କମର୍ଦ୍ଦା(ଆରତୀ ଭୂୟାଁ): ବାସ୍ତବିକ ପ୍ରେମ ହିଁ ସତ୍ୟ ସନାତନ। ମାନବ ହୃଦୟର ଏକମାତ୍ର ଆରାଧ୍ୟ ଦେବତା। ପ୍ରେମ ହିଁ ଜୀବନ ଆକାଶର ଧୃବତାରା। ପ୍ରେମ ଏପରି ଏକ ଅମୂଲ୍ୟ ରତ୍ନ, ଯାହାର ବିନିମୟରେ ସବୁ କିଣା ଯାଇପାରେ, ସବୁ କିଛି ସଂସାରର ଅମୂଲ୍ୟ ବସ୍ତୁକୁ ହାସଲ କରାଯାଇପାରେ। ହୃଦୟରେ ପ୍ରେମ ଜାଗିଲେ ପର ଆପଣାର ଭେଦ ଭାବକୁ ଭୁଲିଯାଏ। ମାନବ ମନରୁ ପଲକରେ ସମସ୍ତ ଗର୍ବ ଅହଂକାର ଦୂର ହୋଇ ପ୍ରାଣରେ ଖେଳିଯାଏ ଆନନ୍ଦ ଉଲ୍ଲାସର ଦିବ୍ୟଚେତନା। ସେହି ପ୍ରେମର ଠାକୁର ଭଗବାନ ଶ୍ରକୃଷ୍ଣ ଆଉ ପ୍ରେମ ବିରହିଣୀ ରାଧିକା।

ସମଗ୍ର ବିଶ୍ୱରେ ଏବେ ଶାନ୍ତି ଖୋଜା ଚାଲିଛି। ଯୁଦ୍ଧ ଓ ସନ୍ତ୍ରାସ ଭିତରେ ବିଶ୍ୱବାସୀ ଅତିଷ୍ଠ। ପ୍ରତି ମୁର୍ହୂତ୍ତରେ ଅସହ୍ୟ ଯନ୍ତ୍ରଣାକୁ ସାମ୍ନା କରୁଛି ମଣିଷ। ତେବେ ଏବେ ମଣିଷ ବଞ୍ଚିବ କେମିତି? ଉତ୍ତର ଆସିବ ଆଧ୍ୟାତ୍ମିକତାକୁ ପୁଞ୍ଜି କରି। ଆଧ୍ୟାତ୍ମିକତା ଏକ ଚରମ ଉପଲବ୍ଧି। ଏଥିପାଇଁ ଉତ୍ତମ ପରିବେଶ ଲୋଡ଼ା। ସମୂହ ଅଞ୍ଚଳବାସୀଙ୍କ ଭିତରେ ଉତ୍ତମ ପରିବେଶ ସୃଷ୍ଟି କରି ଆଧ୍ୟାତ୍ମିକ ଚେତନା ଜାଗରଣ କରିବା ପାଇଁ ଭୋଗରାଇ ବ୍ଲକର କୁରୁଠିଆ ଗ୍ରାମରେ ଗଢ଼ି ଉଠିଛି ଶ୍ରୀ ଶ୍ରୀ କୃଷ୍ଣକୃପା ସେବାଶ୍ରମ।

ଆଧ୍ୟାତ୍ମିକ ଦର୍ଶନ ଦ୍ୱାରା ମଣିଷକୁ ଆଦର୍ଶ ଓ ଶୃଙ୍ଖଳିତ କରିବା ବିଭିନ୍ନ ମଠ ମନ୍ଦିର ବା ସେବାଶ୍ରମ ଦ୍ୱାରା ହିଁ ସମ୍ଭବ ହୋଇଥାଏ। ସେହିଭଳି ଏକ ମହତ୍‌‌ ଉଦ୍ଦେଶ୍ୟ ନେଇ କେତେକ ଭଗବତ ପ୍ରେମୀ ୧୯୯୨ ମସିହା ପବିତ୍ର ଶ୍ରୀଜଗନ୍ନାଥଙ୍କ ବାହୁଡ଼ା ଯାତ୍ରା ଦିନ ଭୋଗରାଇ ବ୍ଲକ ଅର୍ନ୍ତଗତ ବାଲିମ ପଞ୍ଚାୟତର କୁରୁଠିଆ ଗ୍ରାମରେ ଶ୍ରୀଶ୍ରୀ କୃଷ୍ଣକୃପା ସେବାଶ୍ରମ ନାମରେ ଏକ ଆଶ୍ରମ ବା ମଠ ସ୍ଥାପନ କରିଥିଲେ। ଆଉ ସେହି ଭଗବତପ୍ରେମୀ ବ୍ୟକ୍ତି ଜଣକ ହେଉଛନ୍ତି ବର୍ତ୍ତମାନ ମଠର ମହନ୍ତ ବାବାଜୀ ଶ୍ରୀ ରାଧାକୃଷ୍ଣ ଦାସ।

ଜଳେଶ୍ୱର-ଚନ୍ଦନେଶ୍ୱର ରାସ୍ତାର ନହରା ବସ୍‌‌ଷ୍ଟାଣ୍ଡରୁ ଉତ୍ତର ପାର୍ଶରେ ଥିବା ରାସ୍ତାଟି ଏହି ମଠକୁ ଲାଗିଛି। ରାସ୍ତାର କିଛି ବାଟ ଗଲା ପରେ ରହିଛି କୁରୁଠିଆ ଆଶ୍ରମ। ଏଠାରେ ବିରାଜମାନ ହୋଇଛନ୍ତି ରାଧାକୃଷ୍ଣ ବିଗ୍ରହ ସହିତ ମହାପ୍ରଭୁ ଜଗନ୍ନାଥଙ୍କ ବିଗ୍ରହ। ଆଜିକୁ ୩୨ବର୍ଷ ଧରି ଚାଲିଛି ଅବିରାମ ସଂକୀର୍ତ୍ତନ।

ପର୍ବପର୍ବାଣୀ-ଆଶ୍ରମରେ ଅକ୍ଷୟ ତୃତୀୟା, ରଥଯାତ୍ରା, ଗୌରପୂର୍ଣ୍ଣମା, ଜନ୍ମାଷ୍ଟମୀ, କାର୍ତ୍ତିକ ବ୍ରତ, ଗୋବର୍ଦ୍ଧନ ପୂଜା, ରାସପୂର୍ଣ୍ଣମୀ ଭଳି ବାରମାସରେ ତେର ପର୍ବ। ଆଶ୍ରମରେ ୧୯୯୩ ମସିହା ମାର୍ଚ୍ଚ ୩୦ତାରିଖରୁ ଅଖଣ୍ଡ ନାମ ସଂକୀର୍ତ୍ତନ ଆରମ୍ଭ ହୋଇ ଆଜି ପର୍ଯ୍ୟନ୍ତ ଚାଲୁ ରହିଛି। ୧୯୮୩ ମସିହାରେ ଗ୍ରାମବାସୀଙ୍କ ଦ୍ୱାରା ଆରମ୍ଭ କରାଯାଇଥିଲା ଛପନ ମାଦଳ ନାମ ସଂକୀର୍ତ୍ତନ, ୧୨ବର୍ଷ ପରେ ୧୯୯୫ ମସିହାରେ ଉଦଯାପିତ ହୋଇଥିଲା। ସେତେବେଳକୁ ୧୯୯୨ ମସିହାରେ ଏଠାରେ ଏକ ମଠ ସ୍ଥାପିତ ହୋଇସାରିଥିଲା। ଏହି ଉଦଯାପନୀ ଉତ୍ସବରେ ପୁରୀ ଗଜପତି ଦିବ୍ୟସିଂହ ଦେବ, ବହୁ ମଠର ମହନ୍ତ, ପ୍ରବଚକ ଆସି ଯୋଗଦେଇଥିଲେ। ରାଧାକୃଷ୍ଣଙ୍କ ଧର୍ମୀୟ ଚିନ୍ତନକୁ ମଣିଷ ସମାଜ ମାନସ ପଟକୁ ନେଇ କାର୍ଯ୍ୟ ପନ୍ଥା ଗ୍ରହଣ କଲେ ଏବ ସୂକ୍ଷ୍ମ, ସ୍ୱଚ୍ଛ, ଭାବମୟ ସମାଜ ଗଠନ ହୋଇପାରିବ ବୋଲି ମଠର ମହନ୍ତ ବାବାଜୀ ଶ୍ରୀ ରାଧାକୃଷ୍ଣ ଦାସ କହନ୍ତି। ସେଥିପାଇଁ ନିଜସ୍ୱ ଉଦ୍ୟମରେ ମଠର ନିକଟବର୍ତ୍ତୀ ଅଞ୍ଚଳରେ ଗୀତା, ଭାଗବତ ତଥା ରାମାୟଣ ଉପରେ ପ୍ରବଚନ ଆୟୋଜିତ ହୁଏ। ଏଠାକୁ ୨୦୧୨ ମସିହାରେ ପୁରୀ ଭଗବତପାଦ ଶିବ ଅବତାର ଜଗତଗୁରୁ ଶଙ୍କରାଚାର୍ଯ୍ୟ ଶ୍ରୀଶ୍ରୀ ସ୍ୱାମୀ ନିଶ୍ଚଳାନନନ୍ଦ ସରସ୍ୱତୀ ପୁରୀ ଗୋବର୍ଦ୍ଧନ ପୀଠରୁ ଆସି ପାଦ ପକାଇଥିଲେ। ଏହି ଆଶ୍ରମ ଏକ ବଡ଼ପଣିଆ ରହିଛି ଯେ କୌଣସି ଅଞ୍ଚଳରୁ ଭକ୍ତମାନେ ବୁଲିବାକୁ ଆସିଲେ ସେଠାରେ ସେମାନଙ୍କୁ ଉପଯୁକ୍ତ ଆତିଥ୍ୟ ପ୍ରଦର୍ଶନ କରାଯାଏ। ଖାଇବା ରହିବା ଇତ୍ୟାଦିର ବ୍ୟବସ୍ଥା କରାଯାଇଥାଏ।

ଭୋଗରାଇ(ଦିଲ୍ଲୀପ ଦାସ): ପ୍ରଥମେ କିଛି ମାସ ସାମାନ୍ୟ କ୍ଷତି ସହିବାକୁ ପଡୁଥିଲା। ମାତ୍ର ସେଥିରେ ଧର୍ଯ୍ୟ ନ ହରାଇ ଦୃଢ଼ମନା ସହକାରେ ଚାଷ କାର୍ଯ୍ୟ ଚଳାଇ ରଖିଥିଲେ। ଏବେ ସେହି ଚାଷରୁ ମାସକୁ ଜଣକ ପ୍ରତି ପାଖାପାଖି ୨ହଜାର ଟଙ୍କା ରୋଜଗାର କରୁଛନ୍ତି। ଭୋଗରାଇ ବ୍ଲକ ବାଗଦା ଗ୍ରାମର ୧୩୫ ଜଣ ମହିଳା କ୍ରିଷ୍ଣା ଜେନାଙ୍କ ସହଯୋଗରେ ଛତୁଚାଷ କରି ମହିଳା ସ୍ୱୟଂସହାୟକ ଗୋଷ୍ଠୀର ମହିଳାମାନେ ଏବେ ଚର୍ଚ୍ଚାରେ ଅଛନ୍ତି।

ମିଶନଶକ୍ତି ଜରିଆରେ ଗାଁର ମହିଳାମାନେ ରୋଜଗାର କରିବାର ରାସ୍ତା ପାଇଛନ୍ତି। ସାମାଜିକ ଓ ଅର୍ଥନୈତିକ ସ୍ତରରେ ସଶକ୍ତ ହୋଇପାରିଛନ୍ତି। ଗାଁ ପ୍ରଥମେ ୧୦ଜଣ ମହିଳା ମିଶି ୫୦ ହଜାର ଟଙ୍କା ବିନିଯୋଗ କରି ଆରମ୍ଭ କରିଥିଲେ ଛତୁ ଚାଷ। ପରେ ସେହି ଗାଁର ବିଭିନ୍ନ ଗୋଷ୍ଠୀର ୧୩୫ରୁ ଅଧିକ ମହିଳା ମିଶି ସେହି ଛତୁଚାଷ କଲେ। ମାତ୍ର ୨ ବର୍ଷ ଭିତରେ ଏହି ସବୁ ଗୋଷ୍ଠୀର ମହିଳାଙ୍କୁ ୩୦ଲକ୍ଷ ଟଙ୍କା ଲାଭାଂଶ ମିଳିଛି। ତେବେ ଏହି ମହିଳାଙ୍କୁ ରୋଜଗାରର ରାସ୍ତା ଦେଖାଇଛନ୍ତି ମିଶନଶକ୍ତି ଦ୍ୱାରା ନିଯୁକ୍ତ ଥିବା ସିଆରପି କ୍ରିଷ୍ଣା ଜେନା। କ୍ରିଷ୍ଣାଙ୍କ ପ୍ରଚେଷ୍ଟା ଓ ଦିଗଦର୍ଶନରେ ମହିଳାମାନେ ସୃଷ୍ଟି କରିଛନ୍ତି ନିଜର ସ୍ୱତନ୍ତ୍ର ପରିଚୟ। ଏଭଳି ଉଦାହରଣ ସୃଷ୍ଟି କରିପାରିଛନ୍ତି ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଅନ୍ତର୍ଗତ ଦାହୁଣଦା ଗ୍ରାମପଞ୍ଚାୟତ ଅଧୀନ ବାଗଦା ଗାଁର ମହିଳାମାନେ। କ୍ରିଷ୍ଣା ୨୦୧୩ ମସିହାରେ ଦାହୁଣାଦା ପଞ୍ଚାୟତର ଜିପିଏଲଏଫରେ ସିଆରପି ଭାବରେ ନିଯୁକ୍ତି ପାଇବାର ସୁଯୋଗ ପାଇଥିଲେ। ପରବର୍ତ୍ତୀ ସମୟରେ ମିଶନ ଶକ୍ତି ଏବଂ ଓଡ଼ିଶା ଜୀବିକା ମିଶନ ଜରିଆରେ ସେ ଛତୁ ଚାଷ କରିବା ପାଇଁ ତାଲିମ ନେଇଥିଲେ। ତାଲିମ ନେବା ପରେ କିଷ୍ଣା ଜେନାଙ୍କ ଅଧୀନରେ ଥିବା ୧୫ଟି ସ୍ୱୟଂ ସହାୟକ ଗୋଷ୍ଠୀର ଆଉ ୧୦୦ ଜଣ ମହିଳା ଏହି ଛତୁ ଚାଷ ବିଷୟରେ ପ୍ରଶିକ୍ଷଣ ନେଇ ମିଳିତ ଭାବେ ଛତୁ ଚାଷ ଆରମ୍ଭ କରିଥିଲେ। ଛତୁ ଚାଷ ଏକ ଲାଭଜନକ ଚାଷ ହୋଇଥିବା ବେଳେ ପ୍ରତିଦିନ ପ୍ରାୟ ୫୦ରୁ ୬୦କେଜି ଛତୁ ଅମଳ ହୋଇଥାଏ। ଏହି ଚାଷ କରି ଏବେ ମହିଳାମାନେ ସ୍ୱାବଲମ୍ୱୀ ହୋଇଛନ୍ତି।

ଚନ୍ଦନେଶ୍ବର: ନିଶାସକ୍ତ ଅବସ୍ଥାରେ ବାପା ମାଆଙ୍କୁ ନିସ୍ତୁକ ମାଡ଼ ମାରିବା ପରେ ପେଟ୍ରୋଲ ଢାଳି ଘରେ ନିଆଁ ଲଗାଇ ଦେଇଛି ନୃଶଂସ ପୁଅ। କର୍କଟ ରୋଗରେ ପିଡୀତ ମାଆର ଚିକିତ୍ସା ପାଇଁ ବାପା ସଂଗ୍ରହ କରି ରଖିଥିବା ନଗଦ ୩୫ ହଜାର ଟଙ୍କା ସମେତ ଲକ୍ଷାଧିକ ଟଙ୍କାର ଆସବାସପତ୍ର ପୋଡି ଭସ୍ମୀଭୂତ ହୋଇଯାଇଛି। ଏନେଇ ପୁଅକୁ ଗିରଫ କରାଯାଇଥିବା ପୁଲିସ ସୂତ୍ରରୁ ସୂଚନା ମିଳିଛି। ଭୋଗରାଇ ଥାନା ଗୁଛିଦା ତେଘରୀ ପଞ୍ଚାୟତର ମଙ୍ଗରାଜପୁର ଗାଁରେ ଏଭଳି ଏକ ସମ୍ବେଦନଶୀଳ ଘଟଣା ଦେଖିବାକୁ ମିଳିଛି।

ସୂଚନା ମୁତାବକ, ମଙ୍ଗରାଜପୁର ଗାଁର ସୁଧୀର ନାୟକ ଓ କର୍କଟ ରୋଗରେ ପୀଡ଼ିତ ତାଙ୍କ ପତ୍ନୀ ସ୍ନେହଲତା ବାସ କରନ୍ତି। ପୁଅ ଶ୍ରୀମନ୍ତ ଓରଫ କାଳିଆ ବାପା ମାଆଙ୍କୁ ବୃଦ୍ଧାବସ୍ଥାରେ ସାହାରା ହେବା ଏବଂ ପ୍ରତିପୋଷଣ କରିବା ପରିବର୍ତ୍ତେ ତାଙ୍କ ପାଖରେ ନ ରହି କାନ୍ଥିଭଉଁରୀ ଗାଁର ଜନୈକା ମହିଳାଙ୍କ ପାଖରେ ରହି ନିଶା କାରବାର କରନ୍ତି। ସୋମବାର ମଧ୍ୟାହ୍ନ ସମୟରେ ମାଆ ସ୍ନେହଲତା ଭାତ ରାନ୍ଧୁଥିବା ସମୟରେ ପୁଅ ଶ୍ରୀମନ୍ତ ଘରେ ପହଞ୍ଚି ମାଆଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହିତ ଘରୁ ବାହାରି ଯିବା ପାଇଁ ଧମକ ଦେବା ସହ ମାରଧର କରିଥିଲା। ଏହା ଦେଖି ବାପା ସୁଧୀର ବିରୋଧ କରିବାରୁ ତାଙ୍କୁ ମଧ୍ୟ ପିଟାମରା କରିବା ସହିତ ଜୀବନରୁ ମାରିଦେବା ପାଇଁ ଉଦ୍ୟମ କରିଥିଲା। ମାଆ ସ୍ନେହଲତାର ଚିତ୍କାର ଶୁଣି ପଡୋଶୀ ମାନେ ସେଠାରେ ପହଞ୍ଚି ନୃଶଂସ ପୁଅ ଶ୍ରୀମନ୍ତ ହାତରୁ ତାଙ୍କ ବାପା ମାଆଙ୍କୁ ଉଦ୍ଧାର କରିଥିଲେ।

ମାତ୍ର ହିତାହିତ ଜ୍ଞାନ ଭୁଲି ପୁଅ ଶ୍ରୀମନ୍ତ ସାଥୀରେ ଆଣିଥିବା ପେଟ୍ରୋଲକୁ ଘର ଉପରେ ଢାଳି ନିଆଁ ଲଗାଇ ଦେଇଥିଲା। ଏହାସହିତ ବାପା ମାଆଙ୍କୁ ମଧ୍ୟ ପେଟ୍ରୋଲ ଢ଼ାଳି ନିଆଁ ଲଗାଇ ଦେବ ବୋଲି ଧମକ ଦେଇଥିଲା। ଘରେ ଲାଗିଥିବା ନିଆଁ ଏତେ ପ୍ରଖର ହୋଇଥିଲା ଯେ, ଗାଁ ଲୋକେ ଏହାକୁ ଆୟତ୍ତ କରିପାରି ନଥିଲେ। ଏହି ନିଆଁରେ ଘର ସମେତ ସ୍ନେହଲତାଙ୍କ ଚିକିତ୍ସା ପାଇଁ ଧାର କରଜ ଓ ବିଭିନ୍ନ ଲୋକଙ୍କ ପାଖରୁ ମାଗି ଯାଚି ସଂଗ୍ରହ କରି ରଖିଥିବା ନଗଦ ୩୫ ହଜାର ଟଙ୍କା ସହ ଘରର ସମସ୍ତ ଆସବାବପତ୍ର, ଗହମ, ଚାଉଳ, ପଲଙ୍କ, ବାକ୍ସ ସବୁ କିଛି ଆଖିପିଚୁଳାକେ ଭସ୍ମୀଭୂତ ହୋଇଯାଇଥିଲା।

ଖବର ପାଇ ଭୋଗରାଇ ଥାନା ଅଧୀନ ଚନ୍ଦନେଶ୍ୱର ପୁଲିସ ଫାଣ୍ଡି ଅଧିକାରୀ ଏଏସଆଇ ବିଶ୍ବନାଥ କର ଘଟଣାସ୍ଥଳରେ ପହଞ୍ଚି ଶ୍ରୀମନ୍ତକୁ ଧରି ଥାନାକୁ ଆଣିଥିଲା ବେଳେ ପରେ ବାପା ସୁଧୀରଙ୍କ ଲିଖିତ ଅଭିଯୋଗ ମୂଳେ ଭୋଗରାଇ ଥାନା କେସ ନଂ ୧୫୩ /୨୨ ରେ ପୁଲିସ ଏକ ମାମଲା ରୁଜୁ କରି ଅଭିଯୁକ୍ତ ପୁଅ ଶ୍ରୀମନ୍ତକୁ ଗିରଫ କରି ଅଧିକ ପଚରାଉଚରା କରୁଥିବା ସୂଚନା ମିଳିଛି। ଗିରଫ ଶ୍ରୀମନ୍ତ ଓରଫ କାଳିଆକୁ ମଙ୍ଗଳବାର କୋର୍ଟ ଚାଲାଣ କରାଯିବ ବୋଲି ପୁଲିସ ସୂତ୍ରରୁ ଜଣାପଡିଛି।