ନୂଆଦିଲ୍ଲୀ: ନୂତନ ଆର୍ଥିକବର୍ଷ ଏପ୍ରିଲ ପହିଲାରୁ ଆରମ୍ଭ ହେଉଛି, ଯାହା ସାଧାରଣ ଲୋକଙ୍କ ପକେଟ୍‌ ଉପରେ ବଡ଼ ପ୍ରଭାବ ପକାଇବ। ଏଥର, ସରକାର ଟିକଟଠାରୁ ଟିକସ ପର୍ଯ୍ୟନ୍ତ ୧୦ଟି ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିବାକୁ ଯାଉଛନ୍ତି। ଏହି ସମୟରେ, ଏପ୍ରିଲ ପହିଲାରୁ କାର୍ଯ୍ୟକାରୀ ହେବାକୁ ଥିବା ବ୍ୟାଙ୍କିଙ୍ଗ ଏବଂ ରେଳବାଇର ନିୟମ ସାଧାରଣ ଲୋକଙ୍କ ଚିନ୍ତାକୁ ବଢ଼ାଇଦେଇଛି।  କରିଛି। ଟ୍ରେନ୍ ଟିକଟ୍ ବାତିଲ୍ ପାଇଁ ରିଫଣ୍ଡ ନିୟମ ଆହୁରି କଠୋର ହେବ ଏବଂ ଏଟିଏମ୍‌ରୁ ଟଙ୍କା ଉଠାଇବା ମଧ୍ୟ ମହଙ୍ଗା ହୋଇପାରେ। ପାନ୍ କାର୍ଡ ପାଇଁ କଠୋର ଡକ୍ୟୁମେଣ୍ଟେସନ୍ ଆବଶ୍ୟକତା ଏବଂ ରନ୍ଧନ ଗ୍ୟାସ୍ ମୂଲ୍ୟରେ ସମ୍ଭାବ୍ୟ ପରିବର୍ତ୍ତନ ସିଧାସଳଖ ଆପଣଙ୍କ ପରିବାରର ବଜେଟ ଉପରେ ପ୍ରଭାବ ପକାଇବ। 

ନୂଆ ଆୟକର ଆଇନ କାର୍ଯ୍ୟକାରୀ
ପୁରୁଣା ଆୟକର ଆଇନ ୧୯୬୧ ଏବେ ଇତିହାସ ହୋଇଯିବ। ନୂତନ ଆୟକର ଆଇନ  ଏପ୍ରିଲ ପହିଲାରୁ କାର୍ଯ୍ୟକାରୀ ହେବ। ପୂର୍ବରୁ ବ୍ୟବହୃତ ମୂଲ୍ୟାୟନ ବର୍ଷ ଏବଂ ପୂର୍ବ ବର୍ଷ ଶବ୍ଦଗୁଡ଼ିକ ବର୍ତ୍ତମାନ ଗୋଟିଏ ଟିକସ ବର୍ଷ ଦ୍ୱାରା ବଦଳାଯିବ। ଏହା ଟିକସ ଦାଖଲ ଏବଂ ବୁଝାମଣାକୁ ସରଳ କରିବ। ଆଇନରେ ଆହୁରି ଅନେକ ପରିବର୍ତ୍ତନ ମଧ୍ୟ କରାଯାଇଛି ଯାହା କରଦାତାଙ୍କ ପାଇଁ ସହଜ ହେବ।

ଅଧିକ ଟିକସ ରିଆତିର ଲାଭ
ନୂତନ ଟିକସ ବ୍ୟବସ୍ଥା ଅଧୀନରେ ବାର୍ଷିକ ୧୨ ଲକ୍ଷ ପର୍ଯ୍ୟନ୍ତ ଆୟ କରୁଥିବା ବ୍ୟକ୍ତିମାନେ ଏବେ ଶୂନ୍ ଟିକସ ଦେବେ। ଧାରା ୮୭ଏ ଅଧୀନରେ ରିଆତିରେ ବୃଦ୍ଧି କରାଯାଇଛି, ଯାହା ମଧ୍ୟବିତ୍ତ ବର୍ଗକୁ ଗୁରୁତ୍ୱପୂର୍ଣ୍ଣ ଆଶ୍ୱସ୍ତି ପ୍ରଦାନ କରିବ। ପୂର୍ବରୁ, ଏହି ସୀମା କମ୍ ଥିଲା, କିନ୍ତୁ ବର୍ତ୍ତମାନ ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଆୟ କରମୁକ୍ତ ହେବ। 

ଟିଡିଏସ୍‌ ଫର୍ମରେ ପରିବର୍ତ୍ତନ
ଏପ୍ରିଲରୁ ଫର୍ମ ୧୬ ଏବଂ ଫର୍ମ ୧୬ଏ ବନ୍ଦ ହୋଇଯିବ। ଫର୍ମ ୧୩୦ ଏବଂ ଫର୍ମ ୧୩୧ ସେଗୁଡ଼ିକ ସ୍ଥାନ ନେବ। ଫର୍ମ ୧୩୦ ବେତନଭୋଗୀଙ୍କ ଟିଡିଏସ୍‌ ପ୍ରମାଣପତ୍ର ପାଇଁ ହେବ, ଯେତେବେଳେ କି ଫର୍ମ ୧୩୧ ଅଣ-ବେତନପ୍ରାପ୍ତ ପେମେଣ୍ଟ ପାଇଁ ହେବ। ଅନୁପାଳନକୁ ସରଳ କରିବା ଏବଂ ଟିକସ ଦାଖଲରେ ସ୍ପଷ୍ଟତା ବଜାୟ ରଖିବା ପାଇଁ ଜାରି ସମୟସୀମାରେ ମଧ୍ୟ ପରିବର୍ତ୍ତନ କରାଯିବ।

ଏଲ୍‌ପିଜି ସିଲିଣ୍ଡର ମୂଲ୍ୟ ସଂଶୋଧନ
ଘରୋଇ ଏଲ୍‌ପିଜି ସିଲିଣ୍ଡର ମୂଲ୍ୟ ଏପ୍ରିଲ ପହିଲାରେ ସଂଶୋଧନ କରାଯାଇପାରେ। ଆମେରିକା, ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ବିଶ୍ୱସ୍ତରୀୟ ଆହ୍ବାନକୁ ବୃଦ୍ଧି କରିଛି, ଯାହା ଯୋଗାଣକୁ ପ୍ରଭାବିତ କରୁଛି। ଏହି ମୂଲ୍ୟ ପରିବର୍ତ୍ତନ ସାଧାରଣ ପରିବାରର ରୋଷେଇ ଘର ଖର୍ଚ୍ଚକୁ ପ୍ରଭାବିତ କରିବ।

ସିଏନ୍‌ଜି, ପିଏନ୍‌ଜି, ଏଟିଏଫ୍‌ ମୂଲ୍ୟରେ ପରିବର୍ତ୍ତନ
ସିଏନ୍‌ଜି, ପିଏନ୍‌ଜି ଏବଂ ବିମାନ ଟର୍ବାଇନ୍ ଇନ୍ଧନ (ଏଟିଏଫ୍‌) ମୂଲ୍ୟ ମଧ୍ୟ ସଂଶୋଧନ ହେବ। ଏହା ବିମାନ ଭଡ଼ା ବୃଦ୍ଧି କରିପାରେ ଏବଂ ଦୈନନ୍ଦିନ ପରିବହନକୁ ପ୍ରଭାବିତ କରିପାରେ। 

ଏଟିଏମ୍‌ ଉଠାଣ ଶୁଳ୍କ ବଢ଼ିବ
ନୂଆ ମାସରୁ  ଏଚ୍‌ଡିଏଫ୍‌ସି ବ୍ୟାଙ୍କରୁ ୟୁପିଆଇ ଏଟିଏମ୍ ଉଠାଣ ମାଗଣା ସୀମାରେ ଅନ୍ତର୍ଭୁକ୍ତ ହେବ। ଯଦି ଆପଣ ପ୍ରତି ମାସରେ ୫ଟି କାରବାର ଅତିକ୍ରମ କରନ୍ତି, ତେବେ ପ୍ରତ୍ୟେକ ପରବର୍ତ୍ତୀ କାରବାର ପାଇଁ ୨୩ ଟଙ୍କା ଶୁଳ୍କ ଲାଗୁ ହେବ। 

ପାନ୍‌ କାର୍ଡ ନିୟମ କଡ଼ାକଡ଼ି
ପ୍ୟାନ୍ କାର୍ଡ ତିଆରି କିମ୍ବା ଅପଡେଟ୍ କରିବା ପାଇଁ ନିୟମ ଏବେ କଡ଼ାକଡ଼ି ହେବ। ଆୟକର ବିଭାଗ ଆଉ ଜନ୍ମ ତାରିଖର ଏକମାତ୍ର ପ୍ରମାଣ ଭାବରେ ଆଧାରକୁ ଗ୍ରହଣ କରିବ ନାହିଁ। ପାନ୍‌ କାର୍ଡ କ୍ଷେତ୍ରରେ ଏଣିକି ୧୦ମ ଶ୍ରେଣୀ ପ୍ରମାଣପତ୍ର, ପାସପୋର୍ଟ, ଜନ୍ମ ପ୍ରମାଣପତ୍ର ଏବଂ ଭୋଟର ପରିଚୟପତ୍ର ଭଳି ଡକ୍ୟୁମେଣ୍ଟ ଆବଶ୍ୟକ ହେବ। 

ଟ୍ରେନ ଟିକଟ ବାତିଲ ନିୟମ କଡ଼ାକଡ଼ି
ରେଳବାଇ ଏବେ ଟ୍ରେନ ଛାଡିବାର ୮ ଘଣ୍ଟା ମଧ୍ୟରେ ଟିକଟ ବାତିଲ ପାଇଁ ଶୂନ୍ୟ ରିଫଣ୍ଡ ପ୍ରଦାନ କରିବ। ପୂର୍ବରୁ, ଏହି ସମୟ ସୀମା ୪ ଘଣ୍ଟା ଥିଲା। ଶେଷ ମୁହୂର୍ତ୍ତରେ ବାତିଲ କରିବା ଦ୍ୱାରା ଆଉ କୌଣସି ରିଫଣ୍ଡ ମିଳିବ ନାହିଁ, ଯାହା ଫଳରେ ଯାତ୍ରୀମାନଙ୍କୁ ପୂର୍ବରୁ ଯୋଜନା କରିବାକୁ ପଡିବ।

ନୂଆଦିଲ୍ଲୀ:ନୂତନ ଆର୍ଥିକ ବର୍ଷ ଏପ୍ରିଲ ପହିଲାରୁ କାର୍ଯ୍ୟକାରୀ ହେବାକୁ ଯାଉଥିବା ଅନେକ ପ୍ରମୁଖ ଆୟକର ଏବଂ ଆର୍ଥିକ ନିୟମାବଳୀ ସରକାର କେତେକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଘୋଷଣା କରିଛନ୍ତି। ୨୦୨୬ ବଜେଟରେ ପାନ୍‌ କାର୍ଡ ବ୍ୟବହାର, ନଗଦ କାରବାର, ପିଲାମାନଙ୍କ ଶିକ୍ଷା ପାଇଁ ଟିକସ ଛାଡ଼, ନିବେଶ-ସଂଯୁକ୍ତ ଟିକସ ଏବଂ ସେୟାର ବଜାର ନିୟମାବଳୀ ସମେତ ଅନେକ ପରିବର୍ତ୍ତନ ଘୋଷଣା କରାଯାଇଛି। ଏହି ପରିବର୍ତ୍ତନଗୁଡ଼ିକର ଲକ୍ଷ୍ୟ ହେଉଛି ଛୋଟ କାରବାରରେ ଜନସାଧାରଣଙ୍କୁ ଆଶ୍ୱସ୍ତି ପ୍ରଦାନ କରିବା ଏବଂ ବଡ଼ କାରବାର ଉପରେ ସରକାରୀ ତଦାରଖକୁ ସୁଦୃଢ଼ ​​କରିବା। 

ପାନ କାର୍ଡ ଝାମେଲା କମିବ
ଏଣିକି ଛୋଟ ଛୋଟ ଆର୍ଥିକ କାରବାର ପାଇଁ ପାନ କାର୍ଡ ଆବଶ୍ୟକ କରିବାର ଝାମେଲା ହ୍ରାସ ପାଇବ। ବର୍ଷସାରା ବ୍ୟାଙ୍କ କିମ୍ବା ଡାକ ଘରୁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ନଗଦ ଜମା କିମ୍ବା ଉଠାଣ ପାଇଁ ପାନ ପ୍ରଦାନ କରିବା ଆଉ ବାଧ୍ୟତାମୂଳକ ହେବ ନାହିଁ। ହୋଟେଲ, ରେସ୍ତୋରାଁ କିମ୍ବା କାର୍ଯ୍ୟକ୍ରମରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ବିଲ୍ ପାଇଁ ପାନ୍‌ ବିବରଣୀ ପ୍ରଦାନ କରିବା ଆଉ ଆବଶ୍ୟକ ହେବ ନାହିଁ। ୫ ଲକ୍ଷ ଟଙ୍କା ପର୍ଯ୍ୟନ୍ତ ମୂଲ୍ୟର ନୂତନ କାର କିମ୍ବା ମୋଟରସାଇକେଲ କ୍ରୟ ପାଇଁ ଆଉ ପାନ୍‌ ଦରକାର ହେବ ନାହିଁ। ସେହିପରି, ଘର କିମ୍ବା ଫ୍ଲାଟ କିଣିବା ସମୟରେ, ୨୦ ଲକ୍ଷ ଟଙ୍କା ପର୍ଯ୍ୟନ୍ତ କାରବାର ପାଇଁ ଆଉ ପାଡ଼୍‌ କାର୍ଡ ଆବଶ୍ୟକ ହେବ ନାହିଁ। ଏନ୍‌ଆର୍‌ଆଇଙ୍କଠାରୁ ସମ୍ପତ୍ତି କିଣିବାରେ ମଧ୍ୟ ପ୍ରକ୍ରିୟା ସରଳ କରିବାକୁ ଯାଇ ଟାନ୍‌ ବଦଳରେ ପାନ୍‌ ବ୍ୟବହାର କରାଯିବ।

ବୀମା ଏବଂ କ୍ଷତିପୂରଣ ନିୟମ
ବୀମା କ୍ଷେତ୍ରରେ ପ୍ରତ୍ୟେକ ପଲିସି କ୍ରୟ ପାଇଁ ଏବେ ପାନ୍‌ ପ୍ରଦାନ କରିବା ବାଧ୍ୟତାମୂଳକ ହେବ। ଆହୁରିମଧ୍ୟ ମୋଟର ଦୁର୍ଘଟଣା କ୍ଲେମ୍‌ ଉପରେ ସୁଧ ଏବେ କରମୁକ୍ତ ହେବ ଏବଂ ସେଥ଄ରୁ ଟିଡିଏସ୍‌ କଟାଯିବନାହିଁ। ଏହା ଦୁର୍ଘଟଣା ପୀଡିତଙ୍କ ପାଇଁ ସମ୍ପୂର୍ଣ୍ଣ କ୍ଷତିପୂରଣ ସୁନିଶ୍ଚିତ କରିବ ଏବଂ ପ୍ରଶାସନିକ କାର୍ଯ୍ୟକୁ ସରଳ କରିବ।

ଶିଶୁ ଶିକ୍ଷା ଉପରେ ବର୍ଦ୍ଧିତ ଟିକସ କାଟ 
ପୂର୍ବରୁ, ପିଲାମାନଙ୍କ ଶିକ୍ଷା ଭତ୍ତା ଉପରେ ଟିକସ ଛାଡ ପ୍ରତି ମାସରେ କେବଳ ୧୦୦ ଟଙ୍କା ଥିଲା, କିନ୍ତୁ ଏବେ ପ୍ରତି ପିଲା ପାଇଁ ଏହାକୁ ପ୍ରତି ମାସରେ  ୩୦୦୦ ଟଙ୍କାକୁ ବୃଦ୍ଧି କରାଯାଇଛି। ପୂର୍ବରୁ ୩୦୦ ଟଙ୍କା ଥିବା ହଷ୍ଟେଲ ଭତ୍ତା ଛାଡକୁ ଏବେ ପ୍ରତି ପିଲା ପାଇଁ ପ୍ରତି ମାସରେ  ୯୦୦୦ ଟଙ୍କା କୁ ବୃଦ୍ଧି କରାଯାଇଛି। ଏହା ସାଧାରଣ ପରିବାରକୁ ପିଲାମାନଙ୍କ ଶିକ୍ଷା ଏବଂ ହଷ୍ଟେଲ ଖର୍ଚ୍ଚ ଉପରେ ଯଥେଷ୍ଟ ଆଶ୍ୱସ୍ତି ପ୍ରଦାନ କରିବ।

ସେୟାର ବଜାର ନିୟମରେ ପରିବର୍ତ୍ତନ
ସେୟାର ବାଇବ୍ୟାକ୍‌ରୁ ପ୍ରାପ୍ତ ଆୟକୁ ଏବେ ପୁଞ୍ଜି ଲାଭ ଭାବରେ କର ଦିଆଯିବ। ଫ୍ୟୁଚର୍ସ ଟ୍ରେଡିଂ ଉପରେ ଏସ୍‌ଟିଟି ୦.୦୫% ଏବଂ ଅପ୍ସନ ପ୍ରିମିୟମ ଉପରେ ୦.୧୫% କୁ ବୃଦ୍ଧି କରାଯାଇଛି, ଯାହା ଦ୍ବାରା ଟ୍ରେଡିଂ ଖର୍ଚ୍ଚ ବୃଦ୍ଧି ପାଇଛି। ଅଡିଟ୍ ହୋଇନଥିବା ବ୍ୟବସାୟ ଏବଂ ବୃତ୍ତିଗତଙ୍କ ପାଇଁ ଆଇଟିଆର୍‌ ଫାଇଲ କରିବାର ଶେଷ ତାରିଖ ଅଗଷ୍ଟ ୩୧ ପର୍ଯ୍ୟନ୍ତ ବୃଦ୍ଧି କରାଯାଇଛି। ତଥାପି, ସାଧାରଣ ବେତନଭୋଗୀ ବ୍ୟକ୍ତି ଏବଂ ଆଇଟିଆର୍‌-୧/୨  ଫାଇଲ କରୁଥିବା ବ୍ୟକ୍ତିମାନଙ୍କୁ ଜୁଲାଇ ୩୧ ସୁଦ୍ଧା ଟିକସ ରିଟର୍ଣ୍ଣ ଫାଇଲ କରିବାକୁ ପଡିବ।

ନୂଆଦିଲ୍ଲୀ: ଡିସେମ୍ବର ମାସ ଶେଷ ହେବାକୁ ଯାଉଛି ଏବଂ ନୂଆ ବର୍ଷ ଆସିବାକୁ ଆଉ ମାତ୍ର କିଛି ଦିନ ବାକି ଅଛି। ନୂଆ ବର୍ଷର ଆଗମନ ସହିତ ଅନେକ ଗୁରୁତ୍ୱପୂର୍ଣ୍ଣ ନିୟମରେ ମଧ୍ୟ ପରିବର୍ତ୍ତନ ଦେଖିବାକୁ ମିଳିବ, ଯାହାର ସିଧାସଳଖ ପ୍ରଭାବ ସାଧାରଣ ଲୋକଙ୍କ ପକେଟ୍ ଉପରେ ପଡ଼ିବ। ବ୍ୟାଙ୍କିଙ୍ଗ୍ ନିୟମଠାରୁ ଆରମ୍ଭ କରି ଟିକସ, ୟୁପିଆଇ ଏବଂ ଡିଜିଟାଲ୍ ପେମେଣ୍ଟ ପର୍ଯ୍ୟନ୍ତ ଅନେକ କ୍ଷେତ୍ରରେ ପରିବର୍ତ୍ତନ ହେବାର ସମ୍ଭାବନା ରହିଛି। ଚାଷୀ, ଯୁବବର୍ଗ, ସରକାରୀ କର୍ମଚାରୀ ଏବଂ ମଧ୍ୟବିତ୍ତ ପରିବାର ଉପରେ ଏହାର ପ୍ରଭାବ ଦେଖିବାକୁ ମିଳିବ। ତେବେ ଆସନ୍ତୁ ଜାଣିବା ନୂଆ ବର୍ଷ ଆରମ୍ଭ ସହିତ କେଉଁ ସବୁ ନିୟମ ବଦଳିବାକୁ ଯାଉଛି।

ରାସନ କାର୍ଡ ନିୟମ

ସର୍ବପ୍ରଥମେ ରାସନ କାର୍ଡ ସହ ଜଡିତ ବଡ଼ ନିୟମ ବିଷୟରେ ଜାଣିବା ଜରୁରୀ। ୨୦୨୬ ନିୟମ ଅନୁଯାୟୀ, ରାସନ କାର୍ଡ ପାଇଁ ଏକ ଅନଲାଇନ୍ ଆବେଦନ ବ୍ୟବସ୍ଥା ଆରମ୍ଭ ହୋଇଛି। ଏହାଦ୍ୱାରା ଚାଷୀ ଏବଂ ଗ୍ରାମାଞ୍ଚଳର ଲୋକମାନଙ୍କୁ ଆଶ୍ୱସ୍ତି ମିଳିବ ଏବଂ ସେମାନେ ସହଜରେ କାର୍ଡ ପାଇଁ ଆବେଦନ କରିପାରିବେ।

 ଚାଷୀଙ୍କ ପାଇଁ ନୂଆ ଅପଡେଟ୍

ପିଏମ କିଷାନ ଯୋଜନାରେ ମଧ୍ୟ କିଛି ପରିବର୍ତ୍ତନ ହେବାକୁ ଯାଉଛି। ଉତ୍ତରପ୍ରଦେଶ ସମେତ ଅନେକ ରାଜ୍ୟରେ 'ଫାର୍ମର ଆଇଡି' ବା କୃଷକ ପରିଚୟ ପତ୍ର ବାଧ୍ୟତାମୂଳକ କରାଯାଉଛି। ବିନା କୃଷକ ଆଇଡିରେ ପିଏମ କିଷାନର କିସ୍ତି ଅଟକି ଯାଇପାରେ। ଏହା ବ୍ୟତୀତ, ପିଏମଏଫବିୱାଇ (PMFBY) ଅର୍ଥାତ୍ ଫସଲ ବୀମା ଯୋଜନାରେ ବନ୍ୟଜନ୍ତୁଙ୍କ ଦ୍ୱାରା ଫସଲ ନଷ୍ଟ ହେଲେ ମଧ୍ୟ ଏବେ ବୀମା କଭର ମିଳିବ। ତେବେ କ୍ଷତି ହେବାର ୭୨ ଘଣ୍ଟା ମଧ୍ୟରେ ଏହାର ରିପୋର୍ଟ କରିବା ଜରୁରୀ ହେବ।

 ବ୍ୟାଙ୍କିଙ୍ଗ୍ ଓ ଆୟକର ନିୟମ

ବ୍ୟାଙ୍କିଙ୍ଗ୍ ଏବଂ ଟ୍ୟାକ୍ସ ନିୟମରେ ମଧ୍ୟ ପରିବର୍ତ୍ତନ ହେବାର ସମ୍ଭାବନା ରହିଛି। ଜାନୁଆରୀରୁ ଆୟକର ରିଟର୍ଣ୍ଣ (ITR) ଫର୍ମରେ ପରିବର୍ତ୍ତନ କରାଯାଇପାରେ, ଯେଉଁଥିରେ ଅଧିକ ଡାଟା ଭିତ୍ତିକ ରିପୋର୍ଟିଂ ରହିବ। ସେହିପରି ଏପ୍ରିଲରୁ କ୍ରେଡିଟ୍ ସ୍କୋର ଅପଡେଟ୍ ନିୟମ ବଦଳିବ। ପୂର୍ବରୁ କ୍ରେଡିଟ୍ ସ୍କୋର ଅପଡେଟ୍ ହେବାକୁ ୧୫ ଦିନ ଲାଗୁଥିବା ବେଳେ ଏବେ ତାହା ମାତ୍ର ୭ ଦିନ ମଧ୍ୟରେ ଅପଡେଟ୍ ହେବ। ଏହାଛଡା ଏସବିଆଇ ଭଳି ବ୍ୟାଙ୍କଗୁଡିକ ଲୋନ୍ ସୁଧ ହାର ଏବଂ ଏଫଡି ଦରରେ ଯେଉଁ ପରିବର୍ତ୍ତନ କରିଛନ୍ତି, ତାହାର ପ୍ରଭାବ ନୂଆ ବର୍ଷରେ ଦେଖିବାକୁ ମିଳିବ।

 ଏଲପିଜି ଦରରେ ପରିବର୍ତ୍ତନ

ତୈଳ ବିପଣନ କମ୍ପାନୀଗୁଡିକ ପ୍ରତି ମାସର ପ୍ରଥମ ତାରିଖରେ ଏଲପିଜି ଗ୍ୟାସ ସିଲିଣ୍ଡର ଏବଂ ବିମାନ ଇନ୍ଧନ (ATF) ଦର ସଂଶୋଧନ କରନ୍ତି। ଡିସେମ୍ବର ମାସରେ ସରକାର କମର୍ସିଆଲ ସିଲିଣ୍ଡର ଦରରେ ୧୦ ଟଙ୍କା ହ୍ରାସ କରିଥିଲେ। ତେଣୁ ନୂଆ ବର୍ଷରେ ଘରୋଇ ଗ୍ୟାସ ସିଲିଣ୍ଡର ଦରରେ କିଛି ଆଶ୍ୱସ୍ତି ମିଳିବାର ଆଶା କରାଯାଉଛି।

ନୂଆଦିଲ୍ଲୀ: କେନ୍ଦ୍ର ସରକାର ଚଳିତମାସରେ ଲୋକସଭାରେ ନୂତନ ଆୟକର ବିଲ୍ ୨୦୨୫କୁ ଅନୁମୋଦନ ଦେଇଛନ୍ତି। ଏହା ପୂର୍ବରୁ ସରକାର ସଂସଦରେ ଉପସ୍ଥାପିତ ଏହି ବିଲ୍‌ର ପୁରୁଣା ଚିଠାକୁ ପ୍ରତ୍ୟାହାର କରିନେଇଥିଲେ, ଯାହାଦ୍ୱାରା ଲୋକସଭାର ସିଲେକ୍ଟ କମିଟିର ସୁପାରିସଗୁଡ଼ିକୁ ଏଥିରେ ଅନ୍ତର୍ଭୁକ୍ତ କରାଯାଇପାରିବ। ଏହା ସେହି ବିଲ୍ ଯାହାକୁ ଅର୍ଥମନ୍ତ୍ରୀ ନିର୍ମଳା ସୀତାରମଣ ଫେବୃଆରୀରେ ବଜେଟ ଅଧିବେଶନ ସମୟରେ ଆଗତ କରିଥିଲେ। ପରେ ଏହାକୁ ତୁରନ୍ତ ସିଲେକ୍ଟ କମିଟି ନିକଟକୁ ପଠାଯାଇଥିଲା। ବିରୋଧୀଙ୍କ ପ୍ରବଳ ବିରୋଧ ମଧ୍ୟରେ ନୂତନ ଆୟକର ବିଲ୍ କୌଣସି ବିତର୍କ ବିନା ସଂସଦରେ ବାଚନିକ ଭୋଟ୍‌ରେ ଅନୁମୋଦନ ଲାଗ କରିଥିଲା। ସଂଶୋଧିତ ଆୟକର ବିଲ୍‌ରେ ସିଲେକ୍ଟ କମିଟିର ପ୍ରାୟ ସମସ୍ତ ସୁପାରିସକୁ ଅନ୍ତର୍ଭୁକ୍ତ କରାଯାଇଛି। ଏହି ବିଲ୍ ଆୟକର ଆଇନ ୧୯୬୧ର ସ୍ଥାନ ନେବ। ତେବେ ଏହି ବିଲ୍‌ରେ ଥିବା କେତେକ ଗୁରୁତ୍ବପୂର୍ଣ୍ଣ ଜିନିଷ ଯାହା ମଧ୍ୟବିତ୍ତ ଏବଂ ବର୍ଗ ପାଇଁ ବେଶ ଉପଯୋଗୀ।
ଆଇଟିଆର୍‌ ଫାଇଲ୍‌ କରିବା ସମୟରେ ମୂଲ୍ୟାୟନ ବର୍ଷର ଦ୍ୱନ୍ଦ୍ୱ ଶେଷ ହେବନୂତନ ଆୟକର ବିଲ୍ ୨୦୨୫ରେ, ମୂଲ୍ୟାୟନ ବର୍ଷକୁ ଟିକସ ‘ବର୍ଷ’ ସହିତ ବଦଳାଯାଇଛି। ବିଲ୍‌ର ପୃଷ୍ଠା ୮୨୩ରୁ ୬୨୨କୁ ହ୍ରାସ କରାଯାଇ ଏହାକୁ ସରଳ କରାଯାଇଛି। ପୁରୁଣା ଆଇନରେ ୫.୧୨ ଲକ୍ଷ ଶବ୍ଦ ଏବଂ ୮୧୯ ଧାରା ଥିଲା।

ବିଳମ୍ବରେ ଆଇଟିଆର୍‌ ଦାଖଲ କଲେ ଜରିମାନା ସହିତ ରିଫଣ୍ଡ ପାଇପାରିବେ
୧୯୬୧ର ଆୟକର ଆଇନ ଅନୁଯାୟୀ, ଯଦି ନିର୍ଦ୍ଧାରିତ ସମୟ ପରେ ଆଇଟିଆର୍‌ ଦାଖଲ କରାଯାଇଥିଲା, ତେବେ କୌଣସି ରିଫଣ୍ଡ ନ ଥିଲା, କିନ୍ତୁ ନୂତନ ବିଲ୍‌ରେ ବିଳମ୍ବରେ ଆଇଟିଆର୍‌ ଦାଖଲ କରିବା ପରେ ଜରିମାନା ଦେବା ସହିତ ରିଫଣ୍ଡ ମଧ୍ୟ ଦାବି କରାଯାଇପାରିବ।

ଘର ସମ୍ପତ୍ତିରୁ ଆୟ ଉପରେ କାଟ
ନୂତନ ଆୟକର ବିଲ୍ ୨୦୨୫ରେ, ଘର ସମ୍ପତ୍ତିରୁ ଆୟ ଉପରେ ୩୦% ମାନକ ଡିଡକ୍ସନ ଏବଂ ଭଡା ସମ୍ପତ୍ତି ଉପରେ ସୁଧ ଡିଡକ୍ସନକୁ ମଞ୍ଜୁର କରାଯାଇଛି। ନୂତନ ବିଲ୍ ଅନୁଯାୟୀ, ଏବେ ଅଣ-କର୍ମଚାରୀମାନେ ମଧ୍ୟ ପରିବର୍ତ୍ତନିତ ପେନସନ ଉପରେ ଟିକସ ଛାଡ଼ର ଲାଭ ପାଇବେ।

୧୨.୭୫ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଟିକସମୁକ୍ତ
ନୂତନ ଆୟକର ବିଲ୍ ଅନୁଯାୟୀ, ନୂତନ ଟିକସ ବ୍ୟବସ୍ଥାରେ ଷ୍ଟାଣ୍ଡାର୍ଡ ଡିଡକ୍ସନ ୫୦ ହଜାର ଟଙ୍କାରୁ ୭୫ ହଜାର ଟଙ୍କାକୁ ବୃଦ୍ଧି ବ୍ୟବସ୍ଥା ରହିଛି। ଏହି ଅନୁଯାୟୀ, ବେତନଭୋଗୀ ବର୍ଗ ୧୨.୭୫ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ କୌଣସି ଟିକସ ଦେବେ ନାହିଁ। କିନ୍ତୁ ଆୟକର ଆଇନର ଚିଠାରେ ଏକ ଭୁଲ ଯୋଗୁଁ, ଏହି ବର୍ଦ୍ଧିତ ଡିଡକ୍ସନ କାର୍ଯ୍ୟକାରୀ ହେଉ ନ ଥିଲା। ଏବେ ସରକାର ଏହି ଭୁଲ ସଂଶୋଧନ କରିଛନ୍ତି, ଯାହା ଲକ୍ଷ ଲକ୍ଷ କରଦାତାଙ୍କୁ ବଡ଼ ଆଶ୍ୱସ୍ତି ପ୍ରଦାନ କରିବ।

କରଦାତା ଆଗୁଆ ନିଲ-ଟିଡିଏସ୍ ପ୍ରମାଣପତ୍ର ପାଇବେ
ଯେଉଁମାନଙ୍କର କୌଣସି ଟିକସ ଦାୟିତ୍ବ ନାହିଁ ସେମାନେ ଏବେ ଆଗୁଆ ନିଲ-ଟିଡିଏସ୍ ପ୍ରମାଣପତ୍ର ନେଇପାରିବେ। ଏହି ସୁବିଧା ଭାରତୀୟ ଏବଂ ଅଣ-ଆବାସୀ କରଦାତା ଉଭୟଙ୍କ ପାଇଁ ପ୍ରଯୁଜ୍ୟ ହେବ। ଏହା ଟିଡିଏସ୍‌ ସମ୍ବନ୍ଧୀୟ ଅନାବଶ୍ୟକ ଡିଡକ୍ସନ ଏବଂ ଗଣନାକୁ ଏଡାଇବ।

ଖାଲି ଘର ଉପରେ ଟିକସ ହଟାଇ ଦିଆଯାଇଛି
ପୁରୁଣା ଆଇନ ଅନୁଯାୟୀ, ଖାଲି ଘର ଉପରେ ଧାରଣାଗତ ଭଡ଼ା ଉପରେ ଟିକସ ଥିଲା। ଯାହାକୁ ନୂତନ ବିଲରେ ହଟାଇ ଦିଆଯାଇଛି। ଏହା ସେମାନଙ୍କୁ ଆଶ୍ୱସ୍ତି ଦେବ ଯେଉଁମାନଙ୍କର ଭଡା ନିଆଯାଇ ନ ଥିବା ସମ୍ପତ୍ତି ରହିଛି।

ନୂଆଦିଲ୍ଲୀ: ଆୟକରଦାତାଙ୍କ ବ୍ୟକ୍ତିଗତ ତଥ୍ୟ ଆଉ ସୁରକ୍ଷିତ ରହିବ ନାହିଁ। ଆୟକର ଅଧିକାରୀ ଚାହିଁଲେ ସାମାଜିକ ଗଣମାଧ୍ୟମ ଆକାଉଣ୍ଟ, ବ୍ୟକ୍ତିଗତ ଇମେଲ୍‌, ବ୍ୟାଙ୍କ ଆକାଉଣ୍ଟ, ଅନଲାଇନ୍ ଇନଭେଷ୍ଟମେଣ୍ଟ ଆକାଉଣ୍ଟ୍‌ସ ଏବଂ ଏପରିକି ଟ୍ରେଡିଂ ଆକାଉଣ୍ଟ୍‌ସ ମଧ୍ୟ ଦେଖିପାରିବେ। ଏଥିପାଇଁ କୌଣସି ସୂଚନା ବା ଅଭିଯୋଗର ଆବଶ୍ୟକତା ନାହିଁ; କେବଳ ସନ୍ଦେହ ହେଲେ ଯଥେଷ୍ଟ। ଗତମାସ ଲୋକସଭାରେ ସରକାର ଆଗତ କରିଥିବା ଆୟକର ବିଲ୍‌ରେ ଏଭଳି ବ୍ୟବସ୍ଥା ରହିଛି।

ଆୟକର ଅଧିକାରୀ ଚାହିଁଲେ ଆୟକରଦାତାଙ୍କ ଘର କବାଟ ଭାଙ୍ଗି ପଶିପାରିବେ। ସେମାନେ ବାକ୍ସ, ଲକର, ସେଫ୍‌ ଓ ଆଲମିରା ମଧ୍ୟ ଭାଙ୍ଗିପାରିବେ। ଲୋକସଭାରେ ଆଗତ ଆୟକର ବିଲର ୨୪୭ ଧାରାରେ ଆୟକର ଅଧିକାରୀମାନଙ୍କୁ ଏଭଳି ଅଖଣ୍ଡ କ୍ଷମତା ଦିଆଯାଇଛି। କେବଳ ସନ୍ଦେହ ହେଲେ ସେମାନେ ଯେକୌଣସି ସ୍ଥାନ ହେଉ କି ଘର ସେଠାରେ ପଶି ଛାନଭିନ୍ କରିପାରିବେ। କଂପ୍ୟୁଟର/ଲ୍ୟାପଟପ୍ ଖୋଲି ଛାନଭିନ୍ କରିପାରିବେ। ଜଣେ ବ୍ୟକ୍ତି କାହା ସହିତ ବ୍ୟକ୍ତିଗତ କଥା ହୋଇଥିଲେ, ସେସଂକ୍ରାନ୍ତ ତଥ୍ୟ ମଧ୍ୟ ଅଧିକାରୀ ହାସଲ କରିପାରିବେ। ଆୟକର ଦାଖଲର ସରଳୀକରଣ ନାମରେ ନୂଆ ବିଲ୍‌ରେ କରାଯାଇଥିବା ଏହିସବୁ ବ୍ୟବସ୍ଥା ନେଇ ଘୋର ଆପତ୍ତି ଜଣାଇଛନ୍ତି ବିଭିନ୍ନ ରାଜନୈତିକ ଦଳ ଓ ସାମାଜିକ ସଂଗଠନ। ଏହାକୁ ତୁରନ୍ତ ପ୍ରତ୍ୟାହାର କରିବାକୁ ସେମାନେ ଦାବି କରିଛନ୍ତି। ଏହାକୁ ଦୃଢ଼ ବିରୋଧ କରିଛି କଂଗ୍ରେସ। ପାର୍ଟି ପକ୍ଷରୁ କୁହାଯାଇଛି ଯେ ଏନ୍‌ଡିଏ ସରକାର ପ୍ରଥମେ ପେଗାସସ୍ ଜରିଆରେ ଆମ ଉପରେ ଗୁଇନ୍ଦା ନଜର ରଖିଲେ, ଏବେ ସେମାନେ ଆମର ବ୍ୟକ୍ତିଗତ ଅଧିକାରକୁ ମଧ୍ୟ ନେଇଯିବାକୁ ବସିଲେଣି। ଆମର ଡିଜିଟାଲ ଜୀବନ ମଧ୍ୟ ଆଉ ସୁରକ୍ଷତ ନୁହେଁ। ଚଢ଼ଉ କି ଖାନତଲାସି ପାଇଁ କୌଣସି ନୋଟିସ ବା ୱାରାଣ୍ଟ ଦରକାର ନାହିଁ। ଆପଣ ଟିକସ ଫାଙ୍କୁଛନ୍ତି ବୋଲି ଆୟକର ଅଧିକାରୀ କେବଳ ସନ୍ଦେହ ଆଧାରରେ ଆପଣଙ୍କର ବ୍ୟକ୍ତିଗତ ଅଧିକାରକୁ ଛଡ଼ାଇନେବେ। ଏହାର ସମସ୍ତେ ବିରୋଧ କରିବା ଉଚିତ। ଅନେକ ସଂଗଠନ କହିଛନ୍ତି ଯେ ଏହି ବିଲ୍ ଗୋପନୀୟତା ରକ୍ଷା ପାଇଁ ସମ୍ବିଧାନ ଦେଇଥିବା ମୌଳିକ ଅଧିକାରର ଏହା ଉଲ୍ଳଂଘନ କରୁଛି।
ସୂଚନାଯୋଗ୍ୟ ଯେ ଏହି ବିଲ ଆଗତ ହେବାପରେ ଲୋକସଭା ବାଚସ୍ପତି ଏହା ଉପରେ ଅଧିକ ଆଲୋଚନା ପାଇଁ ୩୧ ଜଣିଆ ସିଲେକ୍ଟ କମିଟିକୁ ପଠାଇଛନ୍ତି।

ପାଟନା: ଟିକସ ବିଭାଗର ଅଜ୍ଞତା ପାଇଁ ଦୈନିକ ମାତ୍ର ୫୦୦ ଟଙ୍କା ଆୟକାରୀଙ୍କୁ ଲକ୍ଷାଧିକ ଟଙ୍କାର ଟିକସ ନୋଟିସ୍‌ ମିଳିଛି। ବିହାରର ଖାଗରିଆରେ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ଏଠାରେ ଆଲାଉଲି ବ୍ଲକର ମାଗୁନା ଗ୍ରାମରେ ରହୁଥିବା ଜଣେ ଶ୍ରମିକଙ୍କୁ ଆୟକର ବିଭାଗ ପକ୍ଷରୁ ନୋଟିସ ମିଳିଛି। ଆୟକର ବିଭାଗ ଏକ ବିଜ୍ଞପ୍ତି ଜାରି କରି ଶ୍ରମିକଙ୍କୁ ୩୭.୫୦ ଲକ୍ଷ ଟଙ୍କା ବକେୟା ଦେବାକୁ ନିର୍ଦ୍ଦେଶ ଦେଇଛି। ଏଥିସହିତ ନୋଟିସ ପାଇବା ପରେ ଶ୍ରମିକଙ୍କ ସମେତ ତାଙ୍କ ପରିବାର ସଦସ୍ୟ ସମସ୍ତେ ଚକିତ ହୋଇଯାଇଛନ୍ତି। ଶ୍ରମିକ ଜଣକ କହିଛନ୍ତି ଯେ ଦିନସାରା କାମ କରିବା ପରେ ତାଙ୍କୁ ଦୈନିକ ୫୦୦ ଟଙ୍କା ମଜୁରୀ ମିଳିଥାଏ, ତେଣୁ ସେ ଏହି ସମସ୍ୟାର କିପରି ମୁକାବିଲା କରିବେ। ଏବେ ସେ ସ୍ଥାନୀୟ ପୁଲିସ ଥାନାନରେ ନ୍ୟାୟ ପାଇଁ ଆବେଦନ କରିଛନ୍ତି।

ବିଜ୍ଞପ୍ତି ଅନୁଯାୟୀ ଶ୍ରମିକଙ୍କ ନାମରେ ୩୭.୫୦ ଲକ୍ଷ ଟଙ୍କାର ଟିକସ ବକେୟା ରହିଛି। ରାଜସ୍ଥାନର ପାଲିରେ ତାଙ୍କ ନାମରେ ଏକ କମ୍ପାନୀ ପଞ୍ଜିକୃତ ହୋଇଛି। ତାଙ୍କ ନାମରେ ଦିଆଯାଇଥିବା ପ୍ୟାନ ନମ୍ବର ବିରୋଧରେ ଅଭିଯୋଗକାରୀ ଏକ ନୋଟିସ ପାଇଛନ୍ତି। ଏଥିସହିତ ଗିରିଶ କହିଛନ୍ତି ଯେ ସେ କେବେ ରାଜସ୍ଥାନ ଯାଇନାହାଁନ୍ତି।

ପୁଲିସ କହିବାନୁଯାୟୀ, ଅଭିଯୋଗ ଆଧାରରେ ଆମେ ଏକ ମାମଲା ରୁଜୁ କରିଛୁ। ଏହି ଘଟଣାରେ ତଦନ୍ତ ଆରମ୍ଭ ହୋଇଛି, ଖୁବ୍ ଶୀଘ୍ର ପୁରା ଘଟଣା ଜଣାପଡିବ। ଶ୍ରମିକ ଜଣକ କହିଛନ୍ତି ଯେ ସେ ଦିଲ୍ଲୀର ଲୋକମାନଙ୍କ ଘରେ କାମ କରନ୍ତି। ଏଥିସହ ସେ ଥରେ ଦଲାଲଙ୍କ ମାଧ୍ୟମରେ ପ୍ୟାନ କାର୍ଡ ପାଇବାକୁ ଚେଷ୍ଟା କରିଥିଲେ, ଯାହା ସେ ଆଉ ପାଇଲେନାହିଁ।

ନୂଆଦିଲ୍ଲୀ: ପାଖେଇ ଆସିଲାଣି ରିଟର୍ଣ୍ଣ ଦାଖଲ ସମୟସୀମା। ଜୁଲାଇ ୩୧କୁ ଏଥିପାର୍ଇ ଶେଷ ସମୟସୀମା ରଖାଯାିଛି। ଅପରପକ୍ଷେ ଦେଶର ୪୧ ପ୍ରତିଶତ ଟିକସଦାତା ଏ ପର୍ଯ୍ୟନ୍ତ ସେମାନଙ୍କ ଆୟକର ରିଟର୍ଣ୍ଣ ଦାଖଲ କରିନାହାଁନ୍ତି । ଏହାର ମୁଖ୍ୟ କାରଣ ହେଉଛି ଆୟକର ରିଟର୍ଣ୍ଣ ଦାଖଲରେ ସମସ୍ୟା। ଏଥରମଧ୍ୟ ଆୟକର ପୋର୍ଟାଲ୍‌ରେ ବୈଷୟିକ ତ୍ରୁଟି ଦେଖାଦେଇଛି। ଏଥିଯୋଗୁ ୪୧% କରଦାତା ଏଯାଏ ରିଟର୍ଣ୍ଣ ଦାଖଲ କରିପାରିନାହାଁନ୍ତି ବୋଲି ଲୋକାଲ୍‌ ସର୍କଲ୍‌ ସର୍ଭେରେ କୁହାଯାଇଛି। ଏହାକୁ ନେଇ କରଦାତାଙ୍କ ମଧ୍ୟରେ ଘୋର ଅସନ୍ତୋଷ ଦେଖିବାକୁ ମିଳିଛି। ଅପରପକ୍ଷେ ପୂର୍ବବର୍ଷଗୁଡିକ ଭଳି ଏଥର ଆଉ ରିଟର୍ଣ୍ଣ ଦାଖଲ ସମୟସୀମାରେ ବୃଦ୍ଧି କରାଯିବନାହିଁ ବୋଲି କେନ୍ଦ୍ର ସରକାର ପୂର୍ବରୁ ଚେତାଇ ଦେଇଛନ୍ତି। ଫଳରେ ଏହି ଶେଷ ସମୟରେ କିଭଳି ରିଟର୍ଣ୍ଣ ଦାଖଲ କରିବେ ସେ ନେଇ କରଦାତଦାମାନେ ବେଶ ଚିନ୍ତାରେ।

ସଦ୍ୟତମ ସର୍ଭେ ଅନୁଯାୟୀ ଦେଶରେ ଏବେ ଅତି କମ୍‌ରେ ୪୧ ପ୍ରତିଶତ ଟିକସଦାତା ସେମାନଙ୍କ ରିଟର୍ଣ୍ଣ ଦାଖଲ କରିବାକୁ ଅପେକ୍ଷା କରିଛନ୍ତି। ଏଥିରେ ୧୦ ପ୍ରତିଶତ ରିଟର୍ଣ୍ଣ ଦାଖଲ କରିବାକୁ ଚେଷ୍ଟା କରିଛନ୍ତି କିନ୍ତୁ ସେମାନେ ଏଥିରେ ବୈଷୟିକ ତ୍ରୁଟିର ସମ୍ମୁଖୀନ ହୋଇଛନ୍ତି। ୨୦୨୧-୨୨ ଆର୍ଥିକବର୍ଷ ପାଇଁ ଆୟକର ରିଟର୍ଣ୍ଣ (ଆଇଟିଆର୍‌) ଦାଖଲ କରିବାର ଶେଷ ତାରିଖ ଚଳିତମାସ ୩୧ ରହିଛି। ସର୍ଭେରେ ଦେଶର ୩୦୬ ଟି ଜିଲ୍ଲାର ନାଗରିକଙ୍କଠାରୁ ୧୧,୦୦୦ରୁ ଅଧିକ ପ୍ରତିକ୍ରିୟା ଗ୍ରହଣ କରାଯାଇଥିଲା। ସେଥିରୁ ୬୯ ପ୍ରତିଶତ ପୁରୁଷ ଥିବାବେଳେ ୩୧ ପ୍ରତିଶତ ମହିଳା ଥିଲେ। ୫୯ ପ୍ରତିଶତ ମତଦାତା କହିଥିଲେ ଯେ ସେମାନେ ରିଟର୍ଣ୍ଣ ଦାଖଲ କରିସାରିଛନ୍ତି। ତେବେ ଜୁଲାଇ ୨୦ ରେ ଅର୍ଥାତ୍‌ ଏକ ସପ୍ତାହ ପୂର୍ବରୁ ହୋଇଥିବା ସର୍ଭେ ଫଳାଫଳରେ ଯଥେଷ୍ଟ ଉନ୍ନତି ଘଟିଛି। ଏହାପୂର୍ବରୁ ଲୋକାଲ୍ ସର୍କଲ୍ସ ଜାଣିବାକୁ ପାଇଛି ଯେ ଏହି ସର୍ଭେର ୫୪ ପ୍ରତିଶତ ମତଦାତା ଏ ପର୍ଯ୍ୟନ୍ତ ଚଳିତ ମାସ ଶେଷ ସୁଦ୍ଧା ଆବଶ୍ୟକ ରିଟର୍ଣ୍ଣ ଦାଖଳ କରିନାହାଁନ୍ତି, ଯେଉଁଥିରୁ ୩୭ ପ୍ରତିଶତ ନିର୍ଦ୍ଧାରିତ ସମୟସୀମା ମଧ୍ୟରେ ରିଟର୍ଣ୍ଣ ଦାଖଲ କରିପାରିବେ କି ନାହିଁ ସେ ନେଇ ଅନିଶ୍ଚିତତା ମଧ୍ୟରେ ରହିଛନ୍ତି। କେବଳ ୪୬ ପ୍ରତିଶତ ଟିକସଦାତା ସେମାନଙ୍କ ରିଟର୍ଣ୍ଣ ଦାଖଲ କରିଛନ୍ତି।

ସରକାରୀ ପୋର୍ଟାଲରେ ରିଟର୍ଣ୍ଣ ଦାଖଲ କରିବାକୁ ଚାହୁଁଥିବା ବ୍ୟକ୍ତିଙ୍କ ବିଫଳତା ପୂର୍ବ ସର୍ଭେ ସମୟରେ ୪ ପ୍ରତିଶତରୁ ଏବେ ୧୦ ପ୍ରତିଶତକୁ ବୃଦ୍ଧି ପାଇଛି। ଏଥିସହ ୯ ପ୍ରତିଶତ ସ୍ୱୀକାର କରିଛନ୍ତି ଯେ, ସେମାନେ ରିଯର୍ଣ୍ଣ ଦାଖଲ ସମୟସୀମା ପୂରଣ କରିବାରେ ସକ୍ଷମ ହେବେ ନାହିଁ । ଏହାଛଡା ୧୩ ପ୍ରତିଶତ ମତଦାତା କହିଛନ୍ତି ଯେ ଜୁଲାଇ ୩୧ ତାରିଖ ସୁଦ୍ଧା ଏହା ଦାଖଲ କରିବା ଏକ ମହତ୍ବପୂର୍ଣ ପ୍ରୟାସ ହେବ। ଆୟକର ବିଭାଗ ଏକ ଟୁଇଟ୍ ମାଧ୍ୟମରେ ଜନସାଧାରଣଙ୍କୁ ସୂଚନା ଦେଇଛି ଯେ ୨୦୨୨-୨୩ ପାଇଁ ୩.୪ କୋଟିରୁ ଅଧିକ କରଦାତା ଇ-ଫାଇଲିଂ ପୋର୍ଟାଲରେ ୨୬ ଜୁଲାଇସୁଦ୍ଧା ପର୍ଯ୍ୟନ୍ତ ରିଟର୍ଣ୍ଣ ଦାଖଲ କରିଛନ୍ତି।