ନୂଆଦିଲ୍ଲୀ: ବୌଦ୍ଧ ଧର୍ମଗୁରୁ ଦଲାଇ ଲାମାଙ୍କୁ ଧମକ ଦେଇଥିବା ସନ୍ଦିଗ୍ଧ ଚୀନ ମହିଳାଙ୍କୁ ବିହାର ପୋଲିସ ଖୋଜି ବାହାର କରିଛି। ଗୁପ୍ତଚରବୃତ୍ତି ଅଭିଯୋଗରେ ବିହାର ପୁଲିସ ବୋଧଗୟାରୁ ଜଣେ ସନ୍ଦିଗ୍ଧ ଚୀନ ମହିଳାକୁ ଅଟକ ରଖି ପଚରାଉଚରା କରୁଛି। ସନ୍ଦିଗ୍ଧ ମହିଳା ଗୁପ୍ତଚରଙ୍କ ବୟସ ପାଖାପାଖି ୫୦ ହେବ ବୋଲି କୁହାଯାଉଛି। ବିହାର ପୋଲିସ ଚୀନ ଗୁପ୍ତଚରଙ୍କୁ ବୋଧଗୟାର କାଲଚକ୍ର ଗ୍ରାଉଣ୍ଡ ବାହାରୁ କାବୁ କରି ନେଇଛି। ଏହି ଜାଗାକୁ ଦଲାଇ ଲାମା ପ୍ରବଚନ ଦେବାକୁ ଆସି ଥାଆନ୍ତି। ପୋଲିସ ମୁତାବକ, ସନ୍ଦିଗ୍ଧ ଚୀନ ମହିଳାଙ୍କ ନାମ ସଙ୍ଗ୍ ସିଆଓଲାନ ବୋଲି ଜଣାପଡିଛି ।

ମିଳିଥିବା ସୂଚନା ଅନୁସାରେ, ସନ୍ଦିଗ୍ଧ ମହିଳାଜଣକ ୨୦୧୯ରେ ପ୍ରଥମେ ଭାରତ ଆସିଥିଲେ। ପରେ କିନ୍ତୁ ସେ ଚୀନ ଫେରି ଯାଇଥିଲେ। ଏହାପରେ ଦ୍ୱିତୀୟ ଥର ଭାରତ ଆସି ପୁଣି ନେପାଳ ଚାଲି ଯାଇଥିଲେ। ସମ୍ପୃକ୍ତ ମହିଳାଜଣକ ନେପାଳରେ କିଛି ଦିନ ବିତାଇବା ପରେ ବୋଧଗୟାରେ ପହଞ୍ଚିଥିଲେ। ଗୟା ସିଟି ପୋଲିସ ଏସ୍‌ପି ଅଶୋକ ପ୍ରସାଦ ତାଙ୍କୁ ଏ ନେଇ ପଚରାଉଚରା ଚଳାଇଛି।

ଏହା ପୂର୍ବରୁ ଏହି ମହିଳାଙ୍କ ସଂପର୍କରେ ଗୁଇନ୍ଦା ଏଜେନ୍ସିମାନେ ଏକ ସତର୍କତା ଜାରି କରିଥିଲେ । ଏହି ରିପୋର୍ଟ ଆଧାରରେ ଚୀନ ମହିଳାଙ୍କ ଏକ ରେଖାଚିତ୍ର ବା ସ୍କେଚ୍ ଜାରି କରାଯାଇଥିଲା । ସଂପୃକ୍ତ ମହିଳାର ନାଁ ସଙ୍ଗ୍ ସିଆଓଲାନ ବୋଲି ଜଣାପଡ଼ିଥିଲା ଓ ତା ସମ୍ପର୍କରେ କୌଣସି ସୂଚନା ମିଳିଲେ ପୁଲିସକୁ ଜଣାଇବାକୁ ଲୋକମାନଙ୍କୁ ନିବେଦନ କରାଯାଇଥିଲା । ଗୁଇନ୍ଦା ରିପୋର୍ଟ ଅନୁସାରେ ଉକ୍ତ ମହି​ଳା ଗତ ପ୍ରାୟ ୧ ବର୍ଷ ହେଲା ବିନା ଭିସାରେ ବୋଧଗୟାରେ ରହୁଥିଲେ ।

ଦଲାଇଲାମାଙ୍କୁ ନେଇ ଚୀନକୁ ଟାର୍ଗେଟ କରିଛି ଆମେରିକା। ଦଲାଇଲାମାଙ୍କ ଉତ୍ତରାଧିକାରୀ ଚୟନ ପ୍ରକ୍ରିୟାରେ ଚୀନର କୌଣସି ଭୂମିକା ରହିବା ଅନୁଚିତ ବୋଲି ଆମେରିକା ବୈଦେଶିକ ମନ୍ତ୍ରାଳୟର ମୁଖପାତ୍ର ନେଡ ପ୍ରାଇସ କହିଛନ୍ତି।ତିବ୍ବତରେ ବୌଦ୍ଧ ଧର୍ମାବଲମ୍ବୀଙ୍କ ମଧ୍ୟରେ ନିଜ ସ୍ଥିତିକୁ ମଜବୁତ କରିବା ଲାଗି ଚୀନ ଦଲାଇଲାମାଙ୍କ ଉତ୍ତରାଧିକାରୀ ଚୟନ କରିବାକୁ ଯାଉଥିବା ସମୟରେ ଆମେରିକା ପକ୍ଷରୁ ଏହି ମନ୍ତବ୍ୟ ଦିଆଯାଇଛି।

ଆମେରିକା ବୈଦେଶିକ ମନ୍ତ୍ରାଳୟର ମୁଖପାତ୍ର ନେଡ ପ୍ରାଇସ କହିଛନ୍ତି ଯେ, ଦଲାଇ ଲାମାଙ୍କ ଉତ୍ତରାଧିକାରୀ ବାଛିବାରେ ଚୀନ୍ ସରକାରଙ୍କର କୌଣସି ଭୂମିକା ରହିବା ଉଚିତ ନୁହେଁ ।  ୨୫ ବର୍ଷରୁ ଅଧିକ ସମୟ ପୂର୍ବରୁ ମଧ୍ୟ ପାଞ୍ଚେନ୍‌ ଲାମାଙ୍କ ଉତ୍ତରାଧିକାରୀ ବାଛିବା ପ୍ରକ୍ରିୟାରେ ଚୀନ୍‌ର ହସ୍ତକ୍ଷେପ ଧାର୍ମିକ ସ୍ୱତନ୍ତ୍ରତାକୁ ଉଲ୍ଲଂଘନ କରିଥିବା ଦର୍ଶାଉଛି । ଏଥିରେ ପିଲାଦିନେ ପଞ୍ଚେନ୍ ଲାମାଙ୍କୁ ‘ଗାୟବ’ କରିବା ଏବଂ ତାଙ୍କୁ (ପିପୁଲ୍ସ ରିପବ୍ଲିକ୍ ଅଫ୍ ଚାଇନା) ସରକାରଙ୍କ ଦ୍ୱାରା ମନୋନୀତ ଉତ୍ତରାଧିକାରୀଙ୍କ ସହ ବଦଳାଇବା କଥା ମଧ୍ୟ ଜଡ଼ିତ ।

ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗତ ବର୍ଷ ଡିସେମ୍ବରରେ ଉକ୍ତ ପ୍ରକ୍ରିୟାରେ ଚୀନ ହସ୍ତକ୍ଷେପକୁ ରୋକିବା ପାଇଁ ତିବ୍ବତ ନୀତିକୁ ମଞ୍ଜୁରୀ ଦେଇଥିଲେ। ଏଥିରେ ତିବ୍ବତରେ ଆମିରକୀୟ ବାଣିଜ୍ୟିକ ଦୂତାବାସ ସ୍ଥାପନା ଏବଂ ଏହା
ସୁନିଶ୍ଚିତ ଲାଗି ଏକ ଅନ୍ତର୍ଜାତୀୟ ମେଣ୍ଟ ବନାଇବାକୁ ପ୍ରସ୍ତାବ ରହିଥିଲା ଏହା ଦ୍ୱାରା ତିବ୍ଦତୀୟ ଧର୍ମଗୁରୁ ଦଲାଇଲାମା ଚୟନରେ ଚିନ୍‌ର ହସ୍ତକ୍ଷେପକୁ ରୋକାଯାଇ ପାରିବ ଏବଂ ତୀବ୍ଦତୀୟ ମାନେ ହିଁ ସେମାନେ ନିଜର ଧର୍ମଗୁରୁ ଚୟନ କରିପାରିବେ ।

ଗତ ଏକ ଦଶନ୍ଧି ଧରି ଚୀନ୍‌ ଦଲାଇ ଲାମା (୧୫ ତମ ଦଲାଇ ଲାମା)ଙ୍କ ପରବର୍ତ୍ତୀ ଅବତାର ନେଇ ଦାବି କରିଆସୁଛି । ଦଲାଇ ଲାମା ଏବଂ ନିର୍ବାଚିତ ତିବ୍ଦତ ସରକାର ଡ୍ରାଗନର ଏହି ଦାବିକୁ ପ୍ରତ୍ୟାଖ୍ୟାନ କରି ଆସୁଛନ୍ତି । ସେ କହିଛନ୍ତି ପରବର୍ତ୍ତୀ ଅବତାର କେବଳ ତିବ୍ଦତୀୟ ସମ୍ପ୍ରଦାୟର ନିୟମ ଅନୁଯାୟୀ ଚୟନ କରାଯିବ ।