ଭାରତୀୟ କ୍ରିକେଟ୍ ଦଳ ଆସନ୍ତା ଜୁନ୍ ମାସରେ ଆୟର୍ଲାଣ୍ଡ ଗସ୍ତରେ ଯିବାର କାର୍ଯ୍ୟକ୍ରମ ରହିଛି। ବହୁ ପ୍ରତୀକ୍ଷିତ ଇଂଲଣ୍ଡ ଗସ୍ତ ପୂର୍ବରୁ ଟିମ୍ ଇଣ୍ଡିଆ ଏହି ଟି-୨୦ ସିରିଜ୍ ଖେଳିବ। ଏ ନେଇ ଆୟର୍ଲାଣ୍ଡ କ୍ରିକେଟ୍ ବୋର୍ଡ ପକ୍ଷରୁ ସ୍ପଷ୍ଟ କରାଯାଇଛି। ଟି-୨୦ ବିଶ୍ୱକପ୍ ବିଜେତା ଭାରତୀୟ ଦଳ ପାଇଁ ଏହି ସିରିଜ୍ ଆଗାମୀ ଇଂଲଣ୍ଡ ଗସ୍ତ ପାଇଁ ଏକ ପ୍ରକାର ପ୍ରସ୍ତୁତି (ୱାର୍ମ-ଅପ୍) ଭାବେ କାମ କରିବ ବୋଲି ଆଶା କରାଯାଉଛି।

ବର୍ତ୍ତମାନର ସୂଚନା ଅନୁଯାୟୀ, ଜୁନ୍ ୨୦ ତାରିଖ ପର୍ଯ୍ୟନ୍ତ ଭାରତ ଘରୋଇ ମାଟିରେ ଆଫଗାନିସ୍ତାନ ବିପକ୍ଷରେ ଗୋଟିଏ ଟେଷ୍ଟ ଏବଂ ୩ଟି ଦିନିକିଆ ମ୍ୟାଚ୍ ଖେଳିବ। ଏହି ସିରିଜ୍ ଶେଷ ହେବା ମାତ୍ରେ ଟିମ୍ ଇଣ୍ଡିଆ ସିଧାସଳଖ ଆୟର୍ଲାଣ୍ଡ ଅଭିମୁଖେ ବାହାରିବ, ଯେଉଁଠାରେ ଦୁଇଟି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳାଯିବାର ସମ୍ଭାବନା ରହିଛି। ଆୟର୍ଲାଣ୍ଡ ସିରିଜ୍ ଶେଷ ହେବା ପରେ, ଜୁଲାଇ ୧ରୁ ୧୯ ତାରିଖ ମଧ୍ୟରେ ଇଂଲଣ୍ଡ ବିପକ୍ଷରେ ଭାରତ ୫ଟି ଟି-୨୦ ଏବଂ ୩ଟି ଦିନିକିଆ ମ୍ୟାଚ୍ ଖେଳିବାର କାର୍ଯ୍ୟକ୍ରମ ନିର୍ଦ୍ଧାରିତ ହୋଇସାରିଛି।

ଆୟର୍ଲାଣ୍ଡ ଦଳରେ ବଡ଼ ପରିବର୍ତ୍ତନ

ଆୟର୍ଲାଣ୍ଡ କ୍ରିକେଟର ହାଇ ପରଫରମାନ୍ସ ନିର୍ଦ୍ଦେଶକ ଗ୍ରାହାମ୍ ୱେଷ୍ଟ ଏହି ସିରିଜକୁ ନିଶ୍ଚିତ କରିଛନ୍ତି। ଏହି ଘୋଷଣା ସହିତ ସେ ସୂଚନା ଦେଇଛନ୍ତି ଯେ ଆୟର୍ଲାଣ୍ଡର ଅଭିଜ୍ଞ ଖେଳାଳି ପଲ୍ ଷ୍ଟିର୍ଲିଂ ଟି-୨୦ ଅଧିନାୟକ ପଦରୁ ଇସ୍ତଫା ଦେଇଛନ୍ତି। ୨୦୨୮ ଟି-୨୦ ବିଶ୍ୱକପକୁ ଆଖିରେ ରଖି ନୂଆ ଅଧିନାୟକଙ୍କ ନେତୃତ୍ୱରେ ଦଳ ଏହି ସିରିଜ୍ ମାଧ୍ୟମରେ ଏକ ନୂଆ ଆରମ୍ଭ କରିବାକୁ ଲକ୍ଷ୍ୟ ରଖିଛି। ତେବେ ଷ୍ଟିର୍ଲିଂ ଦିନିକିଆ ଦଳର ନେତୃତ୍ୱ ନେବା ଜାରି ରଖିବେ।

ପୂର୍ବ ରେକର୍ଡ ଓ ପ୍ରସ୍ତୁତି

ବିଗତ ୭ ବର୍ଷ ମଧ୍ୟରେ ଭାରତୀୟ ଦଳ ୨୦୧୮, ୨୦୨୨ ଏବଂ ୨୦୨୩ ମସିହାରେ ଆୟର୍ଲାଣ୍ଡ ଗସ୍ତ କରିଛି ଏବଂ ସବୁଥର କ୍ରିକେଟ୍ ପ୍ରଶଂସକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି। ସୂର୍ଯ୍ୟକୁମାର ଯାଦବଙ୍କ ନେତୃତ୍ୱାଧୀନ ଟି-୨୦ ଦଳ ପାଇଁ ଆୟର୍ଲାଣ୍ଡ ବିପକ୍ଷ ଏହି ଦୁଇ ଟିକିଆ ମ୍ୟାଚ୍ ବେଶ୍ ଗୁରୁତ୍ୱପୂର୍ଣ୍ଣ ରହିବ, କାରଣ ଏହା ଇଂଲଣ୍ଡର ସମାନ ପରିବେଶ ଓ ପିଚ୍ କଣ୍ଡିସନ୍ ସହ ଖାପ ଖୁଆଇବାରେ ଖେଳାଳିମାନଙ୍କୁ ସାହାଯ୍ୟ କରିବ। ମ୍ୟାଚ୍ ଗୁଡ଼ିକ ଡବଲିନ୍ ନିକଟସ୍ଥ ମାଲାହାଇଡ୍ ଗ୍ରାଉଣ୍ଡରେ ଖେଳାଯିବାର ଯଥେଷ୍ଟ ସମ୍ଭାବନା ରହିଛି।

ଡବ୍ଲିନ୍‌‌: ସ୍ଥାନୀୟ ମାଲାହାଇଡ୍‌‌ରେ ଭାରତ ଓ ଘରୋଇ ଆୟର୍ଲାଣ୍ଡ ରବିବାର ଦ୍ୱିତୀୟ ଟି-୨୦ ମ୍ୟାଚ୍‌‌ରେ ମୁହାଁମୁହିଁ ହେବେ। ପ୍ରଥମ ଟି-୨୦ରେ ଭାରତ ଡିଏଲଏସ୍‌ ପ୍ରଣାଳୀରେ ୨ ରନରେ ବିଜୟୀ ହୋଇ ସିରିଜରେ ୧-୦ରେ ଅଗ୍ରଣୀ ହାସଲ କରିଛି। ତେଣୁ ଦ୍ୱିତୀୟ ମୁକାବିଲା ଜିତି ଭାରତ ଆଗୁଆ ସିରିଜ ହାତେଇବା ଲକ୍ଷ୍ୟରେ ରହିଛି। ଅନ୍ୟପଟେ ଆୟର୍ଲାଣ୍ଡ ଘରୋଇ ପରିବେଶରୁ ଫାଇଦା ଉଠାଇ ଏହି ମ୍ୟାଚ୍‌‌ ଜିତି ସିରିଜ ବଞ୍ଚାଇବାକୁ ଉଦ୍ୟମ କରିବ। ଫଳରେ ଏହି ମ୍ୟାଚ୍‌‌ରେ ଜବରଦସ୍ତ ସଂଘର୍ଷ ଦେଖିବାକୁ ମିଳିବ।

ଯୁବ ଖେଳାଳିଙ୍କ ନେଇ ଭାରତୀୟ ଦଳ ପ୍ରଥମ ମ୍ୟାଚ୍‌‌ରେ ଜବରଦସ୍ତ ବୋଲିଂ କରିଥିଲା ଓ ପ୍ରତିପକ୍ଷ ଦଳକୁ ବଡ଼ ସ୍କୋର ହାସଲ କରିବାକୁ ସୁଯୋଗ ଦେଇ ନଥିଲା। ବର୍ଷା କାରଣରୁ ମ୍ୟାଚ୍‌‌ ବନ୍ଦ ହେବା ଫଳରେ ଭାରତ ବିଜୟୀ ଘୋଷିତ ହୋଇଥିଲା। ଫଳରେ ଭାରତୀୟ ଯୁବ ବ୍ୟାଟରମାନେ ବ୍ୟାଟିଂ କରିବାକୁ ପର୍ଯ୍ୟାପ୍ତ ସୁଯୋଗ ପାଇ ନଥିଲେ। ଏଥର ପାଗ ଭଲ ରହିଲେ ମଧ୍ୟକ୍ରମ ବ୍ୟାଟରମାନେ ଭଲ ବ୍ୟାଟିଂ କରିବାର ସୁଯୋଗ ପାଇବେ। ଶିବମ୍‌‌ ଦୁବେ, ଋତୁରାଜ ଗାଏକ୍ୱାଡ ଓ ରିଙ୍କୁ ସିଂ ମିଳିଥିବା ସୁଯୋଗର ଫାଇଦା ଉଠାଇବେ ବୋଲି ଆଶା କରାଯାଉଛି। ରୋହିତ ଶର୍ମା, ବିରାଟ କୋହଲି, ଶୁବମାନ ଗିଲ, ହାର୍ଦ୍ଦିକ ପାଣ୍ଡ୍ୟା ଓ ସୂର୍ଯ୍ୟକୁମାର ଯାଦବଙ୍କ ଅନୁପସ୍ଥିତି ଏହି ଯୁବ ଖେଳାଳିଙ୍କ ପାଇଁ ସୁଯୋଗ ସୃଷ୍ଟି କରିଛି। ବୋଲିଂରେ ଆଘାତ ସମସ୍ୟାରୁ ମୁକୁଳି ଅଭିଜ୍ଞ ଦ୍ରୁତ ବୋଲର ଯଶପ୍ରୀତ ବୁମ୍‌‌ରା ପ୍ରଥମ ଓଭରରେ ୨ ୱିକେଟ ନେଇ ସଫଳ ପ୍ରତ୍ୟାବର୍ତ୍ତନ କରିଛନ୍ତି। ୪ ଓଭର ବୋଲିଂ କରି ସେ ୨୪ ରନ ବ୍ୟୟ କରି ୨ ୱିକେଟ ଅକ୍ତିଆର କରିଥିଲେ। ସେ ମଧ୍ୟ ୯ଟି ଡଟ୍‌‌ ବଲ୍‌‌ ପକାଇଥିଲେ। ଟି-୨୦ ପଦାର୍ପଣ କରିଥିବା ପ୍ରସିଦ୍ଧ କ୍ରିଷ୍ଣାଙ୍କ ସହ ସେ ମିଶି ଭଲ ବୋଲିଂ କରିଥିଲେ। ତାଙ୍କ ଫିଟ୍‌‌ନେସ୍‌‌ ଉପରେ ସମସ୍ତଙ୍କ ନଜର ରହିଛି। ଅଲରାଉଣ୍ଡର ୱାସିଂଟନ ସୁନ୍ଦର ମଧ୍ୟ ଆଘାତ ସମସ୍ୟା ପାଇଁ ଦଳରେ ସ୍ଥାନ ପକ୍କା କରିପାରି ନାହାନ୍ତି। ତେଣୁ ବୋଲିଂରେ ସେ ବୁମ୍‌‌ରାଙ୍କୁ ଉପଯୁକ୍ତ ସହଯୋଗ କରି ଚୟନକର୍ତ୍ତାଙ୍କୁ ପ୍ରଭାବିତ କରିବାକୁ ପ୍ରୟାସ କରିବେ। ପାଣ୍ଡ୍ୟାଙ୍କ ଅନୁପସ୍ଥିତରେ ସେ ନିଜର ଅଲରାଉଣ୍ଡ ଦକ୍ଷତାକୁ ପ୍ରମାଣ କରିବାର ସୁଯୋଗ ପାଇବେ। ଡବ୍ଲିନ୍‌‌ର ମେଘୁଆ ପାଗରେ ଟସ୍‌‌ର ଭୂମିକା ଆହୁରି ଗୁରୁତ୍ୱପୂର୍ଣ୍ଣ ହୋଇଛି। ପ୍ରଥମ ମ୍ୟାଚ୍‌‌ରେ ଭାରତ ଭାଗ୍ୟଶାଳୀ ଥିଲା।

ଅପରପକ୍ଷରେ ଘରୋଇ ଦଳ ବ୍ୟାଟିଂ ଦକ୍ଷତାକୁ ନେଇ ଚିନ୍ତିତ ରହିଛି। ପ୍ରଥମ ଓଭରରେ ୨ ୱିକେଟ ହରାଇ ଆୟର୍ଲାଣ୍ଡ ବ୍ୟାକ୍‌‌ଫୁଟ୍‌‌କୁ ଚାଲିଯାଇଥିଲା। ସାରା ମ୍ୟାଚ୍‌‌ରେ ଆୟର୍ଲାଣ୍ଡ ବ୍ୟାଟରମାନେ ସଂଘର୍ଷ କରିଥିବା ଦେଖାଯାଇଥିଲା। ତେଣୁ ଦ୍ୱିତୀୟ ମ୍ୟାଚ୍‌‌ରେ ଘରୋଇ ଦଳ ଉନ୍ନତ ବ୍ୟାଟିଂ କରିବାକୁ ପ୍ରୟାସ କରିବ। ଅବଶ୍ୟ ବୋଲିଂରେ କ୍ରେଗ ୟଙ୍ଗ କ୍ରମାଗତ ଦୁଇ ୱିକେଟ ନେଇ ଭାରତକୁ ସମସ୍ୟାରେ ପକାଇଥିଲେ। ଭାରତକୁ ହରାଇବାକୁ ହେଲେ ବ୍ୟାଟିଂ, ବୋଲିଂ ଓ ଫିଲ୍ଡିଂରେ ଭଲ ପ୍ରଦର୍ଶନ କରିବାକୁ ହେବ ବୋଲି ଘରୋଇ ଦଳର ମ୍ୟାନେଜେମେଣ୍ଟ ହୃଦୟଙ୍ଗମ କରିଥିବ। ଆଗକୁ ଏସିଆ କପ୍‌‌ ଓ ବିଶ୍ୱକପ୍‌‌ ଖେଳାଯିବାର କର୍ଯ୍ୟକ୍ରମ ରହିଛି। ତେଣୁ ଏହି ସିରିଜ ବୁମ୍‌‌ରାଙ୍କ ପାଇଁ ବିଶେଷ ଭାବେ ଗୁରୁତ୍ୱ ବହନ କରୁଛି। ଭାରତକୁ ବିଜୟୀ କରାଇବା ସହ ବୁମ୍‌‌ରା ନିଜର ଫିଟ୍‌‌ନେସ, ଫର୍ମକୁ ପ୍ରମାଣିତ କରିବାର ଆବଶ୍ୟକତା ରହିଛି। ତେଣୁ ବୁମ୍‌‌ରାଙ୍କ ଉପରେ କେବଳ ଚୟନକର୍ତ୍ତା ନୁହଁ ସମସ୍ତଙ୍କ ନଜର ରହିଛି। ଘରୋଇ ଦଳରେ ଆଣ୍ଡ୍ର୍ୟୁ ବଲବିର୍ଣ୍ଣି, ଜୋଶୁଆ ଲିଟଲ, କ୍ରେଗ ୟଙ୍ଗ ଓ ଜର୍ଜ ଡେକରେଲ୍‌‌ଙ୍କ ଭଳି ମ୍ୟାଚ୍‌‌ ୱିନର ରହିଛନ୍ତି। ତେଣୁ ଭାରତ ଆୟର୍ଲାଣ୍ଡକୁ ଆଦୌ ହାଲ୍‌‌କା ଭାବେ ନେବନାହିଁ।

ଭାରତୀୟ ଦଳ : ଯଶପ୍ରୀତ ବୁମ୍‌‌ରା (ଅଧିନାୟକ), ଋତୁରାଜ ଗାଏକ୍ୱାଡ (ଉପ- ଅଧିନାୟକ), ଅର୍ଶଦୀପ ସିଂ, ଆଭେସ ଖାନ, ଶିବମ ଦୁବେ, ଯଶସ୍ୱୀ ଜୟସ୍ୱାଲ, ମୁକେଶ କୁମାର, ପ୍ରସିଦ୍ଧ କ୍ରିଷ୍ଣା, ରବି ବିଷ୍ଣୋଇ, ସଞ୍ଜୁ ସାମସନ, ଶାହବାଜ ଅହମ୍ମଦ, ଜିତେଶ ଶର୍ମା, ରିଙ୍କୁ ସିଂ, ତିଳକ ବର୍ମା ଓ ୱାସିଂଟନ ସୁନ୍ଦର।

ଆୟର୍ଲାଣ୍ଡ ଦଳ: ପଲ ଷ୍ଟିର୍ଲିଂ (ଅଧିନାୟକ), ରସ୍‌‌ ଆଡେର, ମାର୍କ ଆଡେର, ଆଣ୍ଡ୍ରିଉ ବଲବିର୍ଣ୍ଣି, କର୍ଟିସ କାମ୍ପର, ଗାରେଥ ଡେଲାନି, ଜର୍ଜ ଡକରେଲ, ଫିଅନ ହାଣ୍ଡ, ଜୋଶୁଆ ଲିଟିଲ, ବେରି ମ୍ୟାକାର୍ଥି, ହାରୀ ଟେକ୍ଟର, ଲୋରକାନ ଟକ୍କର, ଥିସ ଭାନ ଓଏରକମ୍‌‌, ବେନ ହ୍ୱାଇଟ୍‌‌ ଓ କ୍ରେଗ ୟଙ୍ଗ୍‌‌।

ଡବଲିନ୍‌‌: ଘରୋଇ ଆୟର୍ଲାଣ୍ଡ ବିପକ୍ଷରେ ଶୁକ୍ରବାରଠାରୁ ଆରମ୍ଭ ହୋଇଥିବା ଟି-୨୦ ସିରିଜରେ ଭାରତ ବିଜୟରୁ ଅଭିଯାନ ଆରମ୍ଭ କରିଛି। ବର୍ଷା ବାଧାପ୍ରାପ୍ତ ଏହି ପ୍ରଥମ ମ୍ୟାଚରେ ଭ୍ରମଣକାରୀ ଭାରତ ଡିଏଲ୍‌‌ଏସ୍‌ ପଦ୍ଧତିରେ ୨ ରନରେ ଆୟର୍ଲାଣ୍ଡକୁ ହରାଇ ଦେଇଛି। ଏଥିସହ ୩ ମ୍ୟାଚ୍‌‌ବିଶିଷ୍ଟ ଏହି ସିରିଜରେ ଭାରତ ୧-୦ରେ ଅଗ୍ରଣୀ ଲାଭ କରିଛି। ସିରିଜର ୨ୟ ମ୍ୟାଚ୍‌‌ ରବିବାର ଖେଳାଯିବ।

ଏହି ଟି-୨୦ ମ୍ୟାଚ୍‌‌ ମାଧ୍ୟମରେ ଅଭିଜ୍ଞ ଦ୍ରୁତ ବୋଲର ଯଶପ୍ରୀତ୍‌‌ ବୁମ୍‌‌ରା ଅନ୍ତର୍ଜାତୀୟ କ୍ରିକେଟ୍‌‌କୁ ପ୍ରତ୍ୟାବର୍ତ୍ତନ କରିଛନ୍ତି। ପିଠି ଯନ୍ତ୍ରଣା ଲାଗି ଦୀର୍ଘ ୧୧ ମାସର ବ୍ୟବଧାନ ପରେ କ୍ରିକେଟ୍‌‌କୁ ଫେରିଥିବା ବୁମ୍‌‌ରା ତାଙ୍କ ପ୍ରଥମ ଓଭରରେ ୨ଟି ୱିକେଟ୍‌‌ ନେଇ ବେଶ୍‌‌ ପ୍ରଭାବୀ ସାବ୍ୟସ୍ତ ହୋଇଛନ୍ତି। ଫଳରେ ଘରୋଇ ଆୟର୍ଲାଣ୍ଡ ପ୍ରଥମେ ବ୍ୟାଟିଂ କରି ୭ ୱିକେଟ୍‌‌ରେ ୧୩୯ ରନ କରିବାକୁ ସମର୍ଥ ହୋଇପାରିଛି। ଜବାବରେ ୧୪୦ ରନର ଲକ୍ଷ୍ୟକୁ ପିଛା କରିଥିବା ଭାରତ ୬.୫ ଓଭରରେ ୨ ୱିକେଟ୍‌‌ ହରାଇ ୪୭ ରନ ସଂଗ୍ରହ କରିଥିଲା। ଏହାପରେ ବର୍ଷା ଲାଗି ଖେଳ ଆଉ ସମ୍ଭବପର ହୋଇପାରି ନ ଥିଲା। ଏହି ସମୟରେ ଭାରତକୁ ୪୫ ରନ ଆବଶ୍ୟକ ହେଉଥିବାବେଳେ ଭ୍ରମଣକାରୀ ଦଳ ୪୭ ରନ କରିଥିଲା। ତେଣୁ ଡିଏଲ୍‌‌ ପଦ୍ଧତିରେ ଭାରତକୁ ୨ ରନରେ ବିଜୟୀ ଘୋଷିତ କରାଯାଇଥିଲା। ଭାରତ ପକ୍ଷରୁ ଋତୁରାଜ ଗାଏକ୍ୱାଡ ୧୯ ଓ ସଞ୍ଜୁ ସାମସନ ୧ ରନରେ ଅପରାଜିତ ରହିଥିବାବେଳେ ଅନ୍ୟତମ ଓପନର ଯଶସ୍ୱୀ ଜୟସ୍ୱାଲ ୨୪ ଓ ତିଲକ ବର୍ମା ଖାତା ଖୋଲି ନ ପାରି ପ୍ୟାଭିଲିୟନ ଫେରିଛନ୍ତି। ଆୟର୍ଲାଣ୍ଡର କ୍ରେଗ୍‌‌ ୟଙ୍ଗଙ୍କୁ ୨ଟି ଯାକ ୱିକେଟ୍‌‌ ମିଳିଥିଲା।

ସ୍ଥାନୀୟ ଦି ଭିଲେଜ ଗ୍ରାଉଣ୍ଡରେ ଶୁକ୍ରବାର ରାତିରେ ଅନୁଷ୍ଠିତ ଏହି ପ୍ରଥମ ଟି-୨୦ ମ୍ୟାଚରେ ଭ୍ରମଣକାରୀ ଭାରତୀୟ ଦଳର ଅଧିନାୟକ ବୁମ୍‌‌ରା ଟସ୍‌‌ ଜିତି ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲେ। ନିଜର ଏହି ନିଷ୍ପତ୍ତିକୁ ବୁମ୍‌‌ରା ପ୍ରଥମ ଓଭରରେ ହିଁ ଯର୍ଥାଥ ପ୍ରତିପାଦନ କରିଥିଲେ। ଆୟର୍ଲାଣ୍ଡ ପାଳିର ପ୍ରଥମ ଓଭରର ୨ୟ ବଲ୍‌‌ରେ ଆଣ୍ଡ୍ରିଉ ବଲ୍‌‌ବିର୍ଣ୍ଣି (୪ ରନ) ଓ ୫ମ ବଲ୍‌‌ରେ ୱିକେଟ୍‌‌ରକ୍ଷକ ଲୋରାନ ଟକର (୦)ଙ୍କୁ ପ୍ୟାଭିଲିୟନ ପଠାଇ ବୁମ୍‌‌ରା ଡବଲ୍‌‌ ଝଟକା ଦେଇଥିଲେ। ଏହାପରେ ହ୍ୟାରୀ ଟେକ୍ଟର (୯ ରନ), ଅଧିନାୟକ ପଲ୍‌‌ ଷ୍ଟର୍ଲିଂ (୧୧) ଓ ଜର୍ଜ ଡର୍କୱେଲ୍‌‌ (୧) ମଧ୍ୟ ସଅଳ ଆଉଟ୍‌‌ ହେବା ଫଳରେ ଆୟର୍ଲାଣ୍ଡ ମାତ୍ର ୩୧ ରନରେ ଏହାର ଅଧା ବ୍ୟାଟର୍‌‌ଙ୍କୁ ହରାଇ ସଙ୍କଟରେ ପଡ଼ିଥିଲା। ଟେକ୍ଟର ପଦାର୍ପଣକାରୀ ପ୍ରସିଦ୍ଧ କ୍ରିଷ୍ଣାଙ୍କ ଶିକାର ବନିଥିବାବେଳେ ରବି ବିଷ୍ଣୋଇଙ୍କ ବଲରେ ଷ୍ଟର୍ଲିଂ ବୋଲ୍ଡ ହୋଇଯାଇଥିଲେ। ଏହାପରେ ଡର୍କୱେଲ ମଧ୍ୟ ପ୍ରସିଦ୍ଧଙ୍କ ୨ୟ ଶିକାର ବନିଥିଲେ। ତେବେ ମଧ୍ୟକ୍ରମରେ କର୍ଟିସ କାମ୍ଫର ଓ ନିମ୍ନଭାଗରେ ବ୍ୟାରୀ ମ୍ୟାକ୍‌‌କାର୍ଥୀଙ୍କ ଉପଯୋଗୀ ବ୍ୟାଟିଂ ବଳରେ ଆୟର୍ଲାଣ୍ଡ ୨୦ ଓଭରରେ ୭ ୱିକେଟ୍‌‌ ହରାଇ ୧୩୯ ରନର ଏକ ସମ୍ମାନଜନକ ସ୍କୋର କରିପାରିଥିଲା। କାମ୍ଫର ୩୯ ରନ କରିଥିବାବେଳେ ବ୍ୟାରୀ ୩୩ ବଲରୁ ୫୧ ରନର ଦ୍ରୁତ ଅର୍ଦ୍ଧଶତକୀୟ ପାଳି ଖେଳି ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ଅନ୍ୟମାନଙ୍କ ମଧ୍ୟରେ ମାର୍କ ଆଦାୟର ୧୬, କେଗ୍ର ୟଙ୍ଗ ୧* ରନ କରିଥିଲେ। ବୋଲିଂରେ ଭାରତ ପକ୍ଷରୁ ବୁମ୍‌‌ରା, ପ୍ରସିଦ୍ଧ ଓ ବିଷ୍ଣୋଇ ୨ଟି ଲେଖାଏ ୱିକେଟ୍‌‌ ନେଇଥିଲେ। ଏହି ମ୍ୟାଚ ଜରିଆରେ ଭାରତର ଦୁଇ ଖେଳାଳି ପ୍ରସିଦ୍ଧ କ୍ରିଷ୍ଣା ଓ ରିଙ୍କୁ ସିଂ ଅନ୍ତର୍ଜାତୀୟ ଟି-୨୦ କ୍ୟାରିୟର ଆରମ୍ଭ କରିଛନ୍ତି।

ସଂକ୍ଷିପ୍ତ ସ୍କୋର
ଆୟର୍ଲାଣ୍ଡ ପାଳି: ୧୩୯/୭ (ବ୍ୟାରୀ ମ୍ୟାକ୍‌‌କାର୍ଥୀ- ୫୧*, କାମ୍ଫର- ୩୯, ଷ୍ଟର୍ଲିଂ- ୧୧, ମାର୍କ ଆଦାୟର-୧୬, ବଲବିର୍ଣ୍ଣି- ୪, ବୁମ୍‌‌ରା- ୨/୨୪, ବିଷ୍ଣୋଇ- ୨/୨୩, ପ୍ରସିଦ୍ଧ- ୨/୩୨)।

ଭାରତ ପାଳି: ୪୭/୨, ୬.୫ ଓଭର (ଯଶସ୍ୱୀ ଜୟସ୍ୱାଲ- ୨୪, ଋତୁରାଜ ଗାଏକ୍ୱାଡ- ୧୯*, ତିଲକ ବର୍ମା- ୦, ସଞ୍ଜୁ ସାମସନ- ୧*)।

ଡବ୍‍ଲିନ୍‍(ଏଜେନ୍ସି): ଭାରତ ଓ ଆୟର୍ଲାଣ୍ଡ ମଧ୍ୟରେ ୨ ମ୍ୟାଚ୍‍ ବିଶିଷ୍ଟ ଟି-୨୦ କ୍ରିକେଟ ସିରିଜ୍‍ ଏଠାରେ ରବିବାରଠାରୁ ଆରମ୍ଭ ହେବ। ଏଠାରେ ରବିବାର ସିରିଜ୍‍ର ପ୍ରଥମ ମ୍ୟାଚ୍‍ ଖେଳାଯିବାର କାର୍ଯ୍ୟକ୍ରମ ରହିଛି। ଭାରତର ଷ୍ଟାର ଖେଳାଳି ରୋହିତ ଶର୍ମା, ବିରାଟ କୋହଲି ଏବଂ ଅନ୍ୟମାନଙ୍କୁ ବାଦ୍‍ ଦେଇ ଏହି ସିରିଜ୍‍ ଅନୁଷ୍ଠିତ ହେବାକୁ ଯାଉଛି। ଏପରିକି ଘରୋଇ ମାଟିରେ ଦଳର ନେତୃତ୍ୱ ନେଇଥିବା ଋଷଭ ପନ୍ତ୍‍ ଓ ପ୍ରମୁଖ ଖେଳାଳି ଶ୍ରେୟାସ ଆୟର ମଧ୍ୟ ଏହି ଟିମ୍‍ରେ ନାହାନ୍ତି। ଏ ସମସ୍ତ ଖେଳାଳି ଏବେ ଇଂଲଣ୍ଡ ସହ ଟେଷ୍ଟ ମ୍ୟାଚ୍‍ ଖେଳିବାକୁ ଲିସେଷ୍ଟରରେ ଅଭ୍ୟାସ ମ୍ୟାଚ୍‍ ଖେଳୁଛନ୍ତି। ଏମାନଙ୍କ ଅନୁପସ୍ଥିତିରେ ହାର୍ଦ୍ଦିକ ପାଣ୍ଡ୍ୟା ଦଳର ନେତୃତ୍ୱ ନେଉଛନ୍ତି। ଚଳିତବର୍ଷ ଇଣ୍ଡିଆନ୍‍ ପ୍ରିମିୟର ଲିଗ୍‍ ରେ ପ୍ରଥମ ପଦାର୍ପଣ କରି ନିଜ ଟିମ୍‍ ଗୁଜରାଟ ଟାଇଟନ୍ସକୁ ଚାମ୍ପିଅନ୍‍ କରାଇଥିଲେ। ହାର୍ଦ୍ଦିକ ଟିମ୍‍ର ନେତୃତ୍ୱ ନେଇଥିଲେ ଓ ଅଲରାଉଣ୍ଡ ଖେଳ ପ୍ରଦର୍ଶନ କରି ନିଜ ଦଳକୁ ଚାମ୍ପିଅନ୍‍ କରାଇଥିଲେ। ଯାହା ଫଳରେ ତାଙ୍କ ଉପରେ ଜାତୀୟ ଚୟନକର୍ତ୍ତା ଭରସା ରଖି ଦଳର ନେତୃତ୍ୱ ଦେଇଛନ୍ତି। ଦକ୍ଷିଣ ଆଫ୍ରିକା ବିପକ୍ଷରେ ମଧ୍ୟ ତାଙ୍କଠାରୁ କିଛି ବିସ୍ଫୋରକ ବ୍ୟାଟିଂ ଦେଖିବାକୁ ମିଳିଥିଲା। ବୋଲିଂରେ ସେ ବିଶେଷ ପ୍ରଭାବ ବିସ୍ତାର କରିପାରି ନଥିବାରୁ ଏଥିଲାଗି ସେ ନିଜକୁ ପ୍ରସ୍ତୁତ କରିନେଇଛନ୍ତି।

ଦକ୍ଷିଣ ଆଫ୍ରିକା ବିପକ୍ଷ ଘରୋଇ ସିରିଜ୍‍ରେ ଭାରତୀୟ ଦଳ ଯେପରି ପ୍ରତ୍ୟାବର୍ତ୍ତନ କରିଥିଲା, ତାହାକୁ ନେଇ ଦଳର ଆତ୍ମବିଶ୍ୱାସ ଢ଼େର ବୃଦ୍ଧି ପାଇଛି। ଦଳର ଦୁଇ ଓପନର କିସାନ ଓ ଗାଏକ୍ୱାଡଙ୍କ ଭଲ ଫର୍ମରେ ଅଛନ୍ତି ଓ ଏମାନଙ୍କ ସହ ଟପ୍‍ ଅର୍ଡର କ୍ଲିକ୍‍ କଲେ ଭାରତକୁ ମ୍ୟାଚ୍‍ ଜିତିବା ସହଜ ହେବ। ଫିଟ୍‍ ହେବା ପରେ ସୂର୍ଯ୍ୟକୁମାର ଯାଦବ ଦଳରେ ସାମିଲ ହୋଇଛନ୍ତି। ସେ ଓ ଦୀନେଶ କାର୍ତ୍ତିକଙ୍କ ବ୍ୟାଟ ଠିକ୍‍ଠାକ୍‍ ଚାଲିଲେ ବିଶ୍ୱର କୌଣସି ବୋଲର ଏମାନଙ୍କୁ ଅଟକାଇବା କଷ୍ଟକର। ଅଧିନାୟକ ହାର୍ଦ୍ଦିକ ଓ ସୁଯୋଗ ପାଇଲେ ନବାଗତ ରାହୁଲ ତ୍ରିପାଠୀ ମଧ୍ୟ କମାଲ ଦେଖାଇବେ। ଦୁଇ ସ୍ପିନର ଯୁଜବେନ୍ଦ୍ର ଚହଲ ଓ ଅକ୍ଷର ପଟେଲ ବିଦେଶ ପିଚ୍‍ରେ କିପରି ପ୍ରଦର୍ଶନ କରିବେ ତାହା ଭାରତ ଲାଗି ଏକ ଚ୍ୟାଲେଞ୍ଜ। ଡବ୍‍ଲିନ୍‍ ପିଚ୍‍ ଫାଷ୍ଟ ବୋଲରଙ୍କୁ ସୁହାଇଥାଏ। ଏ କ୍ଷେତ୍ରରେ ଭାରତ ଢ଼େର ଆଗରେ ରହିଛି। ଉପଅଧିନାୟକ ଭୁବନେଶ୍ୱର କୁମାରଙ୍କ ନେତୃତ୍ୱରେ ହର୍ଷଲ ପଟେଲ, ଆଭେଶ ଖାନ୍‍, ଅର୍ଶଦୀପ ସିଂ ଓ ଏକ୍ସପ୍ରେସ୍‍ ବୋଲର ଉମରାନ ମଲିକ୍‍ଙ୍କୁ ନେଇ ବେଶ ଦୃଢ଼। ଏଣୁ ଆୟର୍ଲାଣ୍ଡ ବିପକ୍ଷରେ ଖେଳିବାକୁ ଭାରତର ଏହି ଦଳ ନିକଟରେ ସମସ୍ତ ପ୍ରକାର ସାମର୍ଥ୍ୟ ରହିଛି। ଭ୍ରମଣକାରୀ ଦଳ ଦୁଇଟିଯାକ ମ୍ୟାଚ୍‍ରେ ବିଜୟୀ ହେଲେ ଆଶ୍ଚର୍ଯ୍ୟ ହେବାର କିଛି ନାହିଁ।

ରାହୁଲ ଦ୍ରାବିଡ୍‍ଙ୍କ ଅନୁପସ୍ଥିତିରେ ନ୍ୟାସନାଲ କ୍ରିକେଟ ଏକାଡେମୀର ମୁଖ୍ୟ ଭିଭିଏସ୍‍ ଲକ୍ଷ୍ମଣ ଦଳର କୋଚ୍‍ ଦାୟିତ୍ୱ ନେଇଛନ୍ତି। ଅନ୍ୟ ସପୋର୍ଟ ଷ୍ଟାଫ୍‍ଙ୍କସହ ମୁଖ୍ୟ ଚୟନକର୍ତ୍ତା ଚେତନ ଶର୍ମା ମଧ୍ୟ ଦଳ ସହ ଡବ୍‍ଲିନ୍‍ରେ ଅବସ୍ଥାନ କରୁଛନ୍ତି।
ଅନ୍ୟପକ୍ଷରେ ଗତ ୩ ବର୍ଷ ହେଲା ଆୟର୍ଲାଣ୍ଡ ଟି-୨୦ ଫର୍ମାଟରେ ସେପରି କିଛି ଉଲ୍ଲେଖନୀୟ ଖେଳ ପ୍ରଦର୍ଶନ କରିନାହିଁ। ଏହି ଦଳରେ ମଧ୍ୟ ପ୍ରତିଭାବାନ ଖେଳାଳିଙ୍କ ଅଭାବ ରହିଛି। ଯାହା ଫଳରେ ଦଳରେ ସିନିଅର ଖେଳାଳିଙ୍କ ଉପସ୍ଥିତି ଦୀର୍ଘଦିନ ହେଲା ରହିଛି। ଅଧିନାୟକ ଆଣ୍ଡ୍ର୍ୟୁ ବଲବିର୍ଣ୍ଣିଙ୍କ ମତରେ ଏବେ ଭାରତର ଯେଉ ପ୍ରକାର ଦଳ ସହ ଖେଳିବ, ସେମାନେ ଶକ୍ତିଶାଳୀ ବୋଲି ଭାବିବାକୁ ହେବ। ଆମେ ଏହି ଶକ୍ତିଶାଳୀ ଦଳ ସହ ମୁକାବିଲା କରିବାକୁ ପ୍ରସ୍ତୁତ ବୋଲି ବଲବିର୍ଣ୍ଣି କହିଛନ୍ତି।

ଭାରତୀୟ ଦଳ: ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ଭୁବନେଶ୍ୱର କୁମାର, ଇଶାନ କିସାନ, ଋତୁରାଜ ଗାଏକ୍ୱାଡ, ସଞ୍ଜୁ ସାମସନ, ସୂର୍ଯ୍ୟକୁମାର ଯାଦବ, ଭେଙ୍କଟେଶ ଆୟର, ଦୀପକ ହୁଦା, ରାହୁଲ ତ୍ରିପାଠୀ, ଦୀନେଶ କାର୍ତ୍ତିକ (ୱିକେଟକିପର), ଯୁଜବେନ୍ଦ୍ର ଚହଲ, ଅକ୍ଷର ପଟେଲ, ରବି ବିଷ୍ଣୋଇ, ହର୍ଷଲ ପଟେଲ, ଆଭେଶ ଖାନ୍‍, ଅର୍ଶଦୀପ ସିଂ, ଉମ୍ରାନ ମଲିକ୍‍।

ଆୟର୍ଲାଣ୍ଡ ଦଳ: ଆଣ୍ଡ୍ର୍ୟୁ ବଲବିର୍ଣ୍ଣି (ଅଧିନାୟକ), ହ୍ୟାରି ଟେକ୍ଟର, ଜର୍ଜ ଡକ୍‍ରେଲ, ଗାରେଥ ଡେଲାନୀ, ପଲ ଷ୍ଟର୍ଲିଂ, କର୍ଟିସ କାମ୍ଫର, ଷ୍ଟିଫେନ ଡୋହେନୀ, ଲୋର୍କାନ ଟକର, ମାର୍କ ଆଦେଆର, କୋନୋର ଓଲଫର୍ଟ, ଜୋଶୁଆ ଲିଟଲ, ଆଣ୍ଡି ମ୍ୟାକ୍‍ବ୍ରାଇନ୍‍, ବ୍ୟାରୀ କ୍ୟାକ୍‍କାର୍ଥି, କ୍ରେଗ୍‍ ୟଙ୍ଗ୍‍।