ଭୁବନେଶ୍ୱର: ବିଏମ୍‌ସି ଆଦାୟ କରିବ ୟୁଜର୍ସ ଫି। ଦୋକାନ, ବ୍ୟବସାୟୀକ ପ୍ରତିଷ୍ଠାନ, ଭୋଜନାଳୟ ସମସ୍ତଙ୍କ ଠାରୁ ୟୁଜର୍ସ ଫି ଆଦାୟ କରାଯିବ। ସମସ୍ତେ ଗଣିବେ ୟୁଜର୍ସ ଫି। ସମସ୍ତଙ୍କ ପାଇଁ ଭିନ୍ନ ଭିନ୍ନ ତାଲିକା ପ୍ରସ୍ତୁତ କରାଯାଇଛି। ଏହି ତାଲିକା ଅନୁଯାୟୀ ୟୁଜର୍ସ ଫି ଦେବେ। ହୋଲ୍ଡିଂ ଟିକସ, ଟ୍ରେଡ୍‌ ଲାଇସେନ୍ସ ସହ ବିଏମ୍‌ସିକୁ ଏକାଧିକ ଟିକସ ଦେବା ପରେ ଅଳିଆ ଉଠାଇବା ପାଇଁ ଆଉ ଏକ ଟିକସ ଦେବାକୁ ପଡ଼ିବ। ଯୁଆଡେ ପାଦ ପଡ଼ିବ ସେଠାରୁ ଅଳିଆ ଟିକସ ଆଦାୟ ହେବ। ବ୍ୟବସାୟୀମାନେ ଏହି ଟିକସ ଭାର ବିଭିନ୍ନ ଆଳରେ ଗ୍ରାହକଙ୍କ ଉପରେ ଲଦି ନେବେ। ଗ୍ରାହକ ଅଳିଆ ଟିକସ ଘରେ ଦେବେ ଏହାପରେ ମଲ୍‌, ରେସ୍ତୋରାଁ, ରେଳ ଷ୍ଟେସନ ସବୁଠି ଦେବେ। ଅଳିଆ ଫୋପାଡ କି, ନାହିଁ। ଯାହା ରାଜଧାନୀବାସୀଙ୍କ ପକେଟ୍‌କୁ ଭାରି ପଡ଼ିପାରେ।

ମାସିକ ହିସାବରେ ମୂଲ୍ୟ ଧାର୍ଯ୍ୟ କରାଯାଇଛି। ୮୦୦ ବର୍ଗଫୁଟ୍‌ରୁ କମ୍‌ ଇଡବ୍ଲୁଏସ୍‌ ଘରରେ ରହୁଥିଲେ ଲେକେ ବିଏମ୍‌ସିକୁ ମାସିକ ୫୦ଟଙ୍କା ଦେବାକୁ ପଡ଼ିବ। ସେହିପରି ଏମ୍‌ଆଇଜି ଘର ପାଇଁ ୭୫ ଏବଂ ଏଚ୍‌ଆଇଜି ଘର ପାଇଁ ୧୨୫ ଟଙ୍କା ୟୁଜର୍ସ ଫି ଦେବାକୁ ପଡ଼ିବ। ହୋଟେଲଗୁଡ଼ିକ ପାଇଁ ୪ଟି ଶ୍ରେଣୀ ପ୍ରସ୍ତୁତ କରାଯାଇଛି। ୧୦ ରୁମ୍‌ ବିଶିଷ୍ଟ ହେଲେ ୫ଶହ ଟଙ୍କା, ୩୦ ରୁମ୍‌ରୁ ପର୍ଯ୍ୟନ୍ତ ହେଲେ ସର୍ବାଧିକ ୧୦୦୦ଟଙ୍କା ଦେବାକୁ ପଡ଼ିବ।

ତେବେ ୟୁଜର୍ସ ଫି ନିୟମ ବିବାହ ଆୟୋଜନକୁ ଅଧିକ ମହଙ୍ଗା କରିଦେବ। ସର୍ବନିମ୍ନ ଶ୍ରେଣୀରେ ମାତ୍ର ୧ଏକର ମଧ୍ୟରେ ମଣ୍ଡପ ଥିବ। ଏଥିରୁ ୫ଶହ କେଜିର ବର୍ଜ୍ୟ ବାହାରୁଥିବ ତେବେ ୧୦ହଜାରେ ଟଙ୍କା ଗଣିବାକୁ ପଡ଼ିବ। ଏହା ସହ ପ୍ରତ୍ୟେକ ୧୦୦କେଜି ପାଇଁ ଆଉ ଅଧିକ ୧୦୦୦ ଗଣିବାକୁ ପଡ଼ିବ। ସେହିପରି ୩ଏକର ମଧ୍ୟରେ ମଣ୍ଡପ ଥିଲେ ୨୦ ହଜାରରେ, ୫ ଏକର ମଧ୍ୟରେ ଥିରେ ୩୦ହଜାର ଏହାଠାରୁ ଅଧିକ ଥିଲେ ୪୦ହଜାର ପର୍ଯ୍ୟନ୍ତ ଅଳିଆ ଉଠାଇବା ଖର୍ଚ୍ଚ ବା ୟୁଜର୍ସ ଫି ଦେବାକୁ ପଡ଼ିବ। ଯାହାକୁ ନେଇ ରାଜଧାନୀବାସୀଙ୍କ ମଧ୍ୟରେ ଛନକା ପଶିଯାଇଛି।

ସେହପରି ସିନେମା ଟିକଟ୍‌ ମଧ୍ୟ ମହଙ୍ଗା ହେବ। ହଲ୍‌ ଏବଂ ମଲ୍‌ଟିପ୍ଲେକ୍ସରେ ସିଟ୍‌ ପିଛା ୟୁଜର୍ସ ଫି ଆଦାୟ ହେବ। ତେବେ ଏହାର ବୋଧକୁ ମାଲିକମାନେ ଗ୍ରାହକଙ୍କ ଉପରେ ନଦି ଦେଇ ପାରନ୍ତି। ଏଣୁ ସିନେମା ଟିକଟ୍‌ ମହଙ୍ଗା ହେବାର ବହୁ ସମ୍ଭାବନା ରହିଛି। ସେହିପରି ରେଳ ଷ୍ଟେସନ, ବସ୍‌ ଷ୍ଟାଣ୍ଡ, ପେଟ୍ରୋଲ ପମ୍ପ, ଇଣ୍ଡଷ୍ଟ୍ରିଜ୍‌, ହେଟେଲ, ଗେଷ୍ଟ ହାଉସ୍‌, ବିଉଟି ପାର୍ଲର, ସପିଂ ମଲ୍‌, ସ୍ପା, ଉଠା ଦୋକାନ, ହାଟ  ପ୍ରଣ୍ଟିଂ ପ୍ରେସ୍‌ ପର୍ଯ୍ୟନ୍ତ ସମସ୍ତଙ୍କ ଠାରୁ ୟୁଜର୍ସ ଫି ଆଦାୟ କରାଯିବ।

ଏହାସହ ୨୦୨୫-୨୬ ସ୍ୱଚ୍ଛ ସର୍ବେକ୍ଷଣ ପାଇଁ ଭୁବନେଶ୍ୱରବାସୀ ଆଗେଇ ଆସିବାକୁ ମେୟର ସୁଲୋଚନା ଦାସ ଆହ୍ୱାନ ଦେଇଛନ୍ତି। ନୂତନବର୍ଷ ୨୦୨୬ ଅବସରରେ ବିଏମସି ପକ୍ଷରୁ ସହରବାସୀଙ୍କୁ ଶୁଭେଚ୍ଛା ଜଣାଇବା ସହ ସହରର ସ୍ୱଚ୍ଛତା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ପାଇଁ ଏକ ନୂତନ ଅଭିଯାନ ଆରମ୍ଭ ହୋଇଛି। ସ୍ୱଚ୍ଛ ସର୍ବେକ୍ଷଣ ୨୦୨୫-୨୬ରେ ଭୁବନେଶ୍ୱରକୁ ଦେଶର ଶ୍ରେଷ୍ଠ ସହର ଭାବେ ଗଢ଼ିତୋଳିବା ପାଇଁ ବିଏମସି ପକ୍ଷରୁ ସେ ଲୋକମାନଙ୍କ ସହଯୋଗ କାମନା କରିଛନ୍ତି ଭୁବନେଶ୍ୱର ମେୟର ସୁଲୋଚନା ଦାସ।

ବିଏମ୍‌ସି ମୁଖ୍ୟାଳୟରେ ଅନୁଷ୍ଠିତ ଏକ ସାମ୍ୱାଦିକ ସମ୍ମିଳନୀରେ ସେ କହିଛନ୍ତି ଯେ ଆବାସିକ ଘର, ଦୋକାନ, ହୋଟେଲ ଏବଂ ଅନୁଷ୍ଠାନ ପାଇଁ ସ୍ୱତନ୍ତ୍ର ୟୁଜର ଫି ଧାର୍ଯ୍ୟ କରାଯାଇଛି। ସହରବାସୀ ‘ସଫା ଆପ୍‌' କିମ୍ୱା ବିଏମସିର ସ୍ୱତନ୍ତ୍ର ହ୍ୱାଟ୍‌ସଆପ୍‌ ନମ୍ୱର ୭୬୫୩୦୧୧୮୩୨ ମାଧ୍ୟମରେ ଅଧିକ ସୂଚନା ପାଇପାରିବେ। ସ୍ୱଚ୍ଛସାଥୀମାନେ ନିଜ ନିଜ ୱାର୍ଡରୁ ୨୦୧୮ ମସିହାରେ ବିଏମ୍‌ସି ଦ୍ୱାରା ଧାର୍ଯ୍ୟ ୟୁଜର୍ସ ଫି ଆଦାୟ କରିବା ପାଇଁ ନିର୍ଦ୍ଦେଶ ଦିଆଯାଇଛି। ସ୍ଥାୟୀ ବାସିନ୍ଦା, ସମସ୍ତ ବ୍ୟବସାୟୀ, ବ୍ୟବସାୟିକ ପ୍ରତିଷ୍ଠାନ, ଶିକ୍ଷାନୁଷ୍ଠାନ, ବିଭିନ୍ନ ପ୍ରତିଷ୍ଠାନ, ଉଦ୍ୟୋଗ ଇଦ୍ୟାଦିଙ୍କଠାରୁ ୟୁଜର୍ସ ଫି ଆଦାୟ କରିବେ। ଏ ନେଇ ସେମାନଙ୍କୁ ତାଲିମ ମଧ୍ୟ ଦିଆଯାଇଛି। ଆସନ୍ତୁ, ସମସ୍ତେ ମିଶି ଭୁବନେଶ୍ୱରକୁ ଏକ ନମ୍ୱର ସହର ଭାବେ ଗଢ଼ିତୋଳିବାକୁ ଅନୁରୋଧ କରିଛନ୍ତି।

ବିଏମ୍‌ସି କମିଶନର ଚଞ୍ଚଳ ରାଣାଙ୍କ ନିର୍ଦ୍ଦେଶ କ୍ରମେ ବିଏମ୍‌ସି ନିୟୋଜିତ ଆଇଇସି ଟିମ୍‌ ପରିମଳ ସଂପର୍କିତ ବିଭିନ୍ନ ନିୟମ ଏବଂ ନାଗରିକ ଦାୟିତ୍ୱବୋଧ ସମ୍ପର୍କରେ ଲୋକମାନଙ୍କୁ ଅବଗତ କରାଇବେ। କେଉଁ ପ୍ରତିଷ୍ଠାନ ପାଇଁ କେତେ ୟୁଜର୍ସ ଫି ଦେବାକୁ ପଡ଼ିବ, ସେ ସମ୍ପର୍କରେ ବିସ୍ତୃତ ଭାବେ ଅବଗତ କରାଇଥିଲେ ଅତିରିକ୍ତ କମିଶନର କୈଳାସ ଚନ୍ଦ୍ର ଦାସ। ଆୟୋଜିତ ଏହି ସାମ୍ୱାଦିକ ସମ୍ମିଳନୀରେ ମେୟରଙ୍କ ସହ ଅତିରିକ୍ତ କମିସନର ରତ୍ନାକର ସାହୁ ଏବଂ ଡେପୁଟି କମିଶନର, ପରିମଳ, ଏନ୍‌. ଗଣେଶ ବାବୁ ଉପସ୍ଥିତ ଥିଲେ।

ଭୁବନେଶ୍ବର : ରାଜଧାନୀର ୧ ନମ୍ବର ହାଟରେ ଅଗ୍ନିକାଣ୍ଡ ଘଟଣା ପରେ ଚେତିଛି BMC । ରାଜଧାନୀର ବିଭିନ୍ନ ହାଟ ପାଇଁ SOP ଆଣିବ ବିଏମ୍‌ସି ।ରାଜଧାନୀର ୨୦ଟି  ବଡ଼  ହାଟ ପାଇଁ ଲାଗୁହେବ SOP । ହାଟ କେମିତି ପାଇ ହେବ ବିଧିବଦ୍ଧ ନିର୍ବାଚନ ହେବ । BMC ଅଧିକାରୀଙ୍କ ଉପସ୍ଥିତିରେ ହେବ ହାଟ କମିଟି ନିର୍ବାଚନ । ସବୁ ହାଟ ଦୋକାନୀଙ୍କ ପାଇଁ ଗ୍ରୁପ ଇନସ୍ୟୁରାନ୍ସ କରିବ BMC । ରାଜଧାନୀର ବିଭିନ୍ନ ହାଟରେ  ଏନଫୋର୍ସମେଣ୍ଟକୁ କଡା କଡ଼ି  କରାଯିବ । ହାଟ ଭିତରେ ଜରିପାଲ ଟାଣି ପାରିବେନି ବ୍ୟବସାୟୀ । ହାଟରେ ଏନଫୋର୍ସମେଣ୍ଟ କଡ଼ାକଡ଼ି କରାଯିବ ।  ରାସ୍ତା ଉପରକୁ ମାଡ଼ି ବ୍ୟବସାୟ କରି ପାରିବେନି ଦୋକାନୀ । ଏକ ନମ୍ବର ମାର୍କେଟକୁ  ମଡର୍ଣ୍ଣ ମାର୍କେଟ କରିବାକୁ ୧୮୬ କୋଟି ଟଙ୍କାର ବ୍ୟୟ ଅଟକଳ ହୋଇଥିଲା । ପାତ୍ରପଡା ଭଗବାନପୁର ହୋଲସେଲ୍ ମାର୍କେଟ ପାଇଁ ଟଙ୍କାର ଅଭାବ ରହିଛି । ଏସବୁ ପାଇଁ ସରକାର ଅର୍ଥ ଯୋଗେଇ ଦେଲେ କାମ ଆଗକୁ ବଢ଼ିବ ବୋଲି ମେୟର କହିଛନ୍ତି । କ୍ଷତିଗ୍ରସ୍ତଙ୍କୁ CMRF  ଫଣ୍ଡ ସହ BMC ନିଜସ୍ଵ  ପାଣ୍ଠିରୁ ଆର୍ଥିକ ସହାୟତା ଯୋଗାଇଦେବାକୁ ବିଚାରବିମର୍ଶ କରାଯାଉଥିବା ମେୟର କହିଛନ୍ତି ।

ଉଲ୍ଲେଖଯୋଗ୍ୟ ଯେ, ରାଜଧାନୀର ସର୍ବାଧିକ ଜନଗହଳିପୂର୍ଣ୍ଣ ୧ନମ୍ବର ହାଟର ବିକାଶ ପାଇଁ ପରିକଳ୍ପନା କରିଥିଲା ବିଏମସି । ୩ ଏକର ଜାଗାରେ ପ୍ରାୟ ୨ ହଜାର ବ୍ୟବସାୟୀ ବସିବା ଭଳି ଏକ ଅତ୍ୟାଧୁନିକ ମାର୍କେଟ୍ କମ୍ପ୍ଲେକ୍ସର ବ୍ଲୁ ପ୍ରିଣ୍ଟ ପ୍ରସ୍ତୁତ କରାଯାଇଥିଲା। ଏଥିପାଇଁ ୪୨ଟି ସରକାରୀ କ୍ୱାର୍ଟର୍ସ ସହ ଦୁଇଟି ବସ୍ତି ଉଚ୍ଛେଦ କରାଯାଇଥିଲା । ୧୧ ବର୍ଷ ପରେ ଏହି ପ୍ରକଳ୍ପ କେବଳ କାଗଜ କଲମରେ ସୀମିତ ହୋଇ ରହିଯାଇଛି । ବିଳମ୍ବିତ ପ୍ରକ୍ରିୟା କାରଣରୁ ପରିବା ମାର୍କେଟ ଚାରିପାଖରେ ପୁଣି ଥରେ ବସ୍ତି ଗଢି ଉଠିଥିବା ବେଳେ ୧ନଂ ହାଟକୁ ସବୁ ସମୟରେ ଅଗ୍ନିକାଣ୍ଡର ଭୟ ରହିଛି। ସେପଟେ ନାଲିଫିତା ତଳେ ଚାପି ହୋଇ ରହିଛି  ୟୁନିଟ ୧ ମାର୍କେଟ ବିକାଶ ନକସା । ଏହି ବିଳମ୍ବିତ ପ୍ରକ୍ରିୟା କାରଣରୁ ଯେଉଁ ବସ୍ତି ଉଚ୍ଛେଦ ହୋଇଥିଲା, ତାହା ପୁଣି ଗଢ଼ି ଉଠିଲାଣି। ଏଣେ ହାଟର ବ୍ୟବସାୟୀ ମାନେ ପ୍ରତି ମୁହୂର୍ତ୍ତରେ ଭୟର ବାତାବରଣ ଭିତରେ ରହୁଛନ୍ତି । ବିଶେଷକରି ହାଟକୁ ସବୁବେଳେ ନିଆଁ ଡର ଲାଗିରହିଛି ।

ଭୁବନେଶ୍ୱର: ଭିଜିଲାନ୍ସ ଜାଲରେ ଭୁବନେଶ୍ବର ମହାନଗର ନିଗମ (ବିଏମସି) କାର୍ଯ୍ୟନିର୍ବାହୀ ଯନ୍ତ୍ରୀ । ଆୟ ବହିର୍ଭୁତ ସଂପତ୍ତି ଠୁଳ ଅଭିଯୋଗରେ ଯନ୍ତ୍ରୀ ଜଗନ୍ନାଥ ପଟ୍ଟନାୟକଙ୍କ ୪ଟି ସ୍ଥାନରେ ଚଢାଉ ଚାଲିଛି। ଆଜି ସକାଳୁ ସକାଳୁ ଏହି ଚାଢାଉ ଚାଲିଛି । ଭୁବନେଶ୍ୱର ବଡ଼ଗଡ଼ ବାସଭବନରେ ଭିଜିଲାନ୍ସ ପକ୍ଷରୁ ଚଢାଉ ଜାରି ରହିଛି । ଭିଜିଲାନ୍ସ ବିଭାଗର ୨ ଜଣ ଏସପିଙ୍କ ସମେତ ୧୦ ଅଧିକାରୀ ଏହି ଚଢାଉରେ ସାମିଲ ଅଛନ୍ତି।

ଭୁବନେଶ୍ୱର: ଭୁବନେଶ୍ୱର ମହାନଗର ନିଗମ ଅଫିସରେ ଗଣ୍ଡଗୋଳ। କିଛି ଅସାମାଜିକ ଯୁବକ ଅଫିସ୍‌ ଭିତରେ ପଶି ଅତିରିକ୍ତ କମିସନରଙ୍କୁ ମାଡ ମାରିଥିବା ଅଭିଯୋଗ ହୋଇଛି। ସୋମବାର ବିଏମସି କାର୍ଯ୍ୟଳୟରେ ଅଭିଯୋଗ ଶୁଣାଣି ଚାଲିଥିବା ବେଳେ କିଛି ଯୁବକ ଅଫିସ୍‌ ଭିତରେ ଧସେଇ ପଶିଥିଲେ, ବିଏମ୍‌ସି ଅତିରିକ୍ତ କମିସନର ରତ୍ନାକର ସାହୁଙ୍କୁ ମାଡ ମାରିଥିବା ଅଭିଯୋଗ ହୋଇଛି।ଫଳରେ ବିଏମସି କାର୍ଯ୍ୟଳୟରେ ଅସନ୍ତୋଷ ଲାଗି ରହିଛି। କୋରପେର୍ଟର ଜୀବନ ରାଉତଙ୍କ ଉପସ୍ଥିତରେ ୫ ଜଣ ଯୁବକ ଏଡିସି ରତ୍ନାକର ସାହୁଙ୍କୁ ମାଡ ମାରିଥିବା ଅଭିଯୋଗ ହୋଇଛି। ନିର୍ଦ୍ଦିଷ୍ଟ ଏକ ୱାର୍ଡରେ ସଫେଇ କାମ ହେଉନଥିବା ଅଭିଯୋଗରେ ଯୁବକମାନେ ଏଡିସିଙ୍କୁ ମାଡ ମାରିଥିବା ପ୍ରାଥମିକ ସୂତ୍ରରୁ ଜଣାପଡିଛି। ପ୍ରତିବାଦରେ କାମ ବନ୍ଦ କରି ବିଏମ୍‌‌ସି କର୍ମଚାରୀ ଧାରଣାରେ ବସିଥିବା ବେଳେ ମାମଲାର ଖୋଳତାଡ ଆରମ୍ଭ କରିଛି ଖାରବେଳ ଥାନା ପୁଲିସ। ଅତିରିକ୍ତ କମିସନର ରତ୍ନାକର ସାହୁଙ୍କୁ ମାଡ ମରାଯାଉଥିବାର ଭିଡିଓ ମୋବାଇଲରୁ ମୋବାଇଲକୁ ଘୂରିବୁଲୁଛି।

ଭୁବନେଶ୍ୱର: ବିଏମ୍‌‌ସିର ହୋଲ୍‌ଡିଂ ଟିକସ ବକେୟା ରଖିଥିବା ବଡ଼ବଡ଼ିଆ ଟିକସଦାତାଙ୍କ ତାଲିକା ଜାରି ହେବା ପରେ ଏବେ ସେମାନଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି। ଜଣକ ପରେ ଜଣେ ଟିକସ ଦେଇ ଚାଲିଛନ୍ତି। ସେପଟେ ଟିକସ ଆଦାୟ ପାଇଁ ବିଏମ୍‌‌ସି ବଡ଼ବଡ଼ିଆ ଟିକସଦାତାଙ୍କ ବିରୋଧରେ ଚାପ ପକାଇ ଚାଲିଛି। ଆଗମୀ ଦିନରେ ଏମାନଙ୍କ ନାମ ବିଏମ୍‌‌ସି ୱେବ୍‌‌ସାଇଟ୍‌‌ରେ ପ୍ରକାଶ ପାଇବ। ଏହାସହିତ ଯେତେବଡ଼ ସଂସ୍ଥା ହେଉ ନା କାହିଁକି ଏହାକୁ ସିଲ୍‌‌ କରି ଦିଆଯିବ। ଏହି ପ୍ରକ୍ରିୟା ଆରମ୍ଭ ହୋଇଗଲାଣି ବୋଲି ବିଏମ୍‌‌ସି ପକ୍ଷରୁ ସୂଚନା ଦିଆଯାଇଛି।

ପାହାଳ ସ୍ଥିତ ଏକ ବିଶାଳ ମଲ୍‌‌ ହୋଲ୍‌ଡିଂ ଟିକସ ଦେଇ ନ ଥିଲା। ଏହାର ମାଲିକଙ୍କୁ ବିଏମ୍‌‌ସି ଅଧିକାରୀମାନେ ଟିକସ ଭରିବାକୁ ଅନୁରୋଧ କଲେ ମଧ୍ୟ କିଛି ଶୁଣୁ ନ ଥିଲେ। ମଙ୍ଗଳବାର ବିଏମ୍‌‌ସିର ଏକ ଟିମ୍‌‌ ଉକ୍ତ ମଲ୍‌‌କୁ ସିଲ୍‌‌ କରିବାକୁ ଯାଇଥିଲେ। ଟିମ୍‌‌ ପ୍ରକ୍ରିୟା ଆରମ୍ଭ କରିବା ବେଳକୁ ଘଟଣାସ୍ଥଳରେ ମଲ୍‌‌ର ବଡ଼ ଅଧିକାରୀ ପହଞ୍ଚିଗଲେ। ଟିକସ ଦେଇଦେବେ ବୋଲି ପ୍ରତିଶ୍ରୁତି ଦେଲେ। ଦୀର୍ଘଦିନ ଧରି ଟିକସ ଦେଉ ନ ଥିଲେ ହେଁ ଅଚାନକ ୩୦ ଲକ୍ଷ ଟଙ୍କା ଧରି ବିଏମ୍‌‌ସିରେ ଦାଖଲ କରିଦେଲେ। ୫୦ଲକ୍ଷରୁ ୧କୋଟି ଟଙ୍କା ବକେୟା ରଖିଛନ୍ତି ୧୫ ଜଣ। ୧ କୋଟିରୁ ଊର୍ଦ୍ଧ୍ବରେ ୧୬ ଜଣ ବ୍ୟକ୍ତି ବା ଅନୁଷ୍ଠାନ ଟିକସ ବକେୟା ରଖିଛନ୍ତି। ୫୦ ଲକ୍ଷରୁ ୧ କୋଟି ବକେୟା ବର୍ଗରେ ଦକ୍ଷିଣ-ପୂର୍ବ ଜୋନ୍‌‌ର ୩ ଜଣ, ଦକ୍ଷିଣ-ପଶ୍ଚିମ ଜୋନ୍‌‌ର ୫ ଜଣ ଏବଂ ଉତ୍ତର ଜୋନ୍‌‌ର ୭ ଜଣ ରହିଛନ୍ତି। ସେହିପରି ୧ କୋଟିରୁ ଊର୍ଦ୍ଧ୍ବ ବକେୟା ରାଶିରେ ଦକ୍ଷିଣ-ପୂର୍ବ ଜୋନ୍‌‌ର ୫ ଜଣ, ଦକ୍ଷିଣ-ପଶ୍ଚିମ ଜୋନ୍‌‌ର ୫ ଜଣ ଏବଂ ଉତ୍ତର ଜୋନ୍‌‌ର ୬ ଜଣ ରହିଛନ୍ତି। ସରକାରଙ୍କ ନିୟମ ଅନୁଯାୟୀ, ନିଜର ହୋଲ୍‌ଡିଂ ଟିକସ ଦେବାରେ ଖିଲାପି ନ ହେବା ପାଇଁ ଚେତାଇ ଦିଆଯାଉଛି। ଅନ୍ୟପକ୍ଷରେ ବିଏମ୍‌‌ସି ୧ଲକ୍ଷରୁ ଅଧିକ ଟିକସ ଦେଇ ନ ଥିବା ଅନୁଷ୍ଠାନ କିମ୍ବା ବ୍ୟକ୍ତିବିଶେଷଙ୍କ ତାଲିକା ପ୍ରସ୍ତୁତ କରିଛି। ଏମାନଙ୍କ ମଧ୍ୟରେ ବହୁ ବଡ଼ବଡ଼ିଆ ରହିଛନ୍ତି। ମାଗି ମାଗି ଥକି ଗଲେ ମଧ୍ୟ ହୋଲ୍‌ଡିଂ ଟିକସ ଦେବାକୁ ନାଁ ଧରି ନାହାନ୍ତି। ବିଏମ୍‌‌ସି ମେଞ୍ଚାଏ ଲୋକଙ୍କ ତାଲିକା ପ୍ରସ୍ତୁତ କରିଥିଲେ ମଧ୍ୟ ମାତ୍ର କେଞ୍ଚାଏ ଲୋକଙ୍କ ନାମକୁ ସର୍ବସାଧାରଣରେ ଜାରି କରିଛି। ଏମାନେ ଯଦି ସମୟ ମଧ୍ୟରେ ଟିକସ ନ ଦିଅନ୍ତି ତେବେ ଆଗାମୀ ଦିନରେ ସେମାନଙ୍କ ନାମ ବିଏମ୍‌‌ସି ୱେବ୍‌‌ସାଇଟ୍‌‌ରେ ଜାରି କରିବାକୁ ଯାଉଛି।

ଭୁବନେଶ୍ୱର: ଡମଣା ଛକରେ ଆଜି ଏକ ବିଏମ୍‌ସି ସଫେଇ ଗାଡିରେ ନିଆଁ ଲାଗିଯାଇଛି। ରାସ୍ତାରୁ ବାଲି ସଫା କରିବା ବେଳେ ହଠାତ୍‌ ଗାଡିରେ ନିଆଁ  ଲାଗିଯାଇଥିଲ।

ଖବର ଅନୁଯାୟୀ, ମଙ୍ଗଳବାର ଦିନ ସକାଳ ସମୟରେ ଭୁବନେଶ୍ୱର ଡମଣା ଛକରେ ଏକ ବିଏମ୍‌ସି ସଫେଇ ଗାଡି ରାସ୍ତା ସଫା କରୁଥିଲା। ଏହି ସମୟରେ ସଫେଇ ଗାଡିରେ ହଠାତ୍‌ ନିଆଁ ଲାଗିଯାଇଥିଲା। ଯାହାଫଳରେ ଗାଡିଟି ହୁତୁହୁତୁ ହୋଇ ଜଳିଥିଲା। ଗାଡିଟି ପୁରା ପୋଡି ପାଉଁଶ ହୋଇଯାଇଛି। ମୋବିଲ ଲିକ୍‌ ଯୋଗୁ ଅଗ୍ନିକାଣ୍ଡ ଘଟିଥିବା ସନ୍ଦେହ କରାଯାଉଛି। ସେପଟେ ଗାଡିରେ ନିଆଁ ଲାଗିଥିବା ଖବର ପାଇ ଦୁଇଟି ଦମକଳ ଗାଡ଼ି ପହଞ୍ଚି ନିଆଁକୁ ଆୟତ୍ତ କରିଥିଲେ। ଅଗ୍ନିକାଣ୍ଡ ପରେ ଡମଣା ରାସ୍ତାରେ ଟ୍ରାଫିକ୍ ଜାମ୍ ହୋଇଥିଲା। ଫଳରେ କିଛି ସମୟ ପାଇଁ ଗୋଟିଏ ପାର୍ଶ୍ବରେ ଯାନବାହନ ଯାତାୟାତ କରିଥିଲା। ଘଟଣାସ୍ଥଳରେ ପୁଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲା।

ଭୁବନେଶ୍ବର: ମାସକ ଭିତରେ ମୁକୁଳା ଡ୍ରେନ ଉପରେ ପଡ଼ିବ ସ୍ଲାବ। ସପ୍ତାହକ ଭିତରେ ସରିବ ଡ୍ରେନ ବାରିକେଡ କାମ। ଭୁବନେଶ୍ଵର ସହରରେ ମୋଟ ୧୮୦୦ କିଲୋମିଟର ଡ୍ରେନ ରହିଛି । ସେଥିରୁ BMC ଅଧୀନରେ ୧୩୮୦ କିଲୋମିଟର ଡ୍ରେନ ଅଛି। ଏହା ଭିତରୁ ୨୭ କିଲୋମିଟର ମୁକୁଳା ଡ୍ରେନ ରହିଛି । ସବୁ ମୁକୁଳା ଡ୍ରେନ ଚିହ୍ନଟ ହୋଇଛି । ଯୁଦ୍ଧକାଳୀନ ଭିତ୍ତିରେ ସ୍ଲାବ୍ କାମ ସରିବ । କିଛି ସ୍ଥାନରେ ଡ୍ରେନ ଉପରେ ଜବରଦଖଲ ରହିଛି । ବିଭିନ୍ନ ବିଭାଗ ସହ ସମନ୍ଵୟ ବୈଠକ କରାଯାଇ ଜବରଦଖଲ ଉଛେଦ ପାଇଁ ପଦକ୍ଷେପ ନିଆଯାଉଛି । ବ୍ୟାରିକେଡ଼ ପାଇଁ ୩୪ଟି ସ୍ଥାନ ଚିହ୍ନଟ ହୋଇଛି । ସପ୍ତାହକ ଭିତରେ ଏସବୁ ସ୍ଥାନରେ ବ୍ୟାରିକେଡ଼ ଲାଗିବ ବୋଲି ବିଏମସି କମିଶନର ରାଜେଶ ପ୍ରଭାକର ପାଟିଲ କହିଛନ୍ତି।

ଭୁବନେଶ୍ବର: ପ୍ରତିଶ୍ରୁତି ପରେ ଆନ୍ଦୋଳନରୁ ଓହରିଲେ ସଫେଇ କର୍ମଚାରୀ । ବିଭିନ୍ନ ଦାବି ନେଇ କାଲି ଠାରୁ ଆନ୍ଦୋଳନ କରିଆସୁଥିବା ହଜାର ହଜାର କର୍ମଚାରୀ ଆଜି ବିଏମସି ଅଫିସ ଘେରାଉ କରିଥିଲେ । ପରିସ୍ଥିତିକୁ ଦୃଷ୍ଟିରେ ରଖି ବିଏମସି କମିଶନର ଓ ମେୟରଙ୍କ ଉପସ୍ଥିତିରେ ଗୁରୁତ୍ବପୂର୍ଣ୍ଣ ବୈଠକ ବସିଥିଲା ।

ସଫେଇ କର୍ମଚାରୀମାନଙ୍କର ଦୁଇଟି ଦାବି ସମ୍ପର୍କରେ ଦୀର୍ଘ ସମୟ ଧରି ଆଲୋଚନା ହୋଇଥିଲା । ଶେଷରେ ସରକାର ସଫେଇ କର୍ମଚାରୀମାନଙ୍କ ଦାବି ମାନିନେଇଥିଲେ । ୩ ଦିନ ଭିତରେ ସବୁ ସଫେଇ କର୍ମଚାରୀମାନଙ୍କର ଦରମା ବୃଦ୍ଧି ହେବ ବୋଲି ପ୍ରତିଶ୍ରୁତି ଦେଇଛନ୍ତି ବିଏମସି କମିଶନର ରାଜେଶ ପ୍ରଭାକର ପାଟିଲ।

ଏହାପରେ ଆଜିଠାରୁ ସଫେଇ କର୍ମଚାରୀ ସଫେଇ କାମରେ ଯୋଗଦେବେ ବୋଲି କହିଛନ୍ତି । ୧୫ ଦିନ ପର୍ଯ୍ୟନ୍ତ ସଫେଇ କର୍ମଚାରୀମାନେ ଅଳିଆ ବାଛିବା ପାଇଁ ସହଯୋଗ କରିବା ନେଇ ବୈଠକରେ ସ୍ଥିର ହୋଇଛି। ବୈଠକ ଶେଷ ହେବା ପରେ ସଫେଇ କର୍ମଚାରୀମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବିଏମସି କମିଶନର ଓ ମେୟରଙ୍କୁ ଧନ୍ୟବାଦ ଜଣାଇଛନ୍ତି।

ଭୁବନେଶ୍ବର: ବଢ଼ିଲା କର୍ପୋରେଟରଙ୍କ ମିଟିଙ୍ଗ ଭତ୍ତା । ବିଏମ୍‌ସି କର୍ପୋରେଟରଙ୍କ ମିଟିଂ ଭତ୍ତା ବୃଦ୍ଧି ହୋଇଛି । କର୍ପୋରେଟରଙ୍କ ଭତ୍ତା ୭୦୦ରୁ ୧୦ ହଜାର ଟଙ୍କାକୁ ବୃଦ୍ଧି କରାଯାଇଛି।  ପ୍ରତି କର୍ପୋରେସନ ମିଟିଂ ପିଛା କର୍ପୋରେଟରଙ୍କୁ ୧୦ ହଜାର ଟଙ୍କା ମିଳିବ । କର୍ପୋରେସନ ମିଟିଂ ପାଇଁ ମେୟର ଭତ୍ତା ହେଲା ୫୦ ହଜାର ଟଙ୍କା ହୋଇଥିବାବେଳେ ଡେପୁଟି ମେୟର ପାଇବେ ୨୫ ହଜାର ଟଙ୍କା । ଏନେଇ କର୍ପୋରେସନ ବୈଠକରେ ନିଷ୍ପତ୍ତି ହୋଇଛି । ଏ ନେଇ ବିଏମସି କମିଶନର ବିଜୟ ଅମୃତା କୁଲାଙ୍ଗେ ସୂଚନା ଦେଇଛନ୍ତି। ସମସ୍ତ ଭତ୍ତା ବିଏମସି ପ୍ରଦାନ କରିବ ।

ଭୁବନେଶ୍ବର: ବିଏମସି କର୍ମଚାରୀମାନେ କାର୍ଯ୍ୟାଳୟକୁ ବିଳମ୍ବରେ ଆସିଲେ ହେବ କଡା କାର୍ଯ୍ୟାନୁଷ୍ଠାନ। ୫ଟି ମାଧ୍ୟମରେ ରାଜ୍ୟ ବିକାଶ ଜାରି ରହିଛି । ୫ଟିର ମୂଳତତ୍ତ୍ଵ ବା ମୌଳିକତା ହେଉଛି ସମୟାନୁବର୍ତ୍ତିତା । ତେଣୁ ବିଏମସିର କର୍ମଚାରୀମାନେ ସଠିକ୍ ସମୟରେ କାର୍ଯ୍ୟାଳୟରେ ପହଞ୍ଚିବା ଲାଗି ବିଜ୍ଞପ୍ତି ଜାରି କରିଛନ୍ତି ବିଏମସି କମିଶନର।

ବିଏମସିର ସବୁ କର୍ମଚାରୀମାନେ କାର୍ଯ୍ୟାଳୟରେ ସକାଳ ୯ ଟା ୪୫ ମିନିଟରୁ ୧୦ ଟା ୧୫ ମିନିଟ ଭିତରେ ପହଞ୍ଚିବା ଲାଗି ହୋଇଛି ନିର୍ଦ୍ଦେଶ । ସକାଳ ୧୦ଟା ୩୦ପରେ ଅଫିସରେ ପହଞ୍ଚିଲେ ହେବ no work no pay ବ୍ୟବସ୍ଥା ଲାଗୁ କରାଯିବ । ଅର୍ଥାତ ବିଳମ୍ବରେ ଅଫିସ୍ ଆସିଲେ ବନ୍ଦ ହେବ ଦରମା ।

ବିଏମସି କମିଶନର ଏ ନେଇ ଏକ ବିଜ୍ଞପ୍ତି ଜାରି କରିଛନ୍ତି। ବିଏମସିରେ କାର୍ଯ୍ୟରତ ସରକାରୀ କର୍ମଚାରୀ, DLR, CLR, ଚୁକ୍ତିଭିତ୍ତିକ, ଆଉଟସୋର୍ସିଂ କର୍ମଚାରୀମାନଙ୍କ ପାଇଁ ଏହି ନିୟମ ବାଧ୍ୟତାମୂଳକ।

ଭୁବନେଶ୍ୱର: ଦୟା ନଦୀ ପାଣିକୁ ପ୍ରଦୂଷଣମୁକ୍ତ ରଖାଯିବା ଉପରେ 5T ତଥା ନବୀନ ଓଡିଶାର ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଗୁରୁତ୍ୱାରୋପ କରିଛନ୍ତି ଏବଂ ଏ ସମ୍ପର୍କରେ ତୁରନ୍ତ ପଦକ୍ଷେପ ଗ୍ରହଣ କରିବା ପାଇଁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ, ନଗର ଉନ୍ନୟନ ବିଭାଗ ଏବଂ ଭୁବନେଶ୍ୱର ମହାନଗର ନିଗମକୁ ସେ ନିର୍ଦ୍ଦେଶ ଦେଇଛନ୍ତି।

ଦୟା ନଦୀର ଜଳକୁ ବିଶୁଦ୍ଧ ରଖିବା ସଂକ୍ରାନ୍ତରେ ଆଜି 5T ତଥା ନବୀନ ଓଡିଶାର ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ବୈଠକରେ ନିଆଯାଇଥିବା ନିଷ୍ପତ୍ତି ଅନୁଯାୟୀ ଭୁବନେଶ୍ୱର ମହାନଗର ନିଗମ ଅଞ୍ଚଳରେ ଥିବା ବିଭିନ୍ନ ପ୍ରତିଷ୍ଠାନର ଦୂଷିତ ଜଳକୁ ସ୍ୱେରେଜ ଲାଇନ୍‌ ସହିତ ସଂଯୋଗ କରିବା ପାଇଁ ବ୍ୟାଧତାମୂଳକ କରାଯାଇଛି। ଏହା ସହିତ BMCର ସବୁ ଘର ଯେପରି ସ୍ୱେରେଜ ଲାଇନ୍‌ ସହିତ ଶୀଘ୍ର ସଂଯୁକ୍ତ ହୋଇପାରିବ ସେ ଦିଗରେ ମଧ୍ୟ ସଚେତନତା ସୃଷ୍ଟି କରିବାପାଇଁ ଶ୍ରୀ ପାଣ୍ଡିଆନ ନିର୍ଦ୍ଦେଶ ଦେଇଥିଲେ।

ଭୁବନେଶ୍ୱରରେ ୱାଟ୍‌କୋ ପକ୍ଷରୁ ବିଭିନ୍ନ ଅଞ୍ଚଳରେ ସ୍ୱେରେଜ କାମ ଚାଲିଛି। ବିଭିନ୍ନ ଏଜେନ୍ସି ସହ ସମନ୍ୱୟ ରକ୍ଷାକରି କାମ କଲେ ଜନସାଧାରଣଙ୍କ ବିଶେଷ ଅସୁବିଧା ହେବ ନାହିଁ ବୋଲି ଶ୍ରୀ ପାଣ୍ଡିଆନ ମତଦେବା ସହିତ ସ୍ୱେରେଜ କାମ ତ୍ୱରାନ୍ୱିତ କରି ନିର୍ଦ୍ଦିଷ୍ଟ ସମୟସୀମା ମଧ୍ୟରେ ଶେଷ କରିବା ଏବଂ ବସ୍ତି ସମେତ ସହରର ସବୁ ଅଞ୍ଚଳ ଯେପରି ସ୍ୱେରେଜ ବ୍ୟବସ୍ଥା ସହିତ ସଂଯୁକ୍ତ ହେବ ସେଦିଗରେ ପଦକ୍ଷେପ ନେବା ପାଇଁ ଶ୍ରୀ ପାଣ୍ଡିଆନ ୱାଟ୍‌କୋକୁ ନିର୍ଦ୍ଦେଶ ଦେଇଥିଲେ।

ଦୟା ନଦୀର ଜଳକୁ ବିଶୁଦ୍ଧ କରିବା ପାଇଁ ଦୟା ଓ ଗଙ୍ଗୁଆର ସଂଯୋଗ ସ୍ଥଳରେ ୱାଟ୍‌କୋ ପକ୍ଷରୁ ଅତ୍ୟାଧୁନିକ ବୈଷୟିକ ଜ୍ଞାନକୌଶଳଯୁକ୍ତ ଏକ ବିଶୋଧନ ପ୍ଲାଣ୍ଟ ନିର୍ମାଣ କରିବା ପାଇଁ ବୈଠକରେ ନିଷ୍ପତ୍ତି ହୋଇଥିଲା।

ଭୁବନେଶ୍ୱର ସହରରେ ବିଭିନ୍ନ ଶିଳ୍ପାନୁଷ୍ଠାନ ମଧ୍ୟ ରହିଛି। ସେମାନଙ୍କର ବର୍ଜ୍ୟବସ୍ତୁ ଓ ଜଳର କିପରି ଉପଯୁକ୍ତ ବିଶୋଧନ କରାଯାଇପାରିବ ସେଥିପାଇଁ IDCO, State Pollution Control Board ଓ BMC ପକ୍ଷରୁ ନିୟମିତ ଯାଞ୍ଚ କରାଯିବ।

ଭୁବନେଶ୍ୱର ସହରର ବିଭିନ୍ନ ନର୍ଦ୍ଦମା ଜଳ ବିଶୋଧନ ପ୍ଲାଣ୍ଟରେ ପହଞ୍ଚିବା  ପୂର୍ବରୁ ସେଗୁଡିକର WATCO ଓ SPCB ପକ୍ଷରୁ ନିୟମିତ ବୈଷୟିକ ଯାଞ୍ଚ ପାଇଁ ବୈଠକରେ ନିଷ୍ପତ୍ତି ଗ୍ରହଣ କରାଯାଇଥିଲା।

ଦୟା ନଦୀର ଜଳକୁ ବିଶୁଦ୍ଧ ରଖିବାପାଇଁ, BMC ଅଞ୍ଚଳର ବର୍ଜ୍ୟବସ୍ତୁ ସୃଷ୍ଟିକାରୀ ଶିଳ୍ପ ତଥା ଅନ୍ୟ ପ୍ରତିଷ୍ଠାନଗୁଡିକ ଉପରେ ତୀକ୍ଷ୍ଣ ନଜର ରଖି ଏହାର ନିୟନ୍ତ୍ରଣ ପାଇଁ ପଦକ୍ଷେପ ନେବାକୁ BMCକୁ ଶ୍ରୀ ପାଣ୍ଡିଆନ ନିର୍ଦ୍ଦେଶ ଦେଇଥିଲେ।

BDA ର ଉପାଧ୍ୟକ୍ଷ ବଲୱନ୍ତ ସିଂ ଅଧ୍ୟକ୍ଷତାରେ ଗଠିତ ଦୟା ଟାସ୍କ ଫୋର୍ସ ଦୟା ନଦୀ ପାଣି କୁ ବିଶୁଦ୍ଧ ରଖିବା ପାଇଁ ବିଭିନ୍ନ ଏଜେନ୍ସି ସହିତ ସମନ୍ଵୟ ରଖି ପଦକ୍ଷେପ ନେଇଛି । ବୈଠକରେ ବଳବନ୍ତ ସିଂହ ନିଆ ଯାଇଥିବା ପଦକ୍ଷେପ ସମ୍ପର୍କରେ ଏକ ପ୍ରେଜେଣ୍ଟେସନ  ଉପସ୍ଥାପିତ  କରିଥିଲେ

ଭୁବନେଶ୍ୱର: ଭୁବନେଶ୍ୱରରେ ବଦଳିବ ଶ୍ମଶାନର ରୂପରେଖ। ରୂପାନ୍ତରିତ ହେବ ରାଜଧାନୀର ସବୁ ଶ୍ମଶାନ। ସତ୍ୟନଗର ଶ୍ମଶାନର ହେବ ନବକଳେବର। ଇଲେକ୍ଟ୍ରିକ ଚୁଲା ଉଠାଯିବା ସହ ପାରମ୍ପରିକ ଓ ଗ୍ୟାସ ଚୁଲାରେ ଶବଦାହ ପାଇଁ ବ୍ୟବସ୍ଥା କରିବ ବିଏମସି। ଏଥିପାଇଁ ସତ୍ୟନଗର ଶ୍ମଶାନରେ ଭିତ୍ତିସ୍ଥାପନ କରିଛନ୍ତି ମଧ୍ୟ ବିଧାୟକ ଅନନ୍ତ ନାରାୟଣ ଜେନା ଓ ମେୟର ସୁଲୋଚନା ଦାସ।

୨ କୋଟି ୩୪ ଲକ୍ଷ ଟଙ୍କା ବ୍ୟୟରେ ଶ୍ମଶାନର ପୁନରୁଦ୍ଧାର କରିବାକୁ ବିଏମସି ଯୋଜନା ରଖିଛି। ଶ୍ମଶାନକୁ ଆସୁଥିବା ଲୋକ ଯେପରି ସମସ୍ତ ସୁବିଧା ପାଇପାରିବେ ସେଥିପ୍ରତି ଗୁରୁତ୍ବ ଦିଆଯାଉଛି। ଏହାସହ କବର ସ୍ଥାନର ମଧ୍ୟ ନବୀକରଣ କରାଯିବ। ଶ୍ମଶାନ ଭିତରେ ଅଧିକ ଗଛ ଲଗାଇବା, ପୋଖରୀ ଓ ସୌନ୍ଦର୍ଯ୍ୟକରଣ ପାଇଁ ସବୁ ବ୍ୟବସ୍ଥା ଗ୍ରହଣ କରିବାକୁ ଲକ୍ଷ୍ୟ ରଖିଛି ବିଏମସି।