କଲମ୍ବୋରେ ଅନୁଷ୍ଠିତ T20 ବିଶ୍ୱକପ୍ ୨୦୨୬ର ଏକ ହାଇ-ଭୋଲ୍ଟେଜ୍ ମ୍ୟାଚରେ ଭାରତ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୬୧ ରନ୍ରେ ପରାସ୍ତ କରିଛି। ତେବେ ମ୍ୟାଚର ଫଳାଫଳ ଅପେକ୍ଷା ପଡିଆରେ ଭାରତୀୟ ଖେଳାଳିଙ୍କ ଆଚରଣ ଏବେ ବିଶ୍ୱବ୍ୟାପୀ ଚର୍ଚ୍ଚାର ବିଷୟ ପାଲଟିଛି। ବିଜୟ ପରେ ମଧ୍ୟ ଭାରତୀୟ ଦଳ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇବାକୁ (Handshake) ମନା କରିଦେଇଛନ୍ତି, ଯାହାକୁ ନେଇ କ୍ରିକେଟ୍ ଜଗତରେ ହଇଚଇ ସୃଷ୍ଟି ହୋଇଛି।

ଟସ୍ ବେଳେ ହାତ ମିଳାଇଲେନି ସୂର୍ଯ୍ୟକୁମାର

ମ୍ୟାଚ୍ ଆରମ୍ଭରୁ ହିଁ ଉତ୍ତେଜନା ଦେଖିବାକୁ ମିଳିଥିଲା। ଟସ୍ ସମୟରେ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ପାକିସ୍ତାନ ଅଧିନାୟକ ସଲମାନ ଅଲି ଆଘାଙ୍କ ସହ ହାତ ମିଳାଇ ନଥିଲେ। ମ୍ୟାଚ୍ ଶେଷ ହେବା ପରେ ମଧ୍ୟ ଭାରତୀୟ ଖେଳାଳିମାନେ ପାକିସ୍ତାନୀ ଖେଳାଳିଙ୍କ ସହ ସୌଜନ୍ୟମୂଳକ ହାତ ମିଳାଇବା ପରିବର୍ତ୍ତେ ସିଧା ଡ୍ରେସିଂ ରୁମକୁ ଫେରିଯାଇଥିଲେ। ରିପୋର୍ଟ ଅନୁଯାୟୀ, ୨୦୨୫ ଏସିଆ କପ୍ ସମୟରୁ ପହଲଗାଓଁ ଆତଙ୍କବାଦୀ ଆକ୍ରମଣର ପ୍ରତିବାଦ ସ୍ୱରୂପ ଭାରତ ଏହି 'ନୋ-ହ୍ୟାଣ୍ଡସେକ୍' ନୀତି ଆପଣାଇ ଆସୁଛି।

ଆଇସିସି ନିକଟରେ ପାକିସ୍ତାନର ଫେରାଦ

ଭାରତର ଏହି ଆଭିମୁଖ୍ୟକୁ ନେଇ ପାକିସ୍ତାନ କ୍ରିକେଟ୍ ବୋର୍ଡ (PCB) ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଏହା ଖେଳୁଆଡ ମନୋଭାବର ବିରୋଧୀ ବୋଲି ଦର୍ଶାଇ ପିସିବି ଆଇସିସି (ICC) ନିକଟରେ ଅଭିଯୋଗ କରିଥିବା ଜଣାପଡିଛି। ଅନ୍ୟପକ୍ଷରେ, ପୂର୍ବତନ ଭାରତୀୟ କ୍ରିକେଟର ସଞ୍ଜୟ ମଞ୍ଜରେକର ମଧ୍ୟ ଭାରତର ଏହି ନୀତିକୁ ସମାଲୋଚନା କରିଛନ୍ତି।

ମ୍ୟାଚରେ ଭାରତର ଏକତରଫା ବିଜୟ

ଖେଳ କଥା ଦେଖିଲେ, ଭାରତ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୭ ୱିକେଟ୍ ହରାଇ ୧୭୫ ରନ୍ ସଂଗ୍ରହ କରିଥିଲା। ଯୁବ ତାରକା ଈଶାନ କିଷାନ ମାତ୍ର ୪୦ ବଲରେ ବିସ୍ଫୋରକ ୭୭ ରନ୍ ସଂଗ୍ରହ କରିଥିଲେ। ଜବାବରେ ପାକିସ୍ତାନ ଦଳ ଭାରତୀୟ ବୋଲରଙ୍କ ମୁକାବିଲା କରିନପାରି ମାତ୍ର ୧୧୪ ରନ୍‌ରେ ଅଲଆଉଟ୍ ହୋଇଯାଇଥିଲା। ଏହି ବିଜୟ ସହ ଭାରତ ସୁପର-୮ ପର୍ଯ୍ୟାୟରେ ପ୍ରବେଶ କରିଛି।

T20 ବିଶ୍ୱକପ୍ ୨୦୨୬ର ହାଇ-ଭୋଲ୍ଟେଜ୍ ମୁକାବିଲାରେ ପାକିସ୍ତାନ ବିପକ୍ଷରେ ଧମାକାଦାର ପ୍ରଦର୍ଶନ କରି ଇଶାନ କିଷାନ ରାତାରାତି ସୁପରଷ୍ଟାର ପାଲଟି ଯାଇଛନ୍ତି। ତାଙ୍କର ଏହି ଚମତ୍କାର ବ୍ୟାଟିଂ ଯୋଗୁଁ ଭାରତ ଏହି ଗୁରୁତ୍ୱପୂର୍ଣ୍ଣ ମ୍ୟାଚରେ ବିଜୟ ଲାଭ କରିଛି। କ୍ରିକେଟ୍ ପଡ଼ିଆରେ ନିଜର ଦକ୍ଷତା ପ୍ରମାଣିତ କରିଥିବା ଏହି ଯୁବ ତାରକା ପଡ଼ିଆ ବାହାରେ ମଧ୍ୟ ବେଶ୍ ବିଳାସପୂର୍ଣ୍ଣ ଜୀବନଯାପନ କରନ୍ତି। ଆସନ୍ତୁ ଜାଣିବା ଏହି ନୂତନ 'ମ୍ୟାଚ୍ ୱିନର'ଙ୍କ ନେଟ୍ ୱର୍ଥ, ଦାମୀ କାର୍ ଏବଂ ଘଣ୍ଟା କଲେକ୍ସନ୍ ବିଷୟରେ।

କୋଟି କୋଟି ଟଙ୍କାର ସମ୍ପତ୍ତି (Net Worth)

ରିପୋର୍ଟ ଅନୁଯାୟୀ, ଇଶାନ କିଷାନଙ୍କ ମୋଟ ସମ୍ପତ୍ତିର ମୂଲ୍ୟ ପ୍ରାୟ ୬୦ରୁ ୭୦ କୋଟି ଟଙ୍କା ବୋଲି ଆକଳନ କରାଯାଇଛି। ତାଙ୍କ ଆୟର ମୁଖ୍ୟ ଉତ୍ସ ହେଉଛି ବିସିସିଆଇ (BCCI) ଚୁକ୍ତିନାମା ଏବଂ ଆଇପିଏଲ (IPL) ଦରମା। ଏହା ବ୍ୟତୀତ ବିଭିନ୍ନ ବ୍ରାଣ୍ଡ୍ ଏଣ୍ଡୋର୍ସମେଣ୍ଟ୍ ଜରିଆରେ ସେ କୋଟି କୋଟି ଟଙ୍କା ରୋଜଗାର କରନ୍ତି। ଆଇପିଏଲରେ ମୁମ୍ବାଇ ଇଣ୍ଡିଆନ୍ସ ଏବଂ ସନରାଇଜର୍ସ ହାଇଦ୍ରାବାଦ ଭଳି ଦଳ ପାଇଁ ଖେଳି ସେ ପ୍ରଚୁର ଅର୍ଥ ଉପାର୍ଜନ କରିଛନ୍ତି।

ବିଳାସପୂର୍ଣ୍ଣ କାର୍ କଲେକ୍ସନ୍ (Car Collection)

ଇଶାନ କିଷାନଙ୍କ ଗ୍ୟାରେଜରେ ଅନେକ ଦାମୀ ଏବଂ ଲକ୍ଜୁରୀ କାର୍ ରହିଛି। ତାଙ୍କ ପାଖରେ ଏକ Mercedes-Benz C-Class ଅଛି, ଯାହାର ମୂଲ୍ୟ ପ୍ରାୟ ୧ କୋଟି ଟଙ୍କା। ଏହା ସହିତ ସେ ଏକ BMW 5 Series କାରର ମାଲିକ, ଯାହା ତାଙ୍କର ପ୍ରିୟ ଗାଡ଼ିମାନଙ୍କ ମଧ୍ୟରୁ ଅନ୍ୟତମ। ତାଙ୍କ କଲେକ୍ସନରେ ଏକ ଶକ୍ତିଶାଳୀ Ford Mustang GT ମଧ୍ୟ ସାମିଲ ଅଛି, ଯାହା ତାଙ୍କର ସ୍ପୋର୍ଟସ୍ କାର୍ ପ୍ରତି ଥିବା ଭଲପାଇବାକୁ ଦର୍ଶାଏ।

ଦାମୀ ଘଣ୍ଟା ସଉକ (Expensive Watches)

କେବଳ ଗାଡ଼ି ନୁହେଁ, ଇଶାନ ଦାମୀ ଘଣ୍ଟା ପିନ୍ଧିବାର ମଧ୍ୟ ସଉକ ରଖନ୍ତି। ତାଙ୍କ ପାଖରେ Rolex Day-Date ଭଳି ପ୍ରିମିୟମ୍ ଘଣ୍ଟା ରହିଛି, ଯାହାର ମୂଲ୍ୟ ୨୦ ଲକ୍ଷରୁ ଅଧିକ ହେବ। ଏହା ବ୍ୟତୀତ ତାଙ୍କ ପାଖରେ Zenith Defy Skyline ଏବଂ ଅନ୍ୟାନ୍ୟ ଅନ୍ତର୍ଜାତୀୟ ବ୍ରାଣ୍ଡର ଘଣ୍ଟା ଥିବା ଦେଖିବାକୁ ମିଳେ। ୨୦୨୬ ବିଶ୍ୱକପରେ ତାଙ୍କର ସଫଳତା ପରେ ତାଙ୍କର ଲୋକପ୍ରିୟତା ଏବଂ ବ୍ରାଣ୍ଡ୍ ଭାଲ୍ୟୁ ଆହୁରି ବୃଦ୍ଧି ପାଇବା ନିଶ୍ଚିତ।

ଟି-୨୦ ବିଶ୍ୱକପ୍ ୨୦୨୬ରେ ଭାରତ ଓ ପାକିସ୍ତାନ ମଧ୍ୟରେ ହେବାକୁ ଥିବା ହାଇ-ଭୋଲଟେଜ୍ ମ୍ୟାଚ୍ ପୂର୍ବରୁ ପୁଣି ଥରେ ଚର୍ଚ୍ଚାକୁ ଆସିଛି 'ହ୍ୟାଣ୍ଡସେକ୍' ବା ହାତ ମିଳାଇବା ପ୍ରସଙ୍ଗ। ରବିବାର କଲମ୍ବୋର ଆର୍ ପ୍ରେମଦାସା ଷ୍ଟାଡିୟମ୍‌ରେ ଉଭୟ ଦଳ ମୁହାଁମୁହିଁ ହେବେ। କିନ୍ତୁ ମ୍ୟାଚ୍ ପୂର୍ବରୁ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ଏହି ପ୍ରସଙ୍ଗରେ କୌଣସି ସ୍ପଷ୍ଟ ଉତ୍ତର ଦେଇନାହାନ୍ତି, ଯାହା ଫଳରେ ସସ୍‌ପେନ୍ସ ଆହୁରି ବଢିଯାଇଛି।

ସୂର୍ଯ୍ୟକୁମାରଙ୍କ ରହସ୍ୟଜନକ ବୟାନ

ସାମ୍ବାଦିକ ସମ୍ମିଳନୀରେ ଯେତେବେଳେ ସୂର୍ଯ୍ୟକୁମାରଙ୍କୁ ପଚରାଯାଇଥିଲା ଯେ ଭାରତୀୟ ଖେଳାଳିମାନେ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇବେ କି ନାହିଁ, ସେ କୌତୁହଳପୂର୍ଣ୍ଣ ଉତ୍ତର ଦେଇଥିଲେ। ସେ କହିଥିଲେ, "ଆଉ ୨୪ ଘଣ୍ଟା ଅପେକ୍ଷା କରନ୍ତୁ। ଭଲ ଖାଆନ୍ତୁ, ଭଲରେ ଶୁଅନ୍ତୁ, କାଲି ଦେଖିବା କ’ଣ ହେଉଛି।" ତାଙ୍କର ଏହି ବୟାନରୁ ସ୍ପଷ୍ଟ ହୋଇଛି ଯେ ଭାରତୀୟ ଦଳ ନିଜର ପୂର୍ବ ଆଭିମୁଖ୍ୟ ବଜାୟ ରଖିପାରେ। ଉଲ୍ଲେଖଯୋଗ୍ୟ ଯେ, ଗତବର୍ଷ ଏସିଆ କପ୍ ସମୟରେ ମଧ୍ୟ ଭାରତୀୟ ଦଳ ପାକିସ୍ତାନ ସହ ହାତ ମିଳାଇବାକୁ ମନା କରିଦେଇଥିଲା।

କାହିଁକି ରହିଛି ବିବାଦ?

ଏହି 'ନୋ-ହ୍ୟାଣ୍ଡସେକ୍' ବିବାଦ ପଛରେ ଏକ ଗୁରୁତର କାରଣ ରହିଛି। ଗତବର୍ଷ ଏସିଆ କପ୍ ସମୟରେ, ପାହାଲଗାମ୍ ଆତଙ୍କବାଦୀ ଆକ୍ରମଣ ଏବଂ ତା’ପରେ ଭାରତୀୟ ସେନା ଦ୍ୱାରା କରାଯାଇଥିବା 'ଅପରେସନ୍ ସିନ୍ଦୂର' ଘଟଣା ପରେ ଦୁଇ ଦେଶ ମଧ୍ୟରେ ତିକ୍ତତା ବୃଦ୍ଧି ପାଇଥିଲା। ସେବେଠାରୁ ଭାରତୀୟ ଦଳ ପାକିସ୍ତାନ ବିପକ୍ଷ ମ୍ୟାଚ୍‌ରେ ପାରମ୍ପରିକ ହ୍ୟାଣ୍ଡସେକ୍‌ରୁ ନିବୃତ୍ତ ରହିଆସୁଛି। ସୂର୍ଯ୍ୟକୁମାରଙ୍କ ବର୍ତ୍ତମାନର ଆଭିମୁଖ୍ୟ ସୂଚାଉଛି ଯେ ଭାରତ ଏହି ପ୍ରତିବାଦ ଜାରି ରଖିପାରେ।

ପାକିସ୍ତାନ ଅଧିନାୟକଙ୍କ ପ୍ରତିକ୍ରିୟା

ଅନ୍ୟପକ୍ଷରେ, ପାକିସ୍ତାନ ଅଧିନାୟକ ସଲମାନ ଅଲି ଆଗା ମଧ୍ୟ ଏହି ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ ଖେଳକୁ ଖେଳ ଭାବନା ସହ ଖେଳାଯିବା ଉଚିତ୍, କିନ୍ତୁ ବିପକ୍ଷ ଦଳ କ’ଣ କରିବେ ତାହା ସେମାନଙ୍କ ଉପରେ ନିର୍ଭର କରେ। ଟିମ୍ ନ୍ୟୁଜ୍ ବିଷୟରେ କହିବାକୁ ଗଲେ, ଭାରତୀୟ ଓପନର୍ ଅଭିଷେକ ଶର୍ମା ସମ୍ପୂର୍ଣ୍ଣ ଫିଟ୍ ଅଛନ୍ତି ଏବଂ ରବିବାର ମ୍ୟାଚ୍‌ରେ ଖେଳିବା ପାଇଁ ପ୍ରସ୍ତୁତ ଅଛନ୍ତି ବୋଲି ସୂର୍ଯ୍ୟକୁମାର ସ୍ପଷ୍ଟ କରିଛନ୍ତି।

ନୂଆଦିଲ୍ଲୀ: କ୍ରିକେଟପ୍ରେମୀଙ୍କ ପାଇଁ ଖୁସି ଖବର । ବହୁ ପ୍ରତୀକ୍ଷିତ ଭାରତ ଏବଂ ପାକିସ୍ତାନ ମଧ୍ୟରେ ମ୍ୟାଚ୍ ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ଫେବୃଆରୀ ୧୫ ତାରିଖରେ ଶ୍ରୀଲଙ୍କାର କଲମ୍ବୋରେ ଅନୁଷ୍ଠିତ ହେବ। ପାକିସ୍ତାନ କ୍ରିକେଟ୍ ବୋର୍ଡ (PCB) ଏକ ନାଟକୀୟ ଢଙ୍ଗରେ ନିଜ ନିଷ୍ପତ୍ତି ବଦଳାଇ ଏହି ମ୍ୟାଚ୍ ଖେଳିବାକୁ ରାଜି ହୋଇଛି, ଯାହା ଫଳରେ ଏହି ହାଇଭୋଲଟେଜ୍ ମୁକାବିଲାକୁ ନେଇ ସୃଷ୍ଟି ହୋଇଥିବା ଅନିଶ୍ଚିତତା ଦୂର ହୋଇଛି ।

ପାକିସ୍ତାନୀ ଗଣମାଧ୍ୟମ 'ଜିଓ ନ୍ୟୁଜ୍'ର ରିପୋର୍ଟ ଅନୁଯାୟୀ, କୂଟନୈତିକ ସ୍ତରରେ ତୀବ୍ର ଆଲୋଚନା ପରେ ପାକିସ୍ତାନ ସରକାର ଦଳକୁ ଖେଳିବା ପାଇଁ ଅନୁମତି ଦେଇଛନ୍ତି। ପୂର୍ବରୁ ବାଂଲାଦେଶ ପ୍ରତି ସମର୍ଥନ ଜଣାଇ ପାକିସ୍ତାନ ଏହି ମ୍ୟାଚ୍ ବର୍ଜନ କରିବାକୁ ଘୋଷଣା କରିଥିଲା। ତେବେ ଅନ୍ତର୍ଜାତୀୟ କ୍ରିକେଟ୍ ପରିଷଦ (ICC)ର ହସ୍ତକ୍ଷେପ ଏବଂ କୂଟନୈତିକ ଚାପ ଯୋଗୁଁ ପାକିସ୍ତାନ ବାଧ୍ୟ ହୋଇ ନିଜ ଜିଦରୁ ଓହରିଛି। ଆଇସିସି ସ୍ପଷ୍ଟ କରିଥିଲା ଯେ ଯଦି ପାକିସ୍ତାନ ମ୍ୟାଚ୍ ନଖେଳେ, ତେବେ ଭବିଷ୍ୟତରେ ଆୟୋଜନ ଅଧିକାର ହରାଇବା ସହ କଡ଼ା ଆର୍ଥିକ କଟକଣାର ସମ୍ମୁଖୀନ ହେବ।

ଏହି ବିବାଦର ସମାଧାନ ପାଇଁ ଶ୍ରୀଲଙ୍କାର ରାଷ୍ଟ୍ରପତି ଅନୁରା କୁମାର ଦିସାନାୟକେ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ସହ ଟେଲିଫୋନ୍ ଯୋଗେ କଥା ହୋଇଥିଲେ। ସେ ପାକିସ୍ତାନ ଦଳକୁ କଲମ୍ବୋର ଆର୍‌. ପ୍ରେମଦାସା ଷ୍ଟାଡିୟମରେ ଖେଳିବା ପାଇଁ ଅନୁରୋଧ କରିଥିଲେ। ଅନ୍ୟପକ୍ଷରେ, ଆଇସିସି ଉପାଧ୍ୟକ୍ଷ ଇମ୍ରାନ ଖ୍ୱାଜା ଲାହୋର ଯାଇ ପିସିବି ଅଧ୍ୟକ୍ଷ ମୋହସିନ ନକଭିଙ୍କ ସହ ଜରୁରୀ ଆଲୋଚନା କରିଥିଲେ, ଯାହା ପରେ ପାକିସ୍ତାନ ନିଜ ନିଷ୍ପତ୍ତି ବଦଳାଇଥିଲା।

ପାକିସ୍ତାନର ଏହି ୟୁ-ଟର୍ଣ୍ଣ (U-turn) ପରେ ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଳା ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ ପାକିସ୍ତାନ ସରକାରଙ୍କ ନିଷ୍ପତ୍ତି ପରେ ସେଠାକାର ଦଳ ଏବେ ମୈଦାନକୁ ଓହ୍ଲାଇବ। ଏହି ଖବର ସାମ୍ନାକୁ ଆସିବା ପରେ ବିଶ୍ୱବ୍ୟାପୀ କ୍ରିକେଟ୍ ପ୍ରଶଂସକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି ଏବଂ ଏହି ମେଗା ଇଭେଣ୍ଟ ଏବେ ବିନା ବାଧାରେ ଆୟୋଜିତ ହେବ।

ନୂଆଦିଲ୍ଲୀ: ୨୦୨୬ ଟି-୨୦ ବିଶ୍ୱକପରେ ଭାରତ ଓ ପାକିସ୍ତାନ ମଧ୍ୟରେ ହେବାକୁ ଥିବା ହାଇ-ଭୋଲ୍ଟେଜ ମ୍ୟାଚକୁ ନେଇ ଚର୍ଚ୍ଚା ଜୋର ଧରିଛି। ତେବେ ଏହି ମ୍ୟାଚ ପୂର୍ବରୁ ପାକିସ୍ତାନ କ୍ରିକେଟ ବୋର୍ଡ (PCB) ନିଜର ବୟକଟ୍ ନିଷ୍ପତ୍ତି ବଦଳାଇପାରେ। ରିପୋର୍ଟ ଅନୁଯାୟୀ, ଆସନ୍ତା ୨୪ ରୁ ୪୮ ଘଣ୍ଟା ମଧ୍ୟରେ ଏନେଇ ଏକ ଚୂଡ଼ାନ୍ତ ନିଷ୍ପତ୍ତି ନିଆଯିବାର ସମ୍ଭାବନା ରହିଛି। ଆଇସିସିର ହସ୍ତକ୍ଷେପ ପରେ ପିସିବି ଏହି ନିଷ୍ପତ୍ତି ଉପରେ ପୁନର୍ବିଚାର କରୁଛି।

ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ପାକିସ୍ତାନ କ୍ରିକେଟ ବୋର୍ଡ ଅଧ୍ୟକ୍ଷ ମୋହସିନ ନକଭି ଏବଂ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ମଧ୍ୟରେ ହେବାକୁ ଥିବା ବୈଠକ ଉପରେ ନିର୍ଭର କରୁଛି। ସୋମବାର ଦିନ ଉଭୟଙ୍କ ମଧ୍ୟରେ ଏକ ବୈଠକ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି। ନକଭି, ଯିଏକି ପାକିସ୍ତାନର ଗୃହମନ୍ତ୍ରୀ ଦାୟିତ୍ୱ ମଧ୍ୟ ତୁଲାଉଛନ୍ତି, ସେ ପ୍ରଧାନମନ୍ତ୍ରୀଙ୍କୁ ଆଇସିସି ସହ ହୋଇଥିବା ଆଲୋଚନା ବିଷୟରେ ଅବଗତ କରାଇବେ। ଯଦିଓ ପିସିବି ମ୍ୟାଚ ଖେଳିବାକୁ ଇଚ୍ଛା ପ୍ରକାଶ କରିପାରେ, କିନ୍ତୁ ସରକାରଙ୍କ ସବୁଜ ସଙ୍କେତ ବିନା କୌଣସି ପଦକ୍ଷେପ ନିଆଯାଇପାରିବ ନାହିଁ।

ଅନ୍ୟପକ୍ଷରେ, ବୟକଟ୍ ନିଷ୍ପତ୍ତିରୁ ଓହରିବା ପାଇଁ ପିସିବି ଆଇସିସି ନିକଟରେ ତିନୋଟି ମୁଖ୍ୟ ସର୍ତ୍ତ ରଖିଥିବା ଜଣାପଡିଛି। ପ୍ରଥମତଃ, ଆଇସିସି ରାଜସ୍ୱରେ ପାକିସ୍ତାନର ଅଂଶ ବୃଦ୍ଧି କରାଯାଉ। ଦ୍ୱିତୀୟତଃ, ଭାରତ ସହିତ ଦ୍ୱିପାକ୍ଷିକ କ୍ରିକେଟ ସିରିଜର ପୁନରୁଦ୍ଧାର ହେଉ। ତୃତୀୟରେ, 'ହ୍ୟାଣ୍ଡସେକ୍ ପ୍ରୋଟୋକଲ' ବା ଖେଳାଳିଙ୍କ ମଧ୍ୟରେ କରମର୍ଦ୍ଦନ ନିୟମର କଡାକଡି ପାଳନ କରାଯାଉ। ସୂଚନାଯୋଗ୍ୟ ଯେ, ୨୦୨୫ ଏସିଆ କପ ସମୟରେ ପାହାଲଗାମ ଆକ୍ରମଣ ପରେ ଭାରତୀୟ ଖେଳାଳିମାନେ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇବାକୁ ମନା କରିଦେଇଥିଲେ, ଯାହାକୁ ନେଇ ପିସିବି ଅସନ୍ତୋଷ ପ୍ରକାଶ କରିଥିଲା।

ଆଇସିସିର ଡେପୁଟି ଚେୟାରମ୍ୟାନ୍ ଇମ୍ରାନ ଖ୍ୱାଜା ଲାହୋର ଗସ୍ତ କରି ସ୍ପଷ୍ଟ କରିଛନ୍ତି ଯେ, ବୟକଟ୍ କରିବା କ୍ରିକେଟ ପାଇଁ ଶୁଭଙ୍କର ନୁହେଁ ଏବଂ ଏହା ଦୀର୍ଘସ୍ଥାୟୀ ହୋଇପାରିବ ନାହିଁ। ଭାରତ-ପାକିସ୍ତାନ ମ୍ୟାଚ୍ ଟୁର୍ଣ୍ଣାମେଣ୍ଟର ଆର୍ଥିକ ଦୃଷ୍ଟିକୋଣରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଥିବାରୁ ଏହି ବିବାଦର ଶୀଘ୍ର ସମାଧାନ ପାଇଁ ବିଶ୍ୱ କ୍ରିକେଟ ସଂସ୍ଥା ପ୍ରୟାସ ଜାରି ରଖିଛି।

ନୂଆଦିଲ୍ଲୀ: ଅପରେସନ ସିନ୍ଦୂର ପରେ ପ୍ରଥମ ଥର ଲାଗି ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫ୍ ସ୍ବୀକାର କରିଛନ୍ତି ଯେ ଭାରତର ବ୍ରହ୍ମୋସ କ୍ଷେପଣାସ୍ତ୍ର ମାଡ଼ରେ ପାକିସ୍ତାନର ଅନେକ ଗୁରୁତ୍ବପୂର୍ଣ୍ଣ ସାମରିକ ପ୍ରତିଷ୍ଠାନ ଧ୍ବଂସ ହୋଇଯାଇଛି। ଏପରିକି ରାୱଲପିଣ୍ଡି ବାୟୁସେନା ଘାଟୀ ମଧ୍ୟ ବର୍ତ୍ତି ପାରିନାହିଁ। ଭରତ ଏଭଳି ଆକ୍ରମଣ କରିବ ବୋଲି ପାକିସ୍ତାନ କଳ୍ପନା କରିପାରିନଥିଲା।

ଅଜରବୈଜାନରେ ଆୟୋଜିତ ଏକ କାର୍ଯ୍ୟକ୍ରମରେ ସରିଫ କହିଛନ୍ତି ଯେ ମେ ୧୦ ତାରିଖ ଭୋର ୪ଟା ୩୦ ସମୟରେ ନମାଜ ପରେ ଭାରତ ଉପରେ ଆକ୍ରମଣ କରିବାକୁ ପାକିସ୍ତାନ ଯୋଜନା କରିଥିଲା। ସେନା ଅଧ୍ୟକ୍ଷ ଜେନେରାଲ ମୁନୀର ସ୍ଥିର କରିଥିଲେ ଯେ ୧୦ ତାରିଖ ସକାଳ ପ୍ରାର୍ଥନା ପରେ ଭାରତ ଉପରେ ସମାରିକ କାର୍ଯ୍ୟାନୁଷ୍ଠାନ ହେବ। ଭାରତକୁୁ ଠିକଣା ଜବାବ ଦେବାଲାଗି ସେନା ପ୍ରସ୍ତୁତ ହୋଇରହିଥିଲା। କିନ୍ତୁ ଏହାପୂର୍ବରୁ ୯-୧୦ ତାରିଖ ରାତିରେ ଭାରତ ପକ୍ଷରୁ ବଡ଼ ଧରଣର ଆକ୍ରମଣ କରାଯାଇଥିଲା। ପାକିସ୍ତାନର ବିଭିନ୍ନ ପ୍ରଦେଶ ଉପରେ ଭାରତ ସୁପରସୋନିକ କ୍ଷେପଣାସ୍ତ୍ର ବ୍ରହ୍ମୋସ ବର୍ଷା କରିଥିଲା। ପାକିସ୍ତାନୀ ସେନା କିଛି କରିବା ପୂର୍ବରୁ ବ୍ରହ୍ମୋସ କ୍ଷେପଣାସ୍ତ୍ର ଆକ୍ରମଣ ଆମର ସବୁ ଯୋଜନାକୁ ଫେଲ୍ କରିଦେଇଥିଲା। ଆକ୍ରମଣରେ ଅନେକ ସାମରିକ ପ୍ରତିଷ୍ଠାନ ଗୁରୁତର ଭାବେ କ୍ଷତିଗ୍ରସ୍ତ ହୋଇଛନ୍ତି। ବ୍ରହ୍ମୋସ ଆକ୍ରମଣରେ ରାୱଲପିଣ୍ଡି ବାୟୁସେନା ବିମାନବନ୍ଦର ମଧ୍ୟ କ୍ଷତିଗ୍ରସ୍ତ ହୋଇଛି। ଅଜରବୈଜାନରେ ଏହି କଥାକୁ ସରିଫ ସ୍ବୀକାର କରିବା ସମୟରେ ସେଠାରେ ତାଙ୍କର ସେନା ଅଧ୍ୟକ୍ଷ ଜେନେରାଲ ମୁନୀର ମଧ୍ୟ ଉପସ୍ଥିତ ଥିଲେ।

ମେ ମାସର ୮-୯ ତାରିଖ ରାତିରେ ଭାରତର ପଶ୍ଚିମାଞ୍ଚଳ ସୀମାବର୍ତ୍ତୀ ଗାଁ ଗୁଡ଼ିକ ଉପରେ ପାକିସ୍ତାନ କ୍ଷେପଣାସ୍ତ୍ର ଓ ଡ୍ରୋନ ମାଡ଼ କରିବାରୁ ଏହାର ପ୍ରତିଜବାବରେ ଭାରତ ପକ୍ଷରୁ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ରାୱଲପିଣ୍ଡିର ନୂର ଖାନ୍‌ ବାୟୁସେନା ଘାଟୀ ସମେତ ପାକିସ୍ତାନର ୧୧ଟି ସାମରିକ ପ୍ରତିଷ୍ଠାନକୁ ଟାର୍ଗେଟ କରିଥିଲା ଭାରତ। ରଫିକି, ମୁରୀଦ, ରହିମ ୟାରଖାନ୍‌, ସୁକ୍କୁର ଏବଂ ଚୁନିଆନ ଭଳି ସାମରିକ ପ୍ରତିଷ୍ଠାନ ଧ୍ବଂସ ହୋଇଯାଇଥିଲା। ସ୍କର୍ଦ୍ଦୁ, ଭୋଲାରି, ଜାକୋବାବାଦ ଏବଂ ସରଗୋଧା ବାୟୁସେନା ଘାଟୀ ମଧ୍ୟ ବ୍ୟାପକ ରୂପେ କ୍ଷତିଗ୍ରସ୍ତ ହୋଇଛି।

ମିଳିଥିବା ସୂଚନା ଅନୁସାରେ, ଭାରତ ଏସ୍‌ୟୁ-୩୦ ଏମ୍‌କେଆଇ ଜେଟ୍ ଯୁଦ୍ଧ ବିମାନରୁ ପାଖାପାଖି ୧୫ଟି ବ୍ରହ୍ମୋସ କ୍ଷେପଣାସ୍ତ୍ର ଆକ୍ରମଣ କରିଥିଲା। ଏହା ସଠିକ ରୂପେ ଲକ୍ଷ୍ୟେଭଦ କରିପାରିଛି। ଉପଗ୍ରହ ଚିତ୍ରରୁ ମିଳିଥିବା ତଥ୍ୟରୁ ଏହାର ପ୍ରମାଣ ମିଳିଛି। ରୁଷ ସହଯୋଗରେ ନିର୍ମିତ ବ୍ରହ୍ମୋସ କ୍ଷେପଣାସ୍ତ୍ର ୩୦୦ କିଲୋମିଟର ଦୂର ପର୍ଯ୍ୟନ୍ତ ତୀବ୍ର ବେଗରେ ଲକ୍ଷ୍ୟେଭଦ କରିପାରିବ। ସବୁଠାରୁ ଉଲ୍ଳେଖନୀୟ କଥା ହେଲା ଯେ ପାକିସ୍ତାନରେ ମୁତୟନ ଚୀନ ନିର୍ମିତ ଏୟାର ଡିଫେନ୍ସ ସିଷ୍ଟମକୁ ଏହି କ୍ଷେପଣାସ୍ତ୍ର ନିଷ୍କ୍ରିୟ କରିଦେଇଥିଲା। ବ୍ରହ୍ମୋସ ଆକ୍ରମଣରୁ ଏହା ପାକିସ୍ତାନକୁ ସୁରକ୍ଷା ଦେବାରେ ବିଫଳ ହୋଇଥିଲା।

ଭୁବନେଶ୍ବର: ଭାରତ ପାକିସ୍ତାନ ମଧ୍ୟରେ ଯୁଦ୍ଧ ପରିସ୍ଥିତି ଭିତରେ ଆଜି ରାଜ୍ୟରେ ମୁଖ୍ୟମନ୍ତ୍ରୀ ମୋହନ ମଝୀଙ୍କ ଅଧ୍ୟକ୍ଷତାରେ ବସିବ ଗୁରୁତ୍ତ୍ୱପୂର୍ଣ ବୈଠକ। ସମସ୍ତ ଅଧିକାରୀ ହେବେ ସାମିଲ। ରାଜ୍ୟ ଓ ରାଜ୍ୟବାସୀଙ୍କ ସୁରକ୍ଷା ନେଇ ହେବ ସମୀକ୍ଷା। ଯୁଦ୍ଧକୁ ନେଇ ଭୟଭୀତ ହେବାର ନାହିଁ । ସାବଧାନର ସହ କାର୍ଯ୍ୟ କରିବାକୁ ପରାମର୍ଶ। ଓଡ଼ିଶା କ୍ଷେତ୍ରରେ ସେମିତି ହୁଏତ ବିପଦ ନାହିଁ। କିନ୍ତୁ ଚାନ୍ଦିପୁର , ଶ୍ରୀମନ୍ଦିର ,ଚିଲିକା ଆଇଏନଏସ ଓ ବଙ୍ଗୋପସାଗର ଥିବାରୁ ଆମ ପାଇଁ ଗୁରୁତ୍ଵ ତାକୁ ନେଇ ସଜାଗ ରହିଛି ଓଡ଼ିଶା।

ନୂଆଦିଲ୍ଲୀ: ପହଲଗାମ ଆକ୍ରମଣ ପରେ ଭାରତ ପାକିସ୍ତାନ ବିରୁଦ୍ଧରେ ଆଉ ଏକ ବଡ ପଦକ୍ଷେପ ନେଇଛି । ଭାରତ ପକ୍ଷରୁ ପାକିସ୍ତାନରୁ ଆମଦାନୀ ରପ୍ତାନୀ ବନ୍ଦ କରାଯାଇଛି । ଉଭୟ ପ୍ରତ୍ୟକ୍ଷ ଓ ପରୋକ୍ଷ ଆମଦାନୀ, ରପ୍ତାନୀ ବ୍ୟାନ୍ କରିଛନ୍ତି ଭାରତ ସରକାର। ଏନେଇ ବାଣିଜ୍ୟ ମନ୍ତ୍ରାଳୟ ପକ୍ଷରୁ ନିର୍ଦ୍ଦେଶାନାମା ଜାରି କରାଯାଇଛି ।

ବିଜ୍ଞପ୍ତିରେ କୁହାଯାଇଛି ଯେ, ଜାତୀୟ ସୁରକ୍ଷା ଏବଂ ସାର୍ବଜନୀନ ନୀତିର ସ୍ୱାର୍ଥକୁ ଦୃଷ୍ଟିରେ ରଖି ଏହି ପ୍ରତିବନ୍ଧକ ଲଗାଯାଇଛି । ଏହି ପ୍ରତିବନ୍ଧକର ଯେକୌଣସି ବ୍ୟତିକ୍ରମ ପାଇଁ ଭାରତ ସରକାରଙ୍କ ଅନୁମୋଦନ ଆବଶ୍ୟକ ହେବ ।

ନୂଆଦିଲ୍ଲୀ: ପହଲଗାମ ଆକ୍ରମଣ ପାଇଁ ପାକିସ୍ତାନ ନିଜର ସବୁ ତନ୍ତ୍ରକୁ ଲଗାଇ ଦେଇଥିଲା। ଆତଙ୍କବାଦୀ ପଠାଇ ଏହି ଆତଙ୍କୀ ରାଷ୍ଟ୍ର ଜମ୍ମୁ-କଶ୍ମୀରର ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ବୈସରନରେ ୨୬ ନିରୀହଙ୍କ ଜୀବନ ନେଇଥିଲା। ହିନ୍ଦୁଙ୍କ ରକ୍ତରେ ହୋଲି ଖେଳି ଘାଟୀକୁ ଅଶାନ୍ତ କରିବା ପାଇଁ ପାକିସ୍ତାନ ସେନା ଯୋଜନାବଦ୍ଧ ଷଡ଼ଯନ୍ତ୍ର କରିଥିଲା। ଏଥିପାଇଁ ପାକିସ୍ତାନୀ ଆତଙ୍କବାଦୀ ସଂଗଠନ ଲସ୍କର-ଇ-ତୋଏବା (ଏଲଇଟି)ସହାୟତା ନେଇଥିଲା। ପାକିସ୍ତାନ ଗୁଇନ୍ଦା ଏଜେନ୍ସି ଇଣ୍ଟର-ସର୍ଭିସ ଇଣ୍ଟେଲିଜେନ୍ସ (ଆଇଏସଆଇ) ଏହି ଆତଙ୍କବାଦୀ ସଂଗଠନକୁ ସହଯୋଗ କରିଥିଲା। ପାକିସ୍ତାନ ସେନା, ଆଇଏସଆଇ ଏବଂ ଏଲଇ୍‌ଟି ମିଳିତ ଷଡ଼ଯନ୍ତ୍ର କରି ପହଲଗାମରେ ଆତଙ୍କ ସୃଷ୍ଟି କରିଥିଲେ। ଏହି ଆକ୍ରମଣର ତଦନ୍ତ କରୁଥିବା ଏନ୍‌ଆଇଏର ପ୍ରାରମ୍ଭିକ ଯାଞ୍ଚ ରିପୋର୍ଟ ଏହି ସୂଚନା (ସୂତ୍ରରୁ) ସୂଚନା ମିଳିଛି। ଏହି ଆକ୍ରମଣରେ ସାମିଲ ଆତଙ୍କବାଦୀଙ୍କୁ ଘାଟୀରେ ଲଜିଷ୍ଟିକ ସହାୟତା ଦେଇଥିବା ତୃଣମୂଳସ୍ତରର (ଓଜିଡବ୍ଲ୍ୟୁ)ର ୨୦ କର୍ମୀଙ୍କୁ ଏନଆଇଏ ଚିହ୍ନଟ କରିଛି। ଏମାନଙ୍କୁ ଏବେ ଜେରା କରାଯାଉଛି।

ପ୍ରମୁଖ ୨ ଓଜିଡବ୍ଲ୍ୟୁ ନିସାର ଅହମ୍ମଦ ଓରଫ ହାଜି ଏବଂ ମୁସ୍ତାକ ହୁସୈନକୁ ଗିରଫ କରି ଜମ୍ମୁର କୋଟ ଭଲୱାଲ ଜେଲ୍‌ରେ ରଖାଯାଇଛି। ଏଠାରେ ଉଭୟଙ୍କୁ ଜେରା କରାଯାଉଛି। ଅଧିକାରୀଙ୍କ ସୂଚନା ଅନୁଯାୟୀ ଏହି ଦୁଇ ଜଣ ଆତଙ୍କବାଦୀ ସଂଗଠନ ଏଲଇଟିର ସହଯୋଗୀ। ପୂର୍ବରୁ ୨୦୨୩ରେ ଭଟା ଧୁରିଆନ ଏବଂ ଟୋଟାଗଲିରେ ସେନା କନଭୟେ ଉପରେ ଆକ୍ରମଣ ମାମଲାରେ ଉଭୟଙ୍କୁ ଗିରଫ କରାଯାଇଥିଲା। ଏନ୍‌ଆଇଏ ତଦନ୍ତରୁ ଜଣାପଡ଼ିଛି ଯେ ଆଇଏସଆଇ, ସେନା ସହିତ ପାକିସ୍ତାନୀ ନେତଙ୍କ ନିର୍ଦ୍ଦେଶ ଏବଂ ସହଯୋଗରେ ଏଲ୍‌ଇଟି ଏହି ଆତଙ୍କବାଦୀ ଆକ୍ରମଣର ପାଇଁ ଷଡ଼ଯନ୍ତ୍ର କରିଥିଲା। ପହଲଗାମ ଆକ୍ରମଣର ଦୁଇ ପ୍ରମୁଖ ସନ୍ଦିଗ୍ଧ ହସିମ ମୁସା ଓରଫ ଅଲିଅସ ସୁଲେମାନ ଏବଂ ଅଲି ଭାଇ ଓରଫ ତଲ୍ହା ଭାଇ ପାକିସ୍ତାନୀ ନାଗରିକ ବୋଲି ଜଣାପଡ଼ିଛି। ଏହି ଦୁଇ ଜଣ ପାକିସ୍ତାନ ସହ ଯୋଗାଯୋଗରେ ଥିଲେ। ସୀମା ଆର ପଟୁ ଏହି ଆତଙ୍କବାଦଙ୍କୁ ସବୁ ନିର୍ଦ୍ଦେଶ ମିଳୁଥିଲା। ଲଜିଷ୍ଟିକ, ସମୟ ଏବଂ ଆକ୍ରମଣ ବିଷୟରେ ସବୁ ସୂଚନା ମିଳୁଥିଲା।

ସୂଚନା ଅନୁଯାୟୀ, ଆକ୍ରମଣରେ ସାମିଲ ଆତଙ୍କବାଦୀ ସପ୍ତାହେ ତଳେ ଭାରତୀୟ ସୀମାରେ ଅନୁପ୍ରବେଶ କରିଥିଲେ। ଓଜିଡବ୍ଲ୍ୟୁଙ୍କ ଏକ ନେଟୱର୍କ ଏହି ଆତଙ୍କବାଦୀଙ୍କୁ ଆଶ୍ରୟସହିତ ଯୋଗାଯୋଗରେ ସହାୟତା ଏବଂ ଅନ୍ୟ ସବୁର ସୂଚନା ଦେଇଥିଲା। ଏହି ଆତଙ୍କବାଦୀ ଗତ ୧୫ ତାରିଖରେ ପହଲଗାମରେ ପହଞ୍ଚି ଥିଲେ। ପରେ ବୈସରନ, ଅରୁ, ବିତାବ ଉପତ୍ୟକା ଏବଂ ଏକ ସ୍ଥାନୀୟ ପାର୍କ ବୁଲି ତଲାସୀ ନେଇଥିଲେ। ସୁରକ୍ଷା ନ ଥିବାରୁ ସେମାନେ ବୈସରନକୁ ଆକ୍ରମଣ ପାଇଁ ଧରିଥିଲେ। ଏନ୍‌ଆଇଏ ଆକ୍ରମଣସ୍ଥଳରୁ ୪୦ କ୍ୟାଟ୍ରିଜ ଜବତ କରିଛି। ବାଲିଷ୍ଟିକ ଏବଂ କେମିକାଲ ବିଶ୍ଳେଷଣ ପାଇଁ ଏହାକୁ ପଠାଇ ଦିଆଯାଇଛି। ସେହିପରି ପହଲଗାମର ୩ଡି ମ୍ୟାପିଂ ମଧ୍ୟ କରାଯାଇଛି। ନିକଟସ୍ତ ମୋବାଇଲ ଟାୱାରର ‘ଡମ୍ପ ଡାଟା’ ଯାଞ୍ଚ କରାଯାଉଛି। ଆକ୍ରମଣ ଦିନ ବୈସରନ ଅଞ୍ଚଳରେ ତିନୋଟି ସାଟେଲାଇଟ ଫୋନ୍‌ ସକ୍ରିୟ ଥିଲା ବୋଲି ମଧ୍ୟ ସୂଚନା ମିଳିଛି। ଏଥିରୁ ୨ଟି ସିଗ୍‌ନାଲର ବିଶ୍ଳେଷଣ କରାଯାଇଛି। ଏ ପର୍ଯ୍ୟନ୍ତ ଆକ୍ରମଣକୁ ନେଇ ୨୮୦୦ ଜଣଙ୍କୁ ଜେରା କରାଗଲାଣି। ୧୫୦ ଜଣଙ୍କୁ ହେପାଜତକୁ ନିଆଯାଇଛି। ଏମାନଙ୍କ ମଧ୍ୟରେ ଜମାତ-ଇ-ଇସଲାମି ଏବଂ ହୁରିୟତର ସଦସ୍ୟ ସାମିଲ ଅଛନ୍ତି। ପହଲଗାମ ଆକ୍ରମଣ ଏବଂ ରାଜୋରି-ପୁଞ୍ଚ କନଭୟ ଉପରେ ଗୁଳିମାଡ଼ ମଧ୍ୟରେ ସମ୍ବନ୍ଧ ରହିଛି ବୋଲି ଅଧିକାରୀ ଆଶଙ୍କା କରୁଛନ୍ତି। ଅନ୍ୟପଟେ ଆତଙ୍କବାଦୀଙ୍କୁ ଧରିବା ପାଇଁ ୧୦ ଦିନ ହେଲା କଶ୍ମୀର ଜଙ୍ଗଲରେ ସେନା ଅଭିଯାନ ଜାରି ରଖିଛି।

ନୂଆଦିଲ୍ଲୀ: ଏପ୍ରିଲ ୨୨ ପହଲଗାମ୍‌ ଆତଙ୍କବାଦୀ ଆକ୍ରମଣ ଘଟଣାକୁ ନେଇ ଏବେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ପ୍ରାୟ ପରିସ୍ଥିତି ସୃଷ୍ଟି ହୋଇଛି। ପହଲଗାମ୍‌ ପର୍ଯ୍ୟଟକ ଆକ୍ରମଣ ଘଟଣାରେ କଶ୍ମୀରରେ ସକ୍ରିୟ ରହିଥିବା ‘ ଦି ରେଜିଷ୍ଟାଣ୍ଟ ଫ୍ରଣ୍ଟ’ ନିଜକୁ ଦାୟୀ କରିଥିଲା। ଏହି ସଂଗଠନ ପାକିସ୍ତାନର ଲସ୍କର ଆତଙ୍କୀ ସଂଗଠନ ସହିତ କାର୍ଯ୍ୟ କରୁଥିବାରୁ ଆକ୍ରମଣ ଘଟଣା ପଛରେ ପାକିସ୍ତାନର ହାତ ରହିଥିବା ସ୍ପଷ୍ଟ ହୋଇଥିଲା। ଏହାପରେ ଭାରତ ସରକାରଙ୍କ ପକ୍ଷରୁ ସିନ୍ଧୁ ନଦୀ ଜଳ ଚୁକ୍ତିନାମା ରଦ୍ଦ କରାଯିବା ସହିତ ପାକିସ୍ତାନ ବିରୋଧରେ ଅନ୍ୟାନ୍ୟ ୫ଟି ପଦକ୍ଷେପ ନିଆଯାଇଥିଲା। କିନ୍ତୁ ଏତିକିରେ ବି କଥା ଶେଷ ହୋଇ ନାହିଁ। ପାକିସ୍ତାନର ଆତଙ୍କବାଦ ଇଲାକାକୁ ଧୂଳିସାତ୍‌ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହୁଙ୍କାର ଦେବା ପରେ ଏବେ ପାକିସ୍ତାନ ବିରୋଧରେ ଯୁଦ୍ଧ ଆଶଙ୍କା ବଢିଛି। ସେପଟେ ପାକିସ୍ତାନ ମଧ୍ୟ ଭାରତ ବିରୋଧରେ ହୁଙ୍କାର ଦେବାକୁ ପଛାଇ ନାହିଁ। ଯଦି ଭାରତ କିଛି ପଦକ୍ଷେପ ନେବ ତେବେ ପାକିସ୍ତାନ କ’ଣ ଚୁପ୍‌ ହୋଇ ବସିବ କି ବୋଲି ସେଠାକାର ବହୁ ନେତା ପ୍ରଶ୍ନ କରିଛନ୍ତି। ଏପରିକି ଘୋରୀ,ସାହିନ ଏବଂ ଗଜନଭି ଭଳି ୧୩୦ ପରମାଣୁ ଅସ୍ତ୍ରକୁ ପାକିସ୍ତାନ କ’ଣ ପ୍ରଦର୍ଶନ ପାଇଁ ରଖିଛି କି ବୋଲି ପାକିସ୍ତାନ ରେଳମନ୍ତ୍ରୀ ହାନିଫ୍‌ ଆବାସୀ ଭାରତକୁ ଧମକ ଦେଇ କହିଛନ୍ତି।

ତେବେ ଭାରତ –ପାକିସ୍ତାନ ମଧ୍ୟରେ ଯଦି ଯୁଦ୍ଧ ହୁଏ ତେବେ ଏହାର ପରିଣତି ଦ୍ବିତୀୟ ବିଶ୍ବଯୁଦ୍ଧ ଠାରୁ ଭୟଙ୍କର ହେବ ବୋଲି ଏବେ ସାମରିକ ବିଶେଷଜ୍ଞମାନେ ଆକଳନ କରିବା ଆରମ୍ଭ କରିଛନ୍ତି। ‘ଫେଡେରସନ ଅଫ୍‌ ଆମେରିକାନ ସାଇଣ୍ଟିଷ୍ଟ’ର ବୈଜ୍ଞାନିକମାନେ କହିଛନ୍ତି ଯେ, ଉଭୟ ଦେଶ ମଧ୍ୟରେ ପ୍ରାୟ ସମାନ ସଂଖ୍ୟକ ପରମାଣୁ ଅସ୍ତ୍ର ରହିଛି। ପାକିସ୍ତାନ ନିକଟରେ ୧୭୦ ପରମାଣୁ ଅସ୍ତ୍ର ରହିଥିଲା ବେଳେ ଭାରତ ନିକଟରେ ୧୮୦ ପରମାଣୁ ଅସ୍ତ୍ର ରହିଛି। ଯଦିଓ ଉଭୟ ଦେଶ ମଧ୍ୟରେ ଯୁଦ୍ଧ ହେବାର ସମ୍ଭାବନା କମ୍‌ ରହିଛି, ତଥାପି କୌଣସି ତ୍ରୁଟିପୂର୍ଣ୍ଣ ନିଷ୍ପତ୍ତି ଯୋଗୁ ଯଦି ଯୁଦ୍ଧ ଆରମ୍ଭ ହୁଏ ତେବେ ପରିଣତି ଅତ୍ୟନ୍ତ ଭୟଙ୍କର ହେବ ଏବଂ ଦ୍ବିତୀୟ ବିଶ୍ବଯୁଦ୍ଧ ପରିଣତିକୁ ବଳିଯିବ ବୋଲି ସେମାନେ କହିଛନ୍ତି।

ସେହିପରି ୟୁନିଭର୍ସିଟି ଅଫ୍‌ କଲୋରାଡୋର ବିଶେଷଜ୍ଞମାନେ କହିଛନ୍ତି ଯେ, ଯଦି ଯୁଦ୍ଧ ଆରମ୍ଭ ହୁଏ ତେବେ ସପ୍ତାହକ ମଧ୍ୟରେ ଅନ୍ୟୂନ ୭ ଲକ୍ଷ ଲୋକଙ୍କ ମୃତ୍ୟୁ ହେବ। ଏହାପରେ ପରମାଣୁ ଅସ୍ତ୍ର ପ୍ରାୟୋଗରେ ପ୍ରାୟ ୮୦ ବିଲିୟନ ପାଉଣ୍ଡ କଳାଧୂଆଁ ସୃଷ୍ଟି ହେବ ଯାହାକି ବାୟୁମଣ୍ଡଳକୁ ଭାରୀ ମାତ୍ରାରେ ପ୍ରଭାବିତ କରିବ। ସ୍ଥିତି ଏଭଳି ହେବ ଯେ, ମାସ ମାସ ଧରି ଧରା ପୃଷ୍ଠରେ ସୂର୍ଯ୍ୟକିରଣ ପଡ଼ିବ ନାହିଁ ଏବଂ ତାପମାତ୍ରା ଅହେତୁକ ଭାବେ ହ୍ରାସ ପାଇବ। ଯାହା ପୁଣି ଏକ ବରଫ ଯୁଗ ସୃଷ୍ଟି କରିବ। ଏଭଳି ସ୍ଥିତିରେ ୫୦ରୁ ୧୨୫ ନିୟୁତ ଲୋକଙ୍କ ମୃତ୍ୟୁ ହେବ ବୋଲି ବୈଜ୍ଞାନିକମାନେ ଆକଳନ କରିଛନ୍ତି।

ନୂଆଦିଲ୍ଲୀ : ପହଲଗାମରେ ଆତଙ୍କବାଦୀ ଆକ୍ରମଣ ପରେ ପାକିସ୍ତାନ ସହିତ ସିନ୍ଧୁ ନଦୀ ଚୁକ୍ତିକୁ ଭାରତ ବାତିଲ କରିବା ପରେ ଏଥିରେ ବିଚଳିତ ଓ ବିବ୍ରତ ହୋଇ ପାକିସ୍ତାନ ଐତିହାସିକ ସିମଲା ରାଜିନାମା ସମେତ ସମସ୍ତ ଦ୍ବିପାକ୍ଷିତ ଚୁକ୍ତିକୁ ସ୍ଥଗିତ କରିବାକୁ ଘୋଷଣା କରିଛି। ପାକିସ୍ତାନର ଏଭଳି ପଦକ୍ଷେପ ସାମରିକ ଦୃଷ୍ଟିରୁ ଉଦ୍‌ବେଗଜନକ ପରିସ୍ଥିତି ସୃଷ୍ଟି କରିପାରେ। କାରଣ ଦୁଇ ଦେଶ ମଧ୍ୟରେ ଶାନ୍ତି ଓ ସ୍ଥିରତା ପ୍ରତିଷ୍ଠା ଲାଗି ୧୯୭୨ ରେ ସ୍ବାକ୍ଷରିତ ସିମଲା ରାଜିନାମା ଭାରତ ଓ ପାକିସ୍ତାନ ମଧ୍ୟରେ ପ୍ରକୃତ ନିୟନ୍ତ୍ରଣ ରେଖା ନିର୍ଦ୍ଧାରିତ କରିଛି। ଦୁଇ ଦେଶର ସେନା ଏହି ରେଖାର ନିଜ ପଟେ ମୁତୟନ ହୋଇ ରହିଛନ୍ତି। ରେଖା ଅତିକ୍ରମ ପାଇଁ ଉଭୟ ଦେଶର ସେନାକୁ ବାରଣ କରାଯାଇଛି। କିନ୍ତୁ ପାକିସ୍ତାନ ଏହି ରାଜିନାମା ବାତିଲ କରିଥିବାରୁ ସାମରିକ ଉତ୍ତେଜନାକୁ ଏଡ଼ାଇ ଦିଆଯାଇ ନପାରେ। କେବଳ ଏତିକି ନୁହେଁ, ଏବେ ସିମଳା ଚୁକ୍ତିରୁ ଓହରି ଯାଇ ନିଜ ଗୋଡ଼ରେ କୁରାଢ଼ୀ ମାରିଥିବା କୁହାଯାଉଛି । କ୍ରୋଧର ବଶବର୍ତ୍ତୀ ହୋଇ ପାକିସ୍ତାନ ଭାରତକୁ ପାକ୍‌ ଅଧିକୃତ କାଶ୍ମୀର ଅର୍ଥାତ୍‌ ପିଓକେକୁ ଭାରତ ସହିତ ମିଶାଇବାର ସୁଯୋଗ ଦେଇଛି।

୧୯୭୧ ଭାରତ-ପାକିସ୍ତାନ ଯୁଦ୍ଧ ପରେ ଶାନ୍ତି ପ୍ରତିଷ୍ଠା ଉଦ୍ଦେଶ୍ୟରେ ୧୯୭୨ରେ ସିମଳା ରାଜିନାମା ସ୍ବାକ୍ଷରିତ ହୋଇଥିଲା। ଭାରତର ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଏବଂ ପାକିସ୍ତାନର ରାଷ୍ଟ୍ରପତି ଜୁଲଫିକର ଅଲ୍ଲୀ ଭୁଟ୍ଟୋ ଏହି ଚୁକ୍ତିନାମାରେ ସ୍ବାକ୍ଷରିତ କରିଥିଲେ। ଦ୍ବିପାକ୍ଷିକ ଆଲୋଚନା ମାଧ୍ୟମରେ ଦୁଇ ଦେଶ ମଧ୍ୟରେ ରହିଥିବା ସମସ୍ତ ବିବାଦର ଶାନ୍ତିପୂର୍ଣ୍ଣ ସମାଧାନ ପାଇଁ ଏଥିରେ ସଂକଳ୍ପ ନିଆଯାଇଥିଲା। କଶ୍ମୀର ବିବାଦ ସମେତ ସମସ୍ତ ଦ୍ବିପାକ୍ଷିକ ବିବାଦର ସମାଧାନ ଆପୋସ ଆଲୋଚନା ମାଧ୍ୟମରେ ହେବ ଏବଂ ଏଥିରେ ତୃତୀୟ ପକ୍ଷ ହସ୍ତକ୍ଷେପ କରିବେ ନାହିଁ। ୧୯୭୧ ଭାରତ -ପାକିସ୍ତାନ ଯୁଦ୍ଧ ପରେ ସ୍ଥାପିତ ସିଜ୍‌ଫାୟର ଲାଇନ୍‌ ବା ଯୁଦ୍ଧବିରତି ରେଖାକୁ ପ୍ରକୃତ ନିୟନ୍ତ୍ରଣ ରେଖା ବା ଲାଇନ୍‌ ଅଫ୍‌ କଣ୍ଟ୍ରୋଲ (ଏଲ୍‌ଓସି) ରୂପେ ଉଭୟ ପକ୍ଷ ସ୍ବୀକୃତି ଦେଇଥିଲେ।

ମତଭେଦ ଓ ତିକ୍ତତା ସତ୍ତ୍ବେ କୌଣସି ଦେଶ ଏକତରଫା ଭାବେ ଏହି ରେଖାରେ କୌଣସି ପରିବର୍ତ୍ତନ କରିପାରିବେ ନାହିଁ ବୋଲି ରାଜିନାମାରେ ସ୍ପଷ୍ଟ ଭାବେ ଉଲ୍ଲେଖ ରହିଛି। ଶାନ୍ତିପୂର୍ଣ୍ଣ ସହାବସ୍ଥାନ ସହିତ ପରସ୍ପରର ଏକତା, ଅଖଣ୍ଡତା ଓ ସାର୍ବଭୌମତ୍ତ୍ବ ପ୍ରତି ବିପଦ ସୃଷ୍ଟି କଲା ଭଳି କୌଣସି ପଦକ୍ଷେପ ନେବେ ନାହିଁ। କେହି କାହାର ଆଭ୍ୟନ୍ତରୀଣ ବ୍ୟାପାରରେ ମଧ୍ୟ ହସ୍ତକ୍ଷେପ କରିବେ ନାହିଁ ବୋଲି ରାଜିନାମାରେ ଉଲ୍ଲେଖ ରହିଛି। ସୂଚନାଯୋଗ୍ୟ ଯେ ୧୯୭୧ ଯୁଦ୍ଧରେ ପାକିସ୍ତାନରୁ ଅଲଗା ହୋଇ ବାଂଲାଦେଶ ନୂଆ ଦେଶ ହୋଇଥିଲା। ବାଂଲାଦେଶ ଗଠନକୁ ମଧ୍ୟ ପାକିସ୍ତାନ ସ୍ବୀକୃତି ପ୍ରଦାନ କରିଥିଲ।

ଦୁଇ ଦେଶ ମଧ୍ୟରେ ଶାନ୍ତି ପ୍ରତିଷ୍ଠା ଲାଗି ସିମଳା ରାଜିନାମା ସ୍ବାକ୍ଷରିତ ହୋଇଥିଲେ ମଧ୍ୟ ଅନେକ ସମୟରେ ଦ୍ବିପାକ୍ଷିକ ସଂପର୍କରେ ଘୋର ଅବନତି ଘଟିଛି। ଏହି ରାଜିନାମା ସତ୍ତ୍ବେ ୧୯୯୯ରେ କାରଗିଲ ଯୁଦ୍ଧ, ୧୯୮୦ ଦଶକରେ ସିଆଚେନ ଗ୍ଲାସିୟର ସଂଘର୍ଷ ହୋଇଥିଲା ଏବଂ କଶ୍ମୀରକୁ ନେଇ ଦୁଇ ଦେଶ ମଧ୍ୟରେ ଏବେ ବି ବିବାଦ ଲାଗି ରହିଛି। ୧୯୮୪ରେ ଅପରେସନ୍ ମେଘଦୂତ ଜରିଆରେ ଭାରତ ସିଆଚେନ ଗ୍ଲାସିୟର ଅଞ୍ଚଳ ଦଖଲ କରିଥିଲା। ଏହା ସିମଲା ରାଜିନାମାର ଉଲ୍ଲଂଘନ ବୋଲି ପାକିସ୍ତାନ ଅଭିଯୋଗ କରି ଆସୁଛି। ସିଆଚେନରେ ଏବେ ବି ଉଭୟ ଦେଶର ସେନା ମୁହାଁମୁହିଁ ହୋଇ ରହିଛନ୍ତି। ମାତ୍ର ସିମଲା ଚୁକ୍ତିରୁ ଓହରିଗଲେ ଭାରତ ଏବେ ପାକ୍‌ ଅଧିକୃତ କାଶ୍ମୀର ଅର୍ଥାତ୍‌ ପିଓକେକୁ ଫେରାଇ ଆଣିବା ପାଇଁ ପଦକ୍ଷେପ ନେଇ ପାରିବ। ଯଦି ଭାରତ ଚାହିଁବ, ତେବେ ସେ ସମ୍ପୂର୍ଣ୍ଣ କାଶ୍ମୀରକୁ କୌଣସି ଆଇନଗତ ପ୍ରତିବନ୍ଧକ ବିନା ବଳ ପ୍ରୟୋଗ କରି ଏକତ୍ର କରିବାର ଯୋଜନା ଉପରେ ଖୋଲାଖୋଲି ଭାବରେ କାମ କରିପାରିବ।

ଭାରତ ନିୟନ୍ତ୍ରଣ ରେଖା ପାର କରିପାରେ

ସିମଲା ରାଜିନାମା ରଦ୍ଧର ଅର୍ଥ ଯଦି ବୁଝିବା, ତେବେ ପାକିସ୍ତାନ କହୁଛି ଯେ LOC ଆଉ ନାହିଁ। ଏହାର ଅର୍ଥ ହେଉଛି ଭାରତ ନିୟନ୍ତ୍ରଣ ରେଖା ପାର କରିପାରିବ। ସିମଲା ଚୁକ୍ତିନାମା ଏଲଓସିକୁ ସ୍ଥାୟୀ ସୀମା ଭାବରେ ସ୍ୱୀକୃତି ଦେଇଥିଲା। ଏହା ଅଧୀନରେ, ଉଭୟ ଦେଶ ବଳ ପ୍ରୟୋଗ ନକରିବା ଏବଂ ନିୟନ୍ତ୍ରଣ ରେଖାକୁ ସମ୍ମାନ ଦେବାକୁ ପ୍ରତିବଦ୍ଧତା ପ୍ରକାଶ କରିଥିଲେ। ଏହାର ସ୍ଥଗିତତା ଭାରତକୁ ନିୟନ୍ତ୍ରଣ ରେଖା ପାର କରି, ବିଶେଷକରି ପାକ୍ ଅଧିକୃତ କାଶ୍ମୀରରେ ଅଧିକ ଆକ୍ରମଣାତ୍ମକ ରଣନୀତି ଗ୍ରହଣ କରିବାକୁ ପ୍ରେରଣା ଦେଇପାରେ। ଭାରତ ପିଓକେର ଲୋକଙ୍କ ସହିତ ସିଧାସଳଖ ସମ୍ପର୍କ ସ୍ଥାପନ କରିପାରିବ। ଏହା ଆଞ୍ଚଳିକ ଉତ୍ତେଜନାକୁ ଆହୁରି ବୃଦ୍ଧି କରିପାରେ। ଏହାର କ୍ଷତି ପାକିସ୍ତାନକୁ ସହ୍ୟ କରିବାକୁ ପଡ଼ିପାରେ।

କାଶ୍ମୀର ଉପରେ ଭାରତର ସ୍ଥିତି ଆହୁରି ମଜବୁତ ହେବ

କାଶ୍ମୀରକୁ ଦ୍ୱିପାକ୍ଷିକ ପ୍ରସଙ୍ଗ ରଖିବା ପାଇଁ ସିମଲା ଚୁକ୍ତିନାମା ମୂଳଦୁଆ। ଏହି ଚୁକ୍ତିନାମା ଉଭୟ ଦେଶକୁ ପାରସ୍ପରିକ ଆଲୋଚନା ଏବଂ ଶାନ୍ତିପୂର୍ଣ୍ଣ ଉପାୟରେ କାଶ୍ମୀର ସମସ୍ୟାର ସମାଧାନ କରିବାକୁ ବାଧ୍ୟ କରେ। ଏହାର ସ୍ଥଗିତତା ଭାରତକୁ ଏକ ଦୃଢ଼ ଯୁକ୍ତି ଦେବ ଯେ ପାକିସ୍ତାନ ନିଜେ ଚୁକ୍ତିନାମାକୁ ପ୍ରତ୍ୟାଖ୍ୟାନ କରିଛି। ଫଳସ୍ୱରୂପ, ଭାରତ କାଶ୍ମୀର ଉପରେ ଏହାର ନୀତିକୁ ଆହୁରି ସୁଦୃଢ଼ ​​କରିବା ପାଇଁ ମୁକ୍ତ ହେବ।

କୂଟନୈତିକ ବିଶ୍ୱସନୀୟତାକୁ କ୍ଷତି

ଚୁକ୍ତିନାମା ସ୍ଥଗିତ ହେବା ଦ୍ୱାରା ପାକିସ୍ତାନର ପୂର୍ବରୁ ଦୁର୍ବଳ କୂଟନୈତିକ ବିଶ୍ୱସନୀୟତା ଆହୁରି ଦୁର୍ବଳ ହୋଇଯିବ। ବିଶ୍ୱ ସମୁଦାୟ ଏହାକୁ ଏକ ଦାୟିତ୍ୱହୀନ ପଦକ୍ଷେପ ଭାବରେ ଦେଖିବ ଏବଂ ପାକିସ୍ତାନର ଅନ୍ତର୍ଜାତୀୟ ଏକାକୀତା ବୃଦ୍ଧି ପାଇପାରେ। ଏପରି ପରିସ୍ଥିତିରେ, ଆର୍ଥିକ ସଙ୍କଟର ସମ୍ମୁଖୀନ ହେଉଥିବା ପାକିସ୍ତାନ ପାଇଁ ଅନ୍ତର୍ଜାତୀୟ ସମର୍ଥନ ଯୋଗାଡ଼ କରିବା ଆହୁରି କଷ୍ଟକର ହୋଇଯିବ।

ଦୁବାଇ: ଆଇସିସି ଚାମ୍ପିଅନ୍ସ ଟ୍ରଫିରେ ଆଜି ହାଇଭୋଲଟେଜ୍ ଲଢ଼େଇ । ସୁପର ସଣ୍ଡେରେ ଭାରତ-ପାକିସ୍ତାନ ମଧ୍ୟରେ ହେବ ମହାମୁକାବିଲା । ମୁହାଁମୁହିଁ ହେବେ ଦୁଇ ପାରମ୍ପରିକ ପ୍ରତିଦ୍ବନ୍ଦ୍ବୀ ଭାରତ ଓ ପାକିସ୍ତାନ । ଏହି ମ୍ୟାଚ୍‌ର ଫଳାଫଳ ଯାହା ହେଉନା କାହିଁକି ଅଂଶଗ୍ରହଣକାରୀ ଦୁଇ ଦଳ ଓ ସେମାନଙ୍କ ସମର୍ଥକଙ୍କ ମଧ୍ୟରେ ଏହି ମ୍ୟାଚ୍‌କୁ ନେଇ ଅନେକ ଆଶା ଓ ଉତ୍କଣ୍ଠା ରହିଥାଏ। କିନ୍ତୁ ଆଇସିସି ଇଭେଣ୍ଟରେ ଏହି ମୁକାବିଲା ରୋମାଞ୍ଚକ ଓ ପ୍ରତିଦ୍ୱନ୍ଦ୍ୱିତାମୂଳକ ହେବା ପରିବର୍ତ୍ତେ ଏକତରଫା ହେବାର ଏକାଧିକ ନଜିର ରହିଛି। ଏହା ସତ୍ତ୍ବେ ଏହି ମୁକାବିଲା ଜିତି ଭାରତ ଚାମ୍ପିଅନ୍ସ ଟ୍ରଫି ସେମିଫାଇନାଲକୁ ଯିବାର ଲକ୍ଷ୍ୟ ରଖିଛି। ଅନ୍ୟପକ୍ଷରେ ପ୍ରଥମ ମ୍ୟାଚ୍‌ରେ ହାରିଥିବା ପାକିସ୍ତାନ ଏହି ମୁକାବିଲାକୁ ଜିତି ପ୍ରତିଯୋଗିିତାରେ ତିଷ୍ଠି ରହିବା ଲାଗି ସମସ୍ତ ପ୍ରକାର ଉଦ୍ୟମ କରିବ ବୋଲି ନିଶ୍ଚିତ ଆଶା ରଖିଛି। ଏଭଳି ସ୍ଥିତିରେ ମ୍ୟାଚ୍‌ଟି ତୀବ୍ର ପ୍ରତିଦ୍ୱନ୍ଦ୍ୱିତାମୂଳକ ହେବ ବୋଲି ଆଶା କରିବା ସ୍ୱାଭାବିକ୍‌। କିନ୍ତୁ ବର୍ତ୍ତମାନ ଫର୍ମ, ରେକର୍ଡ ଓ ସଫଳତାକୁ ବିଚାରକୁ ନେଲେ ମ୍ୟାଚ୍‌ଟି ଏକତରଫା ହେଲେ ଆଦୌ ଆଶ୍ଚର୍ଯ୍ୟ ହେବାର କିଛି ନାହିଁ।

ଦୁବାଇ ଇଣ୍ଟରନ୍ୟାସନାଲ ଷ୍ଟାଡିୟମ୍‌ରେ ଆୟୋଜିତ ହେବାକୁ ଥିବା ଏହି ମ୍ୟାଚ୍‌ ଲାଗି ଖେଳାଳି, କର୍ମକର୍ତ୍ତା, ଆୟୋଜକ, ପ୍ରାୟୋଜକ ଓ ସମର୍ଥକଙ୍କ ମନରେ ଢେ଼ର ଉତ୍କଣ୍ଠା। ଦୁଇ ଦେଶ ମଧ୍ୟରେ ରାଜନୈତିକ ଓ କୁଟନୈତିକ ଉତ୍ତେଜନାର ପରିପ୍ରକାଶ ହୋଇଥାଏ ଏହି ମୁକାବିଲା। ଏଥିଲାଗି ଉଭୟ ଦଳ ଯେପରି ଦକ୍ଷତାର ବିନିଯୋଗ କରିଥାନ୍ତି, ଠିକ୍‌ ସେହିପରି ଚାପକୁ ମୁକାବିଲା କରିଥାନ୍ତି। ଦକ୍ଷତା ପ୍ରଦର୍ଶନ ସହ ଯେଉଁ ଦଳ ଚାପକୁ ଭଲରେ ଗ୍ରହଣ କରିବାରେ ସମର୍ଥ ହୋଇଥାନ୍ତି, ସେହି ଦଳ ମୁକାବିଲାରେ ବିଜୟୀ ହୋଇଥାନ୍ତି। ସବୁ ଦୃଷ୍ଟିରୁ ଦେଖିଲେ ଭାରତ ଏବେ ପାକିସ୍ତାନଠାରୁ ବହୁ ଉପରେ ରହିଛି। ଫର୍ମ ହେଉ ଅବା ପରିବେଶ, ଖେଳ ହେଉ ଅବା ଚାପର ମୁକାବିଲାରେ ଭାରତ ନିଶ୍ଚିତଭାବେ ତାହାର ପାରମ୍ପରିକ ପ୍ରତିଦ୍ୱନ୍ଦ୍ୱୀ ଠାରୁ ବହୁ ଆଗରେ। ଏହାର ଅର୍ଥ ନୁହେଁ ଯେ ପାକିସ୍ତାନ ଯେତେ ଭଲ ଖେଳିଲେ ମଧ୍ୟ ଏହି ମ୍ୟାଚ୍‌ ଜିତିପାରିବ ନାହିଁ। ପାକିସ୍ତାନ ନିକଟରେ ଭାରତ ଭଳି ବିଶ୍ୱବିଜେତା ରହିଛନ୍ତି। ବୋଲିଂରେ ଗୋଟିଏ ସ୍ପେଲ୍‌ କିମ୍ବା ଗୋଟିଏ ବଡ଼ ପାର୍ଟନରସିପ୍‌ ଏହି ମ୍ୟାଚ୍‌ର ଭାଗ୍ୟ ନିର୍ଦ୍ଧାରଣ କରିଥାଏ।

ଘରୋଇ ମାଟିରେ ଇଂଲଣ୍ଡକୁ ୩-୦ରେ ହରାଇବା ଓ ଏଠାରେ କଡ଼ା ପ୍ରତିରୋଧ ସତ୍ତ୍ବେ ବାଂଲାଦେଶକୁ ସହଜରେ ପରାସ୍ତ କରିବା ପରେ ଭାରତର ମନୋବଳ ବୃଦ୍ଧି ପାଇଛି। ଦଳର ସମୀକରଣ ଠିକ ହୋଇଯାଇଛି ଓ ପ୍ରମୁଖ ଖେଳାଳି ଫର୍ମକୁ ଫେରିଛନ୍ତି। ଅଧିନାୟକ ରୋହିତ ଶର୍ମାଙ୍କ ଫର୍ମକୁ ନେଇ ଯେଉଁ ଦ୍ୱନ୍ଦ୍ୱ ରହିଥିଲା ତାହା ବାଂଲା ବିପକ୍ଷ ମ୍ୟାଚ୍‌ରେ ୪୧ ରନ୍‌ ସଂଗ୍ରହ କରିବା ପରେ ସେହି ସନ୍ଦେହ ଦୂରୀଭୂତ ହୋଇଛି। ଶୁବମନ ଗିଲଙ୍କ ଶତକ ବଳରେ ଭାରତ ବାଂଲା ମୁକାବିଲାକୁ ୪ ୱିକେଟରେ ଜିତିନେଇଥିଲା। ଏହି ମ୍ୟାଚ୍‌ରେ ଫର୍ମକୁ ଫେରିଥିଲେ ମହମ୍ମଦ୍‌ ସାମି। ସେ ୫ଟି ୱିକେଟ ନେବା ଯେତିକି ଗୁରୁତ୍ୱପୂର୍ଣ୍ଣ ନ ଥିଲା, ପୂରା ରିଦିମ୍‌ରେ ବୋଲିଂ କରି ସେ ପୂରା ଫିଟ୍‌ ବୋଲି ଦର୍ଶାଇଥିଲେ। ଏଣୁ ନବାଗତ ହର୍ଷିତ ରାଣାଙ୍କ ସହ ମିଶି ସେମାନେ ପେସ୍‌ ବୋଲିଂ ସମ୍ଭାଳିବେ ବୋଲି ଏହି ମ୍ୟାଚ୍‌ରୁ ସ୍ପଷ୍ଟ ହୋଇଛି।

ଅନ୍ୟପକ୍ଷରେ ମହମ୍ମଦ୍‌ ରିଜୱାନଙ୍କ ନେତୃତ୍ୱରେ ଗଠିତ ପାକିସ୍ତାନ ଦଳ ନିକଟରେ ଫର୍ମ କି ଆତ୍ମବିଶ୍ୱାସ ଥିଲାଭଳି ମନେହେଉନାହିଁ। ଘରୋଇ ମାଟିରେ ନ୍ୟୁଜିଲାଣ୍ଡ ନିକଟରୁ ଦୁଇଥର ହାରିବା ପରେ ଦଳର ଦକ୍ଷତା ଓ ବଡ଼ ମ୍ୟାଚ୍‌ ଖେଳିବା ନେଇ ପ୍ରଶ୍ନ ଉଠିଛି। ବିଶେଷ କରି ନ୍ୟୁଜିଲାଣ୍ଡ ବିପକ୍ଷରେ ୩୨୦ ରନ୍‌ର ଲକ୍ଷ୍ୟକୁ ପିଛା କରି ଦଳର ବ୍ୟାଟରମାନେ ଯେପରି ପ୍ରଦର୍ଶନ କଲେ, ତାହା ପର୍ଯ୍ୟାପ୍ତ ନ ଥିଲା। ଯାହା ଫଳରେ ଦଳ ୬୦ ରନ୍‌ରେ ପରାଜିତ ହୋଇଥିଲା। ଗୋଟିଏ ପଟେ ଫର୍ମ ଓ ଆତ୍ମବିଶ୍ୱାସର ଅଭାବ, ଭାରତ ଭଳି ପ୍ରତିଦ୍ୱନ୍ଦ୍ୱୀ ଓ ପ୍ରତିଯୋଗିତାରେ ତିଷ୍ଠି ରହିବାର ଆଶଙ୍କା ମଧ୍ୟରେ ପାକିସ୍ତାନ ଏହି ମ୍ୟାଚ୍‌ ଖେଳିବ। ଏଭଳି ସ୍ଥିତିରେ ପାକିସ୍ତାନ ପକ୍ଷରୁ କେହି ଜଣେ ବୀରତ୍ୱପୂର୍ଣ୍ଣ ଖେଳ ପ୍ରଦର୍ଶନ କଲେ ଆଶ୍ଚର୍ଯ୍ୟ ହେବାର କିଛି ନାହିଁ। ଭାରତ ବିପକ୍ଷରେ ମ୍ୟାଚ୍‌ ଜିତାଇବା ଅର୍ଥ ପାକିସ୍ତାନରେ ସବୁଦିନେ ଜଣେ ହିରୋର ମାନ୍ୟତା ପାଇବା। ଏହି ସୁଯୋଗକୁ କେହି ହାତଛଡ଼ା କରିବାକୁ ଚାହିଁବେ ନାହିଁ।

ସ୍ପିନରଙ୍କ ଭୂମିକା ଗୁରୁତ୍ୱପୂର୍ଣ୍ଣ

ଦୁବାଇର ଅନ୍ତର୍ଜାତୀୟ ଷ୍ଟାଡିୟମ୍‌ରେ ଉଭୟ ବୋଲର ଓ ବ୍ୟାଟର ସମାନ ପରିମାଣରେ ସହାୟତା ପାଇଥାନ୍ତି। ଏଣୁ ଯେଉଁ ଦଳ ସେମାନଙ୍କ ଖେଳରେ ଶୃଙ୍ଖଳା ପ୍ରଦର୍ଶନ କରିବେ ସେହିଦଳ ଏଠାରେ ଭଲ ଖେଳିବ। କିନ୍ତୁ ବୋଲିଂରେ ପେସରଙ୍କ ଅପେକ୍ଷା ସ୍ପିନରଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିବ।

ଏଠିକାର ପିଚ୍‌ ସର୍ବଦା ସ୍ପିନରଙ୍କୁ ସୁହାଇଥାଏ। ଏଥିରୁ ଫାଇଦା ଉଠାଇବା ଲାଗି କୁଲଦୀପ ଯାଦବ, ରବୀନ୍ଦ୍ର ଜାଡେଜା ଓ ଅକ୍ଷର ପଟେଲ ପ୍ରସ୍ତୁତ ଅଛନ୍ତି। ସେହିପରି ଭାରତୀୟଙ୍କୁ ରାସ୍ତାରୁ ହଟାଇବାକୁ ଆବ୍ରାର ଅହମ୍ମଦ୍‌ ଯୋଜନା କରିଛନ୍ତି। କମରାନ ଗୁଲାମ, ସଲମାନ ଅଲି ଆଘା ଓ ସାଉଦ୍‌ ସକିଲ କିଛି ସହାୟତା କରିପାରନ୍ତି। ପାକିସ୍ତାନ ସାହିନ୍‌ ଶାହ ଆଫ୍ରୀଦୀ, ନସୀମ ଶାହ, ଫହୀମ ଅଶ୍ରଫ, ହାରିସ ରୌଫ୍‌ଙ୍କ ଫାଷ୍ଟ ବୋଲିଂ ଉପରେ ନିର୍ଭର କରୁଛି। ନସୀମ ଶାହ ଭଲ ଫର୍ମରେ ଥିଲାବେଳେ ଆଫ୍ରିଦୀ ଭାରତ ବିପକ୍ଷ ମ୍ୟାଚ୍‌ରୁ ଫର୍ମକୁ ଫେରିବେ ବୋଲି ଆଶା ରଖିଛନ୍ତି।