ମହାକାଳପଡ଼ା: ଭାଇଚାରାର ସନ୍ଦେଶ ଦେଲେ ମାଙ୍କଡ଼ପଲ। ନଦୀକୂଳରେ ମାଙ୍କଡ଼ଟିଏ ପାଣି ପିଇବା ବେଳେ ତାକୁ କୁମ୍ଭୀର ଟାଣିନେଲା। ଏହି ସମୟରେ ମାଙ୍କଡ଼ଟି ଜୋରଜୋର୍‌ରେ ଚିତ୍କାର କରିବାରୁ ନଦୀ ଆରପଟେ ଥିବା ମାଙ୍କଡ଼ପଲ ତାକୁ ଉଦ୍ଧାର କରିବା ପାଇଁ ନଦୀ ଭିତରକୁ ଡେଇଁ ପଡ଼ିଥିଲେ। ଏମିତି ଏକ ଘଟଣାକୁ ସେଠାରେ ଉପସ୍ଥିତ ଜଣେ ବ୍ୟକ୍ତି ନିଜ ମୋବାଇଲର କଏଦ୍‌ କରିଥିଲେ। ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଏହା ଚର୍ଚ୍ଚାର ପରିସରକୁ ଆସିଛି। ଦିନକୁ ଦିନ ଶ୍ରେଷ୍ଠ ପ୍ରାଣୀ ମଣିଷ ମଧ୍ୟରେ ଭାଇଚାରା ନଷ୍ଟ ହେଉଥିବା ବେଳେ ସାଥୀ ମାଙ୍କଡ଼କୁ ବଞ୍ଚାଇବା ପାଇଁ ମାଙ୍କଡ଼ପଲଙ୍କ ସମୂହ ପ୍ରୟାସ ମଣିଷ ସମାଜକୁ ଘଡ଼ିଏ ଭାବିବାକୁ ବାଧ୍ୟ କରିଛି।

ସୂଚନା ମୁତାବକ, ମହାକାଳପଡ଼ା ବ୍ଲକ୍‌ ଖରିନାସି ଜଙ୍ଗଲ ପାର୍ଶ୍ବରେ ମହାନଦୀର ଏକ ଶାଖା ନଦୀ ପ୍ରବାହିତ ହେଉଛି। ଏହି ନଦୀକୂଳରେ ଗୋଟିଏ ମାଙ୍କଡ଼ ପାଣି ପିଉଥିବା ବେଳେ ତାକୁ ଟାଣି ନେଇଥିଲା କୁମ୍ଭୀର। ମାଙ୍କଡ଼ର ଚିତ୍କାର ଶୁଣି ଅନ୍ୟ ମାଙ୍କଡ଼ମାନେ ନିଜ ଜୀବନକୁ ବାଜି ଲଗାଇ କୁମ୍ଭୀର ଭର୍ତ୍ତି ନଦୀ ପାର ହୋଇ ତା’ ନିକଟରେ ପହଞ୍ଚି ଉଦ୍ଧାର କରିବାକୁ ଚେଷ୍ଟା କରିଥିଲେ। ସାଥୀ ମାଙ୍କଡ଼କୁ ବଞ୍ଚାଇ ପାରିଲେନି ସିନା କିନ୍ତୁ ସେମାନେ କରିଥିବା ସାମୂହିକ ପ୍ରୟାସ ସମଗ୍ର ମାନବ ସମାଜ ପାଇଁ ଶିକ୍ଷଣୀୟ ହୋଇଛି।

କେନ୍ଦୁଝର: ଜାତୀୟ ରାଜପଥ ୪୯ ର ଜୁଡିଆ ଘାଟି ସାନଘାଗରା ନିକଟରେ ବନ ବିଭାଗ ପକ୍ଷରୁ ମାଙ୍କଡ ମାନଙ୍କ ରାସ୍ତା ପାର ହେବା ପାଇଁ ଦୁଇଟି ଝୁଲନ୍ତା ଚଲାପଥ ନିର୍ମାଣ କରାଯାଇଛି। ଏହି ଚଳାପଥ ଦ୍ୱାରା ମାଙ୍କଡମାନେ ସୁବିଧାରେ ଗୋଟିଏ ପାହାଡରୁ ଆଉ ଗୋଟିଏ ପାହାଡକୁ ଜାତୀୟ ରାଜପଥ ଅତିକ୍ରମ କରି ପାରିବେ। ଜାତୀୟ ରାଜପଥରେ ଦୈନିକ ଶହ ଶହ ଟ୍ରକ ଯାତୟତ କରୁଥିବାରୁ ମାଙ୍କଡ ମାନେ ଗୋଟିଏ ପାଶ୍ୱର୍ରୁ ଆଉ ଗୋଟିଏ ପାଶ୍ୱର୍କୁ ଗଲା ସମୟରେ ଦୁର୍ଘଟଣାର ଶୀକାର ହୋଇଥାନ୍ତି। ଏହି ଝୁଲନ୍ତା ରାସ୍ତା ବା କ୍ୟାନୋପି ବ୍ରିଜ ଦ୍ୱାରା ଦୁର୍ଘଟଣା ରୋକାଯାଇ ପାରିବ ବୋଲି ମତପ୍ରକାଶ ପାଇଛି। ସିଦ୍ଧମଠ ଜଙ୍ଗଲରୁ ସାନଘାଗରା ଜଙ୍ଗଲ ଯାତାୟତ ପାଇଁ ଝୁଲନ୍ତା ଚଲାପଥ ବେଶ ସହାୟକ ହେବ ।

ଅନ୍ୟପକ୍ଷରେ ଖାଦ୍ୟ ଅଭାବ ଯୋଗୁଁ ମାଙ୍କଡ ମାନେ ଜଙ୍ଗଲ ଛାଡି ପଦାକୁ ଚାଲି ଆସୁଥିବାରୁ ଦୁର୍ଘଟଣା ବଢୁଛି । ସେମାନଙ୍କ ପାଇଁ ଜଙ୍ଗଲରେ ଖାଦ୍ୟ ବ୍ୟବସ୍ଥା କରାଯିବାକୁ ଦାବି ହୋଇଛି । ସାନଘାଗରା ସମ୍ମୁଖରେ ଦୁଇଟି ଝୁଲନ୍ତା ଚଲାପଥ ଆରମ୍ଭ ହେବା ପରେ ଅଧିକ ମାଙ୍କଡ ଯାତାୟତ କରୁଥିବା ଭୂୟାଁ ଜୁଆଙ୍ଗ ପୀଢ ରେଞ୍ଜ ଅନ୍ତର୍ଗତ କାଇପୁର ଠାରେ ଆଉ ଏକ ଝୁଲନ୍ତା ଚଲାପଥ ନିର୍ମାଣ କରାଯିବ। ଗୁରୁବାର ଦିନ ଡିଏଫ୍‌ଓ ଏଚ୍‌ଡି ଧନରାଜ, ଏସିଏଫ୍‌ ଘନଶ୍ୟାମ ମହାନ୍ତ, ଅଶୋକ କୁମାର ଦାସ, ରେଞ୍ଜର ମାନସ କୁମାର ମୁର୍ମୁ ଝୁଲନ୍ତା ଚଲାପଥ ସ୍ଥାନ ପରିଦର୍ଶନ କରିଥିଲେ ।