ଅଗଷ୍ଟ ୧୫ ତାରିଖରେ ଡିସକଭରି ଇଣ୍ଡିଆରେ ପ୍ରସାରିତ ହୋଇଥିବା 'ଡିକ୍ଲାସିଫାଏଡ୍: ଅପରେସନ୍ ସିନ୍ଦୂର' (Declassified: Operation Sindoor) ଡକ୍ୟୁମେଣ୍ଟାରୀ ପରେ ଭାରତ ଓ ପାକିସ୍ତାନ ମଧ୍ୟରେ ପୁଣି ଥରେ ବୟାନବାଜି ତେଜିଛି। ଗତ ବର୍ଷ ଭାରତୀୟ ସେନା ପାକିସ୍ତାନ ଭିତରେ ପଶି କିପରି ଆତଙ୍କବାଦୀଙ୍କୁ ନିପାତ କରିଥିଲା, ତାହାର ସମ୍ପୂର୍ଣ୍ଣ ସତ ଏହି ଡକ୍ୟୁମେଣ୍ଟାରୀ ମାଧ୍ୟମରେ ସାମ୍ନାକୁ ଆସିଛି। ଏହି ସତ ସାମ୍ନାକୁ ଆସିବା ପରେ ପାକିସ୍ତାନ ସେନାର ମିଡିଆ ୱିଙ୍ଗ ଆଇଏସପିଆର (ISPR) ଏକ ଲମ୍ବା ବୟାନ ଜାରି କରି ନିଜର ବିଫଳତାକୁ ଲୁଚାଇବା ପାଇଁ ପ୍ରୟାସ କରିଛି।

'ଅପରେସନ୍ ସିନ୍ଦୂର' କ'ଣ ଥିଲା?

୨୨ ଏପ୍ରିଲ ୨୦୨୫ ରେ କାଶ୍ମୀରର ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣରେ ୨୬ ଜଣ ନିରୀହ ଲୋକ ପ୍ରାଣ ହରାଇଥିଲେ। ଏହାର କଡ଼ା ଜବାବ ଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିର୍ଦ୍ଦେଶରେ ଭାରତୀୟ ସେନା ୭ ମେ ୨୦୨୫ ରେ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀର (PoK) ରେ ଆତଙ୍କବାଦୀଙ୍କ ଠିକଣା ଉପରେ ଏୟାର ଷ୍ଟ୍ରାଇକ୍ କରିଥିଲା। ଜୈଶ-ଏ-ମହମ୍ମଦ ଏବଂ ଲସ୍କର-ଏ-ତୈୟବାର ୯ଟି ଠିକଣା ଉପରେ ଏକକାଳୀନ ଆକ୍ରମଣ କରାଯାଇଥିଲା। ପ୍ରାୟ ୮୮ ଘଣ୍ଟା ଧରି ଚାଲିଥିବା ଏହି ସାମରିକ ଅପରେସନକୁ 'ଅପରେସନ୍ ସିନ୍ଦୂର' ନାମ ଦିଆଯାଇଥିଲା।

ଦିଲ୍ଲୀ ଉପରେ କ୍ଷେପଣାସ୍ତ୍ର ଆକ୍ରମଣ ଉଦ୍ୟମ

ଡକ୍ୟୁମେଣ୍ଟାରୀରେ କୁହାଯାଇଛି ଯେ, ଅପରେସନ୍ ସିନ୍ଦୂର ବେଳେ ପାକିସ୍ତାନ ଏତେ ଭୟଭୀତ ହୋଇଯାଇଥିଲା ଯେ, ସେ ଦିଲ୍ଲୀ ଉପରେ ଏକ ହାଇ-ସ୍ପିଡ୍ ମିସାଇଲ୍ ଆକ୍ରମଣ କରିବାକୁ ପ୍ରୟାସ କରିଥିଲା। ତେବେ ଭାରତୀୟ ସୁରକ୍ଷା ବ୍ୟବସ୍ଥା ଏହାକୁ ହରିୟାଣାର ସିର୍ସା ନିକଟରେ ହିଁ ଆକାଶରେ ମଝି ବାଟରେ ନଷ୍ଟ କରିଦେଇଥିଲା।

DGMO ସ୍ତରରେ ପାକିସ୍ତାନର ଗୁହାରି

କ୍ରମାଗତ ବ୍ରହ୍ମୋସ୍ କ୍ଷେପଣାସ୍ତ୍ର ମାଡ଼ ଯୋଗୁଁ ପାକିସ୍ତାନର ଅଣ୍ଟା ଭାଙ୍ଗିଯାଇଥିଲା। ପରିସ୍ଥିତି ଏପରି ହୋଇଥିଲା ଯେ, ୧୦ ମେ ସନ୍ଧ୍ୟାରେ ପାକିସ୍ତାନର ଡିଜିଏମଓ (DGMO) ଭାରତର ଡିଜିଏମଓଙ୍କୁ ଫୋନ୍ କରି ଯୁଦ୍ଧବିରତି ପାଇଁ ଗୁହାରି କରିଥିଲେ। ସେ କହିଥିଲେ, 'ସାର୍, ଆପଣମାନେ ଅନେକ ବ୍ରହ୍ମୋସ୍ ହିଟ୍ କରିସାରିଲେଣି, ଏବେ ତ ବନ୍ଦ କରନ୍ତୁ।' ଏହା ପରେ ଯାଇ ୮୮ ଘଣ୍ଟାର ଏହି ଯୁଦ୍ଧବିରାମ ହୋଇଥିଲା।

ପାକିସ୍ତାନର ପ୍ରତିକ୍ରିୟା ଏବଂ ଡୋଭାଲ୍‌ଙ୍କ ବୟାନ

ପାକିସ୍ତାନ ଏବେ ଏହି ଡକ୍ୟୁମେଣ୍ଟାରୀକୁ ଖଣ୍ଡନ କରି କହିଛି ଯେ ଭାରତ ଇତିହାସକୁ ବଦଳାଇବାକୁ ଚେଷ୍ଟା କରୁଛି। କିନ୍ତୁ ଏହି ୨-ଭାଗ ବିଶିଷ୍ଟ ସିରିଜରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ, ପୂର୍ବତନ ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ଏବଂ ଅନ୍ୟାନ୍ୟ ବରିଷ୍ଠ ସାମରିକ ଅଧିକାରୀମାନେ ଅପରେସନର ନିଖୁଣ ବର୍ଣ୍ଣନା କରିଛନ୍ତି, ଯାହା ପାକିସ୍ତାନର ମିଛକୁ ପଦାରେ ପକାଇଦେଇଛି।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଫେସବୁକ୍ ରିଲ୍ ଅସ୍ଥାୟୀ ଭାବେ ହଟାଯିବା ଘଟଣାକୁ ନେଇ ବିବାଦ ତେଜିବାରେ ଲାଗିଛି। ଏହି ପ୍ରସଙ୍ଗରେ ୩ ଦିନ ମଧ୍ୟରେ କ୍ଷମା ପ୍ରାର୍ଥନା କରିବାକୁ ସଂସଦୀୟ ସ୍ଥାୟୀ କମିଟି ମେଟା ସିଇଓ ମାର୍କ ଜୁକରବର୍ଗଙ୍କୁ କଡ଼ା ଚେତାବନୀ ଦେଇଛି। ଏହା ସହିତ ଭାରତରେ ସୋସିଆଲ ମିଡିଆ ପ୍ଲାଟଫର୍ମଗୁଡ଼ିକର କଣ୍ଟେଣ୍ଟ ମଡେରେସନ ନୀତିକୁ ନେଇ ମଧ୍ୟ କମିଟି ପ୍ରଶ୍ନ ଉଠାଇଛି।

ଯୁବବର୍ଗଙ୍କ ସମସ୍ୟା ଓ ପରୀକ୍ଷା ପ୍ରଶ୍ନପତ୍ର ଲିକ୍ ସଂସ୍କାର ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କ ଏକ ଭିଡିଓ ବାର୍ତ୍ତାକୁ ଫେସବୁକରୁ ଅଳ୍ପ ସମୟ ପାଇଁ ହଟାଇ ଦିଆଯାଇଥିଲା। ପରବର୍ତ୍ତୀ ସମୟରେ ଏହା ଏକ ତ୍ରୁଟି ଯୋଗୁଁ ହୋଇଛି ବୋଲି ମେଟା ସ୍ପଷ୍ଟୀକରଣ ଦେବା ସହ ଭିଡିଓକୁ ପୁନଃସ୍ଥାପିତ କରିଥିଲା। ତେବେ ସଂସଦୀୟ କମିଟିର ଅଧ୍ୟକ୍ଷ ନିଶିକାନ୍ତ ଦୁବେ କହିଛନ୍ତି ଯେ, ଏହି ଘଟଣା ପାଇଁ ମାର୍କ ଜୁକରବର୍ଗ କ୍ଷମା ମାଗିବା ଉଚିତ। ଯଦି ସମସ୍ୟାର ସମାଧାନ ନହୁଏ, ତେବେ ସୂଚନା ପ୍ରଯୁକ୍ତିବିଦ୍ୟା ଆଇନର ଧାରା ୭୯ ଅଧୀନରେ ମେଟାକୁ ମିଳିଥିବା ସୁରକ୍ଷା ବା "ସେଫ୍ ହାର୍ବର" ପ୍ରଭାବିତ ହୋଇପାରେ। ଅନ୍ୟପକ୍ଷରେ ନିବେଶକଙ୍କୁ ଆର୍ଥିକ କ୍ଷତି ପହଞ୍ଚାଉଥିବା ଜାଲିଆତି ଆପ୍ଲିକେସନ୍ ପ୍ରସଙ୍ଗରେ ଗୁଗଲ ଇଣ୍ଡିଆ ମୁଖ୍ୟଙ୍କ ବିରୋଧରେ ମଧ୍ୟ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ୟାନେଲ୍ ଦାବି କରିଛି।

ଏହି ବିବାଦ ମଧ୍ୟରେ ଅଗଷ୍ଟ ୫ ଓ ୬ ତାରିଖରେ ମେଟାର ଗ୍ଲୋବାଲ୍ ପ୍ରତିନିଧିମାନେ ଭାରତ ସରକାରଙ୍କ ସହ ଆଲୋଚନା ପାଇଁ ନୂଆଦିଲ୍ଲୀ ଆସୁଛନ୍ତି। ଆଇଟି ସଚିବ ଏସ୍. କ୍ରିଷ୍ଣନ୍ଙ୍କ ସୂଚନାନୁସାରେ, ସରକାର ମେଟା ସମ୍ମୁଖରେ ଏକାଧିକ ପ୍ରସଙ୍ଗ ଉଠାଇବାକୁ ଯୋଜନା କରିଛନ୍ତି। ଏଥିରେ ପ୍ରଧାନମନ୍ତ୍ରୀଙ୍କ ଫେସବୁକ୍ ରିଲ୍ ହଟାଇବା, ଶିଶୁ ଯୌନ ଶୋଷଣ କଣ୍ଟେଣ୍ଟ (CSAM) ରୋକିବା ପାଇଁ ପଦକ୍ଷେପ ଏବଂ ପ୍ରମୁଖ ୟୁଜର ଆକାଉଣ୍ଟଗୁଡ଼ିକର ପରିଚାଳନା ଆଦି ସାମିଲ ରହିଛି। ଅଧିକାରୀମାନେ କହିଛନ୍ତି ଯେ, ସରକାର ଏଭଳି ଘଟଣାର ପ୍ରକୃତ କାରଣ ଜାଣିବାକୁ ଚାହୁଁଛନ୍ତି।

ପ୍ରଶ୍ନପତ୍ର ଲିକ୍ ଅଭିଯୋଗ ଏବଂ ତତ୍କାଳୀନ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ହୋଇଥିବା ବିକ୍ଷୋଭ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶର ଯୁବକମାନଙ୍କୁ ସମ୍ବୋଧିତ କରି ଏକ ଭିଡିଓ ପୋଷ୍ଟ କରିଥିଲେ। ତେବେ ଏହି ଭିଡିଓକୁ ମେଟା ହଟାଇବା ପରେ ବିଜେପି ନେତାମାନେ ତୀବ୍ର ସମାଲୋଚନା କରିବା ସହ କମ୍ପାନୀ ନିକଟରୁ କ୍ଷମା ପ୍ରାର୍ଥନା ଦାବି କରିଥିଲେ। ସଂସଦୀୟ କମିଟି ବୈଠକରେ ଉପସ୍ଥିତ ଥିବା ବିରୋଧୀ ଦଳର କିଛି ସଦସ୍ୟ ଏହି ପ୍ରସଙ୍ଗକୁ ଇଣ୍ଟରମିଡିଆରୀ ସୁରକ୍ଷା ସହ ଯୋଡ଼ିବାକୁ ବିରୋଧ କରିଥିଲେ ଏବଂ ସେନ୍ସରସିପ୍ ପରିବର୍ତ୍ତେ ପ୍ରଯୁକ୍ତିବିଦ୍ୟା ନିୟନ୍ତ୍ରଣ ଉପରେ ଧ୍ୟାନ ଦେବାକୁ ପରାମର୍ଶ ଦେଇଥିଲେ। ଆଇଟି ଆଇନର ଧାରା ୭୯ ଅନୁଯାୟୀ ସୋସିଆଲ୍ ମିଡିଆ ପ୍ଲାଟଫର୍ମଗୁଡ଼ିକୁ ତୃତୀୟ ପକ୍ଷର କଣ୍ଟେଣ୍ଟ ପାଇଁ ଦାୟୀ ନହେବାର ନ୍ୟାୟିକ ସୁରକ୍ଷା ମିଳିଥାଏ, ଯାହାକି ଏହି ଘଟଣା ପରେ ସଙ୍କଟରେ ପଡ଼ିପାରେ।

ନିକଟରେ ଦିଲ୍ଲୀର ଜନ୍ତରମନ୍ତର ଠାରେ ହୋଇଥିବା ବିକ୍ଷୋଭ ପ୍ରଦର୍ଶନ ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ତାଙ୍କ ସ୍ୱର୍ଗତ ମାଆଙ୍କ ଉଦ୍ଦେଶ୍ୟରେ ଅଶାଳୀନ ମନ୍ତବ୍ୟ ଦେଇଥିବା ଛାତ୍ରଛାତ୍ରୀଙ୍କୁ ପ୍ରଧାନମନ୍ତ୍ରୀ କ୍ଷମା କରିଦେଇଛନ୍ତି। ଶୁକ୍ରବାର ଦିନ ସୋସିଆଲ୍ ମିଡିଆରେ ଏକ ଭିଡିଓ ବାର୍ତ୍ତା ଜାରି କରି ସେ କହିଛନ୍ତି ଯେ କିଛି ପ୍ରଦର୍ଶନକାରୀ ଯେଉଁ ଭାଷା ବ୍ୟବହାର କରିଛନ୍ତି ତାହା କୌଣସି ସଭ୍ୟ ସମାଜ ପାଇଁ ଗ୍ରହଣୀୟ ନୁହେଁ। ତେବେ ଏହି ଛାତ୍ରଛାତ୍ରୀମାନେ ପଥଭ୍ରଷ୍ଟ ବା ଭୁଲ ବାଟରେ ଯାଇଥିବା ପିଲା, ତେଣୁ ସେମାନଙ୍କୁ କୋର୍ଟ କଚେରୀ କିମ୍ବା ଆଇନଗତ କାର୍ଯ୍ୟାନୁଷ୍ଠାନରେ ଛନ୍ଦିବା ପରିବର୍ତ୍ତେ ସେମାନଙ୍କୁ ସଠିକ୍ ମାର୍ଗଦର୍ଶନ କରିବା ଆମର କର୍ତ୍ତବ୍ୟ।

ଦାନ୍ତ କାମୁଡ଼ି ହୋଇଗଲେ କ'ଣ ଦାନ୍ତ ଭାଙ୍ଗିଦେବା?

ଭିଡିଓରେ ସମାଜକୁ ଏକ ଉଦାହରଣ ଦେଇ ପ୍ରଧାନମନ୍ତ୍ରୀ କହିଛନ୍ତି, "ବେଳେବେଳେ ଆମ ଦାନ୍ତ ତଳେ ଜିଭ ଚାପି ହୋଇ ରକ୍ତ ବାହାରି ଆସେ, କିନ୍ତୁ ସେଥିପାଇଁ ଆମେ ଆମ ଦାନ୍ତ ଭାଙ୍ଗିଦେଉନାହୁଁ। କାରଣ ଦାନ୍ତ ମଧ୍ୟ ଆମର ଏବଂ ଜିଭ ମଧ୍ୟ ଆମର। ଠିକ୍ ସେହିପରି ଏହି ପିଲାମାନେ ମଧ୍ୟ ଆମର।" ଯୁବତୀମାନେ ବ୍ୟବହାର କରିଥିବା ଅପଶବ୍ଦକୁ ନେଇ ଲୋକଙ୍କ ରାଗ ସ୍ୱାଭାବିକ, କିନ୍ତୁ ସେମାନଙ୍କୁ ସଜାଡ଼ିବା ପ୍ରତି ଧ୍ୟାନ ଦେବା ଉଚିତ୍ ବୋଲି ସେ ଦେଶବାସୀଙ୍କୁ ନିବେଦନ କରିଛନ୍ତି।

ଆସନ୍ତୁ ଦେଶ ଗଠନରେ ସାମିଲ ହେବା

ଏହି ଘଟଣାରୁ ଆଗକୁ ବଢ଼ିବା ପାଇଁ ଆହ୍ୱାନ ଦେଇ ମୋଦୀ ଛାତ୍ରଛାତ୍ରୀମାନଙ୍କୁ ରାଷ୍ଟ୍ର ଗଠନରେ ସାମିଲ ହେବାକୁ ନିମନ୍ତ୍ରଣ କରିଛନ୍ତି। ସେ କହିଛନ୍ତି, "ପିଲାମାନେ ଆସ, ଆମେ ଏକାଠି ଦେଶ ପାଇଁ ଆଗକୁ ବଢ଼ିବା। ନୂଆ କିଛି ଶିଖିବା, ନିଜ ଭୁଲରୁ ମଧ୍ୟ ଶିଖିବା... ମୁଁ ତୁମମାନଙ୍କ ପାଇଁ ବଞ୍ଚୁଛି, ତୁମର ଉଜ୍ଜ୍ୱଳ ଭବିଷ୍ୟତ ପାଇଁ ପରିଶ୍ରମ କରୁଛି।" ଉଲ୍ଲେଖଯୋଗ୍ୟ ଯେ, ଜନ୍ତରମନ୍ତର ପ୍ରଦର୍ଶନ ସମୟରେ ଜଣେ ମହିଳା ପ୍ରଧାନମନ୍ତ୍ରୀଙ୍କ ବିରୋଧରେ ଅପଶବ୍ଦ ବ୍ୟବହାର କରୁଥିବାର ଭିଡିଓ ଭାଇରାଲ ହେବା ପରେ ଏକ ଜିରୋ ଏଫ୍ଆଇଆର୍ (Zero FIR) ରୁଜୁ ହୋଇଥିଲା। ଏହି ପରିପ୍ରେକ୍ଷୀରେ ପ୍ରଧାନମନ୍ତ୍ରୀଙ୍କ ଏହି ସକାରାତ୍ମକ ବାର୍ତ୍ତା ସାମ୍ନାକୁ ଆସିଛି।

Abuses never solve anything.

Let’s guide the misguided.

Let’s work together.

Let’s work for Bharat. pic.twitter.com/yAePG60KYL

— Narendra Modi (@narendramodi) July 31, 2026

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କମନୱେଲଥ୍ ଗେମ୍ସରେ ଐତିହାସିକ ସ୍ୱର୍ଣ୍ଣ ପଦକ ଜିତିଥିବା ଶର୍ମିଳା ଧନଖଡ଼ଙ୍କୁ ଉଚ୍ଚ ପ୍ରଶଂସା କରିବା ସହ ତାଙ୍କର ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି। ଏହି ବିଜୟ ସହ ଭାରତ କ୍ରୀଡ଼ା କ୍ଷେତ୍ରରେ ଏକ ନୂତନ ମାଇଲଖୁଣ୍ଟ ସ୍ଥାପନ କରିଛି।

ସ୍କଟଲାଣ୍ଡର ଗ୍ଲାସଗୋଠାରେ ଅନୁଷ୍ଠିତ ମହିଳା ସଟ୍ ପୁଟ୍ F57 ଇଭେଣ୍ଟରେ ଶର୍ମିଳା ୯.୮୧ ମିଟର ଦୂରତା ଅତିକ୍ରମ କରି ସ୍ୱର୍ଣ୍ଣ ପଦକ ଜିତିଛନ୍ତି। ଏହାସହ ସେ ଭାରତର ପ୍ରଥମ କମନୱେଲଥ୍ ଗେମ୍ସ ପାରା-ଆଥଲେଟିକ୍ସ ସ୍ୱର୍ଣ୍ଣ ପଦକ ବିଜେତା ହେବାର ଗୌରବ ଅର୍ଜନ କରିଛନ୍ତି। ଏହି ବିଜୟ ସହ ଗେମ୍ସରେ ପାରା-ଆଥଲେଟିକ୍ସ ପଦକ ପାଇଁ ଭାରତର ୨୦ ବର୍ଷର ଅପେକ୍ଷାର ଅନ୍ତ ଘଟିଛି। ପ୍ରଧାନମନ୍ତ୍ରୀ ଏକ୍ସ (X) ରେ ପୋଷ୍ଟ କରି ଲେଖିଛନ୍ତି ଯେ, ଏହି ଚମତ୍କାର ପ୍ରଦର୍ଶନ ଦୁଇ ଦଶନ୍ଧି ଧରି ଲାଗିରହିଥିବା ଅପେକ୍ଷାର ଅନ୍ତ ଘଟାଇଛି।

ଏହି ସମାନ ଇଭେଣ୍ଟରେ ସଟ୍ ପୁଟର୍ ଶିଳ୍ପା ଶାଏଲା ଏକ ନାଟକୀୟ ଢଙ୍ଗରେ ବ୍ରୋଞ୍ଜ ପଦକ ହାସଲ କରିଛନ୍ତି। ମ୍ୟାଚ୍ ପରବର୍ତ୍ତୀ ପ୍ରତିବାଦ ଏବଂ ସମୀକ୍ଷା ପରେ ନାଇଜେରିଆର ୟୁଚେରିଆ ଇୟିଆଜିଙ୍କୁ ଅଯୋଗ୍ୟ ଘୋଷଣା କରାଯାଇଥିଲା। ଫଳରେ ଶିଳ୍ପା ନିଜର ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ ୭.୨୬ ମିଟର ସହ ଏହି ପଦକ ନିଜ ନାମରେ କରିଥିଲେ। ଶର୍ମିଳାଙ୍କ ସ୍ୱର୍ଣ୍ଣ ପରେ ଶିଳ୍ପାଙ୍କ ଏହି ବିଜୟ ଦେଶ ପାଇଁ ଏକ ଐତିହାସିକ ସଫଳତା ଏବଂ ଏହା ପ୍ରଥମ ଥର ପାଇଁ କମନୱେଲଥ୍ ଗେମ୍ସରେ ଭାରତକୁ ଏକ ଡବଲ ପୋଡିୟମ ଫିନିସ ଦେଇଛି।

ପୁରୁଷ ହାଇ ଜମ୍ପରେ ରୌପ୍ୟ ଜିତିଥିବା ସର୍ବେଶ କୁଶାରେଙ୍କୁ ମଧ୍ୟ ପ୍ରଧାନମନ୍ତ୍ରୀ ମୋଦୀ ପ୍ରଶଂସା କରିଛନ୍ତି। ସର୍ବେଶ ୨.୨୫ ମିଟର ଡେଇଁ ଏହି ସଫଳତା ପାଇଛନ୍ତି। ସେହିପରି ଭାରୋତ୍ତୋଳନରେ ମଧ୍ୟ ଭାରତକୁ ବଡ଼ ସଫଳତା ମିଳିଛି। ମହିଳା ୫୩ କିଲୋଗ୍ରାମ ଫାଇନାଲରେ ଜ୍ଞାନେଶ୍ୱରୀ ଯାଦବ ରୌପ୍ୟ ପଦକ ଜିତିଥିବା ବେଳେ ବିନ୍ଦ୍ୟାରାଣୀ ଦେବୀ ଏବଂ ଭଲ୍ଲୁରୀ ଅଜୟ ବାବୁ ଯଥାକ୍ରମେ ମହିଳା ୫୮ କିଲୋଗ୍ରାମ ଓ ପୁରୁଷ ୭୯ କିଲୋଗ୍ରାମ ବିଭାଗରେ ବ୍ରୋଞ୍ଜ ଓ ରୌପ୍ୟ ପଦକ ହାସଲ କରିଛନ୍ତି। ବିଶେଷକରି ସ୍ନାଚ୍ ଇଭେଣ୍ଟରେ ନୂଆ ରେକର୍ଡ ସୃଷ୍ଟି କରିଥିବା ଅଜୟ ବାବୁଙ୍କୁ ପ୍ରଧାନମନ୍ତ୍ରୀ ସ୍ୱତନ୍ତ୍ର ଶୁଭେଚ୍ଛା ଜଣାଇଛନ୍ତି।

ବିକ୍ରମ-୧ ରକେଟର ଐତିହାସିକ ସଫଳତା ପରେ ଭାରତର ପ୍ରଥମ ଘରୋଇ ମହାକାଶ କମ୍ପାନୀ ସ୍କାଇରୁଟ୍ ଏରୋସ୍ପେସ୍ ର ପ୍ରତିଷ୍ଠାତାମାନଙ୍କୁ ସୋମବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାକ୍ଷାତ କରିଛନ୍ତି। ଏହି ସାକ୍ଷାତକାରରେ ପ୍ରଧାନମନ୍ତ୍ରୀ ଉଭୟ ପ୍ରତିଷ୍ଠାତା ପବନ ଚନ୍ଦନା ଏବଂ ନାଗା ଭରତ ଡାକାଙ୍କୁ ଅଭିନନ୍ଦନ ଜଣାଇବା ସହ ଦେଶର ଘରୋଇ ମହାକାଶ କ୍ଷେତ୍ରର ଉଜ୍ଜ୍ୱଳ ଭବିଷ୍ୟତ ନେଇ ଆଲୋଚନା କରିଛନ୍ତି।

ମୋଦୀଙ୍କ ଏକ୍ସ (X) ପୋଷ୍ଟ ଓ ଆଲୋଚନା

ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସ (X) ରେ ଏହି ସାକ୍ଷାତକାରର ଫଟୋ ସେୟାର କରି ପ୍ରଧାନମନ୍ତ୍ରୀ ମୋଦୀ ଲେଖିଛନ୍ତି ଯେ, 'ସ୍କାଇରୁଟ୍ ଏରୋସ୍ପେସର ପବନ ଚନ୍ଦନା ଏବଂ ନାଗା ଭରତ ଡାକାଙ୍କ ସହ ଏକ ଚମତ୍କାର ଆଲୋଚନା ହେଲା। ଆମ ଆଲୋଚନାରେ ସ୍ୱାଭାବିକ ଭାବରେ ବିକ୍ରମ-୧ ର ସଫଳତା ପ୍ରମୁଖ ସ୍ଥାନ ଗ୍ରହଣ କରିଥିଲା।' ସେ ଆହୁରି ମଧ୍ୟ କହିଛନ୍ତି ଯେ ସେମାନଙ୍କର ଉତ୍ସାହ, ମହତ୍ୱାକାଂକ୍ଷା ଏବଂ ସକାରାତ୍ମକତା ଭାରତର ଘରୋଇ ମହାକାଶ ଇକୋସିଷ୍ଟମର ଜୀବନ୍ତ ଭାବନାକୁ ଦର୍ଶାଉଛି।

ସ୍କାଇରୁଟ୍ ଏରୋସ୍ପେସର ପ୍ରତିକ୍ରିୟା

ପ୍ରଧାନମନ୍ତ୍ରୀଙ୍କୁ ଭେଟିବା ପରେ ସ୍କାଇରୁଟ୍ ଏରୋସ୍ପେସ୍ ନିଜର ଆନନ୍ଦ ପ୍ରକାଶ କରିଛି। କମ୍ପାନୀ ପକ୍ଷରୁ କୁହାଯାଇଛି ଯେ ପ୍ରଧାନମନ୍ତ୍ରୀଙ୍କ ସହ କମ୍ପାନୀର ଯାତ୍ରା, ବିକ୍ରମ-୧ ର ସଫଳତା ଏବଂ ଭାରତର ମହାକାଶ କ୍ଷେତ୍ର ପାଇଁ ଦୀର୍ଘକାଳୀନ ଲକ୍ଷ୍ୟ ସେୟାର କରିବା ସେମାନଙ୍କ ପାଇଁ ଏକ ଗର୍ବର ବିଷୟ। ଏହାବ୍ୟତୀତ, କମ୍ପାନୀ ଘରୋଇ ଅଂଶଗ୍ରହଣ ପାଇଁ ଦେଶର ମହାକାଶ କ୍ଷେତ୍ରକୁ ଉନ୍ମୁକ୍ତ କରିଥିବା ସରକାରୀ ସଂସ୍କାରକୁ ଶ୍ରେୟ ଦେଇଥିଲା। ଏହି ସଫଳତା ପାଇଁ ସେମାନେ ଉଭୟ ଇନ-ସ୍ପେସ୍ (IN-SPACe) ଏବଂ ଇସ୍ରୋ (ISRO) କୁ ସେମାନଙ୍କର ସୁବିଧା ଏବଂ ମାର୍ଗଦର୍ଶନ ପାଇଁ ଧନ୍ୟବାଦ ଅର୍ପଣ କରିଛନ୍ତି।

ବିକ୍ରମ-୧ ରକେଟର ଐତିହାସିକ ସଫଳତା

ସୂଚନାଯୋଗ୍ୟ ଯେ, ଗତ ଜୁଲାଇ ୧୮ ତାରିଖରେ ସ୍କାଇରୁଟ୍ ଏରୋସ୍ପେସ୍ ନିଜର ପ୍ରଥମ ଅର୍ବିଟାଲ୍-ଶ୍ରେଣୀର ରକେଟ୍ ବିକ୍ରମ-୧ କୁ ଶ୍ରୀହରିକୋଟାରୁ ସଫଳତାର ସହ ଉତକ୍ଷେପଣ କରିଥିଲା। ଏହି ମିଶନର ନାମ ଥିଲା 'ମିଶନ ଆଗମନ'। ଏହି ଐତିହାସିକ ଉଡ଼ାଣରେ ରକେଟ୍ ଅନେକ ପେଲୋଡ୍ ମହାକାଶକୁ ନେଇଥିଲା, ଯେଉଁଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଲିଖିତ ଏକ ସ୍ୱତନ୍ତ୍ର ପୋଷ୍ଟକାର୍ଡ ମଧ୍ୟ ସାମିଲ ଥିଲା। ସେହି ପୋଷ୍ଟକାର୍ଡରେ 'ବନ୍ଦେ ମାତରମ୍' ଉଲ୍ଲେଖ ଥିଲା। ଏହା ଭାରତୀୟ ମହାକାଶ ଗବେଷଣା ଇତିହାସରେ ଏକ ନୂତନ ଅଧ୍ୟାୟ ସୃଷ୍ଟି କରିଛି।

ଇ୨୦ (E20) ଇଥାନଲ ମିଶ୍ରିତ ପେଟ୍ରୋଲକୁ ବାଧ୍ୟତାମୂଳକ କରିବା କେନ୍ଦ୍ର ସରକାରଙ୍କ ନିଷ୍ପତ୍ତିକୁ ବିରୋଧ କରି ଆମ ଆଦମୀ ପାର୍ଟି (ଆପ୍) ଏକ ବଡ଼ ଆନ୍ଦୋଳନର ପ୍ରସ୍ତୁତି କରୁଛି। ଏହି ପ୍ରସଙ୍ଗରେ ଆସନ୍ତା ଅଗଷ୍ଟ ୧ ତାରିଖ (ଶନିବାର) ନୂଆଦିଲ୍ଲୀ ସ୍ଥିତ କନଷ୍ଟିଚ୍ୟୁସନ୍ କ୍ଲବ୍ ଠାରେ ଦଳ ପକ୍ଷରୁ ଏକ 'ନ୍ୟାସନାଲ ଟାଉନ୍ ହଲ୍ ଆଗେନଷ୍ଟ ଇ୨୦' ର ଆୟୋଜନ କରାଯିବ ବୋଲି ଆପ୍‌ର ରାଷ୍ଟ୍ରୀୟ ଆବାହକ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି।

ପ୍ରଧାନମନ୍ତ୍ରୀଙ୍କ ବାସଭବନକୁ ଯିବ ଆପ୍

ଏକ ସାମ୍ବାଦିକ ସମ୍ମିଳନୀରେ ଶ୍ରୀ କେଜ୍ରିୱାଲ କହିଛନ୍ତି ଯେ, କେନ୍ଦ୍ର ସରକାର ଯଦି ଏହି ନିଷ୍ପତ୍ତି ପ୍ରତ୍ୟାହାର ନ କରନ୍ତି ତେବେ ଆଗାମୀ ଦିନରେ ଏହା ଏକ ବିରାଟ ଜନଆନ୍ଦୋଳନର ରୂପ ନେବ। ଆସନ୍ତା ସପ୍ତାହରେ ସେ ଏକ ଦାବିପତ୍ର ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବାସଭବନକୁ ଯିବେ ବୋଲି ସ୍ପଷ୍ଟ କରିଛନ୍ତି। ସେ କହିଛନ୍ତି, "ଯେତେବେଳେ ଦେଶର ଯୁବବର୍ଗ ଏକାଠି ହୋଇ ସ୍ୱର ଉତ୍ତୋଳନ କଲେ, ସେତେବେଳେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଇସ୍ତଫା ଦେବାକୁ ପଡ଼ିଥିଲା। ଠିକ୍ ସେହିପରି ଇ୨୦ ବିରୋଧରେ ମଧ୍ୟ ଆମକୁ ଏକାଠି ହୋଇ ସ୍ୱର ଉଠାଇବାକୁ ପଡ଼ିବ।"

ଇଥାନଲ ମିଶ୍ରିତ ପେଟ୍ରୋଲକୁ ନେଇ କ'ଣ ରହିଛି ସମସ୍ୟା?

ପୁରୁଣା ଯାନଗୁଡ଼ିକରେ ଇ୨୦ ପେଟ୍ରୋଲ ବ୍ୟବହାର କରିବା ଦ୍ୱାରା ମାଇଲେଜ୍ କମିବା ସହିତ ଇଞ୍ଜିନ ଶୀଘ୍ର ଖରାପ ହୋଇଯାଉଥିବା ଲୋକେ ଅଭିଯୋଗ କରୁଛନ୍ତି। ଆପ୍ ଦାବି କରିଛି ଯେ ପେଟ୍ରୋଲ ପମ୍ପଗୁଡ଼ିକରେ ଗ୍ରାହକମାନଙ୍କୁ ବିକଳ୍ପ ଭାବେ ଶୁଦ୍ଧ ପେଟ୍ରୋଲ, E10 ଏବଂ E20 ବାଛିବାର ସୁଯୋଗ ମିଳିବା ଉଚିତ। ଏଥିସହ ଇ୨୦ ତୈଳର ମାଇଲେଜ୍ କମ୍ ଥିବାରୁ ଏହାର ଦର ସାଧାରଣ ପେଟ୍ରୋଲ ତୁଳନାରେ କମ୍ ହେବା ଦରକାର।

ଟାଉନ୍ ହଲ୍‌ରେ ସାମିଲ ହେବାକୁ ଆହ୍ୱାନ

ଏହି ଟାଉନ୍ ହଲ୍ ବୈଠକରେ ବିଶେଷଜ୍ଞ ଏବଂ ଇ୨୦ ପେଟ୍ରୋଲ ଯୋଗୁଁ ନିଜ ଗାଡ଼ିରେ ସମସ୍ୟାର ସମ୍ମୁଖୀନ ହୋଇଥିବା ସାଧାରଣ ଲୋକଙ୍କୁ ଆମନ୍ତ୍ରିତ କରାଯାଇଛି। କେଜ୍ରିୱାଲ ଦେଶବାସୀଙ୍କୁ ଆହ୍ୱାନ ଦେଇଛନ୍ତି ଯେ ସେମାନେ ଅନଲାଇନ୍ ଏବଂ ଅଫଲାଇନ୍ ମାଧ୍ୟମରେ ଏହି ବୈଠକରେ ବହୁସଂଖ୍ୟାରେ ଯୋଗ ଦିଅନ୍ତୁ ଏବଂ କେନ୍ଦ୍ର ସରକାରଙ୍କ ଉପରେ ଚାପ ପକାଇବା ପାଇଁ ନିଜର ମତ ରଖନ୍ତୁ। ଆପ୍ ପକ୍ଷରୁ ଏକ ଅନଲାଇନ୍ ପିଟିସନ୍ ମଧ୍ୟ ଜାରି କରାଯାଇଛି ଯେଉଁଥିରେ ପ୍ରାୟ ୨ ଲକ୍ଷରୁ ଅଧିକ ଲୋକ ଦସ୍ତଖତ କରିସାରିଛନ୍ତି।

ନୂଆଦିଲ୍ଲୀ: କେନ୍ଦ୍ର ସରକାର ପ୍ରଶ୍ନପତ୍ର ଲିକ୍ ରୋକିବା ପାଇଁ ଏକ କଠୋର ଆଇନ ଆଣିବାକୁ ଯାଉଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏନେଇ ସୂଚନା ଦେଇଛନ୍ତି ଯେ, ପ୍ରଶ୍ନପତ୍ର ଲିକ୍ ମାମଲାରେ କଠୋର ଦଣ୍ଡବିଧାନ ପାଇଁ ଏକ ବିସ୍ତୃତ ଡ୍ରାଫ୍ଟ ବିଲ୍ ପ୍ରସ୍ତୁତ କରାଯାଇଛି।

ଆଜି ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ଏହି ପ୍ରସ୍ତାବ ଉପରେ ଆଲୋଚନା କରାଯିବ। ଏହାପରେ ଆସନ୍ତା ସପ୍ତାହରେ ସଂସଦରେ ଚାଲିଥିବା ଅଧିବେଶନରେ ଏହି ବିଲ୍ ଆଗତ ହେବା ସହ ଗୃହୀତ ହେବାର ସମ୍ଭାବନା ରହିଛି। ନିଜର ଏକ୍ସ (X) ହ୍ୟାଣ୍ଡେଲରେ ଏକ ଭିଡିଓ ବାର୍ତ୍ତା ଜାରି କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, କ୍ୟାବିନେଟରେ ପ୍ରଶ୍ନପତ୍ର ଲିକ୍ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ପ୍ରଶ୍ନପତ୍ର ଲିକ୍ ଯୋଗୁଁ ଛାତ୍ରଛାତ୍ରୀ ଓ ସେମାନଙ୍କ ପରିବାର ଭୋଗୁଥିବା ଦୁର୍ଦ୍ଦଶାକୁ ନେଇ ପ୍ରଧାନମନ୍ତ୍ରୀ କହିଛନ୍ତି ଯେ, ଗତ ଅଢ଼େଇ ମାସ ମଧ୍ୟରେ କେନ୍ଦ୍ର ସରକାର ଅନେକ ପଦକ୍ଷେପ ନେଇଛନ୍ତି, ଯାହାଫଳରେ ଦୋଷୀମାନଙ୍କୁ ଗିରଫ କରି ଜେଲ ପଠାଯାଇଛି। ସେ କହିଛନ୍ତି, 'ମୁଁ ଜାଣେ ପ୍ରଶ୍ନପତ୍ର ଲିକ୍ ଛାତ୍ରଛାତ୍ରୀ ଓ ସେମାନଙ୍କ ପିତାମାତାଙ୍କୁ ବହୁତ କଷ୍ଟ ଦେଇଥାଏ।' ପରୀକ୍ଷାର୍ଥୀଙ୍କ ଭବିଷ୍ୟତକୁ ସୁରକ୍ଷିତ କରିବା ଦିଗରେ ସରକାରଙ୍କ ପ୍ରାଥମିକତା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ପ୍ରାୟ ୨୨ ଲକ୍ଷ ଛାତ୍ରଛାତ୍ରୀଙ୍କ ପାଇଁ ବିନା ବିଳମ୍ବରେ ପରୀକ୍ଷା ପରିଚାଳନା କରାଯାଇଛି। ଏହାର ଫଳାଫଳ ଜୁଲାଇ ୧୯ ତାରିଖରେ ଘୋଷଣା କରାଯାଇଥିଲା।

ପରୀକ୍ଷାରେ ଅନିୟମିତତା କରୁଥିବା ବ୍ୟକ୍ତିଙ୍କ ପାଇଁ ଫାଷ୍ଟ ଟ୍ରାକ୍ କୋର୍ଟ ଏବଂ କଠୋର ଦଣ୍ଡର ବ୍ୟବସ୍ଥା ଥିବା ଏକ ଦୃଢ଼ ପ୍ରସ୍ତାବ ପ୍ରସ୍ତୁତ କରିବା ପାଇଁ ସେ ବ୍ୟକ୍ତିଗତ ଭାବେ ନିରନ୍ତର କାର୍ଯ୍ୟ କରିଛନ୍ତି ବୋଲି ପ୍ରଧାନମନ୍ତ୍ରୀ ଜୋର୍ ଦେଇ କହିଛନ୍ତି। କ୍ୟାବିନେଟ୍ ସହଯୋଗୀଙ୍କ ପରାମର୍ଶକୁ ଆଧାର କରି ଏହି ପ୍ରସ୍ତାବକୁ ଚୂଡ଼ାନ୍ତ ରୂପ ଦିଆଯିବ। ସୋମବାରଠାରୁ ସଂସଦୀୟ ଅଧିବେଶନର ଦ୍ୱିତୀୟ ସପ୍ତାହ ଆରମ୍ଭ ହେଉଥିବାରୁ ଏହି ବିଲ୍ ଯଥାଶୀଘ୍ର ଗୃହରେ ପାରିତ କରାଇବାକୁ ପ୍ରୟାସ କରାଯିବ ବୋଲି ମୋଦୀ ଦୃଢ଼ୋକ୍ତି ପ୍ରକାଶ କରିଛନ୍ତି। ସୂତ୍ରରୁ ପ୍ରକାଶ ଯେ, ପ୍ରସ୍ତାବିତ ବିଲରେ କଠୋର ଜୋରିମାନା, ଫାଷ୍ଟ ଟ୍ରାକ୍ ସ୍ୱତନ୍ତ୍ର ଅଦାଲତ ମାଧ୍ୟମରେ ସମୟବଦ୍ଧ ବିଚାର ଏବଂ ଏଭଳି ଅପରାଧରେ ସମ୍ପୃକ୍ତ ଅନୁଷ୍ଠାନ ତଥା ବ୍ୟକ୍ତିବିଶେଷଙ୍କ ପାଇଁ ଦୃଢ଼ ଜବାବଦେହିତା ବ୍ୟବସ୍ଥା ସାମିଲ ରହିବ।

ନୂଆଦିଲ୍ଲୀ: ଫାଷ୍ଟ-ଟ୍ରାକ୍ କୋର୍ଟରେ ହେବ ନିଟ୍ ପ୍ରଶ୍ନପତ୍ର ଲିକ୍ ମାମଲାର ଶୁଣାଣି । ଯୁବପିଢିଙ୍କ ଭବିଷ୍ୟତ ସହ ଖେଳୁଥିବା ଲୋକଙ୍କୁ ଛଡ଼ାଯିବନି। ପ୍ରଶ୍ନପତ୍ର ଲିକ୍ ଘଟଣାକୁ ନେଇ ଏଭଳି ଗୁରୁତ୍ବପୂର୍ଣ୍ଣ ଘୋଷଣା ସହିତ ଯୁବପିଢିଙ୍କୁ ବଡ଼ ବାର୍ତ୍ତା ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦେଶରେ ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷାରେ ପେପର ଲିକ୍ ଏବଂ ଅନିୟମିତତାକୁ ନେଇ ବିରୋଧ ପ୍ରଦର୍ଶନ ଜାରି ରହିଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ଦିନ ଏକ ବଡ଼ ଘୋଷଣା କରିଛନ୍ତି। ପେପର ଲିକ୍ ମାମଲାଗୁଡ଼ିକର ଶୀଘ୍ର ବିଚାର ପାଇଁ ଫାଷ୍ଟଟ୍ରାକ୍ କୋର୍ଟ (Fast-track courts) ପ୍ରତିଷ୍ଠା କରାଯିବ ବୋଲି ସେ ପ୍ରକାଶ କରିଛନ୍ତି। ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳୁଥିବା ଦୋଷୀମାନଙ୍କୁ କଠୋର ଦଣ୍ଡ ଦିଆଯିବ ବୋଲି ପ୍ରଧାନମନ୍ତ୍ରୀ ସ୍ପଷ୍ଟ କରିଛନ୍ତି।

ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ' (X) ରେ ଏକ ପୋଷ୍ଟ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ଆମ ଯୁବପିଢ଼ିଙ୍କ କଲ୍ୟାଣ ଏବଂ ଭବିଷ୍ୟତ ଠାରୁ ଅଧିକ ଗୁରୁତ୍ୱପୂର୍ଣ୍ଣ ଆଉ କିଛି ନାହିଁ। ପେପର ଲିକ୍‌ରେ ସମ୍ପୃକ୍ତ ଥିବା ବ୍ୟକ୍ତିମାନଙ୍କୁ ତୁରନ୍ତ ଏବଂ କଠୋର ଦଣ୍ଡ ନିଶ୍ଚିତ କରିବା ପାଇଁ ସରକାର ଫାଷ୍ଟଟ୍ରାକ୍ କୋର୍ଟ ଗଠନ କରିବାକୁ ନିଷ୍ପତ୍ତି ନେଇଛନ୍ତି। ଏହି ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ସେ ସମ୍ପୃକ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ପରୀକ୍ଷା ବ୍ୟବସ୍ଥାରେ ସ୍ୱଚ୍ଛତା ଆଣିବା ଏବଂ ପ୍ରଭାବିତ ଛାତ୍ରମାନଙ୍କୁ ନ୍ୟାୟ ପ୍ରଦାନ କରିବା ସରକାରଙ୍କ ପ୍ରାଥମିକତା ବୋଲି ସେ ଦର୍ଶାଇଛନ୍ତି।

ଦେଶରେ NEET ପରୀକ୍ଷା ଅନିୟମିତତାକୁ ନେଇ କକରୋଚ୍ ଜନତା ପାର୍ଟି (CJP) ନେତୃତ୍ୱରେ ଏବଂ ବିଭିନ୍ନ ବିରୋଧୀ ଦଳର ସମର୍ଥନରେ ଆନ୍ଦୋଳନ ତୀବ୍ର ହେବାରେ ଲାଗିଛି। ବିରୋଧୀମାନେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରିବା ସହ ପରୀକ୍ଷା ପ୍ରକ୍ରିୟାରେ ବ୍ୟାପକ ସଂସ୍କାର ଆଣିବାକୁ ଦାବି କରିଛନ୍ତି। ଏହି ପରିପ୍ରେକ୍ଷୀରେ, ବିରୋଧୀ ଦଳ ନେତା ରାହୁଲ ଗାନ୍ଧୀ ବୁଧବାର ଦିନ ଅଭିଯୋଗ କରିଥିଲେ ଯେ ଗତ ୧୦ ବର୍ଷ ମଧ୍ୟରେ ୧୫୦ ରୁ ଅଧିକ ପେପର ଲିକ୍ ହୋଇଛି, କିନ୍ତୁ ଏହି ମାମଲାଗୁଡ଼ିକରେ ଗୋଟିଏ ବି ଲୋକଙ୍କୁ ଦଣ୍ଡିତ କରାଯାଇ ନାହିଁ।

ଗତ ଜୁଲାଇ ୨୦ ତାରିଖରେ ନୂଆଦିଲ୍ଲୀରେ ଏହି ଆନ୍ଦୋଳନ ଉଗ୍ର ରୂପ ନେଇଥିଲା। ସିଜେପି (CJP) ସମର୍ଥକମାନେ ସଂସଦ ଅଭିମୁଖେ ଶୋଭାଯାତ୍ରା କରିବାକୁ ଉଦ୍ୟମ କରୁଥିବା ବେଳେ ପୋଲିସ ସେମାନଙ୍କୁ କେନ୍ଦ୍ରୀୟ ଦିଲ୍ଲୀ ନିକଟରେ ଅଟକାଇଥିଲା। ଫଳରେ ସୁରକ୍ଷାକର୍ମୀ ଏବଂ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ଦେଖିବାକୁ ମିଳିଥିଲା। ଏହି ଘଟଣା ପରେ ଜାତୀୟ ସ୍ତରର ପରୀକ୍ଷା ପରିଚାଳନାରେ ଅଧିକ ସ୍ୱଚ୍ଛତା ଏବଂ ଉତ୍ତରଦାୟିତ୍ୱ ଆଣିବା ପାଇଁ ରାଜନୈତିକ ବୟାନବାଜି ସହ ଆଇନଗତ ପ୍ରକ୍ରିୟା ଜୋର ଧରିଛି।

ଗୁଜରାଟର ଅହମ୍ମଦାବାଦ ସ୍ଥିତ ଏକ ବେଆଇନ ବାଣ କାରଖାନାରେ ଶନିବାର ଅପରାହ୍ନ ପ୍ରାୟ ୩:୩୦ ମିନିଟ୍ ସମୟରେ ଏକ ଭୟାବହ ବିସ୍ଫୋରଣ ଘଟିଛି। ଏହି ମର୍ମନ୍ତୁଦ ଘଟଣାରେ ଅତିକମ୍‌ରେ ୮ ଜଣଙ୍କର ମୃତ୍ୟୁ ଘଟିଥିବା ବେଳେ ୧୫ରୁ ଊର୍ଦ୍ଧ୍ୱ ଲୋକ ଗୁରୁତର ଆହତ ହୋଇଛନ୍ତି। ରାମୋଲ-ଗାତ୍ରାଡ୍ ରୋଡ୍ (ରାମତୋଲ୍ ଅଞ୍ଚଳ) ରେ ଥିବା ଏହି କାରଖାନାରେ ହଠାତ୍ ନିଆଁ ଲାଗିଯିବା ଫଳରେ ଏହି ବଡ଼ ଧରଣର ବିସ୍ଫୋରଣ ହୋଇଥିଲା। ବିସ୍ଫୋରଣର ଶବ୍ଦ ଏତେ ଭୟଙ୍କର ଥିଲା ଯେ କିଛି କିଲୋମିଟର ପର୍ଯ୍ୟନ୍ତ ଏହାର ପ୍ରକମ୍ପନ ଅନୁଭୂତ ହୋଇଥିଲା।

ବେଆଇନ ଭାବେ ଚାଲିଥିଲା କାରଖାନା

ମିଳିଥିବା ସୂଚନା ଅନୁଯାୟୀ, ଉକ୍ତ ବାଣ କାରଖାନାଟି ବେଆଇନ ଭାବେ ପରିଚାଳିତ ହେଉଥିଲା। ପୂର୍ବରୁ ଏହାର ଲାଇସେନ୍ସ ବାତିଲ କରାଯାଇଥିଲେ ସୁଦ୍ଧା ମାଲିକ ମେହୁଲ ଦୋଡିୟା ଏହାକୁ ବେଆଇନ ଭାବେ ଚଳାଉଥିଲେ। ବିସ୍ଫୋରଣ ସମୟରେ କାରଖାନା ଭିତରେ ବହୁ ଶ୍ରମିକ କାମ କରୁଥିଲେ। ଖବର ପାଇବା ମାତ୍ରେ ନିକଟରେ ଥିବା ବସ୍ତ୍ରାଲ୍ ରାପିଡ୍ ଆକ୍ସନ୍ ଫୋର୍ସ (RAF) ର ଯବାନମାନେ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ପରେ ଅଗ୍ନିଶମ ବାହିନୀର ୫ରୁ ଅଧିକ ଗାଡ଼ି ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା।

ପ୍ରଧାନମନ୍ତ୍ରୀଙ୍କ ଶୋକ ଓ ଅନୁକମ୍ପାମୂଳକ ସହାୟତା ରାଶି ଘୋଷଣା

ଏହି ଅଘଟଣକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଭୀର ଶୋକ ପ୍ରକାଶ କରିଛନ୍ତି। ସେ ନିଜର ଏକ୍ସ (X) ହ୍ୟାଣ୍ଡେଲରେ ପୀଡ଼ିତ ପରିବାର ପ୍ରତି ସମବେଦନା ଜଣାଇବା ସହ ଆହତମାନଙ୍କର ଆଶୁ ଆରୋଗ୍ୟ କାମନା କରିଛନ୍ତି। ଏହା ସହିତ ପ୍ରଧାନମନ୍ତ୍ରୀଙ୍କ ଜାତୀୟ ରିଲିଫ୍ ପାଣ୍ଠି (PMNRF) ରୁ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଏବଂ ଆହତମାନଙ୍କୁ ୫୦,୦୦୦ ଟଙ୍କା ଲେଖାଏଁ ସହାୟତା ରାଶି ପ୍ରଦାନ କରିବାକୁ ଘୋଷଣା କରାଯାଇଛି। ସ୍ଥାନୀୟ ପ୍ରଶାସନ ପକ୍ଷରୁ ପ୍ରଭାବିତ ଲୋକଙ୍କୁ ସମସ୍ତ ପ୍ରକାର ସମ୍ଭାବ୍ୟ ସହାୟତା ଯୋଗାଇ ଦିଆଯାଉଥିବା ପ୍ରଧାନମନ୍ତ୍ରୀ କହିଛନ୍ତି।

ପୋଲିସର ତଦନ୍ତ ଜାରି

ଉଦ୍ଧାର ହୋଇଥିବା ଗୁରୁତର ଆହତମାନଙ୍କୁ ଚିକିତ୍ସା ପାଇଁ ତୁରନ୍ତ ଏଲ୍.ଜି. ହସ୍ପିଟାଲ୍ ଏବଂ ଆସାରୱା ସିଭିଲ୍ ହସ୍ପିଟାଲ୍ ରେ ଭର୍ତ୍ତି କରାଯାଇଛି। ପୋଲିସ ଏବଂ ଫୋରେନ୍ସିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। କାରଖାନା ମାଲିକଙ୍କ ବିରୋଧରେ 'ବିସ୍ଫୋରକ ଆଇନ' (Explosives Act) ଅଧୀନରେ ଅପରାଧିକ ମାମଲା ରୁଜୁ କରାଯାଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବରିଷ୍ଠ ପୋଲିସ ଅଧିକାରୀ ସୂଚନା ଦେଇଛନ୍ତି।

ନୂଆଦିଲ୍ଲୀ: ଭେନେଜୁଏଲାରେ ଲଗାତାର ଦୁଇଟି ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ଏହି ପ୍ରାକୃତିକ ବିପର୍ଯ୍ୟୟରେ ବ୍ୟାପକ କ୍ଷୟକ୍ଷତି ଘଟିଥିବା ବେଳେ ବହୁ କୋଠା ଭୁଶୁଡ଼ି ପଡ଼ିଛି। ଯୁକ୍ତରାଷ୍ଟ୍ର ଆମେରିକାର ଭୂବିଜ୍ଞାନ ସର୍ବେକ୍ଷଣ ସଂସ୍ଥା (USGS) ଅନୁଯାୟୀ, ପ୍ରଥମ ଭୂମିକମ୍ପଟି ୭.୨ ତୀବ୍ରତା ରହିଥିଲା ଏବଂ ଏହା ରାଜଧାନୀ କାରାକାସ୍ ଠାରୁ ୨୮୪ କିଲୋମିଟର ପଶ୍ଚିମରେ ଥିବା ସାନ୍ ଫେଲିପେ ନିକଟରେ ଅନୁଭୂତ ହୋଇଥିଲା। ଏହାର ଠିକ୍ ପରେ ପରେ ୭.୫ ତୀବ୍ରତାର ଅନ୍ୟ ଏକ ଭୂମିକମ୍ପ ରାଜଧାନୀରୁ ୨୯୩ କିଲୋମିଟର ଦୂର ୟୁମାରେ ଅଞ୍ଚଳରେ ଅନୁଭୂତ ହୋଇଥିଲା। USGS ଆକଳନ ଅନୁଯାୟୀ ଏହି ବିପର୍ଯ୍ୟୟରେ ମୃତ୍ୟୁସଂଖ୍ୟା ୧୦,୦୦୦ ରୁ ୧,୦୦,୦୦୦ ମଧ୍ୟରେ ରହିପାରେ।

ଏହି ଘଟଣାରେ ଗଭୀର ଶୋକ ପ୍ରକାଶ କରିଛନ୍ତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ସେ ସୋସିଆଲ୍ ମିଡିଆ ପ୍ଲାଟଫର୍ମ 'X' ରେ ଲେଖିଛନ୍ତି ଯେ, ଏହି କଷ୍ଟକର ସମୟରେ ଭାରତବାସୀ ଭେନେଜୁଏଲାର ଲୋକଙ୍କ ସହ ଛିଡ଼ା ହୋଇଛନ୍ତି। ପ୍ରାଣ ହରାଇଥିବା ଲୋକଙ୍କ ପରିବାର ପ୍ରତି ସମବେଦନା ଜଣାଇବା ସହ ଭାରତ ସମସ୍ତ ପ୍ରକାର ସମ୍ଭାବ୍ୟ ସହାୟତା ଯୋଗାଇଦେବାକୁ ପ୍ରସ୍ତୁତ ଥିବା ପିଏମ୍ ମୋଦୀ ପ୍ରତିଶ୍ରୁତି ଦେଇଛନ୍ତି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ତୁରନ୍ତ ସହାୟତା ଯୋଗାଇଦେବାକୁ ଘୋଷଣା କରିଛନ୍ତି। ଟ୍ରୁଥ୍ ସୋସିଆଲ୍ (Truth Social)ରେ ଏକ ପୋଷ୍ଟ କରି ସେ କହିଛନ୍ତି ଯେ ଆମେରିକୀୟ ସରକାରୀ ସଂସ୍ଥାଗୁଡ଼ିକୁ ତୁରନ୍ତ ଉଦ୍ଧାର କାର୍ଯ୍ୟରେ ସାହାଯ୍ୟ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଅନ୍ୟପକ୍ଷରେ, ଭେନେଜୁଏଲାର କାର୍ଯ୍ୟକାରୀ ରାଷ୍ଟ୍ରପତି ଡେଲସି ରୋଡ୍ରିଗେଜ୍ (Delcy Rodriguez) ଦେଶରେ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି ଏବଂ ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି। ଉଦ୍ଧାରକାରୀ ଦଳ ଭଗ୍ନାବଶେଷ ତଳେ ଚାପି ହୋଇ ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ଅଭିଯାନ ଜାରି ରଖିଛନ୍ତି।

ମୟୁରଭଞ୍ଜ: ଓଡିଶାରେ ପହଞ୍ଚିଲେ ପ୍ରଧାନମନ୍ତ୍ରୀ ମୋଦି । ବାୟୁସେନାର ସ୍ୱତନ୍ତ୍ର ବିମାନ MI-17 ହେଲିକପ୍ଟର ଯୋଗେ ମୟୂରଭଞ୍ଜର ପାହାଡ଼ପୁର ହେଲିପ୍ୟାଡ୍‌ରେ ଓହ୍ଲାଇଲେ ପ୍ରଧାନମନ୍ତ୍ରୀ । ଆଜି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ୬୮ତମ ଜନ୍ମଦିନରେ ସାମିଲ ହେବେ ମୋଦି । ପୂର୍ବରୁ ପାହାଡ଼ପୁରରେ ପହଞ୍ଚି ସାରିଛନ୍ତି ରାଷ୍ଟ୍ରପତି ଶ୍ରୀମତୀ ମୁର୍ମୁ। ନିଜ ଜନ୍ମଭୂମିରେ ଜନ୍ମଦିନ ପାଳନ କରୁଥିବା ମହାମହିମଙ୍କୁ ଶୁଭେଚ୍ଛା ଜଣାଇବା ସହ ସାକ୍ଷାତ କରିବାକୁ ଓଡ଼ିଶାରେ ପହଞ୍ଚିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । 

ଆଜି ମୟୂରଭଞ୍ଜର ବିଭିନ୍ନ କାର୍ଯ୍ୟକ୍ରମରେ ରାଷ୍ଟ୍ରପତିଙ୍କ ସହ ଯୋଗଦେବେ ପ୍ରଧାନମନ୍ତ୍ରୀ । ରାଷ୍ଟ୍ରପତିଙ୍କ ସହ ପାହାଡ଼ପୁର ଗ୍ରାମ ପରିଦର୍ଶନ କରିବେ ପ୍ରଧାନମନ୍ତ୍ରୀ । ଏହାପରେ ଉଭୟ ନେତୃତ୍ୱ ପବିତ୍ର ସାନ୍ତାଳୀ ଜାହେରା ଏବଂ ହୋ ଜାହେରା, ଦକ୍ଷତା କେନ୍ଦ୍ର ଏବଂ ପାହାଡ଼ପୁର ସ୍କୁଲରେ ପ୍ରାର୍ଥନା କରିବେ। ଏହି ଗସ୍ତ ଆଦିବାସୀ ବହୁଳ ଅଞ୍ଚଳ ତଥା ଗ୍ରାମାଞ୍ଚଳରେ ଶିକ୍ଷାଗତ ସୁଯୋଗ, ଦକ୍ଷତା ବିକାଶ ଏବଂ ସାମାଜିକ-ଆର୍ଥିକ ସଶକ୍ତୀକରଣକୁ ସୁଦୃଢ଼ କରିବା ପାଇଁ ଚାଲିଥିବା ପ୍ରୟାସ ଉପରେ ଆଲୋକପାତ କରିବ ବୋଲି ଆଶା କରାଯାଉଛି। ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ଗରିମାମୟ ଉପସ୍ଥିତି ରାଇରଙ୍ଗପୁର ତଥା ମୟୂରଭଞ୍ଜ ଜିଲାବାସୀଙ୍କ ପାଇଁ ଏକ ସ୍ବର୍ଣ୍ଣିମ ଇତିହାସ।

ନୂଆଦିଲ୍ଲୀ/ଭୁବନେଶ୍ୱର: ଆଉ କିଛି ସମୟ ପରେ ଓଡ଼ିଶାରେ ପହଞ୍ଚିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ତାଙ୍କ ସହ ଏହି ଗସ୍ତରେ ସାମିଲ ହେବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ମୟୂରଭଞ୍ଜ ଜିଲ୍ଲାର ରାଇରଙ୍ଗପୁରଠାରେ ଆୟୋଜିତ ଏକ ବିଶାଳ ସମାରୋହରେ ଦେଶର ଶୀର୍ଷ ଦୁଇ ସାମ୍ବିଧାନିକ ପଦାଧିକାରୀ ଏକାଠି ଯୋଗଦେବେ, ଯାହା ଓଡ଼ିଶା ପାଇଁ ଗର୍ବର ବିଷୟ ହୋଇଛି। ଏହି ମିଳିତ ଗସ୍ତ ଓଡ଼ିଶାର ରାଜନୈତିକ ଏବଂ ବିକାଶମୂଳକ ଦୃଶ୍ୟପଟ୍ଟକୁ ଜାତୀୟ ସ୍ତରରେ ଆହୁରି ମଜବୁତ କରିବ ବୋଲି ଆଶା କରାଯାଉଛି। ୪୭ ହଜାର କୋଟିରୁ ଅଧିକ ଟଙ୍କାର ପ୍ରକଳ୍ପର ଶିଳାନ୍ୟାସ ଓ ଲୋକାର୍ପଣ କରିବେ ପ୍ରଧାନମନ୍ତ୍ରୀ। ଦୁଇ ରାଷ୍ଟ୍ରମୁଖ୍ୟଙ୍କ ଉପସ୍ଥିତିକୁ ନେଇ ଜିଲ୍ଲାବାସୀଙ୍କ ମଧ୍ୟରେ ଉତ୍ସାହ ପରିଲକ୍ଷିତ ହୋଇଛି। 

ଶନିବାର ପୂର୍ବାହ୍ନରେ ପ୍ରଧାନମନ୍ତ୍ରୀ ଏବଂ ରାଷ୍ଟ୍ରପତି ମିଳିତ ଭାବେ ରାଷ୍ଟ୍ରପତିଙ୍କ ଶାଶୂଘର ଗାଁ ପାହାଡ଼ପୁର ପରିଦର୍ଶନ କରିବେ। ସେଠାରେ ଉଭୟ ଅତିଥି ସାନ୍ତାଳୀ ଜାହେରା ଓ ହୋ ଜାହେରାରେ ପୂଜାର୍ଚ୍ଚନା କରିବେ। ଏହାଛଡ଼ା ଦକ୍ଷତା ବିକାଶ କେନ୍ଦ୍ର ଏବଂ ପାହାଡ଼ପୁର ସ୍କୁଲ ମଧ୍ୟ ପରିଦର୍ଶନ କରିବାର କାର୍ଯ୍ୟକ୍ରମ ରହିଛି। ଆଦିବାସୀ ଓ ଗ୍ରାମାଞ୍ଚଳରେ ଶିକ୍ଷା, ଦକ୍ଷତା ବିକାଶ ଏବଂ ସାମାଜିକ-ଅର୍ଥନୈତିକ ସଶକ୍ତୀକରଣକୁ ବୃଦ୍ଧି କରିବା ଏହି ଗସ୍ତର ଅନ୍ୟତମ ମୁଖ୍ୟ ଉଦ୍ଦେଶ୍ୟ।

ଅପରାହ୍ନ ପ୍ରାୟ ୧ଟା ସମୟରେ ରାଇରଙ୍ଗପୁରଠାରେ ରାଜ୍ୟ ସରକାରଙ୍କ ଦୁଇ ବର୍ଷ ପୂର୍ତ୍ତି ଉପଲକ୍ଷେ "ବିକାଶର ଧାରା, ଓଡ଼ିଶା ସାରା" ଶୀର୍ଷକ କାର୍ଯ୍ୟକ୍ରମ ଅନୁଷ୍ଠିତ ହେବ। ସରକାରୀ ସୂତ୍ର ଅନୁଯାୟୀ, ଏହି ଅବସରରେ ୪୭,୬୦୦ କୋଟି ଟଙ୍କାରୁ ଅଧିକ ବ୍ୟୟବରାଦରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରାଯିବ। ପ୍ରଧାନମନ୍ତ୍ରୀ ମୋଦୀ ରାଇରଙ୍ଗପୁରଠାରେ ଆୟୋଜିତ ଏକ ବିଶାଳ ଜନସଭାକୁ ମଧ୍ୟ ଉଦବୋଧନ ଦେବେ। ଦୁଇ ଭିଭିଆଇପିଙ୍କ ଗସ୍ତକୁ ଦୃଷ୍ଟିରେ ରଖି ଓଡ଼ିଶା ପୋଲିସ ପକ୍ଷରୁ ରାଇରଙ୍ଗପୁର ଓ ଆଖପାଖ ଅଞ୍ଚଳରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଉଲ୍ଲେଖଯୋଗ୍ୟ ଯେ, ରାଷ୍ଟ୍ରପତି ମୁର୍ମୁ ତାଙ୍କ ଦୁଇ ଦିନିଆ ଓଡ଼ିଶା ଗସ୍ତର ଅଂଶସ୍ୱରୂପ ଶୁକ୍ରବାର ସନ୍ଧ୍ୟାରୁ ନିଜ ଜିଲ୍ଲା ମୟୂରଭଞ୍ଜରେ ପହଞ୍ଚିଛନ୍ତି।