ପଶ୍ଚିମବଙ୍ଗ ରାଜନୀତିରେ ତୃଣମୂଳ କଂଗ୍ରେସ (TMC) ପାଇଁ ସଙ୍କଟ ଘନୀଭୂତ ହେବାରେ ଲାଗିଛି। ଦଳ ଭିତରେ ଚାଲିଥିବା ମହାବିଦ୍ରୋହ ମଧ୍ୟରେ ଏବେ ୧୯ ଜଣ ବିଦ୍ରୋହୀ ସାଂସଦଙ୍କ ଏକ ତାଲିକା ସାମ୍ନାକୁ ଆସିଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଏହି ତାଲିକାରେ ବଲିଉଡ୍ ଅଭିନେତାରୁ ନେତା ପାଲଟିଥିବା ଶତ୍ରୁଘ୍ନ ସିହ୍ନା ଏବଂ ପୂର୍ବତନ କ୍ରିକେଟର ୟୁସୁଫ ପଠାନଙ୍କ ଭଳି ହାଇ-ପ୍ରୋଫାଇଲ୍ ନେତାଙ୍କ ନାମ ମଧ୍ୟ ସାମିଲ ରହିଛି। ଏହି ସାଂସଦମାନେ ଏକ ଅଲଗା ସଂସଦୀୟ ଗୋଷ୍ଠୀ ଗଠନ କରିବା ସପକ୍ଷରେ ସ୍ୱାକ୍ଷର କରିଥିବା ଦାବି କରାଯାଉଛି।

ସଂସଦରେ ସ୍ୱତନ୍ତ୍ର ଗୋଷ୍ଠୀ ଗଠନ ପାଇଁ ପ୍ରସ୍ତୁତି

ସୂଚନା ଅନୁଯାୟୀ, ବରିଷ୍ଠ ନେତ୍ରୀ ତଥା ସାଂସଦ କାକୋଲି ଘୋଷ ଦସ୍ତିଦାରଙ୍କ ନେତୃତ୍ୱରେ ଲୋକସଭାରେ ଟିଏମସିର ଏକ ବଡ଼ ଗୋଷ୍ଠୀ ବିଦ୍ରୋହ କରିଛନ୍ତି। ପ୍ରାୟ ୨୦ ଜଣ ସାଂସଦ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖି ଏକ ସ୍ୱତନ୍ତ୍ର ଦଳ ଭାବରେ ସ୍ୱୀକୃତି ପ୍ରଦାନ କରିବାକୁ ଦାବି କରିଛନ୍ତି। ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ ଦଳର ନେତାମାନେ ଗୋଟିଏ ପରେ ଗୋଟିଏ ମମତା ବାନାର୍ଜୀଙ୍କ ହାତ ଛାଡ଼ିବାରେ ଲାଗିଛନ୍ତି, ଯାହା ଫଳରେ ଦଳର ଅସ୍ତିତ୍ୱ ଉପରେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି।

ବଡ଼ ନେତାଙ୍କ ବିଦ୍ରୋହ ଓ ପ୍ରତିକ୍ରିୟା

ଏହି ବିଦ୍ରୋହ ସମୟରେ ଶତ୍ରୁଘ୍ନ ସିହ୍ନା ସମ୍ପୂର୍ଣ୍ଣ ନୀରବତା ଅବଲମ୍ବନ କରିବା ଅନେକ ପ୍ରଶ୍ନ ସୃଷ୍ଟି କରିଛି। ଅନ୍ୟପଟେ କିର୍ତ୍ତୀ ଆଜାଦ୍ ଅଭିଯୋଗ କରିଛନ୍ତି ଯେ, କେନ୍ଦ୍ରୀୟ ତଦନ୍ତକାରୀ ସଂସ୍ଥା (ଇଡି ଏବଂ ସିବିଆଇ)ର ଭୟ ଦେଖାଇ ବିଜେପି ୟୁସୁଫ ପଠାନଙ୍କ ଭଳି ସାଂସଦମାନଙ୍କୁ ବ୍ଲାକମେଲ୍ କରୁଛି। ତେବେ ଲୋକସଭା ସହ ରାଜ୍ୟସଭାରେ ମଧ୍ୟ ଦଳକୁ ଝଟକା ଲାଗିଛି। ବରିଷ୍ଠ ନେତ୍ରୀ ସୁସ୍ମିତା ଦେବ ରାଜ୍ୟସଭାରୁ ଇସ୍ତଫା ଦେଇଛନ୍ତି ଏବଂ ସେ ବିଜେପିରେ ସାମିଲ ହେବା ନେଇ ଚର୍ଚ୍ଚା ଜୋର ଧରିଛି।

ମମତାଙ୍କ ପାଇଁ ବଢ଼ୁଛି ଅଡ଼ୁଆ

ଗୋଟିଏ ପଟେ ଦିଲ୍ଲୀରେ ମମତା ବାନାର୍ଜୀ ଏବଂ ଅଭିଷେକ ବାନାର୍ଜୀ ଇଣ୍ଡିଆ (INDIA) ମେଣ୍ଟର ବୈଠକରେ ଯୋଗ ଦେଉଥିବା ବେଳେ, ଅନ୍ୟପଟେ ତାଙ୍କ ଦଳର ୧୪ ଜଣ ସାଂସଦ ପଶ୍ଚିମବଙ୍ଗର ବିଜେପି ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କୁ ଭେଟିବା ଦଳ ପାଇଁ ବଡ଼ ବିପଦର ସଙ୍କେତ ଦେଇଛି। ଏହା ପୂର୍ବରୁ ବିଧାନସଭାରେ ଟିଏମସିର ୫୮ ଜଣ ବିଧାୟକ ମଧ୍ୟ ବିଦ୍ରୋହ କରି ରିତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବେ ସମର୍ଥନ ଜଣାଇଥିଲେ। ୧୯୯୮ ମସିହାରେ କଂଗ୍ରେସରୁ ଅଲଗା ହୋଇ ଗଠନ ହୋଇଥିବା ତୃଣମୂଳ କଂଗ୍ରେସ ଏବେ ୨୮ ବର୍ଷ ପରେ ସବୁଠାରୁ ବଡ଼ ଭାଙ୍ଗନର ସମ୍ମୁଖୀନ ହୋଇଛି।

ଭୁବନେଶ୍ୱର: ଦୀଘା ଜଗନ୍ନାଥ ଧାମରୁ ହଟିବ 'ଧାମ' ଶବ୍ଦ । ମୋହନ ମାଝୀଙ୍କ ଚିଠି ପାଇବା ପରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ କଲେ ବଡ଼ ଘୋଷଣା । ଦୀଘା ଜଗନ୍ନାଥ ଧାମ ବଦଳରେ ହେବ ଦୀଘା ଜଗନ୍ନାଥ ସାଂସ୍କୃତିକ କେନ୍ଦ୍ର । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଛନ୍ତି କି, 'ଦୀଘା ଜଗନ୍ନାଥ ଧାମ' ବଦଳରେ ହେବ ଦୀଘା ଜଗନ୍ନାଥ ସାଂସ୍କୃତିକ କେନ୍ଦ୍ର। ପୂର୍ବ ସରକାର ଧାମ ଶବ୍ଦ ଯୋଡିଥିଲେ, ଏହା ସନାତନ ଧର୍ମ ବିରୋଧୀ ଥିଲା। ଓଡିଶା ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଚିଠି ପାଇଛି, ‘ଧାମ’ ଶବ୍ଦ ହଟାଇଲୁ। ଏଥିପାଇଁ ପୁରୀ ସାଂସଦ ସମ୍ବିତ ପାତ୍ରଙ୍କୁ ମଧ୍ୟ ପଠାଇଛନ୍ତି। ଏହାସହ ଏଥିପାଇଁ କ୍ୟାବିନେଟରେ ପ୍ରସ୍ତାତ ପାରିତ କରାଯିବ ବୋଲି କହିଛନ୍ତି ଶୁଭେନ୍ଦୁ ଅଧିକାରୀ।

‘ଦୀଘା ଜଗନ୍ନାଥ ଧାମ’ ନାମକରଣ ପରିବର୍ତ୍ତନ ପାଇଁ ଆଜି ଚିଠି ଲେଖିଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ଏ ନେଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁଙ୍କୁ ଚିଠି ଲେଖିଥିଲେ ମୁଖ୍ୟମନ୍ତ୍ରୀ ମୋହନ ମାଝୀ। ‘ଦୀଘା ଜଗନ୍ନାଥ ଧାମ’ ବଦଳରେ ‘ଶ୍ରୀଜଗନ୍ନାଥ ମନ୍ଦିର, ଦୀଘା’ ଲେଖିବାକୁ ମୁଖ୍ୟମନ୍ତ୍ରୀଙ୍କ ପ୍ରସ୍ତାବ ଦେଇଥିଲେ।

ଭୁବନେଶ୍ୱର: ଦୀଘା ମନ୍ଦିରରୁ ‘ଧାମ’ ଶବ୍ଦ ହଟାଇବାକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କୁ ମୋହନ ମାଝୀଙ୍କ ଚିଠି । ପଶ୍ଚିମବଙ୍ଗର ପୂର୍ବ ମେଦିନୀପୁର ଜିଲ୍ଲାର ଦୀଘାଠାରେ ନିର୍ମିତ ଶ୍ରୀ ଜଗନ୍ନାଥ ମନ୍ଦିରର ନାମରୁ 'ଧାମ' ଶବ୍ଦ ହଟାଇବାକୁ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଅନୁରୋଧ କରିଛନ୍ତି। ପ୍ରଭୁ ଶ୍ରୀ ଜଗନ୍ନାଥଙ୍କ ଭକ୍ତଙ୍କ ଧାର୍ମିକ ଏବଂ ସାଂସ୍କୃତିକ ଭାବନାକୁ ଦୃଷ୍ଟିରେ ରଖି ଓଡ଼ିଶାର ମୁଖ୍ୟମନ୍ତ୍ରୀ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କୁ ଏକ ଚିଠି ଲେଖିଛନ୍ତି।

ନିଜ ପତ୍ରରେ ଶ୍ରୀ ମାଝୀ ଦର୍ଶାଇଛନ୍ତି ଯେ, ଦୀଘାର ଏହି ମନ୍ଦିରକୁ 'ଦୀଘା ଜଗନ୍ନାଥ ଧାମ' ଭାବରେ ନାମକରଣ କରାଯିବା ଫଳରେ ଓଡ଼ିଶା ତଥା ଅନ୍ୟାନ୍ୟ ସ୍ଥାନରେ ଥିବା ଅଗଣିତ ଭକ୍ତ, ଧାର୍ମିକ ବିଦ୍ୱାନ ଏବଂ ସାମାଜିକ-ସାଂସ୍କୃତିକ ସଙ୍ଗଠନଗୁଡ଼ିକ ମଧ୍ୟରେ ଉଦ୍‌ବେଗ ପ୍ରକାଶ ପାଇଛି।

ମୁଖ୍ୟମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଛନ୍ତି ଯେ, ଭାରତର ପବିତ୍ର ଚାରି ଧାମ ମଧ୍ୟରୁ ଅନ୍ୟତମ ଥିବା ପୁରୀର ଶ୍ରୀମନ୍ଦିର ସହିତ 'ଜଗନ୍ନାଥ ଧାମ' ଶବ୍ଦ ଅଙ୍ଗାଙ୍ଗୀ ଭାବେ ଜଡ଼ିତ ଏବଂ ଏହାର ଅସୀମ ଆଧ୍ୟାତ୍ମିକ, ଐତିହାସିକ ତଥା ସାଂସ୍କୃତିକ ଗୁରୁତ୍ୱ ରହିଛି। ସେ କହିଛନ୍ତି ଯେ, ଏହି ନାମକରଣ ଅଗଣିତ ଭକ୍ତଙ୍କ ବିଶ୍ୱାସ ଏବଂ ଚେତନାରେ ଏକ ସ୍ୱତନ୍ତ୍ର ସ୍ଥାନ ଅଧିକାର କରିଛି। ତେଣୁ ପୁରୀ ଶ୍ରୀ ଜଗନ୍ନାଥ ଧାମର ପବିତ୍ରତା ଏବଂ ସ୍ୱତନ୍ତ୍ର ପରିଚୟ ବଜାୟ ରହିବା ଉଚିତ୍।

ଶ୍ରୀ ଜଗନ୍ନାଥଙ୍କ ଐତିହ୍ୟ ଏବଂ ଓଡ଼ିଶାବାସୀଙ୍କ ଆବେଗ ସମ୍ପର୍କରେ ଶ୍ରୀ ଅଧିକାରୀଙ୍କ ବୁଝାମଣା ଉପରେ ଭରସା ପ୍ରକଟ କରି ମୁଖ୍ୟମନ୍ତ୍ରୀ ଆଶା ପ୍ରକାଶ କରିଛନ୍ତି ଯେ ଭକ୍ତଙ୍କ ଉଦ୍‌ବେଗକୁ ଉଚିତ୍ ବିଚାର କରାଯିବ।

ଓଡ଼ିଶା ମୁଖ୍ୟମନ୍ତ୍ରୀ ପଶ୍ଚିମବଙ୍ଗ ସରକାରଙ୍କୁ 'ଧାମ' ଶବ୍ଦ ବାଦ୍ ଦେଇ ଏହି ମନ୍ଦିରର ନାମକରଣ କେବଳ 'ଶ୍ରୀ ଜଗନ୍ନାଥ ମନ୍ଦିର, ଦୀଘା' ରଖିବାକୁ ପରାମର୍ଶ ଦେଇଛନ୍ତି। ଶ୍ରୀ ମାଝୀ କହିଛନ୍ତି ଯେ, ଏଭଳି ପଦକ୍ଷେପକୁ ଶ୍ରଦ୍ଧାଳୁମାନେ ବ୍ୟାପକ ପ୍ରଶଂସା କରିବେ ଏବଂ ଏହା ଦ୍ୱାରା ଓଡ଼ିଶା ଓ ପଶ୍ଚିମବଙ୍ଗର ଲୋକଙ୍କ ମଧ୍ୟରେ ଥିବା ସଦ୍ଭାବନା, ସାଂସ୍କୃତିକ ସମ୍ପର୍କ ଏବଂ ପାରସ୍ପରିକ ସମ୍ମାନ ଆହୁରି ସୁଦୃଢ଼ ହେବ।

ଏହି ପ୍ରସଙ୍ଗରେ ବ୍ୟକ୍ତିଗତ ଧ୍ୟାନ ଦେବା ସହ ଜଗନ୍ନାଥ ଭକ୍ତଙ୍କ ଭାବନାକୁ ସମ୍ମାନ ଜଣାଇ ଏକ ସକାରାତ୍ମକ ନିଷ୍ପତ୍ତି ନିଆଯିବ ବୋଲି ମୁଖ୍ୟମନ୍ତ୍ରୀ ନିଜ ପତ୍ରରେ ଆଶାବ୍ୟକ୍ତ କରିଛନ୍ତି।

ପଶ୍ଚିମବଙ୍ଗ ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ରାଜ୍ୟରେ ଏବେ ସେଣ୍ଟ୍ରାଲ୍ ବ୍ୟୁରୋ ଅଫ୍ ଇନଭେଷ୍ଟିଗେସନ୍ (ସିବିଆଇ) କୌଣସି ବି ମାମଲାର ତଦନ୍ତ କରିପାରିବ। ଏଥିପାଇଁ ଶୁଭେନ୍ଦୁ ଅଧିକାରୀଙ୍କ ନେତୃତ୍ୱାଧୀନ ନୂଆ ସରକାର ସିବିଆଇକୁ ସମ୍ପୂର୍ଣ୍ଣ ଛାଡ଼ ପ୍ରଦାନ କରିଛନ୍ତି।

ପ୍ରତ୍ୟାହାର ହେଲା ଟିଏମସି ସରକାରଙ୍କ ନିଷ୍ପତ୍ତି

ପୂର୍ବରୁ ୨୦୧୮ ମସିହାରେ ତତ୍କାଳୀନ ତୃଣମୂଳ କଂଗ୍ରେସ (ଟିଏମସି) ସରକାର ରାଜ୍ୟରେ ସିବିଆଇ ତଦନ୍ତ ଉପରେ ଥିବା ସାଧାରଣ ସମ୍ମତି ବା 'ଜେନେରାଲ୍ କନସେଣ୍ଟ'କୁ ପ୍ରତ୍ୟାହାର କରି ନେଇଥିଲେ। କିନ୍ତୁ ବର୍ତ୍ତମାନର ସରକାର ଦିଲ୍ଲୀ ସ୍ପେଶାଲ୍ ପୋଲିସ୍ ଏଷ୍ଟାବ୍ଲିସମେଣ୍ଟ ଆକ୍ଟର ଧାରା ୬ ଅନୁଯାୟୀ ସିବିଆଇକୁ ସମଗ୍ର ପଶ୍ଚିମବଙ୍ଗରେ ତଦନ୍ତ କରିବା ପାଇଁ ପୁଣିଥରେ 'ଜେନେରାଲ୍ କନସେଣ୍ଟ' ପ୍ରଦାନ କରିଛନ୍ତି। ଦୁର୍ନୀତି ବିରୋଧରେ ରାଜ୍ୟ ସରକାରଙ୍କ ଏହା ଏକ 'ଜିରୋ ଟଲରାନ୍ସ' ନୀତି ବୋଲି କୁହାଯାଉଛି।

ରାଜ୍ୟ କର୍ମଚାରୀଙ୍କ ପାଇଁ ରହିବ ସର୍ତ୍ତ

ସିବିଆଇକୁ ତଦନ୍ତ ପାଇଁ ଖୋଲା ଛାଡ଼ ମିଳିଥିଲେ ମଧ୍ୟ ଏକ ସର୍ତ୍ତ ରଖାଯାଇଛି। ରାଜ୍ୟ ସରକାର ସ୍ପଷ୍ଟ କରିଛନ୍ତି ଯେ, ଯଦି ସିବିଆଇ ପଶ୍ଚିମବଙ୍ଗ ସରକାରଙ୍କ ଅଧୀନରେ ଥିବା କୌଣସି ସରକାରୀ କର୍ମଚାରୀଙ୍କ ବିରୋଧରେ ତଦନ୍ତ ଆରମ୍ଭ କରିବାକୁ ଚାହୁଁଛି, ତେବେ ଏଜେନ୍ସିକୁ ଆଗୁଆ ଲିଖିତ ଅନୁମତି ନେବାକୁ ପଡ଼ିବ। ଅର୍ଥାତ୍ ରାଜ୍ୟ ସରକାରୀ କର୍ମଚାରୀଙ୍କ ସମ୍ବନ୍ଧୀୟ ମାମଲାରେ ସିବିଆଇ ସିଧାସଳଖ ତଦନ୍ତ ଆରମ୍ଭ କରିପାରିବ ନାହିଁ; ସେହି କ୍ଷେତ୍ରରେ ରାଜ୍ୟର ସମ୍ମତି ଅପରିହାର୍ଯ୍ୟ ଅଟେ।

ଦୁର୍ନୀତି ବିରୋଧରେ କଡ଼ା କାର୍ଯ୍ୟାନୁଷ୍ଠାନ

ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ନେତୃତ୍ୱରେ ପଶ୍ଚିମବଙ୍ଗ ସରକାର ଦୁର୍ନୀତିଗ୍ରସ୍ତ ଅଧିକାରୀ ଏବଂ ବିଭିନ୍ନ ସ୍କାମର ପର୍ଦ୍ଦାଫାସ କରିବାକୁ ପ୍ରତିଶ୍ରୁତିବଦ୍ଧ। ଶିକ୍ଷକ ନିଯୁକ୍ତି ଦୁର୍ନୀତି, ପୌରସଂସ୍ଥା ଏବଂ ସମବାୟ ବିଭାଗରେ ହୋଇଥିବା ଅନିୟମିତତା ଭଳି ପ୍ରସଙ୍ଗରେ ସିବିଆଇ ତଦନ୍ତକୁ ରାଜ୍ୟ ସରକାର ସମର୍ଥନ ଜଣାଇଛନ୍ତି। ଗତ ସରକାର ଏହିସବୁ ମାମଲାରେ ସିବିଆଇକୁ ତଦନ୍ତ ଅନୁମତି ନଦେଇ ଦୁର୍ନୀତିଗ୍ରସ୍ତ ଅଧିକାରୀମାନଙ୍କୁ ସୁରକ୍ଷା ଦେଉଥିଲେ ବୋଲି ବର୍ତ୍ତମାନର ସରକାର ଅଭିଯୋଗ କରିଛନ୍ତି।

ପଶ୍ଚିମବଙ୍ଗରେ ନୂଆ ବିଜେପି ସରକାର (BJP) ଗଠନ ହେବା ପରେ ରାଜ୍ୟରେ ବେଆଇନ ଅନୁପ୍ରବେଶକାରୀଙ୍କ ବିରୋଧରେ କଡ଼ା ପ୍ରଶାସନିକ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ସରକାରଙ୍କ ନୂଆ ତଥା କଠୋର ନୀତି ଭୟରେ ବକ୍ରି ଇଦ୍ ସମୟରେ ଅନେକ ବେଆଇନ ବାଂଲାଦେଶୀ ପ୍ରବାସୀ ନିଜ ଦେଶକୁ ଫେରିଯିବା ପାଇଁ ଉଦ୍ୟମ କରୁଥିବା ଦେଖିବାକୁ ମିଳିଛି।

ସୀମାରେ ଲାଗିଛି ପ୍ରବାସୀଙ୍କ ଭିଡ଼

ରିପୋର୍ଟ ଅନୁଯାୟୀ, ରାଜ୍ୟର ବିଭିନ୍ନ ସୀମାନ୍ତ ଅଞ୍ଚଳରେ ଏବେ ଏହି ପ୍ରବାସୀଙ୍କ ଗହଳି ଦେଖିବାକୁ ମିଳୁଛି। ବିଶେଷକରି ୨୪ ପ୍ରଗଣା (24 Parganas) ରୁ ଆରମ୍ଭ କରି ମାଲଦା (Malda) ପର୍ଯ୍ୟନ୍ତ ବିଭିନ୍ନ ସୀମାନ୍ତ ଚେକପୋଷ୍ଟରେ ବାଂଲାଦେଶୀ ନାଗରିକଙ୍କ ବଡ଼ ବଡ଼ ଦଳ ଏକାଠି ହୋଇ ନିଜ ଇଚ୍ଛାରେ ସ୍ୱଦେଶ ଫେରିଯାଉଛନ୍ତି। ଅନ୍ୟପଟେ ଭାରତ-ବାଂଲାଦେଶ ସୀମାରେ ସୀମା ସୁରକ୍ଷା ବଳ (BSF) ପକ୍ଷରୁ କଡ଼ା ପ୍ରହରା ଦିଆଯାଉଛି।

ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ କଡ଼ା ନିର୍ଦ୍ଦେଶ

ନିକଟରେ ରାଜ୍ୟର ନୂଆ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ନେଇଥିବା ଶୁଭେନ୍ଦୁ ଅଧିକାରୀ (Suvendu Adhikari) ଭାରତ-ବାଂଲାଦେଶ ସୀମାରେ ଅନୁପ୍ରବେଶ ରୋକିବା ନେଇ ଏକ ବଡ଼ ବୟାନ ଦେଇଥିଲେ। ଏହାଛଡ଼ା ବରିଷ୍ଠ ବିଜେପି ନେତା ଦିଲୀପ ଘୋଷ (Dilip Ghosh) ମଧ୍ୟ ଏହି ପ୍ରସଙ୍ଗରେ କଡ଼ା ଆଭିମୁଖ୍ୟ ପୋଷଣ କରିଛନ୍ତି। ପୂର୍ବରୁ ମମତା ବାନାର୍ଜୀ (Mamata Banerjee) ଙ୍କ ନେତୃତ୍ୱାଧୀନ ଟିଏମସି ସରକାର ଅମଳରେ ବେଆଇନ ପ୍ରବାସୀଙ୍କୁ ପ୍ରଶ୍ରୟ ମିଳୁଥିବା ନେଇ ବିଜେପି ଅଭିଯୋଗ କରିଆସୁଥିଲା। ମାତ୍ର ବର୍ତ୍ତମାନ କ୍ଷମତା ପରିବର୍ତ୍ତନ ପରେ ନୂଆ ସରକାରଙ୍କ ଆଭିମୁଖ୍ୟ ଯୋଗୁଁ ବାଂଲାଦେଶୀ ଅନୁପ୍ରବେଶକାରୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି।

ପଶ୍ଚିମବଙ୍ଗର ବରିଷ୍ଠ ନେତା ଶୁଭେନ୍ଦୁ ଅଧିକାରୀଙ୍କ ବ୍ୟକ୍ତିଗତ ସହାୟକ (ପିଏ) ଚନ୍ଦ୍ରନାଥ ରଥଙ୍କ ହତ୍ୟା ମାମଲାରେ ଏକ ବଡ଼ ଖୁଲାସା ହୋଇଛି। ଭୁଲ୍ ବଶତଃ ଗିରଫ ହୋଇଥିବା ଉତ୍ତରପ୍ରଦେଶ ବଲିଆର ବାସିନ୍ଦା ରାଜ ସିଂହଙ୍କୁ କୋର୍ଟରୁ ମୁକ୍ତି ମିଳିଛି। ସିବିଆଇ ତଦନ୍ତ ପରେ ସେ ନିର୍ଦ୍ଦୋଷ ବୋଲି ପ୍ରମାଣିତ ହୋଇଛନ୍ତି। ଜେଲରୁ ବାହାରିବା ପରେ ରାଜ ସିଂହ ସିବିଆଇକୁ ଧନ୍ୟବାଦ ଜଣାଇବା ସହ କହିଛନ୍ତି ଯେ, ଯଦି ସିବିଆଇ ଏହି ମାମଲାର ତଦନ୍ତ କରିନଥାନ୍ତା, ତେବେ ତାଙ୍କର କେବେ ବି ଏନକାଉଣ୍ଟର ହୋଇଯାଇଥାନ୍ତା।

ପଶ୍ଚିମବଙ୍ଗ ପୋଲିସର ଭୁଲ୍ ଏବଂ ସିବିଆଇର ତଦନ୍ତ

ରାଜ ସିଂହଙ୍କୁ ମେ' ୧୧ ତାରିଖରେ ଅଯୋଧ୍ୟାରୁ ପଶ୍ଚିମବଙ୍ଗ ପୋଲିସର ସ୍ପେଶାଲ୍ ଟାସ୍କ ଫୋର୍ସ (ଏସଟିଏଫ) ଗିରଫ କରିଥିଲା। ତେବେ ପରବର୍ତ୍ତୀ ସମୟରେ ଏହି ହତ୍ୟା ମାମଲାର ତଦନ୍ତ ଭାର କେନ୍ଦ୍ରୀୟ ତଦନ୍ତକାରୀ ସଂସ୍ଥା (ସିବିଆଇ) ହାତକୁ ଯାଇଥିଲା। ସିବିଆଇ ନିଜ ତଦନ୍ତରେ ଜାଣିବାକୁ ପାଇଥିଲା ଯେ ହତ୍ୟାକାଣ୍ଡ ଘଟିଥିବା ଦିନ (ମେ' ୬) ରାଜ ସିଂହ ଘଟଣାସ୍ଥଳରେ ଉପସ୍ଥିତ ନଥିଲେ। ପରିବାର ଲୋକେ ପ୍ରଦାନ କରିଥିବା ସିସିଟିଭି ଫୁଟେଜ୍, ଗେଷ୍ଟ ହାଉସ୍ ବିଲ୍ ଏବଂ ଅନ୍ୟାନ୍ୟ ପ୍ରମାଣରୁ ସ୍ପଷ୍ଟ ହୋଇଥିଲା ଯେ ସେହି ସମୟରେ ରାଜ ଉତ୍ତରପ୍ରଦେଶରେ ଥିଲେ। ନାମରେ ସମାନତା ଥିବାରୁ ପଶ୍ଚିମବଙ୍ଗ ପୋଲିସ ଭୁଲ୍ ବ୍ୟକ୍ତିଙ୍କୁ ଗିରଫ କରିଥିଲା ବୋଲି ସିବିଆଇ ବାରାସାତ କୋର୍ଟରେ ସ୍ୱୀକାର କରିଥିଲା। ଏହା ପରେ କୋର୍ଟ ତାଙ୍କୁ ତୁରନ୍ତ ଖଲାସ କରିବାକୁ ନିର୍ଦ୍ଦେଶ ଦେଇଥିଲେ।

ପ୍ରକୃତ ଅପରାଧୀ ଗିରଫ

ନିର୍ଦ୍ଦୋଷ ରାଜ ସିଂହଙ୍କୁ ମୁକ୍ତ କରିବା ପରେ ସିବିଆଇ ପ୍ରକୃତ ଅପରାଧୀଙ୍କୁ ଧରିବାରେ ସଫଳ ହୋଇଛି। ପ୍ରକୃତ ଶାର୍ପସୁଟର ରାଜକୁମାର ସିଂହଙ୍କୁ ମୁଜାଫରନଗରରୁ ଗିରଫ କରାଯାଇଛି। ସେହିପରି ଅନ୍ୟତମ ଅଭିଯୁକ୍ତ ନବୀନ କୁମାର ସିଂହ ଏବଂ ବିନୟ ରାୟ ମଧ୍ୟ ସିବିଆଇ ଜାଲରେ ପଡ଼ିଛନ୍ତି।

ସଂଗଠନ ଉପରେ କ୍ଷୋଭ ପ୍ରକାଶ

ମୁକୁଳିବା ପରେ ରାଜ ସିଂହ ନିଜର ଆପବିତି ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ଗିରଫଦାରୀ ପରେ ତାଙ୍କୁ ଏତେ ମାତ୍ରାରେ ମାନସିକ ଚାପ ପ୍ରଦାନ କରାଯାଇଥିଲା ଯେ ସେ ଭୟଭୀତ ହୋଇପଡ଼ିଥିଲେ। ତାଙ୍କ ମାଆ ଜାମବନ୍ତୀ ଦେବୀଙ୍କର ପ୍ରଭୁ ରାମଲାଲାଙ୍କ ଉପରେ ଅତୁଟ ବିଶ୍ୱାସ ଥିଲା ଏବଂ ସେହି ଆଶୀର୍ବାଦରୁ ସେ ସୁରକ୍ଷିତ ଫେରିଛନ୍ତି ବୋଲି ପ୍ରକାଶ କରିଛନ୍ତି। ତେବେ ସେ ଅଖିଳ ଭାରତୀୟ କ୍ଷତ୍ରିୟ ମହାସଭାର ପ୍ରଦେଶ ସଚିବ ଥିବା ସତ୍ତ୍ୱେ ସଂଗଠନ ତାଙ୍କ ସମର୍ଥନରେ ବାହାରି ନଥିବାରୁ ସେ କ୍ଷୋଭ ପ୍ରକାଶ କରିଛନ୍ତି ଏବଂ ଖୁବଶୀଘ୍ର ପଦରୁ ଇସ୍ତଫା ଦେଇପାରନ୍ତି ବୋଲି କହିଛନ୍ତି।

ପଶ୍ଚିମବଙ୍ଗ: ପଶ୍ଚିମବଙ୍ଗର ନୂତନ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ବିଜେପି ନେତା ଶୁଭେନ୍ଦୁ ଅଧିକାରୀ ତାଙ୍କର ପ୍ରଥମ କ୍ୟାବିନେଟ୍ ବୈଠକରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ବାଂଲାଦେଶ ସୀମାରେ ବାଡ଼ ନିର୍ମାଣ ପାଇଁ ସୀମା ସୁରକ୍ଷା ବଳ (BSF) କୁ ଜମି ହସ୍ତାନ୍ତର କରିବା ସହିତ ରାଜ୍ୟରେ ତୁରନ୍ତ ଜନଗଣନା (Census) ପ୍ରକ୍ରିୟା ଆରମ୍ଭ କରିବାକୁ ସେ ମଞ୍ଜୁରୀ ଦେଇଛନ୍ତି।

ମୁଖ୍ୟମନ୍ତ୍ରୀ କହିଛନ୍ତି ଯେ ସୋମବାରଠାରୁ ଜମି ହସ୍ତାନ୍ତର ପ୍ରକ୍ରିୟା ଆରମ୍ଭ ହେବ ଏବଂ ଏହାକୁ ୪୫ ଦିନ ମଧ୍ୟରେ ଶେଷ କରାଯିବ। ବେଙ୍ଗଲର ସୀମାବର୍ତ୍ତୀ ଜିଲ୍ଲାଗୁଡ଼ିକରେ କ୍ରମାଗତ ଭାବେ ବଦଳୁଥିବା ଜନସଂଖ୍ୟାକୁ ଦୃଷ୍ଟିରେ ରଖି କ୍ୟାବିନେଟ୍ ଏହି ନିଷ୍ପତ୍ତି ନେଇଛି। ଜମି ହସ୍ତାନ୍ତର ପ୍ରକ୍ରିୟା ଶୀଘ୍ର ସମ୍ପୂର୍ଣ୍ଣ କରିବା ପାଇଁ ମୁଖ୍ୟ ଶାସନ ସଚିବ ଏବଂ ରାଜ୍ୟ ଭୂମି ଓ ଭୂ-ରାଜସ୍ୱ ବିଭାଗର ସଚିବଙ୍କୁ ନିର୍ଦ୍ଦେଶ ଦିଆଯାଇଛି।

ଶନିବାର ଦିନ ତାଙ୍କ ସହ ଶପଥ ଗ୍ରହଣ କରିଥିବା ଅନ୍ୟ ପାଞ୍ଚ ଜଣ ମନ୍ତ୍ରୀ ମଧ୍ୟ ଏହି ବୈଠକରେ ଉପସ୍ଥିତ ଥିଲେ। ଜନଗଣନା ପ୍ରକ୍ରିୟା ଆରମ୍ଭ କରିବାକୁ ଅନୁମୋଦନ ଦେବା ସହ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ପୂର୍ବତନ ମମତା ବାନାର୍ଜୀଙ୍କ ନେତୃତ୍ୱାଧୀନ ଟିଏମସି (TMC) ସରକାର ଉପରେ କଡ଼ା ସମାଲୋଚନା କରିଥିଲେ। ସେ ଅଭିଯୋଗ କରିଥିଲେ ଯେ ପୂର୍ବ ସରକାର ୧୬ ଜୁନ୍, ୨୦୨୫ ତାରିଖରେ କେନ୍ଦ୍ର ଗୃହ ମନ୍ତ୍ରଣାଳୟ ଦ୍ୱାରା ପଠାଯାଇଥିବା ସର୍କୁଲାରକୁ ଅଣଦେଖା କରିଥିଲେ ଏବଂ ମହିଳା ସଂରକ୍ଷଣକୁ ଅଟକାଇବା ଉଦ୍ଦେଶ୍ୟରେ ଉଦ୍ଦେଶ୍ୟମୂଳକ ଭାବେ ଜନଗଣନାକୁ ସ୍ଥଗିତ ରଖିଥିଲେ। ଏହାବ୍ୟତୀତ, କ୍ୟାବିନେଟ୍ ନୂତନ ଅପରାଧିକ ଆଇନ ଭାରତୀୟ ନ୍ୟାୟ ସଂହିତା (BNS) କୁ ରାଜ୍ୟରେ ସରକାରୀ ଭାବେ ଲାଗୁ କରିବାକୁ ମଧ୍ୟ ମଞ୍ଜୁରୀ ଦେଇଛି, ଯାହା ପୂର୍ବ ଟିଏମସି ସରକାର କରିନଥିଲେ।

କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ନିର୍ବାଚନ ପ୍ରତିଶ୍ରୁତି ଅନୁଯାୟୀ, ସ୍କୁଲ ଚାକିରି ଆଶାୟୀଙ୍କ ବୟସ ସୀମାକୁ ଆଉ ୫ ବର୍ଷ ବୃଦ୍ଧି କରିବା ପ୍ରସ୍ତାବକୁ ମଧ୍ୟ କ୍ୟାବିନେଟ୍ ଅନୁମୋଦନ କରିଛି। ଏହା ସହିତ ରାଷ୍ଟ୍ରୀୟ ଏବଂ ରାଜ୍ୟ କ୍ୟାଡର ଅଧୀନରେ ଥିବା ଅଧିକାରୀମାନଙ୍କ ପାଇଁ କେନ୍ଦ୍ର ସରକାରୀ ପ୍ରଶିକ୍ଷଣ ପ୍ରକ୍ରିୟା ଆରମ୍ଭ କରିବାକୁ ମୁଖ୍ୟ ଶାସନ ସଚିବଙ୍କୁ କ୍ଷମତା ପ୍ରଦାନ କରାଯାଇଛି।

ପଶ୍ଚିମବଙ୍ଗ: ପଶ୍ଚିମବଙ୍ଗ ରାଜନୀତିରେ ଏକ ଐତିହାସିକ ଅଧ୍ୟାୟ ଯୋଡ଼ି ହୋଇଛି। ଆଜି ବରିଷ୍ଠ ବିଜେପି ନେତା ଶୁଭେନ୍ଦୁ ଅଧିକାରୀ ପଶ୍ଚିମବଙ୍ଗର ନବମ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। କୋଲକାତାର ପ୍ରସିଦ୍ଧ ବ୍ରିଗେଡ୍ ପ୍ୟାରେଡ୍ ଗ୍ରାଉଣ୍ଡ ଠାରେ ଆୟୋଜିତ ଏହି ଶପଥ ଗ୍ରହଣ ଉତ୍ସବରେ ଏକ ନୂଆ ଇତିହାସ ସୃଷ୍ଟି ହୋଇଛି। ପ୍ରଥମ ଥର ପାଇଁ ରାଜ୍ୟରେ ଭାରତୀୟ ଜନତା ପାର୍ଟି (ବିଜେପି) ଶାସନ କ୍ଷମତାକୁ ଆସିଥିବା ବେଳେ ଏହି ପ୍ରସିଦ୍ଧ ମଇଦାନରେ ଶପଥ ନେବାରେ ଅଧିକାରୀ ହେଉଛନ୍ତି ପ୍ରଥମ ମୁଖ୍ୟମନ୍ତ୍ରୀ।

ରାଜ୍ୟପାଳ ଆର.ଏନ. ରବି ନବନିର୍ବାଚିତ ମୁଖ୍ୟମନ୍ତ୍ରୀ ଏବଂ ତାଙ୍କ କ୍ୟାବିନେଟ୍ ସହଯୋଗୀମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ଆଗାମୀ ଦିନରେ ବେଙ୍ଗଲ କ୍ୟାବିନେଟର ସମ୍ପ୍ରସାରଣ ହେବାର ସମ୍ଭାବନା ଥିବା ବେଳେ ଉଦଘାଟନୀ ଉତ୍ସବରେ ପ୍ରାଥମିକ ଭାବେ ୫ ଜଣ ବିଧାୟକ ମନ୍ତ୍ରୀ ଭାବେ ଶପଥ ନେଇଛନ୍ତି। ସେମାନେ ହେଲେ ଦିଲ୍ଲୀପ ଘୋଷ, ଅଗ୍ନିମିତ୍ରା ପଲ୍, ଅଶୋକ କୀର୍ତ୍ତନୀୟା, କ୍ଷୁଦିରାମ ଟୁଡୁ ଏବଂ ନିଶୀଥ ପ୍ରମାଣିକ।

କଡ଼ା ସୁରକ୍ଷା ବଳୟ ମଧ୍ୟରେ ଅନୁଷ୍ଠିତ ଏହି ଶପଥ ଗ୍ରହଣ ଉତ୍ସବରେ କେନ୍ଦ୍ର ସରକାରଙ୍କ ବହୁ ବରିଷ୍ଠ ନେତା ଏବଂ ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀମାନେ ଯୋଗ ଦେଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଏହି ଐତିହାସିକ ମୁହୂର୍ତ୍ତର ସାକ୍ଷୀ ହୋଇଥିଲେ। ସେହିପରି ଅନ୍ୟ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ମଧ୍ୟରେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ମଧ୍ୟପ୍ରଦେଶର ମୋହନ ଯାଦବ, ରାଜସ୍ଥାନର ମଦନ ଲାଲ୍ ଶର୍ମା ଏବଂ ଦିଲ୍ଲୀର ମୁଖ୍ୟମନ୍ତ୍ରୀ ରେଖା ଗୁପ୍ତା ପ୍ରମୁଖ ଉପସ୍ଥିତ ଥିଲେ।

ଶପଥ ଗ୍ରହଣ ଉତ୍ସବ ପାଇଁ ବ୍ରିଗେଡ୍ ପ୍ୟାରେଡ୍ ଗ୍ରାଉଣ୍ଡକୁ ଚୟନ କରିବା ରାଜ୍ୟ ରାଜନୀତିରେ ବିଜେପିର ଦବଦବା ଏବଂ କ୍ଷମତା ପରିବର୍ତ୍ତନର ସ୍ପଷ୍ଟ ସଙ୍କେତ ଦେଉଛି। ଐତିହାସିକ ଦୃଷ୍ଟିକୋଣରୁ ବିଶାଳ ରାଜନୈତିକ ସମାବେଶ ଏବଂ ଆନ୍ତର୍ଜାତୀୟ ଅତିଥିମାନଙ୍କ ପାଇଁ ବ୍ୟବହୃତ ହେଉଥିବା ଏହି ମଇଦାନ ଏବେ ଦଳର ସ୍ଲୋଗାନ "ପରିବର୍ତ୍ତନ" ର ସାକାର ରୂପକୁ ପ୍ରମାଣିତ କରିଛି।

ପଶ୍ଚିମବଙ୍ଗରେ ଏକ ଐତିହାସିକ ରାଜନୈତିକ ପରିବର୍ତ୍ତନର ସମୟ ଆସିଯାଇଛି। କୋଲକାତାରେ ଜାରି ରହିଥିବା ବିଜେପି (BJP) ବିଧାୟକ ଦଳ ବୈଠକରୁ ଏକ ବଡ଼ ଖବର ସାମ୍ନାକୁ ଆସିଛି। ଶୁଭେନ୍ଦୁ ଅଧିକାରୀଙ୍କୁ ଦଳ ନିଜର ନେତା ଭାବେ ନିର୍ବାଚିତ କରିଛି ଏବଂ ସେ ବେଙ୍ଗଲର ପରବର୍ତ୍ତୀ ମୁଖ୍ୟମନ୍ତ୍ରୀ ହେବେ।

ଅମିତ ଶାହ ଓ ମୋହନ ଚରଣ ମାଝୀଙ୍କ ଉପସ୍ଥିତିରେ ମୋହର

କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏବଂ ଓଡ଼ିଶା ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଉପସ୍ଥିତିରେ ଅନୁଷ୍ଠିତ ଏହି ଗୁରୁତ୍ୱପୂର୍ଣ୍ଣ ବୈଠକରେ ତାଙ୍କ ନାମରେ ମୋହର ବାଜିଛି। ଆସନ୍ତାକାଲି ଅର୍ଥାତ୍ ମେ' ୯ ତାରିଖ ସକାଳ ୧୧ଟା ସମୟରେ କୋଲକାତାର ଐତିହାସିକ ବ୍ରିଗେଡ୍ ପରେଡ୍ ଗ୍ରାଉଣ୍ଡରେ ଶୁଭେନ୍ଦୁ ଅଧିକାରୀ ମୁଖ୍ୟମନ୍ତ୍ରୀ ପଦର ଶପଥ ନେବେ।

ରବୀନ୍ଦ୍ର ଜୟନ୍ତୀରେ ଶପଥ ଗ୍ରହଣ ଉତ୍ସବ

ମେ' ୯ ତାରିଖ ଦିନଟି ପଶ୍ଚିମବଙ୍ଗ ପାଇଁ ବେଶ୍ ସ୍ୱତନ୍ତ୍ର, କାରଣ ଏହି ଦିନ ରବୀନ୍ଦ୍ର ଜୟନ୍ତୀ ପାଳନ କରାଯାଏ। ଏହି ଶୁଭ ଅବସରରେ ରାଜ୍ୟର ପ୍ରଥମ ବିଜେପି ସରକାରଙ୍କ ଶପଥ ଗ୍ରହଣ ସମାରୋହ ଆୟୋଜିତ ହେବ। ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ସମେତ ଅନେକ ରାଜ୍ୟର ମୁଖ୍ୟମନ୍ତ୍ରୀମାନେ ଯୋଗଦେବେ।

ଦୁଇ ଉପମୁଖ୍ୟମନ୍ତ୍ରୀ ଏବଂ ବିଧାନସଭା ଭଙ୍ଗ

ଭବାନୀପୁରରେ ମମତା ବାନାର୍ଜୀଙ୍କୁ ମାତ୍ ଦେଇଥିବା ଶୁଭେନ୍ଦୁଙ୍କ ସହ ଦୁଇ ଜଣ ଉପମୁଖ୍ୟମନ୍ତ୍ରୀ (Deputy CM) ମଧ୍ୟ ନିଯୁକ୍ତ ହେବା ନେଇ ଚର୍ଚ୍ଚା ହେଉଛି, ଯାହା ରାଜ୍ୟରେ ନୂଆ ରାଜନୈତିକ ସମୀକରଣ ସୃଷ୍ଟି କରିପାରେ। ଅନ୍ୟପକ୍ଷରେ, ବେଙ୍ଗଲର ରାଜ୍ୟପାଳ ଆର.ଏନ ରବି ଗତ ମେ' ୭ ତାରିଖରେ ରାଜ୍ୟ ବିଧାନସଭାକୁ ଭଙ୍ଗ କରିଦେଇଛନ୍ତି। କୋଲକାତା ଗେଜେଟରେ ଜାରି ସରକାରୀ ବିଜ୍ଞପ୍ତି ଅନୁଯାୟୀ, ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟିର (BJP) ବିପୁଳ ବିଜୟ ପରେ ବିଧାନସଭା ଭଙ୍ଗ କରିବା ପାଇଁ ଏହି ପଦକ୍ଷେପ ନିଆଯାଇଛି।

ପଶ୍ଚିମବଙ୍ଗ: ପଶ୍ଚିମବଙ୍ଗ ବିଜେପି ନେତା ସୁଭେନ୍ଦୁ ଅଧିକାରୀଙ୍କ ବ୍ୟକ୍ତିଗତ ସହାୟକ (ପିଏ) ଚନ୍ଦ୍ରନାଥ ରଥଙ୍କୁ ବୁଧବାର ରାତିରେ ଗୁଳି କରି ହତ୍ୟା କରାଯାଇଛି। ମଧ୍ୟମଗ୍ରାମ ନିକଟରେ ଥିବା ଏକ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ଏହି ଘଟଣାକୁ ନେଇ ଜଣେ ପ୍ରତ୍ୟକ୍ଷଦର୍ଶୀ ବଡ଼ ଖୁଲାସା କରିଛନ୍ତି। ତାଙ୍କ ମତରେ ଆତତାୟୀମାନେ ଅତି ନିକଟରୁ ଗୁଳି ଚଳାଇଥିଲେ ଏବଂ ଏହି ଆକ୍ରମଣ ସମ୍ପୂର୍ଣ୍ଣ ରୂପେ "ପୂର୍ବ ଯୋଜନାବଦ୍ଧ" ଥିଲା ବୋଲି ସନ୍ଦେହ କରାଯାଉଛି।

ଗଣମାଧ୍ୟମ ଏଜେନ୍ସି ଏଏନଆଇ (ANI) ଅନୁଯାୟୀ, ପ୍ରତ୍ୟକ୍ଷଦର୍ଶୀ ଜଣକ କହିଛନ୍ତି, "ଚନ୍ଦ୍ରନାଥଙ୍କ କାର୍ ମୋ କାର୍ ଅତିକ୍ରମ କରିବା ମାତ୍ରେ ହଠାତ୍ ଅଧା ରାସ୍ତାରେ ଅଟକି ଯାଇଥିଲା। ଏହାପରେ ବାଇକ୍‌ରେ ଆସିଥିବା ଜଣେ ବ୍ୟକ୍ତି କାର୍‌ର ବାମ ପାର୍ଶ୍ୱରୁ ଗୁଳି ଚଳାଇବା ଆରମ୍ଭ କରିଥିଲେ।" ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଗୁଳି ଚଳାଇଥିବା ବ୍ୟକ୍ତି ଜଣକ ଖୁବ୍ ପାରଙ୍ଗମ ଥିଲେ ଏବଂ ଘଟଣାସ୍ଥଳରୁ ତୁରନ୍ତ ଫେରାର ହୋଇଯାଇଥିଲେ। ରାତି ୧୦:୩୦ ରୁ ୧୧ ଟା ମଧ୍ୟରେ ଡାକ୍ତରଖାନାରୁ ପ୍ରାୟ ୨୦୦ ରୁ ୩୦୦ ମିଟର ଦୂରରେ ଏହି ଘଟଣା ଘଟିଥିଲା। ସେ ଦୁଇ ରାଉଣ୍ଡ ଗୁଳି ଶବ୍ଦ ଶୁଣିଥିଲେ। ଲୋକମାନେ ତୁରନ୍ତ ପୀଡ଼ିତଙ୍କୁ ଡାକ୍ତରଖାନା ନେଇଥିଲେ। ଏହି ଆକ୍ରମଣରେ କାର୍‌ର ଡ୍ରାଇଭର ମଧ୍ୟ ଗୁଳିମାଡ଼ର ଶିକାର ହୋଇଛନ୍ତି।

ଏହି ଘଟଣା ପରେ ପଶ୍ଚିମବଙ୍ଗ ବିଜେପି ନେତ୍ରୀ ଅଗ୍ନିମିତ୍ରା ପଲ୍ ଏହା ପଛରେ ରାଜନୈତିକ ଉଦ୍ଦେଶ୍ୟ ଥିବା ଅଭିଯୋଗ କରିଛନ୍ତି। ସେ କହିଛନ୍ତି ଯେ, ସିସିଟିଭି (CCTV) ଫୁଟେଜ୍ ଯାଞ୍ଚ କରାଯାଉଛି। ଭବାନୀପୁରରେ ମମତା ବାନାର୍ଜୀଙ୍କ ପରାଜୟର ଏହା ଏକ ପରିଣାମ ହୋଇପାରେ ବୋଲି ସେ ଆଶଙ୍କା ପ୍ରକାଶ କରିଛନ୍ତି। ଅଗ୍ନିମିତ୍ରା ପଲ୍ କହିଛନ୍ତି ଯେ, ଚନ୍ଦ୍ରନାଥ ଜଣେ ବିଶ୍ୱସ୍ତ ବ୍ୟକ୍ତି ଥିଲେ ଏବଂ ବିରୋଧୀ ଦଳ ନେତାଙ୍କ କାର୍ଯ୍ୟାଳୟର ସମସ୍ତ ଦାୟିତ୍ୱ ତୁଲାଉଥିଲେ। ସାଧାରଣ ଜନତା ଏବଂ ଦଳୀୟ କର୍ମୀଙ୍କ ମଧ୍ୟରେ ଏହି ହତ୍ୟାକାଣ୍ଡକୁ ନେଇ ପ୍ରବଳ ଅସନ୍ତୋଷ ଦେଖାଦେଇଛି। ସେହିପରି ବିଜେପି ନେତା ସୁଭେନ୍ଦୁ ଅଧିକାରୀ ଏହାକୁ ଏକ ସୁଚିନ୍ତିତ ଷଡ଼ଯନ୍ତ୍ର ବୋଲି ବର୍ଣ୍ଣନା କରିବା ସହ ଦୋଷୀଙ୍କୁ କଠୋର ଦଣ୍ଡ ଦିଆଯିବ ବୋଲି ପ୍ରତିଶ୍ରୁତି ଦେଇ ଦଳୀୟ କର୍ମୀଙ୍କୁ ଶାନ୍ତି ବଜାୟ ରଖିବାକୁ ନିବେଦନ କରିଛନ୍ତି।

ଅନ୍ୟପକ୍ଷରେ, ଶାସକ ଦଳ ତୃଣମୂଳ କଂଗ୍ରେସ (TMC) ଏହି ଘଟଣାକୁ ଦୃଢ଼ ନିନ୍ଦା କରିଛି ଏବଂ ଏହାର ସିବିଆଇ (CBI) ତଦନ୍ତ ଦାବି କରିଛି। ଟିଏମସି ନିଜ ସୋସିଆଲ୍ ମିଡିଆ ହ୍ୟାଣ୍ଡେଲ୍ 'ଏକ୍ସ' (X) ରେ ଲେଖିଛି ଯେ, "ମଧ୍ୟମଗ୍ରାମରେ ଚନ୍ଦ୍ରନାଥ ରଥଙ୍କ ନୃଶଂସ ହତ୍ୟାକାଣ୍ଡକୁ ଆମେ କଡ଼ା ନିନ୍ଦା କରୁଛୁ।" ଏହା ସହ ଟିଏମସି ଅଭିଯୋଗ କରିଛି ଯେ ଗତ ତିନି ଦିନ ମଧ୍ୟରେ ଆଦର୍ଶ ଆଚରଣ ବିଧି ଲାଗୁ ହୋଇଥିଲେ ମଧ୍ୟ ବିଜେପି ସମର୍ଥିତ ଦୁର୍ବୃତ୍ତଙ୍କ ଦ୍ୱାରା ନିର୍ବାଚନ ପରବର୍ତ୍ତୀ ହିଂସାରେ ଅନ୍ୟ ତିନିଜଣ ଟିଏମସି କର୍ମୀଙ୍କୁ ମଧ୍ୟ ହତ୍ୟା କରାଯାଇଛି। ଏହି ଘଟଣାରେ କୋର୍ଟଙ୍କ ତତ୍ତ୍ୱାବଧାନରେ ସିବିଆଇ ତଦନ୍ତ ସହିତ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଟିଏମସି ଦାବି କରିଛି।

ପଶ୍ଚିମବଙ୍ଗ: ପଶ୍ଚିମବଙ୍ଗ ବିଧାନସଭା ନିର୍ବାଚନ ୨୦୨୬ରେ ଭାରତୀୟ ଜନତା ପାର୍ଟି (ବିଜେପି) ଐତିହାସିକ ବିଜୟ ହାସଲ କରିବାକୁ ଯାଉଛି। ଭାରତୀୟ ନିର୍ବାଚନ ଆୟୋଗ (ECI)ର ସଦ୍ୟତମ ଟ୍ରେଣ୍ଡ ଅନୁଯାୟୀ, ୨୯୪ ଆସନ ବିଶିଷ୍ଟ ପଶ୍ଚିମବଙ୍ଗ ବିଧାନସଭାରେ ବିଜେପି ୧୮୧ଟି ଆସନରେ ଆଗୁଆ ରହି ବହୁମତ ହାସଲ କରିଛି (ବହୁମତ ସଂଖ୍ୟା ୧୪୮)।

ଏହି ଐତିହାସିକ ବିଜୟ ସହିତ ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସ (ଟିଏମସି)ର ୧୫ ବର୍ଷର ଶାସନର ଅନ୍ତ ଘଟିବାକୁ ଯାଉଛି। କ୍ରମାଗତ ତିନିଥର କ୍ଷମତାରେ ରହିବା ପରେ ଏଥର ଟିଏମସି ତିନି ଅଙ୍କ ଛୁଇଁବା ନେଇ ସଂଘର୍ଷ କରୁଥିବା ଦେଖିବାକୁ ମିଳିଛି। ଶାସନ ବିରୋଧୀ ହାୱା, ଆଇନଶୃଙ୍ଖଳା ପରିସ୍ଥିତି ଏବଂ ଅନୁପ୍ରବେଶ ପ୍ରସଙ୍ଗକୁ ମୁଦ୍ଦା କରି ବିଜେପି ଏହି ବିପୁଳ ସଫଳତା ପାଇଛି। ଏଥର ପଶ୍ଚିମବଙ୍ଗରେ ସ୍ୱାଧୀନତା ପରଠାରୁ ସର୍ବାଧିକ ଭୋଟ୍ ହାର ରେକର୍ଡ କରାଯାଇଛି (ପ୍ରଥମ ପର୍ଯ୍ୟାୟରେ ୯୩.୧୯% ଏବଂ ଦ୍ୱିତୀୟ ପର୍ଯ୍ୟାୟରେ ୯୧.୬୬%)।

ମୁଖ୍ୟମନ୍ତ୍ରୀ ପଦ ପାଇଁ ଦୌଡ଼ରେ ଅଛନ୍ତି କେଉଁ ନେତା?
ପଶ୍ଚିମବଙ୍ଗରେ ବିଜେପି ସରକାର ଗଢ଼ିବା ସ୍ପଷ୍ଟ ହେବା ପରେ ଏବେ ଦଳର ମୁଖ୍ୟମନ୍ତ୍ରୀ ଚେହେରା କିଏ ହେବେ, ତାହାକୁ ନେଇ ଚର୍ଚ୍ଚା ଜୋର୍ ଧରିଛି। ନିର୍ବାଚନ ପ୍ରଚାର ସମୟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ସୂଚନା ଦେଇଥିଲେ ଯେ ବିଜେପି ଜିତିଲେ ଜଣେ ବଙ୍ଗୀୟ ଏବଂ ବଙ୍ଗଳା କହୁଥିବା ନେତାଙ୍କୁ ମୁଖ୍ୟମନ୍ତ୍ରୀ କରାଯିବ। ମୁଖ୍ୟମନ୍ତ୍ରୀ ଦୌଡ଼ରେ ଥିବା ପ୍ରମୁଖ ନେତାମାନେ ହେଲେ:

ଶୁଭେନ୍ଦୁ ଅଧିକାରୀ: ପୂର୍ବତନ ଟିଏମସି ନେତା ତଥା ବର୍ତ୍ତମାନର ବିଜେପି ନେତା ଶୁଭେନ୍ଦୁ ଅଧିକାରୀଙ୍କୁ ଜଣେ ଲୋକପ୍ରିୟ ଚେହେରା ଏବଂ ଦକ୍ଷିଣ ବଙ୍ଗର ଜଣେ ଶକ୍ତିଶାଳୀ ଜନନେତା ଭାବରେ ବିବେଚନା କରାଯାଏ।

ଦିଲୀପ ଘୋଷ: ପୂର୍ବତନ ରାଜ୍ୟ ବିଜେପି ସଭାପତି ତଥା ଦକ୍ଷ ସଂଗଠକ ଏବଂ ବାଗ୍ମୀ ନେତା ଦିଲୀପ ଘୋଷ ମଧ୍ୟ ଏହି ଦୌଡ଼ରେ ଆଗରେ ଅଛନ୍ତି। ସେହିପରି ମୁକୁଲ ରାୟ ଓ ରାହୁଲ ସିହ୍ନାଙ୍କ ନାମ ମଧ୍ୟ ଚର୍ଚ୍ଚାରେ ରହିଛି।

ରୂପା ଗାଙ୍ଗୁଲି: ସୋନାପୁର ଦକ୍ଷିଣରୁ ପ୍ରାର୍ଥୀ ତଥା ବିଜେପିର ପ୍ରମୁଖ ମହିଳା ଚେହେରା ରୂପା ଗାଙ୍ଗୁଲି। ସେ ବର୍ତ୍ତମାନ ଚାଲିଥିବା ନିର୍ବାଚନ ଗଣତିରେ ଆଗୁଆ ଅଛନ୍ତି ଏବଂ ତାଙ୍କୁ ମୁଖ୍ୟମନ୍ତ୍ରୀ ପଦର ଏକ ଶକ୍ତିଶାଳୀ ଦାବିଦାର ମନେ କରାଯାଉଛି।

ସମୀକ ଭଟ୍ଟାଚାର୍ଯ୍ୟ: ରାଜ୍ୟ ବିଜେପି ସଭାପତି ତଥା ବରିଷ୍ଠ ଆରଏସଏସ ନେତା ସମୀକ ଭଟ୍ଟାଚାର୍ଯ୍ୟ ମଧ୍ୟ ଦୌଡ଼ରେ ଅଛନ୍ତି। ୨୦୨୪ରୁ ରାଜ୍ୟସଭା ସାଂସଦ ଥିବା ସମୀକ, ରାଜ୍ୟରେ ବିଜେପି ସଂଗଠନକୁ ମଜବୁତ କରିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି।

ନିଶୀଥ ପ୍ରାମାଣିକ: ଉତ୍ତର ବଙ୍ଗର ପ୍ରମୁଖ ଚେହେରା ଏବଂ ପୂର୍ବତନ କେନ୍ଦ୍ରମନ୍ତ୍ରୀ ନିଶୀଥ ପ୍ରାମାଣିକ, ଯିଏକି ବିଶେଷକରି କୁଚବିହାର ଅଞ୍ଚଳରେ ଦଳର ସ୍ଥିତି ମଜବୁତ କରିଛନ୍ତି। ସେ ଏବେ ମାଥାଭାଙ୍ଗାରୁ ନିର୍ବାଚନ ଲଢୁଛନ୍ତି।

ଅଗ୍ନିମିତ୍ରା ପଲ୍: ଆସାନସୋଲ ଦକ୍ଷିଣର ବିଧାୟିକା ତଥା ରାଜ୍ୟ ଉପାଧ୍ୟକ୍ଷା ଅଗ୍ନିମିତ୍ରା ପଲ୍। ଜଣେ ସକ୍ରିୟ ଏବଂ ସ୍ପଷ୍ଟବାଦୀ ମହିଳା ନେତ୍ରୀ ଭାବରେ ସେ ରାଜ୍ୟରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି।

ଅନ୍ତିମ ଫଳାଫଳ ଆସିବା ପରେ କେନ୍ଦ୍ରୀୟ ନେତୃତ୍ୱ ଏବଂ ନବନିର୍ବାଚିତ ବିଧାୟକଙ୍କ ସହିତ ଆଲୋଚନା କରି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ମୁଖ୍ୟମନ୍ତ୍ରୀ ଚୟନ ନେଇ ଚୂଡ଼ାନ୍ତ ନିଷ୍ପତ୍ତି ନେବ। ଯଦି ଏହି ଟ୍ରେଣ୍ଡ୍ ଶେଷ ପର୍ଯ୍ୟନ୍ତ କାଏମ ରହେ, ତେବେ ଦଶନ୍ଧି ପରେ ପଶ୍ଚିମବଙ୍ଗ ପ୍ରଥମ ଥର ପାଇଁ ଏକ ଅଣ-ଟିଏମସି ଏବଂ ଅଣ-ବାମପନ୍ଥୀ ସରକାର ଦେଖିବାକୁ ଯାଉଛି।

କୋଲକାତା: ପଶ୍ଚିମବଙ୍ଗ ବିଧାନସଭା ନିର୍ବାଚନ ୨୦୨୬ ପାଇଁ ଭାରତୀୟ ଜନତା ପାର୍ଟି (ବିଜେପି) ସୋମବାର ନିଜର ପ୍ରଥମ ପ୍ରାର୍ଥୀ ତାଲିକା ଘୋଷଣା କରିଛି। ଆଗାମୀ ନିର୍ବାଚନରେ ମୋଟ ୨୯୪ଟି ଆସନ ମଧ୍ୟରୁ ବିଜେପି ପ୍ରଥମ ପର୍ଯ୍ୟାୟରେ ୧୪୪ ଜଣ ପ୍ରାର୍ଥୀଙ୍କ ନାମ ଘୋଷଣା କରିଛି। ରାଜ୍ୟରେ ଏପ୍ରିଲ୍ ୨୩ ଓ ୨୯ ତାରିଖରେ ଦୁଇଟି ପର୍ଯ୍ୟାୟରେ ମତଦାନ ଅନୁଷ୍ଠିତ ହେବ ଏବଂ ମେ ୪ ତାରିଖରେ ଫଳାଫଳ ପ୍ରକାଶ ପାଇବ। କ୍ଷମତାସୀନ ତୃଣମୂଳ କଂଗ୍ରେସ (ଟିଏମସି) ଏବଂ ବିଜେପି ମଧ୍ୟରେ ଚଳିତ ନିର୍ବାଚନରେ ଏକ କଡ଼ା ଟକ୍କର ଦେଖିବାକୁ ମିଳିବ।

ବିଜେପିର ଏହି ପ୍ରଥମ ତାଲିକାରେ ୧୦ ଜଣ ମହିଳା ପ୍ରାର୍ଥୀ ସ୍ଥାନ ପାଇଛନ୍ତି। ଦଳର ହେଭିୱେଟ୍ ନେତା ତଥା ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀଙ୍କୁ ଭବାନୀପୁର ନିର୍ବାଚନମଣ୍ଡଳୀରୁ ଟିକେଟ୍ ମିଳିଥିବା ବେଳେ ଦିଲୀପ ଘୋଷଙ୍କୁ ଖଡ଼ଗପୁର ସଦର ଏବଂ ଅଗ୍ନିମିତ୍ରା ପଲ୍‌ଙ୍କୁ ଆସାନସୋଲ୍ ଦକ୍ଷିଣ ଆସନରୁ ପ୍ରାର୍ଥୀ କରାଯାଇଛି। ରବିବାର ଦିନ ଭାରତୀୟ ନିର୍ବାଚନ ଆୟୋଗ (ECI) ପଶ୍ଚିମବଙ୍ଗ ସମେତ ୪ଟି ରାଜ୍ୟ ଓ ଗୋଟିଏ କେନ୍ଦ୍ରଶାସିତ ଅଞ୍ଚଳ ପାଇଁ ନିର୍ବାଚନ ତାରିଖ ଘୋଷଣା କରିବା ପରେ ବିଜେପି ପକ୍ଷରୁ ଏହି ତାଲିକା ଜାରି କରାଯାଇଛି।

ପଶ୍ଚିମବଙ୍ଗରେ ଏବେ ବି ୪୨ ଲକ୍ଷରୁ ଅଧିକ ଭୋଟରଙ୍କ ଭବିଷ୍ୟତ ଅନିଶ୍ଚିତତା ମଧ୍ୟରେ ରହିଛି, କାରଣ ଏମାନଙ୍କ ନାମ ଭୋଟର ତାଲିକାରେ 'ଯୁକ୍ତିଯୁକ୍ତ ଅସଙ୍ଗତି' (logical discrepancy) ବର୍ଗରେ ରଖାଯାଇଛି ଏବଂ ସେଗୁଡ଼ିକର ବିଚାର ବିଭାଗୀୟ ସମୀକ୍ଷା ଚାଲିଛି। ମୁଖ୍ୟ ନିର୍ବାଚନ ଅଧିକାରୀ (CEO) ଙ୍କ କାର୍ଯ୍ୟାଳୟ ତଥ୍ୟ ଅନୁଯାୟୀ, ଗତ ନଭେମ୍ବର ମାସରେ ସ୍ୱତନ୍ତ୍ର ସଂଶୋଧନ ପୂର୍ବରୁ ରାଜ୍ୟରେ ମୋଟ ଭୋଟରଙ୍କ ସଂଖ୍ୟା ଥିଲା ୭,୬୬,୩୭,୫୨୯। କିନ୍ତୁ ଫେବୃଆରୀ ୨୮ ତାରିଖରେ ପ୍ରକାଶିତ ଚୂଡ଼ାନ୍ତ ତାଲିକାରେ ଏହି ସଂଖ୍ୟା ଖସି ଆସି ୬,୪୪,୫୨,୬୦୯ ରେ ପହଞ୍ଚିଛି। ଏଥିରେ ପ୍ରାୟ ୩.୨୮ କୋଟି ପୁରୁଷ ଏବଂ ୩.୧୬ କୋଟି ମହିଳା ତଥା ହଜାରେରୁ ଅଧିକ ତୃତୀୟ ଲିଙ୍ଗୀ ଭୋଟର ସାମିଲ ଅଛନ୍ତି।

ପ୍ରାୟ ୬୦ ଲକ୍ଷ ଭୋଟରଙ୍କ ତଥ୍ୟକୁ ବିଚାର ବିଭାଗୀୟ ସମୀକ୍ଷା ପାଇଁ ପଠାଯାଇଥିଲା। ସେଥିମଧ୍ୟରୁ ପ୍ରାୟ ୧୮ ଲକ୍ଷ ଭୋଟରଙ୍କ ସମୀକ୍ଷା ପ୍ରକ୍ରିୟା ଶେଷ ହୋଇଥିବା ବେଳେ ବାକି ୪୨ ଲକ୍ଷରୁ ଊର୍ଦ୍ଧ୍ୱ ମାମଲା ଏବେ ବି ବିଚାରାଧୀନ ରହିଛି। ଏହି ପ୍ରକ୍ରିୟାକୁ ଶୀଘ୍ର ଶେଷ କରିବା ପାଇଁ ମୋଟ ୭୩୨ ଜଣ ବିଚାର ବିଭାଗୀୟ ଅଧିକାରୀ ନିୟୋଜିତ ହୋଇଛନ୍ତି। ଏହି କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ପଡ଼ୋଶୀ ରାଜ୍ୟ ଓଡ଼ିଶା ଏବଂ ଝାଡ଼ଖଣ୍ଡରୁ ୧୦୦ ଜଣ ଲେଖାଏଁ ଅଧିକାରୀ ଦିନରାତି କାର୍ଯ୍ୟ କରୁଛନ୍ତି।

ଅନ୍ୟପଟେ ଶନିବାର ଦିନ ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ଟିଏମସି ଓ ବିଜେପି ସମର୍ଥକଙ୍କ ମଧ୍ୟରେ ହୋଇଥିବା ସଂଘର୍ଷକୁ ନେଇ ନିର୍ବାଚନ ଆୟୋଗ ଚିନ୍ତା ବ୍ୟକ୍ତ କରିଛନ୍ତି। ଆଦର୍ଶ ଆଚରଣ ବିଧି (MCC) ଲାଗୁ ହୋଇସାରିଥିବାରୁ ଏଭଳି ହିଂସାକାଣ୍ଡ ଘଟାଇଲେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିର୍ବାଚନ କମିଶନର ସ୍ପଷ୍ଟ କରିଛନ୍ତି।