ରାୟଗଡା: ସିନେମା ହଲ୍‌ରେ ଲାଗିଲା ନିଆଁ । ରାୟଗଡ଼ା ଅଶୋକ ଟକିଜ୍‌ ହଲ୍‌ରେ ଅଗ୍ନିକାଣ୍ଡ । ରାୟଗଡା ସହରର ଅଶୋକା ସିନେମା ହଲରେ ତେଲୁଗୁ ସିନେ ତାରକା ପ୍ରଭାସଙ୍କ ବହୁ ପ୍ରତିକ୍ଷୀତ ସିନେମା 'ରାଜା ସାହେବ୍' ଚାଲିଥିଲା ବେଳେ ଅଘଟଣ । ସିନେମାରେ ପ୍ରଭାସଙ୍କ ଏଣ୍ଟ୍ରି ବେଳେ ସମର୍ଥକମାନେ ସିନେମା ହଲ ପରିସରରେ ନିଆଁ ଲଗାଇ ଆଳତୀ କରୁଥିଲେ । ଏହି ସମୟରେ ହଲରେ ଝୁଲୁଥିବା ପରଦାରେ ନିଆଁ ଲାଗିଯାଇଥିଲା । ଯାହାପରେ ହଠାତ୍ ନିଆଁର ପ୍ରକୋପ ବଢିବାରେ ଲାଗିଥିଲା । ହଲ୍ କର୍ତ୍ତୃପକ୍ଷ ସଙ୍ଗେ ସଙ୍ଗେ ନିଆଁ ଲିଭା ଯନ୍ତ୍ରରେ ନିଆଁକୁ ଆୟତ୍ତ କରିଥିଲେ। ଯାହାଦ୍ବାରା ଏକ ବଡ ଦୁର୍ଘଟଣାକୁ ଏଡେଇ ଦିଆଯାଇ ପାରିଥିଲା। ତେବେ ଏହି ଅଗ୍ନିକାଣ୍ଡରେ କାହାର କୌଣସି କ୍ଷତି ହୋଇନଥିବା ଜଣାପଡିଛି ।

ଶ୍ରୀନଗର: କାଶ୍ମୀରବାସୀଙ୍କ ପାଇଁ ଖୁସି ଖବର | ପ୍ରାୟ ଦୀର୍ଘ ୩୨ ବର୍ଷ ପରେ କାଶ୍ମୀରବାସୀ ବଡ଼ ପରଦାରେ ଦେଖିବେ ସିନେମା । ୧୮୮୯-୯୦ ମସିହାରେ ଆତଙ୍କବାଦୀଙ୍କ ଧମକ ଯୋଗୁଁ କାଶ୍ମୀରର ସମସ୍ତ ଫିଲ୍ମ ହଲକୁ ବନ୍ଦ କରିଦିଆଯାଇଥିଲା ।ଲେଫ୍ଟନାଣ୍ଟ ଜେନେରାଲ ମନୋଜ ସିହ୍ନା ମଙ୍ଗଳବାର ଉପତ୍ୟକାର ପ୍ରଥମ ମଲ୍ଟିପ୍ଲେକ୍ସର ଉଦଘାଟନ କରିଛନ୍ତି। ଏହା ପୂର୍ବରୁ ସିହ୍ନା ରବିବାର ଦକ୍ଷିଣ କାଶ୍ମୀରର ଶୋପିଆନ୍ ଓ ପୁଲୱାମା ଜିଲ୍ଲାରେ ସିନେମା ହଲ୍ ଉଦଘାଟନ କରିଥିଲେ। ସୂଚନାଯୋଗ୍ୟ, ଆଇନକ୍ସ ଚେନର ଏହି ମଲ୍ଟିପ୍ଲେକ୍ସରେ ଆମିର ଖାନଙ୍କ ଅଭିନୀତ ‘ଲାଲ ସିଂ ଚଢା’ର ପ୍ରିମିୟର ହେବ |

ଏହି ମଲ୍ଟିପ୍ଲେକ୍ସରେ ତିନୋଟି ସ୍କ୍ରିନ ରହିବ ଏବଂ ୫୨୨ ଦର୍ଶକ ଏକା ସଙ୍ଗେ ଫିଲ୍ମ ଦେଖିପାରିବେ | ପ୍ରଥମେ କାଶ୍ମୀରରେ ହିଁ ଆଂଶିକ ସୁଟିଂ ହୋଇଥିବା ଆମୀର ଖାନଙ୍କ ଫିଲ୍ମ ‘ଲାଲ ସିଂ ଚଢା’ ଏଠାରେ ପ୍ରଦର୍ଶିତ ହେବ। ଏହା ପରେ ସୈଫ ଅଲି ଖାନ ଏବଂ ହ୍ରିତିକ ରୋଶନଙ୍କ ‘ବିକ୍ରମ ବେଧା’ ୩୦ ସେପ୍ଟେମ୍ବରରେ ମୁକ୍ତିଲାଭ କରିବ। ବର୍ତ୍ତମାନ ଦିନକୁ ସକାଳ ୯ ଟାରୁ ୬ଟା ମଧ୍ୟରେ ତିନିଟି ଶୋ ଚାଲିବ | ପରବର୍ତ୍ତୀ ସମୟରେ ଦର୍ଶକଙ୍କ ସଂଖ୍ୟା ଦେଖି ଶୋ’ ଞବଢ଼ାଯିବ|

କାଶ୍ମୀରରେ ୧୯୯୦ ମସିହାରେ ମଧ୍ୟ କିଛି ସିନେମା ହଲ୍ ଖୋଲିବା ପାଇଁ ପଦକ୍ଷେପ ନିଆଯାଇଥିଲା | ତେବେ ଆତଙ୍କବାଦ ଯୋଗୁଁ ଏହି ପ୍ରୟାସ ସମ୍ପୂର୍ଣ୍ଣ ସଫଳ ହୋଇପାରିନଥିଲା। ସେପ୍ଟେମ୍ବର ୧୯୯୯ରେ ଆତଙ୍କବାଦୀମାନେ ଲାଲ ଚୌକରେ ରିଗାଲ ସିନେମା ଉପରେ ଗ୍ରେନେଡ୍ ଆକ୍ରମଣ କରିଥିଲେ। ୮୦ ଦଶକ ପର୍ଯ୍ୟନ୍ତ ଉପତ୍ୟକାରେ ପ୍ରାୟ ଏକ ଡଜନ ସିନେମା ହଲ୍ ଥିଲା । କିନ୍ତୁ ଆତଙ୍କବାଦ ଯୋଗୁଁ ସିନେମା ହଲ୍ ଗୁଡ଼ିକ ବନ୍ଦ ହୋଇଯାଇଥିଲା ।