୫ରୁ ନଭେମ୍ବର ୧୯ ପର୍ଯ୍ୟନ୍ତ ଦିନିକିଆ ବିଶ୍ୱକପ୍ ଖେଳାଯିବ। ଚଳିତଥର ଭାରତ ଏହାର ଆୟୋଜନ କରୁଛ।

ପର୍ଥ: ଆଜି ଅଷ୍ଟ୍ରେଲିଆ ପର୍ଥରେ ଆଇସିସି‌ ଟ୍ବେଣ୍ଟି-୨୦ ବିଶ୍ବକପରେ ଭାରତ ଦକ୍ଷିଣ ଆଫ୍ରିକାକୁ ଭେଟିବାକୁ ଯାଉଛି। ଭାରତ ଟସ୍‌ ଜିତି ବ୍ୟାଟିଂର ନିଷ୍ପତ୍ତି ନେଇଛି। ଏହି ମ୍ୟାଚରେ ଭାରତ ବିଜୟ ହେଲେ ସେମିଫାଇନାଲରେ ଟିମ୍ ଇଣ୍ଡିଆର ସ୍ଥାନ ସୁନିଶ୍ଚିତ ହେବ। ଭାରତ ଓ ଦକ୍ଷିଣ ଆଫ୍ରିକା ମୁକାବିଲା ଉପରେ ସମସ୍ତଙ୍କ ନଜର। ଆଜିର ମ୍ୟାଚରେ ଯୁବ ଖେଳାଳି ଦୀପକ ହୁଡାଙ୍କୁ ଟିମ୍‌ ଇଣ୍ଡିଆରେ ସ୍ଥାନ ମିଳିଛି।

India win the toss and opt to bat first against South Africa 🏏#INDvSA | #T20WorldCup | 📝: https://t.co/GI5MZQsgV0 pic.twitter.com/SeCH6NsQTD

— ICC (@ICC) October 30, 2022

ଚଳିତ ବିଶ୍ୱକପ୍‌ରେ ଉଭୟ ଟିମ୍ ପୂର୍ବରୁ ଦୁଇଟି ଲେଖାଏଁ ମ୍ୟାଚ୍ ଖେଳିସାରିଥିବା ବେଳେ କେହି ହେଲେ ହାରି ନାହାନ୍ତି। ଭାରତ ୨ଟି ମ୍ୟାଚ୍ ଜିତି ୪ ପଏଣ୍ଟ ସହ ପଏଣ୍ଟ ଟେବୁଲର ଏକ ନମ୍ବର ସ୍ଥାନରେ ଥିବା ବେଳେ ଦକ୍ଷିଣ ଆଫ୍ରିକା ଗୋଟିଏ ମ୍ୟାଚ୍ ଜିତି ୩ ପଏଣ୍ଟ ସହ ତୃତୀୟ ସ୍ଥାନରେ ରହିଛି। ଆଉ ଆଜିର ମ୍ୟାଚ୍ ଉଭୟ ଟିମ୍ ପାଇଁ ଗୁରୁତ୍ୱ ରଖୁଛି। ତେଣୁ ସୁପର ସଣ୍ଡେରେ ଆଜି ଦେଖିବାକୁ ମିଳିବ ସୁପର ମୁକାବିଲା।

🚨 Toss & Team News from Perth 🚨@ImRo45 has won the toss & #TeamIndia have elected to bat against South Africa. #T20WorldCup | #INDvSA

Follow the match ▶️ https://t.co/KBtNIjPFZ6

1⃣ change to our Playing XI as @HoodaOnFire is named in the team 🔽 pic.twitter.com/X9n5kLoYNn

— BCCI (@BCCI) October 30, 2022

ଚଳିତ ବିଶ୍ୱକପ୍‌ରେ ବିରାଟ କୋହଲିଙ୍କ ଛଡ଼ା ସୂର୍ଯ୍ୟ କୁମାର ଯାଦବ ମଧ୍ୟ ଭଲ ଫର୍ମରେ ଅଛନ୍ତି। ତେଣୁ ଆଜିର ମ୍ୟାଚ୍‌ରେ ମଧ୍ୟ ସୂର୍ଯ୍ୟଙ୍କ ଉପରେ ଭରସା ରଖିଛି ଦଳ। କାରଣ, ପାକିସ୍ତାନ ବିପକ୍ଷରେ ଦମଦାର ଆରମ୍ଭ କରିବା ସତ୍ତ୍ୱେ ପାଭିଲିୟନକୁ ଶୀଘ୍ର ସିନା ଫେରିଥିଲେ, ହେଲେ ନେଦରଲାଣ୍ଡ ବିପକ୍ଷରେ ସୂର୍ୟ୍ୟ ଦେଖାଇଥିଲେ ତେଜ। ରାହୁଲ ଏବଂ ରୋହିତ ଯିବାପରେ କିଙ୍ଗ କୋହଲିଙ୍କ ଭରପୁର ସାଥ୍ ଦେଇଥିଲେ ସୂର୍ଯ୍ୟ । ପଡିଆର ଚାରିଆଡକୁ ସଟ୍ ଖେଳିଥିଲେ। ତାଙ୍କ ଭିନ୍ନ ଅନ୍ଦାଜ ଏବଂ ଆଗ୍ରେସନରେ ବ୍ୟାଟିଂ ଦେଖିଲା ଭଳି ଥିଲା। ବିଲକୁଲ ଚାପମୁକ୍ତ ଖେଳ ଖେଳୁଛନ୍ତି ସେ। ତେଣୁ ଏହି ଇନିଂସ ପରେ ଏବେ ତାଙ୍କ ଉପରେ ଭରସା ଏବଂ ବିଶ୍ୱାସ ଆହୁରି ବଢିଯାଇଛି।

ଅନ୍ୟପଟେ ପର୍ଥ ଗ୍ରାଉଣ୍ଡ ପାରମ୍ପରିକ ଭାବେ ଏହି ଗ୍ରାଉଣ୍ଡ ଫାଷ୍ଟ ବୋଲରଙ୍କୁ ସୁହାଇଥାଏ। ଏହି କିଛି ବର୍ଷ ମଧ୍ୟରେ ଏହି ସହର କଂକ୍ରିଟ ଜଙ୍ଗଲରେ ପରିଣତ ହେବା ପରେ ପିଚ୍‌‌ ଉପରେ ମଧ୍ୟ ପ୍ରଭାବ ପଡ଼ିଛି। ଏଠାରେ ପୂର୍ବରୁ ଯେଉଁ ବାଉନ୍ସ ଓ ସୁଇଂ ହେଉଥିଲା ତାହା ଏବେ ନାହିଁ, କିନ୍ତୁ ଏହି ପିଚ୍‌‌ ଏବେ ମଧ୍ୟ ଫାଷ୍ଟ ବୋଲରଙ୍କୁ ସୁହାଉଛି। ଯାହା ଫଳରେ ବିଶ୍ୱର ଦୁଇ ଶ୍ରେଷ୍ଠ ଫାଷ୍ଟ ବୋଲର ଦକ୍ଷିଣ ଆଫ୍ରିକାର କାଗିସୋ ରାବାଡା, ଆନରିଚ୍‌‌ ନୋର୍ଜେଙ୍କ ନେତୃତ୍ୱରେ ୱେନ୍‌‌ ପାର୍ନେଲ ଓ ଅନ୍ୟମାନେ ଭାରତ ପ୍ରତି ବିପଦ ସୃଷ୍ଟି କରିପାରନ୍ତି।

ଭାରତୀୟ ଦଳର ଗୋଟିଲ ପରିବର୍ତ୍ତନ କରାଯାଇଛି। ରୋହିତ ଶର୍ମା, ଲୋକେଶ ରାହୁଲ, ବିରାଟ କୋହଲି ଓ ସୂର୍ଯ୍ୟକୁମାର ଯାଦବଙ୍କ ପରି ବ୍ୟାଟରଙ୍କ ପକ୍ଷେ ନିଶ୍ଚିତ ଭାବେ ରାବାଡା ଓ ନୋର୍ଜେଙ୍କ ବୋଲିଂରେ ହାତଖୋଲା ସଟ୍‌‌ ଖେଳିବା କଷ୍ଟକର ହେବ। ଏବେ ରାବାଡା ଘଣ୍ଟା ପ୍ରତି ୧୪୫ ଓ ନୋର୍ଜେ ୧୫୦ କିଲୋମିଟର ବେଗରେ ବଲ ପକାଉଛନ୍ତି। ପର୍ଥ ପିଚ୍‌‌ରୁ ଏମାନଙ୍କୁ ସହାୟତା ମିଳିଲେ ବିଶ୍ୱର ଶ୍ରେଷ୍ଠ ବ୍ୟାଟିଂ ଲାଇନ୍‌‌ ସହ ମୁକାବିଲା ଖୁବ୍‌‌ ରୋମାଞ୍ଚକ ହେବ ବୋଲି ଆଶା କରିବା ସ୍ୱାଭାବିକ୍‌‌। ସେହିପରି ପିଚ୍‌‌ରୁ ଫାଇଦା ଉଠାଇବାରେ ଭାରତୀୟ ପେସ୍‌‌ ବୋଲର ମଧ୍ୟ ସିଦ୍ଧହସ୍ଥ। ଏଣୁ ଏହି ମ୍ୟାଚ୍‌‌ଟି ପେସ୍‌‌ ବୋଲର ବନାମ ବ୍ୟାଟରଙ୍କ ମଧ୍ୟରେ ଲଢ଼େଇ ହେବ ବୋଲି କୁହାଯାଇପାରେ। ଉଭୟ ଦଳର ବ୍ୟାଟର ଭଲ ଫର୍ମରେ ରହିଛନ୍ତି। ଏମାନେ କିପରି ପର୍ଥ ପିଚ୍‌‌କୁ ମୁକାବିଲା କରିବେ ତାହା ଉପରେ ମ୍ୟାଚ୍‌‌ର ଭାଗ୍ୟ ନିର୍ଣ୍ଣୟ ହେବ।

ନୂଆଦିଲ୍ଲୀ: ଟି-୨୦ ବିଶ୍ଵ କପ୍‌ ପୂର୍ବରୁ ଭାରତକୁ ଲାଗିଛି ବଡ ଝଟକା । ଟିମ ଇଣ୍ଡିଆର ଦକ୍ଷ ଦ୍ରୁତ ବୋଲର ଯଶପ୍ରିତ ବୁମରା ବିଶ୍ୱକପ ଦଳରୁ ବାଦ ପଡିଛନ୍ତି । ପିଠିରେ ଆଘାତ ଲାଗିବା କାରଣରୁ ତାଙ୍କୁ ବିଶ୍ୱକପରୁ ଓହରିବାକୁ ପଡିଛି । ଭାରତର କ୍ରିକେଟ ପ୍ରଶଂସକମାନଙ୍କ ଆଶା ଥିଲା ଯେ ବୁମରାହ ସୁସ୍ଥ ହୋଇ ଫେରିବେ ଏବଂ ଟି-୨୦ ବିଶ୍ୱକପରେ ଖେଳିବେ, ମାତ୍ର ସେ ଆଶା ଏବେ ଆଶାରେ ରହିଯାଇଛି । ସବୁଠୁ ଅନୁଭବୀ ଓ ଶ୍ରେଷ୍ଠ ବୋଲର ଜଶପ୍ରୀତ ବୁମରା ବିଶ୍ୱକପରୁ ବାଦ୍ ପଡ଼ିଛନ୍ତି ।

ପିଠିରେ ସମସ୍ୟା ପାଇଁ ସେ ଏବେ ବିଶ୍ୱକପ ଟୁର୍ଣ୍ଣାମେଣ୍ଟରେ ଖେଳିପାରିବେ ନାହିଁ । ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଏନେଇ ଘୋଷଣା କରିଛି । ଖୁବଶୀଘ୍ର ବୁମରାହଙ୍କ ରିପ୍ଲେସମେଣ୍ଟର ଘୋଷଣା କରାଯିବ । ବିସିସିଆଇ ନିଜ ପ୍ରେସ ରିଲିଜରେ ଲେଖିଛି, ବୋର୍ଡର ମେଡିକାଲ ଟିମ୍ ଭାରତୀୟ ଦଳର ଦ୍ରୁତ ବୋଲର ଜଶପ୍ରୀତ ବୁମରାଙ୍କୁ ଆଇସିସି ଟି-୨୦ ବିଶ୍ୱକପରୁ ବାହାର କରିଦେଇଛି ।

ଏହି ନିଷ୍ପତ୍ତି ବିସ୍ତୃତ ମୂଲ୍ଯାଙ୍କନ ଏବଂ ବିଶେଷଜ୍ଞଙ୍କ ପରାମର୍ଶ ପରେ ନିଆଯାଇଛି । ବୁମରାଙ୍କୁ ଆରମ୍ଭରେ ପିଠିରେ ଆଘାତ କାରଣରୁ ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜରୁ ବାଦ୍ ପଡ଼ିଥିଲେ । ତାଙ୍କ ସ୍ଥାନରେ ମହମ୍ମଦ ସିରାଜଙ୍କୁ ସ୍ଥାନ ମିଳିଥିଲା । ସେପଟେ ବିଶ୍ୱକପରେ ବୁମରାଙ୍କ ସ୍ଥାନରେ କିଏ ଦଳରେ ସ୍ଥାନ ପାଇବେ ସେନେଇ ଖୁବଶୀଘ୍ର ଘୋଷଣା କରାଯିବ ।

ଉଲ୍ଲେଖଯୋଗ୍ୟ, ଗତ ସପ୍ତାହରେ ଜଶପ୍ରୀତ ଟି-୨୦ ଦଳରୁ ବାଦ୍ ପଡ଼ିବା ନେଇ ଖବର ଆସିଥିଲା । ସମସ୍ତ ଗଣମାଧ୍ୟମରେ ମଧ୍ୟ ଏନେଇ ଖବର ପ୍ରକାଶ ପାଇଥିଲା । ହେଲେ ବିସିସିଆଇ ସଭାପତି କହିଥିଲେ ବୁମରାହଙ୍କୁ ଦଳରୁ ବାହାର କରାଯାଇନି, ଚିକିତ୍ସା ଚାଲିଛି, ଶେଷ ସମୟରେ ସୁସ୍ଥ ହୋଇ ଦଳରେ ସାମିଲ ହୋଇପାରନ୍ତି । ଏହାପରେ ସମସ୍ତଙ୍କ ମନରେ ଆଶା ସଞ୍ଚାର ହୋଇଥିଲା । ହେଲେ ଏବେ ବାଦ୍ ପଡ଼ିବା ପରେ ସବୁ ଆଶା ଭାଙ୍ଗି ଯାଇଛି । ବୁମରାହଙ୍କ ଅନୁପସ୍ଥିତି ଦଳ ପାଇଁ ବଡ଼ କ୍ଷତି ସାବ୍ୟସ୍ତ ହେବ ବୋଲି ଅନୁମାନ କରାଯାଉଛି ।