ବ୍ରହ୍ମପୁର: ବ୍ରହ୍ମପୁର ଏମକେସିଜି ମେଡିକାଲ କଲେଜ ଓ ହସ୍ପିଟାଲରୁ ୭ ଜଣ ଦଲାଲଙ୍କୁ ଗିରଫ ବ୍ରହ୍ମପୁର ପୁଲିସ ଗରିଫ କରିଛି। ଦୀର୍ଘ ୪ବର୍ଷ ପରେ ପୁଣି ଅପରେସନ ଦଲାଲ ଆରମ୍ଭ କରିଛି। ଦଲାଲଙ୍କୁ ଧରିବାକୁ ବ୍ରହ୍ମପୁର ଏସପି ଡା. ସର୍ବଣା ବିବେକ ଏମ ଯୋଜନା କରିଥିଲେ। କୌଣସି ଥାନାକୁ ସୂଚନା ନଦେଇ ନିଜେ ଏସପି ନେତୃତ୍ୱ ନେଇଥିଲେ।

ଆଜି ସକାଳୁ ୧୫ଜଣ କନେଷ୍ଟବଳଙ୍କୁ ବିଭିନ୍ନ ୱାର୍ଡକୁ ପଠାଇଥିଲେ। ସମସ୍ତେ ଗାଉଳିଆ ବେଶରେ ଥିଲେ। କିଏ ଲୁଙ୍ଗି ଟାୱଲ ପିନ୍ଧିଥିଲେ ତ ଆଉ କିଏ ହାପ ପ୍ୟାଣ୍ଟ ସହ ମଇଳା ସାର୍ଟ ପିନ୍ଧିଥିଲେ। ସେମାନେ ବିଭିନ୍ନ ୱାର୍ଡକୁ ଯିବା ପରେ ଦଲାଲ ମାନେ ତାଙ୍କ ପାଖକୁ ଆସିଥିଲେ।

ଦଲାଲଙ୍କୁ ଦେଖି ଜଣେ କନେଷ୍ଟବଳ କାହ୍ନା ଡାକୁଆ ସୁରଟ ଯିବାର ଅଛି ଜଲଦି ଡାକ୍ତରଙ୍କୁ ଦେଖା କରାଇଦେବାକୁ କହିଥିଲେ। କହ୍ନାଙ୍କୁ ନ୍ୟୁରୋ ସର୍ଜରୀ ବିଭାଗରୁ ଘରୋଇ ଡାକ୍ତରଖାନାକୁ ନେବା ବେଳେ ଜଣେ ଦଲାଲଙ୍କୁ କାବୁ କରିଥିଲା। ପରେ ଆଉଟଡୋରରେ ବୁଲୁଥିବା ଅନ୍ୟ ଦଲାଲଙ୍କୁ ଗିରଫ କରିଥିଲା ପୁଲିସ। ଏସପି ଡା ସର୍ବଣା ବିବେକ ଏମ , ଏସଡିପିଓ ରାଜୀବ ଲୋଚନ ପଣ୍ଡା, ବୈଦ୍ୟନାଥପୁର ଥାନା ଆଇଆଇସି ରାମ କୁମାର ମୁର୍ମୁ ଓ ମେଡିକାଲ ଫାଣ୍ଡି ଅଧିକାରୀ ଭୈରବ କୁମାର ଭୁଆଁ ଘଟଣା ସ୍ଥଳରେ ପହଞ୍ଚିଥିଲେ। ଘଟଣାର ତଦନ୍ତ ଜାରି ରହିଛି। ଏମାନଙ୍କ ଲିଙ୍କରେ ଯେଉଁ ମାନେ ଅଛନ୍ତି ସମସ୍ତଙ୍କୁ ଗିରଫ କରାଯିବ ବୋଲି  ଏସପି କହିଛନ୍ତି।

ବ୍ରହ୍ମପୁର: ବ୍ରହ୍ମପୁର MKCG ମେଡିକାଲ କଲେଜରେ ଅଗ୍ନିକାଣ୍ଡ । ପ୍ଲାଷ୍ଟିକ୍ ସର୍ଜରୀ ୱାର୍ଡରେ ନିଆଁ ଲାଗିଥିବା ଜଣାପଡ଼ିଛି। ୱାର୍ଡରୁ ଧୂଆଁ ବାହାରିବାରୁ କିଛି ରୋଗୀ ବାହାରକୁ ଚାଲି ଆସିଥିଲେ। ଏହାପରେ ୨ ରୋଗୀଙ୍କୁ ସ୍ଥାନାନ୍ତର କରାଯାଇଛି। ନିୟନ୍ତ୍ରଣ ପାଇଁ ଅଗ୍ନିଶମ ବାହିନୀକୁ କଲେଜ ଅଧୀକ୍ଷକ ସୂଚନା ଦେଇଥିଲେ। ଖବର ପାଇ ଘଟଣା ସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛନ୍ତି। ତେବେ ବର୍ତ୍ତମାନ ସୁଦ୍ଧା ଅଗ୍ନିକାଣ୍ଡର କାରଣ ସ୍ପଷ୍ଟ ହୋଇ ନ ଥିବା ବେଳେ ପ୍ରାଥମିକ ତଦନ୍ତରୁ ଆଗ୍ନିକାଣ୍ଡର କାରଣ ସର୍ଟସର୍କିଟ ଯୋଗୁଁ ହୋଇଥିବା ଆନୁମାନ କରାଯାଉଛି।

ବ୍ରହ୍ମପୁର: ଛୋଟମୋଟ ଅବ୍ୟବସ୍ଥା ହିଁ ବିଭିନ୍ନ ବିଭାଗର ପାରିବାର ପଣିଆକୁ ପଦାରେ ପକାଇଥାଏ। ଉନ୍ନତ ଭିତ୍ତିଭୂମି ସହିତ ଲୋକଙ୍କ ସୁବିଧାକୁ ସରକାର ସବୁବେଳେ ଗୁରୁତ୍ୱ ଦେଇ ଆସିଛନ୍ତି। କିନ୍ତୁ ଉଚିତ ରକ୍ଷଣାବେକ୍ଷଣ ଅଭାବରୁୁ ବହୁ ସ୍ଥାନରେ ଜୁଗାଡ କରି ସଂସ୍ଥା ଚାଲୁ ରଖାଯାଇଥିବା ଦେଖିବାକୁ ମିଳିଛି। ଏମକେସିଜି ମେଡ଼ିକାଲ କଲେଜର ସିଟି ସ୍କାନ ରୁମ ଆଗରେ ରୋଗୀଙ୍କ ପାଇଁ ଦୁଇଟି ଚେୟାର ପଡ଼ିଛି। ସେଥିରୁ ଗୋଟିଏର ଷ୍ଟାଣ୍ଡ ଭାଙ୍ଗି ଯାଇଛି। ମରାମତି କରାଯିବା ପରିବର୍ତ୍ତେ ସିମେଣ୍ଟ ଇଟାକୁ ବ୍ୟବହାର କରି ଚେୟାରକୁ ଚଳନୀୟ କରାଯାଇଛି। ସିଟି ସ୍କାନ ପାଇଁ ଆସିଥିବା ରୋଗୀ ଏଠାରେ ଅପେକ୍ଷା କରିବା ପାଇଁ ବସିଥାନ୍ତି। ଏଠାକୁ ବହୁ ଗୁରତର ରୋଗୀ ମଧ୍ୟ ଆସିଥାନ୍ତି। ସେଠାରେ ସିମେଣ୍ଟ ଇଟା କେତେ ସୁରକ୍ଷିତ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏତେବଡ଼ ମେଡ଼ିକାଲରେ ଏଭଳି ଛୋଟିଆ ଘଟଣା ଉପରେ ସ୍ୱାସ୍ଥ୍ୟ ପ୍ରଶାସନର ନଜର ପଡ଼ୁନଥିବାରୁ ରୋଗୀ ଓ ସମ୍ପର୍କିୟଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ସେଠାରେ ବସିବାକୁ ରୋଗୀ ଅମଙ୍ଗ ହେଉଥିବା ବେଳେ ପଡ଼ିଯିବାର ଭୟ ଘାରୁଛି। ସ୍ଥାନୀୟ ପ୍ରଶାସନ ଏଥିପ୍ରତି ଗୁରୁତ୍ୱ ଦେବା ସହ ଚେୟାର ପରିବର୍ତ୍ତନ ଅଥବା ମରାମତି କରିବାକୁ ଦାବି ହୋଇଛି।