ନୂଆଦିଲ୍ଲୀ: ଡିଜିସିଏର ଅଧ୍ୟକ୍ଷ ହେଲେ ବରିଷ୍ଠ ଆଇଏଏସ୍‌ ବୀର ବିକ୍ରମ ଯାଦବ । କେନ୍ଦ୍ର ସରକାରଙ୍କ ପକ୍ଷରୁ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ)ରେ ବଡ଼ ଧରଣର ଅଦଳବଦଳ କରାଯାଇଛି। ସରକାର ବର୍ତ୍ତମାନର ମହାନିର୍ଦ୍ଦେଶକ ଫୈଜ ଅହମ୍ମଦ କିଦୱାଇଙ୍କୁ ପରିବର୍ତ୍ତନ କରି ତାଙ୍କ ସ୍ଥାନରେ ବୀର ବିକ୍ରମ ଯାଦବଙ୍କୁ ନୂଆ ମହାନିର୍ଦ୍ଦେଶକ ଭାବେ ନିଯୁକ୍ତ କରିଛନ୍ତି। ଶ୍ରୀ ଯାଦବ ହେଉଛନ୍ତି ୧୯୯୬ ବ୍ୟାଚ୍‌ର ଓଡ଼ିଶା କ୍ୟାଡର ଆଇଏଏସ୍‌(IAS)। ସେ କେନ୍ଦ୍ରୀୟ ଡେପୁଟେସନରେ ଯିବା ପୂର୍ବରୁ ଓଡ଼ିଶାର ବିଭିନ୍ନ ପ୍ରଶାସନିକ ପଦପଦବୀରେ କାର୍ଯ୍ୟ କରିଥିଲେ। ୨୦୨୪ରେ ତାଙ୍କୁ ଶ୍ରୀ ମନ୍ଦିରର ମୁଖ୍ୟ ପ୍ରଶାସକ ଦାୟିତ୍ୱ ମିଳିଥିଲା। ଏବେ ସେ ଡିଜିସିଏ ମୁଖ୍ୟ ହୋଇଛନ୍ତି। 

ବୀର ବିକ୍ରମ ଯାଦବ ବର୍ତ୍ତମାନ ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟରେ ଅତିରିକ୍ତ ସଚିବ ଭାବରେ କାର୍ଯ୍ୟ କରୁଛନ୍ତି। ନୁଆ ନିଯୁକ୍ତି ପରେ ସେ ଭାରତର ବିମାନ ନିୟାମକ ସଂସ୍ଥା ଡିଜିସିଏର ମୁଖ୍ୟ ହେବେ।   ଭାରତର ବିମାନ ଚଳାଚଳ କ୍ଷେତ୍ର ବର୍ତ୍ତମାନ ଦ୍ରୁତ ବିକାଶ ଆଡ଼କୁ ଅଗ୍ରସର ହେଉଥିବା ବେଳେ ଏବଂ ଏୟାର ଟ୍ରାଫିକ୍ ବୃଦ୍ଧି ପାଉଥିବା ସମୟରେ ଏହି ନିଯୁକ୍ତି ବେଶ୍ ଗୁରୁତ୍ୱପୂର୍ଣ୍ଣ ମନେ କରାଯାଉଛି।

ଅନ୍ୟପକ୍ଷରେ, ଡିଜିସିଏର ପୂର୍ବତନ ମୁଖ୍ୟ ଫୈଜ ଅହମ୍ମଦ କିଦୱାଇଙ୍କୁ ବ୍ୟକ୍ତିଗତ ଏବଂ ପ୍ରଶିକ୍ଷଣ ବିଭାଗ (DoPT)ର ଅତିରିକ୍ତ ସଚିବ ଭାବରେ ନିଯୁକ୍ତ କରାଯାଇଛି। ଉଲ୍ଲେଖଯୋଗ୍ୟ ଯେ, ଶ୍ରୀ କିଦୱାଇ ଜାନୁଆରୀ ୨୦୨୫ରେ ଡିଜିସିଏର ମୁଖ୍ୟ ଭାବେ ଦାୟିତ୍ୱ ଗ୍ରହଣ କରିଥିଲେ ଏବଂ ମାତ୍ର ବର୍ଷକରୁ ଅଧିକ ସମୟ ପାଇଁ ଏହି ପଦବୀରେ କାର୍ଯ୍ୟ କରିଥିଲେ।

କେନ୍ଦ୍ର ସରକାର ଡିଜିସିଏର ମୁଖ୍ୟ ଭାବେ ବୀର ବିକ୍ରମଙ୍କୁ ନିଯୁକ୍ତି ଦେଇଥିବା ବେଳେ ଏହାର ଅତିରିକ୍ତ ସଚିବ ଭାବେ ପୁନୀତ୍ କଂସଲ୍‌ଙ୍କୁ ଦାୟିତ୍ୱ ଦିଆଯାଇଛି। ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟର ଅତିରିକ୍ତ ସଚିବ ହୋଇଛନ୍ତି ମୋନା କେ ଖଣ୍ଡାର।

ଜ୍ଞାନେନ୍ଦ୍ର ଡି ତ୍ରିପାଠୀଙ୍କୁ କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ ଅଧୀନରେ ଥିବା କୃଷି ଗବେଷଣା ଓ ଶିକ୍ଷା ବିଭାଗର ଅତିରିକ୍ତ ସଚିବ ସହିତ ଇଣ୍ଡିଆନ୍ କାଉନ୍ସିଲ୍ ଅଫ୍ ଏଗ୍ରିକଲ୍ଚରାଲ୍ ରିସର୍ଚ୍ଚର ସଚିବ ଭାବେ ନିଯୁକ୍ତି ଦିଆଯାଇଛି। ବିଶାଲ୍ ଗଗନଙ୍କୁ କେନ୍ଦ୍ରୀୟ ସୂଚନା ଆୟୋଗର ସଚିବ ହୋଇଛନ୍ତି। 

ନୂଆଦିଲ୍ଲୀ: ଝାଡ଼ଖଣ୍ଡର ଚତ୍ରା ଜିଲ୍ଲାରେ ହୋଇଥିବା ଭୟାବହ ଏୟାର ଆମ୍ବୁଲାନ୍ସ ଦୁର୍ଘଟଣାର ରହସ୍ୟ ଆହୁରି ଜଟିଳ ହେବାରେ ଲାଗିଛି। ଏହି ଦୁର୍ଘଟଣାରେ ବିମାନରେ ଥିବା ସମସ୍ତ ୭ ଜଣ ଯାତ୍ରୀଙ୍କର ମୃତ୍ୟୁ ଘଟିଥିଲା। ତେବେ ବର୍ତ୍ତମାନର ପ୍ରାଥମିକ ତଦନ୍ତରୁ ଜଣାପଡିଛି ଯେ, ଦୁର୍ଘଟଣାଗ୍ରସ୍ତ ବିମାନରେ କୌଣସି ‘ବ୍ଲାକ୍ ବକ୍ସ’ ବା କକପିଟ୍ ଭଏସ୍ ରେକର୍ଡର (CVR) ଏବଂ ଫ୍ଲାଇଟ୍ ଡାଟା ରେକର୍ଡର (FDR) ନଥିଲା। ଏହା ଦୁର୍ଘଟଣାର ପ୍ରକୃତ କାରଣ ଖୋଜିବା ପ୍ରକ୍ରିୟାକୁ କଷ୍ଟସାଧ୍ୟ କରିପାରେ।

ବ୍ଲାକ୍ ବକ୍ସ ନଥିବାରୁ ବିମାନର ଶେଷ ମୁହୂର୍ତ୍ତରେ କ’ଣ ଘଟିଥିଲା, ତାହା ଜାଣିବା ଏବେ କଷ୍ଟକର ହେବ। ବିମାନ ଦୁର୍ଘଟଣା ତଦନ୍ତ ବ୍ୟୁରୋ (AAIB)କୁ ବର୍ତ୍ତମାନ କେବଳ ଏୟାର ଟ୍ରାଫିକ୍ କଣ୍ଟ୍ରୋଲ୍ (ATC) ସହ ହୋଇଥିବା ଶେଷ କଥାବାର୍ତ୍ତା ଏବଂ ଘଟଣାସ୍ଥଳରୁ ମିଳିଥିବା ଭଗ୍ନାବଶେଷ ଉପରେ ନିର୍ଭର କରିବାକୁ ପଡିବ।

ସୂଚନାଯୋଗ୍ୟ ଯେ, ଏହି ବିମାନଟି ଫେବୃଆରୀ ୨୩ ତାରିଖ ସନ୍ଧ୍ୟା ୭:୧୧ ମିନିଟରେ ରାଞ୍ଚିରୁ ଦିଲ୍ଲୀ ଅଭିମୁଖେ ଉଡାଣ ଭରିଥିଲା। ଉଡାଣର ମାତ୍ର ୨୩ ମିନିଟ୍ ପରେ ପାଗ ଖରାପ ଥିବା ଦର୍ଶାଇ ପାଇଲଟ୍ ରୁଟ୍ ବଦଳାଇବାକୁ ଅନୁରୋଧ କରିଥିଲେ ଏବଂ ଏହା ପରେ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା।

ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନ ବନ୍ଦରରେ ମଙ୍ଗଳବାର ଏକ ବଡ଼ ଦୁର୍ଘଟଣା ଟଳିଯାଇଛି। ଟ୍ୟାକ୍ସିୱେରେ ଥିବାବେଳେ ଦୁଇଟି ଯାତ୍ରୀବାହୀ ବିମାନର ଡେଣା ପରସ୍ପର ସହ ଘଷି ହୋଇଯିବା ଫଳରେ ଏହି ଅଘଟଣ ଘଟିଥିଲା। ତେବେ ସୌଭାଗ୍ୟବଶତଃ ଏଥିରେ କୌଣସି ଯାତ୍ରୀ କିମ୍ବା କ୍ରୁ ସଦସ୍ୟ ଆହତ ହୋଇନାହାନ୍ତି ଏବଂ ଏକ ବଡ଼ ବିପଦରୁ ସମସ୍ତେ ଅଳ୍ପକେ ବର୍ତ୍ତି ଯାଇଛନ୍ତି।

ମିଳିଥିବା ସୂଚନା ଅନୁଯାୟୀ, ଏୟାର ଇଣ୍ଡିଆର ବିମାନ (ଏଆଇ୨୭୩୨) ମୁମ୍ବାଇରୁ କୋଏମ୍ବାଟୁର ଯିବା ପାଇଁ ପ୍ରସ୍ତୁତ ହେଉଥିବା ବେଳେ ଟ୍ୟାକ୍ସିୱେରେ ଅପେକ୍ଷା କରିଥିଲା। ଠିକ୍ ଏହି ସମୟରେ ପାଖ ଦେଇ ଗତି କରୁଥିବା ଏକ ଇଣ୍ଡିଗୋ ବିମାନର ଡେଣା ଏୟାର ଇଣ୍ଡିଆ ବିମାନର ଡେଣା ସଂସ୍ପର୍ଶରେ ଆସିଥିଲା। ତେବେ ବିମାନର ଗତି ଧୀର ଥିବାରୁ କୌଣସି ବଡ଼ ଧରଣର କ୍ଷୟକ୍ଷତି ହୋଇନାହିଁ।

ସୁରକ୍ଷା ଦୃଷ୍ଟିରୁ ତୁରନ୍ତ ଉଭୟ ବିମାନର ଉଡାଣକୁ ବାତିଲ କରିଦିଆଯାଇଛି। ବିମାନରେ ଥିବା ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ଓହ୍ଲାଇ ଦିଆଯାଇଛି ଏବଂ ସେମାନଙ୍କ ଗନ୍ତବ୍ୟସ୍ଥଳରେ ପହଞ୍ଚାଇବା ପାଇଁ ବିକଳ୍ପ ବ୍ୟବସ୍ଥା କରାଯାଇଛି। ଘଟଣାସ୍ଥଳରେ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA)ର ଅଧିକାରୀମାନେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ବୈଷୟିକ ଯାଞ୍ଚ ପରେ ହିଁ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସୂଚନା ମିଳିଛି।

ମହାରାଷ୍ଟ୍ର: ମହାରାଷ୍ଟ୍ରର ବାରାମତୀ ନିକଟରେ ଘଟିଥିବା ଭୟାବହ ବିମାନ ଦୁର୍ଘଟଣାର ତଦନ୍ତ ପ୍ରକ୍ରିୟାକୁ ତ୍ୱରାନ୍ୱିତ କରାଯାଇଛି। ଜାନୁଆରୀ ୨୮ତାରିଖରେ ଘଟିଥିବା ଏହି ଦୁଃଖଦ ଦୁର୍ଘଟଣାରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ଅନ୍ୟ ୪ ଜଣଙ୍କର ପ୍ରାଣହାନୀ ଘଟିଥିଲା। ବେସାମରିକ ବିମାନ ଚଳାଚଳ ମନ୍ତ୍ରାଳୟ ଗୁରୁବାର ସ୍ପଷ୍ଟ କରିଛି ଯେ ଦୁର୍ଘଟଣାଗ୍ରସ୍ତ ବିମାନର ‘ବ୍ଲାକ୍ ବକ୍ସ’କୁ ସଫଳତାର ସହ ଉଦ୍ଧାର କରାଯାଇଛି, ଯାହା ଦୁର୍ଘଟଣାର କାରଣ ଜାଣିବାରେ ମୁଖ୍ୟ ଭୂମିକା ଗ୍ରହଣ କରିବ।

ମନ୍ତ୍ରାଳୟର ସୂଚନା ଅନୁଯାୟୀ, ଦୁର୍ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପାଇଁ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ୍ ବ୍ୟୁରୋ (AAIB) ର ତିନିଜଣିଆ ଟିମ୍ ଏବଂ ଡିଜିସିଏ (DGCA) ର ଅନ୍ୟ ଏକ ଟିମ୍ ଜାନୁଆରୀ ୨୮ ତାରିଖରେ ହିଁ ଘଟଣାସ୍ଥଳରେ ପହଞ୍ଚିଥିଲେ। AAIB ର ମହାନିର୍ଦ୍ଦେଶକ ମଧ୍ୟ ସେହିଦିନ ଘଟଣାସ୍ଥଳ ପରିଦର୍ଶନ କରିଥିଲେ। ଉଦ୍ଧାର ହୋଇଥିବା ବ୍ଲାକ୍ ବକ୍ସରୁ ବିମାନର ଉଡାଣ ସମ୍ବନ୍ଧୀୟ ଗୁରୁତ୍ୱପୂର୍ଣ୍ଣ ତଥ୍ୟ ମିଳିବ ବୋଲି ଆଶା କରାଯାଉଛି।

ଉଲ୍ଲେଖଯୋଗ୍ୟ ଯେ, ବୋମ୍ବାଡିୟର୍ ଲିୟରଜେଟ୍ ୪୫ (Bombardier Learjet 45) ନାମକ ଏହି ବିମାନଟି ବାରାମତୀ ଏୟାରଷ୍ଟ୍ରିପରେ ଅବତରଣ କରିବାକୁ ଚେଷ୍ଟା କରୁଥିବାବେଳେ ଦୁର୍ଘଟଣାଗ୍ରସ୍ତ ହୋଇଥିଲା। ମନ୍ତ୍ରାଳୟ ସୋସିଆଲ ମିଡିଆରେ ସୂଚନା ଦେଇ କହିଛି ଯେ, “AAIB ନିୟମାବଳୀ, ୨୦୨୫ର ନିୟମ ୫ ଏବଂ ୧୧ ଅନୁଯାୟୀ ତଦନ୍ତ ଆରମ୍ଭ କରାଯାଇଛି। ଏକ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ସ୍ୱଚ୍ଛ ଏବଂ ନିରପେକ୍ଷ ତଦନ୍ତ ଶେଷ କରିବା ଆମର ପ୍ରାଥମିକତା।”

ନୂଆଦିଲ୍ଲୀ: ଦେଶରେ ଉଡ଼ିବ ଆଉ ୩ ନୂଆ ଏୟାରଲାଇନ୍ସ । ଦେଶର ବୃହତ୍ତମ ବିମାନ ସେବା ପ୍ରଦାନକାରୀ ସଂସ୍ଥା ଇଣ୍ଡିଗୋରେ ଦେଖାଦେଇଥିବା ଗୁରୁତର ସଙ୍କଟ ପରେ କେନ୍ଦ୍ର ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ଭାରତୀୟ ଆକାଶରେ ଉଡ଼ାଣ ଭରିବା ପାଇଁ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ତିନୋଟି ନୂତନ ଏୟାରଲାଇନ୍ସକୁ ଅନୁମତି ପ୍ରଦାନ କରିଛି। କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ପକ୍ଷରୁ ଶଙ୍ଖ ଏୟାର, ଅଲ୍ ହିନ୍ଦ୍ ଏୟାର ଓ ଏବଂ ଫ୍ଲାଏ ଏକ୍ସପ୍ରେସକୁ ଅନୁମତି ମିଳିଛି । ଏହି ପଦକ୍ଷେପ ଦ୍ୱାରା ଯାତ୍ରୀମାନଙ୍କ ପାଇଁ ବିକଳ୍ପ ବଢିବା ସହ ବଜାରରେ ଏକାଧିପତ୍ୟ ହ୍ରାସ ପାଇବ ବୋଲି ଆଶା କରାଯାଉଛି। ନୂତନ ଏୟାରଲାଇନ୍ସଗୁଡ଼ିକ ବଜାରକୁ ଆସିବା ପରେ ପ୍ରତିଯୋଗିତା ବୃଦ୍ଧି ପାଇବ ଏବଂ ଯାତ୍ରୀମାନେ ଉନ୍ନତ ସେବା ପାଇପାରିବେ ବୋଲି ଆଶା କରାଯାଉଛି।

କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ସୋସିଆଲ ମିଡିଆରେ ସୂଚନା ଦେଇଛନ୍ତି ଯେ, ଅଲ୍ ହିନ୍ଦ ଏୟାର (Al Hind Air) ଏବଂ ଫ୍ଲାଏ ଏକ୍ସପ୍ରେସ (FlyExpress) କୁ ଉଡ଼ାଣ ଆରମ୍ଭ କରିବା ପାଇଁ ଏନଓସି ପ୍ରମାଣପତ୍ର (NOC) ପ୍ରଦାନ କରାଯାଇଛି। ଏହା ବ୍ୟତୀତ ଉତ୍ତରପ୍ରଦେଶ ଭିତ୍ତିକ ଶଙ୍ଖ ଏୟାର (Shankh Air) ପୂର୍ବରୁ ଏନଓସି ପାଇସାରିଛି ଏବଂ ୨୦୨୬ ମସିହାରେ ଏହାର ସେବା ଆରମ୍ଭ କରିବାକୁ ଯାଉଛି। ମନ୍ତ୍ରୀ କହିଛନ୍ତି ଯେ, ଉଡାନ୍ (UDAN) ଯୋଜନା ମାଧ୍ୟମରେ ଷ୍ଟାର ଏୟାର ଏବଂ ଫ୍ଲାଏ-୯୧ ଭଳି ଛୋଟ କମ୍ପାନୀଗୁଡ଼ିକ ଆଞ୍ଚଳିକ ଯୋଗାଯୋଗରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି।

ନୂଆଦିଲ୍ଲୀ: ଦେଶର ଅଗ୍ରଣୀ ବିମାନ ସେବା ପ୍ରଦାନକାରୀ ସଂସ୍ଥା ଇଣ୍ଡିଗୋ ବର୍ତ୍ତମାନ ଏକ ବଡ଼ ସଙ୍କଟ ଦେଇ ଗତି କରୁଛି। ଗତ କିଛି ଦିନ ହେବ ଲଗାତାର ବିମାନ ବାତିଲ ଏବଂ ବିଳମ୍ବ ଯୋଗୁଁ ଯାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି। ଏହି ପରିପ୍ରେକ୍ଷୀରେ ଶୁକ୍ରବାର ଦିନ କମ୍ପାନୀ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ବିମାନ ସେବାରେ ଦେଖାଦେଇଥିବା ବିଭ୍ରାଟର କାରଣ ଖୋଜିବା ପାଇଁ ଏକ ସ୍ୱାଧୀନ ଅନ୍ତର୍ଜାତୀୟ ବିମାନ ଚଳାଚଳ ପରାମର୍ଶଦାତା ସଂସ୍ଥାର ନିଯୁକ୍ତିକୁ ଇଣ୍ଡିଗୋ ବୋର୍ଡ ମଞ୍ଜୁରୀ ପ୍ରଦାନ କରିଛି।

ଇଣ୍ଡିଗୋ ପକ୍ଷରୁ କୁହାଯାଇଛି ଯେ, ଚିଫ୍ ଏଭିଏସନ୍ ଆଡଭାଇଜର୍ସ ଏଲଏଲସି (Chief Aviation Advisors LLC), ଯାହାର ନେତୃତ୍ୱ କ୍ୟାପଟେନ ଜନ ଇଲସନ ନେଉଛନ୍ତି, ଏହି ଘଟଣାର ମୂଳ କାରଣ ଖୋଜି ବାହାର କରିବେ ଏବଂ ସମସ୍ୟାର ସମାଧାନ ପାଇଁ ଉପଯୁକ୍ତ ପଦକ୍ଷେପ ସୁପାରିଶ କରିବେ। ଉଲ୍ଲେଖଯୋଗ୍ୟ ଯେ, ଡିସେମ୍ବର ୨ ତାରିଖରୁ ଶହ ଶହ ବିମାନ ବାତିଲ ହେବା ଫଳରେ ଦେଶର ପ୍ରମୁଖ ବିମାନବନ୍ଦରଗୁଡ଼ିକରେ ପ୍ରବଳ ଭିଡ଼ ଜମିଥିଲା ଏବଂ ହଜାର ହଜାର ଯାତ୍ରୀ ଅଟକି ରହିଥିଲେ।

DGCAଙ୍କ କଡ଼ା କାର୍ଯ୍ୟାନୁଷ୍ଠାନ
ଅନ୍ୟପକ୍ଷରେ, ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ଏହି ମାମଲାରେ ନିଜର କାର୍ଯ୍ୟାନୁଷ୍ଠାନକୁ ଜୋରଦାର କରିଛି। ଇଣ୍ଡିଗୋର ସୁରକ୍ଷା ଏବଂ ପରିଚାଳନା ନିୟମାବଳୀର ତଦାରଖ ଦାୟିତ୍ୱରେ ଥିବା ୪ ଜଣ ଫ୍ଲାଇଟ୍ ଇନ୍ସପେକ୍ଟରଙ୍କୁ ଚାକିରିରୁ ବରଖାସ୍ତ କରାଯାଇଛି। ଏହା ବ୍ୟତୀତ, ଇଣ୍ଡିଗୋ ସିଇଓ ପିଟର ଏଲବର୍ସଙ୍କୁ ପୁଣି ଥରେ ତଲବ କରାଯାଇଛି। ଏହି ସମୟରେ ସରକାର ଇଣ୍ଡିଗୋ ଉପରେ ୫୮.୭୫ କୋଟି ଟଙ୍କାର GST ଜୋରିମାନା ମଧ୍ୟ ଲଗାଇଛନ୍ତି।

ପରିସ୍ଥିତି ଉପରେ ତୀକ୍ଷ୍ଣ ନଜର ରଖିବା ପାଇଁ DGCA ଗୁରୁଗ୍ରାମ ସ୍ଥିତ ଇଣ୍ଡିଗୋ ମୁଖ୍ୟାଳୟରେ ଦୁଇଟି ସ୍ୱତନ୍ତ୍ର ଟିମ୍ ନିୟୋଜିତ କରିଛି। ଗୋଟିଏ ଟିମ୍ ଏୟାରଲାଇନ୍ସର ଆଭ୍ୟନ୍ତରୀଣ କାର୍ଯ୍ୟକଳାପ, ଯେପରିକି ପାଇଲଟ୍ ଉପଲବ୍ଧତା, କ୍ରୁ ଡ୍ୟୁଟି ସମୟ ଏବଂ ବିମାନ ବାତିଲ ସଂଖ୍ୟା ଉପରେ ତଦାରଖ କରୁଛି। ଦ୍ୱିତୀୟ ଟିମ୍ ଯାତ୍ରୀଙ୍କ ଅଭିଜ୍ଞତା ଉପରେ ଧ୍ୟାନ ଦେଉଛି। ଯାତ୍ରୀମାନେ ଟିକେଟ୍ ବାବଦ ଟଙ୍କା ଫେରସ୍ତ ପାଉଛନ୍ତି କି ନାହିଁ ଏବଂ ନିୟମ ଅନୁଯାୟୀ କ୍ଷତିପୂରଣ ଦିଆଯାଉଛି କି ନାହିଁ, ତାହା ଯାଞ୍ଚ କରାଯାଉଛି। ଏହି ଟିମ୍‌ଗୁଡ଼ିକ ପ୍ରତିଦିନ ସନ୍ଧ୍ୟା ୬ଟା ସୁଦ୍ଧା ରିପୋର୍ଟ ପ୍ରଦାନ କରୁଛନ୍ତି।

ନୂଆଦିଲ୍ଲୀ: ଦେଶରେ ଇଣ୍ଡିଗୋ ସଙ୍କଟକୁ ନେଇ ଏବେ ଭାରତର ବିମାନ ଚଳାଚଳ କ୍ଷେତ୍ରରେ ଅସ୍ଥିରତା ଲାଗି ରହିଛି । ଇଣ୍ଡିଗୋ ବିରୁଦ୍ଧରେ କେନ୍ଦ୍ର ସରକାରଙ୍କ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି । ଇଣ୍ଡିଗୋକୁ ଶୀତକାଳୀନ ବିମାନ ସଂଖ୍ୟା ୫ ପ୍ରତିଶତ କମାଇବାକୁ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ନିର୍ଦ୍ଦେଶ ଦେଇଛି । ପରିଚାଳନା ଅକ୍ଷମତା ଯୋଗୁଁ ୨୦୨୫ ଶୀତ ସିଡ୍ୟୁଲ୍‌ କମାଇବାକୁ ନିର୍ଦ୍ଦେଶ ଜାରି ହୋଇଛି ।

ଇଣ୍ଡିଗୋ ପୂର୍ବ ଶୀତ ସିଡ୍ୟୁଲ୍ ତୁଳନାରେ ଡିପାର୍ଚର୍ ୯ ପ୍ରତିଶତରୁ ଅଧିକ ବଢ଼ାଇଥିଲା । କିନ୍ତୁ ଅନୁମୋଦିତ ସଂଖ୍ୟାରୁ ବହୁତ କମ୍ ବିମାନ ପରିଚାଳନା କରୁଥିଲା । ଇଣ୍ଡିଗୋ ଦୈନିକ ୨୨୦୦ ଘରୋଇ ଓ ଅନ୍ତର୍ଜାତୀୟ ବିମାନ ଉଡ଼ାଣ କରେ । ନୂଆ ନିର୍ଦ୍ଦେଶ ଅନୁସାରେ ଦୈନିକ ଇଣ୍ଡିଗୋ ବିମାନ ଉଡ଼ାଣ ସଂଖ୍ୟା ୧୧୦କୁ ହ୍ରାସ ପାଇବ । ଆସନ୍ତାକାଲି ଅପରାହ୍ନ ୫ଟା ସୁଦ୍ଧା ସଂଶୋଧିତ ସିଡ୍ୟୁଲ୍ ଦାଖଲ କରିବାକୁ ନିଦ୍ଦେଶ ଜାରି ହୋଇଛି ।

ପୁରୀ: ଶ୍ରୀଜଗନ୍ନାଥ ମନ୍ଦିରକୁ RED ZONE ଘୋଷଣା କଲା ଡିଜିସିଏ। ଶ୍ରୀମନ୍ଦିର ସୁରକ୍ଷାକୁ ଆହୁରି ମଜବୁତ କରିବା ପାଇଁ ପଦକ୍ଷେପ। ଏୟାରସ୍ପେଶ୍ ମ୍ୟାପରେ କିଛି ଏଭଳି ତଥ୍ୟ ରହିଥିବା ଭାରତ ସରକାରଙ୍କ ଡିଜିସିଏ ୱେବସାଇଟରେ ଉପଲବ୍ଧ ରହିଛି l ଏହାର ଅବଧି ତିନିବର୍ଷ ମଧ୍ୟ ରହିଛି। ଅର୍ଥାତ ୨୦୨୮ ସେପ୍ଟେମ୍ବର ୨୫ ତାରିଖରେ ଏହାର ସମୟସୀମା ପୂରଣ ହେବ। ପୁର୍ନବାର ଶ୍ରୀମନ୍ଦିର ଉପରକୁ ନିଷିଧାଞ୍ଚଳ କରିବାକୁ ଆବେଦନ କରାଯିବ। ପୂର୍ବରୁ ଶ୍ରୀମନ୍ଦିର ଉପରକୁ ନୋ ଫ୍ଲାଇଂ ଜୋନ୍‌ ଘୋଷଣା କରାଯାଇଥିଲା।

ନୂଆଦିଲ୍ଲୀ : ଦେଶରେ ଚଳାଚଳ କରୁଥିବା ବିମାନ ଗୁଡିକରେ କିଛିଦିନ ହେବ ଲାଗାତର ତ୍ରୁଟି ପରିଲକ୍ଷିତ ହେଉଛି। ଗତ କିଛି ଦିନରେ ବିଭିନ୍ନ ଏୟାରଲାଇନସର ଏକାଧିକ ବିମାନ ୧୦ ଥର ଜରୁରୀ ଅବତରଣ କରିଛନ୍ତି। ବିଶେଷକରି ସ୍ପାଇସଜେଟ୍ ବିମାନରେ ଅଧିକ ତ୍ରୁଟି ସାମ୍ନାକୁ ଆସିଛି। ଯାହାକୁ ନେଇ ନେଇ ବଡ ପଦକ୍ଷେପ ନେଇଛି ଡିଜିସିଏ। ଘରୋଇ ବିମାନ ସେବା କମ୍ପାନି ସ୍ପାଇସ ଜେଟ୍ ଉପରେ କଡା କଟକଣା ଲଗାଇଛନ୍ତି ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) । ୮ ସପ୍ତାହ ପାଇଁ ୫୦ ପ୍ରତିଶତ ଉଡାଣ ଉପରେ ରୋକ ଲାଗାଯାଇଛି। ଏହି ଆଠ ସପ୍ତାହ ଏୟାରଲାଇନ ଉପରେ ଅତିରିକ୍ତ ନଜର ରଖାଯିବ । ଯଦି ଭବିଷ୍ୟତରେ ବିମାନ ସେବାପ୍ରଦାନକାରୀ କମ୍ପାନୀ ୫୦ ପ୍ରତିଶତରୁ ଅଧିକ ଉଡାଣ କରିବାକୁ ଚାହିଁବ ତେବେ କମ୍ପାନୀଙ୍କୁ ପ୍ରମାଣ କରିବାକୁ ପଡିବ ଯେ ଅତିରିକ୍ତ ଭାର ଉଠାଇବାର କ୍ଷମତା ତାଙ୍କ ପାଖରେ ଅଛି ନା ନାହିଁ, ପର୍ଯ୍ୟନ୍ତ ପରିମାଣର ସଂଶାଧନ ଏବଂ କର୍ମଚାରୀ ଅଛନ୍ତି ନା ନାହିଁ ।

ସୂଚନାଯୋଗ୍ୟ ଗତକିଛି ଦିନ ମଧ୍ୟରେ ଯାତ୍ରୀବାହୀ ସ୍ପାଇସ୍‌ ଜେଟ୍‌ ବିମାନରେ ସିରିଏଲ ତ୍ରୁଟି ପରିଲକ୍ଷିତ ହୋଇଥିଲା। ଯାହାକୁ ନେଇ ଯାତ୍ରୀଙ୍କଠାରୁ ଆରମ୍ଭ କରି ସରକାରଙ୍କ ପର୍ଯ୍ୟନ୍ତ ଚିନ୍ତା ପ୍ରକଟ କରିଥିଲେ । ଏପରିକି ଗତ ୧ ମାସ ମଧ୍ୟରେ ଏହି କମ୍ପାନିର ଫ୍ଲାଇଟଗୁଡ଼ିକରେ ୯ ଥର ତ୍ରୁଟି ଦେଖାଯାଇଥିଲା । ଜୁଲାଇ ୬ ରେ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (ଡିଜିସିଏ) ସ୍ପାଇସ ଜେଟକୁ ଏକ କାରଣ ଦର୍ଶାଅ ନୋଟିସ ଜାରି କରିଥିଲା। ଜୁନ୍‌ ୧୯ରୁ ଏହାର ବିମାନରେ ବୈଷୟିକ ତ୍ରୁଟିର ଆଠଟି ଘଟଣା ରିପୋର୍ଟ ହେବା ପରେ ଏହି ନୋଟିସ ଜାରି କରା ଯାଇଥିଲା। ବିଭିନ୍ନ ପ୍ରକାର ଯାଞ୍ଚ ଏବଂ ସ୍ପାଇସଜେଟ୍ ଦ୍ବାରା ଦାଖଲ ହୋଇଥିବା କାରଣଦର୍ଶାଅ ନୋଟିସର ଉତ୍ତରକୁ ଦୃଷ୍ଟିରେ ରଖି ନିରାପଦ ତଥା ନିର୍ଭରଯୋଗ୍ୟ ବିମାନ ପରିବହନ ସେବା ପାଇଁ ସ୍ପାଇସଜେଟର ପ୍ରସ୍ଥାନ ସଂଖ୍ୟା ୫୦ ପ୍ରତିଶତ ମଧ୍ୟରେ ସୀମିତ ରଖିବାକୁ ନିର୍ଦ୍ଦେଶ ଦେଇଛି ଡିଜିସିଏ। ଏହି କଟକଣା ୮ ସପ୍ତାହ ପର୍ଯ୍ୟନ୍ତ ଜାରି ରହିବ।

ନୂଆଦିଲ୍ଲୀ: ଘରୋଇ ଏୟାରଲାଇନ ଇଣ୍ଡିଗୋକୁ ମହଙ୍ଗା ପଡ଼ିଲା ଜଣେ ଦିବ୍ୟାଙ୍ଗ ପିଲାକୁ ବିମାନରେ ଯାତ୍ରା କରିବାକୁ ଅନୁମତି ନଦେବା । ଏଥିପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରିଛି ଡିଜିସିଏ । ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ଇଣ୍ଡିଗୋକୁ ୫ ଲକ୍ଷ ଟଙ୍କା ଜରିମାନା କରିଛି। ତଦନ୍ତ ସମୟରେ ବିମାନ କର୍ତ୍ତୃପକ୍ଷଙ୍କ ତ୍ରୁଟିଥିବା ନେଇ ଜଣାପଡ଼ିବା ପରେ ଜରିମାନା କରିଛି ଡିଜିସିଏ । ଚଳିତ ମାସ ପ୍ରାରମ୍ଭରେ ରାଞ୍ଚି ବିମାନବନ୍ଦରରେ ହାଇଦ୍ରାବାଦ ଅଭିମୁଖେ ଯାଉଥିବା ଏକ ବିମାନରେ ଚଢ଼ିବାକୁ ଜଣେ ଭିନ୍ନକ୍ଷମ ବାଳକକୁ ବାରଣ କରାଯାଇଥିବା ଅଭିଯୋଗ ହୋଇଥିଲା । ଏହି ଘଟଣାର ପ୍ରତିବାଦରେ ବାଳକର ପିତାମାତା ମଧ୍ୟ ଉକ୍ତ ବିମାନରେ ନ ଯିବାକୁ ନିଷ୍ପତ୍ତି ନେଇଥିଲେ। ରାଞ୍ଚି ବିମାନବନ୍ଦରରେ ରାଞ୍ଚି-ହାଇଦ୍ରାବାଦ ବିମାନରେ ବସିବା ବନ୍ଦ ହେବା ପରେ ଇଣ୍ଡିଗୋକୁ କୁହାଯାଇଛି ଯେ ପିଲାଟି ଭୟଭୀତ ହୋଇଛି।

ବିମାନ ଯାତ୍ରା ପାଇଁ ଦେଶର ସର୍ବୋଚ୍ଚ ନିୟନ୍ତ୍ରକ ଡିଜିସିଏ କହିଛି, ଅନୁସନ୍ଧାନରୁ ଜଣାପଡିଛି ଯେ ଇଣ୍ଡିଗୋର ଗ୍ରାଉଣ୍ଡ କର୍ମଚାରୀ ଭିନ୍ନକ୍ଷମ ପିଲାଟିକୁ ବିମାନରେ ପ୍ରବେଶ କରିବାକୁ ନଦେଇ ପରିସ୍ଥିତିକୁ ଅଧିକ ସମ୍ବେଦନଶୀଳ ଏବଂ କଷ୍ଟସାଧ୍ୟ କରି ଦେଇଥିଲେ । ଏହା ଡିଜିସିଏ ଗାଇଡ ଲାଇନର ଉଲ୍ଲଂଘନ। ବିମାନ କର୍ମଚାରୀ ଯାତ୍ରୀଙ୍କ ଅସୁବିଧା ପ୍ରତି ଯତ୍ନଶୀଳ ହେବା ଉଚିତ ।

ମେ ୮ରେ ଗଣମାଧ୍ୟମରେ ଏହି ଘଟଣା ସାମ୍ନାକୁ ଆସିବା ପରେ ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ନିଜେ ଏଥିରେ ହସ୍ତକ୍ଷେପ କରି ତଦନ୍ତ ନିର୍ଦ୍ଦେଶ ଦେଇଥିଲେ । ପରେ ସେ ଫ୍ୟାକ୍ଟ ଫାଇଣ୍ଡିଂ କମିଟି ଗଠନ କରିଥିଲେ | ଇଣ୍ଡିଆଗୋ କର୍ମଚାରୀ ନିୟମ ଉଲ୍ଲଂଘନ କରିଥିବା ପ୍ରାଥମିକ ତଦନ୍ତରୁ ଜଣାପଡିବା ପରେ ଫ୍ୟାକ୍ଟ ଫାଇଣ୍ଡିଂ କମିଟି ଇଣ୍ଡିଗୋ ଏୟାରଲାଇନ୍ସକୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା।

ନୂଆଦିଲ୍ଲୀ: ଭୟ ବଢାଉଛି କରୋନାର ନୂଆ ଭ୍ୟାରିଆଣ୍ଟ ‘ଓମିକ୍ରନ୍’। ଦକ୍ଷିଣ ଆଫ୍ରିକାରୁ ମିଳିଥିବା ଏହି ନୂଆ ଭାରିଏଣ୍ଟକୁ ନେଇ ବିଶ୍ୱରେ ବାଜିଛି ସତର୍କ ଘଣ୍ଟି । ଏହା ସାରା ବିଶ୍ବ ପାଇଁ ଘାତକ ହେବାର ସମ୍ଭାବନା ଯଥେଷ୍ଟ ଅଧିକ ବୋଲି ସୋମବାର ବିଶ୍ବ ସ୍ବାସ୍ଥ୍ୟ ସଂଗଠନ(ହୁ) ପକ୍ଷରୁ ଚେତାବନୀ ଦିଆଯାଇଛି।ବିଶ୍ବସ୍ତରରେ ସଂକ୍ରମଣ ରୋକିବାକୁ ଏବେ ବିଭିନ୍ନ ରାଷ୍ଟ୍ର ବିଦେଶ ଯାତ୍ରା ଉପରେ ରୋକ ଲଗାଇବା ସହିତ ନୂଆ ଗାଇଡଲାଇନ ଜାରି କରିଛନ୍ତି । ବିଶେଷକରି ଗୋଟିଏ ଦେଶରୁ ଅନ୍ୟ ଦେଶକୁ କରୋନା ଭୂତାଣୁର ଏହି ଭ୍ୟାରିଆଣ୍ଟ ଯେଭଳି ନ ବ୍ୟାପେ ତାହାକୁ ଅଧିକ ଗୁରୁତ୍ବ ଦିଆଯାଇ ଆବଶ୍ୟକ ପଦକ୍ଷେପ ଗ୍ରହଣ କରାଯାଇଛି।

ଏହାରି ମଧ୍ୟରେ ଭାରତରୁ ଡିସେମ୍ବର ୧୫ରୁ ଅନ୍ତର୍ଜାତୀୟ ବିମାନ ଉଡାଣ ଆରମ୍ଭ ନେଇ ଯେଉଁ ଘୋଷଣା ହୋଇଥିଲା ସେଥିରେ ମଧ୍ୟ ରୋକ୍‌ ଲଗାଇଛନ୍ତି କେନ୍ଦ୍ର ସରକାର। ବିଭିନ୍ନ ଦେଶରେ ଓମିକ୍ରନର ପ୍ରଭାବକୁ ଦେଖି ଏହି ନିଷ୍ପତି ନେଇଛି ବେସାମରିକ ବିମାନ ଚଳାଚଳ ମନ୍ତ୍ରାଳୟ ।ମନ୍ତ୍ରାଳୟ କହିଛି ଯେ ଆଗାମୀ ୧୫ ତାରିଖରୁ ଆରମ୍ଭ ହେବାକୁଥିବା ଅନ୍ତର୍ଜାତୀୟ ବିମାନ ସେବା ଉପରେ ପ୍ରତିବନ୍ଧକ ଲଗାଯାଇଛି। ନୂଆ ତାରିଖ ଶୀଘ୍ର ଘୋଷଣା କରାଯିବ। କରୋନାର ନୂଆ ଭାରିଏଣ୍ଟ ଓମିକ୍ରନ ଯୋଗୁଁ ଏହିଭଳି ନିଷ୍ପତ୍ତି ନିଆଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନଭେମ୍ବର ୨୭ ତାରିଖରେ ଓମିକ୍ରନକୁ ନେଇ ସମୀକ୍ଷା ବୈଠକ କରିଥିଲେ। ବୈଠକରେ ଡିସେମ୍ବର ୧୫ରୁ ଅନ୍ତର୍ଜାତୀୟ ବିମାନ ଆରମ୍ଭ କରିବା ନିଷ୍ପତ୍ତି ଉପରେ ସମୀକ୍ଷା କରିବାକୁ କୁହାଯାଇଥିଲା। ଏହାସହ ପ୍ରଧାନମନ୍ତ୍ରୀ ବିଦେଶରୁ ଆସୁଥିବା ଯାତ୍ରୀଙ୍କ ଉପରେ କଡା ନଜର ରଖିବାକୁ ମଧ୍ୟ କହିଥିଲେ।

ଆଜି ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ଡିସେମ୍ବର ୧୫ରୁ ଅନ୍ତର୍ଜାତୀୟ ବିମାନ ଉଡାଣ ଆରମ୍ଭ ହେବା ନେଇ ଏକ ସମୀକ୍ଷା କରିଥିଲା। ଯାହାପରେ କରୋନାର ନୂଆ ଭ୍ୟାରିଆଣ୍ଟ ‘ଓମିକ୍ରନ୍’ ବିପଦକୁ ଆଖି ଆଗରେ ରଖି ଡିସେମ୍ବର ୧୫ ରୁ ଅନ୍ତର୍ଜାତୀୟ ବିମାନ ଚଳାଚଳ ଆରମ୍ଭ କରିବାର ନିଷ୍ପତ୍ତି ସ୍ଥଗିତ ରଖାଯାଇଛି।  ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) କହିଛି ଯେ ଅନ୍ତର୍ଜାତୀୟ ବିମାନ ଉଡାଣ ଉପରେ ଆଗକୁ ମଧ୍ୟ ବିଭିନ୍ନ ପର୍ଯ୍ୟାୟରେ ଆଲୋଚନା ହେବ ଏବଂ ପୁଣିଥରେ ଆନ୍ତର୍ଜାତୀୟ ଯାତ୍ରୀବାହୀ ବିମାନ ସେବା ପାଇଁ ନୂଆ ତାରି୍ଖ ଘୋଷଣା ହେବ।

ସୂଚନାଯୋଗ୍ୟ ୨୦୨୦ ମସିହା ମାର୍ଚ୍ଚ ମାସରେ ଦେଶରେ ଲକଡାଉନ ଘୋଷଣା କରାଯାଇଥିଲା। ସେବେଠାରୁ ନିୟମିତ ଅନ୍ତର୍ଜାତୀୟ ବିମାନ ସେବାକୁ ବାତିଲ କରାଯାଇଥିଲା। ପରବର୍ତ୍ତୀ ଅବସ୍ଥାରେ କରୋନା ସଂକ୍ରମଣ ହ୍ରାସ ପାଇବାରୁ ଲକଡାଉନ ହଟିଥିଲା। କିନ୍ତୁ ଅନ୍ତର୍ଜାତୀୟ ବିମାନ ସେବାକୁ ଏଯାଏ ସ୍ୱାଭାବିକ କରାଯାଇ ପାରିନି। ନିୟମିତ ଅନ୍ତର୍ଜାତୀୟ ବିମାନ ସେବା ବନ୍ଦ ରହିଥିଲେ ମଧ୍ୟ ଭାରତ ସରକାର ନିର୍ଦ୍ଦିଷ୍ଟ ମାର୍ଗରେ ବିମାନ ଉଡ଼ାଣ ପାଇଁ ଅନୁମତି ଦେଇଥିଲେ। ସେହିପରି ସଂକ୍ରମଣ ହ୍ରାସ ଓ ଟିକାକରଣ ବଢ଼ିବା ପରେ ଏୟାର ବବଲ୍ସ ଚୁକ୍ତି କରିଥିବା ଦେଶଗୁଡ଼ିକ ସହ ବିମାନ ସେବା ଆରମ୍ଭ କରାଯାଇଛି।

ନୂଆଦିଲ୍ଲୀ : ବିମାନରେ ଯାତ୍ରା କରୁଥିବା ଲୋକଙ୍କ ପାଇଁ ନୂଆ ଗାଇଡଲାଇନ୍‌ ଜାରି କରିଛି ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ)। ଦେଶରେ ପୁଣିଥରି କରୋନା ବୃଦ୍ଧି ପାଉଥିବା କାରଣରୁ ନୂଆ ଗାଇଡଲାଇନ୍‌ ଜାରି କରାଯାଇଛି। ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ପକ୍ଷରୁ ଶନିବାର ଜାରି କରାଯାଇଥିବା କଟକଣାକୁ କଡାକଡି ଭାବେ ପାଳନ କରିବାକୁ ଏୟାରପୋର୍ଟ ଅଥରଟି ଅଫ୍ ଇଣ୍ଡିଆ, ସିଆଇଇଏସଏଫ ଓ ଦେଶର ସମସ୍ତ ବିମାନ ବନ୍ଦର କର୍ତ୍ତୃପକ୍ଷଙ୍କୁ ଏହି ନିର୍ଦ୍ଦେଶ ଦିଆଯାଇଛି। ଏଥି ସହିତ ବିମାନ ଯାତ୍ରୀଙ୍କୁ ମଧ୍ୟ ଗାଇଡଲାଇନକୁ ସଠିକ ରୁପେ ପାଳନ କରିବାକୁ ନିର୍ଦେଶ ଦିଆଯାଇଛି। ଯଦି କୌଣସି ବିମାନ ଯାତ୍ରା ଗାଇଡଲାଇନ ଉଲ୍ଲଘଂନ କରନ୍ତି ତେବେ ତାଙ୍କୁ ବିମାନରୁ ଓହ୍ଲାଇ ଦେବା ପାଇଁ ମଧ୍ୟ ଡିଜିସିଏ ନିର୍ଦେଶ ଦେଇଛି।

Passengers will be de-boarded if they don't wear masks properly inside aircraft or don't follow COVID appropriate behaviour. If a passenger violates protocol despite repeated warnings then the passenger will be treated as 'unruly passenger': Directorate General of Civil Aviation pic.twitter.com/4HhXznJBYX

— ANI (@ANI) March 13, 2021

ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ତରଫରୁ ଜାରି ସର୍କୁଲାରରେ କୁହାଯାଇଛି ଯେ ବିମାନବନ୍ଦରରେ ପ୍ରବେଶ କରିବାଠୁ ବାହାରିବା ଯାଏଁ ମାସ୍କ ପିନ୍ଧିବା ଅନିବାର୍ଯ୍ୟ। ଯାତ୍ରା ସମୟରେ ସାମାଜିକ ଦୂରତା ଓ କୋଭିଡ ଗାଇଡଲାଇନ ପାଳନ ନ କଲେ ଯାତ୍ରୀଙ୍କୁ ବିମାନରୁ ଓହ୍ଲାଇ ଦିଆଯିବ। ଯେଉଁମାନେ ଯାତ୍ରା ସମୟରେ ବାରମ୍ବାର ନିୟମ ଉଲଙ୍ଘନ କରିବେ ସେମାନଙ୍କୁ ଉପଦ୍ରବୀ ଯାତ୍ରୀ ବୋଲି କୁହାଯିବ। ଉପଦ୍ରବୀ ଯାତ୍ରୀଙ୍କ ତାଲିକାରେ ଥିବା ଯାତ୍ରୀଙ୍କ ବିମାନ ଯାତ୍ରା ବ୍ୟାନ କରାଯିବ। ନୂଆ ନିୟମ ଅନୁସାରେ ଏହି ବ୍ୟାନ ୬ ମାସ, ବର୍ଷେ କିମ୍ବା ୨ ବର୍ଷ ଯାଏଁ ରହିବ।

ଡିଜିସିଏ ପକ୍ଷରୁ ଜାରି ଗାଇଡଲାଇନରେ କୁହାଯାଇଛି ଯେ କିଛି ଯାତ୍ରୀ ଠିକ୍ ଭାବରେ ମାସ୍କ ପିନ୍ଧୁନଥିବା ଦେଖିବାକୁ ମିଳୁଛି। ଏହାକୁ ଦୃଷ୍ଟିରେ ରଖି ଏହି ନୂଆ ନିର୍ଦ୍ଦେଶ ଦିଆଯାଇଛି। ଅଧିକାଂଶ ଯାତ୍ରୀ ମାସ୍କ କେବଳ ପାଟି ଉପରେ ରଖୁଛନ୍ତି। କିନ୍ତୁ ମାସ୍କ ଉଭୟ ପାଟି ଏବଂ ନାକକୁ ଘୋଡ଼ାଇ ରଖିବା ଉଚିତ୍। କେବଳ ଚେକିଂ ହେଉଥିବା ସ୍ଥାନରେ ଯାତ୍ରୀମାନେ ଠିକ୍ ଭାବରେ ମାସ୍କ ପିନ୍ଧୁଛନ୍ତି। ଆଉ ବିମାନରେ ବସିବା ବେଳେ ଏହି ନିୟମକୁ ଠିକ୍ ଭାବେ ଅନୁପାଳନ କରୁ ନାହାନ୍ତି। କରୋନାକୁ ଦୂରେଇ ରଖିବା ପାଇଁ ଠିକ୍ ଭାବରେ ମାସ୍କ ପିନ୍ଧିବା ଜରୁରୀ ଡିଜିସିଏ କହିଛି।