ନୂଆଦିଲ୍ଲୀ : ଜମ୍ମୁ-କାଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଲ ମଲିକ ପୁଣି କେନ୍ଦ୍ର ସରକାରଙ୍କୁ ତୀବ୍ର ସମାଲୋଚନା କରିଛନ୍ତି। ଦେଶ ବହୁତ ଖରାପ ଲୋକ ହାତରେ ଅଛି ବୋଲି କହିଛନ୍ତି। ଯଦି କୃଷକ ଏକାଠି ନ ହୁଅନ୍ତି ଏବଂ କେନ୍ଦ୍ରରେ ଥିବା ସରକାର ପୁଣି କ୍ଷମତାକୁ ଆସନ୍ତି ତେବେ କୃଷକ ବଞ୍ଚିବେନି। ସେମାନେ ପ୍ରଥମେ ଚାଷ କାର୍ଯ୍ୟକୁ ଶେଷ କରିଦେବେ। କାରଣ କୃଷକ ଚାଷ ଛାଡ଼ି ସହରକୁ ମୂଲ ଲାଗିବାକୁ ଯାଆନ୍ତୁ ବୋଲି ସେମାନେ ଚାହୁଁଛନ୍ତି। ଏହା ପରେ ସେନାକୁ ଶେଷ କରିଦେବେ। କୃଷକଙ୍କୁ ବରବାଦ୍‌ କରିବାର ନକ୍ସା ପାସ୍‌ ହୋଇଛି। ଏହା ବିରୋଧରେ ଲଢିବା ଉଚିତ। ଯିଏ ଲଢିବ, ସେ ହିଁ ବଞ୍ଚିବ। ସତ୍ୟପାଲ ମଲିକ ପୁଲୱାମା ଆକ୍ରମଣକୁ ନେଇ କେନ୍ଦ୍ର ସରକାରଙ୍କୁ ପୁଣି ନିଶାଣ କରିଛନ୍ତି।

ସେ କହିଛନ୍ତି ଯେ ପୁଲୱାମା ଆକ୍ରମଣ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କାର୍ବେଟ ନ୍ୟାସନାଲ ପାର୍କରେ ସୁଟିଂ କରାଉ ଥିଲେ। ସେଠାରୁ ବାହାରିବା ପରେ ଏକ ଢାବାରୁ ଫୋନ୍‌ କରି କ’ଣ ହୋଇଛି ବୋଲି ତାଙ୍କୁ ପଚାରି ଥିଲେ। ସେତେବେଳେ ଆମ ଭୁଲ୍‌ରୁ ଏପରି ହୋଇଥିବା ମଲିକ କହିଥିଲେ। ରାଜ୍ୟପାଳ ଥିବା ସମୟରେ ସେ ପୁଲୱାମା ଆକ୍ରମଣ ବିଷୟରେ କହିଥିଲେ। ଏଥିରେ ୪୦ ଯବାନ ସହିଦ ହୋଇଥିଲେ। ଯଦି ସ୍ବରାଷ୍ଟ୍ର ମନ୍ତ୍ରାଳୟ ୫ ବିମାନ ଦେଇଥାନ୍ତା ତେବେ ଯବାନଙ୍କ ଜୀବନ ବଞ୍ଚି ଯାଇଥାନ୍ତା। ପ୍ରଧାନମନ୍ତ୍ରୀ ଏବଂ ଡୋଭାଲ ମୋତେ ପାଟି ଖୋଲିବାକୁ ମନା କରିଥିଲେ। ସେହି ଦିନ ନିର୍ବାଚନ ପାଇଁ ଏହାର ରାଜନୀତିକରଣ ହେବ ବୋଲି ବୁଝି ଯାଇଥିଲି। ପ୍ରାଣ ହରାଇଥିବା ସୈନିକଙ୍କ କଥା କିଏ ପଚାରେ। ଏଥିରୁ ବୁଝି ପାରୁଥିବେ ଯେ କେତେ ବିପଜ୍ଜନକ ଲୋକ ଦେଶ ଚଲାଉଛନ୍ତି। ଆମ ସୈନିକ ଏବଂ ଦେଶ ପ୍ରତି ତାଙ୍କର ଦରଦ ନାହିଁ। କେବେ ମନ ତ ଆଉ କେବେ ଶରୀର କଥା କହୁଛନ୍ତି।

ସିକର କୁଦନ ସ୍ଥିତ ଅଜିତାପୁରାରେ ମଙ୍ଗଳବାର ୧୯୩୫ ଗୁଳିକାଣ୍ଡରେ ପ୍ରାଣ ହରାଇଥିବା କୃଷକଙ୍କ ୮୮ତମ ପୁଣ୍ୟତିଥିରେ ଏକ ଜନସଭାକୁ ସମ୍ବୋଧନ କରି ମଲିକ କୃଷକଙ୍କୁ ଲଢ଼ିବାକୁ ଅଭ୍ୟାସ କରିବା ପାଇଁ ଆହ୍ବାନ ଦେଇଛନ୍ତି। କୃଷକ ଆନ୍ଦୋଳନ ଶେଷ ହୋଇନାହିଁ। ଦାବି ପୂରଣ ହୋଇନାହିଁ। ସର୍ବନିମ୍ନ ସହାୟକ ମୂଲ୍ୟ (ଏମଏସପି) ବିନା ଚାଷୀ ଚଳିପାରିବେ ନାହିଁ। ଚାଷୀ ଯାହା ବି ଉତ୍ପାଦନ କରୁଛି ତାହାର ଉଚିତ୍‌ ମୂଲ୍ୟ ମିଳୁନାହିଁ। ଯାହା କିଣୁଛି ତାହାର ମୂଲ୍ୟ ବଢ଼ି ଚାଲିଛି। ଚାଷୀ ଦିନକୁ ଦିନ ଗରିବ ହେବାରେ ଲାଗିଛି। ଚାଷୀର କ୍ରୟ କ୍ଷମତା ଶେଷ ହେବାରେ ଲାଗିଛି। ମଲିକ କବିତା ଶୁଣାଇ କେନ୍ଦ୍ର ସରକାରଙ୍କୁ ଭର୍ତ୍ସନା କରିଛନ୍ତି। ସରକାର କୃଷକଙ୍କୁ ହତ୍ୟା କରୁଛନ୍ତି। ଏବେ ଏଭଳି ସ୍ଥିତି ସୃଷ୍ଟି କରନ୍ତୁ, ଯେପରି ଲୋକେ କୃଷକଙ୍କୁ। ସରକାରଙ୍କୁ କୃଷକ ମାଗିବାର ଆବଶ୍ୟକତା ପଡିବନି। ଦିଲ୍ଲୀ ସରକାର ବଦଳାଇବା ପରେ ହିଁ ଏପରି ସମ୍ଭବ ହୋଇପାରିବ। ଯଦି ସମସ୍ତେ ଜାତି ଛାଡି ଏକାଠି ହୋଇଯିବେ ତେବେ ଦିଲ୍ଲୀରେ ବିଜେପିକୁ କେହି ରକ୍ଷା କରିପାରିବେ ନାହିଁ।

ସେ ଦିଲ୍ଲୀରେ ସବୁ ଦଳଙ୍କ ସହ କଥା ହୋଇଥିବା କହିଛନ୍ତି। ସମସ୍ତେ ଜଣେ ପ୍ରାର୍ଥୀ ବଦଳରେ ଅନ୍ୟ ଜଣେ ପ୍ରାର୍ଥୀ ଛିଡା କରିବାକୁ ରାଜି ହୋଇଛନ୍ତି। ଏପରି ହେଲେ ଏମାନେ ଦିଲ୍ଲୀରେ ରହିବେ ନାହିଁ। ୫ ବର୍ଷରେ ବହୁତ କିଛି ବର୍‌ବାଦ ହୋଇଯାଇଛି। ଏବେ କେହି ତାଙ୍କ ମୁହଁ ଚାହିଁବେନି। ସେମାନଙ୍କ ସବୁ ଗର୍ବ ଖର୍ବ ହୋଇଯାଇଛି। ସେମାନେ ବଞ୍ଚିଲେ ନିଜେ ବଞ୍ଚିବନି ବୋଲି ଜାଣି ରଖନ୍ତୁ। ନିଜର ଟଙ୍କା, ଜମି ଏବଂ ଶିଶୁଙ୍କୁ ବଞ୍ଚାଇବାର ଏହା ଶେଷ ସୁଯୋଗ। ସହିଦଙ୍କ ସନ୍ତାନ ହୋଇ ଭୟ କରନାହିଁ। ମଲିକ ଏହି କାର୍ଯ୍ୟକ୍ରମ ପରେ ଦିଲ୍ଲୀ ଫେରି ଯାଇଥିଲେ।

ନୂଆଦିଲ୍ଲୀ : ମେଘାଳୟ ରାଜ୍ୟପାଳ ସତ୍ୟପାଲ ମଲ୍ଲିକ ପୁଣିଥରେ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ଦେଶର ରାଜଧାନୀ ଦିଲ୍ଲୀସ୍ଥିତ ରାଜପଥ ନାମ ପରିବର୍ତ୍ତନ କରିବାକୁ ନେଇ କେନ୍ଦ୍ରରେ କ୍ଷମତାସୀନ ମୋଦୀ ସରକାରଙ୍କୁ ଟାର୍ଗେଟ କରିଛନ୍ତି ବରିଷ୍ଠ ବିଜେପି ନେତା ତଥା ବର୍ତ୍ତମାନର ମେଘାଳୟ ରାଜ୍ୟପାଳ ସତ୍ୟପାଲ ମଲିକ। ପୂର୍ବରୁ ବିଭିନ୍ନ ପ୍ରସଙ୍ଗରେ ଦଳୀୟ ସରକାରଙ୍କୁ ଟାର୍ଗେଟ କରି ସାରିଛନ୍ତି ରାଜ୍ୟପାଳ ମଲିକ। ସେ କେନ୍ଦ୍ରର ଅନେକ ଯୋଜନା ଏବଂ ନିଷ୍ପତ୍ତିକୁ ଖୋଲାଖୋଲି ବିରୋଧ କରିଛନ୍ତି। ବର୍ତ୍ତମାନ ରାଜ୍ୟପାଳ ରାଜପଥ ନାମ ପରିବର୍ତ୍ତନ କରିବାକୁ ନେଇ କେନ୍ଦ୍ରରେ କ୍ଷମତାସୀନ ବିଜେପି ସରକାରଙ୍କୁ ଟାର୍ଗେଟ କରିଛନ୍ତି।

ପ୍ରଧାନମନ୍ତ୍ରୀ ମୋଦୀଙ୍କୁ କଟାକ୍ଷ କରି ମେଘାଳୟ ରାଜ୍ୟପାଳ ସତ୍ୟପାଲ ମଲିକ କହିଛନ୍ତି ଯେ, ସେ ପ୍ରତ୍ୟେକ ତୃତୀୟ ଦିନରେ ଉଦଘାଟନ କରୁଛନ୍ତି। ବୋଧହୁଏ ଏଥର କିଛି ଉଦଘାଟନ କରିବାକୁ ନଥିଲା। ସେଥିପାଇଁ ସେ ରାଜପଥ ନାମ ପରିବର୍ତ୍ତନ କରି ଏହାର ଉଦଘାଟନ କରିଛନ୍ତି।

ନିକଟରେ ଉତ୍ତର ପ୍ରଦେଶ ବୁଲନ୍ଦ ଶହର ଜିଲ୍ଲାର ମୁଢି ବାକାପୁର ଗ୍ରାମରେ ଏକ କାର୍ୟ୍ୟକ୍ରମରେ ଯୋଗଦେବାକୁ ଆସିଥିଲେ ମେଘାଳୟ ରାଜ୍ୟପାଳ ସତ୍ୟପାଲ ମଲିକ । ଏହି ଅବସରରେ ଗଣମାଧ୍ୟମରେ ପ୍ରତିକ୍ରିୟା ରଖି ସେ କହିଛନ୍ତି ଯେ, ରାଜପଥ ବ୍ରିଟିଶ ନାମ ନୁହେଁ। ତେଣୁ ଏହାର ନାମ ପରିବର୍ତ୍ତନ କରିବାର କୌଣସି ଆବଶ୍ୟକତା ନାହିଁ। କଂଗ୍ରେସ ନେତା ରାହୁଲ ଗାନ୍ଧୀଙ୍କ ବାବଦରେ ପ୍ରତିକ୍ରିୟା ରଖି ରାଜ୍ୟପାଳ କହିଛନ୍ତି ସେ ଏକ ଭଲ କାମ କରୁଛନ୍ତି। ତାଙ୍କୁ ମୋର ଶୁଭେଚ୍ଛା।ବର୍ତ୍ତମାନ ଯୁବକ ଅଛନ୍ତି ତେଣୁ ଚାଲୁଛନ୍ତି, ହେଲେ ଆଜିକାଲି ନେତମାନେ ଏସବୁ କରୁ ନାହାନ୍ତି ବୋଲି ମଲିକ କହିଛନ୍ତି।

କୃଷକ ଆନ୍ଦୋଳନ ପର ଠାରୁ ମୋ ଇସ୍ତଫା ମୋ ପାଖରେ ପଡ଼ିଛି। ଯେତେବେଳେ ତାଙ୍କୁ କୁହାଯାଏ ଯେ ତାଙ୍କ କଥା ତାଙ୍କ ଦଳର ସରକାରଙ୍କୁ କ୍ଷତି ପହଞ୍ଚାଉଛି, ତାହାଲେ ସେ ଇସ୍ତଫା ଦେଇଦେବେ। ଯଦି କିଛି ସତ କଥାକହି କିଛି ହରେଇବାକୁ ପଡେ ତେବେ ତା ପାଇଁ ମୁଁ ପ୍ରସ୍ତୁତ ବୋଲି ସେ କହିଛନ୍ତି । ସେପଟେ ଇଡି ଓ ସିବିଆଇର ଛାଟ କେବଳ ବିରୋଧୀ ନେତାଙ୍କ ଉପରେ ପଡୁଛି କିନ୍ତୁ ବିଜେପିର ଅନେକ ନେତା ଅଛନ୍ତି ଯେଉଁମାନଙ୍କ ଉପରେ ଜାତୀୟ ଯାଞ୍ଚ ଏଜେନ୍ସିର ରେଡ୍‌ କରିବା ଆବଶ୍ୟକ।  ଏମଏସପି ପ୍ରସଙ୍ଗ ଉଠାଇ ରାଜ୍ୟପାଳ କହିଛନ୍ତି ଯେ ଯଦି ଫସଲ ଉପରେ ସର୍ବନିମ୍ନ ସହାୟକ ମୂଲ୍ୟ କାର୍ୟ୍ୟକାରୀ ନ କରାଯାଏ ତାହେଲେ କୃଷକ ଏବଂ ସରକାରଙ୍କ ମଧ୍ୟରେ ପୁଣି ଥରେ ଏକ ବଡ ଲଢେଇ ହେବା ନିଶ୍ଚିତ।

ଅନ୍ୟପଟେ ପୂର୍ବତନ ପଶ୍ଚିମବଙ୍ଗ ରାଜ୍ୟପାଳ ଜଗଦୀପ ଧନଖଡ଼ଙ୍କୁ ଉପରାଷ୍ଟ୍ରପତି କରାଯିବା ନେଇ ତାଙ୍କୁ ପ୍ରଶ୍ନ କରାଯାଇଥିଲା। ଏଥିରେ ସେ ପ୍ରତିକ୍ରିୟା ଦେବା ବେଳେ ତାଙ୍କୁ ମଧ୍ୟ ଅଫର ମିଳିଥିବା କଥା କହିଥିଲେ। ଧନଖଡ଼ଙ୍କ ବିଷୟରେ ସେ କହିଥିଲେ ଯେ ଧନଖଡ଼ ଉପଯୁକ୍ତ ପାର୍ଥୀ ଥିଲେ, ଏଣୁ ତାଙ୍କୁ ରାଷ୍ଟ୍ରପତି କରିବାର ଥିଲା। ମୋର ଏ ବିଷୟରେ କହିବା ଉଚିତ ହେବନି। ହେଲେ ମୋତେ ପୂର୍ବରୁ ଇସାରା ଦିଆଯାଇଥିଲା ଯେ ଯଦି ଆପଣ କିଛି ନ କହିବେ ତେବେ ଆପଣଙ୍କୁ ଉପରାଷ୍ଟ୍ରପତି କରିଦେବୁ। ତେବେ ମୁଁ ଏପରି କରିପାରିବି ନାହିଁ। ମୁଁ ଯାହା ଦେଖିବି ତାହା ନିଶ୍ଚିତ କହିବି ବୋଲି ସତ୍ୟାପଲ ମଲ୍ଲିକ କହିଛନ୍ତି।

ସୂଚନାଯୋଗ୍ୟ ସେପ୍ଟମ୍ବର ୮ ତାରିଖ ଗୁରୁବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜଧାନୀ ନୂଆଦିଲ୍ଲୀ ସ୍ଥିତ ରାଷ୍ଟ୍ରପତି ଭବନ ଠାରୁ ଇଣ୍ଡିଆ ଗେଟ୍ ପର୍ଯ୍ୟନ୍ତ ଯାଇଥିବା କର୍ତ୍ତବ୍ୟପଥ ରାସ୍ତାକୁ ଉଦଘାଟନ କରିଛନ୍ତି। ଯାହା ପୂର୍ବରୁ ରାଜପଥ ନାମରେ ଜଣାଶୁଣା ରହିଥିଲା। ଏହି ଅବସରରେ ପ୍ରଧାନମନ୍ତ୍ରୀ କହିଛନ୍ତି ଯେ ଦାସତ୍ୱର ପ୍ରତୀକ ରାଜପଥ ଏବେ ଇତିହାସର ବିଷୟ ପାଲଟିଛି ଏବଂ ଏହାକୁ ସବୁଦିନ ପାଇଁ ଲିଭାଇ ଦିଆଯାଇଛି। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ବର୍ତ୍ତମାନ କର୍ତ୍ତବ୍ୟ ପଥ ନାମରେ ଏକ ନୂତନ ଇତିହାସ ସୃଷ୍ଟି ହୋଇଛି। ସ୍ୱାଧୀନତାର ଅମୃତ ମହୋତ୍ସବ ଅବସରରେ ଆଉ ଏକ ଦାସତ୍ୱ ପରିଚୟରୁ ମୁକ୍ତି ପାଇଁ ମୁଁ ସମସ୍ତ ଦେଶବାସୀଙ୍କୁ ଅଭିନନ୍ଦନ ଜଣାଉଛି। ଏହି ଅବସରରେ ଇଣ୍ଡିଆ ଗେଟ ଠାରେ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଏକ ପ୍ରତିମୂର୍ତ୍ତି ଉନ୍ମୋଚନ କରିଛନ୍ତି।