ନୂଆଦିଲ୍ଲୀ: ଇଂଲଣ୍ଡରେ ଆୟୋଜିତ ହେବାକୁ ଥିବା ୨୦୨୬ ମହିଳା ଟି-୨୦ ବିଶ୍ୱକପ୍ ପାଇଁ ବିସିସିଆଇ ପକ୍ଷରୁ ୧୫ ଜଣିଆ ଭାରତୀୟ ଦଳ ଘୋଷଣା କରାଯାଇଛି। ମୁମ୍ବାଇ ସ୍ଥିତ ବିସିସିଆଇ ମୁଖ୍ୟାଳୟରେ ଅନୁଷ୍ଠିତ ଚୟନ ବୈଠକରେ ଏହି ନିଷ୍ପତ୍ତି ନିଆଯାଇଛି। ଆସନ୍ତା ଜୁନ୍ ୧୪ ତାରିଖରୁ ଆରମ୍ଭ ହେବାକୁ ଥିବା ଏହି ଟୁର୍ଣ୍ଣାମେଣ୍ଟରେ ହରମନପ୍ରୀତ କୌରଙ୍କ ନେତୃତ୍ୱରେ ଭାରତ ତାର ପ୍ରଥମ ଟି-୨୦ ବିଶ୍ୱକପ୍ ଟାଇଟଲ୍ ଜିତିବାକୁ ଲକ୍ଷ୍ୟ ରଖିବ। ସେହିପରି ସ୍ମୃତି ମାନ୍ଧାନାଙ୍କୁ ଉପ-ଅଧିନାୟିକା ଦାୟିତ୍ୱ ଦିଆଯାଇଛି।

ଗତବର୍ଷ ଆହତ ସମସ୍ୟା କାରଣରୁ ଦଳରୁ ବାଦ୍ ପଡିଥିବା ୱିକେଟ୍ କିପର ବ୍ୟାଟର ଯସ୍ତିକା ଭାଟିଆ ଟି-୨୦ ବିଶ୍ୱକପ୍ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି। ଏସିଏଲ୍ ସର୍ଜରୀ ପରେ ସେ ସମ୍ପୂର୍ଣ୍ଣ ସୁସ୍ଥ ହୋଇ ଫେରିଥିବା ଜଣାପଡିଛି। ଅନ୍ୟପକ୍ଷରେ, ଦଳରେ ସ୍ଥାନ ପାଇବା ନେଇ ଆଶା କରାଯାଉଥିବା ତାରକା ଖେଳାଳି ପ୍ରତିକା ରାୱଲଙ୍କୁ ଟି-୨୦ ଦଳରୁ ବାଦ୍ ଦିଆଯାଇଛି। ତେବେ ତାଙ୍କୁ ଏବଂ ହରଲିନ୍ ଦେଓଲଙ୍କୁ କେବଳ ଲର୍ଡସ୍‌ରେ ଖେଳାଯିବାକୁ ଥିବା ଏକମାତ୍ର ଟେଷ୍ଟ ମ୍ୟାଚ୍ ପାଇଁ ସୁଯୋଗ ମିଳିଛି।

ଦଳରେ ଶେଫାଳି ବର୍ମା, ଜେମିମା ରୋଡ୍ରିଗୁଏଜ୍, ଦୀପ୍ତି ଶର୍ମା ଏବଂ ରିଚା ଘୋଷଙ୍କ ଭଳି ଅଭିଜ୍ଞ ଖେଳାଳି ନିଜ ସ୍ଥାନ ବଜାୟ ରଖିଛନ୍ତି। ଏହାବ୍ୟତୀତ ଭାରତୀ ଫୁଲମାଳି, ଯୁବ ପେସର ନନ୍ଦିନୀ ଶର୍ମା ଏବଂ ବାମହାତୀ ସ୍ପିନର ଶ୍ରୀ ଚରଣୀ ମଧ୍ୟ ନିଜ ପ୍ରଦର୍ଶନ ଆଧାରରେ ଦଳରେ ସ୍ଥାନ ପାଇବାରେ ସଫଳ ହୋଇଛନ୍ତି। ଘରୋଇ କ୍ରିକେଟରେ ଉନ୍ନତ ପ୍ରଦର୍ଶନ ଆଧାରରେ ରାଧା ଯାଦବ ମଧ୍ୟ ନିଜ ସ୍ଥାନ ବଜାୟ ରଖିଛନ୍ତି। ଅନ୍ୟପଟେ ଆହତ ସମସ୍ୟା କାରଣରୁ କାଶ୍ୱୀ ଗୌତମ ଏବଂ ଅମନଜୋତ କୌର ଚୟନ ପାଇଁ ଉପଲବ୍ଧ ନଥିଲେ।

ଭାରତୀୟ ଦଳ: ହରମନପ୍ରୀତ କୌର (ଅଧିନାୟିକା), ସ୍ମୃତି ମାନ୍ଧାନା (ଉପ-ଅଧିନାୟିକା), ଶେଫାଳି ବର୍ମା, ଜେମିମା ରୋଡ୍ରିଗୁଏଜ୍, ଭାରତୀ ଫୁଲମାଳି, ଦୀପ୍ତି ଶର୍ମା, ରିଚା ଘୋଷ (ୱିକେଟ୍ କିପର), ଶ୍ରୀ ଚରଣୀ, ଯସ୍ତିକା ଭାଟିଆ, ନନ୍ଦିନୀ ଶର୍ମା, ରେଣୁକା ସିଂହ ଠାକୁର, ଅରୁନ୍ଧତୀ ରେଡ୍ଡୀ, କ୍ରାନ୍ତି ଗୌଡ଼, ଶ୍ରେୟାଙ୍କା ପାଟିଲ, ଏବଂ ରାଧା ଯାଦବ।

ଆଗାମୀ ମାସରେ ଦକ୍ଷିଣ ଆଫ୍ରିକା ବିପକ୍ଷରେ ହେବାକୁ ଥିବା ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ପାଇଁ ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (ବିସିସିଆଇ) ଭାରତୀୟ ମହିଳା ଦଳ ଘୋଷଣା କରିଛି। ଅଭିଜ୍ଞ ଖେଳାଳି ହରମନପ୍ରୀତ କୌରଙ୍କୁ ଦଳର ଅଧିନାୟକ ଦାୟିତ୍ୱ ମିଳିଥିବା ବେଳେ ଷ୍ଟାର ବ୍ୟାଟର ସ୍ମୃତି ମନ୍ଧାନା ଉପ-ଅଧିନାୟକ ଭାବେ ନିଯୁକ୍ତ ହୋଇଛନ୍ତି। ଆସନ୍ତା ଜୁନ୍ ମାସରେ ଇଂଲଣ୍ଡରେ ହେବାକୁ ଥିବା ଆଇସିସି ମହିଳା ଟି-୨୦ ବିଶ୍ୱକପ୍ ୨୦୨୬ ପୂର୍ବରୁ ଏହି ସିରିଜ୍ ଭାରତୀୟ ଦଳର ପ୍ରସ୍ତୁତି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ।

ଅନୁଷ୍କା ଶର୍ମାଙ୍କୁ ମିଳିଲା ସୁଯୋଗ

ଏହି ଦଳ ଘୋଷଣାର ସବୁଠାରୁ ବଡ଼ ଚର୍ଚ୍ଚାର ବିଷୟ ହେଉଛି ଯୁବ ଖେଳାଳି ଅନୁଷ୍କା ଶର୍ମାଙ୍କ ଚୟନ। ମହିଳା ପ୍ରିମିୟର ଲିଗ୍ (ଡବ୍ଲୁପିଏଲ୍ ୨୦୨୬)ରେ ଗୁଜରାଟ ଜାଏଣ୍ଟସ୍ ପାଇଁ ଖେଳି ସେ ଦମଦାର ପ୍ରଦର୍ଶନ କରିଥିଲେ। ଡାହାଣହାତୀ ବ୍ୟାଟର ଅନୁଷ୍କା ୭ଟି ଇନିଂସରେ ୨୫.୨୮ ହାରରେ ଏବଂ ୧୨୯.୧୯ ଷ୍ଟ୍ରାଇକ୍ ରେଟ୍‌ରେ ମୋଟ ୧୭୭ ରନ୍ ସଂଗ୍ରହ କରିଥିଲେ। ତାଙ୍କର ଏହି ଚମତ୍କାର ପ୍ରଦର୍ଶନ ଯୋଗୁଁ ତାଙ୍କୁ ପ୍ରଥମ ଥର ପାଇଁ ଜାତୀୟ ଦଳରେ ସୁଯୋଗ ମିଳିଛି ଏବଂ ସେ ଆନ୍ତର୍ଜାତୀୟ ପଦାର୍ପଣ କରିବା ନେଇ ଆଶା ରଖିଛନ୍ତି।

ଦଳରେ ଅନ୍ୟ ପ୍ରମୁଖ ପରିବର୍ତ୍ତନ

ଅନୁଷ୍କା ଶର୍ମାଙ୍କ ବ୍ୟତୀତ, ୱିକେଟକିପର ଉମା ଛେତ୍ରୀ ଜାତୀୟ ଦଳକୁ ଫେରିଛନ୍ତି। ସେହିପରି ପେସ୍ ବୋଲିଂ ବିଭାଗକୁ ମଜବୁତ କରିବା ପାଇଁ କାଶ୍ୱୀ ଗୌତମଙ୍କୁ ସାମିଲ କରାଯାଇଛି। ଅନ୍ୟପକ୍ଷରେ, ଗତ ଅଷ୍ଟ୍ରେଲିଆ ସିରିଜ୍‌ରେ ଖେଳିଥିବା ଅମନଜୋତ କୌର ଏବଂ ବୈଷ୍ଣବୀ ଶର୍ମାଙ୍କୁ ବାଦ୍ ଦିଆଯାଇଛି। ବୋଲିଂ ବିଭାଗରେ ରେଣୁକା ଠାକୁର, ଅରୁନ୍ଧତୀ ରେଡ୍ଡୀ ଏବଂ କ୍ରାନ୍ତି ଗୌଡ଼ ପେସ୍ ଦାୟିତ୍ୱ ତୁଲାଇବେ। ସ୍ପିନ୍ ବିଭାଗରେ ଅଭିଜ୍ଞ ଦୀପ୍ତି ଶର୍ମା, ଶ୍ରେୟଙ୍କା ପାଟିଲ ଏବଂ ଶ୍ରୀ ଚରଣୀ ପ୍ରମୁଖ ଭୂମିକା ଗ୍ରହଣ କରିବେ।

ସିରିଜ୍‌ର କାର୍ଯ୍ୟସୂଚୀ

ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଏହି ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଏପ୍ରିଲ୍ ୧୭ରୁ ଆରମ୍ଭ ହୋଇ ଏପ୍ରିଲ୍ ୨୭ ପର୍ଯ୍ୟନ୍ତ ଖେଳାଯିବ। ପ୍ରଥମ ଦୁଇଟି ମ୍ୟାଚ୍ ଡର୍ବାନ୍‌ରେ ଖେଳାଯିବାକୁ ଥିବାବେଳେ ପରବର୍ତ୍ତୀ ଦୁଇଟି ମ୍ୟାଚ୍ ଜୋହାନସବର୍ଗରେ ଏବଂ ଅନ୍ତିମ ମ୍ୟାଚ୍ ବେନୋନିଠାରେ ଅନୁଷ୍ଠିତ ହେବ।

ଘୋଷିତ ଭାରତୀୟ ଦଳ:

ହରମନପ୍ରୀତ କୌର (ଅଧିନାୟକ), ସ୍ମୃତି ମନ୍ଧାନା (ଉପ-ଅଧିନାୟକ), ଶେଫାଳି ବର୍ମା, ଜେମିମା ରୋଡ୍ରିଗ୍ସ, ଦୀପ୍ତି ଶର୍ମା, ରିଚା ଘୋଷ (ୱିକେଟକିପର), ଅରୁନ୍ଧତୀ ରେଡ୍ଡୀ, ରେଣୁକା ଠାକୁର, କ୍ରାନ୍ତି ଗୌଡ଼, ଶ୍ରୀ ଚରଣୀ, ଶ୍ରେୟଙ୍କା ପାଟିଲ, କାଶ୍ୱୀ ଗୌତମ, ଭାରତୀ ଫୁଲମାଲୀ, ଉମା ଛେତ୍ରୀ (ୱିକେଟକିପର), ଏବଂ ଅନୁଷ୍କା ଶର୍ମା।

ନୂଆଦିଲ୍ଲୀ : ଗତକାଲି ଏବଂ ଆଜି କ୍ରୀଡ଼ା ଜଗତରେ ଦୁଇଟି ଦୃଶ୍ୟ ବେଶ ଭାଇରାଲ ହେଉଛି। ଯେତେବେଳେ ଜଣେ ସାଥି ଖେଳାଳି ଅବସର ନିଅନ୍ତି ସେତେବେଳେ ତାଙ୍କ ସାଥି ଖେଳାଳିଙ୍କ ସହ ପ୍ରତିଦ୍ବନ୍ଦୀମାନେ ମଧ୍ୟ କିପରି ଭାବୁକ ହୋଇଯାଆନ୍ତି ତାହା ଦେଖିବାକୁ ମିଳିଛି। ଯାହା କ୍ରୀଡାର ସୌନ୍ଦର୍ଯ୍ୟତାକୁ ପ୍ରକାଶ କରୁଛି। ଖେଳରେ ନିଜ ନିଜ ଭିତରେ ବିଜୟ ପାଇଁ ପ୍ରତିଦ୍ବନ୍ଦୀତା କରୁଥିବା ବେଳେ ଜଣେ ଅବସର ନେଲା ବେଳେ ଅନ୍ୟ ଜଣେ କିପରି ଭାବବ୍ୱିହଳ ହୋଇ କାନ୍ଦିପକାଇଛନ୍ତି ତାହା ଦେଖିବାକୁ ମିଳିଛି।

ଟେନିସ କୋର୍ଟରୁ ଅବସର ନେଲେ ଫେଡେରର

କ୍ୟାରିୟର ସାରା ଜଣେ ଦୃଢ଼ ପ୍ରତିଦ୍ବନ୍ଦ୍ବୀ ଭାବେ ସ୍ପେନ୍‌ ତାରକା ରାଫେଲ ନାଦାଲଙ୍କ ସହ ଖେଳିଆସିଥିବା ସ୍ବିଜରଲାଣ୍ଡ୍‌ ତାରକା ରୋଜର ଫେଡେରର୍‌ ଶେଷରେ ଗତକାଲି  ଟେନିସ କୋର୍ଟରୁ ବିଦାୟ ନେଇଛନ୍ତି । ଶୁକ୍ରବାର ଦିନ ଲାଭେର କପରେ ସେ ତାଙ୍କ ସାଥୀ ରାଫେଲ ନାଦାଲଙ୍କ ସହ ଏକ ଡବଲ୍ସ ମ୍ୟାଚରେ ପରାସ୍ତ ହୋଇଥିଲେ ଏବଂ ଏହା ସହିତ ତାଙ୍କର ଚମତ୍କାର କ୍ୟାରିୟର ମଧ୍ୟ ସମାପ୍ତ ହୋଇଯାଇଛି । ଏହି ଶେଷ ମ୍ୟାଚ୍ ପରେ ରୋଜର ଫେଡେରର କାନ୍ଦି ପକାଇଥିଲେଫେଡେରରଙ୍କ ସହ ତାଙ୍କ ସାଥି ଖେଳାଳି ରାଫେଲ ନାଦାଲ ମଧ୍ୟ କାନ୍ଦିପକାଇଥିଲେ । ରୋଜର ଫେଡେରର ହେଉଛନ୍ତି ତୃତୀୟ ସର୍ବାଧିକ ଗ୍ରାଣ୍ଡସ୍ଲାମ ଜିତିଥିବା ଟେନିସ ଖେଳାଳି । ଗତ ସପ୍ତାହରେ ସେ ଟେନିସରୁ ଅବସର ଘୋଷଣା କରିଥିଲେ। ସେ ଲାଭେର କପରେ ନିଜ କ୍ୟାରିୟରର ଶେଷ ମ୍ୟାଚ୍ ଖେଳିବାକୁ ଘୋଷଣା କରିଥିଲେ। ସେ ଲାଭେର କପରେ ୟୁରୋପ ଟିମ ପକ୍ଷରୁ ଖେଳିଥିବାବେଳେ ତାଙ୍କ ସାଥୀ ଥିଲେ ସ୍ପେନର ରାଫେଲ ନାଡାଲ। ଏହି ଯୋଡି ପ୍ରଥମ ସେଟରେ ଫ୍ରାନ୍ସିସ୍ ଟିଫୋ-ଜ୍ୟାକ୍ ସାକଙ୍କୁ ପରାସ୍ତ କରିଥିଲେ ।

ଅନେକ ମ୍ୟାଚ୍‌ରେ ଫେଡେରର ଓ ନାଡାଲଙ୍କ ମଧ୍ୟରେ କଡ଼ା ଟକ୍କର ଦର୍ଶକ ଦେଖିଥିଲେ। ଦୁଇ ଜଣ ପରସ୍ପରର ଚୀର ପ୍ରତିଦ୍ୱନ୍ଦ୍ୱୀ। ତଥାପି ଫେଡରରଙ୍କ ପାଇଁ ଥିବା ନାଡାଲଙ୍କ ସମ୍ମାନ ପୂରା ବିଶ୍ୱ ଦେଖିଛି। ଲାଭେର କପ୍‌ରେ ନିଜର ଶେଷ ପ୍ରତିଯୋଗିତାମୂଳକ ମ୍ୟାଚ୍‌ ଖେଳୁଥିବା ଫେଡେରରଙ୍କ ପତ୍ନୀ ମିରକା, ୪ ପିଲା ଓ ବାପା ମା’ ମଧ୍ୟ ଉପସ୍ଥିତ ରହିଥିଲେ। ୨୦ ଥରର ଗ୍ରାଣ୍ଡସ୍ଲାମ ଚାମ୍ପିୟନଙ୍କୁ ବିଦାୟ ଜଣାଇବା ବେଳେ ସମସ୍ତଙ୍କ ଆଖିରେ ଲୁହ ଚାଲି ଆସିଥିଲା। ସେହିପରି ସାଥୀ ଖେଳାଳିମାନେ ମ୍ୟାଚ୍ ପରେ ଫେଡେରରଙ୍କୁ କାନ୍ଦରେ ଉଠାଇଥିଲେ।

It was a magical evening yesterday. Thank you again to all the players and fans who were here to share this moment with me. It means the world ❤️😊🙏🏼 pic.twitter.com/IKFb6jEeXJ

— Roger Federer (@rogerfederer) September 24, 2022

ଗତକାଲି ମ୍ୟାଚ୍ ସରିବା ପରେ ୪୧ ବର୍ଷୀୟ ଫେଡେରର ବହୁତ ଭାବ ବିହ୍ଵଳ ହୋଇ ପଡିଥିଲେ। ଦର୍ଶକଙ୍କୁ ଅଭିବାଦନ କରିବା ସମୟରେ ସେ କାନ୍ଦି ଉଠିଥିଲେ। ଏହି ସମୟରେ ପ୍ରାୟ ଦୁଇ ଦଶନ୍ଧି ଧରି ତାଙ୍କୁ ଟକ୍କର ଦେଇ ଆସିଥିବା ରାଫେଲ ନାଡାଲ ମଧ୍ୟ ନିଜ ଆଖିର ଲୁହକୁ ଅଟକାଇ ପାରିନଥିଲେ। ନାଦାଲ-ଫେଡେରରଙ୍କ ଭାବୁକ ଫଟୋ ସେୟାର କରି ବିରାଟ କୋହଲି ଏକ ସୁନ୍ଦର ପୋଷ୍ଟ କରିଛନ୍ତି। କୋହଲି ଟୁଇଟ୍ କରି ଲେଖିଛନ୍ତି, କେହି କଣ ଚିନ୍ତା କରିଥିଲେ କି ଦୁଇ ମହାନ ପ୍ରତିଦ୍ଵନ୍ଦ୍ଵୀ ପରସ୍ପର ପାଇଁ ଏମିତି ଦୁଃଖ ଅନୁଭବ କରିବେ। ଏହା ହିଁ ଖେଳର ସୁନ୍ଦରତା। ଏହା ମୋ ପାଇଁ କ୍ରୀଡା ଜଗତ ସହ ଜଡିତ ସବୁଠୁ ସୁନ୍ଦର ଛବି ଏବଂ ଦୃଶ୍ୟ। ଯେତେବେଳେ ଆପଣଙ୍କ ସାଥୀ ଆପଣଙ୍କ ପାଇଁ ଲୁହ ଗଡାଉଛି, ତେବେ ଏହା ଜଣାପଡେ ଯେ, ଈଶ୍ଵର ଆପଣଙ୍କୁ କେତେ ପ୍ରତିଭା ଏବଂ ଦକ୍ଷତା ଦେଇଛନ୍ତି, ଯାହାକୁ ଆପଣ ଆହୁରି ଉନ୍ନତ କରି ପାରିଛନ୍ତି। ଏହା ଦୁଇ ଖେଳାଳିଙ୍କ ପାଇଁ ସମ୍ମାନ ବ୍ୟତୀତ ଆଉ କିଛି ନୁହେଁ।

@rogerfederer @RafaelNadal

— Virat Kohli (@imVkohli) September 24, 2022

ଫେଡେରର ୨୦ଥର ଗ୍ରାଣ୍ଡସ୍ଲାମ ଟ୍ରଫି ଜିତିଛନ୍ତି। ସେ ୬ ଥର ଅଷ୍ଟ୍ରେଲିଆ ଓପନ ଟାଇଟଲ୍ସ, ଗୋଟିଏ ଥର ଫ୍ରେଞ୍ଚ ଓପନ ଟ୍ରଫି, ୮ଥର ୱିମ୍ବେଲଡନ ଟ୍ରଫି ଓ କ୍ରମାଗତ ୫ଥର ଆମେରିକା ଓପନ ଟାଇଟଲ ଜିତିବାର ରେକର୍ଡ କରିଛନ୍ତି। ନିଜର ଏଟିପି ଟୁର କ୍ୟାରିୟରରେ ସେ ୧୨୫୧ ଥର ଜିତିଛନ୍ତି। ଏହା ବିଶ୍ୱରେ ଦ୍ୱିତୀୟ ସର୍ବାଧିକ। ତାଙ୍କ ଉପରେ ୧୨୭୪ ଏଟିପି ବିଜୟ ସହ ଜିମ୍ମି କୋନର୍ସ ରହିଛନ୍ତି। ଫେଡେରର ୧୦୩ ଟୁର ଲେଭଲ ଟ୍ରଫି ଅର୍ଥାତ ଏଟିପି ଟାଇଟଲ ଜିତିଛନ୍ତି। ୧୯୯୮ରେ ନିଜର ପ୍ରଥମ ଏଟିପି ଟୁର ମ୍ୟାଚ୍‌ ଖେଳିଥିବା ଫେଡେରର ୩୧୦ ସପ୍ତାହ ଧରି ବିଶ୍ୱର ୧ନଂ ଟେନିସ ଖେଳାଳି ହୋଇ ରହିଥିଲେ। ଏହା ମଧ୍ୟରେ ରେକର୍ଡ କ୍ରମାଗତ ୨୩୭ ସପ୍ତାହ ରହିଛି। ମାତ୍ର ୨୧ ବର୍ଷ ବୟସରେ ଫେଡରର ୨୦୦୩ ୱିମ୍ବେଲଡନରେ ନିଜର ପ୍ରଥମ ବଡ଼ ଟ୍ରଫି ଜିତିଥିଲେ। ୨୦୦୩ରୁ ୨୦୦୯ ମଧ୍ୟରେ ସେ ୨୮ଟି ଟୁର୍ଣ୍ଣାମେଣ୍ଟରୁ ୨୧ଟିରେ ଫାଇନାଲ ମ୍ୟାଚ୍ ଖେଳିଥିଲେ।

ଝୁଲନ ଗୋସ୍ୱାମୀଙ୍କ ଅବସର

ଆଜି ଭାରତୀୟ ମହିଳା କ୍ରିକେଟ ଦଳ ଇଂଲଣ୍ଡ ବିପକ୍ଷ ଶେଷ ଦିନିକିଆ ମ୍ୟାଚ ଖେଳିବାକୁ ମୈଦାନକୁ ଓହ୍ଲାଇଛି । ଏହି ମ୍ୟାଚ ଭାରତୀୟ ମହିଳା ବୋଲର ଝୁଲନ ଗୋସ୍ୱାମୀଙ୍କ ପାଇଁ ଖାସ ରହିଛି । କାରଣ ସେ ନିଜ ଶେଷ ଅନ୍ତର୍ଜାତୀୟ ମ୍ୟାଚ ଖେଳୁଛନ୍ତି । ଆଜି ଟିମ ଇଣ୍ଡିଆ ଚାହିଁବ ବିଜୟୀ ହୋଇ ଝୁଲନଙ୍କୁ ତାଙ୍କ ଶେଷ ମ୍ୟାଚରେ ଉପହାର ଦେବାକୁ । ଏହି ସିରିଜରେ ଭାରତ ୨-ରେ ଆଗୁଆ ରହିଛି ।

Smiles, tears & hugs! 😊 🥹 🤗

An emotional huddle talk as @JhulanG10 set to play her final international game!

Go well, legend! 👏 👏

Follow the match ▶️ https://t.co/RwUqefET7e #TeamIndia | #ENGvIND pic.twitter.com/DzDdYzseh4

— BCCI Women (@BCCIWomen) September 24, 2022

ମ୍ୟାଚ ଆରମ୍ଭ ହେବା ପୂର୍ବ ଟିମ ତରଫରୁ ଝୁଲଙ୍କୁ ସ୍ମୃତି ଚିହ୍ମ ଉପହାର ଦିଆଯାଇଥିଲା । ଏହି ସମୟ ଝୁଲନ ଆଉ ପୂରା ଟିମ ପାଇଁ ଖାସ ଥିଲା । କ୍ୟାପଟେନ ହରମନପ୍ରିତ ସିଂ ଝୁଲନଙ୍କୁ ଧରି ଭାବୁକ ହୋଇଯାଇଥିଲେ । ଆଉ କାନ୍ଦି ପକାଇଥିଲେ ମଧ୍ୟ, ଯାହାର ଭିଡିଓ ସୋସିଆଲମିଡିଆରେ ଖୁବ ଭାଇରାଲ ହେଉଛି ।

For over 20 years Jhulan Goswami has run in, hit a length and blazed a trail.

She has bowled nearly 10,000 balls in ODI cricket, and she may just have inspired as many young girls to try cricket.

Thanks @JhulanG10, you’re an inspiration. pic.twitter.com/EMeCtAA5Wa

— England Cricket (@englandcricket) September 24, 2022

ଅନ୍ୟପଟେ ଇଂଲଣ୍ଡ ଦଳ ମଧ୍ୟ ଝୁଲନଙ୍କୁ ସମ୍ମାନ ଜଣାଇବା ସହ ଆଜି ସେ ବ୍ୟାଟିଂ କରିବାକୁ ଆସିବା ସମୟରେ ସମସ୍ତ ଖେଳାଳି ତାଙ୍କୁ କରତାଳି ମାରି ସ୍ବାଗତ କରିବା ସହ ଅଭିବାଦନ ଜଣାଇଥିଲେ। ୧୯ ବର୍ଷ ବୟସରେ ୨୦୦୨ରେ ଟିମ ଇଣ୍ଡିଆରେ ଡେବ୍ୟୁ କରିଥିଲେ ଝୁଲନ । ସେ ଭାରତ ପାଇଁ ୧୨ ଟେଷ୍ଟ, ୨୦୪ ଦିନିକିଆ, ୬୮ଟି ଟି-୨୦ ମ୍ୟାଚ ଖେଳିଛନ୍ତି । ଏହାସହ ସେ ଟେଷ୍ଟରେ ୪୪, ଦିନିକିଆରେ ୨୫୪ ଓ ଟି-୨୦ରେ ୫୬ଟି ୱିକେଟ ନେଇଛନ୍ତି । ଦିନିକିଆରେ ୨୦୦ରୁ ଅଧିକ ୱିକେଟ ନେଇଥିବା ସେ ପ୍ରଥମ ମହିଳା ଖେଳାଳି ।