କେନ୍ଦ୍ରାପଡ଼ା: ଲୁଣା ନଦୀକୁ ଡେଇଁ ଯୁବକ ନିଖୋଜ । କେନ୍ଦ୍ରାପଡ଼ା ଅନ୍ତର୍ଗତ ଲୁଣା ନଦୀର ଏକ ପୋଲ ଉପରୁ ଡେଇଁ ପଡ଼ିବା ଫଳରେ ଜଣେ ୨୨ ବର୍ଷୀୟ ଯୁବକ ନିଖୋଜ ହୋଇଯାଇଛନ୍ତି। ଖବର ପାଇ ଅଗ୍ନିଶମ ବାହିନୀ ପକ୍ଷରୁ ସ୍ପିଡ୍ ବୋଟ୍ ସାହାଯ୍ୟରେ ବ୍ୟାପକ ଉଦ୍ଧାର କାର୍ଯ୍ୟ ଜାରି ରହିଛି। ନିଖୋଜ ହୋଇଥିବା ଯୁବକ ଜଣକ ହେଲେ କେନ୍ଦ୍ରାପଡ଼ା ସଦର ଥାନା ଅନ୍ତର୍ଗତ ବାହାକଣ୍ଡିଆ ଗାଁର ରାଜକୁମାର ଜେନା। ମିଳିଥିବା ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ରାଜକୁମାର କଳାପଡ଼ା ଲୁଣା ନଦୀ ପୋଲ ନିକଟକୁ ଯାଇଥିଲେ। ତେବେ ଯୁବକ ଜଣକ କେଉଁ କାରଣରୁ ନଦୀକୁ ଡେଇଁଲେ ତାହା ଏପର୍ଯ୍ୟନ୍ତ ଅସ୍ପଷ୍ଟ ରହିଛି। ଘଟଣାର ପରିସ୍ଥିତି ଏବଂ ପ୍ରକୃତ କାରଣ ଜାଣିବା ପାଇଁ ସ୍ଥାନୀୟ ପୋଲିସ ପକ୍ଷରୁ ମଧ୍ୟ ଏକ ତଦନ୍ତ ଆରମ୍ଭ କରାଯାଇଛି।

ଘଟଣା ସମ୍ପର୍କରେ ଖବର ପାଇବା ମାତ୍ରେ ସ୍ଥାନୀୟ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଏକ ସ୍ପିଡ୍ ବୋଟ୍ ଜରିଆରେ ନଦୀରେ ଖୋଜାଖୋଜି ଆରମ୍ଭ କରାଯାଇଥିଲା। ଗତକାଲି ରାତିର ଅନ୍ଧକାର ଏବଂ ନଦୀରେ ଥିବା ପ୍ରବଳ ସ୍ରୋତ କାରଣରୁ ଉଦ୍ଧାର କାର୍ଯ୍ୟରେ ବାଧା ଉପୁଜିଥିଲା। ଏହା ସତ୍ତ୍ୱେ ଅଗ୍ନିଶମ ବାହିନୀ ପକ୍ଷରୁ ନିଖୋଜ ଯୁବକଙ୍କୁ ଠାବ କରିବା ପାଇଁ ନିରନ୍ତର ପ୍ରୟାସ ଜାରି ରହିଛି। ବର୍ତ୍ତମାନ ସୁଦ୍ଧା ରାଜକୁମାରଙ୍କର କୌଣସି ପତ୍ତା ମିଳିପାରି ନାହିଁ।

କେନ୍ଦ୍ରାପଡ଼ା: ୩ ଦିନ ପରେ ଉଦ୍ଧାର ହେଲେ ନିଖୋଜ ଛାତ୍ର । କେନ୍ଦ୍ରାପଡ଼ା ଜିଲ୍ଲାରେ ଅପହରଣ ତଥା ଆକ୍ରମଣର ଶିକାର ହୋଇଥିବା ଜଣେ ନିଖୋଜ ଛାତ୍ରଙ୍କୁ ୩ ଦିନ ପରେ ପୋଲିସ ଉଦ୍ଧାର କରିବାରେ ସଫଳ ହୋଇଛି। ଏହି ଛାତ୍ରଙ୍କୁ ନିର୍ଦ୍ଦୟ ଭାବେ ପିଟାଯାଉଥିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ପୋଲିସ ଘଟଣାକୁ ଗମ୍ଭୀରତାର ସହ ନେଇଥିଲା।

ମିଳିଥିବା ସୂଚନା ଅନୁଯାୟୀ, ରାଜନଗର ଥାନା ଅନ୍ତର୍ଗତ ଖଣ୍ଡେଇପଦା ଗ୍ରାମରେ ଥିବା ଜଣେ ସାଙ୍ଗଙ୍କ ଘରେ ଉକ୍ତ ଛାତ୍ର ଜଣକ ଲୁଚି ରହିଥିଲେ। ବିଶ୍ୱସ୍ତ ସୂତ୍ରରୁ ଖବର ପାଇ ପଟ୍ଟାମୁଣ୍ଡାଇ ଗ୍ରାମାଞ୍ଚଳ ପୋଲିସ ତୁରନ୍ତ ଉକ୍ତ ସ୍ଥାନରେ ପହଞ୍ଚି ତାଙ୍କୁ ଠାବ କରିଥିଲା। ବର୍ତ୍ତମାନ ପୋଲିସ ଛାତ୍ରଙ୍କୁ ଥାନାକୁ ଆଣି ଅଧିକ ପଚରାଉଚରା କରୁଥିବା ଅଧିକାରୀମାନେ ସ୍ପଷ୍ଟ କରିଛନ୍ତି।

ଛାତ୍ରଙ୍କୁ ଅତି ନିର୍ମମ ଭାବେ ମାଡ଼ ମରାଯାଉଥିବାର ଦୃଶ୍ୟ ଅନଲାଇନରେ ବ୍ୟାପକ ଭାବେ ପ୍ରସାରିତ ହେବା ପରେ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା, ଯାହା ପୋଲିସର ତ୍ୱରିତ କାର୍ଯ୍ୟାନୁଷ୍ଠାନକୁ ଖୋରାକ ଯୋଗାଇଥିଲା। ବର୍ତ୍ତମାନ ପୋଲିସ ଉଦ୍ଧାର ହୋଇଥିବା ଛାତ୍ରଙ୍କ ବୟାନ ରେକର୍ଡ କରୁଛି। ଅପହରଣ ଏବଂ ଆକ୍ରମଣର ପ୍ରକୃତ କାରଣ ଖୋଜିବା ସହ ଘଟଣାର ପୁରା ବିବରଣୀ ଜାଣିବାକୁ ଉଦ୍ୟମ ଜାରି ରହିଛି। ଆକ୍ରମଣରେ ସମ୍ପୃକ୍ତ ଥିବା ଦୁର୍ବୃତ୍ତମାନଙ୍କୁ ଚିହ୍ନଟ କରିବା ଏବଂ ଛାତ୍ରଙ୍କ ନିଖୋଜ ହେବା ପଛର ପ୍ରକୃତ ରହସ୍ୟ ଭେଦ କରିବା ପାଇଁ ପୋଲିସର ତଦନ୍ତ ଜାରି ରହିଛି।

କେନ୍ଦ୍ରାପଡ଼ା: କେନ୍ଦ୍ରାପଡ଼ା ଜିଲ୍ଲାର ବନ୍ୟା ପ୍ରଭାବିତ ଅଞ୍ଚଳରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ସୋମବାର ଭୋର ସମୟରେ ନଦୀରେ ଗାଧୋଉଥିବା ବେଳେ ଜଣେ ୪୬ ବର୍ଷୀୟା ମହିଳାଙ୍କୁ କୁମ୍ଭୀର ଟାଣି ନେଇଥିବା ଅଭିଯୋଗ ହୋଇଛି। ମିଳିଥିବା ସୂଚନା ଅନୁଯାୟୀ, ଏହି ଘଟଣାଟି ଆଳପୁଆ ପଞ୍ଚାୟତର ଦାମଦରପାଟଣା ଗାଁରେ ଘଟିଛି। ଗତ ଏକ ସପ୍ତାହ ଧରି ଏହି ଅଞ୍ଚଳ ବନ୍ୟା ଜଳରେ ଜଳମଗ୍ନ ରହିଛି। ନିଖୋଜ ମହିଳାଙ୍କ ନାମ ସୁଚିତ୍ରା ଦାସ ବୋଲି ଜଣାପଡ଼ିଛି। ଭୋର ସମୟରେ ସେ ନିକଟସ୍ଥ ନଦୀକୁ ଗାଧୋଇବାକୁ ଯାଇଥିବା ବେଳେ ହଠାତ୍ ଏକ କୁମ୍ଭୀର ତାଙ୍କୁ ଆକ୍ରମଣ କରି ପାଣି ଭିତରକୁ ଟାଣି ନେଇଥିଲା। ଘଟଣାସ୍ଥଳରୁ ଅର୍ଥାତ୍ ନଦୀ କୂଳରୁ ତାଙ୍କର ଚପଲ, ଟର୍ଚ୍ଚ, ମୋବାଇଲ୍ ଫୋନ୍ ଏବଂ ସାବୁନ୍ ଉଦ୍ଧାର କରାଯାଇଛି।

ଖବର ପାଇବା ମାତ୍ରେ ପଟ୍ଟାମୁଣ୍ଡାଇ ଅଗ୍ନିଶମ ବାହିନୀର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ନଦୀରେ ସର୍ଚ୍ଚ ଅପରେସନ୍ ଆରମ୍ଭ କରିଛନ୍ତି। ତେବେ ଖବର ଲେଖାହେବା ସୁଦ୍ଧା ମହିଳାଙ୍କର କୌଣସି ପତ୍ତା ମିଳିପାରି ନାହିଁ।

ଅନ୍ୟପକ୍ଷରେ, ବନ୍ୟା ସମୟରେ ବନ୍ୟଜନ୍ତୁଙ୍କ ବାରମ୍ବାର ଆକ୍ରମଣକୁ ନେଇ ସ୍ଥାନୀୟ ଲୋକେ ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ, ବାରମ୍ବାର ଦାବି ସତ୍ତ୍ୱେ ବନ ବିଭାଗ ପକ୍ଷରୁ ବିପଦସଙ୍କୁଳ ଗ୍ରାମଗୁଡ଼ିକରେ କୌଣସି ସଚେତନତା କାର୍ଯ୍ୟକ୍ରମ କିମ୍ବା ଆବଶ୍ୟକୀୟ ପ୍ରତିଷେଧକ ମୂଳକ ପଦକ୍ଷେପ ଗ୍ରହଣ କରାଯାଇନାହିଁ। ପୂର୍ବରୁ କେନ୍ଦ୍ରାପଡ଼ା ଜିଲ୍ଲାପାଳ ବନ୍ୟା ପ୍ରଭାବିତ ଅଞ୍ଚଳ ପରିଦର୍ଶନରେ ଆସିଥିବା ବେଳେ ଲୋକେ ଏହି ସମସ୍ୟା ସମ୍ପର୍କରେ ତାଙ୍କୁ ଅବଗତ କରାଇଥିଲେ। ସେତେବେଳେ ଜିଲ୍ଲାପାଳ ବନ ବିଭାଗ ପକ୍ଷରୁ ସଚେତନତା କାର୍ଯ୍ୟକ୍ରମ କରାଯିବ ବୋଲି ପ୍ରତିଶ୍ରୁତି ଦେଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଇ ନଥିବା ଗ୍ରାମବାସୀ ଅଭିଯୋଗ କରିଛନ୍ତି।

କେନ୍ଦ୍ରାପଡ଼ା: ଭିଜିଲାନ୍ସ ଜାଲରେ କେନ୍ଦ୍ରାପଡ଼ା ଫରେଷ୍ଟ ରେଞ୍ଜର ରବୀନ୍ଦ୍ର କୁମାର ନାୟକ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ କଟକ ବନଖଣ୍ଡ ଅଧୀନରେ ଥିବା କେନ୍ଦ୍ରାପଡ଼ା ଫରେଷ୍ଟ ରେଞ୍ଜର ରବୀନ୍ଦ୍ର କୁମାର ନାୟକଙ୍କ ଘରେ ଚଢ଼ାଉ କରାଯାଇଛି। କଟକ ଓ କେନ୍ଦ୍ରାପଡ଼ା ଜିଲ୍ଲାର ୪ଟି ସ୍ଥାନରେ ଏକକାଳୀନ ଚାଲିଛି ରେଡ୍ । କଟକର ସ୍ୱତନ୍ତ୍ର ଭିଜିଲାନ୍ସ ବିଚାରପତିଙ୍କ ଦ୍ୱାରା ଜାରି କରାଯାଇଥିବା ସର୍ଚ୍ଚ ୱାରେଣ୍ଟ ଆଧାରରେ ଏହି ବ୍ୟାପକ ଚଢ଼ାଉ କରାଯାଉଛି।

ଭିଜିଲାନ୍ସ ବିଭାଗର ଏକ ସରକାରୀ ପ୍ରେସ୍ ବିଜ୍ଞପ୍ତି ଅନୁଯାୟୀ, ଏକାସାଙ୍ଗରେ ୪ଟି ଭିନ୍ନ ଭିନ୍ନ ସ୍ଥାନରେ ଏହି ସର୍ଚ୍ଚ ଅପରେସନ୍ ଚାଲିଛି। ସେଗୁଡ଼ିକ ହେଲା- କଟକ ଜିଲ୍ଲା ବାରଙ୍ଗ ଥାନା ଅନ୍ତର୍ଗତ ମୁଣ୍ଡଳୀ ଗୋଡ଼ିସାହିରେ ଥିବା ତାଙ୍କର ୪ ମହଲା ବିଶିଷ୍ଟ ବାସଭବନ, ବାଙ୍କୀ ଥାନା ଅନ୍ତର୍ଗତ ସାହାଡ଼ାପଡ଼ା ସ୍ଥିତ ତାଙ୍କର ପୈତୃକ ଘର, କେନ୍ଦ୍ରାପଡ଼ା ଫରେଷ୍ଟ ରେଞ୍ଜରେ ଥିବା ତାଙ୍କ କାର୍ଯ୍ୟାଳୟ ଏବଂ କେନ୍ଦ୍ରାପଡ଼ାରେ ଥିବା ତାଙ୍କର ଅସ୍ଥାୟୀ ବାସଭବନ।

ଏହି ବୃହତ୍ ଯାଞ୍ଚ ପ୍ରକ୍ରିୟାରେ ଏକ ବଡ଼ ଭିଜିଲାନ୍ସ ଟିମ୍ ସାମିଲ ହୋଇଛି। ଏହି ଟିମ୍‌ରେ ୫ ଜଣ ଡିଏସପି (DSP), ୯ ଜଣ ଇନ୍ସପେକ୍ଟର, ୫ ଜଣ ଏଏସଆଇ (ASI) ଏବଂ ଅନ୍ୟାନ୍ୟ କର୍ମଚାରୀମାନେ ଅଛନ୍ତି। ମଙ୍ଗଳବାର ଠାରୁ ଆରମ୍ଭ ହୋଇଥିବା ଏହି ତଦନ୍ତ ପ୍ରକ୍ରିୟା ବର୍ତ୍ତମାନ ସୁଦ୍ଧା ଜାରି ରହିଛି।

ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାର ପ୍ରକୃତ ତଥ୍ୟ ଉନ୍ମୋଚନ କରିବା ପାଇଁ ଭିଜିଲାନ୍ସ ବିଭାଗ ପକ୍ଷରୁ ସମସ୍ତ କାଗଜପତ୍ରର ତନ୍ନ ତନ୍ନ ଯାଞ୍ଚ କରାଯାଉଛି। ଏହି ଅପରେସନ୍ ସମ୍ପୂର୍ଣ୍ଣ ହେବା ପରେ ଜବତ ହୋଇଥିବା ମୋଟ ସମ୍ପତ୍ତିର ପରିମାଣ ସମ୍ପର୍କରେ ବିସ୍ତୃତ ବିବରଣୀ ପ୍ରଦାନ କରାଯିବ ବୋଲି ବିଭାଗ ପକ୍ଷରୁ ସୂଚନା ଦିଆଯାଇଛି।

କେନ୍ଦ୍ରାପଡା: ବିନା ଆଧାରକାର୍ଡରେ କୌଣସି ସରକାରୀ ଯୋଜନାର ସୁଫଳ ଉପଲବ୍ଧ ହେଉନି। ରାସନ୍‌ କାର୍ଡଠାରୁ ଆରମ୍ଭ କରି ଜବ୍‌କାର୍ଡ, ଲେବର କାର୍ଡ, ସାମାଜିକ ସୁରକ୍ଷା ଯୋଜନା, ସ୍କୁଲ ନାମଲେଖା, ଜାତି ପ୍ରମାଣପତ୍ର, ଶିକ୍ଷା ବୃତ୍ତି, ବିଭିନ୍ନ ଭତ୍ତା ପର୍ଯ୍ୟନ୍ତ ପ୍ରତ୍ୟେକ କ୍ଷେତ୍ରରେ ସରକାର ଆଧାରକାର୍ଡକୁ ବାଧ୍ୟତାମୂଳକ କରିଛନ୍ତି। ଆଧାରକାର୍ଡ ବାଧ୍ୟତାମୂଳକ ଥିବାରୁ କେତେଜଣ ଛାତ୍ରଛାତ୍ରୀ ଶିକ୍ଷାରୁ ବଞ୍ଚିତ ହେଉଥିବା ପରିଲକ୍ଷିତ ହୋଇଛି। ଆଧାରକାର୍ଡରେ ରହିଥିବା ଛୋଟମୋଟ ତ୍ରୁଟିକୁ ସଂଶୋଧନ ମଧ୍ୟ କରିହେଉନି। ଫଳରେ ଜଣେ ଛାତ୍ରୀ ନର୍ସିଂ ଶିକ୍ଷା ପାଇବାରୁ ବଞ୍ଚିତ ହୋଇଛନ୍ତି। ପାଠପଢା ପ୍ରତି ତାଙ୍କର ଆଗ୍ରହ ଥିଲେ ମଧ୍ୟ ସରକାରୀ ବିଧି ବ୍ୟବସ୍ଥା ଯୋଗୁଁ ଶିକ୍ଷାରୁ ବଞ୍ଚିତ ହୋଇଥିବାରୁ ଭେଁ ଭେଁ ହୋଇ କାନ୍ଦିଛନ୍ତି। ବୟସ ଗଡ଼ି ଚାଲିଥିବାରୁ ଆଉ ଆଗକୁ ପାଠ ପଢ଼ିବେ କି ନାହିଁ ସେ ନେଇ ସନ୍ଦେହ ସୃଷ୍ଟି ହୋଇଛି। ଏହିଭଳି ଏକ ଘଟଣା କେନ୍ଦ୍ରାପଡ଼ା ଜିଲ୍ଲା ଗରଦପୁର ବ୍ଲକ ଅଧୀନ ଗରଦପୁର ଗ୍ରାମର ଉମେଶ ବେହେରାଙ୍କ ଝିଅ ରୂପାଲି ବେହେରା(୧୭)ଙ୍କ କ୍ଷେତ୍ରରେ ଦେଖିବାକୁ ମିଳିଛି।

ସେ ଜଣେ ଅନୁସୂଚିତ ଜାତିର ଛାତ୍ରୀ। ଯୁକ୍ତ ୨ ବିଜ୍ଞାନ ପାଠ ପଢିବା ପରେ ନର୍ସିଂ କରିବାକୁ ମନ ବଳାଇଥିଲେ। ମାଟ୍ରିକ ଏବଂ ଯୁକ୍ତ ୨ରେ ଭଲ ନମ୍ୱର ରଖି ପାସ ମଧ୍ୟ କରିଛନ୍ତି। ପରିବାରର ଆର୍ଥିକ ସ୍ଥିତି ଖରାପ ଥିବାରୁ ସରକାରଙ୍କ ପକ୍ଷରୁ ଅନୁସୂଚିତ ଜାତି ମାନଙ୍କ ପାଇଁ ମିଳୁଥିବା ଷ୍ଟାଇପେଣ୍ଡ ଜରିଆରେ ନର୍ସିଂ ଶିକ୍ଷା ଗ୍ରହଣ କରିଥାନ୍ତେ ସେ। ଏନେଇ ସବୁ ପ୍ରସ୍ତୁତି ସରିଥିଲା। ହେଲେ ଆଡ୍‌ମିଶନ ସମୟରେ ଆଧାରକାର୍ଡରେ ଏକ ସାମାନ୍ୟ ତ୍ରୁଟି ଯୋଗୁଁ ତାଙ୍କୁ ଫେରାଇ ଦିଆଯାଇଥିଲା। ତ୍ରୁଟି ସଂଶୋଧନ ପାଇଁ ଭୁବନେଶ୍ୱରଠାରୁ କଟକ ଆଉ କେନ୍ଦ୍ରାପଡ଼ା ଦୌଡି ଦୌଡି ଶେଷରେ ନିରାଶ ହୋଇ ଏବେ ଘରେ ବସି ରହିଛନ୍ତି ସେ। ତେବେ ଆଧାରକାର୍ଡରେ ତ୍ରୁଟି ଥିବାରୁ ସେ ଆଗକୁ ସମସ୍ତ ସର୍ବନିମ୍ନ ସରକାରୀ ସୁବିଧାରୁ ବଞ୍ଚିତ ହେବେ ବୋଲି ଆଶଙ୍କା ସୃଷ୍ଟି ହୋଇଛି।

ରୂପାଲିଙ୍କର ମାଟ୍ରିକ ଏବଂ ଯୁକ୍ତ ୨ ସାର୍ଟିଫିକେଟରେ ଜନ୍ମ ୨୩/୧୨/୨୦୦୬ ରହିଥିବା ବେଳେ ଆଧାରରେ ୨୫/୧୨/୨୦୦୬ ରହିଛି। ଏହି ଦୁଇଦିନ ତ୍ରୁଟିକୁ କୌଣସି ସ୍ଥାନରେ ସଂଶୋଧନ କରିହେଉନି। ଫଳରେ ସେ ଏବେ ଶିକ୍ଷାରୁ ବଞ୍ଚିତ ହୋଇଛନ୍ତି। ଏମିତିକି ଯେତେଥର ତ୍ରୁଟି ସଂଶୋଧନ କରିବାକୁ ଯାଉଛନ୍ତି, ହୋଇପାରୁନି ବୋଲି ରୂପାଲିଙ୍କ ବାପା ଉମେଶ କ୍ଷୋଭର ସହ କହିଛନ୍ତି। ସରକାର ଅନୁସୂଚିତ ଜାତି ଏବଂ ମହିଳା, ଯୁବତୀ ଓ ଛାତ୍ରୀମାନଙ୍କୁ ସ୍ୱାବଲମ୍ୱୀ କରିବାକୁ ସ୍ୱତନ୍ତ୍ର ବ୍ୟବସ୍ଥା କରିଥିବା କହି ଡିଣ୍ଡିମ ପିଟୁଛନ୍ତି। ହେଲେ ବାସ୍ତବରେ କ’ଣ ହେଉଛି ଆମେ ଭୋଗୁଛୁ ବୋଲି ଛାତ୍ରୀଙ୍କ ବାପା କହିଛନ୍ତି । ଏହି ତ୍ରୁଟି ପାଇଁ ଆଧାର କାର୍ଡ କୌଣସି ସ୍ଥାନରେ ଲିଙ୍କ ମଧ୍ୟ ହୋଇପାରୁନାହିଁ ବୋଲି ପରିବାର ପକ୍ଷରୁ ଅଭିଯୋଗ କରାଯାଇଛି ।

ଆଧାରକାର୍ଡ ତିଆରି ଏବଂ ସଂଶୋଧନ ପ୍ରକ୍ରିୟାକୁ ଏବେ ଜଟିଳ କରି ଦିଆଯାଇଛି। ପୂର୍ବରୁ ଭୋଟ୍‌ର କାର୍ଡ, ପ୍ୟାନ୍‌ କାର୍ଡ, ମାଟ୍ରିକ ପ୍ରମାଣପତ୍ର, ପାସ୍‌ପୋର୍ଟ କିମ୍ୱା ସେଭଳି କୌଣସି ଡକ୍ୟୁମେଣ୍ଟ ନଥିଲେ ସ୍ଥାନୀୟ ସରପଞ୍ଚ କିମ୍ୱା କୌଣସି ଗେଜେଟେଡ୍‌ ଅଧିକାରୀଙ୍କ ଦସ୍ତଖତ ଜରିଆରେ ଆଧାରକାର୍ଡ ତିଆରି କିମ୍ୱା ସଂଶୋଧିତ ହୋଇ ପାରୁଥିଲା। ଏହା ଆଉ ସମ୍ଭବ ହେଉନି। ଏଥିପାଇଁ ଆବାସିକ ପ୍ରମାଣପତ୍ର, ଜାତି ପ୍ରମାଣପତ୍ର, ଜନ୍ମ ପ୍ରମାଣପତ୍ର ବାଧ୍ୟତାମୂଳକ କରାଯାଉଛି। ଆଧାରକାର୍ଡ ପାଇଁ ଖାଦ୍ୟ ସୁରକ୍ଷା ଏବଂ ଶିକ୍ଷାରୁ ବଞ୍ଚିତ କରା ନଯିବାକୁ ସର୍ବୋଚ୍ଚ ନ୍ୟାୟାଳୟର ନିର୍ଦ୍ଦେଶ ରହିଛି।

ଆଧାରକାର୍ଡ ପ୍ରସ୍ତୁତ ବେଳେ ନାମର ବନାନ, ଠିକଣା ଏବଂ ଜନ୍ମ ତାରିଖରେ ଯେତେ ଭୁଲ କରାଯାଉଛି, ଏଥିଯୋଗୁଁ ହିତାଧିକାରୀଙ୍କ ଦୁଃଖ ବଢିବାରେ ଲାଗିଛି। ଆଧାରକାର୍ଡର ସାମାନ୍ୟ ତ୍ରୁଟି ହିତାଧିକାରୀଙ୍କ ପାଇଁ ପରିଚୟ ସଙ୍କଟ ତିଆରି କରୁଛି ଏବଂ ସେ ସବୁ ଯୋଜନାରୁ ବଞ୍ଚିତ ହେଉଛନ୍ତି। ଏନେଇ ବିଭାଗ ପକ୍ଷରୁ ସତର୍କତା ଅବଲମ୍ୱନ ଜରୁରୀ ବୋଲି ବୁଦ୍ଧିଜୀବୀ ମହଲରେ ମତପ୍ରକାଶ ପାଇଛି ।

କେନ୍ଦ୍ରାପଡା: ଶାବଳରେ ପିଟିପଟି ମହିଳାଙ୍କୁ ମାରିଦେଲେ ପଡୋଶୀ । କେନ୍ଦ୍ରାପଡା ଜିଲା ରାଜକନିକା ଥାନା ଅନ୍ତର୍ଗତ ସଂଗ୍ରାମପୁର ଗାଁରେ ଜମିବାଡି ବିବାଦରୁ ଘଟିଛି ଏହି ଅଘଟଣ । ମୃତ ମହିଳା ହେଉଛନ୍ତି ୫୨ ବର୍ଷିୟା ସୁଶୀଳା ନାୟକ ।

ମିଳିଥିବା ସୂଚନା ଅନୁଯାୟୀ, ସଂଗ୍ରାମପୁର ଗାଁର ସୁଶୀଳା ନାୟକଙ୍କ ଜମିରେ ତାଙ୍କ ପଡୋଶୀ ଏକ ପାଇଖାନା ନିର୍ମାଣ କରିଥିଲେ। ଏହାକୁ ନେଇ ଗତ ଦୁଇବର୍ଷ ଧରି ଉଭୟ ପରିବାର ଭିତରେ ବିବାଦ ଲାଗି ରହିଥିଲା । ଆଜି ଉଭୟ ପକ୍ଷ ରାଜକନିକା ଥାନାରେ ବିବାଦର ସମାଧାନ କରିବା ପାଇଁ ପହଞ୍ଚିଥିଲେ। କିନ୍ତୁ ଏହିଘଟଣାର ସମାଧାନ ପାଇଁ ପୋଲିସ କିଛି ଅଧିକ ସାକ୍ଷୀ ଆଣିବା ପାଇଁ କହି ଉଭୟ ପକ୍ଷ ଙ୍କୁ ଘରକୁ ପଠାଇ ଦେଲା । ସୁଶୀଳା ଏବଂ ତାଙ୍କ ପରିବାର ଲୋକେ ଘରେ ପହଞ୍ଚିବା ପରେ ତାଙ୍କ ପଡୋଶୀ ରକ୍ତମୁଖା ହୋଇ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରିଥିଲେ।

ପଡ଼ୋଶୀ ସୁନାକର ନାୟକ, ମହେଶ୍ଵର ନାୟକ, ଅନୁସୂୟା ନାୟକଙ୍କ ଆକ୍ରମଣରେ ସୁଶୀଳା ଗୁରୁତର ଆହତ ହୋଇଥିଲାବେଳେ ତାଙ୍କ ପୁତୁରା ମନୋରଞ୍ଜନ ନାୟକ ଓ ପବିତ୍ର ନାୟକ ମଧ୍ୟ ଆହତ ହୋଇଥିଲେ। ଏମିତିକି ଆହତମାନଙ୍କୁ ନେଇ ହସ୍ପିଟାଲ ଆସୁଥିବା ଆମ୍ବୁଲାନ୍ସ କୁ ଆକ୍ରମଣକାରୀ କିଛି ସମୟ ଅଟକାଇ ଦେଇଥିଲେ। ଆହତ ମାନେ କେନ୍ଦ୍ରାପଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ପହଞ୍ଚିବା ପେର ଡାକ୍ତର ସୁଶୀଳାଙ୍କୁ ମୃତ ଘୋଷଣା କରିଥିଲେ। ଅନ୍ୟପକ୍ଷରେ ଆହତ ମନୋରଞ୍ଜନ ଓ ପବିତ୍ରଙ୍କ ସ୍ୱାସ୍ଥ୍ୟବସ୍ଥା ଏବେ ଗୁରୁତର ଥିବା ଜଣାପଡ଼ିଛି ।

ପଟ୍ଟାମୁଣ୍ଡାଇ: ଦୁଇଦିନିଆ କେନ୍ଦ୍ରାପଡା ଗସ୍ତରେ 5T ସଚିବ ଭି.କେ ପାଣ୍ଡିଆନ୍। ଜିଲ୍ଲାରେ ହେଉଥିବା ବିଭିନ୍ନ ଉନ୍ନୟନ ମୂଳକ କାର୍ଯ୍ୟର ଅଗ୍ରଗତି ସମ୍ପର୍କରେ ସମୀକ୍ଷା କରିବା ସହ ବରିଷ୍ଠ ଅଧିକାରୀଙ୍କ ସହ ଆଲୋଚନା କରୁଛନ୍ତି ଭି.କେ ପାଣ୍ଡିଆନ। ଜମଧରରେ ନିୟନ୍ତ୍ରିତ ବଜାର କମିଟିରେ ନିର୍ମାଣାଧିନ ୫ ଶହ ମେଟ୍ରିକ ଟନ ବିଶିଷ୍ଟ ଶୀତଳଭଣ୍ଡାର ବୁଲି ଦେଖିଲେ 5T ସଚିବ।

ଜାତୀୟ କୃଷି ବଜାର, କେନ୍ଦ୍ରାପଡା କାର୍ଯ୍ୟାଳୟର ଅଧିକାରୀଙ୍କ ସହ ଆଲୋଚନା କରିଛନ୍ତି। ଜଝାଙ୍ଗ କାଇଁଚ ପିଜି ସେଣ୍ଟର ପରିଦର୍ଶନ କଲେ 5T ସଚିବ। ମହିଳାଙ୍କ ହାତ ତିଆରି କାଇଁଚରୁ ପ୍ରସ୍ତୁତ ଜିନିଷର ପ୍ରଶଂସା କରିଛନ୍ତି। ଏହାପରେ ବଡମୂଳବସନ୍ତରେ ମାଛଚାଷ ପ୍ରକଳ୍ପ ବୁଲି ଦେଖିଲେ ଭି.କେ ପାଣ୍ଡିଆନ। ସଙ୍କଟମୋଚନ ଓ ମା ଶାରଳା ଏସଏଚଜିଙ୍କ ଦ୍ବାରା ଏହି ପ୍ରକଳ୍ପ ହୋଇଛି।

ଏହାପରେ ପଟ୍ଟାମୁଣ୍ଡାଇ ଅଭିମୁଖେ ବାହାରିଛନ୍ତି 5T ସଚିବ। ନିର୍ମାଣ ହୋଇଥିବା ସ୍କିଲଡେଭଲପମେଣ୍ଟ ସେଣ୍ଟର ବୁଲି ଦେଖିବା ସହ ଇନଡୋର୍ ଷ୍ଟାଡିୟମ ଏବଂ ହଲ ଦେଖି ବରିଷ୍ଠ ଅଧିକାରୀ ମାନଙ୍କ ସହ ଆଲୋଚନା କରିବେ। ଦିନ ଗୋଟାଏରେ ଗୋଲରାହାଟରେ ପହଞ୍ଚି ମିଶନଶକ୍ତି ମହିଳାଙ୍କ ଦ୍ବାରା ପ୍ରସ୍ତୁତ ଏମ୍ବ୍ରୋଡୋରୀ କାରୁକାର୍ଯ୍ୟ ଦେଖିବା ସହ ଜୀବନ ଜୀବିକା ଉପରେ ମହିଳା ମାନଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି। ପରେପରେ ଦଧିବାମନଜୀଉଙ୍କ ଦର୍ଶନ କରିବା ସହ ମନ୍ଦିର ଚର୍ତୁପାର୍ଶ୍ବ ବୁଲି ଦେଖିବେ ପାଣ୍ଡିଆନ୍।

ସେହିପରି ଦିନ ୧ଟା ୧୫ ମିନିଟରେ ଡେରାବିଶର ବ୍ଳକ ଅଫିସ ପରିସରରେ ଥିବା ମିଶନଶକ୍ତି କାଫେରେ ଲଞ୍ଚ କରିବା ସହ ମହିଳା ମାନଙ୍କ ସହ ଭାବ ବିନିମୟ କରିବେ। ପରେ ବଳଦେବ ଜୀଉଙ୍କୁ ଦର୍ଶନ କରିବା ସହ ସଂନ୍ଧ୍ୟା ଆଳତୀ ସମୟରେ ଉପସ୍ଥିତ ରହିବେ। ସନ୍ଧ୍ୟା ୬ଟା ବେଲେ ସର୍କିଟ ହାଉସ ପରିସରରେ ବିଭିନ୍ନ ଆସୋସିଏସନ, ସାମାଜିକ ସଂଗଠନ ଏବଂ ଜନସାଧାରଣ ପ୍ରତିନିଧି ମାନଙ୍କ ସହ ଜିଲ୍ଲାର ବିକାଶ ନେଇ ଆଲୋଚନା କରିବାର କାର୍ଯ୍ୟକ୍ରମ ରହିଛି।

କେନ୍ଦ୍ରାପଡା: ଜଣେ ୱେବ ଚ୍ୟାନେଲ ସାମ୍ବାଦିକଙ୍କୁ ମହିଳା କନେଷ୍ଟବଳଙ୍କ ମାଡ଼ ମାରିବା ଘଟଣାକୁ ନେଇ କେନ୍ଦ୍ରାପଡ଼ା ଜିଲ୍ଲାର କିଛି ବିଧାୟକଙ୍କୁ ଘେରିଛନ୍ତି ସାମ୍ବାଦିକ ସଂଘ । ଗତକାଲି ମହିଳା କନେଷ୍ଟବଳ ଜଣକ ମାସ୍କ ନପିନ୍ଧି କାର୍ଯ୍ୟ କରୁଥିବା ଫଟୋ ଭାଇରାଲକୁ ନେଇ ମହିଳା କନେଷ୍ଟବଳ ଜଣକ ରାଗିଯାଇଥିଲେ । କେନ୍ଦ୍ରାପଡ଼ା ଏସପିଙ୍କ କାର୍ଯ୍ୟାଳୟ ସମ୍ମୁଖରେ ଜଣେ କାର୍ଯ୍ୟରତ ସାମ୍ବାଦିକଙ୍କୁ ମାଡ଼ ମାରିବା ସହ ତାଙ୍କ ସାର୍ଟ ଚିରିଦେଇଥିଲେ । ସାମ୍ବାଦିକ ଜଣକ ନିଜର ପରିଚୟ ଦେଉଥିଲେ ମଧ୍ୟ କିଛି ଶୁଣି ନଥିଲେ ମହିଳା କନେଷ୍ଟବଳ। କେନ୍ଦ୍ରାପଡ଼ା ଏସପିଙ୍କ କାର୍ଯ୍ୟଳୟ ସମ୍ମୁଖରେ ବିଜେପି ଧାରଣାସ୍ଥଳକୁ ଖବର ସଂଗ୍ରହ ପାଇଁ ଯାଇଥିବା ସାମ୍ବାଦିକ ଜଣକ ମହିଳା କନେଷ୍ଟବଳ ମାସ୍କ ପିନ୍ଧିନଥିବା ଫଟୋକୁ ସୋସିଆଲ ମିଡିଆରେ ଛାଡିଥିଲେ। ଏହି ଘଟଣାରେ ଖପ୍ପା ହୋଇ ମହିଳା କନେଷ୍ଟବଳ ଉକ୍ତ ସାମ୍ବାଦିକଙ୍କ କଲରକୁ ଟାଣି ମାଡ଼ ମାରିଥିଲେ । ଏହି ଘଟଣାକୁ ନେଇ ସାମ୍ବାଦିକ ମହଲରେ ନିନ୍ଦା କରାଯାଇଥିବା ବେଳେ ମହିଳା କନେଷ୍ଟବଳଙ୍କ ନିଲମ୍ବନ ଦାବି କରିଛନ୍ତି । ଆଜି କେନ୍ଦ୍ରାପଡାରେ ଏକ ସରକାରୀ କାର୍ଯ୍ୟକ୍ରମରେ ଯୋଗ ଦେବାକୁ ଯାଇଥିବା ଅବସରରେ ଜିଲ୍ଲାର ସବୁ ବିଧାୟକଙ୍କୁ ସାମ୍ବାଦିକମାନେ ଘେରିଥିଲେ । ସାମ୍ବାଦିକଙ୍କ ଉପରେ ହୋଇଥିବା ଆକ୍ରମଣ ଘଟଣାରେ କାର୍ଯ୍ୟାନୁଷ୍ଠାନ ଦାବି କରିଥିଲେ । ସାମ୍ବାଦିକଙ୍କ ଏକ ପ୍ରତିନିଧି ଦଳ ସହ ବିଧାୟକମାନେ ଆଲୋଚନା କରିଥିବା ସୂଚନା ମିଳିଛି ।

ମହାକାଳପଡା: ମହାକାଳପଡା ବ୍ଲକ ରାଜଗଡ ପଞ୍ଚାୟତ ଗୟାସପୁର ଗ୍ରାମର ଜଣେ ଅବସରପ୍ରାପ୍ତ ଶିକ୍ଷକଙ୍କ ଘରେ ମାଲକାନାଗିରି ମାଥିଲି ଅଂଚଳର ଜନୈକ ଆଦିବାସୀ ଛାତ୍ରର ଝୁଲନ୍ତା ମୃତଦେହ ଉଦ୍ଧାର କରାଯାଇଛି । ୨୪ ଘଣ୍ଟା ପୁଲିସ ଝୁଲନ୍ତା ମୃତଦେହକୁ ଜଗିବା ପରେ ଗୁରୁବାର ଅପରାହ୍ନରେ ପରିବାରଲୋକ ଏବଂ ମାଜିଷ୍ଟ୍ରେଟଙ୍କ ଉପସ୍ଥିତିରେ ଉଦ୍ଧାର କରି ପୋଷ୍ଟମର୍ଟମ ପାଇଁ ପଠାଇଥିଲା ।

ଗୟାସପୁର ଗ୍ରାମର ଅବସରପ୍ରାପ୍ତ ଶିକ୍ଷକ କାର୍ତିକ ଲେଙ୍କାଙ୍କ ଘରେ ପ୍ରାୟ ୮ ବର୍ଷ ହେବ ମାଲକାନାଗିରି ମାଥିଲି ଅଂଚଳର ମୁନା ନାଲି ନାମକ ଛାତ୍ର ରହିଆସୁଥିଲା । ସ୍ଥାନୀୟ ବିଣାପାଣୀ ଉଚ୍ଚ ବିଦ୍ୟାଳୟରେ ଦଶମ ଶ୍ରେଣୀରେ ପଢୁଥିଲା। ବୁଧବାର ଅପରାହ୍ନରେ ସେ ରହୁଥିବା ଘରେ ସିଲିଙ୍ଗ ଫ୍ୟାନରେ ରଶି ଲଗାଇ ଆତ୍ମହତ୍ୟା କରିଥିବା ନେଇ ଅବସରପ୍ରାପ୍ତ ଶିକ୍ଷକଙ୍କ ପକ୍ଷରୁ ମହାକାଳପଡା ପୁଲିସକୁ ସୂଚନା ଦିଆଯାଇଥିଲା ।

ଖବର ପାଇ ପୁଲିସ ଗୟାସପୁରରେ ପହଞ୍ଚି ସଂପୃକ୍ତ ଘରକୁ ସିଲ୍ କରି ମୃତଦେହକୁ ଜଗି ରହିଥିଲା । ଗୁରୁବାର ଅପରାହ୍ନରେ ମୃତକଙ୍କ ପରିବାର ଲୋକ ପହଂଚିବା ପରେ ବି ପୁଲିସ ନିକଟରେ କୌଣସି ଅଭିଯୋଗ କରି ନ ଥିଲେ ଫଳରେ ଘରମାଲିକଙ୍କ ଲିଖିତି ସୂଚନାକୁ ଗ୍ରହଣ କରି ପୋଷ୍ଟମର୍ଟମ ପାଇଁ ପଠାଇଥିଲା ।

ତେବେ ଛାତ୍ରର ମୃତ୍ୟୁକୁ ନେଇ ନାନା ପ୍ରଶ୍ନ ଉଙ୍କି ମାରୁଛି ଯାହା ସ୍ଥାନୀୟ ଅଂଚଳରେ ଚର୍ଚ୍ଚାର ବିଷୟ ପାଲଟିଛି । ଜଣେ ମେଧାବୀ ଛାତ୍ର ଭାବରେ ମୁନା ନାଲି ଏନଆରଟିଏସ୍‌,ଏମଏମଏନଏସ୍ ଭଳି ଛାତ୍ରବୃତି ପାଇବାକୁ ଯୋଗ୍ୟ ହୋଇପାରିଥିଲେ । ପ୍ରାଥମିକ ବିଦ୍ୟାଳୟଠାରୁ ଆରମ୍ଭ କରି ଉଚ୍ଚ ବିଦ୍ୟାଳୟ ପର୍ୟ୍ୟନ୍ତ ସମସ୍ତ କ୍ରୀଡାରେ ଚମ୍ପୟାନ ମଧ୍ୟ ହେଉଥିଲା । ତେଣୁ ଜଣେ ମେଧାବୀ ଛାତ୍ରର ଆତ୍ମହତ୍ୟାକୁ ସହଜରେ ଗ୍ରହଣ କରିପାରୁନାହାନ୍ତି ସ୍ଥାନୀୟ ଅଞ୍ଚଳବାସୀ ଏବଂ ସହପାଠୀ ଛାତ୍ରଛାତ୍ରୀମାନେ ।

ଦଶମ ଶ୍ରେଣୀରେ ପଢୁଥିବା ଆଦିବାସୀ ଛାତ୍ର ପ୍ରାୟ ୮ ବର୍ଷ ତଳେ ଅର୍ଥାତ ପ୍ରଥମ ଶ୍ରେଣୀରେ ପଢୁଥିବା ବେଳେ ସୁଦୂର ମାଲକାନାଗିରିରୁ ଆସି କେନ୍ଦ୍ରାପଡାର ଗୟାସପୁରରେ କେମିତି ପହଂଚିଲା । କେମିତି ଏତେ ଛୋଟ ବେଳୁ ରହିପାରିଲା, କେବଳ ପାଠ ପଢିବା ପାଇଁ ରହିଥିଲା ନା ଆଉ କିଛି କାରଣ ରହିଥିଲା ତାହା ପ୍ରଶ୍ନବାଚୀ ସୃଷ୍ଟି କରିଛି ।

କେନ୍ଦ୍ରାପଡା: କେନ୍ଦ୍ରାପଡା ଜିଲ୍ଲା ମେରାଇନ ଥାନା ଅଧିନ ବାହାକୁଦ ଅଞ୍ଚଳରୁ ଏକ ଅଟୋରେ କେତେଜଣ ମହିଳା ରାମନଗର ଆସୁଥିବା ବେଳେ କମେଣ୍ଟ ମରାକୁ କେନ୍ଦ୍ର କରି ଭୁଜାଲିରେ ଆକ୍ରମଣ ହୋଇଥିବା ଅଭିଯୋଗ ହୋଇଛି। ପୁଲିସ ସୂଚନା ମୁତାବକ, ଅଟୋରେ ମହିଳା ଯୁବତୀମାନେ ବାହାକୁଦ ଘାଟରୁ ରାମନଗର ଆସୁଥିବା ବେଳେ ଅଭିଯୁକ୍ତ ସୁଧୀର ବେହେରା ମହିଳା ଯୁବତୀଙ୍କୁ ଦେଖି କମେଣ୍ଟ ପାସ କରିଥିଲେ। ଏହାପରେ ଅଶାଳୀନ ଇଙ୍ଗିତ କରିଥିଲେ। ଏହାକୁ ବିରୋଧ କରିବାରୁ ଅଭିଯୁକ୍ତ ମହିଳା ଯୁବତୀଙ୍କୁ ଅଶ୍ଲୀଳ ଭାଷାରେ ଗାଳିଗୁଲଜ କରିଥିଲା। ଏନେଇ ଅଟୋଚାଳକ ଅଭିଯୁକ୍ତ ବୁଝାସୁଝା କରିବାରୁ ତାଙ୍କୁ ଧକ୍କା ତଣ୍ଟିଆ ଦେଇ ତଳେ ଫୋପାଡ଼ି ଦେଇଥିଲେ। ଏନେଇ ଅଟୋରେ ଥିବା କାଦମ୍ବିନୀ ବେହେରା ତାଙ୍କ ସ୍ୱାମୀଙ୍କୁ ଏସମସ୍ତ ଘଟଣା ଫୋନ କରି କହିବାରୁ ସେ ଘଟଣା ସ୍ଥଳରେ ପହଞ୍ଚିଥିଲେ। କାଦମ୍ବିନୀଙ୍କ ସ୍ୱାମୀ କମେଣ୍ଟ କାହିଁକି କରୁଥିଲ ପଚାରିବାରୁ ତାଙ୍କ ମୁଣ୍ଡକୁ ଭୁଜାଲିରେ ହାଣି ଥିଲେ। ରକ୍ତାତ ଅବସ୍ଥାରେ ତଳେ ପଡିଯିବାରୁ ଅଭିଯୁକ୍ତ ସୁଧୀର ଘଟଣାସ୍ଥଳରୁ ଫେରାର ହୋଇଯାଇଥିଲେ। ସ୍ଥାନୀୟ ଲୋକଙ୍କ ସହାୟତାରେ କାଦମ୍ବିନୀଙ୍କ ସ୍ୱାମୀ ମେଡିକାଲରେ ପହଞ୍ଚିଥିଲେ। ଏନେଇ କାଦମ୍ବିନୀ ମେରାଇନ ଥାନାରେ ଅଭିଯୋଗ କରିବା ପରେ ପୁଲିସ ଏକ ମାମଲା ୭୫/୨୧ ରୁଜୁ କରି ତଦନ୍ତ ଆରମ୍ଭ କରିଛି।

କେନ୍ଦ୍ରାପଡା: କରୋନା ଭ୍ୟାକ୍ସିନ ସର୍ଭେ ନାଁରେ ଲୁଟ ଆରମ୍ଭ ହୋଇଛି। ଗାଁ ଗାଁ ଆଉ ଘର ଘର ଟିକାକରଣ ନେଇ ପଞ୍ଜିକରଣ କରିବାକୁ ଏକ ଲୁଟିଆ ଟିମ ଜିଲ୍ଲାରେ ଲୁଟପାଟ ଆରମ୍ଭ କରିଛନ୍ତି। ଯାହା ଘରେ କେବଳ ମହିଳା ଥିବେ ସେମାନଙ୍କୁ ଟାର୍ଗେଟ କରୁଛନ୍ତି। ବିଭିନ୍ନ ବାହାନାରେ ଘରେ ପଶି ମହିଳାଙ୍କ ମୁହଁକୁ କପଡ଼ାରେ ବନ୍ଦ କରି ବାନ୍ଧି ପକାଉଛନ୍ତି। ପରେ ଦୁର୍ବୃତ୍ତଙ୍କ ମଧ୍ୟରୁ ଜଣେ ସେମାନଙ୍କ ମୁଣ୍ଡରେ ବନ୍ଧୁକ ଆଉ ଅନ୍ୟଜଣେ ଭୁଜାଲି ଦେଖାଇ ଲୁଟ କରି ଫେରାର ହୋଇଯାଉଛନ୍ତି। ଗତ ଦୁଇମାସ ଭିତରେ ଏହିଭଳି ଦୁଇଟି ଘଟଣା ଘଟିଥିଲେ ମଧ୍ୟ କେନ୍ଦ୍ରାପଡା ପୁଲିସ କେବଳ ମାମଲା ରୁଜୁ କରି ଚୁପ ହୋଇ ବସିଛି। ଗତ ମାସ ୧୮ ତାରିଖ ପଟ୍ଟାମୁଣ୍ଡାଇ ଥାନା ଅଧିନ ନସିପୁର ଅଞ୍ଚଳରେ କୁଳମଣି ରାଉତଙ୍କ ଘରେ ପଶି ସର୍ବସ୍ୱ ଲୁଟିନେଇଛନ୍ତି ଦୁର୍ବୃତ୍ତ।

ପୁଲିସ ସୂଚନା ମୁତାବକ, କୁଳମଣି ଏବଂ ତାଙ୍କ ପୁଅ ପଟ୍ଟାମୁଣ୍ଡାଇ ଯାଇଥିଲେ। ଘରେ କୂଳମଣିଙ୍କ ପତ୍ନୀ ରଙ୍ଗଲତା ରାଉତ ଆଉ ତାଙ୍କ ନାତୁଣୀ ଥିଲେ। ରଙ୍ଗଲତା ଜଳଖିଆ ଖାଉଥିବା ସମୟରେ କେହି ତାଙ୍କ ଗ୍ରୀଲ ବାଡେଇଥିଲେ। ରଙ୍ଗଲତା ଗ୍ରୀଲ ଖୋଲି ପଚାରିବାରୁ ଏକ ୩ ଜଣିଆ ଟିମ କୋଭିଡ ଭ୍ୟାକ୍ସିନ ସର୍ଭେ ନେଇ ଆସିଥିବା କହିଥିଲେ। ଏନେଇ ଘର ପରିବାରର ସମସ୍ତଙ୍କ ଆଧାରକାର୍ଡ ମାଗିଥିଲେ। ଏନେଇ ରଙ୍ଗଲତା ତାଙ୍କ ସ୍ୱାମୀ କୂଳମଣିଙ୍କୁ ଫୋନ ଲଗାଇଥିଲେ। ଦୁର୍ବୃତ୍ତ ବଳପୂର୍ବକ ରଙ୍ଗଲତାଙ୍କ ଘରେ ପଶି ମୋବାଇଲ ଝାମ୍ପି ନେଇ ସୁଇଚ ବନ୍ଦ କରିଦେଇଥିଲେ। ରଙ୍ଗଲତା ଆଉ ତାଙ୍କ ନାତୁଣୀଙ୍କ ମୁହଁକୁ କପଡ଼ାରେ ବନ୍ଦ କରିଦେଲେ। ଆଉ ଘରର ଖୁଣ୍ଟରେ ସେମାନଙ୍କୁ ବାନ୍ଧି ଦେଲେ। ସେମାନଙ୍କ ମଧ୍ୟରୁ ଜଣେ ଦୁର୍ବୃତ୍ତ ରଙ୍ଗଲତାଙ୍କ ମୁଣ୍ଡରେ ବନ୍ଧୁକ ଲଗାଇଥିବା ବେଳେ ଅନ୍ୟଜଣେ ନାତୁଣୀଙ୍କ ବେକରେ ଭୁଜାଲି ଲଗାଇ ଜୀବନରୁ ମାରିଦେବା ନେଇ ଭୟଭୀତ କରାଇଥିଲେ। ତୃତୀୟ ଦୁର୍ବୁତ୍ତ ଘରର ଟ୍ରଙ୍ଗ, ଆଟାଚ ଆଉ ଗଡ଼ରେଜ ଖୋଜି ସୁନା ଅଳଙ୍କାର ଆଉ ଟଙ୍କା ବାହାର କରିଥିଲେ କ୍ଷ ୬ଟି ସୁନା ମୁଦି, ଗୋଟିଏ ସୁନା ଚେନ, ଦୁଇହଳ ରୁପା ପାଉଁଜି, ଦୁଇଟି କାନଫୁଲ, ରୂପାମୁଦ୍ରା, ସୁନା ବାହୁଟି ଏବଂ ଗଡ଼ରେଜ ଭାଙ୍ଗି ୨ ଲକ୍ଷ ୭୫ ହଜାର ଟଙ୍କା କ୍ୟାସ ଲୁଟି ନେଇଥିଲେ। ସମୁଦାୟ ଟଙ୍କା ଆଉ ସୁନା ମିଶି ୪ ଲକ୍ଷ ଟଙ୍କା ଲୁଟ ହୋଇଥିବା ନେଇ ପଟ୍ଟାମୁଣ୍ଡାଇ ଥାନାରେ ଅଭିଯୋଗ ହୋଇଛି। ଏନେଇ ପୁଲିସ ୨୯୯/୨୧ ମାମଲା ରୁଜୁ କରିଛି। ହେଲେ ଏହି ଲୁଟିଆ ଗ୍ୟାଙ୍ଗର କୌଣସି ପତା ପାଉନଥିବା ଜାଣିବାକୁ ମିଳିଛି। ଏନେଇ ଥାନା ଅଧିକାରୀ ରାକେଶ ତ୍ରିପାଠୀ କୁହନ୍ତି ଘଟଣାର ତଦନ୍ତ ଚାଲିଛି। ଖୁବଶୀଘ୍ର ଅଭିଯୁକ୍ତଙ୍କୁ ଗିରଫ କରିବୁ ବୋଲି ସେ କହିଛନ୍ତି।

ମହାକାଳପଡା: ପରିବେଶ ସନ୍ତୁଳନ ରକ୍ଷା କ୍ଷେତ୍ରରେ କଇଁଛ ମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଥିବା ନେଇ ପରିବେଶବିତ୍ ମାନେ ମତବ୍ୟକ୍ତ କରିବା ସହିତ ବିଶେଷଜ୍ଞ ମାନେ ମଧ୍ୟ ମତପୋଷଣ କରୁଛନ୍ତି । ସମୁଦ୍ର ପଥରେ ଅଲିଭ ରିଡଲେ ଭଳି କଇଁଛ ମାନେ ମଧ୍ୟ ଲକ୍ଷ ଲକ୍ଷ ସଂଖ୍ୟାରେ ଆସି ଗହିରମଥା ଅଂଚଳରେ ଅଣ୍ଡାଦାନ କରିଥାନ୍ତି । ସେମାନଙ୍କଲୁ ସୁରକ୍ଷା ଦେବା ପାଇଁ ବନବିଭାଗ ସଚେତନତା କାର୍ଯ୍ଯକ୍ରମ କରିଥାଏ ଏବଂ କଇଁଛମାନଙ୍କ ଆଗମନ ସମୟରେ ସମୁଦ୍ର ଏବଂ ନଦୀରେ ମାଛମାରିବା ଏବଂ ଟ୍ରଲର ଚଳାଚଳ ନେଇ କଟକଣା ଲଗାଯାଇଥାଏ । ମାତ୍ର ବନବିଭାଗ କାର୍ଯ୍ଯାଳୟର କେଇ ମିଟର ଦୂରରେ କଇଁଛ ମକଟା ଯାଇ ଅବାଧରେ ମାଂସ ବିକ୍ରି ହେଉଥିବା ଘଟଣା ମହାକାଳପଡା ଅଂଚଳରେ ଚର୍ଚ୍ଚାର ବିଷୟ ପାଲଟିଛି।

କଇଁଛ କଟା ଯାଇ ମାଂସ ବିକ୍ରି କରାଯାଉଥିବା ନେଇ ଭିଡିଓ ବିଭିନ୍ନ ସାମାଜିକ ଗଣମାଧ୍ୟମରେ ଘୁରି ବୁଲିବା ପରେ ମଧ୍ୟ ବନବିଭାଗ ପକ୍ଷରୁ କୌଣସି ପ୍ରକାର ତତ୍ପରତା ଦେଖା ନ ଯିବା ପରିବେଶବିତ୍ ମାନଙ୍କୁ ଆଶ୍ଚର୍ଯ୍ଯ ଲାଗୁଛି। ବନ୍ୟପ୍ରାଣୀ ସିଡୁଲ୍‌-୨ ପାର୍ଟ୧ଶ୍ରେଣୀ ଭୁକ୍ତ ପ୍ରକାରର ୪ଟି କଇଁଛକୁ ଦୁଇଜଣ ଯୁବକ ମହାକାଳପଡାର ଛପାଲି ଗୋଡା ଅଂଚଳରେ କାଟୁଥିଲେ । ସେହି ପ୍ରଜାତିର କଇଁଛଙ୍କ ବଂଶ ଏବେ ବିପଦରେ ପଡିଛି ।ଏହି ଭଳି ପ୍ରଜାତିର କଇଁଛ ଗହିରମଥା ସାମୁଦ୍ରିକ ଅଭୟାରଣ୍ୟ ଓ ମହାକାଳପଡା ବନାଂଚଳ ଅଧିନ ନଦୀନାଳ, ପୋଖରୀରେ ଦେଖିବାକୁ ମିଳିଥାନ୍ତି । ଏହି ପ୍ରଜାତିର କଇଁଛ ମାଂସକୁ ଚଢା ଦରରେ କିଛି ଅସାଧୁ ବ୍ୟବସାୟୀମାନେ କିଗ୍ରା ପ୍ରତି ୩୦୦ ରୁ ୫୦୦ ଟଙ୍କାରେ ବିକ୍ରି କରିବା ସହିତ ବସ୍‌ ଯାଗେ କଲିକତାକୁ ମଧ୍ୟ ଚାଲାଣ କରନ୍ତି । ଏବେ ବସ୍ ଚଳାଚଳ ବନ୍ଦ ଥିବାରୁ ସ୍ଥାନୀୟ ଅଂଚଳରେ ଖୂଲମଖୁଲା ମାଂସ କାଟି ବିକ୍ରି କରୁଥିବା ଦେଖିବାକୁ ମିଲିଛି। ସବୁଠାରୁ ଆଶ୍ଚର୍ଯ୍ଯର କଥା ବନବିଭାଗ କାର୍ୟ୍ୟାଳୟର ପାଖାପାଖୀ ଅଂଚଳରେ କଇଁଛ କଟାଯାଇ ବିକ୍ରି ହେଉଥିବା ଜଣା ପଡିବା ପରେ ବନବିଭାଗର ଦାୟିତ୍ୱହିନତା ପଦାରେ ପଡିଛି । ବର୍ତମାନ କଇଁଛ ମାନଙ୍କ ମିଳନ ଋତୁ ଆରମ୍ଭ ହୋଇଥିବାରୁ ବନବିଭାଗ ଅଧିକ ସତର୍କତା ଅବଲମ୍ବନ କରିବା ଆବଶ୍ୟକ ବୋଲି ପରିବଶେବିତ୍ ସମରେନ୍ଦ୍ର ମାହାଳି କହିଛନ୍ତି । ଅବାଧରେ କଇଁଛ ମାଂସ ବିକ୍ରି ହେଉଥିବା ନେଇ ଜମ୍ବୁ ରେଂଜ ଅଧିକାରୀ ସାହାଜୀ ଚରଣ ବିଶ୍ୱାଳଙ୍କୁ ପ୍ରତିକ୍ରିୟା ମିଳି ପାରି ନାହିଁ ।