ମଧ୍ୟପ୍ରଦେଶର ଛତରପୁର ଜିଲ୍ଲାରେ ଅବସ୍ଥିତ ପ୍ରସିଦ୍ଧ ବାଗେଶ୍ୱର ଧାମ (Bageshwar Dham)କୁ ଏବେ ବିଦେଶରୁ ମଧ୍ୟ ଦାନ ବା ଚାନ୍ଦା ମିଳିପାରିବ। ବାଗେଶ୍ୱର ଧାମର ପୀଠାଧୀଶ୍ୱର ଧୀରେନ୍ଦ୍ର କୃଷ୍ଣ ଶାସ୍ତ୍ରୀଙ୍କ ସଂସ୍ଥାକୁ ବିଦେଶୀ ପାଣ୍ଠି ସଂଗ୍ରହ ପାଇଁ ଭାରତ ସରକାରଙ୍କ ତରଫରୁ ଅନୁମତି ମିଳିଯାଇଛି। କେନ୍ଦ୍ର ଗୃହ ମନ୍ତ୍ରଣାଳୟ ଦ୍ୱାରା ଫରେନ କଣ୍ଟ୍ରିବ୍ୟୁସନ ରେଗୁଲେସନ ଆକ୍ଟ (FCRA) ଅଧୀନରେ ଏହି ମଞ୍ଜୁରୀ ପ୍ରଦାନ କରାଯାଇଛି।

ଏହି ଅନୁମତି ମିଳିବା ପରେ ଏବେ ବାଗେଶ୍ୱର ଧାମ ସହିତ ଜଡ଼ିତ ସଂସ୍ଥା ବିଦେଶରେ ରହୁଥିବା ଅନୁଗାମୀ ଏବଂ ଶ୍ରଦ୍ଧାଳୁମାନଙ୍କଠାରୁ ଆଇନଗତ ଭାବେ ଦାନ ଗ୍ରହଣ କରିପାରିବ। ପୂର୍ବରୁ ବିଦେଶରୁ ଚାନ୍ଦା ଆଣିବା ପାଇଁ ସ୍ୱତନ୍ତ୍ର ଅନୁମତିର ଆବଶ୍ୟକତା ପଡ଼ୁଥିଲା।

ସାମାଜିକ ଓ ଧାର୍ମିକ କାର୍ଯ୍ୟରେ ଲାଗିବ ଅର୍ଥ

ଧୀରେନ୍ଦ୍ର ଶାସ୍ତ୍ରୀଙ୍କ ତତ୍ତ୍ୱାବଧାନରେ 'ଶ୍ରୀ ବାଗେଶ୍ୱର ଜନ ସେବା ସମିତି' ନାମକ ଏକ ସଂସ୍ଥା ମଧ୍ୟପ୍ରଦେଶର ଛତରପୁର ଜିଲ୍ଲାର ଗଡ଼ା ଗ୍ରାମରେ କାର୍ଯ୍ୟ କରୁଛି। ସୂଚନା ଅନୁଯାୟୀ, ଏହି ସଂସ୍ଥା ମୁଖ୍ୟତଃ ଧାର୍ମିକ (ହିନ୍ଦୁ), ସାମାଜିକ, ଶୈକ୍ଷିକ, ସାଂସ୍କୃତିକ ଏବଂ ଅର୍ଥନୈତିକ କ୍ଷେତ୍ରରେ କାର୍ଯ୍ୟ କରିଥାଏ। ଏଫସିଆରଏ ଅନୁମୋଦନ ମିଳିବା ପରେ, ବିଦେଶରୁ ମିଳୁଥିବା ଅର୍ଥକୁ ଏହିସବୁ ସେବାମୂଳକ ଏବଂ ଧାର୍ମିକ କାର୍ଯ୍ୟକୁ ଆଗେଇ ନେବାରେ ବିନିଯୋଗ କରାଯିବ।

କ'ଣ ଏହି ଏଫସିଆରଏ (FCRA) ନିୟମ?

ଏଫସିଆରଏ (FCRA) ନିୟମ ଅନୁଯାୟୀ, ବିଦେଶରୁ ପାଣ୍ଠି ଗ୍ରହଣ କରୁଥିବା ଯେକୌଣସି ଅଣ-ସରକାରୀ ସଂସ୍ଥା (NGO)କୁ ନିଜ ଆୟ ଏବଂ ବ୍ୟୟର ସମ୍ପୂର୍ଣ୍ଣ ହିସାବ ରଖିବାକୁ ପଡ଼ିଥାଏ। ଅର୍ଥାତ୍ ଟଙ୍କା କେଉଁଠୁ ଆସିଲା ଏବଂ କେଉଁ କାର୍ଯ୍ୟରେ ଖର୍ଚ୍ଚ ହେଲା, ସେହି ସବୁ ତଥ୍ୟ ସରକାରଙ୍କୁ ପ୍ରଦାନ କରିବା ବାଧ୍ୟତାମୂଳକ ଅଟେ।

ଏହି ବିଦେଶୀ ଦେଣନେଣ ଏକ ନିର୍ଦ୍ଦିଷ୍ଟ ବ୍ୟାଙ୍କ ଆକାଉଣ୍ଟ ମାଧ୍ୟମରେ କରାଯାଇଥାଏ ଏବଂ ସମୟ ସମୟରେ ଏହାର ରିପୋର୍ଟ ମଧ୍ୟ ଦାଖଲ କରିବାକୁ ପଡ଼େ। ଏହି ପଞ୍ଜୀକରଣର ବୈଧତା ୫ ବର୍ଷ ପର୍ଯ୍ୟନ୍ତ ରହିଥାଏ, ଯାହା ପରେ ସଂସ୍ଥାକୁ ଏହାର ନବୀକରଣ (ରିନ୍ୟୁଆଲ୍) କରିବାକୁ ପଡ଼ିଥାଏ।

ଦେଶ ବିଦେଶରେ ବଢୁଛି ବାଗେଶ୍ୱର ବାବାଙ୍କ ଲୋକପ୍ରିୟତା

ଗତ କିଛି ବର୍ଷ ଧରି ବାଗେଶ୍ୱର ଧାମର ପ୍ରମୁଖ ୨୯ ବର୍ଷୀୟ ଧୀରେନ୍ଦ୍ର କୃଷ୍ଣ ଶାସ୍ତ୍ରୀ ବେଶ ଚର୍ଚ୍ଚାରେ ରହିଆସିଛନ୍ତି। ତାଙ୍କ କାର୍ଯ୍ୟକ୍ରମରେ ଲକ୍ଷ ଲକ୍ଷ ସଂଖ୍ୟାରେ ଶ୍ରଦ୍ଧାଳୁଙ୍କ ଭିଡ଼ ଜମୁଥିବା ଦେଖିବାକୁ ମିଳୁଛି। କେବଳ ଭାରତରେ ନୁହେଁ, ବିଦେଶରେ ମଧ୍ୟ ତାଙ୍କର ବହୁ ସଂଖ୍ୟାରେ ଅନୁଗାମୀ ଅଛନ୍ତି। ଏପରି ପରିସ୍ଥିତିରେ ଏହି ମଞ୍ଜୁରୀ ତାଙ୍କ ସଂସ୍ଥା ପାଇଁ ଏକ ବଡ଼ ପଦକ୍ଷେପ ବୋଲି ବିବେଚନା କରାଯାଉଛି। ଏପ୍ରିଲ ୧୫ ସୁଦ୍ଧା ଯେଉଁ ୩୮ଟି ଏନଜିଓକୁ ଏଫସିଆରଏ ପଞ୍ଜୀକରଣ ପ୍ରଦାନ କରାଯାଇଛି, ସେଥିମଧ୍ୟରେ ବାଗେଶ୍ୱର ଧାମ ମଧ୍ୟ ସାମିଲ ରହିଛି।

ନୂଆଦିଲ୍ଲୀ : କେନ୍ଦ୍ର ସରକାରଙ୍କ ରିପୋର୍ଟ ଅନୁସାରେ ଭାରତ ବ୍ରିଟେନକୁ ଅତିକ୍ରମ କରି ଅନ୍ୟତମ ବୃହତ୍ ଅର୍ଥନୀତରେ ପରିଣତ ହୋଇଛିି ଦେଶର ଅର୍ଥବ୍ୟବସ୍ଥା କ୍ରମଶଃ ସୁଦୃଢ଼ ହେଉଛି ଓ ୫ ଟ୍ରିଲିଅନ ଅର୍ଥନୀତିର ନିକଟତର ହେବାରେ ଲାଗିଛି । ବିଡ଼ମ୍ବନା ହେଉଛି କେନ୍ଦ୍ର ସରକାର ଦେଶର ବିକଶିତ ଅର୍ଥ ବ୍ୟବସ୍ଥାର ଯେଉଁ ଗୋଲାପୀ ଛବି ଦେଖାଉଛନ୍ତି, ବାସ୍ତବିକତା ହେଉଛି ତାହାର ବିପରୀତ। ବର୍ଷକ ମଧ୍ୟରେ ଭାରତର ଋଣ ବୋଝ ୮ ପ୍ରତିଶତରୁ ଅଧିକ ବୃଦ୍ଧି ଘଟିଛି।

କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ ପ୍ରକାଶିତ ବିଦେଶୀ ଋଣ ଷ୍ଟାଟସ୍‌ ରିପୋର୍ଟର ୨୮ତମ ସଂସ୍କରଣରେ ପ୍ରକାଶିତ ହୋଇଛି ଏହି ତଥ୍ୟ। କେବଳ ସେତିକି ନୁହେଁ; ବର୍ଷକ ମଧ୍ୟରେ ଦେଶର ବୈଦେଶିକ ପାଣ୍ଠି ୬୯ ବିଲିୟନ ଡଲାର ହ୍ରାସ ପାଇ ୫୭୩.୯ ବିଲିଅନ ଡଲାରରେ ପହଞ୍ଚିଛି । ଅନ୍ୟପଟେ ଦେଶର ସ୍ବର୍ଣ୍ଣ ଭଣ୍ଡାରରେ ମଧ୍ୟ କ୍ରମଶଃ ଖାଲି ହେବାରେ ଲାଗିଛି । ଗତ କିଛିମାସ ମଧ୍ୟରେ ସ୍ବର୍ଣ୍ଣ ପରିମାଣ ୨୭.୧ କୋଟି ଡଲାର ହ୍ରାସ ପାଇଛି । ଭାରତର ବୈଦେଶିକ ମୁଦ୍ରା ଭଣ୍ଡାରରେ ହ୍ରାସ ସହ ବାଣିଜ୍ୟ ନିଅଣ୍ଟ ବଢ଼ିବା ଦେଶର ଅର୍ଥନୀତିକୁ ପ୍ରଭାବିତ କରିବା ଆଶଙ୍କା ସୃଷ୍ଟି କରିଛି ।

ବିଦେଶ ବଜାରରୁ ଭାରତ ପ୍ରଚୁର ଋଣ ଉଠାଇଛି। ପୂର୍ବବର୍ଷ ତୁଳନାରେ ଉପରୋକ୍ତ ଋଣ ପରିମାଣରେ ୮.୨ ପ୍ରତିଶତ ବୃଦ୍ଧି ଘଟିଛି। କେନ୍ଦ୍ର ସରକାରଙ୍କ ଦ୍ବାରା ପ୍ରକାଶିତ ସର୍ବଶେଷ ତଥ୍ୟାନୁଯାୟୀ ୨୦୨୨ ମାର୍ଚ୍ଚ ୩୧ ସୁଦ୍ଧା ଭାରତର ବୈଦେଶିକ ଋଣ ପରିମାଣ ୬୨୦.୭ ବିଲିୟନ ଡଲାରରେ ପହଞ୍ଚିଛି। ମାର୍ଚ୍ଚ ୨୦୨୧ ଶେଷ ବେଳକୁ ଏହି ଋଣ ପରିମାଣ ୫୭୩.୭ ବିଲିୟନ ଡଲାର ରହିଥିଲା। ଏହି ଋଣ ମଧ୍ୟରୁ ୫୩.୨ ପ୍ରତିଶତ ଆମେରିକୀୟ ଡଲାରରେ ରହିଥିବାବେଳେ ଭାରତୀୟ ଟଙ୍କା ହିସାବରେ ଏହା ୩୧.୨ ପ୍ରତିଶତ ହେବ ବୋଲି ଆକଳନ କରାଯାଇଛି।

ଅପରପକ୍ଷରେ ଭାରତର ବାହ୍ୟ ଋଣ ସ୍ଥିତି ସମ୍ପର୍କିତ ଏହି ରିପୋର୍ଟରେ ଅର୍ଥ ମନ୍ତ୍ରାଳୟ ଉପରୋକ୍ତ ଋଣ ପରିମାଣକୁ ବେଶ ହାଲୁକା ଭାବେ ଗ୍ରହଣ କରିଛି। ବିଶ୍ବର ବିଭିନ୍ନ ଦେଶର ଋଣ ସ୍ଥିତି ଆଧାରରେ ଭାରତର ବୈଦେଶିକ ଋଣ ସ୍ଥିତି ସାଧାରଣ ବୋଲି ଅର୍ଥ ମନ୍ତ୍ରଣାଳୟ କହିଛିି ବିଭିନ୍ନ ଋଣ ଦୁର୍ବଳତା ସୂଚକାଙ୍କ ଅନୁଯାୟୀ ବୈଦେଶିକ ଋଣ ଦୃଷ୍ଟିରୁ ବିଶ୍ବର ସ୍ୱଳ୍ପ ଏବଂ ମଧ୍ୟମ ଆୟକାରୀ ଦେଶଗୁଡିକ ତୁଳନାରେ ଭାରତ ଭଲ ସ୍ଥିତିରେ ରହିଥିବା ମନ୍ତ୍ରାଳୟ କହିଛି।

ଅପରପକ୍ଷେ ଅଗଷ୍ଟ ୨୬ରେ ଶେଷ ହୋଇଥିବା ସପ୍ତାହରେ ଭାରତର ବୈଦେଶିକ ମୁଦ୍ରା ଭଣ୍ଡାରରେ ୩ ବିଲିୟନ୍‌ ଡଲାର ହ୍ରାସ ଘଟିଛି। ଗୋଟିଏ ବର୍ଷର ଆକଳନ କଲେ ଏହି ପରିମାଣ ପ୍ରାୟ ୬୯ ବିଲିଅନ ଡ଼ଲାର ହେବ । ୨୦୨୧ ସେପ୍ଟେମ୍ବରରେ ଭାରତର ବୈଦେଶିକ ପାଣ୍ଠି ପରିମାଣ ସର୍ବକାଳୀନ ରେକର୍ଡ଼ସ୍ତର ୬୪୨.୪୫ ବିଲିଅନ ଡ଼ଲାରରେ ପହଞ୍ଚିଥିଲା । ମାତ୍ର ଏବେ ଏହା ୫୭୩.୯ ବିଲିଅନ ଡ଼ଲାରକୁ ଖସି ଆସିଛି। ଏଭଳି ସମୟରେ ଦେଶର ବାଣିଜ୍ୟ ନିଅଣ୍ଟ ବଢ଼ିବାରେ ଲାଗିଛି। ଚଳିତବର୍ଷ ଅଗଷ୍ଟରେ ପୂର୍ବ ବର୍ଷ ତୁଳନାରେ ଦେଶର ବାଣିଜ୍ୟ ନିଅଣ୍ଟ ଦ୍ୱିଗୁଣିତ ହୋଇଛି। ରପ୍ତାନି ହ୍ରାସ ସହ ଆମଦାନୀ ବୃଦ୍ଧି ଏହାର ପ୍ରମୁଖ କାରଣ ବୋଲି କୁହାଯାଉଛି ।

ନିକଟରେ ପ୍ରକାଶିତ ବାଣିଜ୍ୟ ମନ୍ତ୍ରାଳୟର ତଥ୍ୟାନୁଯାୟୀ, ଅଗଷ୍ଟରେ ଭାରତର ରପ୍ତାନି ଗତ ବର୍ଷ ତୁଳନାରେ ୧.୧୫% ହ୍ରାସ ପାଇ ୩୩ ବିଲିୟନ ଡ଼ଲାରରେ ପହଞ୍ଚିଛି। ବାଣିଜ୍ୟ ନିଅଣ୍ଟ ୨୮.୬୮ ବିଲିୟନ ଡ଼ଲାରରେ ପହଞ୍ଚିଛି। ଅଗଷ୍ଟ ୨୦୨୧ରେ ଏହି ସଂଖ୍ୟା ୧୧.୭୧ ବିଲିୟନ ଡ଼ଲାରରେ ପହଞ୍ଚିଛି। ଏଥିଯୋଗୁ ଭାରତୀୟ ମୁଦ୍ରା ଟଙ୍କା ଚାପ ଗ୍ରସ୍ତ ହେବା ଆଶଙ୍କା ବୃଦ୍ଧି ପାଇଛି । ଗୋଟିଏ ପଟେ ଦେଶର କରଜ ଭାର ବଢ଼ୁଥିବାବେଳେ ସମତାଳରେ ବୈଦେଶିକ ମୁଦ୍ରା ଭଣ୍ଡାରରେ ହ୍ରାସ , ବାଣିଜ୍ୟ ନିଅଣ୍ଟ ବୃଦ୍ଧି ଏବଂ ସୁନା ଭଣ୍ଡାରର ମହଜୁଦ ପରିମାଣ ତଳକୁ ଖସିବା ଦେଶର ଅର୍ଥନୀତିକୁ ଦୁର୍ବଳ କରିପାରେ ବୋଲି ବିଶେଷଜ୍ଞମାନେ ମନେ କରୁଛନ୍ତି ।