ଆଡିଲେଡ୍‌: ଅଷ୍ଟ୍ରେଲିଆର ଆଡିଲେଡ୍‌ ଗ୍ରାଉଣ୍ଡରେ ଆଜି ୨ୟ ସେମିଫାଇନାଲ ମ୍ୟଚ ଖେଳାଯାଉଛି । ଏହି ମ୍ୟାଚରେ ଭାରତ-ଇଂଲଣ୍ଡ ମୁହାଁମୁହିଁ ହୋଇଛନ୍ତି। ୨ୟ ସେମିଫାଇନାଲରେ ଟସ୍‌ ଜିତି ଇଂଲଣ୍ଡ ପ୍ରଥମେ ବୋଲିଂ ନଷ୍ପତ୍ତି ନେଇଛି। ଫଳରେ ଭାରତ ପ୍ରଥମେ ବ୍ୟାଟିଂ କରି ୬ ୱିକେଟ ହରାଇ ୧୬୮ ରନ କରିଛି।  ଏହି ମ୍ୟଚକୁ ଇଂଲଣ୍ଡ ଜିତିବାକୁ ହେଲେ ୧୬୯ ରନର ଆବଶ୍ୟକତା ରହିଛି।

ଭାରତ ପକ୍ଷରୁ ଲୋକେଶ ରାହୁଲ ୫ ବଲରେ ୫ ରନ କରି ଆଉଟ ହୋଇଥିଲେ। ପରେ ପାରିକୁ ବିରାଟ କୋହଲି ଓ ରୋହିତ ଶର୍ମା ସମ୍ଭାଳିଥିଲେ। ରୋହିତ ଶର୍ମା ୨୮ ବଲରେ ୨୭ ରନ କରି ଆଉଟ ହୋଇଥିଲେ। ପରେ ସୂର୍ଯ୍ୟକୁମାର ଯାଦବ ୧୦ ବଲରେ ୧୪ ରନ କରି ଆଉଟ ହେଇଥିଲେ। ବିରାଟ କୋହଲିଙ୍କ ସହ ହାର୍ଦ୍ଦିକ ପାଣ୍ଡ୍ୟା ଯୋଗ ଦେଇ ଇଂନିସକୁ ଆଗକୁ ବଢାଇଥିଲେ। ପରେ ବିରାଟ କୋହଲି ଏକ ଅର୍ଦ୍ଧଶତକୀୟ ଇଂନିସ ଖେଳି ଆଉଟ ହୋଇଥିଲେ। ବିରାଟ କୋହଲି ୪୦ ବଲରେ ୫୦ ରନ କରି ଆଉଟ ହୋଇଥିଲେ। ପରେ ଋଷଭ ପନ୍ତ ଆସି ପାରିକୁ ସମ୍ଭାଳିଥିଲେ। ହାର୍ଦ୍ଦିକ ପାଣ୍ଡ୍ୟା ମଧ୍ୟ ଏକ ଅର୍ଦ୍ଧ ଶତକୀୟ ଇଂନିସ ଖେଲିଥିଲେ। ହାର୍ଦ୍ଦିକ ପାଣ୍ଡ୍ୟା  ୩୩ ବଲରେ ୬୩ ରନ କରି ୨୦ ଓଭରର ଶେଷ ବଲରେ ଆଉଟ ହୋଇଥିଲେ। ଋଷଭ ପନ୍ତ ୪ ବଲରେ ୬ ରନ କରି ରନ ଆଉଟ ହୋଇଥିଲେ।

ଇଂଲଣ୍ଡ ପକ୍ଷରୁ କ୍ରିସ ଜୋର୍ଡନ ୩ ଟି ୱିକେଟ ନେଇଥିବା ବେଳ ଆଡିଲ ରସିଦ ଓ କ୍ରିସ ୱକ୍ସ ଗୋଟିଏ ଲେଖାଏଁ ୱିକେଟ ନେଇଥିଲେ।

ଆଡିଲେଡ୍‌: ‘ଇଂଲଣ୍ଡକୁ ଆମେ ଇଂଲଣ୍ଡ ମାଟିରେ ପରାସ୍ତ କରିଛୁ। ଏହି ଦଳର ଖେଳ ସମ୍ପର୍କରେ ଆମେ ଭଲ ଭାବେ ଅବଗତ ଅଛୁ। ଚଳିତ ବିଶ୍ୱକପ୍‌ରେ ଆମ ଖେଳାଳିମାନେ ଭଲ ପ୍ରଦର୍ଶନ କରୁଛନ୍ତି। ଏଣୁ ଆମେ ଗୁରୁବାର ଖେଳାଯିବାକୁ ଥିବା ଇଂଲଣ୍ଡ ବିପକ୍ଷ ଦ୍ୱିତୀୟ ସେମିଫାଇନାଲରେ ଭଲ ପ୍ରଦର୍ଶନ କରିବୁ’ ବୋଲି କହିଛନ୍ତି ଭାରତୀୟ ଦଳର ଅଧିନାୟକ ରୋହିତ ଶର୍ମା। ଫର୍ମରେ ନଥିବା (୫ମ୍ୟାଚ୍‌ରେ ୮୯ରନ୍‌) ଓ ମଙ୍ଗଳବାର ଅଭ୍ୟାସ ବେଳେ ଆହତ ହୋଇଥିବା ଅଧିନାୟକ ରୋହିତ ଇଂଲଣ୍ଡ ବିପକ୍ଷରେ ମ୍ୟାଚ୍‌ ଜିତିବେ ବୋଲି କହିବାକୁ କୁଣ୍ଠା ପ୍ରକାଶ କରିଛନ୍ତି। ଗତ ଜୁଲାଇ ମାସରେ ଇଂଲଣ୍ଡ ଗସ୍ତରେ ଯାଇଥିବା ଭାରତ ୨-୧ରେ ଟି-୨୦ ସିରିଜ୍‌ ଜିତିଥିଲା। ଏହି ସିରିଜ୍‌ରେ ଭାରତର ବର୍ତ୍ତମାନ ମୁଖ୍ୟ ବ୍ୟାଟର ସୂର୍ଯ୍ୟକୁମାର ଯାଦବ ୧୭୧ ରନ୍‌ କରିଥିଲେ। ଶେଷ ମ୍ୟାଚ୍‌ରେ ସେ ଏକାକୀ ୫୫ ବଲ୍‌ରେ ୧୧୭ ରନ୍‌ କରି ଭାରତକୁ ବିଜୟର ନିକଟକୁ ନେଇଥିଲେ ମଧ୍ୟ ଜିତାଇ ପାରି ନଥିଲେ। ଏବେ ସେହି ସୂର୍ଯ୍ୟକୁମାର ଚଳିତ ବିଶ୍ୱକପ୍‌ରେ ଜବରଦସ୍ତ ଫର୍ମରେ ଅଛନ୍ତି। ୩୬୦ ଡିଗ୍ରିରେ ବ୍ୟାଟିଂ କରୁଛନ୍ତି। ଫର୍ମକୁ ଫେରିଥିବା ବିରାଟ କୋହଲି ଯଦି ତାଙ୍କୁ ସାଥ୍‌ ଦିଅନ୍ତି କିମ୍ବା ଉଭୟ ଖେଳାଳି ଏହି ମ୍ୟାଚ୍‌ରେ କ୍ଲିକ୍‌ କରନ୍ତି, ତେବେ ଇଂଲଣ୍ଡ ନିକଟରେ ଯେତେ ଟାଣୁଆ କିମ୍ବା କୁଶଳୀ ବୋଲର ଥିଲେ ମଧ୍ୟ ଏମାନଙ୍କୁ ଅଟକାଇବା କଷ୍ଟକର। ଆଡିଲେଡ୍‌ ପିଚ୍‌ ଟିକେ ଭାରତୀୟଙ୍କ ଲାଗି ଅଡୁଆ ସୃଷ୍ଟି କରିପାରେ। ଚଳିତ ଟୁର୍ଣ୍ଣାମେଣ୍ଟରେ ଦ୍ରୁତତମ ବୋଲର ଭାବେ ବିବେଚିତ ମାର୍କ ଉଡ୍‌ ଆହତ ହେବାରୁ ଏହି ମ୍ୟାଚ୍‌ ଖେଳୁ ନାହାନ୍ତି। ଫଳରେ ଭାରତୀୟ ବ୍ୟାଟର କିଛି ପରିମାଣରେ ଆଶ୍ୱସ୍ତ। ସାମ କୁରାନଙ୍କ କଟର, ଡେଭିଡ୍‌ ୱିଲି କିମ୍ବା କ୍ରିସ୍‌ ଓକ୍ସ କିମ୍ବା କ୍ରିସ୍‌ ଜୋର୍ଡାନ ଭାରତୀୟ ବ୍ୟାଟରଙ୍କୁ ଅଡୁଆରେ ପକାଇବା ସମ୍ଭାବନା କମ୍‌। ଦଳରେ ଥିବା ଦୁଇ ସ୍ପିନର ଆଦିଲ ରଶିଦ୍‌ ଓ ମୋଇନ୍‌ ଅଲ୍ଲୀଙ୍କ ବିପକ୍ଷରେ ଭାରତର ପ୍ରଦର୍ଶନ ଭଲ ନାହିଁ। ସେହିପରି ଭାବେ ଜୋଶ୍‌ ବଟ୍ଟଲର, ଆଲେକ୍ସ ହେଲ୍ସ, ଲିଆମ ଲିଭିଙ୍ଗଷ୍ଟୋନ୍‌, ନୂଆ ତାରକା ହ୍ୟାରୀ ବ୍ରୁକ୍ସ, ଫିଲିପ୍‌ ସଲ୍ଟ ଓ ଅଲରାଉଣ୍ଡର ବେନ୍‌ ଷ୍ଟୋକ୍ସଙ୍କୁ ଭାରତୀୟ ଅଲରାଉଣ୍ଡର ଅଣଦେଖା କରିପାରିବେ ନାହିଁ। ଭାରତୀୟ ବୋଲରଙ୍କ ନିକଟରେ ଏତେ ଅଭିଜ୍ଞତା ନାହିଁ, ତଥାପି ବ୍ୟାଟରଙ୍କଠାରୁ ଭଲ ପ୍ରଦର୍ଶନ ମିଳିଲେ ଏମାନେ ପ୍ରଭାବୀ ପ୍ରଦର୍ଶନ କରିବାରେ ପଛଘୁଞ୍ଚା ଦେବେ ନାହିଁ।

ଭାରତ ମଧ୍ୟ ଚୂଡାନ୍ତ ଏକାଦଶ ଚୟନ କରିପାରି ନାହିଁ। ରୋହିତ ଶର୍ମାଙ୍କ ଅନୁଯାୟୀ ଆମେ ମ୍ୟାଚ୍‌ ପୂର୍ବରୁ ଚୂଡାନ୍ତ ଖେଳାଳି ଚୟନ କରୁନାହୁଁ। ବହୁ ପୂର୍ବରୁ କିଏ କେଉଁ ମ୍ୟାଚ୍‌ ଖେଳିବେ ସେ ସମ୍ପର୍କରେ ନିଷ୍ପତ୍ତି ନେଇଥାଉ। କିନ୍ତୁ ଏହି ନକ୍‌ଆଉଟ ମ୍ୟାଚ୍‌ ପୂର୍ବରୁ ଚୂଡାନ୍ତ ଖେଳାଳି ଚୟନ କରାଯିବ। ଅକ୍ଷର ପଟେଲ କିମ୍ବା ଯୁଜବେନ୍ଦ୍ର ଚହଲଙ୍କ ମଧ୍ୟରୁ କାହାକୁ ଖେଳାଯିବ ତାହା ମଧ୍ୟ ସ୍ଥିର ହୋଇନାହିଁ। ଆଡିଲେଡ୍‌ରେ ଏହି ମୁକାବିଲା ଯେଉଁଠାରେ ଖେଳାଯିବ, ସେଠାରେ ପୂର୍ବରୁ ମ୍ୟାଚ୍‌ ଅନୁଷ୍ଠିତ ହୋଇଯାଇଥିବାରୁ ଚହଲଙ୍କୁ ସୁଯୋଗ ମିଳିବା ସମ୍ଭାବନା ରହିଛି। ସେହିପରି ଭାରତୀୟ ଟପ୍‌ ଅର୍ଡରରେ ଜଣେ ବାମହାତୀ ବ୍ୟାଟରଙ୍କୁ ଖେଳାଇବା ନିଷ୍ପତ୍ତି ହେଲେ ପନ୍ତ୍‌ଙ୍କ ପଲା ଭାରି ରହିପାରେ। ଯିଏ ଏହି ମ୍ୟାଚ୍‌ ଖେଳନ୍ତୁ କାହିଁକି ଚାପକୁ ସମ୍ଭାଳିପାରିଲେ ସଫଳ ହେବେ।

ନକ୍‌ଆଉଟରେ ଭାରତର ପ୍ରଦର୍ଶନ ଭଲ ନୁହେଁ ଦୀର୍ଘ ୩୫ ବର୍ଷ ପରେ ଭାରତ ଓ ଇଂଲଣ୍ଡ ମଧ୍ୟରେ ଆଇସିସି ନକ୍‌ଆଉଟ ସେମିଫାଇନାଲ ଖେଳାଯିବ। ୧୯୮୭ ଦିନିକିଆ ବିଶ୍ୱକପ୍‌ ସେମିଫାଇନାଲରେ ଇଂଲଣ୍ଡ ବିଜୟୀ ହୋଇଥିଲା। ନିକଟରେ ଭାରତ ଖେଳିଥିବା ୨୦୧୪ ଟି-୨୦ ବିଶ୍ୱକପ୍‌ ଫାଇନାଲ, ୨୦୧୬ ଟି-୨୦ ବିଶ୍ୱକପ୍‌ ସେମିଫାଇନାଲ, ୨୦୧୭ ଚାମ୍ପିଅନ୍ସ ଟ୍ରଫି ଫାଇନାଲ ଓ ୨୦୧୯ ଦିନିକିଆ ବିଶ୍ୱକପ୍‌ ସେମିଫାଇନାଲରେ ପରାଜିତ ହୋଇଥିଲା। ୨୦୧୩ରେ ଭାରତ ଶେଷଥର ଆଇସିସି ଟ୍ରଫି ଭାବେ ଚାମ୍ପିଅନ୍ସ ଟ୍ରଫି ଜିତିଥିଲା।

ସିଡନି : ସିଡନି କ୍ରିକେଟ ଗ୍ରାଉଣ୍ଡଠାରେ ଚାଲିଥିବା ଟି-୨୦ ବିଶ୍ବକପ୍ ପ୍ରଥମ ସେମିଫାଇନାଲ ମ୍ୟାଚରେ ପାକିସ୍ତାନ ୭ ୱିିକେଟରେ ନ୍ୟୁଜିଲାଣ୍ଡକୁ ହରାଇ ଫାଇନାଲରେ ପ୍ରବେଶ କରିଛି। ଏହି ମ୍ୟାଚରେ ନ୍ୟୁଜିଲାଣ୍ଡ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରି ନ୍ୟୁଜିଲାଣ୍ଡ ୨୦ ଓଭରରେ ୪ ଓ୍ବିକେଟ ହରାଇ ୧୫୨ ରନ କରିଥିଲା । ଫାଇନାଲକୁ ପ୍ରବେଶ କରିବାକୁ ୧୫୩ ରନ୍‌ର ବିଜୟ ଲକ୍ଷ୍ୟନେଇ ପଡିଆକୁ ଓହ୍ଲାଇଥିବା ପାକିସ୍ତାନ ପ୍ରଥମରୁ ଜବରଦସ୍ତ ଆରମ୍ଭ କରିଥିଲା। ଦୁଇ ଓପନର ବାବର ଆଜମ ଓ ରିଜୱାନ ଦମ୍‌ଦାର ଖେଳ ପଦର୍ଶନ କରିବା ସହ ପାକିସ୍ତାନର ବିଜୟରେ ମୁଖ୍ୟ ଭୂମିକା ନେଇଥିଲେ।

ଆଜିର ମ୍ୟାଚ୍‌ରେ ପାକିସ୍ତାନର ଦୁଇ ଓପନର ବ୍ୟାଟ୍ସମ୍ୟାନ୍‌ ଜବରଦସ୍ତ ପ୍ରଦର୍ଶନ କରିଛନ୍ତି। ଦୁହେଁ ଅର୍ଦ୍ଧଶତକ ହାସଲ କରିଛନ୍ତି। ମହମ୍ମଦ ରିଜୱାନ ସର୍ବାଧିକ ୫୭ ରନ୍ କରିଥିବା ବେଳେ ବାବର ଆଜମ ୫୩ ରନ୍ କରିଛନ୍ତି। ସେହିପରି ମହମ୍ମଦ ହାରିସ ୩୦ ରନରେ ଯୋଗଦାନ ଦେଇଛନ୍ତି। ଆସନ୍ତାକାଲି ଭାରତ ଓ ଇଂଲଣ୍ଡ ମଧ୍ୟରେ ସେମିଫାଇନାଲ ମ୍ୟାଚ୍ ଖେଳାଯିବ। ଯିଏ ଜିତିବ ସିଏ ପାକିସ୍ତାନ ସହିତ ଫାଇନାଲ ଖେଳିବ।

ଆଜି ସିଡନି କ୍ରିକେଟ ଗ୍ରାଉଣ୍ଡଠାରେ ଖେଳାଯାଉଥିବା ପ୍ରଥମ ସେମିଫାଇନାଲରେ  ନ୍ୟୁଜିଲାଣ୍ଡ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରି ନ୍ୟୁଜିଲାଣ୍ଡ ୨୦ ଓଭରରେ ୪ ଓ୍ବିକେଟ ହରାଇ ୧୫୨ ରନ କରିଥିଲା । ଦଳ ଆରମ୍ଭରୁ ଫିନ ଆଲେନଙ୍କ ଓ୍ବିକେଟ୍ ହରାଇଥିଲେ ବି ଡେଭନ କନଓ୍ବେ ଓ ଅଧିନାୟକ କେନ ଓ୍ବିଲିୟମସନ ସତର୍କତାର ସହ ବ୍ୟାଟିଂ କରି ଦଳୀୟ ସ୍ଥିତିକୁ ସୁଧାରିଥିଲେ । ଦଳ ପକ୍ଷରୁ ଡେରିଲ ମିଚେଲ ସର୍ବାଧିକ ୫୩ ରନ (ଅପରାଜିତ) କରିଥିବାବେଳେ କେନ ଓ୍ବିଲିୟମସନ ୪୬ ରନ ଓ ଡେଭନ କନଓ୍ବେ ୨୧ ରନ କରିଥିଲେ । ସେହିପରି ଜେମ୍ସ ନିସାମ ୧୬ରନ କରି ଅପରାଜିତ ଥିଲେ ।ପାକିସ୍ତାନ ପକ୍ଷରୁ ସାହିନ ଆଫ୍ରିଦି ୨ଟି ଓ୍ବିକେଟ ନେଇଥିବାବେଳେ ମହମ୍ମଦ ନଓ୍ବାଜ୍ ଗୋଟିଏ ଓ୍ବିକେଟ ନେଇଥିଲେ ।

ଫାଇନାଲକୁ ପ୍ରବେଶ କରିବାକୁ ୧୫୩ ରନ୍‌ର ବିଜୟ ଲକ୍ଷ୍ୟନେଇ ପଡିଆକୁ ଓହ୍ଲାଇଥିବା ପାକିସ୍ତାନ ଦଳ ପକ୍ଷରୁ ଓପନର ମହମ୍ମଦ ରିଜୱାନ ଓ ବାବର ଆଜମ ଦମ୍‌ଦାର ଇନିଂସ ଖେଳିଥିଲେ। ଦୁହେଁ ଶତକୀୟ ଭାଗିଦାରୀ କରିଥିଲେ। ଉଭୟ ଅର୍ଦ୍ଧଶତକ କରିଥିଲେ। ୧୨.୪ ଓଭରରେ ଅଧିନାୟକ ବାବର ଆଜମ ଆଉଟ ହୋଇଥିଲେ। ଟ୍ରେଣ୍ଟ ବୋଲ୍ଟଙ୍କ ବଲ୍‌ରେ ସେ ଡେରିଲ ମିଚେଲଙ୍କ ଦ୍ୱାରା କ୍ୟାଚ୍ ଆଉଟ୍ ହୋଇଥିଲେ। ପ୍ୟାଭିଲିୟନକୁ ଫେରିଲା ବେଳକୁ ସେ ୪୨ ବଲ୍‌ରେ ୭ଟି ଚୌକା ସହାୟତାରେ ୫୩ ରନ୍ କରିଥିଲେ।

ବାବର ଆଉଟ୍ ହୋଇଯିବା ପରେ ମହମ୍ମଦ ରିଜୱାନଙ୍କ ସହିତ ଯୋଡ଼ି ହୋଇଥିଲେ ମହମ୍ମଦ ହାରିସ୍‌। ତେବେ ୧୬.୬ ଓଭରରେ ରିଜୱାନ ଆଉଟ୍ ହୋଇଯାଇଥିଲେ। ସେ ୪୩ଟି ବଲ୍‌ରୁ ୫ଟି ଚୌକା ସହାୟତାରେ ୫୭ ରନ୍ କରିଥିଲେ। ଟ୍ରେଣ୍ଟ ବୋଲ୍ଟଙ୍କ ବଲ୍‌ରେ ଗ୍ଲେନ୍ ଫିଲିପ୍ସଙ୍କ ଦ୍ୱାରା ସେ କ୍ୟାଚ୍ ଆଉଟ୍ ହୋଇଥିଲେ। ୧୮.୬ ଓଭରରେ ମହମ୍ମଦ ହାରିସ୍ ୨୬ଟି ବଲ୍‌ରୁ ୨ଟି ଚୌକା ଓ ଗୋଟିଏ ଛକା ସହାୟତାରେ ୩୦ ରନ୍ କରିଥିଲେ।

ସିଡନୀ: ନ୍ୟୁଜିଲାଣ୍ଡ ଓ ପାକିସ୍ତାନ ମଧ୍ୟରେ ୨୦୨୨ ଟି-୨୦ ବିଶ୍ୱକପ୍‌ର ପ୍ରଥମ ସେମିଫାଇନାଲ ମୁକାବିଲା ଏଠାରେ ଆଜି ଖେଳାଯିବ। ଏହି ମ୍ୟାଚ୍‌ ପୂର୍ବରୁ ଉଭୟ ଦଳ ଭଲ ପ୍ରସ୍ତୁତି କରିନେଇଛନ୍ତି। ଏହି ମ୍ୟାଚ୍‌ରେ ନ୍ୟୁଜିଲାଣ୍ଡ ଟିମ୍‌କୁ ଶକ୍ତିଶାଳୀ ମନେକରାଯାଉଥିଲେ ମଧ୍ୟ ପାକିସ୍ତାନର ମନୋବଳ ସୁଦୃଢ଼ ରହିଛି। ଉଭୟ ଦଳ ନିକଟରେ ଏହି ମ୍ୟାଚ୍‌ ଜିତିବାର ଦକ୍ଷତା ଓ କ୍ଷମତା ରହିଛି। କିନ୍ତୁ ପୂର୍ବ ରେକର୍ଡ ଓ ଉତ୍ସାହକୁ ଦେଖିଲେ ପାକିସ୍ତାନକୁ ଏହି ମୁକାବିଲାରେ ସାମାନ୍ୟ ଫେବରିଟ୍‌ ମନେକରାଯାଉଛି।

ସେମିଫାଇନାଲ ପୂର୍ବରୁ ପ୍ରଦର୍ଶନ: ଆୟୋଜକ ଅଷ୍ଟ୍ରେଲିଆ, ଶ୍ରୀଲଙ୍କା ଓ ଆୟର୍ଲାଣ୍ଡକୁ ପରାସ୍ତ କରିବା ପରେ ନ୍ୟୁଜିଲାଣ୍ଡ ସୁପର-୧୨ ଗ୍ରୁପ୍‌-୧’ରେ ଶୀର୍ଷସ୍ଥାନ ହାସଲ କରି ସେମିଫାଇନାଲରେ ପ୍ରବେଶ କରିଛି। ଦଳ ଇଂଲଣ୍ଡ ନିକଟରୁ ହାରିଥିଲାବେଳେ ଆଫଗାନିସ୍ତାନ ବିପକ୍ଷ ମୁକାବିଲା ବର୍ଷା ଯୋଗୁଁ ବାତିଲ ହୋଇଥିଲା। ଅନ୍ୟପକ୍ଷରେ ପାକିସ୍ତାନ ଦୁଇଟି ଗୁରୁତ୍ୱପୂର୍ଣ୍ଣ ମୁକାବିଲାରେ ଭାରତ ଓ ଜିମ୍ବାୱେଠାରୁ ହାରିଯିବା ପରେ ସ୍ୱଦେଶ ଫେରିବା ଆଶଙ୍କାରେ ଥିଲ। କିନ୍ତୁ ଦକ୍ଷିଣ ଆଫ୍ରିକାକୁ ନେଦରଲାଣ୍ଡ୍‌ସ ହରାଇ ପାକିସ୍ତାନକୁ ସେମିଫାଇନାଲକୁ ଯିବାର ସୁଯୋଗ ଦେଇଥିଲା। ଏହା ପରେ ସେମିଫାଇନାଲରେ ପ୍ରବେଶ କରିବାକୁ ହେଲେ ପାକିସ୍ତାନ ଲାଗି ବାଂଲାଦେଶକୁ ହରାଇବା ଆବଶ୍ୟକ ହେଉଥିଲା। ପାକିସ୍ତାନ ସହଜରେ ଏହି ମ୍ୟାଚ୍‌ ଜିତି ସେମିଫାଇନାଲରେ ପ୍ରବେଶ କରିଥିଲା। ୧୯୯୨ ଅଷ୍ଟ୍ରେଲିଆରେ ଖେଳାଯାଇଥିବା ଦିନିକିଆ ବିଶ୍ୱକପ୍‌ରେ ପାକିସ୍ତାନର ସମାନ ଅବସ୍ଥା ରହିଥିଲା। ଏହି ଦଳ ସେମିରେ ଶୀର୍ଷସ୍ଥାନରେ ଥିବା ନ୍ୟୁଜିଲାଣ୍ଡକୁ ହରାଇବା ସହ ଚାମ୍ପିଅନ୍‌ ମଧ୍ୟ ହୋଇଥିଲା।

ଆଇସିସି ନକ୍‌ଆଉଟରେ ପାକିସ୍ତାନ ଅପରାଜେୟ: ଦୁଇ ଦେଶ ମଧ୍ୟରେ ୨୮ଟି ଟି-୨୦ ମୁକାବିଲା ଅନୁଷ୍ଠିତ ହୋଇଛି। ଏହା ମଧ୍ୟରୁ ପାକିସ୍ତାନ ୧୭ଟି ଓ ନ୍ୟୁଜିଲାଣ୍ଡ ୧୧ଟି ମ୍ୟାଚ୍‌ରେ ବିଜୟୀ ହୋଇଛି। ବିଶ୍ୱକପ୍‌ ପୂର୍ବରୁ ନ୍ୟୁଜିଲାଣ୍ଡରେ ଖେଳାଯାଇଥିବା ତ୍ରିରାଷ୍ଟ୍ରୀୟ ଟି-୨୦ କ୍ରିକେଟ ଫାଇନାଲରେ ମଧ୍ୟ ପାକିସ୍ତାନ ଚାମ୍ପିଅନ୍‌ ହୋଇଥିଲା।

ଆଇସିସି ଦ୍ୱାରା ଆୟୋଜିତ ଟୁର୍ଣ୍ଣାମେଣ୍ଟ (ଦିନିକିଆ ଓ ଟି-୨୦ ବିଶ୍ୱକପ୍‌) ନକ୍‌ଆଉଟରେ ନ୍ୟୁଜିଲାଣ୍ଡଠାରୁ ପାକିସ୍ତାନ ଆଦୌ ହାରିନାହିଁ। ୧୯୯୨ ଓ ୧୯୯୯ରେ ଅନୁଷ୍ଠିତ ଦିନିକିଆ ବିଶ୍ୱକପ୍‌ ସେମିଫାଇନାଲରେ ପାକିସ୍ତାନ ନିକଟରୁ ନ୍ୟୁଜିଲାଣ୍ଡ ପରାଜିତ ହୋଇଥିଲା। ୨୦୦୭ ଟି-୨୦ ବିଶ୍ୱକପ୍‌ ସେମିଫାଇନାଲରେ ମଧ୍ୟ ନ୍ୟୁଜିଲାଣ୍ଡ ବିପକ୍ଷରେ ପାକିସ୍ତାନ ବିଜୟୀ ହୋଇଥିଲା।

ନକ୍‌ଆଉଟରେ ନ୍ୟୁଜିଲାଣ୍ଡ ମ୍ୟାଚ୍‌ ଜିତି ନପାରିବାର ଅନେକ ରେକର୍ଡ ରହିଛି। ଗତ ୭ ବର୍ଷ ମଧ୍ୟରେ ଏହି ଦଳ ୨୦୧୫ ଓ ୨୦୧୯ ଦିନିକିଆ ବିଶ୍ୱକପ୍‌ ଫାଇନାଲ ଓ ୨୦୨୧ରେ ଟି-୨୦ ବିଶ୍ୱକପ୍‌ ଫାଇନାଲରେ ପରାଜିତ ହୋଇଛି।
ଉଭୟ ଦଳର ଶକ୍ତି ବୋଲିଂ: ଚଳିତ ଟୁର୍ଣ୍ଣାମେଣ୍ଟରେ ପାକିସ୍ତାନର ବ୍ୟାଟର ଭଲ ପ୍ରଦର୍ଶନ କରିନାହାନ୍ତି। ବିଶେଷ କରି ଦୁଇ ଓପନର ମହମ୍ମଦ୍‌ ରିଜୱାନ୍‌ ଓ ଅଧିନାୟକ ବାବର ଆଜମ ଫର୍ମରେ ନାହାନ୍ତି। ଏମାନଙ୍କ ବିଫଳତା ନ୍ୟୁଜିଲାଣ୍ଡକୁ ସୁହାଇପାରେ। ସେମିଫାଇନାଲ ଖେଳାଯିବାକୁ ଥିବା ପିଚ୍‌ ନ୍ୟୁଜିଲାଣ୍ଡ ବୋଲରଙ୍କୁ ସୁହାଇଛି। ଏଠାରେ ଦଳର ଦୁଇ ଫାଷ୍ଟ ବୋଲର ଟିମ୍‌ ସୌଦୀ ଓ ଟ୍ରେଣ୍ଟ ବୋଲ୍ଟ ଶକ୍ତିଶାଳୀ ଅଷ୍ଟ୍ରେଲିଆ ଓ ଶ୍ରୀଲଙ୍କାର ଟପ୍‌ ଅର୍ଡର ବ୍ୟାଟିଂକୁ ଧ୍ୱସ୍ତ କରିଦେଇଥିଲେ। ପାକିସ୍ତାନର ନୂଆ ଖେଳାଳି ମହମ୍ମଦ୍‌ ହ୍ୟାରିସ୍‌ ଓ ସାଦାବ ଖାନ୍‌ଙ୍କ ଉପରେ ବ୍ୟାଟିଂ ନିର୍ଭର କରୁଛି। ପାକିସ୍ତାନର ବୋଲିଂ ସାହିନ ଆଫ୍ରିଦୀ ଓ ହ୍ୟାରିସ୍‌ ରୌଫଙ୍କ ସଫଳତା ଉପରେ ନିର୍ଭର କରୁଛି। ଯୁବ ଫାଷ୍ଟ ବୋଲର ନସୀମ ଶାହ ମଧ୍ୟ ଭଲ ଫର୍ମରେ ଅଛନ୍ତି। କିନ୍ତୁ ଦଳରେ ଥିବା ଦୁଇ ସ୍ପିନର ସାଦାବ ଓ ବାମହାତୀ ମହମ୍ମଦ୍‌ ନୱାଜଙ୍କୁ ମୁକାବିଲା କରିବା କିୱି ବ୍ୟାଟରଙ୍କ ପକ୍ଷେ କଷ୍ଟକର।

ନ୍ୟୁଜିଲାଣ୍ଡ ଦଳର ଅଧିନାୟକ କେନ୍‌ ୱିଲିୟମସନ ବିଳମ୍ବରେ ହେଉ ମଧ୍ୟ ଫର୍ମକୁ ଫେରିଛନ୍ତି। ଗ୍ଲେନ୍‌ ଫିଲିପ୍ସ ଗତ ଦୁଇଟି ମ୍ୟାଚ୍‌ରେ ଗୋଟିଏ ଶତକ ଓ ଗୋଟିଏ ଅର୍ଦ୍ଧଶତକ ସହ ନୂଆ ସମ୍ଭାବନା ସୃଷ୍ଟି କରିଛନ୍ତି। ଆହତ ସମସ୍ୟାରୁ ମୁକୁଳିବା ପରେ ଡାରିଲ ମିଚେଲ ଓ ୱିକେଟ କିପର ଫିନ୍‌ ଆଲେନ୍‌ ଚମକ୍ରାର ଲୟରେ ବ୍ୟାଟିଂ କରୁଛନ୍ତି। ଡେଭନ କନୱେଙ୍କ ଦକ୍ଷତାକୁ ମଧ୍ୟ ଅଣଦେଖା କରାଯାଇ ନପାରେ। ଏମାନେ ଯଦି ମିଳିତଭାବେ କ୍ଲିକ୍‌ କରନ୍ତି, ତେବେ ନ୍ୟୁଜିଲାଣ୍ଡର ପାକିସ୍ତାନ ବିପକ୍ଷ ଆଇସିସି ବିଶ୍ୱକପ୍‌ ନକ୍‌ଆଉଟ ପରାଜୟ ଏଡ଼ାଇପାରିବ।

ଖେଳାଳି ଦଳ
ନ୍ୟୁଜିଲାଣ୍ଡ: କେନ୍‌ ୱିଲିୟମସନ (ଅଧିନାୟକ), ମାର୍ଟିନ ଗପ୍ଟିଲ, ଫିନ୍‌ ଆଲେନ୍‌ (ୱିକେଟକିପର), ଡେଭନ କନୱେ, ଡାରିଲ ମିଚେଲ, ଗ୍ଲେନ୍‌ ଫିଲିପ୍ସ, ମାର୍କ ଚାପମ୍ୟାନ୍‌, ମାଇକେଲ ବ୍ରେସ୍‌ୱେଲ, ମିଚେଲ ସାଣ୍ଟନର, ଇଶ୍‌ ସୋଧି, ଲକି ଫର୍ଗୁସନ, ଟିମ୍‌ ସୌଦୀ, ଜେମ୍ସ ନୀଶାମ, ଆଦାମ ମିଲ୍‌ନେ ଓ ଟ୍ରେଣ୍ଟ ବୋଲ୍ଟ।

ପାକିସ୍ତାନ: ବାବର ଆଜମ (ଅଧିନାୟକ), ମହମ୍ମଦ୍‌ ରିଜୱାନ୍‌ (ୱିକେଟକିପର), ଆସିଫ୍‌ ଅଲ୍ଲୀ, ହାଇଦର ଅଲ୍ଲୀ, ଖୁସ୍‌ଦିଲ ଶାହ, ସାନ ମାସୁଦ୍‌, ମହମ୍ମଦ୍‌ ହାରିସ୍‌, ଇଫତିକର ଅହମ୍ମଦ୍‌, ସାଦାବ ଖାନ୍‌, ମହମ୍ମଦ୍‌ ନୱାଜ, ମହମ୍ମଦ୍‌ ୱାସିମ ଜୁନିୟର, ହାରିସ୍‌ ରୌଫ୍‌, ମହମ୍ମଦ୍‌ ହାସନେନ୍‌, ନସୀମ ଶାହ ଓ ସାହିନ ଆଫ୍ରିଦୀ।

ଆଡିଲେଡ୍‌‌ : ଚଳିତ ଟି-୨୦ ବିଶ୍ୱକପ୍‌‌ରେ ବୁଧବାର ଗ୍ରୁପ୍‌‌-୨’ର ଦ୍ୱିତୀୟ ମ୍ୟାଚ୍‌‌ରେ ଭାରତ ବିପକ୍ଷ ବାଂଲାଦେଶ ମାତ୍‌ ଦେଇ ସେମିର ନିକଟତର ହୋଇଛି। ଆଜିର ରୋମାଞ୍ଚପୂର୍ଣ୍ଣ ମ୍ୟାଚରେ ଭାରତ ବାଂଲାଦେଶକୁ ପରାସ୍ତ କରିଛି। ଆଜିର ମ୍ୟାଚରେ ଟସ୍‌ ଜିତି ବାଂଲାଦେଶ ଭାରତକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲା। ପ୍ରଥମେ ବ୍ୟାଟିଂ କରି ଭାରତ ଲୋକେଶ ରାହୁଲ ଓ ବିରାଟ କୋହଲିଙ୍କ ଅର୍ଦ୍ଧଶତକୀୟ ଇନିଂସ ବଳରେ ୨୦ ଓଭରରେ ୬ ୱିକେଟ ହରାଇ ୧୮୪ ରନ୍‌ ସଂଗ୍ରହ କରିଛି। ଯାହା ଫଳରେ  ମ୍ୟାଚରେ ବିଜୟୀ ହେବାକୁ ବିପକ୍କ୍ଷ ବାଲାଂଦେଶକୁ ୧୮୫ ରନ୍‌ ଟାର୍ଗେଟ ଦେଇଥିଲା ଟିମ୍‌ ଇଣ୍ଡିଆ।

Bangladesh gave it their all, but India reign in Adelaide 🙌#T20WorldCup | #INDvBAN | 📝: https://t.co/vDRjKeeGvf pic.twitter.com/EOMtLYt3zb

— ICC (@ICC) November 2, 2022

୧୮୫ ରନର ବିଜୟ ଲକ୍ଷ୍ୟ ପିଛା କରିଥିବା ବାଂଲାଦେଶ ଦୁଇ ଓପନର ଲିଟନ ଦାସ୍ ଏବଂ ନଜମୁଲ ହୋସେନ ସାଣ୍ଟୋ ଦୃଢ ଆରମ୍ଭ ଦେଇଥିଲେ। ବିଶେଷ କରି ଲିଟନ୍ ଦାସ ଧୂଆଁଧାର ବ୍ୟାଟିଂ କରି ଭାରତୀୟ ବୋଲରଙ୍କୁ ନିର୍ଧୁମ ପ୍ରହାର କରିଥିଲେ। ମାତ୍ର ୭ ଓଭରରେ ବାଂଲାଦେଶ ବିନା ଓ୍ଵିକେଟ୍‌ରେ ୬୬ ରନ କରି ନେଇଥିଲା। ଲିଟନ୍ ଦାସ୍ ଅର୍ଦ୍ଧଶତକ ହାସଲ କରିଥିଲେ। ସାତ ଓଭର ପରେ ବର୍ଷା ହେବାରୁ ଓଭର ହ୍ରାସ ହୋଇଥିଲା। ଡକ୍ ଓ୍ଵର୍ଥ ଲୁଇସ୍ ନିୟମ ଅନୁଯାୟୀ ବାଂଲାଦେଶ ସାମ୍ନାରେ ୧୬ ଓଭରରେ ୧୫୧ ରନର ବିଜୟ ଲକ୍ଷ୍ୟ ଧାର୍ଯ୍ୟ କରାଯାଇଥିଲା।

.@imVkohli bagged the Player of the Match award as #TeamIndia beat Bangladesh in Adelaide. 👌 👌

Scorecard ▶️ https://t.co/Tspn2vo9dQ#T20WorldCup | #INDvBAN pic.twitter.com/R5Qsl1nWmf

— BCCI (@BCCI) November 2, 2022

ବାର୍ଷାପରେ ମ୍ୟାଚ ଆରମ୍ଭ ହେବା ପରେ ରୋହିତ ସେନା ଦମ୍‌ଦାର ଖେଳପଦର୍ଶନ କରିବା ସହ ମ୍ୟାଚରେ ମୋଡକୁ ବଦଳାଇଦେଇଥିଲେ। ଆରମ୍ଭରୁ ବିସ୍ଫୋରକ ବ୍ୟାଟିଂ କରି ଭାରତୀୟ ଦଳ ପାଇଁ ଚିନ୍ତାର କାରଣ ହୋଇଥିବା ଲିଟନ ଦାସଙ୍କୁ ଏକ ଚମତ୍କାର ଥ୍ରୋ କରି ରନ ଆଉଟ କରିଥିଲେ କେଏଲ ରାହୁଲ । ଏହା ପରେ ବାଂଲାଦେଶର ନିୟମିତ ଓ୍ବିକେଟ ପତନ ହୋଇଚାଲିଥିଲା। କିନ୍ତୁ ବାଂଲା ବ୍ୟାଟର ହାର ମାନିନଥିଲେ। ଜଣେ ପରେ ଜଣେ ବ୍ୟାଟର ବଡ଼ ସଟ୍‌ ଖେଳିବା ସହ ଭାରତର ବିଜୟରେ ବାଧକ ସାଜିବାରେ ଲାଗିଥିଲେ। ତେବେ ଗୋଟିଏ ଓଭରରେ ଅର୍ଶଦୀପ ସିଂହ ଅଫିପ ହୁସେନ(୩ ରନ) ଏବଂ ଅଧିନାୟକ ସାକିବ ଉଲ ହସନ(୧୩ ରନ) ଙ୍କୁ ଆଉଟ୍‌ କରି ମ୍ୟାଚ୍‌ର ମଙ୍ଗ ଭାରତ ଆଡକୁ ମୋଡିଥିଲେ। ୟାସିର ଅଲ୍ଲୀ ୧ ଏବଂ ମୋସଡେକ୍ ହୁସେନ ୬ ରନ କରି ପାଭିଲିୟନ ଫେରିଥିଲେ। ଶେଷ ଓଭରରେ ବାଂଲାଦେଶକୁ ଜିତିବାକୁ ୨୦ ରନ ଦରକାର ଥିବା ବେଳେ ଦଳ ୧୪ ରନ କରି ବିଜୟଠୁ ୫ ରନରୁ ଦୂରରେ ରହିଥିଲା। ୧୬ ଓଭରରେ ପ୍ରତିପକ୍ଷ ଦଳ ୬ ଓ୍ଵିକେଟ୍ ହରାଇ ୧୪୫ ରନ କରିଥିଲା।ଏହି ବିଜୟ ସହ ଭାରତ ୪ଟି ମ୍ୟାଚରୁ ୩ଟି ବିଜୟ ହାସଲ କରି ୬ ପଏଣ୍ଟ ପାଇବା ସହ ଗ୍ରୁପ-୨ର ପଏଣ୍ଟ ଟେବୁଲର ଶୀର୍ଷରେ ପହଞ୍ଚିଛି ।

ଆଡିଲେଡ୍‌‌: ଚଳିତ ଟି-୨୦ ବିଶ୍ୱକପ୍‌‌ରେ ବୁଧବାର ଗ୍ରୁପ୍‌‌-୨’ର ଦ୍ୱିତୀୟ ମ୍ୟାଚ୍‌‌ରେ ଭାରତ ଓ ବାଂଲାଦେଶ ପରସ୍ପରକୁ ଭେଟିବେ। ପ୍ରଥମ ମ୍ୟାଚ୍‌‌ରେ ପାକିସ୍ତାନ ଓ ଦ୍ୱିତୀୟ ମ୍ୟାଚ୍‌‌ରେ ନେଦରଲାଣ୍ଡ୍‌‌ସକୁ ହରାଇବା ପରେ ଭାରତ ତୃତୀୟ ମ୍ୟାଚ୍‌‌ରେ ଦକ୍ଷିଣ ଆଫ୍ରିକାଠାରୁ ୫ ୱିକେଟରେ ପରାସ୍ତ ହୋଇଥିଲା। ୩ଟି ମ୍ୟାଚ୍‌‌ ଖେଳି ୨ ବିଜୟ ଓ ୧ ପରାଜୟ ସହ ୪ ପଏଣ୍ଟ ପାଇ ଭାରତ ଗ୍ରୁପ୍‌‌ -୨ରେ ଦକ୍ଷିଣ ଆଫ୍ରିକା ପଛକୁ ଦ୍ୱିତୀୟ ସ୍ଥାନରେ ରହିଛି। ଅନ୍ୟପଟେ ବାଂଲାଦେଶ ମଧ୍ୟ ସମାନ ସଂଖ୍ୟକ ମ୍ୟାଚ୍‌‌ ଖେଳି ୨ ବିଜୟ ଓ ୧ ପରାଜୟ ସହ ସମାନ ୪ ପଏଣ୍ଟ ପାଇଥିଲେ ମଧ୍ୟ ନେଟ ରନରେଟ୍‌‌ରେ ପଛରେ ରହି ତୃତୀୟ ସ୍ଥାନରେ ରହିଛି। ତେଣୁ ସେମିଫାଇନାଲରେ ସ୍ଥାନ ପକ୍କା କରିବାକୁ ହେଲେ ଭାରତକୁ ଏହି ମ୍ୟାଚ୍‌‌ ଜିତିବାର ଜରୁରୀ ହୋଇପଡ଼ିଛି।

ଆଡିଲେଡ ଓଭାଲ ଗ୍ରାଉଣ୍ଡରେ ଖେଳାଯିବାକୁ ଥିବା ଏହି ମ୍ୟାଚ୍‌‌ରେ ଯଦି ବାଂଲାଦେଶ ପରାସ୍ତ ହୁଏ ତେବେ ସେମି ଦୌଡ଼ରୁ ଏକପ୍ରକାର ବାଦ୍‌‌ ପଡ଼ିବ। ଯଦି ଭାରତ ପରାସ୍ତ ହୁଏ ତେବେ ସେମି ଆଶା କଷ୍ଟକର ହେବ। ଅନ୍ତିମ ମ୍ୟାଚରେ ଜିମ୍ବାୱେକୁ ହରାଇଲେ ଭାରତ ୬ ପଏଣ୍ଟ ପାଇବ। ସେପେଟେ ପାକିସ୍ତାନ ଯଦି ତାର ଅନ୍ତିମ ଦୁଇଟି ମ୍ୟାଚ୍‌‌ ଜିତେ ତାହାଲେ ସମାନ ୬ ପଏଣ୍ଟ ପାଇବ। ଏପରି ସ୍ଥଳେ ନେଟ୍‌‌ ରନରେଟ୍‌‌ର ଗୁରୁତ୍ୱ ଆହୁରି ବଢ଼ିଯିବ। ସେହିପରି ଭାରତକୁ ହରାଇଲେ ବାଂଲାଦେଶର ସେମି ସମ୍ଭାବନା ଦୃଢ ହେବ। ଭାରତ ପରେ ବାଂଲାଦେଶ ଯଦି ପାକିସ୍ତାନକୁ ହରାଏ ତେବେ ୮ ପଏଣ୍ଟ ପାଇ ସେମିକୁ ଉଠିବା ନିଶ୍ଚିତ ହେବ। ତେଣୁ ସବୁ ଦୃଷ୍ଟିକୋଣରୁ ଦେଖିବାକୁ ଗଲେ ଭାରତ ପାଇଁ ଏହି ମ୍ୟାଚ୍‌‌ ନକଆଉଟ ସଦୃଶ ହୋଇଛି। ସେମିକୁ ଉଠିବାକୁ ହେଲେ ଭାରତକୁ ଏହି ମ୍ୟାଚ୍‌‌ରେ ବିଜୟୀ ହେବାକୁ ପଡ଼ିବ। ଆଡିଲେଡ୍‌‌ରେ ପ୍ରବଳ ବର୍ଷା ହୋଇଛି। ଫଳରେ ଏହି ମ୍ୟାଚ ବାତିଲ ହେବାର ଆଶଙ୍କ ମଧ୍ୟ ସୃଷ୍ଟି ହୋଇଛି। ଏପରି ହେଲେ ପଏଣ୍ଟ ଭାଗ ହେବ। ଦୁଇ ଦେଶ ଗୋଟିଏ ଲେଖାଏ ପଏଣ୍ଟ ହାସଲ କରିବେ। ଏହାହେଲେ ଭାରତ କ୍ଷତି ସହିବ ଓ ସେମି ଫାଇନାଲ ଆଶା ନେଇ ଆଶଙ୍କା ସୃଷ୍ଟି ହେବ। ବର୍ଷା ହେବାର ସମ୍ଭାବନା ୩୦ରୁ ୬୦ ପ୍ରତିଶତ ରହିଛି। ଅଷ୍ଟ୍ରେଲିଆରେ ପାଣିପାଗ ଅତିଶୀଘ୍ର ବଦଳିଥାଏ। ତେଣୁ ବର୍ଷା ସମ୍ଭାବନା ବଢ଼ିପାରେ କିମ୍ବା କମିପାରେ। ଭାରତୀୟ ପ୍ରଶଂସକଙ୍କ ମନରେ ଏବେ ଉତ୍କଣ୍ଠା ବଢ଼ିଯାଇଛି।

ହାଇସ୍କୋରିଂ ହେବ ମ୍ୟାଚ୍‌‌
ବିଶ୍ୱକପ୍‌‌ରେ ଆଡିଲେଡ୍‌‌ରେ କୌଣସି ମ୍ୟାଚ୍‌‌ ଖେଳାଯାଇନାହିଁ। ଏଠାର ପ୍ରଥମେ ବ୍ୟାଟିଂ କରିଥିବା ଦଳର ହାରାହାରି ରନ ସଂଗ୍ରହ ୧୭୦ ରହିଛି। ଭାରତ ପୂର୍ବରୁ ଏଠାରେ ଏକମାତ୍ର ଟି-୨୦ ମ୍ୟାଚ୍‌‌ ଖେଳିଛି ଓ ଏଥିରେ ବିଜୟୀ ହୋଇଛି। ୨୦୧୬ରେ ଭାରତ ଏଠାରେ ଘରୋଇ ଅଷ୍ଟ୍ରେଲିଆକୁ ୩୭ ରନରେ ପରାସ୍ତ କରିଥିଲା। ସେମି ଆଶା ଉଜ୍ଜୀବିତ ରଖିବାକୁ ହେଲେ ଉଭୟ ଦଳ ମ୍ୟାଚ୍‌‌ ଜିତିବାକୁ ପ୍ରୟାସ କରିବେ। ତେଣୁ ଏହି ମ୍ୟାଚ୍‌‌ ସଂଘର୍ଷପୂର୍ଣ୍ଣ ହେବ ସହ ରୋମାଞ୍ଚକ ହେବ ବୋଲି ଆଶା କରାଯାଉଛି। ଓପନର ଲୋକେଶ ରାହୁଲଙ୍କ ଫର୍ମକୁ ନେଇ ଟିମ୍‌‌ ଇଣ୍ଡିଆ ମ୍ୟାନେଜମେଣ୍ଟ ଚିନ୍ତିତ ରହିଥିଲେ ମଧ୍ୟ ସେ ଖେଳିବା ନିଶ୍ଚିତ ମନେ ହେଉଛି। ୱିକେଟକିପର ବ୍ୟାଟର ଦୀନେଶ କାର୍ତ୍ତୀକ ଆହତ ହୋଇଥିବାରୁ ତାଙ୍କ ସ୍ଥାନରେ ଋଷଭ ପନ୍ତ ଅନ୍ତିମ ଏକାଦଶରେ ସ୍ଥାନ ପାଇପାରନ୍ତି। ସ୍ପିନର ୟୁଜବେନ୍ଦ୍ର ଚହଲ ମଧ୍ୟ ଖେଳିବାର ସମ୍ଭାବନା ରହିଛି।

ଭାରତୀୟ ଦଳ
ରୋହିତ ଶର୍ମା (ଅଧିନାୟକ), ବିରାଟ କୋହଲି, ଲୋକେଶ ରାହୁଲ, ଦୀପକ ହୁଦା, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଦୀନେଶ କାର୍ତ୍ତିକ, ରବିଚନ୍ଦ୍ରନ ଅଶ୍ୱିନ, ମହମ୍ମଦ ସାମି, ଭୁବନେଶ୍ୱର କୁମାର, ୟୁଜବେନ୍ଦ୍ର ଚହଲ, ଋଷଭ ପନ୍ତ, ଅକ୍ଷର ପଟେଲ, ହର୍ଶଲ ପଟେଲ, ମହମ୍ମଦ ସାମି ଓ ଅର୍ଶଦୀପ ସିଂ।

ବାଂଲାଦେଶ ଦଳ
ସାକିବ ଅଲ ହାସନ (ଅଧିନାୟକ), ସୌମ୍ୟ ସରକାର, ନାଜମୁଲ ହୋସେନ ସାଣ୍ଟୋ, ଲିଟନ ଦାସ, ଆଫିଫ ହୋସେନ, ନୁରୁଲ ହାସନ (ୱିକେଟ କିପର), ମୋସାଡେକ ହୋସେନ, ୟାସିର ଅଲି, ତାସ୍କିନ ଅହମ୍ମଦ, ମୁସ୍ତାଫିଜୁର ରହମାନ ଓ ହାସନ ମାହମ୍ମୁଦ।

ମେଲବୋର୍ଣ୍ଣ: ଅଷ୍ଟ୍ରେଲିଆରେ ଖେଳାଯାଉଥିବା ଚଳିତ ଟି-୨୦ ବିଶ୍ଵ କପ୍‌ରେ ସବୁଠୁ ବଡ ବାଧକ ସାଜିଛି ବର୍ଷା । ବର୍ଷା କାରଣରୁ ଅନେକ ମ୍ୟାଚ୍‌ ବାତିଲ୍ ହୋଇ ସାରିଥିବା ବେଳେ କିଛି ମ୍ୟାଚ୍‌ରେ ପଏଣ୍ଟ ଭାଗ କରାଯାଇଛି। ଶୁକ୍ରବାର ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ହେବାକୁ ଥିବା ଦୁଇଟି ଯାକ ମ୍ୟାଚ୍ ବର୍ଷା ଯୋଗୁଁ ବାତିଲ ହୋଇଯାଇଛି । ଯାହାକି ଗ୍ରୁପ୍-୧ର ପଏଣ୍ଟ ଟେବୁଲକୁ ରୋଚକପୂର୍ଣ୍ଣ କରିଦେଇଛି । ତେବେ ଅନ୍ୟପଟେ ବର୍ଷା ଯୋଗୁଁ ମ୍ୟାଚ ବାତିଲ ହେଉଥିବାରୁ ଏକାଧିକ ଟିମର ସେମିଫାଇନାଲ ଯିବାର ଆଶା ଅଧୁରା ରହିପାରେ ବୋଲି କ୍ରିକେଟ୍ ବିଶେଷଜ୍ଞମାନେ ଆକଳନ କରିବା ଆରମ୍ଭ କଲେଣି ।

ସୂଚନାଯୋଗ୍ୟ, ଆଜି ମେଲବର୍ଣ୍ଣରେ ପ୍ରଥମେ ଆୟରଲ୍ୟାଣ୍ଡ-ଆଫଗାନିସ୍ତାନ୍ ଏବଂ ପରେ ଅଷ୍ଟ୍ରେଲିଆ-ଇଂଲଣ୍ଡ ଭିତରେ ମ୍ୟାଚ୍ ହୋଇଥାନ୍ତା । ହେଲେ ଏହି ଦୁଇଟି ଯାକ ମ୍ୟାଚ ବର୍ଷା ଯୋଗୁ ସମ୍ପୂର୍ଣ୍ଣ ବାତିଲ କରାଯାଇଛି । ସ୍ଥିତି ଏମିତି ଯେ, ଦୁଇଟି ଯାକ ମ୍ୟାଚର ଟସ୍ ମଧ୍ୟ ପଡିନଥିଲା । ତେଣୁ ଚାରୋଟି ଦଳକୁ ଗୋଟିଏ ଲେଖାଏଁ ପଏଣ୍ଟରେ ସନ୍ତୁଷ୍ଟ ହେବାକୁ ପଡିଛି ।

ଆଜିର ଦ୍ଵିତୀୟ ମ୍ୟାଚ ଥିଲା ଚିରାଚରିତ ପ୍ରତିଦ୍ବନ୍ଦୀ ଅଷ୍ଟ୍ରେଲିଆ ଓ ଇଂଲଣ୍ଡ ମଧ୍ୟରେ । ଏହି ମ୍ୟାଚ ବେଳକୁ ବର୍ଷା ଛାଡ଼ିଯାଇଥିଲେ ବି ପଡ଼ିଆ ଓଦା ଥିବାରୁ ମ୍ୟାଚକୁ ବାତିଲ କରାଯାଇଥିଲା । ଏହି ମ୍ୟାଚ ଉଭୟ ଦଳ ପାଇଁ ବେଶ ଗୁରୁତ୍ବପୂର୍ଣ୍ଣ ଥିଲା, କାରଣ ପୂର୍ବରୁ ଉଭୟ ଦଳ ଗୋଟିଏ ଲେଖାଏଁ ମ୍ୟାଚ ହାରି ସାରିଛନ୍ତି । ଅଷ୍ଟ୍ରେଲିଆ ନିଜର ପ୍ରଥମ ମ୍ୟାଚରେ ନ୍ୟୁଜିଲାଣ୍ଡଠାରୁ ପରାସ୍ତ ହୋଇଥିବାବେଳେ ଇଂଲଣ୍ଡ ଏକ ବର୍ଷା ବାଧିତ ମ୍ୟାଚରେ ଆୟର୍ଲାଣ୍ଡଠାରୁ ଡିଏଲ୍ ନିୟମ ଅନୁସାରେ ପରାସ୍ତ ହୋଇଥିଲା । ଅବିଶ୍ରାନ୍ତ ବର୍ଷା ଯୋଗୁଁ ବଡ ବଡ ଦଳକୁ ଭୋଗିବାକୁ ପଡୁଛି ଏହାର ପରିଣାମ ।

ପର୍ଥ : ଅଷ୍ଟ୍ରେଲିଆରେ ଚାଲିଥିବା ଟି୨- ବିଶ୍ବକପ୍‌ରୁ ଆଉଟ ହେବ ପାକିସ୍ତାନ ଟିମ୍‌। ବିଶ୍ବକପ୍‌ର ଦୁଇଟି ମ୍ୟାଚ ଲଗାତର ହାରିବା ପରେ ବିଶ୍ବପକ୍‌ରୁ ବିଦାୟ ରାସ୍ତାର ନିକଟତର ହୋଇଛି ପାକିସ୍ତାନ। ପ୍ରଥମ ମ୍ୟାଚରେ ଭାରତ ପାକିସ୍ତାନକୁ ହରାଇଥିବା ବେଳେ ଦ୍ବିତୀୟ ମ୍ୟାଚରେ ବି ଧୋଇ ଦେଇଛି ଜିମ୍ବାୱେ । ଆଜି ପର୍ଥରେ ଖେଳାଯାଉଥିବା ମ୍ୟାରେ ରେ ଜିମ୍ବାୱେ ଟିମ୍‌ ରୋମାଞ୍ଚକ ଖେଳ ପ୍ରଦର୍ଶନ ସହ ପାକିସ୍ତାନକୁ ୧ ରନ୍‌ରେ ହରାଇ ଦେଇଛି।

ଆଜି ପର୍ଥରେ ଖେଳାଯାଉଥିବା ମ୍ୟାଚରେ ଜିମ୍ବାଓ୍ବେ ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରି ଜିମ୍ବାଓ୍ବେ ନିର୍ଦ୍ଧାରିତ ୨୦ ଓଭରରେ ୮ ଓ୍ବିକେଟ ହରାଇ ୧୩୦ ରନ କରିଥିଲା । ଦଳ ପକ୍ଷରୁ ସିନ ଓ୍ବିଲିୟମସନ ସର୍ବାଧିକ ୩୧ରନ କରିଥିଲେ ।

୧୩୧ରନ ର ଏକ ସହଜ ବିଜୟ ଲକ୍ଷ୍ୟ ନେଇ ଖେଳିଥିବା ପାକିସ୍ତାନ ଆରମ୍ଭରୁ ବିପର୍ଯ୍ୟୟ ସମ୍ମୁଖୀନ ହୋଇଥିଲା । ଦଳର ଦୁଇ ତାରକା ବ୍ୟାଟ୍ସମ୍ୟାନ ମହମ୍ମଦ ରିଜଓ୍ବାନ ଓ ବାବର ଆଜମ ଯଥାକ୍ରମେ ୧୪ ଓ ୪ ରନ କରି ଆଉଟ ହୋଇଥିଲେ । ତେବେ ସାନ ମାସୁଦ ଲଢୁଆ ବ୍ୟାଟିଂ କରି ୪୪ ରନ କରିଥିଲେ । ମାତ୍ର ଦଳର ମଧ୍ୟଭାଗ ପୁଣି ବିଫଳ ହୋଇଥିଲେ । ମହମ୍ମଦ ନଓ୍ବାଜ (୨୨ ରନ )ଙ୍କ ବ୍ୟତିତ ଅନ୍ୟମାନେ ବିଫଳ ହୋଇଥିଲେ । ଫଳରେ ଦଳ ୨୦ ଓଭରରେ ୧୨୯ ରନ ହିଁ କରିପାରିଥିଲା ।

ଟି-୨୦ ବିଶ୍ୱକପରେ ଜିମ୍ବାୱେ ପ୍ରଥମଥର ପାଇଁ ପାକିସ୍ତାନକୁ ହରାଇବାର ରେକର୍ଡ କରିଛି। ପର୍ଥରେ ଐତିହାସିକ ବିଜୟ ପରେ ଜିମ୍ବାୱେ ଖେଳାଳିମାନେ ଷ୍ଟାଡିୟମରେ ଉପସ୍ଥିତ ପ୍ରଶଂସକଙ୍କ ସହ ହାତ ମିଳାଇ ଉତ୍ସବ ମନାଇଛନ୍ତି। ଚଳିତ ବିଶ୍ୱକପର ସୁପର ୧୨ରେ ଏହା ଜିମ୍ବାୱେର ପ୍ରଥମ ବିଜୟ। ସେହିପରି ପାକିସ୍ତାନ କ୍ରମାଗତ ଦ୍ୱିତୀୟ ମ୍ୟାଚ୍‌ ହାରି ବିଶ୍ୱକପରୁ ବିଦା ହେବା ସ୍ଥିତିକୁ ଚାଲି ଆସିଛି। ପ୍ରଥମ ମ୍ୟାଚ୍‌ରେ ପାକିସ୍ତାନ ପ୍ରତିପକ୍ଷ ଭାରତ ଠାରୁ ହାରିଥିଲା। ଏବେ ଦଳ ଜିମ୍ବାୱେ ଠାରୁ ହାରିଛି। ଜିମ୍ବାୱେ ବିଜୟରେ ନାୟକ ସାଜି ୩ ୱିକେଟ ଦଖଲ କରିଥିବା ସିକନ୍ଦର ରାଜା ମ୍ୟାଚର ଶ୍ରେଷ୍ଠ ଖେଳାଳି ପୁରସ୍କାର ପାଇଛନ୍ତି। ପାକିସ୍ତାନକୁ ହରାଇବା ପରେ ଜିମ୍ବାୱେ ଖେଳାଳିମାନେ ଖୁସିରେ କାନ୍ଦି ମଧ୍ୟ ପକାଇଥିଲେ।

ସିଡନୀ: ଅଷ୍ଟ୍ରେଲିଆର ସିଡନୀ କ୍ରିକେଟ ଗ୍ରାଉଣ୍ଡରେ ଗୁରୁବାର ଭାରତ ଓ ନେଦରଲାଣ୍ଡ୍‌‌ସ ମୁହାଁମୁହିଁ ହୋଇଛନ୍ତି। ଆଜିର ମ୍ୟାଚରେ ଭାରତ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା। ଭାରତ ପ୍ରଥମେ ବ୍ଯାଟିଂ କରି ୧୭୯ ରନ କରିଛି। ଏହି ମ୍ୟାଚକୁ ଜିତିବାକୁ ହେଲେ ନେଦରଲାଣ୍ଡ୍‌‌ସକୁ ୧୮୦  ରନର ଆବଶ୍ୟକତା ରହିଛି।

ଭାରତ ପକ୍ଷରୁ କେଏଲ ରାହୁଲ ୧୨ ବଲରେ ୯ ରନ କରି ଆଉଟ ହୋଇଥିଲେ। ପରେ ପାରିକୁ ରୋହିତ ଶର୍ମା ଓ ବିରାଟ କୋହଲି ସମ୍ଭାଳିଥିଲେ। ରୋହିତ ଶର୍ମା ଏକ ଅର୍ଦ୍ଧ ଶତକୀୟ ଇଂନିସ ଖେଳି ଆଉଟ ହୋଇଥିଲେ। ରୋହିତ ଶର୍ମା ୩୯ ବଲରେ ୫୩ ରନ କରି ଆଉଟ ହୋଇଥିଲେ। ପରେ ବିରାଟଙ୍କ ସାଥ ଦେବା ପାଇଁ ସୂର୍ଯ୍ଯକୁମାର ଯାଦବ ଆସିଥିଲେ। ଉଭୟ ଶେଷ ପର୍ଯ୍ଯନ୍ତ ଅପରାଜିତ ରହି ଅର୍ଦ୍ଧ ଶତକୀୟ ଇଂନିସ ଖେଳିଥିଲେ। ସୂର୍ଯ୍ଯକୁମାର ଯାଦବ ୨୫ ବଲରେ ୫୧ ରନ କରି ଅପରାଜିତ ରହିଥିବା ବେଳେ ବିରାଟ ୪୪  ବଲରେ ୬୪ ରନ କରି ଅପରାଜିତ ରହିଥିଲେ।

ନେଦରଲାଣ୍ଡ୍‌‌ସ ପକ୍ଷରୁ ପଲ ଭାନ ମିକରେନ ଓ ଫ୍ରେଡ କ୍ଲାସେନ ଗୋଟିଏ ଲେଖାଏଁ ୱିକେଟ ନେବାରେ ସଫଳ ହୋଇଥିଲେ।

ମେଲବୋର୍ଣ୍ଣ: ଟି-ଟ୍ୱେଣ୍ଟି ବିଶ୍ୱକପ୍‌ର ହାଇଭୋଲଟେଜ୍ ମ୍ୟାଚ୍‌ ଆଜି ଭାରତ- ପାକିସ୍ତାନ ମଧ୍ୟରେ ଖେଳାଯାଇଥିଲା। ଟସ୍ ଜିତି ଭାରତ ଫିଲ୍ଡିଂ ନିଷ୍ପତ୍ତି ନେବା ପରେ ପାକିସ୍ତାନ ନିର୍ଦ୍ଧାରିତ ୨୦ ଓଭରରେ ୮ ୱିକେଟ ହରାଇ ୧୫୯ ରନ୍ କରିଥିଲା।  ଭାରତ ୬ ୱିକେଟ ହରାଇ ୧୬୦ ରନ କରି ଏହି ମ୍ୟାଚକୁ ଜିତିନେଇଛି। ୩୧ ରନରେ ଚତୁର୍ଥ ୱିକେଟ ପତନସତ୍ତ୍ବେ ରୋମାଞ୍ଚକର ବିଜୟ ହାସଲ କରିଛି ଭାରତ। ଏଥିସହ ବିଜୟରୁ ଭାରତର ବିଶ୍ବକପ ଅଭିଯାନ ଆରମ୍ଭ କରିଛି।

ଭାରତ ପକ୍ଷରୁ ରୋହିତ ଶର୍ମା ୭ ବଲରେ ୪ ରନ କରି ଆଉଟ ହୋଇଥିବା ବେଳେ କେ ଏଲ ରାହୁଲ ୮ ବଲରେ ୪ ରନ କରି ଆଉଟ ହୋଇଥିଲେ। ସୂର୍ଯ୍ଯକୁମାର ଯାଦବ ୧୦ ବଲରେ ୧୫ ରନ କରି ଆଉଟ ହୋଇଥିବା ବେଳେ ଅକ୍ଷର ପଟେଲ ୩ ବଲରେ ୨ ରନ କରି ଆଉଟ ହୋଇଥିଲେ। ପରେ ପାରିକୁ ବିରାଟ କୋହଲି ଓ ହାର୍ଦ୍ଦିକ ପାଣ୍ଡ୍ୟାଙ୍କ ଧର୍ଯ୍ଯପୂର୍ଣ୍ଣ ବ୍ୟାଟିଂ କରି ଆଗକୁ ନେଇଥିଲେ। ହାର୍ଦ୍ଦିକ ପାଣ୍ଡ୍ୟା ୩୭ ବଲରେ ୪୦ ରନ କରି ଆଉଟ ହୋଇଥିଲେ । ଦିନେଶ କାର୍ତ୍ତିକ ୨ ବଲରେ ୧ ରନ କରି ଆଉଟ ହୋଇଥିଲେ। କୋହିଲି ମ୍ୟାଚ ବିଜୟୀ ୮୨ ରନର ଦମଦାର ଇନିଂସ ଖେଳିଥିଲେ। ୫୩ ବଲରୁ ୬ ଚୌକା ଓ ୪ ଛକା ସହାୟତାରେ ୮୨ରନ କରି ବିରାଟ କୋହିଲି ଅପରାଜିତ ରହିଥିଲେ। ରବିଚନ୍ଦ୍ରନ ଅଶ୍ଵିନ ୧ ବଲରେ ୧ ରନ କରି ଅପରାଜିତ ରହିଥିଲେ।

ପାକିସ୍ତାନ ପକ୍ଷରୁ ହ୍ୟାରିସ ରୌଫ ଓ ମହମ୍ମଦ ନୱାଜ  ୨ଟି ଲେଖାଏଁ ୱିକେଟ ନେଇଥିବା ବେଳେ ନସିମ ଶାହ ଗୋଟିଏ ୱିକେଟ ନେଇଥିଲେ।

ମେଲବୋର୍ଣ୍ଣ : ଅଷ୍ଟ୍ରେଲିଆରେ ଚାଲିଥିବା ଟି-୨୦ ବିଶ୍ୱକପର ଅଷ୍ଟମ ସଂସ୍କରଣରେ ଭାରତ ରବିବାର ପାରିମ୍ପରିକ ପ୍ରତିଦ୍ୱନ୍ଦ୍ୱି ପାକିସ୍ତାନ ବିପକ୍ଷରୁ ଅଭିଯାନ ଆରମ୍ଭ କରିବ। ସୁପର-୧୨ ପର୍ଯ୍ୟାୟର ଏହି ହାଇଭୋଲଟେଜ ମ୍ୟାଚ୍‌‌ ଉପରେ ସାରା ବିଶ୍ୱର କ୍ରୀଡ଼ାପ୍ରେମୀଙ୍କ ନଜର ରହିଛି। ଆତ୍ମବିଶ୍ୱାସରେ ଭରପୂର ଭାରତ ଗତ ବିଶ୍ୱକପ୍‌‌ ପରାଜୟର ପ୍ରତିଶୋଧ ନେବା ସହ ଖାତା ଖୋଲିବା ଲକ୍ଷ୍ୟରେ ରହିଛି। ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ଅନୁଷ୍ଠିତ ଗତ ସଂସ୍କରଣରେ ପାକିସ୍ତାନଠାରୁ ୧୦ ୱିକେଟ୍‌‌ରେ ଭାରତ ହାରିଥିଲା। ବିଶ୍ୱକପ୍‌‌ ଇତିହାସରେ ପାକିସ୍ତାନଠାରୁ ଏହା ଥିଲା ଭାରତର ପ୍ରଥମ ପରାଜୟ। କିନ୍ତୁ ଇତିମଧ୍ୟରେ ଗୋଟିଏ ବର୍ଷ ବିତି ଯାଇଛି। ଭାରତର ଏହି ପରାଜୟରେ ପାକିସ୍ତାନ ତାରକା ଦ୍ରୁତ ବୋଲର ଶାହିନ ଶାହା ଆଫ୍ରିଦ (୩/୩୧) ହିରୋ ଥିଲେ। ଦୁବାଇରେ ଅନୁଷ୍ଠିତ ଏହି ମ୍ୟାଚ୍‌‌ରେ ଆଫ୍ରିଦି ଟପ୍‌‌ ଅର୍ଡର ୩ ୱିକେଟ ନେଇ ଭାରତର ବ୍ୟାଟିଂ ବିପର୍ଯ୍ୟାୟ ଘଟାଇଥିଲେ। ଭାରତ ଏଥର ନୂଆ ରୂପରେ ମ୍ୟାଚ୍‌‌ରେ ଅବତୀର୍ଣ୍ଣ ହେବ।

ଟୁର୍ଣ୍ଣାମେଣ୍ଟରେ ଭାରତ ଅବଶ୍ୟ ଫେଭରାଇଟ୍‌‌ ବିବେଚିତ ହେଉନାହିଁ। ଭାରତୀୟ ଦଳରେ କେତୋଟି ସମସ୍ୟା ଏବେବି ରହିଛି। ଭାରତୀୟ ଦଳର କମ୍ବିନେଶନ ଏପର୍ଯ୍ୟନ୍ତ ସ୍ଥାୟୀ ରୂପ ନେଇପାରିନାହିଁ। ୨୦୧୯ରେ ଭାରତ ୪ ନମ୍ବର ବ୍ୟାଟର ନେଇ ଚିନ୍ତିତ ଥିଲା। ଦୁଇବର୍ଷ ବିତି ଯାଇଥିଲେ ମଧ୍ୟ ଭାରତ ଏହି ସମସ୍ୟା ଦୂର ହୋଇପାରିନାହିଁ। ଏବେ ୱିକେଟକିପର ବ୍ୟାଟର ରିଷଭ ପନ୍ତଙ୍କୁ ଟପ୍‌‌-୫ରୁ ବାଦ ନେଇ ଭାରତ ଜଣେ ଅତିରିକ୍ତ ବୋଲରଙ୍କୁ ଦଳରେ ସାମିଲ କରିପାରେ। ଭାରତୀୟ ବ୍ୟାଟରମାନେ ପାକିସ୍ତାନ ଦ୍ରୁତ ବୋଲର ଶାହିନ, ନସିମ ଶାହା ଓ ହାରିସ ରୌଫଙ୍କ ବିପକ୍ଷରେ ପରୀକ୍ଷାର ସମ୍ମୁଖୀନ ହେବେ। ପାୱାର ପ୍ଲେ’ରେ ଶାହିନଙ୍କୁ ଭାରତୀୟ ବ୍ୟାଟରମାନେ କିଭଳି ଖେଳୁଛନ୍ତି ତାହା ଉପରେ ମ୍ୟାଚ୍‌‌ର ଭାଗ୍ୟ ନିର୍ଦ୍ଧାରିତ ହେବ। ଭାରତ ନଂ-୧ ବ୍ୟାଟର ସୂର୍ଯ୍ୟକୁମାର ଯାଦବଙ୍କ ଉପରେ ସମସ୍ତଙ୍କ ନଜର ରହିଛି। ଶାହିନଙ୍କୁ ସେ ସଫଳତାର ସହ ମୁକାବିଲା କରିବେ ବୋଲି ଆଶା କରାଯାଉଛି।

ସ୍ଥିତି ଓ ପରିବେଶ ଯାହା ହେଉନା କାହିଁକି ସେ ତାଙ୍କର ବ୍ୟାଟିଂ ଶୈଳୀରେ ପରିବର୍ତ୍ତନ କରି ନଥାନ୍ତି। କିନ୍ତୁ ମେଘୁଆ ଓ ଆଦ୍ର ପରିବେଶରେ ଅଧିନାୟକ ରୋହିତ ଟସ୍‌‌ ଜିତିଲେ ଚେଜ୍‌‌ କରିବାକୁ ଅଧିକ ପସନ୍ଦ କରିବେ। ତେବେ ଏଥିପାଇଁ ଭାଗ୍ୟଦେବୀଙ୍କ ସହାୟତା ଜରୁରୀ। କେତେଜଣ ତାରକା ବୋଲରଙ୍କ ଅନୁପସ୍ଥିତିରେ ଭାରତର ବୋଲିଂ ବିଭାଗ ସାମାନ୍ୟ ପ୍ରଭାବିତ ହେବା ଭଳି ମନେ ହେଉଛି। ବର୍ଷା କାରଣରୁ ପିଚ୍‌‌ ଦ୍ରୁତ ବୋଲରଙ୍କୁ ସୁହାଇଲେ ଭାରତ ଜଣେ ସ୍ପିନରଙ୍କୁ ଖେଳାଇବ। ଦଳରେ କିନ୍ତୁ ୩ ଜଣ କ୍ୱାଲିଟି ସ୍ପିନର ରହିଛନ୍ତି। ବ୍ୟାଟିଂ କରିବାକୁ ସମର୍ଥ ଥିବାରୁ ଏଭଳି ସ୍ଥିତିରେ ଫର୍ମରେ ନଥିବା ହର୍ଶଲ ପଟେଲ ଅନ୍ତିମ ଏକାଦଶରେ ସ୍ଥାନ ପାଇପାରନ୍ତି।

ପାକିସ୍ତାନ ଦଳରେ ୩ଜଣ ବାମହାତୀ ବ୍ୟାଟର ଶାନ ମାସୁଦ/ଫକର ଜମାନ, ମହମ୍ମଦ ନୱାଜ ଓ ଖୁସ୍‌‌ଦିଲ ଶାହା ଅଛନ୍ତି। ତେଣୁ ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କୁ ସୁଯୋଗ ମିଳିପାରେ। ଶାହିନ ଫିଟ୍‌‌ ହେବାପରେ ପାକିସ୍ତାନର ଆତ୍ମବିଶ୍ୱାସ ଦ୍ୱିଗୁଣିତ ହୋଇଛି। ଅଧିନାୟକ ବାବର ଆଜମ ଓ ମହମ୍ମଦ ରିଜୱାନଙ୍କୁ ନେଇ ଗଠିତ ପାକ୍‌‌ ଓପନିଂ ଯୋଡି ଜବରଦସ୍ତ ଫର୍ମରେ ରହିଛି। ଦଳରେ କେତେଜଣ ଅଲରାଉଣ୍ଡର ତଥା ମ୍ୟାଚ ୱିନର ରହିଛନ୍ତି। ବୋଲିଂରେ ପାକିସ୍ତାନ ମଧ୍ୟ ବେଶ୍‌‌ ଶକ୍ତିଶାଳୀ ମନେ ହେଉଛି।
୩୭ ବର୍ଷ ପରେ ମେଲବୋର୍ଣ୍ଣରେ ଭାରତ-ପାକ ମୁକାବିଲା

ଦୀର୍ଘ ୩୭ ବର୍ଷ ପରେ ମେଲବୋର୍ଣ୍ଣ କ୍ରିକେଟ ଗ୍ରାଉଣ୍ଡ (ଏମ୍‌‌ସିଜି)ରେ ଭାରତ ଓ ପାକିସ୍ତାନ ମୁହାଁମୁହିଁ ହେବେ। ଏହାପୂର୍ବରୁ ୧୯୮୫ରେ ବେନସନ ଆଣ୍ଡ ହେଜେସ୍‌‌ ବିଶ୍ୱ ଚାମ୍ପିଅନସିପ୍‌‌ରେ ଦୁଇ ଦଳ ଫାଇନାଲରେ ପରସ୍ପରକୁ ଭେଟିଥିଲେ। ଏଥିରେ ଭାରତ ୧୭ଟି ବଲ ବାକି ରଖି ୮ ୱିକେଟରେ ଅତି ସହଜରେ ବିଜୟୀ ହୋଇ ଟାଇଟଲ ହାସଲ କରିଥିଲା। ରବି ଶାସ୍ତ୍ରୀ ପ୍ଲେୟର ଅଫ୍‌‌ ଦି ଟୁର୍ଣ୍ଣାମେଣ୍ଟ ଓ କ୍ରିସ୍‌‌ ଶ୍ରୀକାନ୍ତ ପ୍ଲେୟର ଅଫ୍‌‌ ଦି ମ୍ୟାଚ୍‌‌ ବିବେଚିତ ହୋଇଥିଲେ।

ଭାରତ: ରୋହିତ ଶର୍ମା (ଅଧିନାୟକ), ଲୋକେଶ ରାହୁଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଦୀନେଶ କାର୍ତ୍ତିକ (ୱିକେଟକିପର), ଋଷଭ ପନ୍ତ (ୱିକେଟକିପର), ୟୁଜବେନ୍ଦ୍ର ଚହଲ, ଅକ୍ଷର ପଟେଲ, ରବିଚନ୍ଦ୍ରନ ଅଶ୍ୱିନ, ମହମ୍ମଦ ସାମି, ଭୁବନେଶ୍ୱର କୁମାର, ଅର୍ଶଦୀପ ସିଂ, ହର୍ଶଲ ପଟେଲ ଓ ଦୀପକ ହୁଦା।

ପାକିସ୍ତାନ: ବାବର ଆଜମ (ଅଧିନାୟକ), ମହମ୍ମଦ ରିଜୱାନ (ୱିକେଟକିପର), ଫଖର ଜମାନ, ଶାନ ମାସୁଦ, ମହମ୍ମଦ ନୱାଜ, ଖୁଶଦିଲ ଶାହା, ଆସିଫ ଅଲି, ହାଇଦର ଅଲି, ଇଫ୍‌‌ତିକାର ଅହମ୍ମଦ, ହାରିସ ରୌଫ୍‌‌, ନସିମ ଶାହା, ଶାହିନ ଶାହା ଆଫ୍ରିଦି, ମହମ୍ମଦ ୱାସିମ, ସଦାବ ଖାନ ଓ ମହମ୍ମଦ ହାସନେନ।

ସିଡନୀ : ଚଳିତ ଟି-ଟ୍ୱେଣ୍ଟି ବିଶ୍ୱକପ୍‌ର ସୁପର-୧୨ ରାଉଣ୍ଡ ଆଜିଠୁ ଆରମ୍ଭ ହୋଇଛି। ପ୍ରଥମ ମ୍ୟାଚ୍‌ରେ ଡିଫେଣ୍ଡିଂ ଚାମ୍ପିଅନ୍‌ ଅଷ୍ଟ୍ରେଲିଆ ବଡ଼ ଝଟକା ଲାଗିଛି।ଆୟୋଜକ ଅଷ୍ଟ୍ରେଲିଆ ବଡ଼ ବ୍ୟବଧାନରେ ହରାଇଛି ନ୍ୟୁଜିଲାଣ୍ଡ । ନ୍ୟୁଜିଲାଣ୍ଡ ଅଷ୍ଟ୍ରେଲିଆଠୁ ୨୦୨୧ ବିଶ୍ୱକପ୍‌ ଫାଇନାଲ୍‌ ପରାଜୟର ପ୍ରତିଶୋଧ ନେବା ସହ ୮୯ ରନ୍‌ରେ ଆୟୋଜକ ଅଷ୍ଟ୍ରେଲିଆକୁ ହରାଇଛି।

ସିଡନିଠାରେ ଖେଳାଯାଇଥିବା ଏହି ମ୍ୟାଚରେ ଅଷ୍ଚ୍ରେଲିଆ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରି ନ୍ୟୁଜିଲାଣ୍ଡ ୨୦ ଓଭରରେ ୩ ଓ୍ବିକେଟ ହରାଇ ୨୦୦ ରନ କରିଥିଲା । ଦଳ ପକ୍ଷରୁ ଡେଭନ କନଓ୍ବେ ମାତ୍ର ୫୮ଟି ବଲରୁ ୯୨ ରନର ବିସ୍ଫୋରକ ଇନିଂସ ଖେଳିଥିଲେ । ସେହିପରି ଫିନ ଆଲେନ ୪୨ ଓ କେନ ଓ୍ବିଲିଅମସନ ୨୩ ରନ କରିଥିଲେ ।

୨୦୧ ରନର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଅଷ୍ଟ୍ରେଲିଆ ଆରମ୍ଭରୁ ଡେଭିଡ ଓ୍ବାର୍ଣ୍ଣରଙ୍କ ଓ୍ବିକେଟ ହରାଇ ସଂକଟରେ ପଡ଼ିଥିଲା । ପରେ ଦଳ ନିୟମିତ ବ୍ୟବଧାନରେ ଓ୍ବିକେଟ ହରାଇଚାଲିଥିଲା । କୌଣସି ବ୍ୟାଟ୍ସମ୍ୟାନ ବଡ଼ ସ୍କୋର କରିପାରିନଥିଲେ । କେବଳ ଗ୍ଲେନ ମାକ୍ସଓ୍ବେଲ ସର୍ବାଧିକ ୨୮ ରନ କରିଥିଲେ । ପ୍ୟାଟ୍ କମିନ୍ସ ୨୧ରନ କରିଥିଲେ । ନ୍ୟୁଜିଲାଣ୍ଡ ପକ୍ଷରୁ ଟିମ ସାଉଥି ଓ ମିଚେଲ ସାଣ୍ଟନର ୩ଟି ଲେଖାଏଁ ଓ୍ବିକେଟ ନେଇଥିଲେ ।