ନୂଆଦିଲ୍ଲୀ: ଗୋଟିଏ ଦିନରେ ୨ ଅଭିଜ୍ଞ କ୍ରିକେଟର ଅବସର ଘୋଷଣା କରିଛନ୍ତି। ପ୍ରଥମେ ଅଷ୍ଟ୍ରେଲିଆର ଷ୍ଟାର ଅଲରାଉଣ୍ଡର ଗ୍ଲେନ୍ ମ୍ୟାକ୍ସୱେଲ୍ ଆଜି ଦିନିକିଆରୁ ଅବସର ଘୋଷଣା କରିଥିବା ବେଳେ ଦକ୍ଷିଣ ଆଫ୍ରିକାର ଖେଳାଳି ହେନରିଚ୍ କ୍ଲାସେନ୍ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି।

ଦକ୍ଷିଣ ଆଫ୍ରିକାର ଅଭିଜ୍ଞ ଖେଳାଳି ହେନରିଚ୍ କ୍ଲାସେନ୍ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। କ୍ଲାସେନ୍ ଦକ୍ଷିଣ ଆଫ୍ରିକା ପାଇଁ ତାଙ୍କ ସମଗ୍ର ଅନ୍ତର୍ଜାତୀୟ କ୍ୟାରିୟରରେ ୩୨୪୫ ରନ୍ କରିଥିଲେ।

ହେନରିଚ୍ କ୍ଲାସେନ୍ ଇନଷ୍ଟାଗ୍ରାମରେ ତାଙ୍କ ପରିବାର ସହିତ ଏକ ଫଟୋ ସେୟାର କରିଛନ୍ତି, ଯାହା ମାଧ୍ୟମରେ ସେ କ୍ରିକେଟ ଛାଡିବା ଘୋଷଣା କରିଛନ୍ତି। ସେ କହିଛନ୍ତି, “ଦେଶକୁ ପ୍ରତିନିଧିତ୍ୱ କରିବା ମୋ ପାଇଁ ଗର୍ବର ବିଷୟ, ମୁଁ ପିଲାଦିନରୁ ଏହି ସ୍ୱପ୍ନ ଦେଖୁଥିଲି। କ୍ଲାସେନ୍ ଏହା ମଧ୍ୟ କହିଛନ୍ତି ଯେ ଏହି ଚମତ୍କାର କ୍ରିକେଟ କ୍ୟାରିୟରରେ, ସେ ଏପରି ଲୋକଙ୍କୁ ମଧ୍ୟ ଭେଟିଥିଲେ, ଯାହାଙ୍କ ସହିତ ତାଙ୍କ ଜୀବନ ବଦଳି ଯାଇଥିଲା।

ହେନରିଚ୍ କ୍ଲାସେନ୍ ଅବସରର କାରଣ ଜଣାଇ କହିଛନ୍ତି, ମୁଁ ଏବେ ଆଶା କରୁଛି ଯେ ମୁଁ ପରିବାର ସହିତ ଅଧିକ ସମୟ ବିତାଇ ପାରିବି କାରଣ ମୁଁ ଅବସର ପରେ ଏହା କରିପାରିବି।” କ୍ଲାସେନ୍ ସେହି ସମସ୍ତ ଲୋକଙ୍କୁ ଧନ୍ୟବାଦ ଜଣାଇଛନ୍ତି ଯେଉଁମାନେ ତାଙ୍କୁ କ୍ରିକେଟରେ ଏହି ସ୍ଥାନରେ ପହଞ୍ଚିବାରେ ସାହାଯ୍ୟ କରିଛନ୍ତି। ଗତ ବର୍ଷ ଜାନୁଆରୀରେ ହେନରିଚ୍ କ୍ଲାସେନ୍ ଟେଷ୍ଟ କ୍ରିକେଟରୁ ଅବସର ନେଇଥିଲେ।

ସେ ତାଙ୍କ ରେଡ୍-ବଲ୍ କ୍ୟାରିୟରରେ କେବଳ ୪ଟି ମ୍ୟାଚ୍ ଖେଳିଥିଲେ ଯେଉଁଥିରେ ସେ କେବଳ ୧୦୪ ରନ୍ କରିପାରିଥିଲେ। ଏବେ ସେ ଦିନିକିଆ ଏବଂ ଟି୨୦ ଫର୍ମାଟକୁ ମଧ୍ୟ ଅଲବିଦା କହିସାରିଛନ୍ତି। ତାଙ୍କର ୬୦ଟି ଦିନିକିଆ କ୍ୟାରିୟରରେ, ସେ ୪ଟି ଶତକ ଏବଂ ୧୧ଟି ଅର୍ଦ୍ଧଶତକ ସହିତ ୨୧୪୧ ରନ୍ କରିଥିଲେ। ଟି୨୦ରେ ତାଙ୍କର ବିସ୍ଫୋରକ ବ୍ୟାଟିଂ ପାଇଁ ସେ ପରିଚୟ ପାଇଥିଲେ, ଯେଉଁଠାରେ ସେ ଦକ୍ଷିଣ ଆଫ୍ରିକା ପାଇଁ ୫୮ଟି ମ୍ୟାଚ୍ ରେ ୧୦୦୦ ରନ୍ କରିଥିଲେ।

ସେହିପରି, ଅଷ୍ଟ୍ରେଲିଆର ଷ୍ଟାର ଅଲରାଉଣ୍ଡର ଗ୍ଲେନ୍ ମ୍ୟାକ୍ସୱେଲ୍ ଆଜି ଦିନିକିଆରୁ ଅବସର ଘୋଷଣା କରିଛନ୍ତି। ଦୁଇଟି ODI ବିଶ୍ୱକପ(୨୦୧୫-୨୦୨୩)ରେ ଅଷ୍ଟ୍ରେଲିଆର ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ଗ୍ଲେନ୍ ମ୍ୟାକ୍ସୱେଲ୍ ସୋମବାର ODI ଫର୍ମାଟରୁ ଅବସର ନେଇଛନ୍ତି।

ମ୍ୟାକ୍ସୱେଲଙ୍କ ODI କ୍ୟାରିଅର୍ ୨୦୧୨ରେ ଆରମ୍ଭ ହୋଇଥିଲା। ୧୪୯ଟି ODI ରେ ଅଷ୍ଟ୍ରେଲିଆର ପ୍ରତିନିଧିତ୍ୱ କରି, ଏହି ଷ୍ଟାର ଅଲରାଉଣ୍ଡର ମୋଟ ୩୯୯୦ ରନ କରିଥିଲେ ଏବଂ ୭୭ ୱିକେଟ ନେଇଥିଲେ। ସେ ୨୦୧୫ ଏବଂ ୨୦୨୩ ବିଶ୍ୱକପ୍ ବିଜୟୀ ଦଳର ମଧ୍ୟ ଅଂଶ ଥିଲେ। ଏହି ଫର୍ମାଟରେ ମ୍ୟାକ୍ସୱେଲଙ୍କ ନାମରେ ଚାରୋଟି ଶତକ ଏବଂ ୨୩ ଅର୍ଦ୍ଧଶତକ ଅଛି। ୩୬ ବର୍ଷୀୟ ଖେଳାଳି ୨୦୨୩ ବିଶ୍ୱକପ୍ ସମୟରେ ଆଫଗାନିସ୍ତାନ ବିପକ୍ଷରେ ୨୦୧ ରନର ଅପରାଜିତ ଇନିଂସ ଖେଳିଥିଲେ। ଏହି ଫର୍ମାଟରେ ଏହା ତାଙ୍କ କ୍ୟାରିୟରର ସର୍ବୋତ୍ତମ ଇନିଂସ ମଧ୍ୟରୁ ଗୋଟିଏ ଥିଲା। ସେ ବୋଲିଂରେ ମଧ୍ୟ ବିପକ୍ଷ ବ୍ୟାଟସମ୍ୟାନଙ୍କ ପାଇଁ ସମସ୍ୟାର କାରଣ ସାଜିଛନ୍ତି। ସେ ଚାରିଥର ଏକ ଇନିଂସରେ ଚାରି ୱିକେଟ ନେଇଥିଲେ। ଫିଲ୍ଡିଂରେ ମଧ୍ୟ ସେ ଅତୁଳନୀୟ ଥିଲେ। ଏହି ଫର୍ମାଟରେ ତାଙ୍କ ନାମରେ ୯୧ କ୍ୟାଚ୍ ଅଛି।

ନୂଆଦିଲ୍ଲୀ: ନୂଆ ରୋଲରେ ନଜର ଆସିବେ ଟିମ୍ ଇଣ୍ଡିଆର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନୀ । ନୂଆ ସିଜିନ୍ ସହିତ ନୂଆ ରୋଲରେ ଧୋନୀଙ୍କୁ ଦେଖିବାକୁ ମିଳିବ ବୋଲି ଧୋନୀ ନିଜର ଫେସବୁକ୍ ପୋଷ୍ଟରେ  ସୂଚନା ଦେଇଛନ୍ତି । ତେବେ ସେ କେଉଁ ନୂଆ ରୋଲରେ ନଜର ଆସିବେ ସେ ନେଇ କୌଣସି ସ୍ପଷ୍ଟ ସୂଚନା ଦେଇନାହାଁନ୍ତି । ଯାହାକି ତାଙ୍କ ଫ୍ୟାନ୍ସଙ୍କ ଭିତରେ ଚର୍ଚ୍ଚା ସୃଷ୍ଟି କରିଛି । ସେହି ପୋଷ୍ଟରେ ଫ୍ୟାନ୍ସ ମାନଙ୍କ ଭିନ୍ନଭିନ୍ନ ମତାମତ ମଧ୍ୟ ଦେଖିବାକୁ ମିଳିଛି।

ଆସନ୍ତା ମାର୍ଚ୍ଚ ୨୨ ତାରିଖରୁ ଆରମ୍ଭ ହେବାକୁ ଯାଉଛି ଆଇପିଏଲ୍ ଟୁର୍ଣ୍ଣାମେଣ୍ଟ । ସମ୍ଭବତଃ ଧୋନୀ ନିଜର ଫେସବୁକ୍ ପୋଷ୍ଟରେ ଏହି ସମ୍ପର୍କରେ ସୂଚନା ଦେଇଛନ୍ତି । ଚେନ୍ନାଇ ସୁପର କିଙ୍ଗସ୍ ତାଙ୍କୁ ଅଧିନାୟକ ଦାୟିତ୍ୱ ସହିତ ଅନ୍ୟ କୌଣସି ନୂଆ ଦାୟିତ୍ୱ ଦେଇପାରେ ବୋଲି ଚର୍ଚ୍ଚା ହେଉଥିବାବେଳେ ଧୋନୀଙ୍କୁ ଚେନ୍ନାଇ ସୁପର କିଙ୍ଗସର ମେଣ୍ଟର ନିଯୁକ୍ତ କରିପାରେ ଟିମ୍ ମ୍ୟାନେଜମେଣ୍ଟ ବୋଲି ମଧ୍ୟ ଚର୍ଚ୍ଚା ହେଉଛି ।

ନଚେତ୍ ଧୋନୀଙ୍କୁ ଅନ୍ୟ କୌଣସି ବଡ ଦାୟିତ୍ୱ ଦେଇପାରେ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (BCCI) ବୋଲି ମଧ୍ୟ ଚର୍ଚ୍ଚା ଚାଲିଛି । ଆଗକୁ ଟି-୨୦ ବିଶ୍ୱକପ୍ । ତେଣୁ ଏହା ପୂର୍ବରୁ ଧୋନୀଙ୍କୁ ବଡ ଦାୟିତ୍ୱ ଦେଇପାରେ ବିସିସିଆଇ।  ଧୋନୀ ହେଉଛନ୍ତି ଏକମାତ୍ର ଅଧିନାୟକ ଯିଏକି ଭାରତକୁ ଟି-୨୦ ବିଶ୍ୱକପରେ ଚାମ୍ପିୟନ୍ କରିପାରିଥିଲେ । ୨୦୦୭ ମସିହାରେ ପାକିସ୍ତାନକୁ ହରେଇ ପ୍ରଥମ ଥର ଟି-୨୦ ବିଶ୍ୱକପ୍ ଚାମ୍ପିୟନ୍ ହେଇଥିଲା ଟିମ୍ ଇଣ୍ଡିଆ । ଆଉ ଏହି ଚାମ୍ପିୟନ୍ ଟିମର କ୍ୟାପଟେନ୍ ଥିଲେ ମହେନ୍ଦ୍ର ସିଂହ ଧୋନୀ । ତେଣୁ ଆଗକୁ ଟି-୨୦ ବିଶ୍ୱକପରେ ନୂଆ ରୋଲରେ ମଧ୍ୟ ନଜର ଆସିପାରନ୍ତି ଧୋନୀ ।

ଭାରତକୁ ସବୁ ଫର୍ମାଟରେ ଟ୍ରଫି ଦେଇଥିବା ଏକମାତ୍ର ଅଧିନାୟକ ହେଉଛନ୍ତି ମାହି । ଆଇପିଏଲ୍‌କୁ ଛାଡ଼ି ଅନ୍ୟ ସବୁ କ୍ରିକେଟ୍‌ ଫର୍ମାଟ୍‌ରୁ ଅବସର ନେଇ ସାରିଛନ୍ତି ଏହି କିମ୍ବଦନ୍ତୀ ଖେଳାଳି । ଧୋନୀ ତାଙ୍କ କ୍ୟାରିୟରରେ ୯୦ଟି ଟେଷ୍ଟ, ୩୫୦ଟି ଏକଦିବସୀୟ ଆନ୍ତର୍ଜାତିକ ମ୍ୟାଚ୍‌ ଏବଂ ୯୮ଟି ଟି–୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି।

ନୂଆଦିଲ୍ଲୀ: ଦିନିକିଆ କ୍ରିକେଟରୁ ଅବସର ନେଲେ  ଅଲ୍‌ରାଉଣ୍ଡର ତଥା ଇଂଲଣ୍ଡର ଷ୍ଟାର୍‌ କ୍ରିକେଟର୍‌ ବେନ୍‌ ଷ୍ଟୋକ୍ସ। ୩୧ ବର୍ଷ ବୟସରେ ସେ ଦିନିକିଆ କ୍ରିକେଟ୍‌ରୁ ଅବସର ଘୋଷଣା କରିଛନ୍ତି। ଆସନ୍ତାକାଲି ଦକ୍ଷିଣ ଆଫ୍ରିକା ବିପକ୍ଷରେ ସେ ନିଜର ଶେଷ ଅନ୍ତର୍ଜାତୀୟ ଦିନିକିଆ ମ୍ୟାଚ୍ ଖେଳିବେ। ଏ ନେଇ ସେ ନିଜେ ଆଜି ଟ୍ବିଟ କରି ସୂଚନା ଦେଇଛନ୍ତି। ଏହି ନିଷ୍ପତ୍ତି ନେବା ତାଙ୍କ ପାଇଁ ଅତ୍ୟନ୍ତ କଠିନ ଥିଲା। ସେ ଟେଷ୍ଟ ମ୍ୟାଚ୍‌ ଉପରେ ଅଧିକ ଗୁରୁତ୍ଵ ଦେବା ପାଇଁ ଏପରି ନିଷ୍ପତ୍ତି ନେଇଥିବା କହିଛନ୍ତି। ଷ୍ଟୋକ୍ସ ୨୦୧୯ ଦିନିକିଆ ବିଶ୍ଵ କପରେ ଇଂଲଣ୍ଡକୁ ଚାମ୍ପିଅନ କରାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ତାଙ୍କର ଏହି ନିଷ୍ପତ୍ତି  ସମସ୍ତ କ୍ରିକେଟ୍‌ ପ୍ରେମୀଙ୍କୁ ଚକିତ କରିଦେଇଛି।

ସୂଚନା ଅନୁଯାୟୀ, ଇଂଲଣ୍ଡ ଓ ସାଉଥ ଆଫ୍ରିକା ମଧ୍ୟରେ ମଙ୍ଗାରବାର ଠାରୁ ୩ ମ୍ୟାଚ୍‌ ବିଶିଷ୍ଟ ଦିନିକିଆ ସିରିଜ ଆରମ୍ଭ ହେବ। ଏହାର ପ୍ରଥମ ମ୍ୟାଚ୍‌ ଡରହାମରେ ଖେଳାଯିବ। ଷ୍ଟୋକ୍ସ ନିଜ ହୋମ୍‌ ଗ୍ରାଉଣ୍ଡରୁ ହିଁ ଦିନିକିଆ କ୍ରିକେଟ୍‌କୁ ଅବସର ନେବେଷ

୨୦୧୧ରେ ଆୟର୍ଲାଣ୍ଡ ବିପକ୍ଷରେ ଇଂଲଣ୍ଡ ପାଇଁ ଡେବ୍ୟୁ କରିଥିଲେ ବେନ୍‌ ଷ୍ଟୋକ୍ସ। ସେ ଇଂଲଣ୍ଡ ପାଇଁ ୧୦୪ ଟି ଦିନିକିଆ ଖେଳି ୨୯୧୯ ରନ୍‌ କରିଛନ୍ତି। ଯେଉଁଥିରେ ତିନୋଟି ଶତକ ଓ ୨୧ଟି ଅର୍ଦ୍ଧଶତକ ସାମିଲ ଅଛି।

ନୂଆଦିଲ୍ଲୀ : ଲଣ୍ଡନ୍‌ଠାରେ ପଳାତକ ବିଜୟ ମାଲ୍ୟାଙ୍କୁ ଭେଟିଛନ୍ତି ୱେଷ୍ଟଇଣ୍ଡିଜ୍‌ର ପ୍ରସିଦ୍ଧ କ୍ରିକେଟର କ୍ରିସ୍‌ ଗେଲ୍‌। ଏହି ଫଟୋ ଏବେ ସୋସିଆଲ୍‌ ମିଡିଆରେ ଖୁବ୍‌ ଭାଇରାଲ୍‌ ହେଉଛି। ୟୁଜରମାନେ ଟ୍ବିଟର୍‌ରେ ଏହାକୁ ଜୋରସୋର ଟ୍ରୋଲ କରିଛନ୍ତି। ଉଭୟଙ୍କର ଫଟୋ ସେୟାର କରିବା ପରେ ସୋସିଆଲ ମିଡିଆରେ କେତେକ ମଜାଦାର ଆଉ ଗମ୍ଭୀର ପୋଷ୍ଟମାନ ଆସୁଛି। ଟୁଇଟ୍‌ରେ ମାଲ୍ୟା ଲେଖିଛନ୍ତି ଯେ, ଉଭୟଙ୍କର ବନ୍ଧୁତା ବହୁତ ପୁରୁଣା। ଜଣେ ୟୁଜର ଲେଖିଛନ୍ତି ଯେ, ବିରାଟ କୋହଲି ଏପରି ସମୟରେ କ’ଣ କହିବେ ? କୋହଲିଙ୍କ ତରଫରୁ ଲେଖିଛନ୍ତି ଯେ, ଲାଗୁଛି ଯେ ଆମର ଅନୁତାପର ଅଭାବ ଅଛି।

ଆଉ ଜଣେ ୟୁଜର କ୍ରୋଧ ପ୍ରକାଶ କରି ଲେଖିଛନ୍ତି ଯେ, ଏହି ପଳାତକ ବିଦେଶରେ ବସି ଆରାମରେ ଟ୍ୱିଟ୍ କରୁଛନ୍ତି।ସର୍ବସାଧାରଣ ସ୍ଥାନରେ ବୁଲୁଛନ୍ତି କିନ୍ତୁ ଆମ ସରକାର ଏହି ପଳାତକକୁ ଦେଶକୁ ଆଣିବାରେ ସକ୍ଷମ ହୋଇନାହାଁନ୍ତି କି ? ଏଥିପାଇଁ ନିରବ ମୋଦୀ କିମ୍ବା ମେହୁଲ ଚୋକସି କିମ୍ବା ଲଲିତ ମୋଦୀ ନାହାଁନ୍ତି, ଯେତେବେଳେ କି ବିଜେପି ଏଥିପାଇଁ ଲୋକଙ୍କଠାରୁ ଭୋଟ୍ ମାଗିଛି। କିଏ ଲେଖÒଛନ୍ତି ଗେଲ୍‌ ତୁମକୁ ବି ୟେ ଲୁଟି ଚାଲିଯିବେ ତ ଆଉ କେଉଁ ୟୁଜର ମାଲ୍ୟା ନିଜର ବଡ ବନ୍ଧୁ ଏସ୍‌ବିଆଇକୁ କେବେ ତ ଭେଟିବାକୁ ଆସନ୍ତୁ ବୋଲି ଟିଟ୍‌ କରିଛନ୍ତି।