ସିଡନୀ: ବର୍ଡର-ଗାଭାସ୍କର ଟ୍ରଫି ଜିତିଲା ଅଷ୍ଟ୍ରେଲିଆ । ଭାରତ ବିପକ୍ଷରେ ୩-୧ରେ ଟେଷ୍ଟ ସିରିଜ ଜିତିଲା କଙ୍ଗାରୁ ଦଳ । ଏହାସହିତ ଧୂଳିସାତ୍‌ ହୋଇଯାଇଛି ଭାରତର WTC ଫାଇନାଲ ସ୍ୱପ୍ନ। ସିଡନୀ ଟେଷ୍ଟ ଜିତିବା ସହ WTC ଫାଇନାଲରେ ସ୍ଥାନ ପାଇଛି ଅଷ୍ଟ୍ରେଲିଆ। ୧୦ବର୍ଷ ପରେ ଭାରତ ବିପକ୍ଷରେ ଟେଷ୍ଟ ସିରିଜ ଜିତିଛି ଅଷ୍ଟ୍ରେଲିଆ। ସିଡନୀରେ ଖେଳାଯାଉଥିବା ପଞ୍ଚମ ଟେଷ୍ଟରେ ୬ ୱିକେଟରେ ଭାରତକୁ ଧୂଳି ଚଟାଇଛି କଙ୍ଗାରୁ ଦଳ। ସିଡନୀ ଟେଷ୍ଟରେ ହାରିବା ପରେ କ୍ରମାଗତ ତୃତୀୟ ଥର ପାଇଁ ୱାର୍ଲ୍ଡ ଟେଷ୍ଟ ଚାମ୍ପିଅନସିପ୍‌ ବା(ଡବ୍ଲୁଟିସି) ଫାଇନାଲରେ ପ୍ରବେଶ କରିବାର ସ୍ୱପ୍ନ ଭାରତର ଧୂଳିସାତ୍‌ ହୋଇଯାଇଛି। ଶେଷ ମ୍ୟାଚ୍‌ରେ ଭାରତ କଙ୍ଗାରୁ ଦଳକୁ ୧୬୨ ରନ ଟାର୍ଗେଟ ଦେଇଥିଲା। ଆୟୋଜକ ଦଳ ୪ ୱିକେଟ ହରାଇ ସହଜରେ ସିରିଜ ହାତେଇ ନେଇଛି। ଅଷ୍ଟ୍ରେଲିଆ ପାଂଚ ମ୍ୟାଚ୍‌ ବିଶିଷ୍ଟ ଟେଷ୍ଟ ସିରିଜକୁ ୩-୧ରେ ଜିତିଛି। ଏହା ସହିତ ୧୦ବର୍ଷ ପରେ ବର୍ଡର-ଗାଭାସ୍କର ଟ୍ରଫି ଜିତିବାରେ କଙ୍ଗାରୁ ଦଳ ସଫଳ ହୋଇଛନ୍ତି। ଡଞଉ ଫାଇନାଲରେ କଙ୍ଗାରୁ ଦଳ ଦକ୍ଷିଣ ଆଫ୍ରିକା ସହିତ ମୁହାଁମୁହିଁ ହେବ।

ସିଡନୀରେ ଖେଳାଯାଉଥିବା ବର୍ଡର-ଗାଭାସ୍କର ଟ୍ରଫିର ପଞ୍ଚମ ଟେଷ୍ଟରେ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ଭାରତ । ପ୍ରଥମ ଇନିଂସରେ ଭାରତ ୧୮୫ ରନ କରିଥିବାବେଳେ ଦ୍ବିତୀୟ ଇନିଂସରେ ୧୫୭ ରନ କରି ଅଷ୍ଟ୍ରେଲିଆକୁ ୧୬୨ରନର ଟାର୍ଗେଟ ଦେଇଥିଲା । ସେହିପରି ଅଷ୍ଟ୍ରେଲିଆ ପ୍ରଥମ ଇନିଂସରେ ୧୮୧ ରନ କରିଥିଲା । ଦ୍ବିତୀୟ ଇନିଂସରେ ଭାରତ ଦେଇଥିବା ୧୬୨ରନର ଟାର୍ଗେଟକୁ ୪ ୱିକେଟ ହରାଇ ହାସଲ କରି ନେଇଛି । ସିଡନୀ ଟେଷ୍ଟ ଜିତିବା ସହିତ ୧୦ ବର୍ଷ ପରେ ବର୍ଡର-ଗାଭାସ୍କର ଟ୍ରଫି ସିରିଜକୁ ୩-୧ରେ କବଜା କରି ନେଇଛି । ଏହା ସହିତ ବିଶ୍ବ ଚମ୍ପିଆନ୍ସ ଟ୍ରଫି ଫାଇନାଲରେ ପ୍ରବେଶ କରଛି ଅଷ୍ଟ୍ରେଲିଆ । ସିଡନୀ ଟେଷ୍ଟରେ ୧୦ୱିକେଟ ନେଇଥିବା ବୋଲାଣ୍ଡ ପ୍ଲେୟାର ଅଫ ଦି ମ୍ୟାଚ ବିବେଚିତ ହୋଇଛନ୍ତି । ସିଡନୀ ଟେଷ୍ଟର ଦୁଇଟି ପାଳିଲେ ସେ ଯଥାକ୍ରମେ ୬ ଓ ୪ଟି ଲେଖାଏଁ ୱିକେଟ ନେଇଥିଲେ । ଭାରତ ପକ୍ଷରୁ ସିଡନୀ ଟେଷ୍ଟରେ କେବଳ ଋଷବ ପନ୍ତ ୬୧ରନ ପାଳି ଖେଳି ଥିଲେ । ବାକି ସମସ୍ତ ବ୍ୟାଟ୍ସମ୍ୟାନ ବିଫଳ ହୋଇଥିଲେ ।

ସିଡନୀରେ ଖେଳାଯାଇଥିବା ବର୍ଡର ଗାଭାସ୍କର ଟ୍ରଫିରେ ଭାରତ ଖେଳାଳିମାନେ ପ୍ରଥମରୁ ହିଁ ନୈରାଶ୍ୟଜନକ ପ୍ରଦର୍ଶନ କରିଥିଲେ। ଚଳିତ ସିରିଜରେ ଟିମ ଇଣ୍ଡିଆର ୫ଜଣ ଖେଳାଳି, ବିରାଟ କୋହଲି, ରୋହିତ ଶର୍ମା, ଶୁଭମନଗିଲ, କେ ଏଲ ରାହୁଲ. ମହମ୍ମଦ ସିରାଜଙ୍କ ପ୍ରଦର୍ଶନକୁ ନେଇ ପ୍ରତ୍ୟେକ ଭାରତୀୟ ଆଶା ବାନ୍ଧି ବସିଥିବାବବେଳେ ସେମାନଙ୍କ ପ୍ରଦର୍ଶନ ଅତ୍ୟନ୍ତ ଲଜ୍ଜ୍ୟାଜନକ ସାବ୍ୟସ୍ତ ହୋଇଥିଲା। ପ୍ରତ୍ୟେକ ଥର ଦଳକୁ ଖେଳାଳିମାନେ ନିରାଶ କରିଥିଲେ।

ନୂଆଦିଲ୍ଲୀ: ଦିଲ୍ଲୀରେ ଚାଲିଥିବା ଦ୍ଵିତୀୟ ଟେଷ୍ଟରେ ଭାରତ ଦମଦାର୍ ବିଜୟଲାଭ କରିଛି । ଅଷ୍ଟ୍ରେଲିଆକୁ ୬ ୱିକେଟ୍‌ରେ ହରାଇଛି ଟିମ୍‌ ଇଣ୍ଡିଆ । ବର୍ଡର-ଗାଭାସ୍କର ଟ୍ରଫିର ୨ୟ ଟେଷ୍ଟକୁ ନିଜ ନାମରେ କରିଛି ରୋହିତ ବାହିନୀ । ଦ୍ଵିତୀୟ ଟେଷ୍ଟ ଜିତି ୪ ମ୍ୟାଚ ବିଶିଷ୍ଟ ସିରିଜରେ ଭାରତ ୨-୦ରେ ଆଗୁଆ ରହିଛି ।

ଦ୍ୱିତୀୟ ଟେଷ୍ଟ ମ୍ୟାଚ୍‌ରେ ପ୍ରଥମେ ଟସ୍‌ ଜିତି ବ୍ୟାଟିଂ କରିଥିଲା ଅଷ୍ଟ୍ରେଲିଆ । ଅଷ୍ଟ୍ରେଲିଆ ପ୍ରଥମ ଇନିଂସରେ ୨୬୩ ରନ୍‌ କରି ଅଲଆଉଟ୍‌ ହୋଇଥିଲା। ଆଉ ଭାରତ ପ୍ରଥମ ଇନିଂସରେ ୧ ରନରେ ପଛୁଆ ରହି ୨୬୨ ରନ୍‌ କରି ଅଲଆଉଟ ହୋଇଥିଲା। ପ୍ରଥମ ଇନିଂସରେ ନାଥନ ଲିଏନ ୫ଟି ଓ୍ଵିକେଟ ନେଇଥିଲେ ।

ମାତ୍ର ଦ୍ଵିତୀୟ ଇନିଂସରେ ଭାରତୀୟ ବୋଲରଙ୍କ ଆଗରେ ଅଧିକ ସମୟ ତିଷ୍ଠି ପାରିନଥିଲେ ଭ୍ରମଣକାରୀ ଦଳ । ଜାଡେଜାଙ୍କ କମାଲ ବୋଲିଂରେ ଧରାଶାୟୀ ହୋଇ ପରାଜୟ ସ୍ୱୀକାର କରିଥିଲା ଅଷ୍ଟ୍ରେଲିଆ ଟିମ୍ । ଦ୍ଵିତୀୟ ଇନିଂସରେ ଅଷ୍ଟ୍ରେଲିଆ ଦଳ ଭାରତ ଆଗରେ ମାତ୍ର ୧୧୫ ରନର ଟାର୍ଗେଟ ଦେଇ ଅଲଆଉଟ ହୋଇଯାଇଥିଲା । ଆଉ ଭାରତ ମାତ୍ର ୪ ଓ୍ଵିକେଟ ହରାଇ ତୃତୀୟ ଦିନର ଲଞ୍ଚ ବ୍ରେକ ସୁଦ୍ଧା ଦ୍ୱିତୀୟ ଟେଷ୍ଟକୁ ଜିତିନେଇଛି । ଅଧିନାୟକ ରୋହିତ ଶର୍ମା ୩୧ ରନ୍‌ କରି ଆଉଟ୍‌ ହୋଇଥିବାବେଳେ କେ ଏଲ ରାହୁଲ ୧ ରନ୍‌, ବିରାଟ କୋହଲି ୨୦ ରନ୍‌, ଶ୍ରେୟସ ଆୟର ୧୨ ରନ୍‌ କରି ଆଉଟ୍‌ ହୋଇଥିଲେ । ଚେତେଶ୍ୱର ପୂଜାରା ୨୭ ରନ କରି ଅପରାଜିତ ରହିଥିଲେ। ସେହିପରି ଶିଖର ଭରତ ମଧ୍ୟ ୨୩ ରନ୍‌ କରି ଅପରାଜିତ ରହିଥିଲେ ।

ନାଗପୁର: ପ୍ରଥମ ଟେଷ୍ଟ ଜିତିଲା ଭାରତ । ନାଗପୁର ଗ୍ରାଉଣ୍ଡରେ ଖେଳାଯାଇଥିବା ବର୍ଡର ଗାଭାସ୍କର ଟ୍ରଫିର ପ୍ରଥମ ଟେଷ୍ଟ ମ୍ୟାଚରେ ଅଷ୍ଟ୍ରେଲିଆକୁ ହରାଇ ଭାରତ ଦମଦାର ବିଜୟ ହାସଲ କରିଛି । ପ୍ରଥମ ଟେଷ୍ଟରେ ଅଷ୍ଟ୍ରେଲିଆକୁ ଗୋଟିଏ ଇନିଂସ ଓ ୧୩୨ ରନରେ ହରାଇଛି ଭାରତ । ଭାରତ ପକ୍ଷରୁ ଅଶ୍ୱିନୀ ୫ଟି ଓ୍ୱିକେଟ ନେଇଥିବାବେଳେ ଜାଡେଜା ଓ ସାମିଙ୍କୁ ମିଳିଛି ୨ଟି ଲେଖାଏଁ ଓ୍ୱିକେଟ । ଏହି ବିଜୟ ସହ ୪ ଟିକିଆ ସିରିଜରେ ୧-୦ ଆଗରେ ରହିଛି ଭାରତ ।

ନାଗପୁରରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚରେ ଟସ୍‌ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଅଷ୍ଟ୍ରେଲିଆ । ମାତ୍ର ମ୍ୟାଚ ଆରମ୍ଭରୁ କଙ୍ଗାରୁ ଦଳ ବିପର୍ଯୟର ଶିକାର ହୋଇ ପ୍ରଥମ ଇନିଂସରେ ମାତ୍ର ୧୭୭ରନ୍‌ କରି ଅଲ୍‌ଆଉଟ୍‌ ହୋଇଥିଲା । ଭାରତ ପକ୍ଷରୁ ପ୍ରଥମ ଇନିଂସରେ ଜାଡେଜା ୫ ଓ୍ୱିକେଟ ନେଇଥିବାବେଳେ ଅଶ୍ୱିନୀ ୩ଟି ଓ୍ୱିକେଟ ଅକ୍ତିଆର କରିଥିଲେ । ଜବାବରେ ପ୍ରଥମ ଇନିଂସରେ ଭାରତ ଜବରଦସ୍ତ ବ୍ୟାଟିଂ କରିଥିଲା । ଅଷ୍ଟ୍ରେଲିଆକୁ ୧୭୭ ରନରେ ଅଲଆଉଟ କରିବା ପରେ ଭାରତ ରୋହିତ ଶର୍ମାଙ୍କ ଦମଦାର ଶତକ, ଜାଡେଜା ଓ ଅକ୍ଷର ପଟେଲଙ୍କ ଅଲରାଉଣ୍ଡ ପ୍ରଦର୍ଶନ ଫଳରେ ୪୦୦ ରନ କରିବାରେ ସଫଳ ହୋଇଥିଲା । ଯାହା ଫଳରେ ଭାରତ ଅଷ୍ଟ୍ରେଲିଆଠାରୁ ୨୨୩ ରନରେ ଆଗୁଆ ରହିଥିଲା ।

ପ୍ରଥମ ଇନିଂସରେ ରବିନ୍ଦ୍ର ଜାଡେଜା ଅଷ୍ଟ୍ରେଲିଆ ବ୍ୟାଟରଙ୍କ ପାଇଁ କାଳ ସାଜିଥିବା ବେଳେ ୨ୟ ଇନିଂସରେ ଅଶ୍ୱିନୀ ସାଜିଥିଲେ ଘାତକ । ଗୋଟିଏ ପରେ ଗୋଟିଏ ବ୍ୟାଟରଙ୍କୁ ଦେଖାଇଥିଲେ ପ୍ୟାଭିଲିୟନ୍‌ର ରାସ୍ତା । ଅଷ୍ଟ୍ରେଲିଆର କୌଣସି ବ୍ୟାଟର ଆଖିଦୃଶିଆ ସ୍କୋର କରିପାରିନଥିଲେ । ଚାରିଜଣ ବ୍ୟାଟସମ୍ୟାନ୍‌ ଦୁଇ ଅଙ୍କ ସ୍କୋର କରିଥିବା ବେଳେ ଆଉ କୌଣସି ବ୍ୟାଟର ବ୍ୟକ୍ତିଗତ ଭାବେ ଦୁଇ ଅଙ୍କ ସ୍କୋର କରିପାରିନଥିଲେ । ଯାହାଫଳରେ ପୁରା ୯୧ ରନ୍‌ରେ ଅଲ୍‌ଆଉଟ୍‌ ହୋଇଯାଥିଲା ।

ସେପଟେ ବୋଲିଂ ବିଭାଗରେ ଭାରତୀୟ ସ୍ପିନର ନିଜର ଜଲଓ୍ୱା ଦେଖାଇଛନ୍ତି । ବେଶୀ ଘାତକ ସାଜିଛନ୍ତି ଅଶ୍ୱିନୀ-ଜାଡେଜା ଯୋଡି । ୨ୟ ଇନିଂସରେ ଅଶ୍ୱିନୀ ୧୨ ଓଭର ବୋଲିଂ କରି ୫ଟି ଓ୍ୱିକେଟ୍‌ ନେଇଥିବା ବେଳେ ରବିନ୍ଦ୍ର ଜାଡେଜା ଏବଂ ମହମ୍ମଦ ସାମି ୨ଟି ଲେଖାଏଁ ଓ୍ୱିକେଟ୍‌ ନେଇଛନ୍ତି । ବାକି ଅକ୍ଷର ପଟେଲ୍‌ଙ୍କ ଖାତାରେ ଗୋଟିଏ ଓ୍ୱିକେଟ୍‌ ରହିଛି । ମାତ୍ର ୩ ଦିନରେ ହିଁ ସରିଯାଇଛି ପ୍ରଥମ ମ୍ୟାଚ୍‌ ।

ହାଇଦ୍ରାବାଦ୍‍ : ଆଜି ହାଇଦ୍ରାବାଦ୍‌ ରାଜୀବ ଗାନ୍ଧି ଅନ୍ତର୍ଜାତୀୟୀୟ ଷ୍ଟାଡିୟମରେ ଖେଳାଯାଉଥିବା ଭାରତ ଓ ଅଷ୍ଟ୍ରେଲିଆ ମଧ୍ୟରେ ତୃତୀୟ ତଥା ଅନ୍ତିମ ମ୍ୟାଚ ଭାରତ ୬ ୱିକେଟର ଅଷ୍ଟ୍ରେଲିଆକୁ ହରାଇ ସିରିଜ୍ ବିଜୟୀ ହୋଇଛି। ବୋଲରଙ୍କ ପରେ ଭାରତୀୟ ବ୍ୟାଟରଙ୍କ ଦମାଦାର ପଦର୍ଶନ ବଳରେ ଭାରତ ଅଷ୍ଟ୍ରେଲିଆକୁ ୬ୱିକେଟରେ ପରାସ୍ତ କରିଛି। ପ୍ରଥମେ ବ୍ୟାଟିଂ କରି ଭାରତକୁ ମ୍ୟାଚ ବିଜୟ ପାଇଁ ୧୮୭ ରନ୍‌ର ଲକ୍ଷ୍ୟ  ଦେଇଥିଲା କଙ୍ଗାରୁ ବାହୀନି। ତେବେ ଭାରତ ସୂର୍ଯ୍ୟକୁମାର ଯାଦବ ଏବଂ ବିରାଟ କୋହଲିଙ୍କ ଦମଦାର ଅର୍ଦ୍ଧଶତକ ବଳରେ ରୋମାଞ୍ଚକର ନିର୍ଣ୍ଣାୟକ ଟି-୨୦ ମୁକାବିଲାକୁ ଜିତି ନେଇଛି।

ରାଜୀବ ଗାନ୍ଧି ଅନ୍ତର୍ଜାତୀୟୀୟ ଷ୍ଟାଡିୟମରେ ଭାରତ ଟସ୍‌ ଜିଣି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରୁଥିବା ଅଷ୍ଟ୍ରେଲିଆ କାମେରନ୍‌ ଗ୍ରିନ୍‌ (୫୨) ଓ ଟିମ୍‌ ଡେଭିଡ୍‌(୫୪)ଙ୍କ ଅର୍ଦ୍ଧଶତକ ବଳରେ ନିର୍ଦ୍ଧାରିତ ୨୦ ଓଭରରେ ୭ଟି ୱିକେଟ୍‌ ହରାଇ ୧୮୬ ରନ୍‌ ସଂଗ୍ରହ କରିଥିଲା। ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଅଷ୍ଟ୍ରେଲିଆ ଆରମ୍ଭରୁ ବିସ୍ଫୋରକ ଢଙ୍ଗରେ ବ୍ୟାଟିଂ ଆରମ୍ଭ କରିଥିଲା। ବିଶେଷ କରି କ୍ୟାମେରୁନ ଗ୍ରୀନ ଧୂଆଁଧାର ବ୍ୟାଟିଂ କରି ଭାରତର ଚିନ୍ତା ବଢାଇଥିଲେ। ୩.୩ ଓଭରରେ ୪୪ ରନର ଦଳୀୟ ସ୍କୋରରେ ଅଧିନାୟକ ଆରୋନ ଫିଞ୍ଚ(୭)ଙ୍କୁ ଆଉଟ୍ କରି ଅକ୍ଷର ପଟେଲ୍ ଭାରତକୁ ପ୍ରଥମ ସଫଳତା ଦେଇଥିଲେ। ଅନ୍ୟପଟେ ଗ୍ରୀନ ଧୂଆଁଧାର ବ୍ୟାଟିଂ କରି ମାତର୍ ୧୯ ବଲ୍‌ରୁ ଅର୍ଦ୍ଧଶତକ ହାସଲ କରିଥିଲେ। ଗ୍ରୀନଙ୍କୁ ଆଉଟ୍ କରି ଭୁବନେଶ୍ଵର କୁମାର ଦଳକୁ ବହୁତ ବଡ ସଫଳତା ଦେଇଥିଲେ। ଗ୍ରୀନ ମାତ୍ର ୨୧ ବଲ୍‌ରୁ ୭ ଚୌକା ଏବଂ ୩ ଛକା ସହ ୫୨ ରନ କରିଥିଲେ। ଏହା ପରେ କଙ୍ଗାରୁ ଦଳ ସଅଳ ଓ୍ଵିକେଟ୍ ହରାଇ ଚାପର ବଶବର୍ତ୍ତୀ ହୋଇଥିଲା ଏବଂ ଭାରତୀୟ ବୋଲର ଅଷ୍ଟ୍ରେଲିଆର ରନ ଗତି ଉପରେ ଅଙ୍କୁଶ ଲଗାଇବାରେ ସଫଳ ହୋଇଥିଲେ।

ଏହାପରେ ମ୍ୟାକ୍ସଓ୍ଵେଲ(୬) ରନ ଆଉଟ୍ ହୋଇଥିବା ବେଳେ ଷ୍ଟିଭ୍ ସ୍ମିଥ(୯) ଚହଲଙ୍କ ବଲ୍‌ରେ ଆଉଟ୍ ହୋଇ ପାଭିଲିୟନ ଫେରିଥିଲେ। ମାଥ୍ୟୁ ଓ୍ଵେଦ(୧)ଙ୍କୁ ଆଉଟ୍ କରି ଅକ୍ଷର ପଟେଲ୍ ଦଳକୁ ବଡ ସଫଳତା ଦେଇଥିଲେ।ଏହା ପରେ ଟିମ୍ ଡେଭିଡ୍ ଏବଂ ଡାନିଏଲ ସାମ୍ସ ଦଳର ସ୍କୋରକୁ ଆଗକୁ ବଢାଇଥିଲେ। ଟିମ୍ ଡେଭିଡ୍ ବିସ୍ଫୋରକ ବ୍ୟାଟିଂ କରି ଅଷ୍ଟ୍ରେଲିଆର ସ୍ଥିତି ମଜବୁତ କରିଥିଲେ। ଡେଭିଡ୍ ୨୫ ବଲ୍‌ରୁ ଅର୍ଦ୍ଧଶତକ ହାସଲ କରିଥିଲେ। ସେ ୨୭ ବଲ୍‌ରୁ ୨ ଚୌକା ଏବଂ ୪ ଛକା ସହ ୫୪ ରନର ଗୁରୁତ୍ଵପୂର୍ଣ୍ଣ ଇନିଂସ ଖେଳିଥିଲେ। ସାମ୍ସ ୨୮ ରନରେ ଅପରାଜିତ ଥିଲେ। ଅଷ୍ଟ୍ରେଲିଆ ନିର୍ଦ୍ଧାରିତ ଓଭରରେ ୭ ଓ୍ଵିକେଟ୍ ହରାଇ ୧୮୬ ରନ କରିବା ସହ ଭାରତକୁ ସିରିଜ ବିଜୟ ପାଇଁ ୧୮୭ ରନ୍‌ର ଲକ୍ଷ୍ୟ ଦେଇଥିଲା।

ଦ୍ବିତୀୟ ପାଳିରେ ଭାରତ ୧୮୭ ରନ୍‌ର ଲକ୍ଷ୍ୟକୁ ପିଛାକରି ୧୯.୫ ଓଭରରେ ୪ ୱିକେଟ ହରାଇ ନିର୍ଦ୍ଧାରିତ ରନ୍‌ କରି ବିଜୟ ହୋଇଛି । ଭାରତ ପକ୍ଷରୁ ସୂର୍ଯ୍ୟକୁମାର ଯାଦବ ସର୍ବାଧିକ ୬୯ ରନ୍‌ କରିଥିବା ବେଳେ ବିରାଟ କୋହଲି ୪୮ ବଲରେ ୬୩ ରନ୍‌ କରି ଭାରତକୁ ବିଜୟ ଦେଇଥିଲେ । ତେବେ ୧୮୭ ରନର ବିଜୟ ଲକ୍ଷ୍ୟ ପିଛା କରିଥିବା ଭାରତର ଆରମ୍ଭ ନୈରାଶ୍ୟଜନକ ଥିଲା। କେଏଲ ରାହୁଲ(୧) ପ୍ରଥମ ଓଭରରେ ଆଉଟ୍ ହୋଇଥିଲେ। ପୁଣି ଦଳୀୟ ସ୍କୋର ୩୦ରେ ଅଧିନାୟକ ରୋହିତ ଶର୍ମା(୧୭) ବିଦାୟ ନେଇଥିଲେ। ଏହା ପରେ ବିରାଟ କୋହଲି ଏବଂ ସୂର୍ଯ୍ୟକୁମାର ଯାଦବ ଦମଦାର ବ୍ୟାଟିଂ କରି ତୃତୀୟ ଓ୍ଵିକେଟ୍‌ରେ ୧୦୪ ରନ ଯୋଡି ଦଳ ବିଜୟର ପଥ ପରିଷ୍କାର କରିଥିଲେ। ଏହି କ୍ରମରେ ଦୁଇ ବ୍ୟାଟସମ୍ୟାନ ନିଜ ନିଜର ଅର୍ଦ୍ଧଶତକ ହାସଲ କରିଥିଲେ। ୧୩୪ ରନ ସ୍କୋରରେ ସୂର୍ଯ୍ୟକୁମାର ଯାଦବ ପାଭିଲିୟନ ଫେରିଥିଲେ। ୩୬ ବଲ୍‌ରେ ବିସ୍ଫୋରକ ବ୍ୟାଟିଂ କରି ୫ ଚୌକା ଏବଂ ୫ ଛକା ବଳରେ ୬୯ ରନର ମ୍ୟାଚ୍ ବିଜୟୀ ଇନିଂସ ଖେଳିଥିଲେ।

ପୁଣି କୋହଲି ଏବଂ ହାର୍ଦ୍ଦିକ ପାଣ୍ଡ୍ୟା ଚତୁର୍ଥ ଓ୍ଵିକେଟ୍‌ରେ ୪୮ ରନ ଯୋଡିଥିଲେ। କୋହଲି ୪୮ ବଲ୍‌ରୁ ୩ ଚୌକା ଏବଂ ୪ ଛକା ସହ ୬୩ ରନର ଗୁରୁତ୍ଵପୂର୍ଣ୍ଣ ଇନିଂସ ଖେଳିଥିଲେ। ଶେଷ ଆଡକୁ ମ୍ୟାଚ୍ ରୋମାଞ୍ଚକର ହୋଇଥିଲା। ୨୦ ତମ ଓଭରର ପଞ୍ଚମ ବଲ୍‌ରେ ବିଜୟ ସୂଚକ ଚୌକା ମାରି ହାର୍ଦ୍ଦିକ ପାଣ୍ଡ୍ୟା ଭାରତକୁ ବିଜୟୀ କରାଇଛନ୍ତି। ପାଣ୍ଡ୍ୟା ୧୬ ବଲ୍‌ରୁ ୨ ଚୌକା ଏବଂ ୧ ଛକା ସହାୟତାରେ ୨୫ ରନରେ ଅପରାଜିତ ଥିଲେ। ଭାରତ ୧୯.୫ ଓଭରରେ ୪ ଓ୍ଵିକେଟ୍ ହରାଇ ୧୮୭ ରନର ବିଜୟ ଲକ୍ଷ୍ୟ ହାସଲ କରି ନେଇଥିଲା

ଅନ୍ୟପଟେ ଅଷ୍ଟ୍ରେଲିଆ ପକ୍ଷରୁ ଡାନିଏଲ୍ ସାମସ୍ ୨ଟି ୱିକେଟ ନେଇଥିବା ବେଳେ ଜୋସ୍ ହାଜଲେଉଡ୍ ଓ ପ୍ୟାଟ୍ କମିନ୍ସ ୧-୧ ୱିକେଟ ନେଇଥିଲେ କିନ୍ତୁ ଅଷ୍ଟ୍ରେଲିଆକୁ ବିଜୟ ଦେବାରେ ସକ୍ଷମ ହୋଇନଥିଲେ । ଫଳରେ ଭାରତ ୩ ମ୍ୟାଚ ବିଶିଷ୍ଟ ଟି-୨୦ ଶୃଙ୍ଖଳାର ୨ଟି ମ୍ୟାଚରେ ବିଜୟ ହୋଇ ସିରିଜ୍‌ ହାତେଇବାରେ ସଫଳ ହୋଇଛି ।

ହାଇଦ୍ରାବାଦ୍‍: ଆଜି ଭାରତ ଓ ଅଷ୍ଟ୍ରେଲିଆ ମଧ୍ୟରେ ଖେଳାଯିବ ନିର୍ଣ୍ଣାୟକ ଟି-୨୦। ୩ ମ୍ୟାଚ୍‍ ବିଶିଷ୍ଟର ତୃତୀୟ ତଥା ଶେଷ ମ୍ୟାଚ୍‍ ଆଜି ହାଇଦ୍ରାବାଦର ଉପ୍ପଲ ଷ୍ଟାଡିୟମ୍‍ ରେ ଖେଳାଯିବ। ଏହା ପୂର୍ବରୁ ଦୁଇଟି ମ୍ୟାଚ୍‍ ଶେଷ ହୋଇଥିଲାବେଳେ ଉଭୟ ଦଳ ଗୋଟିଏ ଲେଖାଏଁ ମ୍ୟାଚ୍‍ ଜିତି ବରାବର ସ୍ଥିତିରେ ରହିଛନ୍ତି। ଏଠାରେ ଖେଳାଯିବାକୁ ଥିବା ମ୍ୟାଚ୍‍ରେ ଯେଉଁ ଦଳ ବିଜୟୀ ହେବ ସେହି ଦଳ ସିରିଜ୍‍ କବ୍‍ଜା କରିବ। ଏହା ବ୍ୟତୀତ ବିଶ୍ୱକପ୍‍ ପୂର୍ବରୁ ଭାରତୀୟ ଦଳରେ ଥିବା ଅସାମନତାକୁ ଦୂର କରିବା ଲାଗି ଏହି ମ୍ୟାଚ୍‍ ମଧ୍ୟ ସୁଯୋଗ ଦେବ। ଏମାନଙ୍କ ମଧ୍ୟରେ ଫର୍ମରେ ନଥିବା ମୁଖ୍ୟ ସ୍ପିନର ଯୁଜବେନ୍ଦ୍ର ଚହଲ ଆହତ ସମସ୍ୟା ପରେ ଦଳକୁ ଫେରିଥିବାବେଳେ ଡେଥ୍‍ ଓଭର ସ୍ପେଶାଲିଷ୍ଟ ହର୍ଶଲ ପଟେଲ ୬ ଓଭରରେ ୮୧ ରନ୍‍ ବ୍ୟୟ କରିଛନ୍ତି। ଚହଲ ଏସିଆ କପ୍‍ରୁ ବ୍ୟୟବହୁଳ ବୋଲର ଭାବେ ସାବ୍ୟସ୍ତ ହୋଇ ଆସୁଛନ୍ତି। ଏଣୁ ଭାରତୀୟ ଦୃଷ୍ଟି କୋଣରୁ ଦେଖିଲେ ଏହି ଦୁଇ ଖେଳାଳିଙ୍କ ଉପରେ ନଜର ରହିବ। ଏମାନଙ୍କ ସଫଳତା ବିନା ଭାରତ ଟି-୨୦ ବିଶ୍ୱକପ୍‍ ରେ କିଛି ଭଲ ପ୍ରଦର୍ଶନ କରିବା କଷ୍ଟକର।

ସେହିପରି ପାୱାରପ୍ଲେରେ ଟାଇଗର ଓ ଡେଥ୍‍ ଓଭରରେ ଶୃଗାଳ ଭଳି ପ୍ରଦର୍ଶନ ଦେଉଥିବା ଭୁବନେଶ୍ୱର କୁମାରଙ୍କୁ ନେଇ ଦଳ ଚିନ୍ତିତ। ସେ ଭାରତୀୟ ମ୍ୟାନେଜମେଣ୍ଟର ମୁଖ୍ୟ ଅସ୍ତ୍ର। ଏଣୁ ତାଙ୍କୁ ଡେଥ୍‍ ଓଭରରେ ବୋଲିଂ ନ ଦେଇ ପୂର୍ବରୁ ଓଭର ସାରିବାକୁ ଅଧିନାୟକ ଚେଷ୍ଟା କରିବେ ବୋଲି ଅଧିନାୟକ ରୋହିତ ଶର୍ମା କହିଛନ୍ତି। ସବୁଠାରୁ ଉତ୍ସାହଜନକ କଥା ହେଲା ଆହତ ସମସ୍ୟା ପରେ ଯଶପ୍ରୀତ୍‍ ବୁମ୍‍ରା ଫର୍ମକୁ ଫେରିବା। ସେ ଦ୍ୱିତୀୟ ମ୍ୟାଚ୍‍ ରେ ଆହତ ହୋଇଥିବା କଥା ପ୍ରଦର୍ଶନରୁ ଜଣା ପଡ଼ି ନଥିଲା। ଏଣୁ ପୂରା ମ୍ୟାଚ୍‍ ଫିଟ୍‍ ଅଛନ୍ତି କି ନାହିଁ, ସେ ସମ୍ପର୍କରେ ପରୀକ୍ଷା ଆବଶ୍ୟକ। ଦ୍ୱିତୀୟ ମ୍ୟାଚ୍‍ ୮ ଓଭର ବିଶିଷ୍ଟ ହୋଇଥିବାରୁ ଭୁବନେଶ୍ୱରକୁ ବାଦ୍‍ ଦିଆଯାଇଥିଲା। ସେ ଶେଷ ମ୍ୟାଚ୍‍ ରେ ଦଳକୁ ଫେରିବାର ସମ୍ଭାବନାକୁ ଏଡାଇ ଦେଇ ହେବ ନାହିଁ। ତାଙ୍କୁ ଯଦି ଚୂଡାନ୍ତ ଏକାଦଶରେ ସାମିଲ କରାଯାଏ, ତେବେ ଋଷଭ ପନ୍ତ୍‍ ବାଦ୍‍ ପଡ଼ିବେ। ଏହା ଫଳରେ ଅକ୍ଷର ପଟେଲଙ୍କୁ ବ୍ୟାଟିଂ ଅର୍ଡରରେ ଆଗୁଆ ଆସିବେ। ଲୋକେଶ ରାହୁଲ ଓ ବିରାଟ କୋହଲିଙ୍କ ଲାଗି ଚଳିତ ସିରିଜ୍‍ ରେ ଶେଷ ସୁଯୋଗ ରହିଛି।

ଅନ୍ୟପକ୍ଷରେ ଅଷ୍ଟ୍ରେଲିଆ କୌଣସି ମ୍ୟାଚ୍‍କୁ ସହଜ ଭାବେ ନିଏ ନାହିଁ। ଏଣୁ ଗତ ଦୁଇଟି ସିରିଜରେ ଅପରାଜେୟ ରହିଥିବା ଡିଫେଣ୍ଡିଂ ଚାମ୍ପିଅନ୍‍ ଅଷ୍ଟ୍ରେଲିଆ ଟି-୨୦ ବିଶ୍ୱକପ୍‍ ପୂର୍ବରୁ ବିଜୟୀ ହୋଇ ଆତ୍ମବିଶ୍ୱାସ ଦୃଢ଼ କରିବ ବୋଲି ଆଶା କରିବା ସ୍ୱାଭାବିକ୍‍। କିନ୍ତୁ ଏହା ସତ୍ୟ ଯେ ଯେଉଁ ଦଳ ଟସ୍‍ ଜିତିବା କିମ୍ବା ରନ୍‍ ଚେଜ୍‍ କରିବ, ସେହି ଦଳ ନିଶ୍ଚିତଭାବେ ଏହି ମ୍ୟାଚ୍‍ ଜିତିବ।

ନାଗପୁର: ଭାରତ ଓ ଅଷ୍ଟ୍ରେଲିଆ ମଧ୍ୟରେ ୩ ମ୍ୟାଚ୍‍ ବିଶିଷ୍ଟ ଟି-୨୦ ସିରିଜ୍‍ର ଦ୍ୱିତୀୟ ମୁକାବିଲା ଆଜି ଏଠାରେ ଖେଳାଯିବ। ଏହା ପୂର୍ବରୁ ମୋହାଲିରେ ଖେଳାଯାଇଥିବା ପ୍ରଥମ ମ୍ୟାଚ୍‍କୁ ସହଜରେ ଜିତି ଅଷ୍ଟ୍ରେଲିଆ ୧-୦ରେ ଆଗୁଆ ରହିଛି। ଅଷ୍ଟ୍ରେଲିଆ ପ୍ରଥମ ମ୍ୟାଚ୍‍ ରେ ଯେପରି ପେସାଦାର ଖେଳ ପ୍ରଦର୍ଶନ କରିଛି, ସେଥିରେ ଯଦି ଭାରତ ନିଜ ଖେଳରେ, ବିଶେଷ କରି ବୋଲିଂରେ ଉନ୍ନତି ନ ଆଣେ ତେବେ ଏଠାରେ ଅଷ୍ଟ୍ରେଲିଆ ସିରିଜ୍‍ ଜିତିବାକୁ ସମର୍ଥ ହେବ। ବ୍ୟାଟିଂକୁ ସହାୟତା ଦେଉଥିବା ପିଚ୍‍ ରେ ଭାରତୀୟ ବୋଲରଙ୍କ ପ୍ରଦର୍ଶନ ଆଦୌ ଉନ୍ନତ ହେଉ ନାହିଁ। ନାଗପୁର ପିଚ୍‍ ବ୍ୟାଟିଂ ଲାଗି ଖ୍ୟାତି ରହିଛି। ଭାରତ ଯଦି ଏହି ମ୍ୟାଚ୍‍ରେ ପ୍ରଥମେ ବ୍ୟାଟିଂ କରେ ତେବେ ସିରିଜ୍‍ ହାରିବା ନିଶ୍ଚିତ ହୋଇଯିବ। ଏହାଛଡ଼ା ଭ୍ରମଣକାରୀ ଅଷ୍ଟ୍ରେଲିଆର ରେକର୍ଡ ଏଠାରେ ବେଶ ଉତ୍ସାହଜନକ ରହିଛି। ଏହି ଦଳ ମଧ୍ୟ ଗତ ଦୁଇଟି ଟୁର୍‍ ରେ ଭାରତ ନିକଟରୁ ଟି-୨୦ ସିରିଜ୍‍ ହାରିନାହିଁ। ଗୋଟିଏ ପଟେ ରେକର୍ଡ ଓ ଅନ୍ୟପଟେ ଦୃଢ଼ ଆତ୍ମବିଶ୍ୱାସ ଅଷ୍ଟ୍ରେଲିଆକୁ ଭଲ ପ୍ରଦର୍ଶନ ଦେବା ଲାଗି ବେଶ ସହାୟକ ହୋଇଛି।

ପ୍ରଥମ ମ୍ୟାଚ୍‍ର ପ୍ରଦର୍ଶନକୁ ଦେଖିଲେ ଭାରତୀୟ ଖେଳାଳିମାନେ ବ୍ୟାଟିଂକୁ ଛାଡିଦେଲେ ଅନ୍ୟ ଦୁଇଟି ବିଭାଗରେ ଫେଲ ମାରିଥିଲେ। ବ୍ୟାଟିଂରେ ମଧ୍ୟ ଦଳ ପାୱାର ପ୍ଲେ’ ମଧ୍ୟରେ ଦୁଇ ତାରକା ଖେଳାଳି ରୋହିତ ଶର୍ମା ଓ ବିରାଟ କୋହଲିଙ୍କୁ ହରାଇଥିଲା। ଏମାନଙ୍କ ଉପସ୍ଥିତି ନିଶ୍ଚିତଭାବେ ରନ୍‍ ସଂଗ୍ରହ ହାରରେ ବଡ଼ ପରିବର୍ତ୍ତନ ଆଣିଥାନ୍ତା। ରବୀନ୍ଦ୍ର ଜାଡେଜାଙ୍କ ସ୍ଥାନରେ ଅକ୍ଷର ପଟେଲଙ୍କୁ ନିଆଯାଇଥିଲାବେଳେ ସେ ୩ଟି ୱିକେଟ ନେଇ ତାଙ୍କ ସାମିଲର ଯଥାର୍ଥତା ପ୍ରତିପାଦନ କରିଥିଲେ। ତାଙ୍କୁ ଛାଡିଦେଲେ ଅନ୍ୟ କୌଣସି ବୋଲରଙ୍କୁ ଅଷ୍ଟ୍ରେଲିଆ ବ୍ୟାଟର ଛାଡି ନଥିଲେ। ବିଶେଷ କରି ଭୁବନେଶ୍ୱର କୁମାରଙ୍କ ୧୯ତମ ଓଭର ବିଫଳତା ଭାରତକୁ ବେଶ ମହଙ୍ଗା ପଡ଼ିଛି। ସେ ଗତ ୩ଟି ମ୍ୟାଚ୍‍ରେ ଏହି ୧୯ତମ ଓଭରରରୁ ୪୯ ରନ୍‍ ଖର୍ଚ୍ଚ କରିସାରିଲେଣି। ପାକିସ୍ତାନ, ଶ୍ରୀଲଙ୍କା ଓ ଅଷ୍ଟ୍ରେଲିଆ ବ୍ୟାଟର ଏହି ରନ୍‍ ନେଇଛନ୍ତି। ଏହା ନିଃସନ୍ଦେହରେ ସେ ବ୍ରେକ୍‍ ଥ୍ରୁ ଦେବାରେ ସିଦ୍ଧହସ୍ତ। କିନ୍ତୁ ଏହି ମ୍ୟାଚ୍‍ ରେ ତାଙ୍କୁ ସଫଳତା ମିଳି ନଥିଲା। ଏହି ମ୍ୟାଚ୍‍ ରେ ସାଢେ ୩ଜଣ ପେସ୍‍ ବୋଲର ୧୪ ଓଭର ବୋଲିଂ ୧୫୦ ରନ୍‍ ଦେଇଥିଲେ। ଏହି ୩ଜଣଙ୍କଠାରୁ ଅଧିକ କିଛି ଆଶା କରିବା ଠିକ୍‍ ହେବ ନାହିଁ। କିନ୍ତୁ ମନେ ରଖିବା ଉଚିତ ଯେ ଭୁବନେଶ୍ୱରଙ୍କୁ ବାଦ୍‍ ଦେଲେ ଅନ୍ୟ ଦୁଇ ପେସ୍‍ ବୋଲର ହର୍ଶଲ ପଟେଲ ଓ ଉମେଶ ଯାଦବଙ୍କ ନିକଟରେ ମ୍ୟାଚ୍‍ ପ୍ରାକ୍ଟିସର ଅଭାବ ରହିଛି। ଏଣୁ ସେମାନେ ଯେ ନିୟମିତ ଖରାପ ପ୍ରଦର୍ଶନ କରିବେ, ତାହା କହିବା ଠିକ୍‍ ହେବ ନାହିଁ।

ଏହା ମଧ୍ୟରେ ଗୁରୁବାର ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସୂର୍ଯ୍ୟକୁମାର ଯାଦବ ସୂଚନା ଦେଇଛନ୍ତି, ଯଶ୍‍ପ୍ରୀତ୍‍ ବୁମ୍‍ରା ଫିଟ୍‍ ହୋଇଛନ୍ତି ଓ ସେ ଖୁବ୍‍ ଶୀଘ୍ର ମ୍ୟାଚ୍‍ ଖେଳିବେ। ଏହାର ଅର୍ଥ ସେ ଏହି ମ୍ୟାଚ୍‍ ଖେଳିବାର ଯଥେଷ୍ଟ ସମ୍ଭାବନା ରହିଛି। ତାଙ୍କ ଅନୁପସ୍ଥିତିରେ ଭାରତୀୟ ବୋଲର ସ୍ଥିରତା ପ୍ରଦର୍ଶନ କରିବାରେ ଅସମର୍ଥ ହୋଇଛନ୍ତି। ଏଠାରେ ତ କେବଳ ସିରିଜ୍‍ ଜିତିବା ଉପରେ ଗୁରୁତ୍ୱ ଦିଆଯାଉଛି। ଅକ୍ଟୋବର ୨୩ରେ ପାକିସ୍ତାନ ସହ ମୁକାବିଲାରୁ ଟି-୨୦ ବିଶ୍ୱକପ୍‍ ଅଭିଯାନ ଆରମ୍ଭ କରିବା ପୂର୍ବରୁ ଭାରତ ଆଉ ମାତ୍ର ୫ଟି ମ୍ୟାଚ୍‍ ଖେଳିବ। ଏହି ୫ଟି ମ୍ୟାଚ୍‍ ରେ ବୋଲିଂ ବାହିନୀକୁ କିପରି ସଜାଡିବ ତାହା କହିବା ମୁସ୍କିଲ। ସାଧାରଣତଃ ଏହି ମ୍ୟାଚ୍‍ ଗୁଡିକରେ ବିଶ୍ୱକପ୍‍ ଟିମ୍‍ରେ ସ୍ଥାନ ପାଇଥିବା ଖେଳାଳି ଖେଳିଥାନ୍ତି। ଯଶ୍‍ପ୍ରୀତ୍‍ ବୁମ୍‍ରା ଓ ଅର୍ଶଦୀପ ସିଂଙ୍କ ଅନୁପସ୍ଥିତି ଦଳର ଯୋଜନାକୁ ନେଇ ସନ୍ଦେହ ସୃଷ୍ଟି କରିବା ଯୁକ୍ତିଯୁକ୍ତ। ସ୍ପିନର ହୁଅନ୍ତୁ କିମ୍ବା ପେସ୍‍ ବୋଲରଙ୍କୁ ନେଇ ଟିମ୍‍ରେ ସନ୍ତୁଳନ ନଥିଲା ପରି ମନେ ହେଉଛି। ଏହାକୁ କିପରି ଓ କେବେ ସଜାଡିବାକୁ ହେବ ତାହା କେବଳ ଟିମ୍‍ ମ୍ୟାନେଜମେଣ୍ଟ କହିବ।

ଦୀର୍ଘଦିନ ଧରି ଆଇପିଏଲ୍‍ ଖେଳିବା ପରେ ଭାରତୀୟ ଫିଲ୍ଡରଙ୍କ ପ୍ରଦର୍ଶନରେ ଢ଼େର ଉନ୍ନତି ହୋଇଛି ବୋଲି ସମସ୍ତେ ଦାବି କରନ୍ତି। କିନ୍ତୁ ପ୍ରଥମ ମ୍ୟାଚ୍‍ରେ ୩ଟି କ୍ୟାଚ୍‍ ଡ୍ରପ୍‍ କରିବା, ବଲକୁ ଠିକ୍‍ ଭାବେ ସଂଗ୍ରହ କରି ନପାରିବା ଏହି ଦାବିକୁ କେବଳ ଉପହସିତ କରୁଛି। ରୋହିତ ଶର୍ମା ଯେଉଁ ଅଲ ଆଟାକ ନୀତି ଗ୍ରହଣ କରିବେ ବୋଲି କହିଥିଲେ ତାହା ଏହି ମ୍ୟାଚ୍‍ ପରେ ଧୂଳିସାତ୍‍ ହୋଇଯାଇଛି।

ଅନ୍ୟପକ୍ଷରେ ଅଷ୍ଟ୍ରେଲିଆ ଦଳରେ ସନ୍ତୁଳନ ରହିଛି ଓ ଏହା ବେଶ ଶକ୍ତିଶାଳୀ ମନେହେଉଛି। କିଛି ତାରକା ଖେଳାଳିଙ୍କ ଅନୁପସ୍ଥିତି ସତ୍ତ୍ବେ ଦଳର ପ୍ରଦର୍ଶନରେ କିଛି ଫରକ ପଡ଼ିନାହିଁ। ଅଷ୍ଟ୍ରେଲିଆର ବିଜୟକୁ ରୋକିବା ଲାଗି ନାଗପୁର ପିଚ୍‍କୁ ସ୍ପିନରଙ୍କୁ ସୁହାଇଲା ଭଳି କରାଗଲେ କିଛି ଆଶ୍ଚର୍ଯ୍ୟ ହେବାର ନାହିଁ। ଭାରତ ଭଳି ଅଷ୍ଟ୍ରେଲିଆର ପେସ୍‍ ବୋଲର ମଧ୍ୟ ଶୃଙ୍ଖଳିତ ପ୍ରଦର୍ଶନ କରିପାରି ନଥିଲେ। ଅବଶ୍ୟ ଏଠିକାର ପିଚ୍‍ରେ ସ୍ପିନରଙ୍କ ଭୂମିକା ଅଧିକ ରହିବ ବୋଲି ଆଶା କରାଯାଉଛି।

ନୂଆଦିଲ୍ଲୀ: ତିନି ମ୍ୟାଚ୍‍ବିଶିଷ୍ଟ ଟି-୨୦ ସିରିଜ ଖେଳିବା ଲାଗି ଅଷ୍ଟ୍ରେଲିଆ କ୍ରିକେଟ୍‍ ଦଳ ଭାରତ ଗସ୍ତରେ ଆସିଛି। ସିରିଜର ପ୍ରଥମ ମ୍ୟାଚ୍‍ ଆଜି ମୋହାଲିରେ ଖେଳାଯିବ। ରୋହିତ୍‍ ଶର୍ମା ଭାରତର ଏବଂ ଆରୋନ ଫିଞ୍ଚ ଅଷ୍ଟ୍ରେଲିଆ ଦଳର ନେତୃତ୍ୱ ନେଉଛନ୍ତି। ବିଶ୍ୱକପ୍ ପୂର୍ବରୁ ବିଶ୍ୱ କ୍ରିକେଟର ଏହି ଦୁଇ ପ୍ରମୁଖ ଦଳ ତ୍ରୁଟି ସୁଧାରିବାକୁ ଚେଷ୍ଟା କରିବେ । ଭାରତ ମଧ୍ୟକ୍ରମ ବ୍ୟାଟିଂ ଓ ଷଷ୍ଠ ବୋଲର ବିକଳ୍ପ ସମସ୍ୟାକୁ ସମାଧାନ କରିବା ଲକ୍ଷ୍ୟରେ ରହିଛି । ଗତ କିଛି ଦିନ ହେବ ଭାରତୀୟ ଦଳର ମଧ୍ୟକ୍ରମ ବ୍ୟାଟିଂ ବିଭାଗର ପ୍ରଦର୍ଶନ ନୈରାଶ୍ୟଜନକ ରହିଛି ।

ଭାରତ ଓ ଅଷ୍ଟ୍ରେଲିଆ ଦଳର ରେକର୍ଡ ଉପରେ ନଜର ପକାଇଲେ ଉଭୟ ଦଳ ଶେଷଥର ଲାଗି ଗତ ଡିସେମ୍ବରରେ ଟି-୨୦ ମ୍ୟାଚରେ ସାମ୍ନାସାମ୍ନି ହୋଇଥିଲେ। ଅଷ୍ଟ୍ରେଲିଆ ଗସ୍ତରେ ଯାଇଥିବାବେଳେ ୩ଟି ଟି-୨୦ ମ୍ୟାଚ୍‍ ଖେଳିଥିଲା ଭାରତ। ଯେଉଁଥିରେ ଭାରତୀୟ ଦଳ ୨-୧ରେ ସିରିଜ ବିଜୟୀ ହୋଇଥିଲା। ପ୍ରଥମ ଦୁଇ ମ୍ୟାଚକୁ ଭାରତ ଯଥାକ୍ରମେ ୧୧ ରନ ଓ ୬ ୱିକେଟ୍‍ରେ ଜିତି ଆଗୁଆ ୨-୦ରେ ସିରିଜ କବ୍‍ଜା କରିଥିଲା। ଏହାପରେ ଅନ୍ତିମ ମ୍ୟାଚକୁ ୬ ୱିକେଟ୍‍ରେ ଜିତି ଘରୋଇ ଅଷ୍ଟ୍ରେଲିଆ ଦଳ ସମ୍ମାନ ରଖିଥିଲା।

୨୩ରୁ ଭାରତ ଜିତିଛି ୧୩ ମ୍ୟାଚ୍‍
ଓଭରଅଲ୍‍ ଉଭୟ ଅଷ୍ଟ୍ରେଲିଆ ଓ ଭାରତ ମଧ୍ୟରେ ବର୍ତ୍ତମାନ ସୁଦ୍ଧା ୨୩ ଟି-୨୦ ମ୍ୟାଚ୍‍ ଖେଳାଯାଇଛି। ଯେଉଁଥିରେ ଭାରତ ୧୩ ମ୍ୟାଚ୍‍ ଜିତି ଅଗ୍ରଣୀ ରହିଛି। ଅଷ୍ଟ୍ରେଲିଆ ୯ ମ୍ୟାଚରେ ଜିତିଥିବାବେଳେ ଗୋଟିଏ ମ୍ୟାଚ୍‍ର ବିନା ଫଳାଫଳରେ ଶେଷ ହୋଇଛି। ତେଣୁ ଅଷ୍ଟ୍ରେଲିଆ ବିପକ୍ଷ ଟି-୨୦ରେ ଭାରତର ପଲା ଭାରି ରହିଛି। ଶେଷ ୫ ଟି-୨୦ ମ୍ୟାଚ୍‍ ଉପରେ ନଜର ପକାଇଲେ ଅଷ୍ଟ୍ରେଲିଆ ଆଗରେ ରହିଛି। ଯେଉଁଥିରେ ଅଷ୍ଟ୍ରେଲିଆ ୩ ଓ ଭାରତ ୨ ମ୍ୟାଚ୍‍ ଜିତିଛି। ଭାରତ ମାଟିରେ ଉଭୟ ଦଳ ମଧ୍ୟରେ ୭ ଟି-୨୦ ମ୍ୟାଚ୍‍ ଖେଳାଯାଇଛି। ସେଥିମଧ୍ୟରୁ ଭାରତ ୪ ମ୍ୟାଚ ଜିତିଥିବାବେଳେ ୩ଟିରେ ପରାଜୟର ସମ୍ମୁଖୀନ ହୋଇଛି। ପଞ୍ଜାବର ମୋହାଲି ଗ୍ରାଉଣ୍ଡରେ ଦୁଇ ଦଳ ଗୋଟିଏ ଥର ସାମ୍ନାସାମ୍ନି ହୋଇଛନ୍ତି। ଏହି ମ୍ୟାଚରେ ଭାରତ ବାଜିମାତ୍‍ କରିନେଇଥିଲା।

ପ୍ରଥମେ ବ୍ୟାଟିଂ କରି ଭାରତ ଜିତିଛି ୫
ଅଷ୍ଟ୍ରେଲିଆ ବିପକ୍ଷରେ ମୋଟ୍‍ ୨୩ ଟି-୨୦ ମ୍ୟାଚରୁ ଭାରତ ୯ଥର ପ୍ରଥମେ ବ୍ୟାଟିଂ କରିଛି। ଏଥିରେ ୫ଟି ମ୍ୟାଚରେ ବିଜୟୀ ହୋଇଥିବାବେଳେ ୪ଟି ପରାସ୍ତ ହୋଇଛି। ଅପରପକ୍ଷରେ ଅଷ୍ଟ୍ରେଲିଆ ବିପକ୍ଷରେ ରନ୍‍ ଚେଜିଂରେ କିନ୍ତୁ ଭାରତର ରେକର୍ଡ ଭଲ ରହିଛି। ୧୩ ମ୍ୟାଚରେ ଭାରତ ଟାର୍ଗେଟ୍‍ ପଶ୍ଚାତଧାବନ କରିଥିବାବେଳେ ୮ଟି ବିଜୟୀ ହୋଇଛି।

ବିରାଟ- ୭୧୮; ଫିଞ୍ଚ୍‍- ୪୪୦
ବ୍ୟକ୍ତିଗତ ରେକର୍ଡ ଉପରେ ନଜର ପକାଇଲେ ବ୍ୟାଟିଂରେ ବିରାଟ କୋହଲି ସର୍ବାଗ୍ରେ ରହିବେ। ଉଭୟ ଦେଶ ମଧ୍ୟରେ ଖେଳାଯାଇଥିବା ଟି-୨୦ରେ କୋହଲି ସର୍ବାଧିକ ୭୧୮ ରନ୍‍ ସଂଗ୍ରହ କରିଛନ୍ତି। ୫୯.୮୩ ଆଭରେଜରେ ସେ ରନ୍‍ ସଂଗ୍ରହ କରିଛନ୍ତି। ଅଷ୍ଟ୍ରେଲିଆ ପକ୍ଷରୁ ସର୍ବାଧିକ ରନ ଫିଞ୍ଚଙ୍କ ନାମରେ ରହିଛି। ଫିଞ୍ଚ ଭାରତ ବିପକ୍ଷରେ ମୋଟ୍‍ ୪୪୦ ରନ୍‍ ସଂଗ୍ରହ କରିଛନ୍ତି। ବ୍ୟକ୍ତିଗତ ସର୍ବୋଚ୍ଚ ଇନିଂସ ଉପରେ ଦେଖିଲେ ସେନ୍‍ ୱାଟସନ ୧୨୪ ରନ ସହ ଶୀର୍ଷରେ ରହିଛନ୍ତି। ୨୦୧୬ରେ ସିଡ୍‍ନୀରେ ଖେଳାଯାଇଥିବା ଭାରତ ବିପକ୍ଷ ଟି-୨୦ରେ ୱାଟସନ ଏହି ମାରାଥନ ଶତକୀୟ ଇନିଂସ ଖେଳିଥିଲେ। ଏହାସତ୍ତ୍ବେ ମ୍ୟାଚରେ ଅଷ୍ଟ୍ରେଲିଆ ପକ୍ଷରୁ ଧାର୍ଯ୍ୟ ୧୯୮ ରନର ବିଶାଳ ଲକ୍ଷ୍ୟକୁ ଭାରତ ଶେଷ ବଲରେ ୩ ୱିକେଟ୍‍ ହରାଇ ଚମତ୍କାର ବିଜୟ ଲାଭ କରିଥିଲା।

ବୋଲିଂରେ ବୁମ୍‍ରା ଆଗରେ
ଦୁଇ ଦଳ ମଧ୍ୟରେ ଖେଳାଯାଇଥିବା ଟି-୨୦ରେ ଯଶପ୍ରୀତ୍‍ ବୁମ୍‍ରା ସର୍ବାଧିକ ୱିକେଟ୍‍ ହାସଲକାରୀ ବୋଲର ରହିଛନ୍ତି। ବୁମ୍‍ରାଙ୍କ ନାମରେ ୧୫ ୱିକେଟ୍‍ ଲିପିବଦ୍ଧ ରହିଛି। ପ୍ରତିପକ୍ଷ ଅଷ୍ଟ୍ରେଲିଆ ପକ୍ଷରୁ ସେନ ୱାଟସନ ସର୍ବାଧିକ ୧୦ ୱିକେଟ୍‍ ସଫଳତା ପାଇଛନ୍ତି। ବ୍ୟକ୍ତିଗତ ବୋଲିଂ ଫିଗର ଉପରେ ନଜର ପକାଇଲେ ଭାରତ ପକ୍ଷରୁ ରବିଚନ୍ଦ୍ରନ ଅଶ୍ୱିନ ୧୧ ରନରେ ଏବଂ ଅଷ୍ଟ୍ରେଲିଆ ପକ୍ଷରୁ ଜାସନ ବେହେରନଡୋର୍ଫ ୨୧ ରନରେ ୪ଟି ଲେଖାଏ ୱିକେଟ୍‍ ନେଇଛନ୍ତି।