ନୂଆଦିଲ୍ଲୀ: କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ମଙ୍ଗଳବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ 'ଆତଙ୍କବାଦୀ' କହି ଏକ ନୂଆ ବିବାଦ ସୃଷ୍ଟି କରିଛନ୍ତି। ଚେନ୍ନାଇରେ ଏକ ସାମ୍ବାଦିକ ସମ୍ମିଳନୀରେ ଏଆଇଏଡିଏମକେ (AIADMK) ଏବଂ ବିଜେପି (BJP) ମେଣ୍ଟକୁ ସମାଲୋଚନା କରିବା ସମୟରେ ସେ ଏହି ମନ୍ତବ୍ୟ ଦେଇଛନ୍ତି।

ଏଆଇଏଡିଏମକେ କିପରି ପ୍ରଧାନମନ୍ତ୍ରୀଙ୍କ ସହ ହାତ ମିଳାଇଲା ତାହାକୁ ନେଇ ଖଡ଼ଗେ ପ୍ରଶ୍ନ କରିଛନ୍ତି। ସେ କହିଛନ୍ତି, "ଅନ୍ନାଦୁରାଇଙ୍କ ଫଟୋ ଲଗାଉଥିବା ଏଆଇଏଡିଏମକେ ନେତାମାନେ ମୋଦୀଙ୍କ ସହ କିପରି ମିଶିପାରିବେ? ସେ ଜଣେ ଆତଙ୍କବାଦୀ। ତାଙ୍କ ଦଳ ସମାନତା ଏବଂ ନ୍ୟାୟରେ ବିଶ୍ୱାସ କରେ ନାହିଁ। ଏହି ଲୋକମାନେ ତାଙ୍କ ସହ ମିଶୁଛନ୍ତି; ଏହାର ଅର୍ଥ ସେମାନେ ଗଣତନ୍ତ୍ରକୁ ଦୁର୍ବଳ କରୁଛନ୍ତି।" ଆଜି ଏଆଇଏଡିଏମକେ ନିଜର ପରିଚୟ ହରାଇ ବିଜେପିର ଏକ ନୀରବ ଦାସ ପାଲଟିଛି ଏବଂ ତାମିଲନାଡ଼ୁର ସ୍ୱାର୍ଥ ରକ୍ଷା କରିବା ପାଇଁ ଏମକେ ଷ୍ଟାଲିନଙ୍କ ଭଳି ଲଢୁଆ ନେତାଙ୍କ ଆବଶ୍ୟକତା ରହିଛି ବୋଲି ସେ ଦୋହରାଇଥିଲେ।

ନିଜର ବିବାଦୀୟ ମନ୍ତବ୍ୟ ଉପରେ ବିବାଦ ବଢ଼ିବା ପରେ ଖଡ଼ଗେ ସ୍ପଷ୍ଟୀକରଣ ଦେଇ କହିଥିଲେ ଯେ ସେ ମୋଦୀଙ୍କୁ ଆତଙ୍କବାଦୀ କହିନାହାଁନ୍ତି, ବରଂ ସେ ସବୁବେଳେ ଲୋକ ଓ ରାଜନୈତିକ ଦଳଗୁଡ଼ିକୁ 'ଭୟଭୀତ' ବା ଟେରରାଇଜ୍ କରୁଛନ୍ତି। ସେ କହିଛନ୍ତି, "ମୋର କହିବାର ଅର୍ଥ ହେଉଛି ମୋଦୀ ସର୍ବଦା ଧମକ ଦେଉଛନ୍ତି। ଇଡି (ED), ଆଇକର ବିଭାଗ (I-T) ଏବଂ ସିବିଆଇ (CBI) ଭଳି ସଂସ୍ଥା ତାଙ୍କ ହାତରେ ଅଛି ଏବଂ ସେ ପରିସୀମନ (Delimitation) କୁ ମଧ୍ୟ ନିଜ ହାତକୁ ନେବାକୁ ଚାହୁଁଛନ୍ତି।"

ସମ୍ବିଧାନ (୧୩୧ ତମ ସଂଶୋଧନ) ବିଲ୍, ୨୦୨୬ ସଂସଦରେ ପାରିତ ନହେବା ପରେ ପ୍ରଧାନମନ୍ତ୍ରୀ ଜାତିକୁ ସମ୍ବୋଧିତ କରି ନିର୍ବାଚନ ଆଚରଣ ବିଧି (MCC) ଉଲ୍ଲଂଘନ କରିଥିବା ଖଡ଼ଗେ ଅଭିଯୋଗ କରିଛନ୍ତି। ଏହା ସହିତ ନିର୍ବାଚନ କମିଶନ ବିଜେପିର ଏକ ଶାଖା ଭଳି କାମ କରୁଛନ୍ତି ବୋଲି ସେ କହିଛନ୍ତି। ମହିଳା ସଂରକ୍ଷଣ ବିଲ୍ ସମ୍ପର୍କରେ ସ୍ପଷ୍ଟ କରି ସେ କହିଛନ୍ତି ଯେ କଂଗ୍ରେସ ୨୦୨୩ ମସିହାରେ ଏହି ବିଲ୍‌କୁ ପୂର୍ଣ୍ଣ ସମର୍ଥନ ଦେଇଥିଲା, କିନ୍ତୁ ବିଦ୍ୟମାନ ୫୪୩ ଆସନ ସହିତ ଏହାକୁ ତୁରନ୍ତ ଲାଗୁ କରିବାକୁ ସେମାନେ ଦାବି କରିଥିଲେ। ମାତ୍ର ମୋଦୀ ଏବେ ଏକ ଭିନ୍ନ ତଥ୍ୟ ଉପସ୍ଥାପନ କରୁଛନ୍ତି ବୋଲି ଖଡ଼ଗେ କହିଛନ୍ତି।

ଏହି ପ୍ରସଙ୍ଗରେ ବିଜେପିର ରାଷ୍ଟ୍ରୀୟ ମୁଖପାତ୍ର ଶହଜାଦ୍ ପୁନାୱାଲା କଂଗ୍ରେସକୁ କଡ଼ା ସମାଲୋଚନା କରିଛନ୍ତି। ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସ (X) ରେ ପୋଷ୍ଟ କରି ସେ କହିଛନ୍ତି ଯେ କଂଗ୍ରେସ ଏପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କୁ ୧୭୫ ଥର ଅପମାନିତ କରିସାରିଲାଣି। ଆତଙ୍କବାଦୀ ଏବଂ ନକ୍ସଲଙ୍କୁ ନିର୍ଦ୍ଦୋଷ କହୁଥିବା କଂଗ୍ରେସ ପାଇଁ ଜଣେ 'ଚା'ବାଲା ଓବିସି (OBC)' ପ୍ରଧାନମନ୍ତ୍ରୀ ଆତଙ୍କବାଦୀ ଏବଂ ସନାତନ ଧର୍ମ ଏକ ରୋଗ ବୋଲି ସେ କଟାକ୍ଷ କରିଛନ୍ତି।

ଭୁବନେଶ୍ୱର: କଂଗ୍ରେସ ସଭାପତି ମଲିକାର୍ଜୁନ ଖଡଗେ ସମ୍ବିଧାନ ବଞ୍ଚାଅ ସମାବେଶରେ କେନ୍ଦ୍ର ଓ ରାଜ୍ୟର ଡବଲ ଇଞ୍ଜିନ ସରକାରଙ୍କୁ ତୀବ୍ର ଆକ୍ରମଣ କରିଛନ୍ତି। ସେ ନିଜ ଅଭିଭାଷଣରେ କହିଛନ୍ତି ଯେ, ଏହି ସରକାର ଗରିବଙ୍କ ପାଇଁ ନୁହେଁ, କେବଳ ଧନୀଙ୍କ ସ୍ୱାର୍ଥ ପାଇଁ କାମ କରୁଛି। ଓଡ଼ିଶାରେ ଯାହା ବି କିଛି ପ୍ରତିଷ୍ଠା ହୋଇଛି, ତାହା କଂଗ୍ରେସ କରିଛି। ଭୁବନେଶ୍ୱରରେ ଏମ୍ସ ଓ ଇନ୍‌ଷ୍ଟିଚ୍ୟୁଟ ଅଫ୍ ଫିଜିକ୍ସ କଂଗ୍ରେସର ଦେଣ। ଭାଜପାର ଅବଦାନ ଜିରୋ। ଏମାନେ ଏଠାରେ କିଛି କାମ କରିନାହାନ୍ତି, କେବଳ ଶ୍ରେୟ ନେବାକୁ ଚେଷ୍ଟା କରୁଛନ୍ତି।

ସେ ଆହୁରି ଅଭିଯୋଗ କରିଛନ୍ତି ଯେ, ଭାଜପା କିଛି କାମ ନକରି କେବଳ ଦେଶର ସମ୍ପଦ ବିକ୍ରି କରିବାରେ ଲାଗିଛି। ଭାଜପା କେବଳ ବିକ୍ରି କରିବାରେ ବ୍ୟସ୍ତ। ଡବଲ ଇଞ୍ଜିନ ସରକାର ଗରିବଙ୍କୁ ଲୁଟୁଛି ଓ ଧନୀଙ୍କୁ ସୁବିଧା ଦେଉଛି ବୋଲି ଖଡ୍‌ଗେ କହିଛନ୍ତି। ଧର୍ମ ନାଁରେ ବିଜେପି ବିଭାଜନ ରାଜନୀତି କରୁଛି ବୋଲି ଖଡଗେ  କହିଥିଲେ।

ଭୁବନେଶ୍ୱର: ଆଜି ଓଡ଼ିଶା ଗସ୍ତରେ ଆସୁଛନ୍ତି କଂଗ୍ରେସ ଅଧକ୍ଷ ମଲ୍ଲିକାର୍ଜୁନ ଖଡଗେ। ଏଆଇସିସି ଅଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ ପରେ ଏହା ହେଉଛି ଖଡଗେଙ୍କ ପ୍ରଥମ ଓଡ଼ିଶା ଗସ୍ତ। କଂଗ୍ରେସ ଅଧ୍ୟକ୍ଷ ଦିନ ୧୨ ଟାରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ଏକ ବିରାଟ ପଟୁଆରରେ ସେ ଲୋୟର ପିଏମଜିରେ ଆୟୋଜିତ ସମାବେଶରେ ଯୋଗଦେବେ। ସମାବେଶରେ କଂଗ୍ରେସର ଜିଲ୍ଲା ସଭାପତି, ବ୍ଲକ ସଭାପତି, ମଣ୍ଡଳ ସଭାପତି, ପଞ୍ଚାୟତ ସଭାପତିଙ୍କ ସହ ହଜାର ହଜାର କର୍ମୀ ଏବଂ ସାଧାରଣ ଲୋକ ଯୋଗ ଦେବେ ବୋଲି ରାଜ୍ୟ କଂଗ୍ରେସ ପକ୍ଷରୁ କୁହାଯାଇଛି। ଏକତ୍ରିତ ଲୋକଙ୍କୁ ଖଡ୍‌‌ଗେ ଉଦବୋଧନ ଦେବା ସହ ସମାବେଶ ପରେ କଂଗ୍ରେସର ବରିଷ୍ଠ ନେତା ଏବଂ ସହଯୋଗୀ ଦଳଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି। କଂଗ୍ରେସ ଅଧ୍ୟକ୍ଷଙ୍କ ଗସ୍ତ ପୂର୍ବରୁ ପିସିସି ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି।

ନୂଆଦିଲ୍ଲୀ: କଂଗ୍ରେସର ନବନିର୍ବାଚିତ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଆଜି ଦାୟିତ୍ବ ନେବେ। ଆଜି ସକାଳେ ରାଜଘାଟ ଯାଇ ଜାତିର ପିତା ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ଏହାପରେ ପୂର୍ବତନ ପ୍ରଧାନମନ୍ତ୍ରୀ ପଣ୍ଡିତ ଜବହାରଲାଲ ନେହେରୁ, ଇନ୍ଦିରା ଗାନ୍ଧୀ, ଲାଲ ବାହାଦୂର ଶାସ୍ତ୍ରୀ ଓ ରାଜୀବ ଗାନ୍ଧୀଙ୍କ ସ୍ମୃତିସ୍ଥଳ ବି ପରିଦର୍ଶନ କରିବେ। ପଦଭାର ସମ୍ଭାଳିବା ପୂର୍ବରୁ କଂଗ୍ରେସ ମୁଖ୍ୟ ଅଫିସରେ ସମସ୍ତ ପ୍ରସ୍ତୁତି ଏବେ ଚୁଡାନ୍ତ ପର୍ଯ୍ଯାୟରେ। ସୁରକ୍ଷାକର୍ମୀ ଓ ବରିଷ୍ଠ କାର୍ଯ୍ଯକର୍ତ୍ତା ପାର୍ଟି ଅଫିସ ଯାଇ ପ୍ରସ୍ତୁତି ସମୀକ୍ଷା କରିଛନ୍ତି। କଂଗ୍ରେସର କେନ୍ଦ୍ରୀୟ ନିର୍ବାଚନ ପ୍ରାଧିକରଣ ମୁଖ୍ୟ ମଧୂସୁଦନ ମିସ୍ତ୍ରୀ ବୁଧବାର ଖଡଗେଙ୍କୁ ଔପଚାରିକ ଭାବେ ନିର୍ବାଚନ ପ୍ରମାଣପତ୍ର ଦେବେ।

ନୂଆ ଦାୟିତ୍ବ ଖଡଗେଙ୍କ ପାଇଁ ନିଶ୍ଚିତ ରୂପେ ନୂଆ ଚ୍ୟାଲେଞ୍ଜ ନେଇ ଆସିବ। ଗୋଟିଏ ପଟେ ରାଜସ୍ଥାନର ଶାସନ ଗାଦି ତ କିଛି ସପ୍ତାହ ମଧ୍ୟରେ ଗୁଜୁରାଟ ଓ ହିମାଚଳ ପ୍ରଦେଶ ବିଧାନସଭା ନିର୍ବାଚନ ଖଡଗେଙ୍କ ପାଇଁ ନୂଆ ଚ୍ୟାଲେଞ୍ଜ ହୋଇପାରେ। ସେହିପରି ୨୦୨୪ ଲୋକସଭା ନିର୍ବାଚନ ତାଙ୍କ ପାଇଁ ବଡ ଅଗ୍ନିପରୀକ୍ଷା ସାଜିବ। ପଦ ଭାର ଗ୍ରହଣ କରିବା ପୂର୍ବରୁ ମଙ୍ଗଳବାର ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କୁ ତାଙ୍କ ବାସଭବନରେ ଭେଟିଛନ୍ତି ମଲ୍ଲିକାର୍ଜୁନ ଖଡଗେ ।

ନୂଆଦିଲ୍ଲୀ : ୨୪ ବର୍ଷ ପରେ କଂଗ୍ରେସକୁ ମିଳିଲା ନୂଆ ସଭାପତି। ଅଣ ଗାନ୍ଧି ପରିବାରରୁ ମଲ୍ଲିକାର୍ଜୁନ ଖଡଗେ ହୋଇଛନ୍ତି କଂଗ୍ରେସର ନୂଆ ମୁଖିଆ। ନୂଆ କଂଗ୍ରେସ ସଭାପତି ନେଇ ହୋଇଥିବା ଭୋଟ ଆଜି ଗଣତି କରାଯାଇଛି, ଯେଉଁଥିରେ ସର୍ବାଧିକ ଭୋଟ ପାଇଁ କଂଗ୍ରେସର ବରିଷ୍ଠ ନେତା ମଲ୍ଲିକାର୍ଜୁନ ଖଡଗେ କଂଗ୍ରେସର ସଭାପତି ଭାବେ ନିର୍ବାଚିତ ହୋଇଛନ୍ତି।

୧୯୯୮ରୁ ଲଗାତାର ଭାବେ ସୋନିଆ ଗାନ୍ଧି ଓ ପରେ ପୁଅ ରାହୁଲ ଗାନ୍ଧି କଂଗ୍ରେସ ସଭାପତି ହୋଇଥିଲେ । ୨୦୧୪, ୨୦୧୯ ନିର୍ବାଚନରେ ଶୋଚନୀୟ ପରାଜୟ, ଦଳରେ ଅସ୍ଥିରତା, ସଂଗଠନ ଦୁର୍ବଳ ଭଳି ଅନେକ ସମସ୍ୟାରେ ଘେରି ରହିଥିବା କଂଗ୍ରେସ ନୂଆ ସଭାପତି ପଦ ପାଇଁ ନିର୍ବାଚନ କରିବାକୁ ନିଷ୍ପତ୍ତି ନେଇଥିଲା। ଆଉ ସେଥିପାଇଁ ମଲ୍ଲିକାର୍ଜୁନ ଖଡଗେ ଓ ଶଶୀ ଥରୁର ନିର୍ବାଚନ ଲଢେଇକୁ ଓହ୍ଲାଇଥିଲେ। ହେଲେ ପ୍ରଥମରୁ ହିଁ ମଲ୍ଲିକାର୍ଜୁନ ଖଡଗେଙ୍କ ବିଜୟ ସୁନିଶ୍ଚିତ ବୋଲି ଜଣାପଡିଥିଲା। ମଲ୍ଲିକାର୍ଜୁନ ଖଡଗେଙ୍କ ବିଜୟରେ ମୁଖ୍ୟ ଭୂମିକା ଗାନ୍ଧୀ ପରିବାର ବୋଲି ବିବେଚନା କରାଯାଉଛି। କାରଣ ଖଡଗେଙ୍କୁ ଗାନ୍ଧୀ ପରିବାରର ନିକଟତର ବୋଲି ବିବେଚନା କରାଯାଏ। ତାଙ୍କ ପାଖରେ ରାହୁଲ ଗାନ୍ଧୀ, ସୋନିଆ ଏବଂ ପ୍ରିୟଙ୍କା ଗାନ୍ଧୀଙ୍କ ସମର୍ଥନ ରହିଛି।ଅନ୍ୟପଟେ ଜି-୨୩ ନେତା ମାନେ ମଧ୍ୟ ମଲ୍ଲିକାର୍ଜୁନ ଖଡ଼ଗେଙ୍କ ସପକ୍ଷରେ ରହିଥିଲେ।

ମଲ୍ଲିକାର୍ଜୁନ ଖଡ଼ଗେ ରାଜ୍ୟସଭାରେ ବିରୋଧୀ ଦଳ ନେତା ଭାବେ କାମ କରୁଥିଲେ। କଂଗ୍ରେସ ସଭାପତି ନିର୍ବାଚନ ଲାଗି ଲଢେଇ ପାଇଁ ସେ ଏହି ପଦରୁ ଇସ୍ତଫା ଦେଇଥିଲେ।   ସେ ୮ଥରର ବିଧାୟକ ଓ ୨ ଥରର ଲୋକସଭା ସାଂସଦ। ଜଣେ ଦଳିତ ନେତା ଭାବେ ଜଣାଶୁଣା ମଲ୍ଲିକାର୍ଜୁନ ଖଡ଼ଗେ କର୍ଣ୍ଣାଟକାର ପିସିସି ସଭାପତି, ପୂର୍ବତନ ଗୃହମନ୍ତ୍ରୀ ଓ କେନ୍ଦ୍ରମନ୍ତ୍ରୀ ଭାବେ କାମ କରିବାର ଅଭିଜ୍ଞତା ରଖିଛନ୍ତି। ଏଥିସହ ସେ ଗାନ୍ଧି ପରିବାରର ଅତ୍ୟନ୍ତ ବିଶ୍ୱସ୍ତ। ମଲ୍ଲିକାର୍ଜୁନ ଦକ୍ଷିଣ ଭାରତୀୟ ରାଜ୍ୟ କର୍ଣ୍ଣାଟକରୁ ଆସୁଛନ୍ତି। ଯିଏ ଦଳର ଜଣେ ଦଳିତ ଚେହେରା ଭାବେ ଜଣାଶୁଣା। ଦଳର ସଭାପତି ଭାବେ ନିର୍ବାଚିତ ହେବାପରେ କଂଗ୍ରେସ ୫୧ ବର୍ଷ ପରେ ଜଣେ ଦଳିତ ଅଧ୍ୟକ୍ଷ ପାଇଛି। ଦେଶର ପୂର୍ବତନ ପ୍ରଧାନମନ୍ତ୍ରୀ ବାବୁ ଜଗଜୀବନ ରାମଙ୍କ ପରେ ଦଳ କୌଣସି ଦଳିତ ନେତା କଂଗ୍ରେସ ନେତା ନେତୃତ୍ୱ ନେଇ ନଥିଲେ। କୁହାଯାଉଛି, ନୂଆ ସଭାପତି ଦାୟିତ୍ୱ ନେବା ପରେ କଂଗ୍ରେସକୁ ମିଳିପାରେ ସଞ୍ଜିବନୀ ।

ସୂଚନାଯୋଗ୍ୟ କଂଗ୍ରେସ ଅଧ୍ୟକ୍ଷ ପାଇଁ ଗତ ସୋମବାର ଭୋଟ୍‌ ଗ୍ରହଣ ହୋଇଥିଲା। ଦେଶର ୩୬ଟି ପୋଲିଂ ଷ୍ଟେସନରେ ୬୭ଟି ବୁଥ୍‌ ହୋଇଥିଲା। ଦଳର ୯୫୦୦ ଜଣ ପ୍ରତିନିଧି ଏଥିପାଇଁ ଭୋଟ ଦେଇଛନ୍ତି।ଭୋଟ ପ୍ରତିଶତ ୯୬ ପ୍ରତିଶତ ଥିବା ବେଳେ ମତଦାନ ପ୍ରକ୍ରିୟା ଶାନ୍ତିପୂର୍ଣ୍ଣ ଥିଲା। ତେବେ ଆଜି କଂଗ୍ରେସ ମୁଖ୍ୟାଳୟରେ ଭୋଟ ଗଣତି କରାଯାଇଥିଲା। ମଲ୍ଲିକାର୍ଜୁନ ଖଡ଼ଗେ ବହୁ ଆଗରେ ରହିବା ସହ ୭୮୯୭ ଭୋଟ ପାଇ ବଡ଼ ବିଜୟ ହାସଲ କରିଛନ୍ତି।ତାଙ୍କ ସହ ପ୍ରତିଦ୍ୱନ୍ଦ୍ୱୀତା କରୁଥିବା ସାଂସଦ ଶଶି ଥରୁରଙ୍କୁ ମାତ୍ର ୧ ହଜାର ୭୨ଟି ଭୋଟ ମିଳିଛି।

ମଲ୍ଲିକାର୍ଜୁନ ଖଡଗେଙ୍କ ନାମରେ ରହିଛି କେତେ ସମ୍ପତ୍ତି ?

କଂଗ୍ରେସ ରାଜନୀତିରେ ମଲ୍ଲିକାର୍ଜୁନ ଖଡଗେଙ୍କୁ ଜଣେ ସ୍ୱଚ୍ଛ ଓ ନିର୍ବିବାଦୀୟ ନେତା ଭାବେ ସମସ୍ତେ ଜାଣନ୍ତି । ସେ କେନ୍ଦ୍ର ସରକାରରେ ରେଳମନ୍ତ୍ରୀ ଭାବେ ମଧ୍ୟ କାର୍ଯ୍ୟ କରିଛନ୍ତି । କର୍ଣ୍ଣାଟକର ଗୁଲବର୍ଗ ଜିଲ୍ଲାରେ ରହୁଥିବା ଖଡଗେ ୨୦୧୯ ରାଜ୍ୟସଭା ନିର୍ବାଚନ କ୍ରମରେ ନିର୍ବାଚନ କମିଶନକୁ ଦେଇଥିବା ସମ୍ପତ୍ତି ତାଲିକା ମୁତାବକ ତାଙ୍କ ନିକଟରେ ମୋଟ ୨୦ କୋଟି ଟଙ୍କାର ସମ୍ପତ୍ତି ରହିଛି ।

ଖଡଗେ ନିର୍ବାଚନକୁ ଦେଇଥିବା ଘୋଷଣାପତ୍ର ମୁତାବକ ତାଙ୍କ ନାମରେ କୌଣସି ଗାଡି ନାର୍ହି । ଖଡଗେଙ୍କ ପତ୍ନୀ ଜଣେ ଗୃହିଣୀ ଓ ତାଙ୍କ ନାମରେ ବି କୌଣସି ଗାଡି ନାହିଁ । ସେପଟେ ଏବେ ଜଣେ ଜଣେ ଜିଲ୍ଲା ସ୍ତରୀୟ ନେତା ନିଜ ଜୀବନର ସୁରକ୍ଷା ପାଇଁ ଅସ୍ତ୍ରଶସ୍ତ୍ର ନିଜ ନାମରେ ରଖୁଥିବା ବେଳେ ଜଣେ ପୂର୍ବତନ କେନ୍ଦ୍ରମନ୍ତ୍ରୀ ଖଡଗେଙ୍କ ନିକଟରେ କୌଣସି ଅସ୍ତ୍ରଶସ୍ତ୍ର ନାହିଁ । ସେପଟେ ଖଡଗେଙ୍କ ଶିକ୍ଷାଗତ ଯୋଗ୍ୟତା କହିଲେ ପେଶାରେ ଜଣେ ଓକିଲ । ସେ ୨୦୧୪ ରୁ ୨୦୧୯ ପର୍ଯ୍ୟନ୍ତ ଲୋକସଭାରେ କଂଗ୍ରେସ ଦଳର ନେତା ଥିଲେ ।

ନୂଆଦିଲ୍ଲୀ: ଆଜି କଂଗ୍ରେସ ଅଧ୍ୟକ୍ଷ ପାଇଁ ନିର୍ବାଚନ ହେବ। ଏଥିପାଇଁ ସବୁ ପ୍ରସ୍ତୁତି ଶେଷ ହୋଇଛି। ୨୦୧୯ ଅଗଷ୍ଟରେ କଂଗ୍ରେସ ଅଧ୍ୟକ୍ଷ ପଦରୁ ରାହୁଲ ଗାନ୍ଧୀ ଇସ୍ତଫା ଦେବା ପରେ ନୂଆ ଅଧ୍ୟକ୍ଷ ବାଛିବାକୁ ଦଳ ପକ୍ଷରୁ ଯେଉଁ ଦାବି କରାଯାଇ ଆସୁଥିଲା ତାହା ପ୍ରାୟ ୩ ବର୍ଷ ପରେ ପୂରଣ ହେବାକୁ ଯାଉଛି। ଯାହାକୁ ନେଇ ଦଳୀୟ କର୍ମୀ ଉତ୍ସାହିତ ରହିଛନ୍ତି ଏବଂ ଦଳ ମଧ୍ୟରେ ଅଧ୍ୟକ୍ଷ ନିର୍ବାଚନକୁ ନେଇ ରହିଆସିଥିବା ଦୀର୍ଘ ଅସନ୍ତାଷ ଦୂର ହେବ ବୋଲି ଆଶା କରାଯାଉଛି। ତେବେ ନିର୍ବାଚନ ପରେ ଦଳର ଭିବଷ୍ୟତ କିଭଳ ରହିବ ତାହାକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିଛି। ବିଶେଷକରି ଦଳର ଆଭିମୁଖ୍ୟ ଏବଂ ପରିଚାଳନାରେ କିଛି ପରିବର୍ତ୍ତନ ଆସିବ ନା ସେହି ପୁରୁଣା ଢଙ୍ଗରେ ଦଳ ପରିଚାଳିତ ହେବ ତାହା କେବଳ ଦଳୀୟ ନେତା ବା କର୍ମୀ ନୁହେଁ, ବରଂ ସାଧାରଣ ଲୋକଙ୍କ ମନରେ ପ୍ରଶ୍ନ ଉଙ୍କି ମାରିଛି।

ଅଧ୍ୟକ୍ଷ ପଦ ନିର୍ବାଚନକୁ ନେଇ ପ୍ରାର୍ଥୀ ଚୟନ କ୍ଷେତ୍ରରେ ବହୁ ତର୍ଜମା ଏବଂ ଅଙ୍କକଷା ପରେ ଶେଷରେ ମଲ୍ଲିକାର୍ଜ୍ଜୁନ ଖଡଗେ ଏବଂ ଶଶୀ ଥରୁରଙ୍କ ଭଳି ଦୁଇ ବରିଷ୍ଠ ନେତା ନିର୍ବାଚନୀ ପ୍ରତିଦ୍ବନ୍ଦ୍ବିତାରେ ଅବତୀର୍ଣ୍ଣ ହୋଇଥିଲେ। ରାଜ୍ୟସଭା ନେତା ଏବଂ ଦୀର୍ଘ ୫୦ ବର୍ଷ ଧରି କଂଗ୍ରେସ ସହ ରହିଆସିଥିବା ୮୦ ବର୍ଷୀୟ ଖଡ୍‌ଗେଙ୍କ ଦଳ ପ୍ରତି ନିଷ୍ଠା ଓ ଆନୁଗତ୍ୟକୁ ନେଇ ତାଙ୍କ ପ୍ରତି ଦଳୀୟ ହାଇକମାଣ୍ଡଙ୍କ ଆଶୀର୍ବାଦ ରହିଛି। ତେଣୁ ତାଙ୍କ ପ୍ରତି ଯୁବ ଏବଂ ପ୍ରାପ୍ତ ବୟସ୍କ ନେତାଙ୍କ ସମର୍ଥନ ରହିବା ସ୍ବାଭାବିକ କଥା। କିନ୍ତୁ ତିନି ତିନିଥର ଲୋକସଭା ସାଂସଦ ରହି ଆସିଥିବା ୬୬ ବର୍ଷୀୟ ଅନ୍ୟତମ ବରିଷ୍ଠ ନେତା ଶଶୀ ଥରୁର ଏହି ନିର୍ବାଚନକୁ ନେଇ କିଛି ଭିନ୍ନ ଆଭିମୁଖ୍ୟ ରଖିଛନ୍ତି। କଂଗ୍ରେସ ୨୦୦୪ ଏବଂ ୨୦୦୯ରେ ଭଲ ପ୍ରଦର୍ଶନ କରିଥିଲା। ହେଲେ ୨୦୧୪ରେ ଦଳ ଯେଉଁ ପରିଣାମ ଭୋଗିଥିଲା ତାହା ଆଜି ମଧ୍ୟ ଚିନ୍ତାର କାରଣ ହୋଇଛି।

୨୦୨୪ରେ ସାଧାରଣ ନିର୍ବାଚନ ହେବାକୁ ଯାଉଥିବା ବେଳେ ମୋଦୀ ସରକାରକୁ ମାତ୍‌ ଦେବାକୁ ଦଳ ପଣ କରିଛି। ହେଲେ ଏଥିପାଇଁ ଦଳକୁ ତୃଣମୂଳ ସ୍ତରରୁ ସଶକ୍ତ କରିବା ସହିତ ଏକ ନୂଆ ରଣନୀତି ନେଇ କାର୍ଯ୍ୟ କରିବାକୁ ପଡ଼ିବ। ଏହାକୁ ଆୟୁଧ କରିଛନ୍ତି ଥରୁର୍‌। ତେଣୁ ଦଳୀୟ କର୍ମୀ ଓ ନେତା କ’ଣ ଚାହୁଁଛନ୍ତି ତାହା ନିର୍ବାଚନ ଫଳାଫଳରୁ ହିଁ ଜଣାପଡ଼ିବ ବୋଲି ଥରୁର କହିଛନ୍ତି। ଯଦିଓ ଖଡଗେଙ୍କ ସହ ତାଙ୍କର କୌଣସି ମତଭେଦ ନାହିଁ ଏବଂ ଦଳକୁ ମଜବୁତ କରିବା ହିଁ ଉଭୟଙ୍କ ଲକ୍ଷ୍ୟ ରହିଛି , ତେବେ ଦଳ ପରିଚାଳନା ଏବଂ ଭବିଷ୍ୟତ ପ୍ରସ୍ତୁତି ପାଇଁ ରଣନୀତି ଗ୍ରହଣ କରିବା କ୍ଷେତ୍ରରେ ଉଭୟଙ୍କ ମାନସିକତା ଭିନ୍ନ । ତେଣୁ ଦଳ ଯଦି ପାରମ୍ପରିକ ନୀତିରେ ପରିଚାଳିତ ହେବାକୁ ଚାହୁଁଥାଏ ତେବେ ଖଡଗେ ବିଜୟୀ ହେବେ। ଆଉ କିଛି ନୂଆ କରିବାକୁ ଥିଲେ କର୍ମୀମାନେ ତାଙ୍କୁ ବିଜୟୀ କରିବେ ବୋଲି ଥରୁର କହିଛନ୍ତି।

ତେବେ ଆଜି ସାରା ଦେଶରେ ଦଳର ୯୮୦୦ ପ୍ରତିନିଧି ହିଁ ଏହି ନିଷ୍ପତ୍ତି ନେବେ। ଉଲ୍ଲେଖଯୋଗ୍ୟ ଯେ, କଂଗ୍ରେସ ପକ୍ଷରୁ ୨୦୨୧ ଅକ୍ଟୋବର ରୁ ଏପ୍ରିଲ ୨୦୨୨ ପର୍ଯ୍ୟନ୍ତ ସଦସ୍ୟ ଯୋଗାଡ଼ ଅଭିଯାନ ଚାଲିଥିଲା। ବର୍ତ୍ତମାନ ସୁଦ୍ଧା ପ୍ରାୟ ୬୦ ନିୟୁତ କର୍ମୀ ଓ ସଦସ୍ୟ ଦଳରେ ସାମିଲ ହୋଇଥିଲା ବେଳେ ଏହାପରେ ନିର୍ବାଚନ ପାଇଁ ପ୍ରତିନିଧି ତାଲିକା ପ୍ରସ୍ତୁତ କରାଯାଇଥିଲା। ଏହି ପ୍ରତିନିଧିମାନେ ହିଁ ପରବର୍ତ୍ତୀ ଅଧ୍ୟକ୍ଷ ବାଛିବେ ଏବଂ ଦଳର ଭବିଷ୍ୟତ ନିର୍ଦ୍ଧାରଣ କରିବେ।

ନୂଆଦିଲ୍ଲୀ : କଂଗ୍ରେସ ଅଧ୍ୟକ୍ଷ ନିର୍ବାଚନ ଲାଗି ଗତକାଲିଠୁ ଶେଷ ହୋଇଛି ନାମାନଙ୍କନ ଦାଖଲ ପ୍ରକ୍ରିୟା। ସେପ୍ଟମ୍ବର ୩୦ ତାରିଖରେ ଦଳର ଅଧ୍ୟକ୍ଷ ପଦ ଲାଗି ନାମାଙ୍କନ ଦାଖଲ କରିଥିଲେ ଦଳର ରାଜ୍ୟସଭା ସାଂସଦ ମଲ୍ଲିକାର୍ଜୁନ ଖଡଗେ,ଲୋକସଭା ସାଂସଦ ଶଶୀ ଥରୁର ଏବଂ ପୂର୍ବତନ ଝାଡଖଣ୍ଡ ମନ୍ତ୍ରୀ କେ.ଏନ ତ୍ରିପାଠୀ। ତେବେ କଂଗ୍ରେସ ଅଧ୍ୟକ୍ଷ ନିର୍ବାଚନ ଲାଗି ତ୍ରିମୁଖୀ ଲଢେଇ ଆଶା କରାଯାଉଥିବା ବେଳେ ଆଜି ଝାଡଖଣ୍ଡ ନେତା କେ ଏନ୍ ତ୍ରିପାଠୀଙ୍କ ନାମାଙ୍କନ ରଦ୍ଦ କରାଯାଇଛି। ଯାହା ଫଳରେ ଏବେ ମଲ୍ଲିକାର୍ଜୁନ ଖଡଗେ ଓ ଶଶୀ ଥରୁର ହେବେ ମୁହାଁମୁହିଁ । ଏହି ଦୁଇ ନେତାଙ୍କ ମଧ୍ୟ ଅଧ୍ୟକ୍ଷ ପଦ ପାଇଁ ଜୋରଦାର ଲଢେଇ ଆଶା କରାଯାଉଥିଲେ ମଧ୍ୟ ବରିଷ୍ଠ ନେତା ତଥା ରାଜ୍ୟସଭା ସାଂସଦ ମଲ୍ଲିକାର୍ଜୁନ ଖଡଗେଙ୍କ ବିଜୟ ନିଶ୍ଚିତ ପରି ଲାଗୁଛି।

ମଲ୍ଲିକାର୍ଜୁନ ଖଡଗେଙ୍କ ବିଜୟରେ ମୁଖ୍ୟ ଭୂମିକା ଗାନ୍ଧୀ ପରିବାର ବୋଲି ବିବେଚନା କରାଯାଉଛି। କାରଣ ଖଡଗେଙ୍କୁ ଗାନ୍ଧୀ ପରିବାରର ନିକଟତର ବୋଲି ବିବେଚନା କରାଯାଏ। ତାଙ୍କ ପାଖରେ ରାହୁଲ ଗାନ୍ଧୀ, ସୋନିଆ ଏବଂ ପ୍ରିୟଙ୍କା ଗାନ୍ଧୀଙ୍କ ସମର୍ଥନ ରହିଛି।ଅନ୍ୟପଟେ ଜି-୨୩ ନେତା ମାନେ ମଧ୍ୟ ମଲ୍ଲିକାର୍ଜୁନ ଖଡ଼ଗେଙ୍କ ସପକ୍ଷରେ ଥିବା ଜଣାପଡିଛି। ଏଣୁ ସେ ହିଁ କଂଗ୍ରେସର ନୂଆ ସଭାପତି ହେବା ଏକପ୍ରକାର ନିଶ୍ଚିତ ହୋଇଯାଇଛି।

ମଲ୍ଲିକାର୍ଜୁନ ଖଡ଼ଗେ ରାଜ୍ୟସଭାରେ ବିରୋଧୀ ଦଳ ନେତା ଭାବେ କାମ କରୁଥିଲେ। କଂଗ୍ରେସ ସଭାପତି ନିର୍ବାଚନ ଲାଗି ଲଢେଇ ପାଇଁ ସେ ଆଜି ଏହି ପଦରୁ ଇସ୍ତଫା ଦେଇଛନ୍ତି।  ସେ ୮ଥରର ବିଧାୟକ ଓ ୨ ଥରର ଲୋକସଭା ସାଂସଦ। ଜଣେ ଦଳିତ ନେତା ଭାବେ ଜଣାଶୁଣା ମଲ୍ଲିକାର୍ଜୁନ ଖଡ଼ଗେ କର୍ଣ୍ଣାଟକାର ପିସିସି ସଭାପତି, ପୂର୍ବତନ ଗୃହମନ୍ତ୍ରୀ ଓ କେନ୍ଦ୍ରମନ୍ତ୍ରୀ ଭାବେ କାମ କରିବାର ଅଭିଜ୍ଞତା ରଖିଛନ୍ତି। ଏଥିସହ ସେ ଗାନ୍ଧି ପରିବାରର ଅତ୍ୟନ୍ତ ବିଶ୍ୱସ୍ତ। ମଲ୍ଲିକାର୍ଜୁନ ଦକ୍ଷିଣ ଭାରତୀୟ ରାଜ୍ୟ କର୍ଣ୍ଣାଟକରୁ ଆସୁଛନ୍ତି। ଯିଏ ଦଳର ଜଣେ ଦଳିତ ଚେହେରା ଭାବେ ଜଣାଶୁଣା। ଯଦି ସେ ଦଳର ସଭାପତି ଭାବେ ନିର୍ବାଚିତ ହୁଅନ୍ତି ତାହେଲେ କଂଗ୍ରେସ ୫୧ ବର୍ଷ ପରେ ଜଣେ ଦଳିତ ଅଧ୍ୟକ୍ଷ ପାଇବ। ଦେଶର ପୂର୍ବତନ ପ୍ରଧାନମନ୍ତ୍ରୀ ବାବୁ ଜଗଜୀବନ ରାମଙ୍କ ପରେ ଦଳ କୌଣସି ଦଳିତ ନେତା କଂଗ୍ରେସ ନେତା ନେତୃତ୍ୱ ନେଇ ନାହାଁନ୍ତି।

ଏଥି ସହିତ ମଲ୍ଲିକାର୍ଜୁନ ଖଡ଼ଗେଙ୍କୁ ଦଳୀୟ ମଙ୍ଗୁଆଳ ଦାୟିତ୍ୱ ପ୍ରଦାନ କରି କଂଗ୍ରେସ ଦେଶର ୨୨ ପ୍ରତିଶତ ଦଳିତଙ୍କୁ ଦଳ ସହ ଯୋଡିବାକୁ ଚେଷ୍ଟା କରିବ। ଏହା ସହିତ ଦଳ ଦକ୍ଷିଣ ଭାରତୀୟ ରାଜନୀତିରେ ସ୍ଥିତି ମଜବୁତ କରିବାକୁ ପ୍ରୟାସ କରିବ। ତାଙ୍କର ଦୀର୍ଘ ଦିନର ରାଜନୈତିକ ଅଭିଜ୍ଞତା ଅନ୍ୟ ଦଳ ସହ ଯୋଗାଯୋଗ କରିବାରେ ବେଶ ସହାୟକ ହେବ।

ଅନ୍ୟପଟେ ଦଳର ଅଧ୍ୟକ୍ଷ ପଦ ନିର୍ବାଚନ ଲାଗି ନାମାନଙ୍କନ ଦାଖଲ କରିବା ପରେ ପ୍ରତିକ୍ରିୟା ରଖି କଂଗ୍ରେସ ରାଜ୍ୟସଭା ସାଂସଦ ମଲ୍ଲିକାର୍ଜୁନ ଖଡ଼ଗେ କହିଛନ୍ତି ଯେ  “ମୁଁ ସର୍ବଦା ଦଳିତ ଲୋକଙ୍କ ଅଧିକାର ପାଇଁ ଲଢିଛି ଏବଂ କଂଗ୍ରେସ ଦଳର ନୀତିକୁ ସମର୍ଥନ କରିବା ପାଇଁ ମୁଁ ଅଧିକ ସଂଗ୍ରାମ କରିବାକୁ ପ୍ରସ୍ତୁତ ଅଛି ଯାହା ସହିତ ମୁଁ ପିଲାଦିନରୁ ଜଡିତ ରହିଛି। ମୁଁ ଦଳର ସେହି ସମସ୍ତ ନେତା, କର୍ମକର୍ତ୍ତା, ପଦାଧିକାରୀଙ୍କୁ ଧନ୍ୟବାଦ ଦେଉଛି, ଯେଉଁମାନେ ମୋ ନାମାଙ୍କନ ସମୟରେ ମୋ ସହିତ ଉପସ୍ଥିତ ରହିଛନ୍ତି। ଆସନ୍ତା ୧୭ ଅକ୍ଟୋବରରେ ମତଦାନ ଅନୁଷ୍ଠିତ ହେବ ଏବଂ ୧୯ ଅକ୍ଟୋବରରେ ନିର୍ବାଚନର ଫଳାଫଳ ଆସିବ। ମୁଁ ଆଶା କରୁଛି ଯେ ମୁଁ ଏହି ନିର୍ବାଚନରେ ​​ଜିତିବି।

ହାର୍‌ ମାନିଯିବାକୁ ପ୍ରସ୍ତୁତ ନୁହଁନ୍ତି ଥରୁର 

ମଲ୍ଲିକାର୍ଜୁନ ଖଡ଼ଗେଙ୍କ ବିଜୟ ଏକ ପ୍ରକାର ନିଶ୍ଚିତ ଥିଲେ ମଧ୍ୟ ହାର ମାନିବାକୁ ପ୍ରସ୍ତୁତ ନୁହନ୍ତି ଲୋକସଭା ସାଂସଦ ଶଶୀ ଥରୁର। ନିଜର ବାକଚାତୁରୀ ପାଇଁ ବେଶ୍ ପ୍ରସିଦ୍ଧ ଥରୁର କହିଛନ୍ତି ଯେ, ଯଦି ଦଳର ବର୍ତ୍ତମାନର ସ୍ଥିତି ନେଇ କଂଗ୍ରେସ କର୍ମୀମାନେ ସନ୍ତୁଷ୍ଟ ଅଛନ୍ତି, ତାହେଲେ ଖଡ଼ଗେଙ୍କ ସପକ୍ଷରେ ଭୋଟ୍ ଦିଅନ୍ତୁ, ହେଲେ ଯଦି ପରିବର୍ତ୍ତନ ଚାହାନ୍ତି, ତାହେଲେ ତାଙ୍କ ସପକ୍ଷରେ ମତ ଯିବା ଉଚିତ ବୋଲି ଥରୁର କହିଛନ୍ତି । ତେବେ ଏଥିରେ ବିଚାରଧାରାର କୌଣସି ସମସ୍ୟା ନାହିଁ ବୋଲି କହିଛନ୍ତି ଶଶୀ ଥରୁର ।

କଂଗ୍ରେସ ଦଳରେ ଥିବା ଯୁବ କର୍ମୀଙ୍କ କଥାକୁ ଶୁଣିବାର ସମୟ ଆସିଯାଇଛି। କଂଗ୍ରେସ ଅଧ୍ୟକ୍ଷ ପଦ ପାଇଁ ନାମାଙ୍କନପତ୍ର ଦାଖଲ କରିଥିବା ଲୋକସଭା ସାଂସଦ ଶଶି ଥରୁର ଆଜି ନାଗପୁରରେ ଏହି କଥା କହିଛନ୍ତି। ସେ କହିଛନ୍ତି, ଆମେ ବଡ଼ ନେତାମାନଙ୍କୁ ସମ୍ମାନ ଦେଉ। କିନ୍ତୁ ଏବେ ଦଳର ଯୁବକର୍ମୀଙ୍କ କଥା ଶୁଣିବାର ବେଳ ଆସିଛି। ଆମେ ଦଳ ସାଂଗଠନିକ ରୂପରେଖକୁ ବଦଳାଇବା ଦିଗରେ କାର୍ୟ୍ୟ କରିବୁ। ଦଳର କର୍ମୀମାନଙ୍କୁ ଗୁରୁତ୍ୱ ଦିଆଯିବା ଉଚିତ୍‌।ଏହା ପୂର୍ବରୁ ଶଶି ଥରୁର କହିଥିଲେ ଯେ ସେ ଦଳର ସଭାପତି ହେଲେ ‘ହାଇକମାଣ୍ଡ’ ବ୍ୟବସ୍ଥାକୁ ହଟାଇ ଦେବେ। ୨୦୧୪ ନିର୍ବାଚନରେ ପରାଜୟ ପରଠୁ କଂଗ୍ରେସ ଏକାଧିକ ନିର୍ବାଚନରେ ପରାଜୟ ବରଣ କରିଥିବା ବେଳେ ଦଳର ସାଂଗଠନିକ ବ୍ୟବସ୍ଥାରେ ଆମୂଳଚୂଳ ପରିବର୍ତ୍ତନ ଆବଶ୍ୟକ ବୋଲି ଜି-୨୩ ନେତାଏ ଦାବି କରି ଆସୁଛନ୍ତି।

କାହିଁକି ନାକଚ ହେଲା କେଏନ୍ ତ୍ରିପାଠୀଙ୍କ ପ୍ରାର୍ଥିପତ୍ର 

କଂଗ୍ରେସ ଅଧ୍ୟକ୍ଷ ପଦ ପାଇଁ ମଲ୍ଲିକାର୍ଜୁନ ଖାଡ଼ଗେ ଓ ଶଶି ଥରୁରଙ୍କ ସହିତ ଝାରଖଣ୍ଡର ପୂର୍ବତନ ମନ୍ତ୍ରୀ କେଏନ୍ ତ୍ରିପାଠୀ ପ୍ରାର୍ଥିପତ୍ର ଦାଖଲ କରିଥିଲେ। ତେବେ ଯାଞ୍ଚ ବେଳେ ତାଙ୍କ ପ୍ରାର୍ଥିପତ୍ର ନାକଚ ହୋଇଯାଇଛି। ଏହି ନିର୍ବାଚନର ରିଟର୍ଣ୍ଣିଂ ଅଫିସର ମଧୁସୂଦନ ମିସ୍ତ୍ରୀ ଏକ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି। ଶ୍ରୀ ମିସ୍ତ୍ରୀ କହିଛନ୍ତି, ପ୍ରାର୍ଥିପତ୍ର ଗୁଡ଼ିକର ଯାଞ୍ଚ କାର୍ୟ୍ୟ ଶେଷ ହୋଇଛି। କେଏନ୍ ତ୍ରିପାଠୀ ଯେଉଁ ୨୦ଟି ଫର୍ମ ଦାଖଲ କରିଥିଲେ ସେଥିରୁ ୪ଟିରେ ଥିବା ହସ୍ତାକ୍ଷର ଗୁଡ଼ିକ ଭିନ୍ନ ଭିନ୍ନ ଥିଲା। ଏହି କାରଣରୁ ତାଙ୍କ ପ୍ରାର୍ଥିପତ୍ରକୁ ନାକଚ କରିଦିଆଯାଇଛି।

ନୂଆଦିଲ୍ଲୀ : କଂଗ୍ରେସ ଅଧ୍ୟକ୍ଷ ନିର୍ବାଚନ ପାଇଁ ନାମାଙ୍କନ ଦାଖଲ କରିବାର ଆଜି ହେଉଛି ଅନ୍ତିମ ଦିନ। ଶେଷ ଦିନର ଅଧ୍ୟକ୍ଷ ନିର୍ବାଚନକୁ ନେଇ ଲଢ଼େଇ ଜୋରଦାର ହେବାକୁ ନେଇ ଚର୍ଚ୍ଚା ମଧ୍ୟରେ ଏକ ରୋଚକ ଦୃଶ୍ୟ ସାମ୍ନାକୁ ଆସିଛି। ପୂର୍ବରୁ କଂଗ୍ରେସ ଅଧ୍ୟକ୍ଷ ପାଇଁ ରେସରେ ଥିବା ଅଶୋକ ଗେହଲଟ ଓ ଦଗବିଜୟ ସିଂହ ଓହରି ଯାଇଛନ୍ତି। ଏଥି ସହିତ ଗାନ୍ଧୀ ପରିବାରର ବିଶ୍ବସ୍ତ ମଲ୍ଲିକାର୍ଜୁନ ଖଡ଼ଗେ କଂଗ୍ରେସ ଅଧ୍ୟକ୍ଷ ରେସ୍‌ରେ ପ୍ରବେଶ କରିଛନ୍ତି। ଅଧ୍ୟକ୍ଷ ପଦ ପାଇଁ ମଲ୍ଲିକାର୍ଜୁନ ଖଡ଼ଗେଙ୍କ ଏଣ୍ଟ୍ରି ପରେ ଦିଗବିଜୟ ଏଥିରୁ ଓହରି ଯାଇଛନ୍ତି । ଖଡଗେ ତାଙ୍କର ନେତା ଓ ସେ ତାଙ୍କ ପାଇଁ ପ୍ରସ୍ତାବକ ହେବେ ବୋଲି କହିଛନ୍ତି ଦିଗବିଜୟ ସିଂ ।

ଆଜି ଶେଷ ଦିନରେ କଂଗ୍ରେସ ଅଧ୍ୟକ୍ଷ ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି ଥିରୁଭନନ୍ତପୁରମ ସାଂସଦ ଶଶି ଥରୁର। ଦିଲ୍ଲୀ ଏଆଇସିସି ଅଫିସ୍‌କୁ ଯାଇ ଥରୁର ତାଙ୍କ ନାମାନଙ୍କନ ପତ୍ର ଦାଖଲ କରିଛନ୍ତି। ଅନ୍ୟପଟେ ଆଜି ଅପରାହ୍ଣ ୩ ଟାରେ ନାମାଙ୍କନ ଦାଖଲ କରିଛନ୍ତି ମଲିକାର୍ଜୁନ ଖଡଗେ। ସବୁଠୁ ବଡ କଥା ହେଉଛି ଖଡଗେଙ୍କ ପଛରେ ଗାନ୍ଧୀ ପରିବାରର ସମର୍ଥନ ରହୁଥିବାରୁ ସେ ହିଁ କଂଗ୍ରେସର ନୂଆ ସଭାପତି ହେବା ଏକପ୍ରକାର ନିଶ୍ଚିତ ହୋଇଯାଇଛି। ସେପଟେ ପ୍ରମୋଦ ତିୱାରୀଙ୍କ ନାଁ ଚର୍ଚ୍ଚା ହେଉଥିବା ବେଳେ ସେ ମଧ୍ୟ କଂଗ୍ରେସ ଅଧ୍ୟକ୍ଷ ନିର୍ବାଚନ ଲଢିବେ ନାହିଁ ବୋଲି ସୂଚନା ମିଳିଛି ।

ମଲ୍ଲିକାର୍ଜୁନ ଖଡ଼ଗେ ବର୍ତ୍ତମାନ ରାଜ୍ୟସଭାରେ ବିରୋଧୀ ଦଳ ନେତା ଭାବେ କାମ କରୁଛନ୍ତି। ସେ ୮ଥରର ବିଧାୟକ ଓ ୨ ଥରର ଲୋକସଭା ସାଂସଦ। ସେ ରାଜ୍ୟସଭା ସାଂସଦ ଭାବେ ମଧ୍ୟ କାର୍ଯ୍ୟ କରିଛନ୍ତି। ଜଣେ ଦଳିତ ନେତା ଭାବେ ଜଣାଶୁଣା ମଲ୍ଲିକାର୍ଜୁନ ଖଡ଼ଗେ କର୍ଣ୍ଣାଟକାର ପିସିସି ସଭାପତି, ପୂର୍ବତନ ଗୃହମନ୍ତ୍ରୀ ଓ କେନ୍ଦ୍ରମନ୍ତ୍ରୀ ଭାବେ କାମ କରିବାର ଅଭିଜ୍ଞତା ରଖିଛନ୍ତି। ଏଥିସହ ସେ ଗାନ୍ଧି ପରିବାରର ଅତ୍ୟନ୍ତ ବିଶ୍ୱସ୍ତ। ଗେହଲଟ ରାଜସ୍ଥାନର ବିବାଦୀୟ ପରିସ୍ଥିତି ଯୋଗୁ ଅଧ୍ୟକ୍ଷ ରେସ୍‌ରୁ ବାଦ ପଡ଼ିଛନ୍ତି। ସେ ଗାନ୍ଧି ପରିବାରର ବିଶ୍ୱସ୍ତ ଭାବେ ଜଣାଶୁଣା ଥିଲେ। ସେ ବାଦ ପଡ଼ିଥିବାରୁ ଗାନ୍ଧି ପରିବାରର ଅନ୍ୟତମ ବିଶ୍ୱସ୍ତ ମଲ୍ଲିକାର୍ଜୁନ ଖଡ଼ଗେଙ୍କୁ ଅଧ୍ୟକ୍ଷ କରାଯିବା ସପକ୍ଷରେ ବରିଷ୍ଠ ନେତା ଥିବା କୁହାଯାଉଛି।

ଅନ୍ୟପଟେ ଜି-୨୩ ନେତା ମାନେ ମଧ୍ୟ ମଲ୍ଲିକାର୍ଜୁନ ଖଡ଼ଗେଙ୍କ ସପକ୍ଷରେ ଥିବା ଜଣାପଡିଛି। ଜି-୨୩ ନେତା ପୃଥ୍ୱୀରାଜ ଚୌହାନ, ମନୀଷ ତିୱାରୀ, ଭୂପିନ୍ଦର ସିଂହ ହୁଡ୍ଡା ମଲ୍ଲିକାର୍ଜୁନ ଖଡ଼ଗେଙ୍କୁ ସପୋର୍ଟ କରୁଛନ୍ତି। ଯାହା ଫଳରେ ମଲ୍ଲିକାର୍ଜୁନ ଖଡ଼ଗେ କଂଗ୍ରେସ ଅଧ୍ୟକ୍ଷ ହେବା ଏକ ପ୍ରକାର ନିଶ୍ଚିତ ହୋଇଯାଇଛି।

ନିର୍ବାଚନରୁ ଓହରିବା ପରେ ଦିଗବିଜୟ ସିଂ କହିଲେ …. 

କଂଗ୍ରେସ ଅଧ୍ୟକ୍ଷ ନିର୍ବାଚନରୁ ଦିଗବିଜୟ ସିଂ ଓହରିବା ପରେ କହିଛନ୍ତି ଯେ ମୁଁ ସାରା ଜୀବନ କଂଗ୍ରେସ ପାଇଁ କାମ କରିଛି ଏବଂ ଏହା ଜାରି ରଖିବି। ଆମର ଆଦର୍ଶ ସମାନ, ଆମେ ଚାହୁଁ ଦଳ ସୁଦୃଢ଼ ହେଉ; ସ‌ୌହାର୍ଦ୍ଦ୍ୟପୂଣ୍ଣ ପ୍ରତିଦ୍ବନ୍ଦ୍ବିତ‌ା, ଶତ୍ରୁତା ନାହିଁ। ମଲ୍ଲିକାର୍ଜୁନ ଖଡ଼ଗେ ନିର୍ବାଚନରେ ପ୍ରବେଶ କରିବା କଥା ପଚାରିବାରୁ ସେ କହିଲେ, ମଲ୍ଲିକାର୍ଜୁନ ଖଡ଼ଗେ ଖୁବ୍‌ ସମ୍ମାନସ୍ପଦ ସହଯୋଗୀ। କଂଗ୍ରେସ ଅଧ୍ୟକ୍ଷ ନିର୍ବାଚନରେ ଅଧିକ ଲୋକ ପ୍ରତିଦ୍ବନ୍ଦ୍ବିତା କରିବା ଭଲ କଥା। ଯେତେ ଅଧିକ ପ୍ରାର୍ଥୀ ହେବେ, ସେତେ ଉତ୍ତମ।

ଦିଗବିଜୟ ସିଂ କହିଛନ୍ତି, ମଲ୍ଲିକାର୍ଜୁନ ଖଡ଼ଗେଜୀ ମୋର ସିନିୟର। ଗତକାଲି ମୁଁ ତାଙ୍କ ବାସଭବନକୁ ଯାଇ କହିଥିଲି ଯେ ଯଦି ସେ କଂଗ୍ରେସ ସଭାପତି ପଦ ପାଇଁ ନାମାଙ୍କନପତ୍ର ଦାଖଲ କରୁଛନ୍ତି, ତେବେ ମୁଁ କରିବି ନାହିଁ। ତା’ପରେ ସେ ନାମ ଲେଖାଉ ନାହାଁନ୍ତି ବୋଲି କହିଥିଲେ। ଏହା ପରେ ମୁଁ ଗଣମାଧ୍ୟମରୁ ଜାଣିଲି ଯେ ସେ ଏହି ପଦ ପାଇଁ ପ୍ରାର୍ଥୀ ଅଟନ୍ତି। ମୁଁ ତାଙ୍କୁ କହିଲି ଯେ ମୁଁ ତାଙ୍କ ସହିତ ଛିଡା ହୋଇଛି ଏବଂ ତାଙ୍କ ବିପକ୍ଷରେ ପ୍ରତିଦ୍ୱନ୍ଦ୍ୱିତା କରିବାକୁ ମଧ୍ୟ ଚିନ୍ତା କରିପାରିବି ନାହିଁ । ମୁଁ ତାଙ୍କର ସମର୍ଥକ ହେବି ।

ନାମାଙ୍କନ ଦାଖଲ କଲେ ଝାଡଖଣ୍ଡର ପୂର୍ବତନ ମନ୍ତ୍ରୀ କେଏନ ତ୍ରିପାଠୀ

କଂଗ୍ରେସ ଅଧ୍ୟକ୍ଷ ନିର୍ବାଚନ ପାଇଁ ଆରମ୍ଭ ହୋଇଛି ନାମାଙ୍କନ ପ୍ରକ୍ରିୟା। ଏହିକ୍ରମରେ ଆଜି ପ୍ରଥମ ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଛନ୍ତି ଝାଡଖଣ୍ଡର ପୂର୍ବତନ ମନ୍ତ୍ରୀ କେଏନ ତ୍ରିପାଠୀ। ଏନେଇ ସେ ଆଜି ଏଆଇସିସି ମୁଖ୍ୟାଳୟରେ ପହଞ୍ଚି ନିଜ ନାମାଙ୍କନ ଦାଖଲ କରିଛନ୍ତି। ଏହାପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସେ କହିଛନ୍ତି ଯେ, ମୁଁ କଂଗ୍ରେସ ଅଧ୍ୟକ୍ଷ ପଦ ପାଇଁ ନାମାଙ୍କନ ଦାଖଲ କରିଛି। ଦଳର ସମସ୍ତ ନେତାଙ୍କ ନିଷ୍ପତ୍ତି କୁ ସମ୍ମାନ ଦେବି ବୋଲି ସେ କହିଛନ୍ତି। ତେବେ ଶ୍ରୀ ତ୍ରିପାଠୀ ଙ୍କ ନାମ ଚର୍ଚ୍ଚାରେ ନଥିବା ବେଳେ ସେ ଆଜି ସରପ୍ରାଇଜ ଫ୍ୟାକ୍ଟର ଭାବେ ନାନଙ୍କନ ଦାଖଲ କରିଛନ୍ତି।