ନୂଆଦିଲ୍ଲୀ :  ଭାରତ ସରକାରଙ୍କ ଅଗ୍ନିପଥ ଯୋଜନାକୁ ନେଇ ପୁଣିଥରେ ମୁଣ୍ଡ ଟେକିଛି ନୂଆ ବିବାଦ। ଅଗ୍ନିପଥ ଯୋଜନାରେ ନିଯୁକ୍ତି ଦେବା ପାଇଁ କେନ୍ଦ୍ର ସରକାର ଆଶାୟୀ ଯୁବକଙ୍କୁ ଜାତିଗତ ଓ ଧର୍ମ ଭିତ୍ତିକ ପ୍ରମାଣପତ୍ର ମାଗୁଥିବା ଅଭିଯୋଗ ହୋଇଛି। ନିଯୁକ୍ତି ପାଇଁ ଉପଲବ୍ଧ ହେଉଥିବା ଫର୍ମର ଗୋଟିଏ ଭାଗ ଏବେ ସୋଶାଲ ମିଡିଆରେ ଭାଇଲ ହେବାରେ ଲାଗିଛି। ଏହାକୁ ନେଇ ଏଥର ଆପ ସାଂସଦ ସଞ୍ଜୟ ସିଂ କେନ୍ଦ୍ର ସରକାରଙ୍କୁ ଟାର୍ଗେଟ କରିଥିବାର ଦେଖିବାକୁ ମିଳିଛି।

ଆପ ସାଂସଦ ସଞ୍ଜୟ ସିଂ କେନ୍ଦ୍ର ସରକାରଙ୍କୁ ଟାର୍ଗେଟ କରି ସେନାରେ ଜାତିଭେଦ ବିସ୍ତାର କରିଥିବା ଅଭିଯୋଗ କରିଛନ୍ତି। ଅଗ୍ନିପଥ ଯୋଜନା ଆଶାୟୀଙ୍କୁ ନିଜର ଜାତି ଓ ଧର୍ମ ପ୍ରମାଣପତ୍ର ଦେବାକୁ କୁହାଯାଇଛି। ଏହାକୁ ଆଧାର କରି ବିରୋଧୀ ଦଳ ଗୁଡ଼ିକ ସରକାରଙ୍କୁ ଘେରିବାକୁ ଚେଷ୍ଟା ଆରମ୍ଭ କରିଛନ୍ତି। ବିରୋଧୀ ଦଳଗୁଡ଼ିକ ଅଭିଯୋଗ କରିଛନ୍ତି ଯେ ପ୍ରଥମ ଥର ପାଇଁ ସେନାରେ ନିଯୁକ୍ତି ପାଇଁ ଜାତି ଓ ଧର୍ମ ପ୍ରମାଣପତ୍ର ମଗାଯାଉଛି। ଆମ୍‌ ଆଦମୀ ପାର୍ଟିର ସାଂସଦ ସଞ୍ଜୟ ସିଂ ଟ୍ବିଟ କରି ମୋଦୀ ସରକାରଙ୍କୁ ଟାର୍ଗେଟ କରି ଲେଖିଛନ୍ତି “ମୋଦୀ ସରକାରଙ୍କ ଅସଲ ଚେହେରା ଦେଶବାସୀଙ୍କୁ ସାମ୍ନାକୁ ଆସିଛି। କ’ଣ ମୋଦିଜୀ ଦେଶର ଦଳିତଳ ପଛୁଆ ଓ ଆଦିବାସୀମାନଙ୍କୁ ସେନା ନିଯୁକ୍ତି ପାଇଁ ଯୋଗ୍ୟ ବିବେଚନା କରୁନାହାନ୍ତି? ଭାରତର ଇତିହାସରେ ପ୍ରଥମଥର ପାଇଁ ସେନା ନିଯୁକ୍ତିରେ ଜାତି ବିଷୟରେ ପଚରାଯାଉଛି। ମୋଦିଜୀ ଆପଣଙ୍କୁ “ଅଗ୍ନିବୀର” ତିଆରି କରିବାର ଅଛି ନା ଜାତିବୀର।” ବୋଲି ସଞ୍ଜୟ ସିଂ କହିଛନ୍ତି।

मोदी सरकार का घटिया चेहरा देश के सामने आ चुका है।
क्या मोदी जी दलितों/पिछड़ों/आदिवासियों को सेना भर्ती के क़ाबिल नही मानते?
भारत के इतिहास में पहली बार “सेना भर्ती “ में जाति पूछी जा रही है।
मोदी जी आपको “अग्निवीर” बनाना है या “जातिवीर” pic.twitter.com/fxgBre38Ft

— Sanjay Singh AAP (@SanjayAzadSln) July 19, 2022

ଅନ୍ୟପଟେ ବିରୋଧୀଙ୍କ ଏହି ଅଭିଯୋଗକୁ ଖାରଜ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ। ବିରୋଧୀଙ୍କ ଅଭିଯୋଗକୁ ଭୁଲ ବୋଲି କହି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ସ୍ପଷ୍ଟ କରିଛନ୍ତି ଯେ ଏହା କେବଳ ଗୁଜବ। ସ୍ୱାଧୀନତା ପୂର୍ବରୁ ବିଦ୍ୟମାନ ଥିବା ପୂର୍ବ ବ୍ୟବସ୍ଥା ଚାଲିଛି। କୌଣସି ପରିବର୍ତ୍ତନ କରାଯାଇ ନାହିଁ । ପୁରୁଣା ବ୍ୟବସ୍ଥା ଜାରି ରହିଛି ବୋଲି କହିଛନ୍ତି ।

ସେହିପରି  ବିରୋଧୀଙ୍କ ଏପରି ଅଭିଯୋଗକୁ ତୀବ୍ର ସମାଲୋଚନା କରିଛନ୍ତି ବିଜେପି ମୁଖପାତ୍ର ସମ୍ବିତ ପାତ୍ର। ସେ ସାମ୍ବାଦିକ ସମ୍ମିଳନୀ କରି କହିଛନ୍ତି ଯେ ବିରୋଧୀ ଜାତି ପ୍ରମାଣପତ୍ରକୁ ନେଇ ଲୋକଙ୍କୁ ଭ୍ରମିତ କରିବା ପାଇଁ ଚେଷ୍ଟା କରୁଛନ୍ତି। ରାଜନୀତି କରିବା ପାଇଁ କେଉଁଠି ନା କେଉଁଠି ଦେଶର ସେନାକୁ ବଦନାମ କରାଯାଉଛି। ସ୍ୱାଧୀନତା ପରେ ଗୋଟିଏ ସ୍ୱତନ୍ତ୍ର ସେନା ଆଦେଶ ଦ୍ୱାରା ୧୯୪୯ରେ ଏହି ପ୍ରାବଧାନର ବ୍ୟବସ୍ଥା କରାଯାଇଥିଲା। ମୋଦି ସରକାର ଏବେ କୌଣସି ନୂତନ ପରିବର୍ତ୍ତନ କରିନାହାନ୍ତି। ସାତ ଦଶନ୍ଧି ଧରି ସେନାର ଜାରି ରହିଥିବା ବ୍ୟବସ୍ଥା ଅନୁସରଣ କରାଯାଉଛି। ସେନା ସ୍ପଷ୍ଟ ଭାବରେ କହିଛି ଆମର ନିଯୁକ୍ତିରେ ଧର୍ମର କୌଣସି ସ୍ଥାନ ନାହିଁ। କିନ୍ତୁ ଧର୍ମ ସମ୍ପର୍କରେ ସୂଚନା ରଖାଯାଏ। କାରଣ ଦୁର୍ଭାଗ୍ୟଜନକ ପରିସ୍ଥିତିରେ ଯଦି ଜଣେ ସୈନିକ ସହିଦ ହୁଅନ୍ତି, ତା’ହେଲେ ତାଙ୍କର ଅନ୍ତିମ ସଂସ୍କାର ଉକ୍ତ ଧର୍ମ ଅନୁସାରେ ହିଁ କରାଯାଏ ବୋଲି ବିଜେପି ମୁଖପାତ୍ର ସମ୍ବିତ ପାତ୍ର କହିଛନ୍ତି।

ନୂଆଦିଲ୍ଲୀ : ଭାରତୀୟ ପ୍ରତିରକ୍ଷା କ୍ଷେତ୍ରର ତିନି ପ୍ରମୁଖ ବିଭାଗ ସ୍ଥଳସେନା, ବାୟୁ ସେନା ଏବଂ ନୌସେନାରେ ୪ ବର୍ଷିଆ ନିଯୁକ୍ତି ଦେବାକୁ ନିକଟରେ କେନ୍ଦ୍ର ସରକାର ଘୋଷଣା କରିଥିବା ‘ଅଗ୍ନିପଥ’ ଯୋଜନାକୁ ନେଇ ଏବେ ସାରା ଦେଶରେ ନିଆଁ ଜଳୁଛି। ଏହି ଯୋଜନାକୁ ବିରୋଧ କରି ଯୁବବର୍ଗ ରାଜରାସ୍ତାକୁ ଓହ୍ଲାଇଥିଲା ବେଳେ ବିକ୍ଷୋଭ ଏବଂ ହିଂସା ଦ୍ବାରା କୋଟି କୋଟି ଟଙ୍କାର ସରକାରୀ ଏବଂ ବେସରକାରୀ ସମ୍ପତ୍ତି ନଷ୍ଟ ହୋଇଛି। ଗୋଟିଏ ପଟେ ଦେଶରେ ଅଗ୍ନିପଥ ଯୋଜନାକୁ ବିରୋଧ କରି ପ୍ରଦର୍ଶନ ଜାରି ରହିଥିବା ବେଳେ ସ୍ଥଳସେନା ପକ୍ଷରୁ ଅଗ୍ନିବୀର ଯୋଜନା ନେଇ ସମ୍ପୂର୍ଣ୍ଣ ବିବରଣୀ ପ୍ରକାଶ କରାଯାଇଛି । ଏଥିରେ ଅଗ୍ନିବୀର ଭାବେ ଯୋଗ ଦେବାକୁ ଚାହୁଁଥିବା ଯୁବକମାନଙ୍କ ପାଇଁ ଶିକ୍ଷଗତ ଯୋଗ୍ୟତା ଓ ଶାରୀରିକ ସକ୍ଷମତା କଣ ରହିବ ତାହା ସ୍ପଷ୍ଟଭାବେ ଉଲ୍ଲେଖ କରାଯାଇଛି । JOININDIANARMY.NIC.IN ୱେବସାଇଟ ପରିଦର୍ଶନ କରି  ସେଥିରେ ସମ୍ପୂର୍ଣ୍ଣ ବିବରଣୀ ପଢିବା ସହ ପଞ୍ଜିକରଣ କରିପାରିବେ। ଆଗାମୀ ଜୁଲାଇ ୨୨ ତାରିଖରୁ ନିଯୁକ୍ତି ନେଇ ପଞ୍ଜିକରଣ ଆରମ୍ଭ କରାଯିବ ।

Indian Army issues notification for Agniveer recruitment rally, registration to open from July onwards#AgnipathScheme pic.twitter.com/VnrAiOXibU

— ANI (@ANI) June 20, 2022

ଭାରତୀୟ ସ୍ଥଳସେନାର ବିଜ୍ଞପ୍ତି ମୁତାବକ ଅଗ୍ନିବୀର ଭାବେ ସାମିଲ ହେବାକୁ ଚାହୁଁଥିବା ଯୁବକମାନେ ସର୍ବନିମ୍ନ ୮ମ ରୁ ୧୦ ଶ୍ରେଣୀ ପାସ କରିଥିବା ଆବଶ୍ୟକ । ସେପଟେ ଅଗ୍ନିବୀରମାନେ ସ୍ଥଳସେନାର ୪ ଟି ବିଭାଗରେ ନିଯୁକ୍ତି ପାଇଁ ଆବେଦନ କରିପାରିବେ । ଜେନରାଲ ଡ୍ୟୁଟି, ଟେକ୍ନିକାଲ, କ୍ଲର୍କ ଓ ଟ୍ରେଡସମ୍ୟାନ ଭାବେ ୪ ଟି ବିଭାଗ ରଖା ଯାଇଛି ।ତେବେ ଏହି ଯୋଜନାରେ ୪ ବର୍ଷ ପାଇଁ ଅଗ୍ନିବୀରଙ୍କୁ ନିଯୁକ୍ତି ଦିଆଯିବ । ସେମାନଙ୍କୁ କୌଣସି ପ୍ରକାର ଗ୍ରାଚ୍ୟୁଟି କିମ୍ବା ପେନସନ୍ ମିଳିବ ନାହିଁ ।

ସର୍ଭିସରେ ୪ ବର୍ଷ ପୂରଣ ହେଲା ପରେ ପ୍ରତି ବ୍ୟାଚର ୨୫ ପ୍ରତିଶତ ଅଗ୍ନିବୀରଙ୍କୁ ଭାରତୀୟ ସେନାରେ ଭର୍ତ୍ତି କରାଯିବ । ଏହି ୨୫ ପ୍ରତିଶତ ଅଗ୍ନିବୀର ୨୫ ବର୍ଷ ଯାଏଁ ସେନାରେ ଚାକିରୀ କରିପାରିବେ ।ଆହୁରି ମଧ୍ୟ କୁହାଯାଉଛି ଯେ, ଅଗ୍ନିବୀରଙ୍କୁ ବର୍ଷକୁ ମୋଟ୍ ୩୦ଟି ଛୁଟି ମିଳିବ । ତେବେ ଅସୁସ୍ଥ ହେଲେ କେତେଦିନ ଛୁଟି ମିଳିବ ତାହା ଅସୁସ୍ଥତା ଉପରେ ନିର୍ଭର କରିବ ।

ନୂଆଦିଲ୍ଲୀ : ଭାରତୀୟ ପ୍ରତିରକ୍ଷା କ୍ଷେତ୍ରର ତିନି ପ୍ରମୁଖ ବିଭାଗ ସ୍ଥଳସେନା, ବାୟୁ ସେନା ଏବଂ ନୌସେନାରେ ୪ ବର୍ଷିଆ ନିଯୁକ୍ତି ଦେବାକୁ ନିକଟରେ କେନ୍ଦ୍ର ସରକାର ଘୋଷଣା କରିଥିବା ‘ଅଗ୍ନିପଥ’ ଯୋଜନାକୁ ନେଇ ଏବେ ସାରା ଦେଶରେ ନିଆଁ ଜଳୁଛି। ଏହି ଯୋଜନାକୁ ବିରୋଧ କରି ଯୁବବର୍ଗ ରାଜରାସ୍ତାକୁ ଓହ୍ଲାଇଥିଲା ବେଳେ ବିକ୍ଷୋଭ ଏବଂ ହିଂସା ଦ୍ବାରା କୋଟି କୋଟି ଟଙ୍କାର ସରକାରୀ ଏବଂ ବେସରକାରୀ ସମ୍ପତ୍ତି ନଷ୍ଟ ହୋଇଛି। ଏହାକୁ ନେଇ ରାଜନୈତିକ ସ୍ତରରେ ବିବାଦ ମଧ୍ୟ ତେଜିବାରେ ଲାଗିଛି। ବର୍ତ୍ତମାନ ସୁଦ୍ଧା ୧୮ଟି ରାଜ୍ୟରେ ଏହି ଯୋଜନାକୁ ବିରୋଧ କରି ବିକ୍ଷୋଭ କରାଯାଇଥିଲା ବେଳେ ବହୁ ଧନଜୀବନ ନଷ୍ଟ ହୋଇଛି। ଏହି ଯୋଜନା ଭାରତୀୟ ସେନା ପାଇଁ ସାଂପ୍ରତିକ ଆହ୍ବାନ ଏବଂ ଏହାଦ୍ବାରା ସେନା ଆହୁରି ସଶକ୍ତ ହେବା ସହିତ ଶତ୍ରୁପକ୍ଷ ମୁକାବିଲା ପାଇଁ ଅପରିହାର୍ଯ୍ୟ ବୋଲି ସରକାର କହୁଥିଲେ ହେଁ ଏହାକୁ ବୁଝିବାକୁ ଅନେକ ପ୍ରସ୍ତୁତ ନାହାନ୍ତି। କିନ୍ତୁ ଅଗ୍ନିପଥ ଯୋଜନା ମଡେଲକୁ କାର୍ଯ୍ୟକାରୀ କରି ବହୁ ବିଦେଶୀ ରାଷ୍ଟ୍ର ଏବେ ସଫଳତା ହାସଲ କରିଥିଲା ବେଳେ ଭାରତର ସାମରିକ ଦୃଶ୍ୟପଟକୁ ଦୃଷ୍ଟିରେ ରଖି ଏହାକୁ ବିରୋଧ କରିବା ପରିବର୍ତ୍ତେ ଏହାର ବିଭିନ୍ନ ଦିଗରେ ତର୍ଜମା କରିବାର ଆବଶ୍ୟକତା ରହିଛି ବୋଲି ବିଶେଜ୍ଞମାନେ ମତ ଦେଇଛନ୍ତି।

ଆମେରିକା, ଇସ୍ରାଏଲ.ଚୀନ୍‌, ଫ୍ରାନ୍ସ, ରୁଷିଆ ଏବଂ ଜର୍ମାନୀ ଭଳି ବହୁ ଉନ୍ନତ ଏବଂ ସାମରିକ ଶକ୍ତିଶାଳୀ ରାଷ୍ଟ୍ର ଏଭଳି ମଡେଲକୁ ନିଜ ସେନାରେ ସାମିଲ କରି ସଂସ୍କାରଭିତ୍ତିକ ଆଧୁନିକୀକରଣ କରିଛନ୍ତି। ଆମେରିକାରେ ଏହି ମଡେଲକୁ ‘ କନସ୍କ୍ରିପସନ ମଡେଲ’(ବାଧ୍ୟତାମୂଳକ ସେନା ସେବା) ଆକାରରେ ଲାଗୁ କରାଯାଇଛି। ଏଥିପାଇଁ ଏକ ସ୍ବତନ୍ତ୍ର ଆଇନ ଅଣାଯାଇ ପ୍ରତ୍ୟେକ ଆମେରିକୀୟ ପୁରୁଷ ନାଗରିକ ସେନାରେ ସେବା ଯୋଗାଇ ଦେବାକୁ ବ୍ୟବସ୍ଥା କରାଯାଇଛି। ୧୮ ରୁ ୨୫ ବର୍ଷ ବୟସ୍କ ପ୍ରତ୍ୟେକ ନାଗରିକ ସର୍ବନିମ୍ନ ୪ ବର୍ଷ ପାଇଁ ସେନାରେ ଭର୍ତ୍ତି ହେବା ଲାଗି ପଞ୍ଜିକରଣ ବ୍ୟବସ୍ଥା ରହିଛି। ୪ ବର୍ଷ ପରେ ଜଣେ ଚାହିଁଲେ ସେନାରେ ନିୟମିତ ନିଯୁକ୍ତି ଲାଗି ଆବେଦନ କରିପାରିବେ ଏବଂ ସର୍ବାଧିକ ୨୦ ବର୍ଷ ପାଇଁ ପୂର୍ଣ୍ଣ ନିଯୁକ୍ତି ଭିତ୍ତିରେ କାର୍ଯ୍ୟ କରିବାର ନିୟମ ରହିଛି। ଚଳିତ ମାସ ୧୭ ତାରିଖରୁ ଆମେରିକା ସେନା ପକ୍ଷରୁ ‘କ୍ବିକ୍‌ ସିପ’ ନାମରେ ଏକ ୪ ବର୍ଷିଆ ନୂଆ ଯୋଜନା ପ୍ରଣୟନ କରାଯିବା ସହିତ ପ୍ରତ୍ୟେକ ଯବାନଙ୍କୁ ୩୫ ହଜାର ଡଲାର ବୋନସ ଆକାରରେ ଦେବାକୁ ଘୋଷଣା କରାଯାଇଛି। କେବଳ ଆମେରିକା ନୁହେଁ ; ବିଶ୍ବର ସର୍ବବୃହତ ସେନା ଭାବେ ପରିଚିତ ଚୀନରେ ମଧ୍ୟ ଏହି ମଡେଲରେ ସେନାରେ ନିଯୁକ୍ତିକୁ ଅଗ୍ରାଧିକାର ଦିଆଯାଇଛି।

ଚାଇନା ମିଲିଟାରୀ ସେବା ଆଇନ ଅନୁଯାୟୀ ୧୮ ରୁ ୨୨ ବର୍ଷୀୟ ପ୍ରତ୍ୟେକ ପୁରୁଷ ଚାଇନା ନାଗରିକ ସେନାରେ ସେବା ଯୋଗାଇ ଦେବାକୁ ପଞ୍ଜିକରଣ କରିବାକୁ ବାଧ୍ୟ। ସେହିପରି ସାମରିକ କୌଶଳରେ ସାରା ବିଶ୍ବରେ ପ୍ରତିଷ୍ଠାଲାଭ କରିଥିବା ଇସ୍ରାଏଲ ମଧ୍ୟ ଏହି ମଡେଲରେ କାର୍ଯ୍ୟ କରୁଛି। ଏଠାରେ ୧୮ ବର୍ଷ ଅତିକ୍ରମ କରିଥିବା ଜିଉ , ଡ୍ରୁଜ୍‌ କିମ୍ବା କାର୍କାସିଆନ ଇସ୍ରାଏଲୀ ନାଗରିକ ସେନାରେ ସେବା ଯୋଗାଇ ଦେବାକୁ ବାଧ୍ୟତାମୂଳକ କରାଯାଇଛି। ଏପରିକି ମହିଳାମାନଙ୍କୁ ମଧ୍ୟ ଏଥିରେ ସୁଯୋଗ ଦିଆଯାଇଛି। ପଞ୍ଜିକରଣ ପରେ ପୁରୁଷମାନଙ୍କୁ ସର୍ବନିମ୍ନ ୩୨ ମାସ ଏବଂ ମହିଳାମାନଙ୍କୁ ୨୪ ମାସ ସେବା ଯୋଗାଇ ଦେବାର ବ୍ୟବସ୍ଥା ରହିଛି। ବିଶ୍ବର ଅନ୍ୟତମ ପ୍ରମୁଖ ଏବଂ ଶକ୍ତିଶାଳୀ ରାଷ୍ଟ୍ର ରୁଷିଆରେ ମଧ୍ୟ ଏହି ମଡେଲରେ କାର୍ଯ୍ୟ କରାଯାଉଛି। ଏଠାରେ ‘କନସ୍କ୍ରିପସନ(ବାଧ୍ୟତାମୂଳକ)’, କଣ୍ଟ୍ରାକ୍ଟ,ଅଲଟରନେଟିଭ୍‌ ଏବଂ ଷ୍ଟେଟ ସିଭିଲିଆନ ସର୍ଭିସ ଭାବେ ସାଧାରଣ ନାଗରିକଙ୍କୁ ସେନାରେ ସେବା ଯୋଗାଇ ଦେବାକୁ ବ୍ୟବସ୍ଥା ରହିଛି।

ଏଥିମଧ୍ୟରୁ ‘କନସ୍କ୍ରିପସନ(ବାଧ୍ୟତାମୂଳକ)’ ଏବଂ କଣ୍ଟ୍ରାକ୍ଟ ଭଳି ଦୁଇଟି ମଡେଲକୁ ମିଶାଇ ହାଇବ୍ରିଡ୍‌ ପଦ୍ଧତି ପ୍ରସ୍ତୁତ କରାଯାଇଛି ଏବଂ ୧୮ ରୁ ୨୭ ବର୍ଷ ବୟସ୍କ ପ୍ରତ୍ୟେକ ପୁରୁଷ ରୁଷ ନାଗରିକଙ୍କୁ ନିଯୁକ୍ତି ଦେବାର ବ୍ୟବସ୍ଥା ରହିଛି। ଯେକୌଣସି ଜରୁରୀକାଳୀନ ସ୍ଥିତିରେ ପ୍ରଶିକ୍ଷିତ ଏହି ଯବାନମାନେ ସେନାକୁ ସେବା ଯୋଗାଇ ଦେବାର ନିୟମ ରହିଛି। ୨୦୨୦ ମାର୍ଚ୍ଚ ସୁଦ୍ଧା ପ୍ରାୟ ୨ ଲକ୍ଷ ୨୫ ହଜାର କଣ୍ଟ୍ରାକ୍ଯ ହୋଇଥିଲା ବେଳେ ବର୍ତ୍ତମାନ ସୁଦ୍ଧା ଏହି ବ୍ୟବସ୍ଥାରେ ୪ ଲକ୍ଷରୁ ଅଧିକ ଯବାନ ରୁଷ ସେନାକୁ ସେବା ଯୋଗାଇ ଦେଉଛନ୍ତି। ୟୁରୋପର ଅନ୍ୟତମ ପ୍ରମୁଖ ରାଷ୍ଟ୍ର ଜର୍ମାନୀରେ ମଧ୍ୟ ଏଭଳି ବ୍ୟବସ୍ଥା ରହିଛି।ପୂର୍ବରୁ ସେନାରେ ଯୋଗ ଦେବା ନେଇ ବାଧ୍ୟତାମୂଳକ ବ୍ୟବସ୍ଥାକୁ ୨୦୧୧ରେ ପ୍ରତ୍ୟାହାର କରି ନିଆଯାଇଥିଲା ବେଳେ ଏବେ ସ୍ବତଃପ୍ରବୃତ ଭାବେ ସେନାରେ ଯୋଗ ଦେବାର ନିୟମ କରାଯାଇଛି। ଅତି କମ୍‌ରେ ୧୭ ବର୍ଷ ବୟସ୍କଜଣେ ଜର୍ମାନୀ ଯୁବକ ସର୍ବନିମ୍ନ ୭ ମାସ ଏବଂ ୨୩ ମାସ ପର୍ଯ୍ୟନ୍ତ ସେବା ଯୋଗାଇ ଦେବାକୁ ବ୍ୟବସ୍ଥା ରହିଛି। ପ୍ରକୃତରେ ଅଗ୍ନିପଥ ମଡେଲକୁ ଭାରତରେ କାର୍ଯ୍ୟକାରୀ କରିବାକୁ ୧୯୮୯ ମସିହାରେ ପରିକଳ୍ପନା କରାଯାଇଥିଲା। କିନ୍ତୁ ବିଭିନ୍ନ କାରଣକୁ ନେଇ ଏହା ହୋଇପାରି ନ ଥÒଲା। ତେବେ ଭାରତର ସାଂପ୍ରତିକ ସ୍ଥିତି ଏବଂ ଶତ୍ରୁପକ୍ଷକୁ ଦୃଷ୍ଟିରେ ରଖି ଏଭଳି ଯୋଜନା କାର୍ଯ୍ୟକାରିତା କେତେ ଆବଶ୍ୟକ ତାହା ବିଚାର କରିବାର ସମୟ ଆସିଛି ବୋଲି ସାମରିକ ବିଶେଷଜ୍ଞମାନେ ମତ ଦେଇଛନ୍ତି।

ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଅଗ୍ନିପଥ ଯୋଜନାକୁ ନେଇ ଏବେ ଦେଶବ୍ୟାପୀ ପ୍ରତିବାଦ କରାଯାଉଛି। ବିଭିନ୍ନ ରାଜ୍ୟରେ ଏହି ଯୋଜନାକୁ ବିରୋଧ କରି ବିଗତ ୪ ଦିନ ହେଲା ବିକ୍ଷୋଭ, ହିଂସା ଲାଗି ରହିଥିବା ବେଳେ ଦିନକୁ ଦିନ ସ୍ଥିତି ବିଗିଡ଼ିବାରେ ଲାଗିଛି।  ଏହି ସ୍କିମ ପ୍ରତ୍ୟାହାର ହେବ ନାହିଁ  ବୋଲି ସାମ୍ବାଦିକ ସମ୍ମିଳନୀରେ ୩ ସେନା ପକ୍ଷରୁ ସ୍ପଷ୍ଟ କରାଯାଇଛି। ଏହି ଯୋଜନାକୁ ନେଇ ମିଥ୍ଯା ଖବର ପ୍ରସାରଣ କରୁଥିବା ୩୫ଟୁ ହ୍ବାଟସଆପ୍ ଗ୍ରୃପ ଉପରେ କେନ୍ଦ୍ର ସରକାର ପ୍ରତିବନ୍ଧକ ଲଗାଇଛନ୍ତି। ନୂତନ ଯୋଜନା ବିଷୟରେ ଭୁଲ ତଥ୍ୟ ବିସ୍ତାର କରୁଥିବା ସମ୍ପୃକ୍ତ ଲୋକଙ୍କୁ ସରକାର ଟ୍ରାକିଂ ମଧ୍ଯ କରୁଛନ୍ତି। ଏଥିସହ ମିଥ୍ୟା ଖବର ପ୍ରସାରଣ କରି ଅଗ୍ନିପଥ ଯୋଜନାରେ ସାମିଲ ହେବାକୁ ଥିବା ଯୁବକମାନଙ୍କୁ ବିଭ୍ରାନ୍ତ କରୁଥିବା କାରଣରୁ ୧୦ ଜଣଙ୍କୁ ଗିରଫ କରାଯାଇଛି। ଏହି ଯୋଜନା ସମ୍ବନ୍ଧରେ ସୂଚନା ଯାଞ୍ଚ କରିବା ପାଇଁ ପ୍ରେସ ଇନଫରମେସନ୍ ବ୍ୟୁରୋ ଏକ ଫ୍ୟାକ୍ଟ ଚେକ୍ ଲାଇନ୍ ମଧ୍ୟ ଖୋଲିଛି।

ଭାରତୀୟ ଯୁବକମାନଙ୍କ ପାଇଁ ସଶସ୍ତ୍ର ବାହିନୀରେ ସେବା କରିବା ପାଇଁ କେନ୍ଦ୍ର  ଏକ ନୂତନ ସ୍ୱଳ୍ପକାଳୀନ ନିଯୁକ୍ତି ନୀତି ଉନ୍ମୋଚନ କରିଛି। ଯାହାର ନାଁ ଅଗ୍ନିପଥ୍ ରଖାଯାଇଛି। ଏହି ଯୋଜନାରେ ୧୭.୫ ରୁ ୨୧ ବର୍ଷ ବୟସର ଯୁବକମାନେ ଚାରି ବର୍ଷ ପାଇଁ ତିନୋଟି ସେବା ମଧ୍ୟରୁ ଯେ କୌସି ସେବାରେ ଅନ୍ତର୍ଭୁକ୍ତ ହୋଇପାରିବେ।

ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଅଗ୍ନିପଥ ଯୋଜନାକୁ ନେଇ ଏବେ ଦେଶବ୍ୟାପୀ ପ୍ରତିବାଦ କରାଯାଉଛି। ବିଭିନ୍ନ ରାଜ୍ୟରେ ଏହି ଯୋଜନାକୁ ବିରୋଧ କରି ବିଗତ ୪ ଦିନ ହେଲା ବିକ୍ଷୋଭ, ହିଂସା ଲାଗି ରହିଥିବା ବେଳେ ଦିନକୁ ଦିନ ସ୍ଥିତି ବିଗିଡ଼ିବାରେ ଲାଗିଛି। ଏ ନେଇ ତିନି ସେନା ପକ୍ଷରୁ ରବିବାର ଦିନ ଏକ ମିଳିତ ପ୍ରେସମିଟ୍ କରି ଏହି ସ୍କିମକୁ ନେଇ ରହିଥିବା ସଂଦେହ ଦୂର କରାଯାଇଛି। ଏହି ସ୍କିମ ପ୍ରତ୍ୟାହାର ହେବ ନାହିଁ  ବୋଲି ସାମ୍ବାଦିକ ସମ୍ମିଳନୀରେ ସ୍ପଷ୍ଟ କରାଯାଇଛି।

କେନ୍ଦ୍ର ପ୍ରତିରକ୍ଷା ମନ୍ତ୍ରାଳୟ ଅଧିନସ୍ଥ ମିଲିଟାରୀ ବ୍ୟାପାର ବିଭାଗର ଅତିରିକ୍ତ ସଚିବ ଲେପ୍ଟନାଣ୍ଟ ଜେନେରାଲ ଅନୀଲ ପୁରି କହିଛନ୍ତି ଯେ, ଏହି ସଂସ୍କାର ଦ୍ବାରା ସେନା ଯବାନଙ୍କ ହାରାହାରି ବୟସ ହ୍ରାସ ପାଇବ ଯାହାକି ସେନାର ଦକ୍ଷତା ବୃଦ୍ଧି କରିବ । ଏବେ ସେନାର ଅଧିକାଂଶ ଯବାନଙ୍କ ବୟସ ୩୦ ବର୍ଷରୁ ଅଧିକ ରହିଛି । ସେ କହିଛନ୍ତି ଯେ ଏହି ସ୍କିମରେ ଆସନ୍ତା ୫ ବର୍ଷରେ ପ୍ରାୟ ୫୦ରୁ ୬୦ ହଜାର ନିଯୁକ୍ତି କରାଯିବ । ଭବିଷ୍ୟତରେ ଏହା ୧.୨୫ଲକ୍ଷକୁ ବୃଦ୍ଧି ପାଇପାରେ ।

ଭାରତୀୟ ବାୟୁସେନାର ପ୍ରତିନିଧିତ୍ବ କରୁଥିବା ଏୟାର ମାର୍ସାଲ ଏସକେ ଝା କହିଛନ୍ତି ଯେ, ଜୁନ ୨୪ରୁ ପ୍ରଥମ ବ୍ୟାଚ୍ ଅଗ୍ନିବୀରଙ୍କ ନିଯୁକ୍ତି ପାଇଁ ପଞ୍ଜୀକରଣ ପ୍ରକ୍ରିୟା ଆରମ୍ଭ ହେବ । ସେହିପରି ଜୁଲାଇ ୨୪ରୁ ଅନଲାଇନ ପରୀକ୍ଷା ଆରମ୍ଭ ହେବ । ପ୍ରଥମ ବ୍ୟାଚ ଅଗ୍ନିବୀରଙ୍କ ତାଲିମ ଡିସେମ୍ବର ସୁଦ୍ଧା ଆରମ୍ଭ ହୋଇଯିବ ।

ଅନ୍ୟପକ୍ଷରେ ନୌସେନାର ପ୍ରତିନିଧିତ୍ବ କରୁଥିବା ଭାଇସ ଆଡମିରାଲ ଦିନେଶ ତ୍ରିପାଠୀ କହିଛନ୍ତି ଯେ, ନୌସେନା ପୁରୁଷଙ୍କ ସମେତ ମହିଳା ଅଗ୍ନିବୀରଙ୍କ ନିଯୁକ୍ତ ମଧ୍ୟ କରିବ। ନଭେମ୍ବର ୨୧ରୁ ପ୍ରଥମ ବ୍ୟାଚ ନାଭାଲ ଅଗ୍ନିବୀରଙ୍କ ତାଲିମ ଆଇଏନଏସ ଚିଲିକାରେ ଆରମ୍ଭ ହେବ ।

ଇସଲାମାବାଦ : ସେନାରେ ନିଯୁକ୍ତି ପାଇଁ କେନ୍ଦ୍ର ସରକାର ଘୋଷଣା କରିଥିବା ଅଗ୍ନିପଥ ଯୋଜନାକୁ ନେଇ ଏବେ ସାରା ଭାରତରେ ନିଆଁ ଜଳିଛି। ବିଭିନ୍ନ ରାଜ୍ୟରେ ଏହି ଯୋଜନାକୁ ବିରୋଧ କରି ବିଗତ ୪ ଦିନ ହେଲା ବିକ୍ଷୋଭ, ହିଂସା ଲାଗି ରହିଥିବା ବେଳେ ଦିନକୁ ଦିନ ସ୍ଥିତି ବିଗିଡ଼ିବାରେ ଲାଗିଛି। ହେଲେ ପଡ଼ୋଶୀ ରାଷ୍ଟ୍ର ପାକିସ୍ତାନରେ କିନ୍ତୁ ଏହି ଯୋଜନାକୁ ନେଇ ଭିନ୍ନ ପରିସ୍ଥିତି ଦେଖାଯାଇଛି।

ମୋଦୀ ସରକାରଙ୍କ ‘ଅଗ୍ନିପଥ’ ଯୋଜନାକୁ ସେଠାରେ ବିଭିନ୍ନ ସ୍ତରରେ ତର୍ଜମା କରାଯାଉଥିବା ବେଳେ ଏହା ପଛରେ ଭାରତର ଏକ ନିର୍ଦ୍ଦିଷ୍ଟ ଅଭିସନ୍ଧି ରହିଛି ବୋଲି ପାକିସ୍ତାନ ରାଜନେତାଙ୍କ ଠାରୁ ଆରମ୍ଭ କରି ଗଣମାଧ୍ୟମରେ ଚର୍ଚ୍ଚା ଜୋର ଧରିଛି। ୪ ବର୍ଷ ଅନ୍ତରରେ ଯୁବକମାନଙ୍କୁ ସେନାରେ ଭର୍ତ୍ତି କରି ଭାରତ ଏହାର ସାମରିକ ଶକ୍ତିକୁ ଏକ ନୂଆ ରୂପ ଦେବାକୁ ଉଦ୍ୟମ କରୁଛି ଯାହାକି ପାକିସ୍ତାନ ପାଇଁ ଦିନେ ବିପଦ ହେବ ବୋଲି ବିତର୍କ ଚାଲିଛି।

ଏପରିକି ୨୦୨୪ କିମ୍ବା ୨୦୨୫ ବେଳକୁ ଭାରତ ଏହାର ପରିବର୍ତ୍ତିିତ ସାମରିକ ରୂପରେଖକୁ ନେଇ ପାକିସ୍ତାନ ଅଧିକୃତ କାଶ୍ମୀର ଉପରେ ଆକ୍ରମଣ କରିବାକୁ ଟାର୍ଗେଟ କରିଛି। ଏଭଳି ଯୋଜନା ପୂର୍ବରୁ ଆମେରିକା ଏବଂ ଅନ୍ୟ କିଛି ପାଶ୍ଚାତ୍ୟ ରାଷ୍ଟ୍ରରେ ଲାଗୁ ହୋଇସାରିଛି। ଏବେ ମୋଦୀ ସରକାର ଭାରତରେ ଏଭଳି ଯୋଜନା ପ୍ରଣୟନ କରି ନିଜର ସାମରିକ ଶକ୍ତିକୁ ଅଧିକ ଶକ୍ତିଶାଳୀ କରିବା ସହିତ ପିଓକେ ହାସଲ କରିବାକୁ ପ୍ରସ୍ତୁତ ହେଉଛନ୍ତି ବୋଲି ସେଠାକାର ରାଜନୀତିକ ବିଶାରଦମାନେ ମତ ଦେଇଛନ୍ତି।

ନୂଆଦିଲ୍ଲୀ : କେନ୍ଦ୍ର ସରକାରଙ୍କ ଅଗ୍ନିପଥ ଯୋଜନାକୁ ବିରୋଧ କରି ବିଭିନ୍ନ ରାଜ୍ୟରେ ବିକ୍ଷୋଭ ଚତୁର୍ଥ ଦିନରେ ପହଞ୍ଚିଛି। ବିହାରରୁ ଆରମ୍ଭ ହୋଇଥିବା ଏହି ବିକ୍ଷୋଭ ଏବଂ ହିଂସା ଅନ୍ୟ ରାଜ୍ୟକୁ ବ୍ୟାପିଥିଲା ବେଳେ ଶନିବାର ୧୮ ରାଜ୍ୟରେ ବିକ୍ଷୋଭ ପ୍ରଦର୍ଶନ କରାଯାଇଛି। ଗତକାଲି ତେଲଙ୍ଗାନାର ସିକନ୍ଦରାବାଦ୍‌ ରେଳ ଷ୍ଟେସନରେ ବିକ୍ଷୋଭ ବେଳେ ପୁଲିସ ଗୁଳିରେ ଜଣେ ଯୁବକ ପ୍ରାଣ ହାରାଇବା ସହ ୧୨ ରୁ ଅଧିକ ବିକ୍ଷୋଭାକାରୀ ଆହତ ହୋଇଥିଲେ। ଆଜି ମଧ୍ୟ ଏହି ରାଜ୍ୟରେ ବିକ୍ଷୋଭ ଆହୁରି ତୀବ୍ର ହେବା ସହ ଆଉ ଜଣେ ପ୍ରାଣ ହରାଇବା ସହିତ ୧୪ ଜଣ ଆହତ ହୋଇଛନ୍ତି।

ସେହିପରି ପଞ୍ଜାବର ଲୁଧିଆନା ଷ୍ଟେସନରେ ବିକ୍ଷୋଭକାରୀମାନେ ଭଙ୍ଗାରୁଜା କରିଛନ୍ତି। ବିହାର, ଉତ୍ତରପ୍ରଦେଶ, ତେଲଙ୍ଗାନା, ମଧ୍ୟପ୍ରଦେଶ ଏବଂ ପଶ୍ଚିମବଙ୍ଗ ଆଦି ରାଜ୍ୟରେ ସ୍ଥିତି ଅସମ୍ଭାଳ ହୋଇପଡ଼ିଥିଲା ବେଳେ ହରିୟାଣା, ଦିଲ୍ଲୀ ଏବଂ ଅନ୍ୟ କିଛି ରାଜ୍ୟରେ ବିକ୍ଷୋଭ ଜାରି ରହିଛି। ସ୍ଥିତିକୁ ଦୃଷ୍ଟିରେ ରଖି ତାମିଲନାଡୁ, କେରଳ ଏବଂ କର୍ଣ୍ଣାଟକ ଆଦି ରାଜ୍ୟରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ବିଭିନ୍ନ ରାଜ୍ୟରେ ରେଳ ଚଳାଚଳକୁ ନେଇ ପଦକ୍ଷେପ ନିଆଯିବା ସହିତ ଅଧିକାଂଶ ରୁଟ୍‌ରେ ଟ୍ରେନ ଚଳାଚଳ ବାତିଲ କରି ଦିଆଯାଇଛି।

ଅଗ୍ନିପଥ ଯୋଜନାକୁ ନେଇ ଦେଶବ୍ୟାପୀ ହୋଇଥିବା ହିଂସାକାଣ୍ଡରେ ଦେଶରେ ବିପୁଳ ଆର୍ଥିକ କ୍ଷତି ହୋଇଛି। ବିଶେଷକରି ବିହାରରେ ଅଧିକ କ୍ଷତି ହୋଇଛି। ଗତ ୪ ଦିନ ହେଲା ହୋଇଥିବା ଏହି ହିଂସାକାଣ୍ଡରେ ବିହାରରେ ୧୧ ଇଞ୍ଜିନ ସହ ୬୦ ଟ୍ରେନ୍‌କୁ ବିକ୍ଷୋଭକାରୀମାନେ ପୋଡ଼ି ଦେଇଛନ୍ତି। ଏତିକି ଦିନରେ ବିକ୍ଷୋଭକାରୀମାନେ ପାଖାପାଖି ୭୦୦ କୋଟି ଟଙ୍କାର ସମ୍ପତ୍ତି ପୋଡ଼ି ନଷ୍ଟ କରି ଦେଇଛନ୍ତି ବୋଲି ଇଷ୍ଟ-ସେଣ୍ଟ୍ରାଲ ରେଳବାଇର ମୁଖ୍ୟ ପବ୍ଲିକ ରିଲେସନ୍ ଅଫିସର ବିରେନ୍ଦ୍ର କୁମାର କହିଛନ୍ତି। ତେବେ କ୍ଷତି ସମ୍ପୂର୍ଣ୍ଣ ଆକଳନ କରାଯାଇ ନାହିଁ। ବର୍ତ୍ତମାନ ଏହାର ହିବାସ ଚାଲିଛି। ତେବେ ଅନୁମାନ ଯେ ପାଖାପାଖି ୭୦୦ କୋଟି ଟଙ୍କାର ସମ୍ପତ୍ତି ନଷ୍ଟ ହୋଇଛି ବୋଲି ବିରେନ୍ଦ୍ର କୁମାର କହିଛନ୍ତି।

ସେପଟେ ବିହାର ସ୍ଥିତିକୁ ଦୃଷ୍ଟିରେ ରଖି ଉପ ମୁଖ୍ୟମନ୍ତ୍ରୀଙ୍କ ସମେତ ୧୨ ଜଣ ବିଜେପି ନେତାଙ୍କ ସୁରକ୍ଷା ନେଇ ସେମାନଙ୍କୁ ‘ୱାଇ’ ଶ୍ରେଣୀ ସୁରକ୍ଷା ଯୋଗାଇ ଦିଆଯାଇଛି। ଅଗ୍ନିପଥ ଯୋଜନାକୁ ନେଇ ବିଶେଷତଃ ଯୁବ ବର୍ଗଙ୍କ ମଧ୍ୟରେ ଆକ୍ରୋଶ ବଢିଥିବା ବେଳେ ଏହାକୁ ରାଜନୀତିକରଣ କରିବା ଉଦ୍ଦେଶ୍ୟରେ ବହୁ ରାଜନୈତିକ ଦଳ ଏଥିରେ ପରୋକ୍ଷରେ ସାମିଲ ହେଉଛନ୍ତି।

କେନ୍ଦ୍ର ସରକାରଙ୍କ ବିରୋଧରେ ଯୁବବର୍ଗଙ୍କୁ ଉସୁକାଇବା ଉଦ୍ଦେଶ୍ୟରେ ଏବେ କାର୍ଯ୍ୟ କରାଯାଉଛି ବୋଲି ବିଜେପି ଅଭିଯୋଗ କରିଛି। କିନ୍ତୁ ଏହି ଯୋଜନା ସମ୍ପୂର୍ଣ୍ଣ ଉପଯୋଗୀ ଏବଂ ସେନାର ସାମର୍ଥ ବୃଦ୍ଧି ପାଇଁ ଏକ ନୂଆ ସଂସ୍କାର ବୋଲି ଦଳ କହିବା ସହିତ ଯୁବବର୍ଗ ପ୍ରଥମେ ଏହାର ବିଭିନ୍ନ ଦିଗକୁ ବୁଝିବା ଦରକାର ବୋଲି ଦଳୀୟ ନେତାମାନେ କହିଛନ୍ତି। ଅନ୍ୟପକ୍ଷରେ ସାଂପ୍ରତିକ ପରିସ୍ଥିତିକୁ ଦୃଷ୍ଟିରେ ରଖି ଶନିବାର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ବାହୁସେନା ,ନୌସେନା ଏବଂ ସ୍ଥଳସେନାର ବରିଷ୍ଠ ଅଧିକାରୀମାନେ ଯୋଗ ଦେଇ ସାଂପ୍ରତିକ ସ୍ଥିତି ଉପରେ ଆଲୋଚନା କରିବା ସହିତ ଅଗ୍ନିପଥ ଯୋଜନାକୁ ନେଇ ବଢିଥÒବା ଯୁବବର୍ଗଙ୍କ ଆକ୍ରୋଶ ଶାନ୍ତ କରିବା ଉଦ୍ଦେଶ୍ୟରେ ପଦକ୍ଷେପ ନିଆଯାଇଛି। ବିଶେଷକରି ଏହି ଯୋଜନାର କିଛି ଦିଗରେ ପରିବର୍ତ୍ତନ ଅଣାଯାଇଛି।

ଏହି ଯୋଜନାରେ ପ୍ରାଥମିକ ଭାବେ ଜଣେ ପ୍ରାର୍ଥୀଙ୍କ ପାଇଁ ସର୍ବୋଚ୍ଚ ଆବେଦନ ବୟସ ସୀମା ୨୧ ରଖାଯାଇଥିଲା। କିନ୍ତୁ କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ଗତକାଲି ଏହି ବୟସ ସୀମାକୁ ୨୩କୁ ବୃଦ୍ଧି କରାଯାଇଥିଲା। ସେହିପରି ଅଗ୍ନିବୀରଙ୍କ ପାଇଁ କେନ୍ଦ୍ରୀୟ ସଶସ୍ତ୍ର ପୁଲିସ ବଳ ଏବଂ ଆସାମ ରାଇଫେଲ୍ସରେ ୧୦ ପ୍ରତିଶତ ସଂରକ୍ଷଣ ରଖିବାକୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଘୋଷଣା କରିଥିଲେ। ଏକ୍ସ ସର୍ଭିସମ୍ୟାନ ସଂରକ୍ଷଣ କୋଟା ବ୍ୟତୀତ ଏହି ବ୍ୟବସ୍ଥା ଲାଗୁ କରାଯିବ ବୋଲି କହିଥିଲେ। ତେବେ ଅଗ୍ନିବୀରଙ୍କ ପାଇଁ ପ୍ରତିରକ୍ଷା ବିଭାଗରେ ୧୦ ପ୍ରତିଶତ ସ୍ଥାନ ସଂରକ୍ଷଣ ରଖିବାକୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଶନିବାର ଘୋଷଣା କରିଛନ୍ତି। ଭାରତୀୟ ତଟରକ୍ଷା ବାହିନୀ ସମେତ ପ୍ରତିରକ୍ଷା ବେସାମରିକ ବିଭାଗ ଏବଂ ପ୍ରତିରକ୍ଷା ରାଷ୍ଟ୍ରାୟତ୍ତ ଉଦ୍ୟୋଗଗୁଡିକରେ ଅଗ୍ନିବୀରଙ୍କ ପାଇଁ ବିଭିନ୍ନ ବଦ ପଦବୀରେ ୧୦ ପ୍ରତିଶତ ସ୍ଥାନ ସଂରକ୍ଷିତ ରହିବ ବୋଲି ସେ ଘୋଷଣା କରିଛନ୍ତି।

ନୂଆଦିଲ୍ଲୀ : ସେନାରେ ସୈନିକ ନିଯୁକ୍ତି ପାଇଁ ସରକାର ଘୋଷଣା କରିଥିବା ଅଗ୍ନିପଥ ଯୋଜନା ଏବେ ସରକାରଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି । ଅଗ୍ନିପଥ ଯୋଜନା ବିରୋଧରେ ଦେଶବ୍ୟାପୀ ହିଂସାତ୍ମକ ପ୍ରଦର୍ଶନ ହୋଇଛି। ଏଭଳି ପରିସ୍ଥିତିରେ ଆଶାୟୀ ଯୁବକଙ୍କ କ୍ରୋଧକୁ ପ୍ରଶମିତ କରିବା ପାଇଁ ସରକାର ଏହି ନିଯୁକ୍ତି ଯୋଜନାରେ କିଛି କୋହଳ କରିଛନ୍ତି । ଅଗ୍ନିବୀରମାନଙ୍କ ପାଇଁ ପ୍ରତିରକ୍ଷା ମନ୍ତ୍ରାଳୟର ବିଭିନ୍ନ ବିଭାଗରେ ସଂରକ୍ଷଣ ଘୋଷଣା କରାଯାଇଛି । ନିଯୁକ୍ତି ଆଶାୟୀ ଯୁବକଯୁବତୀମାନଙ୍କ ଅସନ୍ତୋଷକୁ ପ୍ରଶମିତ କରିବାକୁ ସରକାର ଏହି ପଦକ୍ଷେପ ନେଇଥିବା କୁହାଯାଉଛି ।

ଦିନକୁ ଦିନ ଅଗ୍ନିପଥ ଯୋଜନା ବିରୋଧରେ ଆନ୍ଦୋଳନ ତୀବ୍ର ହେଉଥିବା ବେଳେ ଏହାକୁ ପ୍ରଶମିତ କରିବାକୁ କେନ୍ଦ୍ର ସରକାର ଉଦ୍ୟମ କରିଛନ୍ତି। ଏହିକ୍ରମରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଅଗ୍ନିବୀରଙ୍କ ପାଇଁ ନୂଆ ସଂରକ୍ଷଣ ନିୟମ ଲାଗୁ କରାଯିବ ବୋଲି ଘୋଷଣା କରିଛନ୍ତି। ୪ ବର୍ଷ ପରେ ସେନାରୁ ଅବ୍ୟାହତି ନେଉଥିବା ଅଗ୍ନିବୀରଙ୍କୁ ପ୍ରତିରକ୍ଷା ବିଭାଗରେ ଚାକିରି ମିଳିବ। ସେମାନଙ୍କ ପାଇଁ ୧୦% ପଦ ସଂରକ୍ଷଣ କରି ରଖାଯିବ ବୋଲି ଆଜି ପ୍ରତିରକ୍ଷା ମନ୍ତ୍ରୀ ଶ୍ରୀ ସିଂହ ସୂଚନା ଦେଇଛନ୍ତି। ଅଗ୍ନିପଥ ଯୋଜନା ବିରୋଧରେ ଆନ୍ଦୋଳନ ତୀବ୍ର ହେଉଥିବାରୁ ଆଜି ଶ୍ରୀ ସିଂହ ୩ ସେନା ବାହିନୀର ମୁଖ୍ୟଙ୍କ ସହ ବୈଠକ କରିଥିଲେ। ଏହି ବୈଠକରେ ଅଗ୍ନିବୀରଙ୍କ ପାଇଁ ପ୍ରତିରକ୍ଷା ବିଭାଗରେ ୧୦% ଚାକିରି ସଂରକ୍ଷଣ ହୋଇ ରହିବ ବୋଲି ନିଷ୍ପତ୍ତି ହୋଇଛି। ଅଗ୍ନିବୀରମାନଙ୍କ ପାଇଁ ତଟରକ୍ଷୀ ବାହିନୀ, ଡିଫେନ୍ସ ସିଭିଲିଆନ ପୋଷ୍ଟ ଓ ସମସ୍ତ ୧୬ଟି ଡିଫେନ୍ସ ପବ୍ଲିକ ସେକ୍ଟରରେ ୧୦% ଚାକିରି ସଂରକ୍ଷିତ ହୋଇ ରହିବ।

ଏହା ପୂର୍ବରୁ ଗୃହ ମନ୍ତ୍ରଣାଳୟ ମଧ୍ୟ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ (ସିଏପିଏଫ୍) ଏବଂ ଆସାମ ରାଇଫଲ୍ସରେ ‘ଅଗ୍ନିବୀର’ଙ୍କୁ ୧୦% ସଂରକ୍ଷଣ ଦେବାକୁ ଘୋଷଣା କରିଥିଲା । ଅଗ୍ନିପଥ ଯୋଜନାରେ ଚାରି ବର୍ଷର କାର୍ଯ୍ୟକାଳ ପରେ ଅଗ୍ନିବୀର ମାନଙ୍କୁ ସିଏପିଏଫ୍ ଓ ଆସାମ ରାଇଫଲ୍ସରେ ନିଯୁକ୍ତି ମିଳିବ । ଏହା ସହିତ ପ୍ରାର୍ଥୀଙ୍କ ବୟସ ସୀମା ମଧ୍ୟ କୋହଳ କରିବାକୁ ନିଷ୍ପତ୍ତି ନିଆଯାଇଛି।ଏଥିସହ ‘ଅଗ୍ନିବୀର’ଙ୍କ ନିଯୁକ୍ତି ବେଳେ ବୟସ ସୀମାକୁ ୩ ବର୍ଷ ଯାଏ କୋହଳ କରାଯିବ। ପ୍ରଥମ ବ୍ୟାଚର ଅଗ୍ନିବୀରଙ୍କ ପାଇଁ ନିଯୁକ୍ତି ବେଳେ ବୟସ ସୀମାକୁ ୫ ବର୍ଷ କୋହଳ କରାଯିବ।

ନୂଆଦିଲ୍ଲୀ : ‘ଅଗ୍ନିପଥ’ ବିରୋଧୀ ନିଆଁ ବର୍ତ୍ତମାନ ସାରା ଦେଶକୁ ବ୍ୟାପିବାରେ ଲାଗିଛି। ଏହି ଯୋଜନାକୁ ବିରୋଧ କରି ବିଭିନ୍ନ ରାଜ୍ୟରେ ବିକ୍ଷୋଭ, ହିଂସା ତୃତୀୟ ଦିନରେ ପହଞ୍ଚିଛି। ଗତକାଲି ଦିଲ୍ଲୀ ସମେତ ହରିୟାଣା, ଉତ୍ତରପ୍ରଦେଶ, ବିହାର, ମଧ୍ୟପ୍ରଦେଶ ଏବଂ ରାଜସ୍ଥାନ ଆଦି ରାଜ୍ୟରେ ଏହି ଯୋଜନାକୁ ତୀବ୍ର ବିରୋଧ କରାଯାଇଥିଲା ବେଳେ ଶୁକ୍ରବାର ଏହା ତେଲଙ୍ଗାନକୁ ବ୍ୟାପିଛି। ସିକନ୍ଦରାବାଦ ଷ୍ଟେସନରେ ଶହ ଶହ ଯୁବକ ଏହି ଯୋଜନାକୁ ବିରୋଧ କରି ଏକାଠି ହେବା ସହିତ ଭଙ୍ଗାରୁଜା କରିଥିଲେ। ସେମାନେ ଦୁଇଟି ଟ୍ରେନରେ ନିଆଁ ଲଗାଇ ଦେଇଥିଲା ବେଳେ ସ୍ଥିତି ନିୟନ୍ତ୍ରଣ କରିବାକୁ ରେଳବାଇ ପୁଲିସ ଗୁଳି ଚଳାଇଥିଲା। ଏହି ଘଟଣାରେ ଜଣେ ବିକ୍ଷୋଭକାରୀ ଯୁବକଙ୍କ ମୃତ୍ୟୁ ହେବା ସହିତ ୧୨ ଜଣ ଆହତ ହୋଇଛନ୍ତି। ତୃତୀୟ ଦିନରେ ବିହାର ଏବଂ ଉତ୍ତରପ୍ରଦେଶରେ ବିକ୍ଷୋଭ ଆହୁରି ଜୋରଦାର ହୋଇଛି। ଏହାରି ମଧ୍ୟରେ ଅଗ୍ନିପଥ ଯୋଜନାକୁ ନେଇ ରାଚନୀତି ମଧ୍ୟ ଆରମ୍ଭ ହୋଇଯାଇଛି।

8 सालों से लगातार भाजपा सरकार ने ‘जय जवान, जय किसान' के मूल्यों का अपमान किया है।

मैंने पहले भी कहा था कि प्रधानमंत्री जी को काले कृषि कानून वापस लेने पड़ेंगे।

ठीक उसी तरह उन्हें ‘माफ़ीवीर' बनकर देश के युवाओं की बात माननी पड़ेगी और 'अग्निपथ' को वापस लेना ही पड़ेगा।

— Rahul Gandhi (@RahulGandhi) June 18, 2022

କେନ୍ଦ୍ର ସରକାରଙ୍କ ଅଗ୍ନିପଥ ଯୋଜନାକୁ ନେଇ ଦେଶରେ ଜଳୁଥିବା ନିଆଁ ମଧ୍ୟରେ ପ୍ରଧାନମନ୍ତ୍ରୀ ମୋଦୀଙ୍କ ଟାର୍ଗେଟ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ। କେନ୍ଦ୍ର   ସରକାର ଗତ ୮ ବର୍ଷ ହେବ ଯବାନ ଓ କିଷାନଙ୍କୁ ଅପମାନିତ କରୁଛନ୍ତି। ତେଣୁ କୃଷି ଆଇନ୍‌ ପରି ‘ଅଗ୍ନିପଥ’ ଆଇନକୁ ମଧ୍ୟ କେନ୍ଦ୍ର ସରକାର ପ୍ରତ୍ୟାହାର କରିବାକୁ ବାଧ୍ୟ ହେବେ ବୋଲି ଟ୍ୱିଟ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ।

ରାହୁଲ ଟ୍ବିଟ୍ କରି କହିଛନ୍ତି “ଲଗାତାର ୮ ବର୍ଷ ଧରି ସରକାର ‘ଜୟ ଯବାନ, ଜୟ କିଷାନ’ର ମୂଲ୍ୟବୋଧକୁ ଅପମାନିତ କରିଛନ୍ତି। ମୁଁ ଏହା ପୂର୍ବରୁ ମଧ୍ୟ କହିଥିଲି ଯେ ପ୍ରଧାନମନ୍ତ୍ରୀଙ୍କୁ କଳା କୃଷି ଆଇନ ପ୍ରତ୍ୟାହାର କରିବାକୁ ପଡିବ। ସେହିଭଳି ଅଗ୍ନିପଥ ନେଇ ମଧ୍ୟ ପ୍ରଧାନମନ୍ତ୍ରୀଙ୍କୁ ସମାନ ସ୍ଥିତିର ସମ୍ମୁଖୀନ ହେବାକୁ ପଡ଼ିବ। ତାଙ୍କୁ ଦେଶର ଯୁବବର୍ଗଙ୍କ କଥା ମାନିବାକୁ ପଡ଼ିବ ଓ ‘ଅଗ୍ନିପଥ’ ଯୋଜନାକୁ ଫେରାଇ ନେବାକୁ ପଡ଼ିବ।’

अग्निपथ – नौजवानों ने नकारा

कृषि कानून – किसानों ने नकारा

नोटबंदी – अर्थशास्त्रियों ने नकारा

GST – व्यापारियों ने नकारा

देश की जनता क्या चाहती है, ये बात प्रधानमंत्री नहीं समझते क्यूंकि उन्हें अपने ‘मित्रों’ की आवाज़ के अलावा कुछ सुनाई नहीं देता।

— Rahul Gandhi (@RahulGandhi) June 17, 2022

ଅନ୍ୟପଟେ ରାହୁଲ ଗାନ୍ଧୀ ଗତକାଲି କରିଥିବା ଆଉ ଏକ ଟ୍ବିଟ୍ରେ ମଧ୍ୟ ପ୍ରଧାନମନ୍ତ୍ରୀ ମୋଦୀ ଏବଂ ତାଙ୍କ ନେତୃତ୍ବାଧିନ ସରକାରକୁ ଟାର୍ଗେଟ କରିଥିଲେ। ରାହୁଲ ଟ୍ବିଟ କରି କହିଥିଲେ ଯେ ଦେଶର ଲୋକମାନେ କ’ଣ ଚାହୁଁଛନ୍ତି ତାହା ପ୍ରଧାନମନ୍ତ୍ରୀ ବୁଝନ୍ତି ନାହିଁ, ତାଙ୍କ ବନ୍ଧୁମାନେ ଯାହା କୁହନ୍ତି ସେ ତାହା କରନ୍ତି। ଏହାର ବହୁ ପ୍ରମାଣ ମଧ୍ୟ ରହିଛି। ମୋଦୀ ସରକାରଙ୍କ ଅଗ୍ନିପଥ ଯୋଜନାକୁ ଯୁବକମାନେ ପ୍ରତ୍ୟାଖ୍ୟାନ କଲେ । କୃଷି ଆଇନକୁ କୃଷକମାନେ ପ୍ରତ୍ୟାଖ୍ୟାନ କଲେ। ବିମୁଦ୍ରୀକରଣକୁ ଅର୍ଥନୀତିଜ୍ଞମାନେ ଅସ୍ୱୀକାର କଲେ ସେହିପରି ଜିଏସ୍‌ଟିକୁ ମଧ୍ୟ ବ୍ୟବସାୟୀମାନେ ପ୍ରତ୍ୟାଖ୍ୟାନ କଲେ।

ନୂଆଦିଲ୍ଲୀ: ଅଗ୍ନିବୀରଙ୍କ ପାଇଁ କେନ୍ଦ୍ର ସରକାରଙ୍କ ବଡ଼ ଘୋଷଣା କରିଛନ୍ତି । ବାରମ୍ବାର ବିବାଦ ପରେ ଅଗ୍ନିପଥ ଯୋଜନାରେ ପରିବର୍ତ୍ତନ କରୁଛନ୍ତି କେନ୍ଦ୍ର ସରକାର । ଅଗ୍ନିବୀରଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ରଖିଛନ୍ତି କେନ୍ଦ୍ର ସରକାର । ସିଏପିଏଫ୍ ଓ ଆସାମ୍ ରାଇଫଲରେ ୧୦ ପ୍ରତିଶତ ସଂରକ୍ଷଣ ରହିବ । ଏହାସହ ଗୃହ ମନ୍ତ୍ରାଳୟ ଅଗ୍ନିବୀର ଭାବେ ସେବା ପୂରଣ କରିସାରିଥିବା ଯବାନଙ୍କ ବୟସସୀମାରେ ମଧ୍ୟ ବୃଦ୍ଧି କରିଛନ୍ତି । ସେମାନଙ୍କୁ ଅଧିକ ୩ ବର୍ଷର ରିହାତି ମିଳିବ । ଏହାସହ ଅଗ୍ନିପଥରେ ସାମିଲ ପ୍ରଥମ ବ୍ୟାଚର ଅଗ୍ନିବୀରଙ୍କ ବୟସ ସୀମାକୁ ମଧ୍ୟ ଅଧିକ ୫ ବର୍ଷ କୋହଳ କରିଛନ୍ତି ।

The MHA also decides to give 3 years age relaxation beyond the prescribed upper age limit to Agniveers for recruitment in CAPFs & Assam Rifles. Further, for the first batch of Agniveer, the age relaxation will be for 5 years beyond the prescribed upper age limit.

— गृहमंत्री कार्यालय, HMO India (@HMOIndia) June 18, 2022

ନୂଆଦିଲ୍ଲୀ : ସାରା ଦେଶରେ ଅଗ୍ନିପଥ ଯୋଜନାକୁ ନେଇ ବିରୋଧ ଚାଲିଛି। କେନ୍ଦ୍ର ସରକାରଙ୍କ ‘ଅଗ୍ନିପଥ‘ ଯୋଜନକୁ ବିରୋଧ କରି ବିଭିନ୍ନ ରାଜ୍ୟରେ ଚାଲିଥିବା ହିଂସା, ପ୍ରତିବାଦ ଓ ଆକ୍ରୋଶର ନିଆଁ ଦେଖାଦେଇଛି। କେଉଁଠି ଟ୍ରେନକୁ ଜାଳି ଦେଉଛନ୍ତି ତ କେଉଁଠି ଷ୍ଟେସନ ଭିତରେ ଭଙ୍ଗାରୁଜା କରୁଛନ୍ତି । ଆଖି ପିଛୁଳାକେ ନଷ୍ଟ ହେଉଛି ଜାତୀୟ ସମ୍ପତି । ୧୦ରୁ ଅଧିକ ରାଜ୍ୟରେ ବ୍ୟାପୁଥିବା ଏହି ହିଂସା ଅଧିକ ଉଗ୍ର ହେବାରେ ଲାଗିଛି । ଉତରପ୍ରଦେଶ, ହରିୟାଣା, ହିମାଚଳ ପ୍ରଦେଶ, ରାଜସ୍ଥାନ, ମଧ୍ୟପ୍ରଦେଶ ଏବଂ ଦିଲ୍ଲୀକୁ ଆନ୍ଦୋଳନ ବ୍ୟାପିଛି । ବିହାରରେ ଉତ୍ୟକ୍ତ ପ୍ରତିବାଦକାରୀ ବିଭିନ୍ନ ରେଳ ଷ୍ଟେସନରେ ଟ୍ରେନ୍ ଜାଳି ଦେବା ସହ ଏକ୍ସପ୍ରେସରେ ଝରକା କାଚକୁ ପିଟି ଭାଙ୍ଗି ପକାଇଛନ୍ତି ।

ସାରା ଦେଶରେ ‘ଅଗ୍ନିପଥ’ ଯୋଜନା ବିରୋଧରେ ଦେଶର ବହୁ ଅଞ୍ଚଳରେ ନିଆଁ ଜଳୁଥିବା ବେଳେ ଏହି ଯୋଜନାରେ ନିଯୁକ୍ତି ପ୍ରକ୍ରିୟା ଆରମ୍ଭ କରିବାକୁ ପ୍ରସ୍ତୁତ ହୋଇସାରିଛନ୍ତି ୩ ସେନା। ସରକାର ଅଗ୍ନିପଥ ସ୍କିମରେ ପୂର୍ବରୁ ଥିବା ବୟସ ସୀମାକୁ ବଢ଼ାଇ ୨୩ବର୍ଷ କରିଛନ୍ତି। ପୂର୍ବରୁ ବୟସ ସୀମା କେବଳ ୧୭-୨୧ବର୍ଷ ଥିଲା। ତେବେ ବୟସ ସୀମା ବଢ଼ାଇବା ସହ ଆସନ୍ତା ଦୁଇ ଦିନ ମଧ୍ୟରେ ଏଥିପାଇଁ ଏକ ବିଜ୍ଞପ୍ତି ଜାରି ହେବ ବୋଲି କହିଥିଲେ ସେନା ମୁଖ୍ୟ ଜେନେରାଲ ମନୋଜ ପାଣ୍ଡେ। ସ୍ଥଳ ସେନା ମୁଖ୍ୟ ଜେନେରାଲ ମନୋଜ ପାଣ୍ଡେ ଶୁକ୍ରବାର କହିଛନ୍ତି, ୨୦୨୨ରେ ଭର୍ତ୍ତି ପାଇଁ ବୟସକୁ ବଢାଇ ୨୩ ବର୍ଷ କରିବା ନେଇ ସରକାରଙ୍କ ନିଷ୍ପତ୍ତି ସହ ଅବଗତ ହୋଇଛି । ଏହି ନିଷ୍ପତ୍ତି ଆମ ଉର୍ଜାବାନ ଏବଂ ଦେଶଭକ୍ତ ଯୁବକଙ୍କୁ ସୁଯୋଗ ପ୍ରଦାନ କରିବ । ଯେଉଁମାନେ କରୋନା ମହାମାରୀ ସତ୍ତ୍ୱେ ରାଲିରେ ସାମିଲ ହେବା ପାଇଁ ପ୍ରସ୍ତୁତି କରୁଥିଲେ, କିନ୍ତୁ ଦୁଇ ବର୍ଷର କରୋନା କଟକଣା ଯୋଗୁଁ ପୂରଣ ହୋଇପାରି ନଥିଲା।

ସ୍ଥଳସେନା ମୁଖ୍ୟ ଜନେରାଲ ପାଣ୍ଡ କହିଛନ୍ତି, ଖୁବଶୀଘ୍ର ଭର୍ତ୍ତି ପ୍ରକ୍ରିୟା ଆରମ୍ଭ ହେବ। ଆସନ୍ତା ୨ ଦିନ ଭିତରେ https://joinindianarmy.nic.in/ ରେ ବିଜ୍ଞପ୍ତି ପ୍ରକାଶ କରାଯିବ। ଚଳିତ ଡିସେମ୍ୱରଠୁ ଅଗ୍ନିବୀରଙ୍କ ପ୍ରଥମ ବ୍ୟାଚର ପ୍ରଶିକ୍ଷଣ ଆରମ୍ଭ ହେବ। ଏହାସହ ଭାରତୀୟ ସେନାରେ ଅଗ୍ନିବୀର ଭାବେ ସାମିଲ ହେବାର ଏହି ସୁଯୋଗର ଲାଭ ଉଠାଇବାକୁ ଯୁବକଙ୍କୁ ସ୍ଥଳ ସେନା ମୁଖ୍ୟ ଆହ୍ୱାନ ଦେଇଛନ୍ତି।

ଅନ୍ୟପଟେ ଆସନ୍ତା ଶୁକ୍ରବାର ୨୪ତାରିଖ ଦିନ ବାୟୁସେନାରେ ଅଗ୍ନିବୀରକୁ ଭର୍ତି ପାଇଁ ପ୍ରକ୍ରିୟା ଆରମ୍ଭ ହେବ । ଏନେଇ ସୂଚନା ଦେଇଛନ୍ତି ବାୟୁସେନା ମୁଖ୍ୟ ଭି.ଆର. ଚୌଧୁରୀ । ଏହାସହ ଅଗ୍ନିପଥ ନିଯୁକ୍ତି ଯୋଜନାର ବୟସ ସୀମା ମଧ୍ୟ ବଢାଯାଇଥିବା ନେଇ ସୂଚନା ଦେଇଛନ୍ତି ଏୟାର ଚିଫ୍ ମାର୍ଶଲ। ବାୟୁସେନା ମୁଖ୍ୟ ଭିଆର ଚୌଧୁରୀ କହିଛନ୍ତି, ‘ଅଗ୍ନିପଥ’ ଯୋଜନାରେ ନିଯୁକ୍ତି ପାଇଁ ସର୍ବୋଚ୍ଚ ବୟସ ସୀମାକୁ ୨୩ ବର୍ଷ ପର୍ୟ୍ୟନ୍ତ ବଢ଼ାଇ ଦିଆଯାଇଛି। ଏହା ଯୁବପିଢ଼ିଙ୍କୁ ଫାଇଦା ଦେବ। ଭାରତୀୟ ବାୟୁସେନାର ନିଯୁକ୍ତି ପ୍ରକ୍ରିୟା ଜୁନ୍ ୨୪ ତାରିଖରୁ ଆରମ୍ଭ ହେବ।କୋଭିଡ୍ ଯୋଗୁ ଦୁଇ ବର୍ଷ ହେଲା ସ୍ଥଳ ସେନାର ନିଯୁକ୍ତି ପ୍ରକ୍ରିୟା ବନ୍ଦ ରହିଥିଲା। ୨୦୧୯-୨୦୨୦ରେ ସ୍ଥଳସେନା ପକ୍ଷରୁ ଯବାନମାନଙ୍କୁ ନିଯୁକ୍ତି ଦିଆଯାଇଥିଲା। ତା’ପରଠୁ ଆଉ କୌଣସି ନିଯୁକ୍ତି ହୋଇନାହିଁ। ଅନ୍ୟପକ୍ଷରେ ଭାରତୀୟ ନୌସେନା ଓ ବାୟୁସେନାରେ ଗତ ଦୁଇ ବର୍ଷରେ ନିଯୁକ୍ତି ହୋଇଥିଲା।

ସେହିପରି ସାରା ଦେଶରେ ଅଗ୍ନିପଥ ଯୋଜନାକୁ ନେଇ ବିରୋଧ ଭିତରେ ନୌସେନା ମୁଖ୍ୟ ଆଡମିରାଲ ହରି କୁମାରଙ୍କ ବଡ ବୟାନ ସାମ୍ନାକୁ ଆସିଛି।ନୌସେନା ମୁଖ୍ୟ କହିଛନ୍ତି, ମୋତେ ଏହି ଧରଣର ବିରୋଧ ପ୍ରଦର୍ଶନର ଆଶା ନଥିଲା। ଆମେ ପ୍ରାୟ ଦେଢ ବର୍ଷ ପର୍ଯ୍ୟନ୍ତ ଅଗ୍ନିପଥ ଯୋଜନା ଉପରେ କାମ କରିଛୁ। ଏହି ଯୋଜନାକୁ ପରିବର୍ତ୍ତନକାରୀ ଦର୍ଶାଇ ଆଡମିରାଲ କୁମାର କହିଛନ୍ତି, ଏହା ଭାରତରେ ନିର୍ମିତ ଏବଂ ଭାରତ ପାଇଁ ହିଁ କରାଯାଇଛି। ମୁଁ ଲୋକଙ୍କୁ କହିବାକୁ ଚାହୁଁଛି ଯେ, ଏହାର ବିରୋଧ କରନ୍ତୁ ନାହିଁ ଏବଂ ହିଂସାତ୍ମକ ହୁଅନ୍ତୁ ନାହିଁ। ଏହି ଯୋଜନାକୁ ବୁଝିବା ଉଚିତ୍ ଏବଂ ଶାନ୍ତି ବଜାୟ ରଖିବା ଉଚିତ୍। ଯୁବ ପିଢିଙ୍କ ପାଇଁ ଦେଶର ସେବା ପାଇଁ ଏହା ଏକ ସୁବର୍ଣ୍ଣ ସୁଯୋଗ।