ଲଡେରହିଲ (ଆମେରିକା) : ଆମେରିକାର ଫ୍ଲୋରିଡାରେ ଭାରତ ଓ ୱେଷ୍ଟଇଣ୍ଡିଜ ମଧ୍ୟରେ ଚତୁର୍ଥ ଟି-୨୦ ମ୍ୟାଚ ଆଜି ଖେଳାଯିବ। ୫ ମ୍ୟାଚ୍‍ ବିଶିଷ୍ଟ ଏହି ସିରିଜରେ ଭାରତ ୨-୧ରେ ଅଗ୍ରଣୀ ହାସଲ କରିଛି। ଫଳରେ ଚତୁର୍ଥ ମ୍ୟାଚ୍‍ ଜିତି ଭାରତ ସିରିଜ ହାତେଇବା ଲକ୍ଷ୍ୟରେ ରହିଛି। ପୂର୍ବରୁ ଅନୁଷ୍ଠିତ ଦିନିକିଆ ସିରିଜରେ ଭାରତ ୩-୦ରେ ୱେଷ୍ଟଇଣ୍ଡିଜକୁ ପରାସ୍ତ କରିଥିଲା। ଅଷ୍ଟ୍ରେଲିଆରେ ଆସନ୍ତା ଅକ୍ଟୋରବ- ନଭେମ୍ବରରେ ଟି-୨୦ ବିଶ୍ୱକପ୍‍ର ଅଷ୍ଟମ ସଂସ୍କରଣ ଆୟୋଜନ ହେବାକୁ ଯାଉଥିବାରୁ ଦଳ ଚୟନ ପାଇଁ ଏହି ସିରିଜ ଭାରତ ପାଇଁ ଯଥେଷ୍ଟ ଗୁରୁତ୍ୱ ବହନ କରୁଛି। ଭାରତର ପ୍ରଦର୍ଶନ ଆଶାନୁରୂପ ହୋଇଛି। ତେବେ ଶ୍ରେୟଶ ଆୟାରଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିଛି। ଭାରତ ପ୍ରଥମ ଟି-୨୦କୁ ୬୮ ରନରେ ଏବଂ ୩ୟ ମ୍ୟାଚକୁ ୭ ୱିକେଟ୍‍ରେ ବିଜୟୀ ହୋଇଥିଲା। ଦ୍ୱିତୀୟ ମୁକାବିଲରେ ଘରୋଇ ୱେଷ୍ଟଇଣ୍ଡିଜ୍‍ ୫ ୱିକେଟରେ ବିଜୟ ହାସଲ କରିଥିଲା।

ବିଶ୍ବକପ୍‌ ଦଳ ଚୂଡାନ୍ତ ପୂର୍ବରୁ ଏବେ ଭାରତୀୟ ଚୟନକର୍ତାଙ୍କ ବିଶେଷ ନଜର ରହିଛି ଶ୍ରେୟସ ଆୟରଙ୍କ ଉପ‌ରେ। ହଠାତ୍‌ ଅସ୍ଥିର ପ୍ରଦର୍ଶନ ପର୍ଯ୍ୟାୟରେ ସମୟ କାଟୁଛନ୍ତି ଏହି ଶୀର୍ଷକ୍ରମ ବ୍ୟାଟର୍‌। ଅନ୍ୟପକ୍ଷରେ ଦୀପକ ହୁଡାଙ୍କୁ ମିଳିଥିବା ସୀମିତ ସୁଯୋଗକୁ ସେ ସଦ୍‌ବ୍ୟବହାର କରିଛନ୍ତି। ବିଶ୍ବକପ୍‌ ଦଳ ପାଇଁ ହୁଡା ଦାବିଦାର ହେଲେଣି। ଏସିଆ କପ୍‌ ଚୂଡାନ୍ତ ଏକାଦଶ ଦଳକୁ ବିରାଟ କୋହଲି ଏବଂ କେଏଲ୍ ରାହୁଲ ଫେରିବା ନିଶ୍ଚିତ ଥିବାରୁ ୨୭ ବର୍ଷୀୟ ଆୟରଙ୍କ ପାଇଁ ସମୟ ସରିସରି ଆସୁଛି ବୋଲି ବିବେଚନା କରାଯାଉଛି। ରାହୁଲ ଦ୍ରାବିଡ଼ଙ୍କ କାର୍ଯ୍ୟକାଳ ଆରମ୍ଭରୁ କୌଣସି ଖେଳାଳିଙ୍କୁ ଅନ୍ୟାୟ‌ର ଶିକାର ହେବାକୁ ଦିଆଯାଉନାହିଁ। ଯାହାକୁ ସୁଯୋଗ ମିଳୁଛି ପର୍ଯ୍ୟାପ୍ତ ରହୁଛି। ଆୟରଙ୍କ‌ କ୍ଷେତ୍ରରେ କିନ୍ତୁ ଟିକିଏ ଏହା ଭିନ୍ନ ରହିଛି। ଦିନିକିଆ ତୁଳନାରେ ସେ ଟ୍ବେଣ୍ଟି-୨୦ରେ ବିଶେଷ ପ୍ରଭାବ ଛାଡ଼ିନାହାନ୍ତି। ବିଗତ ଅଢ଼େଇ ମାସରେ ସେ ୯ଟି ଟ୍ବେଣ୍ଟି-୨୦ ଖେଳିଥିବା ବେଳେ ମାତ୍ର ଥରେ ୫୦ ଟପିଛନ୍ତି। ଗୋଟିଏ ବର୍ଷାରେ ଧୋଇଯାଇଥିଲା। ୱେଷ୍ଟଇଣ୍ଡିଜ୍ ବିପକ୍ଷରେ ଶେଷ ଦୁଇ ମ୍ୟାଚ୍‌ରେ ସେ ଖେଳିଲେ ନିଶ୍ଚିତ ପ୍ରଭାବ ଛାଡ଼ିବାକୁ ଚାହିଁବେ। କାରଣ ଏସିଆ କପ୍‌ ଦଳରେ ସାମିଲ ରହିଲେ ବି ସେ ଚୂଡାନ୍ତ ଏକାଦଶକୁ ଆସିବା କଷ୍ଟକର ହେବ।

ଚଳିତ ବର୍ଷ ବିଶ୍ବକପ୍‌ ଖେଳାଯିବାକୁ ଥିବାରୁ ଭାରତ ପାଇଁ ଏହି ଶୃଙ୍ଖଳା ଗୁରୁତ୍ବ ବହନ କରୁଛି। ତୃତୀୟ ମ୍ୟାଚ୍‌ ବେଳେ ମାଂଶପେଶୀ ଟାଣି ହୋଇଯିବାରୁ ରିଟାର୍ଡ ହର୍ଟ ହୋଇଥିବା ଅଧିନାୟକ ରୋହିତ ଶର୍ମା ଫିଟ୍‌ ଘୋଷିତ ହୋଇଥିବାରୁ ଶନିବାର ମ୍ୟାଚ୍ ଖେଳିବା ସମ୍ଭାବନା ଉଜ୍ବଳ ରହିଛି। ଲୌଡରହିଲ୍‌ରେ ଭାରତୀୟ ଦଳକୁ ଉତ୍ସାହିତ କରିବାକୁ ମଧ୍ୟ ବହୁ ପ୍ରଶଂସକ ପ୍ରତ୍ୟେକ୍ଷ ଭାବେ ଉପସ୍ଥିତ ରହିବେ। ଭାରତ ଏବେ ଆହତ ହର୍ଷଲ ପଟେଲ ଫିଟ୍‌ ହୋଇଯାଇଥିବାରୁ ତାଙ୍କୁ ଅସ୍ଥିର ଆୱେସ ଖାନଙ୍କ ବଦଳରେ ଖେଳାଇବା ସ୍ଥିତିରେ ରହିଛି। କୁଲଦୀପ ଯାଦବଙ୍କୁ ଖେଳାଇବା କଥା ମଧ୍ୟ ରୋହିତ ଶର୍ମା ବିଚାର କରୁଛନ୍ତି। ଶେଷ ଥର ପାଇଁ ଲୌଡରହିଲ୍‌ରେ ୨୦୧୬ରେ ଭାରତ-ୱେଷ୍ଟଇଣ୍ଡିଜ୍‌ ୨ ମ୍ୟାଚ୍‌ ଶୃଙ୍ଖଳା ଖେଳିଥିବା ବେଳେ ଗୋଟିଏ ମ୍ୟାଚ୍‌ ବର୍ଷା ଧୋଇନେଇଥିଲା। ୱେଷ୍ଟଇଣ୍ଡିଜ୍‌ ୧-୦ରେ ଶୃଙ୍ଖଳା ଜିତିଥିଲା। କୋଭିଡ୍‌ ପ୍ରଭାବିତ ଶ୍ରୀଲଙ୍କା ଗସ୍ତକୁ ଛାଡ଼ି‌ଦେଲେ ଭାରତ ଶେଷ ଥର ପାଇଁ ୨୦୧୯ରେ ଅଷ୍ଟ୍ରେଲିଆ ନିକଟରୁ ହିଁ ଏକ ଟ୍ବେଣ୍ଟି-୨୦ ଶୃଙ୍ଖଳା ହାରିଥିଲା।

ପୋର୍ଟ ଅଫ ସ୍ପେନ୍‍: ଏକ ୩ ମ୍ୟାଚ ବିଶିଷ୍ଟ ଦିନିକିଆ କ୍ରିକେଟ ସିରିଜରେ ଭାରତ ଓ ଘରୋଇ ୱେଷ୍ଟଇଣ୍ଡିଜ୍‍ ପରସ୍ପରକୁ ଭେଟବେ। ଶୁକ୍ରବାର ସ୍ଥାନୀୟ କୁଇନ୍ସ ପାର୍କ ଓଭାଲ ଗ୍ରାଉଣ୍ଡରେ ଅଭିଜ୍ଞ ଓପନର ଶିଖର ଧାୱନଙ୍କ ନେତୃତ୍ୱାଧିନ ଭାରତ ନିକୋଲାସ ପୁରନଙ୍କ ୱେଷ୍ଟଇଣ୍ଡିଜ ଦଳକୁ ଭେଟିବ। କେବଳ ଦିନିକିଆ ଖେଳୁଥିବା ଧାୱନ ତାରକା ଖେଳାଳିମାନଙ୍କ ଅନୁପସ୍ଥିତିରେ ଭାରତର ନେତୃତ୍ୱ ନେଉଛନ୍ତି।

ଗତ ଫେବୃୟାରୟୀରେ ୱେଷ୍ଟଇଣ୍ଡିଜ ଭାରତ ଗସ୍ତରେ ଆସି ୩ଟି ଲେଖାଏ ଦିନିକିଆ ଓ ଟି-୨୦ ମ୍ୟାଚ୍‍ ଖେଳିଥିଲା। ପୁଣିଥରେ ଦୁଇଦଳ ୩ଟି ଦିନିକିଆ ସମେତ ୫ଟି ଟି-୨୦ ମ୍ୟାଚ୍‍ରେ ମୁହାଁମୁହିଁ ହେବେ। ଆଗକୁ ଅକ୍ଟୋବରରେ ଅଷ୍ଟ୍ରେଲିଆର ଟି-୨୦ ବିଶ୍ୱକପ୍‍ ଖେଳାଯିବ। ତେଣୁ ଦିନିକିଆ ସିରିଜ ଉପରେ ସେତେଟା ଗୁରୁତ୍ୱ ଦିଆଯାଉନାହିଁ। ତେବେ ବରିଷ୍ଠ ଖେଳାଳିଙ୍କ ଅନୁପସ୍ଥିତିରେ ଯୁବ ଖେଳାଳିମାନେ ନିଜ ଦକ୍ଷତା ତଥା ପ୍ରତିଭା ପ୍ରମାଣ କରିବାର ଭରପୁର ସୁଯୋଗ ପାଇବେ। ନିୟମିତ ଅଧିନାୟକ ରୋହିତ ଶର୍ମା ବିଶ୍ରାମ ନେଉଥିବାରୁ ଧାୱନ୍‍ କ୍ୟାରିୟରରେ ଦ୍ୱିତୀୟଥର ପାଇଁ ଭାରତ ନେତୃତ୍ୱ ନେଉଛନ୍ତି। ରୋହିତଙ୍କ ସମେତ ମହମ୍ମଦ ସାମି, ଯଶପ୍ରୀତ ବୁମ୍‍ରା, ଋଷଭ ପନ୍ତ, ହାର୍ଦ୍ଦିକ ପାଣ୍ଡ୍ୟା ଓ ବିରାଟ କୋହଲିଙ୍କ ଭଳି ତାରକା ଖେଳାଳିମାନେ ଏହି ସିରିଜରୁ ବିଶ୍ରାମ ନେଇଛନ୍ତି। ନିୟମିତ ସ୍ଥିର ପ୍ରଦର୍ଶନ କରିଆସୁଥିବା ଧାୱନଙ୍କ ଲାଗି ଉଭୟ ପ୍ରଦର୍ଶନ ଓ ନେତୃତ୍ୱ ନେଇ ଏହି ସିରିଜରେ ଚ୍ୟାଲେଞ୍ଜ ରହିଛି। ଧାୱନଙ୍କ ସହିତ ଦଳକୁ ଫେରିଥିବା ଶୁବମନ ଗିଲ ଇନିଂସ ଓପନ କରିବେ ବୋଲି ଆଶା କରାଯାଉଛି। ଦଳରେ ସ୍ଥାନ ପାଇଥିବା ଇଶାନ କିସାନ ଓ ଋତୁରାଜ ଗାଏକ୍ୱାଡ ମଧ୍ୟ ଓପନ୍‍ କରିବାର ଦକ୍ଷତା ରଖୁଛନ୍ତି। ଦଳର ମିଡଲଅର୍ଡର ନେଇ ଟିମ୍‍ ମ୍ୟାନେଜମେଣ୍ଟ ଚିନ୍ତିତ ଥିବ। ଇନ୍‍ଫର୍ମ ଦୀପକ ହୁଦା ୩ ନଂରେ ବ୍ୟାଟିଂ କରିବାକୁ ଆସିବେ। ସେହିପରି ସୂର୍ଯ୍ୟକୁମାର ଯାଦବ, ଶ୍ରେୟାସ ଆୟର ଓ ସଞ୍ଜୁ ସାମସନ ମଧ୍ୟକ୍ରମେରେ ଗୁରୁଦାୟିତ୍ୱ ବହନ କରିବେ। ହାର୍ଦ୍ଦିକଙ୍କ ଅନୁପସ୍ଥିତରେ ଶାର୍ଦ୍ଦୁଳ ଠାକୁର ଏକମାତ୍ର ପେସ୍‍ ଅଲରାଉଣ୍ଡର ଭାବେ ଦଳରେ ସ୍ଥାନ ପାଇଛନ୍ତି।

ଏଠାରେ ୩ଟି ମ୍ୟାଚ୍‍ ଖେଳାଯିବ। ପିଚ୍‍ ସ୍ପିନରଙ୍କୁ ସୁହାଉଥିବାରୁ ୟୁଜବେନ୍ଦ୍ର ଚହଲ ଓ ରବୀନ୍ଦ୍ର ଜାଡେଜା ୩ଟି ଯାକ ମ୍ୟାଚ୍‍ ଖେଳିବା ନିଶ୍ଚିତ ମନେ ହେଉଛି। ଇଂଲଣ୍ଡରେ ଦିନିକିଆ ସିରିଜ ଖେଳିପାରି ନଥିବା ଅର୍ଶଦୀପ ସିଂ ଏଠି ଦିନିକିଆ ପଦାର୍ପଣ କରିବେ। ଅପରପକ୍ଷରେ ୱେଷ୍ଟଇଣ୍ଡିଜ ଗତ ସିରିଜରେ ବାଂଲାଦେଶଠାରୁ ୩-୦ରେ ପରାସ୍ତ ହୋଇଥିଲା। ଅଲରାଉଣ୍ଡର ଜାସନ ହୋଲ୍ଡର ଦଳକୁ ଫେରିଛନ୍ତି। ଗତ କିଛି ମାସ ହେବା ଦଳ ସମ୍ପୂର୍ଣ୍ଣ ୫୦ ଓଭର ଖେଳିବାକୁ ସଂଘର୍ଷ କରୁଛି। ୨୦୧୯ ବିଶ୍ୱକପ୍‍ ପରେ ଦଳ ୩୯ଟି ମ୍ୟାଚ୍‍ ଖେଳିଥିବା ବେଳେ ୬ଥର ୫୦ ଓଭର ଖେଳିବାର ସମର୍ଥ ହୋଇଛି। ଦୁଇ ଦଳ ଏପର୍ଯ୍ୟନ୍ତ ୧୩୬ଟି ଦିନିକିଆରେ ମୁହାଁମୁହିଁ ହୋଇଛନ୍ତି। ଭାରତ ୬୭ରେ ଓ ଘରୋଇ ଦଳ ୬୩ ମ୍ୟାଚ୍‍ରେ ବିଜୟୀ ହୋଇଛନ୍ତି। ଦୁଇଟି ମ୍ୟାଚ୍‍ ଟାଇ ହୋଇଥିବା ବେଳେ ୪ଟିରେ କୌଣସି ଫଳାଫଳ ମିଳି ନ ଥିଲା। ଗତ ୫ଟି ମୁକାବିଲାରେ କିନ୍ତୁ ଭାରତ ବିଜୟୀ ହୋଇଛି।

ଭାରତୀୟ ଦଳ
ଶିଖର ଧାୱନ (ଅଧିନାୟକ), ଋତୁରାଜ ଗାଏକ୍ୱାଡ, ଶୁବମନ ଗିଲ, ଦୀପକ ହୁଦା, ସୂର୍ଯ୍ୟକୁମାର ଯାଦବ, ଶ୍ରେୟାସ ଆୟର, ଇଶାନ କିସାନ (ୱିକେଟକିପର), ସଞ୍ଜୁ ସାମସନ (ୱିକେଟକିପର), ରବୀନ୍ଦ୍ର ଜାଡେଜା (ଉପ- ଅଧିନାୟକ), ଶାର୍ଦ୍ଦୁଳ ଠାକୁର, ୟୂୁଜବେନ୍ଦ୍ର ଚହଲ, ଅକ୍ଷର ପଟେଲ, ଆଭେସ ଖାନ, ପ୍ରସିଦ୍ଧ କ୍ରିଷ୍ଣା, ମହମ୍ମଦ ସିରାଜ ଓ ଅର୍ଶଦୀପ ସିଂ।

ୱେଷ୍ଟଇଣ୍ଡିଜ ଦଳ
ନିକୋଲାସ ପୁରନ (ଅଧିନାୟକ), ସାଇ ହୋପ (ଉପ- ଅଧିନାୟକ), ସମରା ବ୍ରୁକ୍ସ, କିସି କାର୍ଟି, ଜାସନ ହୋଲ୍ଡର, ଅକିଲ ହୋସେନ, ଅଲଜାରୀ ଜୋସେଫ, ବ୍ରାଣ୍ଡନ କିଙ୍ଗ୍‍, କାଏଲ ମେୟର୍ସ, ଗୁଡାକେଶ ମୋଟି, କିମୋ ପଲ, ରୋଭମାନ ପାୱେଲ ଓ ଜେଡେନ ସିଲ୍ସ।