ଭୁବନେଶ୍ବର: ରାଜଧାନୀରୁ ୨୬ ଲକ୍ଷ ଟଙ୍କାର ବ୍ରାଉନସୁଗାର ଜବତ । ଏହା ଘଟଣାରେ ୨ ଯୁବତୀ ଗିରଫ ହୋଇଥିବା ଜଣାପଡ଼ିଛି। ଭୁବନେଶ୍ବରରେ ଘର ଭଡ଼ା ନେଇ ଚଳାଉଥିଲେ ନିଶା କାରବାର। କାକଟପୁର ଓ ବାଲେଶ୍ବରର ୨ ଯୁବତୀ ଆଇଟି ସେକ୍ଟରରେ କାର୍ଯ୍ୟରତ ବୋଲି ଜଣାପଡ଼ିଛି। ୨ ଯୁବତୀଙ୍କୁ ଗିରଫ କରି କୋର୍ଟ ଚାଲାଣ କରିଛି କମିଶନରେଟ ପୁଲିସ ।

ବାଲେଶ୍ବର: ସବୁ ସୀମା ଟପିଲେ ବ୍ରାଉନସୁଗର ମାଫିଆ । ବ୍ରାଉନସୁଗର ଚଢ଼ାଉ ବେଳେ ପୁଲିସ ଉପରେ ଆକ୍ରମଣ । ଆକ୍ରମଣରେ ୪ ପୁଲିସ କର୍ମଚାରୀ ଆହତ ହୋଇଛନ୍ତି। ଗତକାଲି ବିଳମ୍ବିତ ରାତିରେ ଜଳେଶ୍ୱର ପୁଲିସ ପକ୍ଷରୁ ପଶ୍ଚିମବଙ୍ଗକୁ ବ୍ରାଉନସୁଗର ଚାଲାଣ ହେଥିବାର ଖବର ପାଇ ପ୍ରଥମେ ଆମ୍ବୁଳି ଅଠା ବାଇପାସ ନିକଟରେ ସତ୍ୟବ୍ରତ ଦାସ ନାମକ ବ୍ରାଉନସୁଗର ଚାଲାଣକାରୀକୁ ଅଟକ ରଖିଥିଲେ। ସତ୍ୟବ୍ରତ ଠାରୁ ୨୭୦ ଗ୍ରାମ ବ୍ରାଉନସୁଗର ଜବତ ହୋଇଥିଲା। ଜାହାର ଆନୁମାନିକ ମୂଲ୍ୟ ୨୭ ଲକ୍ଷରୁ ଉର୍ଦ୍ଧ୍ବ ଟଙ୍କା ହେବ ବୋଲି ଜଣାପଡ଼ିଛି। ତେବେ ଏ ନେଇ ପୁଲିସର ଅଧିକ ତଦନ୍ତ ପରେ ସମ୍ପୃକ୍ତ ବ୍ରାଉନସୁଗର ବେପାରୀ ସେଖବାଡର ସେକ୍ ମୁକିନକୁ ଗିରଫ ପାଇଁ ଯାଇଥିଲା  । ମୁକିନକୁ ଧରିବା ସମୟରେ ୧୦ରୁ ଅଧିକ ମହିଳା ଅତର୍କିତ ପୁଲିସ ଉପରକୁ ଆକ୍ରମଣ କରିଥିଲେ। ଘଟଣାରେ ଦୁଇ ଜଣକୁ ଗିରଫ ରଖା ଯାଇଥିବା ସୂଚନା।

ଭୁବନେଶ୍ବର: ନୂଆବର୍ଷ ଓ ବଡ଼ଦିନ ପୂର୍ବରୁ ନିଶା ମାଫିଆଙ୍କ ବିରୋଧରେ ଆକ୍ସନ। ସ୍ପେଶାଲ ଟାସ୍କଫୋର୍ସ ଜାଲରେ ବ୍ରାଉନସୁଗର ମାଫିଆ । କେନ୍ଦୁଝର ଯୋଡ଼ିଆଘାଟି ଅଞ୍ଚଳରୁ ଜବତ ହୋଇଛି ବିପୁଳ ପରିମାଣର ବ୍ରାଉନସୁଗର। ଚଢ଼ାଉ ବେଳେ ଜବତ ହୋଇଛି ୧ କେଜି ୮୦ ଗ୍ରାମର ବ୍ରାଉନସୁଗର । ଜବତ ବ୍ରାଉନସୁଗରର ମୂଲ୍ୟ ୧ କୋଟି ୧୦ ଲକ୍ଷ ଟଙ୍କା ବୋଲି ଅନୁମାନ କରାଯାଉଛି। ଏହି ଘଟଣାରେ ଜଣେ ନିଶା ମାଫିଆକୁ ଗରିଫ କରା ଯାଇଛି। ଅଭିଯୁକ୍ତର ନାଁ ରାଜେନ୍ଦ୍ର କୁମାର ମାଝୀ ( ୪୬ ) । କେସ ନମ୍ବର ୩୨ , NDPS ACT 1985 ରେ ମାମଲା ରୁଜୁ ହୋଇଛି।

ସୂଚନା ଅନୁଯାୟୀ, ୨୦୨୦ରୁ ନାର୍କୋଟିକ୍ସ ଡ୍ରଗ୍ସ ବିରୋଧରେ ଜାରି ରହିଛି ଅଭିଯାନ । ୨୦୨୦ରୁ ଆଜି ମଧ୍ୟରେ ୭୪ କେଜି ବ୍ରାଉନସୁଗର, ୨୦୨ ଗ୍ରାମ କୋକେନ, ୧୧୬ କୁଇଣ୍ଟାଲ ଗଞ୍ଜେଇ ଜବତ ହୋଇଛି।

ଭୁବନେଶ୍ବର: ସ୍ପେଶାଲ କ୍ରାଇମ ୟୁନିଟ ହାତରେ କେଜିଏରୁ ଉର୍ଦ୍ଧ ବ୍ରାଉନସୁଗର। ସ୍ପେଶାଲ କ୍ରାଇମ ୟୁନିଟ ପକ୍ଷରୁ ଚଢ଼ାଉ କରାଯାଇ ୧ କେଜି ୧୨ ଗ୍ରାମ ବ୍ରାଉନସୁଗର ଜବତ କରାଯାଇଛି। ଯାହାର ଆନୁମାନିକ ମୂଳ୍ୟ କଟିଏରୁ ଉର୍ଦ୍ଧ୍ବ ଟଙ୍କା ହେବ ବୋଲି ଜଣାପଡ଼ିଛି। ଅତିରିକ୍ତ ଡିସିପି ସଞ୍ଜୀବ ଶତପଥୀଙ୍କ ନିର୍ଦ୍ଦେଶ କ୍ରମେ ଚାଲିଥିବା ଆଣ୍ଟି ନାର୍କୋଟିକ୍ସ ଡ୍ରାଇଭରେ ଡେଲାଙ୍ଗ କୋଠାଗଡ଼ର ନିରଞ୍ଜନ ପାଟ୍ଟଯୋଶୀ ଓ ଡେଲାଙ୍ଗ ଥାନା ରତନପୁରର ପ୍ରଦୀପ୍ତ କୁମାର ସାହୁଙ୍କୁ ଗିରଫ କରାଯାଇଛି । ସେମାନଙ୍କ ଠାରୁ ୨ଟି ବାଇକ ମଧ୍ୟ ଜବତ କରାଯାଇଛି ।

ଖବର ଅନୁଯାୟୀ, ମେ’ ୧୦ ରେ ଆରମ୍ଭ ହୋଇଥିବା ସ୍ପେଶାଲ କ୍ରାଇମ ୟୁନିଟ ୧୪୨୦ ଗ୍ରାମ ବ୍ରାଉନସୁଗର ଏଯାବତ ଜବତ କରିଛି। ଏହାସହ ୨୩୦ କେଜି ଗଞ୍ଜେଇ ଜବତ କରାଯାଇଛି। ୩ ଟି ଦିଗକୁ ନେଇ ସ୍ପେଶାଲ କ୍ରାଇମ ୟୁନିଟ କାର୍ଯ୍ୟ କରୁଛି। ଆଣ୍ଟି ଫ୍ରଡ ସେଲ, ନାର୍କୋଟିକ୍ସ କଣ୍ଟ୍ରୋଲ ଓ ଅର୍ଗାନାଇଜଡ କ୍ରାଇମ ବିରୋଧରେ ଜିରୋ ଟଲରାନ୍ସ ନୀତି ଆପଣାଯାଉଛି। ଓଡ଼ିଶା ପୁଲିସର କ୍ରାଇମବ୍ରାଞ୍ଚ ଭଳି କମିଶନରେଟ ପୁଲିସରେ ସ୍ପେଶାଲ କ୍ରାଇମ ୟୁନିଟ ମିନି କ୍ରାଇମବ୍ରାଞ୍ଚ ଭଳି କାମ କରୁଥିବା କହିଛନ୍ତି ପୁଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ।

ଭୁବନେଶ୍ବର: ପାର୍ବଣ ପୂର୍ବରୁ ନିଶା କାରବାର ଉପରେ STF ର ଜିରୋ ଟଲେରାନ୍ସ । କେନ୍ଦୁଝରରୁ ୫୨୦ ଗ୍ରାମ ବ୍ରାଉନସୁଗର ଜବତ କରିଛି ଏସଟିଏଫ୍ । ମାରୁତି କାରରେ ଚାଲାଣ ହେଉଥିଲା ଏହି ଧଳାଜହର । ଆନନ୍ଦପୁର ଦେବାନନ୍ଦ ସାମଲଙ୍କୁ ଗିରଫ କରିଛି STF । କେସ ନମ୍ବର ୩୮୦, NDPS Act 1985 ରେ ତଦନ୍ତ ଜାରି ରଖିଛି ଏସଟିଏଫ ।

ପାର୍ବଣଙ୍କୁ ଦୃଷ୍ଟିରେ ରଖି ସ୍ପେଶାଲ ଡ୍ରାଇଭ ଜାରି ରଖିଛି STF ।  ୨୦୨୦ ରୁ ଏବେ ମଧ୍ୟରେ ୭୨ କେଜି ବ୍ରାଉନସୁଗର ଜବତ ହୋଇ ସାରିଛି।  ୨୦୨ ଗ୍ରାମ କୋକେନ, ୧୧୬ କୁଇଣ୍ଟାଲ ଗଞ୍ଜେଇ, ୩ କେଜି ୬୫୦ ଗ୍ରାମ ଅଫିମ ଜବତ କରିଛି STF । ଆଗକୁ ମଧ୍ୟ ଏହି ଅଭିଯାନ ଜାରି ରହିବ ବୋଲି STF ଏସପି ସୂଚନା ଦେଇଛନ୍ତି।

ସେହିପରି କମିଶନରେଟ ପୁଲିସ ହାତରେ ୪ ଜଣ ଗଞ୍ଜେଇ ମାଫିଆ ପଡ଼ିଛନ୍ତି।  ଓଡ଼ିଶାରୁ ବାହାର ରାଜ୍ୟକୁ ଚାଲାଣ ହେଉଥିଲା ଗଞ୍ଜେଇ ।  କାର ସହ ଚାରି ବେପାରୀଙ୍କୁ ମାଡି ବସିଛି କ୍ରାଇମ ସ୍ପେଶାଲ ୟୁନିଟ । କାର ଭିତରୁ ଦେଢ କୁଇଣ୍ଟାଲ ଗଞ୍ଜେଇ ଜବତ ହୋଇଛି । କାର ଯୋଗେ ବିହାର ଚାଲାଣ ହେଉଥିଲା ଗଞ୍ଜେଇ । ଏ ନେଇ ସୂଚନା ଦେଛନ୍ତି ପୁଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ

ବାଳେଶ୍ୱର: କୋଟିଏ ୧୦ ଲକ୍ଷ ଟଙ୍କାର ବ୍ରାଉନସୁଗର ଜବତ କଲା ଏସଟିଏଫ । ବାଳେଶ୍ୱର ରେଳଷ୍ଟେସନ ରୋଡ଼ରୁ ଏହି ବ୍ରାଉନସୁଗର ଜବତ କରିଛି STF ।  ସନ୍ଧ୍ୟା ସମୟରେ ବ୍ରାଉନସୁଗର ଡିଲ ପାଇଁ ଚାଲିଥିଲା ବଡ଼ମସୁଦ୍ଧା । ଖବର ପାଇ ଛଦ୍ମ ବେଶରେ ଛକି ରହିଥିବା STF  ୪ ଅଭିଯୁକ୍ତକୁ  କାବୁ କରିଥିଲା । ୪ ଅଭିଯୁକ୍ତଙ୍କ ଘର ବାଳେଶ୍ୱର ଅଞ୍ଚଳର ବୋଲି ଜଣାପଡ଼ିଛି। ଅଭିଯୁକ୍ତ ୪ ଜଣ ହେଲେ  ସେକ ଫୟାଜ, ସେକ ମୁରାଦ, ସେକ ସମସେଦ ଓ ସମ୍ବିଦ ନାୟକ ।

ଭୁବନେଶ୍ୱର: ପ୍ରେମିକାକୁ ଖୁସି କରିବାକୁ ପ୍ରେମିକର ବ୍ରାଉନସୁଗର ବେପାର । ଦୀପକ ବେହେରା ନାମକ ଜଣେ ବେପାରୀଙ୍କୁ ଗିରଫ କରିଛି କମିଶନରେଟ ପୁଲିସ । ଗିରଫ ବ୍ୟକ୍ତିଙ୍କ ନିକଟରୁ ଲକ୍ଷାଧିକ ଟଙ୍କାର ବ୍ରାଉନ୍‌ସୁଗାର ଜବତ କରିଛି କମିଶନରେଟ୍‌ ପୁଲିସ । ଏନେଇ ଭୁବନେଶ୍ୱର ଡିସିପି ପ୍ରତୀକ ସିଂହ ସୂଚନା ଦେଇଛନ୍ତି ।

ଖବର ଅନୁଯାୟୀ, କିଛି ଦିନ ହେବ ଦୀପକ ବେହେରା ବ୍ରାଉନ୍‌ସୁଗାର ବେପାର କରୁଥିବା ନେଇ ପୁଲିସ ନିକଟରେ ଗୁଇନ୍ଦା ସୂଚନା ରହିଥିଲା । ଏହିକ୍ରମରେ ସୋମବାର ଦିନ କମିଶନରେଟ୍‌ ପୋଲିସ ଚଢାଉ କରି ଦୀପକ ବେହେରା ନାମକ ଜଣେ ବ୍ରାଉନ୍‌ସୁଗାର ବେପାରୀକୁ ଗିରଫ କରିଛି । ତାଙ୍କ ନିକଟରୁ ୨୮୦ ଗ୍ରାମର ବ୍ରାଉନ୍‌ସୁଗାର ଜବତ ମଧ୍ୟ କରିଛି ପୁଲିସ । ଯାହାର ଆନୁମାନିକ ମୂଲ୍ୟ ୨୮ ଲକ୍ଷ ହେବ ବୋଲି ପୁଲିସ ପକ୍ଷରୁ ସୂଚନା ଦିଆଯାଇଛି ।

ଭୁବନେଶ୍ୱର: STF କବଜାରେ ବ୍ରାଉନସୁଗର ବେପାରୀ ।  ଆସାମରୁ ସ୍ଥାନୀୟ ପୁଲିସ ସହାୟତାରେ ଜଣେ ଅନ୍ତଃରାଜ୍ୟ ଡ୍ରଗ୍ସ ମାଫିଆକୁ ଗିରଫ କରିଛି STF । ଗିରଫ ଅଭିଯୁକ୍ତର ନାଁ  ସଲିମ ଅହମ୍ମଦ ହୋଇଥିବା ବେଳେ ଘର ମଣିପୁରର ଇମ୍ଫାଲରେ ବୋଲି ଜଣାପଡ଼ିଛି। ଏସଟିଏଫ୍ ସଲିମକୁ ଗୌହାଟିରୁ ଗିରଫ କରିବା ସହ ୧ କେଜି ୩୩୫ ଗ୍ରାମ ବ୍ରାଉନ ସୁଗାର ଜବତ କରିଛି ।

ଅଭିଯୁକ୍ତ ଠାରୁ ଏକ ହ୍ୟୁଣ୍ଡାଇ ସାଣ୍ଟ୍ରୋ କାର୍ ସହ ଅନ୍ୟ ଅପରାଧିକ ସାମଗ୍ରୀ ଜବତ ହୋଇଛି । ପୂର୍ବରୁ ଏସଟିଏଫ୍ ୨ ବ୍ରାଉନସୁଗର ବେପାରୀଙ୍କୁ ଗିରଫ କରିଥିଲା । ସେମାନଙ୍କୁ ପଚରାଉଚରା ବେଳେ ଏସଟିଏଫ୍ ଡ୍ରଗ୍ସ କାରବାର ମୁଖ୍ୟ ସଲିମ୍ ବିଷୟରେ ଜାଣିବାକୁ ପାଇଥିଲା । ସେବେଠୁ ଏସଟିଏଫକୁ ଚକମା ଦେଇ ସଲିମ୍ ଗୌହାଟିରେ ଲୁଚି ଥିଲା । ସ୍ଥାନୀୟ ପୁଲିସ ସହାୟତାରେ ସଲିମକୁ ଗିରଫ ପରେ ଓଡ଼ିଶା ଟ୍ରାଞ୍ଜିଟ୍ ରିମାଣ୍ଡରେ ଆଣୁଛି ଏସଟିଫଏ । ଅଭିଯୁକ୍ତକୁ କଟକ ଜିଲ୍ଲା ଜଜରେ ହାଜର କରାଯିବ ।

ଭୁବନେଶ୍ବର: ଥମିବାର ନାଁ ନେଉ ନାହିଁ ବ୍ରାଉନସୁଗର କାରବାର। ହାତ ପାହାନ୍ତାରେ ନିଶାଦ୍ରବ୍ୟ ମିଳୁଥିବାରୁ ସହଜରେ କିଣି ସେବନ କରୁଛନ୍ତି ଲୋକେ। ପୁଣି ବିପୁଳ ପରିମାଣର ବ୍ରାଉନସୁଗର ଜବତ କରିଛି ଖେର୍ଦ୍ଧା କ୍ରାଇମ ବ୍ରାଞ୍ଚ ଏସଟିଏଫ୍ । ଜବତ ବ୍ରାଉନସୁଗରର ଆନୁମାନିକ ମୁଲ୍ୟ ୨ କୋଟି ହେବ ବୋଲି ଜଣାପଡ଼ିଛି। ଏଥିସହ ୨ ଅଭିଯୁକ୍ତକୁ ଗିରଫ କରିଛି ଏସଟିଏଫ । ଗିରଫଙ୍କ ମଧ୍ୟରୁ ଜଣେ ହତ୍ୟା ମାମଲାରେ ସଂପୃକ୍ତ ସୂଚନା ।

ଭୁବନେଶ୍ବର: ଥମିବାର ନାଁ ନେଉ ନାହିଁ ବ୍ରାଉନସୁଗର କାରବାର। ହାତ ପାହାନ୍ତାରେ ନିଶାଦ୍ରବ୍ୟ ମିଳୁଥିବାରୁ ସହଜରେ କିଣି ସେବନ କରୁଛନ୍ତି ଲୋକେ। ଚଳିତ ବର୍ଷର ସବୁଠୁ ବଡ଼ ପରିମାଣର ବ୍ରାଉନସୁଗାର ଜବତ କରିଛି ବାଲେଶ୍ବର ପୁଲିସ । ୧୦ କେଜିର ବ୍ରାଉନସୁଗାର ଜବତ କରିଛି ପୁଲିସ। ଯାହାର ଆନୁମାନିକ ମୂଲ୍ୟ ୧୧ କୋଟିରୁ ଅଧିକ ହେବ ବୋଲି ଜଣାପଡ଼ିିଛି। ଏଥିସହ ୬ ଜଣ ଧଳାଜହର ବ୍ୟବସାୟୀଙ୍କୁ ଗିରଫ କରାଯାଇଛି। ମୁଖ୍ୟ ଅଭିଯୁକ୍ତ ମଧ୍ୟପ୍ରଦେଶର ଆୟୁବ ବୋଲି ଜଣାପଡ଼ିଛି। ଏ ନେଇ ସୂଚନା ଦେଇଛନ୍ତି ପୂର୍ବାଞ୍ଚଳ ଆଇଜି ହିମାଂଶୁ ଲାଲ।  ଅନ୍ୟ ସହଯୋଗୀ ହେଲେ- ଲାଡେନ ଏସକେ ସଫିକ୍ , ଏସକେ ରାଜୁ, ବାବୁ, ରିଣ୍ଟୁ ଓ ରିତୁ ତରେଇ। ଉକ୍ତ ୫ ଅଭିଯୁକ୍ତ ସହଦେବଖୁଣ୍ଟା ଥାନା ଅନ୍ତର୍ଗତ ଅରଡ ବଜାରର ବୋଲି ଜଣାପଡିଛି।

ବାଲେଶ୍ୱର: ପୁଣି ଜବତ ହେଲା ଏକ କୋଟିରୁ ଉର୍ଦ୍ଧ୍ବ ଟଙ୍କାର ବ୍ରାଉନସୁଗର। ବାଲେଶ୍ୱର ରେଲୱେ ପ୍ଲାଟଫର୍ମ ନିକଟରୁ ୧ କେଜି ଓଜନର ବ୍ରାଉନସୁଗର କ୍ରାଇମବ୍ରାଞ୍ଚ ଏସଟିଏଫ ଟିମ ଜବତ କରିବା ସହ ଜଣକୁ ଗିରଫ କରିଛି। ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ ୧ କୋଟି ଟଙ୍କା ହେବ ବୋଲି ଜଣାପଡିଛି। ସଟିଏଫ ଟିମ ଗିରଫ ଅଭିଯୁକ୍ତକୁ ଜେରା ପାଇଁ କଟକ ନେଇଥିବା ଜଣାପଡ଼ିଛି।

ସୂଚନା ଅନୁଯାୟୀ, କୌଣସି ସୂତ୍ରରୁ ଖବର ପାଇ ଗତ ସୋମବାର ରାତି ଠାରୁ ଏସଟିଏଫ ଟିମ ବାଲେଶ୍ୱରକୁ ଆସି ଅଭିଯୁକ୍ତକୁ ଧରିବା ପାଇଁ ଜଗି ବସିଥିଲେ। ଏସଟିଏଫ ଟିମର ନେତୃତ୍ୱ ଜଣେ ଡ଼ିଏସପି ନେଇଥିବା ବେଳେ ୫ ଜଣ ଅଧିକାରୀ ଏହି ଟିମରେ ସାମିଲ ଥିଲେ। ତେବେ ପଶ୍ଚିମବଙ୍ଗ ମୁର୍ଷିଦାବାଦରୁ ବ୍ରାଉନସୁଗର ବାଲେଶ୍ୱର ସହରକୁ ଟ୍ରେନ ଯୋଗେ ଚାଲାଣ ହେଉ ଥିବା ସୂଚନା ପାଇ ଏସଟିଏଫ ଟିମ ପୂର୍ବରୁ ବାଲେଶ୍ୱର ରେଳ ଷ୍ଟେସନରେ ଜଗି ବସିଥିଲା।

ଏଠାରେ ସୂଚନା ଯୋଗ୍ୟ ଯେ, ପଶ୍ଚିମବଙ୍ଗରୁ ପ୍ରାୟ ପ୍ରତିଦିନ ଓଡ଼ିଶାର ବିଭିନ୍ନ ଜିଲ୍ଲାକୁ ଏହି ଧଳାଜହର ଚାଲାଣ ହେଉଛି। ମାତ୍ର ବାଲେଶ୍ୱର ଓ ଜଳେଶ୍ବର ବ୍ରାଉନସୁଗାର କଳା ବ୍ୟବସାୟର ହବ ପାଲଟିଛି।

ଜଳେଶ୍ବର: ପୁଣି ଜବତ ହେଲା ଏକ କୋଟିରୁ ଉର୍ଦ୍ଧ୍ବ ଟଙ୍କାର ବ୍ରାଉନସୁଗର । ଜଳେଶ୍ବର ଅବକାରୀ ବିଭାଗର ସ୍ୱତନ୍ତ୍ର ଟିମ କମର୍ଦା ଥାନା ଅଞ୍ଚଳରେ ଚଢ଼ାଉ କରି ବିପୁଳ ପରିମାଣର ବ୍ରାଉନସୁଗର ଜବତ କରିଛି। ପଶ୍ଚିମବଙ୍ଗରୁ ଓଡିଶା ଚାଲାଣ ବେଳେ ଏହି ବ୍ରାଉନସୁଗର ଜବତ ହୋଇଥିବା ଜଣାପଡ଼ିଛି।  ଏହାର ପରିମାଣ ଏକ କେଜି ରହିଛି। ଯାହାର ଆନୁମାନିକ ମୂଲ୍ୟ ୧ କୋଟିରୁ ଉର୍ଦ୍ଧ୍ବ ଟଙ୍କା ହେବ ବୋଲି ଆକଳନ କରାଯାଇଛି। ଏଥି ସହ ଦୁଇ ଜଣ ବ୍ରାଉନସୁଗର ବେପାରୀଙ୍କୁ ଗିରଫ କରାଯାଇଥିବା ସୂଚନା ।