ନୂଆଦିଲ୍ଲୀ: ବିକ୍ରି ହୋଇଛି ଭାରତୀୟ ଜୀବନ ବୀମା ନିଗମ (ଏଲ୍‌ଆଇସି)ର ଅଂଶଧନ। ଅଫର ଫର୍ ସେଲ୍ (ଓଏଫ୍‌ଏସ୍‌) ଜରିଆରେ ବୀମା କମ୍ପାନୀର ୬.୫% ଅଂଶଧନ ବିକ୍ରି କରିଛନ୍ତି କେନ୍ଦ୍ର ସରକାର। ସୂଚନାଯୋଗ୍ୟ ଯେ, ଏ ପର୍ଯ୍ୟନ୍ତ ଏଲ୍‌ଆଇସିରେ ସରକାରଙ୍କର ୯୬.୫% ଅଂଶଧନ ରହିଥିଲା, ଯେତେବେଳେ କି ସର୍ବସାଧାରଣଙ୍କର କେବଳ ୩.୫% ଅଂଶଧନ ଥିଲା।  ଓଏଫ୍‌ଏସ୍‌ରେ ୩୧,୫୫୨ କୋଟି ଟଙ୍କା ମୂଲ୍ୟର ମୋଟ ୮୨ କୋଟିରୁ ଅଧିକ ସେୟାର ଆବଣ୍ଟିତ କରାଯାଇଥିଲା। ତେବେ ଏଲ୍‌ଆଇସିରେ ଥିବା ସରକାରଙ୍କ ଅଂଶଧନକୁ ବଡ଼ ରିଆତି ମୂଲ୍ୟରେ ବିକ୍ରି କରାଯାଇଥିବା ଜଣାପଡିଛି। ବିକ୍ରି ପାଇଁ ସରକାର ଆଣିଥିବା ଏହି ଅଫର ଫର୍ ସେଲ୍‌କୁ ବମ୍ପର ସବସ୍କ୍ରିପସନ ମିଳିଛି। ହେଲେ ଅଂଶଧନ ବିକ୍ରି ପରେ ଏଲ୍‌ଆଇସିର ସେୟାର ମୂଲ୍ୟରେ ୯% ହ୍ରାସ ଘଟିଛି।

ଅଫର ଫର୍ ସେଲ୍‌ରେ ଏଲ୍‌ଆଇସିର ସେୟାର ପିଛା ମୂଲ୍ୟ ୩୮୨ ଟଙ୍କା ଧାର୍ଯ୍ୟ କରାଯାଇଥିଲା,ଯେତେବେଳେ କି ଓଏଫ୍‌ଏସ୍‌ ଘୋଷଣା ପୂର୍ବରୁ ଏହାର ସେୟାର ପିଛା ମୂଲ୍ୟ ୪୨୮.୫୦ ଟଙ୍କା ରହିଥିଲା। ଏଥିରୁ ସ୍ପଷ୍ଟ ଭାବେ ଜଣାପଡୁଛି ଯେ, ସରକାର ଏଲ୍‌ଆଇସିର ଅଂଶଧନକୁ ୧୦.୯% କମ୍‌ ମୂଲ୍ୟରେ ବିକ୍ରି କରିଛନ୍ତି। ଏହି ସେଲ୍‌ ଜରିଆରେ ସରକାରଙ୍କୁ  ୩୧,୫୫୨ କୋଟିରୁ ଅଧିକ ଟଙ୍କାର ରାଜସ୍ବ ମିଳିଛି। ଏଲ୍‌ଆଇସି ଅଂଶଧନ ବିକ୍ରି ପାଇଁ ପ୍ରସ୍ତାବିତ ଓଏଫ୍‌ଏସ୍‌ ଦୁଇ ଦିନ ମଧ୍ୟରେ ସମାପ୍ତ ହୋଇଛି। ପ୍ରାରମ୍ଭରେ କମ୍ପାନୀର ୨.୫% ଅଂଶଧନ ବ୍ରିକି ଯୋଜନା ରଖାଯାଇଥିବାବେଳେ ପରେ ଏହାକୁ ୬.୫% ଯାଏ ବୃଦ୍ଧି କରାଯାଇଛି। ସୂଚନାଯୋଗ୍ୟ ଯେ, ଶେଷ ପର୍ଯ୍ୟନ୍ତ ସରକାର ଏଲ୍‌ଆଇସିରୁ କେତେକ ପ୍ରତିଶତ ଅଂଶଧନ ବିକ୍ରି କରିବେ ତାହାକୁ ସାର୍ବଜନୀନ କରି ନ ଥିଲେ। ଶେଷରେ ଏହି ସେଲ୍‌କୁ ନିବେଶକମାନଙ୍କଠାରୁ ବେଶ ଭଲ ପ୍ରତିକ୍ରିୟା ମିଳିଛି।  ଅଫର ଫର୍ ସେଲ୍ (ଓଏଫ୍‌ଏସ୍‌) ମାଧ୍ୟମରେ ଏଲ୍‌ଆଇସିର ସେୟାର କମ୍ ମୂଲ୍ୟରେ ଉପଲବ୍ଧ ହେବା ଜଣାପଡିବା ପରେ, ଖୋଲା ବଜାରରେ କ୍ରୟ ମନ୍ଥର ହୋଇଯାଇଥିଲା, ଯାହା ଫଳରେ ସେୟାର ମୂଲ୍ୟ ଓଏଫ୍‌ଏସ୍‌ ମୂଲ୍ୟର ନିକଟତର ହୋଇଥିଲା।  ଏଲ୍‌ଆଇଇସିର ଏହି ଅଫର ଫର୍ ସେଲ୍‌ରେ ସରକାର ‘ଗ୍ରୀନ୍ ସୁ ଅପ୍‌ସନ୍‌‘ ବ୍ୟବହାର କରିଛନ୍ତି।

ନୂଆଦିଲ୍ଲୀ: ସୋମବାର ଭାରତୀୟ ଜୀବନ ବୀମା ନିଗମ (ଏଲଆଇସି) ଶେୟାର ୬୬୮.୨୦ ଟଙ୍କାରେ ବନ୍ଦ ହୋଇଛି। ଶେୟାର ମୂଲ୍ୟ ହ୍ରାସ ପଛର ବଡ କାରଣ ହେଉଛି ଆଙ୍କର ନିବେଶକଙ୍କ ଲକ-ଇନ ଅବଧି ଶେଷ ହେବା । ଏହାର ଅର୍ଥ ଏଲଆଇସିର ଇସ୍ୟୁରେ ନିବେଶ କରିଥିବା ଆଙ୍କର ନିବେଶକମାେନ ଏବେ ନିଜର ଶେୟାର ବିକ୍ରି କରିପାରିବେ। ଦ୍ୱିତୀୟ କାରଣ ଗତକାଲି ଶେୟାର ବଜାର ତଳମୁହାଁ ହେବା। ଏଥିଯୋଗୁ ଆଜି ସେନ୍‌ସେକ୍ସ ୧୪୫୬ ପଏଣ୍ଟ ତଳକୁ ଖସିଛି।

ଏଲଆଇସିର ଶେୟାର ତାଲିକାଭୁକ୍ତ ହେବା ପରଠାରୁ ୨୯ ପ୍ରତିଶତ ତଳକୁ ଖସିସାରିଛି। ଏହିପରି ଲିଷ୍ଟିଂ ପରେ ସବୁଠୁ ଅଧିକ ତଳକୁ ଖସିଥିବା ଏହା ଏସିଆର ଦ୍ୱିତୀୟ ଶେୟାର ହୋଇଛି। ଏହି ମାମଲାରେ ଏବେବି ପ୍ରଥମ ସ୍ଥାନରେ ଦକ୍ଷିଣ କୋରିଆର କମ୍ପାନୀ ଏଲ୍‌ଜି ଏନର୍ଜୀ ସଲ୍ୟୁସନ୍‌ ରହିଛି। ଏହାର ଶେୟାର ମୂଲ୍ୟ ଲିଷ୍ଟିଂ ପରଠୁ ୩୦ ପ୍ରତିଶତରୁ ଅଧିକ ତଳକୁ ଖସିସାରିଛି। ସୋମବାର ସକାଳେ ଏଲଆଇସିର ଶେୟାର ମୂଲ୍ୟ ୭୦୦ ଟଙ୍କାରୁ କମ୍‌ ଅର୍ଥାତ ୬୯୧ ଟଙ୍କାରେ କାରବାର ଆରମ୍ଭ କରିଥିଲା। କାରବାର ବନ୍ଦ ସମୟରେ ଏଥିରେ ୫.୮୫ ପ୍ରତିଶତ ହ୍ରାସ ହୋଇ ବିଏସ୍‌ଇରେ ୬୬୮.୨୦ ଟଙ୍କାରେ ବନ୍ଦ ହୋଇଥିଲା। ସୋମବାର କ୍ରମାଗତ ଭାବେ ୧୦ମ ଦିନରେ ଏଲଆଇସିର ଶେୟାର ନିମ୍ନଗାମୀ ହୋଇ ବନ୍ଦ ହୋଇଛି। ସୋମବାର ଏଲଆଇସିର ବଜାର ପୁଞ୍ଜି ହ୍ରାସ ହୋଇ ୪.୨୨ ଲକ୍ଷ କୋଟି ଟଙ୍କା ହୋଇଥିଲା। ଏହାସହ ଦେଶର ସବୁଠୁ ଅଧିକ ମୂଲ୍ୟବାନ ଥିବା ଶୀର୍ଷ କମ୍ପାନୀ ତାଲିକାରୁ ଏଲ୍‌ଆଇସି ବାହାର ହୋଇଯାଇଛି। ଏଲ୍‌ଆଇସି ଏବେ ଏହି ସୂଚୀରେ ଷଷ୍ଠ ସ୍ଥାନରେ ରହିଛି। ଲିଷ୍ଟିଂ ହେବା ପରଠାରୁ ଆଜି ଯାଏ ଏହି ଶେୟାର ନିବେଶକଙ୍କ ୧.୭ ଲକ୍ଷ କୋଟି ଟଙ୍କା ବୁଡାଇ ସାରିଛି । ମେ’ ୧୭ରେ ଏଲଆଇସିର ଶେୟାର ପୁଞ୍ଜି ବାଜାରରେ ତାଲିକାଭୁକ୍ତ ହୋଇଥିଲା। ସେହି ସମୟରେ ଏହାର ବଜାର ପୁଞ୍ଜି ୬ ଲକ୍ଷ କୋଟି ରହିଥିଲା। ଏହା ଦେଶର ପଞ୍ଚମ ସବୁଠୁ ବଡ଼ କମ୍ପାନୀ ଥିଲା।