ଭଦ୍ରକ ଜିଲ୍ଲା ଚାନ୍ଦବାଲି ସ୍ଥିତ ବୈତରଣୀ ନଦୀର ଗେମନ ବ୍ରିଜ୍ ଉପରୁ ଜଣେ ଯୁବକ ନଦୀକୁ ଡେଇଁ ପଡ଼ିଥିବା ସନ୍ଦେହ କରାଯାଉଛି। ବ୍ରିଜ୍ ଉପରେ ଯୁବକଙ୍କର ଜୋତା ଓ ମୋବାଇଲ୍ ପଡ଼ିଥିବା ବେଳେ ତାଙ୍କର କୌଣସି ପତ୍ତା ମିଳୁନାହିଁ। ନିଖୋଜ ଯୁବକ ଜଣକ ହେଲେ ରାଜକନିକା ଥାନା ଅନ୍ତର୍ଗତ ମଧୁପଡ଼ା ଗାଁର ଜୟରଥ ମଲ୍ଲିକ।

ଗତକାଲି ରାତିରୁ ଜୟରଥ ନିଖୋଜ ଥିଲେ। ପରିବାର ଲୋକେ ବହୁ ଖୋଜାଖୋଜି କରିବା ପରେ ମଧ୍ୟ ତାଙ୍କର କୌଣସି ସନ୍ଧାନ ପାଇନଥିଲେ। ତେବେ ଆଜି ସକାଳୁ ସ୍ଥାନୀୟ ଲୋକେ ଗେମନ ବ୍ରିଜ୍ ଉପରେ ତାଙ୍କର ମୋବାଇଲ୍ ଫୋନ୍ ଏବଂ ଜୋତା ପଡ଼ିଥିବାର ଦେଖିବାକୁ ପାଇଥିଲେ। ଏହାପରେ ଘଟଣା ସମ୍ପର୍କରେ ସ୍ଥାନୀୟ ପୋଲିସ ଓ ପ୍ରଶାସନକୁ ଖବର ଦିଆଯାଇଥିଲା।

ଯୁବକ ଜଣକ ନଦୀକୁ ଡେଇଁ ଆତ୍ମହତ୍ୟା କରିଛନ୍ତି ନା ଏହି ଘଟଣା ପଛରେ ଅନ୍ୟ କୌଣସି ରହସ୍ୟ ରହିଛି, ସେନେଇ ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ପ୍ରଶାସନ ଏବଂ ପୋଲିସ ମଧ୍ୟ ଘଟଣାର ପ୍ରକୃତ କାରଣ ଖୋଜିବାରେ ଲାଗିଛନ୍ତି। ଅନ୍ୟପଟେ ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନଦୀ ଭିତରେ ଖୋଜାଖୋଜି ଆରମ୍ଭ କରିଛି। ଏହି ଘଟଣାକୁ କେନ୍ଦ୍ର କରି ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି।

କେନ୍ଦ୍ରାପଡ଼ା: କେନ୍ଦ୍ରାପଡ଼ାରେ ଲଜ୍ଜ୍ୟା । ପୁଣି ଗୁରୁ ନାଁରେ ଆସିଲା କଳଙ୍କର ଅଭିଯୋଗ । ରାଜକନିକା ଥାନା ଅଞ୍ଚଳର ଏକ ଘରୋଇ ସ୍କୁଲ୍‌ରେ ସପ୍ତମ ଶ୍ରେଣୀ ଛାତ୍ରୀଙ୍କୁ ଗଣଦୁଷ୍କର୍ମ କରିଥିବା ନେଇ ଅଭିଯୋଗ ହୋଇଛି । ଅଭିଯୋଗ ଅନୁସାରେ, ଛାତ୍ରୀ ଜଣକ ସପ୍ତମ ଶ୍ରେଣୀରେ ପଢ଼ୁଥିବା ବେଳେ, ସ୍କୁଲର ୪ ଜଣ ଶିକ୍ଷକ ଦୀର୍ଘ ଦିନ ହେବ ବଳପୂର୍ବକ ଛାତ୍ରୀଙ୍କ ସହ ଶାରୀରିକ ସମ୍ପର୍କ ରଖିଆସୁଥିଲେ। ସ୍କୁଲର ଖେଳ ଛୁଟି ସମୟରେ ଛାତ ଉପରକୁ ଡାକି ନେଇ ଏଭଳି ଘୃଣ୍ୟ କାମ କରିଆସୁଥିଲେ ଶିକ୍ଷକ। ଏପରିକି ୪ ଜଣ ଶିକ୍ଷକଙ୍କୁ ସହଯୋଗ କରୁଥିଲେ ସ୍କୁଲର ଜଣେ ଶିକ୍ଷୟିତ୍ରୀ।

ଏଥିରେ ଅତିଷ୍ଠ ହୋଇ ଛାତ୍ରୀ ଜଣକ ମା'ଙ୍କ ଆଗରେ ସବୁ କଥା କହିଥିଲେ ।  ଛାତ୍ରୀଙ୍କ ବାପା ରାଜ୍ୟ ବାହାରେ ଚାକିରି କରୁଥିବାରୁ, ସେ ଘରକୁ ଫେରିବା ପରେ ଗତ ୧୮ ତାରିଖରେ ଶିଶୁ ମଙ୍ଗଳ କମିଟି (CWC) ରେ ଅଭିଯୋଗ କରିଥିଲେ । ଅଭିଯୋଗ ପରେ ଏକ ଚାରି ଜଣିଆ ଟିମ ପୀଡ଼ିତାଙ୍କ ଘରେ ପହଂଚିବା ପରେ ତାଙ୍କ ବୟାନ ରେକର୍ଡ କରିଛନ୍ତି । ଅନ୍ୟପଟେ ଏହି ଗୁରୁତର ଅଭିଯୋଗକୁ ଭିତ୍ତି କରି ପୋଲିସ ଆଜି ସକାଳୁ ଉକ୍ତ ସ୍କୁଲର ୪ ଜଣ ଶିକ୍ଷକଙ୍କୁ ଉଠାଇ ନେଇ ଥାନାରେ ଅଟକ ରଖିଛି ଏବଂ ସେମାନଙ୍କୁ ପଚରାଉଚରା ଜାରି ରଖିଛି । 

ବିଦେଶରେ କାମ କରିବାକୁ ଯାଇ ପୁଣି ଥରେ ଫସିଛନ୍ତି ଓଡ଼ିଆ ଶ୍ରମିକ। ଥାଇଲ୍ୟାଣ୍ଡର ଏକ ପ୍ଲାଇଉଡ୍ କମ୍ପାନୀରେ କାର୍ଯ୍ୟ କରୁଥିବା ୬ ଜଣ ଓଡ଼ିଆ ଶ୍ରମିକ ଏବେ ସେଠାରେ ଅତ୍ୟନ୍ତ ଦୟନୀୟ ଅବସ୍ଥାରେ ଥିବା ଜଣାପଡିଛି। ସେମାନଙ୍କ ମଧ୍ୟରୁ ୫ ଜଣ କେନ୍ଦ୍ରାପଡା ଜିଲ୍ଲା ରାଜକନିକା ଅଞ୍ଚଳର ହୋଇଥିବା ବେଳେ ଜଣେ ଭଦ୍ରକ ଜିଲ୍ଲା ଚାନ୍ଦବାଲି ଅଞ୍ଚଳର। ଗତ ୨୦୨୪ ଅଗଷ୍ଟ ମାସରେ ସେମାନେ ରୋଜଗାର ଆଶାରେ ଥାଇଲ୍ୟାଣ୍ଡ ଯାଇଥିଲେ।

ଏହି ଶ୍ରମିକମାନେ ଏକ ଭିଡିଓ ବାର୍ତ୍ତା ଜରିଆରେ ନିଜର ଦୁଃଖ ପ୍ରକାଶ କରିବା ସହ ରାଜ୍ୟ ସରକାରଙ୍କୁ ଉଦ୍ଧାର ପାଇଁ ଅନୁରୋଧ କରିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ, ଗତ ୪ ମାସ ହେବ କମ୍ପାନୀ ସେମାନଙ୍କୁ କୌଣସି ପାରିଶ୍ରମିକ ଦେଇନାହିଁ। ଦରମା ମାଗିଲେ ମାଲିକ ସେମାନଙ୍କୁ ଧମକ ଚମକ ଦେଉଛନ୍ତି। ଏମିତିକି ଗତ ୪ ଦିନ ହେବ ସେମାନଙ୍କୁ ଖାଇବାକୁ ମଧ୍ୟ ଦିଆଯାଉନାହିଁ। ଭୋକ ଉପାସରେ ଏହି ଶ୍ରମିକମାନେ ଏବେ ସେଠାରେ ଗୃହବନ୍ଦୀ ଭଳି ଜୀବନ କାଟୁଛନ୍ତି।

ବାରମ୍ବାର ସମାନ ଘଟଣା

ଏହା ପ୍ରଥମ ଥର ନୁହେଁ, ପୂର୍ବରୁ ମଧ୍ୟ କେନ୍ଦ୍ରାପଡା ଜିଲ୍ଲାର ଅନେକ ଶ୍ରମିକ ଥାଇଲ୍ୟାଣ୍ଡରେ ଫସି ରହିଥିବାର ଖବର ସାମ୍ନାକୁ ଆସିଛି। ୨୦୨୩ ମସିହାରେ ପ୍ରାୟ ୩୮ ଜଣ ଶ୍ରମିକ ଏବଂ ପରେ ୨୦୨୪ ଜୁଲାଇ ମାସରେ ଆଉ ୭ ଜଣ ଶ୍ରମିକ ସେଠାରେ ନିର୍ଯ୍ୟାତନାର ଶିକାର ହୋଇଥିବା ଅଭିଯୋଗ ହୋଇଥିଲା। ଅନେକ କ୍ଷେତ୍ରରେ ଦଲାଲମାନେ ଶ୍ରମିକଙ୍କୁ ଟୁରିଷ୍ଟ ଭିସାରେ ବିଦେଶ ପଠାଇ ଦେଉଛନ୍ତି, ଯାହା ପରବର୍ତ୍ତୀ ସମୟରେ ସେମାନଙ୍କ ପାଇଁ ବଡ଼ ସମସ୍ୟା ସୃଷ୍ଟି କରୁଛି। ଭିସା ଅବଧି ସରିବା ପରେ ପୁଲିସ୍ ଭୟରେ ଶ୍ରମିକମାନେ ଲୁଚି ରହିବାକୁ ବାଧ୍ୟ ହେଉଛନ୍ତି।

ଫେବୃଆରୀ ୨୦୨୬ - ୬ଜଣ

ଜୁଲାଇ ୨୦୨୪ - ୭ଜଣ

ଅକ୍ଟୋବର ୨୦୨୩ - ୩୮ଜଣ

ଏହି ଘଟଣା ସମ୍ପର୍କରେ ସୂଚନା ମିଳିବା ପରେ କେନ୍ଦ୍ରାପଡା ଜିଲ୍ଲା ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି। କେନ୍ଦ୍ରାପଡାର ଅତିରିକ୍ତ ଜିଲ୍ଲାପାଳ କହିଛନ୍ତି ଯେ, ଏହି ସମସ୍ୟା ସମ୍ପର୍କରେ ଜିଲ୍ଲା ଶ୍ରମ ଅଧିକାରୀଙ୍କୁ ଅବଗତ କରାଯାଇଛି। ଶ୍ରମିକମାନଙ୍କ ସମ୍ପର୍କରେ ସବିଶେଷ ତଥ୍ୟ ସଂଗ୍ରହ କରାଯାଇ ସେମାନଙ୍କୁ କିପରି ସୁରକ୍ଷିତ ଭାବେ ସ୍ୱଦେଶ ଫେରାଇ ଅଣାଯିବ, ସେ ନେଇ ରାଜ୍ୟ ସରକାରଙ୍କ ସହ ସମନ୍ୱୟ ରକ୍ଷା କରାଯାଉଛି।

ଭୁବନେଶ୍ଵର: କେନ୍ଦ୍ରାପଡ଼ା ଜିଲ୍ଲା ରାଜକନିକା ବ୍ଲକ ଶିକ୍ଷା ଅଧିକାରୀ (ବିଇଓ)ଙ୍କ କାର୍ଯ୍ୟାଳୟର ଆକାଉଣ୍ଟାଣ୍ଟ ମହମ୍ମଦ ଫିରୋଜ ଖାନ ଭିଜିଲାନ୍ସ ହାତରେ ଧରାପଡ଼ିଛନ୍ତି। ୨୦,୦୦୦ ଟଙ୍କା ଲାଞ୍ଚ ନେଉଥିବାବେଳେ ଆକାଉଣ୍ଟାଣ୍ଟ ଫିରୋଜ ଖାନଙ୍କୁ ଧରିଛି ଭିଜିଲାନ୍ସ। ସ୍କୁଲ ୟୁନିଫର୍ମ ପାଇଁ ସ୍ଵୟଂ ସହାୟକ ଗୋଷ୍ଠୀଠାରୁ ଲାଞ୍ଚ ନେଉଥିଲେ ଫିରୋଜ।

ଖବର ଅନୁଯାୟୀ ସେ ଜଣେ ଅଭିଯୋଗକାରୀଙ୍କଠାରୁ ୧.୯୩ ଲକ୍ଷ ଟଙ୍କାର ବିଲ୍ ପାସ୍ କରିବା ବଦଳରେ ଏବଂ ସରକାରଙ୍କ ନିୟମ ଓ ସର୍ତ୍ତାବଳୀ ଅନୁଯାୟୀ ରାଜକନିକା ବ୍ଲକର ସ୍କୁଲଗୁଡ଼ିକୁ ୟୁନିଫର୍ମ ଯୋଗାଇଥିବା ଏକ ସ୍ୱୟଂ ସହାୟକ ଗୋଷ୍ଠୀର ବାକି ରାଶି ପ୍ରଦାନ କରିବା ପାଇଁ ୨୦ ହଜାର ଟଙ୍କା ଲାଞ୍ଚ ନେଉଥିଲେ। ଏହି ସମୟରେ ଆକାଉଣ୍ଟାଣ୍ଟ ଫିରୋଜ ଖାନ ରେଡ ହ୍ୟାଣ୍ଡ ଧରାପଡିଛନ୍ତି।

ଓଳାଭର: ରାଜକନିକା କଣ୍ଡିଆ ପୂର୍ତ୍ତବିଭାଗ ରାସ୍ତାର ସିହୋପଡା -ବରିପଡା ମଝି ରାସ୍ତାରେ ଆଜି ବାଇକ୍ ଆଉ ସ୍କୁଟି ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ବାଇକ୍ ରେ ବସିଥିବା ଦୁଇ ଆରୋହୀ ମୃତ୍ୟୁବରଣ କରିଥିବା ବେଳେ ସ୍କୁଟି ଆରୋହୀ ଜଣକ ବି ଗୁରୁତର ହୋଇଛନ୍ତି। ରାଜକନିକା ପୁଲିସ୍ ଘଟଣାସ୍ଥଳରେ ପହଞ୍ଚି ଆମ୍ବୁଲାନ୍ସ ଯୋଗେ ମୃତକଙ୍କୁ ରାଜକନିକା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ପଠାଇ ତଦନ୍ତ ଆରମ୍ଭ କରିଛି।ଜମିରେ ଧାନ କାଟୁ ଥିବା ଚାଷୀ ଆଉ ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ ସ୍ଥାନୀୟ କଇଥାପାଳ ଗ୍ରାମର ଖଗେଶ୍ୱର(୫୮) ନାୟକ ଆଉ ରମେଶ ନାୟକ(୫୮) ବଜାଜ ସିଟି ୧୦୦ (OR02 AE ୮୨୫୮୦) ଯୋଗେ ସିହୋପଡା ପଟରୁ ଘରକୁ ଫେରୁଥିବା ବେଳେ ଅପର ପଟୁ ଅର୍ଥାତ୍ ବରିପଡା ଆଡୁ ଓଳାଭର ଯାଉଥିବା ସୁଶାନ୍ତ ବିନ୍ଧାଣୀ(୪୮) ସ୍କୁଟି (OD 29 K ୬୦୪୦) କୁ ମୁହାଁ ମୁହିଁ ଚାଷଜମି ପାଖରେ ଥିବା ଏକ ବୁଲାଣିରେ ଧକ୍କା ଦେଇଥିଲା। ଫଳରେ ଧକ୍କା ଏତେ ଜୋରରେ ହୋଇ ଥିଲା ଯେ ସ୍କୁଟି ଆରୋହୀ ରାସ୍ତା କଡକୁ ଛିଟିକି ପଡି ଗୁରୁତର ହୋଇଛନ୍ତି।

ବାଇକ୍ ଆରୋହୀ ଜଣଙ୍କ ପଛ ପଟମୁଣ୍ଡ ପିଟି ହେବା ସହ ଆଉ ଜଣଙ୍କର ମୁହଁରେ ଗଭୀର ଆଘାତ ଲାଗିଥିଲା। ପ୍ରବଳ ବେଗରେ ରକ୍ତସ୍ରାବ ହୋଇ ଥିବା ବେଳେ ରାସ୍ତାଟି ରକ୍ତରେ ଜୁଡୁବୁଡୁ ହୋଇ ଯାଇଥିଲା। ଆମ୍ବୁଲାନ୍ସ ପହଞ୍ଚି ସେମାନଙ୍କୁ ରାଜକନିକା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେବା ବେଳେ କିନ୍ତୁ ବାଇକ୍ ଆରୋହୀ ଦୁଇଜଣଙ୍କ ମୃତ୍ୟୁ ହୋଇଥିବା ନେଇ ସୂଚନା ମିଳୁଛି । ତେବେ ସ୍କୁଟି ଆରୋହୀ ଗୁରୁତର ହେବା ସହିତ ତାଙ୍କ ଗୋଡ଼ ଭାଙ୍ଗି ଯାଇଥିବାରୁ ତାଙ୍କୁ ମଧ୍ୟ ମେଡିକାଲ ନିଆ ଯାଇଛି ।ରାଜକନିକା ପୁଲିସ ଘଟଣାସ୍ଥଳରେ ପହଞ୍ଚି ଦୁଇଟି ଗାଡ଼ିକୁ ଜବତ୍ କରି ଥାନାକୁ ନେଇଥିବାର ଜଣାପଡ଼ିଛି। ସୂଚନାଯୋଗ୍ୟ ଯେ ଚାରିମାସ ତଳେ ମଧ୍ୟ ଏହି ରାସ୍ତାରେ ଦୁଇ ଯୁବକ ଗାଡି ଧକ୍କାରେ ପ୍ରାଣ ହରାଇଥିବା ବେଳେ ଗତବର୍ଷ ବି ଏହି ରାସ୍ତାର ପେଗରପଡା ଠାରେ ମଧ୍ୟ ବେପରୁଆ ଗାଡି ଚାଳନା ଯୋଗୁଁ ଦୁଇଜଣଙ୍କ ଜୀବନ ଯାଇଛି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ମୃତ ଦୁଇ ଜଣ ହେଲମେଟ ପିନ୍ଧିଥିଲେ ହୁଏତ ଆଜି ଏଭଳି ଅଘଟଣ ଘଟି ନଥାନ୍ତା ବୋଲି ଆଲୋଚନା ହେଉଛି । ତେବେ ରାଜକନିକା ପୁଲିସ ଦୁଇ ମୃତ ଦେହକୁ ପଞ୍ଚନାମା ନିମନ୍ତେ ଆଳିକୁ ପଠାଇ ଥିବାର ଜଣା ପଡ଼ିଛି । ଦୁଇ ଜଣଙ୍କର ମୃତ୍ୟୁ ପରେ କୈଥାପାଳରେ ଶୋକର ଛାୟା ଖେଳି ଯାଇଛି।

ରାଜକନିକା : କନିକା ଇଲାକା ପରିଚିିତ ହେବା ଦିନଠୁ ଇଶ୍ୱରୀୟ ବିଶ୍ୱାସ ଅଧାରରେ ଜଣେ ଦେବୀଙ୍କ ସହ ମାନବର ବିବାହ ଭଳି ଆଲୋକିତ ପାରମ୍ପରିକ ମହୋତ୍ସବ ପାଳନ ହେବା ସହ ସମ୍ପୃକ୍ତ ଅଞ୍ଚଳରେ ମାଙ୍ଗଳିକ ମୁହୁର୍ତ୍ତର ଶୁଭାରମ୍ଭ ହେବା ଭଳି ନିଷ୍ଠାପର ଧାର୍ମିକ ମାନସିକତା ଯୋଗୁ ଏହି ବିବାହ ଏଠାରେ ଏକ ଗଣପର୍ବର ମାନ୍ୟତା ପାଇଛି । ଶୁଣିବାକୁ ଆଶ୍ଚର୍ଯ୍ୟ ଲାଗୁଥିବା ଏଭଳି ଏକ ପାରମ୍ପରିକ ବିବାହୋତ୍ସବ ଅଧୁନା ରାଜକନିକାର ଅନ୍ୟତମ ଶକ୍ତିପୀଠ ଜୟନଗର ପଞ୍ଚାୟତର ବଜରପୁରର ଅଧିଷ୍ଠାତ୍ରୀ ଦେବୀ ମା ବାସୁଳୀଙ୍କର ବିବାହକୁ ନେଇ ଖୁବ ଉତ୍ସାହ ଭରିଦେଇଛି ।

ବୈଦିକ ରୀତିନୀତିର ପାରମ୍ପରିକ ବିବାହ ଉତ୍ସବର ସମସ୍ତ ଖସଡା ରୀତିନୀତିରେ ଆଜି ରାତିରେ ଏହି ପୀଠର ଦେବୀଙ୍କ ସହ ରିଘାଗଡର କୁମ୍ଭାର ରାଜା ପୁତ୍ରଙ୍କ ବିବାହ କରାଇବାକୁ ବ୍ୟାପକ ପ୍ରସ୍ତୁତି ଶେଷ ହୋଇଛି । ପ୍ରତିବର୍ଷ ମାଘ ମାସର ପୁନେଇ ରାତିରେ ଅନୁଷ୍ଠିତ ହୋଇ ଆସୁିଥିବା ମାଙ୍କ ବିବାହୋତ୍ସବ ଏହି ଅଂଚଳର ଜନମାନସରେ ଏକ ସାଂସ୍କୃତିକ ଭାବଧାରାର ପରିଚୟ ଦେଇ ଆସୁଥିବା ବେଳେ ଏହି ବିବାହ ନ ସରିବା ଯାଏ ସଂପୃକ୍ତ ୨୨ ଖଣ୍ଡ ମୌଜାର ଅଧିବାସୀ ମାନେ କୌଣସି ମାଙ୍ଗଳିକ କାର୍ଯ୍ୟ(ଯଥା ବିବାହ,ବ୍ରତ,ଗୃହପ୍ରବେଶ,ବିବାହ ଲଗ୍ନ ସ୍ଥିର,କୌଣସି ପୂଜାପାଠ)ନ କରିବା ମା ଙ୍କ ପ୍ରତି ସମର୍ପଣର ମାନସିକତାକୁ ସୂଚାଇ ଦେଇଛି । ତେବେ କିମ୍ବଦନ୍ତୀ ଅନୁ୍‌ଯାୟୀ ଏକଦା ଭଞ୍ଜବଂଶର ଶାସନରେ ରହିଥିବା ତତ୍‌କାଳୀନ କନିକା ଇଷ୍ଟେଟର ରାଜଧାନୀ ଥିବା ବଜରଗଡ(ଅଧୁନା ବଜରପୁର) ରାଜବଂଶର ଈଷ୍ଟଦେବୀ ଭାବେ ମା ବାସୁଳୀ ପୂଜିତା ହୋଇ ଆସୁଥିଲେ ।

ସେ ସମୟରେ ନଦୀ ମଧ୍ୟରେ ଯାତାୟତର ଏକମାତ୍ର ସାଧନ ଥିବାରୁ ବ୍ରାହ୍ମଣୀ-ବୈତରଣୀ ନଦୀର ସଂଯୋଗସ୍ଥଳ ବଜରଗଡକୁ ରାଜଧାନୀ ଭାବେ କରି ଜଳପଥକୁ ଯୋଗାଯୋଗର ମାଧ୍ୟମ ଭାବେ ବ୍ୟବହାର କରାଯାଉଥିଲା । ନଦୀ ପରିବେଷ୍ଟିତ ଥିବା ଏହି ଭୂଖଣ୍ଡରେ ଘଞ୍ଚ ଜଙ୍ଗଲ ଥିବାରୁ ମା ନିଜେ ଅପରୂପା ଯୁବତୀ ବେଶରେ ସାଂଧ୍ୟ ଭ୍ରମଣରେ ବିହାର କରୁଥିବା ବେଳେ ନଦୀ ଆରପାରିର ରାଜୁତି କରୁଥିବା ରିଘାଗଡର କୁମ୍ଭାର ରାଜବଂଶର ରାଜା ବଳି ଓ ତାଙ୍କ ଭାଇ କନିକା ପଟକୁ ପାରିଧିରେ ଆସି ମାଙ୍କ ରୂପରେ ଆକୃଷ୍ଟ ହୋଇ ତାଙ୍କୁ ବିବାହ କରିବାକୁ ମନ ବଳାଇଥିଲେ ।

ତେବେ ମା ନିଜ ପରିଚୟ ଦେଇ ନିଜେ ଦେବୀ ହୋଇଥିବାରୁ ଏଭଳି ବିବାହକୁ ବାରଣ କରିଥିଲେ । ମାତ୍ର ରାଜା ଅବୁଝା ନ୍ୟାୟରେ ରାଜା ବଳି ନିଜ ଜିଦରେ ବିବାହ କରିବାକୁ ଅଟଳ ରହିବାରୁ ମା ବିବାହ ପାଇଁ ସମ୍ମତି ଜଣାଇ ଏକ ଅଭିିନବ ସର୍ତ ରଖିଥିଲେ । ସର୍ତ ଅନୁସାରେ ବିବାହ ସଂପନ୍ନ ହୋଇଥିଲେ ମଧ୍ୟ ବାସର ରାତିରେ ବଳି ମାଙ୍କୁ ସ୍ପର୍ଶ କରିବା ମାତ୍ରକେ ଭଷ୍ମ ହୋଇ ଯାଇଥିଲେ । ହେଲେ ଏଭଳି ଏକ କଥିତ ମାଙ୍ଗଳିକ ଭାବଧାରାରେ ବନ୍ଧା ହୋଇ ଆସିଥିବା ସେହି ଇଲାକାର ୨୨ ଖଣ୍ଡ ମୌଜାର ଅଧିବାସୀ ଆଜି ଯାଏ ପରମ୍ପରା କ୍ରମରେ ପ୍ରତିବର୍ଷ ମାଘ ପୂର୍ଣ୍ଣମୀରେ ରିଘାଗଡର କୁମ୍ଭାର ରାଜବଂଶର ପ୍ରତୀକ ରାଜପୁତ୍ରକୁ ବରବେଶରେ ବାଣ ରୋଷଣି ସହ ବରଯାତ୍ରୀଙ୍କ ମେଳରେ ଆଣି ମା ଙ୍କ ପୀଠରେ ସଂପୂର୍ଣ୍ଣ ବୈଦିକ ରୀତିରେ ବିବାହ ସଂପନ୍ନ କରାଇ ଏ ସାଂସ୍କୃତିକ ଚେତନାକୁ ଋଦ୍ଧିମନ୍ତ କରି ଆସିଛନ୍ତି ।

ବର ପିତା ଭାବରେ କୁମ୍ଭାର ରାଜବଂଶର ଜନୈିକ ପ୍ରତିନିଧି ଦୁଇ ରାଜପୁତ୍ରଙ୍କ ମାଟିର ପ୍ରତିକୃତିକୁ ଆଣି ବିବାହ ବେଦୀରେ ଉପସ୍ଥିତ ରହି ଦାୟିତ୍ୱ ତୁଲାଇ ଥିବା ବେଳେ କନ୍ୟାପିତା ଭାବରେ ମାଙ୍କ ପୂଜକ କନ୍ୟାଦାନ କରିଥାନ୍ତି । ପଶ୍ଚିମ ଓଡିଶାର ଗଣପର୍ବ ଶୀତଳଷଷ୍ଠୀର ଶିବ ପାର୍ବତୀ ବିବାହ ସହ ସାମଂଜସ୍ୟ ରଖିଥିବା କନିକାର ବଳି-ବାସୁଳୀ ବିବାହ ମଧ୍ୟ ଏହି ଇଲାକା ପାଇଁ ଆକର୍ଷଣ ପାଲଟିଥିବାରୁ ମାଙ୍କ ପୀଠ ଚଳଚଂଚଳ ରହିଛି । ଆଜି ସଂଧ୍ୟାରେ ରିଘାଗଡ ଘାଟ ପାର ହୋଇ କୁମ୍ଭାର ରାଜବଂଶର ପ୍ରତୀକ ବରକୁ ବିବାହ ବେଦୀକୁ ପ୍ରୋସେସନରେ ଅଣାଯିବା ପରେ ମାଙ୍କ ପୀଠରେ ବିବାହ ସଂପନ୍ନ କରାଯିବାର କାର୍ଯ୍ୟକ୍ରମ ଥିବାରୁ ଜନଗହଳି ବଢି ଯାଇଛି । କନିକା ରାଜ ପରିବାର ପକ୍ଷରୁ ବଳି-ବାସୁଳୀ ବିବାହୋତ୍ସବ ପାଇଁ ସମସ୍ତ ବନ୍ଦୋବସ୍ତ କରାଯାଇ ଥିବା ବେଳେ ଅଂଚଳବାସୀଙ୍କ ସକ୍ରିୟ ଅଂଶଗ୍ରହଣ ପୀଠକୁ ପ୍ରାଣବନ୍ତ କରି ରଖିଛି । ତେବେ ବିବାହର ୩ ଦିନ ପରେ ଏହି ପୀଠକୁ ସମସ୍ତଙ୍କୁ ଯିବାକୁ ବାରଣ ଥିବାରୁ ଆଜିର ବିବାହ ବେଶ ଉତ୍ସାହ ଭରିଦେଇଛି ।

ରାଜକନିକା : ରାଜକନିକା ଗ୍ରାମ୍ୟ ନିର୍ମାଣ ଉପଖଣ୍ଡ ଅଧୀନ ନହୁଲିଆ  ଆୟତନ ରାସ୍ତାର ଆୟତନ ସ୍କୁଲ ସଂଲଗ୍ନ ରାସ୍ତାରେ ଦୀର୍ଘଦିନ ଧରି ବର୍ଷାପାଣି ଜମିବା ଘଟଣାରେ ଆନ୍ଦୋଳନକୁ ଛାତ୍ରଛାତ୍ରୀ ଓହ୍ଲାଇବା ପରେ ପ୍ରଶାସନ ପ୍ରତିଶୃତି ଦେଇ ପାଣି ନିଷ୍କାସନର ବ୍ୟବସ୍ଥା କରିବାକୁ କହିଥିଲେ ବି ଅବସ୍ଥାରେ କିଛି ବି ପରିବର୍ତନ ହୋଇନାହିଁ । ସୂଚନା ମୁତାବକ ଆଣ୍ଠୁଏ ପାଣିରେ ଯାତାୟତ କରୁଥିବା ଅବସ୍ଥାକୁ ଦୂର କରି ଆରଡ଼ି ବିଭାଗ ରାସ୍ତାର ମର୍ଯ୍ୟାଦା ରକ୍ଷା କରିବାକୁ ଗତ ମାସ ୨୯ ତାରିଖରେ ଆୟତନ ଗ୍ରାମବାସୀ ଆନ୍ଦୋଳନ କରି ରାସ୍ତାରୋକ କରିଥିଲେ। ୬ ଘଣ୍ଟା ଧରି ରାସ୍ତାରୋକ କରିବା ସହ ସ୍କୁଲର ଛାତ୍ରଛାତ୍ରୀ ମଧ୍ୟ ସାମିଲ ଥିବା ଏହି ଆନ୍ଦୋଳନକୁ ପାଣି ନିଷ୍କାସନର ବ୍ୟବସ୍ଥା କରିବାକୁ ଦିଆଯାଇଥିବା ବେଳେ ଆଜି ବି ସେହି ସ୍ଥାନରେ ବର୍ଷାପାଣି ଲହଡି ଭାଙ୍ଗୁଛି।

ପୂର୍ବ କନିକାର ଲାଇଫଲାଇନ କୁହାଯାଉଥିବା ଆରଡ଼ି ବିଭାଗର ଏହି ରାସ୍ତାରୁ ପାଣି ହଟାଇବାକୁ ଆନ୍ଦୋଳନ ପରେ ଏହି ସ୍ଥାନରେ ଏକ କଂକ୍ରିଟ ରାସ୍ତାକୁ ଭାଙ୍ଗି ପାଇପ ପୋତି ଦେଇ ଛାଡି ଦେଇଥିବାରୁ ଗତ ୪ଦିନ ମଧ୍ୟରେ ଏହି ସ୍ଥାନରେ ଛୋଟ ବଡ଼ ବହୁ ଦୁର୍ଘଟଣା ଘଟିବାରେ ଲାଗିଛି । ଆନ୍ତରିକତା ନ ଥିବା ଭଳି ଆଚରଣ କରି ଆସିଥିବା ଆରଡ଼ି ବିଭାଗ ନିଦାବିଷ୍ଣୁ ଭାବରେ ଏଭଳି ଏକ ସମ୍ବେଦନଶିଳ ପ୍ରସଙ୍ଗକୁ ଏଡାଇ ଚୁପ ରହିବା ପୁଣି ଥରେ ପାଣି ନିଷ୍କାସନ ପାଇଁ ଆଉ ଏକ ଆନ୍ଦୋଳନ କରିବାକୁ ଗ୍ରାମବାସୀ ଚେତାବନୀ ଦେଇଛନ୍ତି । ବିଦ୍ୟାଳୟରେ ଅଧ୍ୟୟନ କରୁଥିବା ଛାତ୍ର ଛାତ୍ରୀ ହୁଅନ୍ତୁ କି ଦୈନଦିନ ଯାତାୟତ କରୁଥିବା ସମସ୍ତ ବ୍ୟକ୍ତି ହଇରାଣ ହେଉଥିବା ବେଳେ ଗ୍ରାମ୍ୟ ନିର୍ମାଣ ବିଭାଗ ତତ୍ପର ନ ହେବା ଆଶ୍ଚର୍ଯ୍ୟ ଚକିତ କରିଛି । ରାଜକନିକା ଗ୍ରାମ୍ୟ ନିର୍ମାଣ ଉପଖଣ୍ଡର ସାମଗ୍ରୀକ ଦାୟିତ୍ୱହୀନତାକୁ ଦାୟୀ କରି ଆୟତନର ସ୍କୁଲ ନିକଟରେ ଜମି ରହିଥିବା ବର୍ଷାପାଣିକୁ ତୁରନ୍ତ ନିଷ୍କାସନ କରିବାକୁ ଦାବୀ ହୋଇଛି ।

ସେହିଭଳି ଓଳାଭର ଅଞ୍ଚଳ ବଳରାମପୁର ପଞ୍ଚାୟତ ଅନ୍ତର୍ଗତ ଇଚ୍ଛାପୁର ଗ୍ରାମରେ ବର୍ଷା ଜଳମଗ୍ନର ଦୃଶ୍ୟ । ବର୍ଷା ଯୋଗୁଁ ଇଚ୍ଛାପୁର, ଗୋବିନ୍ଦପୁର, ସାତଘରିଆ ଗ୍ରାମର ଶତାଧିକ ପରିବାର ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି କ୍ଷ ତେବେ ଗତ ଗୁରୁବାର ଗ୍ରାମବାସୀ ମନ୍ତ୍ରୀଙ୍କୁ ଭେଟିବାରୁ ସେ ଖୁବ ଶୀଘ୍ର ଏହାର ସମାଧାନ କରିବେ ବୋଲି ପ୍ରତିଶୃତି ଦେଇଛନ୍ତି ।

ଓଳାଭର : ବିବାହର ପବିତ୍ର ବେଦିରେ ହୋମ ନିଆଁକୁ ସାକ୍ଷୀ ରଖି ଗୋଟେ ଜନମ ପାଇଁ ନୁହେଁ, ସାତ ଜନମ ପାଇଁ ଏକାଠି ରହିବାର ପଣ କରିଥାଆନ୍ତି ପତିପତ୍ନୀ । ହେଲେ ଯେତେବେଳେ ସେ ପ୍ରତିଶୃତିରେ ଫାଟ ଦେଖାଦିଏ,ଚାହୁଁ ଚାହୁଁ ସମ୍ପର୍କଟା ମିଛ ବୋଲି ପ୍ରମାଣିତ ହୋଇପଡେ ଏଭଳି ଏକ ପ୍ରାସଙ୍ଗିକତା ବହନ କରୁଥିବା ଘଟଣାଟି ଘଟିଛି ରାଜକନିକା ଥାନା ଭାମଣ୍ଡା ଗ୍ରାମରେ। ମୃତ ସ୍ୱାମୀର ଜୂଇ ଜଳୁଥିବା ଅଵସ୍ଥାରେ ନିଜ ପ୍ରେମିକର ହାତ ଧରି ସ୍ତ୍ରୀ ଫେରାର ହୋଇଯିବା ଭଳି ଅମାନବୀୟ ଘଟଣା ସ୍ଥାନୀୟ ଅଞ୍ଚଳରେ ଏବେ ଚର୍ଚ୍ଚାର ବିଷୟ ପାଲଟିଛି।

ମିଳିଥିବା ସୂଚନାଅନୁସାରେ ରାଜକନିକା ଥାନା ଭାମଣ୍ଡା ଗ୍ରାମ ନୃସିଂହ ନାଥ ମନ୍ଦିରର ପୂଜକ ରଙ୍ଗାଧର ଦାଶ ଯିଏକି ଗତ ୧୭ ତାରିଖରୁ କେଉଁଆଡେ ନିଖୋଜ ହେବା ନେଇ ରାଜକନିକା ଥାନାରେ ଅଭିଯୋଗ ହୋଇଥିଲା। ଏନେଇ ପ୍ରଥମେ ରଙ୍ଗାଧର ଦାଶଙ୍କ ସ୍ତ୍ରୀ ରତ୍ନମଣି ଥାନାରେ ଅଭିଯୋଗ କରିଥିଲେ। ଏହାପରେ ରାଜକନିକା ଥାନାରେ ପୁଣିଏକ ଅଭିଯୋଗ କରିଥିଲେ ନିଖୋଜ ରଙ୍ଗାଧରଙ୍କ ଭାଇ ଗଙ୍ଗାଧର। ସେ ତାଙ୍କ ଅଭିଯୋଗରେ ଦର୍ଶାଇଥିଲେ ଯେ ତାଙ୍କ ଭାଇ ସହ ପତ୍ନୀ ରତ୍ନମଣୀର ସବୁବେଳେ ଝଗଡା ଲାଗି ରହୁଥିଲା।ପାରିପାରିକ ଏହି ଝଗଡା ସେଇ ଗ୍ରାମର ଏକ ଯୁବକ ଓ ରତ୍ନମଣିଙ୍କ ଅବୈଧ ସମ୍ପର୍କକୁ ନେଇ ସବୁ ବେଳେ ରଙ୍ଗାଧର ମନସ୍ତାପରେ ରହୁଥିଲେ।ଏମିତିକି ଗତ ୧୭ ତାରିଖ ରଙ୍ଗାଧରଙ୍କ ନିଖୋଜ ପଛରେ ଏମାନଙ୍କ ହାତ ଥିବା ନେଇ ସେ ସନ୍ଦେହ ପ୍ରକଟ କରିଥିଲେ।

ଗତକାଲି ଭାମଣ୍ଡା ଗ୍ରାମ ପାଖ ଏକ ନାଳରୁ ମିଳିଥିଲା ଏକ ଗଳିତ ଶବ। ଶବଟି ରଙ୍ଗାଧରଙ୍କର ବୋଲି ମଧ୍ୟ ଚିହ୍ନଟ ପରେ କ୍ରମଶଃ ତାଙ୍କ ଭାଇ ଗଙ୍ଗାଧର କରୁଥିବା ସନ୍ଦେହ ଘନିଭୂତ ହୋଇଥିଲା। ମୃତ ଦେହରେ ବିଭିନ୍ନ କ୍ଷତ ଥିବା ସହ ମୁଣ୍ଡ ରେ ମଧ୍ୟ ଗଭୀର କ୍ଷତ ଥିଲା ବୋଲି ପ୍ରତ୍ୟକ୍ଷଦର୍ଶୀ କହିଛନ୍ତି। ଶବବିଳିବା ପରେ ରାଜକନିକା ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଥିଲା। ଏହାପରେ ରାଜକନିକା ପୁଲିସ ପକ୍ଷରୁ ଶଵ ବ୍ୟବଚ୍ଛେଦ କରାଯାଇ ଗତକାଲି ଅପରାହ୍ନରେ ପରିବାରକୁ ଦିଆଯାଇଥିଲା।

ପରିବାର ଲୋକ ଗତକାଲି ରଙ୍ଗାଧରଙ୍କ ଅନ୍ତେଷ୍ଟି କାର୍ଯ୍ୟ କରିଥିଲେ। ହେଲେ ତାଜୁବ କରିବା ଭଳି କଥାଟି ହେଉଛି ଯେଉଁ ସ୍ତ୍ରୀ ସ୍ୱାମୀର ଏଭଳି ମୃତାହତ ହେବା ବେଳେ ଦୁଃଖରେ ମ୍ରିୟମାଣ ହେବା କଥା ତାହା ତାଙ୍କ ପାଖେ ଦେଖିବାକୁ ମିଳିନଥିଲା  ମଶାଣୀକୁ ଶବ କୋକେଇ ଯୋଗେ ବୁହା ହେଲା।ଜୂଇରେ ବି ନିଆଁ ଲାଗିଲା। ହେଲେ ସାତଜନମକୁ ସାଥି ହୋଇ ଥିବା ପତ୍ନୀ ଜଣକ କିନ୍ତୁ ମୁହଁ ମୋଡି ଚାଲିଗଲା ପ୍ରେମିକ ସହ। ଯାହାକି ପରକୀୟା ପ୍ରୀତି ନେଇ ଉଠିଥିବା କଥାଟି ଏଠାରେ ସତ୍ୟ ବୋଲି ବିବେଚିତ ହୋଇଛି। ସ୍ୱାମୀର ଜୂଇ ଲିଭି ନ ଥିଲା,ଏପାଖରେ ହାତରୁ ଶଂଖା ଖୋଲି ସ୍ତ୍ରୀ ନିଜ ପ୍ରେମିକ ସହ ଫେରାର ହୋଇଯିବା ବୋଧହୁଏ ବିରଳ ଉଦାହରଣ ବୋଲି ଆଲୋଚନା ହେଉଛି।

ଉଳ୍ଲେଖଯୋଗ୍ୟ ରଙ୍ଗାଧର ଓ  ରତ୍ନମଣିଙ୍କର ଏବେ ଦୁଇ ଝିଅ,ଦୁଇ ପୁଅ ରହିଛନ୍ତି। ଦୁଇ ଝିଅ ନିଜ ପ୍ରତିକ୍ରିୟାରେ ଆମ ମାଆ ଅନ୍ୟ ଲୋକ ସହିତ ଖରାପ ସମ୍ପର୍କ ରଖି ଆମ ବାପାକୁ ମାରିଦେଲେ ବୋଲି କହିବା ସହ ଏମିତି ମାଆ କାହାକୁ ନ ମିଳୁ। ଏଭଳି ମାଆଙ୍କୁ ଆମେ ଚାହୁଁନା ବୋଲି କାନ୍ଦ କାନ୍ଦ ହୋଇ କହିଥିଲେ। ଅନ୍ୟପଟେ ରତ୍ନମଣିଙ୍କ ପ୍ରେମିକ ବି ରୋକଠୋକ୍ ଚାରିବର୍ଷ ହେବ ରତ୍ନମଣିଙ୍କ ସହ ସମ୍ପର୍କ ଥିବା ନେଇ କହିଥିଲେ।ଏମିତିକି ଏକଥା ରଙ୍ଗାଧର ବି ଏହାକୁ ଜାଣିଥିଲେ ବୋଲି ମଧ୍ୟ କହିଥିଲେ।ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେତେବେଳେ ଏସବୁ ଘଟଣାରେ ରତ୍ନମଣିଙ୍କ ପ୍ରତିକ୍ରିୟା ନେଇଥିଲୁ ସେ ବି ସ୍ପଷ୍ଟ ଭାବେ ଅନ୍ୟ ସେହି ବିବାହିତ ଯୁବକଙ୍କ ସହ ଅବୈଧ ମିଳାମିଶା ଅଛି ବୋଲି ମାନିଥିଲେ।ଏମିତିକି ସ୍ୱାମୀ ଗଲାପରେ ବିଧବା ହୋଇ ଶାଶୁଘରେ ପିଲାମାନଙ୍କ ସହ ରହିବ କି ନାହିଁ ପଚାରିଲା ପରେ ପିଲାମାନେ ତାଙ୍କୁ ରଖାଇ ଦେବେ ନାହିଁ।ସେଥିପାଇଁ ପ୍ରେମିକ ସହ ରହିବାକୁ ପସନ୍ଦ କରିବେ ବୋଲି କହିଥିଲେ।

ଅନ୍ୟପଟେ ଏ ଘଟଣାକୁ ନେଇ ଭାମଣ୍ଡା ଗ୍ରାମରେ ତିବ୍ର ପ୍ରତିକ୍ରିୟା ପ୍ରକାଶ ପାଇଛି। ଲୁଚାଛପାରେ ଦୁହିଂଙ୍କର ଅବୈଧ ପ୍ରେମ ବେଶ୍ ବହୁ ବର୍ଷ ଧରି ଚାଲିଥିବା କଥା ଚର୍ଚ୍ଚା ହୋଇଛି। ପ୍ରେମିକ ବି ଏହାକୁ ନେଇ ଚେତାବନୀ ଦେବା ପରେ ଆଜି ତାହା ସତ ହୋଇଛି। ରତ୍ନମଣି ଓ ତାଙ୍କ ପ୍ରେମିକ ଜାଣିଶୁଣି ରଙ୍ଗାଧରକୁ ବେକ ଚିପିବା ସହ ମୁଣ୍ଡରେ ଲୁହାରଡରେ ପିଟି ପିଟି ହତ୍ୟା କରିଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏଯାଏ ବି ଏମାନଙ୍କ ବିରୋଧରେ ଥାନାରେ ଅଭିଯୋଗ ସେମିତି ହୋଇ ନ ଥିବା ବେଳେ ମୃତ ରଙ୍ଗାଧରଙ୍କ ଭାଇ ଗଙ୍ଗାଧର କରିଥିବା ଅଭିଯୋଗର ସତ୍ୟତା ବେଶ୍ ପ୍ରାସଙ୍ଗିକ ମନେହୁଏ। ଅପରପକ୍ଷରେ ରତ୍ନମଣି ସ୍ୱାମୀର ଜୂଇ ଜଳୁଥିବା ବେଳେ ପ୍ରେମିକର ହାତ ଧରି ଫେରାର ହୋଇଯିବା ଓ ଗ୍ରାମବାସୀଙ୍କ ଅଭିଯୋଗ ନିଶ୍ଚିତ ଭାବେ ସୁପରିକଳ୍ପିତ ହତ୍ୟାକାଣ୍ଡ ଆଡେ ଇଙ୍ଗିତ କରୁଛି ।

କେନ୍ଦ୍ରାପଡା: ଜଣେ ଯୁବତୀଙ୍କୁ ପ୍ରେମ ନିବେଦନ କରିବା ପରେ ଅନ୍ତରଙ୍ଗ ହେବାକୁ ଶାରୀରିକ ସମ୍ପର୍କ ରଖି ଲକ୍ଷାଧିକ ଟଙ୍କା ଠକି ନେଇ ଫେରାର ହୋଇଯାଇଥିବା ନେଇ ରାଜକନିକା ଥାନାରେ ଅଭିଯୋଗ ହୋଇଛି l ଅଭିଯୋଗ ମୁତାବକ, କାଳିକାପୁର ଅଞ୍ଚଳର ଜଣେ ୨୨ ବର୍ଷୀୟ ଯୁବତୀଙ୍କ ସହ ଆଳି ମନପୁର ଅଞ୍ଚଳର ମନୋଜ ସେଠି ପ୍ରେମ ନିବେଦନ କରି ଫସାଇଥିଲେ l ପରେ ବିବାହ କରିବାର ପ୍ରଲୋଭନ ଦେଖାଇ ବାରମ୍ବାର ଶାରୀରିକ ସମ୍ପର୍କ ରଖିଥିଲେ l ଯୁବତୀଙ୍କ ସରଳତାର ସୁଯୋଗ ନେଇ ତାଙ୍କ ଠାରୁ ଲକ୍ଷାଧିକ ଟଙ୍କା ନେଇ ଚାକିରୀ କରିବାକୁ ଆଫ୍ରିକା ଚାଲିଯାଇଛନ୍ତି l ଏବେ ବିବାହ କଥା କହିବାରୁ ଅଶ୍ଲୀଳ ଭାଷାରେ ଗାଳିଗୁଲଜ କରିବା ସହ ଜୀବନରୁ ମାରିଦେବାକୁ ଧମକ ଦେଇଛନ୍ତି l ଏନେଇ ଥାନାରେ ଅଭିଯୋଗ ହେବା ପରେ ପୋଲିସ ଏକ ମାମଲା ୧୯୫/୨୧ ରୁଜୁ କରି ତଦନ୍ତ ଆରମ୍ଭ କରିଛି l

ରାଜନଗର : ରାଜନଗର ଥାନା ଅନ୍ତର୍ଗତ ବରୁଣିପଲା ଗାଁର ଜଣେ ଯୁବକଙ୍କୁ ୪ଜଣ ଯୁବକ ତାଙ୍କ ଘର ନିକଟରୁ ଉଠାଇ ନେଇଥିଲେ । ସେମାନେ ଯୁବକଙ୍କ ହାତକୁ ବାନ୍ଧି ଅଜ୍ଞାତ ସ୍ଥାନରେ ରଖିଥିଲେ । ପୁଲିସ ଖବର ପାଇବା ପରେ ସ୍ୱତନ୍ତ୍ର ଟିମ ଗଠନ କରି ଯୁବକଙ୍କୁ ଉଦ୍ଧାର କରିବା ସହିତ ୪ଜଣ ଅପହରଣକାରୀଙ୍କୁ ଗିରଫ କରିଛି । ୭ ବର୍ଷର ପୁଅକୁ ନିଜ ପାଖକୁ ନେବା ପାଇଁ ତାର ବାପା ଏପରି ଅପହରଣ କରିଥିବା ପୁଲିସ ସୂତ୍ରରୁ ଜଣାପଡିଛି । ଆଜି ଅପରାହ୍ନରେ ପଟ୍ଟାମୁଣ୍ଡାଇ ଏସଡିପିଓ ସଂଧ୍ୟାରାଣୀ ବେହୁରିଆ ରାଜନଗର ଥାନାରେ ସାମ୍ବାଦିକ ସମ୍ମିଳନୀ କରି ଏ ସଂପର୍କରେ ସୂଚନା ଦେଇଛନ୍ତି ।

ପୁଲିସ ସୂତ୍ରରୁ ମିଳିଥିବା ସୂଚନା ମୁତାବକ ବରୁଣିପଲ୍ଲା ଗାଁର ରଶ୍ମୀତା ପ୍ରଧାନ ଗତକାଲି ସଂଧ୍ୟାରେ ରାଜନଗର ଥାନାରେ ତାଙ୍କ ସ୍ୱାମୀ ଦୀପକ ପ୍ରଧାନଙ୍କୁ ଅପହରଣ କରାଯାଇଥିବା ନେଇ ଅଭିଯୋଗ କରିଥିଲେ । ପୂର୍ବ ଶତୃତାକୁ ନେଇ ଗତକାଲି ଅପରାହ୍ନ ୫ ଘଟିକା ସମୟରେ ଏହି ଅପହରଣ ହୋଇଥିବା ସେ କହିଥିଲେ । ଅଭିଯୋଗ ପାଇବା ପରେ ଏ ନେଇ ରାଜନଗର ଥାନା ଆଇଆଇସି ତପନ କୁମାର ନାୟକ କେନ୍ଦ୍ରାପଡା ଏସପି ଓ ପଟ୍ଟାମୁଣ୍ଡାଇ ଏସଡିପିଓଙ୍କୁ ଜଣାଇଥିଲେ । ଏକ ଟିମ ଗଠନ କରି ଚଢାଉ କରାଯାଇ ମହାକାଳପଡା କେୟାରବାଙ୍କ ମଠ ନିକଟ ନଦୀ ପଠାରୁ ଦୀପକଙ୍କୁ ଉଦ୍ଧାର କରିଛି ପୁଲିସ । ଦୀପକଙ୍କ ହାତକୁ ଗାମୁଛାରେ ବନ୍ଧା ଯାଇଥିବା ଅବସ୍ଥାରେ ଉଦ୍ଧାର କରାଯାଇଥିଲା । ନଦୀ ପଠାରୁ ୨ଟି ମୋଟର ସାଇକେଲ ଜବତ କରାଯାଇଥିବା ସହ ସେଠାରେ ଥିବା ସୁଧାଂଶୁ ସ୍ୱାଇଁ, ସରୋଜକାନ୍ତ ସ୍ୱାଇଁ, ସୁବାଷ ସ୍ୱାଇଁ ପ୍ରମୁଖ ୩ ଭାଇଙ୍କ ସହ କୁମ୍ଭାରପଡାର ଶଙ୍କର୍ଷଣ ରାଉତଙ୍କୁ ପୁଲିସ ଘଟଣା ସ୍ଥଳରୁ ଗିରଫ କରି କୋର୍ଟ ଚାଲାଣ କରିଛି । ଏ ନେଇ ରାଜନଗର ଥାନାରେ କେସ ନଂ ୨୬୬ ଦଫା ୨୯୪, ୩୨୩, ୩୬୪ ଓ ୩୪ ଆଇପିସିରେ ମାମଲା ରୁଜୁ ହୋଇଛି ।

ରାଜକନିକା :  ଭାତୃବିବାଦ ଯେ କେତେ ଉଗ୍ରରୂପ ନେଇ ପାରେ,ତାହା ଆଜି ରାଜକନିକା ଅଂଚଳରେ ଦେଖିବାକୁ ମିଳିଛି । ବଡଭାଇକୁ ଘର ତିଆରି ବେଳେ ଟଙ୍କା ସାହାଯ୍ୟ କରିଥିବା ସାନଭାଇ ବାକି ଟଙ୍କା ପାଇଁ ବଡଭାଇକୁ ଶୋଇବା ଅବସ୍ଥାରେ ପେଟ୍ରୋଲ ପକାଇ ପୋଡି ମାରିଦେବାର ଉଦ୍ୟମ କରିବା ଘଟଣା ସାରା ରାଜକନିକାକୁ ସ୍ତମ୍ଭୀଭୂତ କରିଦେଇଛି । ଗୁରୁତର ଅବସ୍ଥାରେ ବଡଭାଇ କଟକ ମେଡିକାଲରେ  ଜୀବନ ସହ ସଂଘର୍ଷ କରୁଥିବା ବେଳେ ପିଶାଚ ସାନଭାଇ ରାଜକନିକା ଥାନାରେ ଅଟକ ରହିଛି ।

ସୂଚନାଯୋଗ୍ୟ ଯେ ରାଜକନିକା ଥାନାନ୍ତର୍ଗତ କାଟଣା-ବଣିଆ ଗ୍ରାମପଞ୍ଚାୟତର ଝାଡମାଳ ଗାଁର ପବିତ୍ର ପ୍ରଧାନ(୫୦)ଆଜି ଅପରାହ୍ନରେ ନିଜ ବଡଭାଇ ବିଚିତ୍ର ପ୍ରଧାନ (୬୨) ଘରେ ଶୋଇଥିବା ବେଳେ ତାଙ୍କ ଉପରକୁ ପେଟ୍ରୋଲ ପକାଇ ନିଆଁ ଲଗାଇ ଦେଇଥିଲେ।  ପେଟ୍ରୋଲ୍‌ ପକାଇ ହଠାତ ନିଆଁ ଲଗାଇ ଦେବାରୁ ସାରା ଶରୀର ଜଳୁଥିବା ବିଚିତ୍ର ଜୀବନ ବିକଳରେ ଘରସାରା ଦୌଡିବାରୁ ନିଜେ ପୋଡି ଯାଉଥିବା ସହ ଘର ମଧ୍ୟ ନିଆଁ ଲାଗି ସଂପୂର୍ଣ୍ଣ ଘର ଜଳିଯାଇଛି । ନିଆଁ ଲାଗିବା କ୍ଷଣି ଅର୍ଦ୍ଧଦଗ୍ଧ ବିଚିତ୍ର ଘରୁ ବାହାରି ଆସି ତଳେ ପଡି ଯାଇଥିଲେ। ଏହାପରେ ଗାଁ ଲୋକ ଗୁରୁତର ଭାବେ ଉଦ୍ଧାର ହୋଇଥିବା ବିଚିତ୍ରକୁ ରାଜକନିକା ମେଡିକାଲରେ ଭର୍ତି କରିଥିଲେ ହେଁ ଅବସ୍ଥା ଗୁରୁତର ଥିବାରୁ ତାଙ୍କୁ କେନ୍ଦ୍ରାପଡା ଓ ପରେ କଟକ ସ୍ଥାନାନ୍ତର କରାଯାଇଛି ।

ବଡଭାଇକୁ ନିଜ ଜାଗା ବାଡି ପାଇଁ ଦୀର୍ଘବର୍ଷ ହେବ ଶତୃତା କରି ଆସୁଥିବା ସ୍ନାତକ ପଢୁଆ ସାନଭାଇ ପବିତ୍ର ପିଲାଛୁଆ ଧରି ଭୂବନେଶ୍ୱରରେ ରହୁଥିବା ବେଳେ ମଝିରେ ମଝିରେ ଗାଁକୁ ଆସି ନିଜ ବିକ୍ରୀ କରିଥିବା ସଂପତିର ସବୁ ଟଙ୍କା ନେଇ ଯାଇଥିଲେ ହେଁ ଘର ତିଆରି ବେଳେ ଧାର ଦେଇଥିବା କିଛି ଟଙ୍କା ଦେବାକୁ ଜିଦ କରି ଭାଇ ସହ ଝଗଡା କରିଥିଲା । ତେବେ ଭଦ୍ରଲୋକଙ୍କ ଜରିଆରେ ମାମଲାର ସମାଧାନ ହୋଇ ଥିଲେ ବି ପବିତ୍ର ଗାଁକୁ ଆସି ବିଭିନ୍ନ ସମୟରେ ଝାମେଲା କରିବା ସହ ଭାଇ ଓ ତାଙ୍କ ପରିବାରକୁ ହଇରାଣ କରି ଆସୁଥିଲା । ଆଜି ଅପରାହ୍ନରେ ବଡଭାଇ ଘରେ ପଶି ପେଟ୍ରାଲ ପକାଇ ନିଆଁ ଲଗାଇ ଦୌଡି ପଳାଉଥିବା ସମୟରେ କାଟଣା ରାସ୍ତାରେ ଲୋକେ କାବୁ କରି ଜଣକ ଘରେ ଅଟକ ରଖି ପୁଲିସକୁ ଖବର ଦେଇଥିଲେ ।

ଖବର ପାଇ ରାଜକନିକା ପୁଲିସ ପବିତ୍ରକୁ ଗିରଫ କରି ଥାନାରେ ଅଟକ ରଖିଥିବା ବେଳେ ବିଚିତ୍ରଙ୍କ ସ୍ତ୍ରୀ ବସନ୍ତ ମଂଜରୀ ପ୍ରଧାନ ରାଜକନିକା ଥାନାରେ ଦିଅରର ତାଙ୍କ ସ୍ୱାମୀଙ୍କୁ ଜୀବନରୁ ମାରିଦେବାର ଉଦ୍ୟମ କରି ନିଆଁ ଲଗାଇ ପୋଡି ଦେବାର ଉଦ୍ୟମ କରିଥିବା ସଂପର୍କରେ ଅଭିଯୋଗ କରି ନ୍ୟାୟ ଭିକ୍ଷା କରିଛନ୍ତି । ତେବେ ଭାଇଭାଇର ଶତୃ ହେବା ଘଟଣାରେ ଆଜି ନୂଆ ଏକ ଅଧ୍ୟାୟ ଯୋଡି ହେବା ସହ ଜଣେ ଉଚ୍ଚ ଶିକ୍ଷିତ ଭାଇର ଜହ୍ଲାଦପଣିଆକୁ ନେଇ ସବୁଠି ନିନ୍ଦନୀୟ ଆଲୋଚନା ଜାରି ରହିଛି ।